أساور الفضة الفصل السادس والعشرون 26 - بقلم نهى

مساء الخير والسرور عليكم يا احبتي

🍀🍀🍀🍀🍀🍀🍀🍀🍀🍀🍀🍀🍀🍀

#اساور_الفضة
#نهى_الحسون

.. مفتهمت شنو تقصدين
شيماء اجتي دخلت عالخط وقاطعت كلام بيبي وكالت
.. الله يسلمج بيبي تعالي كعدي انتي تعبانة
سحبت الكرسي وكعدتها
سليمة باوعت لشيماء
.. ياااا شبيج تغمزيلي

هو انا شكلتلها ما نعرف نباركلج لو نتحمدلج عالسلامة

سليمة متضيع فرصة الا تذب سمها
استغفر الله لازم كون تحجيني
شوف هاي شافتني اتكسرت عبالها تكوم علية
متدري الساني بعده صاحي يزهو بالنصر

.. شبيج بيبي مبين عليج هواي فغحانة (فرحانة) بدعمتي
عبالك جاية عغس محتاغة. تباغكيلي (عرس محتارة تباركيلي) لو تتحمديلي عالسلامة

.. يمة.. يمة منج اكلتيني وشربتيني
والله لوما مكسرة جان خليت النعال يركص على جلدج
بس وين انتي مزوركه حتى ماكو مكان اضربج بي

درت وجهي ضايجه مها وحجيت وية شيماء بصوت ناصي
.. عليكم الله اذا متت لا تخلون سليمة تحضغ (تحضر) بفاتحتي
اتوقع اذا كعدت يم الناس تذممهم ما يقغون (مايقرون)
الفاتحة على غوحي (روحي) ولا تخليكم تسولي ثوابات

شيماء ابتسمت .. خرب يومج ولا تكعدين راحة

شوية ودخل الدكتور المسؤل عن حالتي
وكعد يشرف وشيماء واكفة يمه واستفسرت منه على كم فقرة بالعلاج وكللها لتخافين هي بعدها صغيرة وبسرعة
يلتئم الجرح

.. استغفر الله حتى هذا يكول صغيرة

سليمة تحجي وية الدكتور
.. اكلك خالة ما تكدر وياك بطريقك
تسويلنا لسان هاي المكطم وتخليها تحجي عدل مثل الخلك والعالم
باوع علية الدكتور وابتسم
.. هاي شنو شبي لسان مريضتنا الحلوة
جاوبته بغيض
.. دكتوغ كلشي ما بي الساني
.. هاك شوف شلون تغوغي
_حجية شوفيها شلون حلو تحجي مثل الفرنسيين
_دخيلك دكتور هي من دون شي لسانها ميسكت اطول منها للكطمه
النوبة تكولها مثل الفرنسيين بعد شيسكتها

حجيت بصوت ناصي للدكتور
.. اكول دكتوغ يغحم (دكتور يرحم) اهلك
ما عندك دوة يخلي بيبي تسكت وبعد متحجي
كون اغيدها (اريدها ) اذا تحتاج شي تطلبه كله بالاشاغة (بالاشارة)
اباوع للدكتور خربان ضحك

بعدها خلص الدكتور الفحص

وطلع
وسليمة اجة عليها عمو امجد واخذها

وضحى بقت كاعدة يمي وتسألني
وين جنتي طالعة وشوداج على منطقة بيت فاطمة

شيماء جاوبتها بس ما حجتلها عن سالفة مروة
.. جانت فاطمة عازمتها عالغدة بييتهم
واني كلتلها عادي روحي لها غيري جو

انتبهت لوجه ضحى من اندارت علية جان جوة عينها زراك بس خافيته
بالمكياج بالتحديد حاطة خافي عيوب
سألتها واني عابسه وجهي من الم رجلي
.. ضحاوي هاي شنو عينج مزوغكة (مزوركة)
هم كولي انضغبتي بالكاونتغ (انضربتي بالكاونتر)

دنكت وارتبكت سكتت محجت شي
اجاني صوت شيماء يم الباب دتطلع
.. بنات اني شوية وارجعلكم
ضحى.. اخذي راحتج

شافت شيماء طلعت وهي
كامت تحجي بحركة كلب
.. لج هدى راح اموت بعد ما اكدر اضم بكلبي اكثر من هيج
.. يايمة ضحاوي والله عغفت (عرفت) بيج متأذية وتكابغين (تكابرين)
ومتقبلين تحجين لخواتج عن همومج
.. ولج شحجي وشكول
والله مالي عين اشتكي واعترض على قسمتي
لان بنفسي اختاريتها
واستاهل بس والله اني بشر وعندي
قدرة تحمل الها حد ونهاية

