رواية اسألي عني الليالي الفصل الحادي وأربعون 41 - بقلم رقية جاسم

احلفلك واكول .. لشوفتك مشتاگ ..
ولدروبك انه ..
ودتني الاشواگ .. اعذرني ولا تزعل ..
متعني اشوف عينك ..
وارد ردود ..

قناة التليگرام

حساب الانستگرام

الـبـارت الاربـعـون................

دنوة : هيج..حب وجع راس..عاينتلي جنهه ما مقتنعه.. ماريد اتفشل جدامهه فما حجيت..رجعنا تكسي..رجليه كامت توجعني من الوكفة..طبينه للبيت..بالطرمه واسمع صوت هوسة منو هنا..طبيت للصالة.. هاي شجابهه..مرة علي هي وبتهه كاعدة ويم رجلهه الجنطة..
وائل : بعد وكت..جان بقيتن بره..
الحجية : رائد يدري..قابل وين راحن..هيانه السوك..
جلنار : شعجب مرام هنا..علي وين..
ام علي : علي..اووف ورم گلبي..كايللهه ادبر اموري هناك واشوف شغل وادز عليكم..
الحجية : بله هذا حجي..اكو واحد يذب عيالة بدون مصرف هاي مو العالم كلهه دتطلع لسوريا وي عائلتهه..هذا علي شنو ما تكليلي..لا حاير بروحه ولا بعائلته..
مرام : خالة شبيج وي رجلي..هسة فوك ما متهجول..

الحجية : يمه انه شحاجيه..دا احجي لمصلحتج ومصلحة بنتج هاي.. يعني اذا علي لا سامح الله صار بي شي منو الكم .. هو حتى ما مدبر عيشته..ماعرف بعد..براحتكم..
عفتهم يحجون وصعدت فوك..نزعت الشال جان تدخل اخلاص نظراتهه غريبة..سدت الباب وكعدت ع الكرسي.. سويت روحي ما مهتمه..بس انه اريد اعرف شجابهه..
اخلاص : اريد احاجيج بشغلة..
دنوة : اي شنو..
اخلاص : ادري رائد يحبج..حاجي اليوم بالتلفون.. كليلة اخلاص تعتذر..شكد حاولت وياه وماقبل..شسوي.. تره مالي احد غير رائد..ادور كطع بيه..
كلت بگلبي..والله صاكركم كلكم حبيبي..اي ليش لا.. اذا اللكمة هو يجيبهه والمصرف والملابس كلهه علي..ليش ما تحبي وتردين رضاته..كتلهه : ميخالف..وره العشه احاجي..

اخلاص : مو تنسين..وها شوفي..لا تكليله اخلاص هيج كلتلي لا عيني..انتي كليله من عندج..يعني شلونهه اخلاص.. دتنطيهه فلوس ومن هلحجي..اعلمج لو تعرفين..
دنوة : عرفت عيني عرفت..
اخلاص : ايييه..زين يله اروح انه..اشوف هاي مرام المصخمة بس لا ما يريدهه علي وذبهه هنا..هم رجال هذا عود..
راحت هي وتحجي وي روحهه..هسة صار علي مو رجال.. جا من وكفتيله وخليتي ياخذ فلوس اخوج شجان اسمه.. رجال لو شنو..هاي شتحس..شكد تضوج سوالفهه..عفت الهوسة كلهه ورحت سويت الاختبار..بس ما توترت لو شي عادي .. بعدني توني متزوجة ورائد ما كايل شي طلع خطين..يعني حامل ..

اخذت نفس وذبيته.. المن اكول..كلهم ملتهين وي مرام وبتهه..اكول لرائد..لا..خليهه من يرجع احسن.. طلعت ورحت للغرفة..سديت الباب وقفلتهه.. بدلت ملابسي.. لبست شال ونزلت يمهم..طبيت للمطبخ اسوي عشه..رغم الجو المشحون بالبيت بس جنت فرحانة..انه وداسوي بالاكل اجه طه يجلب برجلية .. ضحكت وشلته بحضني..لك شوكت تحجي..حتضل بس اما وبابا..ميشبه جلنار ابد..هي ملامحهه حقيرة وحاده وهذا بريء حتى من يكبر..مبين علي..يمكن يشبه ابوه.. الله يرحمه .. صفنت شوي..يعني اذا جلنار ضلت ويانه بعدين طه حيعرف برائد مو ابوه..لو يضل يكله بابا..بس عفيه ماريدهه تبقى.. ادور رائد يكوم يتعود عليهه..وانه وين اروح..

احبه وماكدر اشوفه يحاجيهه مو يجي يمهه..بس طه خطية.. ماريد يتبهذل..يبقى طفل ماله ذنب بكلشي..بسته وخليته بالكع.. صبيت الاكل بمواعين ونزلت اخذته..رحت للصالة.. البنات كاعدات : صبيت الاكل اخذو للصالة..تعبت بعد..
نور : مدتشوفين الملازم..دنقره..روحي انتي اخذي..
دنوة : تعبانه والله..شحياخذ من وكتكم..داحجي جان يفوت الحجي..خزرني وحجة وياي بنتر..
وائل : عوفيهن يقرن..روحي انتي سوي..كملي شغلج للاخير لا تضلين تذبين على هاي وهاي..
دنوة : بس مكتلهم شي..شنو بيهه اذا ساعدوني..
وائل : ديله روحي وكصري لسانج..لا تراددين..

دنجت خليت طه بالكع يمهم ورحت للمطبخ..ليش هج يفشلني جدامهن..شكد حقيرات..وهو هم حقير..اخذت السفره رحت افرشهه..اسمع نور تكلة فديتك خالو..وين اكو منك.. عمى الج ولخالج..مخلي كورته وي بنيه بكد بنته..جلنار ماكو.. مشفتهه لو بغرفتهه جان اجت على طه..يمكن كاعدة يم مرام.. هو الواحد من يضيع وحده من هذني يلكاهه بغرفة وحده منهن.. مسويات شلون لمه..خليت الاكل وصحتهم ياكلون.. جلنار نزلت من فوك..شصعدهه..هي متصعد ابد..ادور نزلت تتمضحك بوجهي وتغمزلي..مهتميت..كعدنه ع السفره كلنه..
جلنار : اريد اكللكم بشارة حلوه..
الحجية : خير ياطير..شعندج..
جلنار : تره دنوة حامل..بس مدري ليش ماحجت..
الكل كامو يعاينون علي..ادور وجهي احس كبت بي حراره .. هاي وكتهه تحجي..

بعدين شعدهه فرحانه..هيج تحبني يعني ما شاء الله..اول مره ادري..معرفت شجاوب..
ام علي : ها صدك..
سكتت مجاوبت..ماعرف والله لساني تربط..مكدرت احجي
جلنار : اي شبيج ساكته..دكولي شي..
دنوة : اي خالة..الحجية الوحيده باركتلي من گلبهه..الباقين على عمى عيونهم..عبالك مجبورين..ولو ماريد يباركون .. بس مبينه شلون طالعه منهم..انه مضجت على شي..بس خاف يكولون لرائد..وانه اريد اكله من يرجع مو هسة.. هاي شبيهه هي شعليهه..وشمعرفهه صدك.. كملنه وكمت اغسل..اجت اخلاص كمشتني من زندي..
اخلاص : لج صدك حامل..
عاينت لايدهه : اي..شنو الغريب بالسالفة..

