رواية اسألي عني الليالي الفصل الثاني وأربعون 42 - بقلم رقية جاسم

قناة التليگرام

حساب الانستگرام

الـبـارت الواحد والاربـعـون................

بهاي ال٣ ايام جنت داغسل مواعين العشه..سمعت صوت الحجية تكله لرائد اسم الله يداده..شبي الرجال ..سديت المي ورحت للصالة حتى ايدي بقى بيهه الزاهي..عاينت لرائد : منو..ماجاوبني..اخلاص حجت مناك..
اخلاص : ابوج متخربط بالمستشفى..
رائد بصياح : شي ميخصج لا تدخلين بي..الف مره كايلج .. يله دروحي منا ..اندار علي.. عيني روحي بدلي اخذج..
مجاوبته..درت وجهي وصعدت فوك انه وابجي..شبي ليش متخربط..ليش هشكل صاير..بعده مو حيل جبير .. من صحتي على صحته والله..

لبست شلون مجان حتى مشفت من الدموع..نزلت بالعجل اخذني ورحنه..طول الطريق بس ابجي رائد يهديني وانه بالطالع..
رائد : يابة سكتي..هسه نوصل انطيني مفكة..
كتله انه وابجي : انت ماعندك احساس..
رائد : ميخالف..يله نزلي وصلنا..
نزلت وهو اجه وراي..طبيت جوه عمامي موجودين وجدي همات بس البنات مشفت احد منهم..شذى ماكو..شعجب .. هي وياه خطوه بخطوه..اجه وكف بسدي وحجة وياهم
رائد : شلونه هسه..
فيصل : خلوله اوكسجين ودننتظر الدكتور شيكول..

عفتهم يحجون وكعدت ع الكرسي..دنجت ودموعي تصب ما سكتت..اجه وائد كعد يمي..حاوطني من جتفي بدون ميحجي شي..وره دقايق اجه الدكتور..رفعت راسي ارد اسمعه شحيكوللهم..
قاسم : بشر دكتور..
الدكتور : ماريد اخوفكم .. بس جلطة دماغية..مبدئيا وضعه مستقر بس لسانه حيصير ثكيل بصعوبة يحجي .. فلازم يرتاح .. بس اريد احجي مع شخص منكم..
رائد راح وياه شوي واجه بس وجهه مصوفر..
شامخ : هاه شكلك الدكتور..
رائد : كال بس يفيق يكدر يطلع..

گلبي ضل يلعب..ليش اجه مثل المصدوم بس من سألة جدي ما كال شي..اكيد كله شي وميقبل يحجي .. ضلينه ننتظر نص ساعه تقريبا وراهه صحى..ردت اطب رائد كمش ايدي
رائد : اصبري..يطلعون ودخلي شوفي براحتج..
سكتت..انداريت علي : شكلك الدكتور..
رفع حاجبه ودنج : ما كال شي..
سكتنه ثنيناتنه..وره ربع ساعه طلعو..عمي فيصل والباقين رجعو .. بقى بس جدي واحنه..رائد كلي فوتي شوفي .. طبيت لكيته كاعد..كعدت يمه بسته من راسه..كتله : شلونك يابة .. شلون صرت..

جاوبني والحرف بالكوه يطلع منه .. وصوته ناصي .. گلبي انعصر عصر..حسيت روحي صارت بزردومي..كمشت روحي ماريد ابجي جدامه..هو بيا حال واجي انه اضيفله..
محيي ببطؤ : يابة ارد احجيلج شغلة..
دنوة : عيوني الك..بس لا تتعب روحك..احجي ع كيفك .. كمش ايدي وحاجاني..
محيي : عرفت بسالفة السحر شذى مسويته .. تعاركت وصيحت .. عفت البيت وطلعت لبيت جدج..حسيت عيوني غوشت وراسي يوجعني..وراها مادري شجابني هنا..
راد يكمل كام يبجي..يريد يحجي ويخونه لسانه..ميكدر ينطق بسلاسة مثلنا..حضنته كمت ابجي..طكيت متحملت

بس ما خليته يشوفني..كمت ابجي بدون صوت .. شكد انقهرت .. مجنت متخيله من حيعرف حيسوي هج..شكد كبران بحيث من موقف بي صياح انجلط..ادور حالته تقهر يريد يحجي ميكدر..يغص بالحجي..مسحت دموعي وابتعدت عنه .. مسحت دموعه..كتله : الله يسامحهه..ليش هيج تسوي بروحك هسه منو يفيدك..ضليت كاعده يمه شوي بعدين دخل رائد وكف يمي تحمدله ع السلامة..ابوي بالكوه يحجي خطية .. بس كال الله يسلمك وسكت..رائد كمشني من جتفي وعاين ع الباب..يعني نطلع..بسته كتله : شوي وتطلع..حرك راسه يعني ماشي..طلعت بره..

رائد : تباتين عنده..
دنوة : ها صدك..
رائد: براحتج بنيتي..
دنوة : اي ابات..يمكن شذى مو بالبيت..كال خوش .. جان يجي الدكتور بيده ورقه..كال يكدر يطلع..وره ربع ساعه طلعنه نزلت انه وي ابوي بالبيت و رائد همات..بس جدي وصلناه للبيت ابوي كله انت جاي من سفر فتعبان .. طبيت للبيت لكيت سما ورزان دينظفن والكزاز بالكع..حتى الجامة مكسوره .. رزان كامت تبجي من شافت ابوي شلون يمشي خطوه خطوه اجت تحضنه ما بادلهه شي..عاينلهه بنفس النظره الجان يعاينلي بيهه من جنت اتلكاه من يجي من شغله وابتسم .. اكول بلكت يلين گلبه وياي..اسويله الاكل وحد..اعرفه شيحب وميحب .. والحمام احضرلياه ..

ماردت رزان وسما يتعاملون بنفس الاسلوب والطريقة..اذا امهم غلطت فهم مالهم دخل .. احاجي من نكون وحدنه احسن..طبينه للصالة وابوي راح للغرفة .. كال ابدل واجي .. انداريت على رائد ..كتله : شفت شلون يحاجي رزان..
رائد : شفت..وادري..
رفعت حاجبي : شمدريك..
رائد : سمعته يحاجيج بالمستشفى..
دنوة : ها..زين شكد اضل هنا..
رائد : بكيفج..اجيج عكبة احسن..
دنوة : اي زين..كام وكف .. دنج باسني..حتروح..
رائد : اي حبيبي..امي تريد دواها..هم يالله الكى صيدلية مفتحه هسه..بالج على نفسج وابوج..سلميلي علي

ابتسمت : ماشي..راح طلعت وياه سديت الباب وطبيت .. بالباب جان تجي سما حضنتني وتبجي من كل گلبهه .. مفهمت شبيهه..سكتت لحدما سكتت..
سما والدموع بعيونهه : دنوة..ابويه حيطلك امي..حتى طردهه من البيت..احنه وين نروح .. والله هي متندمة وتريد تعتذرلج حبابة احجي وياه..
مسحت دموعهه وبستهه : ميخالف..عاينت علي باستغراب
سما : تدرين على شنو تعارك وياهه..
دنوة : اي حجالي..اذا حسوي شي فالج انتي ورزان .. لأن عشت سنين ابوي ميحبني بسبب امي..فماريد انتو هم تعيشون هيج .. اما امج متستاهل اسوي شي علمودهه .. مو تزعلين مني..بس السوتلياه هواي وانتي تدرين شلون تأذيت .. هسة كلشي راح وانه ححجي وياه تدللين..

