رواية اسألي عني الليالي الفصل الثامن 8 - بقلم رقية جاسم

قناة التليگرام

حساب الانستگرام

الــبــارت الــســابــع..............

العصرية صارتلي شغلة ضرورية واضطريت اطلع.. ضليت من شغلة لشغلة ماانهديت.. رحت للعمارة انه وبعد چم واحد.. جبنا شغلات للزرع ورجعت.. بعد سلمتهم كلشي ورحت للبيت .. أول ماطبيت اشوف الوجوه مصوفرة.. هدى مااجت استقبلتني.. تفاجئت ..
محيي : يمة هدى وين..
الحجية غادة : ماادري ..
عيوني نطت من مكنها : شنيييي..

اجت يمي كمشتني من ايدي وتعاينلي بخوف : يمة وداعة طولك ماادري وينها.. شو احنا كعدنا الصبح ندور عليها ماهي.. چن فحص ملح وذاب..
محيي : خاف يم أمها.. بس ماتطلع بدون ماتعلمني..
الحجية غادة : لا ماهي هناك.. انه دزيت رافد لبيتهم گايلتله ماجايتني البت عدكم..

جريت ايدي منها وطلعت بالسيارة لبيت أمها.. هسه تطلع هناك انه متأكد.. هاي توزها وتضوجها بحچيها.. بس گلبي غدى نار وين راحت.. مااريد ماضي أم حامد يصيرلي وانه معلي.. وصلت للبيت لگيته مضروب زنجيل ومقفول.. كلت خافت وقفلته.. دگيت الباب طلعلي واحد جوارينهم رجال چبير بالعمر..
- : تفضل وليدي..
محيي : حجي أهل البيت وين..
- : والله ماندري.. على غفلة طلعوا اليوم الصبح..
محيي : منو ومنو..
- : ماشفنا بس الأماية طالعة..
صفنت علي وسكتت ماحچيت.. ركبت السيارة ورجعت بس أمشي بطيئ.. بلچن اشوفها دتتمشى.. عسى ماتروح لبغداد بس المهم اجيبنها..

رجعت للبيت لكيت ابوي وخواني كلهم جايين..
شامخ : ها بشر وينها..
محيي : مو يم أمها.. اصلا شايلين محد يعرف عنهم شي..
شامخ : صدك چذب.. البت تطلع من دارها محد يدري وينها شني هاي..
محيي : بوية هي فقيرة.. ماتطلع وحيدها اخذها مني..
شامخ : اي قابل مانعرفها.. بس شوف ياهي وازتها..

رأسا اجت ببالي مرة كاظم.. انداريت عليها حاچيتها وتعاركت وياها.. هي عصبية وتخرط كلشي.. كلت اذا هي السبب حتحچي واعرف منها..
جنة : عمي وداعة عقيل وكاظم.. وداعة عرضي مااعرف عنها شي.. صار يومين ماجاية لداركم وروح ابوي..
محيي : چذابة.. انتي تكرهيها تردين تهججيها..
جنة : صح اضوجن منها بس مااريد يصير هيج..
محيي : چا طبي القرآن.. مااصدگنج انه لو ماادري شيصير..
شامخ : لا ماتكمشه.. ليش هو القرآن سهل وتحلف بي..
محيي : بوية وهدى.. شمالكم يمعودين هدى وين.. هيج خليتها وطلعت رجعت لكيتها ضايعة.. سنااااء ماشفتيها دخيل ربج وين راحت..
سناء : لا والله خوية ماشفتها.. احنا البارحة چنا بالحديقة ماكو شي.. اندري شصار..

عاينتلهم وسكتت.. همزين محد ببيتنا بس اهلنا ماكو گرابة ابوي.. لو يعرفون هسه يطششون السالفة ومرة ابن الشيخ شاردة.. چا غير العگل تصير جوه القنادر..

طلعت من البيت ادورها بالحلال.. خرته خور شبر شبر.. بلچن الله طالعة ومتيهة.. هي تضيع بي.. مرة همات جبتها وتيهت بالگوة لكيتها.. ضليت افرفر بطني گامت تگرصني والجو غورب.. رجعت كلت خاف رجعت.. لكيتها ماكو.. راسي كام يوجعني وگلبي يدك ببطؤ.. وين راحت دخيلك يالله.. صعدت فوك فركشت الكنتور.. قطعة هدوم وحدة مامشيولة من مكانها .. الذهب بمكانه.. حتى شفتها مرتبة الچرباية ومخلية فرشة جديدة.. ضليت بالغرفة وأفتش بيها عسى اكو شي منها يوصلني عليها..

ابوي ماقبل نخبر الشرطة وانه همات مااقبل.. رأسا حيطش الخبر ونصير بالحضيض.. بس گتلهم عساس أخذتها لبيت جدها ببغداد.. مانمت الليل بس أفكر راسي غدى طبل..

ثاني يوم من الصبح طلعت لجارة (جوارين) هدى انه وعم ابوي ازهر هو هذا الوحيد يثق بي ثقة عمياء.. دكيت الباب واستقبلني .. بعد سلام وكلام فتحت الموضوع..
محيي : عمي انت بگد ابوي ويمكن اكبر.. اعتبرتي ابنك.. اذا تعرف أم هدى وين راحت انطيني خبر يرحم اهلك..
- : عمي والله أخافن.. وانه رجال عندي بنيات حديثات يروحن للمدرسة.. شمدريني شيصير اذا حچيت..
محيي : بس احچي انت وبعد كلشي يمي والله مااذكر اسمك ولا نريد نسويها ثارات ومشاكل..
- : احچيلك.. شفت دمك محترك عليها وگلبي وجعني عليك..
محيي : الله يسلم گلبك.. فهمني..
- : بنتي الوسطانية دتطلع للمدرسة وشايفة هدى بالباب وي أمها.. لابسة عباية ورافعة البوشية وتبچي.. أمها طلعت گرصتها تريد تسكتها وزنجلت الباب.. وراها اجه رجال حواجبه معگودة وهزيل أخذ هدى.. انه عبالي عمها لو خالها مااذكر زين بس هاليجي ببالي چنت ادري عدها خال واحد.. عاد ماادري هذا اهو يا لا.. عاد نزلت البوشية طلعن بالعجل..

محيي : عمي متأكد الله يسلمك..هي ماگايلتلي عندي خال..
- : يشهد ربي علي انه هذا الأعرفنه وگلت الك.. بعد انت تأكد بطريقك شوف شون..
ازهر : خوية أم هدى ماحچت وياكم شي.. بعد تعرف انتم جارة وتسيرون واحد ع اللاخ..
- : لا والله.. صارلها چم يوم ماتطلع.. حتى ام نبأ (مرته) فگدتها وراحتلها..

ضليت كاعد احاچي وشفته صادگ بحچيه.. أخذت مواصفات الرجال الچان وياهم..بس هذا الأعرفه عنهم بعد انگطع كلشي.. طلعت من يمهم ورجعت للبيت انطيت خبر لأبوي.. وبنفس اليوم رحت للسيطرة التطلع للعمارة وفوك.. حاچيت الضابط تلث نجمات.. كتله نسوان ثنين مبوشات ورجال وياهن .. هذني أمهات البوشية الواحد ينتبه عليهن ويبقن بباله فلهالسبب سألته..
- : لا خويي ماشفنا هيج سيارة فاتت..يمتى الوكت الطلعوا بي البصرة..
محيي : الصبح البارحة..
- : انه چنت واكف البارحة تحديدا الصبح..وماشفت..
محيي : مشكور سيدي ..
- : ليش ماتسوي دعوة بالمركز مال اختفاء..
محيي : مااكدر سيدي.. الموضوع يخص شرفي..

سكت بعد هو خوما يجبرني.. خليت ورجعت.. الغرفة ماصعدتلها بس كاعد جوه.. قاسم ولواء وكاظم كلساع واحد طاب وطالع الوي يدزهم لفلان مكان يشوفون بلچن واحد من الوادم شايفهن.. هسه حتلو اريد اسأل عن هذا الرجال الوياهن مااكدر.. لا عندي اسمه ولا اكو صلة گرابة بيناتنا..

