رواية اسألي عني الليالي الفصل الثالث والعشرون 23 - بقلم رقية جاسم

قناة التليگرام

حساب الانستگرام

الـبـارت الـثـانـي والـعـشـرون...........

ضحكت بداخلي..ياسارة هاي.. مااحس غير كام يريد يجر الشال مني ويحچي بكلمات مامفهومة.. ادفع بي واخاف يضربني بدون مايحس..فتح الباب وشمرني بالغرفة.. صح سكران بس بقوته مو هزيل..تخبلت لمن شفته يريد يقفل الباب.. دفعته وابچي واصيح اريد واحد يگعد.. چن نايمين نومة الكهف محد يحس.. هو جر شالي والقراصة.. شعري انفك .. هيج عليك يالله انفتح الباب..انصدمت ..

فات عقيل فاك عيونه على كبرهن.. كمشني من شعري سحلني ويفشر ويغلط اشكال الوان..كلشي يجي على باله حچاه.. انه اجر بإيده اريده يعوفني ماكو..كمت اصيح بإسم عمي اريد يجي يخلصني..هذا ماعنده مانع هسه يكتلني..

دنوة : عقيل بس اسمعني..والله ماادري عقيل..
جرني حيل : اششش لج ساقطة انه صوچي انطيتج مجال.. لو مخليج تولين وي ابوج اشرفلي..اليوم ذبحج يصير على ايدي يامعلونة يابت الملاعين..
الكل كعد على صوت صياحه..اجه عمي مخروع يجر بي : لك البت حامل يمعود فك عنها..
عقيل : لااااا..اليوم اموتها وحگ ربك.. وخر انت لاتدخل بوية..
جرني منه قوي..كمت بالعجل لبدت وره عمي : عمو مامسوية شي والله مامسوية..هو ماسمع مني..
كاظم : شكو دفهمونا شمالكم..اذا شغلة بيناتكم مايحتاج تخبصون البيت بوية اكو خصوصية..
عقيل : ليش هي خلت خصوصية..هاي جاهلة..تورطت بيها..
عاط : هاااا يعني ماتفهمونا..
عقيل : يعني شحچيلك..بوية شفتها وي وليد فاكة الشعر والدشداشة مسرودة من يم الصدر..شسويلها هاي.. فهمني انت.. عمي اشد گرون واكعد هاهيه ..

گبل لا يحجي حچيت : عمو مو هيج والله..وليد سكران وانه كعدت اريد اشرب ماي وشفته..روح شوفه فوك..
صاح بعلو صوته على وليد.. اجه من فوك بالگوة يمشي بس مصحصح .. نزل يمنا ..اول ما صار جدام عمي ضربه راشدي وكمشه من قميصه يطلعه بره وهو يجر بروحه للبيت..
كاظم : امشي اطلع بره..اذا شفتك بالبيت اطيح حظك.. قندرة ادبسز ماربيتك عدل..لك هاي مرة أخيك طيحت راسي..
وليد : ها يابة على كيفك..اعتذر ماشفتها والله چن وحدة غيرها ببالي..

ضليت واگفة واتفرج عليهم..قشعريت من وليد وتصرفاته.. شكد الشرب مؤذي..حتى مايعرفنا..كلساع يغلط بإسم واحد من عدنا.. وراها حنين كامت تبچي علي هو طاح بالگع مابي حيل يمشي..اخذونه للحمام سبح وطلع لغرفته.. عمي قفل الباب واخذ المفتاح..
انداريت على عقيل اشوفه وجهه احمر دم.. يريد يكتلني بس عمي واگف..
كاظم : اخذ مريتك واصعد فوك..ماسوت شي الغلط من أخيك..
عقيل : لا انه هاي ماتصيرلي مرة بعد..شيبت راسي..
كاظم : دمشي انگلع..هسه شيبت راسك..مو شايلة جاهل من صلبك شمالك انت شو ماتعرف تسولف..تهذري..

سكت واخذني وصعدنا..راح تمدد وانه واگفة يم الباب..
دنوة : ليش اجيت..
اندارلي بعصبية وخازرني : شني ليش اجيت.. چا تردين اعوفنج على حل شعرج..
دنوة : مو هيج..فهمتني غلط.. بس مو عساس حتبقى يم روان..
عقيل : لا اجيت..مالي نفس وابوها هناك مايعجبني هيج..
عاينتله ومقلصة عيوني باستهزاء..مايعجبك..بس يعجبك كل يوم متزوج وحدة..شكد حقير..

تانيته ينام يله رحت تمددت ونمت..ثاني يوم گعدت الصبح لكيت وليد واكف بالممر ويمه جنطة..مهران مبدل وواكف يمه بيده سويچ..نزلت عاينتله بدون مااحچي..تقدم علي ومنزل راسه : يخوي تعذريني..مااحس والله حتى مااتذكر.. هسه ابوي حچالي..هواي صارت مواقف ماحلوة بحگج من وراي.. حطلع افضل..
دنوة : التشوفه صح سوي..
عفته ورحت للمطبخ..خفت يشوفنا عقيل..مااريد علاقة الأخوة تخرب بسببي..بسبب هذا السم.. مشى اليوم بهدوء ماصار شي..وليد راح يم أمه هي جانت تريده يجي يمها بالبيت بس عمي ماقابل..

مرت ايام مابيها شي بس كئيبة .. خصوصا بعد وفاة عمي.. جدي تعب وسكره دائما مامستقر..لو يصعد لو ينزل.. مامنتظم.. مقهور علي ..فبهالأيام جانت شيماء مرة عمي فيصل يمنا..ضيفتها وگاعدة يمها..
شيماء : اگلج خية ماترحين تشوفين عمج خطية..
ام عقيل : اي والله ناويتها..يمكن باچر اروح مابيها مجال.. شونه هسه بالبيت يا وين..
شيماء : اي بالبيت مايقبل يبات بالمستشفى..
ام عقيل : من يوم يومه..ان شاء الله نجي خية زحمة نگعد ونسكت..
وراها ثاني يوم رحنا انه وعمتي..عمي چان موجود والبنات همات.. طبيت سألت عنه گالوا بغرفته ..رحتله رأسا بدون مااشوف منو يمه..
فتحت الباب وگلت : وينك جدو گاعد..
اول مادخلت صار رائد بوجهي..كاعد يمه ولابس السماعات الطبية ديقيس ضغطه.. خزرني يعني سكتي ..سكتت بين ما كمل وگام باس راسه ..
رائد : لاتخاف مابي شي .. منتظم ..يبقى بس باچر الصبح سوي تحليل سكر گبل لاتتريك.. خوما تحس بغواش بعيونك..
شامخ : لا نعمة احسن من الأول..
رائد : اي هاهيه يعني بلش يستقر.. عندك العافية بس خابرني اجي وياك عود..

عاينت لجدي الدمعة صارت بطرف عينه هو ويعاين لرائد.. اكيد تذكر عمي..لأن انه الشفته بس چم مرة محسوبة ع الاصابع كمت لمن اشوف رائد اتذكره شحال هو ابنه ومربي.. كلش يشابهون شبه موطبيعي.. چنهم خوان.. رائد نزل باسه وشبگه بعدين گام ..ماعاين علي رأسا طلع..

رحت گعدت يم جدو وبسته ..فتحلي ايده ومبتسم بتعب.. شبگته وايده الحنينة على راسي..
شامخ : شونج بنيتي..زينة..
دنوة : زينة جدو..شلونك انت بالي عليك دائما اسأل..
شامخ : يوصلني سؤالج يبوي..بس شوفة عينج..
دنوة : ان شاء الله مرضة صغيرة وتگوم بحيلك..  وخرت عنه وحضنت ايده : لو بعدني صغيرة چا گتلي لمن اصير زين اخذج للشط أمشيج ..شگد مشتاقة للشط جدو بعد مااخذتني..
ضحك : وج وين اخذنج وانتي مرية صرتي مانچ صغيرونة..
دنوة : اي بس انه صغيرونة يمك جدو..
شامخ : ههههه..يابعد گلبي البنيات شكثر احبنهن..

