رواية اسألي عني الليالي الفصل الثاني وخمسون 52 - بقلم رقية جاسم

سنين فارگتك واحس حالي غريب ..
من اشوف احباب وانه بلا حبيب ..

قناة التليگرام

حساب الانستگرام

الـبـارت الواحد والـخـمـسـون.................

اكعد الفجر على صوته مصخن ويحجي ميدري بروحه.. اروح اسويله كمادات لحد ما تفكه الصخونة وانام بالكع بس راسي بحضنه..وره هليومين بالليل تقريب الدعش نزلت اجيبله مي سمعت صوت الباب تندك..جمالة مو دكة عاديه.. مال واحد مستعجل..شفت الحجي كام طلع يفتحهه ومخبوص..منو هاي ياستار..

خليت الشال وطلعت وراه اشوف منو..ضليت واكفة بباب الكليدور ..سيارة سودة بالباب ونازل منهه رجال قصير وسمين شوي كاعد يحاجي الحجي وراه ثنين بعد..ضلو واكفين نص ساعة بعدين طلعو وطبينه.. الحجي طب مشدوه ويفرك بايده..خالة اجت شافتنه..عاينت علي رفعت جتافي يعني ما ادري..حجت وي الحجي..
الحجية : خير ياستار..منو اجة..
وائل : شاك بيهم لأن مدري وين شايفهم..بس سألوا على محمد..
الحجية : محمدد..ليش شمسوي الاغبر..
وائل : ما تسألي..كتله كول اذا عندك شي انه اوصله الحجي كال لا ميصير لازم هو..
الحجية : زين منو ما عرفتهم..مو تكول شاك بيهم..
وائل : واحد منهم جان يجي بسيارة جدام السيطرة..

....اي مو كتلج شايفه بس ناسي وين..اول ما شفته شبهت بي..هسة تذكرته..هذا ابنج وين مدخل روحه..
الحجية : سوده مصخمة بوجهك يمحمد..وهذا شيريد من ابني احنه ناس كافين خيرنه شرنه..هذا شعنده جاينه..
وائل : هسة انتي عوفي كل هذا..كولي ليش جايين بالليل اكو واحد يجي بالدعش..
الحجية : هسة دتخوفني بالزايد لو شنو..
وائل : شكو اخوفج هسة انه قابل ما خفت من رحت فتحت الباب شمدريني ما يردون يصكوني.. ابنج لاطش بيهم بعدين تصير التايهه..هسة روحي ارتاحي الصباح رباح..
الحجية : شينيمني اليوم..هم مشاكل وهم تهديدات.. يعني ما نخلص..ابتليت ابني بالجيش..وين ما نروح لاحكتنه المصايب ياريتهه مصايب بيهه حل..هسة هاي وين جانتلنه والله مليت.. ما ادري اخاف علي لو على صگر..

وائل : خوية نامي هسة..الصبح نفتهم شكو..هو ابنج اجه من الشغل مثل الجنازة راح نام كبل..
الحجية : اقنع روحي يعني..
عاينت علي بنظرات قلقة..خطية نظراتهه مال ام خايفة على ابنهه حتلو جان غلطان بس يبقى ابنهه..ولو ما ندري شمسوي واذا هذوله جايين علي متقصدين لو غلطانين..الحجي راح لغرفته وانه رحت للمطبخ جبتله مي وصعدت فوك..اول ما طبيت دار وجهه علي..
صگر : تأخرتي..

دنوة : اي جنت يم خالة..اجيبلك شي تاكله ما اكلت من الظهر لسه..خاف مو زين عليك..
صگر : ماريد شي..معدتي توجعني..هاي بدون اكل وهيج لو اكل شلون..
رحت كعدت يمه عدلت كعدته وانطيته المي..بالكوه يله كدر يكعد عدل..ظهره متشنج الى درجة..حتى للحمام ما يكدر يكوم.. انه اخذه..ادور ثكيل وطويل بين ما اخذه جتفي يكوم يوجعني.. هو يدري لأن بس ارجعه يكلي مرة اللخ صيحي خالي لو محمد انتي متكدرين..اكلة اي بس ما اكول لاحد..يعني انه ضالة وياه..اخذت المي منه وساعدته خاطر يمدد.. طفيت الضوه بقه مالت التيبل لامب ورحت تمددت من الجهة اللخ بس مبتعدة عنه خاف اطخ بي ويتأذى..بالليل كلساع اكعد خاف بي شي لو كاعد وما يكدر يسوي شيريد..لحد ما الفجر كعدت على صوته يون..

كمت شغلت الضوه واجيت يمه : شبيك شنو يوجعك..
صگر : لك ااااخ يابة..الوجع موتني..لج جيبي شي اخذه مسكن صخام..
دنوة : شلون خاف مو زين معدتك فارغة وانت ما ماكل..
صگر : دجيبي هسة ميت من الوجع..
نزلت جوه جبت مسكن من الكاونتر وبرتقالة كشرتهه وقطعتهه ميكدر يكمش شي بايدة ويجهد نفسه..وهم ما يصير ياخذ الدوة ومعدته فارغه..صعدت فوك انطيته الحباية بعد وكلته نص البرتقالة وهم بطلاع الروح ميقبل يخلي شي بحلكه.. كتله : ادري ليش متقبل تاكل هسة الاكل شعلي..
صگر : لج تعبان من الوجع حتى حلكي ما اريد افكه..
دنوة : زين هسة تنام لو متوجع..
صگر : ميجيني نوم من وره الالم..هسة لو اكوم مثل الاوادم اريد اروح للدكتور..

ما متعود اكعد فترة طويلة..
دنوة : سوده عليه متستاهل والله..كله بسببي قهرتك..
صگر : لا يولي..انتي شعليج..تذكرين كبل يومين..طبيت اسبح وتمزلكت بالحمام..ثكلي كله صار على ظهري..
دنوة : عزززه العزاني..وانت ليش ما كلت..جان من زمان اخذناك للدكتور..هسة زين هيج تعبان حتى حجي ما بيك حيل تحجي يله ولو كلت انت وين تسمع كلام
صگر : يله عاد شمدريني حيصير هيج..تعاي نامي كافي من البارحة الصبح كاعدة..
كمت طفيت الضوه واجيت تمددت..شوي وحاجاني..
صگر : تعاي هنا تمددي يمي..محروم منج من وره هلمرضة مدري منين طلعتلي..
دنوة : خاف يوجعك ظهرك..شبيك هياتني وين اروح..
صگر : ميخالف تعالي..

تقربت منه وحاوطته من صدره بس هو ثابت بمكانه ميكدر يتحرك الا بالشافعات..بسته وحاجيته شوي لحد ما غفى ونمت وراه..ما حاجيته بموضوع محمد..الصبح اكعد واشوف الحجي شسوه وياه وصدك السالفة هاي لو مشتبهين.. كعدت الصبح لكيته نايم و فاك ايده مثل واحد تعبان..كمت غسلت واجيت بعده نايم..ما ردت اكعده..لبست الشال ونزلت.. سمعت صوت محمد والحجي وخالة بالصالة..رحت يمهم اسمع شديحجون بس محجيت شي..
وائل : اي هاي السالفة كلهه..منو هذول وشيريدون منك..
محمد سكت ما جاوبه..
وائل : لا تضل ساكت..اذا انت تكدر تفلت وتضم راسك اخوك هو حيبتلي..مو كافي علي مريض تجي انت تجمالة
محمد : خالو شبيك صدك جذب..قابل انه اريد ااذي صگر .. صارلي بمكان ابوي شعندي وياه..

