رواية اسألي عني الليالي الفصل الثالث وثلاثون 33 - بقلم رقية جاسم

اعاتِب من يمر بيه حنين الصوت ..
           ولو يمرني الطيف ..
      يلكاني هلة ويلكاني غايب ..

قناة التليگرا

حساب الانستگرا

الـبـارت الثاني والـثـلاثـون..............

فاطمة : يلة يمة ورود..ابوج بالباب ينتظرنة..
ورود : يلة بس البس الحذاء..
فاطمة : طلعت من البيت ادردم بيني وبين روحي..هاي دنوة شلون طالعة يالله..ولا تكول مطلكة..يعني اكيد تحز بخاطر المرة من تطلك وهي بعدهي صغيرة..ششافت من حياتهه دتطلك..بس والله حلوة وما تتعاب..روان طبت على كد العقد وراحت بعد مشفتهه..اي اكيد متطيق تشوف طليقة رجلهه وهي بهلوضع..لو خاف اكو غير شي..ما ادري..خلارجع للبيت واخابرهه بالليل..صعدت بالسيارة وانتظرت ورود تجي..ابو قصي انت جنت وياهم غير..
لواء : اي عيني..
فاطمة : وشلونة الولد..
لواء : والله زين..ومبين شاريهه..الله يسعدهم..
فاطمة : ها..اي زين..

اجت ورود سلمت على ابوهه وطلعنه للبيت..قصي وعامر بقو وياهم يتعللون..لواء بس وصلنة للبيت ورجع يمهم..كتلة تتعشه يعني ننتظرك..كال حنتعشة بره انتو اكلو..نزعت الشال وعلكت العباية..انداريت ع ورود..اكلج يمة شفتي روان اليوم
ورود : اي صدك توني اريد اسألج..شو مدري شلونهه
فاطمة : مادري..حتى انه كلت..اكلج كومي سوي عشه.. تعبت انه وابوج كال نجي بالليل..
ورود : يلة بس ابدل..
فاطمة : كمت انه هم بدلت..سمعت التلفون يدك..رحت شلتة.. هاي اختي الجبيرة..ام ظافر..
ام ظافر : هلا خية..شلونج..
فاطمة : هلا بيج عيني..على الله..وانتي..شخبار ظافر

ام ظافر : زينين..حاجيتة بموضوع حنين..كتله تره البنيه متريدك وتزوجت بارداتهه..انت هم انساهه وانتهى الموضوع.. خوما نضل عايشين بالماضي..وانته تستاهل وحده احسن منهه ومن مقامك من ناحية الدراسة والبيئة وغيرهه..
فاطمة : وهو شكال..
ام ظافر : اقتنع..هسة ينساهه يمعودة..اشكال يشوف بالكلية بقت على حنين..اي سولفيلي شلونهه الخطوبة..
فاطمة : على كولتج..يعني حلوة..سولفتلهه شصار بين ما اجت ورود كالت يلة سويت العشه..اكلج خية..اروح اكلي لگمة خاطر اخذ دواي وانام..ودعتهه وسديته..بس مكتلهه على روان.. خاف يضل بالهه وهي هلوحيدة..كعدت اكلت شوي واخذت دواية مالت الضغط ورحت للغرفة خابرت روان..

روان : الو..هلة بخالة..
فاطمة : هلة بيج عيوني..
روان : شنو تردين تكولين شي..
فاطمة : اي والله..اشو شفتج ضايجة بالخطوبة..شكو.. شو هاي انه حجيت هج جان تنفجر بجي وتشهك.. بس اصبري خلاتفهم شبيج..
روان : شتفهمين خالة..والله مذلولة من وره عقيل..
فاطمة : شلون يعني..شمسوي..
روان : اليوم شفت عقيل يحضن بدنوة ويبوس بيهه..يعني هي من جانت مرتة كلساع يكتل بيها..هسة من طلكهه كام يحنلهه.. اني ليش هيج حظي..انوب هي تدفع بي متريدة وهو مجلبلهه حتى كام يكرهني من وراهه..كليلي انتي شسوي هسة تكليلي حاجي..اي مو حاجيتة ورحت علي ابجي فحطت من البجي.. اكلة شعندك وياهه..مرة تطلكت وراحت خلص انتهى كلشي بيناتكم لا تضل تعترضلهه يكلي وانتي شكو اني بكيفي

كتلة بكيفك مو..لعد اني وابني وين نروح اذا انت ضليت تركض ورة هاي المكموعة..يكلي شخبصتيني بابنج..هسة هو وينة خليجي منا لذاك الوكت عود الله كريم..وهسة قبل شوية يكلي حروح لبغداد واخلص منج..يعني اني شسوي خالة انطيني حل تعبت..اكلة اذا متريدني طلكني..يكلي لا احبج وما اطلكج يعني شنو بكيفة يحبني وبكيفة يضوج مني.. اذا هيج الحجي لعد هذا لعب مو حب..
فاطمة : والله مادري شكلج..هاي دنوة لعبت بعقل الرجال.. لازم تكسبي..اذا يضل هيج احتمال يقنعهه ويرجعون..وانتي تحبي مثل متكولين..شوفي خالة انتي لازم متسكتيلهه.. هاي حية..تلكيهه من برة هيج بس بداخلهه غير شي..
روان : يعني شسوي ما اسكتلهه..اذا رجلي هو رايح عليهه وجايهه بالغصب..حتى الجذبة مترهم..

فاطمة : شبيج يولي..مو تكولين رجلج حيروح لبغداد..يعني محيعرف شصاير..وانتي هيج روحي عليهه وصيحي لمي عليهه البيت..كليلهم هاي تكلي الا اخذ رجلج منج..شبيج متعرفين تتصرفين..شوفيهه شلون لابسه وكاشخة اليوم وهو جان زوجهه يجوز تحنلة وسوت هج علمودة..
روان : ها..اي معقول..
فاطمة : وانتي مقهورة لهلسبب؟..
روان : اي والله خالة..
فاطمة : يمعودة..ختولي هاي سالفتهه شمرة عصا ترة.. وانتي الاصل عقيل ميعوفج لتشيلين هم..
روان : طمنتيني والله..اني ماخابرت امي..هسة بس احجيلهه ع الصار تضل تعير بيه..ها كتلج لتقبلين بابن الريف هذا جدرة ميكعد الا على اربعة..ارتاحي هسة..وهاي هيج تضل تحجي ..حتى اضوج احجيلهه..

