رواية اسألي عني الليالي الفصل الحادي وثلاثون 31 - بقلم رقية جاسم

وداعت عيونك حبيبي ..
عمري بس وياك أحسة ..
ومن تغيب الدمع بعيني ..
اغرگ وما ألكى مرسى ..

قناة التليگرام

الـبـارت الـثـلاثـون.............

حنين : كعدت الصبح على صوت مصايح عقيل وروان.. مليت منهم كل يوم نفس القرص ينعاد..من يوم الطلك دنوة ما يطيق روان..اقل غلط تسوي يكلب البيت عليهه..يكللهه عود انتي مثل دنوة..شلون نظيفة ومرتبة..اجي الگى ملابسي مصفطه والحمام محضر..انه اللازم اتحسر عليهه مو هي..هي الف واحد يتمناهه..بس الله بلاني بيج..انتي بلوة وانه جنت حاسبج نعمة ..وهي تكب..لعد انت ضحكت علي بالحب مالك بعدين تكلي مغشوش بيج..وهاي هيج يضلون يتعاركون ومصايح لحد ما تكوم تبجي وهو يعوف البيت ويطلع..

كمت من الجرباية ورحت للممر..هلمرة ردة فعله تختلف عن كل مرة..ابوي جان كامشة وامي جدامة وتدفع بي وهو يصيح
عقيل : عوفنيييي داكلك..اريد اهد عليهه..هاي الما تستحي
كاظم : غير نفتهم شكووو..شبيكم يمعودين..انتي شبيج خرسيتي ما تحجين.. يحجي ويأشر على روان..
روان بخوف : ع..عمو والله ماكتلة شي..
ابوي زمخ بيهه..فزت من مكانهه..كللهه : اكو وحده ادمية ما مسوية شي يجي رجلهه يريد يضربهه الا اذا جان خبل
عقيل : اخذي ملابسج وطلعي من البيت يله..يلههه.. ما اريد اشوف خلقتج جدامي..
روان : بس اني حامل..
عقيل : طبج طووب..انتي وحملج..بليتيني حمل وحمل.. حسرة اكلج سويلي شغلة ولو بگد النمنماية صحتي حملييي..
ام عقيل : يمه استهدي بالرحمن..مو جنت رايدهه تحبل ويجيك وليد تفرح بي..شنو التغير هسة..

عقيل : اذا ابنهه يطلع عليهه ما اريدة..
كاظم : كافي مزعطة عاد..فهمونة شصاير..تردون تتعاركون روحو تعاركو بغرفتكم..بس مال تتعاركون جدامنه وتردونه نوكف نعاينلكم مثل الاصنام ما ندري شكو هاي مالهه داعي
عقيل : كل يوم طالعتلي بسالفة جديده..يعني اجي تعبان من الصخام الشغل اريد ارتاح..وين ارتاح وييين؟..اذا بالبيت وبغرفتي اطب واطلع عركات وتلاسني ع اقل شي..چي احبهه واسكت..لا والله لا تاخذينهه نقطة ضعف..شخطة قلم وتولين لبيت اهلج..عمي لعبت روحي بالقران..كافييي.. كافيي.. كام يجر بفانيلته ويصيح..كافي اعتقيني..هسة ادور طالعتلي بسالفة صفح..تكلي نروح لبيت امي نعيش..اي مو احنه مهجولين وفگوره..لج لوووما اهلج الفگر يافگر بت الفگر..

حنين : كام يريد يضربهه وابوي كمشة بالگوه ويصيح بي وهي واكفة بالباب وامي بسدهه..
روان : يله على كيفكم ويايه بس تصيحون عليه..ما تصيحون على بتكم..جايه تحب اخويه وتريده يتزوجهه..تقشمره بكم حجاية..والله يالله..كلكم صرتو براسي..وها لعلمكم تره امي ما تقبل تاخذ حنين لظافر..وانتو تعرفون ليش..
حنين : انه جسمي كله خدر..بعد ما اعرف شسوي..بطني كامت توجعني حيل..ابوي وعقيل اندارو علي..عقيل اجه كمشني من زندي ..يعت بيه ومخنزر..
عقيل : صدك الكالتة؟.. مجاوبتة..صاح ..احاجيييج.. صدك؟ هو انه منين اتلكالهه..منج لو منهه..
حنين : دموعي نزلت بالعجل من الموقف..اي احبة صحيح بس امه ما تقبل..كمشني من بلوزي حيل وشمرني على ابوي طحت بحضنة..كمشته من ياخة دشداشته واعاين بعيونة اخاف يسويلي شي..يابة والله ما مسوية شي..

روان صفكت بايدهه : يا مامسوية عيني..الليل كلة تتخابرون وكاعدين تحلمون احلام متتحقق..
ابوي ضربني راشدي صوفر اذاني..كمت ابجي واشهك.. والله اطخ بعقلة يزوجني ماعنده مانع..وانه كبرت..صرت ٢١.. ابن خال ابوي اكبر مني عمره ثلاثين..مره طلبني من ابوي وگله بعدهه صغيره ما انطيهه..فكلة من تكبر اجي اخطبهه ابوي ما عارض.. الرجال للامانة يشتغل وعنده شهادة معهد.. بس مرة اخته وهو وامه جانو هنا..فسمعت اختة تحاجي بالمطبخ تكلة اذا تريد تزوج لازم تعوفهه عاد ميصير هيج لعد لشنو مزوجينك احنه..مفهمت المن تقصد..يمكن وحدة يحبهه او هج شي يعني..

هو صادف كبل چم يوم جاي ع ابوي بمحلة.. وسائلة عني..وابوي كايلة بابنه مفتوح شوكت ما تريد تعال.. بيومهه حاجيت ابوي بالموضوع ..كتلة اصبر شوي يابة وانه بعدني مو هلكبر..مو غدير تزوجت عمرهه ٢٣..مثل الاقتنع وكال ماشي.. بس الصار اليوم غير كلشي..
كاظم بعصبية : تعاي اخذي بتج لا اخلص عليهه..الابن يتعارك ليل نهار وما نشوفة بس بالمصايب..والبنت عايشة باوهام وجذب ..شوفي لج..وأشر على روان.. اخوج اذا تگرب لباب بيتي احش رجلي..اذا هي عقلهه صغير المفروض هو اليصير واعي ويجيهه من الباب..
روان تخوصرت : واخويه شعلي عيني..هي بتكم تخابرة تكلة شوكت تجي تخطبني..