ضليت كاعدة يمه واسولف وياه..تعبان على وفاة عمي.. كل ممنوع مرغوب وهو چان مانع نفسه من عدنا ومن جدي بشكل خاص..فيحبه حيل..راح لدار حقه بعد..مشى اليوم كلساع داخلة ناس تشوفه..هو شوي كام على حيله لمن شافهم شلون مهتمين لأمره.. بالليل اجه عقيل يشوفه..فرحت يم سرور بين ما يخلصون..

سرور : خية دباتي عدنا حبابة..
دنوة : والله اريد ابات..بس عقيل مايقبل..
سرور : حاچي..گليله مشتاقة لأهلي اريد ابقى عدهم..
دنوة : ميخالف حگله بس مااعتقد يقبل..
سرور : دجربي شمالج ماتخسرين شي..
انتظرته يطلع من جدي بعدين اجاني.. : يله دنوة..
كمت مترددة خاف يفشلني..اخذته على صفحة ..
دنوة : عقيل..اريد ابات هنا..
رفع حاجبه باستهزاء : ليش عود..
دنوة : مشتاقتلهم..وصار هواي ماشايفتهم شنو مايصير..
عقيل : يله باتي..باچر العصر اجي اخذج..
ابتسمتله : شكرا..
عقيل : العفو..تعاي سدي الباب حطلع..
: اي يله..   رحت وياه سديت الباب واخذت نفس براحة بعدين طبيت..

ساعدتهم بالبيت وكملنا شغل بعدين صعدنا فوك.. انه گاعدة دااسولف وياهن واشتهيت بقلاوة..
دنوة : اگلج سرور..جيبيلي بقلاوة..
ضحكت : شمالج..شني دتتنسين..
دنوة : لج كلساع مشتهية شي..ذاك اليوم گعدت عقيل بنص الليل اريد ليمون..
نوارة : ههههه..لك يردوني اتزوج..شمالي مسودنة.. هو انه حايرة بروحي شاكل ادور اگوم اكل وهذا بطني ياكل وياي..
دنوة : اي بله يخلص الأكل..يله ميخالف المهم نشبع ثنيناتنا..
سرور : ههههههه..لج عليج سوالف.. صبري هسه اشوفلج شعدنا..
دنوة : اي فدوة شوفي..

راحت وره شواي اجت جايبة زنود الست وهاي حلاوة اسمها عش العصفور..مثل الشعرية بيها جوز ومكسرات صغيرة.. اخذت منها كعدت اكل..صار عندي زنود بلشت اسمن من الأكل.. بعدلي سبع شهور شيخلصهن وشگد حيصير وزني..  المهم اكلت وخليته على صفحة..

رحت غسلت واجيت..ضلينا نسولف چان تطفى الكهرباء.. صارت حارة تكتل..
نوارة على فطاريتها حچت : ذاك اليوم همات طفت الكهرباء بس رائد چان موجود.. خابر صديقه جاب المولدة مالته شغلناها.. شو مالنا هسه ديشغلوها وعطلت شايفة هيج حظ..
دنوة : صدك..شوكت اجاكم رائد..
سرور : گبل لايتوفى عمي..
دنوة : ها.. اي بعد شنو ..قصي ومرته شلونهم..
سرور : والله زينين كلهم على حطة ايدج.. خو ورود .. لمن رحتي ذاك يوم وهذا يوم هي كلساع تترزل.. يابوية شني مرة چيس حب..ماتعرف تسوي كلشي..عاد جدة كمشتها ركبة ونص شغل وطبخ هسه استعدلت..
دنوة : اي خلتلتهي بهالسوالف احسللها من المشاكل وتذبها براس الوادم..
سرور : سكتي لاتذكريني بذاك اليوم..شون فشلة تفشلت.. افيييش.. غسل ولبس ..
دنوة : هههههه..انچبي ولج لاتتشفين بأحد ختولي..

ضلينا نحچي شوي نتلهى عن الحر..وين نولي .. كمت فتحت الشباچ وخليت البردة وراه..
فاجئتني سرور من حچت : دنوة..اريد احچيلج.. للأمانة الرجال كال لاتكليلها .. بس تعرفين بعد..
انداريتلها متسائلة : منو تقصدين..
سرور : رائد ..
بلكت ريگي بقلق : شبي..شگايلج..

سرور : ماگايل شي هو..بس انه سمعته يخابر امه ماادري شكلتله بس هو جاوبها گللها سمعت بيها حامل يمة.. حامل انه گلبي يلچمني شسويلها الله يسعدها..
نوارة حچت من يمها بعصبية : سرور مالها داعي تكليلها رائد هيج وهيج..المرة متزوجة مايصير..
سرور : ماحچيت شي..الموقف صاير صار شهرين.. هسه الرجال نسى اصلا والسالفة بردت مو حامية..
نوارة : اي حتلو مايصير..هاهيه مالهم نصيب شووون يعني نضل مچلبين بالماضي..
دنوة : مايحتاج تتعاركن بنات..انه نسيته لرائد اصلا وحامل من عقيل ..
عفتهن يحچن ورحت فرشت اريد انام.. اكيد انقهر لمن سمع بيه حامل..

ماادري شلون اجاني النوم وغفيت.. وچن بالحلم اجاني رائد .. شفته لابس هدوم عسكرية بس متربة واحنا بمكان مهجور وحارة تكتل.. اجه يمي كامش بيده بطل ماي ومبين علي بارد كلش..ماردت اگله انطيني لأن هو همات عطشان.. كعد يمي وعاينلي بزعل..انطاني الماي..
دنوة : لا مااريد..انت همات عطشان..
رائد : مومشكلة..
اخذته وشربته رأسا كله حتى استحيت من روحي مابقيتله.. گام وينكت هدومه..اجه شخص من بعيد لابس دشداشة بيضة ووجهه كله نور حتى مامبين..كمش إدينا وقربهم لبعض ويحچي وياه ماسمعته شيكول.. رائد عاينلي وابتسم ..

فزيت اتلفت يمنى ويسرى..محد اكو.. انهضمت من الحلم .. حتى بالحلم مايحاچيني..بعدني احبه مداانساه.. كلشي هنا يخلي ذكرياتي وياه تتجمع بشكل دموع هشة بفؤادي.. خناجر هلگدما تجرحني..

كمت غسلت وجهي ونزلت لكيت الكل مشغول ويحضرون للغدة.. رحت كعدت يمهم بالمطبخ ..لهناك وصار صوت اكثر من رجال مو من ولدنا بالمضيف.. تمشيت للباب واكفة وراها واسمع..
- : شيخنا اجيناك گبل مرة بمشكلة ووگفتلنا ماقصرت.. هسه نريد منك شي صغير ماياخذ من وكتك..
شامخ : ابشر مضيفي مفتوح بكل وكت..
- : تسلم ماتقصر.. ابن اخوي اخذ بت وشرد مانعرف اصلها ولا فصلها..گلبنا الدنيا عليهم ومالهم أثر.. وصلنا حچي من مكان موثوق هو ديحچي ع الحكومة الجديدة.. واحنا يشيخ مانريد مشاكل وبلاوي.. هاي عيبة علينا مانرضاها.. نريدك تنزل اسمه من العشيرة احنا متبرين منه..
شامخ : انزله بس كون حچيك اكيد..
- : اي شيخنا اكيد.. حتى هاي صور وصلتنا ..
شامخ : هذا هو.. اعتبرونه نازل ولاتعرفونه ولايعرفكم..
- : مشكور شيخ اكيد كلامك مايختلف علي..

انه اسمعهم وبداخلي اكول الحمدلله ماسويت هيج.. هواي اسباب تدفعني اتصرف بهالتصرف بس چان شي بداخلي يمنعني.. ضميري يمكن ..المهم هالشغلة بيها ضرر للأشخاص نفسهم گبل اهلهم وناسهم.. وبالحالتين حيضلون عايشين بتأنيب ضمير..
درت وجهي ورحت كعدت بالمطبخ.. العصر اجه عقيل اخذني ورجعنا للبيت..
مرن چم يوم وانه كاعدة بالغرفة بالگع يم الكنتور داارتب خانتي بالليل.. انفتحت الباب ودخل عقيل..ضل يعاينلي هو وساكت.. حسيته يريد يگول شي ..اجه كعد يمي وحضني من چتافي..قربني لصدره وبإيده اللخ ذب الهدوم من ايدي..
عقيل : دتاكلين زين..وجهج اصفر ..
دنوة : اي دااكل..
سكت وانه همات سكتت..ضليت على وضعيتي بحضنه بس صاكة روحي.. ضايجة منه ومن اسلوبه الماعرفته لحد هسه..

