أساور الفضة الفصل السابع والعشرون 27 - بقلم نهى

مساء الخير عليكم احبتي
مساءاً محملا بضياء اساور الفضة

#اساور_الفضة
#نهى_الحسون

هدى

حسيت على ايد تضرب على وجهي
فتحت عيوني على كيفي
لكيت روحي بحضن شيماء
احس كلبي يريد يطلع من صدري

ما اعرف شديصير بية اني بحلم لو بعلم
سمعت شيماء دتسألني عن حالي جاوبتها بسؤال

واني خايفة

.. اكلج شيماء اني ما اعغف (اعرف) شبية
جنت احلم بكابوس على الاساس اني متزوجة قاسم

سمعت هالة. كالت
.. امدا حظي دروحي رجعي نامي وكملي حلمج
وشوفيلنا وياج اولادكم بالمستقبل يشبهون منو منكم
انتي لو اخوية

انتبهت لأم قاسم ضربتها على راسها حتى تسكت

ام قاسم.. اسم عليج خالة مدري شجاج وانخبصتي
كعدي شربيلج شوية ماي
عدلت كعدتي ولزمت راسي دايخة وجان اسمع صوت سليمة
تحجي
سليمة.. شبيج ياحظي اغمى عليج جنج ممصدكة اتزوجتي

هي حجت هاي الكلمات واني كمزت من مكاني وباوعت لشيماء اسألها
وعيوني دايخة

.. شيماء واحد منكم يفهمني شنو شصايغ (شصاير)

ام قاسم اقتربت مني .. تعالي كعدي يمي خليني افهمج
الصار
رحت كعدت يمها واني كلي ارجف واتعشم
عسى ولعل يكذبون الخبر ويطلع ماكو هيج حجي

ام قاسم.. خالة هدوشة انتي بنية حبابة وحلوة
الف من يتمناج تصيرين ام بيته
وواحد من الالف امه داعيتله وصرتي من نصيبه
وهذا الواحد قاسم ابني

مكدرت اكتم صوتي الخايف كمت من يمها ووكفت بنص الهول احوم مثل البزونة المحروك ذيلها
.. يبووووووووووي .. يبووووووي عليج ياهدى
وين جانتلي هاي المصيبة

انتبهت لأم قاسم تفتر وراي تريد تهديني
.. لحظة خالة على كيفج لا تنخبصين
كعدي خلي نفهمج

واني ابجي ودموعي تكت
على خدودي وهالة وشيماء يباوعون علية
لا تعليق على الموقف

يعني اغرب موقف امر بي بحياتي ان
مصدر خوفك وارهابك يكون نهايتك
والاضرب من هذا كله
ام قاسم المغوار هي الي دتواسيني
زين اروح منك وين
وين انطي وجهي
اشو منين ما التفت الكة روحي كبالك
شنو صاير مثل هذاك الي يركض ورة وحده
يكوللها وين تروحين اطلعلج حتى بالمركه

اريد اصرخ اريد ابجي اريد اعترض على الي اني بي
هذا مو حلمي ولا طموحي
ولا فكرتي عن الزواج والبيت والعائلة

قاسم ما بي اي شي ينطبق عليه كلمة. فارس احلامي
هذا ساحل احلامي او دامغ احلامي

هسة ما اريد فارس احلام عمي بطلنا اريد
رجال طبيعي اعيش وياه بأمان
زين وين راح الكة الامان اذا جان قاسم بكبره
مصدر كل مخاوفي

بجيت ما اتحملت التفتت لأم قاسم حجيت وياها بتوسل

.. عفية خالة داخلة على الله وعليج
اغيدج ( اريدج) تخلصيني من هذا الزواج
اصلا اني ما ادغي (ادري) شوكت اتزوجت
حتى محد اخذ غأيي (رأيي)

عفية خالة الله يخليلج ابنج
ما اريد اتزوج بعدني صغيرة عالزواج

سليمة حجت .. ما عليج منها ام قاسم خلي تولي تتعاير
التفتت علية وكملت كلامها

.. انجبي وسدي حلكج لا تتدلعين
شنو بعدج صغيرة عالزاوج
ولج البعمرج متزوجة ومخلفة جهال

عفت سليمة تحجي لوحدها ورجعت لام قاسم اتوسل بيها
.. خالة نخيتج لا تعوفيني ما اغيد (ماريد) اتزوج قاسم

ام قاسم .. كولي يالله خالة حبيبتي
ما تكليلي شلزكتي متريدين قاسم شبي قابل يكرص
وهيجي متخبلة منه

ترة انتي جبيرة موصغيرة
وخلي ببالج ابوج هو الزوجج لقاسم
شرط الا عقد سيد وما اكتفى هشكل طلب عليه مقدم ومؤخر يكسر الظهر
يعني حتى لو انتي تردين تتطلكين

قاسم ما راح يوافق يطلكج
الا بحالة وحدة ابوج يتنازل عن المؤخر

اباوع عليها تحجيها من ورة خشمها
ونوب حظي الاغبر
مبين على خالة ام قاسم مقتنعة وبكل
عقلها جاية وتريدني اتعامل وية الموضوع وكأنه

