أساور الفضة الفصل العشرون 20 - بقلم نهى

الى قرائي الاعزاء
احبتي يشكو البعض منكم من قصر البارت
انتوا تردون بارت يومي والوقت صار شتا
والنهار قصير ويادوب الحك اخلص شغلي ومسؤلياتي واكعد اكتب البارت فلذلك اتمنى ان تقدرون وضعي والتزامي وياكم بتنزيل البارت
ولكم مني جزيل الشكر للمتابعة

.........

#اساور_الفضة
#نهى_الحسون

(الضربة الما تكسرك تقويك )
هذا حال شيماء

جنت اهدي بشومة لان صارت ترجف من القهر
.. تغيدين اغوح (تريدين اروح) اصيح لضحى؟
.. لا خليها تكمل عشاها وهي تجي
اخاف بيبي وبابا ينتبهون من تصيحيلها
ما اريدهم يعرفون بالصار
.. هسة انتي اهدئي.. هدي اعصابج بين ما تجي حتى تعغفين (تعرفين )شنو تحجين وياها

رحت اجيب ماي لشيماء من المطبخ وشفت ضحى بالطارمة دتحجي بنقال بابا

و سليمة وبابا على نفس وضعهم
رحت اخذت الماي وانطيته لشيماء اخذته مني
وشربته
شوية ودخلت ضحى وبعيونها نظرات
تجدح
شيماء شافتها

.. ضحى عندي موضوع كلش مهم
واريدج تكعدين وتسمعينه زين
حتى بعدها تقررين
ضحى.. حتى اني عندي موضوع وياج اريد احجيه بس بالاول انتي كولي شنو ردتي تحجين وبعدين اكلج اني شنو الموضوع

اباوع لشيماء محرجة متعرف شلون توصل لضحى موقف خطيبها بدون ما تجرحها
.. بالحقيقة الموضوع يخص سيف خطيبج
.. شبي سيف

.. ضحى اني حاولت بقدر الامكان اتغاضة عن تصرفات سيف وياي واصفي نيتي بتجاهه
واغالط روحي واكول اخاف استعجلت بالحكم عليه
لكن عالصار اليوم مستحيل اكدر اسكت له اكثر من هيج

.. ليش سيف شسوة
.. سيف كان دائما يسمعني كلام
ما يجوز يكوله لاخت مرته
المفروض اني مثل اخته واعتبر عرضه
بس مع الاسف سيف فاهم الموضوع غلط
وعباله اني فاسخة الخطوبة معناها متوفرة وبية مجال للتحرش

.. يعني انتي هسة جاية تكليلي ان سيف اتحرش
بيج وجان يسمعج كلام ويلمحلج طول هاي المدة وانتي ساكتة عليه

..جان لازم اسكت شفت بسوكتي
اصلاح ذات البين مردت اخرب بينكم
بس مع الاسف افتهم عدم كلامي بالموضوع غلط
واليوم اتمادة وياي وصلت بيه يتحرش بية
بكل وقاحة

فكل الي اريده منج ان متزعلين نفسج على هيج
انسان نكس اني متأكدة ان قرار الانفصال
راح يكون صعب عليج بس صدكي لمصلحتج
لان سيف قذر ما يستاهلج

فباجر راح ادز على عمو امجد ونكعد اني وياج نحجي وياه عن سيف يحطله حد ويكله كلشي انتهى وكلمن يرجع بمكانه مالك عندنا......
ضحى.. هوب هوب اوكفي لحظة
اكلتيني بالحجي

اشو انتي حجيتي وانتي قررتي وحكمتي من يمج
شنو هي منو بينا صاحبة الشأن والقرار
.. ميحتاجلها علم اكيد بعد الي سمعتيه تفسخين خطوبتج من سيف وربي يعوضج بالاحسن منه

.. شيماء تعرفين قبل شوية جنت احجي وية سيف
وحذرني منج
كلي ضحى
.. ديري بالج من شيماء
اختج بدت تتمادة بتصرفاتها وياي
بذيج الايام جانت كلما تشوفني
تلمحلي وتكول
هنيالها ضحى عليك شكد مدللها

ومرات تكلي
اتمنى كون اتزوج واحد مثلك يشبه مواصفاتك
بالحقيقة انا كلش اتنرفزت منها واكثر من مرة
صديتها تدرين بعد ما شفت تصرفتها المو راحة
راجعت حساباتي

وكلت اروح اسأل على سمعتها بالمستشفى
وفعلا رحت سألت و اكدولي صحة ضنوني بيها
لهذا السبب سيف اتصل علية حتى يستعجل بالزواج وكال هذا الخميس راح يكون زوجنا
لان سمعة اختج صارت على كل السان
وانا كلبي اتورط وحبج واخاف توصل سمعة اختج
لاهلي وساعته يخلوني افسخ خطوبتنا

ونبهني على شغلة جنت غافلة عنها وكال
.. وحتى اليوم من طلعنا انتبهتي على اختج من جنا نفتر عالغرف شلون على غفلة طنكرت

.. اي انتبهت
.. تدرين ليش طنكرت لان همين رجعت تحاول
وياي وحجت حجي ما ينلبس عليه هدوم بحيث وكف شعر راسي
والله لو ما عيب واحنا بمكان عام جان لزمتها وشكيت حلكها على حجايتها وياي

