رواية اسألي عني الليالي الفصل الثاني وثلاثون 32 - بقلم رقية جاسم

ماريد جنة ولا قصر ..
وياك ارد أگضي العمر ..

قناة التليگرام

حساب الانستگرام

الـبـارت الـواحـد والـثـلاثـون...............

سارة ام رائد : يمه اخلاص جيبي التلفون..اريد اشوف اخوج وصل بعده..
اخلاص : اي هسة لحظة..
سارة : مرمرني هذا الرجال..اكلة يمه من توصل خابرني يكول اي ويغلس..اكعدلك جم يوم لا شلون ميصير..اجت اخلاص جابتلي التلفون.. دورت اسمه وخابرت..دكيت اول مره ماجاوب..كمت على حيلي ورحت للصالة..انتظرت دقايق ورجعت خابرتة..جاوبني..
رائد : ها يمة شلونج..
سارة : شلوني..عايفني هج حتى ماتكول امي خطية يضل گلبهه علي..وصلت بعدك؟..
رائد : تعذريني والله التهيت..هسة يله فضيت..
سارة : ها خوش..شكد وتنزل..
رائد : مو گتلج مطول هلمرة..بالـ١٥ يوم..اذا كلش عشر ايام واجي..خير اكو شي..
سارة : لا سلامتك..يلة بالك على نفسك..

رائد : يمة اصبري..
سارة : ها عيني كول..
رائد : باجر خطوبة سرور..روحي وره ما تخلص الهوسة شوفيلي دنوة شلونهه..ضل بالي عليهه..
سارة : ليش شبيهه..
رائد : بس شوفيهه وكليلهه رائد سأل عليج..
سارة : اويلي انت وراسك..يله ماشي..
سديته ورحت للمطبخ.. جنت مخلية الاكل ع النار..داسوي دولمة ومنهه اوزع للجيران ثواب لحامد..واكفه ع الطباخ واتذكرة..

اخذني انه وصغيره جنت طالعة وي امي لمحل ذهب..اذكر جنت لابسة تنورة جوه الركبة بشوي وقميص ابو الياخة..وشعري كاريه قصير.. بعد شوي عن المحل جان اكو مطعم..هو طلع وي اصدقائه ويعدل بدگم الردان مالت القميص..ملامحه جذبتني طوله ورزانته طبيت وي امي للصايغ..جان عدهه ترچية مكسوره تريد تبدلهه..ضل منظره ببالي..حسبته راح هسة بس من طلعنه جان واكف..رجعنة للبيت وبعده ببالي..گبل كلشي ماكو..لا تلفون بيدك..تطلع وي امك لو احد من عائلتك وترجع يعني الشي بصعوبة يتحصل

وراهه بلشت اداوم..طبعا انه خلصت ثالث متوسط وراهه دخلت معهد تجارة..جان عندي اخت توم بس ماتشبهني.. بس بالاسم توم..فتجي وياي للدوام يعني سجلنا سوه..طلعت من بيتنة براس الفرع شفتة واكف.. بالبداية خفت الة نيه موزينه وياي جي شافني صغيرة يحسب اتساهل واتقشمر..غسلت ع الموضوع ولو جنت اشوفة كل يوم بس اسوي روحي مشفتة ضليت تقريب الاربع شهور..لحد امتحانات نص السنة..طلعت من الامتحان ابجي..جنت ممجاوبة وخفت ارسب..ابوي من يدخلنه للمدرسة يكول اليرسب يبطل..وگبل مجان اكو خصوصي ودورات تقوية فالطالب يعتمد على نفسة وبس..

من طلعت شفتة وانه جنت ابجي وضايجة..كلت اروح احاجي.. اكلة بعد لا تضل تراقبني واطلعلي فد حجة.. تمشيت لعندة واعاين منا ومنا..خاف احد يجي ويشوفني..بعدني محاجية وهو سبقني..
حامد : اعرف شحتكولين..مالي نية موزينه وياج..واريد اجي من الباب..بس لازم اعرف انتي شنو موقفج..
انه ضليت صافنة..ششاف مني..بعدني صغيرة وابجي ع الصغيرة گبل الجبيرة..كتلة ما ادري..ابوي موجود وحاجي.. والله اختفى اسبوع تقريبا لحدما كملت امتحانات جان تندك الباب العصر..نسوان ما اعرفهم..بس طبو وامي رحبت بيهم.. وحدة منهن حجت..كالت نريد نخطب البنية وأشرت علي لابنه حامد وحجت عنه وعن ابوه كالت ابوه عنده خير من الله وهو الولد جادود ويشتغل وشايفهه واجاهه من الباب..ويخليهه تكمل دراسة يمه مو مشكلة..

امي كلتلهه اذا هيج ماعدنه اعتراض بس نشوف ابوهه ونردلكم خبر واخذت منهه العنوان ..ابوي كلش فقير وانسان ع نياته بكلشي..احسة يشوف الدنيا كلهه زينة ومتجي منهه الشينة مثلة..بالليل رجع من الشغل وامي فاتحته بالموضوع..
امي : يابو حسن..اريد احاجيك بسالفة..
ابوي هو وياكل : اي كولي..
امي : اليوم اجو خطابة على سارة..وتكول الولد يشتغل وكعدت تحجيلة شكالولهه النسوان..
ابوي : نسأل عنهم ونشوف..
ثاني يوم ابوي دز خواني حسن وكمال سألو عليهم بمنطقتهم جانو ساكنين بحي الجهاد واحنة بالدورة..اهل المنطقة حمدوا بي..كالو ماعنده أذية وخالة خوش رجال..مجابو طاري ابوه.. ابوي كال هاهية كلولهم موافقين..وره يومين اجت الزلم وقرو الفاتحة..