بس كلما اكول كافي بعد ما اكدر اسكت اكثر
التفت واكول منو الي راح يسندني اذا طلبت العون
وحتى لو ردت احجي منو راح يسمعني وياخذلي بحقي

اتلمست ساقي ادلكها وحجيت
.. احجيلي منو وياج وشبيها حياتج وية سيف
بدت ضحى تحجيلي
.. منين ابديلج تردين اكلج شلون عاملني بأول شهر من زواجنا والوحشية الي استخدمها وياي

لو تردين اكلج امه شلون ذالتني بفقر اهلي
لو تردين اسولفلج شلون خانكني حصرة علية اتنفس لو احجي
وما لي حق اطلع من البيت
ولا الي حق اتصرف بأي شي فارض علية كلشي

بالله الحجاب افتهمنا ستر زين البوشية شكو
لج هدى من اول شهر
حرم علية المكياج يكلي انتي حلوة ميحتاج
اغار عليج ما اريدج تحطين مكياج بالبيت منا اخواني

وبعدها ملابسي بالبيت ميقبل الا دشاديش كبار والوانهم
باهتة يكلي حتى متلفتين الانظار انتي بيضة وحلوة
اخاف تلفتين نظر اخواني

وبعدها خلاني حتى بالبيت لازم البس جواريب
وحجاب مقنعة من هذا الي يوصل لتحت الصدر

لج والله حتى بيبي سليمة متقبل تلبسه
على البهذلة البي احس بي ديسلب مني شبابي شوية
شوية بالتدريج

.. يايمة سودة علية ضحاوي وين جانتلج هاي

اباوع عليها تحجي وتبجي والله مردت كلبي
فوك ما انا موجوعة زاد وجعي
خطية تقريبا راح يصيرلها سنة الا شوية
من اتزوجت ما يوم شفتها تضحك

لحظات ودخلت الممرضة وكالت العفو انتي ضحى
.. اي اني ضحى
.. زوجج برة دينتظرج يكول صيحيها الي
باوعت علية وبعيونها شكوى

غمضت عيوني واتمنيت للحظة كون اني ولد
جان والله ما اخلي يطلع عليه الصبح اذا مو هو بالمستسفى مكسر
همست بضعف وكلتلها
.. فوضي امغج لله (امرج لله)هو اعلم بحالج
.. والنعم بالله

لبست بوشيتها ونزلتها على وجهها ولبست عبايتها وسلمت علية وطلعت بسرعة

شيماء
طلعت ورة الطبيب حتى اوصي بابا يجيب حليب بي كالسيوم
وصفه الدكتور لهدى يفيدها يساعد على التأم الكسر
طلعت ودورت عليه شفته بنفس مكانه

كلتله عن الحليب وكال ان شاء الله فد شوية يجي صاحبي ياخذ مكاني
واجيبلها الحليب

وطلبت منه يجيبلنا اكل لان ما اكدر ارجع اسوي اكل

بعدها خليت ورجعت لهدى واني دا امشي
واصطدمت بواحد جان جاي بأتجاهي بكل سرعته مستعجل ارتديت للخلف من اثر الضربة احس
كتفي انخلع من وراه

باوع علية وحجة بكل غضب
.. صدك جذب كل عين شكبرها ومتشوفين
خزرته.. هو منو ضرب منو
اني لو انت باوع على ساعته شكله جان كلش مستعجل

.. لا تعطليني ولا اعطلج ملازم لا تعتذرين ماعندي وقت اضيعه وياج
راح وتركني بس قبل لا يروح
باوع علية بنظرة غريبة وراح

اسلوبه نرفزني هذا شبي صدك مو طبيعي
راح وعافني بنص الطريق مصفصفة
اباوع على اثره هزيت ايدي وحجيت بصوت ناصي
.. ناس تعبانة

سمعت صوت رباب من وراي
.. شبيج تهزين بأيدج
حجيتلها على الصار
رباب .. بشرينا عاد يستاهل هاي العصبية كلها لو مو شي
.. هو اني وين لحكت اشوفه من ورة كلامه اشكد
مكروه

رباب رفعت حاجبها .. اول مرة اسمعج تلفظين كلمة مكروه هاي الكلمة مالها مكان بقاموسج اممممم
عرفتها شنو تقصد
.. اهووووووو خرب يومج رباب شكل المسلسلات التركية ماكلة عقلج لدرجة فاصلة عن المعقول
وتحجين كله بالخيال
بالله شو امشي كدامي خلي نروح لهدى

جنا نمشي ونحجي بالممر مالت المستشفى
ودك نقالي رقم غريب اشرت لرباب حتى تسكت
ورديت عالمتصل

سمعت صوت المتصل
واتوقفت بنص الدرب مصدومة
اجذب اذني لو اصدكها همست بصوت مبهوت
.. مروة!!