جرت نفس وطبت جوه..قفلت البيبان وفتت وراهه..ابوي توه طلع من الغرفة
محيي : شنو وين رائد..
دنوة : راح يجيب الدوه لامه..كال سلميلي علي..
محيي : الله يسلمه..هذا الجنت اكول حيأذي بنتي طلع احسن من الحية الخالهه ببيتي..
دنوة : ارتاح ولا تتعب نفسك..تاكل شي..
محيي : لا ماريد..حروح انام..
دنوة : مثل متريد..راح للغرفة ينام..انه نزعت الصاية والشال وكعدت الم بالكزاز..كملت جان تجي رزان بيدهه بتيته وكبه ضلت صافنه ع الطباخ..كتلهه : شبيج..
رزان : ماعرف اسوي اكل..
دنوة : تعاي كملي بمكاني هسه انه اسوي الاكل..كمت غسلت ايدي وسويت الاكل بين ما هي كملت..راحت صاحت سما واجت..انه جنت متعشيه فما اكلت..

ضليت كاعدة وياهم .. سما كامت تبجي تريد امهه..ديحجون جان يدك التلفون .. كامت رزان شالته..طلعت امهه..كلتلهه شوكت تجين مشتاقيلج ومن هلحجي..من سدت الاتصال تغيرت ملامحهه..
سما : ها شكالت..
رزان : كالت خابرت الشيخ عكبة يجي ويجيبهه..
دنوة : جدي يعني..
رزان : اي..بس ميدري على شنو الموضوع..بس حيجي وهي تجي وياه..كالت هو ميرفض طلب ابوه..
كلت بگلبي والله هاي تلكفهه هي وطايره..شلون كبل راحت على جدي..وابوي اكيد ماحجاله شصاير..ادور هم يرجع يصير عصبي..مشى الوكت..البنات صعدو فوك وانه نمت جوه خاف يكعد بالليل يحتاج شي..ثاني يوم ماصار شي .. البنات التهوا بقرايتهم وانه ضليت يم ابوي..

خطية تعبان فد دور .. ويحتاج واحد وياه خطوة بخطوة خطوات ثكيلة ولسانه همات ميكدر يحجي عدل..انه احاول ما احرجه وماريد يحجي ويتعب سويت الغده وهو سويتله اكل وحد بدون دهن .. صبيتلهم اكل بالصالة وابوي اخذتله الاكل للغرفة..عاين علي وابتسم..
محيي : تعبتج بويه..
دنوة : تعبك راحه..الله يطول بعمرك يارب.. عاينت لايده شلون بالكوه يشيلهه من الماعون..كعدت يمه سويت الاكل قطع صغار خاطر ميتعب من ياكل..ضليت كاعدة يمه لحدما خلص .. اخذت الصينية ورحت للمطبخ..طبيت للصالة البنات ماكو والاكل بالكع..حتى ماشالوه..شلون يدارون ابوي اذا رحت .. شذى ولو سوت بي هج بس تبقى مرته واكيد حتداري

لو بيدي اضل يمه بس رائد شلون..هو هم مريض .. ابوي يحجي ع الاقل..بس رائد ع الصامت ولا يفك حلكة.. هسة متأكدة دتوجعه بس ميحجي..اغسل المواعين واروح اخابره .. غسلت المواعين ورحت لابوي اشوفه خاف محتاج شي.. لكيته متمدد..غطيته ودنجت بسته..كتله : حاخذ التلفون اخابر .. اشرلي بايده يعني اي..اخذته ورحت للهول..خابرت على رائد عباله ابوي..كتله : لا..انه دنوة..
رائد : ياهلا..شلونج حبيبي..
دنوة : زينه..ردت اسأل عنك..شلون صارت رجلك..
رائد : زينه اليوم احسن من البارحة..عمي شلونه..

دنوة : الحمدلله..باجر تجي شذى..مادري ابقى لو ارجع .. شوكت تنزل للواجب انت..
رائد : عكبة..بكيفج بنيتي..ابقي اذا تريدين..
دنوة : ها..مادري اشوف.. حسيت صوته مخنوك ومتوتر ماعرف شبي..كتله ..شبي صوتك..
رائد : مابي شي حبيبي..
كتله ها..بس گلبي يلعب..اعرفه وحافظته .. ليش ميحجي والله حيخبلني..حجينه شوي بعدين سديته..مشى الوكت.. العصر اجه عمي قاسم هو وخالة ابتسام وسرور وعمي فيصل همات .. كعدو بالصالة وابوي وياهم..سرور هو ويحجي تعاين علي..مادري شتقصد..بقو كاعدين وانه وياهه رحنه للمطبخ .. صبيت جايات قدمتلهم واحنه عصاير..سألتني ع الحمل متدري حامل..كتلهه اي صار ٣ اسابيع تقريبا..ضلينه كاعدين حجتلي على حسام..

عقيل وروان طلعو من يمهم سكنو بغير بيت..كالت رجعو حبايب كله حبيبي وحياتي..عفية شكد انغث منهه هاي روان..سوالفهه مال جهال ومتعرف شتسوي بس الغيرة عاميتهه..هي هم جانت مثل جلنار..يعني ضرتي .. بس بعمري ماغرت منهه ولا ضجت جي عقيل يروح يمهه .. بس هاي جلنار اذا جابت اسم رائد احترك..شحال لو يصير يمهه مدري شيصير بيه بوكتهه.. سألتني على رائد..مدري منو كايللهه مريض..كتلهه بعدهه رجله وميقبل يروح لغير دكتور .. ماشفت واحد عنودي مثله..همزين انه مو عنودية..ما احب هاي الصفة..هو عنودي باسلوب..يعني يسمع شنو اريده يسوي ويكول اي بس ميسوي..شلون طبع..بس يله..كلشي من رائد حلو..

