رواية اسألي عني الليالي الفصل الثلاثون 30 - بقلم رقية جاسم

شگلك وانت نسمة صِيف ..
        شگلك يالذهب شعرَك ..

لكِن ما تحن ياحيف ..
        تصد وتعذب بهجرَك ..

قناة التليگرام

الـبـارت الـتـاسـع والـعـشـرون ..............

سناء : البنات حيرجعن من الكلية..بـ١٢ ونص هسة..واكفه ع الطباخ دا اسوي الاكل..حمد ديقره للوزاري مسويتله غرفة بس اله..بلكت يطلع معدل عالي..حمد يمه تعال جيب القنينة من بره ظهري يوجعني..
حمد : يله جاي..
سناء : جابهه وشكلهه وراح يكمل قرايته..رجلي يشتغل بالاستخبارات بالعمارة ينزل للبيت كل اسبوع..بين ما كملت الغده اجن البنات..
كوثر : يا يمه..همزين خلص الاسبوع وعدنه اسبوع عطله قبل الامتحانات..مابيه حيل بعد..
فرح : اي همزين..
سناء : شعدجن تسولفن هناك..تعالن جوه..

فرح : يله جينه عيني جينه..شمسويتلنه غده اليوم..
سناء : خير من الله..روحي بدلي وتعاي صبي انه مابيه حيل بعد..راحن يبدلن وانه رحت اغسل..بين ما كملت جانن صابات الاكل..كعدنه نتغده مثل كل مره المهاوش بين حمد وفرح ما يخلص..من خلصنه كامت كوثر غسلت المواعين وانه رحت تمددت ونمت..كاعده وياهن من السته الصبح..
العصر اجت كوثر كعدتني..
كوثر : يمه كومي..هاي وحده تكول انه ام خالد هي امج حتعرفني..طلعي شوفيهه شتريد..
سناء : دخليهه للبيت شبيج يحظي..هسة بس اغسل وجهي قابل اطلعلهه هج..
كوثر : يله عيني حروح ادخلهه..نسينه..
سناء : كملت غسلت وجهي ولبست الشال بين ما طببتهه كوثر..منو هاي ام خالد..يمكن اذا شفتهه اعرفهه..بس بالاسم ما اذكر اعرف هج مره..طبيت للصالة جانت مخليه گلاص مي يمهه..اول ما شفتهه عرفتهه..تذكرت كلشي..

من جنت صغيرة وعيت ع المشاكل بين حامد وابوي وبقية خواني..يگعد بعركة وينام بعركة..يكللهم وين وديتو امي..من ينام يكعد الفجر يصيح ويبجي ويروح على محيي يضل يضرب بي ويصيح لحد ما يجي ابوي ويفاككهم..احنا جان عمري ست سنوات يجي هو بالليل الدموع بعيونه وعيونه غادية دم..يحضني وينام من يحضني بعد ما يكعد بالليل..ماادري ليش.. ابوي جان ياخذني من ايدي ونروح نتمشى بالمزرعة البعيده..يمشيني على حافة الشط ويحجيلي..
شامخ : بوية انه ما اريدنج تطلعين مثل حامد..أي شي ممكن تسمعينه من اخوج لا تصدگي..تعاي علي وانه افهمج الموضوع كلة..السالفه صارت جدامه اكيد تضل مچلبه براسه بس انتي ما اريدج تصيرين مثله زين..ماما غادة هي امج وام حامد ماكو فرق بيناتكم..هي تأذيج؟..
سناء : لا بالعكس حبابة..
شامخ : اي خلص بعد..ما زال تحبج لازم انتي هم تحبيهه.. هي امج وانتي بنتهه زين بابا؟..

سناء : عاينت علي وابتسمت ولو جنت ما افتهم شديكول يعني ليش عود خالة غادة هي امي..الي هي ام محيي والباقين بس كتله زين..وهاي جان كل فترة ياخذني نتمشى ويسولفلي ويحاول يحببني بخالة غاده..انه احبهه چي هي ما مأذيتني الشهاده لله..تكعدني الصبح على دوامي من جنت بالابتدائية وتسويلي لفة وتخليلي تفاحه لو كيكة خاطر ما اجوع هناك.. وتسويلي ضفاير وتشدهن بشريط وتغنيلي اغاني گبل.. الجهال الوياي كلهه تجي مشي..بس انه ابوي ياخذني بسيارته من اوصل للمدرسة اسمع البنات يتهامسن بيناتهن هاي التجي بالسيارة..الله اعلم شعدهم من بيت وهذيج اللخ تكللهه لا هذوله عدهم قصر اكيد..

ابوي جان يعاملني انه وحامد احسن معاملة..حتى يميزنا عن الباقين بالبدايه مجنت اعرف ليش..اكول هو يحبنا ويسوي هشكل..وضلت المشاكل كل يوم تزيد ما تنقص..لحد ما فديوم من جان عمري ثنعش سنه وحامد عمره عشرين اخذني وطلعنا من الديرة بدون ما يكول لأحد..ابوي ضل يدور علينا بكل مكان..يريد يعرف وين رحنه..اگلة لحامد وين رايحين..يگلي ما نريد نشوفهم بعد ولا يشوفونه..هذول غجر والنذالة ماليتهم وما اريدج تصيرين مثلهم..امي الي هي خالة غادة بعد ما شفتهه ولا ابوي.. رحنه لبغداد وكعدنه بواحد من فنادق السعدون القديمة..حامد جان يكعد كل يوم بالليل يصيح ويبجي يكول لااا..حرام عليكم..الله لا ينطيكم..ليش هشكل..ليشش..يضل يصيح لحد ما اجي يمه واحضنه امسح ع راسة يله يهدأ

انه مارحت للدوام علموده.. هو يشتغل بمطعم والمصرف يادوب يكفي اله..طول هاي الفترة ابچي..متعوده على ابوي وماما غادة وحامد اخذني منهم..من يشوفني ابچي يكلي انسيهم وانه امج وابوج..هذوله وحوش وحتشوفين شلون بعدين بالوكت المناسب..جنت أجهل شديكول..فاگله ابوي شلون يصير وحش انت دتجذب علي خاطر ما ابجي..وراهه بديت اتعود بدونهم وانه ماادري اذا امي موجودة هناك وما تريد تشوفنه لو ميتة ومانكدر نشوفهه احنا لحد ما فديوم سمعت حامد يحاجي خالي..