فاطمة : انه وين اروح..حاجيني شوكت متحبين..مو يكولون الخالة هي ام ثانية..يلة حبوبه مسحي دموعج..انه اروح انام تعبت من الهوسة اليوم..ودعتهه ورحت نمت..فزيت بالليل على صوت الباب تنفتح ويدخل ضوه..فتحت عيوني ع كيف..
لواء : نامي مو يمج..دادور على ملابسي..
فاطمة : رجعت تمددت وانتظرته يطفي الضوه وغفيت.. بعد ماعندي دوام وكعدة من الصبح..جنت اشتغل بجمعية بس حكومية..يعني من تقاعدت ضليت استلم راتب..ولو ممحتاجين بس تزوجني لواء جبيرة.. فابوي كالة اذا تاخذهه تخليهه تشتغل جنت اشتغل بمعمل خياطة..بعدين وره ما تزوجت بالالفينات بدايتهه اشتغلت بالجمعية هاي..زواجي جان تقليدي ومابيناتنا شي..بس الايام والعشرة الهه دورهه اكيد

هو جان متقبل فكرة الشغل لأن جان يدرس ببغداد ببيت خالة فشايف اهل بغداد شلونهه عيشتهم وطبعهم وماخذ عليهم حتى من تزوجنة عشنه ببيت الشيخ جم سنة وراهه اجر بيت بالمدينة بس بالبصرة وسكنة بي..تقريب الخمس سنوات صار عندي قصي وعامر واحنة بالبيت هذا..لحدما تزوجت سناء وراحت لبيت رجلهه عاد اجينة يمهم..اخت عمي.. يعني عمة ابو رجلي جانت هي الكل بالكل يعني اذا طبت للبيت لازم كلشي على احسن وجه ومحد يحجي.. فهي جانت تكرهني جي لواء مخليني على راحتي والشيخ مخليلنة غرفة النه ولقصي وعامر وحد..شوكت ما يعجبهه تروح ع الشيخ تكلة هاي شنو فاطمة تروح للشغل شعدنه قابل.. هو يكللهه رجلهه قابل احنة شكو..وهاي ضلت كل فترة تكول هيج لواء يسمعهه بس يسكت..

لحدما فديوم كلتلي انتي تطلعين تتواعدين مترحين للشغل..عاد هنا كمت ابجي وصدك حزت بخاطري مسكتت..تانيت لواء يرجع وحجيتلة صارت عركة شكبرهه..لواء كالة لعمي اذا اختك متحترم روحهه انه طالع من البيت..هاي جي تشوفوني ساكت هج تسوون بيومهه ردنة نطلع من البيت بس عمي كال بعد لا تجي يمكم ولا تتكربلكم..هي هلوحيدة ويريد يدللهه..انه ماصدك يحبهه هشكل جي اخته الوحيدة..يمكن اكو شي ثاني بس هو ما يكول..سنة الـ٩٧ سكنا ببغداد..اشترى لواء بيت هناك قريب ع المحل الجان يشتغل بي..وبقينا هناك ٢٠٠٣ بالسقوط خطفوا قصي..ماقبلوا يرجعوه الا فدية وننتقل من بغداد..جنة ساكنين بالاعظمية..والله ضل مخطوف عدهم شهر..ادور الاتصالات مكطوعة..كلش فقدت الامل بذاك اليوم وكلت بعد ميرجعلي ابني..

لحدما فديوم رجع لواء من الشغل يلهث..حتى ماكدر يحجي انه كلت هاي كتلو لقصي..اخر شي حجه
لواء : اجتني رسالة من واحد طفل..كاتبلي بيهه عنوان ومبلغ باجر اروح هناك..كتلة منو انطاكياهه..كال واحد رجال وكال خليستعجل احسن الة ولابنة..
بيومهه مانمنة للصبح..بين اي هذا اخر امل الي..وبين خاف هاي نصبة..اخر شي الصبح لواء اخذ فلوس ع المبلغ المحددي وراح..ضليت كامشة گلبي خاف ياخذون رجلي..بين ما اجة انه خلصت القران..ماكو نبي وامام مانخيتة..والحمدلله رجعو ثنيناتهم وبردو گلبي..قصي جان يصلي بالجامع ويهتم لهلاشياء.. وبفترة السقوط ماهو اليعجبهم ياخذو..يا واحد يصلي..يا واحد جان بالحزب محد سلم منهم..

وراهه باسبوع من رجع لواء باع البيت ورجعنة لبيت الشيخ اخت الشيخ بعد راحت لبيت رجلهه ومشفتهه من ذاك اليوم.. كعدت الصبح لواء ماكو..يمكن طلع للشغل كمت غسلت وجهي ورحت للمطبخ احضر الريوك..
قصي بنعاس : صباح الخير يمة..
ام قصي : هلة..صباح النور عيني..
قصي : انه حطلع للشغل..
ام قصي : وين رايح..تريك اول..
قصي : لا ميحتاج..متخوم من البارحة..
ام قصي : يلة براحتك..قصي متزوج صار سنتين..وعندة ولد بس هلفترة مرتة ببيت اهلهه..هي هم الحلة فمن تروح تضل يمهم اسبوع هج وترجع..

كعدت ورود جابت الريوك بالصالة وكعدنه نتريك..العصر خابرني لواء..كال بالليل حيجون عقيل وسالم وعصام وابوي وقاسم..يعني لازم عشة زين.. اوصي قصي من يجي بالليل يجيب وياه..مشى اليوم عادي ماصار شي..كلت بالليل اخابر روان اشوفهه شلونهه.. المغربيه اجو وانه خابرت قصي يجيب وياه كباب شوي وتكة..الصالة الجبيرة مفتوحة..فينسمع شديحجون..جابو طاري دنوة..
لواء : والله هاي البنية الله يحبهه ورجعت..