زواج طبيعي زين وين الزواج الطبيعي بالموضوع

التفتت لهالة وفجاءة اتذكرت وحجيت وية ام قاسم
.. زين خالة قاسم ابنج مو على الاساس يحب بنت عمه غهف
وحاجزها يغيد (يريد) يتزوجها شلون يتزوجني

انتبهت عليها شهكت وباوعت لهالة وخزرتها
وكأن هالة جاسوس وشت بالحكومة
شلون تطلع اسرار الدولة
شيماء.. هدى ترة بابا هو الي فرض الزواج على قاسم

.. يعني شنو قصدج فوك هذا كله طلع قاسم
متزوجني غصب عنه يبووووووو علية يبوووووي
شلون قسمة هاي ياغبي (يا ربي)
التفتت لأم قاسم
.. عفية خالة انتي شلون تغضيها (ترضيها)
تشوفين ابنج يحب بنت عمه وتسكتين
المفروض هسة انتي وياي مو علية
وتحاولين وياية نبطل هذا الزواج

ام قاسم.. خالة كلشي قسمة ونصيب
والبي الخير الله يقدمه

وانا ام قاسم واعرف بمصلحة ابني اكثر منه
واشوف ان انتي اكثر وحدة تناسبين قاسم

كعدت بالكاع وصرت الطم وابجي بقلة حيلة
الظاهر استعانيت بالشخص الغلط حتى يخلصني

ام قاسم ما راح تخدم اهدافي
اصلا مبين عليها راح تبذل اقصى ما بوسعها حتى
تمم هذا الزواج الله ليكولها

اباوع لهالة تريد تحجي وية امها وترجع تسكت
مبين عليها هي الثانية متكدر تناقش امها كدامنا

جريت حسرة واني اتحسب على ابوي
وين وصلني ليش يكسرني هيج كسرة

بعدها قررت امسح دموعي
وعزلت نفسي عنهم كلهم وما حجيت وية اي واحد بيهم حتى
شيماء اختي من تسألني او تريد تحجي وياي
ما اجاوبها

ورة فترة راحت ام قاسم وهالة
واسمعها تكول لشيماء هديها وفهميها خلي تكبر عقلها وتنسى سالفة الطلاق

دخلت للغرفة واني حيل مخنوكة ماجاي اتخيل روحي
اصير زوجة لهذا الشخص
يعني لو بعد ميت سنة ما راح تدبر ولا راح ترهم الشغلة
يعني شجاب هتلر على حظي الاغبر

اسمع سليمة تحجي وية شيماء
.. كلي لأختج خلي تحمد الله وتشكره
بيوم لكت رجل واتزوجت
لايكون الست نست نفسها
ذكريها بالبكعة وببيت اهل رائد
الي اجوي عليها وتالي انهزمو من عرفوا
بسالفة الوحمة

حجيت بصوت عالي حتى تسمعني جنت كلش مقهورة

.. والله لو مو الوحمة عسى ما مشوهة من فوك ليجوة
ما اتزوج قاسم لو جان اخر غجال بالعالم
دكولي رجال مثل الناس ياام نص لسان
بعدين تبطري عليه

بعدها اجتي شيماء وكعدت يمي وسولفتلي
كل الي سواه بابا بسالفة الدعمة
وكف شعر راسي شلون يسوي بية هيج
شلون هنت عليه ليش اني مو بنته
ليش ما اكتفى ياخذ مبلغ مالي من الولد كتعويض ويسكت
لو الا يطين عيشتي

شيماء.. لو تحجين منا لسنة ابوج ما راح يغير رأيه
هو ما سوة هذا كله علمود انتي تجين وتخربين كلشي برفضج

كلام شيماء سد كل الابواب بوجهي
بس رغم هذا كله بقيت مصرة واتمسكت بالرفض
انتظرت ابوية يجي حتى احجي وياه

لليل يالله اجة للبيت
واول ما دخل رحت عليه
.. بابا انا مستحيل اقبل اتزوج قاسم لو على كص غكبتي (ركبتي)

عقد حواجبه وباوع لشيماء
جوابته
شيماء.. بابا اليوم اجتي ام قاسم وكلتلها بالموضوع
رجع باوع علية
..انا ما منتظر منج توافقين او ترفضين قاسم
هو اصلا صار زوجج
يعني رفضتي او رضيتي هو رجلج
فأرضي بقسمتج وسكتي بلا حجي زايد ولا تدوخين راسي

.. بابا شلون تغيد (تريد) مني اغضى (ارضى) واوافق اتزوج
من واحد انغصب بالزواج مني

.. شوفي وسمعيني زين انا هذا الحجي ما يعبر علية
فلا تكعدين تلفين وتدورين بالحجي ترة ما راح يفيدج
ولا راح تكدرين تغيرين شي من الصار فاهمة

دار وجهه على شيماء
.. لزمي اختج وفهميها لا تظل تلوص بالحجي
هسة هي كالبة الدنيا على شنو مو زين مني ولكيتلها
رجال يقبل بيها لا ومو اي رجال قاسم بكبره هاي جزاتي

شيماء .. بابا انت غصبت اثنين على هذا الزواج
وتريدهم يوافقون بكل سهولة ترة واكفة. ميصير
زين ما فكرت بهدى شلون راح يعاملها
قاسم من بعد ما غصبته يتزوجها

