رواية اسألي عني الليالي الفصل الثاني والعشرون 22 - بقلم رقية جاسم

قناة التليگرام

حساب الانستگرام

الـبـارت الـواحـد والـعـشـرون..............

خنگني المكان..ماادري شلون مشى الوكت واخذت عارف وامه رجعتهم للبيت وطلعت لبيتنا..لكيت امي تحوم علي.. اجت باستني وتحاچيني..
الحجية : شونك حبيبي يمة لاتخوفني عليك..وين چنت..
رائد : لاتخافين ماكو شي..ام عارف متخربطة ورحتله..
الحجية : يله حبوبي تعال فوت صبيتلك اكل ماماكل من البارحة عمت عيني..
رائد : اسم الله لاتحچين هيج..
مشيت وياها للمطبخ تغديت.. يومين والتحقت ..

معاملة البيت مشوها بفلوس وخلصت..اجاني عمي محيي لبغداد.. انطاني الفلوس مشدودة وبعلاگة سودة ..
محيي : هاي نص المبلغ..صح مااطيقك بس ماافرط بدمك.. النص الثاني خليته بالبنك..
رائد : مشكور ماقصرت.. اخذتهن وضميتهن بالچكمچة.. خلاخلص دوامي وارجع اسدد..

قفلت السيارة ونزلت.. رحت للقاعدة دربت الجنود وياي بعد چم ضابط وعريف .. شوي نسيت مااجه ببالي شي چي تعبان.. هلكت روحي بهالفترة..بس ميخالف..اريد انسى.. التلفون قافله مافتحته الا لمن خلص دوامي..طبيت بدلت واخذت السويچ وطلعت للبصرة..فتحت التلفون لكيت امي وابوي مخابريني.. هو منو يضل باله علي غيرهم ..رجعت خابرت امي گتلها بالطريق انه..

وگفت بدربونة طلعت الفلوس حسبت منهن سبع ملايين ورحت لبيت خالي..دگيت الباب طلعتلي جوان مبتسمة.. سلمت وفتت..
رائد : خالي هنا..
جوان : اي هسه اجه..
رائد : خوش.. طبيت جوه ضيفوني..كعدت خليت الفلوس ع الطبلة : هذا الدين خالو..حسبه تأكد منه..
محسن : لا يابة قابل اني اشكك بيك..حشاك..
رائد : الله يسلمك.. حروح هسه وراي درب ..
محسن : وين رايح.. بات عدنا حتغيم الشمس..
رائد : لا مااريد اطول تعبان والله..
ترخصت منهم وطلعت للبيت.. وصلت المغرب ..لكيت امي مجهزتلي الاكل والهدوم..كعدت اكل بس كلشي مابي طعم.. مدااحس اكو اكل بحلگي..

خلت ايدها على ايدي : ها يوم شونك حبيبي..
رائد : زين الحمدلله لايضل بالج..
الحجية : يمة ليش مانازع الحلقة..مايصير البت ماتتوفق بحياتها بعد..
رائد : ناسيها يمة مو بالقصد.. نزعتها خليتها ع الميز وكمت للغرفة اخذت الهدوم سبحت.. اوووف يابة گلبي غادي نار.. اريد تطفى هالنار هلكتني.. شسوي مااعرف ..

رحت تمددت ونمت.. گعدت بالليل على حركات امي بالغرفة دترتب بالكنتور مدري شنو..راحت سدت الباب واجت يمي..
عاينتلها مستغرب : حجية شبيج تحومين وراي شكو..
الحجية : اي ييمة غير خايفة عليك..دشوف روحك لاتحچي لاتكول.. هو انت ماتحچي اصلا بس هسه فد دور.. يوم افتحلي گلبك لاتكتم موزين عليك..
عاينتلها وبگلبي اكول عندي هواي حچي..خليت راسي على رجلها كامت تمسح على شعري وتسألني..
الحجية : خابرني خالك محسن..كال دفع الدين..صدك..
رائد : اي..
الحجية : منيلك يمة..
رائد : اجه محيي انطاني فلوس البيت..شوف باچر لو عكبة اسدد الباقين..
الحجية : اي يالله تخلص من هذا الحمل..
رائد : اي والله دمار..
ضليت ع الوضعية هاي ماادري شكثر بس جسمي منتهي من التعب..فرجعت نمت..

دنوة .....

بالليل كمت للحمام بدلت ورجعت..لگيته ديگلب بالتلفزيون ويمه صينية مال اكل..اكلت شوي واخذت الدوة ورحت نمت..

كعدت الصبح لگيته واكف ومنطيني ظهره ديخابر.. سويت روحي نايمة بس دااسمع..
عقيل : تره مو وكتج روحي لاتنگرين براسي..هسه مخابرتني تگليلي هيج.. ديله بله ..اگلج لاتسودنيني انگلعي..

معقولة هاي روان..هو يحبها شلون هيج يحچي وياها.. عفية الزلم ولا ينحزرون..
حركت روحي بالفراش حسيت بوجع نفس البارحة.. شوكت يروح تعبت..هو حس علي گاعدة..اندارلي ويعاينلي بقلق وخوف.. كعد يمي ..
عقيل : شونج اليوم..
عاينتله وحركت راسي بمعنى موزينة..باس راسي وخدي ويعتذرلي..سكتت ماجاوبته..ساعدني اگوم ومتچيني على صدره..ايدي محاوطة ظهره..مشاني للحمام .. دفعته من صدره واغمض وافتح بالگوة : روح شكرا..
عقيل : مثل ماتردين..

طبيت غسلت وغيرت هدومي وطلعت..لبست شال ونزلنا نتريك.. خواته هنا مكيفات بي..خوانه همات..چا شبيه انه مامكيفة.. اريد بس ابچي.. صبحت عليهم ورحت كعدت بالديوانية يم عقيل..بدوا يجيبون الاكل ودخلوا مهران وصلاح اخو عقيل الثاني.. مستحية اعاين بوجه أحد بعد الحچي الصار البارحة.. بس كاعدة ومااريد اتحرك علمود محد ينتبه على بطؤ حركاتي.. تريگت هيج من لاچارة مااشتهي بس علمود الدوة.. كملت بالبداية وگمت للمطبخ كعدت ع الكرسي وحاضنة ايدي بإتجاه بطني دتلويني..حسيت على ايد مرية تخلت على چتفي.. رفعت راسي شفتها امه ..بس تعاينلي بنظرات حادة
ام عقيل : كافي تنعوص..مو تزوجنا شو ماسوينا هيج..
دنوة : خالة والله دتوجعني ليش ماتصدكين..
ام عقيل : گومي لاتمشين هيج جدام خوانه شيكولون علي..
عيوني دمعت من كلامها شلون واگفتله وهو كله غلط من فوك ليجوه..

دنوة : بس هو أذاني..
دارت وجهها وتحچي من خشمها : هاي عودك ابوج بس يطگج ومبهذلج وهيج تدلعين علينا..لو مدللج شتسوين بينا..
عفتها ورحت كعدت وي حنين وبراء..بس كاعدة ماحچيت..

هيج مرت الأيام..مرته ماسمعت عنها شي شكلها اطول يله تجي.. ام عقيل حقيرة وياي ..چن انه أذيت روحي هيج مو ابنها..بس اسكت مااريد مشاكل..الخطاطير مايخلصون.. كلساع جايين جماعة..يا خوات عمتي يا صحبان عقيل.. يعني هواي ناس.. صحتي بدت تتحسن والوجع خف..

بيوم چنت كاعدة جوة مسوين عصرونية..اكلت شوي وترخصت منهم..صعدت فوك لكيت باكيت تلفون ع الميزتواليت.. تركته گلت خاف مالته ادور يصيح علي.. دقايق وفات هو وينزع القميص..بلعت ريگي..استغفرالله..
وگف وراي وحضني..همس : التلفون الج..
دنوة : شكرا..عبالي مالتك..
ابتعد وراح ع الكنتور يبدل..هستوه جاي من الشغل.. عاينت لجسمه بالمراية.. تارس بس عنده كرش صغير..ولو مااشوفه ياكل هواي..

فتحت الباكيت خليت السيمكارت بي وتمددت العب هاي لعبة الحية.. حياتي مملة وباردة .. اجه كعد يمي ويتفرج ع التلفزيون.. حسيت علي نصاه وتقرب مني يشم بشعري وإيده تقربني لصدره..

