أساور الفضة الفصل التاسع عشر 19 - بقلم نهى

مساء النور والسرور على احب الناس
الى قلبي مرحبا بكم متابعيني الواتباديين
اشكر تواصلكم معي ومتابعتكم لقصتي

♥️🍀🌹♥️🍀🌹🍀🍀🌹🍀♥️

#اساور_الفضة
#نهى_الحسون

هدى
شومة جانت تباوع علية وعيونها تلمع بالدموع
وضحى جهزتني
واخيراً شيماء قبلت احط كحلة وحمرة ضحى تسوي شعري واني
كوة لازمة كلبي لايطير من الفرحة

وسليمة كامت تحوم فوك راس شيماء كل شوية
تسأل عن اهل رائد
سليمة .. هذولي منين تعرفوهم
وشيماء كعدت تفهمها
.. زين همة وين شافوا ام حلك الاعوج

.. بيبي مو كلتلج بيت المختار جوارينا وبابا يعرفهم وشي اكيد يعرفون هدى وشايفينها

.. زين همة يدرون بأختج بكعة ؟
لو نمشيها على عماها
شيماء.. بيبي شنو هذا الحجي

.. اي غير تفهموني شنو راح تكولون للناس
حتى اعرف شلون احجي وياهم

.. طبعاً نكللهم عن وحمة هدى بس مو بهيج اسلوب
بيبي عفية خليني اني احجي وياهم بهذا الموضوع

جنت اباوع لروحي بالمراية واسمع حجي شيماء وسليمة
حجيت وية ضحى
.. اكلكم اني مو كلت هاي بييتكم
اذا اجوني الخطابة
تحطوها بكونية وتضموها فوك السطح

.. ههه والله عليج افكار هو احنة من غير كلشي ممفتكين من السانها ونوب نحطها فوك السطح
علمود يجي ابوج يطبق علينا بر الوالدين يم امه
وبراسنا
لحظات وسمعنا صوت الجرس وكلبي كمز من مكانه

شيماء راحت تفتح الباب وضحى راحت تجهز صينية التقديم وسليمة ااااخ ياسليمة اباوع عليها من الباب شلون تعدل بشيلتها
ههههه خرب لايكون عبالها الخطابة جايين عليها
انعل ابو شكلج

عدلت شعري وحطيته صفح وسمعت اصواتهم دخلوا
يمة .. يمة .. صارت صدك واجوي فديت كلبك
ياغائد طلع بكد كلمته
رحت يم ضحى بالمطبخ

ضحى .. هاج لزمي الصينية زين ورفعي ظهرج عدل وفردي اكتافج و ورفعي راسج وانتي تمشين
ورمشي بعيونج حتى يكولون عليج دمج حلو

.. هههههههه اكول ست ضحاوي شنو غاح اقدم عالتجنيد لو اقدم العصيغ (عصير) للخطابة
.. دمشي عوبة ما اوصيج عود هماتين روحي حششي يم اهل الولد حتى يطفرون

دخلت عليهم واني شايلة صينية العصير
ومسوية روحي خجلانة ومدنكة
والي يشوفني يكول شلون بنية حلوة خجولة كيوت

ورفعت راسي وشفت ام رائد وبنتها كاعدات
وحدة بصف الثانية لزك عبالك داخلين على حرب وحاسات بالخطر
قدمتلهم العصير ورحت اسلم عليهم
ام رائد ضلت كاعدة بمكانها مكامت وكالت عذريني
ما بية اكوم اسلم رجلية توجعني
جاوبتها

.. لا عادي خالة ظلي كاعدة بمكانج اني اسلم عليج ان شاء الله
سلمت علية من ورة خشمها وتنطيني بس خدها عبالك شامة ريحة مو طيبة

موقفها كلش زعجني
رحت على ليلى وابتسمتلها ما ابتسمت وظلت تباوع علية من فوك ليجوة بنظرات كلها تكبر وغرور
وكفت يمها وكامت من مكانها بتثاقل على كيف
وسلمت علية نفس طريقة سلام امها بكل برود

اشكد شايفة حقارة بس مثل حقارة هذولي الثنين مشفت يمتلكون كمية سموم كسروا على سم الحية
عرفت قبل لا يحجون ان الموضوع ما راح يعدي على خير
بعدها رحت كعدت يم شيماء
اباوع لنظراتهم شلون يباوعون عالمكان
بتقزز ونفور

سليمة.. يا هلا زارتنا البركة ونورتونا
اباوع لسليمة كعدت تزحف عليهم

خطية جنا كلمن همه شكل
واني اريد تعدي المواجهة على خير وسليمة تريد تزوجنا وترتاح من عدنا
وشيماء تريد تفرح بينا وتبلغ الامانة

ام رائد.. هلا بيج حجية
بالحقيقة اني اليوم اجيت مثلما تعرفون
حتى اتفق وياكم
علمود موعد خطوبة رائد المفروضة علينا
شيماء.. شنو!!!!