كلت بگلبي والله يحبهه بعد اكثر..فزيت على صوت ورود..
ورود : يمة هاي وين اخلي..
اجيت رتبت الاكل وراحت ورود صاحت عامر يودي الاكل يمهم وانه طلعت النة وكعدنه بالمطبخ ناكل..

ورود : يمة شنو رأيج بناصر..
فاطمة : هاي حتخبصيني بي..جم مرة سألتيني علي.. يابة خوش ولد ارتاحي..
ورود : يعني انه احاجيج جي امي قابل المن احجي..
فاطمة : يلة احجي يمة..كملنة اكل جان يجي لواء..
لواء : اكلج عيني..حضريلي فراش للجماعة..الفجر نطلع لبغداد جم يوم وارجع..عامر حيجي وياي..
فاطمة : اي على راحتك..مر الوكت ورود انطت فراش لقصي وهو بعد رتبلهميا..سوت جاي وكعدنة نحجي بعد التهيت ماخابرت روان..بالليل رحت انام جان يدك التلفون..شلتة هاي روان..خير ياستار..هسة تذكرت..
روان : الو خالة..شلونج..
فاطمة : هلة بيج حبيبة..على الله..خير خوما اكو شي

روان : خالة كلشي اكو..هاي غرفة دنوة الكعدنه بيهه صايره ع المزرعه..وهسة شفت دنوة ورائد سوه..كاعدين شوه هذا مو ملتحق شعندة جاي..
فاطمة : صخام يداده..صدك تحجين..يمكن نازل طوارئ زين شنو حتسوين انتي هسة..
روان : ماادري هو انه داسألج..
فاطمة : شوفي خالة هاي جتج من الله..باجر من الصبح تخزيهه بالبيت..اول شي تجيهه بالهداوة تره شفتج انتي ورائد بعدين فري الموضوع على عقيل واذا سألو شكو كولي شفتهه هي ورائد  واخذت رجلي ومن هلحجي تعرفين بعد..
روان : اخاف محد يصدكني..
فاطمة : لا شلون ميصدكون..سوي مثل ما كتلج وهسة تشوفين شلون حيكرهوهه..كالت ماشي ودعتهه وسديته..

روان تصير بت اختي..مرة جبتهه وياي من اجيت من بيت اهلي وشافهه عقيل..عاد ضل كلما اروح لبيت اهلي يكلي وروان متجي وياج فهمت حبهه..فكتلة اذا تريدهه اخطبهه..
ماكال لا..وره فترة اقل من شهر خطبهه بس خطوبتهم طولت وحبهه واخذهه بس ماصار عدهه خلفة الا هلسنة رجعت التلفون ونمت..

دنوة : وره هاي الخمسة ايام..الظهر جنت واكفة ع الطباخ داسوي الغده.. نصيت النار وصعدت فوك اغير ملابسي سمعت صوت صياح طرشني..لبست بالعجل ونزلت جوة اشوف شكو..اول ما خطيت باية الدرج دفعتني شذى..
شذى : ابوج اذا صار بي شي ما ارحمج..كلة من وراج ام الزلم..كح...هذا صاحبج برة روحي يلة فضيهه..
دنوة : شنو صاحبي..شبيهه هاي..عفتهه ورحت للباب.. يعني شصور الموقف ما انطي حقة..ابوي واكف ويصيح ومناك رائد يصيح..ابوي شافني واكفة اجة علي كمشني من شعري وجرني..كام يصيح ويغلط وانه شعري خلص بيدة..
محيي : شعندج طالعه..شعندج..اي طالعه تشوفي طبعا انتي بحال ابوج يموووت ينجلط يخلص عمره..

دنوة : كمت ابجي وايدي على ايده اريده يوخر..يابة والله ما ادري شديصير..هو سمعني احجي هيج ضربني راشدي ودفعني جوة..كعدت بالكع وابجي وايدي على وجهي..جان الباب مالت المطبخ كلة جام..وخرت البرده شوي وعاينتلهم شنو انه يربي ليش بس مشاكل تعبت من روحي شحال لو غيري
محيي : انت لو رجال صدك مو تجي تالي الليل تستغلهه وتلعب بعقلهه..انت جلببب مثل ابوك..
رائد : ابوي مات..ماااات..كافي حتى الميت ماخلص منكم..وانه دنوة احبهه..اي احبهه واريدهه واخذهه جدامك وجدام الكل وغصب عنكم والله..بس چي ابوي متوفي ما اكدر اجي اخطبهه..والا هي الي لو بعد عشر سنين الي
محيي : بيك خير اخذهه..الا اخليهه حسرة بگلبك..يلة بره بيتي واذا اجيت بعد احش رجلك..

رائد : جاي مره وثانيه وثالثة لحدما اخذهه..انت ابوهه متحبهه بگدي..ترة اكبر منهه بـ١٦ سنة بحال اضحك عليهه شايف وعايف..حرام عليك توكف بقسمتهه والله شاريهه واعيشهه احلى عيشة..
محيي : عيشتك خليهه الك..محد يحب بنتي مثل ابوهه.. يلة اطلع برة..ولا تجي وره ما تفرخ الدجاجة..
دنوة : ابوي كام يدفع برائد ويصيح يگله يلة اطلع وهو لسة يسكت بي ويحاجي..لابس عسكري وشعره مخربط مبين توة نازل من الواجب..اخر شي حجة..
رائد : احسبهه مثل متريد..بس وروح ابوي احرك روحي واحرگهه وياي اذا ما نطيتنياهه..الا اندمك على عمرك اخليك تنطينياهه وانت مغمض..كافي وخر ايدك..طالع ...