حامد : رجعة يمهم ما ارجع..لو اعرف اموت..اخذوهه جدام عيني الله ياخذ عيونهم ويحرگهم..
خليل : ما يصير وليدي..هذول اهلك وتحتاجهم..اذا ما احتاجيتهم انت فاختك حتحتاجهم..ويجي يوم ياخذوهه وانت ما تكدر تروح هناك وتضل يمهم بعد..
حامد : احرك الديرة عليهم اذا اخذوهه..فوك الظلم الشفته جدامي يريدون ياخذوهه..مسمي روحه اب..الله لا يوفقة بجاه النبي..خالو نار وشابه بصدري..شيطفيهه هاي شيطفيهه والله اصيح واستريح..تعبت..
خالي : زين خالو ليش ماتزوج؟..تشوف المره التحتويك ويصير عندك عائلة ع الاقل تلتهي عنهم وعن التفكير بيهم.. لا تنسى ربك ما يظلم احد وامك انظلمت..
حامد : الله كريم..اريد شغل زين بالاول بعدين عود..

سناء : مفهمت شديحجون..بس كلمة امك انظلمت بقت ببالي عود شنو يقصد يعني..جنت صغيرة وجهال گبل مو مثل هسة ع نياتهم وما يفهمون الا يجي واحد يفهمهم..تركت الموضوع ..

لحدما مرت فترة وحامد انسجن.. تفاجئت بأبوي اجه اخذني ورجعنا للديرة..ملابسي جانت على حطتهه بالكنتور.. هلحجي بالستينات.. حامد يكره ابوي وبقى يكرهه رغم انسجن وطلع ومن طلع تزوج ورحتله انه وماما غادة باركتله واعتذرت منه من موقف ابوي چي اخذني بدون ما يكول..مرته كلش حبابة والظاهر حاجيلهه كلشي..تعاطفت وياي حبيبتي شتريدين گليلي..تردين تباتين يمنه هلا بيج..ببطن عيوني اخليج..  وهيج حجيهه

حامد وره شهرين من زواجه صار عنده رائد..وكل فتره ابوي ياخذني هناك اضل اسبوع اسبوعين وارجع..سنة الـ٨٥ محيي تزوج وصار عنده بنيه بسنة الـ٨٦.. قبل زواجته بسنة انخطبت وابوي انطاني..طلع جان يشوفني من اروح للمعهد واندل بيتنه واجه خطبني..حبني من صدك وعوضني عن هواي شغلات..وراهه اقل من شهر تزوجت واخذني للمدينة هناك جان بيتهم..عشت وي اهلة وانه بعدني اروح اداوم..صار عندي كوثر وراهه بسنة يعني بسنة تخرجي صار عندي فرح..من صار عندي فرح رجلي جان ديبني بيت وبناه وكمله وانتقلنه هناك فرح عمرهه اشهر..

بيوم الرحت للديرة وحامد تزوج كمت ابچي على فراگة.. صارلي بمقام الاب والام..يجي علي گبل لا يطلع للشغل يگلي محتاجة شي اجيبلج اطلبي ولا تفكرين تره عندي فلوس تكفي..واذا ماعندي ابيع قميصي واجيبلج..بالليل يجي يبوسني ويحضني يگلي بس انتي بقيتي من ريحة امي..وكل ما احضنج اتذكر موقفي من جنت صغير مداگدر انسى..

بقيت اتردد على بيت حامد كل فترة..گاطع الكل بس انه يجيني واجي شكد حاولت اگلة انسى الصار وعوف كلشي.. بس ضل المنظر براسه وما قبل يصالح ولا يصالحو.. وراهه صرت حامل بحمد الاخير وبعد ما حبلت..صار عندي اكياس ع الرحم وهملتهه وكبرت..فمن رحت للدكتورة كالت مابيهه مجال تتعالجين..لازم نشيل الرحم.. شلت الرحم عمري بالتلاثينات.. كلش تأذيت وعانيت يله گدرت اتعود..اول فترة جنت احس بوخة ونار تغلي بجسمي..بعدين الحمدلله كلشي هان..ضليت اتردد لبيت اهلي ما عفتهم.. يبقى ابوي ورباني وجان غافل يمكن الله اعلم..انه امي مالحگت عليهه..عمري ست شهور وتوفت..فما حسيت بشعور فقدان الام..واذا ححسة فبس من تتوفى امي غادة الي وعيت عليهه..اما شعور حامد فما جنت احس مثله..

ضليت عادي لحدما اجاني الخبر الكسر ظهري..من توفى حامد..كمت ابچي وادك على راسي..عبالك ابوي مات..هو جان بمثابة امي وابوي ..ينزع قميصة ويبيعه بس خاطر يعيشني.. ما استوعبت موتته الا وره الاربعين..الله يرحمه يارب.. بالفترة الكعدنا بيهه بالسعدون جانت ام خالد .تگلي لا تشيلون منا والله تعودت كل يوم اجي يمج نسولف..جانت تسألني ليش وحدج هنا واهلج وين..اكللهه انه وي اخوي عايشة واهلي موجودين..ما انطيهه تفاصيل هيج علمني حامد.. لأن يدري بيهه تجينا وانه صغيره يعني يمكن يفلت لساني واحجيلهه كلشي..وراهه من شلنا ورحنا لبيت خالي اجت هي وبنتهه صغيره بالگوه تمشي..