سرور : اكلج هو ابوج ليش هيج صار..
دنوة : متعارك وي شذى الحية..
سرور : ليش ياستار..مو خبصتج بس تحجين شي حبيبي محيي وحبيبي .. لو بس بالاسم..
دنوة : لا مو هج..بس ذيج الفترة من تمرضت..هي مسويتلي السحر..ابوي عرف وتعارك وياهه..
سرور بشهكة : عزززه بعينهه..شنو من بشر هاي.. ما انقهرت من شفت حالتج شلون تعبانه وما تكدرين تحجين
دنوة : ماعدهه گلب..شكد اكرهه..انه جنت ادري اصلا .. سمعت رزان وسما يحجون..هم اجه ببالي ابوي..كلت اذا عرف شيسوي بيهه..ويمكن يكره البنات على كرهه ..
سرور : تستاهل..خل يكرهه..متستاهل محبه حتى

دنوة : على كولتج..بس انه انقهرت ع البنات..ماريد يتعاملون مثل ما تعاملت انه..تذكرين من جان اذا اجه ولكى الاكل بعده ما صاير شيسوي بيه..يكتلني علمود اكل تخيلي ..
سرور : اي والله صحيح..لا تقهرين بروحج موزين عليج .. هسة هو زين وياج الحمدلله..و رائد يمج..وانه لازكة بيج بكل وكت..اي خاف عبالج..
دنوة : ههههه..قابل كلهه تلزك مثلك..بقو ساعة وراحو.. خلص باقي اليوم عادي .. ابوي ماسأل عن شذى ولا كال..ثاني يوم كعدت الصبح سويت ريوك لابوي ورافعه الدشداشة لخشمي ريحة البيض تلعب روحي..يالله بلشنه كعدته وكمشته من جتفه..من يكعد من النوم يدوخ كلش يكلي مدا اركز فاخلي يكعد شويه بعدين اكومه على كيفة ..

خلص ورجع للغرفة جبتله الاكل ..كمل واخذته غسلت المواعين وكعدت وياه ع التلفزيون ساعه وكمت اسوي الغده..البنات ابوي ميخليهن يروحن للدوام..حتى المدارس اكثر من نصهه وكفت..مشى اليوم عادي للعصر اندكت الباب..طلعت افتحهه طب جدي وشذى وراه عيونهه مورمه..شافتني جان تنصدم.. فاتوا جوه .. ابوي جان كاعد بالصالة..من شافهه وجهه صار احمر بالكوه حجى
محيي : شجابهه هاي..
شامخ : اكعد نتفاهم..
محيي : ما اتفاهم..متصيرلي مره بعد..
شامخ : يعني شلون نضل واكفين..اكعد بويه..
كعدو..انه واكفه بالباب مطبيت..

شامخ : ما ادري على شنو متعاركين..شي يخصكم هذا .. بس بناتك كبار ويحتاجن امهن..
محيي : خلتاخذهن وتروح..ماريدهن..
شامخ : لا تغلط نفس الغلطة القديمة..اذا هي غلطانة فالبنات مالهن علاقة..بويه اسمع مني..خلص لا تريدهه.. بس منو يداريك..البنات يجي يوم يروحن ودنوة متزوجه هم تحير برجبها وعيالهه لو تحير وياك..تبقى وحدك.. ليش بويه .. عندك مره وإن غلطت..
محيي : يابة ماتعرف شسوت..وانه مابيه حيل احجي .. حيلي وصحتي راحن من وراهه..وتريد ارجعهه..
شذى : والله ما احجي ولا حجاية..ومستعده اعتذر من دنوة بس رجعني..اريد بناتي وبيتي..كعدتي ماتحلى بدونكم .. شتريد قابلة وداعت العشرة..

محيي : ليش بقت عشرة بعد الصار..
هي سمعت هيج كامت يم ايده..كمشتهه وتتوسل بي يقبل يرجعهه .. انه بس ساكته واسمع .. ضلت تتوسل وتبجي .. ابوي ما عاينلهه ولا اخذ ايده منهه..
شامخ : يعني حتخليهه تضل هيج..دتطلب رضاك لتسوي بيهه هشكل جدام بناتهه وبنتك..عيب..
محيي : ارجعهه..اذا دنوة كالت..انه ماتأذيت بعملتهه .. بس بنتي تأذت..مع ذلك..اذا رجعت مالي حك عليهه وجيتهه بس لخاطر البنات..ماريد اظلمهن مثل دنوة..
شامخ : يعني هاهيه..
محيي : كتلك الموضوع راجع لدنوة..
جدي اندار علي..شذى تعاينلي بنظرات تريد اكول ميخالف .. صدك كلتهه : مسامحتهه..لخاطر البنات..

مسحت دموعهه وكامت..راحت ع البنات تحضن بيهن وهن هم عبالك صار سنه مشايفتهن..ما حاسه بشعور امك تكون بعيده عنك وبعدين تنجمعون..يمكن شعور حلو ومحزن بنفس الوكت .. رحت جبت مي وحلاوه لجدي..شرب منه وراهه نص ساعه وطلع..كمت اشيل الماعون..صاحني ابوي
محيي : حترجعين لبيت رجلج..
دنوة : ميهلي اعوفك يابة..رائد قابل..
محيي : لا بويه..ارجعي لبيتج..شذى هنا..انتي هم تعبانه
ماردت اخلي يحجي اكثر .. هو تعبان اصلا..كتله ماشي وكفت ع السنك اغسل الكلاص والصينية اجت شذى يمي .. كمشتني من زندي عتنتي..
شذى : خاف عبالج تخليني انهان يم محيي كدامج .. لا حبيبتي غلطانة..

اول وتالي يرجعني لأن هذا البيت مسجل بأسمي..وبعد لا تجين لبيتي..
انصدمت من حجيهه..ابوي شلون يسوي هج..كتلهه : انتي جنتي ماكو وابوي مريض وحده..شلون اعوفة..
شذى : اي بناته يمه..انتي شكو منبصة روحج..
دنوة : بناتج ملتهيات ولا يمهن ابوهن..انتي متستاهلين فلس احمر يصير باسمج..عاد بيت شكبره هذا ظلم وكفر
شذى : لا والله..شو متعرفين تحجين انتي..خاف ما استاهل وتزعلين..يله ولي خابري رجلج يجي ياخذج..
شلون تحجي بقسوة ولا عدهه ذرة حب الي..خفت تسوي شي بأبوي لو تغثة مادري اروح لو ابقى..اخاف يصيرله شي .. الغصة صارت بزردومي..صاحت بيه

شذى : يله مو احاجيج..التلفون بالغرفة..روحي خابري يجي ياخذج..تره اسوي مشكلة مصايره..بكيفج..
دنوة : اي رايحه وخري ايدج..بس اريد اكلج ليش سويتي هشكل..جان كلتي لابوي ماريدهه رجعهه لبيت جدهه.. ليش خليتيني ما اعرف منو ديحجي وياي..نسيت حتى روحي .. وانتي تتمنيلي الموت..ليش..
شذى : والله هذا العندي..كتلج من البداية ماريدج.. ماريدج يابنت الحلال..لزكتي ليش..بعدين اني مرة ابوج..مو امج لو مرة عمج حتى ادللج..
دنوة : ماكتلج دلليني..بس ليش تسوين هج..
شذى : لوما تزوجتي جان حالتج اسوأ بعد..
مادري شجاوبهه..وكفت شعري راسي بحجيهه..معرفت شكول مدري مصدومة مدري حجيهه يسم البدن..