ابوي كام يصيح على عقيل..كلة : اخذ مرتك وخش جوه.. هاي بعد ما اريدهه تطلع بدربي..لو تشوف صرفة لحالك لو تضب لسانهه..بعد چلمة وحده منكم ثنينكم ما اريد اسمع.. كافي دخنه يابشر دخنهههه..ما تفهمون بالحيوان..وانتي ..وأشر علي..اجة كمشني من زندي واخذني للغرفة..قفلهه واندار علي اكيد الاب من يسمع واحد يكول بنتك هي تخابر بالولد وتكلة كيت كيت حيتخبل واعصابة تنهار..ضربني راشدي وشالني شمرني ع الجرباية..كمت ابجي واشهك..لا يابة فدوه اروحلك والله جذابة..ما مخابرة احد انه وداعت طولك..اجه تقرب علي وكمشني من شعري..

كاظم : بالجمعة انطي خبر لثامر يجي يخطبج..كلمة وحده متصير ثنين..ياويييلج اذا فكيتي حلگج بكلمة..فاهمة انتي الظاهر مو مال احترام..وهذا ظافر جذاب ثم جذاب.. وكلشي سمعتي منه جذب..وهسة تشوفين شلون..فهمتيييي
حنين : حركت راسي بمعنى اي وايدي على وجهي اخاف يجيني راشدي..ابوي ابد مامد ايده علي..هاي اول مرة بحياتي كمت ابجي مثل الطفل من الفشلة..وهاي روان ما ادري شدعي عليهه..حتى عقيل كام يكرهه..شمسوي بيهه الله خاطر يسوي بيهه بعد..فتح الباب وصاح..
كاظم : امشي خشي يمهه..ولا تشوفني چهرتهه بعد لا بالقران اخلص عليهه..الجمعة يجي ثامر يخطبهه واخلص منهه.. وانته عقيل لم لسان مرتك..ما نريد هوسة..وكوليلة لاخوج الشريف لا يجي ولا يتگرب..هاي اذا اله نية يجي اصلا..

حنين : امي طبت وسدت الباب وراهه..كعدت يمي شافتني ابجي..لا هي الوياي ولا هي الوي ابوي..تكسر وتجبر..
ام عقيل : يمة شلون تسوين هشكل..زين هيج ابوج شاط المسكين وخليتي روان تتشمت بي..
حضنتهه وكمت ابجي بحضنهه : والله ما مخابرتة..جذب هو يخابرني..ويكلي احبج واجي اخطبج بس امه ما تقبل چي ما مكملة دراسة وهو صيدلاني..
ام عقيل : مو كافي عندي روان الله ما يجرعهه..ادور اخوهه ياخذ بنتي..لا هاي كملت السبحة..ماماتي ..استهدي بالرحمن وفكري بعقلج..الولد تمشي بشور امة..يعني باجر عكبة اذا صار شي وامه كلتله عوف حنين يعوفج ويروح بنص الدرب؟ الحياة درب طويل ماما ومو أي احد يكدر يتحمل يمشي هذا الدرب..اختاري الصح اليوكف ويمشي وياج كل هذا الدرب لحدما تخلفين ويصير عندج بزرة وتكبريهم لحدما يوصلون لبر الامان..ادري بيج واعية وتفهمين..

حنين : گلبي شيفهمه..انه حبيته بعد ومافكرت هشكل..
ام عقيل : ميخالف..النسيان نعمة وانتي حتروحين يم رجال قدرج واجاج من الباب..مو گضاهه مخابرات ووعود واوهام مالهه نهاية..دتفهميني..
حنين : مسحت دموعي وتنهدت..اي فهمت..بس اخاف اظلمة وياي مثل دنوة..
ام عقيل : دنوة تختلف يمة..هاي بنيه بت بيت واخوج مزوج صارلة هواي..وما اخذهه عن حب..بس چي كرابته وبت عمة.. بس هذا الولد رادج من گبل..اكيد هو شايفج بعد وعاجبته وضالة بباله..والا لو ما عاجبته جان من زمان وترك الموضوع وراه وتزوج..مو ينتظر..صحيح؟..
حنين : مخمختهه ببالي شوي..كلامهه صحيح..بس شلون انسى سنه ونص ..بلكت التهي وي هذا ثائر مدري ثامر.. دخت هلكد ما صوت صراخ ابوي باذاني..

طلعت من الغرفة لنه وامي..جان تطلع روان بيدهه جنطة..وعقيل كامش السويج بيده يمكن يريدون يطلعون..
ام عقيل : ها على وين ان شاء الله؟..
عقيل : تريد تروح لبيت اهلهه..
ام عقيل : طبعا انتو فد ثنين ما تنحزرون..ساعة تتعاركون وتصير ملاطم..وراهه ترجعون حبايب..شوف يمة هاي اخر مرة اكلك..اطلع دورلك بيت وفضنة اذا ضلت هاي السوالف.. ملينة عاد لا ليلنة ليل ولا نهارنة نهار..عيب شنو ماكو احترام
عقيل : يعني طردة..
ام عقيل : مو طردة..بس لازم تعرف حدودك..البيت بيت ابوك صحيح..مازالة بيته لازم تحترمة وتحترم اهلة..الكلام الك ولمرتك سمعتيني زين..
عقيل : هلايام واطلع..ما مطول ان شاء الله..

حنين : امي اخذتني ورحنة للغرفة..كعدت تنصحني وتحاول تفهمني ان الحياة مو بس احبك وتحبني..ما ادري شلون مافكرت هشكل من حبيت ظافر..جنت اكول يكدر يوكف بوجه امة اذا رادني صدك..بالليل اجه ابوي ماطلعت سلمت علي استحيت من الموقف الصار..ثاني يوم كعدت الصبح من وكت چي ابوي حيطلع لشغلة..ما اتحمل يطلع زعلان مني..اريد اراضي واكلة عرفت غلطي..طلعت من الغرفة جان لابس الدشداشة وستره فوكاهه..شافني وصد عني..رحت يمة كمشت ايده جرهه مني..
كاظم : روحي..
حنين : بس غلطت واريد تسامحني ماجاوبني..عافني وراح دموعي نزلت..شلون بيه اذا ضل هشكل.. مامتعودة..