ابتعد عني وگام تمدد ويگلب بالتلفزيون.. كملت الخانة شلون ماچان ورحت طفيت الضوة.. نزلت جوه ابحوش بالثلاجة.. جوعانة ومشتهية لبن واعصر بي ليمون..ماادري شهالوحام الغريب.. كلساع شكل.. ماكو دقايق وشفته فوك راسي..
عقيل : مشتهية شي..
عاينتله وضحكت : عرفتني بعد.. اي
عقيل : شنوه..
دنوة : اريد ليمون ولبن..
عقيل : صعدي لبسي وجيبي السويچ اروح اجيبلج..
رحت صعدت لبست شال وعباية ونزلت..اخذني وطلعنا ضل يفتر لحدما نزل اشترالي ورجعنا للبيت.. خففته بماي وعصرت الليمونة.. اويلي روحي ذابت هو يعاينلي وساكت.. بين ما كملت وصعدنا فوك.. راح تمدد وصاحني.. اجيت يمه.. طلع فلم ويتفرج وانه وياه بس ادوخ وانعس لمن اتفرج .. فگمت اغفي.. حسيت علي طفاه وحضني.. بالعادة يحضني بدون مايحچي..
هلمرة كال بهمس هو ويفتح ظفيرتي : شبگيني بوية.. حسسيني انتي مرتي.. مااريدنج بالغصب توبت..
بلعت ريگي وحاوطت زنده.. اجيت ابچي انه واحضنه مااعرف ليش..  هو صدك عد كلمته ماتدنالي خلاني على راحتي لحدما غفيت..

مرت الأيام هادئة..ماكو شي مهم.. لحدما صار الأربعين مال عمي.. رحنالهم الصبح طبخنا ووزعنا للناس.. لحد المغربية هيج رجعت للبيت سبحت ونمت.. كعدني عقيل الفجر بدلنا وطلعنا للنجف.. اول ماطبيت للمقبرة انقبضت روحي.. امشي واتخيل فديوم اموت واندفن يبچون علي بعدين انسي.. مثل هذول الناس.. شكد الانسان يتكبر ويوصل مراحل يقدس ذاته لحد الجنون بس نهايته هنا.. بالگع..

وصلنا واخذنا مصاحف قرينا سورة يس وهديناها اله.. الشمس بدت تطلع وانه روحي ساحت من الحر.. الشهر السادس بعد.. اخذت ماي غسلت وجهي ومنتظرتهم يخلصون ونروح.. صفنت هيج وشفت رائد گاعد يم امه واخلاص.. محمد واكف يمهم.. الكل يبچي ومقهور على وفاته بس محد ماكل گلبي غير رائد.. رفع راسه واندار وجهه احمر وعيونه مورمة.. ادور ضعفان وجهه اصفر مطعن.. سالم انطاه ماي يغسل .. درت وجهي وعيوني مدمعة علي..  نص ساعة وطلعنا.. بس صعدت بالسيارة ذبيت روحي على عقيل.. مااعرف شصار بيه بس اهجس بعد مااكدر احچي.. الحر سحن روحي..
كمشني من ايدي وفاتح الباب يهفيلي.. بحدود الربع ساعة يله استعدلت شوي بس بعدني لعبانة نفسي..
اندارلي ويعدلي بشالي : شونج هسه عيني..
دنوة : زينة..خلنرجع..
عقيل : يله ماطول صرتي احسن..

اجه كعد وطلعنا للبصرة.. طبيت للبيت لگيته هوسة وهذا اكرم شامر الملاعيب بكل مكان.. انتحست منه..گبل لا نطلع الفجر لملمت وطلعت..اجيت وكفت جدامها..
دنوة : شنو معناها هاي.. ليش هيج مخلية ابنج يوصخ البيت.. شبيج شنو هالحقارة.. ماتكولين مرة حامل مابيها حيل..
وفاء : عيني وانه شنو.. يعني قابل اكمش طفل.. هو يلعب ويوصخ بعدين ننظف عود..
دنوة : لا انتي تنظفين مو احنااا..
عفتها وصعدت فوك.. سبحت وغيرت هدومي ورحت تمددت ع المكيف.. ردتلي روحي بعدين ماحسيت شصار..

رائد ......
طلعنا من المگبرة دنرجع للبصرة .. واكف يم السيارة ومحاوط چتف امي.. سكرها مامستقر وادوخ هواي.. صعدتها توني داادير وجهي وكمشت ايدي..
الحجية : يمة اصبر.. هاي هوسة هناك..
انداريت واشوف ام سالم وجدة وعقيل واگفين يم سيارته..
الحجية : روح شوف شكو..
رائد : يمة شدخلني.. خاف بنچر شي..
الحجية : يله براحتك.. چا خلي محمد يروح..
محمد سمعها وراح تمشى عليهم.. مسافة تلث سيارات بين سيارتي وسيارته.. شواي واجه ملامحه باردة..
محمد : هاي التافهة متخربطة مدري شني..
الحجية : مني..
محمد : دنوة.. اكو غيرها..
رائد : شمالك ماتعرف تسولف.. تمسلت هواي.. امشي اصعد وراي دوام..
اجه يعاينلي بتك عين.. هملته انه مو عراك..هسه اكمشه ادفنه بس مااتعارك..

صعدنا وفتحت التبريد امي لاتروح تتخربط.. شفتهم صعدوا سياراتهم يله طلعت.. انه روحي طافرة من الدنيا كلها..

ابوي مات بيدي.. كعدت بالليل هيج عليك يالله ميت عطش.. اجيت بالهول لكيته كاعد وروحه سايحة.. چنه ذبلان.. اجيت كعدت يمه سألته شبيك يابة..ماجاوبني بس يأثر على صدره ويغمض ويفتح على كيفه.. شكد ماكدرت حاولت ابعد التفكير السلبي.. طفرت للغرفة جبت السويچ داافتح الباب وكعدت امي واخلاص.. عفتهم بالبيت واخذته انه ومحمد.. محمد يسوق وانه ليوره كاعد وياه.. بينا وبين المستشفى مسافة كيلو واحد مو اكثر.. الطريق كله اهدي بي.. يابة على كيفك وارتاح بأنفاسك لاتخاف..
گبل لانوصل كمش ايدي وعاينلي : راضي عليك وليدي.. انت وخوانك.. ديربالك على أمك..
سكت وحط راسه على متني.. انتبهت لحركة شفايفه ماادري شيحچي.. قربت ايدي من انفاسه ماحسيت بيهن.. روحي انعصرت بيدي..
صحت : محمد بالعجلللل..
محمد : اي شسوي اطير..
رائد : طير صخم يله يمعود..
ماصدكت مات..وصلنا للمستشفى ونزلته مابي روح بس هيج دااحاول اقنع روحي مابي شي.. اجه الدكتور اخذه لغرفة الانعاش.. ماطول دقايق وطلع..رحتله ومتوقع شحسمع..
- : البقية بحياتك.. متوفي الرجال نوبة قلبية..
لو اگول الهوى صار صعب علي اشمه مااچذب.. هلكد اختنكت وعيوني غرغرت.. عاد خابرت على عمي قاسم وهو جاب عمامي وولدهم.. شيعناه واخذته للنجف دفنته يم أمه.. هو چان موصيني هشكل..

رجعت للبيت تعبان.. عود خليت محمد الشفية بالفاتحة البالبيت مايعرف يدبر أموره.. وانه بالجامع.. ذبحت ذبيحتين وهواي شغلات سويتها.. هلكت حتى نسيت حزني على والدي.. بالليل شفت البيت هادئ محد كاعد كلها نايمة.. صعدت فوك لغرفتي تمددت ودرت وجهي ع الباب.. شفته واكف يم راسي.. طفرت من مكاني للركن.. فدشي غريب وشعور بي خوف ورهبة.. ثواني وراح.. رجعت لمكاني وبچيت بچي حسيت جسمي كام يرجف واصابيع ايدي تشمر من وحدها.. اعصابي تلفت.. نمت بليلتها وأول ليلة انام هيج مقهور ومهضوم.. دائما اشوف الموت جدامي.. بس ماتوقعت ابوي حيموت بحضني..