دنوة : راح وابوي سد الباب وراه..اندار علي..كمت بالعجل صعدت فوك وسديت الباب وابجيي..ما ادري ابجي من الموقف لو من الخوف..ثواني وطب ابوي..كمشني من رگبتي ويدفر بية ويضرب..يصيح مفهمت منة شي..
محيي : هاي انتي گتيله يجيييي..يالجلبة انتي شنووو اريد اموتج واخلص منج..طيحتي راسي بالكع..طيحتييي
دنوة بدموع وشهكات : والله ما ادري بي..والله اسوي التريده بس عوفني..يااابة احاجييك..هو ولا يمة..عافني وكام راح طلع واجة بالعجل..
محيي : كومي ماريد اشوفج جدامي بعد..اخذج لبيت خالتج لتشوفيني خلقتج..ماطيقج..كومييي
دنوة بخوف : اي اي والله كمت..مسحت دموعي وطلعت جنطه خليت بيهه ملابس ولبست الصاية والشال ودموعي مسكتت يعني لا هو المنطيتي لرائد ومريحني ولا هو العايفني بحال سبيلي..تكسر جسمي من الكتل..

محيي : يلة لاتعوين..امشي وياي..
دنوة : نزل هو ونزلت وراه..شذى واكفه هي وبناتهه ع صفحة شافتني كامشة بيدي جنطة كامت تصيح..
شذى : وين ماخذهه..خليهه يمي تشتغل..اني مابيه حيل
محيي : انتي مدخلج..انه اعرف شتصرف..امشي يلة
دنوة : رحت وياه وداني مشي لبيت خالتي..الطريق كلة مدنجة راسي..بس اسمعة يحاجيني..
محيي : ابقي هناك وانه اجيج بعدين..لا تخابرين خوش
دنوة : اي..وصلنة لبيتهم دك الباب جان تطلعلة خالتي.. طبيت جوه عافني هناك وراح..كعدت وياهم حاولت ما ابين جنت ابجي بس هي عرفت..
خالتي : شنو جنت تبجين..شو عيونج مورمة..
دنوة : لا مابية شي..البنات وين..
خالتي : فوك..تعاي كعدي يمي..احس بيج شي

رحت كعدت يمهه وحضنتهه..كمت ابجي بس دموعي تنزل مالي حيل اشهك واطلع صوت..مادري شكد ضليت بحضنهه بس سمعت صوت حلا وتارة يكولون شبيهه..مسحت دموعي وسلمت عليهم بابتسامة..
تارة : شبيج حبيبي..شلون اجيتي..
خالتي : ابوهه جابهه..اخذوهه يمكم فوك لتخلوهه تضوج هي جاية ترفه عن نفسهه..
تارة : افااا..احنا نقصر يعني..يلة تعاي..
ابتسمت وصعدت وياهم فوك..عيب كل ما اجي يمهم يشوفون دموعي بعيني شنو ابتلوا بية..
حلا : اليوم نروح لدنيا العصر ونرجع بالليل..هي عازمتنة ع العشة بس امي متتعشة تدرين بيهه..
دنوة : ها صدك..صار شكد مشايفتهه..
تارة : احجيلنة شبيج..

دنوة : حجيتلهم شصار من شفت رائد لحدما اجيت هنا.. وشلون روان كالت جانت بحضن رائد للفجر..
حلا : يمة شنو من بشر هاي متخاف ربهه..متخاف يجذبونهه يكولون تبتلي على بتنه صخام بعينهه..
دنوة : مادري..ادور اليوم اجة رائد وصار صياح بالباب بينه هو وابوي..ابوي يكلة ما انطيهه ورائد يكلة تنطيهه واذا مانطيتهه اخذهه غصب..
حلا : عيني هذا رجال لتخافين..حيجي يخطبج هسة تشوفين
دنوة : مو ابو ميت..شلون..
تارة : يخطبج بدون حفلة وهوسة..بس المهم تصيرين الة.. بين ما تطلع السنة مال ابوه وتزوجون..
دنوة : وابوي وين يقبل تصير الخطوبة هلكد طويلة..

حلا : والله ماعرف..انتي سالفتج سالفة..بعدج بضيم ابوج جان تشوفين رائد.. يالله تهنيتي چان تزوجتي هذا الخبل عقيل.. وهسة رائد والهوسة مال ابوج عبالك مسويهه عناد.. صدك كليلي هذا ميستحي على روحه يسوي هشكل.. شعدنا .. شنو هسة تفطن بيج..
دنوة : كلهه التمت براسي..هو انه يوم اي وعشرة لا..بس الله كريم اكيد كلشي الة نهاية..ماصار شي وراهه..تغدينا وكعدنا ع التلفزيون الظهر..العصر بدلت ونزلت جوة..بين ما كملوا ورحنة لبيت دنيا..استقبلتنة وتضحك وتسولف..رجلهه ماعاين علي ابد..مبين ابن اوادم..طلع من البيت كال اجيب عشة من برة لا تعبين روحج..ام رجلهه عايشه وياهم..

طلعت سلمت علينا وكعدت..عادي ماعدهه شي لا تحبهه ولا تكرهه..اكو عمات ولا يطيقن مرة الابن..مثل ام عقيل..جانت تكعدني من الصبح انظف واكنس واطبخ
دنيا : اي دنوو شعجب جيتي وكلتي بت خالتي اشوفهه شلونهه ..بيا شهر طبت..
ابتسمت وكتلهه : مو هذيج الفترة جانت امتحانات بعدين صارت خطوبة سرور التهيت يعني..يلة قابل انه كاطعة مو اجيكم كل فترة..بس انتي الناسيتني..
دنيا : شوف ذبتهه براسي..يلة مقبولة..

الكل ضحك..بعدين مشى الوكت بين ما اجة رجلهه جاب اكل ساعدتهه انه وتارة..سويناه بمواعين وكعدنة بالصالة..بين ضحكة وسالفة خالتي كالت يلة نروح تأخرنة هم يالله.. دنيا مقبلت نروح كالت باتو اليوم هنا..شنو هاي جايين دقايق ورايحين..بس خالة جانت مجايبة دواهه فرجعنا..بالطريق فتنا من بيت رائد..جان واكف هو وياه رجال جبير..يطلع بالخمسينات تقريبا..وامة همات واكفة بره..رجل دنيا دك هورن ع الخفيف وسلم عليهم..شافني بالسيارة مثل الانصدم.. دنجت ووصلنا للبيت..طبيت وصعدت فوك بالعجل..بدلت وتمددت تذكرته الصبح شلون اجة ويحجي بدم محروك واعصاب يحجي من كل گلبه..يگله اخذهه يعني اخذهه وجدام الكل..شوي وطبو البنات..