.. بالحقيقة رائد اجبرنا حتى نجي لهنا علمود نتفق وياكم على يوم للخطوبة
بس اني حبيت قبل لا افوت بسالفة الخطوبة
اوضحلكم موقفنا اني وابوه من سالفة الخطوبة
اني وابوه رافضين اختياره بس غصب عنا وافقنا
حتى لا نخسر ابنا
سمعت صوت شهكة سليمة

.. عزة العزاج ياسليمة يعني شنو جايين مجبورين

هي تحجي واني احس راح انفجر كوة لزمت روحي لا اهد بيهم

سحبت نفس عميق وصرت اصبر بروحي
هدى صلي عالنبي وكولي يالله ما عليج بيهن
مقهورات منج لان رائد اختارج الج
ولخاطر رائد راح اسكت واتحملهن

.. اي اجيت مجبورة لان ابني اتعارك ويانة اني وابوه وطلع من البيت زعلان لان رفضنة نخطبله هدى

سليمة.. ليش عيني وشبيها بتنا
حتى ترفضونها
شيماء .. بيبي لحظة

والتفتت على ام رائد .. ممكن توضحين كلامج اكثر
اشو رائد كلي اهلي جايين يتفقون وياكم على الخطوبة
وما ادري بينكم اكو اشكال او اكو اعتراض من جانبكم على اختي

.. خليني اكلج اياها من الاخير
ابني يحب اختج ومجنون بيها واليحب مثلما تعرفين اعمى ما يشوف عيوب الحبيب
حتى لو شافهم كدامه راح يجذب عيونه
واحنا هذا الزواج ميصرفلنا

لا انتوا من نفس مستوانا ولا اختج صالحة للزواج
حتى اخذها لابني
شيماء انخطف لونها.. شنوقصدج ؟؟
.. لتسوين روحج متعرفين شنو قصدي
شنو نسيتي وحمتها الي بجسمها لا عبالج ما عندي علم بيها

ترة اني جارتكم من جنتوا انتوا صغار وامكم جانت من تجي لبيتنا دائما تجيب هدى وياها
..وين الربط بالسالفة
.. ترة اني شايفة الوحمة الي بجسم هدى
فأني اتفقت وية رائد ان احجي وياج حتى تراويني
جسمج اشوفها
واتوقع ان هذا الحجي ما يزعل احد

شيماء.. العفو انتي شنو جاية تهينينا ببيتنا لو جاية
تخطبين
اشو من دخلتي لحد هسة محجيتي كلمة براسها خير تدل على الاصول
ترة انتوا الاجيتوا ودكيتوا بابنا احنة ما دازين عليكم
واختي بعدها صغيرة

ما مستعجلين على زواجها
اباوع لشيماء ما انطت مجال لام رائد تكمل كلامها ورفعت نقالها وداست على رقم رائد اتصال
اباوع على ايديها شلون ترجف من العصبية

اما اني من بعد الكلام السمعته حسيت بروحي هويت بوادي سحيق عميق اظلم
واحتاج انعزل بمكان لوحدي حتى اكعد العق جروحي لحالي

جانت معالم وجهي جامدة مثل الصخر ما تدل على اي شي
انتبهت من تفكيري على صوت شيماء
.. الو رائد
انتبهت لليلى شلون كمزت من سمعت بأسم رائد
وكعدت تحجي وية امها بصوت ناصي

شيماء.. اكول رائد ممكن اعرف شنو معناها
تجيب امك لبيتنا غصب عنها وتكعد تهينا
اذا انت تعرف بأهلك رافضين شكو جايبهم وجاي
لبتنا

سكتت شيماء تسمع كلام رائد بالطرف المقابل
جانت تستمع وتتنفس بغضب
واني الجمود كان عنواني بهاي اللحظة بس اباوع بعيوني واسمعهم
انتبهت لضحى تفرك بيدها وتهدي بسليمة الي
كل شوية تكوم تريد تهد عليهم