بالطريق هيج بس رمشت.. فلتت السيارة مني چا سويت حادث.. امي تريدلها شغلة خاطر تبچي..
الحجية : يمة چا رحت بيها..
رائد : ابقوا هنا حنزل اغسل.. مانايم من البارحة..
نزلت غسلت بماي بارد وصعدت..رجعنا للبيت بس سبحت ونمت .. البيت وحشة وساكت.. چان ابوي يكعدنا الصبح هو مسوي الريوك.. يكول مااريد سري تتعب.. مايصيحلها بأم رائد لو محمد.. الطفل ينشأ حسب بيئته ويكبر عليها.. انه لمن وعيت ع الدنيا چنت صغير اشوف ابوي ماياكل اذا ماتجي أمي.. اول مايدخل البيت يسأل عليها.. وهذا الشي كبر وياه لحدما كبرونا وصرنا وهو بعده بهالشكل.. يحبها وعلمنا ع الحب.. لهالسبب لمن حبيت دنوة مافرطت بيها لحد آخر فرصة..

مرت تلث ايام بالرابع كعدت الصبح بدلت وخليت فلوس يم أمي وطلعت للدوام.. الولد بالمقر أخذوا بخاطري منهم ماحضروا الفاتحة..  مشت الأيام عادية.. بوكت استراحتي اروح للمحلات اشوف شكو ماكو وارجع.. محمد اذا اخلي بالمحل يدمره دمار.. مايعرف يشتغل وعصبي هسه اذا واحد حچه شي يكتله.. فبقيت بس العمال وانه وياهم اتفقد الوضع..

خلص دوامي ونزلت للبيت.. بس طبيت بعد ماطلعت.. اشوف محمد يروح ويجي چنه يلوب على شي.. يعاينلي ويريد يحچي ويسكت.. سكتت بس بالي يمه ..بالليل تانيته يدخل لغرفته ورحت وكفت بالباب اسمعه يخابر..
محمد : شوف لاتورطني وي الگحا.... اي معلي انه.. ابوي متوفي شون اجيك هسه.. گللها محمد مايريدج اصلا وماعندج فلس احمر يمه..
ضل يحچي لهناك وعاط.. فتحت الباب وطبيت ..سد التلفون رأسا وشمره ع الچرباية..
عاينلي بأرتباك : ها رائد..شو هنا.. عبالي نايم..
رائد : مااريد ادخل هاي خصوصية.. بس اذا طايح بمشكلة احچي..
محمد : لا مابيه شي.. جنت احاچي صاحبي..
تركته ورحت اخذت التلفون.. كام يتصافگ ويريد يجره مني بس مايكدر.. دگيت ع الرقم وخليته على أذني.. اول ما انفتح الخط اجه صوت بنية تبچي ترس أذني.. : ها محمد تنكرني.. مو انطيتك خمسمية ع الاقل رجعلي نصهن..
رائد : محمد ماموجود.. منو حضرتج..
- : انت منو.. انه رايدة محمد.. اطلبه فلوس ومايقبل يرجعلياهن..
رائد : منين تعرفي.. الولد ابوه ميت مايكدر يجيج..
- : عيني منو انت خاطر تسألني.. ماعرفتك..
رائد : اخو لمحمد..
- : انت الضابط..
رائد : اي نعم.. تعرفيني ماشاء الله..

سدته رأسا.. عاينت لمحمد ماي وجهه طاح صار اصفر..
محمد : خوية مامسوي شي والله هاي وحدة نصابة..
رائد : نصابة وتعرفني وتعرفك بعد تعرف اخلاص وأمي.. ليش ماخذ فلوس من المرة..
فلت لسانه : دختولي هاي گح... اصلا..
رائد : ابوي انطاك اكبر من مقامك.. امشي جدامي وديني عليها مااصدگك انت ماينعرف صدگك من چذبك..
محمد : لا شنو اوديك عليها.. هي منو هاي خاطر تنزل روحك علمودها..
رائد : مو علمودها.. بس مااريد اكلان تبن وانه تعبان.. خو انت بلاويك وراي وراي.. كل يوم جاييني الطلابة للمقر والصياح والفشار.. امشي يله لاتضوجني..

ضل يجر ويعر لحدما طلع ورحت وياه.. دلاني ع المنطقة والبيت مبين هذاك هو.. شبهة وموخوش.. سيارتين حكومية واگفة بالباب وزلم طابة وطالعة..
عاينت لمحمد : ماتخاف على روحك تتمرض يصيرلك شي.. عار خزي مالاگي اليفرك حلگك..

سكت لأن يدري بروحه غلطان.. نزلنا وطبيت عادي.. اجتني وحدة ثلاثينية چنها سكرانة بالگوة تحچي.. بوية لعبت روحي..
- : اهلا عيوني.. تفضل المن رايد..
محمد : هيفاء اريدها..وينها..
- : ها الرجال من طرفك.. موجودة بغرفتها..
رائد : ماافوت انه.. اريدها تطلع جيبيها ماعندي وكت..
تقدم عليها يحاچيها بس ماسمعته شيگللها.. فاتت رأسا وره شواي اجت وحدة لگف والحاجب طاير.. شيطانة.. كعدنا بالحديقة وحاچيتها.. بعد كلام فهمت السالفة.. هاي صاحبته.. ماخذ منها فلوس بحجة ماعنده بعدين يرجعلهيا وماكلهن عليها.. انه اسمع ودمي يغلي.. شحال لوما اخلي فلوس بيده كلما اطلع.. افضله على روحي بهواي شغلات.. بعدين يروح يگدي من هاي وهاي.. عاد ياريتها تستحق الواحد يحچي هيج جدامها..

هيفاء : هسه عيني انه اريد فلوسي.. مااعرف منك لو من اخوك.. المهم ترجعلي..
رائد : اجيبلچياهن كاملات.. بس تغيرين رقمج وماتستقبلين محمد بعد..
هيفاء : اي هو احنا علاقتنا شبه مقطوعة باقين علمود الفلوس مو اكثر.. شوكت تجيبلياهن..
رائد : باچر الصبح ادگلج تلفون تطلعين تاخذيهن.. لأن انه ماادخل هيج بيوت تجيني سمعة..
هيفاء : يله عيني اليسمع مايكول اخوه ابو نسوان.. تره انه ردت اشتكي عليك..
رائد : شوفي چي انتي مرة فمو حلو اهددج.. بس لمن تطولين لسانج علي لا افرك حلگج بالقندرة..  كمت وجريت محمد.. : باچر تجيج فلوسج..

عفتها وطلعت.. ادور ماعلي بس بنات الحرام.. بالطريق رزلته كسفت احواله.. راح فات وامي طلعت جانت نايمة.. ماردت احچيلها هي منا مقهورة..كتلها طلعنا بشغلة يم واحد صاحبي .. صعدت فوك حسبت خمسمية من راتبي وخليتهن على صفحة.. ثاني يوم الصبح اخذتهن وخابرت عليها.. طلعتلي انطيتهيا ورجعت للبيت.. بس منتحس من محمد.. دومه يفشلني ويخليني بمواقف سخيفة وتنزل الراس..

وره فترة انه وراجع من دوامي خابرني جدي.. شلته وحاچيته.. بالأخير كال : بوية اريدنك تجيني اذا ماعندك شي..
رائد : تأمر.. خوماكو شي..
شامخ : اكو جماعة جايين علي يردونك..
رائد : انه.. ليش شعدهم..
شامخ : ابنهم مكتول وانت كاتله..دازين جماعة للمقر مالاگيك.. كايليلهم طالع..
رائد : شدتحچي جدي الله يسلمك.. انه وين اتعارك..
شامخ : ادري بيك.. جايبيلي واحد عساس شيخ مأجري.. هسه بس تجي علمود اعرف شتصرف..
رائد : جاي بس مسافة الطريق..