.. شنو حجت
.. عرضت نفسها علية وتكلي عوف ضحى متفيدك وانا بساعتها عصبت عليها وطيحت حظها
متشوفين شلون جانت ضايجة

لان طيحت حظها ورزلتها وعفتها ورحت وكلت لخاطر ضحى راح افوتلها الصار واسكت
بس نرفزني كلامها

من هددتني وكالت اذا ما اندمك الا اخرب علاقتك بضحى اخليها تفسخ خطوبتها منك ضحى تسمع كلامي

كلتلها ضحى تحبني ومستحيل تسمح بهيج شي
كلتلي تريد تتأكد بنفسك

وصاحتلج كدامي بالمحل حتى تأكد كلامها وسألتج على رأيج بالغرفة وانتي باوعتيلها
وكلتي انتي شنو رأيج
وهي كالت ما عجبتني محلوة خلي نشوف غيرها جانت تحجي وتباوعلي بتحدي

شيماء شهكت ولطمت على صدرها
.. ولج عزة العزاج يا ادبسز
شلون تحجين وياي هيج من طيح الله حظج وحظ خطيبج
ولج الله يصخم وجهج
اني اختج شيماء نسيتيني

ضحى..شيماء حطي روحج بمكاني
حتى اني انتبهت عليج اليوم بالطلعة وين ما سيف موجود الكاج واكفة يمه تحجين وياه كلشي يدينج
.. ليش متكولين هو الي جان يفتر وراي
ضحى.. وهسة بطلبج مني افسخ خطوبتي من سيف يأكد صحة وصدق كلامه
بس اني راح اكلج من هسة لتعبين نفسج بالحجي
لان مستحيل اخليج تخربين
خطوبتي فاهمة
انتي بموقفج هذا خذلتيني وطعنتيني

جانت ضحى تحجي شنو كللها سيف عن شيماء
اني من يمي لو ما حاضرة الموقف من اتصل على شيماء جان صدكته على هيج دهاء مقنع
شلون حاكها للسالفة ولفها على شيماء
هذا مو انسان هذا اكيد شيطان وراضع وية بليس

انتبهت على ضحى بعدها تحجي

ضحى .. وليش استغرب تصرفج اصلا
واني بعيني شاهدة
عليج شلون خبلتي ليث بتصرفاتج وخلتيه يركض وراج
وكتل روحه عليج وعاف اولاده ومرته وعادى اهله علمودج
فمو جديدة عليج تحاولين تفرين عقل سيف
علمود يت..............

ومحسينا الا وشيماء لطمت ضحى على حلكها بظهر كف ايدها
لطمة شكة شفتها وطلع منها دم
مفاجئة الضربة خلتني ما ارمش من صدمة الموقف

شيماء ترجف بعصبية .. اشششششش ولاكلمة
قسماً بذات الله اذا بعد فتحتي حلكج بحرف واحد صدكيني راح يكون اخر يوم
بحياتج تسمعين عندج اخت اسمها شيماء

ضحى باوعت لشيماء وبدون متحجي
طلعت من الغرفة تبجي

انتبهت لشيماء شلون جانت تباوع لكف ايدها وتبجي رفعت راسها وحجت بصوت تعبان
شيماء.. ربي امتحانك صعب
وهواي على صبري
شمعنا اني تمتحني وية اعز ناسي
خواتي
شمعنا اني ليش .. ليييييش

جانت تحجي وضربت كف ايدها بالميز
وانضربت بقوة
عبالك تريد تعاقب الايد الي انمدت على اختها

متحملت اسكت و حجيت
.. شيماء ليش مشوفتيها مكالمة سيف
من قبل شوية اتصل عليج خليها تتأكد وتشوف منو ديركض ورة منو
جاوبتني شيماء بكل قهر
.. لج هذا سيف غسل عقل اختج بكلامه ومراح ينفع وياها الحجي ولا راح تقتنع بهيج حجة واهنة
هسه يكوللها صحيح اني خابرت اتوسل بيها تتركنا لحبنا

ويطلع روميو واني واكفة بطريقهم اريد احرمه من جولييت
والمشكلة بأختج مقتنعة بكلامه
سكتي الله يخليج خليني بهمي

اباوع لشيماء طلعت من الغرفة وصعدت فوك للسطح

وضحى ما اعزف وين ولت
نمت بمكاني مصدومة من الي صار بين خواتي
(شلون وليش وشصار بينا )
هاي الكلمات صارت كل شوية تتكرر بأفكاري
غمضت عيوني ونمت بمكاني ما اعرف شلون

ومن بعد هذا الموقف
صار جو البيت متكهرب
يوم ثاني الصبح كعدتني شيماء قبل لا تروح للدوام وكالت

.. هدى الصار البارحة بيني وبين ضحى ما اريد اي واحد يسمع بيه اريدج تنسينه نهائياً

.. يعني شنو غاح نخلين سيف يتزوج ضحى هيج بكل سهولة ويفلت بغلطته بدون ما يتعاقب عالسواه وياج

.. الموضوع طلع من ايدينا واختج مقتنعة بسيف وقررت تكمل زواجها وهاي حياتها وهي حرة بيها