شيماء.. حتى لو كان هذا قرارك وحياتك وانت حر بيها كان المفروض تتأكد من اهلك ومن قناعتهم بالموضوع
وما تعرضنا لهيج موقف محرج

وعلى فكرة رائد اكو شغلة انت متعرفها بهدى
لازم اكلك عليها حتى ابطل الحجة وما تكول ما كلتوا
هدى عندها وحمة سودة بجسمها
.. ميخالف حتى لو تدري بيها وقابل ومقتنع
هذا الشي راجعلك اهم شي احنا بررنا موقفنا ووضحنالكم كلشي حتى لا تكولون خدعتونا

اتغير معالم وجه شيماء
.. تسلم رائد هاي من اخلاقك
هو اني ليش سكتت ومجاوبت الوالدة
لان ادري بيك انت شنو واعرف اخلاقك
ولخاطرك سكتت
سلمت عليه ونهت الاتصال وباوعت على ام رائد

ام رائد بعصبية مرتبكة.. ليش اتصلتي على رائد
جان حجيتي وياي اني مو امه على شنو رحتي ركضتي
عليه تشتكين

.. اني ما داشتكيله انتي اتجاوزتي علينا واني
اخلاقي متسمحلي اتجاوز واكعد اصيح
على مرية جبيرة بكد امي والاصول تكول
مادامكم ببتنا ضيوف فأحترامكم واحب

لذلك اتصلت على صاحب الشأن وحجيت وياه
حتى
لا تصير حجاية منج وحجاية مني وتكبر المشكلة
وبعدها يصير الحق علية وعلى اختي

.. اي بس انتي ما انطيتنا فرصة نكمل
ترة اني دا اكول احنا راح نخطب اختكم
وانتي قاطعتيني
.. بربج خالة صدك تحجين لو هسة غيرتي اقوالج
لان اتصلت على رائد وحجيت وياه

اباوع لوجه ام رائد شلون انبهت لونه
متوقعت شيماء فهمت قصدها وغايتها من الاستفزاز
شكلها جاية وناوية ان تحجي ويانا وتتفق
بدون ما يدري رائد بالكلام الدار بينا وبينها
هذولي شنو من ناس

وبهاي الاثناء دك نقال ام رائد
اباوع عليها شلون كعدت تبلعم
ردت عليه
وسكتت الظاهر رائد ديحجي بعصبية
لان اسمعها تكله

.. اوكف بس خلي افهمك
بس انطيني مجال
شكله ما انطاها مجال تحجي خطية ظلت اتمتمت
.. لاهمة فهموا السالفة غلط
اباوع عليها شلون شكهت وضربت وجها على كيفها

.. يالله .. يالله هياتنا طالعين بس لاتعصب

سدت النقال وحجت وية بنتها بعصبية تنتر

.. كومي امشي اخوج ينتظرنا بالباب
باوعت لشيماء
.. هسة ارتاحيتي من شعلتيها
حسبي الله عليج انتي واختج المشوهة
اجتي كلمتها مثل الساطور على راسي وقسمته نصين

حسيت الدم راح من وجهي وانخمش كلبي
من ذكرت سالفة الوحمة ابد والله ما اجتي على بالي
ولا بيوم فكرت بيها تكون حاجز بيني وبين رائد

عفت شيماء راحت وراهم حتى تسد الباب
وكمت من يم ضحى سليمة ومشيت
اسمع سليمة تحجي
.. ااااااخ وانا صارلي ساعة كوة لازمة الساني
لا يفلت واصيحها البكعة
تالي طلعت بت بليس تدري عنها

طلعت من يمهم ودخلت للغرفة وسديت الباب علية
جنت اتحرك مثل المخدرة
صرت انزع بملابسي بدون شعور
بعدما نزعتهم كلهم ظليت بطرك الملابس الداخلية رحت وكفت كدام المراية اباوع لجسمي

اني اعرف جسمي ومتعودة عالوحمة جزء من جسمي
بس اول مرة بحياتي اباوع للوحمة بنظرة. تقزز

اي فعلاً شكلها غلط منو راح يقبل يتزوج
وحدة جسمها هشكل
سليمة جانت دائما تعيرني بالبكعة بس مجنت اهتم
لكلامها بس اليوم عرفت شنو معنى كلامها