وائل : هذوله منو ابني..معلينه بهلحجي..واحد منهم انه شايفة بالدورية مال هذوله ....شجابك عليهم ..احجي كلشي خالو مالنه خلك مشاكل..هذوله يجيبون اكبر راس عاد مو احنه..
محمد : اي والله انه صرت وياهم..صار شهور..
وائل : شنو شنووو..وانت شجابك عليهم..انت سني..
محمد : سني شنو..محد يدري بيه هيج..كايللهم غير شكل.. لو يدرون سني يصكوني..
الحجي تخبل..كام يصيح وكامشه من تشيرته حتى ضربه
الحجي : يا ارعن يا سززز..هاي شمسويييي.. هاي سوالف بشر عاقل يا طاييييش..شسوييييلك..لك خبل انتتت.. خبلللللل اكووول وين غاط وترجعلنه توالي الليل..ساعة زهراء وحبيبتي وجان عندي علاقة بيهه..وهسة هاي السالفة التعبانة.. تدري اخوك اذا عرف شيسوي بيك..

محمد : خالو بس خلنتفاهم شبيك..اذا عدهم شي يجوني.. انه ما مسوي شي وما غلطان وياهم..كله شغلي عدل..
وائل : شغلك عدل..دنجببببب لللللك..شتشتغل بله..
محمد : اي تره ماعندي شي وياهم..بس على كد الباج والسمعة..المهم ما كتلي شرادو..
وائل : يردوك..تعال جاي..شو انت دا تحجي بدم بارد.. امك ما كدرت تنام البارحة من وراك..كللهه انت شملوص وشحاجي.. منو وداك لهذا الدرب.. يا ارعن..
محمد : وشنو قابل انه صغير لو شنو..
وائل : لا والله اشوفك خاش بالعمرين..
محمد : هسة شنو شرادو مني..ما كالو..
وائل : لاع..رادوك انت تجي تحاجيهم..شمسوي..
محمد : والله ما مسوي..عادي شعندي قابل..
وائل : اكلك انت حتجلطني..شبيك تحجي بدم بارد..

حتخبلني والله..امك حالتهه حاله وانه قلق عليك..بعدين تجي انت تكلي عادي ما عندي شي..شوف اكلك..تعوف هاي الشغلة لا تصير سالفة حتى الله ما يرضه عليهه..محد مقصر وياك وعايش حياتك عدل ليش تمسلت وتروح لغير طريق.. معلينه.. معلينههههه..زين لو لا..شلون ما طبيت تطلع.. الخطر على صگر اكثر منك..ما فكرت شحيصير لو عرفو اخوك عقيد ببغداد وسني..
محمد : يابة شعليهم باخوي..انه وياهم لو هو..
وائل : متنجب لا تفور دمي..تعرف جوارين خالك فادي ببغداد
محمد : اي شبيهم..عدهم شباب ثنين بكصتي..
وائل : رحم الله والديك..واحد منهم..هذا الاسمر..

راح اسمه من بالي..جان يشتغل وياهم مثل حضرة جنابك.. بعدين اختلف عليهم وهسة هو طافر بالخارج واخوه انخطف سنه محد يدري وين اراضيه..بعدين لكوه بصحراء الانبار .. شلون وصل هناك..ما ادري..هسه هو عايش بدهوك لا يوصل لبغداد ولا هم يحزنون..حتى عائلته ما شافهم من رجع.. كبل سفروه هناك بعدين دزوله مرته وبناته هناك..
محمد رجع كعد ع الكرسي طبيعي : اي وشسويله..
وائل : لك بابا شنو شتسويله..اكص ايدي اذا صاحي.. اخوك اخوووووك يا بشررررر..اذا ما خايف على روحك خاف على اخوك..شنو ذنبه بعده كلشي ما شاف من حياته وانت حضرة جنابك الكسيف مكضيهه تخامة للفجر صرت وي هذا وصرت وي ذاك..جيب تلفونك..
رفع حاجبه وايده على جيبه : شتسوي بي..
الحجي سحبه من جيبه وخازره : دجييييب للللك..

اخذه وطلع السيمكارت كسره وهطر التلفون..
وائل : طلعه من البيت متطلع..لحد ما اخوك يصير زين ونشوف شيسوي..يعني انه ما شايف واحد ذرة مسؤولية ماكو براسه شنو انت..
محمد بصياح : لا عاااد مو هيج..فهمنه خالي..على عيني وراسي بس لا تدخل بحياتي..انه مقتنع..
وائل : تسوي مثل ما اكلك وغصبا ما عليك..هذا الحجي لو يأثر بس عليك طبك مرض..انت وياهم شعلينه..بس انه واخوك شنو ذنبنه..يابة حتى شغلي بعد ما اروحله..زين..بس بالمقابل انت قدم تنازل واكعد بالبيت..
محمد : كاعد..بس لشوكت..منو اليضمن محيجون لهنا مرة اللخ..واحنه منتظرين الفرج من يصير صگر زين..
وائل : تنتظر وتنجب..المفروض اخلص عليك على سالفتك الوصخة هاي..

بس ما كتلي شوداك عليهم..
محمد : من جنت اروح لزهراء (الي خابرت صگر) عرفتهم هناك..شفتهم يحجون بالموضوع ودخلت الفكرة براسي.. بعدين ذبيت جرش وي عشيرة ال.... وصرت وياهم..
وائل : اي مو هي لعبة حتى تدخل الفكرة براسك.. من امدااا لراسك الما يفكر..
محمد : اهووووو يمه ما تجين تحاجي..
الحجية : انت لا تحاجيني بعد..مخبل عاقل والله ما ادري.. اذا صار شي لا انت ابني ولا انه اعرفك..
محمد : ها هيج صار الحجي..شو اللوم بس يطيح علي.. ما تكولون لصگر هيج من خلانه نتهجول بسوريا سنتين..
الحجية : صگر خاف علينه وما راد يصير شي يأذينه احنه كبله هو..قدمنه على روحه..انت شسويت بلا زحمة.. اريد اعرف شسويت..شعوطتني الله يشعوطك..ما استاهل هيج تسوي بيه وتحرك دم..

كامت تبجي وتعاتبه : ليش هيج..لييييش..
رحت حضنتهه وأهدي بيهه..يعني صدك البيت دخل بجو متوتر الى ابعد درجة..حتى انه خفت..هلمرة وين نروح.. منا صگر مريض ومنا سالفة محمد..شكد كرهته وضجت منه من موقفه البارد..يعني شنو هذا ميحس..ميكول اخوي خطية خاف يصيرله شي بسببه..هذولة مو هيج ومشي..مو بس هيج.. المشكلة مسوي روحه غير طائفة..اذا صگر يدري يكلب البيت على راسه..ضليت كاعدة يمهه لحد ما هدت..
الحجي كام من مكانه ويعاين لمحمد بطرف عينه : خوش طاب بلمة مال بعورة..
محمد سكت ما حجة شي..انه كمت ردت اصعد فوك.. لعبت روحي حتى من الاكل وكلنه هيج..بس رحت للمطبخ سويت شي خفيف لصگر..شنو ذنبه هو مريض هم ما يدري شصار والله خايفة من ردة فعله..