مرن تلث أيام من أظلم أيام حياتي.. بالليل اصفن بيني وبين روحي.. محيي خاف ضوجتها انت.. بس هي ماتضوج منك.. انه علمتها وكبرتها.. خليتها باليوم الواحد تنضج شهور.. فكرًا مو عمرا ..حتى علمتها تقره وتكتب كشي بدائي.. تكعد يمي لمن اقره وتضل صافنة ماتعرف الأحرف فدرستها.. اجه ابوي يمي شافني كاعد يم الفانوس ومتچي راسي على ايدي..
شامخ : ماتكوم تناملك شوي بوية مايصير هيج..
محيي : وهدى..شون انام وهي ماكو.. وين راحت البت..
شامخ : هاي شوفة عينك.. داادور وياك وماخليت مكان بالبصرة يعتب علينا..
عاينتله ومخنوووك حد گطع النفس : يعني وينها..
شبگني بدون مايحچي.. انه همات اكتفيت بالسكوت..

مرت الأيام نفس الشي.. حاولنا هواي.. دورنا بكل مكان.. رحت لبغداد مرتين.. اتمشى بالشوارع عسى اشوفها حتلو صدفة.. مااكتلها ولا أمد ايدي عليها التوبة من ذيج المرة.. بس اريد أعرف اخبارها..
الى أن رجعت الفجر للبيت لكيت ابوي يصفگ بإيده بقلق ويروح ويرجع .. اجيت طمنته وبالگوة واكف نعسان منتهي.. صعدت فوك فتحت الشباچ طاحت منه ورقة رسم.. يعني بيضة بدون خطوط..

نزلت اخذتها.. خط هدى.. اي خطها دخيلك يالله.. اكو كلمات مامفهومة مكتوبة بخط ماحلو وناقصة حرف لو حرفين بس حاولت أجمعها..
- : ماكدرت اروح بدون مااخليلك شي مني وأبقيك حاير.. انه حروح محيي.. أمي چانت تحاول تجبرني ابوگ الذهب وانطيهيا.. حتى الفلوس.. علمود يجي اليوم الأعوفك واروح مثل ما اجه هسه .. بس انه اشوفك تتعب وتجي تنام رأسا اكول حريمة ابوگنه وهو مامقصر وياي.. حباب سامحني فدوة ابوس ايدك.. انه احبنك واموتن عليك وروح ابوي.. بس أمي خوانها جابرينها تجي يمهم وتجيبني وياها لو يكتلوها چي تزوجت وره وفاة ابوي..بس احنا حنروح للمكان العايش رجل أمي مااكدر اگلك وين.. احبنك بس احبن أمي ومااريدنها تموت.. انه ماارجع بعد ابد.. اسفة سامحني..

ضليت اتصافگ واگلب بالورقة مامصدك هاي هدى كاتبة هيج.. ماكرهتها ولا نقص حبها.. بس مقهور ع الفشلة الأنحطيت بيها.. مرتي تروح مني وبداخلها هواي حچي ماادري بي.. چنت تاركها على راحتها ماردت اجبرها تحچي خاف تضوج.. كعدت بالگع وساكت.. چا انه صارلي عشرين يوم ماشايف النوم وادور عليج تالي تطلعين رايحة لخاطر امج.. ضليت انتظر لحدما طلعت الشمس ونزلت اخذت أمي وابوي على صفحة خليت الورقة بيده يقراها..
رفع راسه وعاينلي بعصبية : هي هاي الخبصتني بيها..
محيي : بوية جبرتها أمها الگح... هي ماتسوي هيج.. ربت يمي وجوه جناحي..
شامخ : المرة التخون راعيها لاتعتبرها مرة بعد.. چا احنا حايرين بزماننا نريد نشوف وين ولت تالي تطلع رايحة براحتها وبرضاتها.. باچر تنصب الفاتحة لشوكت نضل نستر ع الموضوع..
محيي : ليش بوية تدفنها وهي عايشة حريمة..
شامخ : وك هاي دفنت راسك بالسيان.. شو ماكالت حريمة..
الحجية غادة : عيني على كيفك وياه.. بعده مقهور عليها وهم عشرة وأيام بيناتهم..

شامخ : بوية انه شحاچي.. غير اريدن مصلحته.. شعندي قابل.. لوما مشوفني هاي الرسالة چا ضليت أدور عليها هالمگموعة.. بس ماتستاهل..
الحجية غادة : يمة انت شحتسوي..
محيي : شتفصل البس.. مامنها ردة وإن ردت بيوم من الأيام انه مطلگها ولا هي مرتي ولا انه رجلها..
شامخ : خوش.. روح بوية لاتحرگ بروحك دخيلك..

ترخصت منه وطلعت تمشيت بالحلال.. گلبي ينغزني عبال بي دنابيس.. كعدت ع الشط وهذا الصياد كاعد بسدي ديصيد ويغني فوك النا خل.. بقيت أسمعله لحدما گام وطبطب على چتفي..
- : الله يفرج همك بوية.. مشبه بيك انه.. ابن الشيخ..
محيي : اي حجي.. ماعرفتك..
- : احنا نعرفكم.. انتم ماتعرفونا.. والبعيد گريب من الگلب چذب اليكول بعيد..
خلى وراح.. هذا شيحجي.. شو ماادري شونه.. يخبط.. بس اوووف يابة والله صح.. انلچمت منها.. غير أجوزن وابطل احبنها.. ماادري شمتاني..

مشى اليوم ماادري شسوي بس ساكت ومتردد اسوي الفاتحة ماجدامي بس هالشي.. بالليل أبوي انطى خبر لعمه أزهر بس هو درى بالسالفة الحقيقية وعساس رحنا للدفنة مستعجلين.. الصبح صارت الفاتحة چن شخص ميت من صدك.. ومشت الأيام حسب الأصول.. انه مثل المصدوم وگلبي اهجسه مورم حينفجر بصدري..

صعدت فوك قفلت الباب علي وأخذت دشداشتها ضليت أشم بيها وشابگها چنها هي.. نزلت دموعي وبچيت بحرگة مثل النسوان.. حتى لمن خيطت رجلي مابچيت.. ماابچي انه حتى لمن چنت صغير.. عاتبتها وحچيت هواي.. بس وين.. ماتسمع هي.. حسبتها ماتت وهي صدك ماتت سيرتها بلسان كل واحد بالبيت.. بس روحها بگلبي.. بالغرفة.. اتسودن لمن ادخللها.. اشوفها واكفة وزنودها بيض ليلو (لؤلؤ) مبينات والبتوب بأيدها تخبل.. ماكدرت امنع روحي من التفكير.. بس متاني الوكت ينسيني..

جهدت روحي بالشغل والدراسة والگعدات.. بيوم فزيت بالليل عرگان والغرفة ظلمة هندس.. حلمان بيها.. جبت الشخاط شعلته وعلگت الفانوس.. شلته ونزلت جوه لكيت ابوي گاعد ديحچي وي كاظم.. كعدت بسده بين ما خلص وراح لداره..
اندارلي : شگعدك..
محيي : ماادري هيج حلمان..
شامخ : مدتنساها..
محيي : لا بوية..شينسيني..اكو شي يگدر ينسيني.. تعبان
شامخ : الوكت ينسيك انت وحيدك ماتگدر..
سكتت وتمددت بالگع.. اريد شي يبردني ميت حر.. داخليا وخارجيا.. گلبي نار تسعر.. اريد ماي بارد ينصب براسه على گلبي بلچن مااحسن بحرورته..

هيج مرت الأيام والشهور.. ماحسيت بطعمهن.. تخرجت وبيوم التخرج اجه ابوي وأمي وخواني.. يوم حلو وسعيد ماينعاد.. باركلي وبعيونه يگلي انت تستاهل الأحسن منها.. بديت أتعود بس مكانها فارغ .. والفراغ چبير ماينملي بكلمة وكلمتين..

