رواية اسألي عني الليالي الفصل الثالث وخمسون 53 - بقلم رقية جاسم

دافية مثل البحيرة و حارة مثل الرصاص
هيج اعرفج ..

دنيا مابيها سكون عيون لبوة وصوت كـاس
هيج اعرفج..

قناة التليگرام

حساب الانستگرام

الـبـارت الـثاني والـخـمـسـون...............

وره هلايام جنت كاعدة وي خالة بالهول اتفرج تلفزيون بالليل..جان يدك تلفوني.. كمت اشيله عبالي صگر..منو يخابرني غيره..بس شفته رقم غريب عفته ما شلته..دقايق ورجع خابر..شلته ..صوت بنية تبجي حتى ما فهمت..
- : دنوة..هاي انتييي..
دنوة : منو معرفتج..
- : شبيج اني رزان..
ضليت صافنة..هاي شمعرفهه برقمي..شجابهه علي اصلا.. حتى نسيتهم..محد تذكرني من تمرضت ولا كال شبيهه ما بيهه اجي اشوفهه..هي وسما عود خواتي..كتلهه ببرود وهدوء : ها هلا بيج..
رزان : شبيج ويايه..
دنوة : مابيه شي الحمدلله..شرايدة..
رزان : شبيج ليش تحاجيني هيج..شمسويتلج اني.. اذا امي هي مسيطرة ع الوضع اني ما اكدر اسوي شي..

دنوة : اي الله يحفظهه الكم..ما كتيلي شرايدة..
رزان : اليوم اجيت لبيتكم ولكيته مقفول..
دنوة : ها شعجب كلتي اشوف اختي شصار ما صار بيهه.. تهجرت وطرحت هسة مسافرة..وانتي توج تذكرتي تسألين علي.. مشكورة ما قصرتي..
كامت تبجي وتحاجيني : عفية لا تحجين ويايه هشكل.. والله دائما احاول اوصلج بس امي متقبل..
دنوة : تره هيانة بيتنه بس شارعين..
رزان : ادري بس امي شلون..
دنوة : ها..اي زين..
تنهدت ورجعت تحجي : صدك مسافرة..
دنوة : اي والله..بالحلة انه مو بالبصرة..
رزان : زين شلون..احتاجج..
دنوة : خير ان شاء الله..

رزان : سالفة طويله..بس ححجيلج حتى من ترجعين يكون عندج علم..
دنوة : احجي اسمع..
رزان : تدرين من توفى ابويه لحد هسة عمامي ما عافونه.. حتى جدو..دائما يجينه ويشوف خاف محتاجين شي.. خصوصا اني وسما صرنه بالكلية يعني مصرفنه اكثر.. ملابس وغيرهه..حتى فلوس الخط عمو قاسم يدفعهه.. قصدي من هذا كله هم عدهم اتصال بينه ويجونه..بس امي تريد تزوج.. تكول بعدني مو حيل جبيرة ليش اضيع حياتي.. فاجه رجال خطبهه من جدو ابوهه وخوالي..صارت عادي وعقد سيد بعد بس محكمة..عمو قاسم درى وكال لجدو الشيخ.. هسة يريدون ياخذونه يمهم اني وسما وامي متقبل.. اني همات ما اريد اعوف امي وعمامي معندين..شلون..

كامت تبجي وتحجي : عفية شلون والله ما اكدر اعوف امي.. وهي هم حقهه قابل بالخمسينات عمرهه..
دنوة : شنو المطلوب مني..
ضلت صافنة حتى ما جاوبتني..عبالي راحت كتلهه : مع السلامة انه اروح عندي شغل..
رزان : وين وييين..صبري احاجيج..شبيج ويايه شمسويتلج اني..هم يحبوج فدوة حاجيهم..كليلهم ما ياخذونه منهه بحجة هي حتزوج واحنه ما نخلي بناتنه يتربن عند غريب..
دنوة : عندج لسان ادافعين بي عن نفسج..وسما همات عدهه.. هسه صار اسمه جدو وعمو..مو جنتي تكولين عليهم قتلة .. امج هم عدهه لسان هي تحجي..
دتجاوبني جان اسمع صوت مرة : جيبي انتي ثولة..
اخذته منهه وحاجتني : الو دنوة..

دنوة : منو..
- : اني شذى شبيج ما عرفتيني..
دنوة : ها اي عرفتج..
شذى : جاوبيني ع الكالتلجيا رزان..
دنوة : انه شنو اجاوبج عيوني..انتي امهه وتعرفين مصلحتهه اكثر مني..اذا تبقى او تروح يم عمامهه..انه بالحالتين ما عندي علاقة بيهم انتهت العلاقات بيناتنه..هسة بحجة شنو ارجع احاجيهم..بعد ما طردوني وانه جاية من غير دولة وطريق شطوووله بعدين يكلولي ما نستقبلج لأن انتي سبب موتة ابوج .. الله اعلم منو كايللهم هيج.. حجيتهه بنبرة صوت متقصدة اريدهه تضوج وتكول منو حاجي هيج علي..
شذى : تره ما رايدتج اطلعين يونس من بطن الحوت.. اريدج تحاجين جدج بس..

دنوة : انتي ما ادري شلون مفتهمة الموضوع.. انه شدخلني بكل هاي اللغوة والله مالهه داعي..اليريد شي يتنازل عن شي..لو بناتج لو زواجتج وانتي بكيفج..اما شغلة احجي وي جدي لو واحد من عمامي فمستحيل..بعد لساني ما يطخ لسانهم..مثل ما نسوني نسيتهم..وانتو هم نسيتوني ولا كلتو اختنه من ابونه..بس الحمدلله..ربج ياخذ شي وينطي شي.. عوضني بمكانكم عشر مرات..هسة اروح واتمنى بعد ما تخابريني وخصوصا انتي.. لا عبالج ناسية شسويتي بيه..كله من صحتي وعافيتي خسرته بسببج..وهسة جايتني تريديني اساعدج..انتي شنووو خاطر اساعدج..انه لو اعرف الرقم مالمن جان حتى ما جاوبت وسمعت صوتج الغثيث.. سديته بوجهه وايدي ترجف.. بكل عين صلفة جايه تريد تصالحني وهي شوفتني الويل..لسه اذكر اليوم الدزتني بي للسوك بنص الظهر..

ضربتني وسوتلي عمل خلتني اتخيل الناس كلهم حيوانات وشياطين..من غير المرضه هاي مال اعصاب شسوت بيه حتى حمل ميصير عندي..كله من وراهه..وهسة بكل عين صلفة جايه تريدني اساعدهه.. انه شكو..الى جهنم شعليه..اخذت نفس وخليت التلفون ع الميز وكمت للغرفة ردت انام راسي يوجعني..جان تجي خالة
الحجية : شنو حتنامين..عصرية حبوبة مو مال نوم..
دنوة : راسي يوجعني خالة..بلكت عندج حباية شي..
راح لجنطتهه طلعت شريط وانطتني منه حباية..اجت كعدت يمي وتحاجيني..
الحجية : منهو الخابرج..صگر..
دنوة : لا..رزان اختي..
رفعت حاجبهه بتساؤل : رزان..يا شمالهه هاي..شنو هسة تفطنت بيج..صار سنين لحد حجى لحد كال..
دنوة : اي خالة هو انه كتلهه هيج..