بقيت ع الحال هذا لمدة اسبوع..بس امي تحاجيني..عقيل يعاينلي بطرف عينة كله ..اجه فديوم كلي سويلي اكل وانه جنت ابجي وعيوني غادية دم..كتله ما اسوي اجه راد يضربني كمت ادفع بي وابجي..كلة بسبب مرتك اكرررهك.. اكره روان..اكرهك ..عافني وراح..ثاني يوم الظهر ع الغدة سمعت ابوي يحاجي امي يكللهه مشية سرور باجر انه مارحت..بس امي وروان..امي رجعت تعبانة راحت طبت ترتاح وانه واكفة بالمطبخ داسوي حلاوة..جان تجي روان تتأفأف وتنزع بشالهه..
روان : بله عليج هاي دنوة ولا تكول مطلگة..شلون لبس وجسم لو كلنه عدنه حيلهه جان صرنه بخير..
حنين : دعوفيهه للبنية افتكت من عقيل العكرة..يضرب بيهه وماملحك..هو هم رجال هذا عود..
روان : ها عيني سالمين..رجال ونص..بس هي زعطوطة ما تعرف شلون تساير امورهه..

حنين : اجت امي على صوت روان..كالت : ها شبيجن.. عركة جديد الحمدلله..نطلع من وحده نطب بالثانية..روان تخوصرت ووكفت جدام امي تريد تتعارك..
روان : وشدعواااج عيني..اجيتي مناك على حسي بالغصب تريدين تسويني عراكة..
ام عقيل : چا انتي شني اذا مو عراكة..
حنين : صار مصايح بيناتهم جان يجي عقيل وابوي..
كاظم : اهووو..يعني مانخلص من المشاكل.. دكافي يابشررر كافي..بالقران لعبت روحي..عقيل اخذ مرتك وروح يرحم عشيرتك..مللتونة عيشتنه والله..
حنين : عقيل اخذ مرتة وراحو..

ابوي راح للصالة..رحت وراه سديت الباب وطبيت.. بست ايدة وراسه.. اعتذرت منه..مسح على راسي وحضني..كمت ابجي واشهك بحضنة.. قابلة بكلشي تسويليا بس لا تزعل مني احس الدنيا هلكدوتهه من زعلت مني..ما متعودة بدون حسك
كاظم : خليهه ببالج..الي يحبج هياتة بابج مو يقشمرج فهمتي؟ ..لا تتصورين حب الاب لبنتة يقل..نفسة هو هو.. بس صديت عنج خاطر تعرفين غلطتج..
حنين : عرفتهه واريدك تسامحني..ابتسم وباسني من راسي مسح دموعي وكلي..
كاظم : باجر تجي النسوان تشوفج..
حنين : وثامر خوش ولد؟..
كاظم : حيل خوش..غمضي عيونج وروحي..
حنين : تنهدت وبستة بخده وطلعت..احس ردتلي روحي..

رحت للمطبخ طفيت النار ومشى باقي اليوم عادي..ثاني يوم جهزت نفسي وابوي شافني وابتسم..همزين جان مصالحني من كل گلبة مو هج..العصر اندكت الباب رحت افتحهه..جانت ام ثامر واخته وبعد ٣ ما شايفتهن..رحبت بيهم وطبو جوه
كعدو وي امي وانه صبيت من الحلاوة السويتهه البارحة وعصاير وقدمتلهم..هم اصلا يعرفوني بس هاي تقاليد يعني امي كلتلهم تصير مشية الزلم والخطوبة بس بدون زواج.. چي عمهه ميت..تطلع السنة مالته يله..الجماعة ما اعترضو..
ام ثامر : اي عادي..شتفصلون نلبس..

حنين : بالليل طب عقيل يصيح..ويييننج.. رواااان.. لمي ملابسج بالعجل..بعد مالنه كعده..امي طلعت على صوتة
ام عقيل : شكو شبيك ياستار..
عقيل : يجي ابوي ويفهمج كلشي..انه رايح لبيت جدي اشرفلي من الكعدة هنا..
امي عافته يطلع وهو يصيح ماسكت لحدما طلع وسد الباب وراه..كعدت تنتظر ابوي يجي..اجة بالليل كلش متاخر.. تقريب الوحده ونص يله طب للبيت..تلگيتة واخذت منه الستره.. راح طب للهول..
كاظم : يا يابة..تكسرت تكسر..
ام عقيل : الك العون حجي..بس شصاير..
كاظم رفع راسة ويعاين بتساؤل : ما حجالج عقيل؟..
ام عقيل : لا والله..

كاظم : اي طبعا ميحجي من سواد وجهه..هذا ابنج ما يجوز من دنوة ورائد..يابة بنيه ما تريدك خلص هاهيه طلكتهه وكلمن راح بدربة..لااا شلون..شايف رائد بالسوك وضال يصيح ويغلط والرجال رجلة متصوبة بالكوة يمشي وابنج رايح يصيح بوجهه..بله هذا عنده عقل؟..كامشي جماعة واحد منهم ولد يشتغل وياي بالمحل..گلي عقيل جان يتعارك..جبته للمحل وكعدنه حليناهه واحد ثنين ثلاثة..كتلة لا عاد تتعرض للرجال شيكول عليك..شكبرك شكدك تتعارك لخاطرهه..كلي لا انه مو علمودهه..بس رائد معيره عساس..
ام عقيل : بشنو معيرة عوذه..

كاظم : دسمعي..خابرت على رائد..كتله اذا عندك مجال تعال للمحل انه موجود..والله ماطول دقايق واجاني..كتله شنو السالفة شحاجي وي عقيل..كلي صارلة يومين يدزلي رسايل يهدد يكلي اكول لجدي انت خليت دنوة تطلع من البيت واخلي يعدمك هلمرة مو يحرمك طبة الديره..يابة انه شدخلني رجال جنت ملتحق والدنيا طامسة لعينهه..ما جاوبته..وراهه من شفته بالسوك يكلي ابوك خله ام دنوة البريئة محد يزور كبرهه وانت حتطلع مثله..عاد هنا كبيت علي لحدما اجت الزلم اخذته.. المهم رائد راح لبيته وابنج رجعلي للمحل..يكلي انه ما اكعد يمك بعد..كتلة الله ومحمد وعلي وياك..رجال شكبرك شگدك انه بكدك عندي ٣ ومبلش ابني بيت مو مثلك..اجه اخذ مرته وطلع مو؟..
ام عقيل : اي..ضل يصيح ويكول متردوني..
كاظم : لا رادتك روحك..مصخهه فدنوب..مو هج كالوهه.. يله هاهيه كلش تعبت بعد..اروح انام..
حنين : امي راحت وياه وانه رحت لغرفتي انام...