اخلاص : خوش..عود حاجي رائد مو تنسيني..
دنوة : ميخالف..بس اغسل المواعين..عافتني وراحت.. ضليت بالمطبخ اصفي المواعين بين ما اجن البنات جابن المواعين .. غسلت المواعين والحجية يمي..كتلهه : خالة اريد التلفون اخابر رائد وره ما اكمل شغلي..
الحجية : اي يمه اخذي بغرفتي..
دنوة : مو تكولين لرائد دنوة حامل..انه اكلة من يرجع..
الحجية : ها..خوش خالة..مثل متريدين..
سويتلهه بوسه بالهوى..ضحكت واخذت المي وراحت .. بين ما كملت البنات كلهن رايحات يم مرام..وانه من يمي يصيحون دندرس منكدر نجيب الاكل .. شدعوه هلكد..لو رائد هنا بكلمه وحده يسكتهن..لو عليش كلمه بس يعاين عليهه تكوم بالعجل يله مو مشكلة.. اتجنب المشاكل احسن..كملت وطفيت الضوه رحت لغرفة الحجية اخذت التلفون وصعدت فوك.. دك مره .. مرتين .. بالثالثة يله جاوب..اا..هلا رائد..

رائد : جعل بس انتي تخابريني..هلا بيج عيوني..
دنوة : هههه..شدعوه هلكد يعني..شلونك..
رائد : هلكد واكثر..والله زين..وانتي..
دنوة : زينة..يله ارجع بالعجل..اريد اكلك شغلة..
رائد : بعد مو هسة اجي..كولي هنا..
دنوة : لا محلوه تصير..من تجي احسن..
رائد : براحتج بنيتي..خوما يحاجوج ويغثوج بالبيت..
دنوة : يعني..زينين عادي..اكلك اخلاص اليوم تبجي عليك .. تكول ما متعوده علي هيج يكاطعني..سامحهه..
رائد : لا..ختولي..يرادلهه جرة اذن..
دنوة : بس مبين عليهه متندمة..شبيك لتصير قاسي..
رائد : يولي منو معلمج تحجين هشكل..هي مو..مو سوالفج هاي معليج بيهه.. كليلهه حاجيته وميقبل يرضا..

هذا شلون عرف..ادور فشلني..عود اجيت اصلح الموقف .. صار بعد اسوأ..كتله : مادري بكيفك بعد..حجينه شويه بعدين راح..سديت التلفون ونزلت لغرفة الحجيه.. جانت نايمه فخليته يم راسهه ع الكومدي وطلعت..صارت اخلاص بوجهي..
اخلاص : ها حاجيتي..
دنوة : اي..ميقبل..كال عوفيهه..
اخلاص : اي لأن انتي ملكة الثول..معرفتي شتحجين وياه .. كبر شكد فاهية وما منج خير..
دنوة : وجع..شمسويتلج..فوك ما احاجي..بعد كل السويتي بيه المفروض حتى ما اعاين بخلقتج..رادت تحجي عفتهه وصعدت طبيت للغرفة..نزعت الشال ورحت ع الكنتور..طلعت حب وجبس وواحد من الاقراص مال افلام..شغلت واحد وطفيت الضوه .. للنص ومليت..كمت طفيته ورجعت نمت..

فزيت الفجر .. ضليت اتكلب بعدين نمت وجه الصبح.. خلصن ٣ ايام هيج.. الحجية صارت متخليني ادنج ..فشغلي بس بالمطبخ والبنات يسوون الباقي..ولو يجرون ويعرون بس احسن .. وره هل ٣ ايام العصر كاعدين بالصالة كلنه.. طه بحضني يلعب وانه اكلب بالتلفزيون..اجت نور مخروعه..

انطت التلفون لجلنار وتحاجيهه بصوت ناصي..
نور : هاج كمشي..هذا واحد يريد يحاجيج..
جلنار اخذت التلفون وراحت..دقايق ورجعت..
الحجية : ها منو جان رايدج..
جلنار : خالة هذا عم طه..عمار..يريد يشوفة..
الحجية : اي شكو بيهه..مو ابنهم..
جلنار : اي بس منو يروح ويايه..اخاف وحدي..خاف ياخذون ابني وميرجعوليا بعد..هسة يكلي حاولي تجين باقرب وكت
الحجية : يمه انه شلون اروح وياج..ماعندج شي يثبت رائد زوجج خاطر انه امه واصير عمتج..روحي وحدج حبوبة .. واذا صار شي لا سامح الله رائد موجود لتخافين..
جلنار : ها هيج تكولين..
الحجية : والله هذا الاشوفه..انتي براحتج..

جلنار : الله كريم..باجر اروح العصر واشوف..اني بس اريد اكول هم شذكرهم بينه هسة..اشو عافونه حتى مصرف مينطونه ولا يدرون بحالنه..
الحجية : اي فكدوكم هسة..الله اعلم وين جانو..
البنات كعدو يسألوهه .. كل وحده تحجي شكل..من يمي دخت هي شحتسوي ماعرف..بالليل اخذت طه غسلتله وبدلت ملابسه خليته بالغرفة يم جلنار وصعدت فوك..ضليت اكلب بالتلفزيون ما اجاني نوم..نزلت جوه..رحت يم الحجية..همزين كاعدة .. كعدنه نسولف .. تذكرت رجلهه وكامت تبجي.. خطية شكد عاشت وياه..من التسعة وستين متزوجة..وهسة احنه ٢٠٠٦ .. صار كومه ..عاشو الحلو والمر..وتعودو على بعض .. الله يرحمه انه ما شفت منه شي موزين..حضنتهه واهدي بيهه .. كمت ابجي وياهه

انقهرت عليهه حسيتهه امي مادري ليش..هي من شافتني بجيت سكتت وابتسمت..مسحت دموعي..
الحجية : لج شكد فطيرة انتي..الله يعين گلبج شلون حتعيشين دنيا شطولهه..قوي كلبج حبيبة..الطيبة زينه بس مو هيج..
دنوة : مادري انقهرت عليج شسوي..وانه منا ضايجة جي رائد ماكو..ابتسمت وباستني من راسي.. بهلاوقات دك التلفون..كمت اجيبه..رائد..كلبي ضل يدك..يريد يحاجي امه انه ليش اجاوب..انطيتهيا..ضليت افتر يم راسهه.. شلون اريد احاجي.. مشتاقتله ومشتاقه لصوته ..هي انتبهت علي شلون دافتر واهز برجلي..كلتله هاي دنوة تحاجيك.. اخذته منهه .. اشرتلي وحجت بهمس : روحي احجي براحتج .. خلصي وتعاي ..انطيتهه بوسه بالهوى ورحت فوك..

سديت الباب وكعدت ع الجرباية..كتله : هلا عيني..
رائد : هلا بالدنيا كلهه..شلونج گلبي..
دنوة : موزينة ..
رائد : ها ليش ..
دنوة : مشتاقتلك..وانت مخابرت صار فترة..
رائد : حكج علي حبيبي..جنت مشغول والله وعايف التلفون طافي..اليوم فضيت وخابرت..
دنوة : ها يعني ما مشتاقلي..
رائد : شلون ما مشتاكلج يولي..لو بيدي امشي هليومين بدقيقة واجي..بس هاي شسوي..
دنوة : هاا..ماشي..حجينه شوي بعدين راح..نزلت انطيته للحجية وصعدت انام..كلتله على جلنار..بس ماعرف شكللهه شكله قبل .. هي وين حتروح قابل..اهل رجلهه وعمام ابنهه مو غربة يعني..بس اول مره اشوف جلنار ضايجة.. حتى ملامحهه متغيره وماضحكت ابد..