اني العلية سويته ونبهتها وحاولت وياها بس مع الاسف تالي اختي بنت امي وابويه تطعني بشرفي
هذا الجنيته من حاولت احذرها

صدك بلحظتها احترك كلبي من ضحى وعليها

راحت شيماء وصادف سليمة لبست عبايتها وطلعت كالعادة تسير من الصباحيات على الجوارين

جنت بالمطبخ وكعدت ضحى وشفايفهة مورمة
راحت عالطباخ وحطت القوري عالنار

ودارت وجههة علية وهي مفرفحة من البجي والعيون حمر
ضحى.. الله عليج قابلة عالسوته شيماء بية
شلون انطاها كلبها تسوي بأختها هيج

هدى.. لج ضحى الله ياخذج
لج اتوقعتج انت اذكي من ان تخلين واحد مثل سيف يضحك عليج
جنت اتأمل تكعدين الصبح وانتي مغاجعة (مراجعة) نفسج
تغاجعين (تراجعين) كلام الباغحة وتعغفين (الارحه وتعرفين)غلطج وية شيماء وتغوحين تعتذغين (تعذرين) منها
اشو كعدتي زايدة قاطات عالبارحة

.. هدى حقي احجي وانقهر لان هاي اختي الجبيرة
.. لج ضحى غاح تخبليني غحمة (رحمة)على والديج كافي
اشو كلما تفتحين حلكج بكلمة تزيدين الطين بلة
اسألج بالله شيماء شنو مصلحتها بفسخ خطوبتج

ضحى.. مبينة واضحة ميحتاجلها علم
سيف يملك كل المواصفات الي تتمناها اي بنية
شكل وجاه ومال وشخصية
وشيماء مو ملاك اكيد طمعت بيه لنفسها

شهكت ولطمت على صدري
.. ولج ضحى الله ياخذج على هاي الافكاغ (الافكار) السودة
لج هاي شيماء امنا الي غبتنا وخسغت (ربتنا وخسرت)سنين عمغها (عمرها)علمودنا وياما غفضت (رفضت) تتزوج علمودنا

شلون تتجغئين (تتجرئين)وتشكين بيها وتصدكين كلام
واحد مصاغلج كم يوم من عغفتيه

.. لا سيف يحبني من قبل وجان كل يوم يدز شهد
حتى تقنعني اوفق اتزوجه وصبر علية كل هاي المدة
منا لحد ما اقتنعت ووافقت
والا واحد مثل سيف الف وحدة تتمناه
بس اصراره وتمسكه بية
خلاني اعرف قيمتي عنده ومدى حبه الي

كلامها خلاني اضرب كف بكف
واكول
.. حسبي الله ونعم الوكيل

مرت الايام والتهت ضحى تطلع وية شهد يكملون حجز الصالون والبدلة وغيرها من التجهيزات

اباوع لشيماء صارت تتهرب من البيت
ورجعت تاخذ خفارات بالمستشفى بحجة يزيد راتبها

واني بقيت بالبيت اتعلمت الطبخ وهواي شغلات
بالاضافة للتنظيف سليمة متحجي علية هاي الايام شكلها
ماخذة اجازة من الغلط والرزايل
مبيها حيل

مرت اربعة ايام على موضوع رائد واهله
وبعد الصار مسمعت عنهم اي شي عن اخبارهم
جنت استحي اسأل شيماء عن رائد
لان البيها كافيها

ضحى رغم انشغالها بعرسها بس ظلت تحوم على راسي وتحجي يمي مقهورة من تجاهل شيماء الها
.. هدى عاجبج تصرف شيماء وياي
.. شكو ليش تحجين عليها اشو البنية حتى البيت عافته من وغاج. (وراج)

.. اي وكتها تتمزعل حضرتها متشوف مبقة شي على زواجي واني بحاجتها
المفروض اني ازعل عالصار مو هي

يعني عيالي يسألوني عنها واني احتاريت شنو اجاوبهم
هي ليش هشكل تسوي بية. هاي بدال ما تجي تصلح غلطها وياي تكوم تزيدها علية

والله قهرتني وكسرتني شالت ايدها مني واني بأمس الحاجة الها وتعرف بية ماعندي غيرها يساعدني بهيج فترة من حياتي لا عندي ام تعلمني ولا عندي احد يرشدني وربي هاي لو وحدة غيري بعد الصار والسمعته

جان متسكت عن السالفة وتحرك الدنيا على راسها
بس اني كلبي مو بيدي احبها غصب عني لان اختي

.. والله حيغتيني (حيرتيني) يا ضحى ما اعغف (مااعرف) شحجي وياج
.. ما حاجة تحجين اني حظي واعرفه
من يومي ماعندي حظ حتى اختي الجبيرة كلبت علية
واذتني من اريد افرح كلها صارت ضدي
طلعت من المطبخ تبجي

سمعت حركة يم باب المطبخ من برة واتفاجئت بوجود
شيماء واكفة يم الباب
بس مبين من شكلها سمعت كلشي

نزعت حذاءها يم باب المطبخ ودخلت للبيت بدون متحجي اي شي

للعصر اجتي رباب عليها وطلعت
حتى ما كالت وين طالعة
انتبهت لشيماء حتى وياي صارت تتعامل ببرود
زين اني شعلية شلي دخل بالموضوع

