رواية اسألي عني الليالي الفصل الثامن وأربعون 48 - بقلم رقية جاسم

اخذني وياك .. چملني ولو گطرة ..
واخذني وياك ..
اهناك ...

الماي گلبك بلچي روحي تنام ..
عصفورة جرف .. بلل جنحها الخوف ..
اخذني وياك ..

قناة التليگرام

حساب الانستگرام

الـبـارت السابع والاربعون...............

ضليت اتصفن واحجي وي روحي..لحدما انفتحت الباب وفات صگر بيده اكل مثل كل مرة..اجة كعد يمي..
صگر : شلونج اليوم..
دنوة : ما ادري..
وكلني لكمة ووخرت ايده..ضل كاعد يمي لحدما حسيت بطعم مر بحلكي..كمت للحمام بالعجل..كمت استفرغ وابجي .. بلعومي اذاني من الحركة..فتحت عيوني وصحت : صگرررر الدم ترس ايدي وحلكي..حسيت دوخة قوية..اجة صگر كمشني من ظهري غسل وجهي وايدي..
صگر : لتبجين بنيتي ماكو شي..
حضني ودار وجهي للجهة الثانية ما يريدني اشوف الدم.. سمعت صوت المي غسل بي المغسلة بعدين رجعنه للغرفة.. قفل الباب وراح للكنتور طلعلي بلوز..لأن مالتي صار بي دم..

ضليت مدنجة ما عاينت علي..بعدين خلص ..رفعت راسي شفت عيونه تلمع..بس عاين بعيوني جان تنزل دمعته.. كعدت بالكع صرت جدامه..مديت ايدي على خده : هاي شنو.. انت دتبجي..ليش..ضوجتك انه.. ما جاوبني..تنهد وكمش ايدي قربهه من شفافه..انفاسه حارة..
صگر : صوجي..اي والله صوجي..صدكت باخلاص.. اعمى ماصدكت حصلتج صار سنين..بعدين امرضج بنفسي..
خليت ايدي على حلكه : اشش لا تجيب طاري هاي اخلاص ما ادري شسمهه..هاي مجرمة..عوفهه ختولي..كمت حضنته بس تصرفاتي طفولية..حضنتي اله..طريقة كلامي..انه ما احجي هج بس هاي المرضة سوتني غير شخص..مرت الايام وصگر راح للواجب..اجت خالة بمكانه..بس متكدر كلساع صاعدة ونازلة..فتجيني بس بالليل لو وكت الغده الظهر..

جان صگر موجود هو الوحيد يداريني..يبدلي ويبقى كاعد وياي لحدما انام..بقت بس خالة تجي يمي تقره على راسي بس عادي ما انطي ردة فعل اندفاعية.. اضل اسمعلهه لحدما تخلص..تجي ترتب الجرباية..هي هم مره جبيرة بس تكلي انتي تعبانة فاعتبريني مثل امج..عادي اذا سويتلج شغلة..تضل يمي شوي بعدين تروح..وره عشر ايام جنت فوك جان يجي صگر..حضني وباسني
صگر : خوما خفتي وحدج..
دنوة : اي..لا تروح بعد..
صگر : تدللين..
راح سبح وكمل بعدين العصر نزل شوي واجة..

صگر : كومي حبيبي..اجت خالتج تريد تشوفج..
دنوة : منو هاي..شتريد مني..اكيد دازيهه علي..
صگر : لا باباتي انه جبتهه محد جابهه..
دنوة : اي اذا انت جبتهه خوش..اجه كومني ونزلنه جوه.. من شفتهه ما عرفتهه.. مكدرت اسوي شي..اجت حضنتني وباستني..خزرتهه : وخري لا تكمشيني..كامت تعاين لصگر ورجعت تعاينلي..بعدين راحت كعدت ع القنفة..البنات هم جانن موجودات بس ما تقربو علي..

كعدو يحجون ع الدكتور وشكال..انداريت على صگر : ليش تحجي هج..قصدك انه مخبلة يعني..
صگر : لا مابيج شي مو كتلج جنج وردة..
عفته وبلش لساني يشتغل..شكو شي مريت بي حجيته.. بس مو عن نفسي..من يوم وعيت ع الدنيا لحد اخر لحظات من تمرضت صخونة وبلاعيمي..عاينت على حلا وكمت احجي : انتي ابوج جان ما يريدج..بس انتي لازكتله يابة ويابة.. اي ما يريدج شنو هي كوة..بعدين واحد راد يغتصبج.. همزين انتي سباعية ودافعتي عن نفسج..صگر كمشني من ايدي
صگر : عيب ميصير هشكل..
دنوة : وخر ايدك دا احجي الصدك..انتي اللخ..وأشرت على تارة..انتي سالفتج سالفة..تزوجتي وطلكتي..صارتلج مشاكل شكد خطية..بس ربج ما يعوف عبده وحيد..تزوجج واحد يحبج ومداريج كلش زين..

بس اخته حية..يمه منهه.. ديري بالج منهه خاف توديج للشماعية بسوالفهه..اي تريد تخبلج يمعوده..انه دا احجي علمودج..احبج قابل شعندي وياج..كلهن ضلو يعاينلوني بنظرات عطف ..نظرات خوف وتساؤل..صحت بيهم : شبيكم تعاينولي عبالك مخبلة..هااا..انتو مخابيل تردون تخبلوني مووو بس لااا..انه ربي وياي..ما يعوفني وحدي..
خالتي : ونعم بالله حبيبتي..لا تضوجين روحج نعتذر..
دنوة : وانتي منو..انه ما اعرفج بس اعرف هذني البنات.. انتن مو كرايب صدام..اي حتى هو اشترالكم بيت جبير..
خالتي : انه خالتج بنتي شنو نسيتي..
دنوة : ما اعرفج..جابج خالتي..انه ماعندي احد..بس صگر انتو كلكم غربة ما شايفتكم اصلا..لا تتقربون مني.. عوفوني اعيش وحدي..

فجأة وطكيت بجي.. كمت احجي واشهك : اي حتى كتلوا واحد جدامج..ولج شلون عشتي..هاااا بس كليلي شلووون من شفتي طايح بمكانه والدم مطشر بالكع وع الحايط شكلتي لروحج..شلون نمتي بالليل..شلون عشتي لحظات فرح حاجيني مو احاجيييج .. صگر كام ميعرف شيكول بعد.. انه تهسترت كمت ابجي واشهك..اجه حضني وترخص منهم بعدين صعدني فوك.. هلكد ما بجيت ع الدرج وكمت استفرغ صار على ايدي وايد صگر..حتى ملابسة..لأن جنت مايلة علي..دم بس ما ادري شلونه..عبالك استفراغ عادي وبي دم..زدت بالبجي وكمت اصيح : شنو هايييي..صگرررر..