همس : انطيني فرصة وسامحيني على ذاك اليوم..
درت وجهي وجسمي رجف : مااكدر انطيني مجال.. مديروح من بالي المنظر..
تنهد وابتعد..
وره يومين بهالحدود..طلعت من الحمام سابحة ولافة شعري بالخاولي..سمعت صوت التلفون يدك..رحت شلته لكيتها سرور.. فرحت وجاوبتها ..

حچينا بعدين كالت امي تريد تحاچيج..انطتهيا وحچت وياي..
ابتسام : ها ماماتي شونج حبيبتي..
دنوة : زينة خالة..انتي شلونج..
ابتسام : الحمدلله اسأل عنج..خلصتي علاجج..اكو تحسن..
دنوة : خلص اليوم..اي زينة احسن من أول بداية..
حسيتها تحركت وغيرت مكانها صار هدوء اكثر.. : ماما خابرتج اريد احاچيج بشغلة..وانتي كبرتي بعد المفروض تفهميني..
دنوة : شنو هي..
ابتسام : رائد..خالة تعرفين النسوان شون يگرگن مايسكتن.. على كلشي لازم يحچن.. منا رجلج ماخذج بالغصب ومنا انتي ضايجة..تدرين شيگولن..
دنوة : شيگولن..
ابتسام : بعدها تحب خطيبها وماطاوعت زلمتها فمن حگه ياخذها غصب..
شهگت بخوف : بس موهيج خالة ليش تخليهن يحچن..
ابتسام : اعرف..ليش چا ماادري بيج شني..وحاچيتهن.. بس هي المرة تنكمش بعد.. سمعيني حبيبة..هذا رجلج بعد ماكو غيره..الدنيا قسمة ونصيب ييمة موكلشي نحصله..هو الزلمة ماقصر وكلشي سوى بس ربج ماكاتبها..

كلامها جرحني لواقعيته وصحته..مو لأن غلط.. بس گلبي مديقبل يقتنع..حتى عقلي..خصوصا بعد الموقف الاول الصار بيناتنا انه وعقيل..صار مثل الصدمة الي..غدير وبراء لمن حاچوني گلولي وجع خفيف ويروح ماطول هو حباب وياج.. جاوبتها بصوت مخنوگ : خالة بعدني احبه.. شسوي..
ابتسام : اوف يخالة شبيدي عليج..بس حرام ييمة.. فكري بالحرام والحلال..عوفي گليبج مايفيد هذا اعمى..
دنوة : احاول.. حروح هسه خالة..سلميلي على نوارة..
ابتسام : واصل حبيبتي..الله وياج..

سديته منها جان تنفتح الباب بقوة انرگعت بالحايط.. فات عقيل عصبي..اخذ التلفون مني وضاغط على زندي حيل.. بچيت واحاول افك ايده..
عاط بيه : ويامن جنتي تحجين..
دنوة : خالة ابتسام..والله خالة..بس وخر ايدك..
شمر التلفون وعاينلي بخزرة فاتح عيونه على وسعهن : تحبينه موووو..
رجفت وراسي افتر : منو..احب منو..
ضربني راشدي وجر شعري هو والخاولي..مد ايده قفل الباب ودفعني ع الچرباية.. ردت اكوم صار فوگاي ويضرب بيه راشديات ويفشر : گح....بكد القندرة تحبي وتردي.. چا انه شني.. طرطور ..
دنوة : اسفة والله مااعيدها عقيل..مااحچي بعد..

جر إذني وسد حلگي : هسه اشوفج شون تحبينه..
شگ الدشداشة علي وهجم بطريقة وحشية ومقرفة.. ينهش لحمي ويتلذذ بهالشي..يفشر وساد حلگي..حركاته مؤذية.. خلاني اسوي شغلات غصبا عني..لعبت روحي ردت اتقيء وكامشني حيل مثبتي جدامه..ضعف وجع ذاك اليوم حسيته بهاللحظات..ياربي دخيلك شجاني وحچيت.. جنت ساكتة.. عيوني تريد تطلع من مكانها وي كل حركة يسويها.. صوتي وقوتي لاشيء جدامه..

گام مني وجر شعري : اذا سمعت الصار هسه طالع بره الغرفة اخلص عليج..انطيتج مجال بس ماتستاهلين..
ماجاوبت بس دموعي تنزل واشهك ..رجع صاح وكال فهمتي.. حركت راسي بالموافقة..شمرني ع الچرباية ووگف يدگم القميص والبنطرون..عافني وراح..

كمت استر بروحي وألفلف جسمي بالغطوة..بطني رجعت توجعني..جسمي مشلول ويصرخ من الألم..تمددت ومغطية روحي اريد ادفى كمت ارجف..جريت الشريط المسكن اخذت ثنين وبداخلي أندب حظي الاگشر..من الحبايات دخت ونمت.. تمنيت يطلع كابوس واكعد مابيه شي.. بس كعدت عظامي كلها تون وعيوني تحرگني من البچي.. كمت شلون ماجان لبست شي وذبيت الدشداشة هاي..طبيت سبحت واشوف جسمي مزورگ..لبست بالعجل مانطاني گلبي اشوف شي بعد..لعبانة روحي من الصار والموقف الخلاني بي..

لبست شال ونزلت ماصعدت .. خبزنا للعشة بس بالگوة ساكتة مااريد احچي ادور يكولون شكو وتبدي الاستفسارات.. بين ما خلصنا سمعت صوته فات للبيت وي صلاح.. صبينا الأكل وكعدنا.. رحت كعدت يم عمي خفت من عقيل ..
بنص الاكل حچت امه : شو هناك كاعدة..تعاي كعدي يم زلمتج..
كمت واستغفر بداخلي اريد يعدي هاليوم على خير.. كعدت يمه حتى نفسيتي انسدت للأكل.. مشى اليوم بطلاع الروح.. بالليل ماصعدت فوك للوحدة ..فتحت الباب على كيف لكيته نايم.. اخذت نفس براحة ورحت نمت ع القنفة..

مر اسبوع ماكو شي..كل يوم اتأخر يله اصعد انام.. اخاف اشوفه كاعد..بعد اكثر من السواه شيسوي.. وره هالأسبوع واگفة وره البيت دنخبز واسمع صوت وحدة تبچي وتصيح وين عقيل.. گلت هاي مرته ..
ام عقيل : شعندج صافنة..كومي خابري عقيل شوفي وين..
دنوة : اي هسه..
گمت صعدت فوك دگيت علي..ماجاوبني..هذا شبي..وهاي البنية منو اصلا..

عدلت الشال ونزلت..شفتها واگفة بالصالة الچبيرة وعقيل يمها.. ماشايفتها ابد ..كامشة بيدها طفل صغير يطلع عمره سنة هيج..
كاظم بصياح : شني هاي عقيل..
عقيل : بوية مرتي هاي..وهذا ابني اكرم..
عمي عيوني نطت من مكانها : شني شني..ماسمعتك.. مريتك شنهو..شدتسولف..
عقيل : اي وداعتك بوية..بس عقد سيد مو محكمة..
كاظم : هاااا..چا همزين عرفنا.. فد دور بعد سنة يله نعرف احسن.. عليمن ساكت اذا عندك وليد واشوفنه موصغيرون.. من يمتى هالحچي..
عقيل : صار سنتين..شني حرام شمسوي..
كاظم : لا يبوي مو حرام..ماطوله من صلبك البيت بيته اله ولأمه..

عاينتلهم وفاكة حلگي بتفاجؤ..ردت ابچي بنص الهوسة هاي.. اخذني علمود الخلفة بعدين طلع مخلف اصلا.. صوچ ابوي.. اووف گلبي يوجعني..
دار وجهه علي ويعاينلي بخزرة.. صديت عنه وطبيت للمطبخ ألهي روحي بشي..اكول لأبوي اكيد مايقبل..هسه يگله ليش اخذتها چا ويطلگني.. شواي واجه هو ومهران.. مهران اخذ كيك من الثلاجة وقواطي ببسي گال صحبانه جايين وطلع.. تقرب مني عقيل كمشني من زندي..
عقيل : رفعي راسج احاجيج..
رفعت راسي بدون مااحچي..
عقيل : ابوج يدري..مايحتاج تگليله..
فكيت عيوني مصدومة وشهگت..كمت اگح غصيت بالهوى واحچي : شنووو..يدري..لاتچذب..