غمضت عيني بصبر
وهذا السبب المليون الي ينضاف على قائمة اعتراضي
عالزواج من هذا الشخص بالذات
ياربي صعبة منين ما اكلبها اشوفها صعبة

.. محد كله يتصرف بروعونية
بنات العالم مو لعبة
يدعمها ويكسرها ويدور وجهه ويروح

حجيت بصوت عالي

.. بابا خلينا لا نضحك على بعضنا
الموضوع واضح انت زوجتني لقاسم مو علمود
سواد عيوني انت زوجتني علمود مصلحتك
همك من هذا كله شلون تحصل الفلوس

بس احب اكلك وهاي كدام الكل
اغوح (اروح)واشتكي واطعن بعقد الزواج واكللهم الزواج باطل
لان اني ما ادغي (ماادري)وما عندي علم بي
اصلا بوقتها اني جنت نايمه مستشفى مااكدغ (مااكدر) اتحغك (اتحرك)
يعني المتشفى بكبرها شاهد

بعدني ممكملة كلامي ما حسيت الا على بابا
هد علية واستلمني راشديات
شهكت بخوف واصطكت سنوني من الخوف
خفت من بابا لا يأذيني واني يالله يادوب كمت على حيلي من الدعمة
كعدت بالكاع وكرفصت على نفسي وحميت وجهي بين ايدية اخاف يأذيني

اسمع شيماء ظلت تعيط بهستريا
لدرجة صارت تتدافع هي وبابا

شيماء.. لا ..لا..لا
لتمد ايدك عليهااااااا
ودفعته من صدره
احس بشيماء انكلبت لبوة تدافع عن جهالها بغضب

.. كاااافي .. كافي لخاطر الله كاااافي دمرتها للبنية ونعلت ابو حظها
عوفها خليها تحجي لوحدها انت الردته سويته
حتى لو غصب عنا المهم الي براسك سويته
بعد ما عليك بيها

سليمة .. شوف العار شلون ترادد ابوها
_رجاءا بيبي لتتدخلين .. شكلتله وراددته
يعني هو غلطان فوكاها ميصير تحجي شي
لازم تسكت وتكول امين وهاي هية

وبابا صار نار من الغضب
كام يسب ويغلط على شيماء
حتى على امي الله يرحمها
وهد على شيماء راد يضربها

باوعتله شيماء ورفعت حاجبها
_ها تريد تضربني لان راح الي جان موكفك

وهو هم لم ايده بقبضة ورجع يسب ويلعن
.. الله يلعنكم شنو من بنات من يوم الي شفتكم وانا
ما شفت الراحة

كومتني شيماء
من الكاع واخذتني ودخلتني للغرفة

وهي ترجف من العصبية
ادري بيها ما بيدها شي تسويه حتى تغير ميصيري

مرت الايام والحال على ما هو عليه
بين فترة وفترة ام قاسم تتصل تتطمن علية

وهالة تتصل بس اجاوبها بتحفظ
وحتى شيماء صرت اعاملها بتحفظ

اما فاطمة فكانت الشخص الوحيد الي
احجيله كل معاناتي ومخاوفي

خلصت العطلة وبدة الدوام
وبلشت اداوم بالكلية وهاي النعمة الوحيدة
الي خلتني التهي عن الموضوع

وخلال هاي المدة الشي الوحيد الجديد الي طراء على حياتنا

عمو امجد احس بي اتغير بمعاملته ويانة وصاير حنين علينا اني وشيماء

ذاك اليوم اجانة للبيت مشتريلنا ملابس جديدة
الي اني وشيماء وبيبي سليمة

فرحنا بوكتها وسليمة صارت تدعيله بالحقيقة حتى اني كمت بكل صلاة ادعيله
ويزيد من رزقه
وكام كل فترة يتسوك للبيت ما لذ وطاب من مخضر على لحوم على فواكه
احس الله دزه النة رحمة

لان بهاي الفترة بالذات
خطية شيماء صار عليها حمل زيادة بالمصرف خصوصاً
من بعد دعمتي صارت تركض عالعيشة وما تلحك
تصرف عالبيت واضافة الى مصرفي
صحيح بيت قاسم همة انطوا لبابا تكاليف علاجي

بس مع الاسف بابا جان يصرف فقط على الاشياء المهمة الي تخص العلاج
اما عن البقية كحليب ولحوم او فواكه وغيرها
من الاشياء المهمة الي تفيدني فهاي كلها على شيماء

والحمدلله رب العالمين ما يترك عبده بحيرة
حنن كلب عمو امجد علينا
سليمة.. يايمة كون دوم هيجي تحن علينا
امجد.. اندعيلي يمة كون الله يرزقني وان شاء الله ما اقصر وياكم

افتح بالعلاليك حتى ملابس داخلية جايبلنا
حتى احذية حلوة مشتريلنة وجنط
شيماء اتشكرت منه
وهو كللها
.. عمو شومة امانة اذا تحتاجون شي انتي لو اختج
كولي لا يردج لسانج

شيماء.. عمو تسلم ربي يرزقك ويفرح بأولادك

صرت اباوع عالملابس
الحمدلله يعني ميحتاج اشتري شي للكلية لان جان جايب قميصين بيض وتنورتين رصاصي