دنوة : صعدت انام ب١٢..كمت اتذكر رائد وابتسم..شكد ارتاح من اتذكره عبالك مو هنا اعيش..توني غفيت جان اسمع صوت ابوي يصيح ..لج بت الكلبببب..تعاي نزلييييي انه الأغم صدكتتتت...متت خوف شكو ياربي شبي وياي ضليت بالغرفة بس كمزت من فراشي..كمت اسمع صوت خطواتة ع الدرج تضرب باذاني..

فتح الباب وهلكد ما فتحهه قوي انركعت بالحايط..اجه علي وعيونة براسه من العصبية كمشني من زندي وضربني راشدي..ضل يضرب بية وانه اصيح جواه وابجي..بس فهمني شكو..شصاير..
محيي : وما تعرفين نفسج شمسوييييه...انه صوجيييي.. امداية اي والله امداية..كومي..اشو كومي..
دنوة : جرني من البلوز وكومني من الكع..كمشني من شعري ويحرك براسي رايح جاي..احس شعري خلص بايدة.. شذى جانت واكفة يم الباب ومچتفة اديهه..شمسوية بس كلي.. جاب راسي خلاه جدامة وعاين علي بنظرات عصبية..

محيي هو وكاز على اسنانة : تحاجين رائد؟..واكفة بالباب وتتمضحكين ويا مووو...لج هذا فرخ البط..يعني حيطلع مثل ابوه..بانية احلام يجي يخطبج..انسي انسي..انتي محد يجيج بعد..انقفلت قسمتج..ديضحك عليج..يضحك عليييج
دنوة : كمت ابجي بحرگة..ما ادري ابجي من حجية الي سم بدني لو ابجي من الكتلة الاكلتهه..ما جاوبته بس بداخلي اكول رائد يحبني والله يحبني..واكثر منك همات..ذبني بالكع وضل يدفر بيه..كلساع نازل علي راشديات ويعت بشعري متت جوة ايده والله..تعبت اصيح لو اكلة عوفني..غمضت عيوني وايدي على وجهي ما اريد يجيني راشدي لاخ..اخر شي كام يضرب على راسي بالخفيف..
محيي : رائد ماكو..خوووش..شيلي من حياتج.. بالله العظيم لو تموتين جدامي ما انطيج..دتفهمييين لو اعيييد..

دنوة : من الضرب الاكلته بعد مابيه حيل اجاوب وافك حلكي بس حركت براسي يعني اي..عافني وراح..ضليت متمددة بالكع وابجي من كل گلبي..يعني ابوي الوحيد الي بالدنيا يعيرني ويكلي مالج قسمة بعد..فوك المعايرة يضرب بيه ويأذيني كمت بالكوة قفلت الباب وتمددت ع الجرباية.. خليت المخدة فوك راسي وابجييي بحرگة..يعني شسوي لروحي امووت؟..وين ما اروح مذلولة وعايشة بالضيم..كيفت هلجم يوم صار وياية مثل هواي اب وبنتة وهسة رجع مثل گبل.. وينك رائد..وييينك..تعبت وحدي..اريد حضنك يلمني ..اريد احس بشعور الامان الاحسه يمه..اووف ياربي..البكدي تضحك للهوى العالي..وانه طول الوكت دموعي بعيوني..محد يهتم يكلي مسحي دموعج انه يمج..مسمعت هلحجي بس من رائد شلون بيه ياربي..والله مليت..شوكت اخلص وارتاح

واهسي انكسر بكلشي..بالدراسة وبالبيت حتى بابوي.. جنت مكيفة اكول هو يحبني مايكرهني اكيد..وهسة ماعول تصير شغلة دايهجم علي..تعبت..ضليت ابجي واتذكر رائد ذاك اليوم.. شلون حجيت علي وما رحمته بحجيي بس مع ذلك هو صار اكبر مني وحط النقط ع الحروف وفهمني كلشي بدون ما يمد ايده علي..ادور من اتذكرة ازيد بالبجي..اتذكر عقيل وشلون يضربني هم يكلي نفس ابوي..يكلي تحلمين تروحين يمه ..ما مكتبوتلي الراحة وروح امي..ضليت ابجي لحدما تعبت ونمت..كعدت الصبح جسمي مكسر وماعندي قابلية انزل اشوف اي احد منهم..ضليت بالفراش ..

ادور عندي امتحان خاف مايقبل اروح..ضليت بالغرفة اروح منا واجي منا.. طلعت الكتب وكعدت اقره..بس اريد الهي روحي وما انزل جوة.. للظهر وبطني كامت توجعني..جان عندي ١٥ موضوع.. قريت نصهن ونزلت..ما عاينت بوجه احد..طبيت للمطبخ لكيت الاكل ع الكاونتر..ماكلين ومخلصين..محد مفكر يصيحني اتغده ..يله مو مشكلة..طلعت مواعين وصبيت اكل وكعدت بالكع اكل.. بس كل جسمي يصيح من وجع الضرب البارحة..داكل جان تجي شذى..تخوصرت جدامي وتحاجيني..
شذى : اشوفج متوجعة..لازم غزرت الكتلة البارحة..
دنوة : عاينتلهه وشلت الاكل..خليته ع السنك ورحت فوك..