مادري شنو جان احساسي بالضبط..شعور غريب صح عجبني من شفتة..بس من صار الموضوع صدك تغيرت فكرتي..بس هو جان اله دور لحتى يغير هلتفكير..صار العقد ولبسنة الحلقات..جان فرحان حيل بس ناقصة يطير من الفرح يعاين علي ويبتسم.. حسيتة يحبني ورايدني صدك..بدت مشاعري تتغير..كمت ابادلة الحب..ولو هو جان يحبني اكثر وشريد يجيبة جدامي..فترة الخطوبة صارت شهرين..جنت اشوفة يم المعهد من اطلع ونروح نتمشى وهو كامش ايدي ويحجيلي عن اهلة وامه..حجالي كلشي وشنو شاف وشلون ضل متعذب وبعده يشوف منظر الدم جدامة من ينام..يكلي من شفتج ارتاحيت ونمت هذيج الليلة مرتاح ماشفت الدم بالحلم بعد..وگلبي الصخر لان من شافج..

ع الشافة من ابوه والهجولة والشغل من هو صغير طبعا گلبه يصير صخر..شكد تعاطفت وياه وكتلة انه وياك خطوة بخطوة لحدما تنسى وترتاح.. سمعني حجي خلاني اصير أسعد انسانة..اكعد الصبح هو اول شخص افكر بي..گبل لا انام هو اخر شخص افكر بي وابتسم..ملامحه من شفته يم الصايغ هي البقت بذهني وما راحت..هذاك يوم وهذا يوم..كال اجرت بيت قريب على بيت خالي ورتبته بعد بس اجيبج..اكلة خاف ما تكدر على مصرف هلكثر..يكلي اذا مو الج المن اچد واتعب طبع انه بغداديه بس من صارت خطوبتي من حامد وعشت وياه اخذ لساني على كلامة واسلوبة..مرت الايام واجه يوم زواجي ومكيفة..صار شكد انتظر وهو ينتظر على جمر.. لهناك جان يدخل حامد مبتسم ويعدل بالخاية مالته..

حامد : كومي يلة..
سارة : ها..وين؟..
حامد : يزفونا للبيت غير..
سارة : انه من الفرحة بعد معرفت شسوي..رحت حضنته بالعجل ودموعي تصب..امي تكلي كافي حتسوي عزى مو عرس..هو باسني من راسي واخذ ايدي وطلعنة بره..وصارت الزفة..اسعد انسانة متوصل للسعاده العشتهه بذاك اليوم.. كل ما احس الدنيا تضيك بيه اتذكر ذاك اليوم وتردلي روحي.. بنفس السنة صرت حامل..جان شعور غريب..فكرة إنه كائن عايش بداخلك وياكل من اكلك ويشرب من شربك تخلي الواحد يفكر الف مرة..بس جان حامد وياي خطوة بخطوة..وهاي خوب بفترة التنسا كلشي اريد يجي جدامي..

اختة وصاني عليهه يكلي هاي الوحيدة الاحس بالراحة من اشوفهه هي ومرة ابوي صراحة ضليت مصدومة من كال مرة ابوي..يعني مشايفه واحد يحب مرة ابوه..انه هم معندي شي وياهه فاداريهه واحبهه على محبة حامد..سنة الـ٧٠ صار عندي ولد.. معرفت شسمي فحامد سماه رائد..وصار عندي محمد..وبالسادس علمي صار عندي اخلاص وگطعت.. كال اريد ادخل كلية عسكرية تعاركت وياه كتله اذا تروح لا انه امك ولا انت ابني..

عاد هنا راح معهد تمريض..سنتين وتخرج كال سويت التردي بعد اسوي الاريده انه وقدم ع العسكرية..اول فتره يجي شعره مزين وعيونة حمر..اگله كافي بطل موزين عليك شوف حالك شلون صاير..
رائد : يمه عوفيني يرحم والديج..مرتاح وعاجبني
سارة : مثل متحب..ابوي توفى وره زواجي بتلث سنوات.. ضليت مقهورة سنين ولحد هسة من اتذكره انقهر وابجي ماقصر ويانه بشي ولو صغير..خصوصا انه..جان ينقهر علي جي تزوجت صغيرة..يكلي خواتج تزوجن كبار بس انتي وياحسرتي ماعرف اذا هلحامد زين وياج لو جذب علينا.. اگله يابة والله حباب ومامقصر وياي..يتنهد ويكلي هاهية بوية مدام مرتاحة براحتج..

محد وكفلي بهاي الطيحة بس حامد.. يجيني بالليل يشوفني دابجي..عليهم ثنينهم راحو هيج بالعجل عبالك ذاك اليوم من يجي ابوي ويكول وين سارة جايبلهه حلاوه من هاي التحبهه..رائد جان صغير..يجي يمي يمسح على راسي ويمسح دموعي..يحضني باديه الصغيرة.. من كبر وكمل الكلية وتخرج..انتقلنا من بغداد للبصرة.. كمت اتردد لبيت الشيخ بالالفينات بدايتهه..جانت بت محيي هي البارزه بين البنات سمرة وعيونهه عسليه بيهه خضار حيل بارزه وشعرهه طويل فوك ركبتهه بشوي..تمشي وگصيبتهه تتحرك وراهه وتضحك وتسولف..ردتهه لمحمد..