يايابة حظي هذا يلگف المشاكل لگف.. سقت اسرع.. مااعرف شكد بس المهم وصلت أوكت شفت السيارات واكفة.. بيهن ستة سبعة.. طبيت من باب المضيف واشوف فوك العشر زلم واكفين من عدا اهلنا.. سلمت چان واحد يگب يغلط ويفشر..
- : انت لاتشوف روحك علينا ضابط وتهوبز براحتك..
رائد : اولا انه مااعرفك.. والحچي مو وياك.. الحچي وي شيخكم.. عدكم شي يمي..
- : لا الحچي وياي..انت كاتل اخوي..
رائد : وينه اخوك خلأشوفه.. عمي لا اعرفكم ولا تعرفوني.. هذا التبلي شنو معناته..
هم وديحچون اجه واكف من بره ملفوف راسه وچف ايده بباندج.. اول ماشفته عرفته.. چان يعاينلي بطرف عينه لمن رحت وي محمد لهذاك البيت..
اجه يريد يحچي وگبيت علي : اذا جايين من طرف الگحا... طلعوا احسللكم.. انت شفتك بهذا البيت... وانطيته العنوان بالمضبوط..  تره وحگ ربك اذبك وره الشمس..

وجههم صوفر.. حچه هذا المكتول : شيخ ماتشوفه شيحچي.. هاي عود انت شيخ..
شامخ : شيخ وأبا عن جد.. هذا الجايبينه انتم موشيخ..
- : لا مامقبول منك هالكلام.. تتبرى منا..
شامخ : بوية انتم منين جاييني.. لالكم راس ولاساس.. صارلي بكد عمر ولدي شيخ ادور تجي انت تلعب علي..  بوية رائد جيب أخيك السالفة ماتنفض..

تركتهم وخابرت على محمد.. دقايق واجاني..
كبل لا ادخل گتله : اريدك تخابر على هيفاء مدري منو وتجر لسانها.. هذول الجماعة من عدها..
محمد : هي دزتلي رسالة قبل چم يوم كالت شون اخوك يگلي افرك حلگج وانه ادزلكم جماعة يدفنوكم..
رائد : من امداها لرجولتك.. ادوسها بالقندرة.. بعدها الرسالة..
محمد : اي بعدها..
جريت التلفون منه وطبيت.. طلعت الرسالة قريتها جدامهم ومشيت التلفون عليهم واحد واحد..
صاح شيخهم : منو يگول هذا رقمها.. احنا ماجايين من طرف أحد.. ابنا كتلته واجينا ناخذ حگه..
رائد : رقمها وانتم جايين منها.. هسه ادز محمد للشركة وخلي واحد منكم يروح يشوف الرقم بأسمن..

انه گتلهم هيج وتسودنوا.. مايقبلون يرحون للشركة.. چي حينكشفون.. ادك ع الرقم ماتجاوب لوتية تدري حتوديهم بداهية.. رادوا يگلبوها علي بس وگفتهم وكتبت الرقم بورقة انطيته لمحمد وطلع واحد من الگاعدين وياه راحوا للشركة.. هم وديحچون هذا المكتول دك تلفونه ارتبك.. جدي جر التلفون من ايده وفتح حاكية رأسا..
اجه صوت بنية وكلنا سمعناه : ها وينك يمعود شسويت لهذوله الگواوي...

قفله وانطانيا.. رديتلهم الرقم بتلفون محمد والرقم بتلفون هذا الولد المكتول.. صاروا بهدومهم..
- : شيخ حتلو ابنكم مامسويلنا شي بس هو مهدد بتنا..
رائد : بتكم هاي سلمتها خمسمية عدا ونقدا بيدها گبل فترة.. وهياتها رسالتها لمن طلبت المبلغ مني وتحاول تهددني اذا مااسلمها الفلوس تخليني ادخل سجن معاقبة.. طلعت الحكومة بيد الگحا... وانه ماادري.. بس چي انه رجال عقلي براسي ومااخلي دوبي وي النسوان سكتت.. الا چا شرمتها نصين ..

شامخ : لا الكم حگ يمي ولا تعتبون عتبة مضيفي.. انه ادري هذا مو شيخ ولا انتم متأذايين من حفيدي.. بس اريدنكم تكونون على علم بفشلتكم.. يله بره..
دخلوا ثنين زلم من الحماية مال جدي طلعوهم وراحوا يصيحون وعادي چنهم على حگ.. بطلعتهم دخل محمد جايب ورقة مثل المستمسك انطانياها.. قريتها بيها اسم البنية هي هيفاء والمواليد يعني السيمكارت الها.. المهم انفضت السالفة لصالحي.. رجال ماشي بدرب عدل ويني وين هالسوالف.. جدي عتب على محمد شلون يسوي هيج.. اعتذرله واعتذرلي ولو مايقدم شي بس كلام.. ردت اطلع ماقبل.. كال اكعد تغده.. ماكلت لا لأن هلكان من التعب.. ترخصت منه ورحت جوه غسلت وخابرت امي.. انه واكف يم باب الترك واحس اكو شخص وراي.. بس ماانداريت.. خلصت مكالمة وانداريت شفتها..

خدها مشخط وأحمر.. جفن عينها مورم شوي.. دموعها بعيونها.. كلما اريد انساها تصير جدامي.. دخيلك يالله شلون عذاب هذا.. عاينتلي وبچت نزلت راسها وراحت لغرفتها.. ماگدرت اسألها شبيج.. مالي حگ عليها.. گبل لمن اسألها جانت حبيبتي وروحها بروحي.. بس الأهم مو لغيري.. ذبلانة وضعفانة.. ذاك اليوم شفتها متروسة وسمنانة.. البشر شگد تهلكه الدنيا..

شفت روحي شلون واكف بوضعية مقلقة وحدي هيج واتفرج على ماادري شنوه.. تمشيت للمضيف كعدت بين ما جابوا الغدة تغدينا وطلعت للبيت.. سبحت ونمت..

كعدت المغربية عرگان وراسي يوجعني.. نزلت لغرفة أمي اخذت براسيتول.. شفتها مطلعة چم صورة.. مااحب الذكريات ولا الصور بس ماادري ليش اخذتهن گلبت بيهن.. الأخيرة جانت الصورة الشفتها بيها.. ظفيرتها طويلة نازلة من چتفها لفخذها.. شابگة امي ومبتسمة.. اخذتها وصعدت فوك.. جبت قلم وگلبتها كتبت بظهرها چم بيت من قصيدة لعريان ماضل شي يتردد بإذاني من يوم زواجتها لحد وفاة ابوي وهذا يومنا غير هالبيت ..

" أعز من روحي أعزك وانت أعز مني ..
ياحسبك عمر خاويتها من صباي ..
بطلت صفنتي ومابطلت مني ..
أجس گلبي الفضي متعوب حد الويل ..
وأدعيله الصبر عن لا يفشلني .."

دنوة .......
مرت أيام مابيها شي غير التكرار.. نوم واكل وشغل.. هيج يعني.. بس وفاء لافتة انتباهي.. اشوفها تبتسم هواي بينها وبين روحها لو لمن تكمش التلفون.. ماادري شكو.. اگول تحچي وي عقيل قابل شعدها..ماحاولت ادقق.. شعليه..

الى أن بيوم عقيل كال اتأخر بالليل عندي شغلة وي صاحبي.. كملت تنظيف البيت وصعدت فوك تمددت داانام.. ضليت اتگلب مااجاني نوم.. كلت انزل انتظره يجي بلكت يجيني نوم.. الجو صنطة كلها نايمة بس صوت ضحك من غرفة وفاء.. شنو معقولة اجه وراح يمها.. للتأكد تمشيت للغرفة مالتها اسمع صوتها..
وفاء : ههههه.. عليك سوالف عفية ياريت كلها مثلك.. لا وحدي گاعدة كرومي نومته گبل شوي.. اشوفلي فديوم طالعين الجماعة واجي اشوفك..  لا يمعود ادور ينامون ومايكعدون هههههه..  اگلك حبي زوجي على جية خلاروح وبعدين نسولف.. احلامك سعيدة حياتييي..