عفتهه ورحت للغرفة خابرت على رائد..كتله تعال اخذني .. رحت فوك لبست الصاية والشال ونزلت كعدت بالصالة يم ابوي..حضنته وبسته من راسه .. كتله : يابة..دير بالك على روحك .. فدوه اروحلك واذا شذى حجت شي لا تهتملهه..موزين عليك..ضليت يمه شوي بعدين اجه رائد..سلم علي وسأله على صحته..بعدين طلعنه .. بس گلبي ضل هناك..خايفة علي مو بيدي..رجعنه للبيت .. كلهم كاعدين بالصالة..بس اخلاص ماكو كعدنه وياهم بس مالي نفس احجي شي .. مقهورة على ابوي..شكد ما ضربني وأذاني بس من شفت حاله متت قهر..شكد قوي وضخم.. بس من شفته هاي الفترة كلشي متغير بي..صوته ومشيته .. جسمه وهواي شغلات..الله كريم

بقيت كاعده شوي بعدين صعدت فوك..نزعت الصاية والشال..اخذت ملابس رحت اسبح صارت اخلاص بوجهي..
اخلاص : شعندج جايه..
دنوة : ليش شعندي..مو رجلي هنا..
اخلاص : ابقي يم ابوج داري..خطية بي جلطتين..
عاينت عليهه مستغربة..وجسمي رجف بنفس الوكت..كتلهه : شنو جلطتين..هو الدكتور كال وحده دماغية..
اخلاص : اي مو كبل صايرتلة قلبية بس ميدري..ووضعه خطر هسة..يعني بس يضوج يصيرله شي اسم الله..
دنوة : ببيش طالبته..مابي شي لتجذبين.. دارت وجهه واشرتلي بيدهه..كالت اسألي رائد يعرف احسن مني .. عفتهه وطبيت للحمام اسبح..كمت ابجي وايدي على راسي .. ليش يجذب علي..ليش دائما يضم عني وميحجيلي..

هسة حيضل گلبي يلعب..ضليت ابجي لحدما خلصت وطلعت .. طبيت للغرفة رائد كاعد ديكلب بالتلفزيون..ما عاينتله نشفت شعري ورحت تمددت..جسمي تكسر صار يومين بس انام بالكع لو ع القنفة..اجه حضني..وخرت ايده..كتله : شتريد .. وخر ايدك اريد انطمر..ماريد اكعد بعد..
رائد : شبيج حبيبي..
عدلت كعدتي وانداريت علي : ابوي بي شي وانت ما حاجيلي وها ..لا تكلي لا مابي شي..تره ادري..هسة اخلاص كلتلي .. ليش تضم علي..تخليني اعرف من هاي وهاي..داحجي كمت ابجي خليت ايدي على وجهي وابجي..اجه حضني وخر ايدي ومسح دموعي..

رائد : باباتي..يعني شلون اكلج وانتي حالتج صعبة..هاي بمكان ما اخفف عنج تردين اجي اكلج الدكتور كال كيت وكيت اخاف عليج والله..واخاف كلمة تأذيج..بس اسمعي مني .. معليج باخلاص..هاي متجوز من سوالفهه..
دنوة : بس المفروض تكلي..
رائد : اعرف شوكت اكلج..بس انتي مستعجلة..
ضل يعاين بعيوني..مادري شجاني..تقربت منه حضنته كمت ابجي من كل گلبي..حضني ويهدي..كتله انه وابجي : انت هم حتتمرض هلكد ما هامل روحك وتعوفني وحدي..بعدني عنه وابتسم..مسح دموعي وباسني..
رائد : يعني انتي ما مصدكة رجلي زينة هسه..يولي شعوفج متكليلي..شعندي غيرج انه..لو افر الدنيا ما الاكي مثل حنانج وطيبتج وفطاريتج..تعاي بحضني..

البارحه بالليل كلساع اكعد اكول خاف دتبجي ومحد يمهه هنا منو يخليج تبجين وانه موجود..
حضني ويعدل بشعري..كام يحجيلي وكل شوي يضحكني .. يريد ينسيني..تذكرت صوته البارحة..كتله : رائد..
رائد : عيوني..
دنوة : اكو شي بالشغل..احسك متضايق..
رائد : لا ماكو شي..هلمرة ما مطول..بس اريدج تديرين بالج على نفسج..ماشي..
دنوة : ماشي.. حضني ويلعب بشعري ويحجيلي حجي حلو نسيت كلشي بس مبتسمة ..شوي وانفتحت الباب .. فاتت بت علي طيبة..
طيبة : عمووو بيبي سارة تريدك جوه..
رائد : شعلتو شيبه لعمو..جاي يابة جاي..

عكدت حواجبهه وراحت..متعرف شكال..ضحكت اندار علي
رائد : اي ضحكي ضحكي..اليوم شيخلصج مني..
دنوة : ها هيج صارت..خلاروح يم الحجية احسن..كمت اروح كمشني من ايدي..كعدني بحضنه واديه محاوطتني من خصري..باسني من رگبتي..
رائد : مشتاكلج والله..هن يومين بس صارن هواي..
انداريت بسته وابتسمت..كتله : انه هم مشتاكككتلك..على كولتك..ليش متكول مشتاقلج..
رائد : مشتاكلج..شحلاتهه طالعة من الگلب..مشتاقلج هاي للنازكين مثلج..
دنوة : ههههه..طلعت نازكة صدك..
رائد : اي چا شنو..المن النزاكة اذا مو الج..

كمت ودنجت همست باذنه : فديت حبيبي انه..رحت لبست الشال وهو بعده مبتسم..ضحكت ونزلت..نزل هو ورايه .. كعد يم الحجية بالهول..خلص باقي اليوم عادي..بالليل بقينه سهرانين نساني الدموع والبجي..حجيتله على شذى شكلتلي كال مو بشر هاي..لتقهرين روحج..صرتي زينة والحمدلله .. ضليت اعاين بعيونه ومبتسمة..يمكن اول مره اعاينله بهلجرأه احساسي جان مختلف عن كل مرة..نمت بحضنه لحدما كعدت الصبح..لكيته مبدل وديرتب بشعره ع المرايه..جريت الروب من الكومدي لبسته وكمت..صبحت علي ورحت حضنته دنج شالني كعدني بحضنه ويعدل بشعري..

ماحجة شي بس مبتسم ويعاينلي من فوك ليجوه..عيوني وشفايفي..ايدي ورگبتي .. بعدين تنهد وباسني..كتله : دير بالك على نفسك..
رائد : تدللين انتي..
ابتسمت وكمت..اخذت ملابس سبحت ونزلت جوه..لكيته واكف يم الباب ديطلع..اشرلي بايده..رحت يمه..انطاني فلوس وراح مشى اليوم عادي..بين اخلاص وجلنار..بس الحجية واكفة وياي متخليهم يحاجوني..جلنار بس تريد تكول شي تسكتهه الحجية..انه بالعناد اروح يمهه اكللهه هم اكو مثل خالتيييي ادافعلي ومدللتني..هي تضحك..تدري بيه اقصدمن.. مرت ٣ ايام عادي..ماكو شي جديد..رائد خابر الحجية وره يومين بس سدته منه وجهه تغيرت ملامحه وضاجت ..