اباوع لرباب وكفت تباوع علية
واني رحت كعدت على كرسي موجود بين سطر كامل كراسي خالية
اجتي رباب وكعدت يمي
جنت مندمجة احجي بحركة كلب وية مروة
بالبداية مردت احملها مسؤولية الصار بهدى

بس الرضت والما رضت مروة صارت سبب بتحطيم حياة هدى

ورة فترة من المخاض بين المشاعر والعواطف
احس عبالك جنت بحلبة مصارعة وخرجت منها بنتيجة
غيرة منصفة

نهيت الاتصال من مروة
باوعت للنقال بين ايدية وانتبهت لرباب لزمت كتفي وعصرته تواسيني وكالت
.. ها ي منو اتصلت عليج وخلتج هشكل تصفنين ؟؟

.. هاي مروة اختي اتصلت علية

.. مروة اختج!!!!معقولة هاي شوكت رجعت
.. وشلون عرفت بحادث هدى
جانت رباب تسألني واني منا كلبي ممرود
كبل نزلت دموعي غصب عني
مكدرت الزم روحي
رباب .. شنو شيماء احجيلي شصاير ليش دتبجين

.. تدرين رباب مروة رجعت للعراق قبل اربعة اشهر

.. شلون عرفتي رجعت شنو اتصلت عليج
.. لا عرفت عن طريق دكتورة صديقتها هشكل بالصدفة سألتي من باب الفضول وكالت
.. صدك انتي اخت الدكتورة مروة ؟
جاوبتها .. اي نعم اني اختها ليش تسألين
.. لا بس اكول شعجب تشتغلين سكرتيرة عند الدكتورة
سولاف
واختج عندها مركز بأسمها مال تجميل ونسائية
وهي تدير القسم النسائي بالمركز
وعندها عيادة كلش جبيرة
خاصة بالامراض النسائية والحمل والولادة واطفال الانابيب
يعني اكول شعجب ما اخذتج يمها تشتغلين

هي جانت تحجي وانا بين الفرحانة اختي رجعت للعراق وحققت حلمها
وفتحت مركز كامل مو بس عيادة
وبين المقهورة اكول حتى ما كلفت نفسها تجي تسأل علينا احنا خواتها

بس كلت معذورة بعد الصار بيها من ورة بابا
واحنا خواتها بنفس الوكت خذلناها
اصلا ليش ترجع وتسأل علينا
وهي ما عندها اي سبب يخليها تحن علينا

بعدما عرفت بوجود مروة ظل الموضوع يكتم على صدري ومثلما اتعودت اسولف لهدى عن اي شي يصير ويايه
او يحز بخاطري حجيتلها عن مروة
وهي بوكتها ظلت تتسمع لكلامي بكل هدوء
وما بين عليها اي ردة فعل وما حجت اي شي غير بس

.. الله يوفقها على الاقل وحدة من عدنا حققت حلمها
وبعدها ما فتحنا الموضوع مرة ثانية

ومرت الايام وجان هدى تسوي حادث
وعرفت بالصدفة عن طريق فاطمة صديقتها
ان هدى قبل الحادث جانت عند مروة اختي
ومن خلال كلام فاطمة الي حجت وهي تجهل الموضوع شنو كالت طلعت من يم الدكتورة وهي تبجي

ومن سألت هدى بعد الحادث حجتلي شنو كانت ردت فعل مروة من شافتها

رباب.. وهسة شنو مروة ليش شعندها متصلة؟؟؟
.. مروة اتصلت علية جانت تريد تتأكد صدك هدى سوت حادث
.. اي وشكالت
اتصلت علية واني رديت عالنقال بدون ما اعرف منو لان جان الرقم غريب
بس كبل رف كلبي من سمعت صوتها وحجيت لا ارادياً
.. مروة!!!
وكبل دخلت بالسؤال بدون لا سلام ولا كلام
.. اي مروة
شيماء اليوم بالصدفة اجتي زميلة وياي
بالعيادة وكالت هدى اختي سوت حادث قبل ٣ايام
صدك هذا الحجي

جانت تحجي بنبرة اهتمام جاوبتها وكلبي ملجوم منها
.. ليش يهمج امرها
..شيماء عفية جاوبيني بدون مماطلة
بالكلام اريد اعرف صدك سوت حادث
ووشوكت سوته بيا ساعة
جاوبتها.. صار الحادث من جانت راجعة من عندج

سمعت صوت شهكتها وبعدها سمعت صوت شي اتكسر مثل الكزاز

لحظات واجاني صوتها هالمرة جان كلش هادئ لدرجة
الهمس
.. وهسة هي شلونها
.. مع الاسف اجيتي متأخرة