عقيل : والله يدري..خابرينه اذا تردين..
خزرته وبچيت..دفعته من صدره : انت نذل وحقير.. لعبانة روحي منك اكرهك والله اكرهك..عندك نسوان ثنين ليش تاخذني..
جر ايدي بقوة خلاها وره ظهري وجرني علي : لعبانة روحج.. لج مو اخليج صدك تلعب روحج..امشي ولي سويلي اكل صعدي فوك مااريد اكل هنا..
دنوة : مااسوي..
جرني اقوى حسيت ايدي حتطگ : اي اي حسوي والله بس وخر..
عافني وراح..

غسلت وجهي ووكفت اسوي عشه انه وحنين..امه واكفة وتتنعوص على راسي..عقيل مايحب هيج.. سويله من هذا .. لاتخلين هواي زيت..ردت اگللها تعاي انتي سوي احسن.. سكتت بس اسمع لحدما كملت وصبيتلهم..اخذت لعقيل وصعدت فوك..لگيته كاعد ع القنفة ويمه باكيت جگاير.. تذكرت رائد شكد چان يدخن..نصيت راسي وجبته يمه.. عفته ردت انزل
صاح : وين نازلة..
دنوة : اتعشه غير..
عقيل : تعاي اكلي هنا..لاتنزلين..
رحت كعدت من الجهة اللخ بس اتفرج ع التلفزيون مااكلت.. هو مامهتم حتى ماسألني..بعد احسن..

كمل واخذته نزلت جوه..ضليت گاعدة وي حنين نتفرج ع التلفزيون.. اشوفها اكبر مني ومامتزوجة ..ليش انه هيج صار بيه..كلما احاول انسى ارجع اتذكر..ماادري شسوي.. رائد ماكل گلبي..شكد مشتاقة اشوفه واسولف وياه.. اشوف عيونه شلون يعاينلي بهلفة ولمعة..كلشي بارد وصامت يم عقيل.. ماكو ذرة احساس بداخلي تتحرك تجاهه..خصوصا هو كلش يأذي ويجرح بكلام وفعل فماكو طريقة يكسبني بيها..

سمعت من عمتي باچر حيجون جدي وعمامي وابوي علمود يشوفون ابن عقيل..يعني لازم اكعد من الصبح..

ضليت اتفرج لحدما خلصت الحلقة وگمت للمطبخ اغسل الگلاصات.. سمعت صوت صلاح يم الباب يخابر ..
صلاح : لا مااروح بعد يمعود تريد تبليني..ماادخل.. بوية شربته للسم مرة وهاهيه شني كلساع..اي گللها صلاح مايجي بعد..قابل كفيل بيها..والله حلوة.. يله روح انه همات اريد انام.. الله وياك ..

رأسا اندارلي..سويت روحي مو يمه..اجه كعد ع الكرسي..
صلاح : شتدرسين انتي..
دنوة : سادس ادبي..
صلاح : هااا.. خوية صبيلي شي من العشة ماتعشيت..
دنوة : اي هسه..
صبيتله ومنصية راسي مستحية منه مااعرفه..خليته ع الميز وصعدت.. كلت هسه نايم ..تفاجئت اول مافتحت الباب صار بوجهي وابنه بيده..
نصى صار بمستوى إذاني : حضريلي روحج بين ما أودي اكرم..
اشوفه شلون يعاينلي بنظرات مقرفة..ولو هو زوجي على سنة الله ورسوله بس احسه يستغلني وطمعان بيه..

عافني وراح..ضليت أحوم بالغرفة مااكدر اطاوعه مستحية.. تمددت وغطيت روحي كلت يشوفني هيج يكول نامت ويروح.. شو هذا ماكو دقايق واجه شال الغطى مني وجرني من ايدي : لاتضوجيني گومي..
دنوة : بس مامستعدة..وتعبانة..
عاط : ادبسز صار اسبوع مامتقربلج..گومي يله..
فزيت منه وگمت مسيرة غير مخيرة..شمسوية بحياتي والله ذبني يم عقيل.. اخذت هدوم ورحت للحمام بدلت.. لبست الدشداشة فوگاهن وتمشيت للغرفة كلشي بيه يرجف وخايفة تنعاد ذيج الليلة..
فتحت الباب وطبيت..رفعلي حاجبه : مالبستي..
دنوة : لبست بس انطيني مجال فدوه..
ضل يستغفر ويفرك بوجهه..شفته اندار ديبدل..نزعت الدشداشة وطبيت جوه الغطى..

راح طفى الضوة بقى بس مالت التيبل لامب..تقرب مني ويشم بشعري..يبوسني ويقربني اله بكل حركة اريد انفر منه مااكدر .. ولو بهاللحظات حسيت بحنان وهدوء بتصرفاته بس ضليت ادفع بي..
كمش ايدي وحچه بهمس : اريدج برضاتج..
صح صعبة علي .. بس مصيري انتهى هنا ..بعد ماعندي غير هالغرفة والبيت وعقيل..حچيت بصوت ناصي : اذا ماكدرت تبتعد عني..
حرك راسه يعني اي..بدا يتقرب بهدوء اكثر وكلشي جان مختلف ..شفت عقيل ثاني ماشفته حتى بأول ليلة.. ماادري شنو الخلاه يتغير هيج.. وره مااعرف شكد ابتعد عني .. باس خدي وتغطى.. جريت الدشداشة لبستها ونمت ..

ثاني يوم كعدت الصبح سبحت ونزلت جوه وياهم احضر الريوك..سمعت صوت الباب الخارجية انفتحت يعني اجوي.. كملنا وصبينا..اجه اكرم شافوه كلهم بس مرته مااجت.. اعاينل لأبوي شلون ماعنده أي ردة فعل..عادي كاعد وساكت.. باركله وشبگه..لو رائد چا ماعنده مانع يخلي طلقة براسه.. چن كلشي يم رائد حرام ولعقيل حلال..

شلنا الاكل وطبيت اغسل مواعين..شواي واسمع صوت جدي يگول وين دنيوة.. غسلت ايدي ورحتله ..فتحلي ايده وابتسملي.. رحت حضنته واتذكر شلون دللني ..
باس راسي ويعدل بشالي : شونج جدو..مرتاحة..
عاينت بعيونه وادري اذا كلت لا محيصير شي : اي جدو مرتاحة.. جدة ليش مااجت ..
شامخ : امس شفتها تعبة مالها حيل..گتلها لاتجين باچر.. شوف چم يوم ومريله مايكول شي..
دنوة : ليش شبيها اسم الله..
شامخ : مابيها شي بوية..شني بشر مايتعب..
دنوة : لا يتعب جدو شبيك حبيبي..
ضحك وترخص كال حروح ..ودعته وطبيت اكمل..

اجت مرته واشوفها لابسة دشداشة حصر..هي سمينة جسمها بارز.. انه بنية واستحيت ..درت وجهي مااهتميت.. اجت يمي تعاينلي بطرف عينها وصوت العلچ يطك براسي..
احسها متقصدة تعلچ بإذاني..انداريتلها : عفية شنو هالازعاج.. دكافي ..
- : انه..ليش شمسوية عيني..
دنوة : دتعلچين بإذاني..
- : ها اعتذر مااقصد..
عافتني واندارت تضحك..بالصدفة فات عقيل شايل اكرم.. راحت يمه تتلوگله واسمع صوتها : ها حبيبي خوما تعبك كرومي..
عقيل : لا عادي..بالعكس متونس علي.. شلابسة انتي..
- : شلابسة ليش..
عقيل : گومي لبسي غيرهن شني هاي..ابوي وخواني هنا.. ماكو احترام..
- : ليش حبيبي انه مو ألبس هيج دائما..شنو التغير..
عقيل : بوية چنتي ببيت اهلج..هسه انتي ببيت ابوي.. يعني مو بس انه اشوفج..گومي بدلي يله بالعجل گبل لا اطلع للشغل..
- : حاضر هسه ابدل..