رحت يمهه احاجيهه..كالت مابيه شي..ماردت اضغط عليهه فعفتهه .. وره هلايام اندكت الباب العصر..رحت افتحهه صار علي بوجهي ووياه رجال صاعد بالسيارة..
علي : شنو ابقى واكف..
دنوة : لا فوت..الرجال طلع وعلي طب جوه..بس يعاينلي من فوك ليجوه..شكد اكره نظراته..تضايقني.. بالصدفة طلعت مرام..اجت حضنته وجلبت برگبته..شلون تحبه وهو عايفهم اصلا ولا يسأل عنهم..حضنهه وباسهه..بعدين فاتو جوه اجو كلهم يسلمون علي..اخلاص شلون تحجي وياه عادي ولا عبالك صار شي وباك اخوهه..بس الحجية من وره خشمهه سلمت علي..بالليل ما اجاني نوم.. اروح يم الحجية بلكت اكدر انام..نزلت بدون شال..كلت كلهم نايمين هسة..

ع الدرج صار علي جدامي..لابسه فانيلة وجتفه مبين.. درت وجهي بالعجل حسيته متقصد..ضل واكف بمكانه..
علي : شو كاعدة..
دنوة : مجاوبته..عفته ونزلت جوه..سمعت الحجية تخابر .. بقيت واكفه بالباب..تكلة يمه شنو نطلع لسوريا..وانت شلون نعوفك هنا..يمه لا تشعوطني بس فهمني شصاير..هسة انت شموديك لسامرا متكلي..شلون وي هذا الرجال انه..لا ماكتلهه شي ما اتبالش وياك انت اذا تريد كللهه..بس هي هم الهه حق تعرف مرتك وحتصير ام لابنك او بنتك..هسة درجع عود الله كريم .. خلاشوف هاي وين تاليتهه..سدته وطبيت انه..سديت الباب وكعدت يمهه : خالة ويامن جنتي تحجين..

الحجية : منو..ماجنت احجي وي احد..
دنوة : بس انه سمعتج تكليله وين نروح لسوريا..
الحجية : مو يمج حبوبة..هسة كليلي شو كاعدة ليش
دنوة : ما اجاني نوم وكلت اجي يمج..ضليت كاعدة يمهه نص ساعه وغفيت..بس گلبي يلعب..شدتقصد ليش دتضم علي .. والله تعبوني هذول بس يضمضمون..هسة قابل انه صغيره .. ضلت الافكار ببالي ونمت..ثاني يوم تفطنت بابوي..سويت الغده ورحت لغرفة الحجية..هي جانت طالعة بس عايفة تلفونهه.. كالت كرابتهه مريض وراحت تشوفه..هم تتأخر يومين هج..خابرته بالكوه يحجي سوده عليه بعده..ماردت اتعبه بس سألته شلونك ولا تتعب نفسك وسديته..

بس گلبي عصرني عصر شكد انقهر من اسمعه شلون يحجي على كيفه ولسانه ثكيل .. سديته ورحت اصعد فوك.. صاحتني اخلاص..
اخلاص : وين وين..تعاي هنا..دتشوفين هاي الصالة .. اريد تغيرين الديكور مالتهه..وتشيلين الزولية بعد الجو بلش يدفى تمسحين الكع همات..
دنوة : شلون افر القنفات وحدي..
اخلاص : يله لج..عود حامل..تره بعدج بالبداية ماعليج شي .. لا تسوين السوالف هاي..يله خلصي بسرعة خاطر تصبيلنه اكل..اريد اروح انام نعسانه..
عفتهه وصعدت فوك..تخبلت..كامت تصيح..من كل عقلهه اسوي كل هذا..حتلو مو حامل بس يتعب .. شلون اسوي وحدي ظهري ينكسر..

داطب للغرفة جان تجي كمشتني من زندي وجرتني للدرج..عثرت بالباية بس كمشت الدرج.. صحت بيهه : لج شبيج..شتريديين..
اخلاص : لا وتصيحين بعد..امي وماكو..بيمن تستكوين بعد وها لعلمج..تره بعد يومين يله تجي..اطمني يعني..
خفت تدفعني لو تسويلي شي..نزلت كنست الزولية..ضليت صافنه ع القنفات..شلون افرهه..اجه علي شافني..
علي : ها شو صافنة..
دنوة : اريد افرهن وثكال..
علي : انه اسويلجياهن..
دنج شال الزولية لفهه والقنفات صارن وحده مقابل اللخ والكراسي ثنين ع الحايط..اجت مرام..
مرام : هاي شنو دتكربين على رجلي متستحين..
علي : كاعد ماعندي شي وهي حامل متكدر وحدهه..

عاينت علي بطرف عينهه وراحت..شال الزولية طلعهه بره كمت مسحت الصالة ورحت صبيت اكل..كعدت وياهم اتغدى .. خلصت ورحت فوك بالعجل..ادور تكلي تعاي سوي هج شغلة واخاف منهه تسويلي شي من ارفض..خلصن اليومين هذن بالاهانة..بس احجي يجي الحجي يرزلني جدامهن .. هن مكيفات هسه حتى لو اريد اعوف البيت بين ما يجي رائد لو الحجية..وين اروح..ابوي ومريض..اخاف علي ينقهر ويصيرله شي فأضل بالبيت..بس احجي ما اسكت..مع ذلك ياكلوني حتى لو حجيت..علي ما سوالي شي بعد..

وره هليومين راح جي رائد حيجي..ع اساس اذا اجة محيعرف جان هنا .. مدري شلون يفكرون..ادور لا كال اخذ مرتي ولا حجة .. وهي ساكتة ما كالت شي..شنو ناوية تبقى يمنه يعني..مادري شنو مسوين وشمفكرين يسوون..ماحجوا وانه هم ماسألت .. بس سمعت علي كبل لا يطلع بيوم كال بعد ٣ ايام اروح لسوريا اشوف الوضع..وراها اجت الحجية استعدلو وياي..هي راحت وعافت تلفونهه..همزين اجت ماتأخرت..رائد ماخابر .. ضل بالي ليش هيج يسوي ادور راح واحس بي شي..بنفس اليوم العصر خابر الحجية..كللهه باجر اجي الصبح..شوي ارتاحيت همزين حجه وخابر..

مشى اليوم عادي..اخلاص والبنات بس كاعدات يم جلنار ويسولفن ما سألت شبيهم..شعليه.. ومنا الحجية فمحد يحجي ثاني يوم اجه رائد.. لاول مره ماكو مشكلة الحمدلله كعدت الصبح غسلت وجهي ولبست الشال ونزلت..جان واكف يدخن يم الدرج والجنطة يم رجله مدري شعجب محد اكو هلكد ما مشتاقتله كمزت حضنته .. كام يضحك وباسني..
رائد : يولي وصخ مترب شحالي..خلاسبح اول..
همست انه وحاضنته : احبك هيج..احبك بكلشي..
رائد : اخ يابة..غير اعشكج بعد عيوني هالعيون..امشي فوك مشتاكلج بكد رحمة الله..