تارة : شنو حتنامين..بعد وكت..بالعشرة هسة..
دنوة : كاعدة من السبعة الصبح..ميتة تعب..
تارة : شكو هي عطلة شعندج كاعدة من الصباحيات..
خليت الغطى على راسي واخذت نفس..شذى وين تخليني انام مثل البشر..صارو هدوء وغفيت..اجاني حلم بس حسيتة حقيقة جن ابوي انطاني لرائد بس جان يبجي من كل گلبه وكامشني من ايدي..يكلي لا ترحين..اخاف عليج..گتله من شنو مو تكول رائد حباب..ما جاوبني بس كلي ديري بالج.. فزيت على صوت تارة وحلا يكعدوني بهمس..
حلا : كومي..كومييي..هذا رائد ع التلفون..
كمزت من مكاني والنوم بعيوني..حتى ماادري بيش الساعة بس اخذت التلفون من ايدهه ورحت بالممر..خليته ع اذني سمعت صوته جر نفس وحجة..

رائد : شلونج..
دنوة : شلوني..انت شتكول..
رائد : ادري..بس ما اكدر ااجل السالفة اكثر..
دنوة : شلون يعني..وابوك..
رائد : شفتي الرجال الواكف بالباب وياي اليوم..هذا خالي باجر اجيبة واجيب جدي وعمي فيصل واجي لبيتكم..ابوج خابرني العصر يكلي اذا اجيت واذا ماجيت انه منطيهه لاخو مرتي..بس...كمت ابجي قاطعته هو ويحجي..
رائد : دنوة لتبجين..وعدتج وما اخلف بوعدي..بس انطيني مجال..اذا ماصارت باليسر اجيبهه بالغصب..انه البارحة جنت راجع من الواجب الظهر..بعدني حتى مامبدل بالعجل اجيت لبيتكم..امي ماحجتلي الا من طبيت للبيت.. من طلعت رحت لبيت جدي كتلة اريدهه منك واذا ماكدرت لتلومني شحسوي كال ميكون خاطرك الا طيب..ادور جبت خالي من المطار وسويت جم شغلة للبيت وهاي كبل شوي طبيت..

دنوة : يعني باجر تجي..
رائد : اي..بس اريدج تعرفين شغلة..اذا خطبتج فماكو هوسة بس نعقد سيد والمحكمة وراهه باسبوع..انه اكدر اخلي ينطيج بحجة ابوي متوفي وماكدر اخطب..بس مستعز بيج وعيونج ادري حتحز بخاطرج بس شسوي..وعد من تطلع السنة مال ابوي اعوضج عن كلشي..بس كون تكولين لابوج موافقة والباقي علي..دتفهميني مو..
دنوة : كلت بگلبي انه ماخذه العرس والزفة والهلاهل لو ماخذته هو..ما اصدك حيصير الموضوع صدك ..اي دافهمك..
رائد : خلص..ردت اخبرج خاطر يكون عندج علم..
دنوة : شلون اذا مقبل حتلو جدي اجة..
رائد : يقبل لتهتمين.. نامي مرتاحة..محيصير الا الخير.. اروح انام كلش تعبان..
ابتسمت..ماشي..سديت التلفون وكمت للغرفة..

تارة : ها شكال..
دنوة : حيجي باجر ويجيب جدي وخالة وعمي فيصل..ماادري بعد شحيصير..بس صوته تعبان ومخنوك..
حلا : اي طبعا اذا ابوج مطردة وحيرجع مرة لخ وره ما انطرد اكيد يضوج..بس ديحاول علمودج..
تارة : زين شكال على ابو..
دنوة : كال بس تصير بدون هوسة بس عقد سيد واسبوع وراها يلة نعقد المحكمة..
حلا : هاااا..شكتلج..مو كتلج حيجيج حتلو ابو ميت..
دنوة : بعد مدري الله كريم..تمددت وكعدنة نحجي بعدين غفيت كعدت الصبح ملكيت البنات..يمكن نزلو يتريكون..عدلت الفراش وغسلت وجهي ونزلت..سمعت خالتي دتحاجي حلا

خالتي : اي مو كتلج..شنو هاي يقشمر عليهه المسكينة لا عيشة مثل الاوادم..يعني لو تخليهه تكمل لو تبطلهه من الاساس ليش كل هذا التعب والهوسة..
حلا : جا هي مو كالت رجعت للدوام..
خالتي : اي كالت..حتى ابوهه نقلهه لهنا..بس هذا محيي مدري شبي..كلساع براي..يعني رائد شمدخلة بزواجتهه لو تزوجهه لو تخليهه تكمل دراسة..معلكهه ليش خطية..
حلا : شحيصير هسة..
خالتي : ميقبل ينطيهه لرائد ولا يقبل تكمل دراسة.. شايلهن للكتب والدفاتر وحاركهن..شيقنعة هذا بعد..
حلا : عزززة..صدك تحجين شنو السالفة..لا هاي ولا هاي شكد خطية دنوة..ولا فرحت..

دنوة : واحد يصبح بهيج حجي شيصير بي..شكد جنت فرحانة بس عادي تعودت..شوكت كملت فرحتي للاخير.. اخذت نفس ورحت يمهم..صبحت عليهم ومشى الوكت عادي ماصار شي جديد..ضليت اليوم كلة افكر رائد  شسوه..اجه لو نسى السالفة وماكو امل..ليش هلكد مخلي املي بي..بلة ما صار شي؟ شحيصير بيه من خيبة وحزن..بالليل جنة كاعدين ع التلفزيون جان يطب ابوي
محيي : كومي لبسي..
دنوة : ها وين..
محيي : للبيت يعني وين..
رحت للغرفة لبست الصاية والشال وخليت ملابسي بالجنطة ونزلت..جان كاعد ديحجي وي خالتي..من شافني كام وطلع يتمشى جدامي..انه طلعت وراه..رحنة للبيت مشي ماكال ولا كلمة لحدما وصلنة..بالباب حجة..