اسمعهم وبداخلي اگول شلون اله نفس بأكثر من وحدة.. وانه لمن عرفت هاي مرته ردت اتقيء..فوك روان ادور هاي.. اجه وگف يمي ومنتچي ع الكاونتر : اليوم تجي خالتج وبناتها..
دنوة : صدك..شمدريك..
عقيل : ابوج گال..طلع مستعجل فگلي خبرها..
دنوة : يله همزين..
عقيل : عوفي من ايدج صعدي فوك حضريلي هدم ارد اروح للشغل..
غسلت ايدي وصعدت فوك..طلعتله هدوم دااريد اطلع صار بوجهي ..سحبني اله وإبهامه يمشي على شفايفي.. هذا شبي مدااتحمل..

دفعته : عقيل شبيك عندي شغل..
ثبتني وايده ترفع الردان بنفس ذاك اليوم..كل ذكرياتي وي عقيل مشؤومة..سكتت ماردت ابين الضعف ..
گال بهمس : ليلة البارحة مدتطلع من راسي..شني انتي.. بوية والله تشعليني بس تعاينيلي..
دنوة : ياااا..انت صدك ماتستحي مو وكت هالحچي..

طلعت بالعجل حتى ماخليته يحچي..مايحبني ولا يريدني حتى..بس بالليل اشوفه العاشق الولهان علمود جسمي.. تعبت مدااگدر اتخلص من هالتفكير..ساعات اكول مااريد أظلمه خاف بساعة شيطان وهيج يگلي ويفكر..بعدين اسحب كلامي بمثل هيج موقف..

التهيت بالشغل لحد العصر اندگت الباب طلعت افتحها.. خالتي والبنات..ابتسمت والدمعة بعيوني على ايام چنت اروحلهم براحتي وارجع..حضنتهم وبوستهم بعدين طبينا.. گعدوا بالاستقبال واجت عمتي كعدت وياهم..رحت عصاير وقدمتلهم.. لهناك چان تجي وفاء ..مرة عقيل..
خالتي عاينتلي متفاجئة : ماعرفتينا..
وفاء : زوجة عقيل الثانية خالة..
خالتي ضلت تنطي الوان حتى ماجاوبتها..ادور اجه اكرم فهي من شكله عرفته ابنه..البنات ساكتات بس اشوف عيونهن تعاينلي بحسرة.. مو اكبر من الحسرة البگلبي.. كلشي بهالوكت يذكرني برائد..حتى البنات..

ردت احاچيهن على صفحة..خوما اخذهن تلاثتهن..بس دنيا اقرب وحدة الي.. اجيت كعدت يمها : تعاي وياي اشوفج شي..
دنيا : اي يله وين..
دنوة : فوك بغرفتي..
دنيا : خاف زوجج هنا..
دنوة : لا بالشغل هسه..گومي لاتخافين..
گامت هي وتعدل بقميصها..صعدنا فوك..ضلت تتفرج ع الغرفة وتحاچيني : ولج كلش حلوة الغرفة وضخمة..

سكتت ماجاوبتها..كعدت ع الچرباية..اندارتلي وچنها حست بيه..اجت يمي كمشت ايدي : بس كون انتي مرتاحة.. مايهم البيت والكعدة..
عاينتلها وتذكرت لمن جابتلي التلفون كالت رائد يريد يحاچيج.. جنت مستحية منه ومااحچي..بچيت وشبگتها..
دنوة : علميني شسوي دنيا..
دنيا : اسم الله شبيج حبيبتي..شكو ياستار..
دنوة : رائد ..بعدني اتذكره.. شلونه هسه ماتعرفين عنه شي.. اووف شسوي بس گليلي..ولج عقيل واحد ....
سكتت..
رفعت راسي وعيونها بيها خوف : شبي..
دنوة : هيج ..مابي شي.. حلا شوكت تزوج..
دنيا : بعد مو هسه..شبيج انتي احچيلي..
تنهدت وحچيتلها من لمن تزوجنا وشلون اخذني غصب.. چنت محتاجة احجي..لأي شخص بس المهم احچي..

مسحت دموعي ونظراتها جدية : ليش هيج نذل هذا.. متگولين لابوج يتحرك..
دنوة : هو يدري بس ماسوه شي..
دنيا : اووف ولج شنو من بشر عفية..هسه هم احچي وعيب ابوج مهما صار..
دنوة : عوفينا من ابوي..دنيا اريد اعرف خبر عن رائد.. احبه مدااگدر اتحكم بتفكيري..
دنيا : لا حبيبي مايصير..حرام انتي مرة متزوجة هسه.. هو رائد هم حيحاول ينساج..فتحي صفحة جديدة عسى ولعل تكون بداية لشي حلو..
دنوة : رائد ماكو منه دنيا..لا عقيل ولا غيره..
دنيا : ماشي نكول ماكو منه..بس شنو تضلين هيج تذكري وماعايشة حياتج.. انسي وديري بالج من عقيل لايعرف ادور يسويلج شي..

سكتت بس اسمعلها وبگلبي اتمنى بلكت يزل لسانها وتجيب اسمه.. شكد مشتاقتله ..بس اشوفه مااحچي بس شوفة.. اووف شكد صعبة هاي صعبة..

دنيا : هسه انتي خبصتيني برائد..بس ماكتيلي هاي وفاء مدري منو شجابها هنا..انه اعرف روان..هاي نفسها لو شنو السالفة..
دنوة : لا هاي مرته اللخ..بس متزوجها عقد سيد وهذا ابنه اكرم اسمه..
فكت عيونها متفاجئة : هذا شنو من بشر عفية..الله يساعدج حبي..خوما تضوجين بعد الغيرة هاي غريزة..
دنوة : لا مااغار..عليمن عود..
دنيا : ولج حتلو ماتحبينه بس يعني شي بداخلج..
دنوة : مااغار اگلج والله..اتمنى مايجيني ويضل يمها هي وابنها..
دنيا : اوف الله يكون بعونج..گومي خلننزل جوة..
مسحت دموعي ونزلت..ضلوا كاعدين عدنا تقريب النص ساعة بعدين طلعوا..

طبيت للهول اعدل القنفات..مااحس غير بإيد عمتي جرتني عليها وخازرتني..
ام عقيل : شعندج اخذتي بت خالتج وحيدچن..
دنوة : شوفتها الغرفة..جانت تريد تشوفها..
ام عقيل : شفتينا سود عبالج هنود..تره كلشي اعرف وكلشي يوصلني فهمتي لج..امشي ولي وبعد اذا اجانا خطار تكرصين بمكانج وماتگومين..اذا سمعت كلمة شينة طالعة على وليدي ماتتخيلين شسوي بيج..
دنوة : انتي فاهمة غلط..ماعندي هيج شي..
عتت ايدي وراحت..

وانه اگول عقيل عليمن طالع..طلعت العينتين منطيته جيناتها.. مشى اليوم عادي..عقيل مااجه العصر.. فبالليل يجي گال عنده شغل.. المغرب دنحضر للعشة ..
عمتي صاحت : اگلج هي..
دنوة : انه..
ام عقيل : وجعا..اي انتي..گومي جيبي التلفون من غرفتي.. اريدن اخابر خيتي..
دنوة : اي هسه..

عفتها ورحت للغرفة..هستوني دااطلع واسمع صوت صلاح.. چنه يحجي بنفس الموضوع الحچه بي ذاك اليوم.. همات يكول انه موكفيل بيها..حضرني موقف سالم وعصام.. خاف اكول ادور تصير مشكلة.. لا معليه معليه ..خلاسكت ماادخل.. تانيته يروح يله طلعت..خاف يكول چانت تصنط علي.. انطيته لعمتي وكملت شغلي.. ضليت اشتغل بالبيت ..اجوي جماعة على عمي كاظم رايدي بشغلة علمود محلاتهم.. يردون يطلعون من المحلات وابو الملك فارض عليهم إيجار غالي ماادري ماليش.. يعني سالفة باطلة ..فهو بحكم ابن الشيخ الچبير اكيد اله خبره من ابوه..فقبل على باچر يروح وياهم يفضونها..