صار المغرب والبيت فارغ ومحد بيه
ظليت لوحدي احوم احس بروحي اختنكت
وخنكتني العبرة وظليت احجي وية الحيطان عساها تسمعني

اناشدها على خواتي الاربعة شلون فركهم الوكت
هم يرجع بينا الوكت ونكعد على فرد صينية ونجتمع
كلنا سوة لو بعد هاي هي وصلنا لأخر المشوار
وصفة هذا حالنا وية الزمن كلمن بوادي

اذن المغرب
ورحت اتوضيت وصليت وقريت شوية قران وهديته لأمي بعدما خلصت رحت للمطبخ اسويلي عشاء طلعت بتيتة اسلكها
سمعت صوت الباب يندك ورحت فتحته
ودخلت شيماء سلمت علية
وسلمت بهدوء
باوعتلي

ودخلت جوة جانت شايلة علاليك بيدها
كعدت عالكرويتة بالمطبخ وفتحت العلاليك وهي تسألني

.. شنو لوحدج بالبيت
.. اي كلهم طالعين محد موجود
.. تعالي شوفي شنو اشتريتلج
طلعت من العلاكة بدلة قصيرة لونها اسود مطعمة بأحمر
نسيت كل ضوجتي ورحت ركض يمها

.. هاي شنو الية البدلة
ابتسمت .. ليش هو اكو غيرج قزمة بالبيت
اخذتها وحطيتها على جسمي
واني استعرض كدام شيماء
.. يابعد عمري شومة الله يخليج الي
صدك ذوق وحلوة
جانت بدلة قصيرة وتوصل لنص الساق
ومخصرة عالجسم
.. بالعافية عليج تستاهلينها هاي هدية نجاحج
لان ما اشتريتلج اي شي ولا اخذتج مطعم التهيت عنج
رحت عليها وحضنتها وبستها من خدها
.. اموت عليج يا احلى اخت بالعالم اله ما يحغمني ( ما يحرمني) منج

ضحكت.. طلعت خبالات هدى
ولج راح تخنكيني

ابتعدت عنها واني اتلمس بالبدلة بين ايدية
انتبهت عليها سحبت علاكة ثانية وطلعت منها علبة ذهب صغيرة
فتحتها ومدتها كدامي تراويني اياها
.. شنو رأيج بهذا المحبس
اقتربت عليها ودنكت اباوع عالمحبس
جان صغير بس كلش نازك
.. كلش حلو وذوق هذا المن

.. هذا اشتريته لضحى اهدي الهة كدام عيالها بيوم زواجها
حتى لتكول خواتي ما ذكروني
قررت اكمل طريقي وياها للاخير
وادوس على نفسي
لان انتوا امانة امي والامانة لازم اصونها في غض النظر عن الصار بيني وبينها
ما اريد عيالها باجر عكبة يعيرونها بأهمالنا الها

اشوفها شلون تحجي
كعدت يمها وبست ايدها
.. منو مثلي الله يحبها وانطاها اخت مثلج حنينة
.. شنو راح تكعدين تشعرين براسي
بالله شو كومي سويلي عشا متت من الجوع
من الصبح باقية على لحم بطني
كمت من مكاني

.. يخسة الجوع هسة ثواني واصيغلج (اصيرلج)عشا
شتحبيني وحش الطاوة لو طماطه مكاية
شتغيديني اصير
_ ماغيدج تصيريلي شي
بعدين يصيغ عندي عسغ هظم
_ ها خيتي سالمين كمتي تغوغوين مثلي
_ ههه عبالج بس انت تتدلعين بالغوغوة اني هم
روحي سويلي عشا يله
_حاضغ سيدي

ومن عندها شيماء قررت
تركن المشاكل والزعل على صفحة وصارت تتعامل وية ضحى ببرود وعلى كد الاحتياجات
علمود تساعد ضحى تكمل بشغلات عرسها
حتى تعرس بدون مشاكل
وضحى رحبت بتقرب شيماء منها وكيفت بي
وهي هم خلت المشاكل وراها
اجتي ضحى بيومها تكول
.. شيماء اختي وما احب ازعلها
رغم الصار بينا ابقى احبها

حرامات ضحى تصير من نصيب سيف
لان ضحى الوحيدة بينا مشافت الدنيا ولا اختلطت بالناس ومتعرف معادنهم وبسرعة تنجرف بالكلام
واكثر وحدة بينا متحب الزعل بس مع الاسف تشوف الناس بعين طبعها
ووكعت بيد سيف اسأل الله يكون سيف عند حسن ضنها بي وما يخذلها

وقبل عرس ضحى بيومين
اجتي رباب اليوم حتى تنظف جسم ضحى بالشمع
قبل العرس وتسويلها كم شغلة خاصة مال عرايس
ما اعرف شنو هي بالضبط
لان كل شوية يطردوني من الغرفة يكولون شغلات كبار ميصير تسمعيها