محيي : خالج عمار يريد يشوفج..گتله جم يوم واجيبهه
دنوة : ماشي..طبيت جوة..شعجب تذكرني هسة..خاف ابوي يريد يخلص مني وكال هشكل..بعد ما اصدك..صعدت فوك رجعت الملابس بالكنتور..بس الصدرية والقميص موجودات الكتب والدفاتر وكلشي يخص الدراسة ماكو..حتى الميز.. لهلدرجة يعني..اكيد خلاه لرزان لو سما..انه شنو خاطر يخليني بمكان مثل مكانهن..اشو رزان تريد تشوفه وهو لا يعرفهه ولا تعرفة مجرد ع التلفون..وانه رائد مو غريب وابوي يعرفة كلش زين ويعرف اخلاقه بس مع ذلك ما انطاه مجال يفك حلكة بكلمة وحدة..كبل طردة من الباب حتى مادخلة للبيت وانه من اقل زلة يكلي ماكو دراسة لو يضربني..شوي وانفتحت الباب..طبت شذى..
شذى : ابوج اليوم وديته للدكتور..
دنوة : شنو ليش..البارحة جان مابي شي..

شذى : اي هذا صاحبج اجة للبيت هو وجدج وعمج وواحد ثاني مشايفتة..ابوج صار عصبي ويصيح..اخر شي جدج كال انه اجيت طباب خير وانت ماقبلت بعد ما ادخل..شو هذولة وره ما طلعو صاح نفسي ضاق..اخذته لدكتور كال گلبه تعبان لتخلو يتعرض لموقف يأذي..وانتيييي حضرتج تجيبين وتقهرين بي..اجت ضربتني على راسي..اذا صار شي بمحيي اذبحج والله..
دنوة : وخري ايدج..ابوي وينه هسة..
شذى : جوة بالغرفة..
عفتهه ونزلت جوة..فتحت الباب على كيفي وطبيت..هو جان واكف يم الميز ديدور بالمجرات..شافني بالعجل صد عني.. رحت يمة حضنته بدون مقدمات كمت ابجي..هو ما انطى أي ردة فعل بس منزل ايدة جوه..لحدما وخرت عنة شوي وبست ايده..زعلان مني..ومصدك بروان..راح كعد ع الجرباية وأشر بيدة يعني كعدي هنا..رحت يمة..

محيي : شوفي يابة..انه ليش ماريد انطيج لرائد..مو جي هو موخوش واحد..لا بالعكس مشهودتله مواقفه والكل يدري بي وانه واحد منهم..بس العرج نداس..الوه أذانا شنو اليضمن مراح يأذيج بعدين..اليوم اجه هو وخاله وعمج وجدج..كتلة هي متقبل..
عاينت علي بنظرة متفاجئة..شلون تكلة هيجي..
محيي : هذا الصح..اقبلي بواقعج..والدراسة انلغت خلص ماكو بعد نهائيا..انسيهه..
دموعي تجمعت بعيوني : بس الدراسة شعليهه..
محيي : هذا العندي..بوية لتعبيني يرحم امج..
نصيت راسي : الي تشوفة..طبطب على ظهري وابتسم..ما بادلتة بشي..بس صعدت فوك..شذى بعدهه بالغرفة..
شذى : نزلي سوي اكل..الظاهر حلالج الجو..

دنوة : اي..نزلت جوة للمطبخ طلعت اكل وكعدت اكلي بي سويت زلاطة وصحتهم ياكلون..انه شبعت من السم السمعتة اليوم من الصبح لسه..ضليت انتظرهم يخلصهم واشيل الاكل ابوي ماصاحني اكل وياهم..عافني ولا كال ليش متاكلين.. سما ورزان ولا وحدة تعاينلي..احس روحي غريبة..وين جانتلي هاي الشغلة..كملو وكلمن راح لغرفتة..بس شذى ضلت بالهول مدري وين تسولف..كملت المواعين وسمعتهه تخابر..

شذى : اي لج..ادور هي كلش نظيفة شلون احصل مالتهه حتى شعرهه تشيلة وتظفره متعوفة مفتوح ابد..شلون بهلحالة معناهه مراح يفيد شي..هاا..اي صدك خوش فكرة بس تفيد لو مو مثل مالتهه ال....ها اي يلة اهم شي تكوم تكره البيت ضوجتني شكد ارزلهه اكللهه انتي هنا بس تشتغلين هي تسمع وتسكت ولا عبالك عدهه احساس..والله مرات اشك بيهه ماعدهه احساس وضحكت..لا يمعودة محيي مريض اصلا بحالهه بحال غيرهه..وهي حتروح لبيت خالهه بالديوانية.. يعني فرصتي هاي..لا لتخافين شبيج..هو محيي لا مزوجهه لواحد ولا منطيهه لرائد شيريد الرجال هذا متدرين..يلة خاف كعدتج من نومج بس ردت استفسر..مع السلامة عيني..
دنوة : طلعت من الهول صفنت بوجهي..
شذى : شجابج هنا..ما وليتي فوك لغرفتج..

حسيت لساني انعكدت..عفتهه وصعدت فوك..شتريد تسويلي هاي..شعجب مدحتني..اكو شي مو طبيعي بالسالفة.. تمددت بس منمت..ما اجاني نوم..هسة شديفكر..اكيد حيحسب صدك ما اقبل..زين جدي شنو موقفة من اجة يريد يسوي الخطوبة بعدين اطلع ما قابلة..شنو هلموقف اليفشل الحطني بي ابوي..ليش هشكل محكوم على امري..بس حجي شذى ضل ببالي..شتسوي بملابسي..من محبتهه الزايده مثلا.. ضليت افكر بعدين دخت ونمت..كعدت الصبح ومثل كل يوم نظفت وسويت الريوك..ابوي طلع للشغل..كال حروح لبغداد ٣ ايام واجي..اول ماطلع استلمتني شذى..كلمة واللخ تكلي بس تفكين حلكج اموتج..سويت الغده متقبل اعوفة واروح.. لا ابقي ليحترك..كملت وصبيتة..كعدت وياهم جان تصيح بيه..