انه ماادري شبيه من يمي كمت ارجف.. تخونه.. عزه العزاها ان شاء الله.. شنو ماعدها حرام عفية شنو هالناس.. هو ابد مامقصر وياها اصلا ينطيها اكثر منها.. حب واهتمام وفلوس حتى ملابس كل شهر تروح تشتري.. ليش تخونه..

فتحت الباب عليها بالعجل وخازرتها.. عاينتلي بهدوء ولا چنها مسوية مصيبة..
دنوة : ويامن چنتي تحجين..
وفاء : وانتي شعليج حبيبتي.. خصوصيات..
دنوة : احچي احسن مما اكول لعقيل هو يتصرف..
وفاء : چنت احاجي اخوي.. شنو ميصير الأخت تحاچي اخوها.. لو هم لازم استأذن..
دنوة : لاتچذبين.. انه سمعتج وبسيطة صبرج علي الا اخلي كلشي كلتي يوصل لعقيل.. حتى الچلب احسن منج.. ع الأقل وفي..
انداريت دااطلع واجت كمشتني من ايدي لوتها وسدت حلگي : وروح ابوي اذا حچيتي حچاية وحدة البسها براسج.. تره هذا شرف.. يعني مو تسولفين بكيفج.. لازم عندج دليل.. وانتي شنو دليلج بلا زحمة.. هاي بس سمعتيني.. اشكال نسمع.. روحي لغرفتج وصيري حبابة خوش حبيبتي.. يله وردة..
عضيت ايدها ودفعتها.. طلعت رأسا خفت تضربني على بطني ادور اطرح.. صعدت فوك وافكر بهاي.. منين اجيب دليل.. لازم اسوي شي.. مايصير هيج..

بمرور نص ساعة اجه عقيل.. وگفت ع الدرج واشوفه شلون يحاچيها بأحترام ويسألها على حالها هي واكرم.. ادور هي شلون تمثل.. قابلية عجيبة.. انقهرت.. درت وجهي وصعدت فوك.. تمددت وهو اجه سبح واجه يمي يبعد بشعر گذلتي..
عقيل : مااستقبلتيني شعجب.. متعود عليج..
دنوة : اي بطني شوي توجعني اليوم..
عقيل : هاا.. ارتاحي چا لاتجهدين روحج..
تقرب علي شبگني ويمسد بشعري.. ماكدرت انام للفجر يله اجاني النوم..

وره يومين كاعدين انه وعقيل بالغرفة فوك.. هو جايب حب وكرزات ديكرز ويتفرج فلم.. ردت ألمحله عليها مااعرف ابقى ساكتة..
دنوة : عقيل اريد اسألك سؤال..بس لاتفهمني غلط..
عقيل : گولي عيني..
دنوة : هم تفتش بتلفون وفاء.. تشوفها ويامن تخابر..
دار وجهه علي بإستغراب : لا.. ليش..
دنوة : هيج مو گتلك لاتفهمني غلط..
عقيل : خوش.. ماافتش ماعدها أحد بس امها وخواتها..
دنوة : ليش ماعدها أخ..
عقيل : لاع منيلها..
اختنگت من الچذب مالها.. شلون هيج مخليته يوثق بيها.. هي هاي شكول ثقة.. الا شوي ولساني يفلت مني واحچي كلشي.. بس اخاف أتضرر انه..فسكتت..

بمرور عشر أيام انه كل يوم اسمعها تخابر وتضحك وتحچي على عقيل.. كل حچيها ومخابراتها لمن عقيل ماموجود.. هو وره ماگتله هم تفتش تلفونها كام يفتشه.. بس مايشوف شي.. عادي ينطيهيا ويرجع طبيعي.. هي تعاينلي وتضحك بمكر.. اكيد تمسح الرقم وماخذة احتياطاتها..

وره هالعشر أيام عمي وعقيل ومهران بايتين ببيت جدي علمود يطلعون الفجر عدهم شغلة نقل أملاك بالديوانية.. فبس احنا بالبيت.. كعدت بالليل مثل عوايدي جوعانة واريد أكل.. اخذت ماعون دولمة ورحت دااصعد فوك واسمع صوت خرخشة مال بتوت من غرفة وفاء.. خليته ع الدچة مالت الدرج وتمشيت للغرفة.. الباب من جوه يبين شكو بالغرفة.. نزلت وعاينتلها واشوف اللبس والمكياج.. حتى الذهب لابسته.. عيوني صارت بگصتي.. جبت التلفون بالعجل وانتظرتها تخابره.. وكفت على حافة الباب علمود ماأبين من جواه ..دعيت تخابر وماتخذلني.. ماكو دقايق وخابرته.. دكيت على عقيل رأسا..
جاوبني وصاح بيه : هاااا شتردين بالليل..
همست : عقيل فدوة اسمع شحسمعك وتعال للبيت بالعجل.. لازم تجي..
قربت السماعة من الباب بحيث الصوت واضح.. ماخذة بوزة صوتها عالي تگله انه بدلت حبيبي هسه اجي.. لا هذا ببيت جده.. يله مسافة الطريق..
ابتعدت عن الباب ورحت للهول.. : ها سمعت..
عقيل : فتحيلي الباب انه بره..

خليت ايدي على گلبي ورحت فتحلهيا.. عاينلي وعيونه حمر من العصبية.. هو ودخل چان تطلع السنيورة لابسة عباية ومخلية مكياج ومتعطرة عطر مال اسبوع.. وكفت وره عقيل واعاينلها وجهها كام ينطي ألوان..
وفاء : ها حبيبي شو هسه جاي..
دفعها ودخل.. سحلها للاستقبال وجر العباية منها.. شهگت وخليت ايدي على حلگي..  لابسة فستان لزك ع الجسم وگصيف.. يعني مبينة هيانها شنو نيتها.. جر التلفون منها وعاط : شنو رقمه هذا الگواااا...
وفاء : عليمن تحچي فدوة والله ماكو هيج كلام..

دفرها بخاصرتها ورجع سألها..
وفاء : نهايته اربعين.. فدوة لاتسويله شي..
عقيل : انه الج بت القنادر.. اليوم اكتلج خلاص..
خابر علي.. بس جاوبه صاح : حضر الچفن مالك يانغل.. اليوم ادفنك انت وهاي الساقطة..
شمره بالگع ونام فوكاها شبعها كتل.. يغلط ويفشر ماادري منين يكتلها بس خلص عليها.. امه كعدت وحنين حتى اكرم.. واكف بالباب ويعاين لأمه شلون تنكتل.. انقهرت علي ورحت اخذته على صفحة.. كمش دشداشتي بخوف ويبچي.. جفل من العياط..چان نايم..
اكرم : خالة صوت بابا يخوووف..
نزلت بمستواه وقربته لصدري.. شواي وطلع شايلها من زندها هي مدماية وشعرها مكفش.. اكرم راد يدير وجهه وشديت علي.. شيشوف.. منظر موسهل.. فتح باب الكليدور وشمرها هي والعباية فوگاها..
عقيل : امشي طلعي.. طالق بالثلاث انتي وابني يبقى يمي.. مااريد يتربى يم الگحااا..

ام عقيل : يمة اخذها لأهلها لاتعوفها هيج مايصير.. تبقى أم ابنك..
عقيل : هو طالع أوديها واكسر راسها وراسه هذا السرسري.. سدي الباب وراي مااطول..
ضلت تتوسل بي مايروح يتعارك وتبچي.. هو وين يسمع بعد اعصابه صايرة نار.. اخذ السويچ وگومها صعدها بالسيارة وطلع رأسا..

اخذت اكرم غسلتله واقره على راسه.. هواي مريت بهيج مواقف لمن چنت صغيرة.. ابوي يجي يصيح ويكسر الغرفة انه گاعدة بالركن واتفرج علي.. اخاف يرگع شي بيه.. أيام مرعبة مااتمناها لأي طفل وشخص سواء شاب مراهق او أيا كان..