الحجية : اي وشكالت المسعدة..
دنوة : جدي يريد ياخذ البنات يمه لأن شذى حتزوج..
الحجية : عزه العزاهه..شتزوج هاي من كل عقلهه..رجلهه مصارله تلث سنين من ميت..بعدهه روحه بالبيت..
دنوة : اي شمعرفني انه خالة..اصلا عفتهم وناسيتهم مدري شذكرهم بيه اصلا..
الحجية : بس خطية هيج بالعجل لطخت الملح والزاد بالحايط
دنوة : تكول بعدني صغيرة..
الحجية : اي هن كلهن يكولن هيج بس علمود يتزوجن.. وهسة هي شرايده منج بالضبط..
دنوة : تكلي حاجي جدج ما ياخذنه عنده..
الحجية : بله هاي شتحطلهه وتطيب..انتي شعليج منهه.. والله هذول ما تصيرلهم جارة..
دنوة : اي هو هيج.. فلهلسبب كتلهه انه ما ادخل..

انتي امهم وتعرفين مصلحتهم اكثر مني..سواء ضلن عندج او راحن..واليريد شي لازم يتنازل عن شي..
الحجية : اي عفية عليج حبيبة..انه كلش كارهتهه لهاي العكربة ع السوته بيج..ما ادري شلون جاوبتيهه..
دنوة : انه لو ادري بيهه هي شذى جان ما جاوبت..بس شلون عليهه درب..خلت رزان تحاجيني بالبداية..تدري بيه اذا سمعت صوتهه اقفل الخط بوجهه..
الحجية : مو دا اكلج عكربة ييمة..عوفج منهه حبيبة.. انه مثل امج واعتبريني امج حتى..
ابتسمت وبستهه من خدهه : احلى ام بالدنيا والله..
خلت ايدهه على زندي بالخفيف ومبتسمة : ختولي يمة.. تعاي افطنج بسوالفنه ببيت الشيخ..
كعدت تسولفلي تحاول تنسيني عبالهه ضجت..

تعودت ع الموضوع وصار شي طبيعي عندي..وجودهم وعدم وجودهم واحد..المهم صگر موجود تسوى عندي الدنيا كلهه.. من يخابرني بالليل يكلي مكدرت انام الا اسمع صوتج.. هسة حضنج محروم منه صوتج هم..نحجي شويه لحد ما يقفل نعاس ويروح ينام..صرت اتحسر على الشهر ونص العايفته بيهن وكاعده ببيت خالي..اكول لو باقية عنده واشوفه من يطلع ويطب للبيت ع الاقل اشوفه خوما هسه..يله .. كلشي يهون ويخلص ونرجع مثل كبل..كلش متفائلة بهاي الجملة احسهه حقيقة وتلامسني..خصوصا لمن اسمعهه من صگر.. خالة صحيح ويايه دائما وتكعد تحاجيني لمن تشوفني ضايجة وكاعدة وحدي..بس صگر يختلف..عبالك يحضن الجزء الخايف مني لحد ما يروح الخوف والقلق..كلشي احسه يم صگر بعد مستحيل احسه يم غيره..

فزيت من افكاري على صوت اخلاص يمنه..
اخلاص : يمة مشتهيه شي اسويلج..
الحجية : لا يمة انه شاكل من وره هلسكر المصخم..
اخلاص : اسم الله عليج حبيبتي..الله يطول بعمرج.. هسة اوصي محمود يجيبلج تكة شوي من بره..
الحجية : يااا..ولج لا تعبين روحج ورجلج..كتلج ما اكل شي ثكيل..شوفي دنوة خاف تريد شي..
كبل لا تحجي حاجيتهه انه : لا ما اريد شي..
ما اريدهه تحملني منية بأكلهه..كمت اتحسس من كل كلمة تكولهه..كل كلمة تطلع منهه احسهه متقصدة تكلياهه ولو دورات ما تقصد بس بعد تأثير الايام والسنين هذا وين يروح .. عاينت علي بطرف عينهه وراحت..رجلهه احسن منهه.. اسلوبه حلو ومثقف..هي مو تكول همجية وتصيح بالحجي.. بس تغث وحجيهه كله بسامير..

انه اسوي روحي ما سمعتهه فهي تسكت..كامت متلح.. خاصة وره ما طلعت حامل..ملتهية بروحهه وهذا الافضل الي والهه.. هي فترة زمان ونرجع لبيتنه بعد..

ضليت كاعدة عند خالة نسولف..بعدين وره ساعتين اجه محمود والحجي جايب تكة وبعد جم شغلة..كمت وي اخلاص ساعدتهه سوينه الاكل بعدين صبيناه وكعدنه نتعشه مثل كل مره.. ماكو شي جديد..مليت من النظام..يعني انام بالليل اكون متأكدة الصبح حكعد على نفس الوضعية ونفس الحجي ماكو تغيير..بس اخلاص تزيد مشاكل..خاصة وره ما يطلع رجلهه للشغل..تتفرعن علي..ومن تجي خالة تعوفني.. بيوم طلعت خالة تقيس سكرهه ومنهه تشتري ملابس الي والهه.. راح وياهه الحجي..انه ضليت بالبيت وي اخلاص.. عافتني وراحت تنام العصر..كمت ع التلفون ضليت اكلب برسايل صگر جان يدك..جفلت لأن جنت مندمجة بيهن..كتله : صگرر خوفتني..
صگر : ههههه..ليش حبيبي..
دنوة : جنت اكلب برسايلنه ودكيت فجفلت..

صگر : يولي والله انه هم..تذكرتج واجيت قريتهن كلت اخابرهه مشتاك لصوتهه..شلونج..
دنوة : زينة بس مشتاقتلك بكد رحمة الله على كولتك..
صگر : بعد طولي هلطول..ما ضل شي وترجعون..
كمت من مكاني وكفت يم الباب : هااا..تحجي صدك.. شوكت يعني شلون شصار..
صگر : يولي بالهداوة..كبل يومين جنت بالبصرة..
دنوة : شنو شنووو..بالبصرههه..شعندك عيني..
صگر : رحت اشوف الوضع شلونه..شصاير..اشوف بيتنه
دنوة : شكد عرم طبعا ولا تسمع كلام..جنت تكدر تخلي شخص هناك يشوفلك الوضع ميحتاج تخاطر بروحك وتجي .. اي بله وششفت هناك شصاير..
صگر : ها يابة سالمين..خلاحجي شبيك..شنو هللسان
دنوة : ها هيج صار الحجي..فوك ما خايفه عليك..

صگر : اي باباتي هسه انه شكايل..بس غير اروح اشوف شصار ما صار..خوما اعوف الموضوع ع الاخير..
دنوة : زين شصاير..
صگر : صافية فد دور..لحد يدري بسالفة محمد ولا شي..
دنوة : يعني شنو لحالنه طلعنه..
صگر : مو كتلج الحذر واجب..والجماعة هناك متجددين.. جايين جدد بمكانهم والسالفة شكلهه انست بعد..
دنوة : صگر تحجي صدك..
صگر : يولي جاذب عليج كبل..
دنوة : لا شبيك بس دا اسأل..
صگر : يله هلفترة واجي اخذكم ونرجع بعد..انه هم مليت من الوضعية..هنا بيت خالي مدري شبيهم..
دنوة : ليش شبيهم..

صگر : ما ادري والله..ما ردت اسأل بس مبين بهاء الصغير عنده مشكلة..ما يجي للبيت..كل ما انزل من الواجب ما الكاه يكولون يجي كل شهر مره..وبنفس الوكت هو ما يشتغل.. يعني وين يروح بهلشهر..بعد ما اعرف..
دنوة : معليك بيهم حبيبي..يمكن شغله تخصه معلينه..
صگر : اي هو شدا اكول..ما اريد ادخل..
دنوة : زين انه مشتاقتلك..وانت جيت كتلي حنرجع.. بعد شيصبرني منا لحد ما تجي..
صگر : هههههه..صبري ابوية انتي..اجيج لتخافين.. فد شهرين بالزايد بين ما اخابر امي وخالي..
دنوة : على راحتك..
ضلينه نحجي بعدين كال حروح..ودعته وسديته.. هذا الخبر يمكن الفرحة الوحيدة الدخلت لگلبي بهلفترة..كل هاي الايام عشتهه بدون شعور..