قاسم ولواء ثنينهم تزوجوا.. قاسم أول بسنة الـ٧٥ .. اخذ وحدة من أهل البصرة حبابة ومالها أذية.. خوش مرة.. ولواء بالـ٧٧ بس أخذ بغدادية وعادي خطبناها ورحنا سيارات كومة گال ابوها مايرضا ينطيها لواحد من الجنوب.. عاد هو لمن شاف ابوي وعگاله والشيوخ رأسا وافق.. انه أبوي متانيني اگله اريد اتزوج ويخطبلي.. مايضغط علي بس ادري بي شيفكر..
شامخ : بوية انه اريدن ترتاح بحياتك وتنسى الماضي.. النسيان نعمة وسبحانه الماينسى..خوانك الأصغر منك تزوجوا انت شناگصك..
محيي : ماناقصني شي بوية الله يحفظك ماتگصر.. بس انه مرتاح هشكل..
شامخ : مااشوفنك مرتاح.. شناوي تسوي..
محيي : لا مرتاح لايضل بالك.. ماعندي شي اريد أقدم كلية.. لو تحتاجني بالحلال..
شامخ : لا خوانك بعد وياي.. اهجس روحي ظلمتك بوية السموحة..
محيي : حشاك لاتگول هيج.. ليش شمسويلي..
شامخ : انه خليتك تزوجها.. شمعلمني هيج تطلع .. البنيادم مثل الرگية.. ماتدري شني ماشني الا تكسره..
محيي : اي لاعاب حلگك.. هاهيه انتهت وراحت.. اريد اخذ شورك بجامعة البصرة كلية العلوم.. وبيها دراسات عليا.. دبلوم وماجستير بس ماكو دكتوراه..

شامخ : هاليعجبك بوية.. شتريد قدم..بس لاتضغط على روحك..
محيي : لا ماكو ضغط.. هيج ارتاح اشوف ناس وألتهي..
شامخ : هاهيه چا.. توكل وذب فايلك.. انه اجي وياك..
محيي : يله مامختلفين عليها..
وراها بفترة انفتح التقديم ورحنا انه وابوي قدمت وضليت أتاني يطلع قبولي.. عاد طلع وداومت.. ومشت الأمور.. أرد للبيت بعدني افگدها شون تجي تتلگاني.. بس ماكو راحت صار سنين..

نوبة كاعد على مصطبة بالجامعة أتصفن ماعندي شي كملت.. اخذت الغراض وتمشيت طلعت بره.. عبالك رجليه مشتني لبيتهم القديم.. لكيت روحي واكف ببابهم.. رفعت راسي شفت الطرمة ماكلتها الترابة وهاي لمن يصير هوى عالي يطير الچياسة وورگ الشجر.. حسيت على رجال واكف يمي..
- : شعجب واكف هنا.. أهل الدار ماموجودين..
محيي : اي خوية أعرف.. ماادري وين صفى بيهم الدهر..
- : سمعت والله أعلم اذا صدك لو چذب إن البت الصغيرة متوفية..
عاينتله وحيلي إنهد للكع : شون شمدريك..
- : والدتي رايحة تسيارة لل.... وشايفة الأماية وحيدها فهي كايلتلها توفت..
محيي : مشكور ماگصرت..
خليت ورجعت للبيت انطيت خبر لأبوي.. ولو السالفة بردت بگلوب الكل بس بعدها بسحن بگلبي..

اجه وياي ماخيب ظني.. رحنا للمنطقة وسألت عنها گالوا مامتوفية بس تمرضت وتلاحگولها.. أما دارهم والسكن شايلين ومحد يدري عنهم.. خابت ظنوني للمرة الألف.. بس دااحاول شون ماچان أعيش وأكمل..

البصرة بالخمسين والستين والسبعين من أفضل وأحلى المحافظات العراقية.. من ناحية البيئة والمستوى العلمي وغيرها من الأمور .. بس اجه اليوم الدمرها ودمر أهلها واحنا من ضمنهم .. حرب أيران.. سنة الثمانين...

حامد ........
ثاني يوم اخذت الشهادة مالتي والجنسية وصور خليتهن بفايل وانطيتهيا.. دليته على بيتنا كال اذا ماانقبلت خلي شغلك عليه.. اني اجيبه لعندك.. هذا ماادري شنو يعني ربي دزليا منقذ والحمدلله..

ضليت أتاني فترة طويلة.. كلت يمكن مالگالي شغل واستحى يردلي بدون ميكون مساعدني.. الى أن بعصرية يوم اعتبره بداية مشواري.. اندكت الباب ..رحت فتحتها وتفاجئت نفس الشخص.. ابو سامي وياه واحد لاخ ماعرفته.. نفسه الي لگى رائد.. سلمت عليهم ودخلتهم جوه.. ضيفتهم وجبناها حچي بعيدا عن الشغل والفلوس.. ماردت أحرجه فماباردت بالموضوع مع العلم اني المحتاج..
آخر شي هو حچه : اخوية ابو رائد.. عرفتك على اخوية..
حامد : اي اهلا وسهلا..
ابو سامي : والله ذبيت فايلك بالمعمل بس ماانقبلت.. كلت فشلة أرجعله وايدي فارغة.. ضليت أدورلك وعلى بالي والله.. لأن رائد شفته صغير والطفل مصاريفه هواي.. فقبل چم يوم اجه اخوية ابو جمال من السفر ويريد يستقر بالعراق ويفتح مشروع.. گتله اعرف واحد خوش رجال وشاغول فتحوا سوه والمصاريف وهالأمور بالنص بيناتكم.. قبل واجينا هاي جيتنا.. فأنت شتگول.. على راحتك تقبل لو لا..

حامد : والله أقبل ليش لا.. بس شنو المشروع النفتحه..
ابو جمال : سمعت بيك مشتغل بأسواق.. والصراحة شغلها متعب ويحتاجله جهد.. لو انشائية لو مفروشات وأخشاب..
صفنت علي : مااجن ببالي هالشغلتين بصراحة.. ثنينهن خوش شغل..
ابو جمال : انت مخير اخوية.. وان شاء الله منختلف ع الشراية وغيرها من الأمور..

ضلينا نحچي لحدما اتفقنا ع المفروشات.. گال فد يومين وأمرلك نطلع ندور على محل مناسب ونباشر.. بشرت سارة وكلش متفائل بهالأنسان.. وجهه بشوش وطيب بكلمته وأسلوبه .. بمرور يومين اجاني وطلعنا ندور.. بقينا هيج فترة الى أن لگينا المكان المناسب.. شكو فلس عندي بالكنتور فرغته بهالمشروع.. صرفت دم عيني وبكل خطوة أخطيها ادعي ربي متخرب وتتفركش مثل مصار بذاك المحل.. ابو جمال عنده اقارب تجار اخشاب.. فگمنا نشتري منهم .. والمفروشات من غير مكان.. بس كله هذا فلوس.. عوزت هواي..
اجيت لسارة احاچيها.. وماكو غير هالشي جدامي..
حامد : سري اريدج توگفين ويايه..
سارة : اني وياك بكل وكت.. تفضل..
حامد : اريد تنطيني ذهبج ابيعه.. واني بس يصير عندي اجيبلج أغاته.. شفتي شلون صار بحدود السبع شهور كاعد لاشغل ولاعمل هاي الشغلة اجتني من ربج هدية..

سارة : حاضر..اخذه كدامك لتسألني..اني أثق بيك حامد..
ابتسمتلي.. بست راسها وشبگتها بروحي.. ثاني يوم العصر اجيت ع الذهب مخليته بعلبة.. لكيتها مخلية الحجل وياهن.. رأسا طلعته..
باوعتلي بأستغراب : ليش طلعته عيني.. مو گلت ابيعه..
حامد : هذا مو اني اشتريته وانتي لابسته من چنتي مراهقة شلون اخذه هسه مااريد..

اجت كعدت يمي تقنعني ابيعه ويا الذهب الباقي بس رفضت .. اموت علي برجلها وصوته صار مثل الچاي لازم اسمعه كل يوم وبكل حركة تتحركها.. نزلت يمها لبستلهيا وبست خدها على موقفها وتنازلها لخاطري..