اخذته وصعدت فوك نيمته يمي.. فتحتله كارتون وانتظر عقيل يجي.. متأكدة سويت الصح.. مايصير تبقى تخونه حرام علي انه اسمع واسكت..  جبت التلفون خابرته.. ماجاوبني.. انتظرت نص ساعة ورجعت دگيت جاوبني..
دنوة : وين صرت..بالي عليك..
عقيل : بالطريق.. اكرم وينه..
دنوة : هياته يمي..
عقيل : خوش.. هسه جاي..
سديته ونزلت طمنتهم وضلينا ننتظره.. شواي واجه..
ام عقيل : ها يمة شسويت..
عقيل : طلگتها وخليتها يم أهلها.. تگلي الا اصدق عقد السيد واخذ اكرم.. كتلها بيج خير روحي صدقي.. رأسا اخلي محامي ياخذ الحضانة منج لأن موشريفة.. وهواي أمور تمنعج تاخذي..
ام عقيل : شوف شون تفكر الدماغ سز.. وانت شمخطط يمة..
عقيل : شني شمخطط يوم.. هاهيه طلگتها وابني يمي شحدها تاخذه اشك حلگها بالقندرة..خلأروح انام وراي سفر..

گام صعد وانه صعدت وراه.. اجه اكرم حضنه ويبچي بحضنه.. هو گعد يحاچي ويقنعه يشتريله شيريد.. سكت ماكال شي..فرشتله بالگع وخليته يتفرج.. كعدت يم عقيل ايده ترجف ويتنفس بثگل..
دنوة : تحتاج اسويلك شي..
عقيل : ليش ماگتيلي من زمان..
دنوة : گتلك وحاولت ألمحلك بس مافهمتني.. وهي تمسح الظاهر ماتخلي شي فلهيج ماكشفتها..
سكت.. حسيت بتأنيب الضمير.. شبگته كزوجة كاملة.. اريد اخفف عنه : اسفة.. انه انقهرت لمن سمعتها لأن انت مامقصر وياها فليش تسوي هيج..

حاوطني من خصري وراسه على متني.. تمددت وهو على وضعيته متمسك بيه..
عقيل : دنوة مكسور.. ماتوقعت والله.. شگللهم ليش طلگتها..
دنوة : شحتگللهم.. خوما تحچي الصار..
عقيل : لا مستحيل.. مايضلي قدر يم أحد.. طلگتها بسبب المشاكل ماكو غيرها..
دنوة : على راحتك.. نام هسه عندك سفر..
سكت وضل على وضعيته لحدما غفى وغفيت وراه..

مرت فترة والكل عرف بطلاگهم.. بس مايدرون بسالفة خيانتها .. هم فشلة تنحچي.. بس احنا بالبيت نعرف.. اكرم الوحيد كاسر خاطري.. تمرض وبالليل يهذي يريد أمه.. عقيل رافض رفض قاطع ان تشوفه.. فأحاول انه اخفف عنه.. بالنهار اخلي يمي بالمطبخ واشتغل واسولفله نكت وقصص.. گام يكيف علي وهو يجيني يريد اكعد وياه.. العبه واتفرج وياه تلفزيون.. شوي شوي تحسن وبلش بتغاضى عنها.. بس دائما يسألني عليها واگله مابيها شي بس هي مسافرة وتتأخر.. عقيل اندارلي وضل يهتملي لمن راحت وفاء.. خصوصا بعد ما شافني أداري اكرم..وبالحالتين محيفرق شي..

ببداية الشهر الثامن حسيت روحي ضايجة نفس الشي يصير يومية.. خابرت عقيل هو بالشغل..
دنوة : عقيل اريد اطلع..
عقيل : وين تروحين..
دنوة : اروح لبيت خالتي أغير جو.. واخذ اكرم وياي..
عقيل : خوش بس خليها هي تجي تاخذج..وانه بالليل لمن ارجع من الشغل اجي اخذكم..
دنوة : ماشي شكرا..
عقيل : هلا بيج..
سديته وكمت لبست هدوم مرتبة وفوگاهن عباية.. بدلت لاكرم وخابرت خالتي.. كالت هسه اجيج.. كعدت أتانيها نص ساعة واجت اخذتني.. ماگتلها شصاير على وفاء انه وعدت عقيل مااحچي لأحد.. بس كتلها أمه ببيت اهلها وجبته وياي.. وصلنا للبيت وضيفوني مثل كل مرة مايقصرون..

اكرم كاعد وخجلان مايعرفهن..
احنا ونسولف تارة كالت : اگلج حبي.. ابوج عنده شخص يعرفه هنا بالمنطقة..
دنوة : لا مااعتقد.. ليش..
تارة : شفت سيارته واگفة يم بيت بعد چم فرع من عدنا گبل اسبوع..
دنيا گرصتها وتحاول تلوف الموضوع : لا هاي ماتعرف سيارة ابوج.. ماشفته انه اشو بس هي..
تارة : والله انه شفته شبيچن ماتصدگني..
دنوة : لا مصدگتج.. بس اذا شفتها اتأكد اكثر..

سديت الموضوع مااريد يتعاركن.. بس بقى ببالي.. بالليل اجه عقيل طلعت خالتي سلمت علي ورحنا.. مرينا من الفرع الثاني صحت : عقيل اوگف لحظة حباب..
عقيل : ياستار.. شكو..
دنوة : فوت بهذا الفرع.. اكو شغلة اريد اتأكد منها..
عقيل : شني شمالج مسودنة.. احچي..
دنوة : فوت واحچيلك والله..
دخلنا للفرع وبنهايته صدك شفت سيارة ابوي واگفة.. يعني كلام تارة صحيح.. معقولة نفس الشخص رايحله.. لا موهيج السالفة.. يمكن متزوج.. اي اكيد مو يمكن.. بس ليش ماگايل .. خاف عنده اسبابه..
عقيل : احچي هسه شكو..
دنوة : حلا گلتلي على بيت حلو تصميمه وردت اشوفه.. تكول يشبه بيت عيالها..
عقيل : هي هاي..
دنوة : اي والله..
سكت ماكال شي وانه همات رجعت للبيت ساكتة..

بمرة كاعدة بالليل يم اكرم داالعب وياه هاي اللعبة مال صور.. فات عقيل كعد يمنا ويتفرج علينا.. گومه ويحاچي..
عقيل : بابا حبيبي روح يم بيبيتك نام اليوم..
اكرم : بس خالة كالت تنام يمي بعد..
عقيل : انه اگلك روح باباتي.. يوم واحد مايأثر..
اكرم : ماشي يوم واحد..
ضحك واخذ غراضه وراح..

كام قفل الباب واجه يتمشى بإتجاهي.. اخذني لحضنه وايده تمسد بظهري .. مااعرف أول مرة هيج اذوب بيده.. رحت وياه للچرباية بدون نقاش.. بلحظات هادئة ورومنسية گدر يتملكني بأسلوب يقنع أنوثتي.. ماادري بروحي والكلمة طلعت لا اراديا من حلگي : رائد شبيك كافي..

ماانتبهت لروحي شحچيت بس حسيت على راشدي قوي سطر خدي.. فتحت عيوني شفت عقيل بس متدروش ويتنفس بقوة.. كمش ايدي حيل ولواها..
عقيل : شني شگلتي بت النعال..
دنوة : شگلت عقيل..
عقيل : من نعلعلا شرفه لرائد الگواااا...
كام مني ولبس.. ضربني راشدي وسحلني من الچرباية.. صرت بموقف فاشل ومستحيل اكو أفشل منه.. صار شهور وي عقيل ليش هسه حچيت.. مدااشوف اكو تفسير واضح.. ضل يضرب بيه ويفشر ويغلط.. انه احاول أبررله الصار مو بأرادتي وانه ناسية رائد..
نزل يمي جرني من شعري وضربني بالكنتور.. كمت اشوفه عشرة.. بچيت وحيلي كله مهدود.. گام وبلحظة حسيت بوجع فضيع ببطني.. ضل يضرب بيه بخاصرتي وبطني..