شذى : كومي سوي الجاي ولتعوفي..اختي حتجي..ما اريد تحركي يالثولة..
دنوة : ميخالف..بس داتغدة..عاينت علي بنظرات عصبية وكامت دفعتني..تصيح وتغلط..
شذى : كوميييي..مرة لخ من اكلج تكومين تسمعين وتسوين الاريدة بدون متفكين حلكج..
فشلتني جدام سما ورزان..دموعي صارت بعيوني..عفتهم ورحت يم الطباخ طلعت القوري وخليت بي مي بين ما يفور وكعدت على صفحة..خليت ايدي على وجهي وابجي مثل الطفل ..مليت منهه..شوكت اخلص والله مالي نفس بالبيت هج بس عيشة ومذلوله عليهه..جنت ببيت جدي شحلاتني..

ابوي بس يريد يكتلني يجي جدي يوكفة..يكلة اذا طكيتهه معناهه هنت ابوك فيعوفني ويروح..بس هنا تجي هي تزيد النار حطب وتوكف تعاينلي شمتانة..شمسويتلهه انه..بطني كامت تكرص بيه ما ماكلة من الصبح على طلعة ابوي بالسبعة لحد هسة جبت ماعون خليت بي اكل وكعدت اكل..يعني شسويلهه بعد اتجنبهه وما اجاوبهه تكلي ليش متجاوبين شنو صنم انتي.. اجاوبهه تكلي لتجاوبين ولتفكين حلكج بكلمة ادور حتى من ابوي بعد ما تستحي..عادي تصيح علي وترزلني جدامة وهو ولا يمة عبالك مديشوف ولا ديسمع..يمكن جي زعلان مني ما ادري..

كملت اكل والجاي صار..طفيتة واخذت الصينية غسلت المواعين وصعدت فوك..هلكت من التعب..سبحت ونمت على وجهي..صدك لو كالوا مرة الاب ماتنحمل..زين الاب ليش هشكل وي بنتة..كافي ما اريد اكول ليش وليش..نمت وكعدت المغرب..البيت كلش هدوء..نزلت جوة شفت الاستكانات ع السنك والبنات ماكو..حتى شذى..وين راحن..هي كالت حتجي اختي بس شنو معقولة تروح وتاخذ البنات ثنينهن..جا انه منو يضل وياي..ادور مغربية والبيت وحشة كلش..رحت توضيت واجيت اصلي..كملت ورحت المصلاية لمكانهه..كمت افتر بالبيت مدري شسوي..حتى ماكالت حطلع..وانه بعد عبالك نمت نومة مال ميت ماحسيت على شي..فتحت التلفزيون وكعدت اكلب لحدما اجن..بعدني ماحاجية شي..

شذى : شكو شبيج..شنو بس لا ردتي تطلعين ويانة..لا عيني انتي مكانج بالبيت..ابوج من يريد يطلعج عود يطلعج بس اني ما اطلع المثلج..ما اطيق اشوفج..روحي من وجهي
سما : ماما شبيج وياهه..ترة ما كالت شي..
شو هاي هي كلتلهه هيج جان تكوم تبجي ودموعهه تصب عشره عشره..حتى بالكوة فهمت عليهه شدتحجي..
شذى : هااا..غيرتجن على امجن هاي المطلكههه..بعد بس عوزهه تعلمجن على درب الرفيج..
دنوة : عفتهه وصعدت فوك..ضلت تصيح بعدين سكتت.. بقيت اتصفن مدري شسوي..حتى بناتهه اذا بيهن مجال فهي حتكلبهن علي..ورة ساعة تقريبا كلتلي تعاي سوي عشة

من يوم الطبيت للبيت هي ابد ماخلت ايدهه بالشغل..كلة انه.. نزلت سويت اكل..بس ماكعدت وياهم..بعد ما اخليهه تفشلني اكثر من هج..
شذى : بما انه مدتاكلين..روحي نظفي غرفتي..اريد تسويهه تلمع لمع..ومسحي الاخشاب وياج..
دنوة : كمت سويت مثل ماتريد..نظفتهه وفرشت فراش جديد وطلعت للهول اخذت الصينية وغسلت المواعين..كملت وصعدت بعد مالهه حجة تحجي..ثاني يوم والثالث ماصار شي..ابوي اجة باليوم الرابع الظهر..انه جنت واكفه ع الطباخ اطبخ رحت استقبلته وبوسته..بس وجهه ثكيل علي..خاف جي تعبان.. طب جوة ..نصيت النار وصبيتلة كلاص مي..توني كعدت جان تصيح البومة..
شذى : يلة روحي ع الاكل ليحترك..

امري لالله..كمت تانيتة يكمل وصبيت..البنات اجو سلمو ع ابوي وكعدو وياه..بس انه معكوطة على صفحة..عود بنتة الجبيرة..للعصر جان تندك الباب..انه مطلعت..من باب المطبخ ضليت اعاينلهم..طبو زلم ثنين..واحد منهم رائد..گلبي احسه حيطلع من مكانه هلكد ما يدك سريع..فاتو من باب الصالة الجبيرة وسدو الباب اليطلع للمطبخ..رحت يم الباب بالعجل اتصنطلهم..شنو معقولة تفاهمو..شعجب ابوي دخلهم
- : يابو دنوة..ترة رائد شاريهه حرام عليك توكف بقسمتهم وتدري بي رجال ويعيشهه ميخليهه تحتاج احد..
محيي : حتى اذا جانت الي نية انطيهه فمن اجاني لمحلي ببغداد وتعارك وياي بعد ما انطيهه..