لا فرح ولا حزن..ايام عادية وتمر..من عدا اليوم الاجه بي صگر للبيت..شلون كعدني من النوم على صوته.. جنت مشتاقه لهيج لحظة تعيدلي ايام جنت انام على صوته واكعد على صوته..هسة من خابرني وحجالي تغيرت نفسيتي.. منتظره اليوم النرجع بي بفارغ الصبر..خلصت سنين بس اصبر واصبر..اكول اي هسة تمر وتخلص..وفعلا دتمشي وتخلص ويرجع الوضع طبيعي..

الحمدلله هيج ولا غير شي.. كمت فتحت التلفزيون وكعدت اتفرج..نص ساعة جان تجي اخلاص..توهه كاعدة ومطنكرة جنهه تريد تتعارك..
اخلاص : شو كاعدة..كومي جيبيلي شي اكله..
ما جاوبتهه..شنو خدامة يمهه..
صاحت بيه : شبيييج مو احاجيييج..
دنوة : ما تكومين تجيبين انتي..خدامتج انه..
اخلاص : والله عيني ما طول كاعدة ببيتي معناهه انتي خدامتي..واذا ما كمتي هسة اسوي بيج سوايه ما صايرة
دنوة : لا خفت كلش..
درت وجهي عنهه..كامت تصيح وتجر بيه من زندي..ما انطيتهه ردة فعل.. اظافرهه نبتت بزندي..عتيت ايدهه جان تعيط
اخلاص : انه تسوين بيه هشكلللل..جلبهههه..
دنوة : خبال حتى خبال..شبيج بابا كبيتي علي..

يمج حواليج انه وحدة كافيه خيري شري شتردين مني..
عتتني من شعري للكع..راسي صار ع الازارة مالت الحايط.. حسيته تكسر..كمشتهه من ايدهه واحس بدوخة فضيعه.. كمت ابجي مدري من الدوخة مدري من الوجع..ادور هي كامت تلهث وبطنهه كبرانه..خفت تطرح وتنذب براسي..صارت عندي عقدة من هلموضوع..كمت بالعجل حسيت الدنيا صارت سوده ورجليه مو بالكع..خليت ايدي على راسي ورحت كعدت ع الدرج بالعجل..بس احس شي حار نزل على زلفي..نزلت ايدي اتلمسه..خليت ايدي جدامي.. دم..تهسترت..كمت عليهه ومن الدوخة اشوفهه عشره مو وحده..كتلهه : شتردين مني.. تردين تموتينيييي..لا تخافين..اي لا تخافين..انه ميته اصلا.. كل هذا الصار خلاني ما احس بطعم الدنيا..وانتي اجيتي تجمالة .. ما قصرتي..شوفي خاف عبالج محملتني منية بكعدتي هنا.. والله مرة اللخ بس مدي ايدج علي وشوفي شسوي بيج..

تخوصرت جدامي وتحاجيني هي وعاوجة حلكهه : اي بله شتردين تسوين..انه خفت كلش الصراحة..
دنوة : خفتي ولا ما خفتي طبج طوووب..زين لو لا.. كافي اهاين لعبتي روحي والله..هسة انه شذنبي هيج طكيتي راسي بالازارة جي انتي مطنكرة..يعني تذبين حركتج بيه.. انه شعليه شكد اكرهج يا جلبهههه..اكرههههج..كلشي سويتي بيه الله يحاسبج علي..لا تشوفين روحج مرتاحة هسة..على كد الوجع الضوكتينيا حتضوكي انتي..لمن تعيريني بالحمل وخليتي صگر اسبوعين ما يعاين بوجهي من وره سالفة طارق.. كله من راسج..انتييييي..اي انتيييي ام البله والمشاكل.. الله ياخذج واخلص منج..كولي امين..
اخلاص : الله ياخذج الج..ام الرجولهههه.. ما عندج كرامة من حضن لحضن وبعدج بكد القندرة..والله عمي زين الج عينت تعاينين بوجه اخوي..يسواج ويسوه راسج..ع الاقل ما جان بحضن هاي وذيج مثلجججج..

دنوة : انتي بيج خير احجي هلحجي جدام صگر..حتى يسويج نصين..بس جاهلة وجبانة همات..انه ما مسويه شي غلط..وصگر يعرفني ما محتاجة تقييمج..عفتهه ودرت وجهي اروح للحمام..حسيت بشي قوي انركع بظهري ادور طاح بالكع وتكسر..درت وجهي وصحت بيهه : يا رعنهههه..
شامره النفاضه علي..كسرت ظهري..
اخلاص : انتي الرعنه..لج لو بيدي اطردج هسة واخلص منجججج..اكرهج يابشرررر اكرهججج..
دنوة : تكرهيني تضربيني بهايييي..يالماعندج ذررررة انسانية جلبههه انه الاكرهج مو انتييي..بسيطه باجر اعوفلج البيت وارجع للبصرة..انعل ابو اليبقى يمج ويكابل جهرتج.. عفتهه ورحت للحمام سديت الباب وكمت ابجي..ليش تكرهني هاي الحقيرة..شمسويتلهه..حتى وهي تضوجني لمن تصيحني اجي اشوفهه شتريد..

اكعدهه لدوامهه الصبح واخلي الاكل جدامهه..من عدا سوريا جنت اغسل ملابسهه بيدي ما جان عدنه غسالة..تجي تفوت من يمي تعاينلي بطرف عينهه وتتأمر..غسلي هاي زين.. هاي لتخلين تايت عليهه ادور تتروح تتلكع..كل هذا ما غزر بعينهه .. تجي تعيرني على زواجتي القديمة..ادري شنو قابل بيدي.. والله مو بيدي..كله بسبب ابوي..هو زوجني بالغصب حتى ما جنت ادري..وهاي الجلبة تكلي من حضن لحضن..بس والله خلترجع خالة واحاجيهه.. حتلو ارجع وحدي ميخالف..بعد ما ابقى يم هاي الحية..طكت گلبي هي وحجيهه المر.. سم .. خوب من صارت حامل..تجي جدامي تحجي عبالك واحد دازهه علي..اكلج دنوة شسمي ابني اذا ولد..واذا بنية شمسيهه..ها اريدج تساعديني بالجهاز مالتهه..يله يوم الالج ان شاء الله انتي هم خطييية..وصگر اخوي حبيبي ما تهنى بحياته..ضل يروكض هنا وهنا..

حتى الطفل ما كمش بيده..شبيج بس ترجعين شدي حيلج .. هيج تحاجيني..عبالك انه قاصدة الديصير..بسوريا جنت طفلة وما اعرف دفعت القنفة وطرحت..ادور اجيت هنا وصارتلي الحالة النفسية..الادوية والمرض كله أثر ع الحمل.. كل هذا وأعبرلهه..اكول هو انه ما باقيه هنا ليش اتعارك واسوي هوسة بعدين من تريد تجينه تكعد تعيرني جدام صگر..كمت اخاف منهه من خلته يصيح علي وعافني حتى ما يخابرني ما يكول مريضة صارلهه شي..اخاف تحاجي وتسويلهه فلم من افلامهه ويصير عصبي..