اخذت الجنطة..حاوطني من جتفي وصعدنه فوك..طبينه للغرفة نزع القميص واجه حضني ويلعب بشعري..
رائد : خوما اذوج..
دنوة : لا الحجية موجوده ما تخليهم يحجون شي..
رائد : انتي هم احجي..ماريدج فاهية..
دنوة : ها ليش..
رائد : يعني لازم اكو سبب دا اكلج هيج..انه يمج بكل وكت.. هسة اروح اسبح جيبلي ملابس وخاولي..

باسني وراح للباب..
ابتسمت ..اندار وراح للحمام .. رحت للكنتور طلعتله ملابس وخاولي..دكيت الباب..طلعلي ايدة..خليت الملابس بايده..سحبني للحمام وقفل الباب..كتله : ها هاي شنو ميصير..خلص وتعال..
رائد : لا..اليوم اريد احس بهلشعور..

اخذني من ايدي فتح المي تنكعت ملابسي..هو مبتسم ولا يمه عادي..خلص وسد المي..جريت الخاولي تلفلفت بي..كتله : هسه انه شلون حطلع..
رائد هو ويبدل : ابقي هنا..شعندج طالعة..
دنوة : هاااا..ابقى هنا..ديله منو يجيبلك ملابس بعد.. ضحك وراح..صحت : وييين..دجيبلي ملابس حباب..
رائد : اي اي ميخالف..
راح وره شوي اجه انطاني الملابس..لبست وطلعت.. مشى باقي اليوم عادي..رائد طلع العصر كال صديقة عازمة مدري وين..الحجية وره الغده كلتله علي جان هنا..ضاج بس ما راد يبين لأن هو راح بعد..بالليل ع العشه اجه..تعشينه وكعدنه بالصالة..جلنار ولا طلعلهه صوت من يوم الاجه طه من بيت عمامه لحد هسة..

جانت كاعده هي ومرام بالصالة اللخ بس طه يمي يعضعض بالكعك..رائد عافهم يحجون وتجى راسه ع القنفة..كام يغفي..كمت غسلت حلك طه وديته لجلنار ورجعت للصالة همست : كوم نام فوك..كال اي وراح بيده مدري شنو بعلاكة..بقيت جوه نص ساعه وصعدت..رائد كاعد يم التلفزيون ديشكل الديفدي..سديت الباب ورحت يمه..حضنته وبسته من خده : شديسوي الحلو..
عاين علي وابتسم.. ظلينا گاعدين سوه ونسولف
حچه كلام غامض ع الفراق وإنه لازم اصبر واتحمل بدونه
دموعي صارت بعيوني : ليش وين حتروح..

رائد : ارد احجيلج..ماريد اضم عنج بعد..بس ماريد بجي ودموع..شوفي يابة..تدرين شغلي شلونه..وانه انقلت لبغداد .. ووضع بغداد متأزم فد دور وسامرا بعد اكثر..بس هاي شسوي هو الشغل هيج متوزع..اخذت اجايز هواي هلشهور بعد ما اكدر حتى اتغيب يوم واحد..انفصل..كبل فترة انه وراجع من الواجب جانت سيارة سوده تلحك وراي .. حاولت اخليهه تيهني..افتريت اكثر من فرع بعدين ضاعت ورجعت للبيت..نفس السيارة تلاحكني صار اربع شهور وتجيني رسايل بالتلفون من ارقام مجهولة..اذا ارجع ادك ع الرقم يطلع مغلق..حتى رسالة من رقم دولي وصلتني..كله تهديد بإسم شغلي والمكان الاشتغل بي چي اداوم بسامرا..

اكو واحد ضابط استشهد بالواجب شيعي هو..انه وياه بنفس المكان نشتغل..تدرين الطائفية هسه بفلس..يردون يركبوها براسي عود انه كتلته..انه حتى مشيت بجنازته والله وكعدت بالفاتحة يوم وطلعت لسامرا..شلون اكتله عاقل مخبل .. هاي السيارة من يوم استشهد الضابط اشوفهه بدربي..مابيهه رقم حتى .. صارتلي هاي السوالف هواي..بس كبل اسبوعين اجتني رسالة يكلي ديربالك على اهلك لا يضيعون منك..انت ما ينكدرلك بس هم سهلين..فاتفقت وي واحد صاحبي عنده شركة مال نقل بري لسوريا ببغداد بالمنصور..ححجزلكم عنده بس اروح لصديقي هنا بالبصرة هو يخابره..

انه جان عندي رقمه بس السيمكارت كسرته جبت غيره..انه ماروح .. بس انتي وامي والحجي واخلاص مال تبقون هنا مستحيل .. انه اذا وحدي ادبرهه سهل..اضل ببغداد ما انزل للبيت.. لحدما اشوف الله شلون يفرجهه..

انه اسمعله وفاكه حلكي..يعني احساسي جان صح .. اكلة شبيك يكلي مابيه شي وينكر..يعني كل هذا صاير وهو ساكت حتى مافكر يحجيلي..من هاي كلساع يوصيني صيري كوية ادور انطاني الاغنية..كمت ابجي واشهك..اجه حضني ويسكت بيه..كمت ادفع بي وابجي بالزايد كتله : انت منا وابوي مناك والدنيا كلهه من جهة لخ..ليش متحجي لييييش .. ليش خليت السالفة تكبر..حتعوفني وحدييي .. وحديييي مثل ما ابوي سوى..

تهسترت كمت ادفع بي ماحسيت على روحي .. هو عايفني على راحتي ما كال شي..اخر شي رحت حضنته واعصر بتشيرته..حيلي انهد هلكد ما بجيت..
رائد : كافي كافي..هسة شكو حجيت..
دنوة : ليش جنت ناوي تسكت اكثر..
رائد : لوما انتي ما يهمني شي..انه كتلهه لامي بس وصيتهه متكول..اعرف شلون احجيلج..
تنهدت ومسحت دموعي..يعني لازم اسافر واعوفه..شلون والله گلبي وجعني..كمشت ايده البيهه الحلقة..

ولا شفته نازعهه بيوم حتى من يسبح تبقى بايده..كتله : ماريد اروح..شلون اعوفك وحدك..
رائد : لا ميصير..كلهه سنة وترجعون..
شهكت ودرت وجهي علي : سنههه..هواااي هيج..
رائد : اسمعي مني..انه اذا ضليت ببغداد محد يجي يمي بس انتو هنا خطر..انتي وامي واخلاص تهموني اكثر من روحي والله..محمد هناك..
دنوة : هناك..شوكت راح..
رائد : انه دزيته كبل اسبوع..كتلة كول لامي حبقى ببغداد بعد عشر ايام .. خوما ادزكم عليك يا الله..هسة كاعد بشقة ومأجر الشقة الثانية الكم شوي اكبر..سوريا اغلب بناياتهه شقق..فهو هذا الموجود..