مابيناتهم فرق جبير بالعمر..جم سنة بس..كمت ارجع للبيت واحاجي اخلاص عليهه..اكللهه شلونهه هلبنية تخبل وتشتغل ماتركد بالكع.. واريدهه لمحمد..رائد من يسمعني احجي عليهه يتبسم ويضل يسمعلي لحدما اغير الموضوع ويروح..من دخل كلية عسكرية كلش هدأ..كلماته معدوده ع الاصابع.. والعصبية ممسوحة من قاموسه.. مرة داسوي بالغده جان يجي.. حط البيرية ع الكاونتر وانتچى علي..
رائد : يمة اريد اسألج دنوة شكد عمرهه هسه؟..
سارة : ثالث متوسط..ليش..
رائد : ماكو شي..ردت اعرف..
سارة : من وكتهه عرفته حابهه ورايدهه من صدك..شلت فكرة اخذهه لمحمد من شفته شلون متعلق بيهه..ماردت اكسر بخاطره..وهي وين تلگى مثل رائد..يحبهه من طاريهه شحال لو يشوفهه..بچري هذا واحسه مني وبيه اكثر من محمد واخلاص فحسيت بي بدون مايحجي..

اجه اليوم الجنت بي ببيت الشيخ..جان يجيني الخبر الهز بدني وصحتي ودمرني كلي..توفى حامد..من الصدمة بعد مادري شسوي..طبيت نمت چن اجاني بالحلم يمسح على جتفي يكلي لاتبجين..انه موجود..بس اريد اخذ رائد وياي وينه..بالحلم ماجاوبته بس رائد طلع من الغرفة لابس دشداشة صحراوية ويضحك بصوت مسموع ونظيف حيل شواربه ولحيته محددات اجه حامد حط ايده على چتفه وراحو يتمشون..لحدما اختفى خيالهم وكعدت ابجي..فحطت بالبجي

رائد كام يذبل يوم عن يوم..ماشفته بهلحالة گبل ابد.. خصوصا بعد ما تزوجت دنوة.. أصريت ان نبيع البيت.. وبعناه..

الحلم الحلمته بليلة وفاة حامد ضل يترددلي كل فترة..من انام مقهورة لو ببالي حامد يجي نفس الحلم..اضل كامشة ايد رائد اكلة وين تاخذه..مايروح منا عوفه..هو يكلي ارجع لتخافين ويروح...

فزيت من تفكيري وذكرياتي على صوت الباب تندك..نصيت النار ورحت افتح الباب..بس ضليت مصدومة من الجايين.. اختي الوسطانية سعاد وبناتهه ثنين وابنهه علي ومرتة حيييل صار شكد..اخر يوم شفتهم بالسبعة مال حامد..رحبت بيهم ودخلتهم جوة..بس وجوههم متبشر بخير..وجايبين وياهم جنط ملابس كعدنه بالصالة الجبيرة..هلا بيكم والله ضويتوا البيت..
سعاد : فدوة لگلبج..والله ما ادري منين ابديلج خية..
سارة : خير..انه من شفتكم كلت اكو شي..
سعاد : علي جان بحزب البعث يشتغل..وهسة مثل ماتعرفين ورة ماسقط النظام كامو يصفون بيهم الامريكان واحد صديق علي كمشوه وكتلوه بالباب..وانه اخاف ع علي ماعندي مكان اروحلة..الحجي مات واخوه وي الامريكان..اذا عرف بعلي يروح يخبر عليه..وتدرين شلون يكرهني ويكره بزري..

سارة : يداده..البيت بيتج عيني..زين وبيتكم شنو حالة..
سعاد : صديق علي حيشتري هو واثاثه..
سارة : الله يساعدكم والله مو هينة..ابقو هنا لين الله يفرجهه خطية البنات خايفات وعلي همات..العالم متدري شتسوي بهاي الفترة..كلش صعبة..يعني اذا جنت وي الحزب ومرتاح فاحلم ترتاح ورة السقوط..واذا صرت وي الامريكان هم مترتاح متدري شحيصير بعدين..الواحد يضل لحالة احسن..

كمت كملت الغدة ودزيت علي وزع للجيران..ومن ضمنهم بيت خالة دنوة..والباقي تغدينة بي وكتلهم اقرو الفاتحة لروح المرحوم.. بعد بالليل التهيت وياهم ومكدرت اروح واشوف دنوة..يلة عود اذا خابرني رائد اگله اجت خالتك ومكدرت اطلع..بالليل البنات نامن بغرفة اخلاص وياهه..وعلي ومرته صارو بغرفة محمد.. محمد يدرس ويشتغل بالنجف مترجم.. فمايجي هج كل شهرين مرتين لو مرة..منا لحدما يجي الله كريم...

دنوة : اي يله..كمت للمطبخ..هاي وين مخليتهن..ادور محد اكو اسألة..كلهه كاعده بالصالة الجبيره..ما احس الا شخص كمشني من خصري..شهكت ودرت وجهي..شجابك؟.. اشو وخر ايدك..شرايد مني..ماصدكت اخلص منك..
عقيل : خلصت العدة موو..
دنوة : وانت شدخلك..
عقيل : خوش..تعاي هسه بعدني رايدج..
دنوة : كمشني من خصري وسحبني علي..كام يبوس برگبتي وجتفي..وايده على حلكي حتى ميطلع صوتي..ادفع بي وابجي..صوتي ميطلع..وهو يبوس بيه لعبت روحي..هو من جان رجلي ماتقبلتة..ادور طليقي..