مسحت دموعي وكمت غسلت الدم بس يوجعني وجع مو طبيعي..غسلته شلون مجان وطلعت..صارت بوجهي.. عفتهه ورحت للغرفة..تغطيت ونمت..اجاني نفس الحلم القديم .. نفس الرجال والغرفة الظلمة..ابجي واحس صوتي عالي بس محد يسمعني..الصوت بره الغرفة اعلى من صوتي..انفتحت الباب وطب هذاك الرجال..كمشني من رگبتي ويضرب راس بالحايط احسه تكسر ويصيح بوجهي..صگر لو يدري شمسويه يذبحججج..يفشر ويغلط لحد ما انفتحت الباب مرة اللخ وفات شخص طويل..شالني وشمرني يم رجله..فزيت عظامي مكسره عبالك واحد جان يضرب بيه بالحقيقة..شفت خالة يمي دتشرب دواهه..عدل كعدتي وخليت ايدي على رگبتي.. مخنوكة منهه وايدي ترجف..كل ما يجيني هذا الحلم احسه حقيقة.. نفس الشعور ينعاد..الصوت والخنكة من الرگبه..خالة شافتني كملت كلاص المي وحاجتني..

الحجية : شبيج حبيبة..شو وجهج مصوفر..
دنوة : ما ادري حلمت حلم مدري شلونه..
الحجية : شلون..
رحت كعدت يمهه سولفتلهيا..كتلهه : ما تعرفين شنو يعني..
الحجية : والله شمعرفني يخالة..خاف نمتي ضايجة وتحلمتي هيج حلم..دورات تصير هيج حالات..
دنوة : لا دائما يجيني بس صار فترة تلث شهور اربعه ما حلمانه بشي..اليوم حلمت..
الحجية : لا تخافين عيني ماكو شي..
عاينت عليهه ودنجت النوم بعده بعيوني : حاجيتي صگر
الحجية : خابرني البارحة بس اليوم لا..
قربت ايدهه تريد تخليهه على راسي ونظراتهه تتفحص شعري..

الحجية : شو شعرج مبلل ليش..بعدين هاي شنو..تعاي جاي ليش هذا الدم يمعزاية..
هي خلت ايدهه وشاغت روحي..كمزت من مكاني : لا خالة لا تكمشيهه..توجعني يمكن مورمة هسة..
الحجية : ردي الباب وتعاي احجيلي..
كمت سديت الباب واجيت كعدت يمهه..كتلهه : انه جنت اريد احاجيج بس كعدت مختنكة من الحلم..
الحجية : احجي يمة لا تخوفيني..
دنوة : هاي اخلاص بعد ما اتحملهه..اليوم لمن طلعتو كعدت اتفرج تلفزيون وهي راحت تنام..بعدين كعدت من وحدهه مطنكرة وضلت تتأمر علي..سويلي هيج وسويلي هيج.. خالة قابل انه صغيرة..يعني شتشوفني..عبالهه بعدني طفلة ومراهقة انسى بالعجل..كتلهه ما اكوم شنو خدامتج انه.. كامت ضربتني وطكت راسي بالإزارة..وضربتني بالنفاضه على ظهري..

بشهكة هي وتخلي ايدهه على صدرهه : عزه العزاهه.. هاي صدك رعنه وادبسز..هسة احاجيهه شلون تمد ايدهه عليج .. جا شنو عبالهه تايهتلهه..
دنوة : اي فدوة حاجيهه لأن تعبتني صدك..من غير التعيار مالتهه على كلشي..حتى على شغلي وانتي تدرين بيه شلون اشتغل .. ما اعوف شي ناقص..بس تريد اطلعني غلطانة بكلشي..والحمل تحاسبني علي عبالك هي رجلي..ها ليش مو حامل..اي فاهية مابيج خير..اصلا بعدج جاهلة شجابج ع الزواج والخلفة..
سكتت شوي ودموعي نزلت..حجيهه مثل السجاجين بگلبي .. كتلهه : خالة هو الصوج مني صدك..بس مدا انطي بنفسي .. صگر ساكت ومتحملني..حتى من اكلة اريد اروح للدكتورة يكلي ما يحتاج..ما مستعجل..مدري يحجي صدك مدري ما يريد يكسر بخاطري..

كمشت ايدهه وعيوني كلهه دموعي..كمت اشوف غواش : الصوج مني..بس شسوي والله مو بيدي..غمضت عيوني ودموعي ترست خدي..خليت راسي بحضنهه وابجي من كل گلبي..بس صوت شهكاتي تنسمع..انهضمت من الموقف .. شوي اكول يمكن حجيهه صحيح..هي تحجي علمود صگر وحقهه.. اخوهه اكبر منهه بكومة ومتزوج صار سنين ومرته ما صارت حامل..هي تزوجت صارلهه شهور وحبلت.. بعدين اكول لا مو حقهه..هو انه وين شفته لصگر..نص الشهر ماكو .. لو انه مريضة لو هو بالواجب..هذاك الشهر طلعت سالفة ظهره وضليت اداري بي حتى ما انام يمه ع الجرباية علمود ياخذ راحته..ومن بلش يصير زين طلعت سالفة محمد وهاي جيتنه .. حتى يوم الكلت من صگر ياخذني حرتاح واخلص من التفكير والتعب الشفته يم ابوي ومرته..

حضنتني وتمسح على جتفي..
الحجية : حبوبة لا تبجين تروحلج فدوة..ولو بنتي بس انتي احسن منهه الشاهد الله..لا يوم عليتي صوتج ولا راددتي واحد من عدنه..
دنوة : شنو الفايدة..هي احسن مني ع الاقل حبلت..
الحجية : خالة تره الحمل رزق من ربج..لا تكولين هشكل.. هاي مو مرة عقيل افتر بيهه دكاترة البصرة كلهم وماكو فايدة.. لحد ما راحت على دكتورة طاحت على علتهه وي الدكتورة وربج صارت حامل..هاي عود هي خشت بالتلاثين وحبلت.. عودك انتي بعدج شحلاتج جنج وركة ريحان..ذبلتي فترة بس هسة تخبلين وبس نرجع للبصرة انه اروح وياج بنفسي للدكتورة واضل وياج خاطر تلتزمين بموعد الدوة وتمشين على حسب الاصول..شو عاينيلي..
رفعت راسي من حنجي..

باستني ومسحت دموعي..لمسة ايدهه مالت مرة جبيرة.. تمنيتهه امي من صدك مو عمتي ام رجلي..
الحجية : انه يمج حبيبة لا تقهرين بروحج..ختولي هاي خليصان محد يخلص منهه..حتى وهي صغيرة هم هيج اسلوبهه معقد وهي مدري شلونهه..المرحوم دللهه زايد وطلعت عينهه..الا هي بهذا كبرهه من تشوف صگر تكوم تتراجف.. تخاف منه لا تشوفيهه تتفرعن براسج..هسة انه لعيونج اروح احاجيهه واكللهه تفك عنج..
ابتسمت بتعب من البجي : ما ادري بيش اجازيج.. شكد وكفتي وياي والله احسج امي..
الحجية : انتي هم فد وحدة..انه امج يول شنو تحسيني.. قابل عندي غيرج..مرة ابني الجبير واحبج من صغرج..يوم اجيتي للدنيا لون عيونج جان ازرك وسمارج يخبل.. كلت هاي شلون بنية حتطلع..