كملت ورحت ع الدرج..جان تحاجيني خالة..
الحجية : ها وين..
دنوة : اشوف صگر شلون صار..وانطي اكل ..
الحجية : يله روحيله..هسة اكمل واصعد اشوفه..
حركت راسي يعني اي..رحت اخذت الصينية وصعدت.. لكيته كاعد توه يريد يكوم وعاكد حواجبه..خليت الاكل ع الميزتواليت ورحت يمه : اساعدك تكوم..
صگر : مدا اكدر وحدي بس صيحي محمد..انتي متكدرين
دنوة : لا تعال ميخالف..شلت ايده وصرت جواه..بالشافعات يله كومته..اخذته يغسل كمل ورجعته للغرفة..يكعد عدل يوجعه صفح همات يوجعه..حتى من يوكف..ادور حتى مابي حيل يحجي هلكد ما متوجع..اكل شوي و وخره..كتله : شنو متاكل بعد..
صگر : ما اريد..ما اريد شي..بس اريد ارتاح..

دنوة : حبيبي شبيدي..الدكتور يجي العصر..تعال نام شوي بلكت ترتاح..
صگر : لا لا..دير بالج تكمشيني..لج متصوب مرتين وما حاس بهيج وجع..شنو هذا دمااار..
ضل متوجع لا يقبل انطي حباية مسكنة ولا يقبل يمدد.. يكلي يوجعني بس اتمدد..ادور حتى دوسه ع الكع ميكدر.. ضليت واكفة بمكاني واعاينله..عيوني دمعت..كمت ابجي.. ما شايفته هيج كبل ابد..
نص ساعة وصعدت خالة..
الحجية : ها يمة شلون صرت..ماكو تحسن..
صگر : ولا ذرة..
الحجية : سوده عليه..شبيدي عليك..شلون صرت هيج..
صگر : دنوة تحجيلج..
دار وجهه وايده على ظهره..كتلهه : رايح يسبح ومتمزلك بالحمام وصاير هيج..

الحجية : عزه بعيني..ما حجيت ما كلت..
دنوة : عوفي خالة ما يكدر يحجي تعبان..هو ما يحجي مو شي جديد..تقربت من شاورتني..
الحجية : لا تحاجي بالموضوع..عوفي جن ما تدرين.. خطية مريض واخليله تجمالة..شيضل بي..
دنوة : ميخالف..ضلت كاعدة يمنه نص ساعة ونزلت..هو ضل يلوب من الوجع..
ما ادري انزل اشتغل واسوي غده لو ابقى.. حتى اذا بقيت شراح اسوي مثلا..هو يوجعه وما يقبل لا يكعد ولا يمدد..بعدين هو حاجاني..
صگر : نزلي شوفي شغلج لا تضلين هنا..
دنوة : شلون خاف تحتاجني..
صگر : لا حبيبي لتخافين..اذا ردت شي اصيحج منا..
دنوة : مثل متريد..

لبست الشال ونزلت..خالة انطتني التلفون وصعدت خليته ع الميزتواليت واخذت الصينية ونزلت.. طبيت للمطبخ سويت الغده بس مالي نفس بشي..كل تفكيري يم صگر..كلش متوجع ومنا محمد شلش تفكيرنه..انه واطبخ اجت خالة..
الحجية هي وتاخذ مي : والله حتى اكل مالي نفس بي.. هذولة شعدهم جايين لعدنه..شوف شمسويلهم محمد ويريدون ياخذوه هسة انه صح ضجت منه بس ابني..يبقى ابني.. اذا صارله شي المن انطي وجهي..
دنوة : صبري خالة لا تفاولين..هسة بس خلصگر يصير زين هو يعرف شيسوي..
الحجية : مو حجى خالج..شبيده..
دنوة : اي خالة شبيج هو الحجي شيريد يسوي قابل.. غير ينطي علم لصگر..يمكن يكدر يسوي شي..

تنهدت وراحت يم الباب : الله يصبرني..
عافتني وراحت..خليت الاكل على نار ناصية ورحت للصالة على صوت الحجي ومحمد..
محمد : اهو يعني حتضل تحاسبني على كل كلمة..
وائل : شتريد اسويلك مثلا..بس لا مخلي ببالك اشيلك بالمديح والصلوات اي عفية عليك سبع..سبعععع..
الحجية : خوية عوفه..هذا دواه صگر..هسة شلون بي مريض سوده علي..
وائل : مو كتلج البارحة على هذا الدكتور اعرفه..هسة خابرته كال العصر اجي..واذا عندي مجال الظهر..
الحجية : بلكت الله..تبهذل عساهه بعدوانه..
عاينت على محمد بقلة حيلة وراحت لغرفتهه..انه كمت صعدت فوك اشوف صگر خاف محتاج شي..لكيته متمدد ويون.. رحت يمه بس اعاينله مابيدي شي شريد اسويله..

كتله : شسويلك وتصير زين..شبيدي..سكت جان يصيح..
صگر : يااااابة بعد ما اتحمل..لج صيحي محمد يالكعبة خليجي ينزلني ما اكدر امشي خطوة وحدة..
متت خوف من وضعه..اليوم اسوأ من البارحة..نزلت بالعجل جوه للصالة..كتله : خالو تعال شوف صگر..يريد ينزل وميكدر..محمد انت همات خاف ميكدر وحده..
وائل : ليش ياستار شبي..مو حيجي الدكتور..
دنوة : مديكدر يكول متوجع كلش..
وائل : يله هسه اروحله..
كام من مكانه وراح فوك..محمد هم صعد..شوي وسمعت صوته يصيح..متت خوف بس لا ما عرفوا يكوموه..رحت ع الدرج شفتهم توهم ديطلعو من الغرفة..صاير خركة وذاب ثكله كله على محمد والحجي..رجله يدوس بالكع ويشيلهه بالعجل ميكدر يبقى واكف فترة..نزلوه بطلاع الروح..

كل باية تشوغ روحه للستار..دمعت عيوني متحملت المنظر.. درت وجهي لحد ما نزل..اخذوه للهول كعد مدري شلون ع القنفة..يصيح ويستريح..اجت خالة تحاجي الحجي..
الحجية : وائل خلناخذة للدكتور..دكتورك يتأخر يله يجي
وائل : ادري وين اكو دكتور هسه مفتح..الدنيا ظهر..
الحجية : يعني شلوون..يبقى يتوجع..
وائل : هسة اخابره اشوف بلكت يكدر يجي هسة..
طلع بالطرمة يخابر واشوفه يروح ويجي لأن البردة مفتوحة.. سكت شوي جان يصيح..حتى عيونه دمعت..
صگر : يااابة والله سجاجين بظهري..محمد تعال كومني..
شوي واجة الحجي كال هسة حيجي بالطريق..انه ما ادري شسوي بعد..كمت ابجي..صدك منظره يقهر..لا يكدر يوكف ولا يكعد..متت قهر..ضليت واكفة بباب الهول ودموعي بعيوني.. ربع ساعة تقريبا واندكت الباب..