هدى.. تغة (ترة) اني كبغت لشوكت تظلون
تعاملوني مثل الجهال
تغة( ترة) مو عبالكم ما افتهم شنو تكولون
تغة اني اعغف( اعرف) كلشي وكلاشي
رباب.. الله يلعن بليسج على هاللسان
لج شيماء سمعتي اختج الفصمة شنو تكول

حجت شيماء وهي تصفط بملابس ضحى وتحطهم بالجنط
.. لا يغرج السانها وداعتج هذا كلة بوخة
ما بيها خير بس السان
لميت شفايفي وبرطمت زعلانة
.. زين خلي غباب (رباب )تسويلي شيرة مثلكم لو حتى هاي حرام
.. ان شاء الله خلي تخلص ضحى والله كريم

.. يا ناس ياعالم نفسي تعاملوني مثل البنات الكباغ اغيد اكبغ (الكبار اريد اكبر) انتوا ليش مستهانين بية
ضحى جانت نازعة ملابسها وباقية بطرك الداخليات ورباب دتسويلها شيرة لايديها
ضحى عافسة وجها من الم الشيرة
.. لج عوبة على شنو كاتلة روحج تلحكين تكبرين وتنصلخين
عاطت
ااااخ .. ااااخ
رباب على كيفج من تشيلين وربي انوجعت
رباب.. لج ثولة احسن بسرعة اشلعها
حتى يخدر المكان ومتنوجعين
دارت وجههة علية
.. يالله جنية جهزي روحج مبقة شي واخلص ضحى
واجي اصلخ جلدج
طفرت من مكاني اركص ممصدكة

.. واخيغاً غاح اصيغ واخيرا راح اصير) مثلكم
شيماء تهز بيدها وتبوسها وتحطها على كصتها
.. احمدك واشكرك يا رب على نعمة العقل
هسة الي يسمعج يكول معشعشة من الشعر
وهنة يادوب كم شعرة وخابصة روحج بيهم
رباب.. ولج خطية خليها تريد تعيش الدور وتجرب شعور البنات الكبار ههههههه على كولتها
نزعت وبقيت بالاتك الداخلي استحيت انزع مثل ضحى
صرت انتبه على جسم ضحى جان صافي
ما شاء الله ونزلت عيوني على منطقة

الخصر والفخذ جانت صافية وما بيها اي عيب
ما شاء الله وبوكتها صرت اقارن جسمي بجسم ضحى
بلحظتها عرفت ان الوحمة مالتي كلش نشاز فوك ما اني متخيلة
وان الجسم البنية لازم يكون كامل مثل جسم ضحى

بس رغم هذا كله ظليت مصرة
اسوي شيرة واجرب
وجان تجيني رباب و الشيرة بين ايديها
وتجر بيها وترجع تجمعها وترجع تجرها سوتها مثل اللاستيك

كالت .. يالله ياحلوة يامكان انظف باوعت لجسمي جانت رجلية وايدية وزنودي ما بيهم شعر هاي احلى خصلة بية
بس عندي شعر جوة ابطي
رفعت ايدي فرحانة

.. نظفي ابطي
وسويت روحي عود اني صاحبة خبرة وبالك عني
اشو هي حطت الشيرة ومدتها على جلدي
واني عطت بكل قوتي البنات كمزوا
شيماء .. عزة بعينج فضحتينا عوبة
رباب.. ولج هاي بعدني كلشي مسويت بس مديتها
.. عاااااا .. لا .. لا .. لا

شيلها اتشاقة ويكم ما اغيد اكبغ (مااريد اكبر)
رباب.. ديالله اتمددي ولتشلعين كلبي خلي اشيلها
اتمددت جوة ايدها مثل الاثول
يمة وهي شاتلها خلتني ارافس جوة ايدها
.. يمة .. يمة.. يمة
رباب تضحك وحاصرتني جوة ايدها متخليني اكوم

.. ههههه لج شيماء لزميها الي عدل
متخليني انضفها عدل ظلت مكطمة
اباوع لشيماء خربانة ضحك
اجتي ولزمتني من ايدية اثنينهم وانتبهت لرباب غمزت لضحى اشو هاي العوبة الثانية
لزميني من رجلية حتى ما اتحرك
.. ولكم شغاح تسوون بية

خغب ولكم بس لاعبالكم انا خغوف (خروف)
جنكم تغيدون(تريدون) تذبحوني
ماحسيت الا ورباب رجعت مدت الشيرة على ابطي وعطت بصوت عالي

..عااااااا .. اخ.. اخ. لج غباب عليج بغوح بيبي سليمة كافي والنبي اتأذيت
صرت اصيح .. التوبة بعد ما اعيدها
وبألف ياعلي من خلصوني
كمت من جوة ايدهن شعري منفوش مكوش وهدومي مخربطة عبالك جنت اتعارك

.. ينعل ابلسكم شسويتوا بية
حشة عدكم عغكة مو شيغة (عركه مو شيرة)
رحت وكفت كدام المرايا ورفعت ايدي لكيت مكان الابط احمر وبي نقاط دم

.. عمة حتى عمة ولكم هي ولية مال غمان لو مال زينين
اباوع للبنات واكعات من الضحك علية
شيماء .. ههههه حتى ههه تبطلين هاي سوالفج
رباب.. هسة بعدج تردين تصيرين جبيرة لو غيرتي رأيج