ادور شوي شوي من كمتي تكبرين تغير لونهن وصارن هيج .. الحجي بيناتنه هيج يخبلن..خضر وعسليات ياهو عنده مثلهن ويتفلسف براسج..بس كليلي..
ضحكت على حجيهه شلون تحجيلي تريد تنسيني.. بستهه من راسهه ورجعت بحضنهه..
الحجية هي وتمسح على جتفي : هسة كومي جبتلج دشداشة جديده وقطعة ملابس لخ..شوفيهن حلوات..
دنوة : اي ميخالف..بس خليني يمج شوي..احسج بمكان صگر تشابهون هواي..
الحجية : يااا..جا غير وليدي شلون ما يشبهني..
ابتسمت واخذت ايدهه خليتهه بيدي..ضلينه نحجي لحد ما طبت اخلاص..عاينت علي ودارت وجهي..
اخلاص : يمة ما جوعانة صبيت عشه..
الحجية بنتر : امشي ولي حتى ما اريد اكل منج..

حشا نعمة الله..
اخلاص : ياااا..يمة شبيج وياي شمسويتلج..
جاوبتهه هي ودايرة وجهه : تعرفين روحج شمسويه..
اخلاص : هاااا بس لا هاي الحية حجتلج سالفة اكبر من راسهه تريد تسويني غلطانة..
الحجية : انتي الغلطانة..شلون تضربيهه بالنفاضة وطكين راسهه بالإزاره..بلكت مشكوك راسهه وين انطي وجهي.. مخبلة انتي..بعد اذا مديتي ايدج عليهه تكسف احوالج بهذا كبرج..سمعتي لو اعيد..هاي عود خطارج احنه وهيج تسويلهه تره اذيتهه من اذيتي..اذا هنتيهه معناهه هنتيني..
اخلاص : ايباااخ..يمة هذا كله علمود هاي العاكر.. يله قابل شمسويتلج..جايبتلج الحفيد لو الحفيدة..شو كاعدة ومصفطة حتى صگر لاعبة براسه يكول ما اريد جهال..

الحجية : لا لاعبة براسه ولا بطيخ..يحبهه ومتفاهمين.. انتي ياهو مالتج بكلشي حاشرة خشمج..
اخلاص : هاي فوك ما اريد اخوي يرتاح تكليلي هيج..
الحجية : اخيج مو صغيرون خاطر تجين انتي تكليلة هذا الصح وهذا يفيدك..هو يعرف مصلحته وين..
دنجت يمي كرصتني من زندي بكل حيلهه..صحت : ااااخ وخري شبييييج..عيوني دمعت هلكد ما كرصتني حيل..
اخلاص : هاي خاطر ما تفكين حلكج بعد..
الحجية : وانه شنو هنا..ماكو احترام..اشو دوخري.. مرة اللخ انه اعوفلج البيت مو هي..
عتت ايدهه مني ودارت وجهه حتى ما عاينتلهه : امشي ولي ما اريد اكلج..شبعت من مشاكلج..
اخلاص : هيج تسوين بيه علمود هاي الجلبة..بس ميخالف امي وما اكدر اجاوبج..

الحجية : شوفي دا اكلج..خافي ربج بيهه خطية يتيمة وما عدهه احد فوك ما تصيرين اختهه تجين تصيرين عدوتهه.. بس يجي يوم ويعاملون بنتج مثل ما عاملتيهه..
اخلاص : اسم الله على بنتي..ابيش طالبتهه تصير مثل هاي العاكر..حتى دراسة ممكملة..
كمت من مكاني بالعجل بحيث حسيت بسواد مثل اللون مالت الملابس..دخت كلش بس كمشت روحي..كتلهه بنتر : لا تشوفيني سكتت معناهه خايفة منج..بس انتي جاهلة شجاوبج تجاوبيني عشرة بدالهه..
رادت تحجي بس سكتتهه خالة..
الحجية : يله روحي ولا تحاجيهه بعد..خطاريش احنه..
خزرتني وراحت..بس طلعت تكومت بمكاني..الدوخة قوية الى درجة..من أثر الضربة..مجان بيه شي صار شهور..

بس هاي الحقيرة أذتني..اجت خالة كومتني على كيفهه
الحجية : سلامتج حبوبة شبيج..اوديج للطبيب باجر..
دنوة : لا خالة..هاي من وره الضربة هيج صارلي..ما جان بيه شي..جم يوم واصير زينة..
الحجية : يله براحتج..تعاي اخذيلج مسكن شوي ترتاحين
كمت وياهه انطتني حباية ورحت للمطبخ شربت مي.. مريت بالصالة لكيتهم كاعدين ديتعشون..صاحني الحجي
وائل : بوية صيحي عمتج وتعاي تعشو..
دنوة : اي هسة..
رحت للغرفة صحتهه..كالت ما اشتهي روحي انتي..حتى انه نفسيتي مسدودة للاكل فضليت كاعدة بالغرفة..هي اخذت ملابس وراحت تسبح..اخذت التلفون من جوه المخدة لكيت صگر مخابرني..رجعت دكيت علي ما جاوبني..عفته كلت هسة هو من يفرغ يخابرني..

مشى الوكت عادي..شفت الملابس عجبني ذوقهه.. مشتريتلي شي تصميمه هادئ ما توقعتهه هيج..تصدمني دائما بتفكيرهه وهسة بذوقهه..تشكرت منهه وكعدنه نسولف لحد ما كالت نعست وراحت تنام ع الجرباية..انه كمت فرشت فراشي وتمددت..ردت انام حاولت ما كدرت..رحت فتحت التلفزيون ونصيته ضليت اتفرج لحد ما قفلت ورحت انام..

مرت الايام على هلحال ماكو تغيير..بس اخلاص سكتت بعد متحاجيني..راسي تحسن شوي بس من اكوم بالعجل ادوخ .. لازم اضل دقايق كاعدة بمكان بعدين اكوم..مشى الوكت صرت احسب يوم يوم بس خاطر نرجع للبصرة..صگر خابر خالة كللهه هلشهر اجي اخذكم ونرجع..بعد عيب تبقون اكثر هو نسيب قابل شكد يتحمل..هو يحجي الصدك..ولو هو الرجال ما قصر ولا حجى شي..بس اخلاص هي الحجي.. اخلاص هي بطنهه كبرت وهي كامت تكعد رجل على رجل وتعاي دنوة نظفي وغسلي وسوي هيج وهيج..تستغلني..من تشوف خالة نايمة الظهرية لو الصبح من وكت تجي تكلي تعاي سوي هيج وهيج..صح اضوج بس ما اريد اكللهه لا ادور تكوم تسويلي شي بعدين ادافع عن نفسي وتطرح..اخاف..اتجفى شرهه واسكت..

مر شهر ضبط ماكو شي ..نفس الشي يصير اليوم يصير باجر..صار ملل..بس هاي كل اسبوع هيج نطلع انه وخالة واخلاص نتمشى..مالي نفس اشتري شي..بس دواية من يخلص اشتريه..اريد بس ارجع لبيتنه واصير يم صگر.. اريد اراجع الدكتورة علمود الحمل..كل هذا يصير من ارجع للبصرة مليت من اخلاص..هناك جان راسي بارد وره ما راحت..

ضلينه هيج لحد ما صار اليوم اليصادف السنة الثالثة على وفاة ابوي..كعدت الصبح مخنوكة بس واحد يطخني اطك بجي تمنيت صگر موجود وياخذني بيده للمقبرة..خالة كعدت وراي بساعة..شافتني مثل الضايجة..
الحجية : شو ضايجة حبيبة شبيج..
دنوة : لا ماكو شي خالة..
الحجية : دحجي مو اعرفج تره..
دنوة : اليوم السنة مالت ابوي ومقهورة..
الحجية : الله يرحمه برحمته الواسعة..تردين من نرجع اكول لصگر ياخذج..
دنوة : ليش شوكت نرجع..
الحجية : بعد اسبوع..
دنوة : صدكككك..جا شو ما كلي هو..