عدلت الشال جان يطب الدكتور بيده جنطه صغيرة..
الدكتور : ما اكدر افحصه هنا..لازم على سرير..
محمد رفعه من جهة والحجي من الجهة اللخ..يعني خركة صار بمعنى الكلمة..اخذو لغرفة خالة..كعد يفحصه الدكتور.. هو مات من الوجع..كل صيحة يصيحهه ولا اللخ..الدكتور بس يكله اصبر بس خلافتهم..
وهاي هيج لحد نص ساعة يله خلص..كتبله ادوية وطلع يحاجي الحجي عليهه شلون ينطيهيا..محمد طلع وياه بره بعدين اجة..خالة كعدت تحجي وي الحجي..
الحجية : ها شكال الدكتور..
وائل : كال انزلاق بالفقرة و رض بالفقرة العصعصية..
الحجية : سودة عليه..وشلون شنطاه ادوية..
وائل : انطاه جل يمسحه ع المنطقة التوجعه مرتين..

حبوب مسكنة..بعدين يومين ويجي للعيادة يسويله علاج طبيعي
الحجية : ولا يرتاح عمت عيني علي..
وائل : يله عاد هيج ولا غير شي..بالبداية عباله رض بالحوض جان حالته بعد اضرب..
الحجية : الله كريم..هسة بس خليكدر يمشي..
وائل : يومين ويكوم يمشي بس يبقى الوجع من يدنج..
الحجية : خير ياربي..كلشي ولا صگر وين انطي وجهي..
وائل : عنده العافية..لا تخافين سبع.. دار وجهه يحاجيني.. خالو كومي انطي شي ياكله بين ما اطلع اجيب الراجيته
دنوة : ماشي..
رحتله للغرفة..لكيته متمدد وعيونه مدمعة..صگر ميبجي ابد.. ما شفته بس مرتين يمكن..رحت يمه مسحت دموعه وهمست : حبيبي متشوف شر..سوده عليه
عاينلي وغمض عيونه : شايفة واحد يبجي من الوجع..

يعني وجع قوي..متت والله ألم فضيع..بعده لهسه يوجعني بس الدكتور انطاني ابرة..
دنوة : الله يساعدك..ارتاح ولا تعب روحك..هسة خالو راح يشتري العلاج وانطيكيا..بلكت تتحسن..
همهم يعني اي بدون ما يحجي..ضليت كاعدة عنده جان يجي محمد..ما درتله وجهي..ضجت منه..اجه كعد يم صگر..
محمد : شلون صرت..
صگر بصوت تعبان : بعدني..
محمد : عندك العافية والله متستاهل..
سكت ما جاوبه..وره ربع ساعة اجة الحجي بيده علاكة مال ادوية..علمني عليهن ووضعية نومته..
وائل : لا تخلي ينام على ظهره..بس على بطنه وتخلين مخدة جواه..مثل ما كتلج يومين واخذه للدكتور يشوفه..
دنوة : ماشي خالو..

اجة هو ومحمد عدلو نومته وخله مخدة جواه..كمت جبتله اكل خفيف واجيت علمود الدوه لازم بعد الاكل..خليته يكعد شلون ما جان ووكلته..بعدين انطيته الحباية..
دنوة : تمدد اخليلك الجل..
صگر : تعاي ما اكدر..
اجيت مددته مثل اول مره بعدين رفعت التشيرت شوي.. طول ما اخليله هو يصيح..ولو ما اضغط علي بس يوجعه خطية.. كمت ورحت غسلت..بعدين اجيت يمه..كتله : اعوفك تنام..
صگر : لا لتروحين..
دنوة : ماشي..ضليت كاعدة يمه وامسح بشعره..هو كامش ايدي اللخ ومغمض..ضل هيج لحد ما نام..من نام كمت للمطبخ اكلت شي ورحت للصالة لكيت محمد والحجي كاعدين الحجي ما سكت عن موضوع محمد..بعده قلق علي.. وخايف على صگر وعلى محمد..

ضليت كاعدة يمهم لحد ما سمعت صوت صگر يصيحني.. رحت يمه : كول حبيبي شبيك..
صگر : اريد اصعد..ما متعود ابقى هنا..
دنوة : وين وين..شعندك صاعد ياعيني..ما شفت شلون نزلوك بطلاع الروح..صير زين و الله كريم شكو قابل..
صگر : يولي كتلج اريد اصعد لا تضوجيني..
دنوة : هاي بعد كال..هسة اكول للحجي ومحمد.. رحت صحتهم وصعدوه بالكوة..استمر الحال هيج يومين.. بس ثاني يوم شوي ها احسن..بحيث من اخذته للحمام كدر يمشي مو فد دور مثل اول مرة..بالليل والعصر من اخليله الجل ماكو دعاء ما يجي على لساني..لأن يتوجع وجع مو طبيعي يكوم يصيح..بهليومين حتى مانمت..خفت من سالفة محمد وخايفة على صگر همات..بالليل بس انام تجي الف فكرة ببالي واكعد من وحدي..

وراهه العصر ساعدته يغير ملابسه..مو هو طويل وانه كصيرة رفعت راسي لكيته مبتسم..كتله : شو مبتسم شبيك..
صگر : تذكرتج من تمرضتي..جنت ابدلج بايدي..هسة انتي صرتي بمكاني..ساعدتيني انتي وساكتة..
ابتسمت : تدلل انت..والله انقهرت عليك ما متعودة اشوفك بهلشكل..تكوم بالسلامة يارب..
صگر : حبيبي الله يسمع منج..
كعد ع الجرباية بين ما بدلت واجة الحجي نزله هو ومحمد.. بعدين نزلت انه وراه..كعد ليوره بالسيارة وكلساع نازلين بالطريق يعدل كعدته..ما مرتاح..لحد ما وصلنه للدكتور ونزلناه..اخذوه لغرفة الانتظار بعدين دقايق واجة الدكتور كال يله خليتفضل..اخذه الحجي ومحمد بعدين طلعو وبقيت انه وياه..اجة رجال سواله العلاج..بين ابره واللخ لازم نص ساعة وهاي هيج لحد ما خلصله..

كال لازم تروحون ع الدكتور هو يسوي اشعة ويشوف بعد جم جلسة يحتاج..اجة محمد ساعده واخذه لغرفة الدكتور.. كعد يحجي وياه ويسأله عن حالته..هو بالكوة يجاوب كلمة تنسمع واللخ لا..عصر كلبي عصر..انقهرت..
الدكتور : استمر ع الادوية بس اغيرلك نوع واحد منهم انطيك ابو المية وخمسة وسبعين..علمود يخف الألم وتكدر تنام بدون ألم ومضاعفات..
صگر : شكرا دكتور..
الدكتور : العفو..مشافى ان شاء الله..
تشكر منه وشخبط على اسم دوه ع الراجيته وكتب غير شي يمهه..بعدين محمد والحجي صعدوه للسيارة..اخذت الراجيته ورحت جبت الدوه ورجعنه للبيت..خالة ما قبلت يصعد.. هو رجع مناك اضرب حتى ميكدر يحجي..بس طب للغرفة نام بالعجل..صعدت بدلت ونزلت جوه..