بالكلية
جنت امشي رايحة للمحاضرة الثانية
وجان اسمع واحد يصيح بأسمي
جمدت واكفة بمكاني مصدومة من عرفت صاحب هذا الصوت

التفتت اشوفه وين
وجان تجي عيني بعينه
.. غائد !!!!!
اجة اقترب مني وعيونه نار جان يباوع علية
كال بصوت غاضب بدون لا سلام ولا كلام
.. هدى صدك هذا الخبر الي سمعته ؟؟
رفعت حاجبي.. شنو السمعته ؟؟

.. سمعت بقاسم خاطبج وعاقد عليج ؟؟
جان يحجي وعروكه مبينة من كد الغضب
تريد تطلع من عيونه

.. منو كلك هذا الحجي؟؟
.. ام قاسم البارحة اجتي لبيتنا وجانت تحجي وية امي وتكللها باركيلي خطبت لقاسم
واجيت اتخبل من سمعت بأسمج انتي الي خطبها قاسم

جنت حابسة الانفاس
خايفة لا يعرف السبب الي خلف هذا الزواج

بس الحمدلله ام قاسم علنت عن الخبر بين الجوارين
هيج خطوبة طبيعية بدون ما تذكر الاسباب

للحظة حسيت بالامتنان لأم قاسم لان حفظت ماي وجهي
سحبت نفس عميق ورفعت راسي وباوعت عليه بكل كبرياء

.. يعني هسة انت جاي علية. لهنا بالكلية
حتى تستفسر مني عن موضوع ما يخصك

.. شلون ما يخصني شنو هدى نسيتي
قاسم يصير صاحبي

.. اي ووين المشكلة واذا صاحبك شنو تريده يستأذن من حضرتك قبل لا يتزوجني

.. لا هدى مو هيج الموضوع لا تغشمين نفسج
وتسوين روحج متعرفين انا عليمن محترك
لو ترديني اذكرج شنو جنا اني وياج بالنسبة لبعضنا
جنا شبه مخطوبين وجان بين حب سنين

جان يحجي بقهر عبالك يريد يخنكني
.. مثلما اتفضلت حضرتك وكلت (كنا وكان )
يعني حبنا جان ماضي قديم وانتهى واكل وشرب عليه الدهر لمن مل

مثلما انت شفت حياتك اني هم الي الحق اشوف حياتي واتزوج واحب من جديد

مالك حق تجي تحاسبني على شي
كنت انت الاسبق بتنفيذه

انتبهت عليه لم قبضة ايده وكورها
وكال .. هدى رحمة على والديج لا تخبليني

جاي اكلج قاسم صاحبي تعرفين شنو معنى كلمة صاحبي يعني مثل اخوية
صعبة اخليه يتزوجج مثل الاعمى وهو ما يدري
بحبنا سوية احس هاي خيانة لصاحبي

.. يعني انت هذا الهامك ان قاسم راح يتزوج الي
جان كلبك يتمناها وتشوفها صعبة بحقه

لو عقلك مدا يكدر يتخيل
ان صاحبك ياخذ شي انت في يوم من الايام
جنت تتمنى تطوله وما حصلته

صاح بصوت عالي غاضب
اربكني صرت اتلفت لا احد ينتبه علينا
.. الله يلعنج يا هدى انتي شيطان مو مرة
اي انا ما اكدر اتخيلج تصيرين ملك صاحبي
ما اكدر اتخيل راح يجمعكم بيت واحد وغرفة وحدة

اتخبل تعرفين شنو اتخبل
من اتخيله يلاعب شعرج الي عشت طول عمري اداري بي واحلم باليوم الي اتوسد عليه
ما اكدر اتخيل تنامين بحضن صاحبي
ويداعب الشفايف الي جنت احلم بيهم ليل نهار

احس صرت بنص هدومي من ورة كلامه وبنفس الوقت قهرني
.. انت هواي مصختها واتعديت الحدود
شنو عبالك اني اموت من بعدك واكعد
اندب حالي لا غائد اصحى
الحياة تستمغ (تستمر) وما تتوقف عليك

ومثلما انت اتزوجت وشفت حياتك اني هم الي الحق اختاغ شغيك (اختار شريك)
حياتي واتزوج
لا عبالك انت عفتني اني انكسغ (انكسر) من بعدك
متوهم اني الف من يتمناني

غمض عيونه وسحب نفس عميق وزفر
وكال .. هدى انا مالي حق اعترض على زواجج
هاي حياتج وانتي حرة بيها
بس كل الي اترجاه منج اختاري من الالف اي واحد
الا قاسم صاحبي لا تكسريني بي

الله يا دنيا رب ضارة نافعة
شكد جنت اصيح واستريح واكول قاسم ما اريده ومستحيل اتزوجه
بس اليوم من شفت نظرات رائد المكسورة
حسيت بماي بارد نزل على كلبي

.. اسفة غائد انت جاي كلش متأخغ (متأخر)
لان قاسم اصلا زوجي يعني الموضوع طلع من ايدي
ما غاح تكدغ (ماراح تكدر) تسوي شي