الحجية : والله هو كال لا تكوليلهه..بس اريدج تفرحين شويونة ما اعز عليج الفرحة ولو بخبر..
ابتسمت وبستهه : فدوة اروحلج خالة..الله عوضني بيج وبصگر والله ما ادري وين اروح بدونكم..
الحجية : حبيبة غير انتي تستاهلين..ارجع واكلج..ربج ما يعوف عبده وحيد..لابد يوصلج لبر تحسين اكو ظهر تسندين ظهرج علي..وانه وياج بكل وكت..
دنوة : الله يحفظج ويطول بعمرج..
باستني وكعدنه نسوي ريوك بين ما كعدت اخلاص كملنه.. صبيته وكعدنه نتريك..خلصت وكمت ع التلفون ردت اخابر صگر اكلة صدك حنرجع بعدين لكيته مخابرني..رجعت دكيت علي..شوي وجاوبني..
صگر : حبيبي شلونج..
دنوة : هلا بيك..زينة وانت شلونك..

صگر : بهلدنيا..
سمعت صوت هوسة يمه..صاح : يووول بس خلاحجي..
دنوة : اذا مشغول نحجي بعدين..
صگر : لا تعاي ماعندي شي..اريد احاجيج بسالفة..
دنوة : اي شنو..
صگر : دتاخذين دواج ع الموعد..
دنوة : اي..
صگر : عفية..اريدج تنتبهين لنفسج..ادري اليوم شنو.. ولو قريب جان اخذتج بيدي بس المسافات بعدتنه..
دنوة : شنو حبيبي شكو..
صگر : شبيج يولي..غير ذكرى وفاة ابوج..
دنوة : وتذكرتني بنص شغلك والهوسة..

صگر : صار يومين افكر وخايف لا تنقهرين وتطلعين ناسية الدوة..ادور تتمرضين وانه بعيد..
دنوة : انت دائما تحجي شي تخليني ما اعرف اجاوب بعد.. بس احبك..لأن تذكرني وما ناسيني حتى وانت مشغول..لا تخاف..دا اخذ العلاج بوكته وما عايفته مثل ما وصيتني
صگر : بعد گلبي هلگلب يولي شعندي غيرج انه.. بنهاية الاسبوع جاي اخذكم ونرجع للبصرة وراهه ادللي شتريدين حاضر..وين تريدين اخذج..
دنوة : الله يطول بعمرك متقصر..بس اشوفك هاهية..
صگر : يله جا حضري روحج..جم يوم وتردين يمي..
ابتسمت لأن حجاهه بقصد..كتله بخجل : صگررر..
صگر : ههههه..نعتذر يابة..يله اروح وانتي ديري بالج على روحج مثل ما كتلج..
دنوة : تدلل..

ودعته وسديته..اخذت نفس ترس صدري..صدك فرحت وگلبي احس طفت ناره من تذكرني رغم البعد..رغم كلشي.. ما مل مني بيوم..يخابرني ويصبر بيه..عبالك انه الواكفه من الصبح لليل مو هو..شحال لوما كاعدة بالبيت والتبريد بالغرفة .. هو الله يساعده على حر تموز وآب..مره خابرته حتى مابي حيل يحجي..كال تعبان صار عشرين يوم ما نايم نومة مال اوادم .. وهاي على الرغم من هذا هو اليسأل..هو اليصبرني .. ابتسمت وخليت التلفون ع الطبلة..

درت وجهي لكيت خالة واكفه بالباب ومبتسمة.. استحيت منهه دنجت وابتسمت..اجت يمي..
الحجية : ها حاجاج..
دنوة : اي هسة سديته كبل شوي..
الحجية : يله همزين هو همات كلج مو بس انه..
دنوة : اي..
ضلينه نسولف وهاي هيج خلص اسبوع..وراهه بالليل كمت لميت الملابس مالتي ومالت خالة..الحجي اجه سوه ملاته بعدين كملت وسحبت الجنطة..صفنت شوي تذكرت رزان.. بعد ما خابرتني لا هي ولا شذى..هسة شصار وياهن.. بعدين كلت انه شعليه دا افكر بيهم..هم فكرو بيه قابل..كمت ع التلفون قريت اخر رسالتين بيناتنه ورجعت ضميته.. وره العشه غسلت المواعين وخالة يمي..كتلهه : شوكت حيجينه صگر..

الحجية : كال الصبح بالعشرة اوصل بس اخذكم ونطلع
دنوة : ها..يله ماعدنه شي كاملين..
الحجية : اي والله انه طك جبدي من الكعدة هنا..ولو الرجال ما قصر الله ينطي العافية..بس وين الواحد ابيته مرتاح..
دنوة : اي والله عشتي..انه هم اكول..صدك حاجيتي محمد
الحجية : اي البارحة خابرني..
دنوة : وشلونه شصايرله..
الحجية : كاعد شبي قابل..يكول ماكو شي ومرتاح حتى .. هسة انه ما اريد احجي بس خلانه نتهجول من وره سالفته بعدين كعد عادي..
دنوة : اي خليكعد خالة احسن مما تصير مشكلة لخ
الحجية : على كولتج..يله هي هانت بعد..
ابتسمتلهه ورجعت كملت المواعين..

خلصتهن ورحت انام..بيومهه تعبت لأن العصرية طلعنه انه وخالة تمشينه رجلهه توجعهه من الكعدة فطلعنه..بس طبيت للفراش نمت..كعدت الصبح على صوت خالة..
الحجية : كومي خالة..صار ساعة اكعد بيج..
كتلهه بنعاس : ليش بيش الساعة..
الحجية : يااا..صدك مسعدة..ولج بالدعش..صگر صار ساعة من جاي..ما يقبل نكعدج بس شنو قابل ننتظر..
كمت من مكاني بالعجل..حاجيتهه وانه مخبوصة : خالههه غير تكعديني كبل لا يجي..هسة شلون دخت..
الحجية : ها بالهدى يمة شبيج..روحي غسلي وتعاي بدلي
حركت راسي يعني اي ورحت للحمام غسلت وكملت ورجعت للغرفة لبست..حضرت الجنط خليتهن بالباب مالت الغرفة ورحت للصالة..لكيته كاعد هو والحجي ومحمود.. من شافني ابتسم بطرف شفته..

لابس عسكري والبيرية محطوطة بسده ع الكرسي.. سلمت علي انه ومدنجة استحي من محمود..طلعت وره شوي سمعت محمود يكله : وين اصبرو تغده عدنه بعد وين نشوفك..
صگر : مشكور غداك واصل بس هم يالله الطريق طويل..
محمود : الله يساعدك والله تعب..
كام يحاجي وراحو عند الباب..اخذت الجنطة مالتي وخالة همات..اخلاص شالت مالت الحجي..بالباب ودعتهه .. كتلهه : تكومين بالسلامة..
عوجتلي حلكهه وحجت بإستهزاء : الله يسلمج..
عفتهه ورحت خليت الجنطة بالصندوك..وره سلام وكلام صعدنه ومشت بينه السيارة..صگر نص الطريق ونزل اشترى اكل .. انه اشترالي غير شي..كتله : ليش مو مثلهم..
صگر : ما ادري هيج اشتهيتلجياهه وجبتهه..
ابتسمت واخذتهه منه..