حتى طه عافته انه خليته يمي ولعبته ..غسلتله وبقيت يمه لحدما نام.. يمكن الموضوع اكبر مما متخيلي..مادري.. عفت السالفة ونمت ..ثاني يوم العصر جلنار بدلت وبدلت لطه وطلعت..لليل هي ماكو..ادور لا اخذت تلفونهه ولشي..تعشينه وكملنه وهي ماكو..للعشرة جان تندك الباب..طلع الحجي يفتحهه..طبت تبجي وعيونهه غادية دم من البجي..اجت ذبت روحهه بحضن الحجية وتبجي..موتت روحهه بالبجي .. مفهمنه شبيهه..انه كاعدة ع الكرسي واعاينلهه محجيت شي.. كامت تطلم..كمشتهه الحجية..
الحجية : لا بابا شدتسوين بروحج..بس خلنفتهم شبيج .. طه وين..ليش تأخرتي هلكد..
جلنار هي وتبجي : خالة مو كتلج حياخذون ابني .. ضليت اتوسل بيهم ماقبلو ينطونيا .. كتلهم اضل نايمه بالباب اذا ماطيتونيا..ادور كامو طلعوني بره وهذا عمار الوصخ ضربني راشدي..كلي ميتربى ابننا بحضن مصلاوية..

كمشت ايد الحجية وتعاينلهه بتوسل : خالة فدوه اروحلج والله ماعندي احد بالدنيا بس طه..وين انطي وجهي اذا راح.. اليوم شينيمني الليل بدونة.. يمه اخذو ابنييي ..وحيديي..
كامت تحجي وتغص..شكد نقهرت عليهه..البنات اجن يمهه والحجية تهدي بيهه..كلتلهه عكبة يجي رائد ويتصرف لتخافين بس طولي بالج..هي بس تسمع مجاوبت..اخر شي اخذتهه مرام للغرفة والبنات راحن لغرفهن ينامن..انه بقيت يم الحجية وره ساعة صعدت..منظر جلنار صار جدامي.. خطية شما تكون هي بس يبقى ابنهه ومفرفحه علي..ضليت اتكلب بالفراش بعدين نمت..وره يومين جلنار خلصتهن بجي.. ادور تخابر على هذا عمار يطلع مغلق.. الحجي ميقبل يروح.. يكول باسمي شنو اروح..ما يكولون شجابك عليهه وشنو دليلك .. ادور تروح تصيرلهه مشكلة..

هو يحجي الصدك بس هي من حركة كلبهه تريد احد يجيبلهه ابنهه..الكل التهى بيهه حتى تخربطت هلكد ما بجت..ضغطهه هبط..ومتاكل بالكوه البنات ياخذولهه اكل..باليوم الثالث الصبح كعدت من النوم متأخرة لبست الشال وطلعت..سمعت صوت رائد..اجههه .. رحت غسلت وجهي ..نشفت ونزلت..رحت للصالة..ضليت صافنه متقدمت بعد..جلنار حاضنته وتبجي ادور هي طويلة مو مثلي راسهه صاير على صدرة..هو كامشهه من جتافهه ويهدي بيهه الكل كاعد بالصالة بس انه واكفة بالباب..
جلنار هي وتبجي وكامشة قميص رائد : رائد فدوه اروحلك اريد ابني..صار يومين ماشفت النوم..شلون انام وابني يمهم مادري دياكل دينام..ديبجي عليه..

كمشهه من ايدهه كعدهه ع الكرسي وهو ع القنفة..
رائد : بس خلافتهم شصاير..وينه طه..
جلنار : رحت لبيت عمه عبالي يريدون يشوفوه ونرجع .. ضلوا مجلبين بي..توسلت بيهم ماطونيا..
رائد : ميخالف..بس ارتاح واروح..كافي لتبجين.. روحي غسلي وجهج .. ابنج يجي يمج لتخافين..
مسحت دموعهه وراحت..رفع راسه شافني..ابتسمت ورحت للمطبخ..شكد ما تعاطفت وياهه بس الموقف اذاني.. مادري شلون طلعت مني الابتسامة..شكد ضجت..وانه نازلة فرحانه بجيته..بعدين شفتهه حاضنته..اخذت نفس ورحت ع الثلاجة .. طلعت جبن وانتجيت ع الكاونتر..اكلت شوي ورجعته .. صعدت فوك.. مارحت للصالة..

طبيت للغرفة صار رائد جدامي.. كاعد ع الكرسي ومدنج راسه..بس دخلت شافني.. مهتميت .. نزعت الشال وكتله : الحمد لله ع السلامة..
رائد : الله يسلمج..تعاي هنا ..واشر جدامه..
رحت وكفت جدامه بس معاينتله..سحبني من ايدي كعدني على رجله..باسني من خدي..
رائد : ادري زعلانة..بس شفتيهه شلون تبجي..
دنوة : لا براحتك..هي هم مرتك قابل بس انه..
رائد : اي بس انتي..
كتله ماشي وكمت .. صاح وين وين ..كام وكف يمي.. حضني ورفعني من الكع..رحنه ع الجرباية..صار فوكايه بس مبتعد شوي..باسني وابتسم..

رائد : مشتاكلج والله.. بس انتي بگلبي وداعة عيونج
ابتسمت ورفعت نفسي شوي بسته..حاوطت ركبته قربته علي .. حضنته .. عدلت كعدتي وهو كعد يمي..اخذ ايدي البيهه الحلقة..
رائد هو ويحرك بالحلقة : شنو ردتي تكليلي ذاك اليوم..
دنوة : حيل بعدك تذكر..
رائد : ما انسى انه..اي شنو..
دنوة : بالليل احسن..هسة تعبان خطية..
رائد : يله انتظر لليل ماعندي شي..
ابتسمت..كام للكنتور طلع ملابس..نزع القميص .. فانيلته صايره بلون التراب..كتله : ليش هشكل ملابسك..
رائد : هو هذا العسكري يابة..شتردين اجي معطر يعني
دنوة : لا مكلت هيج..لبست الشال ..هو ابتسم وراح للحمام .. سديت الباب ونزلت للمطبخ..

سويت زلاطة وكلبت التمن.. مدري منو مسوي الاكل.. وره نص ساعة صبيت الاكل والبنات اجو اخذوه للصالة..كلهم كعدو حتى جلنار..مدري شعجب.. صارلهه يومين ولا شفناهه..عفتهم وصعدت فوك.. الغرفة مفتوح بابهه شوي..فتحتهه وطبيت : يله رائد تجي تتغدى .. منتبهت علي جنت دايرة وجهي داسد الباب.. هو واكف يم الكنتور كرشة رجله مورمة..صاير بيهه ازرك والاوردة مبينه .. ماعرف شلون ما انتبهت عليهه كبل..رحت يمه ..كتله : شبيهه رجلك ليش هشكل..مجاوبني ..شبيك مو احاجيك..
رائد : من تصوبت الدكتور كلي يحتاجلك راحة اقل شي شهر وشوي..انه اسبوعين حسيت نفسي صرت زين..