شذى : وييين..وين رايحة عيني..روحي جيبيلي مسواك من برة اني مابيه حيل..اشك حامل..
دنوة : باع هاي يربي..انه شكو واذا حامل..يامكثر الحوامل وين اطلع هسة؟..ترة الدنيا ظهر واخاف..اجت علي اخذت ايدي وخلت بيهه ثلاثين الف..
شذى : تروحين تسوكين لا والله اخلي محيي يطلعج من البيت وترحين يم جدج القاتل..
دنوة بنتر : وليش تحجين علي؟..شفتي خيره يغطيج انتي واهلج وكل ناسج..وما اروح اتسوك..
شذى : لا اشو تروحين ونص..
دنوة : كمشتني من شعري وطلعتني بره بالطرمة..قفلت الباب وراحت مدري وين..وره دقيقة او اقل شمرتلي الصاية والشال من الشباج وصاحت بيه..
شذى : نص ساعة اذا ماجيتي اندمج على عمرج..

دنوة : سدت الشباج وراحت..كمت ابجي وادك ع الباب اريدهه تفتحة..ادور السوك بعيد يعني شتريدني اروح واجي ركض؟ ياربي ارحم بحالي والله تعبت..لبست الصاية والشال والحذاء مالتي وطلعت..حتى لو تكرهني بس شلون ادزني الظهر.. طعتهه وسكتت خفت تكول لابوي شي ويكتلني.. مابيه حيل ضرب تأذيت.. الشارع يصفر صفر..بين ما وصلت للسوك كلساع فايتة سيارة من يمي..لو ينزل الجامة ويصوفر لو يكلي الحلو شعنده طالع الظهرية..كرهت روحي وكرهت شذى وابوي وكلهم كرهتهم..ما اريد احد بعد..رحت لواحد ابو مخضر اخذت طماطه وخيار وبتيته وخس..حيلي بايد ما اكدر اشيل اكثر من هذني..دفعت فلوس ورجعت..همزين محد اكو من رجعت..وصلت للفرع مالتنا جان اشوف سيارة ابوي بالباب.. جسمي كام يرجف..متت خوف..

اذا شافني طالعة يذبحني ادور البارحة جان كاتلني..هسة شذى اكيد محضرتلهه عذر تريد تذبة براسي..شسوي يربي ماريد انكتل بعد..اروح لبيت خالتي؟..اي اكيد حتساعدني هي..علاقل ارجع وياهه.. اي اروح لخالتي..درت وجهي وتمشيت لبيت خالتي..وجهي صار احمر من الشمس..صار ساعة افتر بالشارع..رجليه غدن خيوط فوك ما تعبانة..دكيت الباب جان تطلعلي..
خالتي : هلا بحبيبتي..تعاي خشي خالة..
دنوة : ابتسمتلهه ودموعي خانتني..تخيلتهه امي..كمت ابجي والبنات وراهه..اجت حلا اخذت العلاليك من ايدي وانه حضنت خالتي وابجي واشهك..كامت تمسح بدموعي..
خالتي : خالة بس خنطب جوة..شكو شبيج فهميني..
دنوة : طبينه جوة بالصالة..كعدنه ع القنفة..ذبيت روحي بحضنهه وايدي على ظهرهه اعصر بدشداشتهه..

هي والبنات يريدون يهدأوني وماكو..من البجي تعبت وجفني ثگل.. تنهدت وكتلهه : خالة خليني يمج حبابة..ما اريد اروح
خالتي بخوف : العين فراش والجفن غطى..البيت بيتج
دنوة : بقيت بحضنهه لحدما غفيت..كعدت على صوت مصايح بين ابوي وخالتي..فزيت وكرفصت روحي بمكاني..شافني كعدت جان يتخبل..اجه يريد يضربني جان تجي خالتي صارت جدامة..
خالتي : تمد ايدك عليهه ببيتك مو ببيتي..هسة هي بحمايتي اذا ضربتهه وهنتهه معناهه هنت اهل البيت..
محيي : انتي ما تعرفين شمسوية هاي..نزلت راسييي..
خالتي : شبيهه شمسوية..ماتجي منهه الشينة والله..
محيي : ترضيهه بتج واكفة وي ابن الي خلة اختج تموت والكل ظالمهه..ها ترضين..
خالتي : تقصد رائد؟..
محيي : چا منو..اكو غيرة يعني..ديلعب بعقلهه..

خالتي : لوما رائد جان كتلك اي..بس الرجال مشهودتله موافقة ما تكدر تعيرة..بلكت جان ديحاجيهه بشغلة ليش بالعجل سويتهه عدهه علاقة بي ويضحك عليهه..
محيي : اعرفه يريد يجي يخطبهه بس ما انطي..
خالتي : وليش ما تنطيهه..رائد خوش رجال..
محيي : لو تموت جدامي ما انطيهه شتريد تسوي ختسوي يله اريد اخذ بنتي وارجع للبيت..
دنوة : ما ارجع.. دار وجهه وعيونة تطاير شرار..
محيي : شنووو..تمشين وي ابوج انتي وساكتة
دنوة : كمشني من ايدي واخذني سحل برة..شكد فشلت منهم وانه اكول ابوي تغير وصار مثل هواي اباء..خالتي تقنع بي وماكو ..كلتله بالله عليك لتمد ايدك عليهه..ما جاوبهه..

صعدني بالسيارة ورجعنه للبيت..نزل هو ونزلت وراه..بقيت واكفة بره خفت اطب ويضربني..
محيي : امشي جوة..مابيه اصيح تعبت..
دنوة : دنجت وطبيت وراه..استقبلتني شذى تغلط وتصيح هاي وين رحتي..وصيتج على جم شغلة تالي متالي رايحة لبيت خالتج وتخلين ابوج تايه يدور هنا وهنا..عمي انتن الله يستر منجن..خوية زوجهه..عدهه وماعدهه شكو بعد..
محيي : هسسس ولا كلمة..انتي هم كلج شر..
دنوة : عفتهم وصعدت فوك ركض..قفلت الباب وتمددت.. جسمي نحلان..نزعت الشال والصاية وجبت الكتب كعدت اقره ابوي ما كال شي ع الدراسة..يعني اروح اداوم عادي.. نمت هواي العصر..فما نعست..كملت قراية بالوحدة وربع.. بس بطني كامت تاكل بية..نزلت على كيفي جوه..دورت بالثلاجة طلعت فاكهة وماعون بي كباب بيت..رحت للصالة اكل..