حيتنظركم محمد بالسيدة زينب .. ياخذكم لمنطقة سكن بيهه.. كال الحجر الاسود..مرام عبالي اخابر ابوهه ياخذهه بس خالتي كالت اخذهه وياي.. اذا راحت لبيت اهلهه ميرجعونهه بعد.. علي الجلب ماكو..ادك على رقمه يطلع مغلق .. دزيتله رسالة بعد ما اعرف اذا حيشوفهه لو لا..
دنوة : والحجية تدري..
رائد : اي كتلهه..انتو بس تطلعون اخذ فلوس واقفل البيت وابقى ببغداد..اشوف وين تاليتهه..
دنوة : ام علي والبنات والحجي شلون..
رائد : خالي يروح وياكم..خالتي والبنات حيرجعون لبيتهم لا تخافين عليهم..

دنوة : ها..هيج يعني..
رائد : اي..كومي خلاروح انام..منتهي من التعب..
كام..رفعت راسي وكمشت ايده..كتله : وابوي..
رائد : عكبة اخذج تشوفي..كوليلة حسافر..
كمت حضنته ودموعي بعيني ..كتله : شلون اعوفك..واعوف ابوي..والله ما اكدر..منا انت مريض ومنا حتضل وحدك من الصبح لليل بالواجب..گلبي وجعني من هسة..
رائد : سلامة كلبج بعد گلبي هلگلب..مابيه شي وداعة عيونج هاي لخاطرج دااخذ الدوه يوم بيوم..هسة احسن..ابوج خابري كل فترة..وانه هم اطمنج عنه..
راح طفى الضوه بقى بس ضوه التيبل لامب..تمدد وصاحني .. حضني ونام..

انه مكدرت انام..ضليت اعاينلة الف حسبه تجي ببالي..كون يطلع كلشي حلم وافز منة الاكي رائد كاعد يمنه عادي..شيوديني لسوريا شلون العيشة هناك .. الله لا ينطي كل واحد زرع الطائفية بين العراقيين.. هسة هو بيهه عليهه ديصيرله هج..ادور خايفة علي..خاف يصيرلة شي..ضليت افكر للفجر يله نمت..ثاني يوم المغرب راح رائد لهذا الرجال الكال علي..يحجزلنه..الحجية ساكته تكول ماكو غير حل.. مبين علي متوتر مدري انه احسه هيج بس ميريد يبين..مادري شكول..خلص الحجي..ذاك اليوم جان يكلي بس نتزوج اضل يمج شهر..

وهسة يادوب اشوف اسبوع..ليش هيج حظي..بالليل داسوي عشه جان تجي جلنار بيدهه طه..كعدت تحاجيني..
جلنار : اكلج شنو حنسافر..شوكت ليش..
دنوة : مادري..هسة يجي رائد ونشوف..
جلنار : هاي شلون مشكلة..هسة اقل شي نبقى سنه .. اذا مو اكثر..انوب منعرف احد هناك..اكلج اني دخت..
دنوة : انه دايخة اكثر منج والله..هج بالعجل اجه حجالي
جلنار : والله ماعرف..شكد طبعه غريب..
دنوة : اي صدك..دنحجي جان يجي رائد..نصيت النار ورحت اشوف شسوى..
الحجية : ها يمة شسويت..

رائد : حجزتلكم عند شركة الاتحاد العربي بالمنصور .. انتي ودنوة وخالي وجلنار واخلاص..طه ما ينحسب..الفلوس من تروحون تدفعوهه..بعد يومين تطلعون
الحجية : شلون اعوفك وحدك ييمة..ليش هج معرض روحك للخطر..ورمت گلبي حرام عليك..
رائد : يمة هذا حجي شبيج..فوك ما خايف عليكم تكليلي هيج هسة شكو..كومه ناس طلعت لسوريا..بس انتو قابل..
الحجية : طلعو ولا ما طلعو..انه داحجي عليك..
رائد : اذا اضل ببغداد ماعلي شي..بس اريدج ادارين روحج وهاي هي..تفض على خير ان شاء الله..
الحجية : ميفيد بيك الحجي..
رائد : اهو شلون طلابة هاي..

حطت الشيلة على عيونهه كامت تبجي..كام حضنهه وباسهه من راسهه..عنده اسلوب يعرف شلون يقنع..عفتهم يحجون ورحت كملت الاكل..كعدنه نتعشى بس الاكل ولا بي طعم .. كلنه متوترين..حتى اخلاص سكتت ما حاجتني شي.. كملت عشه وصعدت فوك..تذكرت اخر فترة رائد كام ميخلي اخلاص والبنات يطلعون للكلية..هو اصلا الوضع جان منخرط يوم اي عشرة لا..هسة صارو ميروحون ابد..رائد اجة وره ساعة..انه جنت كاعده داكلب بالتلفزيون..بس گلبي ما مرتاح من البارحة..شريد احجي خاطر يقنع..هسة اذا نضل بالبيت شكو علينه..بس هو شلون..

دخت والله..طفى الضوه واجه كعد يمي..حضني واخذ الريمونت نصى التلفزيون..
رائد : باجر اخذج لبيت ابوج تشوفي..
دنوة : تعال وياي..ما اريد ابقى يم شذى..بس اشوف ابوي وارجع..ساعة ..ساعة ونص بالزايد..
رائد : براحتج عمري.. سكتنه ثنيناتنه بعدين حجة ..شلون حفاركج..متعود عليج والله..متعود اكل من ايدج وانام بحضنج بس ميخالف..كله يهون ونرجع مثل كبل..
حضنته وخليت راسي على صدرة..كتله : شوكت نطلع
رائد : الصبح لازم انتو هناك..انه اوصلكم عود..خليت فلوس يم امي تكفيكم..محمد هم عنده..
دنوة : ليش هيج صار بينه..

رائد : ميخالف حبيبي..الله يفرجهه..اريد ادارين روحج والطفل ببطنج..وطمنيني عنج كل فترة..
حاوطته من جتفه وتقربت يمه..كتله : لا تكول هيج..يارب منطول ونرجع..تقرب باسني ويحجي بهداوة..بقينه كاعدين للوحدة ونص ونمنه..كعدت الصبح كبله..غسلت ونزلت جوه..ام علي دتودع الحجية والحجي..البنات مبدلات والجنط بيدهم .. ودعتهم كالت سلميلي على رائد..ماقصر..مادري شعجب ذكرته بشغلة زينه..يمكن حست ع السوالهيا .. وره ما طلعو نزل..البيت فرغ بس صوت طه يغنغن يريد رائد يشيله .. وضعنه تغير..