.. اصلا هوالكبغ مو بالشيغة (الكبر مو بالشيرة)
ومديتلهم الساني اعيب عليهن وطلعت اغسل بالحمام

وبعدما خلصنا تجهيز جنط ضحى
كالت .. شيماء الله يخليج اريدج تجين وياي انتي وهدى
تعدولون وياي الملابس مالتي ببيت عيالي
استحي اروح لوحدي
اباوع لشيماء كلش اتضايقت ووجها صار الوان
صدك الموقف صعب صارت مثل بلاع الموس بالحالتين تتأذة

لا بيها ترفض هي اختها الجبيرة وما عندها غيرها
توكف وياها بهذا اليوم
ولا بيها تكول اي اخاف تتواجه وية النكس سيف
رباب حجت وكالت
اذا تردون اروح وياكم
شكلها تعرف بسالفة شيماء

اي شيماء متضم على رباب شي
سمعت رباب تكللها لتخافين اني وياج
خلي اشوف زلمة يتجرء يحجي ويقترب منج وانا موجودة

يوم ثاني كعدنا من الصبح شغل وتنظيف وضحى قبل لا تطلع كالت مو تنسون اليوم بالليل نروح لبيت عيالي
نسفط غراضي

وطلعت للصالون تسوي شعرها وتحف واخذت وياها شيماء واخذوا وياهم رباب خطية هم انعم الله عليها
من فرغت روحها النا
اما اني بقيت بالبيت مكابلة حبيبة كلبي سلومة
وشبيج يا سلومة
واليوم سليمة طابكة فيوزاتها

سليمة بيها طبع كلما تشوف عدنا مناسبة وتشوفنا ملتهيات
تعرس وية عرسنا وتطلعلها شغلات من جوة الكاع
تخلينا ندعم وحدة بالثانية
سليمة.. شنو سالفتكم ادري واحد معرس وعشرة مجانين عود ليش هيج البيت انخبص وصاير وصخ

غمضت عيني بصبر هسة اليسمعها يكول قصر الملك سليمان مو عبالك نص بيت
.. ليش شبي البيت نظفنا اول ما كعدنا من النوم
.. ولج الجنية الوصخة تعالي خلي اعلمج النظافة شلون تصير

يا يمة وجان سليمة تدخلني لعالم الكراب من اوسع ابوابه
اباوع عليها راحت للبوفية القديمة مثل المعرض الخشبي

بي جام ومعروض بيها مواعين وقواري قديمة وكلاصات من دور جدي وجدها
وانتيكات حتى سبحة جدي الله يرحمه بيها والنفاظات

المهم هذا الكم الهائل من الغراض والمواعين
طلعتهم وكالت كلهم تغسليهم وتنشفيهم وتسحبين المعرض تنضيفين الجواه وترجعي
لمكانه وتلمعي وتالي تردين تصفطين هذولي كلهم بداخل المعرض

.. بيبي شكلولج عني سبورمان وين اكدر اسحب هذا المعرض متشوفين شكبره
.. انا اصيحلج علاوي يساعدج
وجان تصيحلي علاوي ختيبي العنوني
ابوعضلات بس كلتله تعال ساعد هدى
اجة يركض الاجلح مشنف ارداناته

وكعد يساعدني وجاب كم واحد ويانة ينكلون
نحط الغراض بالطشت
واني كعدت اتغزل بختيبي
.. يمة من فدوة اغوح لسنونك
ههههه اني احجي وهو فرحان مصدك روحه وكشر سنونه يضحك

جنت اشتغل وادردم بكلبي على سليمة احس اليوم اندليت مكان كل فقرة بظهري من ورة الشغل
وللمغرب يالله خلصت وبقت بس ارجع الغراض بالمعرض وارتبهم
بس خليتهم ينشفون يالله ارجعهم

رجعو البنات من الصالون وما شاء الله ضحى طالعة تجنن جنها لعابة عين الباردة عليها
التهينة بين الشيل والحط وجمع الغراض
واجة الليل وحضرنا نفسنا
اتصل سيف على بابا وكال راح ادز اخوية يجي ياخذكم

من بعد الصار سيف ما اتصل بشيماء ولا عتب باب البيت شكله يريد يثبت لضحى صحة كلامه

لبست شالي وبنطرون جينز وعليه قميص مقفل ملابسي كلها كاجول وحذاء رياضي ابيض

وصل اخو سيف

ضحى.. يالله بنات سحبوا الجنط وخلوها بالباب
حتى يجي ياخذهم
وكملنا كلشي وبقينا بس احنا اجينا نطلع
اشو هاي سليمة كالت هدى تبقى ما تروح وياكم
خلي بس شيماء ورباب يروحون وية ضحى يساعدونها كافي عليها شنو رايحات كلجن قابل عدكم زفة

يمة هي تحجي واني ظليت اكمز من القهر
.. ما.. ما.. ما علية اريد اروح وياهم شنو ليش ما اروح
سليمة .. انتي انجبي كعدي وسكتي
وتعالي صفطي الغراض بالمعرض
خليتي شغلج عالنص مكطم مثل السانج
شيماء.. يالله لا تضوجين ابقي هنا هو احنا ما راح نتأخر