.. شيماء جاوبيني لتلعبين بأعصابي

.. لتسأليني عالحادث
وتعالي حاجيني ما بعد الحادث اختج شصار بيها
.. عفية شيماء اربكتيني احجي شكو صار شنو هدى
لهاي الدرجة اتضررت
.. كليلي عن يا ضرر منهم تسألين
عن كسرها بدعمتها لو تسألين عن كسرة بختها
لا لا خلي اسولفلج عن سواية ابونا بأختنا
..احجي شسوة بيها اثير ؟؟؟
.. مسوة شي غير بس فوك مصيبة حادثها
اجة ابوج وزوجها لواحد لا يريدها ولا تريده
زوجها لقاسم جيرانه قبل
الي اختج تخاف منه من هي صغيرة ولحد هسه من تشوفة تنهزم
وتالي كسرها فوك ما هي مكسورة
مسمعت صوت مروة
ظليت احجي اريد اطلع كل الي بكلبي

.. تدرين مروة هدى اجتج علمودي
رادت تجمعنا سوية حتى يرتاح كلبي
ادري بيج مراح يهمج هذا كلامي ولا راح يقدم او يأخر
عندج

بس اكول شلون انطاج كلبج تهضمين اختج الصغيرة ما الومج لو اتصرفتي هيج وياي لان اني اختج الجبيرة واتحمل مسؤلية الصار وياج بذاك الوكت
بس هدى شنو الذنب الي ارتكبته وياج حتى تعاقبيها هيج

.. تدرين رباب اني ما الوم مروة عالصار بهدى

بس اريد اكعد وية الزمن اعاتبه
واكله
انا شسويت من ذنب وياك حتى تعاقبني
وتسلب من بين ايدية الثمر الجنيته

اي رباب تدرين امي من اتوفت

سلمتني خواتي مثل البذور من يوم
اخذتهم من ايديها
كبل زرعتهم بكلبي
وصرت ارويهم بماي عيني لحدما نبتت
جذورهم وقوة عودهم
وكبرت شجرتهم وثمرت
وجانت كل ثمرة بهاي الشجرة تمثل وحدة من خواتي

وكدام عيني شفت شلون بدة الثمر ينضج
جنت هواي فرحانة
بديت اجني الثمر وحطيتهم بالسلة

كلت الحمدلله ما بقة شي عالحمل
هانت بس اوصل السلة لبر الامان
بديت امشي بطريقي واني شايلة سلة الثمر بيدي

امشي على كيف حتى اداري الثمار البيها
بعدني ببداية الطريق وجان اتعثر
وتوكع مني ثمرة

هاي جانت اول ثمرة اخسرها من السلة
هاي الثمرة جانت مريم اختي الصغيرة
من اخذوها مني وهي بالكماط ومكدرت احتويها

وتالي نهضت من جديد ونفضت عني التراب ورجعت حملت السلة من جديد وكلت

يالله شيماء كومي وديري بالج عالبقة بالسلة
رجعت امشي وهالمرة جنت اكثر حذر

وتالي هبت علية عصفة ريح
ومرت اللخ اتعثرت
هالمرة وكعت ثمرة مروة من السلة
وما لحكت عليها بسرعة راحت

رجعت من جديد اتحاملت على نفسي وكوة وكفت على رجلية
بس هالمرة صرت امشي واني اعرج
ورجعت شلت السلة

اصبر نفسي بالبقة بيها واكول هالمرة راح احافظ عليهم

وصرت اداري بيهم
بس ما ادري شلون على غفلة طلعتلي نفس العثرة بطريقي
ووكعتني وجان تطيح مني ثمرة ضحى وتروح بالرجلين

مع الاسف باوعت للسلة وما صفة بيها بس ثمرة وحدة
من خوفي عليها لا اخسرها
طلعتها من السلة وشلتها بين ايدي وحلفت
هالمرة مستحيل اخلي شي يصيبها
ويسلبها مني

بس مثل كل مرة تطلع العثرة بطريقي
وتوكعني على وجهي وسلبت من بين ايدية اخر ثمرة
من شجرة امي

هالمرة عثرتي جانت قوية
كمت منها واني محنية الظهر
اباوع عالسلة صفت ما بيها ولا ثمرة من شجرة امي
وصرت اسأل روحي وين راح الثمر الجنيته

جريت حسرة واتنفست

رباب اني هيج حالي وية خواتي وابوي
خواتي الثمر وابوي العثرات الي دائما تطلع بطريقي
وتسلب مني وحدة من خواتي

رباب بحزن حضنتني
.. يابعد عمري ياشومة شكد شايلة هموم بكلبج
بس لتخافين على خواتج اكو رب رحيم
هو احن عليهم منج ومن امج الي ولدتهم
وان شاءالله رب العالمين ميضيع تعبج
حاشى لله يضيع تعب بشر
ترجعون بيوم وتلتمون ان شاءالله