دخلتهه للبيت وكعدت وي مرة خالي كلتلهه اني جنت جوارينهم بالسعدون ومن هلحجي..يعني بيت خالي عرفوهه وعرفتهم.. وراهه تركتهه ومشت الدنيا بينا وماصار اكو تواصل بيناتنه من ذاك اليوم وهذا يوم..فاجأتني بجيتهه..اول ما شفتهه حضنتهه وبوستهه كمت ابچي..شكد كبرانه ومتغيره..اكمش بايدهه وما مصدگة..شلون وصلتلي.. شلون صار كل هذا..عبالك حلم ومر جدامي بالعجل..

ام خالد وهي تحضن بيه وتبوس : عبالك ذاك اليوم والله.. فگدتكم وفدگت كعدتكم يمنا بالسعدون..
سناء بدموع : حبيبتي خالة شكد مشتاقتلج والنبي..كعدي كعدي..كعدنا والدموع بعيونا..مادري دموع الفرح هاي لو شنو..شلونج اخبارج..
ام خالد : على الله خالة..
سناء : شلون وصلتيلي..من بغداد للبصرة..
ام خالد : والله طك گلبي عليكم وكلت خلاشوف وين صفى بيهم الدهر..ما اجه ببالي غير بيت خالج ورحتلهم..كال صارو بالبصرة وهاي جيتي..واخويه هم بيته هنا فاجيت يمه وبدربي مريتكم..ضليتوا على بالي وداعت خلودي..
سناء : تدرين من شفتج تذكرت كومة شغلات..عبالك ذاك اليوم من جنتي تجينه وتسوين اكل..بنتج وينهه..
ام خالد بضحكة : تزوجت وراحت..وصار عندي ولد سميته خالد..هسة خطبتله بعد كم شهر يتزوج..
سناء : الله يحفظه ويطول بعمرج..

رحت جبتلهه كيك وعصير كعدنا سوالف والوكت اخذنا.. عرفتهه على حمد والبنات..
ام خالد : يتربون بعزج يارب..تستاهلين الخير..
سناء : خليت ايدي على ايدهه..الله يخليج خالة..صارت مغربية جان تكول يله اروح اني..كتلهه ابقي ع العشه ماقبلت.. طلعت وراهه سديت الباب جان يجي ناصر..هو رجلي..رحبت بي ودخل جوه..
ناصر : اكلج مو گلتي اريد اروح لبيت رائد ..
سناء : اي عيني..شوكت يصيرلك مجال..
ناصر : باجر اذا هاي..
سناء : اي والله ياريت..
ناصر : ميخالف..تدللين..
سناء : ماشي..البنات اجن سلمن على ابوهن وحمد همات مشى اليوم عادي..ثاني يوم العصر بدلت وكوثر اجت وياي وناصر..بالطريق..ناصر انزل جيب شي لسلامته خوما نروح وايدنه فارغه..

ناصر : اي صدك ميصير..هسة اطبك يم محل جملة..اخذ علبة حلويات وببسي همات..لو شنو؟..
سناء : اي يله زين هيج..نزل يجيب واجه..بعدين رحنالهم شفت رائد  واكف بالباب وي مجموعة من الولد..تخيلته حامد..نفس الملامح والشعر..بس هو اضخم واطول من ابوه..دمعت عيني بلا ما احس..نزلنه سلمت علي وتحمدلته ع السلامة
رائد : الله يسلمج عمة..جيتج كافية..
طبينه جوه وضل هو وناصر بره..كعدنا بالديوانية وي امه.. ماخذه هواي اطباع من حامد..العشرة هواي تأثر..
ام رائد : شو لا تجين لا تسألين هج كالوهه..
سناء : والله مشاوير الحياة شنسوي..كوثر اجوهه خطابة والتهيت بعد..رائد شلون صار..
ام رائد : راكب راسه ما تعرفي..وليدي اكعد لا تتحرك هواي مو زينه عليك الحركة..وهو ما يركد بالكع..

سناء : دنحجي جان نسمع صوت صياح بره..توني داطلع جان يطب رائد وناصر كامشة وهذا يصيح ماسكت..طب جوه واحنه كلشي ما مفتهمين..
ام رائد : شكو شبيك..ويامن تعاركت..
رائد : يمه هذول العركچية شايفين دنوة ذاك اليوم من اجت وواحدهم مثل الثور يكلي هاي الحلوة وينهه اشو ماكو.. يابة انه نار وگبت بيه شيطفيهه..هذا بس خلاصير زين والله اشلع اذانة..شكو شعدنا ويكول هج..
ام رائد : يمه هي مرة وحده اجت وشافوهه..
رائد : يعني شلون ميصير تطلع وتشوف خلك الله..
ناصر : يمعود هسة انت بحال عركات..شوف رجلك شلون مورمة..منو يفيدك دنوة؟..اكعد عيني..
رائد : لا والله فلا افوتلياهه هذا الخسيس..خليصبرلي
سناء : كافي ياعيني..هسة جاي تشوط روحك بالزايد

بالگوه هدأ..عاين لامه من رادت تحجي بنظرات ما ادري شلونهه.. سكتت من شافت عيونه..شلون دافعلهه لدنوة وهي غايبة.. مبين يحبهه..ضل كلساع يتذكر الموقف ويغلط ويصارخ بعدين يسكت..ضلت كلماتة ببالي..اكول ليش رائد ما اجه لخطوبة دنوة وضل بالواجب كل وكته..ما ينزل بس مره كل ١٥ يوم..كل ما اخابر سارة تكلي بالواجب بعده..وهاي بالشافعات ينزل يوم يومين ويرجع..حتى من سوه حادث وفاق من البنج جان يهذي وينهه..اريد اشوفهه..وينهه..بس ما كال اسم..اي والله يحبهه صدك..المغربيه طلعنا.. كتله لناصر خليني انه وكوثر يم بيت اهلي فد ساعتين وتعال..
ناصر : يله مثل متحبين..باتي اذا تردين..
سناء : لا انت موجود ميصير اعوفك..عاينلي وابتسم..