شالني واخذني للحمام غسل حلكي وايدي..اخذني للغرفة راد يروح..كمت يمه كمشته من ايده : وين تروح وتعوفني..
صگر : بس امسح الدرج خوما يبقى هج..
دنوة : لا لاااا..لتعوفني..اخاف وحدي..
صگر : تعاي وياي بين ما اكمل..
رحت وياه..كعدت ع الباية الفوك وهو بنص الدرج مسحه وعاكد حواجبه بس ماحجه شي..حتى ما كال شنو هلريحة .. راح نزل..ضليت كاعدة ع الباية ماكمت..انتظرته لحدما غفيت ما ادري شلون..هج وحدي هاي اول مرة اغفى بدون مهدئات فزيت على ايده يشيلني..غيرلي ملابسي واجه حضني.. نمنه ع الجرباية وهو مخلي ايده بين شعري..
صگر : ما ادري اروح لبغداد لو اخذج لدكتور..
دنوة : شعدنه ببغداد..
صگر : اخذج لدكتور هناك..

دنوة : زين اكلك..هاي النكسة ماطلعتوهه..
صگر : اذا اجت يمج وأذتج اطلعهه جدامج..بعد..
دنوة : منو يكول..
صگر : وغلاتج..
سكتت شوي..ضل كاعد يمي بعدين كام ع الكنتور كلبة كلاب مدري شيدور..فتش الجيوب مال قماصلة والبناطير..انه كاعدة واحجي ماسكتت..تعبت هلكد ما حجيت..احس فجوجي كامت توجعني من كثر الحجي..بالاخير طلع ورقة صغيرة من جيب القمصلة الجلد..راح ع التلفون جابه يخابر بي..كتب الرقم وضل يفتر بالغرفة رايح جاي..دك مرتين يله شاله..
صگر : شلونك حجي.. انه اجيتك من البصرة علمود مرتي عرفتني..الله يسلمك..بهلدنيا وين نروح..والله محتاجك بشغلة الكاك باجر الصبح..فد بالعشرة عشرة ونص مسافة الطريق يعني لأن حطلع الفجر..

هاا..ان شاء الله..تسلم متقصر..مشكور منك حجي..
سده واندار علي..كتله : منو هذا..وين تريد تاخذني.. تريد تموتني..اجه يمي حضني ومقفل علي بإيدة..
صگر : اموت انه ولا يصيرلج شي..بس ابقي هنا ولا تسوين شي بدوني..مستعد ابقى كاعد الليل كلة علمودج..
ضل كاعد يمي ويحجيلي..طبعا مكدرت انام حتى من اخذت الحباية..راسي كام يدك سطرني..كمت افتر بالغرفة وابجي : لك راسي..راسيييي..حموت من الوجع..عفية سويلي شي الله يخليك..رحت كعدت يمه بالكع ودموعي بعيوني : صگر ديوجعني سويلي شي..جانت بالوحدة بالليل..اخذ السويج واجة يمي كومني وطلعني بالسيارة..ضل شكد يفتر لحدما هدأ راسي من وحده..هاي كل ما يكوم يوجعني اخذ حباية بس ميروح الوجع لحدما يطلعني صگر..شنو تفسير حالتي ما ادري..تعبت من كلشي..تعبت من نفسي..

كبل لا نرجع للبيت بالباب وشغل الاغنية..رجع الكشن ورجع راسه علي..كتله : هاي شنو..شوكت ننزل..
صگر : بس تخلص ننزل..
خلصت ونزلنه..طول الاغنية ماعندي احساس تجاهه.. شكد جانت تعنيلي ومن اسمعهه انقهر واتذكره..خصوصا من جنه بسوريا..غربة ووحدي بس وي هاي الاغنية..هسة من سمعتهه عبالك اغنية عاديه مرت علي..المرض نساني نفسي وشكلي حتى بالمرايه ما اعاين لروحي..سبح ما اسبح..يجي صگر كل تلث ايام يسبحني ويغيرلي ملابسي..صعدنه فوك انطاني الحباية وغفيت..من اخذهه انسطر بشكل..بحيث اذا واحد شالني من مكاني ما احس بي..كعدت على بطني توجعني كلش..لكيت روحي بالسيارة وصگر توه ديطفيهه..كتله : شنو هاي..وين احنه..شجابني هنا..

صگر : بالهداوة بنيتي..انه جبتج..مو كتلج اخذج لدكتور بغداد يله انزلي وصلنه..ماردت اكعدج..
نزلت وطبينه جوه..الرجال من شفته تخبلت..كمت اصيح وخازرته.. ما ادري شتخيلته..مثل واحد يريد يرجعني لنقطة جنت بيهه..تذكرت من اجيت لهذا المكان وكمت استفرغ دم.. تأذيت وضليت فترة بالفراش..صگر كمشني من جتفي ودنج يمي يحاجيني بهمس..
صگر : الحجي ما يريد منج شي بنيتي..يريد يشوفج شلون صرتي..دقايق منطول واذا صار شي شتريدين اسويلج
دنوة : لا ما اريد..هذا يريد يموتني..
صگر : ابوية انتي محد يريد يموتج فدوه اروح لعيونج.. لا تعبيني وتعاي نفوت جوه..انه وياج ما اعوفج زين..
دنوة : واذا عفتني..

صگر : لا ما اعوفج وداعت عيونج..
حركت راسي يعني اي وطبينه جوه..الشريط كله انعاد جدامي من يوم طبيت لهاي الصالة وكمت استفرغ دم..يوم الي صگر كام يقره قرآن بالغرفة وانه ابجي اريده يسكت وهو مستمر عبالك مو يمه الحجي..لحد هاي اللحظة كله مر جدامي.. كمت ابجي وحاضنه صگر..هو كاعد بسدي وانه حاضنته وابجي دموعي ماسكتت..بس بدون صوت..كمت اسمع شديحجون
صگر : حجي ما ادري منين ابديلك..بس هي على فجأة صارت تكول اكو واحد يراقبني..انتو تريدون تموتوني.. متقبل تاكل من احد بالبيت..هي تحب امي بس مع ذلك من تجيبلهه الاكل متقبل تاخذ منهه..الا اجي اكللهه هذا الاكل انه سويته يالله تاخذه..بالبداية اخذتهه على دكتور نفسي..كلت يمكن تعبت من الصار وهي جانت بسوريا سنتين لظروف معينة..

كال عدهه ذهان وانطاني ادوية..كبل اسبوع كامت تستفرغ دم وحالتهه تأزمت..خفت يكون راجعلهه العمل..صار اسبوع ادور رقمك..لأن ابوهه انطاك عمره هو جان عنده رقمك..صدفة البارحة كلت خلادور بلكت الكاه..لكيته وخابرتك..حتى مانمت بالقرآن..بس صارت بتلاثة اخذتهه واجيت..خايف عليهه..
الشيخ : الله يرحمه للوالد ويطول بعمرك..اني كتلك العمل مستحيل يرجع الا نفس الشخص يسوي..لأن صعب هذا النوع يرادله واحد صار سنين بالسحر..
صگر : الديصيرلهه شنو..
الشيخ : تقرالهه قرآن شي لو بس ع الادوية..
صگر : اي والله كبل لا تنام دائما اقره يم راسهه..
الشيخ : وليدي..انت مثل ابني ومرتك مثل بنتي..مشكلتهه مو يمي..اي اكلكياهه من الاخير..