رحت للواجب ضليت هواي..عشر ايام تقريبا..طول الفترة واكف ما اكعد بس وكت النوم..تدرين بوضع العراق شلونه هلفترة.. وانه مكاني واصل وهواي ناس تعرفني.. وهاي هيج.. لا تحسبين انه بس كاعد بالمقر..رحت للفلوجة مرتين.. وطلعنه لسامرا..وووو .. هواي شغل.. بحيث والله بس ارجع للبيت اضل نايم يومين
ضليت صافنة..سامرا فد دور وضعهه جان متدمر بهاي الفترة ادور ضربو الامام..الله يستر شحيصير من وره هاي الفتالة .. كتله : وبعد حتروح لسامرا..
رائد : هاي المره مرحت..بس طلعت لبغداد .. المره الجايه اي .. والعقيد كلي اكو مقدم ذب استقالة وانت حتجي بمكانه ..
دنوة : هسه انت حتحير بالنقل لو برجلك لو بشنو

شنو هاي الهوسة ليش هشكل.. كلت بكلبي ..صدك ضجت.. يعني هو مريض وهامل روحه ادور حيصير شغلة ببغداد.. بس الطريق وحده يشلع الگلب والوضع يخوف..حضل كامشة السجادة لحدما يرجع..دمعتي صارت بعيني.. دنجت مخليته يشوفني .. رفع راسي وابتسم بتعب..
رائد : باجر اروح للدكتور..زين هيج..
عيونه صارت بعيوني..كمت ابجي.. حضنته واديه محاوطه بطنه..هو يمسح بشعري ويهديني..
رائد : يولي..بنيتي..كافي..يمج وماعوفج والله .. كافي دموع مو كلت ماريد بجي بعد..شو متسمعين كلام..
وخرت عنه كتله : ماكدر..شلون حتضل هج..
رائد : لا مو كتلج حروح للدكتور..وانتي تجين وياي.. خاطر ما تضل بخاطرج..مابيه شي وداعتج..

اخذت نفس ومسحت دموعي : يله حنزل..تعال .. باسني وابتسم .. نزلت وانتظرته شوي واجه..تغدينه.. كمت للمطبخ بعدين غسلت المواعين .. اجه رائد حضني وباسني من خدي..همس باذني..
رائد : يله خلصتي..امشي اريد انام..
غسلت ايدي وانداريت علي : يله كملت..اخذني من ايدي وصعدنه فوك..راح تمدد..طفيت الضوه وقفلت الباب.. رحت يمه على حافة الجرباية..مديت ايدي على شعره امسح بي .. ادور طولان وسرح شكد حلو صاير..كتله : ديربالك على روحك .. لخاطر الحجية اذا مو لخاطري.. ابتسم وعدل كعدته .. أشر على صدره..كمت من الجهة اللخ كعدت يمه..حضني وباسني دكات گلبه حسيت بيهن هلكد ما واضحة وسريعة ..ما حجة شي لحدما غفى..

ضليت كاعدة مكدرت انام.. رجله كلش متأذية وهو ميحجي حيموتني..اكو واحد مريض ميحجي .. ليش هشكل يحمل روحه طاقة فوك طاقتة..ادور سالفة طه وجلنار منا..شيفضهه هاي..خلص اليوم عادي..بالليل اجت جلنار تحجي وي رائد بالصالة..كللهه باجر اروحلهم واشوف شسوي..انطته العنوان متريد تروح وياه.. كلتله شلون بصفتك شنو تروح..كللهه عندي ورقة عقد السيد بالسيارة.. رجلهه يعني .. انه اعرف السيد مينطي ورقة..بس كلام.. بعدين كال عقدت يم سيد عنده رخصة من وزارة العدل يصير العقد بورقة بعدين اذا رادو يتأكد يصدقوه بالمحكمة .. من عرف بمرام اجت هنا استثقلهه كلش.. حتى ما يعاين بوجهه..مادري شنو نظرته عليهه بس ما حاجاهه .. الحجية من حجالهه حينقل شغله لبغداد تخبلت كامت تحجي علي وين رايح هناك ذاب نفسك بالتهلكة

عنده خلك محد عندياه .. ضل يسمعهه لحدما خلصت حجي فهمهه بعدين هي سكتت..كالت امري لالله شسوي وي حامد الثاني .. تقصد يتشابهون بالطبع بقينه كاعدين ل١٢ البنات نامو انه نعست كمت صعدت فوك غيرت ملابسي وطفيت الضوه .. فتحت التلفزيون وتمددت ضليت اكلب بالقنوات لحدما اجة رائد .. قفل الباب ونزع التشيرت اجه يمي
رائد : شنو ردتي تكليلي يولي..لا تشعوطيني..
انداريت علي وحاوطت ركبته..كتله : ردت اكلك انه حامل .. اخذ ايدي من جتفة باسهه..
رائد : والله حسيت..بس كلت اشوفهه شتكول..
دنوة : ماحسك فرحان..
رائد : الفرح بالكلب يبعد الگلب وصاحبه.. تعاي شلون مفرحان..منتظر هللحظة من سنين..

نصى صوت التلفزيون واخذني لحضنه..نساني الدنيا كلهه بكلماته وهمساته..نمنه متأخرين..كعدت الصبح ملكيتة .. كمت لبست واخذت ملابس رحت سبحت ورجعت للغرفة..نشفت شعري ونزلت جوه..تذكرت اليوم جمعة..فالبنات بالبيت .. بس نزلت صارت بوجهي اخلاص..
اخلاص : زين نزلتي..ذابة الشغل علينه..انتي الچنة لو احنه والله خوش سالفة هاي..شافت روحهه حامل كامت تتنعوص براسنه..حتى رجلهه متدري بي وين..
دنوة : بس البيت نظيف شتريدين اسوي..عاينت علي .. غمتني وراحت..هاي شبيهه مخليه كورتهه وياي..يمهه حواليهه شعليه بيهه..نزلت يم الحجية بالمطبخ.. كتلهه : رائد وين
الحجية : راح لاهل المرحوم..
دنوة : اشو هسة..ليش..

الحجية : هي انطته مجال هاي..بعده يالله كعد كامت تتبكبك يمه يله شوكت تروح وحموت اريد ابني..ادري ابنج قابل بالزبل هيانه بيتهم وهذوله اهلة بعد شكو..انه ما هامني شي بس خاف يأذون رائد وهو مريض سوده عليه..
دنوة : حجالج؟..
الحجية : اي كلي كبل لا يروح للواجب..بس مقبل اكلج ..
دنوة : هاي الكل طلع يدري بس انه نايمة ورجليه بالشمس ..
الحجية : خالة تدرين مالي خلك رائد..لا يروح يتعارك وتصير هوسة كلي لا تكولين كتلة خوش وها اها..
دنوة : كون يقبل يروح للدكتور..
الحجية : هو يحبج..بلكت يروح لخاطرج..هذا راكب راسه ولا مره طب لعيادة دكتور..شعوطني ..
دنوة : ميخالف احاجي..هو هم كلي اروح باجر.. بعد خليرجع واشوف.. الحجية كامت تتأفأف وراحت..