جنت دا امسح دموعي وسحبت نفس عميق
ورفعت راسي وجان تجي عيني بعين
نفس الشخص الي اصطدمت وياه قبل شوية

جان يباوع علية وسرحان بنظره حان واكف يم الدكتور

عقدت حواجبي وباوعت عليه مستغربة
وهو انتبه على نفسه وبسرعة غير اتجاه نظرته
ورجع يحجي وية الدكتور وكأن شيئاً لم يكن

قاطعني صوت رباب دتسلم
باوعت شفت هالة وام قاسم ديسلمون
كمت من مكاني وسلمت عليهم
جانوا جايين وبيدهم ورد وعلب حلويات
ام قاسم.. خالة شومة الحمد لله على سلامة اختج
.. الله يسلمج خالة
اجتي هالة والوجه فرحان .. الحمدلله على سلامة جنتنا
ما تدرين شكد فرحت من اخوي قاسم دعم اختج
عقدت حواجبي ما اعرف اضحك على حجيها لو انقهر

تالي اجتها ضربة على راسها من ام قاسم
وكالت
.. ههه خالة ما عليج بهاي الملكوفة
قصدها فرحانة لان قاسم عقد على اختج
وتريدين الصدك شكد انقهرت وانمرد كلبي على اختج وابني
لان ابني دخل للسجن واختج دخلت للمستشفى
بس عسى ان تكرهوا شيئاً وهو خيراً لكم

بس انجبر خاطري بيوم سمعت قاسم عقد على هدى
احس ماي بارد على كلبي نزل

صحيح الظرف الي تم بي العقد مو مناسب
بس ان شاء الله انعوضها لهداوي عالجايات

انتبهت لام قاسم. هي وهالة جان
مبين عليهم فرحانين بالصار

ام قاسم .. طبعاً اني جنت رايده اجي لهدى من اول يوم
بس بعد تعرفين ب قاسم جان بالسجن
ويوم ثاني يالله طلع
والتهينا الناس كامت تجينا علمود قاسم
وهسة يالله فرغنا نجي نتحمدلها عالسلامة ونتطمن عليها
مدت ايدها وسلمتني علب الحلويات
.. يا خالة ليش كلفتوا على نفسكم

ام قاسم.. لا خالة هذا واجبنا ولازم نسوي اكثر
هاي علمود سلامة هدى جنتنا

هالة.. شومة عفية اخذينا لهدى اريد اشوفها
مشتاقتلها الله عليج شنو كالت من عرفت بقاسم
عقد عليها
شيماء.. بالحقيقة هي متدري بسالفة زواجها
لان اني ما خليت اي واحد يحجي يمها بخصوص هذا الموضوع

ام قاسم.. يا خالة ليش مكلتولها
.. خالة ترة الموضوع كلش صعب
وهدى وضعها وصحتها كلش تعبانة
اشوف الوقت مو مناسب
اخاف يصير عليها شي اذا تعرف اتزوجت بدون علمها

ام قاسم عقدت حواجبها ولطمت صدرها
.. عزة بعيني يعني شلون اختج اتزوجت ابني بدون علمها والسيد شلون يعقدلهم

.. بهيج وضع ميحتاج ياخذ موافقة البنية
لان هدى بالمستشفى ومتكدر تحضر وابوها وكيلها
وهذا السبب استخدمه بابا حتى يتمم العقد

اباوع لام قاسم بهتت فرحتها وظلت مصفصفة
.. والله ياخالة ما اعرف شنو اكول
شيماء.. خالة معذورة حقج تنصدمين لان الصار كله على بعضه
هوسة وخبصة فكل الي اطلبه منج
لتجيبون سيرة عن الموضوع لحدما هدى تكوم على حيلها
هالة.. صحيح كلامج شيماء خصوصا
هدى تتخبل من قاسم وتخاف منه

ام قاسم.. احجي عدل شنو تتخبل من قاسم شنو مسويلها
اسم الله يمها بكربها وين شايفها

هالة.. لا ماما كلشي ممسوي لها
ما اعرف ليش هشكل هي تخاف منه و مكبرة الموضوع

هو يادوب شوية جان يجرها من ظفيرتها على كم كتلة
و شوية فشخة بالحجار خلت دمها بطولها
على شوية دعمة بالسيارة. فلشتها تفليش
شدعوة عليها هشكل حساسة
خطية قسومي اخوي مسكين كلشي ممسويلها
بس هي تتعاير بطرانة