اخذهه لدكتور يشوف حالتهه ويشخصهه صح..يمكن الادوية الدتاخذهه متتحملهه معدتهه وكامت تستفرغ دم..اكو هواي احتمالات..اما سالفة السحر فاستبعد هذا الموضوع تماما .. البنية انفك عنهه السحر..والديصيرلهه هو حالة نفسية.. كتلك اني السحر مو سهل..وتبعاته صعب تتعالج..لازم تخليهه بموقف هادئ..لا تخلي اعصابهه تنشد وتتوتر..هذا كله بسبب التوتر والشد العصبي..اني مو طبيب..ولا اعرف بالطب.. بس بحكم معرفتي بفك الاعمال الشيطانية فدائما من بين خمس اشخاص يرجعولي ثنين نفس حالة زوجتك..عبالهم راجعلهه السحر او بعدهه ما خلصت منه بشكل كامل..فشغلي لازم اطمنك واكلك توجه لأقرب طبيب باطنية يكشف عن حالتهه .. اني لو علاجهه يمي ما اقصر واساعدك اليوم كبل باجر.. اصلا البنية هاي كلش تعاطفت وياهه..

مبينة فقيرة وعلى نياتهه..زين يابة..
صگر : الله يسلمك حجي..والله كل الاجة ببالي مثل ما كلت الحمدلله هشكل ولا غيرهه..ان شاء الله اراجعلهه عند اقرب طبيب..مشكور منك ما اعرف بيش اجازيك..
الشيخ : لا يابة مثل ابني انت..شسويتلك قابل..
خلصو حجي وانه سكتت بعد محجيت ولا بجيت..الشيخ قره على راسي جم اية هم مثل كل مرة..ما احس بشعور غريب بالعكس ارتاح..ادور هو صوته حلو وخاشع..ارتاحيتله هو ويقره..ضلينه شوي بعدين طلعنه..صگر الطريق كله يعاينلي ويبوس ايدي..نص الطريق ونزل اشترى اكل وعصير.. خله لفة بحضني وباكيت شربت..دفعتهن : ما اريد..
صگر : اكلي بس شوي..لخاطري..
دنوة : اكلك ما اريد شنو كوة..يمكن بي سم..

صگر : جيبي اكل كبلج..بس اذا مابي شي تاكلي خوش
دنوة : خوش..اكل جدامي بعدين اخذتهه منه..اكلت منهه لكمتين تلاثة وخليتهه ع الدشبول..بس شربت العصير لأن عطشانة..بين ما وصلنة للبيت صايرة الدنيا مغربية..طبيت للبيت رجلية صايرة خيوط..عفته جوه وصعدت فوك..ميتة نعاس بس ما اكدر انام..ضليت اتكلب بالفراش وراسي يوجعني من الطريق والسيارة..اريد انام تعبت من السهر والحجي.. كرفصت روحي وكمت ابجي..دموعي حارة وخدي هم حار.. كمت احجي وي نفسي : نامي..ناميييي..كافي صار كومة منايمة..لج حتموتييين..سكتت شوي بعدين صرت احجي بهمس : نامي..يله نامي..عبالك واحد يريد ينيم طفل ويلوليله خاطر ينام..انه الولي لنفسي بالدموع..حسيت نفس الشخص ديراقبني..كمت اعرك وانفاسي سريعة..

كمت من مكاني توني طلعت جان يجي صگر..حضنته ودموعي تصب عشرة عشرة..كمشته من قمصلتة وراسي يم بطنه..بعدني عنه شوي ودنج صار مقابيلي..
صگر : ليش البجي شبيج..
دنوة : اخاف وحدي..هذا ديراقبني يريد يسويلي شي.. ضل يعاين علي بنظرات مكسورة..حضني واخذني للجرباية انطاني دوة الأرق وراح يبدل..بعدين اجة بدلي وخلاني بحضنه ماكعدت للصبح..ثاني يوم العصر بعد يوم طويل من الحجي والدوخة..من الثنعش الصبح ما حاطه شي بحلكي.. حتى مي ما شربت..متخومة ع الاخير..راسي يوجعني مثل كل مرة..ردت اضرب راسي بالحايط من الوجع..اجه صگر كمشني ضل يعاتب بيه ويحجي بحركة ودم محترك..
صگر : لج ليش..يعني وين اروح بعد..بس دقايق نزلت اجيبلج مي اجي الكاج تسوين هج..

اصحي اصحي.. انتي مو هشكل..محد يراقبج..محد يريد يموتج..تعبت والله..كومي البسج نروح للدكتور..
دنوة : مو راسي ديوجعني شسوي..
صگر : راسج يوجعج تضربي بالحايط..تعرفين شيصير.. تتأذين بالزايد مو تصيرين زينة..من يوجعج تعاي كليلي يوجعني انه شسويلج من يكوم يوجعج..مو اطلعج بره لحد ما تصيرين زينة صيري مثل كل مرة..لا تأذين روحج..
سكتت محجيت شي..كام بدل واجة بدلي بعدين رحنه للدكتور ضلينه ننتظر لحدما خلصو المراجعين جان بيهم خمسة بعدين صاح السكرتير اسمي وطبينه..اسئلة كالمعتاد..اسمج وعمرج شتصير منهه..بعدين بلش يستفسر عن حالتي..
الدكتور : شنو حالتج..
دنوة : معدتي توجعني كلش..حتى اكعد من النوم من وراهه .. وادوخ..حتى كمت استفرغ دم..واحس روحي متخومة

الدكتور : تحسين بحركة بالمعدة او بالبلعوم..
دنوة : اي هوي.. عاين على صگر وحجة..
الدكتور : هي تاخذ ادوية..واذا تاخذ اريد اشوفهن..
صگر : اي..جايبهن وياي..
انطاهيا..كعد يقراهن بعدين سألني..
الدكتور : هاي شنو..من شوكت تاخذهن..شنو نوع الاكل التاكلة..يا طبيب انطاهه هاي العلاجات..
صگر : متاكل هي اصلا..لو مي لو عصير..اذا اكلت تكوم تستفرغ..العلاجات صار شهرين تاخذهن..الدكتور الاولاني كال من تخلص ترجعلهن..
الدكتور : بس مو زين..اكبر غلط..هاي الادوية للي عمرهم خمسة وتلاثين وفوك..هي بعدهه شابة متتحمل كذا نوع.. خصوصا حضرتك كتلي هي متاكل..

العلاج هذا يحتاجلة كمية كافية من الاكل..بسبب هذا النوع صاير عدهه تقرح بالمعدة..ما اكدر احدد قطعا نوعة وكميته الا اسوي تحليل دم او براز..حكتبلهه اشعة فورا لأن حالتهه صعبة.. هاي الادوية اتركهه حاليا..نعالج مشكلتهه العضوية بعدهه اني ارسلك على طبيبة نفسية مضبوطة ببغداد..مبدئيا أي حباية بعد متاخذ..لحد ما اعالج التقرح..
صگر : بس هي متنام اذا متاخذ هاي الادوية..
الدكتور : ضروري تتركهه..مجرد فترة قصيرة بين ما تصير زينة حتى تراجعلهه دكتور نفسي..انت شنو تخصصك..
صگر : خريج معهد طبي..
الدكتور : حيل زين..بس شعجب ما منتبه للادوية..
صگر : ما اعرف يعني كلت هو دكتور واكيد يعرف احسن مني ثم انه ما مارست مهنتي بعد التخرج..صرت بغير مجال
الدكتور : اها..فهمتك..