عضيت ايدة صاح ااخ وضربني راشدي..خدي صار نار من ضربتة..كمت ابجي وادفع بي..شتريد مني..عوفني عوفنيييي دفعتة ومسحت دموعي..شوف اذا اعترضتلي اكول لابوي ولجدي واخلي سيرتك على كل لسان..موكافي فصختلي خشمي وضربتني لحدما الله كال بس..ابلع واسكت..بس هسة لا احلم اسكت.. مرتك حامل متخاف ربك..انه مو مرتك خلص انتهى..ارجع لحياتك وخليني اعيش..مو اول ثنين يتطلگون كافي تعبت عفتة واخذت نفس ورحت للصالة..نوارة شافتني ضلت تعاينلي بنظرات متسائلة..ابتسمت وكعدت يمهم..
نوارة بهمس : شبيج شنو جنتي تبجين؟..
دنوة : لا ماكو شي..الحذاء جان يوجعني..

كالت هاا بس ما مقتنعة..ورة شويه خفت الهوسة وكلمن راح لبيته..بقينه بس احنه..ابوي اجة هو وعمي قاسم وجدي..صاحني..رحتلة
محيي : يلة مترجعين؟..
دنوة : خلابات عدهم..ارتاح من الامتحانات..
محيي : ها..يلة براحتج..من تردين ترجعين خابريني..
دنوة : ابتسمتلة وكتلة ماشي..سرور انطت الفستان لسالم رجعة..جانت مأجرتة يعني..نظفنا الديوانية والصالة وطلعنا.. انه صعدت فوك لبست من سرور دشداشة ومسحت المكياج ونزلت..سالم جاب عشه من برة..وكعدنه ناكل..

عقيل ماشال عينة عني..تضايقت من الكعدة..عاينت لروحي خاف مبين شي مني..حتى كعدتي عادية..اكلت شلون مجان وكمت..روان ولا حجت حجاية..حتى صوتهه مسمعته..معقولة تابت..طبيت لغرفتي لكيتهه متغيره كلهه..الكنتور اكبر والجربايه ام النفرين يمكن روان وعقيل صارو هنا..سديت الباب بهدوء وصعدت فوك لغرفة البنات..صفنت شوية..احمد ماكو بس عصام وسالم..

تمددت ع الجرباية وغمضت عيوني..ضليت اتگلب بالفراش.. توني غفيت جان يجن نوارة وسرور..يضحكن وصوتهن عالي فزيت من مكاني وطارت النومة..
نوارة : فززتيهه بضحكتج..
سرور : ديلة خلتكعد شعدهه نايمة بعد وكت..
دنوة : اي عيني شكو عليج..لج انه رحت للامتحان ورجعت مشي ورحت سبحت وسويت الغده بين ما اجه ابوي بدلت واجيتكم..ماكعدت ..ادور رجلي توجعني من الكعب..صدك اكول اشو احمد ماكو..بس عصام وسالم..
نوارة : سالفة طويلة يمعودة..
سرور : يله ماعندي شي تعاي احجيلج..
دنوة : جبت المخده خليتهه بحضني وتربعت..سولفتلي كلشي من يوم الشافتة واليوم العرفت احمد جان ياخذ نص الربح بدون مايدري حسام..لحدما دز امه وخواته وخطبوهه..ضليت صافنة عليهه..هذا احمد يطلع منة كل هذا؟..

سرور : اي يمعودة..
دنوة : ياستار.. همزين خلصتي..
سرور : اي الحمدلله كلة راح وحنصير سوه ان شاء الله..
دنوة : كعدنا نسولف..راحت نوارة جابت كرزات وعصير وكعدنا نتعلل..نزلت سرور الاكل وانه تمددت..شوي واجت
سرور : وين نايمة عيني وين..هاج هذا رائد يريدج..
دنوة بابتسامة : جيبي..اخذته منهه ورحت كعدت بالزاوية واحجي بصوت ناصي..وهن كاعدات ع الجرابي مالتهن ويضحكن على وضعي شلون داحجي ومبتسمة..

رائد : شلونهه بنيتي..
دنوة : زينة..وانت..
رائد : زين من سمعت صوتج..يولي امي ما اجت؟
دنوة : لا ماكو..
رائد : عود كتلهه روحي شوفيلي دنوة شلونهه..
دنوة : ليش شبيه..
رائد : ضل بالي عليج ذاك اليوم..تحجين وتبجين..تمنيت مو بالواجب..امسح دموعج بيدي وماعوفج وحدج..
دنوة : ابتسمت وكتلة..كلماتك عوضت عن وجودك..
رائد : يولي شهلحجي الحلو..صدك اليوم شلون طلعتي.. اكيد حلوة مثل كل مرة..
دنوة : هههه..وليش هلثقة..يكولون حلوة والله..
رائد : شحدة اليكول محلوة..اريد اخذ طوارئ وانزل.. مشتاگلج والله..

دنوة : يلة ليش تستعجل..هسة تنزل واشوفك..
رائد : باع شلون تحجي ولا مشتاگتلي موو..
دنوة : لا والله مشتاقتلك..بس شبيدي يعني..
رائد : لا يابة شبيدج..جايج صبريلي..
دنوة : مدري ليش خفت.. عززة..شتقصد وين جاي.. ضحك بصوت عالي وحاجاني..
رائد : اجي اشوفج غير..
دنوة : وشكو تضحك..والله يالله..
رائد : نعتذر يابة نعتذر..ادور تروح تزعل..
دنوة : ها هجي هامك زعلي وانت تضحك علي..يله ارد انام
رائد : يولي احبج..لا تزعلين..زعلج الوحيد ما اتحملة..
دنوة : يلة مزعلانة..
رائد : بالج على نفسج..