اباوع لأم قاسم شلون تخزر بهالة

هدى
جنت متأذية من رجلي
ومنتظرة شيماء تجي تعدلها الي احس طلعت روحي من تحركت شوية
دخلت شيماء
وحجيت.. عفية شومة لحكيني غاح اموت من الالم
انطيني ابغة (ابرة) دوة اي شي بس خلي يسكن الالم

شيماء .. ها متأذية
لعد شوفي شنو جبتلج وياي راح تخليج تنسين حتى الالم
فاتت جوة ودخلت وراها هالة وام قاسم

اجتي علية هالة بكل لهفة وشمرت روحها بحضني وصارت تبجي
عطت بصوت موجوعة .. اااااااخ
من الله يلعن بليسج هالة
شنو ثوع (ثور) وهادينه علية

كمزت من مكانها خايفة تباوع على رجلي
هالة .. يايمة سودة علية هاي شصاير بيج
الف الحمدلله على سلامتج تكبرين وتنسيها

ام قاسم.. الحمدلله على سلامتج خالة
.. الله يسلمج خالة
جنت احجي وعابسة وجهي من الالم

.. شنو خالة موجوعة
.. اي والله خالة كلش متأذية
هالة.. اهووو هاي شمسوي بيج
كالب خلقتج

.. اي مو اعمي ويسوق سياغة شتتغجين (سيارة شتترجين) منه
كون كسغ (كسر) لايده حتى بطل يسوق سريع

ام قاسم شهكت وكالت
.. اسم الله على اسمه ان شاء الله عدوينه

جاوبها مستغربة
.. لحظة خالة انا المتضغغة (المتضررة) مو السايق
انتي ويامن
هالة تضحك .. لج عوبة مو السايق يصير ابنها طبعاً تخاف عليه

حجيت مندمجة
.. واذا ابنه.............
فجاءة وصلني البث
شهكت مفزوعة وعطت
.. يمةةةةةةةةةةةة. قاسم هو نفسه الي دعمني
يبوووووووي علية يبووووووو
باوعت
شيماء.. اي صدك نسيت اكلج منو السايق
لان مصار موضوع تسأليني عن اسم الدعمج
جنتي ملتهية بجروحج

بلعت ريكي وباوعت لام قاسم وهالة
وحاصرتني البجية
.. ااااخالة ترة انا مو قصدي احجي عليه

هالة.. شنو مو قصدج بعد انتي حجيتي عليه ورحتي
وراح اكوله هدى تدعي عليك

شهكت .. انجبي عوبة ما جنت اعرف منو الدعمني
انا لو ادري بقاسم اخوج داعمني
جان هسة تلكيني اطك اصبعتين من الفرحة
ممصدكة حظي الاغبغ (الاغبر) حطني بطريقه

ام قاسم تضحك على هدى تريد تهديها
.. يا خالة معقولة لحد هسة تخافين منه ترة والله قسومي كبر وصار حباب وطيب وحنين

همست يم هالة .. اي هي منو حمادة العغوس غيغ (العروس غير) حفافتها
ابتسمت.. خالة الله يحفظه الج ويعلي منازله
وتفغحين (تفرحين) بي

هالة بتصنيف.. بعد .. بعد غنيله
سيدي .. سيدي شكد انت رائع سيدي

بنت الاوادم حسستيني عبالك اخوي سلطان جائر يأمر بقطع الرقاب
وتخافين منه يطير ركبتج هههههههههههه
ام قاسم .. خالة هدى لتخافين بعد هو كبر واتغير وانتي كبرتي شي اكيد بعد متخافين منه

جانت ام قاسم تحاول تمهد لخبر زواج قاسم من هدى

.. لا خالة اني صحيح كبغت بس الخوف مو بيدي
ضربتني هالة بخاصرتي

.. شدعوة يحافظ على كيفج دادا كبري عقلج وانجبي
.. لج عوبة هذا النوع من الخوف ما بيه صغيغ لو جبيغ (صغير ولا جبير)
اخوج مثل الثوغ (الثور) الهائج بيوم يدخل للساحة
كلها تخاف منه صغاغ وكباغ (صغار وكبار) يشردون

ام قاسم.. انعم الله عليج سويتي ابني ثور

وجهي كام ينطي الوان
.. لالالا حشااااااه سيد قاسم
خالة الامثال تضغب (تضرب ) ولا تقاس

اباوع لشيماء ورباب خانكتهم الضحكة
ورة فترة دك نقال هالة
وراحت هي وامها وظليت اني وشيماء ورباب
.................