بعته وجاب مبلغ كلش زين.. گدرت اسدد النقص والدين ومشت أموري عدلة والحمدلله.. اني مااعرف للنجارة بس ابو جمال شغلته هاي وشغلنا وياه عمال ثنين.. هو يصمم ويحدد وين يگص وهالأشياء والعمال يشتغلون.. تعودت ع الشغل وتوفرتلي راحة اكثر.. بين ما لميت ايدي وأخذت سارة لأبو الذهب اشترت قطعتين ورجعنا.. ولو توقعتها حتاخذ اكثر بس هي تراعيني.. تراعي ظرفي وحتى حالتي النفسية.. فرحان بيها وبرائد..

مرت الأيام ورائد كام يركض ويمشي ويحچي.. لسانه طلق من هو صغير.. اجي للبيت يجي يحضني من رجلي ويصفني بكلماته.. نوبة اجيت وچنت تعبان فدنوب.. بس تمددت ع الكرويتة وأتاني الغدة يكمل.. اجه هو وخر ايدي من عيني..
رائد : شو نايم عيني..
حامد : عيني شنو لك سرسري..
رائد : بابا يعني اقصد اشو نايم حبيبي بابا..
حامد : ههههههه.. انت فد واحد لوتي..
رائد : انت عمري وحياتي..
حامد : يايابة.. لسانك هذا عليمن طالع..
رائد : مو ماما تكلك عمري وحياتي فأني سمعتها وكتلها يصير اگول لبابا هيج لو بس انتي..
حامد : اي وشگالت هي..
رائد : كالت يصير طبعا وتبوسه من عيونه..
چيت عليه حضني وباسني من عيوني وخدودي ويگلي عمري وحياتي.. اجت سارة تضحك مكيفة على سوالفه..

حامد : هاي شمعلمته..
سارة : شكو بيها ياعمري وحياتي..
رائد : هااا شفت شتگول..
سكتت بس اضحك علي.. يحچيلنا هيج ونضحك بس هو لا.. يعني لمن اشوفه اشوف روحي وطفولتي.. لمن يگعد من النوم يروح وحده يغسل ويجي يلم الفراش.. كلش هادئ ومسالم .. لمن يطلع بالشارع يكعد ع الرصيف وينتظر صديقه.. ماعنده بس صديق واحد.. هم كلهم اصدقائه بس واحد يحبه.. منتظر اسمه.. يجي يمه يله يگوم..

اني بالمحل ومندار داارتب وسمعت صوت أبوية بشكل واضح.. انداريت سلمت علي عيب منا الناس حاولت ماابين..
شامخ : اذا عندك مجال اريدنك بشغلة..
حامد : تفضل هنا محد اكو..
شامخ : لا وحيدنا ماترهم هنايه..
صحت ع العامل اجه يكمل بمكاني ورحت وياه تمشينا بالشارع..
شامخ : لمن چنت قاصر.. انه اشتريت چم دونم هنا ببغداد وسجلته بأسمك وانه الوصي..خليت بي فلاليح ويشتغلون..
باوعتله ومصدوم بقهر وعصبية : ليش ماگتلي..
شامخ : ماصحتلي الفرصة ومااعرف اخبارك هاي يادوب تجيك الحجية كل چم شهر.. هسه هو بعده بأسمك.. تحب اخذك تشوف الشغل بي وهمات خاطر تثبت روحك..
حامد : اي اروح ماعندي مشكلة..
شامخ : چا خوش.. باچر الصبح أمرلك للمحل اخذك..
حامد : ان شاء الله..

رجعت للمحل وأفكر.. وين جانت هالشغلة عني.. حرامات.. شكد توازيت ع الشغل بس اجتني متأخرة.. يله ذخر لعائلتي.. ثاني يوم الصبح رحت وياه للدوانم شفتها .. مزروعة قمح وخوش مكان.. تشكرت منه لأن الواحد ميعرف شمضمومله .. مثل ذيج الوگعة ضليت شهور اسبح اريد اوصل للشاطي صار بعيد عليه.. بس الحمدلله وصلت.. گام الوارد اليوصلني من الدوانم نصه أنطي لأبوية هو يجيب مواد أولية علمود الزراعة مااعرف منين اشتريهن يراد واحد أسطة.. والنص الباقي بالبنگ مامحتاج..

رجعت من المحل الظهرية.. لكيت الباب مفتوحة ورائد يفوت ويطلع.. رحت علي شلته وطبيت اصيح على سارة..
حامد : ماما وين حبيبي..
رائد : كالت جدو تعبان وراحت بسرعة..
حامد : شنووو.. متأكد.. هي گلتلك هيج..
رائد : اي هي.. وكالت لمن يرجع بابا خليجيبك ويجي لبيت جدو.. امشي خنروح..
حامد : اي يله نروح..
اخذته وأجرت تكسي رحت لحي الجهاد.. لكيت الهوسة بالباب والناس ماادري منين مامنين.. طبيت سلمت ومن كلامهم عرفت ابو سارة متوفي.. خليت رائد يم جهال اختها وقمت وياهم بالواجب.. رحنا للنجف دفناه ورجعنا.. انصب الچادر وصح مشغول وياهم بس بالي يمها متتحمل هسه تتمرض.. ماكدرت افوت جوه.. بس خوانها يجيبون واحنا نوزع..

لحدما بالليل فتت شفتها.. اجت حضنتني وتبچي بصوت..
سارة : مات بابا حامد..
حامد : الله يرحمه عيون حامد انتي.. اني وياج وابوج واخوج وشتردين اصيرلج..
سارة : بس لتعوفني اموت بدونك..
بستها وهديتها بطريقتي..

ضلينا اسبوع يمهم بعدين اخذت رائد واخذتها ورجعنا.. تعبت وحتى مابيها حيل تحچي.. بس تبچي وهاملة كلشي.. اني همات مااضغط عليها.. اجي من الشغل ولو تعبان واريد انام بس اسوي هالأگدر علي واصيحها تجي تاكل.. رائد يوم اخذه ويايه ويوم يبقى يمها تضوج وحدها.. تعبت وياها واحاول اغلب اليوم أواسيها وابقى يمها بس هم عندي مسؤوليات والتزامات.. بعد الأربعين مالته مثل الفكت وبدت ترجع طبيعية .. اجيت للبيت لكيتها منظفة ومسوية اكل كاعدة يم رائد تلعبه.. گعدت يمها حضنتها.. ذبت روحها بحضني تدري بحضنتي هاي شقصد..
سارة : ماادري بدونك شسوي..
حامد : لا دخيلج شعندي غيرج..
سارة : الله يخليلنياك يارب.. نام زين اليوم منايم..
بست خدها ورجعت گذلتها وره إذنها : ان شاء الله..
اجه رائد كعد بحضني ويشوفني شمسوي وشراسم..

بدت حياتنا تستعدل وترجع أقرب للطبيعية.. اجي من بره اشوف رائد شلون حاضنها ويمسح دموعها لمن تبچي.. لو يبوس راسها وإديها.. ااااخ الأم شكد مقدسة..

مرت أيام ورائد عمره صار يستحق يدخل مدرسة.. اخذته اني وسارة وطلعنا.. سجلته وكملت كلشي وراها رجعنا.. انطيتها فلوس بعد هي تروح تشتريله.. وبلش الدوام.. كعدت الصبح لكيته مبدل.. شعره مثل شعري سرح ماي.. رجعتلهيا ليوره وأعدل الياخة مالت القميص.. هو كاعد ومبتسم ميحچي.. بين ما كملت واخذناه ورحنا.. اجت المعلمة اخذته لمكان الاصطفاف واني واگف بعيد اشوفه شلون راح يتمشى ووگف بالأخير لأن طويل.. يبين من جماعة الثالث مو الأول.. ابتسمت علي وتانيته يفوت للصف بعدين رجعت..

بلش يداوم ومن أول أيامه شاطر ونبه.. اليوم دور ابو جمال بالمحل فگعدت متأخر.. للظهر وراحت سارة جابته واجت.. ولو المدرسة قريبة بس ميهلي اخلي يروح وحده.. اجه حط الجنطة على صفحة ونزع الحذاء والجواريب راح يغسلهن.. اني كاعد واباوع منتظره شيسوي.. كمل واجه كعد يمي يسولفلي شمسوي وشكد ماخذ بالإملاء..

