أساور الفضة الفصل الثلاثون 30 - بقلم نهى

مساء الانوار عليكم يا احبتي
🌹🌹🌹🌹🌹🌹🌹🌹🌹🌹🌹🌹🌹

# اساور_الفضة_ج٢
#نهى_الحسون

هالة
وكعت امي كدام عيوننا وقاسم
صاح بصوت مفزوع على امي وركض عليها
.. يوووووم

اني وخواتي صرنا وحدة تدعم بالثانية
كوثر بخوف على امها
.. لك قاسم امي راح تروح من بين ايدينا كلة من وراك
هسة ارتاحيت شلون هيج تصيح عليها

قاسم جان راكع يم امي واهتمامه كله منصوب عليها
يصحي بيها والخوف ماخذ عقله

اني عفتهم رحت ركض جبت قطعة سكر مكعبة وحطيتها جوة لسانها
امي عدها سكر من تعصب وموعد اكلها يفوت ومتاكل وتظل جوعانه
امي يهبط عندها السكر وتكوم ترجف وتدوخ
وهي ماخذه احتياط حاطه يمها دائما قطع سكر تحطها جوة لسانها حتى يصعد عدها
وراسا تاكل بس هي اليوم زعلانه من قاسم متوقعته هيج يصيح عليها
هي عبالها راح يكول ماريد ويتخبل ويطلع من البيت وجابت اخواتي
حتى ليخلوا يطلع وهي تزعل شوية وياه يعني
هويضوج لان متعود عليها وميكدر بلياها
هذا تخطيطها

قاسم شالها وحطها عالسرير ومنى دتمسح على وجهها وكوثر تفرك بصدرها
شوية بدت امي تسترد الوعي تفتح عيونها وترجع تغمضهم دايخة

قاسم صاح على هديل يستعجلها
.. جيبي عباية امي خلي اخذها للمستشفىً
يالله بسرعة اتحركي

امي همست بتعب تحجي وية منى
.. كولي لأخوج ميحتاج ياخذني للمستشفى ما بية شي
اني متعودة على هبوط السكر مو جديدة علية

حجيت خايفة عليها
.. اي يمة صحيح انتي متعودة على هبوط السكر بس جنتي دائما تتلاحكين لروحج وتاخذين حلو مو تعوفين نفسج
وهاي اول مرة تصير عندج حالة اغماء

قاسم كام من مكانه

.. شوفي يمة اخذج للمستشفى لو اعرف اشيلج وحطج بالسيارة بالكوة
اتجه عليها واقترب منها يريد يشيلها

حجت بغيض وية منى .. منى كليله ميحتاج يشيلني ويعرض عضلاته علية
مثل مابين قوة صوته اني اكدر امشي

كامت نبع الحنان بمساعدة منى وكوثر
ولبسوها العباية ومشت على كيف واني ومنى سانداتها
راح قاسم قبلنا وشغل السيارة خطية

جان قاسم مخبوص ما دايقتنع امي مبيها شي
وصلنا للمستشفى ورة فترة بعدما كملنا الفحوصات والتحاليل وشافها الدكتور
كال
.. حجية هاي شنو السكر عندج كلش هابط
شنو ليش هيج ناسية نفسج انتي مو تعرفين عندج سكر المفروض ماخذة احتياطاتج
اكلج منتظم دواج منتظم شلون تاخذين الدوة بدون متاكلبن
الحمدلله مصارت شغله اكبر

باوعلها قاسم بغيض

كمل الدكتور كلامه
وباوع علينا اني وقاسم ووكمل
.. سمعوني زين لازم تنتبهون عليها
ديروا بالكم على اكلها وشربها وحالتها النفسيه

لان اذا جتها الحالة وهي نايمه
متكدر تتحرك وتدخل غيبوبه وتروح بيها
هذا الكلام الج هم حجيه حتى تديرين بالج

باوع لامي وكال
.. حجية لا تستهانين بصحتج هو انتي شنو عندج
حتى تنسين نفسج بالاكل والعلاج

ام قاسم جرت حسرة وحجت وية الدكتور بتعب
.. والله يا يمة شسوي بالصحة اذا هي الدنيا تمشي وياي كلة بالعكس
خلي ربي ياخذ امانته وارتاح