هسة عزيزي مثل ما كتلك..ما اكدر اكتب أي علاج..الا اعرف اذا كانت القرحة الهضمية او قرحة الاثني عشر.. حسب تشخيصي لحالتهه من خلال اجوبتهه فنتأمل ان تكون قرحة هضمية..تتعالج مع الادوية والاكل الصحي..
كعد يكتب اسم الدكتور ابو الاشعة ودكتور ثاني كال دكتور جراح علمود يقره الأشعة والتحاليل..ما ادري ليش عبالي هو نفسه يسويهن..صگر يتابع وياه كلمة كلمة وعاكد حواجبه.. لحد ما خلص وترخص منه..بعدين طبينه لصالة بيهه كراسي وغرفة لخ مسدود بابهه..طلعت منهه بنية بعدين طبينه احنه.. صگر انطاه الورقة..الدكتور حرك راسه وكال تفضلي ع السدية..رحت كعدت جان ينطيني ما اعرف شنو بكوب صغير لونه ابيض..
الدكتور : اولا صار شكد ماكلة وشاربة..
دنوة : من الثنعش تقريبا..

الدكتور : حتى مي ما شاربة..
دنوة : اي..
الدكتور : تفضلي..شربي واستريحي بمكانج..
اخذته منه واعاين لصگر..اشرلي بايدة يعني شربي ويعاينلي بنظرات عبالك واحد يتوسل بيه بس علمود اسوي مثل ما يريد الدكتور بدون حجي زايد..شربته وتمددت..بعدين لبس مناظره واجه ع الشاشة يراقب حركتي..شوي يكلي تحركي يمين او يسار..بعدين بكلي اثبتي بمكانج..اخر شي ثبتت بمكاني لمدة نص ساعة..بعدين تحركت بعد أمر منه لليسار..وره نص ساعة لخ لليمين بعدين كلي كومي..انه واعدل ملابسي اسمعه يحاجي صگر..
الدكتور : لمدة اربع ساعات متاكل شي..بين ما يختفي مفعول السائل الشربته..وراهه تبدي تنطيهه سوائل فقط.. باليوم الثاني تاكل عادي بعد تتعدى المرحلة هاي..

صگر : مفهوم..شوكت اخذ الاشعة..
الدكتور : سوي التحاليل الكاتبهه الدكتور بعدين اخذ الاشعة وياهن علمود تصبر كاملة بس تحتاج تشخيص من الدكتور اني هسة بينت عندي تقرحات بالقناة الهضمية..ما اكدر اجزم انه حالتهه كذا وكذا..الا بعد التحاليل..
صگر : زين ليش كل هذا..مو يكون احسن اذا سوينه ناظور
الدكتور : الناظور للحالات القصوى..الدكتور من يسأل المريض عن الاعراض ومن شنو يعاني يكدر يشخص الحالة اذا تحتاج ناظور او لا..وان شاء الله شي بسيط ويتعالج مع الوقت ووصفة الطبيب..
صگر : اشكرك دكتور..

كمت رحت يم صگر كامشه ايده بقوة..شد على ايدي وطلعنه نزلت جوه للمختبر..سوالي تحليل وبعد جم شغلة كال باجر يكملن كلهن..صگر صعدني بالسيارة وراح..كال دقايق واجي شوي واجة..نزل اشترى اكل بعدين رجعنه للبيت.. توهم صبو عشه جان تجي جلنار وانه تخبلت : طلعوهههه..نكسههه وصخههه..تريد تموتنيييي..كلبت الدنيا..صگر كام من الاكل وصعدني فوك..كمت ادفع بي وابجي : وخررر.. انت تريدهه تبقى خاطر تموتني..انت هم تكرهني حقييير..كلكم تردون تموتوني..ليش هااا..جي احسن منكم..اذا ما طلعتهه احرك روحي هنا..هنااااا فااااهم..احرك روحيييي..كمت اضرب على راسي ودموعي تصب..اهمس بيني وبين نفسي : احرك روحي هنا..فهمت لو لا..وضليت اعيد بيهه لحد ما تعبت وسكتت من وحدي..صگر الف مره حاول وياي بس مسكتت..

بالليل مانمت ولا دقيقة..ضليت الليل كلة احجي واخبط مواضيع مدري منين..ادور صارتلي شغلة كمت احجي شكو شي مريت بي كبل بس بصيغة غير شخص..مثلا احجي عني بس اكول جلنار..لو اخلاص..وهاي هج ..صگر ضل كاعد وياي..يغفى ويرد يكعد على صوتي..يجي يهديني..يطلع فلم مسلسلة بس اسكتي..وانه مستمرة لساني ما اكدر اتحكم بي ثاني يوم العصر اخذني وطلعنه للعيادة..جاب التحاليل والاشعة ورحنه للدكتور..دزنه على دكتور جراح قره الأشعة والتحاليل..أشر على جم شغلة وكتب بورقة بعدين كال اخذوهه وروحو لدكتور الباطنية..جان واحد جدامنه..بس طلع طبينه بده الدكتور يحاجي صگر..
الدكتور : مثل ما كلت..قرحة هضمية..بسبب الادوية القوية الاخذتهن..الظاهر اول اسابيع ما مأثرة عليهه..بعد مرور شهر يله بلش يبين المفعول..

صگر : دكتور انه سويت مثل ما كتلي وما انطيتهه أي دوة من الادوية الشفتهن حضرتك..بس منامت..يعني من البارحة لحد هسة هي كاعدة..شلون بهلحالة..
الدكتور : علاج الأرق انطيهه منه نص حباية فقط.. بالاضافة للادوية الي حكتبلهيا..مدة العلاج حتستغرق اسبوع الى اسبوعين..بعدهه تبدي تختفي الأعراض عدهه..اذا استمرت الاعراض وما فادهه العلاج..وقتهه تخضع لعملية ناظور.. ان شاء الله الموضوع سهل ويتعالج..
صگر : ان شاء الله..طيب كتلي انطيك عنوان دكتورة..
الدكتور : اي صحيح ذكرتني..حكتب اسمهه بظهر الراجيته .. ازهار الشماع..بنفق الشرطة ببغداد..ما اعرف اذا عندك روحة هناك او لا..بس هي راح تكشف عن حالتهه وتنطيك المضبوط بس شرط بعد ما تخلص ادويتهه..علمود ميصير عدهه مضاعفات او نوع من الادوية يفقد فعاليته..

عموما..بعد هلاسبوعين اذا اختفت الاعراض خير على خير.. توجه مباشرة للدكتورة ببغداد..واذا استمرت ارجعلي نتخذ الاجراءات اللازمة..

كعد يحجي وي صگر بعدين انطاه الراجيته..نزل ع الصيدلية اخذ الادوية ورجعنه للبيت..اسبوعين ينطيني العلاج بوقته بالضبط..يوكلني سوائل واشياء خفيفة مابيهه دهون ولا حامض..بس بطلاع الروح يله اخذ..هو يضل يمي لحدما اخلص الماعون يله ينطيني الدوة..شوي شوي بدت تخف عندي الدوخة ولعبان النفس..حتى الاستفراغ اول فترة تغير لونه بعدين اختفى تماما..الحركة بالبلعوم والمعدة هم راحت بس هاي اخر فترة من العلاج يله..وره هلاسبوعين كعدت الصبح واسمع صگر يخابر ويصيح..
صگر : لك شلون اجي..ما اكدر شنو متقدرون انتو.. دخيولييي..اكلك مرتي مريضة..مريضهههه يابشر..شلون اعوفهه وحدهه..بس هلفترة..اسبوع مو اكثر بين ما اخذهه لدكتور ثاني..يابة اكلك ما اكدر شلون بلوه هاي..اخذت صخام بعينه اي اخذت اجازة..