انه طلعت فواكه كعدت اكل ع الميز..كمت غسلت المواعين وطلعت بتيته وبيتنجان وهاي شغلات التبسي..كملتهن وگليتهن..خليتهن ع النار والتمن كملته .. سمعت صوت رائد ..نصيت النار ورحت للصالة ..رائد وجهه صاير احمر والاوردة بايده مبينه وبارزه حيل .. طه ماكو..يعني ماقبلو ينطوه..جلنار اجت يمه..كبل بجت..
جلنار : وين طه..مو كتلي اجيب ابنج..
رائد : ماقبلو ينطوه..يابة انه رجلهه وابنهه بركبتي صار شهور هسه تذكرتو ضناكم..
الحجية : وشكالو..
رائد : يكولون هو يبقى ابنه وميتربى عدهه..وانت مو رجلهه جذاب..شوفتهم العقد سكتو..ادور يردون يتهموهه .. مانفهتلهم كبل طلعت العقد.. بس طه ضل عدهم..

جلنار : شلون يعني..تره اموت اذا ماشوف ابني..هو بس هذا بقالي بالدنيا..انوب يروح والله انتحر..
رائد : شتنتحرين يمعودة جهال احنه..عندي صديقي خوش محامي..اليوم اخابره وافهمه الموضوع..شكد ما يطلب حنطي ابنج يجيج بس انطيني مجال..الحضانة للام اول وتالي بس اشوف هذا صديقي شيكول عن حالتج..وراهه سهلة..
جلنار هي وتمسح دموعهه : وشلونه..شفته..
رائد : اي شفته..زين مابي شي..جان يلعب وي بتهم اصغر منه مدري بكدة..لتخافين..
جلنار : الله يحرك كلبهم مثل ما حركوا كلبي..
رائد : يله كافي لتبجين..روحي غسلي وجهج.. هسة لو بي شي جان كلنه اي..بس يضحك ويلعب..

ام علي : ميخالف خالة..يبقى ابنهه وهي متعوده تشوفه كل اليوم متكدر..حقهه اعذرهه
رائد : الله كريم..غداكم جاهز لو اروح انام..
الحجية اندارت علي ..كتله : لا جاهز..الحجية كالت للبنات يروحون يصبون ويجيبون الاكل..انه صعدت فوك غيرت الدشداشة..المطبخ حار مدري انه جسمي حار..نزعت الشال كعدت ع الجرباية..اختنكت ماعرف ليش..النفس يوصل لنص زردومي وينسحب..ادور تنرفزت..اريد اتنفس عدل .. هاي دائما تجيني الحالة واضل افتر بالغرفة..اجه رائد شافني اجر نفس بصعوبة..سد الباب واجه يمي..
رائد : شبيج..
دنوة : مادري..مدا اكدر اتنفس..
رائد : تعاي نزلي .. اليوم اخذج لدكتور يشوفج ..

خليت ايدي ع القمصلة مالته : ماريد اروح لمكان..اريدك تروح للدكتور يشوف رجلك..حباب..
بابتسامة : اي اليوم اروح والله..هاي لخاطرج ها..انه ماروح دكتور ابد..بس انتي كلتي بعد..
دنوة : ها وانه هيج الي تأثير..
رائد : كلشي بيدج..گلبي وعقلي وتفكيري..
ابتسمت وبسته..نزع القمصله ونزلنه..تغدينه وكملنه .. كمت اغسل المواعين سمعت صوت بجي بالصالة الثانية.. كملت المواعين ورحت .. مرام تبجي واخلاص يمهه تسكت بيهه.. ضليت واكفة بمكاني مارحت..مانتبهو علي..
مرام : لج شلون اسكت..علعلني وياه..شسوي متكليلي
اخلاص : اي شبيج ماعندج اهل..متروحين عليهم .. هذا علي مابي خير..ادور تروحون بداهية انتي وبنتج..

مرام : اهلي..اهلي مو هنا..مو كتلج طلعو لسوريا .. لو موجودين جان رحتلهم بدون منجي هنا..بس شسوي
اخلاص : هسة هو شيكلج..
مرام : يكلي دبري روحج..انه ما اكدر اخذج وياي..
اخلاص : وين ترحين يعني..شبي هذا ميفكر..
مرام : شمعرفني يمعودة..اضل يمكم والله كريم..
اخلاص : براحتج عيني..البيت بيتج..
اخلاص شافتني واكفة..رادت تحجي عفتهه وصعدت.. طبيت للغرفة رائد كاعد ع الحافة مالت الجرباية ورافع البنطرون .. كرشة رجله مبينه..مخلي ايده عليهه وعاكد حواجبه .. تقربت كعدت يمه شال ايده.. صايره اسوأ من البارحة.. گلبي انعصر عصر..كتله : ليش هيج هامل روحك.. راد يحجي كمت ابجي .. صدك منظرهه وجعني..الف حسبة تجي ببالي.. خاف بي شي ويضم علي..ميريدني اعرف..حضني ويهدي بيه .. انه بالطالع حتى محجيت بس ابجي..

عصرة الگلب هاي ما احس بيهه بس من يصير شي .. دائما كبل لا يصير شي يقهر اضل مقهورة يومين بدون سبب وتفكيري شارد مو وياهم .. ادور تمرضت .. زادت الحالة صارت اسوأ..كمت اختنك .. ماكول شي بس ياربي لتخليني اخسره..حضنته ودموعي تنزل ماسكتت..مادري شكد ضليت ابجي بس هو ماسوى شي .. حتى ما ضاج مني..اخر شي سكتت ووخرت عنه.. كتله : نام انه دوختك بدون سبب..
رائد : ما انام بدونج..تعاي گلبب انتي.. شتسوين راضي وداعتج..ادري مقهورة علي..بس اليوم اروح ونشوف..
تمدد واشرلي ع المكان البسدة..رحت كعدت يمه..حضني ويهدي بيه..عبالك انه المريضة..كتله : ليش دتحجي هشكل .. المفروض انه اكلك هيج..

رائد : انتي متعرفين بشنو افكر وشديجي ببالي .. انه افكر الف مره كبل لا احجي كلمة زايدة..اخاف تأذيج..المريتي بي مو سهل بس الله يعرف شجنت احس من اشوفج تستفرغين دم ومتعرفين ناسج..ماعرف اذا تذكرين شصار..بس من اخذتج من بيتكم كمت انه ابدلج بايدي واكعد الصبح كبلج .. اكول خاف تكعد وتشوفني نايم متكدر تحجي وتكعدني .. الشيخ كلي ديربالك عليهه من العصبية والمشاكل وكلشي يأثر على نفسيتهه .. اعصابهه تتوتر وممكن تتأذى وتصير اسوأ لا كالهه الله..فانه ماحجيتلج لأن ماريدج تبجين وتتوترين

والله خايف عليج اكثر من روحي..مريت بالاصعب منهه وكمت بحيل الله بس انتي .. انتي تختلفين والله احسج نسمة تمرين ع البشر ميحس بيج هلكد ما هادية وحساسه.. لا تتوترين ولا شي .. الله كريم .. بس انتبهي لروحج وللطفل ببطنج..انه يمج ومستحيل اعوفج لو مدري شيصير..اعتبريني ابوج من تحسين روحج محتاجة ابوج يمج..اعتبريني اخ .. حبيب .. زوج .. بكيفج المهم اكدر اعوضج ..تفهميني..