ظليت اباوع لجسمي واتمعن بالوحمة
لفترة وكأنما اتأمل تختفي من اطيل النظر بيها

غمضت عيوني وسحبت نفس عميق
انفتح الباب ودخلت شيماء
شافتني نازعة ملابسي باوعتلي بشك
عرفت معنى نظرتها
جاوبتها بدون متسألني

.. جنت اريد اغير ملابسي
رحت للكنتور وطلعتلي تراك
وصرت البس كدامها بس جنت مستحية
ما اعرف ليش
شيماء.. هدى رائد اتصل علية وحجة وياي قبل شوية
وكعد يعتذر من الي صار
وكال اوعدكم الصار ما يتكرر

واني كلته.. رائد اشوفها صعبة تتزوج بدون رضى اهلك ليش ما تتريث شوية منا لحد ما تبرد الكلوب
وتقنعهم

جاوبني .. شيماء هذولي اهلي وانا اعرفهم ما راح يتغير موقفهم الي براسهم يسونه وناسين انا كبرت
والي كلمتي وحر بأختياري
.. بس امك هم حقها هي تريدلك بنية كاملة
واختي تعتبر موكاملة حسب كلام الناس

.. شيماء انتي شكاعد تحجين
لج هاي هدى بنيتي ربيتها على ايدي
وجنت انتظرها تكبر كبال عيني جنت احميها حتى من
نفسي من تهواها
عن يا عيب تحجين انا ماحبيت هدى علمود جسمها
انا حبيتها لروحها

واذا جان عن اهلي فما عليكم بيهم
وانا كايللهم
هاي حياتي وانا حر بيها محد اله حق يتدخل بيها

بس كل الي اريده منكم تساعديني انتي وهدى
توكفون وياي ومالكم غرض بالباقي

شيماء.. والله يا رائد ما اعرف شنو اكلك انت ذهب
والمثلك صعب نخسره
بس يبقى الرأي الاول والاخير لصاحبة الشأن هدى
.. زين اكدر احجي وياها بس افهمها عالموضوع

.. بالحقيقة هدى بعدما سمعت كلام الوالدة
دخلت للغرفة وسدت الباب على روحها
واني كلت خليها لوحدها احسن
جانت شيماء تحجي واني
كلبي ينزف

شيماء .. هسة شنو رأيج
ترة هو منتظر مني اتصل عليه حتى يحجي وياج
بجيت حسيت اتحاصرت بزاوية
.. شيماء ما اكدغ احجي وياه
ما مستعدة اوجه اي واحد
بهاي اللحظة وخصوصاً غائد
استحي ماعندي وجه احجي وياه

واني اعغف (اعرف) عندي عيب يمكن يجاملني ويكولي اتزوجج
بس اخاف من يتزوجني ويشوفها وينصدم
وتالي يتندم
.. ما راح اخذ بهذا كلامج
ادري بيج دتحجين هذا الحجي لان سمعتي كلام ام رائد
وانتي هسة مقهورة
دك نقال شيماء شافت المتصل وباوعت علية

.. هسة افتهم من كلامج مراح تكدرين تحجين وية رائد
مو؟؟؟

هزيت راسي بمعنى لا مااكدر ودموعي نزلت
دارت وجها وطلعت من الغرفة وردت عالنقال
وجان رائد هو المتصل عليها

وبيومها دخل البيت بحالة هدوء وحتى سليمة
صارت هادئة من بعد الصار ولا نطقت بحرف بخصوص الموضوع

ورة المغرب اجة سيف خطيب ضحى وشهد واخذوا ضحى و شيماء وراحوا علمود يشترون غرفة على ذوق ضحى ومناك ياخذهم يعشيهم برة
ضحى كالت تعالي ويانة غيري جو بس اني رفضت
لان لا النفسية ولا الرفقة تساعد اطلع من البيت

لليل اوجة بابا وسويتله عشا وجهه ضعفان واسود
ما اعرف شبي وبس يفرك براسه

ما سألته رحت صبيت العشا اله ولسليمة
ورحت وديته الهم بالطارمة كاعدين
لكيته متمدد بحض سليمة وهي تقرة على راسه
شكد اتمنيت وجود امي بهاي اللحظة
يمكن لو امي عايشة ما راح تخليني اتعرض لهيج اهانة

حطيت الصينية يمهم وردت ادخل جوة للبيت
سليمة.. ما تتعشين ويانا ؟؟
.. اتعشوا انتوا اني ما اشتهي
.. مو من اخلاقج تزعلين على بطنج
دتعاي اكلي وخليج صلفة مثلما تسوين وياي
وكحة عين وما تنكسرين