تذكرت امي جانت تريد تروح وياي من اروحلهم..هسة تضل تحجي چي نسيتهه..يله شسوي هو حيجي بمشية سرور وعود تشوفه.. وصلت هناك وكعدنا بالمطبخ..
ابتسام : ها رحتي شفتي رائد..
سناء : اي خطية متأذي ومگلوطهه لامه..ولا يكعد..هسة گبل شوي تعارك بالباب..
ابتسام : ليش ياساتر..
سناء : سامع ولد يحجون على دنوة..
ابتسام : الحجي بيناتنا..هو يحبهه..ما تشوفي شلون كتل نفسه عليهه ..ومن تزوجت كلساع رايح متعارك وي عقيل ويروح قاسم وفيصل يفاككوهم بس وين يقبل محيي ينطيهه.. وره ما عرف بابوه شمسوي..
سناء : انه هم كلت هيج..الله كريم..

نوارة كامت تضحك من سمعتني..سرور مجانت موجودة.. اكيد تعرف شي وضامته.. بقيت ع العشه واجه ناصر اخذني انه وكوثر..فرح جانت مسويه عشه الهه ولابوهه واخوهه..صعدت فوك للغرفة..همزين باجر عطله بعد..لكيته نايم..اكيد تعبان.. انمطلت يمه ونمت..

دنوة : خوش..حسوي وانزل..ضلت تعاينلي بنظرات مدري شلونهه..صعدت فوك دورت ع الشسوار..اول ما شغلته طفت الكهرباء..شلون سالفة هاي..كمت داريد اطلع جان تنفتح الباب وطب شخص..من الظلمه مشفت منو..بس سمعت صوت القفل..گلبي ضل يدك..خفت يكون خيال ذاك الولد.. كمت اصيح سروووور..وييينج..تعااي..اخاااف..سمعت صوت خلاني ارجف من فوك ليجوة..
- : هشش..گصري حسج شبيج..

خليت ايدي على حلگي بخوف..صخام.. رائد.. شجابه .. الغرفة كلش ظلمة مايبين شي..بس اسمع صوته انفاسه وخطواته.. حسيت علي شغل الجداحة يورث جگارة.. طفاهه وشغل اللايت مالتهه..كمت اخلي ايدي على رجلي وزنودي.. فشلت من الموقف..هو واكف ويدخن..يعاينلي ومصغر عيونه من الدخان..

وره الباب اكو تعلاگة عليهه العبايات مالت سرور ونوارة.. مد ايده اخذ وحدة وتقرب علي..
مدلي ايده : كمشي لبسيهه..
قربت ايدي اريد اخذهه..ومن توتري ايدي لامست ايده.. رجفت بداخلي .. ضليت صافنة علي..
رفع حاجبه : لاتصفنين..
: ها..اي اي..  اخذتهه ولبستهه بالعجل انه وأضم شعري جواهه..
همست : شجابك..
رائد : مشتاك لشوفتج والله..

ابتسمت وگلبي يدك سريع من صوته وعطره.. افشان .. ياربي شكد طيب..وگف جدامي والضوة جوه..مامبين من شكله بس عيونه وحواجبه..كمت اتهرب من نظراته وخايفة ماادري ليش..
دنوة : عفية روح مايصير هيج..
رائد : شبيج يولي..حتى ماكامشج..اريد اشوفج واتوكل..

هو كال هشكل وانه تذكرت كلام خالة ابتسام..صدك ابوي ماينطيني حتلو شافني اموت..وليش دااعلقه بيه وانه تفكيري انزرعت بي فكرة إن هو ابن المات مظلوم بسبب اقرب شخص الي امي.. ودائما فرخ البط عوام.. صح احبه وروحي بي وصوته وكلشي يخصه..بس الصار اكبر من حدود فكري ومخيلتي..ماتوقعت سبب كره أبوي لعمي ورائد وحتى انه حيكون شي متعلق بأمي..

عاينت بعيونه وحچيت : ليش تريد تشوفني..اصلا ليش تحبني.. ماانكر انه احبك واتمناك ..بس امي ...
سكتت .. جان اكو ماعون وراي..مد ايده طفى الجگارة بي.. چتف إدي : شبيها امج..
دنوة : هو خله امي تموت ومحد يزورهه..محد راغبهه.. وانه سمعت خالة ابتسام تحاچي مرة عمو فيصل..تگللهه ابوهه ماينطيهه بعد.. وهي اصلا ماتريده چي حامد جان السبب..ولو تريد الصدك فانه هيج..علمودنا ثنيناتنا..   حچيتهه واختنگت بيهه..

صغر عيونه مثل واحد ديستصغر كلام المقابيله.. ابتسم بطرف شفايفه : استغفرالله..هذا حچي بشر عاقل..اكول لاتسودنيني.. شبيج ابوية ..ابوي ماغلط.. وصارت مكتوبة علي بسبب ولد الحرام.. راح لدار حگه والصار انتهى وعرفتي الصدك.. الف فرصة وفرصة جدامي اكدر اسوي المايسوي عدوچ..بس شعندي وياج..انه لوما احبج مااسوي ذرة من السويته..تعرفين طبعي..كتوم ومااحجي.. انتي تزوجتي بوكت يصعب علي شمة الهوى وحگ ربج.. اربعين ابوي ماطالع شلون اخطب بيا عين..دناوي العشتي مو اصعب من العشته..بس انه مااحچي..

عيب هلكلام لاتعيدي..ابوج اذا ماينطيج باليسر اخذج بالغصب والله..احرگ الدنيا على راسه..مللني بعيشتي.. بس خلتگضي هاي الأيام واشوفج ببيتي..