بالليل كلش كملت شغلي وصعدت فوك..صارت بالدعش ونص مااجه..بعد شواي ويصير الشارع هندس محد يطلع.. فخابرته..
رأسا شاله : الو..
دنوة : ها..اشو تأخرت..
عقيل : هسه جاي..مو گتلج اتأخر..
دنوة : اي بس يعني..
عقيل : يله مااطول..
: ماشي... سديته ورحت بدلت هدومي صار بيهن ريحة اكل.. ضليت انتظره مااجه..شبي هذا وين راح.. لبست شال ونزلت جوة لگيت عمتي كاعدة وتحوم علي..

شو هاي اول ماشافتني خزرتني وعاطت بيه : انتي وجه الفگر.. ابني ماادري وينه ..
دنوة : انه شعليه خالة..
ام عقيل : لا عليج..چان مايتأخر اندري شصارله..
دنوة : مو خابرته گال بالطريق..
عافتني وراحت مدري وين..هي راحت وسمعت صوت الباب انفتحت وفاتت السيارة..رحت طلعت شفته عقيل.. ضليت واگفة يم الباب ..طفاها واجه يمي.. عاينتله مستغربة : هاي شنو الريحة ..
مد ايده انطاني علاگة : ياريحة..
دنوة : ماادري.. شنو هذا ..شارب..
شمر العلاگة علي وصعد فوك رأسا.. اجت عمتي شافتني بالباب گالت : ها اجه.. وينه..
دنوة : اي صعد فوك..
خلت ايدها على راسها وتگول الحمدلله ربي..راحت لغرفتها.. عفتها وصعدت فوك..

لگيته كاعد على طرف الچرباية ونازع التشيرت.. رفع راسه عيونه حمر دم شكله مطفي..
عقيل : قفلي الباب وتعاي..
خفت منه..قفلت الباب ووگفت يمها مارحتله..كام من مكانه ويترنح يمنى ويسرى..جر شالي شمره بالگع.. صديت عنه ودفعته بقرف : عقيل شنو هالريحة عفية مااتحمل..
كمشني من شعري قربني لوجهه وانفاسه بوجهي : امشي وياي للچرباية..
دنوة : بس انت....
قاطعني : اشش لابس ولامس..يله اريدج وهسه..

مشيت وياه خفت يكتلني..ولاحسيت بشعور غير بالقرف.. ريحته ووضعه..يفشر ويوجع .. لو اكو شي يجي بيدي چا سويته..بس عيوني مدمعة على وضعي المنحدر بسبب ابوي..

ابتعد عني وراح ينام..جريت الغطى واعاينله بغيظ واشمئزاز .. گمت للحمام سبحت رأسا ورجعت نمت..

كعدت الصبح لگيته كاعد ومغير هدومه..اجه وگف جدامي ..
حچه بدون مقدمات : مااريد احد يعرف شارب..فلاتحچين .. ديربالج..
دنوة : لا مااحچي..بس انت تشرب صدك..
عقيل : اي صار تلث سنين اربعة..
سكتت شريد احچي..عافني وراح..

بفترة اسبوع بدت وفاء تشد گورتها وياي..تشوف عقيل دائما يجي بالغرفة مايروح يمها..ولو مامقصر وي ابنها بس غيرة ضراير..انه اتمنى يروحلها ويعوفني وحدي وهاي عبالها انه اتلوگله علمود يجيني.. بيوم خابرني كال حجي اتغده حضريليا.. فگمت اسويله لأن بقى قليل..اجت هي عبالك تشمشم اخباري..
وفاء : شو دتسوين اكل..المن..
دنوة : عقيل حيجي يتغده..
دفعتني واخذت من ايدي : روحي انه اسويله..
بگلبي كلت بعد احسن..عفتها هي تسويله ورحت نمت.. ماحسيت بي لمن گعدت كالت اجه تغده وراح..

هي وياه مشاكل من الصبح ع اللبس..تلبس ضيگ والشال محطوط بس بالأسم..انه بس گاعدة واتفرج مااحچي.. منتظرة مصيري وين حيصفى..تعبت من التفكير..اتخيل رائد بعقيل .. لمن يفوت للبيت ويريد اكل..لو لمن يرجع شعره بيده ليوره.. اريد انسى بس كلشي ديجذبني اله..

وراها بفترة گصيرة تأخرت ال.... كمشت گلبي بس لا اطلع حامل.. مااريد منه طفل ..خصوص هو يشرب وتصرفاته ماتنحزر ابد..احس مصير الطفل حيكون معلق.. فقررت اصبر لحدما تعدي فترة بعد يله احچي..

وبيوم جدو عزمنا بالجمعة گال تعالوا تغدوا يمنا.. مسوي ثواب لأبوه.. كعدت الصبح بدلت ورحنا ..عقيل فات من باب الديوانية واحنا رحنا من باب الكليدور..طبيت جوة سلمت وگعدت.. البنات والبيت وكلشي بي نساني عقيل ورغباته.. التهيت وياهم.. خبزنا واجن نسوان گرابتنا ..
خالة ابتسام گبل لا نصب الاكل كالت : يمة روحي جيبي السفطة مال خبز وره البيت..
دنوة : اي هسه..
گمت عدلت الشال ورحت.. طبيت وره البيت لكيته هوسة.. رجعت الغراض لمكانهن واخذت الخبز وطلعت..

وگفتني ريحته..هذا هو لو لا..هذا عطره اعرفه.. رفعت راسي لكيته داير وجهه صفح ومنصي راسه ع الجداحة ديورث الجگارة.. عاينتله بقهر ودموعي بعيوني.. رائد .. اجه هوى عالي بهاللحظة چان تنرگع الباب..كمزت وعطت : يبوو..
رأسا اندار ملامحه بهتت وتكلست..چنه مامصدك.. مداانساك شلون افهمك هالشي بدون كلام.. أخذتني رجليه لعنده وعيوني تاخذ تصورات اتخايله بيهن بوكت مااشوفه.. ضعفان وعيونه مطعن جواها..
نصى ودار وجهه بعد ماچان مركز عيونه علي : شلونج خوية..
ردت اطك بچي لمن سمعتها بحلگه..هو حتى لمن ماچان معترفلي يكلي ابوية وباباتي..
ماجاوبته.. جر نفس وزفره بعدين راح.. گلبي مايتحمل هيج عذاب..شحچي شگول..شنو هالدنيا القاسية..

خليت ورحت للمطبخ بالعجل..حتى ماكدرت اكل وانه اعاين على كلشي واشوفه بي..هنا لمن شفته گاعد يدخن مايقبل اكمش ايده..هناك هيج .. ووو.. كل مكان يذكرني بي.. لجأت للاستقبال ضليت گاعدة لحدما خلص الغدة واجه عقيل بالصدفة..رحت حاچيته..
دنوة : عقيل..احاچيك..
اندارلي بتساؤل : ها بوية..
دنوة : خلارجع للبيت..متضايقة هنا..رجعني..
عقيل : يله امشي..

لبست العباية ورجعت للبيت..هيج مرت الأيام.. بالليل احضر روحي وانتظره يجي بس مجبورة علمود لايجبرني وتصير غصب عني.. خصوصا اخر فترة دائما يجي سكران.. واخاف احچي لايسويلي بلوة..الشهرية تأخرت اسبوعين.. قطعت الشك من اليقين هاهيه حامل..گلت اگله اله اول وهو يكول.. ضليت اليوم كله متوترة شلون احچي..
خابرته حاچيته : عقيل لاتشرب اليوم حباب..
عقيل : شني..بكيفج امشي انه..
دنوة : اريد احاچيك بموضوع ضروري مايتحمل شرب وانت تكون مو وياي..
عقيل : اشوفن..الله كريم خلاشوف شعندج..
دنوة : ماشي.. سديته ومشى اليوم بهدوء..

بالليل الكل يله اجه..طلعت فتحتله الباب ودخل.. ماشميت بي ريحة يعني ماشارب الحمدلله..صعد فوك حضرتله العشة وجبتلهيا.. گعدت جدامه ومستحية انطق ..
رفع راسه عاينلي بإستغراب : شبيج بوية..شصاير..
دنوة : ردت احاچيك بشغلة..
عقيل : اي ماتحجين صارلج يومين تحومين..
طگيتها بالعجل : انه حامل..
رفع حاجبه ونزل اللگمة من حلگه : حامل.. شني شوكت هالحچي.. ليش ماحچيتي ..
دنوة : استحيت اكول..وماچنت متأكدة..
تقرب علي وخازرني : تأكدتي عدل..مااريد اتعشم..
دنوة : لا تأكدت صح..
تغيرت ملامحه وابتسم..باس راسي وخدي : مبروك بوية.. بنية ولد مايفرق الحمدلله على كل حال..
دنوة : حتگللهم..
عقيل : چا غير اطشه بالعشيرة..
ابتسمت علي شلون يحچي.. عفته ياكل ورحت تمددت ومتغطية احس حمل وانشال مني..