معرفت شجاوب..كلماته ضيعتني..كتله : شحجي.. والله ضاع الحجي.. ابتسم وحضني..غمضت عيوني بس منمت.. كلماته كلما اتذكرهه كلبي يكوم يدك سريع..ادور شلون يحجي بهدوء وصوت ناصي..يارب يطلع احساسي غلط ومابي شي .. انتظرته ينام وكمت شغلت التلفزيون ضليت اكلب درته على مسلسله وكعدت اتفرج.. لحدما كعد العصر..ضل بالفراش شوي بعدين كام غير ملابسة واخذ فلوس..اندار علي
رائد : تجين..
دنوة : بكيفك..
رائد : لا ضلي هنا احسن..اجيبلج شي وياي..
دنوة : سلامتك حبيبي..
ضحك وكال : بعد گلب هلحبيب انتي..

نزلت من الجرباية رحت يمه..رفعت نفسي شوي .. بسته ابتسم وباسني..لبست الشال ونزلت وراه..اخلاص شافتني بملابس البيت يعني مراح اروح وياه..كامت تحجي..
اخلاص : ها اشوفج حتبقين بالبيت..متروحين وياه .. شلون تخلي يروح وحده..انتي مره عود..
دنوة : هو ميقبل اروح وياه..انه شكو تحجين علي.. هي تحجي وتعاين لرائد تريده يجاوبهه بس لابسهه فد دور .. حتى ما عاين عليهه..تخبلت..كامت تفتر بالصالة تريد تسوي شي يضوجني خاطر يجي يحاجيهه..بس ماكو..هي هاي الشغلة وسكتت وراهه..شوي وطلع..يمه زعله شكد ثكيل .. ولو هاي اخلاص تستاهل الاكثر ..مشى الوكت..

ساعتين .. اربعه هو ماكو..وين راح..مرام سوت العشه..كعدو يتعشون انه ضليت كاعده ع القنفة..مكدرت اكل
وائل : لا تضلين هيج..تعاي اكلي هسة يجي وين يروح
مجاوبت..كامو يحجون بسالفة علي..امه بعد شوي وتبجي .. صدك الضنا عزيز لو شمهما صار..هذا علي فشلهه لأمه جدام رائد وكلشي سوه..بس بعدهه تريد تطمن علي ويصير جدامهه..صح ماحجت شي وطلعت بالشخصية الرزنه جدامنه بس انه سمعتهه تحجي وي زينب..كلتلهه اخوج فشلني .. انه اجيت يمهم فترة لحدما الله يفرجهه..تاليهه يسوي هيج.. مادري انقهر عليهه لو اضوج منهه لأن غثته لرائد بكلامهه من كلتله هن مليون ونص..عبالك دتكول هن الفين..ادور هاي جلنار منا بس تبجي..

ماكدر اكللهه شي هي هم حقهه.. كمت طلعت للطرمة..ضليت شوي بعدين سمعت صوت باب سيارة .. يمكن اجه..مد ايده فتح السركي وفات..تمشيت لعنده .. ابتسم من شافني ونصى حضني..هادئ بشكل..حتى ماحجه شي .. فتنه جوه..الحجية كامت خطيه..كللهه كعدي يمه شكو كايمة .. رحت جبتله ماي..
الحجية : ها يمه..شكلك الدكتور..
رائد : دوالي..
الحجية : بس هاي مو مال دوالي..
رائد : هو هشكل كال..اروح لغيره غير مره اتأكد..
الحجية : وناوي تنزل للواجب بهذا الوضع..
رائد : لا مابيه اتحرك منا لهنا..الاجازة مالتي طويله .. الله كريم اشوف وين تاليتهه هاي..

جلنار : وطه..شسويت علي..
رائد : جنت يم صاحبي المحامي..حجيتله على حالتج .. كال اكو شروط خاطر تصير الحضانة الهه..منهه لازم ما متزوجة كتله بس انه عاقد سيد عليهه وعندي ورقة .. كال عقد السيد ميثبت بالمحكمة..هاي خلصت..كال لازم عدهه راتب .. انتي عندج راتب المرحوم..بس لازم اسوي المعاملة مالته.. والطفل عمره اقل من ١٨ سنة..يعني ابنج الج اول وتالي والمحامي شاطر ميضيعهه منه .. يبقى بس عمام طه لازم يمضون ع الاوراق بالمحكمة..
جلنار : يعني اكو امل..
رائد : اي..هاي شسوي بعد حتى محامي خليت .. واتفقت وياه على مبلغ زايد بس خاطر يكسبهه ويرجعلج طه

ضل كاعد شوي بعدين صعد بيده علاكة .. بقيت جوه لميت الاكل وغسلت المواعين..كملت وصعدت فوك .. طبيت للغرفة نزعت الشال وفتحت شعري..رائد ايده على راسه ومنتجي ع التاج مالت الجرباية ويكلب بالتلفزيون.. طفيت الضوه ورحت كعدت يمه..حاوطني من جتفي وقربني علي .. كتله : اخذت دواك..
رائد : اي حبيبي..جبتلج شي وياي..
دنوة : شنو.. اندار ع المجر مالت الكومدي..طلع علبة مال ذهب بيهه سوار..رفيع وبي وردة من النص..لبسنياه..
رائد : حلو..

ابتسمت وبسته من خده : ماانحرم منك يارب..
رائد : كتلج بس تصيرين يمي اجيبلج..ادور حامل.. يعني شريد من الله بعد..
بسته وحضنته : اريد تصير زين..ماريد شي بعد..
رائد : ان شاء الله گلبي انتي..كومي طلعي فلم وجيبي حب مشتاك اسهر وياج..
دنوة : مو تعبان..
رائد : يمج مرتاح وداعتج..
ابتسمت وكمت طلعت فلم وجبت حب..ضلينه كاعدين للثنتين وشويه..مرن ايام عادي ماصار شي نفس النمط .. بس البنات سكتو عني..رائد ضل زعلان من اخلاص ولا يحاجيهه وره ايام طلع رائد وجلنار للمحكمة .. كبلهه بيوم جهزت جلنار الجناسي والاوراق..

بيوم گاعدين دنتغدة چان تندفر الباب .. گام على حيله يشوف شكو .. شواي واسمع صوت الامريكان ديفوتون .. عدلنا الشالات ووگفنا .. فات هو ويحاچيهم انگليزي .. ابتسمت علي شلون مسلطن واحنا مثل الاطرش بالزفة ساكتين مانفتهم .. تالي دخلوا جوه للصالة التطلع ع الدرج .. گعدوا وفتحوا اكلهم كله سفري مسلفن .. اجه يتمشى ومخلي إدي بجيوبه ..
رفع حاجبه وابتسم : گعدوا اكلوا معليكم بيهم ..
گعدت يمه بين ما خلصنا گامن البنات يشيلن الاكل ماخلاني اگوم وياهن .. الامريكان شواي وطلعوا ..