دنوة : كتلة ماشي وسديتة..جريت نفس وابتسمت..سرور تضحك هي ونوارة..حطيت التلفون ع الميز وفرشت فراش بالكع ونمت..كعدت الصبح البنات ماكو..شلت الفراش ولميت شعري ونزلت..جانو صابين الريوك توهم..صبحت عليهم وكعدنا نتريك افتقدت هاي الكعدة والضحكة..

سالم : شوكت نخلص من سرور..قصدي شوكت تزوج..
سرور : هااا تريد تخلص مني..لا اشو ماروح..اطمن عيني منا لحدما تطلع راس سنة ابو رائد يالله اتزوج..
سالم : يعني متروح هلبنية..حتبقى على گلوبنا..
سرور : يمة شفتي شلون يحجي..ما تكليلة شي..
ابتسام : ديشاقة شبيج ماما..
سالم : اي والله يبتلي الواحد يحجي حجاية..
الجد : خاب متاكلون كضيتوهه مصايح..شبيهه سرور اصلا مي بارد ع الگلب..وغمز..
قاسم : ها حجي اشو بس توكف بسد حفيدتك..جا وحفيدك المسكين هيج عگطته لخاطر سراوي..

الكل كام يضحك..كملنا اكل وشلناه..وكفت ع السنك اغسل بالمواعين وجدتي وخالة ابتسام يسولفن ع الخطوبة والنسوان البارحة..عقيل ماشفتة بعد..يمكن طلع لشغلة..حتى روان مدري شبيهه اشو خانسة فدنوب..اجت ويانه ع الغده من دنسوي وساعدت بجم شغلة بعدين راحت..العصر اندكت الباب..حطيت الشال على راسي وطلعت..ام رائد..هلا بخالة رحبت بيهه وبوستهه..بعدين طبينة..
ام رائد : همزين لكيتج هنا..رائد خبصني يكلي شلونهه دنوة..كتلة يمة دنطيني مجال باجر اروحلهم واشوفهه..
ضحكت وكتلهه اي خالة ادري..يله ماعليج..طبينة جوة وباركت لسرور ع الخطوبة..شوي وراحت ماطولت..كالت بيت اختي يمي واجيت اسوي الواجب..

سرور ونوارة كلساع يعاينون علي ويغمزون..ها شعندج بالزاوية ..انه اضحك عليهم شلون كمشوهه علي..بالليل جدي اخذ عقيل وعمي وسالم وعصام راحو لبيت عمي لواء..ومناك الفجر يطلعون لبغداد جم يوم ويرجعون..بقينا بس احنة بالبيت..استغليتهه فرصة وكلت اطلع للمزرعة وي البنات مشتاقة للمكان هذا..انتظرنة بين ما نامت جدة وخالة ابتسام بعدين طلعنة..روان اصلا بغير عالم كلش متغيرة..اساسا شعليهه..جبت غطى منستخدمة فرشتة وغطى لاخ تكومنا جواه..سرور كامت طبت جوة شوي واجت كعدت ويانة..ورة ساعه وشوي نعست..خليت راسي على رجل نوارة وكمت اغمض..افتح عيني شوي عود داكللهم وياكم وداسمع بس بالجذب..غمضت عيوني والغطى ينشال مني..

كمت احجي انه ومغمضة..لج سرور عوفي الحركات هاي.. بااارده بس سمعت صوتة فزيت من مكاني وعيوني مفتوحة على وسعهن سرور ونوارة واكفات صفح يضحكن..لحظة هاي شجابك خررب شلون جفلت..هذا سواهه صدك ونزل طوارئ لابس عسكري وشعرة مرجع ليورة..
سرور : يلة اروح واعوفكم..محد اكو اليوم..وغمزت..
هو ضحك وانتظرهم يروحون..سدو الباب وعاينلي..
رائد : مو كتلج اجيج..تعاي...

كمت على حيلي وعدلت الشال.. : هاي سويتها صدك عفية جفلتني شبيك..
رائد : يولي شوكت مچذب عليج.. تعاي نكعد..

مشيت وياه كعدنا ع الصبة جوه الشجرة.. والجو بي هوى بحيث الورگ مالت الشجرة يطيح شوي منه..
رائد : هسه انتي صدگية شني مدااصدك..
دنوة : هههههههه.. چا شنو..
رائد : لاتضحكين بوية انتي فضيحة من يوم يومج..
دنوة : اهو.. هسه مانضحك تكول ليش زعلانة.. نضحك تكول فضيحة..
رائد : يابة غير انه گلبي رچيچ مايتحمل هيج..
انداريت وعاينتله بطرف عيني بدلع : يله هاي لخاطرك ها..
ضحك وحط ايده على گلبه : يايابة شني گلبي صار طبل..
دنوة : ههههه.. سلامة گلبك عيوني..
رائد : بعد گلبي هالعيون اغديلهن فدوة..

بقينا نسولف ويحچيلي شلون تعارك وي عقيل بيوم زواجي وبعد حچي..ذكريات توجع بس مجبورين نعتبرها من ضمن ذكرياتنا..
كال : انتي اغلى الناس عندي .. جنة خضرة وحلم وردي.. من زمن صدگيني ودي.. يجمعنا الحنين ...
عاينتله بإبتسامة : شنو هاي..
رائد : اغنية احبها.. فديوم اسمعچياها..
دنوة : مبينة حلوة..
رائد : هذا الكاسيت من اشتريته چانت هستوها نازلة.. رحت لمحل كتله اريد منه واخذته بعدين شفت روحي بدون كروة.. ماچنت اسوق بوقتها فأرجع كراوي.. كلت هي خربت كمت اشتريت باكيت جگاير وخلصته بالطريق لحدما وصلت..
دنوة : الله شكد حلو عندك مغامرات..
ضحك ضحكة طويلة وانه صافنة علي شلون شواربه ارتسمت بشكل شفايفه.. ابتسمت لا اراديا..