اسمع كلامها ما اعرف هاي جاي تذمني لو تريد تقويني على الي صار

يالله اتعودت عليها على الاقل سليمة عذرها وياها من
اترزل بينا مرية جبيرة مخرفة

بابا سألها

.. ليش شبيها هدى على شنو زعلانة
وكعدت سليمة تحجي لأبوي عن بيت اهل رائد
وشنو سوت امهم
.. هو هذا الجنت خايف منة وشايل همة
عرفت بهدى من دون خواتها ما راح تتزوج
الا ينشل حالي وحال الخلفوني

درت وجهي ودخلت جوة للبيت ما اتحملت
اسمع اكثر
اذا جان ابوية هيج يحجي لعد معذورة ام رائد
وابوه من يرفضوني

لليل اجوي البنات جانوا محملين علاليك غراض
وضحى وجهها منور من الفرحة ياربي يدومها عليها

بس لفت انتباهي وجه شيماء الي كان اصفر
ومبين عليها كلش عصبية
سألت ضحى
.. اكول ضحى شبيها شومة صار شي وياكم
جاوبتني ضحى وهي تطلع بالغراض من العلاليك

.. والله ما اعرف شبيها جنا نفتر على حب الله
بمعارض الاثاث والتهينا من غرفة لغرفة
اشو هاي على غفلة اتبدل وجهها وكل شوية كالت يالله خلي نرجع
والله خطية حتى شهد وسيف استغربوا
موقفها

باوعت عليها طلعتلها ملابس وركعت الكنتور بعصبية وكعدت تنافخ
وراحت دخلت للحمام
ضحى اتمغطت بتعب .. اخ يمة ظهري ورجلية
يوجعوني من الفرة تعالي دلكيني

..شوف هاي العوبة مصدكة غوحها ادلكها بعد
فد مغة (مرة) متغدين(متردين) اسويلج مساج عالواهس بالطشت لان ماعدنا جاكوزي

دخلت شيماء للغرفة وحطت فراشها واتمددت وحطت المخدة على راسها وكالت
بنات عفية طفوا الضوة اريد انام باجر وراي دوام
ضحى.. اني عني جوعانة رايحة اكل لان استحيت اكل وية سيف
راحت طلعت برة

واني فرشت فراشي بصف شومة
وطفيت الضوة ونمت يمها
جانت تنافخ حجيت بصوت ناصي
.. شومة حبيبتي شبيج ليش ضايجة
.. هدى ما بية شي عوفيني اريد انام

.. اكووووووول شوووووومة حبيبتيييييي
.. اهووووووو اشتغلت هدى
شتردين

.. كليلي شبيج ضايجة شكلج ما عجبني من غجعتي
صايغ (صاير) شي
.. اوووف ياهدى خليني بضيمي شحجي وشكول
اليوم انصدمت صدمة عمري وانحطيت بموقف
كلش صعب

.. شنو
.. لج هذا الحقير النكس سيف خطيب ضحى
اليوم واحنا طالعين بالسيارة انتبهتله عدل المراية
وحطها علية
وصار يباوعلي من جوة لجوة وكلت هاي صدفة
والجائز اني متوهمة خاف ديباوع على ضحى اني عبالي علية
وبعدها نزلنا لمعارض الاثاث واباوع عليه
ميسأل ضحى عن الغرفة
كل شوية يجي يوكف يمي ويكلي

.. شنو رأيج بهاي الغرفة
واني كبل اصيح لضحى واكللها ها شنو رأيج
وهي باوعتلي وكالت.. انتي شنو تكولين
كلتلها معجبتني اكو بعد احلى وعملية اكثر

صاح لصحاب المعرض وكله
.. اريد غرفة فخمة مامعروضة واهم شي اريد
السرير قوي وياريت بي مرايات
جان يحجي ويباوع علية
هدى نرفزني بنظرات عيونه اكلتني اكل
هدى.. ادبسزز عمة بعيونه ان شاء الله

.. هدى مو هنا المصيبة
المصيبة هو هاي مو اول مرة. يسوي وياي هيج حركات
بس هاي المرة اتعدة حدوده وافتهم سكوتي علامة رضى