هو وديحچي جان تجي الكهرباء.. غطيت وجهي لأن مخلية كحلة وحمرة واستحي منه..
رائد : يولي دوخري ايدج خلاشوفج..شكد بخيلة..
وخرت ايدي وخزرته : شتقصد..
مد ايده على جيبه طلع جگارة دخنهه وزفر الدخان : لا صرتي كريمة هسه..  ابتسم   ..لاتفكرين هشكل بعد..وخلي مواقفنا بين عيونج..اليحب صدك ماينسى بسبب كلمة سمعهه من غيره.. اسمعي لهذا..  وأشر على گلبي  ..وانه وعد زلم اذا خيبت ظنونج ماانعد ع الزلم..سولفيلي شغلة مشتاك لسوالفج ولكلشي بيج..حتى حسج العالي..
دنوة : ااا..ديله شبيك وي صوتي..هي صدفة اصلا انه منيلي صوت عالي..
رائد : لا انه عندي..  ابتسم  ..فطنتيني.. كليلي شوكت تخلص العدة الگشرة هاي..

عاينت بعيونه بخجل وماادري شلون افاتحه بالموضوع : ها.. خلصت صار فترة..
رفع حاجبه مستغرب : لا صدك ..
دنوة : اي والله.. شنو ماتدري..
عگد حواجبه متفاجئ ومبتسم بنفس الوكت.. بشر شايل تعابير الدنيا بدقيقة..

زفر انفاسه براحة ومد ايده يعدل الشماغ : اريدج تعرفين مافديوم عاينتلچ بنظرة حرام.. احبج واحب روحج مو جسمج.. وفهمج كفاية ..
حركت راسي بمعنى اي وگلبي يدك سريع من كلامه وردة فعله الرزنة..ماتوقعت هيج حيجاوبني وانه كلامي جارح حد الآه..

تقرب علي ومد ايده وراي..انفاسه حسيت بيهن على خدي.. شهگت ودفعته : شدسوي..
رائد : دااطفي الصخمانة..شبيج ابوية..ماادنالج الا تصيرين حلالي.. هسه اروح بطيت عليهم ..وانتي لاتطلعين جدام احد بهللبس عيب..

راح للباب واندارلي : طالعة نار وشرار..  غمزلي..
دنوة : عززه لاتحاچيني هيج.. يله اخاف احد يشك كافي انزل..وانه اسوي شعري وانزل..
ضحك : نازل..ومثل ما وصيتج..
دنوة : ماشي.. ابتسملي وراح..اعاين لطوله يخبل..اميز رائد من بين مية واحد..ع طوله وترهيمة جسمه..ادور لابس الدشداشة النيليه والشماغ..تذكرت اليوم الشفته بي.. اليوم الغير كلشي بحياتي والله اعلم شحيغير بعد..بس لوما هذا اليوم جان ما حسيت بهلشعور..مو بس حب..امان وانجذاب وغيرهه وغيرهه..ادور يكلي باباتي وبنيتي ويهتم لكل كلمة اكولهه..ما اعتقد اكو منه ثنين..ابتسمت وره هلتفكير ورحت ع المرايه سويت شعري بالعجل ونزلت..جوه جانت واكفتلي نوارة ومخوصرة..نزلت اضحك وهي معصبة..

نوارة بهمس : هاي وينج لج..خوفتيني عبالي صار شي.. هاي كله من وره سرور ام راس..اكللهه بابا ميصير وهي تكلي لا شكو بيهه خليهم يتفاهمون..
دنوة بدلع : اي فديتهه لسراوي..خلتنا نتفاهم..عاينتلي وسوت حركة سخيفه بوجهه..
نوارة : كال نتفاهم كال..صدك وره ما يطلعون اريد اگلج على شغلة..بس مو هسة..
دنوة : شنو احجي..ليش مو هسة..
نوارة : بعدين عيني..يرادلهه جو..
دنوة : يله عيني بعدين بعدين..رحت وياهه للصالة وكعدت وي البنات..سوالف وضحك..وحدة من البنات الجدد تعاينلي بطرف عينهه انه وسرور..يمكن ماعاجبيهه چي من البصرة وهي عودك بغدادية وبس..سرور كعدت يمهه ام حسام.. وكلساع ضاحكه ومبتسمة..مبين حبتهه..اهم شي العمة ما تكره الچنة..هاي نعمة عود..كلهه مدحت اللبس مالتي..

نوارة تعاينلي وتغمز..هاي شبيهه..شتريد تگلي يعني..وره تقريب النص ساعة قرو الفاتحة وطلعت الزلم..يبينون من الجامة مالت الصالة..هي صايره ع الساحة الجبيره..النسوان لبسن الصايات واكو منهن لابسة عباية وراحو..عمي فيصل اجه اخذ مرته وبناته وعمامي الباقين..فرغ البيت..
ابتسام : سرور انتي نظفي البيت..انه هلكت بعد مابيه حيل اشيل گشاية..وسوي اكل لابوج خاف جوعان..
سرور : اي يمة ميخالف..
دنوة : اندارت علي وبعيونهه حجي..
سرور : باتي يمنه اليوم حبابة..متعوده عليج..
دنوة : لا يمعوده..هم اروح ارتاح وماجبت ملابس وياي..واريد اقرة ووو..خير من الله شغلات..
سرور : عاد سوتهه كباية وهي ما تستاهل..
دنوة : يله من تصير الخطوبة اجي الطش يمكم..