شفت تلفون ع الطبلة..خلصت اكل ورحت اخذت التلفون وصعدت فوك..سديت الباب وقفلتهه..اريد اخابره..الورقة الي جان بيهه رقمة بقت بالجنطه..رحت للكنتور ابحوش اريد الكاهه.. ادور وگلبي يدور گبلي..همزين لكيتهه..كتبت الرقم بالعجل ورحت كعدت ع الجرباية..دك مره مرتين جان يجاوب..كام يحمحم بعدين حجه..

رائد : الو..منو..
دنوة : اا..انه دنوة..
رائد : هلا بالخير كله.. شلونج يكل ناسي..
دنوة : بمكان ما ابتسم..كمت ابجي..رائد شوكت تجي
رائد : ليش البجي دنيتي انتي..بعدني يالله رحت..اكو شي صاير؟..اكدر انزل يوم طوارئ..
دنوة : تنهدت وكتله..ماكو شي..بس مشتاقتلك..
رائد : وانه بعد وداعة عيونج..شعندج كاعدة هسه..
دنوة : جنت اقرة..
رائد : عفية بنيتي..
دنوة : كمت ابجي بصوت ناصي..گتله رائد شلون اذا ابوي ما انطاني..ما اتحمل بعد والله..
رائد : ارخص الدنيا كلهه بس اخذج..كلمة مني خليهه يمج لو بيدي اليوم گبل باجر اخذج واطير بيج..ما اخليهم يشوفونج ابوج حاجاج ..

جاوبته والدموع تنزل عشره عشره : اي..
رائد : كليله اي وبس..منا لوكتهه انه عندي الف حل.. وعدتج وانطيتج كلمة..مو رجال اذا ما صرتي يمي..مسحي دموعج وماريدهه تنزل ع الغالي والرخيص..تثقين بيه؟..
دنوة : اي..
رائد : چا خلص باباتي انتي..نامي وارتاحي وصالحي ابوج لا تخلي يزعل عليج..الصار مو قليل بس انه اعرف شلون اثبتله العكس..اطمني وما اريد بجي دنيتي انتي.. ماعولت اروح تالي تنزل دموعج بالعجل..
دنوة : اخذت نفس وزفرتة..دوختك
رائد : انتي راحة بكل تعبج ودوختج..
دنوة : ابتسمت..انه نعست..حروح انام..
رائد : تصبحين على خير حبيبي..بالج على نفسج..
دنوة : انت هم..
سديته والابتسامة مرسومه على وجهي شكد فرحت من سمعت حچيه..بلسم للجرح والله..

خالتي ما غلطت من كالت رجال..مسحت الرقم ونزلت التلفون جوة.. صعدت فوك بالعجل تمددت ونمت..تمنيت اكعد متأخرة.. مابيه حيل اروح للدوام ع التعب مالت البارحة..اجت رزان كعدتني بس من وره خشمهه.. اي اكيد شذى ماخلت شي ما حجتة علي..يجوز كلتلهه عافت البيت وراحت وي واحد.. الله اعلم..كمت غسلت وبدلت.. اخذت كتبي ونزلت جوه ابوي جان كاعد ديحجي وي سما تكلة المدرس موزين اريد اروح لغيرة.. يمكن دتقصد ع الخصوصي.. هو كللهه اي تدللين اليوم العصر اشوف مرة الرجال صديقي هي خوش مدرسة وتاخذ دروس بالبيت.. كامت باستة وتتشكر منه وانه واكفة يم الدرج اعاينلهم..حزت بخاطري من انه بنتة الجبيرة وهو البارحة مشبعني كتل بدون ما يسمع السالفة مني..اخلص امتحانات واروح لبيت جدي احسن..بيوم خطوبة سرور ابقى يمهم..ما عاينت عليهم شذى جانت مخلية زيتون بماعون ع السنك..اخذت ثنين ووحدة اكلتهه وطلعت..

حتى محد جرب يسألني اذا زينة لو صايرلي شي شكد انقهرت ليش هشكل..شمسوية.. مريت ببيت رائد مالكيت سيارتة..تذكرت البارحة شلون كعد يخفف من وجعي حسبالك يحس بيه ابتسمت وكملت طريقي للمدرسة..بالباب شفت هدير واكفة جنهه تنتظر احد..شافتني جان تجي علي
هدير : ها ولج.. دانتظرج تأخرتي كلت بس لا اخذتهه النومة
دنوة : لا بس جنت تعبانة من القراية.. مشينا جوه وكعدنا على مصطبة جان يجن هالة واصيل..ابتسمت عادي چن ماكو شي سلمن علي وراحن بس هلمرة احس اكو شي..هالة تعاينلي وتضحك بدون سبب بس ابادلهه بإبتسامة شوي ودك الجرس طبيت للقاعة امتحنت..

خلصت وانطيت الورقة من طلعت جانت هالة بره بس اصيل مدري وين..اكيد دتمتحن شنو هلسؤال يعني..رحت للمصطبة الخليت عليهه كتبي جان تجي هالة..
هالة : دنوو حبيبي تعاي وياي..
دنوة : رفعت راسي والكتب بحضني..على وين؟
هالة : هنا بالفرع الثاني..اصيل دتنتظرني وكتلهه ما اجي الا تطلع دنوة..نشتري ونجي لا تخافين قريب المحل
دنوة : ما اكدر اليوم..اريد ارجع وي هدير
هالة بنتر : شدعوة تره مطلبنه شي..وهدير ابوهه حيجيهه
دنوة : ماشي..كالت يله ورحنه نتمشى..
اشو شارع يجر شارع رجلية كامت توجعني..

طول الطريق تحاول تلهيني ع ان الدرب بعيد.. بس خاطر ما اكللهه وين احنه..كلت يجوز ضيعت لو شي..طبينا لفرع فارغ يصفر..الفروع الطبينالهه كبل شواي جان بيهه بشر ولو محل..شفت اصيل واكفة وي واحد ويأشر علينا..معرفت اذا جان يأشر علي لو على هالة.. خفت وضليت واكفة بمكاني
هالة : امشي شبيج..
دنوة : لا ما اكدر..هاي اصيل بعد انه ارجع..درت وجهي بدون مقدمات واريد ارجع جان تجيني عتّة من زندي..حسيته انخلع صحت ااخ ليش..بس درت وجهي احس دماغي سكت.. الولد كامشني من زندي والبنات واكفات عادي ولا عبالك..لازم احافظ على موقفي واضل هادئة..