فجأة وابتعد..عيونه تحولت من عصبية لخوف وحيرة.. گومني بس كمت خرگة.. عاينت جواي شفت الدم وتخبلت.. كمت ابچي بحرگة وهستيرية.. كمشته من تشيرته وساندة روحي علي.. بطني صارت تتگطع.. اجه لبسني وطلعنا.. صاح على حنين اجت نزلتني وياه.. ماادري شصار ومنو اجه دخت واريد الألم يروح.. دخلت للمستشفى واجت الدكتورة اخذتني لردهة تريد تمددني ع السدية.. كمشت ايدها واصيح من الوجع..
دنوة : دكتورة فد مااكدر امدد.. بطنييي..
- : ماما ضروري.. بس مددي هسه انطيج مهدأ..
حاولت امدد شلون ماچان واجت شكلت الكانيولة خلتلي ماادري شنو وتكلي سوي هيج وهيج والوجع يتقلص تدريجيا.. بعدين نمت ماادري شصار..

كعدت شفت ام عقيل كاعدة يمي وحنين وخالة ابتسام.. اجت يمي تمسد بشعري وكامشة ايدي..
دنوة : شصار خالة..
ابتسام : سقطتي يمة.. بس بيها صالح..
دموعي صارت بعيوني.. : شلون..
ابتسام : الطفل ميت ببطنج صارله اسبوعين..
طكيت بچي : شنو خالة شدتحچين.. ليش ميت..
ابتسام : ملفوف الحبل السري على رگبته..
شبگتها وابچي من كل گلبي.. فوك الموقف الفاشل ادور يطلع الطفل ميت ببطني.. شكد حظي فگر من يوم يومه.. ضليت ابچي لحدما دخل عقيل وطلعوا كلهم.. درت وجهي قرفانة منه.. وكف يمي ورافع حاجبه بتكبر..
عقيل : الحمدلله ع السلامة..
ماجاوبته..

رجع حچه : دنوة تعبتيني انتي.. شتردين اسويلج وتقبليني.. احبج واداريج وشتردين اجيبلج.. اشكال تتنسين واخلي بحضنج.. بطلت أمد ايدي عليج واعتذرتلج بكد شعر راسي.. كلنا حبينا بس مالزگنا هيج..
درت وجهي علي وبچيت : انت اخذتني خاطر تكسر ظهر رائد مو علمودي.. ماتريدني اصلا.. ماخليتني احچي واوضح موقفي.. انه ناسيته ماافكر بي.. اذا احبه صدك چا گتلك هيج بأول يوم اخذتني بي مو هسه.. وره شهور يله..
عقيل : هذا لايمنع ان انتي غلطانة.. تعرفين الفزة الفزيتها لمن سمعت اسمه بهيج وضع.. يعني انتي متخيلتني رائد.. ماحاسة بوجودي..
دنوة : كتلك موهيج الحچي وفهمتك.. افهمني ارجوك انه تعبت من المشاكل والكتل.. لو مطردني بره البيت ولا كاتلني وانه چنت...  غصيت وبچيت بحرگة انه واتذكر شلون چنت بدون هدوم وهو يكتلني حتى مارحم بيه.. مو لهالدرجة..ع الاقل يسترني مو حيوانة انه..
عقيل : شلون صرتي هسه..
حركت راسي يعني زينة..

دنوة : اخذني لبيت جدو.. مااريد ارجع للبيت..
سكت..
دنوة : عقيل احاچيك لاتعبرني.. اخذني حباب.. انت ترتاح وانه ارتاح ووعد مااگول عقيل كتلني وسقطت..
عقيل : اخذج ميخالف بس كومي على حيلج..

اجه گومني ويعدل هدومي.. انه جرحته لمن كتله رائد وهو جرحني ضعف.. ماانكر غلطتي.. بس مو هذا عقابها.. لوما الطفل ميت ببطني چا هو موته..
طلعنا ولمن وصلنا نزلني وي خالة ابتسام لبيت جدي.. اجه ابوي خايف أول مرة اشوفه هيج.. حضنته وابچي على صدره مهضومة من الدنيا شكد أذتني..
محيي : الحمدلله على سلامتج بابا..غير تنتبهين لمن تنزلين..
سكتت وبلعت ريگي.. اكيد گايللهم طاحت من الدرج..  دخلني جوه تمددت بغرفتي.. بقيت يمهم وخالة كلساع تسويلي عصير وتنطيني مسكنات وتخليلي من هذا الچيس الحار على بطني لأن الوجع يتناوب.. ساعة قوي ساعة يخف..
كل گرابتنا اجوي علمودي.. واولهم خالتي وبناتها.. شبگت دنيا وبچيت.. ادري بيها تفهمني هسه حست بيه شكد مقهورة.. 

ابوي اخذني انه وخالة ابتسام ورحنا للدكتورة.. مانزل هو بس انه وياها..فحصتني وانطتني ادوية مسكنة وعلاجات.. شوي تحسن كدرت ارجع طبيعية امشي واروح واجي..

بهالفترة انه گاعدة بالليل مايجيني نوم.. تمشيت ع الراديو اگلب بي چان يدك التلفون.. عقيل..
شلته.. : هلو عقيل..
عقيل : شونج بوية.. خوما متوجعة..
دنوة : لا زينة صرت..شعجب تذكرتني..
عقيل : على بالي ودائما اجي بالليل اريد اشوفج الگاج نايمة..
دنوة : اي انعس من وكت من وره الدوة..
عقيل : اكرم مشتاقلج ويسأل عليج..
دنوة : حبيبي انه همات مشتاقتله.. جيبه باچر يمي..
عقيل : تدللين.. اخذي راحتج خاف تردين تنامين..
دنوة : ماشي.. مع السلامة..
سديته ورحت تمددت وضليت اتگلب لحدما اجاني النوم ونمت..

ثاني يوم اجه اكرم الصبح جابه عقيل.. اجاني يركض للغرفة.. انه واكفة يم الميزتواليت داالبس الشال.. فتح الباب ويعاينلي هو ويضحك : ماما دنوووة..
فتحتله إديه واجه حضني..شميت ريحته مثل الأخليلهيا ومهندم نفس هندامي.. كعدته يمي اليوم كله تونست وياه واضحك على سوالفه چنه شايب يضحك..  بالليل اجه عقيل وفات للغرفة.. اعتذرلي وباس راسي..
عقيل : شوكت ترجعين للبيت.. مكانج فارغ..
دنوة : هالأسبوع انه اخابرك عود..
عقيل : ان شاء الله.. يله بابا امشي للبيت..
اجه باسني من خدي ويمسح بأصابيعه على جفني بي زراك من ايد عقيل..
اكرم : هثه (هسه) تصير دينة (زينة) ماما دنوة..
دنوة : هههههه.. ياروحي ان شاء الله..
اخذه وراح.. انه علمته يصيحلي ماما دنوة علمود لايحس بنقص الأم بحياته..

وره چم يوم سمعت رائد متعارك.. تفاجئت.. مايتعارك هو شعجب هسه هيج.. اجه هو ودخل للمضيف بعدين من فضت عرفت السالفة من وره محمد.. انه طالعة من غرفة قصي چنت يم مرته نسولف.. شفته واكف يم باب الترك ويخابر.. وكفت قريب علي واسمع صوته بوضوح.. عيوني غرغرت بالدموع ماگمت اشوفه بس اشوف غواش..
هو يحچي بهدوء ورزانة : اي يمة بس اتغده واجيج.. لاتكلفين روحج عيوني.. ارتاحي..
سده واندارلي.. ردت اگله لو ضالة متمسكة بيك واريدك احسن من هاي المشاكل الصايرة.. احسن مما تطلع قطعة دتتكون بداخلي ميتة.. بس مايفيد نحچي كلشي صار وفات..

بنهاية الأسبوع خابرني عقيل ياخذ موافقتي على رجعتي كتله موافقة.. اجه اخذني بس ابوي رزله..
محيي : لاتشوفني سكتت يعني مااعرف..ادري بيك ضاربها.. بس الشفعلك الطفل ميت.. لو ماميت چا صار غير حساب..
عقيل : عمي الصار بيناتنا ماينحچي.. لو تعرفه تعذرني..
محيي : مهما يكن.. هذا ابنك او بنتك.. اكو واحد يكتل صلبه.. خلي عقلك براسك واذا اجتني دنوة مكتولة مرة اللخ يصير غير حچي..
عقيل : حاضر من عيوني..
ترخص منه واخذني ورجعنا للبيت.......

يتبــــــــــــــــــــع....................