الا اللهم تكون ما عندك ذغة غجولة (ذرة رجولة) وقليل اصل
تغوح تكسغ (تروح تكسر) ببختي وتطعن سمعتي يم قاسم
وانت تعغف (تعرف) اني بغيئة (بريئة)

حسيت برائد يريد يطك من الغضب
وحاصرته بالكلام ما كدر يحجي اي شي
.. الله يلعنج ياهدى بيمن ادعي عليج
ما لكيتي الا قاسم تأذيني بي
لج مو كافي عليج انا لعبتي بحالي وهدمتي احلامي

.. صوجك انت الي اتخليت عني بأول هبت غيح (ريح)
مو ذنبي انت ما كدغت (كدرت) تحافظ على حبنا

الظاهر مجان قوي لدرجة تحارب علموده

باوعت لساعتي ونهيت الكلام
.. اني تسمحلي صاغ لازم ااغوح (اروح) وكفتي وياك هنا
مو لائقة

لان انت شخص لا اعغفك ولا تعغفني غغيب (لااعرفك ولاتعرفني غريب )
واني بنية عاقده علية شاب اخو خيته

تركته ومشيت واني احس بالنصر
اي لاول مرة بحياتي احس بالعدل وان الدنيا دوراة

🌹🍀🌹🍀🌹🍀🌹🍀🌹🍀🌹🍀
@houda_s

((جنت افز فزة طفل مفطوم من كوابيس حلمي بفركاك
وجنت اصبر الروح ياروحي بامل رجعتك لية وملكاك
جنت احلم اشوفك وبقوس وقزح الون اجمل حلم وياك
تجيني وبعيونك نظرة مسامح وي باقة ورد احمر بيمناك
اركض اذبن روحي على صدرك وانت التلمني بيسراك
وسفة بعتني وبعت كلبي الوفي هذا الذي من الصغر حباك
اسبوع واحد ماطولت وازوجت عساك بهاي البلوة عساك
خليتني بحلك شماتي تلوج بية وتذم عساك تلوج بيك عداك
هذا جزة الحب الي حبه كلبي الك وعلى اغلى الغلة اغلاك
واليوم جايني تعاتب شنو هالصلافة البيك متكولي شقساك
ماهمتك خطبتي لغيرك همك الخاطب لانو صاحبك ذاك
الف وسفه على سنين عمري كضت احبك وافرح بطرواك
جنت تمشي وتلعب وانا الطفلة المعلكة بذيالك تمشي وراك
صح اخطيت ماانكرت يوم عاقبني حتى سنة وسنتين بفركاك
مو تكطعها حد السيف وتمحي حب سنين صباية وصباك))

بقلم هدى
........................................‏#Hoda...............................

امشي وكلبي ينزف دم مسحت دمعة خاينة
شردت من عيوني تطلب الحرية
تريد تخذلني بس هيهات انذل
رفعت راسي وكملت طريقي

وسالفة زواجي من قاسم
الي جنت اخاف منها
صار اليوم درع احتمي بي وياخذلي حقي

رجعت للبيت
ولكيت شيماء راجعة قبلي
ودتصب بالغدا
وسليمة وبابا كاعدين يمها عالكرويتة بالمطبخ
دخلت سلمت عليهم

ورحت ابدل ملابسي سمعت بابا يسأل بشيماء
.. اكول شنو سالفة الجماعة اشو طولوا
شوكت ناوين يسوون العرس

شيماء.. بابا لحد الان محد جاب سيرة عرس هاي انت من يمك تحجي

حجة بعصبية .. شنو قصدج يعني الجماعة غلسوا علينا

ادعي بكلبي والله ياريت

اسمع ابوي ظل يعد ويصف عليهم ويتوعدلهم

بيت ام قاسم
هالة .. يعني ماما ما اعرف وين تردين توصلين من تسوين هيج
ام قاسم.. انتي ما عليج طلعي منها
.. يمة الله يخليج ترة الموضوع مو سهل
وانتي تردين بكيفج تزوجينهم بالكوة

.. شدعوة عيني مكبرة الموضوع
ترة همة لا اول ولا اخر اثنين يزوجون هشكل

ترة الموضوع عادي
اغلب الناس تزوج ولدها زواج مدبر
شمعنا اني من ردت ازوج اخوج صارت السالفة واكفة

انتبهت على خواتي وحدة تباوع عالثانية
خواتي من سمعوا بالخبر
كان بيهم المعارض وكان بيهم المؤيد للزواج

منى وكوثر مؤيدين
بس هديل معارضة

اما خواتي الي متزوجات بالمحافظات
عنصر محايد لا مع هالجهة ولا مع الجهة الثانية
لان هنة بروحهن غركانات

هديل .. يعني انتي هم فكري بيهم صعبة
في ليلة وضحاها تطلبين من اثنين يتزوجون من بعضهم
بعدما كان لكل واحد بيهم حياته الخاصة واحلامه
وتخطيطه لمستقبله تلكينه محاسب حساب
لهيج يوم

هالة.. والله هديل نفس كلامي اني اكول لو امي شوية تتأنى وتنطي مجال لقاسم

ام قاسم .. هو اخوج من غير كلشي جاي يتهرب من الموضوع. مو نوب ترديني انطيه مجال

ولكم يمة والله كلبي تعب من ورة اخوكم الما راضي
يريحني وانا احس بعد العمر ما ظل بي شي