وهاي هيج استمر الحال بين دكتور وعلاج طبيعي والادوية.. ابقى كاعدة وياه الليل كله لأن دورات يكعد الفجر من يشوفني نايمة يعوفني ما يكعدني ويضل يتوجع للصبح بعدين يكلي شفتج نايمة وما ردت اكعدج..لحد وره اسبوع يله كام يمشي وحده بس ميكدر يكعد بالكع..فاجيبله الاكل ع القنفة لو ع الطبلة..حتى كام يكدر يصعد فوك..يعني تحسن كلش جبير رجع شبه طبيعي..طول هاي الفترة محد حجى بموضوع محمد كلما يريدون يحجون خالة تكله خيصير زين بعده..محمد والحجي ثنينهم بالبيت ما طلعوا..بابنه ما اندكت بعد.. بس الخوف والقلق اكثر شي طالع ع الحجي..حتى مياكل هيج قليل ودائما تفكيره شارد..يريد يحاجي صگر ويسكت.. يكول خطية هو متوتر من المرض اجي انه اضيفله..وراهه من بلش يصير زين جنت جوه دا اغسل مواعين اجه حضني وباسني من ركبتي..

صگر : تعرفين رحمة الله شكبرهه..مشتاكلج بكدهه..
ابتسمت : والله انه هم بس غير انت مريض..
صگر : سويتيلي هواي يولي..فوك طاقتج..انتي من تمرضتي وداريتج جنتي خفيفة وتنشالين بالعجل..بله انه شلون انشال وانتي ناعمة وصغيرة..
دنوة : اي عادي شبيك..واجبي وانت حبيبي شعندي غيرك اذا ما اوكف وياك..جا ويامن اوكف..
صگر : يبعد المايجن بحلاتج كلهن..حصعد فوك كملي وتعالي خوش..
دنوة : يله..بس على كيفك من تصعد..
صگر : تأمرين امر..
كرصني من خدي ع الخفيف وراح..بالباب وسمعت الحجي صاحه للصالة..المواعين هواي وصوت المي فما سمعت شحجو بين ما كملت جان تكب العيطة..

غسلت الزاهي من ايدي ورحت للصالة..صگر يصيح بوجه محمد والحجي كامشة يريد يكعده وهو ماكوو..حتى نسى روحه مريض..
صگر : لك يا عااااار..يا جلبببب..تريد تودينه بداهيه يا صكطططط..انت شنو متكليييي..لك بهذلتني الله يبهذل احوالك كول امين..من انت بكد القندرة تريد تدرس ببغداد وابوي ما يخليك..كمت سويت نقل معهد لبغداد علمودك.. حتى ما يكول يروح وحده وبعده مراهق..شتريد بعد..والمصرف وره وفاة ابوي جاريييي..كله يطب بحلكك بدون ما تدري شكد اتعب يله احصل..هاي هلسنة كمت تشتغل واخذت روحك للتهلكة..شنو انت..ليش ماكتليييي..ليش ما حجيييت.. حتى صرت مثل صديقك بس اريدك تحجيلي وما تروح للسوالف الطايح حظهه..هسة لو باقي على زهراء اشرفلك من طيحان الحظ هذا..

هسة هم شعدهم جايين..شعدهممممم..
وائل : رادو يحجون وي محمد..
صگر : يحجون وياك..شوف لك قندرة..لا عبالك هذوله دغش وتمشي عليهم سوالفك..عرفو كلشي..عرفوك منين ما منين.. رايحلي ذاب جرش وحاير شمسوي بروحك.. بعدين هاي شنو لحيتك..شعدنه..ارهابي انت..
الحجية : يمة هسه انت مريض لا تصيح..صارلهه فوك الاسبوع هاي السالفة..ما كتلك جي مريض..
صگر : هسة شسويلك..اموتك واخلص منك..كافي مشاكل لعبت روحي والله..وين اسفرك هسة..
محمد : شبيكم كلكم صرتو علي..بلكت طلعو جايين على غير شي شدعواكم..
صگر شال النفاضه ركعهه يم رجله..كمز من مكانه..

صگر : تاكل تبن لا اطيح حظك هسة..امشي من جدامي.. امشييييي..شلون يحجي بدم بارد الجلب..حكك.. زعطوط ما علموك ميصير تلعب بالنار..
وائل : خالو اكعد خلنتفاهم..مو زينة عليك الوكفة..
كعد ع الكرسي ومستمر يصيح..صار نار..
صگر : اخر فترة شسوولك وشسويت انت..
محمد : ما سوولي شي ولا سويت شي..
صگر : تحجي لا احجيك بالاهاين..
ضل يماطل ويكول ما مسوي شي..لحد ما بعدين حجى : اي تعاركت وي واحد جان صاحبي..هذا عنده علاقة بخلدون.. رجل اخت زهراء..عساس رجلهه ما ادري..هو يدري بيه سني وذاب جرش وكل هاي التفاصيل..كايم صديقة مشتكيله علي هو رايح خارط كلشي..انه حتى قافل التلفون صار اربع ايام وما اطلع للمحل بس العصر وارجع المغرب.

انه هم خايف بس ما اريد اوتر الوضع بالزايد..
صگر : زين بلا زحمة اذا خايف هاي المسلته كلهه شكو مسويهه..اريد اعرف..
محمد : شمدريني بعد صارت..
صگر : لا والحلو شلون يحجي..بس لو داري من البداية.. چا دفنتك بالبيت ولا خليتك تلتقي وياهم..
محمد : يمعود..هسة احنه وين وصلنه سنة وشيعة شنو..
صگر : حجي يفيدك..انه اطلع واشوف..بعدهه الطائفية ما راحت ولا حتروح..وانت بمكان ما تكفي خيرك شرك كمت صرت وياهم..ما قصرت
محمد : يابة طايش اغبر يعني شسوي..
صگر : حتتحمل نتيجة الطيش هذا..مو تريد تزوج..
محمد : اي..
صگر : كوم لم ملابسك وتروح لبيت خال امب باربيل..

رجلك ما اريدهه تخطي البصرة زين لو لا..لحيتك شيلهه وشواربك هم..ما اريد واحد يشوفك ويعرفك..اربيل مابيهه غير الجيش والبيشمركة..تروح هناك وحلكك متفكة..
محمد بصياح : شنو شنوووو..وين تريد تذبني هناك.. هو انه وين شايفه خاطر اروح اعيش يمه..
صگر : ابوية انت لا تعبني وروح هناك..اذا ع المصرف لا تخاف انه ادزلك كل فترة ولا تطلب من احد خوش..
محمد : يمة هذا شديحجي..
صگر : هذا بعينك..شنو بكدك تحاجيني هيج..
الحجية : حجي اخوك صحيح..هو هذا المفروض يصير.. هو الشمال أأمن شي..روح واسكت
وائل : واحنه وين نروح..وانت..
صگر : هسة خليروح محمد هو المهم..بعدين احنه.. خالو انه علمودك ما اخليك تروح وياهم..