.. ليش شسوة هالمرة
جنا دنتمشى بين الغرف المعروضة بداخل المعرض
استغل انشغال ضحى وشهد
ولزمني من ايدي وسحبني عليه
لج وربي اجيت اموت من القهر والخوف
صرت اباوع على مكان وجودنا انتبهت

لكيت نفسي بين غرفتين صايرات بأخر صالة العرض
اتمنيت اصرخ واتفل بوجهه
النذل اتعمد يسحبنا لهنا ويصرف البنات
مجنت ماخذة بالي منه

كلت البسه بس الظاهر النكس جان تفكيره بغير وادي

.. عزة بعينه شسوالج
.. لج هدى حصرني ما انطاني مجال اتنفس
دفعني ولزك جسمه بية وحجة بصوت ناصي
كلي

.. لج راح تخبليني صارلج ساعة تبيعين ثكل براسي
بعد ما اتحمل شومة اريدج
شهكت وذبيت البطانية عني وكعدت على حيلي

.. يمة صخام الصخمنة يمة سودة علية خواتي
ما بيكم وحدة عندها حظ هاي انتي واكعة بورطة
وهاي ضحى مستمرة على عماها وية هذا الناقص سيف
وتالي شسويتي

.. مد ايده على جسمي واني عطت بصوت عالي بس هو حط ايده على حلكي
اجيت ازوع بلحظتها من الخوفة لج اتذكرت اسود لحظات بحياتي
لج هدى ظليت ارافس جوة ايده لحدما زكطته
برفسة على رجليه

وهو ظل يسب ويغلط ويلعن ودفعته ورحت امشي
واني كلني ارجف من ورة الخوف
لج هدى موقفه وياي فتح بوجهي كوابيس العالم
كلها واتذكرت بلحظتها اسوء كابوس بحياتي

.. سودة علية شومة بعد شنو مسوية بيج الدنيا واني ما اعرف بيه
ظلت تبجي بنهيار
حضنتها واني اطمن بيها
.. اشششش حبيبتي كافي لتبجين يروح فدوة لتراب رجليج هذا العار
جنا نحجي ودك نقال شيماء رقم غريب
باوعت وعقدت حواجبها

.. منو هذا ديتصل
.. خاف رائد
.. لا مو رائد عندي رقمه مسيفته بالنقال
.. لعد منو
.. اتوقع ام رائد

.. بالله ردي
داست رد
.. الو
عقدت حواجبها واني اشرت الهة بحركة. منو
هي اشرتلي بيدها اصبر شوية
لحظات واباوع الشيماء كامت من مكانها
وهي تصيح

لك انت صدك ما تستحي اسمعني زين
مو شفتني ساكتة عبالك اني قابلة على سوايتك
لا انت غلطان واليوم بهذا موقفك وياي عميت على روحك وباجر يجيك الرد وسدت النقال

.. شنو شبيج احجي منو هذا
.. هذا العار سيف يكلي اليوم عبرتها الج وكلت
حقها تضوج وتتعصب المكان مو مناسب واكيد مراح

تكدر تاخذ راحتها
فالباجر اجي عليج للمستشفى واخذج وياي لشقتي حتى ناخذ راحتنا اكثر
رحت فتحت الضوة
اباوع علها دمغت كصتها من القهر وتغلط وتسب

.. امداني وامدة حظي والله استاهل الصار بية

هو من اول معرف من ضحى
اني جنت مخطوبة وفسخت خطوبتي من ليث
وعرف بسالفة مطاردة ليث وصدي اله
وهو بوكتها بدة يلمحلي

ومرة ضحى حجت حجاية بس بوكتها مجانت تعرف
شنو يقصد بهذا حجيه
كالت سيف يكول ميصير تفسخ خطوبتها من ليث
هسة شي اكيد هذا مستفرد بأختج ولاعب وياها وشبعان بيها

وهي بوكتها الثولة مجاوبته
.. تكله شنو لاعب شنو شبعان شنو شبيك سيف
شتحس وين تريد توصل بهذا كلامك

متدري بهذا كلامه جاي يطعن بشرف اختها
رجعت دمغت كصتها بقهر
هدى.. هسة شراح تسوين وياه
شيماء.. هالمرة ما راح اسكتله
لان هذا ناقص وكلشي يطلع منه
باوعت لي

.. كومي روحي صيحيلي ضحى
.. د تتعشى يم سليمة وابوي

يتبع
احبكم هواي احبكم كومة
اختكم نهى 🌹♥️🌹♥️🌹♥️🌹