الولد : على وين رايدة؟..
دنوة : ليش منو حضرتك خاطر تسأل..
من گتله هيج وخر ايده استغليتهه فرصة ورحت..كمت امشي بخطوات متوازنه اريد الفرع يخلص داركض..جسمي كله نمل من الموقف..هذني ناوياتلي نية گشرة..يله ماضل شي.. امتحانين واخلص.. بين ما وصلت لشارع المدرسة لكيت البنات ماكو..بس جم وحده من هذني اليطلعن متأخرات..اخذت نفس وزفرتة بخوف..تمشيت لبيتنه..جانت سيارة واكفة ببابنه..اول مره اشوفهه وصلت للبيت جانت الباب مفتوحة..طبيت وسديتهه وراي.. رزان وسما وامهم واكفات وجدامهم مره وابنهه صغير..سمعت صوت الباب انسد جان تندار علي..معرفتهه اول مره اشوفهه..

تمشيت لعدهه وابتسمت..ما بادلتني بشي..
شذى : هاي اختي ام رامي..سلمي عليهه..
دنوة : سلمت عليهه..ردت السلام من وره خشمهه..ماردت اسوي شي عفتهه وصعدت فوك بالغرفة بدلت ونمت..كلش نعسانة..اجاني نفس الحلم..كمت ابجي بالحلم واصيح واكله رائد وينه..يحبني وحيجي ياخذني..كعدت من النوم المخدة مليانة مي من دموعي وصوتي مبحوح عبالك جنت اصيح بالصدك..كمت على كيفي وفتحت الباب داطلع..جان يصير بوجهي هذا الطفل الصغير..شكد حلو ابيض ومدبدب.. دنجت بسته بخدج والعب بايدة..جان يجي واحد..بكد رائد يمكن لو عقيل..شافني ارتبك..
- : هاي انت هنا..شصعدك يول..تعال بابا ودنج شالة..

دنوة : ابتسمت..يمكن رجلهه هذا..بكد رائد وعنده ولد.. وهو لسه مامتزوج..التهى بالمشاكل..رحت غسلت وجهي وحطيت الشال على راسي ونزلت..صار ابوي بوجهي چنه يريد يصعد فوك..عفتة ونزلت بعدهه بخاطري الكتله..يسمع لشذى وانه لا..بباب المطبخ سمعت شذى تحاجي اختهه..

شذى : اي لج كتله بتك جانت ناوية تشرد وي رائد لان تدري بيك ما تنطيهه..زوجهه بس تخلص سادس..عاد الفكرة بقت بباله البارحة حاجاني..
ام رامي : اي والله زين تسوين..بس هي حلوة والله يعني تمشي بس يجي واحد يخطبهه..
شذى : اي عيني تشبه محيي مو بله..
ام رامي : كلش..بس هي سمرة..
شذى : اي..هسة هاي اصيل تصير بت المدرسة التدرس عدهه رزان..فهاي بتي الثولة حاجيتلهه على دنوة..كايلتلهه اي هاي بنية جديده ويانه..شوف شحسوي بيهه..الا اخليهه تكره اليوم الطبت بي لهذا البيت..
ام رامي : محيي اذا عرف يطلعج انتي وبناتج تره..بلا كلشي هو مقهور عليهه مثل متكولين..
شذى : اي البارحة ما نام..يكلي شلون ضربتهه..لا لتخافين كلشي ماكو..

دنوة : گلبي ضل يدك سريع وجسمي يرجف..معقولة هي دازته خاطر يسويلي شي وتتهمني بشرفي؟ ليش هشكل ديصير بيه..بعد مابيه اكمش روحي ياربي ساعدني والله تعبت..جانت دتحجي وياهه وتصب اكل..كشت روحي من الاكل ومنهه ومن كلشي بالبيت..طبيت للمطبخ..
شذى : اي زين اجيتي..تعاي نگلي الاكل للصالة..
رحت فرشت سفرة وجبت الاكل..رزان وسما ولا شفتهن..اي هو انه شوكت شفتهن يخلن اكل ع السفرة لو يشيلن شي من الكع..بس علي الشغل..كملت ورحت صحتهن..كعدنه ع الاكل بس ما الي نفس اكل..لعبانة روحي من السمعته..اكلت زلاطه شوي بس وكمت..

صعدت فوك بالعجل ماريد تتأمر علي.. كشت روحي منهه..شكد نيتهه گشرة وياي..هسه لو ارادد والاسن جان ميخالف..بس كافية شري خيري..طلعت الكتاب وتنهدت..يله هانت..اخر امتحان عندي لازم ارجع اجهز روحي واروح لسرور..خوما تضل وحدهه..ومنهه اخلص من شذى.. كعدت اقره والخص المهم حسب الاتذكرة..الماده هواي وراسي متصدع من الصار..بعد ماطلعت من الغرفة..لحدما أذن المغرب سديت الكتاب..خلصت المادة بس اراجع..رحت تمددت ع الجرباية وظهري احسه متفصخ..هاي شلون حروح للخطوبة بهج وضعية..شوي وانفتحت الباب..فزيت من مكاني..

محيي : شبيج بوية..كعدي كعدي..
دنوة : اجه وبيده صينية..خلاهه ع الميز وكعد يمي..لف ايده على راسي وباسني منة..
محيي : عساهه بالكسر ايدي اذا نمدت عليج..
ما جاوبته بس ساكتة..
محيي : شفتج ما اكلتي ع الغدة وانتي عندج قراية..ميصير تقرين بدون اكل..
بعد راسي شوي وجاب الصينية يريد يوكلني..بس ما اشتهي مو ماريد..كتلة ..ليش تضربني؟..
محيي : السمعته مو هين..
دنوة : شنو السمعته..ومن منو..
محيي : شذى حجتلي كلشي..البنات شايفاتج راجعة من الدوام وتحاجي بالباب..تنهد وكال ..عوفي الموضوع..
دنوة : صدك تريد تزوجني؟..
محيي : خلصي السادس اول..بعدين الله كريم..