رحت للمطبخ لبست الصاية والشال..جان تجي نوارة..
نوارة : اييي همزين لكيتج وحدج..تعاي احجيلج..
دنوة : اي يله احجي..تدرين انه نسيت..
نوارة : حقج..شفتي رائد وشبعتي منه طبعا تنسين
دنوة : لج شتقصدين..قابل شمسويه هي شوفة..
نوارة : يله عيني مانقصد شي..شوفي عمة سناء جانت يمهم گبل يوم او يومين ما اذكر علمود سلامته..فهي وطابة وراهه باقل من نص ساعه صار مصايح ورائد بالگوة فوته ناصر.. بعدين طلع شكو؟..
دنوة : شكو..
نوارة : هاي انتي مو رحتيلهم من جنتي ببيت خالتج..فاكو ولد شايفيج وما يدرون انتي گرابته..ديحجون وواحد فالت لسانة كايله لصگر هاي وينهه الحلوة..وهو منهد علي غلط وصياح حتى الرجال خايف وطافر..

دنوة : ههههه..اي طبعا هذا رائد..چا شعبالج..
نوارة بضوجة : لا عيني ما عبالنه..كبر راسهه الانسة..
دنوة : بجالة غير..وضحكت..لا صدك فرحني موقفة..
طب ابوي وعمي قاسم وجدي..سلمت عليهم..
محيي : يله يابة امشي نرجع..
دنوة : يله ماعندي شي جاهزة..رحت للصالة ودعت سرور ونوارة وطلعت وي ابوي..اول ما صعدت السيارة نزعت الحذاء رجلي كامت تأذيني حيل..صار هواي لابستة..سألته لابوي .. شلونه الولد الخطب سرور؟..
محيي : خوش ولد..مرتب ومبين بغدادي هيانة..
دنوة : اي حتى خواته وامه مبينين..شوكت اتفقتو ع الخطوبة والمهر وهسوالف..

محيي : انه محجيت والله..بس ابوهه وهو وابوه اتفقو..بعد اسبوع يجون يخطبون ويسوون عقد سيد..المهر سووه ١٠ والمؤخر هم عشرة..بالاخير المهم هو الولد نفسة متهم الفلوس والمهر والخبصة هاي كلهه..
دنوة : ها..اي صحيح والله..وصلنه للبيت..
محيي : نزلي انتي..حجيب شغله من السوك واجي..
دنوة : ماشي..نزلت ودكيت الباب بين ما طلعت رزان يله حرك سيارته..سلمت عليهه..اول ما طبيت استلمتني..

شذى : اي زين رجعتي..عبالي حتخليني انظف هذا البيت كله وحدي..يله ولي بدلي ملابسج وتعاي نظفي..اريده يلمع لمع خوش وما تفكين حلكج بكلمة..تشوفين شي ما يعجبج..
دنوة : بس تعبانة..والبيت نظيف مابي شي..شو هاي انه جاوبتهه جان تتخبل..كامت تصيح وتغلط..
شذى : امشييي..فوكاهه جايه ترادد..شلون لسان شطولة سترك ربي منهه لا تعلم بناتي..
دنوة : كلت بگلبي ليش هن بناتج قاصرات يعني..صعدت فوك وعفتهه تحجي..غيرت ملابسي ونزلت..

نظفت الهول وكنسته والمطبخ..تعبت فوك التعب..وفوك هذا ما عاجبهه..كلساع جايه تخربط شغلة..تكلي مو هج يسووهه..عدلي عدل لتصيرين ثولة من ابوي هنا تسكت ومتحجي ولا كلمة..بس من يروح تستلمني شسوي انه بهلحالة؟..قابل هو حيضل وياي بالبيت طول الوكت..يله اصبر شسوي..لخاطره..كملت كلشي وذبيت المكناسة ع الدرج..جان يجي ابوي..جايب وياه حلويات من الافران وكباب شوي..
رزان : بابا مدللنه هلفترة..كله من بره العشه..
محيي : اي تدللون..شعندي غيركم..
دنوة : عاين علي وتغيرت ملامحة..الكحله مالتي سايحة والردان مكفوف هو والبجامة.. ابتسمتله ورحت عدلت روحي ونزلت وياهم تعشيت وكعدنه على فلم..

شذى كاعده ع القنفه ماحجت وي ابوي بعد اصلا..البنات راحن ينامن وانه دايرة وجهي..سمعته راح صالحهه..اكيد ضاربهه راشدي طبعا تزعل شلت الكرزات وغسلت المواعين وصعدت فوك..بعد يومين وتبدي الامتحانات..منو يكول انه اصير بالمدرسة وره كل هذا الصار؟ عفت الافكار ورحت تمددت..

هسة انه تعبانه ليش ما انام..كعدت الصبح جسمي مكسر من الكعب البارحة وفوك التعب اجت شذى تكلي كومي نظفي.. بله البارحة نظفت البيت كله اليوم شنو عذرهه..مشى اليوم عادي ما صار شي جديد..ابوي راح للشغل وشذى استلمتني سوي هيج وهيج..اسوي انه وساكتة ما اريدهه تاخذهه حجة خاطر تكول لابوي بنتك كيت كيت..وما اريد اخرب علاقتهم..صار سنين سوه..بعدين اجي انه اخربهه.. رزان علاقتي بيهه قوت بس سما تكرهني..كامت تجيني بالليل تسولفلي مواقف صايرة وياهه..وانه بالمقابل احجيلهه..ما اريد احسسهه بغير إنه انه اختهه ولو جنت من غير ام..

اليوم اخر يوم وتبلش الامتحانات..قريت كملت كلشي اريد اطب للفراش جان تجي رزان..سدت الباب وكعدت
رزان : قبل لتنامين اريد اگلج شي..
دنوة : كلي اذان صاغية..كولي..
رزان : تذكرين الولد هذاك؟..الي سمعتيني اخابرة..
دنوة : اي شبي..
رزان : هو اني فكرت بحجيج وكلت يمكن صدك تحجي.. فگلته بعد لا تخابرني ابويه عرف وحياخذ مني التلفون..
دنوة : شفتي..مو گتلج..لو يحبج جان كال اجي احاجي ابوج مو يعوفج بالدرب هشكل..
رزان : اي صحيح حجيج والله..شسوي مفكرت..
دنوة : بستهه وطبطبت على ظهرهه..يله المهم عرفتي هسة.. حركت راسهه بمعنى اي وراحت..تمددت ونمت..