خصوصا هو شفته متونس وفرحان..بلكت يتغير.. ثاني يوم كعدت على صوت هلاهل ومباركات..بدلت شي حلو ونزلت.. مهما كان عقيل وصح مااحبه بس هذا ابني البطني.. اذا مافرحانة لعقيل فحفرح لروحي..الكل عرف وصارت عزيمة.. وفاء شدت وياي..گامت تضوجني بس ماانطيها مجال رأسا اعوفها واروح..

وراها بأسبوع صعدت بالسطح لميت الهدوم ونزلت عزلتهن.. اخذت مال وفاء واكرم ونزلت انطيهيا.. گبل لا افوت شدني صوتها دتحچي بصوت ناصي بالتلفون..
وفاء : ولج والله ماادري شسوي..ادور طلعت حامل.. حيعوفني الرجال وين اروح.. چذابة عزززه شمدريج..والله وطلع صليح مو هين..مااعرف يجوز يدري هو وياه نفس الطبع والسوالف المكسرة.. هاهيه على راحتج خية ردت اسولفلج احس حطگ من وره هاي السعلوة..

فتحت الباب بالعجل..گمزت من مكانها : دفتحيها على كيف ع الاقل..ماعندج اسلوب..
دنوة : لا حبي ماعندي..تدرين شوكت يصير عندي.. لمن تفكين عني وماتحچين بظهري..
وفاء : انه احچي..وين سمعتيني..
دنوة : سمعتج..مايهم شوكت بس المهم سمعت.. وهاج هاي هدومكم..
شمرتهن عليها وصعدت فوك..ضليت بالغرفة ماطلعت.. شتريد تسوي هاي الرعنة..مااريد اوصل الموضوع لعقيل ادور يطلع مايستاهل واتفشل..وخاف يطلگها وتاخذ ابنها.. هو همات ابنه فيعني مااريد احرمه منه.. قررت اسكت واحلها بروحي ..

مرت ايام طبيعية لاتخلو من مشاكل الضراير وهالسوالف ولو مو يمها انه..روان ماتجي بس هو يروحلها كل چم يوم.. الى أن بيوم كعدت بالليل عطشانة..لبست شال ونزلت .. اسمع صوت الباب تنفتح وتنسد وصوت اقفال..خفت بس لا دااتخيل.. بلعت ريگي بخوف ورحت على كيفي واشوف صلاح منتچي على باب الكليدور..هلكد ماشارب ريحته وصلتلي والمسافة بيناتنا موگصيرة.. اشوفه كاعد بالگع ويون يايابة.. خفت اروح يمه ادور يتخيلني وحدة يعرفها.. صعدت فوك گعدت عقيل.. : عقيل.. اكعد..عقيل..
فتح عيونه بضوجة : شكو شكووو..
دنوة : صلاح جوه شارب..روح شوفه..
گمز من مكانه نزل بالعجل..رحت وراه بس واكفة على نص الدرج مارحتله..گومه واخذه للمغسلة وهذا يصيح ويفشر.. عقيل يسد حلگه يريده يسكت ماسكت..آخر شي دخله للحمام وراح لغرفته اخذله هدوم وضل ينتظره لحدما طلع چان شوي ها صاحي..اخذه لغرفته وصعدلي..

حچه هو ويصعد : شعندج واكفة..تعاي..
رحت وراه..ذبيت الشال وسديت الباب : صلاح همات يشرب..
عقيل : اي..صار هواي مو انه علمته..
عاينتله بنظرة استنكار : مو انت..
عقيل : وجع شني اچذب عليج..طفي الضوة خلانام..
طفيته ورحت نمت..

وره يومين تلاثة گاعدة بالمطبخ ماعندي شغل..البنات ديطبخن.. اجت عمتي ..
صاحت : گومي شعندج كاعدة..
دنوة : وين اگوم..
ام عقيل : نظفي غرفة صلاح..مكركبة..
دنوة : خو حنين تنظفها مو هي اخته..
خزرتني : امشي ولج لاتضوجيني ادبسز..
عاينتلها بحقد ورحت للغرفة..حرت منين ابدي..كلش هوسة ومااعرف شنو الشغلات اليحتاجها والمايريدها.. گمت ارتب بالميزتواليت والعطور..دااضم المشاطة بالمجر ولگيت هدوم نسائية داخلية..سديته بالعجل ..هذا شنو عفية.. دقايق چان يفوت لابس شورت وكامش الفانيلة بيده يريد يلبسها.. صدره مبلل.. استحيت منه..

نصيت راسي : اعتذر بس خالة كالت نظفي غرفته..
صلاح : لاعادي ماصار شي..حطلع وعوفيها خوية شينظفها..
اجه وگف يمي ديطلع هدوم من الكنتور..نفس هيئة عقيل.. الضخامة والطول حتى البطن.. مااحس غير بصوت عقيل صاح : تعاي هنا..
فزيت منه : انه..وين اجي..
عقيل : تعاي اريدنج بشغلة..

ذبيت من ايدي ورحتله..يمشي سريع وعلى اعصابه.. صعدنا فوك..اول ماطبيت جرني من شعري..
عقيل : شعندج بغرفة صلاح..
دنوة : خالة دزتني انظفها..شبيك وياي وخر ايدك..
عقيل : اذا شفتج رايحة يمه اموتج..

وخرت ايده وخزرته : تشك بيه..
عقيل : رايحتله برجليج واشوفنه ماخذ راحته بعد بس يجي كما خلقني ربي..
انقرفت منه ودفعته : لاتحچي هيج والله حچيك كله يلعب الروح.. عيب وحرام تشك بيه مامسوية شي انه ..
جر شعري قوي شمرني ع الچرباية : لج چم مرة عدتيها وگلتي تلعب روحي..اليوم العب روحج بس صبري..
تقرب مني بقسوة و حدّة مثل اغلب المرات..چنه دينتقم من روحه وحياته المخربطة بيه.. گام مني حسيت بوجع قوي.. خفت ع الطفل..
بچيت وحچيت بصوت عالي : كافي تسوي هيج..انت ماتحس.. شنو من بشر ..
عقيل : اشش لج ادبسز گومي من يمي يله..واذا شفتج يم صلاح اذبحج..روحي..

گمت وابچي بحرگة..اخذت هدوم ورحت سبحت.. يشك بيه.. والله ماابقى.. الا اخابر ابوي ..شنو يشك.. ليش شبيه شمسوية.. سبحت ورحت ع التلفون همزين ماموجود طلع مدري نزل جوه.. دورت رقم ابوي وخابرته..
شواي وجاوبني..رأسا حچيت : بابا اخذني بعد ماابقى هنا ماابقى..
محيي : شكو ياستار شمالج بوية فهميني..
دنوة : بابا عقيل يشك بيه..يشك بشرفي..
محيي : لا ياسرسري..شون بوية شسوى..
حچيتله شلون يحاچيني چن عندي شي وي اخوه.. كال هسه جاي.. سديته منه وبدتخلي اتمنى ابوي يتخذ خطوة حازمة مو بس يحچي.. نزلت جوة ضايجة ..صلاح ماموجود بس عقيل.. دقايق چان تندك الباب ودخل ابوي..