.. والله طكت روحي من البيت هم اريد اطلع هسة بيمن راح ااثر عليكم

بابا كال.. يالله كافي بلا حجي زايد ابقي يم بيبتج
واخذ البنات ووصلهم مشي لراس الفرع حتى يركبون بسيارة حمة ضحى المنتظرتهم

من حركة كلبي احس اذاناتي كامت تطلع دخان
يمكن لو بساعتها لازمة سليمة جان ثرمتها بسنوني
من القهر
دخلت للبيت وبدلت ملابسي واني بس ادردم

وهي تكلي ها شنو تكولين علي صوتج ما اسمعج زين

ياربي كون تصير طرشة وخرسة وعمية
اووف

لبست تراكي البرمودة ورحت اصفط الغراض بالمعرض وهي كاعدة يمي فوك راسي كل شوية لازمة
قطعة من المواعين
.. ايباااااه هذا الصيني الاصلي
الله على ايام الخير

غمضت عيوني كوة متحملتها
صفطتهم بالمعرض وخلصلت بعدما انشك حلكي
بيهم
فجاءة انطفت الكهرباء
واحنا اصلا ماعدنا سحب

عندنا لايت شحن شغلته
وكعدت انافخ هي منا ضوجة ونوب انطفت الكهرباء كملت السبحة صدك اختنكت وكعدت اتحسب على سليمة الله يحفظها
من تشوفني كاعدة يمها كون تصخرني كل شوية وتكومني على شغلة

راحت يم كنتورها وطلعت المفتاح من جيبها
و فتحته وكعدت بالكاع بسطت تطلع ملابسها
وطلعت بقجاتها مثل الصرة

واني سديت الجام مالت المعرض خلي اروح انام لاهم تكعد تصخرني كلتلها
.. بيبي خلصت انا راح انام لان كلش نعسانة

.. هو انا شفتهمت منج اشو مخلصتها علية خدة وخدر كل خير مابيج شو بالله كليلي شنو نفعج
شهكت بغيض.. والله حرام عليج هذا كله السويته
وتكولين ما بية خيغ (خير )

.. يالله دروحي لا تكعدين تنكين فوك راسي هم السان مكطم وهم ما كاعدة راحة
يالله خلي اللايت يمي ما اشوف ظلمة وطلعي

.. صاغ
اوووف منج ياسليمة شوكت افتك منج
جنها الغول الي يحبس الاميرات الحلوات المثلي

ضميت شفايفي بغيض ورصيت على سنوني
بدي افترسها سليمة راح تموتني ناقصة عمر
دخلت للغرفة وانا افور فرشت الفراش واتعثرت

بالمصلاية لان ظلمة كلشي ما اشوف عدلت المصلاية وجان الزم المحرم مالت الصلاة الابيض وطكيتها صفنة
وابتسمت بشيطنة واجتمعت افكار العالم السودة كلها اتربعت براسي
اجيت والله جابك

لبست المحرم بالمكلوبي خليت الوجه للخلف بحيث الي يشوفني راح يشوف بس قطعة بيضة
البس واني وانا اضحك على الي راح اسويه بيها
انتظرت دقايق والكهرباء بعدها مطفية

لحظات خطفت من يمها
انتظرت اسمع منها شي ماكو
رجعت خطفت من يمها هالمرة كعدت اسوي حركة الخفاش بالاحرام
عاد هنا سليمة فزعت

سليمة.. ياربي دخيلك شنو هاذ
كوة لازمة روحي رجعت اركض عالسريع وخطفت من يمها

عاطت مفزوعة.. يمااااااااي سلاماً قولا من رب رحيم
اباوع عليها شلون تجر بأذاناتها وتنشر على راسها
.. سور سور حولي وحوالية
وكعدت كل شوية اخطف من يمها وهي
كامت ترجف من الخوف وانا متونسة

.. يمة هذا جني قل اعوذ برب الفلق
ومن كد الخوف كعدت تقرة الايات وتنشر على روحها تريد تحصنها

كمت اركض بسرعة ادخل عليها للغرفة واطلع
ههههه عبالك جني اثول شارب نفط
صاحت.. يمااااااااااي دخليك يابو الحسنين
هذا الجني ناوي علي ولج هديوة
خايبة هديوة البكعة وينج

خرب بالحظ اجيت اجاوبها اكللها
ها بيبي الا اشوية
كوة لحكت على روحي زين ما فضحت روحي
وربي لوما اخاف جان فطست من الضحك عالكاعد

يصير بسليمة ومنظرها كارصة الزاوية وتخاف تطلع من الغرفة الجني لازملها الباب
عاضة على شايفي لا اضحك واشتهر
اسمعها تصيح

.. ولج البكعة ام السان المكطم وين وليتي
كون الله ياخذج
خرب يومها بعز الخوف وكارصة بروحة بالزوية
والسانها ما بطل متبري منها
انا الج بسيطة ياسليمة

دخلت عليها بالغرفة بكل صلافة جني مستهتر
بايع مخلص
هي شافتني ظليت احوم بالغرفة واركض بشكل دائري
واسوي حركة الطير
هي تصيح .. يبوووووووووي يبووووووووي
ياجني دخيلك