اجه ابوي كعدني الصبح..
محيي : يله يابة..كومي للدوام..حضرتي روحج؟..
دنوة بنعاس : اي حضرت كلشي..كمت وابتسمتله..رحت للحمام غسلت وجهي واجيت بدلت ولبست الشال..الصدرية سوده وساده ومخصرة من الخصر..هم مو حيل طويلة.. شعجب ابوي جايب هج..يمكن هو هيجي..لو الديرة جانت حاكمة علي يسوي مثلهم..اخذت الكتاب والاقلام ونزلت.. الراديو مشتغل وشذى واكفة دتسأل بالبنات..سمعت ابوي يكللهه لازم اطلع هسة عندي شغل كومة..شافني اجيت..

محيي : اوصلج انه؟..
دنوة : لا بس دليني عليهه انه اروح..قريبة هي؟..
محيي : اي قريبة..
دنوة : اي خلص..دليني عليهه..انت عندك شغل..
محيي : تندلين بيتج خالتج مو؟..تاخذين الفرع گبل وو...
دنوة : وصفلي الطريق..بيت خالتي قريب علينه كلش..فرعين او ٣..حسب وصفة فانه حمر ببيت رائد..كال تعاي تريگي وروحي.. كعدت يمهم اكلت جبن شوي وكمت..بوسته ورحت للمدرسة..بالطريق كامشة الكتاب واراجع..

بس فتت بشارع خالتي گلبي كام يمشي جدامي..جان اكو ثنين زلم واكفين بالباب..هذا رائد اي..هاي هيأتة.. بس البسده منو..بين ما وصلت لبيتهم طب الولد بقى رائد شافني فتح عيونه..مثل اليكول شجابج هنا وحدج..ابتسمت من شفته وگلبي ما احس بي هلكد ما يدك سريع..هو هم ابتسم من شافني..درت وجهي اشوفة راح لو بعد..جان بعده واكف ويعاينلي..گصني بنظراتة دنجت ورحت..تقريب الخمس دقايق ووصلت للمدرسة.. البنات واكفات بره واكو منهن بعدهن ديتمشن..شلون حختلط وياهن طبعي ما اتأقلم بالعجل احتاج وكت طويل..

طبيت جوه وكعدت على مصطبه راجعت بين ما دك الجرس ودورت على اسمي بيا قاعة ورحت..اجت الاسئلة زينه.. جاوبت وضليت انتظر لحدما دك الجرس وانطيتهه..بالممر واسمع بنات ثنين يحجن..وحده تكللهه اي اليوم يجي واشوفة..كال نروح لشقته..وهذيج اللخ تكللهه اي حتى تاخذون راحتكم..ضليت فاكة حلگي عليهن هاي شدتحجي استغفر الله..متخاف على روحهه..انه دامشي وهن جدامي..اندارت علي وشافتني..
- : شعندج تسمعيلنه..شنو ماعندج شغل وعمل..
دنوة : مداسمعلج..وين اروح يعني؟..دامشي حالي حالج .. جاوبتهه هذيج اللخ وهي تجر بيهه..
- : ختولي امشي عوفيهه..

دنوة : كلش ضجت منهن..يعني اطير مثلا..عودك شلون حجي يحجن خاطر افك اذاني عليجن..عفتهم ورحت برة للساحة.. بقت جم قاعة يطلعون يله نطلع..اجت وحدة كعدت يمي..
- : انتي جديدة؟..اول مره اشوفج..
دنوة : اي جديدة..
- : ها حلو..انه هدير..انتي؟..
دنوة : ابتسمت وكتلهه دنوة..
- : غريب اسمج..انه شفت البنات هذني يتعاركن وياج بالممر لا تديريلهن بال..هذني بس يردلهن سالفة ويتعاركن..
دنوة : لا ماجاوبت..هي بس هلچم شهر ونتخرج..
- : على كولتج..اي احجيلي بيا مدرسة جنتي..
دنوة : انه مو من المدينة..جنت بالديرة..بعد بالجنوب.. حجينه شوي جان يدك الجرس..كامت وكالت باجر اشوفج هم.. ابتسمتلهه وكتلهه ماشي..اخذت كتابي والاقلام وطلعت

كامت تمطر ع الخفيف..نث يعني..مريت من بيت رائد جان واكف بالباب ولابس بنطرون وبلوز فوكاه قمصلة ..وامه واكفة يمه تحاجي.. هذا شبسرعة لحك يصير زين ..امه  شافتني بعد عيب لازم اسلم.. تمشيت لبابهم ووكفت جدامهه رائد صار بسدي..
ام رائد  : تعاي خشي يمنه..خليوكف المطر..
دنوة : لا خالة..هياته بيتنه قريب..
ام رائد : خلي رائد يوصلج..هو يمر بطريقج..تدرين انه ما اجيتكم خاف زحمة من مرة ابوج..
دنوة : رفعت راسي عاينتله..جان مبتسم بطرف شفافة.. دنجت بالعجل..كتلهه ..لا عادي خالة هلا بيج بكل وكت..بوستهه ورحت..گلبي طاير احسة..

رجعت للبيت جان تستقبلني شذى توني صعدت فوك ع اول باية جان تصيح..
شذى : وين مولية..سمعت من محيي تعرفين تطبخين..بعد كله عليج الطبخ..انه ما اخلي ايدي..
دنوة : اي..بس ابدل واجي..رحت بدلت ونزلت..طلعت باگة سبيناغ ثرمتهه وحمست وياهه بصل وبهارات.. سويت التمن وخليته على صفحة.. انه وواكفه اسوي الاكل جان يجن البنات راحت هي تفتح الباب وانه واكفة ع الطباخ..متت حر..المطر وكف والشمس طلعت..المطبخ صاير مضرب شمس..منا نار الطباخ وحرارته ومنا الشمس..نصيت النار وهي راحت وي بناتهه بالصالة ديحلون الاسئلة..كعدت بالكع وانتچيت ع الكاونتر..جان تجي هي وتخوصرت جدامي..