وهيج نظامه بكل يوم .. يسعدني ويزيدني فخر إن ابني يطلع هيج من بين أقرانه اليقرون بالتواسيل..

كعدت الصبح بدلت وطلعت للشغل مثل كل مرة.. لكيت الهوسة بباب المحل للظالين وناس طابة طالعة اطلع بالغراض.. شصاير .. بس وصلته وشفته ريجي نشف.. لو يصيبني السكر هم قليل بحق هالصدمة.. المحل محترك صاير عطاب.. الأخشاب والزوالي والكومبارات كلها متدمرة للأخير.. ضليت اصفك بإيدي من الصدمة وهول الموقف..
اجه واحد ابو اسواق بصف محلي.. : الله يعوضك اخوية ابو رائد.. وشتحتاج احنا موجودين..
حامد : متقصر بس بعدني مامصدك والله.. اني البارحة قفلته بيدي ورجعت للبيت.. شلون احترك وماادري..
- : تماس كهربائي الاطفاء گالوا..
سكتت ودزيت العامل لبيت ابو جمال.. اجه مخروع خطية وصدمته مو أقل من الصدمة الصرت بيها اني.. حسيت فلوسي كلها ضاعت واني چنت ضام دخل البارحة.. من غير البضاعة والغرف التأجير..

ضلينا واكفين هواي بين ما فرغنا المحل وراها رجعت للبيت.. كسرة عمري هاي.. الحمدلله على كل حال.. بقيت فترة بالبيت بس اطلع لأبو جمال لو هو يجيني حسب..
ابو جمال : خوية لشوكت نضل گاعدين.. لازم نرجع..
حامد : هم نفس المشروع ويحترك.. صارتلي عقدة..
ابو جمال : شفت الوارد الأجانا.. الحمدلله خير من الله.. نتوكل ونگطع الكهرباء مامحتاجيها مو تكول غذائية ولازم كهرباء دوم..
حامد : انت تكول هيج يعني..
ابو جمال : اي والله.. استشاريت والدي ونصحني هيج.. هو هماتين حيساعدني بمبلغ مالي أشتري بي وبين ما ألم ايدي أسدده..
حامد : اذا هيج ماكو مشكلة.. اني هم عندي وهو يبقى محلنا حتلو صرفنا علي من جديد..
صافحته واتفقنا..

بمرور يومين بدلت العصرية دااطلع واندگت الباب فات ابوية .. تفاجئت بي..كعد يمي وبعد سلام وكلام فتح الموضوع..
شامخ : اجيتك واريدن انطيك شغيلة نطية (بدون ترجيع)..
حامد : تفضل..
شامخ : سمعت محلك محترك.. چنت مار عليك وشفته مقفول .. سألت ابو الأسواق كال كيت وكيت السالفة..
مد ايده على جيب القمصلة انطاني چيس اسود بي فلوس مبين من شكله : هاي الفليسات الك.. تفيدك تلم المحل من جد وجديد واعتبرها حلالك مااريدنك تردهن ليه..
حامد : مشكور متقصر بس مااخذ فلوس.. عندي بالبنگ واسحبهن عليش اطلب منك..

شامخ : انه ماگايل طلبت مني.. انه داانطيك من أب لأبنه وتاخذهن انت وساكت.. خلي الفليسات الي بالبنگ لأبنك ومريتك تنفعهم بالزمن..الشغل على صفحة..
حامد : كتلك مااريد..
شامخ : تريد ولاتردني ماحلوة تصير..
صفنت علي.. اخذهن واني أرجعلياهن دفعة وحدة.. مااريد يمن عليه فديوم.. اخذتهن وتشكرت منه هواي..

وراها بفترة قصيرة جبت صباغ بيضلي المحل وبعدين صبغه كلشي سواه كامل وشوية وشوية رجع المحل وجبنا القطع والزوالي وغيرها من الأمور المطلوبة.. حصتي من الوارد اخذها مصرف للبيت.. شغل الدوانم بعده نفسه بس كمت اني اروح اجيب المستلزمات والحبوب .. قبل چان النص الباقي من وارد الشغل أخلي بالبنگ.. هسه صرت أجمعه لحدما كملت المبلغ ورحت لأبوية لمحله انطيتهيا عدا ونقدا.. ماقبل ياخذهن وصار يصيح رجعهن عليه.. خليتهن ع الميز وطلعت..

اني وراجع من الشغل ميت برد اطگطگ.. طبيت جوه كعدت يم الصوبة واجه رائد كعد يمي يحل دروسه.. اشوف سارة تروح وتجي چنها تريد تحجي شي..
صحتلها : سري تعاي هنا..
سارة : ها اني..
حامد : ليش اكو غيرنا..
سارة : اي اجيت.. هم اريد احچيلك شغلة..
اجت بصفي وتسألني ع الشغل.. باوعت لرائد وابتسمت : حيصيرله أخ او أخت..
باوعتلها وبگلبي فرحة بس اتأكد اطلعها : حامل..
سارة : اي.. صار هواي يمكن شهر..
حامد : لعد متحچين شمنتظرة يحظي..
سارة : غير اني تعبانة واشوف رائد صغير خطية خاف يغار فردت اتأكد اكثر..
بست راسها وخدها وحاوطت چتفها.. : الف مبروك..
باوعتلي وابتسمت.. حضنتني واجه يوخرها مني..

رائد : شعندك تحضنها.. عيب..
حامد : انچب لك.. عيب شنو..مرتي هاي..
رائد : اي وهاي أمي.. يعني غير بس اني احضنها..
حامد : انت لوما اني وأمك متجي.. يعني بكيفي..
ضحكتله وفتحتله ايدي حضنته واخربط شعره.. شما أخربطه يرجع يتعدل.. سرح ..سارة تضحك وخجلانة من كلامي.. اني من اگله هيج احچيها بنبرة شقة وضحك.. فميزعل بالعكس يخزرني ويضحك..

مرت الأيام وبدت تتوحم بس وحامها موطبيعي.. ماادري شتتشهى.. اكلات خبط ..
كعدت بالليل على صوت طگطگة بالمطبخ.. تمشيت لكيتها كاعدة ع الكرسي وبحضنها ماعون تمن وفوگاه نارنج.. اجيت اكلت خاشوگة رأسا ذبيته.. مر مرورة تضرب بالراس وحامض..
حامد : هاي شمخلية..هو هذا اكل..
سارة : هسه ليش تعيب.. غير اشتهيته..
حامد : ادري بس هذا مو اكل.. شنو بي..
سارة : تمن وليمون ونارنج.. ماادري شو تنساني بالحوامض.. يمكن بنية هاي.. مو مثل تنساة رائد..
حامد : دخيل ربها شحست وخلتج تاكلين هيج..
سارة : هههههههه.. والله عليك سوالف حبيبي.. شعليها هي خطية..

ضلت كل يوم هيج تاكل حوامض بشراهة.. اني شعندي قابل .. فلوس وموجودة فأجيب شكد متريد.. لحدما اجه يوم ولادتها.. اخذت رائد للمحل وهي اجن يمها النسوان وخواتها وأمها..
رائد : بابا ماما شحيصيرلها ليش طلعنا..
حامد : ميصيرلها شي حبيبي.. هسه نرجع وتشوف شجابت..
سكت ومكيف عباله شي ينوكل.. عزلت المحل ورجعت للبيت .. طبيت شفتها وجايبة بنية.. شوية مني وشوية منها.. تحمدتلها ع السلامة وجبت شغلات رادوها.. رائد غيران مافات للغرفة يكلي هي هاي الهدية.. شو محلوة.. بعدني مماخذها للمستشفى ومسجلها.. أم سارة كالت خلتنعنش يم أمها چم يوم وناخذها..