منى.. اسم الله عليج يمة ربي يطول عمرج وتشوفين
اولاد قاسم وتفرحين بيهم

واذا على قاسم فعوفي علية اني اعرف شلون اخلي
يجيج ويكلج يمة تم شنو تفصلين انا البس

بس كون انتي تسمعين كلامي
ام قاسم.. الله وايدج يمة هيج الله يحبني
ويخليه يحن علية ويتمم زواجه
نذر علية اذبح خروف واوزع لحمه للمحتاجين
كون فتفوته ماتدخل البيت منه

ااخ يا كلبي شوكت يرتاح

جنا نحجي وجان يدخل قاسم
راح يم امي وباسها من راسها
.. شلونج يالغالية
شنو شبي كلبج بعده يأذيج
جان يحجي وهو يتمدد وحط راسه بحضن امي
اباوع عليه رجال مشورب طول بعرض
من يوصل يم امي
ينكلب طفل صغير يطالب بحنانها على طول

منى بس سمعت سؤاله
.. اي والله قسومي امي بعده كلبها يأذيها
ومو زين عليها تتأخر

اليوم اجينا اني والبنات حتى نقنعها تروح للدكتور يشوفلها القلب
. هي معاندة ما تقبل ما اعرف شبيها

غمزت لأمي
همست يم منى
.. اكول شو اشم ريحة مؤامرة بالموضوع
كولي على شنو ناوية
منى.. اششش انت ما عليج سكتي وطلعي منها

قاسم .. وليش انا وين رحت وانتوا جايين تاخذونها للطبيب

باوع لامي .. شوفي يمة اليوم اخذج بيدي للدكتور
.. لا يمة ما يحتاج
.. بدون عناد اكلج اخذج للدكتور يعني اخذج
لو اعرف اخذج سحل لازم اليوم ترحين للدكتور

هالة.. الله يلعن بليسك
انت عندك كلشي بالقوة وصلت بيك حتى وية نبع الحنان

قاسم.. شسوي لامج كون تشلع كلبي
ما تجي الا بالعين الحمرة
وتكلي يمة عليمن طالع راسك يابس

اباوع لامي كوة لازمة روحها لا تضحك

متعودة على علاقة قاسم وامي
مرات يبيع الميانة وية امي ويكعد يتشاقة وياها
احسهم مو ام وابنها
عبالك اصدقاء
ومرات يكون الابن المدلل
ومرات اشوفه ابو البيت الحازم
شخصية قاسم مركبة
بس عنده خصلة وحدة ثابتة ما تتغير
قاسم عنده
امي واني وخواتي خط احمر
اما الباقي قابل للتغيير

ام قاسم .. اكووول يمة قسام
غمض عيونه وجر نفس عميق

.. الله يستر صار بيها قسام
كولي يمة شتردين
.. ما رايدة غير بس سلامتك
واريد افرح بيك واشوفك عريس

.. ان شاء الله يمة هانت ما ظل شي وتتخرج رهف
ونتزوج

ام قاسم .. يبووووووو وانا شيصبرني ٥سنين بعد
اكلك يمة وليش ننتظر رهف الفاهية
وانت اصلاً عندك مرة تحط رهف وعشيرتها بجيبها

عقد حواجبه .. منو هاي
.. شسالفة يمة مريتك الي عقدت عليها
وركنتها. وعفتها وراك ما تدري بالدنيا طشت لو رشت

.. اهووووو تدرين والله نسيتها
لايكون ترديني اتزوجها من صدك
.. اي وشكو بيها
.. يمة صدك تحجين من كل عقلج
مقتنعة اتزوج وحدة بهيج طريقة
تصدكين يمة انا كوة لازم روحي ومبقيها على ذمتي
ولوما المؤخر الي يكسر الظهر
جان مستحيل ابقيها على ذمتي دقيقة وحدة

مستحيل اربط نفسي وية وحدة ابوها
باعها بفلوس تدرين يمة ابوها سمعته زفت
وعلى كل السان اذا الاب هيج زبالة
شنو تترجين تطلع تربية بنته

ام قاسم.. لاااا يمة استغفر ربك
لا تحكم على بنته وتحملها بذنب ابوها

والله يمة بناته ذهب مو لان انا اريدك تتزوجها
بس روح واسأل عن اخلاقهن
بكل مكان راح يشهدولك عليهن

هنة تربية امهم واختهم شيماء من وراها
ابوهم ما له دخل بيهم
.. حتى لو يمة لو جانت رب الاخلاق
تبقى ابوها تعبان

ما يشرفني جهالي يكون جدهم اثير خريج السجون
كطنة وشيلها من اذنج
ما اتزوج من بنته لو جانت اخر مرة بالعالم

.. يايمة قاسم تقبلها البنية تبقى معلكة هشكل
لا هي طايلة ارض ولا هي طايلة سما
.. مشكلتها مو مشكلتي ابوها الي ورطها
انا حالي حالها اتوازيت على هذا الزواج
اذا هو ابوها ورطها وما فكر ببنته انا شكو