بقينا شواي بعدين كال .. : فوتي نامي..انه اروح بعد..
كمت ومن ودي احضنه بس تراجعت.. : احبك..
رائد : اعشگج والله..
دنوة : ابتسمت وهو كام ينفض ملابسه..ودعني وراح يتمشى سديت الباب وصعدت فوك..

فراشي جان مفروش..بس تمددت ونمت..احلى لحظات بحياتي..تمنيته دائما هنا واشوفة واحس بهذا الشعور الماحسة يم غيرة..كل الراح جان اختبار ياربي ماريد اتعذب برائد..اريدك تسهل كلشي ونصير سوة.. كعدت الصبح على صوت سرور يمي..تخابر وتضحك..بس شلت راسي كالت يلة حروح وسدته..ويامن تحجين..
سرور : وي حسام..مبين البارحة تأخرتووو..
ابتسمت وكتلهه اي والله..
سرور : اي عيني ليش لا..تدرين ب١٢ هسة..
دنوة : جذاابه..شنو هاي شبسرعة..اكلج جيبي التلفون اخابر على ابوي يجي ياخذني..
سرور : شنو هاي..هم جية يسموهه..

كمت اخذت التلفون منهه..ادور بالارقام واحاجيهه..يله اجيكم غير مرة..شكو قابل مستعجلين..لكيت رقمة ودكيت علي.. الو هلا يابة..شلونك..
محيي : هلا بابا..كولي..
دنوة : يلة متجي تاخذني؟..
محيي : اي يلة..مسافة الطريق واوصل..
دنوة : ماشي..سديتة وانطيتهيا..كمت لبست الفستان وفوكاه الصاية..نزلت غسلت وجهي ولبست الشال..جدة كلتلي وين رايحة ابقي بعد..كتلهه هاهية صار يومين يمكم لزكتلكم.. ضحكت وكالت لو هج اللزكة لو بلاهه..جنت واكفة بالمطبخ وحدي داكل جبن..جان تجي روان..

روان : باعي لج..ترة شفتج انتي ورائد البارحة..والا اكول لجدج عليكم..شوفي شحيسوي بيكم..
هاي شمعرفهه؟..كبر حتى كبر..تمالكت نفسي وكتلهه منو يكول هلحجي صدك..اصلا رائد ملتحق..
روان بضحكة : مشيهه على غيري عيني..اخذتي رجلي مني خليتي يكرهني..كرهتج هدومج كولي امين..
دنوة : وشكو تدعين علي..رجلج نسونجي ويبصبص هنا وهنا انه شكو..شو دطيري من يمي مالي خلگج..
روان : عبالچ رجلي ما كسر عينج يعني مو رجال..
دنوة : ليش انتي تقيسين الرجولة هيج..ولي عن وجهي بربج من الصبح تردين تتعاركين ياستار منج..شو هاي انه كتلهه هج جان تكمز علي تجر بشعري وتضرب راسي بالكع.. احسة تكسر..اصيح وابجي..لج وخري..شرايده منييي.. سرووور..خالة..فدوه واحد يجي..

روان : بواگة الزلم..جلبة حقيرة..الله يموتج واخلص منج..
اجت جدتي والبنات يردون يسحبونهه مني وهي كامشة شعري خلصتة كله بيدهه..كمت ارفس جواهه وهي جنهه حايط تضرب بيه..بس افتح عيني تجيني كفخة..كمت ماشوف اخر شي ابوي صاح بيهه جان تكوم..راحت وكفت يمه وتتوسل بي يسمعهه..انه اجت سرور كومتني
روان : عمي ترضاهه دنوة تروح لعقيل تكلة رجعني
جدتي زمخت بيهه : لج ياملعونة..وين كالت البنية هشكل موزين خلصت منة هذا الخبل..
روان ودموعهه عشرة عشرة : لا مو خبل..هي بتكم خبلتة.. خلتة مايندل دربة..ام السحووورة..سحرت لرجلي..حتى اهلة بعد مايردوه بالبيت..
ابتسام : رجلج الله يسلمة كلساع متعارك وي ابوه وامه.. شتريدين يسووله يعني..يشيلو بالصلوات؟..

روان : خوش..هاي كلكم صرتو ضدي..اندارت على ابوي ورافعة اصبعهه تأشر علي..هاي بنتك البارحة للفجر بحضن رائد..لعبت فلك وانه شفتهه بعيوني هاي ومستعدة احلف
بلعت ريكي وتشاهدت بداخلي..ابوي عيونه حتطلع من مكانهه من العصبية..كمز من مكانه صار جدامي..كمشني من الصاية وطلعني برة دفرات وجلاليق..يغلط ويفشر.. جدتي كمشتة من ايده وحلفتة..
جدة : احلفك بالغالي لا تطكهه..ترة التهايم سهلة ودنوة متسوي هشكل..استهدي بالله محيي..
محيي : لا تدخلييين..لحد يدخل..بنتي وانه حر بيهه..واذا تحتاج تربية اربيهه..
ضربني راشدي فر وجهي..خليت ايدي على وجهي اخاف يجيني راشدي ثاني..