شذى : كومي لج..لا يحترك الاكل..
جاوبتهه بصوت تعبان : لا ماعلي شي..نصيت النار.. حسبالك جانت منتظرتني احجي حجاية وتگب بوجهي..كمشتني من شعري وعتنتي حيل..كمشت ايدهه اريد اوخرهه..
شذى : اذا ما سمعتي كلامي اخلي الدلال هذا يطلع من عيونج..يله ولي من وجهي وروحي ع الطباخ..
كتلهه والدموع بعيني : اي والله حكوم..كمت عوفيني.. وخرت ايدهه وراحت..كمت بالعجل وكفت يم الطباخ وكعدت انتظر بين ما صار الاكل..وسما ورزان ضحك وسوالف..

لو ضالة ببيت جدي احسن..هنا عشت چم يوم ولو وحدنه بس ضجت..بس من ابوي هنا تصير زينة..صبيت الغده وصحتهم ياكلون .. اكلت وصعدت نمت..اذا ابقى تضل تتأمر علي كعدت من النوم جبت الكتاب وكعدت اقرة..خلصت نص الماده ونزلت على صوت ابوي..اي واخيرا..رحت علي بسته وحضنته حسيت بالراحة شوي..احسن من شذى..ادور رزان مدري شلون تعاينلي..شوف شحاجيتلهه امهه..هلمرة هي شذى سوت العشه..چي ابوي بالبيت تريد اطلع نفسهه هي الزينة تعشينه ورحت كملت قراية..بقالي شوي ونمت..

ثاني يوم هم كعدت وبديت اراجع..لحدما صارت بالسبعة وربع وطلعت للمدرسة رائد ماشفته..اي هي مره وحده قابل كلساع..بس هم ضل گلبي يدك سريع..بين ما وصلت شفت البنات الرادن يتعاركن وياي البارحة كاعدات ع المصطبه الكعدت عليهه البارحة.. غلست ورحت كعدت على غيرهه..
جان يجن..
- : شو ما كعدتي هناك..وأشرت ع المصطبه..
دنوة : شفتكم گاعدين عليهه..
- : اي عادي خلتقوى علاقتنه..منين انتي..
دنوة : كعدن يمي وحجينه..وحدة اسمهه اصيل والخ هالة.. وحدتهن تحجي شي واللخ تغمزلهه..مفهمت شكو..بس كلت اخلي علاقتي سطحية وياهن..ما اريد اتعمق..

دك الجرس ورحنه للقاعة..امتحنت وكملت ورجعت للبيت..كمت ارجع للبيت مشي وي هدير..بيتهه بالفرع الگبلنه..وهم مشفته اي يمكن تعبان حقه..خلصت ٣ امتحانات..واجه الخميس.. جان عندي امتحان سهل..فطلعت..هالة واصيل جانن طالعات گبلي ضلت تعاين علي مدري شلون..
هالة : امشي ويانه..نروح نشتري..
دنوة : منين تشترون..
اصالة : هيانة المحل براس الفرع..ما نتأخر..
دنوة : لا ما اكدر..كتلهه لامي (ماردت اكول مرة ابوي) حرجع من وكت..
هالة : شدعوه شنو صغيره انتي حتى تكليلهه لامج هيج..
دنوة : لا مو صغيرة..بس تحتاجني بالبيت..

ابتسمت ورحت اتمشى..هدير گبل لا ندخل للقاعة كالت ابوي يجي ياخذني انتي رجعي..بالطريق وفتت من بيت رائد..جان واكف بالباب ولابس عسكري ومدنج راسة ديلبس البيرية بايده وايده اللخ يسد الباب..رفع راسة وشافني..ابتسمت وهو هم ابتسم.. رجلية اخذتني لعندة..كتله ..حتلتحق؟..
رائد : اي والله..خلصت الاجازة..همس بصوت ناصي.. همزين شفتج گبل لا اروح..حطول هلمرة..
دنوة : ضجت بداخلي بس كتله.. شكد يعني؟..داحجي ويا جان تفوت سيارة..بس شكلهه شايفته..
رائد : ١٥ يوم ع الاكثر..شلونج بالامتحانات..
دنوة : اشو هواي..ليش هشكل..زينة يعني..
بابتسامة : حشتاگلج والله..
دنوة : برطمت بشكل خفيف..انه هم..هو ضحك وكال يله اروح تأخرت وانتي ارجعي للبيت..كتلة ماشي..ابتسمت ورحت اتمشى للبيت..واخيرا شفته..صار شكد فاگدتة..

من وصلت جانن البنات هناك..سما مدري شلون تعاينلي هي وامهه شذى ما حاجتني..مدري شعجب حتى ما كلتلي سوي اكل صعدت فوك بدلت ونمت..كعدت ع الغده تغديت ورتبت البيت وكعدت على فلم وي البنات بين ما اجه ابوي.. بالليل وره العش كعدني يمه..سألني شلون داجاوب بالامتحانات واذا يخليلي خط خاف المسافة بعيده..كتله لا بالعكس داتونس بالطريق وبنيه صديقتي تجي وياي مو وحدي..
شذى هي وعاوجه حلكهه : اي ليش متتونسين..الله يستر
محيي : شبيج وياهه يمعودة..عوفيهه..

صعدت انام ب١٢..كمت اتذكر رائد وابتسم..شكد ارتاح من اتذكرة عبالك مو هنا اعيش..توني غفيت جان اسمع صوت ابوي يصيح ..لج بت الكلبببب..تعاي نزلييييي انه الأغم صدكتتتت.....

يتبـــــــع................