حتى محد راد ياكل..بس الاكل مصبوب مشى الوكت عادي..العصر بدلت واخذني رائد لبيت ابوي..سلمت علي ووصيته يدير باله على صحته..ولو گلبي وجعني انه واكلة هاي الكلمات بس شسوي موبيدي..رائد حجالة شصاير .. اول مره اشوف ابوي يتعاطف وياه..سأله على شغلة ووين حيسكن..هم كالة بالك على نفسك أزمة وتفض وترجع حياتكم طبيعية..شذى مرجعه علاقتهه بابوي .. هي وحده من الاثنين..لو هو يحبهه لو هي عرفت شتسوي خاطر تكسبة من جديد..شعليه بالحالتين انه ما اجي وحدي بعد .. الا رائد وياي..وهو ميكول شي عادي يجي ويجيبني .. بقينه ساعه بعدين رجعنا للبيت..

گضيت اليوم كله كاعدة يمه..صافنة شلون يحچي وحركات إيده وشفايفه وكلشي يخصه..لحد الليل عفته يحچي وياهم وصعدت فوك احضر الجنطة..اول ما فتحت الكنتور عطره دخل لأنفاسي..نسج خيوطه بين ذرات الهوى الأتنفسه.. گلبي عصرني.. جريت جنطة خليت بيهه هدومي وشالاتي.. صيف وشتا..لأن كال تبقون هواي..انه وگاعدة مديت ايدي ع الخانة اجر الشال.. تلمسته وابتسمت بقهر وتعب..حفارگه..اووف شلون بس .. مااگدر ياربي ساعدني..انطيني الصبر..ابد موصبورة بس من عنده تعلمت اصبر.. تنهدت وخليته بين الهدوم.. سحبت الجنطة وگمت اخذت شماغه نيلي طوخ.. لفيته على چف إيدي وقربته مني اشم بي..حلم مو..حلم ..مااصدك .. هسه أفز .. أفز الاگي بحضني يشم بشعري ويتغزل بي..

شواي وسمعت الباب انفتحت وانسدت..صوت السويچ ع الميزتواليت وأنفاسه ..هلكد ما الغرفة هدوء سمعتهن.. وخرت الشماغ من ايدي وصفطته..ماحسيت غير بإيده حاوطت خصري واللخ تبعد الشعر عن رگبتي بكل هدوء..
همس : شبيج بنيتي..
جاوبته بخنگة وصوت مبين جنت ابچي : مابيه شي..
ابتعد عني ودارني علي..عگد حواجبه بقلق..
رائد : باچية..

طگيت بچي..تقربت منه حضنته وابچي بحضنه..
دنوة : لاتبعدني عنك..خليني يمك..گول حلم..گول چذب ماترحون.. احجي شي..
مسح على شعري وهمس : ميخالف حبيبي.. هواي ناس طلعت لسوريا..انه خايف عليكم وهيج سويت..چا بقيتكم چن ماكو شي..
عاينت بعيونه وعيوني مغرغرة دموع : وانه..
رائد : انه اخابرچ دائما ابوية..وشوكت ماتصفى الاوضاع ارجعكم..
دنوة : ليش تحجي بدم بارد..انه ..ماادري.. گلبي يوجعني .. خايفة عليك ومااريد اعوفك..خلابقى يمك..حتى تقفل الباب وتروح لحدما تخلص دوام وترجع..
مد اصبعه يمسح دموعي ويحاچيني بهدوء : النار اذا لاحت بانزين على كومة هدوم شتسويلهه..
دنوة : تحرگهه غير..

رائد : انتي نار هسه..بنفس الوكت محترگة.. شلون ازيدلج بانزين..تردين تحترگين بالزايد..لازم طرف يتحمل خاطرف الطرف الثاني يتگوى بي..من احجي بهدوء مو يعني هادئ.. انه لخاطر هاي العيون دااسوي هشكل..ولخاطرج اتحمل كلشي.. فهمتيني ابوية..ليش انه محتعذب بهلبعد والغياب.. اهلي يبتعدون عني وانه طالع بواجب حياة او موت.. بس كله لخاطركم يهون..
صفنت بعيونه ودنجت : خنروح لبيت جدي..مو احسن..
رائد : انه اريد اطلعكم من العراق اجي اخليكم بنفس المحافظة بس اختلاف منطقة..چا شسويت بهلحالة..
جريت نفس وحضنته حيل..خليت راسي على چتفه واشم بعطر رگبته.. ايدي تمشي ع الجزء المبين من صدره.. مافديوم تجرأت وسويت هيج حركة..بس هسه حسيت روحي حفتقد لشي مااكدر اتناساه..

كمش ايدي وباسهه..گام وگومني وياه..قفل الباب وطفى الضوة.. حاوطني من خصري وشالني..استغليت ان الضوة مطفي وتقربت من شفايفه بلهفة وخوف من الفقد.. ساعات فصلتني من واقعي المرير بحياة مابيهه بس همسنا وأنفاسنا .. ليلة جريئة لعدم النسيان.. بعد هلوكت حضنته وراسي على چتفه اشم بي..
همس : دناوي..
دنوة : شنو حبيبي..
رائد : اريد انام وراي طريق..
دنوة : اسفة..نام ..
بادلني الحضنة هو ويمسد بشعري لحدما غفيت بحضنه.. ناسية او متناسية باچر شحيصير..

كعدني الفجر..لبست الروب ورحت سبحت..هو سابح گبلي.. اجيت بدلت ونزلت..

رائد اخذ ملابس اله وقفل البيبان وطلعنا..طه نايم بغير عالم..تمنيت انه بكدة وماعرف شديصير تمنيت حلم واكعد الكى رائد دينشف بشعره ع المرايه .. كل المريت بي هان وراح..بس هاي حتضل بگلبي..اروح والمسافة بيناتنه شكبرهه..مادري شحيصيرله وشحيسوي..

ابوي همات مريض ووضعه يوترني..عفتهم كلهم وراي وحسافر..ما اعرف شكول بعد..نمت بالطريق لحدما كعدتني جلنار .. الشمس توهه دتطلع..سيارات واكفة بره ورائد واكف ديحجي وي واحد رجال..نزلنه ..كتلهه : الجنط وين..
جلنار : اخذهن رائد صعدهن هناك..وأشرت ع السيارة .. اجه علينه..وعدهم كلهم وانه اخر شي..
رائد : بالج على نفسج..كلشي يهون وتتذكرين حجيي بعدين ماريدج فاهية..ابتسم وكال..حشتاكلج والله..

عيوني دمعت بس مبجيت..كتله : انه هم..ابتسم ورحنه للسيارة احنه جنه اخر شي ونطلع بعد..الحجية شكد قوية ما بجت بس ضلت توصي بي وباسته..وراهه طلعنه..انه كعدت يم الجامة ضليت اعاينله شلون واكف..لحدما اختفى طوله وصوت الناس كله راح..صارت السيارة كلهه هدوء..

مشت السيارة هواي والشمس طلعت..اكو بردة صغيره سديتهه..وانتجيت ع الكرسي..نص الطريق وكفنه يم مطعم ضلينه تقريب الساعة وراهه كملنه الطريق..على فجأة الرجال ضرب بريك قوي.......

يتبــــــــــــــع...........................