اتوسلة يابه كافي الله يخليك بس اسمعني..هسة اكيد يحسب غير حساب..صعدني بالدفرات للسيارة وخالة وجدتي واكفات يردون يهدو وهو ماكو عبالك انطرش بعد مايسمعهم..شغل السيارة بالعجل..صار الدرب دقيقتين..فتحت الباب ونزلت بس طبينة للبيت كمشني من شالي وصعدني فوك يغلط ويفشر..بت الكلببب انه صوجيي لجج شنو انتي..شنوووو هنتي شيباتي الله ياخذج واخلص منج ومن شررججج..انه تهيني هاي الكح...مابقى علي بس الكحا...تعلمني شلون اربي..بس هيييين..اليوم اطلعلج جلد جديد..صبري

شذى متدري شكو بس طلعت من الغرفة ووكفت ع الدرج تراقبني شلون دانكتل..عبالك تتلذذ بكتلتي واهانتي حتى ماجربت تكلة ع كيفك وياهه..طببني بالغرفة وقفلهه..جان لابس بنطرون وبي حزام..نزع الحزام وضل يضربني شطبة لجسمي..كمت ابجي واصيح واستريح هو ولا يمة اسمعنييي فدوة لتسوي هشكل..يااابة احاجيك..هو عبالك ميسمع اصلا متت من الوجع..اجتني ضربة ع اذاني بعد مشفت شي وراهه مدري شوكت كعدت..بس فكيت عيوني على سرور عبالي انه بعدني ببيت جدي..بس شلت راسي كمت اصيح وابجي من الوجع..حضنتهه وابجي..هي بجت علي..
سرور : لج والله ما انطاني گلبي اشوفه يسوي هج جدامي وابقى بالبيت..اجيت انه وامي وجدتي..

دنوة : سرور مدارتاح..تعبت..كل ما يصير شي يفرحني اكول هاهية خلصت المشاكل وحتبدي حياة عادية..جسمي كلة يوجعني..ما اريد ابقى هنا..كمت ابجي بحرگة وارفع بردان الصاية..شوفييي..شوفي ايدي..اكو اب هيج يسوي ببنتة.. اريد امووووت واخلص..من حرگتي كمت اعت بالصاية والشال وابجي بحرگة..دموعي بللت الصاية والشال..سرور متدري شتسويلي تهسترت ..نهاريت بالبجي..خليت راسي على رجلهه ودموعي تصب..هي تمسح على شعري وتمسح بدموعي شوي وسمعت صوت ابوي يصيح ويغلط علي..

محيي : سكتيهه لهاي الجلبة..ماريد اسمع حسهه لا والله اجي اسحلهه واذبهه للجلاب..سمعتينييييي
دنوة : سرور من سمعتة كال هج راحت سدت الباب واجت كعدت يمي..دفنت راسي بحضنهه واعصر ببلوزهه ابجي وكاتمة صوتي بالگوة..سرور اخذيني وياج..ما اريد ابقى هنا بعد..كمت ابجي واشهك اغص بالحجي..
سرور : سكتي لا تحجين شي..شوفي حالتج..انه وياج بس لا تبجين والله مرمرتي لگلبي..هسة نشوف شلون تصفى..
تنهدت ومسحت دموعي..بيش الساعة..
سرور : بالاربعة.. اجيبلج اكل تاكلين؟..
دنوة : لا..نفسيتي مسدوده ع الاكل ماريد..

سرور : حروح اشوف شديسوون واجي..غيري ملابسج وغسلي وجهج بين ما اجي..
دنوة : ماشي..راحت وانه كمت للحمام غسلت وجهي وذبيت مي ع ايدي ورجلي..متت من الوجع..روان شلون شافتني.. شمعرفهه اصلا..هو انه جنت ما اعرف هي شلون..نشفت وطلعت للغرفة..غيرت ملابسي..ضليت صافنة على جسمي.. احمر ع ازرك..طبع الراشدي على اذاني ورگبتي.. تنهدت ودموعي نزلت انه والبس..لو تريحني ياربي لو تاخذ امانتك عاد..مليت ..

يعني رجعني للدوام بس خاطر يذلني ويكتلني واضل ساكتة جي يدري بيه جنت مستقتلة ع الدراسة..اذا المدرسة هيج محملتة منية ماريدهه..بس خليعتقني ويريحني من الكتل..مو كال تنكسر ايدي اذا امدهه عليج..كعدت ع الجرباية وايدي على وجهي ابجي..شوي وانفتحت الباب طبت سرور
سرور : هم رجعتي تبجين..دكافي ياعيني..
مسحت دموعي ورفعت راسي احاجيهه..شكال ابوي؟
سرور : ماكال شي..هو فشلان من روان ومن حرگتة ضربج هسة جدة كلتلة بعد ماعرفك اذا سمعت بيهه مكتولة..
دنوة : والدراسة شكال عليهه؟..
سرور : ماحجه شي..بس سمعتة يكللهه لمرته تخابر ابن اخوهه يشتغل خط خاطر تسجلين وياه..يعني ماكو مشي بعد
دنوة : مادري بعد..

كعدت يمي وتحاول تفهمني هو ابوي حتلو قسى علي..انه اعرف كل هلحجي بس سمعتهه..
سرور : اجيبلج اكل تاكلين..ميصير هج..
حركت راسي بمعنى اي..راحت تجيبلي اكل وانه متمدده وافكر برائد البارحة..شكد جنت فرحانة..بس من تذكرت روان شكالت لابوي يحترك دمي..اريد اموتهه..يعني ماخفتي على حملج صارلج سنين محرومة من الخلفة وهسة جي صرتي حامل كمتي تدفرين بنعمتج..طبت سرور بيدهه صينية..
سرور : يلة اكلي..شوي ونروح..ماروح الا تاكلين..
عدلت كعدتي واكلت..بين ما خلصت جان تصيحهه امهه.. باستني واخذت الصينية..نزلت وياهه..جانو طالعين برة بس شذى جوه هي والبنات..