الطفلة أول متشرب حليب تغص وتصير زرگة من الصياح والبچي .. الجو بارد واخاف اطلعها لتروح تتمرض.. كمت لفيتها زين واخذتها اني وأم سارة للمستشفى.. عود فحصها الدكتور كال مابيها شي..
حامد : دكتور الطفلة تغص شنو مابيها شي..
- : ليش حضرتك دكتور واني ماادري..
حامد : مو دكتور بس اكو اشياء بديهيا نعرفها..
- : اخذها مابيها بس الخير..
اخذتها بس مامطمن لكلامه.. رحت لدكتور اختصاص اطفال .. كومة ناس جدامي واني كاعد على اعصابي بين ما اجانا السرة وطبيت.. فحصها وگام عيونه بگصته..
- : هو هذا كلام.. الطفلة شكد عمرها..
حامد : تلث أيام دكتور..
- : لازم تدخل مستشفى ضروري وفورا.. عدها مي بالرئة بس تاخذ حليب اكثر تختنگ ولاسامح الله تموت..
باوعتلها وگلبي عصرني حييل عليها.. رأسا نقلتها بمستشفى بس ماكتلها لسارة.. خايف ليصير بيها شي..

بقت بالمستشفى اليوم كله.. رجعت بالليل وأمها ضلت يمها.. طبيت لكيتها دتحاول تتمشى..
سارة : حامد همزين اجيت.. البنوتة وين..
حرت شجاوبها.. لصت السالفة : هسه مااطول..
سارة : شنو مااطول.. من الصبح انت ماكو عفية وينها لتخوفني..
حامد : بس لتخافين.. لازم اروح هسه..

بس طبيت اخذت بطانية وطلعت بالعجل.. اجه الدكتور يحاچيني..
- : سحبت منها أربع صرنجات وبعد أكو..
حامد : يعني شنو دكتور.. متصيرلها چارة..
- : لا .. تحت رحمة ربها حاليا.. بس تنطيها حليب تغص وتموت.. بالبداية ماصارلها شي لأن الأم حليبها ضعيف وقليل وهي عدها گحة فهاي منعتها إن تكمللها رضاعتها..
تخبلت اني شديحچي هذا.. ادفع فلوس الدنيا كلها بس تصير زينة.. بقيت اسبوع بالمستشفى لايب عليها.. صدرها يصعد وينزل وتتنفس بقوة وصعوبة.. سارة عرفت بس ماادري بوضعها شنو.. ساكن المستشفى.. دخلتها مستشفيات ثنين وثنينهم نفس الحچي.. متأخرين عليها.. المفروض أول متجي للدنيا اجيبها يفحصوها.. بهالأثناء سويتلها شهادة ولادة وسميتها درة..

وره هالأسبوع رجعت للبيت سبحت وبدلت.. حتى مااشتهي اكل شي.. سارة طبيت وطلعت تبچي.. رجعت للمستشفى واجاني خبر وفاتها.. اچذب اذا كلت مادمعت عيوني عليها .. طبيت شفتها للمرة الأخيرة وبگلبي اكول : هم تحتاجين تدخلين مغيسل.. ليش هو الطفل هم نجس..
انقهرت متت قهر.. انطيت خبر لأبوية اجه هو وعمه وخواني.. ماقصر وصارت الدفنة.. مامستوعب طفل هلگدودته يندفن وهو حتى ميكدر يشوف البشر بشكل واضح.. هم وراها حساب وكتاب.. الك بيها إدارة ربي..

رجعت وسويت فاتحة حسب الأصول.. بالليل اسمع ام سارة تحاچيها تحاول تخفف عنها..
ام سارة : ماما لعد هذني اليموتلهن صبي لو شاب شيگولن.. الى رحمة الله..
سارة : ادري يمة بس تعبت.. تمنيت اشوفها اكثر..
ام سارة : هاهيه يمة حبيبتي فدوة اروحلج انتي نفسة موزين عليج القهر ماماتي..

تكأبت والبيت كله كئيب.. بس عدت وصارت أيام نتذكرها وتمر علينا مرور يأذي شوية وينتهي بوقته..

مرت الأيام وحياة طبيعية مثل هواي عوائل عاشت بالسبعينات.. العراق بهالفترة هادئ ومستقر من كل النواحي.. سمعت بخواني متزوجين وابوية اجه عزمني بس مارحت.. بس دزيت سلامي بيد الحجية غادة.. ولو اكرههم بس لخاطرها هي وسناء.. بسنة الـ٧٨ نورني طفل جديد لحياتي.. توبت أعيد ذيج الغلطة الصارت لدرة.. أخذته رأسا للمستشفى فصحوه فحص كامل.. سميته محمد حسب طلب سارة.. بالبداية تخاف تنطي حليب بعدين تعودت شوية شوية.. بدا ينشنش ويزحف يسولف بكلمات مامفهومة.. رائد صاير نار ويباوع من بعيد.. جبتله طوبات وشغلات لخ يتونس بيها علمود ليغار.. همات اخذه ويايه للمحل وهيج مشى الحال لحدما تعود علي..

وبسنة الـ٧٩ بدوا يتهجرون الايرانيين والكراد "الشيعة" بعد ما چنا شعب وناس وحدة..واحد جواريني ايراني هستوه مكمل بيته بعد بس يأثث وصار التهجير للمناطق الأخرى بحيث وصله الخبر قبل ليجون يطلعوا بالغصب.. اجاني للبيت خايف ولازم مفاتيح كفشة مال بيت..
- : اخوية ابو رائد.. بيتي تعبان علي وهاي كدامك شلون بنيته طابوگة طابوگة.. اخذه انت اكعد بي بس ليروح يصير بيد الحزب..
حامد : مااكدر يخوي.. مااكعد بي بس اني اگللهم صاحبه طلع من زمان..
ضل يحاول ويايه وماقبلت.. اجت سارة تعاتبني..
سارة : هسه ليش مااخذته.. اكبر من بيتنا وجديد..
حامد : ليش اخذه شبيه.. حتى ولدي تنكسر ظهورهم.. لا طبعا مااخذه.. البيت الينگعد بي وهو مأخوذ من أهله بالغصب حيصير نار علينا كلنا.. منتهنى بي..
سارة : بس هو انطاكيا..
حامد : ليش ينطينيا..لأن حيتهجر مغصوب..ميصير ابوية..

وراها طلعوا كلهم ومنهم الكتلوهم.. الى أن حلت سنة الهلاك لغالبية الشعب العراقي.. خصوصا الفئة الذكورية.. سنة الثمانين.. گعدنا مخترعين ومنعرف راسنا من رجلينا.. الناس بالشارع طلعت ادخل جهالها للبيوت والطيارات من فوگانا.. صافرة الأنذار دگت ببغداد وانعلن رسميا بداية الحرب العراقية الايرانية..

اجو جماعة من الحزب دگوا بيباننا واحد واحد وذبوا البدلة العسكرية علينا..
- : الي مانلگاه جاي باچر نجيلو لبيتو نشيلو من صينيتو.. سكتت شحدي أجاوبه.. طبيت للحمام زينت لحيتي وشعري صفر.. لمن كملت وباوعت جوايه لكيته كومة.. شكد معتز بي بس راح.. ضليت الليل كله كاعد.. ماخايف على نفسي.. بس خايف على ولدي وعائلتي.. غفيت وجه الفجر وگعدت وراها بساعة او أقل.. كمت لبست والجنطة محضرتها سارة.. اجت حضنتني حييل وتبچي بچي يكسر الگلب..
حامد : يروحلج حامد فدوه بس لتبچين ..
ابتعدت وباست جبيني وراسي : الله يرجعك سالم يارب.. ننتظرك تجينا وتنور بيتنا..

ابتسمتلها واخذت الجنطة وطلعت.. شفت ابو كريم وابو انمار وباقي الجوارين كلهم لابسين عسكري.. طلعنا كلنا للقاعدة وبعد تفرقنا كلمن بمكان.. اني بالبصرة.. نهر جاسم.. أخطر نقطة قتال بالحرب كلها.. خفت.. اچذب اذا نكرت هالشي.. بس سلمت أمري لربي وبداخلي اريد اعيش لأجل عائلتي..

دربونا تدريب كامل خصوصا ع السلاح والتصويب وغيرها هواي أمور.. بعدها طلعنا للبصرة.. شفت شباب صغار حتى شوارب ماعدهم.. شفت شايب تعبان.. شفت عريس وخاطب كلشي شافت عيوني.. بس ساكتين منكدر نحچي.. هالحرب ظلم للعراق والعراقيين على وجه التحديد.. أيام قليلة وصار اطلاق النار والقتل شي طبيعي ودفاع عن النفس.. الطرف الثاني يشوف نفسه واحنا نشوف نفسنا الصح.. بالحقيقة الصح ماموجود عند الطرفين..