اذا نزلت شكد ابقى..ما اكدر اطول اكثر من عشر ايام.. هاهيه امري لالله..اليوم الفجر اطلع..ماشي..
سده واندار علي..كتله : وين حتروح..
ذب التلفون ع الكرسي واجه كعد يمي يحاجيني بهدوء عبالك ديحجي وي طفل ويريد يفهمة شي اكبر من عمره : حبيبي لازم اروح للواجب..
دنوة : شنو واجب..وين صاير..
صگر : يعني شغل..ببغداد ابوية انتي..
دنوة : اخذني وياك..تريد تعوفني هنا وحدي..
صگر : بنيتي..ما اكدر اخذج هناك ميصير..بس ولد يفوتون دتفتهمين شلون..وانه مراح اطول..بس اخلص شغلي واجيج بالعجل ما اعوفج وحدج..
دنوة : بس حتروح وتعوفني..شلون..
صگر : ما اعوفج..حسبيلي عشر ايام واجي..

كمت ابجي وحاطه ايدي على وجهي..صگر الوحيد يعرفلي يعرف شريد..يصبرلي من اريد احجي..ما يكول لا ولا يصيح علي..شلون يم منو ابقى اذا راح..اجة حضني ويهدي بيه لحد ما صاح على خالة اجت..خلاني بحضنه ويحاجيهه..
صگر : يمه لازن انزل للواجب بعد ميصير ابقى اكثر..
الحجية : ودنوة شلون..تعوفهه..
صگر : يعني شسوي..هم عندي شغل والتزامات..صار تلث شهور وياهه جره وحده..حيصيرن اربعه..ما امل منهه لا والله بس الشغل شلون..لو ماعندي شي جان بقيت..
الحجية : زين حتروح اكيد حتطول..
صگر : لا حبقى عشر ايام وارجع ما مطول..بس اريدج اداريهه وديرين بالج عليهه..هي تحبج متستوحش منج..
الحجية : دواياتهه شلون..
صگر : ماعدهه شي تاخذه..طولي خلك وياهه جم يوم وارجع اخذهه لدكتورة ببغداد..اشوف وين تاليتهه..

اعصابي تلفت والله متدمر..اشوفهه هج تبجي على فجأة لو تضحك وانه مابيدي شي..شسوي ما ادري..تعبت
الحجية : الله يساعدك يمه..ويساعدهه هي هم خطية..قابل بيدهه..كله من وره العكارب جوه..منريد نذكر اسامي
صگر : اي والله..لا تنزليهه يمهم..اذا ضاجت طلعيهه بالحديقة هي ترتاح هناك..
كعدت يمنه شوي بعدين باستني ونزلت..هو انه صدك ارتاحلهه هي حبابة وما تأذيني..بس متعودة على صگر..متعودة شلون يجيب الاكل جدامي وياكل يله يخلي اللكمة بحلكي.. بالليل انطاني نص الحباية ونمت..بس فزيت الفجر ما ادري شلون ولو انه من اخذ الحباية هاي بعد ما اكدر للصبح.. درت وجهي ع الجهة اللخ..صگر لابس عسكري وواكف ديصلي.. هو يصلي اصلا من اول ما اجيت للبيت..بس انه هاي الفترة الاخيرة كبل لا اتمرض كمت اكطع..

كمل واجة يمي باسني يعدل بشعري..ويعاينلي بتعب
صگر : ادري ما تكدرين تسوين شي..بس ديري بالج على نفسج..فترة صغيرة مو هواي..امي حتكون بمكاني..
دنوة : حتروح صدك..
صگر : اي..
بقى كاعد يمي شوي بعدين باسني ونزل..ضليت اتصفن بالغرفة لحد ما غفيت وحدي..كعدتني خالة الظهر وكلتني واخذتني للحمام غسلت وجهي وطلعت..اول يومين عادي.. تجي تنام يمي..توكلني وتكعد وياي لحد ما انام وحدي.. بهاي الفترة جان المفروض صگر يجي اليوم..لأن سمعتهه تخابره بالليل كلتله يله بالسلامة..كعدت من النوم كبلهه..ضليت احوص بالغرفة بعدين نزلت جوه..انه وشعري مكفش..بجامتي تك منهه صاعد من اثر النومة المخربطة..طبيت للمطبخ شربت مي..

توني دا اصعد جان تحجي جلنار..
جلنار : همزين شفناج عيني..وين غاطة فوك..
عاينت عليهه بس ما جاوبت..اصلا بالي مو يمهه..
جلنار : اخلاص حتنخطب وانتي نايمة ورجليج بالشمس..
دنوة : انه شكو..اصلا هاي مجرمة حتلو انخطبت حتبقى هج مسمومة ومحد يريدهه..عفتهه وصعدت فوك..خالة توهه كعدت راحت تغسل وغسلتلي وياهه..بعدين نزلت جابتلي اكل
الحجية : حروح اخذ دواية..اذا ردتي شي صيحيني..
دنوة : اي..باستني وراحت..ضليت كاعدة ع الجرباية واتصفن ما ادري شسوي..بس حجي جلنار صار ببالي وكمت احجي على اخلاص..اي هاي المنافقة الجذابة..محد يريدهه هاي مجرمة تريد تكتل مرة اخوهه وتوديهه للشماعية..مسويه روحهه هي وبس..وعلى هلمنوال لحد ما انفتحت الباب وفات صگر .. ابتسم واجة يمي حضني وشالني من الكع..

صگر : شلونج..خوما احد اذاج..
دنوة : لا..بس وين جنت..
صگر : مو كتلج بالشغل بنيتي..بعد ماعوفج لحد ما تصيرين زينة وترجعين مثل كبل..
دنوة : شقصدك..انه مخبلة يعني..
صگر : لا مابيج شي ابوية انتي..
دنوة : لا بيه شي..انت دتجذب علي..تريد تسويني مخبلة علمود توديني للشماعية انت وهاي اخلاص المجرمة..
صگر : انه وياج مو عليج..مو اخذتج للدكتور وابقى كاعد وياج للصبح..يعني احبج وما اريد اسويلج شي مو زين.. انتي بنتي كبل كلشي..شلون ارضا بأذيتج..
حضني ويحجي بهداوة كله بنيتي وباباتي..لحد ما هديت وسكتت..راح يسبح ويبدل..بعدين اجة جان تجي خالة..