شذى : زين شفناج عيني ام الزلم..شعندج بحضن هذا وذاك صدك ماضل حيا عدج..
سرور من سمعتهه تخبلت..ضلت تعاينلي تريدني اجاوبهه بس غلست..يلة خالة تصيحج..باستني وشاورتني..
سرور : هاي لتسكتيلهه ترة تاكلج..
دنوة : ماشي..راحت برة جان تستلمني شذى..كمشتني من بلوزي وتعت بيه..وانه غادية جثة بيدهه مابيه اتحرك سانتيم واحد..منتهية فدنوب
شذى : باعي لج..غده عشه ريوك كله عليج..تكعدين الصبح تنظفين البيت كشاية ماريد..حالج حال الخدامة..بس انتي بلاش ما ادفعلج فلوس يالرخيصة..

غصيتي بالهوى من كثر ما اختنگت كمت ابجي..عافتني وراحت تتلوك لابوي وتعدل بياختة..ابوي ماعاين علي..راح طب للغرفة بالعجل كمت ردت الهول وغسلت المواعين..كنست الكع.. بين ما كملت صارت مغربية..طلعت هي من الغرفة تعدل بشعرهه
شذى : سوي عشة يله..اريد عشه زين لحبيبي..
خررب يالله شكد لعبت روحي منهه..تره ابوي هذا..مو رجلي خاطر جاية تغورني بي..بلعتهه وسكتت..كمت طلعت جوامد من المجمدة وبديت اگلي بيهن..كملت وخليتهن بالصينية وصحتهم يجون ياكلون..انه كمت بس خليت الصينية
رزان : متجين تاكلين..
محيي : عوفيهه..تاكل متاكل..تاكل سم متدخلين..
درت وجهي وصعدت فوك..

سديت الباب وقفلتهه ابجي موتت روحي بالبجي..فشلني جدامهم كلهم..ضليت ابجي لحدما صاحتني شذى..
شذى : ويننننج..تعاي غسلي المواعين..
مسحت دموعي ونزلت غسلتهن وهي كاعدة وي ابوي ع الميز مدري شيحجون..كملت وصعدت فوك..تمددت ومن كثر مابجيت اول ماحطيت راسي ع المخدة غفيت..اجاني نفس الحلم.. نفس الرجال..احس روحي مشدودة بالحلم ماكدر اتحرك واكلة عوفني..بس اصيح رائد وين..كعدت الفجر على صوت الاذان احسة يدك باذاني..شعور يخوف..ضليت بفراشي متلفلفه وعركاانة من الحلم..

كل ما يجيني الحلم هذا واكعد عبالك جنت اركض مو انام خلص الاذان كمت توضيت واجيت فرشت السجادة وصليت بس خلصت ضليت ساجدة وابجي بحرگة اريد ربي يساعدني ماريد بشر يعيرني..تنهدت ومسحت دموعي..شلت المصلاية ورحت تمددت ونمت..اجت شذى على راسي من الصبح
شذى : كومي نظفي يلة..اني حطلع لبيت اهلي العصر اجي ما اريد كشاية وصخ بالكع خوش..ترة تصير موزينة..
دنوة : اي..كمت غسلت وجهي ونزلت جوة..البنات مبدلات والشعر مفتوح على حلتة وابوي همات مبدل..

محيي : انه اوديهم لبيت جدهم والعصر اجي واجيبهم.. حطلع للشغل بدربي..
مجاوبت بس سمعت..حضرتلهم الريوك وكعدت وياهم اكلت.. طلعو كلهم..ابوي حتى ماعاين بخلقتي..يدري مرتة تكلي كل يوم بحضن واحد..اووف يابة..حكمت علي بدون ما تسألني زوجني لعقيل بالغصب..قفلت الباب وطبيت نظفت البيت وكعدت ع التلفزيون..دك التلفون الارضي..كمت شلتة..

سرور : هلا حبيبي شلونج..
دنوة : هلا بيج..زينة وانتي..
سرور : زينة..ضل بالي عليج والله..ام رائد جانت هنا البارحة من رجعنه وسألتنا وين چنا..
دنوة : وشكتيلهه؟..
سرور : جدة سولفتلهه كلشي..يمكن حتكول لرائد وهو يتصرف بعد مادري..
دنوة : شيريد يصير خيصير..بعد مالي قابلية احجي
سرور : لا انتي قوية وتحملتي هواي..لتضعفين هسة..
دنوة : الله كريم..ضلينا نحجي دقايق وراحت..سديتة ورحت للمطبخ سويت اكل..

وهاي هيج خلص اليوم واليوم الوراه..لحد خمس ايام..عشتهه بالضيم والقهر..شذى تكعدني وتنومني بتعيارة..كلمة والثانيه تكلي ام الزلم..لا تفكين حلكج بكلمة ترة اكلة لابوج عايفة شغل البيت كلة براسي وتعرفين هو شلون ميطيقج..وانه والله اكعد من الصبح انظف واسوي الريوك ارد اركد بالكع وصاحتني هاي اذا اتأخر عليهه دقيقة تضل تصيح تكلب البيت فوك راسي..ابوي ماعاين بوجهي ابد.. ولا جاب سيرتي..انه عن انظف واسوي الاكل واصعد..

وره هاي الخمسة ايام..الظهر جنت واكفة ع الطباخ داسوي الغده.. نصيت النار وصعدت فوك اغير ملابسي..سمعت صوت صياح طرشني..لبست بالعجل ونزلت جوة اشوف شكو......

يتبــــــــــع.................