صاح : عقيل وين..
عاينلي وگام راحله ..
عقيل : ها عمي تفضل ليش واگف..
محيي : لا مااتفضل اذا مااخذ بنتي واطلع..
عقيل : شني شسالفة اكعد فهمني شصاير..
صاحني رحت وياه وامه همات اجت..طبينا بالهول .. عمي اجه على صوت ابوي ..
طب متفاجئ : هله خوية..
محيي : هله بيك..ماتكمش ابنك هذا..
كاظم : عقيل..شبي ..
محيي : يشك بشرف بتي..لا وفوگاها وي حماها.. ترضاها انت..
فك عيونه متفاجئ وصاح : صدك هالحچي..وك عقيل..
سكت ماگال شي من فشلته..
محيي : احچي انتي بوية..خليعرف شصاير.. انه چي احترمك مااخذتها..چا اخذتها وطلعت حتى مااحچي..
شفت ابوي واگف وياي..فحچيت وراسي مرفوع كلت مايفشلني اكيد دام مامسوية شي..
عقيل : عمي انت على عيني وراسي والله..بس انه رجال وشفت مريتي يم اخوي بهيج وضع..شسوي.. انه چي اخاف واغار عليها هيج حچيت..
شهگت وخزرته : بس بابا هو ماگال هيج والله ماگال..
عاط : چا شگتلج..تردين تسويني فد دور موخوش.. لا يبوي وحگك مالي نية بشي..بالعكس انه لوما متأكد من دنوة وشرفها مااخذها..وهاي جدامك اعتذر منها واذا تكررت اخذها..

اندارلي وحچه : تعذريني بوية..
فكيت عيني متفاجئة من چذبه واحتياله..شنو من بشر هذا.. ادور ابوي شفته رخه ولا چن..اجيت اموت.. بچيت رأسا : بابا يچذب والله يچذب..
صدگني..بس كلام عقيل نهى كلشي..خصوصا هو يحچي بطريقة حيادية..بحيث ماطلعني بس انه غلطانة..حتى هو.. واعتذر سحل روحه..
ام عقيل : وليدي اعتذر ولو اللوم مو بس علي..عليج انتي همات..اذا تنسد السالفة يكون احسن خوية ابو دنوة.. عشنا اشكال وشفنا كلشي..شو ماخابرنا على اهاليتنا يجون ياخذونا..
محيي : بعد اخوج هم مزوجين بعد كلشي يصير.. بس هنا لا نوگف..مع ذلك الغلط من الاثنين مانظلم أحد..

ضلوا يحچون وانه احچي بس محد مهتم..آخر شي اجه صلاح شاف الهوسة وعرف بسببه..فاعتذر گال ماچنت ادري وانه مامتعود اشوف بنية يمي ولو ادري عقيل هيج يفكر حتى ماافوتها للغرفة.. هو انه ادري هيج تفكيره.. بس مقهورة على تفكير عقيل الوصخ..عاد ابوي لمن سمع هيج وكل الاطراف تراضت طلع .. عاينتلهم شلون عادي عدهم..حموت انه..

عفتهم وصعدت فوك ميتة خوف من عقيل..شواي وانفتحت الباب دخل عصبي..گبل لا يجي يمي عطت : الله يخليك لاتضربني.. حباب هاهيه مااعيدها ..
عاينلي بطرف عينه : مااضربج..بس اذا انعادت المهزلة هاي مرة اللخ اطيح حظج..
دنوة : انه مامسوية شي..انت تأذيني وتشك بيه..لا عبالك كلام ابوي يخليك تحس روحك صح..تبقى غلط وانه لوما حامل چا رحت لجدي..
درت وجهي ع الكنتور ايدي ترجف..مامتعودة اصيح واحچي واصير اعصاب..كل المشاكل اسكت.. اجه جرني من زندي علي ويعت بيه : لاتعيريني بحملج..جيبي وروحي عود..
دنوة : لا مااروح ماطول ابني او بنتي مايجي وياي..

وخرت ايده ونزلت جوة..ماحچيت حرف طول اليوم.. مهضومة من الموقف الحقير الصرت بي..ليش هيج حظي مصخم.. اوف منه ..

وره اسبوع بديت اتشهى اكلات..ادور بنص الليل اكعد مشتهية شي وطعمه بحلگي..بيوم كعدت بالليل بالثنتين اريد ليمون براسه..شفت عقيل نايم..
گعدته : عقيل.. عقيل اكعد حباب..
وخر الغطى من راسه واندارلي : شبيج انتي.. ماتخلين الواحد يهجع وينام من نامت بلوكة علي ع الاقل انام..
دنوة : اريد ليمون..جيبلي..
عقيل : ميخالف باچر..
دنوة : لا هسه اريد..مااتحمل لازم هسه..
عاينلي بملل : لج من الصبح طالع للشغل عوفيني نايم باچر اجيبلج صندوك..

كمت ابچي..كلش مشتهيته .. شافني ابچي كام لبس واخذ السويچ..رحت وياه ونفتر..
عقيل : محد مفتح..هسه وين الگى..
دنوة : مااعرف شوفلي اريد..
سكت وسحب التلفون يخابر..ماادري منو بس مبين صاحبه.. سده ولاف السيارة لمكان ثاني..وگفنا يم عمارة.. شواي واجه رجال شايل علاگة بيده ..انتبهت بيها ليمون.. اويلي روحي ساحت..انطاهيا وتشكر منه..اخذتها منه واخذت وحدة زرفتها شوي وبديت اشرب منها..انه كلش اكره الحمضيات بس هسه مااكدر يعني بعد اشتهيته..

رجعنا للبيت اكلت وحدة لخ حسيت روحي ارتاحيت عقيل يعاينلي وكاشة روحه..
عقيل : شون تاكلي يمعودة شيجرعه..
دنوة : لا طيب..معليك ديور وجهك..
عقيل : بعد احسن..نامي عود لاتتأخرين..
همهمت بالموافقة..راح ينام وانه بس خلصتها رحت تمددت وغفيت..

مرت ايامي عادية..انه وعقيل علاقتنا نفسها.. اذا اعانده ياخذ بالغصب..ولا چنه متزوج ثنين..لاطش بيه.. دورات بيني وبين روحي اگله روح لوفاء.. عنده ابنه فوك الكل..مدلل وكلشي عيني واغاتي..وفاء تشوفه شلون يعامله تعاينلي بطرف عينها وتبتسم عود يحبني ومايحبج..عساه لاحبني شلون انه ميتة علي ..

وره يومين بهالحدود واكفة بالمطبخ العصر دااسوي چاي.. مااحسه غير بصوت ام رائد دتسلم .. يعني رائد..لأن اشوفه بيها.. عدلت شالي ورحت سلمت عليها.. تعاينلي بعتاب مثل لمن جان رائد داخل غيبوبة..هي تحچي وياي وانه اسمع صوت حنين بس بعيد..
عاينتلها : خالة حنين وين..
ام رائد : هيانها برة.. شوفيها وجيبيها ..
دنوة : اي هسه..
رحت للباب واشوفها واگفة يم رائد دتحچي وياه من الجامة.. ماادري شگلتله وابتسملها..اجيت اطك من القهر.. اويلي شگد مشتاقتله لمن چان يبتسم على سوالفي ويضل صافن.. يگلي سوالفج حلوة حتلو جانت صفنات..هي رأسا اندارت شافتني.. ابتسمتلي بالچذب واجت حضنتني وحچت بصوت عالي : سمعت حامللل..الف مبروك..

هاي شبيها تعيط..شكد ضجت منها بس حاولت ماابين : اي حامل الله يبارك بيج..تعاي فوتي..
فاتت رأسا..رائد عاينلي بعتاب وراح ماحچه شي.. روحي وياك والله مارافگتني من يوم تزوجت عقيل هي وياك.. مدااحس بطعم الدنيا وشنو حلاوتها..شكد چنت فرحانة وياه حتى مااهتم شحيصير لأن هو وياي مايعوفني.. تنهدت بحسرة وطبيت..

ضليت كاعدة وياهم..خالة باركتلي ع الحمل وانطتني هدية.. تشكرت منها واخذتها..شكد عدها أصول.. بحيث وره كل الصار اجتني ماگالت لا..لأن يبقى هذا واجب ومن الأصول يعني..

بعد مرور فترة اسبوعين او عشرين يوم.. گعدني عقيل من الصبح..عاينت للساعة بالستة ونص..
دنوة : شبيك من الصبح شكو..
عقيل : كومي حنروح لبيت جدي..
دنوة : ليش شعدنا..
عقيل : ابو رائد متوفي الفجر عيب لازم نروح..