انتبهت لقاسم يحجي وهو عاقد الوجه نهض من حضن امي وكام على حيله
ام قاسم رفعت راسها تباوع عليه
.. هايمة شو كمت
وين رايح
.. طالع عندي شغل كلت اجي شوية للبيت اكل لكمة
بس الظاهر الكل كاعد منتظريني وحادين سنونكم علية
خلي اطلع بروحي العزيز لان ادري
راح تكعدون تاكلون راسي

خلة وطلع من البيت واني راحت وراه تصيحه يرجع
اتعودنا مثل كل مرة امي تفتح وياه سيرة الزواج
من هدى قاسم يتهرب

اباوع لامي كامت تولول

كوثر .. يمة حقه قاسم ما الومه احنا لان شايفين هدى ومعاشرينها
ونعرف اخلاقها نريده يتزوجها تكون من نصيب قاسم

بس لا تنسين قاسم رجال
حاله حال اي واخد من يريد يتزوج لا بد وان يبحث عن اصل البنية ويختار الزين منها

وهو متخبل من ابوها وتصرفاته وما يتشرف يناسبه

ام قاسم.. وهسة انا قابل راح ازوجه البنية لو ابوها
كون هو صدك يهتم
بابو البنية ما يشوف عمه ابو رهف
شلون اتبدلت اطباعه من استعدلت امور اخوج بالشغل
ليش نسى هو شسوة بأبوه بيوم ورطه
وخلاه يشارك منير

على ابو شارك اخوك اولى من تشارك الغريب

هدى
بالليل ستونا حطينا رسنا عالمخدة
وجان يندك الباب
بصوت عالي مال واحد مستعجل
كمزنا اني وشيماء من مكانا

سمعت صوت سليمة
.. يمة ياستار منو هذا الي جاينة بهالليل
شيماء وهي تلبست نعالها
.. بيبي لحظة اوكفي لتفتحين الباب انتظريني
اجي وياج خاف كلشي يصير
يطلعون حرامية

رحت وراها واني احجي من بين اسناني
.. دعوفيها يوم المنى يسطي علينا حرامي ويخطف
سليمة شفايتلنا

بس ولو انا متأكدة راح يتورط ويرجعها يوم ثاني علينا
وفوكها بوسة

جنت احجي واكفة يم باب المطبخ
وجان سليمة تفتح الباب
وما اشوف الي عباية سودة دخلت للبيت وهي تصرخ وتبجي
.. عزة بعيني هاي ضحيوة اختي

انتبهت لشيماء انخبصت بمنظر ضحى المدمى

دخلناها للبيت نريد نفتهم منها كلمة من ورة شهكاتها وبجيها كلشي ما افتهمنا

اباوع لضحى نزعت شالها وعبايتها
ووجها كله ازرك والشفة مشكوكة
شيماء.. ضحى رحمة على والديج احجيلي شصاير
بيج
جانت ضحى تتراجف
ووجها صاير علبة الوان
رجعت شيماء تحجي وياها
ما حسينا الا على ضحى اغمى عليها ووكعت بين ايدينا

شيماء.. يمة اخيتي شجاج ضحاوي احجي
كعدت تضرب على خدها ضربات خفيفة

وضحى بغير عالم
.. شيماء شبيها ضحى
.. والله ما اعرف شبيها اختي
ظلت تدلك على صدرها لحد ما استردت الوعي
ورجعت تبجي بحركة فتحت حلكي اريد اسألها
شيماء اشرتلي اسكت

كومتها واخذتها للحمام
وسبحتها وطلبت مني احضرلها ملابس
دقايق وطلعت من الحمام
ودخلتها للغرفة وكعدت بدللها
وتمشط بشعرها

شيماء.. هدى فرشي لضحى خليها تنام
رحت نفذت بدون اي سؤال

فرشتلها فراش ونامت مكرفصة على روحها وغمضت عيونها بدون ما تنطق اي كلمة

ظلينا اني وشيماء وحدة تباوع بوجه الثانية
شبيها اختنا
انتبهنا عليها خطية كل شوية تكمز

اتمددت واخذتني النومة وما كعدت الا يوم ثاني الصبح على صوت سليمة باوعت للساعة
لكيت شيماء كاعدة وضحى بعدها نايمة
كمت من مكاني على كيف حتى ما ازعجها

واخذت ملابسي والملازم وحذائي وطلعت وسديت الباب على كيف
غسلت وبدلت ورحت دخلت للمطبخ
وسليمة لا زالت تحجي بدون انقطاع

سليمة.. هسة ما عرفتي منها شبيها وليش هشكل حالها
شيماء.. اكلج بيبي البارحة شفتيها البارحة شصاير بيها
اجتي مفرفحة

عرفت شيماء اختي مستحيل تخلي ضحى تنام بدون متعرف شنو الموضوع
ومتأكدة من سبحتها بالحمام عرفت شبيها

.. اي غير نفتهم منها شمسوية
انا سوكتها ما عاجبني بس لا مسوية مكسورة
وطاردها رجلها بهالليل

ماكدرت الزم روحي عنها تحجي الحجر
.. انعم الله عليج هاي انتي المرة الجبيرة
بيبتنا تحجين هشكل علينا