أول نزلة الي بالواجب بقيت شهرين بعدين اجوا الاحتياط ونزلنا لبيوتنا.. اجيت لكيت محمد يمشي وسارة تعبانة من البعد بس تحاول علمودي متبين.. اجه رائد يركض حضني ويبوس بيه..
رائد : اشتاقيتلك متعرف شكد.. موت موووت..
حامد : ههههههه.. اويلي فدوه لحلگك..
شلت محمد وطبيت جوه.. مشى اليوم بجو بي راحة مفتقدها .. بالليل داانام واجه رائد يمي يسولفلي..
رائد : بابا اريد البس هاي الملابس مال جيش بمكانك..
حامد : لا باباتي اسم الله عليك ختولي شتسوي بيها..
رائد : اشاورك بشي بس متكول..
حامد : اي مااگول..
تقرب مني ويباوع ع الباب : سمعت النسوان يگولن لماما اذا بقت الحرب خلي رائد يلبس بمكان أبوه..
باوعتله مصدوم : شنو هالكلام ابوية.. بعدك صغير..
رائد : ماادري هيج سمعت..
حامد : لا مااخليك.. ان شاء الله تخلص ونرتاح..

وهيج مرت الأيام والشهور.. كل شهر نتقدمه يصير القتل بفلس والماي ينگلب دم من كثر الحمار مالته.. اني گلبي قوي ومااتأثر بالعجل.. اكو واحد عمره ١٨ وكع من طوله من الخوف والدماية.. كل مواطن عراقي شارك بالحرب وطلع منها صاحي نفسيا وذهنيا هذا يحتاجله شهادة تقدير على قوته وصموده..

ويا تأزم حال العراق صرت اضل بالواجب اكثر.. تلث شهور.. دورات اربعة.. على حسب.. البرد يگص گص واني بنص المايات مطربس.. ارجف من البرد بس لازم روحي وأهدي بيها بين متطلع الشمس وأدفى عليها..

بعد مرور اربع شهور ونص بالواجب.. باردة تگرص بحيث وجهي گام يمشك ويطك دم.. من المايات والبرودة.. رجعت للبيت دكيت الباب طلعتلي سارة وباوعتلي بنظرة جامدة.. مغطية خشمها وحلگها بس عيونها..
سارة : تفضل أخي شرايد..
حامد : اخي شنو شبيج.. اني حامد ماعرفتيني..
شهكت وفكت عيونها : حامد.. احلف القرآن انت ابو رائد.. وعلي ماادخلك البيت.. مستحيل حامد انت..
حامد : يولي سارة لتخبليني..
هي ودتحچي طلعت ام انمار باوعتلي وهمات ماعرفتني..
ام انمار : منو حضرتك.. شرايد..
حامد : عيني ام انمار اني ابو رائد.. شبيكم..
سارة : لج عيني مدااصدك.. ميشبهه..
ضلت تماطل واني رجليه غادية خيوط من الوگفة والتعب..

آخر شي جابتلي ماي وصابون غسلت بره.. وعندي جرح سچينة بإيدي ميروح.. رفعت القميص شوفتلهيا.. كامت تبچي وحضنتني بالعجل..
سارة : اسفة يروحي والله خوفتني..كومة ناس يجونا علينا وحسبتك منهم..
حامد : ميخالف ماصار شي..
طبيت جوه شفت وجهي شلون تلفان ومشخط.. اجه محمد يخاف يحضني..
رائد : شبيك لك متروح لأبوك..
محمد : مو بابا هذا..
حامد : هههههههه.. هي أمكم ماعرفتني معذورين..
ضليت اليوم كله كاعد وياهم مشتاقلهم ميت عليهم..

المحل تركته بس أبو جمال كاعد بي ماقصر.. مالبس عسكرية بالحزب هو بعد هم الأسياد.. كل شهر يجيب حصتي من الوارد للبيت صار بمكاني والحمدلله.. محمد صغير ميستوعب بس رائد عبر الـ١٥ سنة.. كام يفتهم ويعرف حجم الخطورة الأني بيها بس مااريد أبينله.. خليته يلتهي بدراسته وميفكر مجرد تفكير بالعسكرية.. درجاته كلها عالية تسعينات متنزل فمااريد مستقبله يضيع بهالأمور.. بأثناء سنوات الحرب رجعت من الواجب لكيت النسوان تدخل للبيت ورائد بالباب.. شافني من بعيد اجه سلم عليه واخذ غراضي.. طبيت شفتها جايبة بنية.. خليتها هي تسميها وصارت اخلاص.. بسبب الظروف ماسويت طفل بعد لو شمهما يصير.. هيج أفضل..

بلشت أمتحاناته سادس علمي چنت حاضر بيها فترة اجازة .. طلعله معدل ٨٩.. هو الأول ع المدرسة بوقتها.. رحت لحفلة التخرج كأب للطالب الأول.. شعور بالفخر والتعويض عن السنوات التركت بيها دراستي..
اجيت بست راسه وهو شواربه ولحيته مختطة.. رجال كامل : الله يوفقك وليدي..
رائد : الله يخليلياك..
حضنته وأنطيته مبلغ مالي كهدية لنجاحه.. وراها ألتحقت..

بقيت أيام طويلة بعدها نزلت.. مديت ايدي داافتح السرگي واسمع صوت سارة تصيح..
سارة : وين رايح.. انت تريد تجلطني هااا يمة شبيك لتخبلني فدوه اروح لطولك..
رائد : يمة شبيج صدك چذب.. هي سنة خلتضيع وراها أقدم .. لعد زين هيج باقين بدون والي ومنعرف وين نروح..
فتحت الباب وطبيت رأسا.. لكيت رائد لابس عسكري واخلاص واگفة يمه عمرها تلث سنين لازمته من ايده وتجره..
باوعلي ويحچي بنبرة حازمة : الف سلامة يابة..
حامد : الله يسلمك.. وين رايد ان شاء الله..
رائد : اگعد انت.. شكلها الحرب محتخلص.. اني البس بمكانك بس هالسنة والله كريم بعدين..
حامد : فوت لغرفتك ذب الهدوم هاي لا اشگگها هسه..
رائد : اي ليش يايابة.. لعد زين هيج شبيك دخيلك فكر بأمي ومحمد واخلاص.. عوفك مني..
حامد : انت مخبل.. تعبت عليك وصرفتلك ماي عيني بس اريدك توصل لمكان يلوگلك مو تجي تلبس عسكرية وتروح لنهر جاسم.. اطلع مو رجال اذا خليتك تخطي خطوة وحدة.. اليوم أروح وياك تقدم كلية وبدون كلمة زايدة..
رائد : لا اروح ونص.. شنو مو رجال قابل..
حامد : بابا الحرب شعليها بالرياجيل..صير رجال بشهادتك شيفيدني اذا استشهدت..هاي بس ينطوني ورقة تايخة بمناسبة فقدان شاب من شباب العراق..

ضل يحچي واني احچي مااسمحله يطلع خطوة بره.. غير اتخبل.. ابني هلكت وليالي ماانام بس علمود اجيبله اللگمة الزينة ويكبر يصير ظهري وحزامي مو انطي لأجل حرب محتفيد لا اني ولا كل مواطن غيري بشي..

حامد : بابا اني مامديت ايدي عليك حتى بصغرك.. لتخليني اغلط هسه واتصرف تصرف ميليق بعمرك.. معدلك حلو وشهادتك يتمنوها تمني.. تضيعها ليش.. فوت كدامي بدل وانطيني البدلة..
خزرته وأشرتله للغرفة.. فات يبدل.. انطاني الهدوم صفطتهن وخليتهن بجنطتي.. طلع مقهور وضايج أعرفه.. خليته على راحته ورحت سبحت وبدلت.. بالليل طلعت لكيته كاعد ويمه ورقة بيها اسماء الكليات والمعاهد التقبل معدله.. كعدت يمه ورتبتها وياه خلى معهد طبي أول شي بعدين سلسلها.. راد يكوم ولزمت ايده..
حامد : اني من خوفي عليك هيج احچي والله ماافكر بشي بس ارجع سالم علمودكم مو علمودي..
رائد : يابة تره اني كبرت وأحس بيك.. بعدلك سنة وياخذوك الجيش الشعبي.. من خدمة لخدمة والله صعبة عليك وعليه.. هذوله مو صدقاني لبسوا ويا أبهاتهم..
حامد : صحبانك ماعدهم العندكيا انت.. عطالة بطالة..
رائد : هاهيه مفتهمك.. الله يحفظك..