بالليل وگفت ع الطباخ اسوي عشة .. اجه وگف يمي ومنتچي ع الكاونتر ..
عاينتله مبتسم : حبيبي شو هواي تبتسم اليوم شكو ..
رائد : سلامتج يبعدي انتي .. مايصير نبتسم والله حلوة ..
دنوة : ههههه.. لا يصير بس يعني مايصير نسأل..
ضحك وتقرب مني .. همس : حبيبي مشتاگلج ..
دنوة : ليش انه مو هنا يمك ..
رائد : فهمتيني بس تتثولين علي وانه زلمة فقير ..
شهگت بتفاجؤ بالشقة : انت فقير .. اسم الله خاف متوهم ..
ضل يضحك ويسولف وياي لحدما خلصت .. مشى الوكت عادي ..

همَ گاعدين بالهول.. عفتهم وصعدت فوك .. سبحت وطبيت للغرفة اختار سيت .. لبست واحد هادئ وطويل .. وگفت يم الميزتواليت اشسور .. بين ما كملت اندگت الباب .. رحت فتحتها صار رائد بوجهي .. ابتسملي وتقرب شبگني هو ويسد الباب .. انتچى عليها ومقربني منه ..
حاوطت رگبته وابتسمت : حلوة ..
رائد : الحلاوة كلها ..
دنوة : ههههه.. اووي مو لهالدرجة ..
نصى صار بمستوى رگبتي يشم بيها ويبعد بشعري : لا لهالدرجة .. كون محد يصيحني على شي ..
دنوة : سوي روحك ماسمعت..
باس رگبتي وطفى الضوة : هو هم هيج ..

روحي وگلبي بيده گبل جسمي .. احاسيسي ومشاعري منقادة بأوامره وحركاته .. الغرفة هادئة الى درجة .. بس صوتنا يشغلها .. شگد حسيته تعبان هالأيام هسه لمن صار بحضني صار عنده نوع من الراحة.. بعد جسمه عني هو ويبعد خصلات شعري .. شبگته واهمس بصوت ناصي..
رفع راسي ورافع حاجبه : شدتحچين..
دنوة : اوي حبيبي ماادري..
خليت راسي على چتفه وأصبعي يمشي على رگبته .. كلساع يكمشها يوخرها وارجع نفس الشي ..
اخر شي ضجت وقربت روحي من صدره : مااحبك ..ابد..
رائد : چا شعندج بحضني ..
دنوة : چي دافي..
سكت ماجاوبني .. بسته من خده وايدي تمسد بشعره : حبيبي اشاقة .. ماالگى مثلك هيج يحتويني ..
شد علي بحضنه : رخصت الغالي لخاطرج.. بس لخاطر اشوفج يمي وتتمايلين جدامي على راحتج .. انه الچ أمان ودنيا تحويج بكل وكت .. لاتهتمين لوضعي المهم اگدر اسندج ..
ابتسمت بنعاس واكتفيت بالسكوت ..

وره چم يوم طلعو الصبح انه جنت نايمة..كعدت ملكيت رائد..غسلت ونزلت جوه .. لكيتهم ديتريكون .. كعدت وياهم تريكت ..خلصنه كمت شلت الاكل وغسلت المواعين..البنات ماكو ومرام مريضة فلازم انه اشتغل .. عادي متعودة ع الشغل وماضوج..كملت ورحت للصالة رتبتهه..الحجي طلع وره الريوك كال ضجت من البيت .. كملت وصعدت فوك رتبت الغرفة مشى الوكت لحد وره الظهر..نزلت سويت الغده والحجية كاعده يمي تسولف .. بين ما كملت الغده جان يجون رائد وجلنار.. اجت الحجية على صوتهم .. كعدو يحجون شصار
الحجية : ها شسويتو..

رائد : ماحضرو اليوم..القاضي سوى القاء القبض عليهم وجابهم للمركز..ما اعترفو الولد يمهم..القاضي كللهم عدكم يوم كامل..اذا ماكلتو وين الولد احنه نجيبه بالقوة..
الحجية : وهاي المن حطو بالمركز..
رائد : عمار ومحمد..اخوه..
الحجية : زين بصفتك شنو رحت يمه..ادور تكول رجلهه وميقبلون ينطوهيا ويصير الهم..
رائد : مدخلت وياهه..بس المحامي وهي..هو المحامي كلي حتى ميحتاج هي تحضر..بس اريد اوراقهه والجنسية مالتهه ومالت ابنهه وعقد المحكمة مال رجلهه وانتهت..
الحجية : وشوكت حتصير الجلسة الثانية..

رائد : بعد ٣ ايام..انطاهم مهلة يمضون ع الاوراق ويجيبون الولد .. مو كتلج .. اذا ماجابوه تروح دورية لبيتهم ..وراهه بين ما هي تجي والمحامي تمضي من طرفهه وتاخذ الطفل .. ماضل شي خلصت..تعبت والله ورجلي توجعني
الحجية : سوده عليه..كوم ارتاح يمه..هسه انت بيهه عليهه متكلوط وي هذا وذاك..
رائد : سهلة..حروح انام لحد يكعدني.. كام وكف يم الباب كال .. دناوي .. تعاي عود..
راح صعد..انداريت على جلنار شوي مرتاحه..حيرجعلهه ابنهه شلون مترتاح..خطية شكد صعبة عليهه هالايام.. همزين حيصير يمهه.. كمت اصعد فوك جان يجن البنات .. تجنبت المشاكل ورحت صبيت اكل..

الحجي هم اجة وره شوي.. كعدو يتغدون انه صعدت فوك..طبيت وسديت الباب..رائد جان متمدد ومخلي ايده على عيونه..عبالي نايم مردت اكعده .. رحت كعدت يمه..وخر ايده وعدل كعدته..
رائد : تغديتي..
دنوة : لا..اجيت اكلك تعال تغده..
رائد : من التعب مااشتهي..اكلي انتي وتعاي من تخلصين ما انام..انتظرج تجين..
ابتسمت وبسته..نزلت جوه تغديت..الحجي سألني على رائد كال ميجي يتغده..كتله تعبان ميريد..كامو ميحاجوني شي .. حتى رائد.. من يصير عصبي كلهه تسكت..جانو كبل من يصيح الحجي يكله شبيك خبصتنه وهيج .. هسة سكتوا .. يمكن خافو علي من تمرض..

ادور شلون مرضه..هو ميحجي حتى من يتأذى .. انه شلون حعرف فلان شي يوجعه.. خايفه بي شي ومحد يحجيلي الخنكة راحت صار يومين بس هذا شعور بداخلي..ماكدر اتحكم بي..كملنه ..كمت شلت الاكل وغسلت المواعين .. البيت صار هدوء كلش..كلهم راحو ينامون خصوصا البنات..انه طفيت ضوه المطبخ وصعدت فوك .. رائد واكف ديبدل..سديت الباب ونزعت الشال..لبس هو وراح تمدد فتحلي ايده واشرلي على حضنه..رحت بحضنه .. اخذ نفس ويمسد بشعري..كتله : مرام حتبقى هنا..
رائد : اذا ما اجه علي اخذهه..اوديهه لبيت اهلهه..
دنوة : بس تكول اهلي بسوريا..انه سمعتهه..