بعد مرور شهر
هالة
دخلت للصالة ولكيت امي وقاسم

ام قاسم .. يمة قاسم صل عالنبي وكول يا الله
مو هيج تنحل السالفة
قاسم.. يمة رحمة على والديج عوفيني
انا اعرف شلون اتصرف
.. شتتصرف ترة هي مو بالكوة
عمك حر وبكيفيه متكدر انت تفرض نفسك عليه

.. حر بكلشي الا بسالفة زواجي من رهف
مو بكيفه بنت عمي الي ومتصير لغيري
وحتى لو انا عقدت على بنية غيرها
تبقى رهف الي
يعني هو عمي محمد ما يعرف بسالفة الزواج شلون
صار مفاجيء مجنت حاسب حسابه
ليش هو مو كدامه صار الحجي

اخذ سويج السيارة وكام من يم امه
ام قاسم.. ها يمة قاسم وين رايح
.. رايح لبيت عمي محمد واشوف منو الما ينطيني
بنته
امي حجت .. هالة كومي جيبي عباتي
خلي اروح وية اخوج لبيت عمك لا يسوي شي هناك

.. لا ما يحتاج ترحين وياي
انا اروح وحدي واحجي وياهم

.. ميخالف يمة انا هم اريد اروح اشوف مرت عمك واتحمدلها السلامة

شوف نبع الحنان شلون بدلت حجيها
رحت طلقة لبست ملابسي وجبت عباية امي

وباوعت علية .. وانتي شكو بدلتي
.. ها مو اني هماتين اريد اتحمد السلامة لمرت عمو محمد

ضيكت عيونها وهمست
..بسيطة انا اعلمج بعدين

رحنا وية قاسم لبيت عمو محمد
وهناك
شفت بيت عمو كلهم موجودين وهو ولده كاعدين
بالصالة شكلهم عندهم خير بجية قاسم
ومنتظرينه

سلمت عليهم ورحت بست عمو محمد من راسه
ما اهتميت للكاعد يباوع علينا بتكبر اصلا مو جديدة
علية
اتعلمت على نظرات التكبر والغرور من هذا ابن عمي

انتبهت لرهف جانت كاعدة عالدرج ما اجتي
سلمت علينا جانت تبجي وعيونها حمر

التفتت اباوع لقاسم كعد كبال عمو محمد واولاده
انتبهت على نظراته تدور عليها
لحد ما شافها وجمدت نظرته اباوع عليه
عيونه فضحته يباوع عليها بلهفة
هي بس شافته زادت بالبجي

غمض عيونه وسحب نفس عميق
وكلي بصوت ناصي

.. هالة روحي لها وكليلها
خلي تمسح دموعها ولا تبجي
لا تخليني هسة اكوم احرك البيت على راس ابوها وخوانها

اي اني اعرف بقاسم يحب رهف ورهف بالرغم ان هي حامضة ومغرورة
بس كلمة حق تنكال هي تموت على قاسم
ويمكن اكثر منه تحبه

كمت اريد اروح اكوم اكللها

بس امي كرصتني وكالت من بين اسنانها
بصوت ناصي

.. وين رايحة كعدي وانجبي
لا ترحين عوفيها
هي من غير كلشي متخبلة علينا ولازكة بقاسم
مو نوب تكلليها شكال قاسم
حتى ما تكلب دقلة
عوفيها خلي تبجيلها شوية وتسكت

خطية امي الوحيدة الي ما حابة اختيار قاسم لرهف
اتذكر سألتها مرة عن سبب اعتراضها على اختيار قاسم
كالت
.. يمة انا اعرف اخوج وطينته ما توالم طينتها
هو عصبي نار ويكره المسؤلية وما يحب يستقر بمكان
يحتاجله وحدة سباعية وحوك تلمه وتحضنه
بنت عمج ما تفيده
هي ذاك اليوم تبجي علمود انكسر اظفرها
زين الزواج مسؤلية

اذا هي مايصة مو حمل مسؤلية
واخوج حر مثل الطير يكره المسؤلية
شلون ترديهم يفتحون بيت ويكونون عائلة

ومن يومها صرت اراقب رهف وادرس شخصيتها
وفعلا ثبتت بأكثر من موقف ان هي مو كفو لاخوي
بس المشكلة بالموضوع اخوي بحبها
والحب اعمى ما يعرف يصيرلو ما يصير كبل
يجي ويدخل بالكلب بدون استأذان

انتبهت على قاسم يحجي وية عمي
وحجاية منه وحجاية من عمو
وكل اشوية انتبه لابن عمي الزين
وميض كل شوية يعترض على كلام قاسم
بس قاسم ينطيه حجاية تسد حلكه وتخليه ما يندل
حلكه

تالي بالاخير محد كدر على قاسم وهذا طبعه
الي يريده ياخذه لو جان من حلك السبع
عمو محمد كال
.. ما اعرف شنو اكلك تدري بية شكد جنت اتمناك
تصير من قسمة رهف
لان اعرفك كلش زين نجر وما راح تنضام ينتي ببيتك
بس سالفة تتزوج على بنتي وهي تصير الثانية واكفة