رحت يم المعرض العزيز مالتها
وصرت اطلع الكلاصات واذبهم بالكاع

يمة هي شافت غراض المعرض كامت تتكسر وهي اتخلبت
كامت سليمة تغرد بالانكليزي على اصوات هنود الحمر ما عرفت شنو تخبص
تالي انسحبت وطلعت من يمها واني اركض

مثل ركضة سعاد حسني بيوم تغني الدنيا ربيع والجو بديع افلي على كل المواضيع. افل افل
ومندمجة افتح بأيدية واسدهم
وربي احلى شعور عبالك ماي بارد على كلبي
لزمتها العافية لسليمة

دخلت للغرفة بسرعة ونزعت الاحرام ولفيته
وحطيت راسي ونمت على المخدة وانا خربانة ضحك
اتذكر شكلها وارجع اضحك

سمعت صوت ابوي رجع للبيت وشافها واسمعه
يكلها خير حجية اسم الله شبيج تتراجفين
ورة نص ساعة اجتي الكهرباء والبنات رجعوا
للبيت اسمع اصواتهم يم بيبي وبابا
واني بعدني جوة البطانية اتخيل شكل سليمة

اجة بابا .. هدى بالله شو كعدي شلون عايفة امي لوحدها مطفية الكهرباء ومفزوعة احنا المن عفناج يمهة
غير تديرين بالج عليها
فركت عيوني عالاساس ستوني كاعدة من النوم
.. ياخطية بيبي شبيها شكو شصاير

.. ما ادري شنو شافت بس تتراجف
طلع من الغرفة وطلعت وراه ورحت دخلت عليهم وانا اتثاوب واحك براسي
اشوفها كاعدة تسولف للبنات عالجني
شيماء.. بيبي كولي يالله خاف يتخيلج

سليمة.. دنجبي تعلميني بالجني
هزت راسها عالجانبين جنها هندي مستفلس
.. يمة .. يمة .. ما شفتوا الي انا شفته
ولكم جني يخوف وعيونه تجدح نار وكل ضرس هاطوله وحلكه يخوف واذاناته طوال وكله شعر
تقيس بكف ايدها

يمة كل شوية يطير لمكان وقزم طوله شبر
وكل شوية تسحب صدر ثوبها وتف تف بي من الخوف
هي توصف بالجني وانا خربانة ضحك
سليمة خرجنت عن النص بالوصف ابدعت
طلعتني اطير وعيوني حمر الله يلعن بيليسج
وبيومها

شيماء تباوع علية بشك وتشوفني شلون خربانة ضحك
عليها
خزرتني وكالت بسيطة انا الج

واليوم عرس ضحى
الكل انشغل بالعرس
عرسها راح يكون بقاعة الاعراس
شيماء حضرت لضحى جنظة ليلة العرس
وراحت وياهة للصالون

واني عدلت نفسي بالبيت وسويت شعري ولبست الفستان الي اشترته الي شيماء
اباوع لروحي كلش حلوة صرت
رحنا لبيت عمو امجد مناك ياخذون ضحى علمود السيارات تكدر تركن بالباب

للظهر اجتي ضحى من الصالون وجانت تجنن بالبدلة
البيضة كصينة صور بنقال مريم اختي
وجانت كلش حلوة طالعة بالرغم ان جنان متقبل
تكعد ويانة بس شيماء فرضت عليها وسحبتها يمنا وكعدنا نسولف وياها واخذتها لعند ضحى وباركتلها
وباست ضحى من خدها بتردد وخدودها صارو
حمر
للساعة ب٤ اجتي الزفة وانترس البيت بالمعازيم
التمت السيارات بباب البيت
دخل سيف جان لابس قاط اسود جان شكله كشخة
وحلو بس ثقيل على كلبي
يباوع لضحى وعيونه تلمع والحلك مشكوك بالضحكة
دقايق دخل رجال جبير لابس قاط رسمي لزم ايد سيف

وحطها بيد ضحى وكومهم
واطلعوا من البيت وسيف لف ضحى لف بالبرنص
خطية كامت تمشي وتتعثر متشوف دربها
من وراه

شيماء راحت تساعد ضحى ببدلتها جانت جبيرة وكوة تمشي بيها صعدتها بالسيارة وراحت ما اعرف ويامن صعدت

واني يا حظي اتوطت بسليمة لازمتها من ايدها واسحل بيها وتمشي على كيف والسيارات اتحركت وسليمة تمشي مثل دودة القز على كيف

امدا حظي شكلي ما راح افتك من سليمة وراي وراي
ما يطول غطاي اجانة الرجال الجبير الي دخل مساعة وكوم سيف وضحى
صاح علينا

.. تعالي حجية هاي سيارة فارغة محد بيها
اني جنت مدنكة ومرتبكة من الخبصة الموجودة بالشارع وكلها رياجيل
اشر على سيارة بيضة فارغة محد بيها حتى صاحب السيارة ماكو فتح الباب الامامي لبيبي

.. صعدي حجية صعدي
واني صعدت ورة
لحظات واجة الولد صاحب السيارة وصعد وسلم على بيبي والتفت يسلم علية
رفعت راسي مصدمة وباوعت عليه

يتبع

احبكم هواي احبكم كومة
اختكم نهى 🌹🌹🌹