الحجية : صگر خوما نسيت سالفة اخلاص..
صگر : اي ببالي والله ما ناسي..شوكت يجون اصلا..
الحجية : هسة خابرتني ام الولد..كالت العصر بالخمسة يجون انت عندك مجال هج وكت..
صگر : اي ماعندي شي..بس تعبان تعب مو طبيعي.. كون ما يضلون يجرون ويعرون..
الحجية : يله انت ساريهم عود..الجماعة حيجون من الحلة لا تسويلهميا دربين..ومبين شاريهه..
صگر : اي خوش ولد..مو كلتي محمد سائل عنه..
الحجية : اي كايلين يشتغل وماعنده اذية على احد..هذا زين مو هذاك طارق مدري شسمة..
صگر : اي هم زين..هاي اخلاص تعبتني فوك تعب الدنيا.. شتريد اسويلهه يعني اكو اخ هج يسوي لاخته..والله لو واحد بمكاني جان شبعهه كتل..

بس خلتحمد ربهه انه ما اضرب..جان هي كل يوم مزوركة
الحجية : يمة ختروح..هي هاي مدري شبيهه من يوم الجبت دنوة لحد هسه..
صگر : ادري..هي من زمان ما تتحاجة..على يابة شنو.. هي الوحيدة..والله انه الوحيد مو هي..اشو شايل البيت كله اكول ما اخلي محمد يخلي ايده وياي..هم شاب ويريد يبني حياته يمكن يريد يزوج بس ديكون نفسه..شفتيني فد يوم اخذت منه لو كتله خلي ايدك بالبيت.. مع ذلك ساكت وما احجي كلمة.. اكول وين يروحون اذا شلت ايدي..بعدين تجي اخلاص الادبسز تكول شناطي وشناطي..
الحجية : الله يطول بعمرك حبيبي انت..اذا هي ما تقدر انه اقدر ودنوة..وخالك..عوفهه ختولي هاي الحقد عاميهه..هسة تزوج وتروح بعد منشوفهه كل شهرين نوبة اذا مو اكثر
صگر : يابة ختروح الله وياهه..بس كون ما ترجعلي..كلساع الله بالخير زعلانة وجايه هي وجنطتهه..

الحجية : لا ان شاء الله ما يصير شي..دير بالك على روحك انت هم تعبان وملتهي يا شغل يا دنوة والدكاترة..
تنهد وحجة : بس لو تصير زينة..والله ماخذه حيلي كله.. انتي متشوفيهه مثلي..كاعد يمهه من الصبح لحد ما تنام.. متيهة راسهه من رجليهه..
الحجية : ارتاحلك يومين واخذهه لبغداد..
صگر : اي ان شاء الله..حنام شوي كبل لا يجون كعديني
الحجية : يله اخذ راحتك..
ابتسمتلي وراحت..طفى الضوه واجة حضني..بس اسمع صوته انفاسه..باسني وحاجاني بهمس..
صگر : جوعانة تاكلين شي..
دنوة : لا ما اريد..سكت شوي بعدين انداريت علي لكيته غافي رايح بسابع نومة..خليت ايدي على شعره امسح بي على كيفي..الشيب البي يلمع..حتى بلحيته..

اليشوفه يكول هذا ابوج..ملامحة جدية من زمان ومبين عصبي بس هذا الشيب كبره هواي..بقيت امسح بشعره لحد ما اجت خالة ما اعرف شوكت كعدته..فز من مكانه مرعوب..
الحجية : ياستار ياربي..خيرك يمة..
صگر هو ويفرك بوجهه : مابيه شي..ها حيجون..
الحجية : اي وصلو البصرة..
صگر : يله بس اغسل وابدل..
راحت وبقى صگر..انداريت علي كمشته من جتفه : شبيك خايف..منو مضوجك..
اخذ ايدي باسهه ومقربهه من شفافه : مابيه شي.. ابتسلمي وراح غسل وجهه واجة لبس بنطرون وقميص والعطر ترس الغرفة..راح نزل بعدين شوي واجة بيده صينية..كعد يمي يوكلني على كيفة ويحاجيني..
صگر : بس تخلص هاي السالفة واخذج لبغداد..

همهمت يعني اي بدون ما احجي..وراهه اجت جلنار متعطرة والملابس اخر موديل..لابسة فستان فوك الركبة بي شذر ويلمع لمع..شعرهه مشسور والمكياج موضوع ثاني..
جلنار بتنعوص : يله عيوني دينتظرون تره خالو طلعلهم..
خزرهه وكال : جاي..
ضلت تعاينلي بطرف عينهه ومبتسمة..اندار باسني ويوصيني ما اسوي شي..هو محيتأخر وو..حذر بكل كلمة يكولهه.. بنيتي وباباتي..ابوية انتي..بنتي..هج يحاجيني بالفترة التمرضت بيهه..برغم مرضي بس حسيته ابوي..بكل تصرف بكل كلمة..حتى بوسته من خدي احساسهه غير شكل.. صگر جان يختلف بكلشي بهاي الفترة..هو نزل وره ساعة جان تجي جلنار..سدت الباب وكعدت ع الطبلة مال ميزتواليت.. تفتح بالعطور مال صگر وتخلي على معصم ايدهه..
دنوة : شدتسوين..

جلنار : اجرب عطور رجلي..شعليج انتي..
دنوة : رجلج شنو..امشي طلعي منا..انتي جلبة..
جلنار : حبيبتي انتي الجلبة..جايه تسوين روحج مريضة براسنه علمود ما تشتغلين..ومكضيتهه سهرات انتي وصگر .. بس لعيونج اليوم ماخذة صگر يعني ماخذته..
انه شياطين الدنيا كلهه صارت جدامي..الدم كام يفور بجسمي..كمت عليهه جان تكمز من مكانهه راحت يم الباب كمت اصيح واشمر بالعطور..وحده من الشيش طاحت يم رجلهه فتحت الباب وطلعت..انه صرت وره الباب جان تركعهه ركعه..ضربت راسي صرت اشوف الميزتواليت اربعه..كمت ابجي واهلس بشعري..اعصابي رجعت انشدت من جد وجديد احس عضلات جسمي كلهه مشدوده..عبالك واحد جان يركض وهو ما متعود بعدين انشد جسمه..

فتحت الباب والكزاز صار برجلي..كمت ابجي بالزايد .. كعدت ع الباية الاولى طلعت الكزاز بس بقت رجلي تذب دم.. متت خوف..من تمرضت كمت اخاف من الدم..اخاف من الظلمة بحيث صگر من يطفي الضوه العصر مثلا ويريد ينام لازم يبقي البردة مفتوحة علمود يفوت ضوه..وبالليل اصلا لا انه انام ولا هو فتبقى الاضوية مفتوحة..نزلت جوه ورجلي ذبحتني الم باب الصالة مسدود والغرفة مالت اخلاص وخالة همات.. انه شلون ارد اوصف الجنت افكر بي ما اكدر اوصله.. رحت لورة البيت..من باب المطبخ الوراني طلعتله.. اكو جليكان متروس لنصه..فتحت القبق مالته واشتميته..نفط..كمشته وايدي ترجف بشكل مو طبيعي..درته على شعري وايدي.. ملابسي كلشي صار علي نفط..كعدت بالكع وابجي..ادور عيوني كامت تحركني..صار على شفافي واذاني..اختنكت من الريحة وراسي يدك حيل..