انه ما ادري شجاني وطفرت من لساني..كتله : ليش..
صگر : مشاكل قديمة بيناتهم..يعني لا يلتقي بيهم ولا هم يلتقون بي..جان خليتكم تروحون وياه هناك..
الحجية : زين شلون خاف ما يقبل شي..عندك تواصل وياه
صگر : اي عندي..بس اخابره اتفق وياه..
الحجية اندارت على محمد وتحاجي بنتر : ارتاحيت.. شفت شسويت بينه..بعدنه ها يالله ارتاحينه من تهجير سوريا اجيت انت حتبهذلنه وتبهذل اخوك..
صگر : عوفي جاهل..
طلع التلفون وخابر مدري منو..كعد يحجي وياه على محمد والوضع خطر وحجاله الموضوع بشكل سطحي..ضل يحجي وياه تقريب الربع ساعة..
صگر : اليوم الفجر اخذك للكراج وتروح لاربيل..كوم جدامي شيل اللحية والشوارب..

ما اريد احد يعرفك..عود صايرلي زلمة بهسوالف..
محمد ضل يصيح وصگر همات..لحد ما كام من وحده للحمام زين لحيته وخفف شواربه..بعدين راح لغرفته ما شفناه.. الوقت عبالك رجعنه ل٢٠٠٦ من ردنه نسافر لسوريا..الغصة صارت بزردومي ليش هيج حظي فكر..منا صارت سالفة هاي البنية زهراء وعفت صگر شهرين الا..ومن رجعت لكيته مريض.. يالله توه ديصير زين واجت اللطمة مالت محمد..عفتهم يحجون وصعدت فوك..كمت اعاين بالغرفة اريد ابجي..ما اريد اعوف البيت مرة اللخ..ما اريد اعوف صگر..تعبت من البعد والاشتياق..اريد فد يوم ارتاحلي شهر كامل ماكو..يعني شنو من انه ببطني امي مكتبوتلي النقمة..رحت فتحت التلفزيون اريد انسى شسوي..شوي واجة صگر..نزع الحزام هذا يشدوه ع البطن علمود الفقرات..اجة تمدد يمي وحضني من خصري..نصيت التلفزيون وحاجيته..

دنوة : صگر..هم حنعوف البيت..
صگر : الله كريم..
دنوة : لا احجي..لتجاوبني هيج جواب..
صگر : اي..فترة بين ما تنسي السالفة وترجعون..بس محمد بعد ماله رجعه هنا..خليشوف حياته هناك..
دنوة : وهيج سهل الموضوع..
صگر : اكول لا تخبليني..شنو سهل باباتي..جا سهل اعوفه هنا يسرح ويمرح بعدين يصكوه..هو بلا كلشي الوضع ها.. مو حيل زين..ولو اكو تغيير جبير عن ال٢٠٠٦ وغيرهه بس بعده مو امان للدرجة التتوقعيهه..بعدين الموضوع جبير وهذا الادبسز مدخل روحه بشغلات اكبر من راسه..
دنوة : بس ما اريد اعوف البيت واعوفك..خليني هنا حباب.. حتلو ابقى وحدي وانتظرك تجي..والله تعبت..ما اريدك تبتعد عني بعد..حتى ما تهنيت بيك..

مد ايده على حلكي سكتني بلمسة هادئة : لا تبجين.. ماكو شي انه ما علي شي..بس الحذر واجب..
دنوة : ادري دتحجين هيج خاطر تقنعني ماكو شي.. نزلت جسمي صرت بمستوى عيونه : انه كبرت..مو مثل اول ما اخذتني حتى استحي اجاوب..يصيحون علي ويغلطون واسكت..هاي سنين الغربة والمشاكل وكلشي صارلي من اجيت يمك لحد هسة تعلمت هواي شغلات..احجيلي الصدك.. شحيصيرلك..دا احجي وكمت ابجي..بجيتي هلمرة بس دموع مابيهه معنى..تعبت هلكد ما بجيت وصبرت..حاوطته من رگبته راسي على صدره واحاجي : لا تبعدني عنك..والله بس انت بقيتلي وهم ما اشوفك..دتحس بيه لو لا..
مسح على شعري وهمس باذني : حاس بيج يبعد عيوني والله اسف على كل لحظة بقيتي بيهه بعيدة عني.. ما عاجبني الوضع بس ما اريد احجي..

ما اريد احجي وتنقهرين..لازم واحد من عدنه هو اليتحمل ويبين بشخصيه قوية..دتفهمين شلون..
حركت راسي يعني اي بس مستمرة ابجي..
صگر : كافي بجي حبيبي..والله ينمرد گلبي عليج.. شبيدي شريد اسوي..لا تقهرين روحج ادور تتمرضين.. ريحي اعصابج هلتكدرين علي..مو هينة علي اشوف دموعج يولي والله..بس هاهية..
حضنته ودموعي تصب..ما ادري شكد ضليت ابجي بس تعبت ونمت..كعدت الصبح راسي يوجعني وايدي مقفلة.. حسيت على صگر حاضني بايده من ادية ويمسح بشعري.. شافني كعدت باسني من راسي وخدي..
صگر : بعد وكت..رجعي نامي..
بتملل : ليش بيش الساعة..
صگر : بالتسعة..

دنوة : ها زين..
تقرب باسني وسحب راسي بحضنه : وصلت محمد للكراج
دنوة : اكول شعندك كاعد..
صگر : اي ما اجاني نوم بعد..راسي حيطك من التفكير..
دنوة : الله يساعدك..ما ادري شكول والله..
صگر : خليهه على الله..نامي عكبة تروحون لبيت اخلاص
دنوة : اخلاص.. بس ليش..
صگر : ماكو غيرهه..وين اخذج..لبيت جدج..هو بلا كلشي ما يريدنه..عاد هسة شلون..
دنوة : زين شكد نبقى..
صگر : ان شاء الله ما مطولين..انه خابرتهه وحجيتلهه شصار كالت تعالو هلا بيكم..عمهه يعني ابو رجلهه عنده مشتمل مأجرة بس من تزوج ابنه شالو النزل وكعدو بمكانه.. فبس هم كاعدين مو وي عيالهه..

دنوة : هااا..يله زين..
تقرب همس باذني : هلكد ما انقهرت عليج حتى بالحلم اجيتيني تبجين..
دنوة : وتريد تعوفني..
صگر : مجبور يولي..مجبور..وين اروح واخلص..
دنوة : ضل يمي لا تروح..
شد علي بحضنه وسكت ما جاوبني..مر اسبوع وصگر لازم يلتحق..بالليل كال حضريلي هدوم اخذ وياي مااگدر ارجع بعد.. كمت فوك سويتله جنطته وانه همات سويت جنطتي.. ورتبت الغرفة..غيرت الفرشة وعطرتهه..اريد اشبع منه..تعبني البعد وهلكتني الظروف.. اخذت سيت نوم هو يحبه علي.. طفيت الضوة بقى بس ضوة احمر..

طبيت للحمام حضرت المي ونسيت المكيف مالت شعري.. تمشيت وفتت للغرفة لكيته متمدد ع الچرباية يگلب بالتلفزيون.. اندارلي ابتسملي بتعب..بادلته واخذت الاريده ورحت سبحت.. نشفت شعري بدون مااشسور .. خليت مكياج بسيط .. عاينت لروحي بالمراية نظرة اخيرة..الله يعلم شوكت حلبس هيج مرة اللخ.. لبست الروب وطلعت..لكيت الغرفة مختنگة بالدخان.. گحيت على كيف ورحت يمه..النظافة مليانة لعينهه گطوف.. سحبتهه من ايده بهدوء..
دنوة : حبيبي كافي موزين هيج..
صگر : خليهه..تقللي التوتر..
دنوة : وانت متوتر..
فرك وجهه وگام : اي والله..خايف عليكم..
طفيت الجگارة وگمت يمه..نزع الحزام مال فقرات .. حضنته من ظهره وأشم بريحته..
دنوة : انه همات خايفة عليك..شكد تخاطر وتتحمل علمودنا..