رائد : هاي شنو..شو ماادري..والله هذا علي اكبر سرسري ومابي خير ..ميخالف اذا صار شي احاجي اخلي ياخذهه .. فلوس وعنده .. شنو عذره بعد..
دنوة : وليش متبقى هنا..
رائد : خلتبقى..بس شكد تضل يعني..بالزايد سنه .. انه غريب وخالي غريب ومحمد..ما نعودلهه شي..يعني ميصير وبلكت باجر عكبة احتاجت شي..بتهه تكبر وتحتاج اب ومصرف .. دتفهمين شلون ..
همهمت يعني اي..حضنته وامسح بشعره..لحدما نام .. على هدوء الغرفة نمت..خلص اليوم عادي..واليوم الوراه .. رجل رائد بلشت تتحسن..خف الزراك بس بعدهه مورمة .. يكول الوجع احسن من كبل..

مادري يحجي الصدك لو يريد يسكتني هم مياخذ الدوه الا اجي اكله اخذت الدوه يله ياخذه .. اليوم طلع رائد هو وجلنار للمحكمة..للظهر يله اجو وطه وياهم .. والله مشتاقتله..صار شكد مشايفته..طبو للبيت .. كعدو جان ينزل طه من حضنهه يزحف يمي..شلته وابوس بي .. اخذته ورحنه للصالة الثانيه الاعبه..شوي واجه رائد..كعد يمي ومبتسم على طه..
رائد : شوكت تصير بتنه بمكان طه..
انداريت علي وابتسمت : شمدريك بنيه..
رائد : نتأمل بنيه..وان شاء الله هيج..فرحان بكلشي .. المهم منج هو هذا الاتمناه..
بسته جان تفوت اخلاص..عاينتلي بطرف عينهه وراحت .. مكدرت تحجي شي..بالليل رائد نام من وكت .. مو عوايده مادري شعجب..انه شفته نايم نزلت جوه يمهم

كلهم كاعدين حتى طه..ضلينه ل١١ بعدين صعدت..اخذت ملابس رحت سبحت .. رجعت للغرفة اسمع صوت رائد يهمهم بينه وبين نفسه بصوت ناصي..رحت يمه..خليت ايدي على كصته ورگبته مصخن كلش..وشفايفه ترجف وايده همات..نزلت جوه بالكاونتر دورت كبسول خافض حراره ومسكن..اخذت مي دافي وصعدت..كعدته بالكوه كعد..انطيته الحبايتين ورجع تمدد ..ضليت كاعده يمه كل شويه اتحسس حرارته.. ضل ساعة بس يهذي وايده ترجف..وراهه سكت وهدأ شوي .. لحدما نزلت حرارته ونام..مكدرت انام..كل ما اغفى واحس طبيت بالنوم ..افز اشوفه..ليش ما كال مريض .. ليش راح نام كبل .. شنو هلطبع هذا ..كعدت الفجر صليت ودعيتله .. كلشي اقبل..

بس مو رائد يصير بي شي..گلبي انمرد مرد علي من شفته يهذي وميعرف شديكول..خلصت صلاة ورحت يمه..بسته وامسد بشعره..كمت اتأمل بملامحه لحدما غفيت .. ثاني يوم كعدت متأخره لأن نمت وجه الفجر.. كمت لبست الشال رحت غسلت ونزلت جوه..صار بوجهي بنهاية الدرج .. حضنته لا اراديا..همست باذنه : ضل بالي عليك شلون صرت..ابتعدت عنه جان مبتسم..
رائد : يولي انه عفويتج هاي اموت بيهه..زين حبيبي .. تره البارحه مجان بيه شي من نمت..بس سبحت واستبردت
دنوة : خوفتني عليك..حتى مكدرت انام..
رائد : اكول ليش متأخرة..اسف يابة..

صحت لااا..منتبهت شلون كلتهه..خليت ايدي على حلكي .. ادور الحجية وام علي كاعدات..هو طكهه بضحكه..
رائد : دنزلي يابة نزلي..ميخالف..
نزلت تريكت وخلص اليوم مثل البارحة..وهاي هيج مشى اسبوع عادي..رائد يوم زين يوم لا..وميقبل يروح دكتور ثاني .. شكد حجيت وياه والحجية هم تحاجي ميقبل..قفل بعد.. دورات اكعد يمه اكوم ابجي علي..بعدين اسكت..اكول هسة هو حاير بيه ابجي لو حاير برجله..

ثاني يوم چنت وي البنات جوه.. الحجي كاعد على صفحة ومغنتب علي.. فوگاهه اوي..
الحجية : حبيبة سويلنا چاي من ايدج الحلوة..
دنوة : ياا..غير تدللين..
ابتسمتلي..كمت هدرته وصبيتلهم..وصلت لخالو..اخذه بدون مايعاينلي..شفته حيگب بوجهي..ترخصت منهم وصعدت فوك.. فتحت الباب على كيفي وحچيت بصوت ناصي : حبيبي وينك وينك.. مشتاقتلك وداعة عينك..
ضحك هو وداير وجهه ديدور بالكنتور مالابس فانيلة.. سديت الباب ونزعت الشال : حبيبي ليش بدون فانيلة.. مابردان..
رائد : يولي دااشرب مي وانكب ع التشيرت..
تقربت منه حضنته وايدي تمسد بچتفه.. : حياتي ظهرك بارد لاتتمرض هو انت مريض..
مد ايده جرني لصدره وايده اللخ محاوطة خصري..
رائد : لج صايرة وكحة..
خزرته : هاي چي احضنك..يله بعد مااحضن..
رائد: لا يولي يبعد روحي احبج هشكل..شبگيني ..
درت وجهي : مااريد وخر..

بعدني شوي وجر فانيلة لبسهه..حاوط چتفي ومشاني للچرباية.. كعدني بحضنه ويبوس برگبتي..
دفعته بذبول من حركاته : رائد دوخر..
رائد : اويلي بنيتي ضاجت مني..
دنوة : ااممم..لا حبيبي ماضجت.. بس تدري شنو على بالي..
رائد : شنو عمري..

دنوة : اريد تسولفلي فد موقف تحبه..صايرلك يعني گبل..
رائد : ها..اي اسولفلج.. هاي فديوم .. سكت ورجع كمل.. اي باباتي فديوم شفت وحدة سمرة بالحلم..وچن انه وياها..
دنوة : عزززه حبيبي تخوني ليش شمسويتلك..ادور تحلم بيهه.. شحلمت بله احچي..
رائد : دصبري ابوية خلاكمل..اي چن انه وياها نايمين بحضن بعض وهي حاضنتني من ظهري..
دنوة : عززه گوم ولك مااحچي وياك بعد..

ضحك وجرني من ايدي اندفعت علي..تمدد ومقفل علي بإيده.. همس بإذني هو ويبوس المنطقة الوراها : اي حبيبي هاي انه وياج شبيج يولي لاتسودنيني..انعل ابو اليحلم بغيرج.. گتلج شبگيني يولي تره تعبان..
ضحكت وحضنته وراسي على چتفه.. صار يمسد بشعري ويشم بي.. ماخليته يسوي شي خطية تعبان من رجله.. فضليت بحضنه اسولف وياه ..

راد ينزل للواجب الحجية كامت تبجي كلتله اذا رحت اعوفلك البيت..شلون تروح وانت رجلك هج .. عاد هو مدد الاجازة..بس مو هواي..٣ ايام..

بهاي ال٣ ايام جنت داغسل مواعين العشه..سمعت صوت الحجية تكله لرائد اسم الله يداده..شبي الرجال ..سديت المي ورحت للصالة حتى ايدي بقى بيهه الزاهي..عاينت لرائد : منو.....

يتبـــــــــــــع...........................