هاي دائما يتشهى شي ويجيبلي..لو كرزات لو حلويات .. حتى اكل مرات..يتذكرني بأبسط التفاصيل..
انه بس اكلت مدري شبيه نعست..ومنا الطريق يدوخ خليت راسي ع الكشن ونمت..كعدت يم السيطرة.. عدلت كعدتي والشال وراهه وصلنه..نزلنه وصگر نزل الجنط..صاح : هاج كمشي المفاتيح..
شمرهن بيدي..رحت فتحت البيبان وطبينه..التراب ماكل الطرمة اكل..من عدا الهول والمطبخ..يراد شغل هواي.. نكتت القنفة علمود نكعد خوما ع التراب..شوي وطب صگر..اخذت الجنط من ايده خليتهن بالصالة اللخ ورجعت للهول..لكيتهم كاعدين وخالة دتحجي وي صگر..
الحجية : يمة خوما تسرعت بهلشغلة..
صگر : لا شنو قابل ما خايف عليكم بس هاهية راحت بعد

الحجية : الله الحافظ..خابرت اخوك..
صگر : اي مابي شي ذاك هو يسمع حسج..
الحجية : يله وين مجان بس المهم مابي شي..
صگر : اي لا تخافين علي..وصيته وهو جبير خوما صغير
الحجية : على كولتك..
كام وكف يم الباب : حروح اسبح وانااام..ميت نعاس.. نومة مال اوادم ما اكدر انام..
الحجية : روح يمة ارتاح..الله يساعدك..
خالة دارت وجهه والحجي راح لغرفته..غمزلي وابتسم.. حسيت حرارة صارت بوجهي..ابتسمت ودنجت..حسيت علي صعد فوك كمت اخذت الجنطة وصعدت وراه..بس طبيت لكيته واكف دينزع القميص..شمره ع الجرباية وانتجى ع الميزتواليت .. كمت نزعت الشال والقميص لابسة جواه تشيرت ربع ردان

اجه يمي..حاوطني من جتفي وقربني علي دنج بهدوء وباسني..طول بيهه وابتعد..
حاجاني هو ومبتسم : شكد خطر طيفج ابالي..
رفعت راسي صارت عيوني بعيونه : هاي الاغنية..
صگر : اي..اجه وكتهه..
رفعت نفسي وحاوطته من رگبته..همست : مشتاقتلك هواااي وداعت طولك..
رفعني من الكع هو ويهمس : بعد طولي هلطول..
راد يشيلني كتله : لااا..ظهرك..
صگر : يولي صار زين شنو جلبتي..
دنوة : لا الدكتور كال بعد ميصير يشيل شي ثكيل..
ابتعد عن وجتف اديه : وانتي شي ثكيل يعني..
دنوة : جا شنو..مو بعينك..

اندار ع الباكيت مالت الجكاير شعل وحده وزفر الدخان هو ويضحك : سكتي ابوية انتي..
درت وجهي ع الكنتور وادردم بيني وبين نفسي : كال مو ثكيلة كال..والله سالفة هاي..
حسيت على ايده حاوطتني من خصري وشالني..والجكارة بطرف حلكه..حطني ع الجرباية وراح قفل الباب.. شمر الجكارة طفت..اجه يمي سحبني من خصري صرت جواه .. صديت وجهي عنه..
همس : ما يصرفلي هلحجي..ادري مشتاكتلي..
دنوة : وشنو هلثقة..
صگر : هسة اشوفج..
لف ايده على خصري واخذني باسلوبه لمكان مابي بس صوتنه وانفاسنه..حتى نسيت على شنو طنكرت كبل شوي..

كام يلبس..كتله : شكد حتضل يمنه..
صگر : ضال هواي..عشر ايام هيج..
دنوة : شعجب..
صگر : يله مو زين..هسة لو اروح جان كلتي ما شفتك..
دنوة : ديله عيني اسفين شحجينه..
صگر : انتي تحجين وانه اسمع بكل وكت..بس تكومين تجيبيلي ملابس اريد اسبح واجي انام..
دنوة : يله هسة..
ابتسملي وراح..كمت لبست واخذتله ملابس..تانيته يكمل وطبيت سبحت..خلصت ورحت نشفت شعري..لكيته نايم وفاتح ايده من التعب..تقربت بسته على كيفي ونزلت.. عدلت القنفات ونكتتهن..ادور مسحت البيت..بين ما كملت صارت الدنيا ليل خالة جانت نايمة..اجت وره ما كملت..

الحجية : هاي جنتي تشتغلين سوده عليه..
دنوة : ديله قابل بيت الغربة..هو بيتنه..حسوي عشة شو جعت هلكد ما اشتغلت..
الحجية : دشوفي الاكل خاف خربان..علمود صگر يجيب
رحت ع المجمدة طلعت جم شغلة قريت الاكسباير.. بعدلهن هواي..كمت كليتهن جان يجي الحجي..
وائل : والله البيت صنطة ما ينطاق..
الحجية : اي والله لا عاب حلكك..يله شنسوي..هسة دنوة تجيبلنه جاهل يضوي البيت حتى ما يخلينه انام..
دنوة : ههههه..يعني لو هيج لو هيج..
الحجية : ديله قابل شكو..نتونس وياه..
ابتسمت ورجعت اكمل الاكل..

خلصت وصبيته بصنينة حطيتهه بالصالة..صعدت فوك اصيح صگر..طبيت للغرفة لكيته توه كاعد..رحت كعدت يمه وامسح على شعره..رطب بعده ما ناشف..
دنوة : سويت عشه تجي تاكل..
صگر : يله جاي..
ابتسمت وكمت..هو راح يغسل وانه نزلت..تعشينه وكعدنه نسولف بالصالة..للدعش وقفلت..هم بقو كاعدين لأن كلهم نامو بقيت بس انه..نظفت البيت والتهيت بعد..عفتهم وصعدت فوك غيرت ملابسي ورحت تمددت..احس عظامي توجعني.. توني غفيت وانفتحت الباب فات ضوه منهه..غمضت ودرت وجهي .. هو سد الباب واجه يمي..حضني من ظهري وراسه بين رگبتي همس : نامي تعبانة انتي..
ابتسمت بطرف شفافي وانداريتله..حطيت راسي بحضنه وغفيت..

صار شهور انتظر هليوم..احس حضنه امي..من اضوج اختنك..احس روحي وحيدة..اخاف اجي بحضنه..هو يستقبلني ويقبلني بكل حالاتي..حتى بمرضني حطني بحضنه..عاد هسة شلون..

مرت الايام طبيعي وملل..لحد ما اجه صگر جان طالع.. صاحني رحت يمه..
صگر : المن شفت فنج..
دنوة : المن..
صگر : جدج يم بيت ابوج..هو وقاسم وكاظم..
دنوة : صدك تحجي..شكو شعدهم..
صگر : شمعرفني..حتى سلام ما سلمت..
دنوة : بس عيب..
صگر : العيب بالجيب..جان كالو عيب من يطردون حفيدتهم من الباب وهي جايه من غير دولة..والله طاحو من عيني بعد ذرة احترام ما انطيهم..
دنوة : يله عوفهم خل يولون..اصلا نسيتهم بس ذاك اليوم خابرتني رزان على سالفة وهسة تذكرت..

صگر : شرادت..
دنوة : شذى رايده تزوج وجدو ما قابل..كايل لو تزوج وتروح وتنطينه البنات لأن ما نخليهم يتربون عند الغربة.. لو تبقى لبناتهه واحنه نساعدهه بالمصرف..
صگر : وهي شعدهه تخابرج..عرفه ولفه..
دنوة : والله ما ادري..تريدني احاجي جدي علمود يخلي البنات عدهه وهي تزوج..
صگر : بله رجاءً منريد نحاجي احد ولا احد يحاجينه..
دنوة : اي هو كتلهه هيج..حتى هي ما خابرتني بعد..
صگر : طبهه مرض..جبيرة وتعرف مصلحتهه ومصلحة بناتهه وين.. هسة عوفينه منهه..تعاي جبتلج شي..
دنوة : شنو شجبت..
أشرلي اكعد يمه..كمت كعدت يمه..