لعد سلام الله على سيف رجلها اذا اجانة يتبلى عليها

سليمة.. خاب شوف ام السان المكطم شلون
تحجي ولج انتي اخر من يحجي ويفتح حلكه
انا لو منج اطم روحي

رجلج عقد عليج ودار وجهه وشرد
بعد ما شفناه ذبج علينا.
هي تحجي ونا صرت نار كبرة

.. حقه يشرد تلكينه عرف بيبتي سليمة
راح وبعد ما رد
يخاف على الجينات الوارثية لا تنتقل لأولاده

شيماء .. هدى تعالي اتريكي ترة الخط وصل
هم يالله ترحين

بالكلية
داومت ودخلت محاضرات واني كلشي ممفتهمة بالي كله يم ضحى اريد اعرف شبيها
اجتني فاطمة وظلينا نحجي
كالت اتقدملها واحد بالكلية

يصير بنفس القسم مالتي شايفها وسائل عليها
والبارحة رايح عليها بالقسم مالتها وحجة وياهة بالموضوع وهي كلتله. انطيني فرصة افكر واستشير الاهل

.. هلة هلة فطومة كبرت وراح تعرس
الله واخيرا
وحدة من عدنا راح تتزوج
.. ليش حبيبتي نسيتي روحج ترة انتي اول
وحدة بينا اتزوجت
.. خرب حظي
لا يكون حاسبة علية هذا زواج
يابة كل ما في الموضوع الولد سوة هشكل حتى يجاري
ابوي بالسالفة

.. اي صدك اني متفاجئة شعجب ابوج ساكت لحد الان
.. وعنه لا حجة والله لايكولها ويبقى ناسي ما يتذكره
خليني مرتاحة
ما عولت ينسون هو سليمة اكلو كلبي

خلص الدوام واجة الخط وبطريق الرجعة
قريب ما نوصل عالبيت
اتصلت علية شيماء تصيح مستعجلة

.. هدى انتي وين رجعتي من الكلية لو بعدج
.. شنو شبيج شيماء ليش تصيحين
.. جااااوبيني
.. هياتني اني قريبة عالبيت
شيماء بأستعجال

.. هدى لتروحين لبيتنا كبل اخذيلج سيارة ورحي لبيت فاطمة واني جاية وراج
افهمج بعدين سمعت صوت صياح بابا يمها
مثل الضربها اي لان شهكت موجوعة

انقطع الخط بهاي الاثناء اني وصلت لراس الشارع
كلبي راد يطلع من صدري بيوم سمعت صياحها
شنو شصاير وليش تطلب مني
ما ارجع للبيت
اتجهت عالشارع العام حتى اجر تكسي
بس فجاءة طرة على بالي سالفة ضحى
شهكت بخوف على خواتي

يمة صخام بس لا سيف هاد عليهم بالبيت
غيرت اتجاهي ورجعت امشي سريع اهرول
خايفة واني انواع الكوابيس اتربعت براسي

وصلت يم باب بيتنا وجان يطلع ابوي والشر
مرسوم على وجهه

كال بصوت غاضب
.. اجيتي والله جابج
لزمني من ايدي وسحبني وراه
يمشي بالشارع واني وراه كايدني من زندي
.. بابا شكو شصاير فهمني

جنت احجي واني اتلفت على باب بيتنا
اريد افتهم شكو

.. تعالي وياي وبعدين تعرفين شنو السالفة
وصلنا يم سيارة فتح الباب. ودفعني حتى اصعد
صعدت واني كلشي ما مفتهمة

ورة فترة اباوع بالطريق اريد اعرف شنو السالفة مقالي
دك
وردت اجاوب بابا اخذه مني
وغلقه
وراها دك نقاله وشكل المتصل عمو امجد
اسمعه يكله
.. امجد انت ما عليك بنتي وانا حر بيها

وبهاي الاثناء انتبهت احنا وكفنا بباب بيت ابو قاسم
شنو السالفة
عقدت حواجبي
واني اباوع لبابا
نزل من السيارة وفتحلي للباب ولزمني من زندي عبالك راح اشرد منه

دك باب بيت ابو قاسم وظل ضاغط عالجرس لحد ما
طلعت هالة باوعت علينا مستغربة وجودنا
وحالها مثل حالي
عيونها تسأل شنسوي جايين

اجتي ام قاسم من ورها تسألها منو بالباب
شافتنا وسلمت
بس بابا قاطع كلامها
دفعني كدامها وكال

.. هاج اخذي هاي مرت ابنج
شعندها كاعدة يمي بالبيت
بيت رجلها اولى بيها

وبلغي ابنج مو انا الي ينضحك
عليه وانركن عالرف

جانت الصدمة محتلة كل افكاري
وبعدما ادركت معنى كلامه
اتشخصت كل مخاوف العالم كدام عيني

شنو. وليش وشوكت
هذا صار

عاصفة وعثرات وحياة معلقة
وحياة جديدة. وعالم جديد
مجهول هذا ما سوف يدور حوله
حياة ابطالنا
فاترككم يا احبتي الى هنا مع نهاية الجزء الاول
من قصة اساور الفضة
وانتظروني قريباً.
اعود لكم مع الجزء الثاني

يتبع

احبكم هواي احبكم كومة
والى اللقاء مع تحيات اختكم نهى 😘😘😘