رائد : انت تكول هي متريدك..هي متقبل..جيبهه هي تحجي ليش تحجي بدالهه..والله وروح ابوي اذا كالت ما اريدك بعد متشوف خيالي ولا اوصللكم..
محيي : شنو اليثبت متسويلهه شي اذا تزوجتهه..
رائد : واضحة مثل عين الشمس..لو اريد اسويلهه شي جان من اول مرة تكلي روح اروح واعوفهه..شاريهه وبرگبتي لحدما اموت..ابوي ماسوالكم شي وكل الشين اجه منكم وانت أعرف بهالشي مايحتاج نفتح مواضيع قديمة.. انه شكو..انه اريدهه لدنوة..اريدهه جي احبهه..يعمي تعبت من الحجي يرحم اهلك اقبل..جبتلك جدي وعمي وخالي وانه اجيتك بعد المن اجيب وتقبل..كتلك لتنطيهه لعقيل ترة مو خوش ويضرب..ما سمعتني وكتلي حنطيهه بعنادك..تاليهه رحت انت بنفسك جبتهه واجيت وانت رحت وياهه للمحكمة طلكتهه..اكثر من هلحجي وانت بعدك رافضني..اذا انت رافضي هي قابلة..بس اسألهه وريح گلبي..ماعندي استعداد اضيعهه مني بعد..صارت بعقيل مرة وبعد التوبة تنعاد..انت مو حبيت واخذت..حاولت مرة ومرتين وانطوك..انه للمرة العاشرة احاول وياك وميفيد..حط نفسك بمكاني وحس بلوعتي..

محيي : انه حبيتهه واخذتهه مو لخاطر اطفي ثاري بيهه
رائد : هم ثار..يابة احلف بالقران خاطر تصدكني..احبهه شنو ماكو بشر يحب..احبهه واريد اخذهه..لا ثار ولا هم يحزنون وأي شي يصير بيهه انه موجود تعال عاتبني عود
- : اي والله حجي رائد صحيح..اذا متلاكي فانه موجود..خالة وبمثابة ابوه..وميصير خاطرك الا طيب..
محيي : هاهية..هاي لخاطر خالك رجال جبير واكثر من مرة حاجاني بموضوعك..بس والله..اذا صار بيهه شي واحد اعتبرني مطلكهه منك غيابي..وبعد تحلم تشوف طيفهه.. ميحتاج نسألهه..موافقتهه من موافقتي
- : يعني نقرة الفاتحة..
محيي : بحيل الله..
انه بس سمعته كال هاهية دموعي تصب..ما احس بيهن اول مرة ابجي دموع الفرح..ماعافني بنص الدرب وحدي.. الف الحمدلله..جنت محتاجة هج فرحة تخليني انسى العشتة بعمري ما انسى هاي اللحظات ولا حنساهه..

رائد جان يحجي بحرگة وصوتة عالي..احسة كاعد على اعصابة بس ينتظر كلمة موافق..صعدت فوك فرحانة والدنيا مواسعتني.. جان تجي شذى ام المشاكل..
شذى : ها شسمعتي..هذا رائد وخالة مو..
دنوة : اي..وافق ابوي..
شذى : اي همزين..حخلص منج..ولا اطيقج..
عفتهه ودرت وجهي..ما اريد اخرب فرحتي بحجيهه السم.. شوية وسمعت صوتهم طلعو..سويت روحي ما ادري ونزلت جوة كاعده ع الكرسي واكلب بالراديو..اجة ابوي حاجاني
محيي : وافقت على رائد..بس اي شي يصير انه ما مسؤول هذا القرار شفته بعيونج..واذا صار شي ديرباااالج ترجعيلي يابة متندمة ويابة مدري شنو..فهمتي..

دنوة : اي..راح وعافني..بالليل سويت العشه ورحت علي بالغرفة جان كاعد ويكلب بالتلفزيون..دكيت الباب وطبيت.. كعدت يمة ع الجرباية..بستة من راسة وحطيت راسي على صدرة..عرفني على شنو جاية..خله ايدة على شعري ويمسد بي..تنهد وحاجاني..
محيي : والله خايف يابة..اخاف يسوي بيج شي
دنوة : بس رائد خوش رجال..حتى جدي اجة وياه..وانت تدري بجدي مايروح وي حي الله..
محيي : صحيح..حترحين هلمرة من صدك..كال باجر بس اعقد سيد واجيب امي واختي..بعدين اسبوع انوب وتعقدون محكمة..مرتاحة اكيد انتي..
دنوة : اي يابة..ان شاء الله خير..حضنتة وبستة..ضليت كاعدة يمه اشوف تلفزيون..انه نسيت على شنو اجيتك..سويت عشة متجي تتعشه..من هذا التحبة..

محيي : لا بوية اكلي انتي..انه شبعان..
ابتسمت ورحت وي البنات اكل..
سما : ها شنو حتزوجين صدك..وتروحين يعني
دنوة : بعد اسبوع اي..
رزان : مدام حتصيرين عروس اني اغسل مواعين اليوم
ضحكت وبستهه..كلش تغيرت وياي من كتلهه تره الولد يضحك عليج ديربالج على روحج..بس امهه متخليهه تبقى وياي عدل وره ما خلصت دك التلفون..رحت شلتة وصعدت فوك..هذا رائد ماكو غيرة..جريت نفس وكتلة هلة..

رائد : هلة بناسي كلهم..فرحان يالله..شينيمني اليوم.. اكول باجر لتلبسين شي حلو..لبسي حي الله..
دنوة : ها تريدني اطلع محلوة..
رائد : شتلبسين تطلعين حلوة والله..خابري خالتج تجي عيب مانستج ابد..انتي هم لتنسيهه..
دنوة : ماشي..حجينة شوي بعدين كتلة حروح انام.. سديتة وخابرت خالتي..طلعتلي حلا..كتلهه جان تصيح..لج وجع طرشتي اذني..شبيج..
حلا : لج باجر نجي والله يمة شهلخبر اليفرح..مو كتلج يجي مو كتللججج..لازم تنطيني فلوس جي قريتلج الفنجان..
ضحكت وكتلهه يلة ميخالف..مو متجين..كالت لا نجي كلنة الفرحه ماساعتني ابد..

طبيت للفراش ضليت اتكلب ما اكدر انام..احس الصار حلم مو حقيقة..كعدت اتذكر رائد وصوتة ذاك اليوم شكد مقهور..واليوم شلون متغير والفرحة بصوتة مبينة شحال لو بعيونة..ورة ساعه ما اجاني نوم..نزلت جوة اشرب ماي واجيب شي اكلة..الباب مالت المطبخ مفتوحة بس الكل نايم..منو برة....

يتبــــــــع..................

بس اريد اوضح شغلة ، اني بشر مثلكم وعندي ظروفي ، فاذا تأخرت يوم ليش الغلط؟ اعوضكم بعدين ؛ وشكرا للكل..