گمت من مكاني بالعجل مامستوعبة..شنو متوفي.. شديكول هذا.. لا خاف انه ماسمعت زين ..
دنوة : شنو متوفي عقيل..شوكت..اقصد شلون..
عقيل : گايل گلبي يوجعني الفجر..بين ما ماخذين للمستشفى متوفي بالطريق..
الدمعة بطرف عيني..صحيح عمي بس ماشايفته هواي.. مااعرفه.. انقهرت على رائد..اكيد هو اخذه للمستشفى وتوفى بيده.. گلبي عصرني ..كمت بدلت بالعجل ورحنا لبيت جدي.. عاينتلهم كلهم لابسين اسود..مع العلم هو أذاهم هواي.. شواي وطلع جدي من غرفته..رفع راسه واشوف عيونه حمر .. اكيد باچي علي..
شامخ : شمالكم بمچانكم..ماتتحركون..قويسم وين..
ابتسام : هسه يجي عمي ديبدل..
شامخ : چا خوش..يله بالعجل..

بين ما اجه عمي وطلعنا لبيتهم..لمن طبينا لفرعهم شفت رائد واگف بالباب وزلم هواي يمه..اشوفه يحچي بهدوء ويغمض ويفتح على كيفه..شكد تعبان.. نزلنا سوولنا مجال وطبينا جوه.. الاجواء تقبض الروح وهوسة كلش ..نسوان هواي كلها تبچي.. محد لفتني بس جديتي وام رائد..ثنينهن چن خسرن قطعة من روحهن..جدة ادري بيها تموت علي.. دائما تحچي بي وكل فترة تخابره ويخابرها ..

كعدت يمهن بس ساكتة..مشى الوكت لحد الظهر فات رائد جايب گونية تمن وشغلات مال طبخ..خلاهن وراح.. اشتغلت وياهن لأن الباقيات كاعدات ولا چن..هي ام رائد واخلاص خطية يلتهن بالمصيبة لو بالأكل.. فساعدتهن .. بس اجه طباخ هو سوى التمن والباقي احنا.. مشى اليوم بصعوبة واشوف الكل يبچي وملتهي..سووا ختمتين النسوان والزلم ماادري.. ادور تعال خلي چايات وودي چايات..

بالليل خفت الهوسة شوي..اكو بعضهن جوارين فراحن لبيوتهن.. باتوا خوات خالة وخوانها وبعد ناس مااعرفهم.. تقريب العشرة اجه عقيل يحاچيني..
عقيل : يله لبسي حنرجع..باچر نجي همات..
دنوة : ها صدك..يله بس البس..
عقيل : يله انتظرج بالسيارة..
خلى وراح..رحت للغرفة اخذت عباتي..ودعت خالة وطلعت.. بباب الكليدور شفت رائد داير وجهه ديدخن.. تقربت علي.. اندارلي وعاينلي بتعب..
لازم اخذ بخاطره : البقية بحياتك..خاتمة الاحزان يارب..
ذب الجگارة وحچه : حياتج الباقية خوية..

عفته ورحت بس كلمة خوية براسي..شكد حدي ومخلي حواجز لكل شخص حتلو چان كلش قريب علي بس ماطوله مايگربله شي بالحلال يتركه.. رجعنا للبيت وثاني يوم همات رحنالهم.. وهاي هيج لحدما خلص اسبوع .. باليوم السابع انه گاعدة يم النسوان وروحي لعبت..انطوني شراب يخفف اللوعة.. ماكو مايفيد شي.. آخر شي گمت تمشيت بالممر محد اكو.. بطني توجعني وروحي طافرة هاي بالبداية وهيج چا بعدين شلون.. حسيت بروحي حستفرغ..رحت للحمام بالعجل.. گمت استفرغ ودايخة.. بس ارتاحيت شوي ..غسلته ورفعت راسي.. سمعت صوت رائد يم الباب يكول لاتعبين روحج يمة هسه ازين واجي ادورهن..

فتح الباب ..رأسا اندار : تعذريني ماادري بيج هنا..
دنوة : لا انه اعتذر..
تمشيت اطلع صار بوجهي واشوفه لحيته طالعة.. چان ابد ماعنده دوم يحلقها..حتى شعره طولان.. نصيت راسي وطلعت بس روحي مفرفحة علي..شگد مقهور بس شايلها بگلبه مايحچي..

رجعت كعدت يمهن..بالليل اجه عقيل رجعني ومارحنالهم بعد.. جدو من القهرة على موتة عمي سكره صعد ماينزل.. دخلوه مستشفى علمود يبقون يراقبونه لايصير شي بعيونه.. خطية يبقى ضناه مهما كان..

رجعنا للبيت ورجعت وفاء تمسلت وتسوي حركات تافهة.. جانت دتسبح وانه بالطرمة دااغسلها.. مااحس بس اجه اكرم يركض وزلگ طاح على ظهره..ذبيت الصوندة وركضتله شلته.. كام يبچي ويصيح..متت خوف خاف صارله شي..دخلته جوه غسلتله وجهه وفركتله ظهره..طلعت وفاء شافته يبچي راح عليها ويبچي بصياح..هذا شبي تخبل علي ادور..
اجت يمي هدادة : ولج شسويتي بإبني..
دنوة : ماسويت شي والله..هو اجه يركض وتمزلك بالطرمة..
رفعت راسه وتعاينله : صدك ماما..
اكرم : لا ماما هي دفعتني..
شهگت وكمشته من زنده : ولك ادبسز ليش تچذب.. بعدك شبر طولك ولسانك هطولاته..
دفن راسه بحضن امه ويبچي..يمة منه ياستار شلون تعلوم معلمته.. عفتها وصعدت فوك ..

بالليل اجه عقيل يصيح ليش ضاربة ابني..يابة والله مو انه.. مايصدك..الأم وابنها والعمة همات وياهم وكفت عبالك ع الواهس.. ماصدكني ورزلني جدامهم ..
عطت : والله ماسويت شي ليش تچذبوني..
عفته وصعدت فوك ابچي ماتحملت..شكد حقراء.. هو وره شواي صعد صاير نار..تشاهدت على روحي.. اجه يمي ويعت بيه روحة رجعة..
عقيل : شوفي لج قندرة اذا سمعت حسج عالي بالبيت اگص لسانج.. زين لو لا ..
ردت احچي سبقني : اششش..خاف تگولين ابنك ما ابنك.. جيبي الطفل وولي عود..
خزرته بقرف : شكد ماعندك احساس انت..يعني انه اتعب والثگل كله علي بعدني تكلي اخذه بس تجيبي..

عقيل : چا تحملي..انتي مو آدمية..صار كومة متزوجين.. اريد فديوم اجي يمج واشوفج راغبتني..ماكو.. شتريدين دااجيبه جدامج..شتردين فهميني خلاشوف دربي..
ردت اگله مااريدك بس سكتت.. عافني وراح ..
وره فترة عشرة ايام راح لروان..گال اتأخر يومين هيج.. گتله براحتك.. بالليل كملنا تنظيف وگعدنا بالهول وي عمي.. جايب ملاعيب لأكرم فگعدنا نتونس علي..مهران كاعد وحنين حتى براء موجودة هي وبتها الصغيرة .. بس صلاح ماكو..

مشى الوكت لحدما ترخصت منهم وصعدت انام.. گعدت بنص الليل مشتهية جبن ..حموت من الوحام هذا كلساع شكل..نزلت اكلت شوي وصعدت.. انه واصعد تخايلت صلاح واگف بباب غرفة الترك..هذا هو لو متوهمة.. تمشيت للباب لگيته يمها وسكران كلش.. ردت ابتعد كمشني من زندي ويعاينلي بنظرة ذابلة وغريبة..
گال بلسان ثگيل : هاي انتي سارة..

ضحكت بداخلي..ياسارة هاي.. مااحس غير كام يريد يجر الشال مني ويحچي بكلمات مامفهومة.. ادفع بي واخاف يضربني بدون مايحس..فتح الباب وشمرني بالغرفة.. صح سكران بس بقوته مو هزيل..تخبلت لمن شفته يريد يقفل الباب.. دفعته وابچي واصيح اريد واحد يگعد.. چن نايمين نومة الكهف محد يحس.. هو جر شالي والقراصة.. شعري انفك .. هيج عليك يالله انفتح الباب..انصدمت ......

يتبــــــــــــــــــــع...................