كمش ايدي وسحبني من وره ظهره لصدره..بسته من چتفه وايدي محاوطة رگبته بس ماذابة ثگلي علي..خاف يتأذى..
رفع راسي ويعاين بعيوني ..رفع حاجبه وابتسم : اووف اروح فدوه للجريئ..
دفعته بشكل خفيف كشقة من صدره : لاتحچي هيج.. تره ابطل..
صگر : لا عمي..كلشي ولا تگلباتج..
دنوة : ااممم..حبيبي شلونه ظهرك..
صگر : زين گلبي..بس وجع خفيف..

مد ايده ع الميزتواليت سحب جگارة ورثهه..كام يدخن.. شو ماادري ليش ردت اجربهه من شفايفه..جريتهه من إيده .. فتح عيونه متفاجئ..

صگر : دناوي شنو سالفتج وي الجگاير..
دنوة : اريد اجرب..
صگر : لا والله..دگعدي ابوية لاتتسودنين..
دنوة : يله حباب شوي..نفس واحد..
صگر : لاااع..ختولي دمار هاي..
عاينت علي وذبلت صوتي حچيت بدلع : يله حبيبي..
سكت ماكال شي..قربتهه من شفايفي ودخنت.. نفسين وأخذهه مني..
صگر : هاي مااريد اكسر بخاطرج وخليتج..مرة اللخ...
سكت .. : شيصير مرة اللخ..
صگر : شفايفي تاكل هلشفايف مو الجگارة..
طفاهه وتقرب مني بحب ولهفة..سلمته كلشي وبداخلي اريد اتمسك بكل لحظة حعيشهه بهلوكت..اخاف نطول مثل سوريا وماأروي عطشي بشوفته.. مد ايده فتح حزام الروب وايده اللخ تحررني من قيودي خاطر اصير حرة بحضنه..

وره ساعتين خليت راسي على صدره وحاضنته .. هو منتشي بريحة شعري..
دنوة : حبيبي..
صگر : ها گلبي..
دنوة : اشتاقيتلك من هسه..
تقرب من رگبتي شمهه هو ويهمس : انه همات..شلون وكت أغبر..
بسته من خده وسكتت..على هدوء الغرفة غفينا..

كعدت الفجر سبحت وبدلت واخذت الجنطة ونزلت..كل متر بالبيت حشتاقله بكد ما حبتعد عنه..ما ادري شكد حبقى يله ارجع بس المهم حتصير ايام ثكيلة..اخذنه صگر ورحنه للحلة اول.. على حسب وصف اخلاص وصلنه لبيتهم..بالباب شفت رجلهه واكف نزل صگر والحجي سلمو عليه..وخالة همات.. انه وكفت يم باب السيارة وسلمت علي بدون ما ارفع راسي.. وره دقايق طبينه..اخلاص اول ما شفتهه معرفتهه ابددد..متغيره كلش.. صايرة احلى بقاطات..جسمهه متروس يعني حيل عجبتني ولو اكرهه بس الواحد يكول الصدك..طبينه بالصالة وصگر اجه كعد همات..تقريب النص ساعه وره ما قدمت عصير جان يكوم ترخص منهم وطلع هو ومحمود..انتظرته يرجع وطلعت بالعجل توه ديصعد بالسيارة وشافني..رحت يمه : حشتاقلك..
صگر : انه بعد بنيتي انتي..انتبهي لنفسج وللدوة مالتج.. لا تخربطين..اخابرج دائما ماشي..

ابتسمت : ماشي..
ابتسملي وركب بالسيارة وراح..بهللحظة حسيت روحي راحت وياه..كلشي بيه بقى بهلمكان بس روحي..اخذت نفس وطبيت سديت الباب ورحت كعدت وياهم..اخلاص اسلوبهه لاين وياي شوي..يعني زينة احسن مو مثل كبل..او يمكن مستحية من رجلهه..عادي انه بالحالتين حبقى يم خالة وما ادخل بشي.. مشى اليوم عادي..بالليل نمنه انه والحجي وخالة بغرفة جانت فارغة بس بيهه جرباية..الملابس بقن بالجنط بالغرفة وخالة تنام ع الجرباية لأن رجلهه توجعهه اذا كعدت..مرت الايام بدون شي جديد..حسيت نظام سوريا انعاد هنا..بس الفرق الحجي يطلع وي محمود من يروح للشغل..هو عنده مكتبة..نبقى انه وخالة واخلاص..محمد كعد يم خال صگر استقر لمدة شهر بعدين كام يشتغل كل ما تسألة خالة ع الوضع يكللهه زين ومرتاح مابيه شي..رقمه اخذناه من صگر..

هو عنده اتصال وي خالة الكعد يمه محمد فضل يحجي وياه من تلفون خالة لحد ما اشترى خط جديد..

وره هلشهر كاعدين العصر عادي دنسولف انه وخالة..جان تجي اخلاص جانت طالعة بس مكالت وين..
اخلاص : يمههه..ويننننج..
الحجية : هنا بالغرفة خييير..
اجت مناك تضحك والابتسامة شاكة الحلك : تدرين وين جنت
الحجية : وين..شمدريني..
اخلاص : رحت سويت تحليل وطلعت حامل..
خالة كامت عليهه بوستهه وباركتلهه..انه هم باركتلهه بس حجيهه مثل السم بجسمي..
اخلاص : اي يمه حامل شفتي..همزين ما تعبت من دكتورة لدكتورة..حجتهه وعاينت علي..
انهضمت من الموقف..ما جاوبتهه ضليت اكلب بالتلفزيون.. بس گلبي انعصر عصر منهه..هم بعد وهم هاي الحقيرة تذب بسامير بگلبي..

بالليل خالة راحت تنام من وكت وانه كاعدة بالمطبخ اكل.. اجت هي واشتغلت رحمة الله..
اخلاص : اكلج..انتو باقين منا لشهرين مو..
دنوة : ما ادري..حسب غير صگر يكول..
اخلاص : اي خوش اذا باقين تجين ويايه اسوي سونار..
دنوة : اي ميخالف..
اخلاص : وانتي ماكو حمل شي..مو راجعتي دكتورة
دنوة : اي بس ماكو بعد..
ابتسمت بطرف شفافهه وراحت يم الباب : الله يرزقج..
دنوة : ان شاء الله وأربي انه وصگر..
انه كتلهه هيج جان تدروش..خزرتني وراحت..كملت ورحت انام اخذت التلفون ردت ادك على صگر بعدين كلت لا.. ادزله رسالة احسن..كتله : حبيبي مشتاقتلك هواي شلونك..ضليت انتظر نص ساعة كلت خاف كاعد..