طبيت للمطبخ والكع وراي مبلله ودم من رجلية..اخذت الجداحة ورحت وره البيت..ايدي هلكد ما ترجف ماكدرت اشغل الجداحة شمرتهه بعيد عني شوي جان طك..اكو كارتونع حاطين بيهه صوبة قديمة متشتغل..كبت النار بيهه وبالكارتونه.. كمت ابجي بس صوتي ماكو..صوت ماعندي..انصدمت من المنظر ومن الموقف الصرت بي..خفت تهسترت..اعصابي انشدت شد مو طبيعي..دموعي ترست عيوني بحيث كمت اشوف بس غواش احمر وبرتقالي مال نار..رجلية اخذتني لمكان الباب.. صار قريب ع الكارتونة..جنت مخلية شال على رگبتي بس صاير اكثر من نصه بالكع..لاحته النار..بس رمشت جان توصل لنص جتفي..اكلت الشال اكل..شوي والنار صار باطراف الدشداشة مالتي..كمت اكمز وارفع بيهه..صحت بعلو صوتي وابجييي..كل الموقف دقيقه او دقيقتين..

بس حسيته ساعة..شكل النار جدامي وشلون شعلتهه انه بيدي..رفعت راسي صار صگر والحجي بوجهي..وراه خالة واخلاص وجلنار..انه شفت جلنار وتخبلت فوك خبالي.. النار اكلت اطراف الدشداشة وانه اريد اكتل جلنار.. حسيتهه شيطان واكف جدامي..ادور دشداشتي قديفة.. اول ما لاحتهه النار لكفتهه وعليهه نفط..كمت ابجي على حالتي وكامشة الفتحة مال دشداشة : حموت انه..هاااا حمووووت.. شوي وحسيت على مي بارد صار على جسمي كله وريحة الشعواط طبت لخشمي كبل..دنجت راسي ع الدشداشة..طفت النار.. طفتتت بس وره البيت مشتعل وخصوصا المكان المشيت بي.. عاينت على خالة دموعهه بعينهه بس واكفة بالباب ما دخلت.. صگر انخبص خبصة..كام يصيح وعركااان..كام يترس مي ويذب ع الكارتونة..والمكان المشيت بي لحد ما طفت..بين ما طفت النار انه رجلية صارت خيوط..بعد ما اكدر اوكف..

كعدت بالكع يم الطباخ وحاطه ايدي على راسي..اندار علي واجة يمي..سحبني لحضنه..كام يصيح..
صگر : لك لييييش..ليش عايفيهه وحدهه..يمة ليش عفيتهههه يعني شسويلكم..هاااا شسويلكم..منو جاي يمج.. منو كلج سوي هج بروحي..
كمت ابجي وأشر على جلنار : جلنااار..هاي النكسهههه تريد تموتنيييي..اذا ما طلعتهه اموت هلمرة مو احرك روحي.. الله يخليك طلعهه..طلعههههه..
راح عليهه كمشهه من شعرهه ويصيح بوجهه : لج شمسويه بيهههه..انتي بشر لو حيواااان..لج ماكو عقل براسج.. ماكوو ماكلتي بنية صغيرة ومريضة ما اعاديهه..لج شنو من بشر انتي..وداعت دنوة وغلاتهه عندي..بس تصير زينة اخذج لبيت اهلج وبعد كلشي ينتهي..روحي بطريقج الله ومحمد وعلي وياج..هسة مشغول وما اعرف راسي من رجلية..

بس يصفى بالي وانه اعرف شسوي..خليتيهه تحرك روحهه يالمتخافين الله..كون انتي تحتركيييين..
كام يحرك بشعرهه ودفعهه بالكع..كامت تبجي وتتوسل بي : فدوه اروحلك صگر لا تسوي هيج..والله محد يريدني ليش تعوفني بنص الطريق..
صگر : لج شوفتيني الويييل..انتي واخلاص..لوما اختي جان طردتهه مثلج..تكومين من وجهي لا اسحلج سحل بالبيت كله اذا طلعتي بوجهي اسويج وصلتين..لو ما ملحكلهه جان راحت والله اذا صار بيهه شعرايه..اطيح حظج..
جلنار : صگر والرب ما اسويلهه شي بعد..اعتذر شتريد اسويلهه بس لا طردني من البيت..اهلي ميريدوني..
صگر : وطبكم مرررررض..انتي واهلج..لا تشوفيني تهاونت وياج بالبداية..بس هلمرة لا..روحي من وجهي ولا تشوفيني دموعج الجذاااابه..لك انهههه ينضحك علييي..يا عااااار

يمة اخذيهه من جدامي الله يخليج..
كامت تبجي وتتوسل بي توسل والله من يمي استحيت.. هو يصيح يوجهه يكللهه لج ما اريدج ما ارييييدج..روحيييي بس اشوف دربي بعد دقيقة متبقين هنا..انه اسمعهم ورجلي ذبحتني الم..اخلاص اخذت جلنار وراحو مدري وين.. صگر اجه علي شاف الدم جوه رجلي جان يتخبل..
صگر : شنو هاي..شبيهه رجلج..
رفعهه شوي وعكد حاجبه..شالني واخذني فوك..كعدني على حافة الجرباية ورافع رجلي شوي..جاب ملقط من المجر مال كومدي ويطلع الكزاز..كمشته من تشيرته وكل ما يطلع وحده اظافري تصير بجتفة..لأن اشر الاظافر يبين ع القميص .. خلص وراح جاب شاش شد رجلي على كيفة..كل شوي يكلي خوما مضبوب..ارخي بعد لو زين..كتله لا زين..وهاي هج مرت تلث ايام..جلنار واخلاص مشفتهن بعد..

باليوم الرابع كعدت الصبح لكيت صگر نايم ويون..كعدته على كيفي : صگر..شبيك..ضل على نفس وضعيته ماكدر يكوم خفت علي..بس بسبب مرضي ماكدرت اسوي شي..هو انه للحمام ما اروح..ادور اسوي شي ثاني..خليت راسي على صدره..لجهلي وسيطرة المرض علي عبالي مات..ردت اسمع صوت نبضاته..بالبداية ماكو..بعدين سمعتهن..بسته من خده وامسح على شعره..لحد ما كعد وحده..ابتعد عني.. عكدت حاجبي تفاجئت من ردة فعله..
صگر : مريض ومصخن..لا تتقربين ادور تنعدين..
سكتت محجيت شي..نزل جوه بعدين صعد بيده حباية وكبسول وصينية بيهه اكل..وكلني وهو هم اكل..ضل نايم بالفراش اسبوع..ما ادري انه اداري لو هو يداريني.. كلش تعب ينام مصخن ويكعد مصخن..راح جاب دوة بس مديصير يصير زين..يكول فلاونزة هي تروح من وحدهه..

وره هلاسبوع شوي بلش يتحسن..طلعني بالحديقة العصر لحد المغرب يله طبينه..هو يعرفني من اضوج شقصد.. دورات يطلعني بالسيارة دورات بالحديقة..حسب..الفجر كعد وكعدني ياه..غيرلي ملابسي وهو همات..بعدين طلعنه لبغداد.. الطريق كله انه احجي..ها وين تريد تاخذني..تريد تخليلي شي بالاكل انت وهذا الدكتور مدري الدكتورة..لحد ما وصلنه لنفس البيت الكعدنه بي من سويت عملية الناظور..خال صگر..بقينه يمهم للعصر بعدين طلعنه للدكتورة..صگر ضل يسأل بعدين يله وصلنالهه..راد ينزل كمشته من ايده..
دنوة : وين حنروح..خاف تسويلي شي..
صگر : لا متسويلج..انه وياج..
سكتت ونزلنه..شكد عالم جدامنه..بس صگر من كال اسمي والعنوان بالبصرة..كال سراكم بعد ثنين بس.. تقريب الساعة والنص يله اجانه الدور..كل واحد يفوت عدهه يضل نص ساعه اذا مو اكثر..