كمت ورحت انام بعد متأكدت بإقتناعه بكلامي.. ثاني يوم رحت وياه قدمتله صيدلة بغداد.. بمرور اسبوع رجعت التحقت.. سنة الـ٨٧ صعبة دمار موطبيعي خصوصا بالبصرة.. اني بالخطوط الأولانية عبور شط العرب.. يعني ع المدينة.. الجنود يشيلون هذوله اليتصوبون والدم يوگع مثل الشلال بالگاع ينقلوهم للمستشفى العسكرية..

بليلة ظلمة صار تبديل وصرت بأول خط دفاعي على شط العرب وجدامي بعد أربعة.. رغم بعد المسافة بس حسيت بحرارة طلقة دخلت لچتفي وماطلعت.. القتلى بهاي الليلة مينعدون وبعد أسوأ من حالتي.. فالأولوية بالنقل الهم بعدين اني.. ضليت صامد وضاغط عليها علمونا شنسوي.. روحي شايغة وبالگوة شايل الرشاشة.. صار رمي والأصوات تسطر سطر.. مطربس بالماي حتى حركتي ثگيلة.. بين ما نادى الضابط الطبي على أسمي ورحت.. تحركنا رأسا لبغداد.. اكو منهم مات بالدرب.. والرجله مبتورة.. المثل حالتي.. وكلشي يعني عجزت إن ابقى اباوع.. وصلنا للمستشفى ودخلت لوحدة من الردهات.. داير وجهي وضاغط على ايدي.. سمعت صوت شخص أعرفه.. اي مااغلط.. انداريت شفته قاسم اخوية..

ضليت اباوعله ومصدوم.. شجابه هنا.. لابس هدوم ممرض.. باوعلي بصدمة واجاني يركض..نزعني القميص والفانيلة..
قاسم : سهلة من هاي دزوني..
حامد : انت قاسم لو اني دااهلوس..
قاسم : اي انه.. رخي أعصابك ولاتحچي..
سكتت وخلالي مخدر ماادري شنو هو بعد كمل وطلعها.. خيط مكانها وشدلي زندي كله بباندج..
قاسم : عندك العافية.. بس غير الضمادة كل يومين..
حامد : ان شاء الله.. انت شجابك هنا مصدوم تره..
قاسم : مو تخرجت تمريض.. فقدمت وانقبلت هنا بمكان ما اروح للجبهة.. لواء همات وياي..

سكتت بس حركت راسي بمعنى اي.. بقيت كاعد شوية وطلعت رجعت للبيت..ضليت اسبوعين بالبيت الجرح ماطاب أذاني وحرت شسويله.. كل دكتور يكلي شكل.. واحد يگلي الجرح خاس واحتمال يمشي من زندك لكل ايدك.. خبلني.. خليت وعفته..

آخر شي ابو جمال انطاني عنوان دكتور مضبوط ورحتله.. رجع خيطلي الجرح وضمده من جديد.. عاد وراها يله استعدل وبلش يطيب..

بآخر أيامي بالبيت بلش دوام رائد.. انقبل معهد طبي قسم أشعة.. رحت اني وسارة بأول يوم شوية ورجعنا.. عبالك ذاك اليوم لمن اخذته للمدرسة.. هسه راح معهد..
اني بعدها بيومين تلاثة التحقت ومثل كل مرة.. نفس الخوف والقلق بس عنصر البرود والصمود بدا يتخلل نفس كل جندي وضابط.. صار سبع سنين ع الحرب الدامية هاي.. مالها نهاية لو شلون.. محد يعرف..

وره فترة مريت ع المحل أشوف شصاير وشنو التغيير.. سلمت ع الحجي وگعدنا.. جبناها ع الحرب وشلون الناس صارت كلش قليل تشتري.. تطبك كومبارات ثنين بمكان الزولية.. غالي محد يشتري..
ابو جمال : اگلك اخوية.. ليش متصير بالحزب..
حامد : لا والله..
ابو جمال : ها ليش..
حامد : مرتاح هيج ومتعود ع الخدمة..اكيد الحزب والريس على راسنا كلنا..
نخاف نحچي كلمة حتى بيناتنا نكول الحايط عنده إذان ويسمعنا شنگول.. لهالدرجة يعني.. رفضت ادخل الحزب بس اني معتدل.. لا وياهم لا ضدهم.. بصف الحايط أمشي..

بيوم رحت للسوك جبت فواكه وخضورات.. براس الفرع وأشوف سيارتهم نازلين منها ضباط.. يالله دخيلك.. تمشيت سلمت وطبيت للبيت.. ماكو دقايق واندفرت الباب علينا..
- : نريد نفتش.. سمعنا بفرعكم أفرارية..
حامد : تفضل فتش..
فات يفتش گلبوا البيت گلاب..حتى جوه الكاونتر نزلوا يشوفون .. اندار واحد منهم شاف ملازم واوراق رائد ع الميز بالانگليزي دراسته..
- : ابنك اشنو دراستو..
حامد : طالب معهد طبي..
- : يله ماضل شي ويخدم..
حامد : اكيد سيدي..
- : حناخذ من هاي الفواكه اذا ممكن..
حامد : البيت بيتك.. بگلبي اكول هو اني اكدر اگلك مو ممكن.. هسه يعلگوني..
اخذوا وراها طلعوا.. رعب موطبيعي بالوكت اليفتشون بي ع الأفرارية..

وره طلعتهم بساعة اجه رائد حاط السترة الطبية على ايده ومرتب من فوك ليجوه.. حط غراضه بحضنه وگعد يسلم وراها سكت.. اني جنت هيج.. بس سلام واسكت.. طالع عليه كطبع واسلوب وحتى شكل..

مرت فترة قصيرة واني بالبيت كاعد يم الراديو دااگلب بي اريد اسمع شمسوين الإشارة تكطع.. فات هو راح لغرفته رأسا.. تانيت دقايق ورحت وراه.. باوعلي وسكت..
حامد : شبيك يابة..مو على بعضك صار فترة..
رائد : ماادري شبيه ..منتظر تذكره..
حامد : شبي..
رائد : باچر محكمته حينسجن عشرين سنة..
حامد : لا بشرفك.. ليش خطية شمسوي..
رائد : مااعرف يابة.. حاولت أوصل لأهله لأن شالوا منا.. واحد جوارينهم كال هذوله معارضين للحزب لتتقربلهم يشيلوك وياهم.. فسكتت.. بس مقهور علي.. ممرودة روحي..
حامد : ديربالك على روحك محد يفيدك.. الله أعلم شمسوي.. يابة انت تروح بطريقك وترجع بدون كلام زايد.. كلمة تضيع حياتك حرامات..
رائد : اي اكيد اني ماشي بحاچيتك..

ضليت گاعد يمه واحاچي.. ولدي مااعتبرهم بس ولدي.. خواني .. اخلاص اختي البعيدة.. سارة أمي ومرتي.. عائلتي اكبر من كلمة عائلة لأن أفتقر لمعنى أفراد العائلة الحقيقي..

وراها نزلت للواجب وبدت الاشتباكات تتصاعد وبالمقابل القتلى يتصاعدون.. بهالشكل.. بين ما خلص دوامي ورجعت.. اجت سارة حضنتني وتبچي بشكل هستيري..
حامد : يمعودة.. سارة شبيج..
ماكو متحچي.. خفت بيها شي لو مريضة.. محمد واخلاص نايمين گعدوا على صوتي ورائد بالدوام..
رفعت راسها وحچت بشهگة : شفته بعيوني....

يتبــــــــــــــــــــع.................