بعدين عفته ونمت..كعدت الصبح لكيته مجاوب..ولو بعدني ما فاتحتهه بس فرحت لا اراديا..
- عمري انتي والله زين ومشتاكلج بكد رحمة الله..اسبوع الجاي اجي يومين يمج..
رجعت كتبتله : صدك والله..همزين..
ابتسمت وكمت غسلت وجهي..لميت الفراشات جان يدك التلفون..رحت شلته بالعجل..دا احجي هو سبقني..
صگر : شلونج بنيتي..
دنوة : زينة وانت..
صگر : بهلدنيا..مشتاك لصوتج والله..
دنوة : انه بعد..حجينه شوي بعدين سديته وكمت اسوي زلاطة جان رمضان والجو حار حيييل..منا النهار طويل ..الله يساعد الكاعد بره..مر اسبوع عادي..بس اخلاص تتنعوص براسي سويلي هيج وسويلي هيج..

جيبيلي هاي الشغلة ما اكدر ادنج تعبانة..ما اكدر اشتغل هواي تدرين حامل يعني اخاف على طفلي..وهاي هيج تحجي بس تريد تغثني..من تشوفني اخذ الحباية تضل يم راسي عود هي مقهورة علي..بالحقيقة هي ما معبرتني حتى..بس يله اخذهه على كد عقلهه..تكرهني واليكره كلشي يسوي.. محمد نفس وضعه ديشتغل يكول محد يعرفني هناك..حتى ديتعلم كردي وماشي الحال..هو ابو المشكلة راح هناك وارتاح.. واحنه تبهذلنه من اخلاص وحجيهه السم..شكد تغث.. صگر كل يومين اخابره او يخابرني..والرسايل منتهين منهه..ما ادري احسهه اكثر شي يقربني اله..احجي براحتي اكثر من المكالمة هي رسالة بس ما ادري شلون يحس بيه..مرة كبل رمضان جنت ابجي وكتبتهه لأن مليت من البيت ومن اخلاص..دزيتهه العصر .. بالليل نامو كلهم تقريب الوحدة ونص جان يخابرني..بدون مقدمات سألني..

صگر : حبيبي شبيج ضايجة..
دنوة : لا مابيه شي..
صگر : ما تكولين اسمي الا اذا جنتي ضايجة..
دنوة : هاي شلون..
صگر : اي انه منتبه عليج..احجيلي..رصيد وشديت علمودج حتلو تبجين ميخالف..
ابتسمت : مابيه شي وداعتك..بس جنت مشتاقتلك ومشتاقة لبيتنه وضجت شوي..هسة احسن..
هذا الموقف ما انساه..يعني حس بيه من رسالة..شلون اذا بالحقيقة ووجه لوجه..هاي المواقف البسيطة هي تبقى ببالي احسهه تصير جزء مني..وصگر سيد هاي المواقف..

وره هلاسبوع جنت نايمة لأن سهرت رمضان ومنو ينام من وكت يعني..كعدت على صوت صگر..شنو معقولة اجه لو دا اتخيل..فتحت عيوني صار ضوه الشمس بعيني..كبل غمضت حسيت على ايده صارت على شعري..همس..
صگر : كومي يولي جاي اشوفج..
ذبيت الغطى وحضنته..جلبت برگبته..صار تلث شهور ما شايفته بس اسمع صوته..دموعي نزلت بس هلمرة غير شي.. بسته من خده ورجعت حضنته..
صگر : يا يااابة..يبعد طولي هلطول والله مشتاكلج يولي.. ما تحملت ابقى اكثر كلت لازم اجي اشوفهه..
دنوة : زين ما بقيت بعد..
صگر : اي حبيبي..كومي هسة صايم ماريد افطر..
دنوة : شقصدك..انه افطرك يعني..وسفة..
صگر : حشاج ابوية انتي..انه افطر وحدي سبحانك ربي

ابتسمت وكمت..هو هم كام..راح كعد بالصالة وي محمود وانه لبست شال ورحت غسلت وجهي..مشى اليوم عادي.. وره الفطور طلع الحجي وصگر ومحمود..ما رجعو لليل تقريب العشرة ونص هيج..مرن يومين شوي تغيرت نفسيتي من اجه صگر..حتى اخلاص سكتت..يعني شكد ما كبرت هي وتزوجت وحتصير ام بس تبقى تخاف من صگر..خالة تكللهه ها شو خانسة..تخافين من عنده وتكوم تضحك..هي تضوج بس هيج عود متريد تبين..

وره هليومين كعدت الظهر ملكيت صگر..شكد ضجت .. حتى ما كعدني اشوفه كبل لا يروح..ولا يبطل هاي سوالفه.. ضليت اليوم كله ضايجة..لحد ما بالليل وره السحور دزيتله : ليش رحت بدون ما تكعدني..مو حشتاقلك..
توني ردت اسده جان يجاوب..
- ما هون علي اشوفج نايمة تعبانة واكعدج..
ابتسمت..صدك انه بليلتهه نظفت البيت وغسلت الطرمة.. انه واخلاص بس هي تجي تكلي شوي هيج واسوي وياج.. تشتغل ع النص ونعوفه علي..تدري بيه ما اعوف شي ع النص يعني هيج بالعناد عبالك..وانه هم ما اكول شي عادي مو فد مشكلة..سديت التلفون وكمت جان تصير خالة بوجهي..
الحجية : ها شو تضحكين..ضحكيني وياج..
دنوة : هههه..لا ماكو شي جنت احاجي صگر..
الحجية : ذكرتيني..تعالي هاج..

اخذتني وياهه لمكان جنطتهه..انطتني فلوس وباكيت الحبوب مالتي..كتلهه : شنو هاي..
الحجية : صگر جاب الدوة وخلالج فلوس خاف تحتاجين شي كتله انه عندي وانطيهه..كال لا خليهه بيدهه..
ابتسمت واخذتهن منهه..هو صدك جان باقيلي بعد حبايتين ويخلص الشريط..حتى وهو مشغول ما ناسيني.. واحد غيره يكلي دطيري انتي ودواج..يعني صدك اذا جنت خسرانه شي بحياتي فصگر طلعلي العوض اضعاف..ولا حسيت.. مرت الايام وخلص رمضان..صگر ما شفته من ذاك اليوم.. بس اخابره..اخلاص رحت وياهه سوت سونار طلع بيهه ولد.. هي ومرام ثنينهن ولد..بس مرام باقيلهه شهرين يمكن وتجيب حيصير اكبر من ابن اخلاص..

وره هلايام جنت كاعدة وي خالة بالهول اتفرج تلفزيون بالليل..جان يدك تلفوني.. كمت اشيله عبالي صگر..منو يخابرني غيره..بس شفته رقم غريب عفته ما شلته..دقايق ورجع خابر..شلته ..صوت بنية تبجي حتى ما فهمت..
- : دنوة..هاي انتييي..

يتبــــــــــــــــع.......................

بنات على كيفكم ويايه شبيكم ، ادري متحمسين بس دااكتب من عندي فراغ وتدرون برمضان الواحد شلون يلتهي ، المهم هسة نجي، اني مااريد اتطرق لمواضيع سياسية متفيدنا راحت وانتهت ، بس هنا يعني مجبورة اوضح كم شغلة فاتمنى ان ما تعتبروها شي سياسي ويأثر ع القصة...
ووو شنو توقعاتكم؟ .. اتحفوني