دموعي صارت بعيوني بس مبجيت..اخذت الصينية واكلت شوي وبعدتهه..اخذهه مني وباسني من راسي وراح..مبين متندم وكلماتة جانت من العصبية..بس سالفة رائد جانت صدك..مادري بعد..ماريد افكر بالموضوع..خلي الوكت هو يحلة مو انه..نزلت گبل العشة جان تتوخصرلي..
شذى : عفتي مواعين الغده علي وكلت ماشي..بس مال تعوفين العشه ومواعينة علي لا متصير..يله تعاي سوي..
دنوة : اي..طلعت الموجود وسويته..هي واختهه يضحكن ليغاد وابوي ورجلهه بالصالة..صبيت الاكل ونگلتة انه..جنت توني ماكلة فماكلت..بس كعدت وياهم..بين ما خلصو ..شلت المواعين وغسلتهن..هم طلعو بعد..

كمت رتبت الصالة والمطبخ وصعدت فوك..راجعت القريته.. نمت ع الكتاب ماكعدت للصبح..اجه ابوي يكعدني للدوام..كمت غسلت وبدلت ونزلت جوة..ابوي محضرلي لفة اكلتهه وعيوني بالكتاب اراجع..باسني وطبطب على چتفي..ابتسمتلة ورحت للمدرسة..هم نفس البارحة.. لكيت هدير تنتظرني كلتلي وين رحتي البارحه ضليت انتظر حسبالي نرجع سوه..انه تفاجئت كتلهه بس هالة كلتلي ابوج حيجي عليج..ضلينا ثنيناتنا صافنين اكو واحد ديلعب يعني هالة واصيل ماشفتهن.. بعد احسن خفة وراحة..

طبيت امتحنت من خلصت ضليت انتظر هدير..بعد ما اتقشمر طلعت ورجعنة مشي..انه فتت بفرع خالتي وهي راحت من الفرع الثاني.. عاينت لبيت رائد..شوكت تجي والله طك گلبي على شوفتك.. احسهه سنين مو جم يوم..رجعت للبيت نفس القوانة والصياح ماصار شي..تغديت وغسلت المواعين وصعدت نمت..كعدت قريت لحدما اجه ابوي..نزلت سلمت علي..جانت بيده علاليك انطاني ثنين والباقيات جان بيهن اكل وكعك وهاي المحليات.. فتحت العلاكة..جان بيهه فستان واللخ بيهه فستاني الاشترتليا خالة بخطوبة دنيا..فرحت بي وبسته..
محيي : باجر اخذج الظهر هناك..وانه اجي العصر..
حركت راسي بمعنى ماشي..
رزان : شنو واحنا مانجي؟..
شذى بصياح : وين عيني ويين..شعندج رايحة..نعرفهم يعرفونه معلينه منهم..هي بتهم تروح تشوفهم..

استغربت من حجيهه..شعجب ماذبت حجاية تغث..اخذتهن وصعدت فوك..الفستان اجة فت علي..خليته هو والكعب على صفحة..جان باقيلي شوي..قريتهن ونزلت ع العشة..تعشيت وبقيت كاعدة وياهم ع التلفزيون..البنات صعدو ينامون وابوي همات..شذى اصلا جانت نايمة..كمت طفيت التلفزيون وصعدت انام..الصبح رحت للامتحان..من طلعت البنات جانو ملتهين كلش..فرجعت للبيت بالعجل..شذى كلتلي تعاي سوي الغده ..عفتهه وطبيت سبحت كملت وطلعت للمطبخ سويت غده نواشف..معكرونة وشوربة وهج يعني..صبيته وكعدنه ناكل شوي واجة ابوي..كعد ع القنفة والسويچ بيده
محيي : يله يابة..حضري روحج انتظرج..
دنوة : اي هسة..

صعدت فوك لبست الفستان جوة الركبة ومن الجتوف بي فتحة ومشدود..فوكاه الصاية والشال..لبست الكعب ونزلت اخذني وطلعنه لبيت جدي..باسني وراح..طبيت سلمت عليهم بس تفاجئت من روان هنا..وبطنهه كبرانة..مبين عليهه الحمل هم سلمت عليهه مهتميت..اريدهه تحس عقيل مهامني ومن تزوجني مو عن حب مثل ما هي فكرت..كعدنا بالصالة..
سرور : حنروح للصالون..تعاي ويانا..
دنوة : هاا..منو حيبقى بالبيت؟
سرور : جدة وروان..
دنوة : اي ليش لا..اروح ميخالف..عرفت عقيل متعارك وي ابوه وجاي هنا..بس معرفت ليش..كالت بعدين احجيلج..وره نص ساعة اجه سالم اخذنا وذبنا عند الصالون وراح..كال من تخلصون خابروني..

سرور سوولهه شعرهه والمكياج وهسوالف نوارة سوت شعرهه ومكياج بسيط وانه هم ردت مثلهه..بس سويت حاجبي همات المهم المخطوبة بينت هيانهه..وره ساعات تعبنة من الكعده خلصنه كلشي..خالة ابتسام خابرت سالم واجة اخذنه..كال الزلم حتوصل بعد نص ساعة هم والشيخ يسوون عقد سيد..انه اول ما وصلت للبيت ذبيت الحذاء..رجلي خدرت كعدت ارتب وي خالة ابتسام وجهزنا كلشي..عمامي اجو هم ونسوانهم والبنات..كلش انخبصنه بين ما اجت الزلم..شوي واجت نور..
نور : خلو الشال ع راسكم..حيجون الزلم..
انه وكفت بالباب ولابسة الصاية فوك الفستان..طبو من الباب الثانية وياهم السيد..

الموقف المريت بي بيوم عقدي وي رائد صار جدامي.. ابتسمت على فرح سرور..لبسهه الذهب وباسهه من راسهه.. اجه الكل باركلهه وانه هم..شاورتهه كتلهه لتخافين بعدج ماتزوجتي.. جان تگرصني..ضحكت وخزرتهه شوي وكلهم طلعو برة.. بقينا بس احنه البنات..انتبهت ام رائد ماكو.. اي اكيد حازه بخاطرهه جي رجلهه مات..مشى الوكت ضحك وسوالف..
نوارة : دنو بالمطبخ خليت الحلويات..جيبيهن حبوبة..

دنوة : اي يله..كمت للمطبخ..هاي وين مخليتهن..ادور محد اكو اسألة..كلهه كاعده بالصالة الجبيره..ما احس الا شخص كمشني من خصري..شهكت ودرت وجهي..شجابك؟....

يتبـــــــــــع..................