طبينه جان تبتسملي..كعدت ع الكرسي وصگر جدامي مثل كل مره..بلشت تسألني عن نفسي وعمري..
الدكتورة : اسمج ماما..شكد عمرج..
دنوة : ثنين وعشرين..دنوة محيي..
الدكتورة : حبيبتي دنو..شنو مشكلتج..اعتبريني مثل امج.. هم مو يسولفون لامهم شنو يضوجهم..سولفيلي..
دنوة : دكتورة انه اتخيل واحد يراقبني ويريد يكتلني..لو من اشوف حماتي اتخيلهه هم تريد تموتني..
الدكتورة : زين بعد شنو..تحسين دوخة تقيؤ..
دنوة : اي ادوخ هواي..وراسي يوجعني كل فترة وجع كلش قوي..حتى ردت اضرب راسي بالحايط..
الدكتورة : لا ماما ميصير..هسة نشوف شنو بيج بس وعد توصفيلي شنو تحسين بالضبط..ويامن عايشة انتي..
دنوة : وي رجلي وعيالي..
الدكتورة : انت زوجهه..

صگر : اي دكتورة..
الدكتورة : طيب كملي حبيبتي..
دنوة : احس رجفة ورعشة تمشي بجسمي..اضل ارجف واتعب ودكتورة هواي احجي..تعبت من الحجي..
اندارت على صگر : شنو تحجي..عن شنو..
صگر : تحجي مواقف صايرتلهه كبل بس توجهه لغير شخص لو تكول انت هشكل عشت..لو اختك..وهكذا..
الدكتورة : طيب استريحي هسة..اخذتهه لدكتور قبل هلمرة
صگر : اي اخذتهه لواحد يمنه بالبصرة..
الدكتورة : اكدر اشوفهن اذا جايبهن معاك..
صگر : اي جبتهن لأن صار عدهه استفراغ دموي وتعبت اكثر فاخذتهه لدكتور باطنية..كال هاي النوعية متناسبهه هو انطاني عنوانج الصراحة واجيت..
الدكتورة : اها..هسة اقراهن واشوف مال شنو..

قرتهن واحد واحد حتى مال ارق..جان تنزل النظارة على خشمهه..
الدكتورة : هذا مو علاج..هذا دمار بالنسبة الهه..هي عدهه انهيار عصبي..من اعراضه الرعشة والرجفة..شعور الارتياب ان شخص يراقبهه او يريد يقتلهه..تحجي عن نفسهه بس تجسدهه للشخص المقابيلهه..هذا العلاج مال صرع وفصام .. شجاب مرضهه ع العلاج هذا..لو مستمرة عليه بعد اسابيع يصير بيهه صرع نتيجة التشخيص الخاطئ..
صگر : شنو الحل..هي حتى متنام..
الدكتورة : مع احترامي..بس الدكتور كيف شخص حالتهه بهلشكل..البنت حالتهه جدا متأزمة المفروض تجوني اوكت المريض النفسي يتأخر يله يستقبل العلاج..فما بالك بشخص صارله شهور مريض علاوة على هذا التشخيص والادوية كلهه خطأ..ميصير هيج ماما..

صگر : هو انه اجيت لأن شفت وضعهه ميتحمل بعد ادوية خصوصا مثل ما حجيتلج صار عدهه تقرح هضمي وتأذت عضويا ونفسيا..
الدكتورة : اي نعم..حكتبلهه ادوية وتمارين سويلهيا او ساعدهه حتى تسويهه..هي سوت شي غير عقلاني مؤخرا
صگر : والله اي..جنت مشغول شوي فتركتهه بالغرفة.. رادت تحرك نفسهه بس تلاحكت للموضوع..
الدكتورة : تره وضعهه خطر..ميصير تعوفهه هيج..
سألتني مره لخ منو وياي بالبيت..صگر كللهه مرتي الثانية جان تكول هنا الحجي..ضلت تحاجي وانه بس اسمعلهم .. بعدين بالاخير انطته الرايجته وكلتله من تشتري الادوية ارجعلي اشوفهن واعلمك عليهن..نزلنه للصيدلية جوه اخذ الادوية ما ركزت حيل وي السعر شكد بس بالثمانين اذا مو تسعين..

اشتراهن ورجعنه للعيادة..طلع المريض جدامنه وطبينه احنه كعدت تعلم صگر على موعد العلاج وشلون ينطينياه.. هو مركز وياهه حييل..عبالك الموضوع يخصه اله مو انه..
صگر : دكتورة اذا تحسنت يحتاج ارجعلج لو هاهية..
الدكتورة : اي ضروري..علمود اشوف مستوى تحسن حالتهه اذا لاحظت شفاء تام نقطع العلاج نهائيا..واذا بعد عدهه نوبات مرض مشابهة لمرضهه نبدي نقلل الكمية لحتى ينقطع نهائيا بعدهه..يعني بالتدريج..ان شاء الله عدهه العافية ودير بالك عليهه..بعدهه شابة حرامات يضيع عمرهه بالامراض النفسية..
صگر : مشكور منج ان شاء الله يصير كلشي حسب المكتوب
تشكر منهه وطلعنه..نزل اشترالي اكل وجم قطعة حلويات كال اكلي شي من الظهر ما مخليه شي بحلكج..

اكلت بالسيارة بعدين ضل يفرني بالسيارة لحد ما صارت الدنيا بين المغرب والليل جان نرجع لبيت خال صگر..انطاني العلاج بثمانية تقريبا..لحد العشرة حسيت صار هدوء براسي واعصابي رخت..فضليت كاعدة يم صگر وهو كاعد يمهم بالصالة..للدعش ونعست..

حس علي واخذني للغرفة مددني وتمدد يمي..ضل يقره على راسي..صوته شكد هادئ ومريح من يقره قرآن..يجبر الواحد ينام..وانه منا نعسانة وتعبانة من الطريق..فدقايق ونمت..

طلعت من الغرفة بدون حذاء..ورجلي توجعني وجع مو طبيعي عبالك بيهه ابر..شعري مكفش والشال محطوط على رگبتي مثل واحد يريد يخنكني بس فكيت روحي منه..عاينت للصالة تصفر صفر..محد اكو..كلهم نايمين..فتحت الباب البراني وطلعت اركض والتفت وراي..ضليت اركض ومرجعة راسي ليوره لحد ما حسيت بضربه قوية على بطني.....

يتبـــــــــــــــع......................

بنات اليوم كان عندي امتحان فماكدرت انشر بالوقت المناسب انطوني مجال يعني قابل اني ماكلتكم..وعدتكم بين يوم ويوم والتزام برمضان ، عموما راعوني شويه يعني ، بوساتي للكل💙..