جاوبهم قاسم.. عمي كدام عينك صارت السالفة
مالي يد بيها حتى الله وكيلك البنية لا شايفها ولا اعرفها
لاتحاسبني على شي صار خارج ارادتي
ولوما متزوجها جان انهدم كلشي بنيته
وربك الحمدلله تممها علية واستلمت المشروع

.. ادري بيك سبع وما ينخاف عليك
ترة اخبارك كلها توصلني مو عبالك
انت كبرت وراح اخليك تسرح وتمرح لوحدك

حالك من حال عمامك البقية كلكم تحت ناظري
قاسم اخوي اعرفه يتخبل من اسلوب عمي
بس ابو طبع ما يغير طبعه

قاسم بنفاذ صبر
.. ها عمي شنو كلت
محمد.. والله لزمتني من ايدي التوجعني المشكلة
انت رجال ما تنرد
وما اكدر ارد جيتكم انت والوالدة
خاطركم عزيز

هاي هي رهف الك بس بشرط تكمل كليتها يالله
تخطبها وتتزوجها اما هسة فكلشي ما الك يمي

اباوع لقاسم حجة برزانة بصوت خشن
.. هذا هو يجرالك التريده
صيحيح جان يحجي بثكل بس عيونه جانت تلمع بالرضى
انتبهت لرهف ابتسمت بفرح ومسحت عيونها
والكل جان راضي عالقرار الا امي اباوع عليها
ما مقتنعة ودتبتسم من ورة خشمها
المكرودة

.......
شيماء
مرت ثلاث اشهر على حادث هدى وقبل شهر فتحوا الجبس عن رجلها
ودخلتها نادي للعلاج الفيزايائي علمود
يساعدونها عالحركة
جانت بالبداية كوة توكف على رجليها
وبعدها
كامت شوية شوية تخطي
وهسه حالياً صارت تمشي طبيعي
بس بعد معاناة وحرب طاحنة بيني وبين سليمة وبابا

لان بالكوة خلتنا سليمة ادخلها للنادي
وبابا الي جان يصرف على هدى من الفلوس الي انطوها للعلاج
اشوفه يحاول بقدر الامكان
يقلص طلباتها حتى ياخذ الباقي اله

هاي من غير حرب الاعصاب الي عاشتها هدى
بحيث نفسيتها صارت صفر بذيج الايام
وجنت كوة لازمة سليمة لا يزلك السانها بموضوع الزواج
وفوك هذا كله بين فترة وفترة ام قاسم تسأل عن هدى
ودائماً تلمح لي شوكت هذى تعرف بالموضوع

واليوم بعدما اتحسن وضع هدى اتصلت على ام قاسم
وطلبت منها تجي هي وهالة حتى يحجون وياها
بهذا الموضوع

لان اني بعد ما عندي قدرة اخوض هيج موقف وية
هدى كافي المعاناة الي شفتها لحد هسة
اخذت حيلي كله

عالاقل من تحجي وياها ام قاسم
راح تختلف ردت فعلها وتسوي حساب لوجود ام قاسم
وتسيطر على انفعالها وعصبيتها

اندك الباب وسمعت صوت هدى
.. شومة يمكن وصلت هالة وامها
اني غايحة (رايحة) افتح الباب

راحت تمشي على كيفها حتى تفتح الباب
حضرت صينية التقديم
وسمعتها تسلم عليهم هي سليمة. و دخلتهم للهول
شلت الصينية ورحت دخلت وسلمت عليهم

قدمتلهم انتبهت لهالة كاعدة يم هدى
رحت كعدت بصفهم وكعدنا نحجي ونسولف وشوية شوية
بدت ام قاسم تدخل بالموضوع

وجان تذب القنبلة بوجه هدى
وهدى اتشنجت واختفت الابتسامة من وجهها
وانكلب وجها اصفر
وما حسيت الا اختي اغمي عليها بين ايدية

.. يمة عزة بعيني والله هذا الجنت خايفة منه
صرت اضرب على وجهها
ايدي ترجف من الخوف
هالة راحت جابت كلاص ماي
وام قاسم تمسح على وجهها بالماي وتقرة ايات

لحظات وهدى استردت الوعي وصارت ترمش بعيونها
باوعت علية
دايخة سألتها
.. ها هدهد شجاج يا حظي
جاوبتني بسؤال بصوت باهت
.. اكلج شيماء اني ما اعرف شبية
جنت احلم بكابوس على الاساس اني متزوجة قاسم

يتبع

احبكم هواي احبكم كومة
مع تحيات اختكم نهى ♥️♥️♥️♥️