اخذ ايدي خله بيهه علبة مال ذهب..كتله : شنو بيهه..
صگر : فتحي وشوفيهه..
ابتسمت وفتحتهه..جايب كلادة خناكية..زنجيلهه رفيع والمدالية صغيرة بيهه حرفي بالانكليزي..ابتسمت وبسته : الله لا يحرمني منك..يعني ليش احبك انه..ها ليش..
ضحك وباسني من خدي : بنيتي تأمر وتدلل..
اخذتهه وكمت صعدت فوك..لبستهه طلعت مرتبة على ركبتي .. وره يومين صگر نزل للواجب..كعدت الصبح سويتله الجنطة ونزلت اسوي ريوك..وره شوي اجه بيده الجنطة..
صگر : شعجب كاعدة من وكت..
دنوة : اريد اسويلك الجنطة فد يوم..كله تروح وحدك..
صگر : يولي والله انقهر عليج من اشوفج نايمة..اكول تعبانة ما اكعدهه خاف بعدهه نعسانة..

دنوة : لا بعد منا وجاي كعدني خوش..
صگر : نكول اي..
ابتسمت وخليتله الاكل ع الميز..كعدت جدامه بس ما اكل .. ما اشتهي الصبح..رفع راسه يحاجيني..
صگر : شو متاكلين..
دنوة : اكل انت بالعافية..ما اشتهي الصبح..
صگر : وتريد اكعدهه الصبح..ابقي نايمة ابوية انتي..
دنوة : شتقصد..
صگر : شقصد..ما اقصد شي..
ابتسملي وعيونه تراقب حركة شفايفي وعيوني..

كمل وراح يغسل..اجه يمي..
صگر : كومي..
كمت وكفت..دنج باسني بوسة طويلة وابتعد..
صگر : تصبيرة منا لحد ما انزل..
دنوة : والله عليك سوالف..
صگر : اي اعجبج يولي..
ديحاجيني جان تجي خالة..ضلت تحاجي شوي بعدين اخذ الجنطة وراحو للهول..غسلت ايدي ورحت وراه.. طلعت وياه ودعته وسديت الباب..
هلمرة البيت صدك صدك صار هدوء وصنطة الى درجة.. بس انه وخالة..الحجي فاتح التلفزيون ويكلب يا بالاخبار.. يا يطلع يم علي..مدري شعجب علي ما اجانه..
وهاي هيج مرت الايام لحد ما بيوم كاعدين ع الغده انه وخالة.. الحجي طالع.. جان يدك تلفونهه..

الحجية : خالة روحي جيبي التلفون ع الكاونتر..
كمت اجيبه..صگر ..شعجب هسة..الظهر..رحت انطيتهيا.. مدري شحجت وياه ما فهمت..سدته وحاجيتهه..
دنوة : شكو شبي صگر..
الحجية : مابي شي..بس بيت اخوي ابو مخلد حيجون
دنوة : ليش..
الحجية : ما ادري..صگر كال سوي نفسج تعرفين انه من اجي افهمج..شكو ما ادري..
دنوة : زين وينهم هسة..
الحجية : يم السيطرة..بعد شواي ويوصلون..
حركت راسي يعني اي وكملت اكل..ما اهتميت للموضوع.. قابل شكو عادي..اول ناس يجونه لو اخرهم.. بس شلون حيجون والحجي معاديهم ما يحجي وي احد منهم..اخاف تصير لغوة وهوسة..

هسة هو صگر غير يحجي يكوول..كله رؤوس اقلام.. دورات يضوج..بس يله يمكن مو شي مهم..
خلصنه اكل وكمت اخذته للمطبخ اغسل المواعين جان تندك الباب..صعدت فوك لبست شال بالعجل واجيت اسلم .. انصدمت كل هذول حيبقون هنا..تلث ولد وبنات شابات.. رجال ومريه كبار بالعمر..سلمت عليهم وخالة عرفتهم علي.. بعدين فاتو..رحت للمطبخ صبيت عصاير ورحت قدملتهم.. ما رفعت عيني استحي..خليت الطبله وعليهه الصينية.. ادور رحت كعدت ع الكرسي بنهاية الصالة..صار حجي وشلونكم اخباركم وهاي السوالف..جانت وياهم طفلة صغيرك تزحف.. نزلت من حضن بنية واجت يمي..شلتهه كعدتهه بحضني وابوس بيهه بوسات صغيرة خاف خدهه يتحسس..

ريحة الاطفال كلهه متشابهه..من شميتهه تذكرت طه.. هسة وين صار..شلون ديعيش..صدك التفكير مرات صعب بهيج مواضيع فالواحد يخلي الامور تمشي حسب تيارهه.. لا يحسب ويتعب باله..

فزيت ع الطفلة نزلت من حضني راحت لأمهه..بعد ما تعرفت عليهم..ثنين منهم متزوجين مخلد اركان.. مخلد هو ابو البنية الصغيرة..وعنده بعد طفلة لاخ..بس اركان ماكو..كالو متزوجين جدد..الصغير بهاء بعده ما متزوج..البنات وحده توم وي بهاء واللخ بكدي..بس شعجب كلهم جايين..شنو معقولة يغيرون جو..هسة صگر غير يخابر ويكول شكو..ع السكتاوي..
بالليل دخت شلون افرشلهم ووين ينامون..بعدين ترتب الوضع وكلمن عرف مكانه..ما انكر البيت صارت بي روح.. بس دوخة وجيتهم مفاجئة مدري شلون..

بالليل اجه الحجي تفاجئ بيهم..بسما سلم على احد .. انه جنت دا اسوي عشه اجه يمي..
وائل : شجابهم هذول..
دنوة : ما ادري خالو..يمكن تسياره غير..
وائل : جية فكر..حروح انام لحد يكعدني..
دنوة : ميخالف..
عافني وراح..هذا شدعوه هلكد يكرههم..يله شدخلني .. يكرههم يحبهم مالي دخل..
كملت العشه بس هلكت من الوكفة..احس رجلية ورمت .. سويت اكثر من كل مرة..فرشت السفرة عاد اجن البنات وياي ياخذن الاكل..محد حاجاني منهن..يعني هيج على كد الابتسامة اذا صادفتهن بالممر لو بالمطبخ..

مرن يومين صگر ما خابر..خالة خابرته تريد تفتهم شكو .. يكللهه مشغول ما اكدر احجي..من اجي احجيلج احسن .. وهاي هيج ضلينه ننتظر..الحجي يكعد الصبح ياكل ويطلع للشغل..يرجع بالليل يكول ما اريد اشوفهم..هذوله الولد كلهم كاعدين..محد بيهم يشتغل معقولة..شويه اكول شعليه..بعدين اكول اي ميشتغلون غير جايين خطار..بعدين تجيني غير سالفة..همَ هم محد حجى .. سكتة ..

وره هلايام.. المفروض اليوم ينزل صگر فكعدت الصبح غسلت وجهي ونزلت..لكيتهم كاعدين وهاي الطفلة تبجي بت مخلد..سهى..نزلت صبحت عليهم وشلتهه..شوي واندكت الباب..خليت سهى يم امهه ورحت افتحهه..بباب الكليدور واسمع صياح وهوسة..صگر واكف بره وياه زلم بس ما مبينين منو..يا ستار ياربي.....

يتبـــــــــــــــــــــع...................

حبيبيني مشتاقه لتوقعاتكم والله ،
شنو توقعاتكم؟ منو هذوله الي ويا صگر ، وبيت خالة ليش جايين..
بالمناسبة اريد اگللكم شي ،، شنو رأيكم بطريقة السرد مالتي؟ ..