على الاقل ميتة لا عيني التشوف ولا كلبي اليحترك

قاسم بغيض .. يمة شكلج مستعجلة تشوفيني ميت
ابتسم الدكتور
.. صلو عالنبي
والتفت لأم قاسم
.. حجية انتي الخير والبركة
وباوع لقاسم

.. وانت ابو الشباب ما اوصيك هلله هلله بالحجية
شكلك شالع كلبها اريدعينك عليها

قاسم نزل اكتافه بأستسلام وحجة بصوت واهن
.. هاي هي دكتور منا ورايح انا الي راح اكون مسؤل على اكلها وشربها بيدي
وما راح اخليها توصل لهاي المرحلة

حجة الكلمة الاخير بغيض

بعدما خلصوا كل الفحوصات واطمنوا على امهم
قاسم بدت تصرفاته تتغير بالتدريج
وتحول من الخوف والرعب على صحة امه الى
برود وتباعد

طلعنا من المستشفى
وبالطريق نزل اشترة بقلاوة وحجة وية هالة

.. هاج لزمي هاي خليها للحجية حتى تاكلها
قطعتين مو هوايه

هالة
عزة صارت بيها حجية
الله يعلم قاسم على شنو ناوي

وصلنا للبيت ولكينا البنات وجهالهم منتظرين يم الباب
نزل قاسم واجة العم حسنين
يركض
.. الحمدلله على سلامتك ياحگة متشوفيش شر

.. الله يسلمك حسنين
قاسم انطاه سويج السيارة حتى يدخلها والبنات
اخذن امي وكعدن يحضنن بيها عبالك جانت مسافرة
وجهالهم نفس الحالة
يقلدون امهاتهم يحضنون بأم قاسم

ام قاسم.. كل شوية وحدة عاصرتني بحضنها شبيكم
ترة ما بية شي هياتني كدامكم ما متت

كوثر تمسح بدموعها.. يمة والله وكعتي كلبنا عليج
منى.. يارب تنذكر ما تنعاد

دخلنا من باب المطبخ وفتنا عالصالة
والبنات لازمات ايد امي

منى.. يمة تعالي ارتاحي بغرفتج
اتوجهنا كلنا نريد ندخل للغرفة

وكفنا صوت قاسم
.. بنات لحظة قبل لا تدخلون الحجية لغرفتها
عندي كلام واريد الكل يسمعه

التفتنا باوعنا عليه ورجعنا للصالة وامي كعدت على اقرب قنفة عليها

وبقوا البنات واكفات والجهال ديلعبون برة وباقية بس بنت منى دتزحف بالكاع
واكف مثل الجبل وجهه ما يكصه السيف
حجة بكل برود موجه كلامه لأمه

.. شوفي حجية الي صار اليوم علمني درس
وخلاني اعيد حساباتي وياج الف مرة
ما جنت اضن بيوم
هيج روحي عندج هينة وانتي اليوم لزمتيني من ايدي التوجعني

هذا هو حجية خلاص يجرالج التردينه
راح اتصل على عمامي يسوون حسابهم
على يوم الجمعة الخطبة والزواج ورة اسبوعين

بس يكون بمعلومج بعدني على نفس حجايتي
بنت عمي محمد تبقى الي واتزوجها لو جان اخر يوم بحياتي

ام قاسم بقت صامدة وابد ما لانت حتى بعد ما
سمعت موافقته عالزواج جانت صادة وجهها عنه

البنات جروا انفاسهم براحة
وهالة انشك الحلك وكوثر كامت باست كتف قاسم

كوثر.. الله يخليك النة ويفرحك مثلما تفرحنا

منى.. قسومي الف مبروك

باوع عليهن ببرود ودار وجهه وخلة وطلع

وام قاسم رجعت راسها على ورة وتجته عالقنفة وغمضت عيونها براحة
وجهة بدة يسترد لونه
رجعت فتحت عيونها وباوعت لبناتها

كوثر.. دخيل الله شكد عنودي
منى.. يالله على الاقل كدرنا ناخذ منه الموافقة
هالة .. شوف هذني والله بطرانات ولكم جنكم نسيتوا قاسم اخوكم
كلشي ولا واحد يغصبه على شي

ام قاسم بصوت تعبان .. منى يمة تعالي اخذيني لغرفتي
اريد ارتاح

...........
شيماء ..
اليوم المستشفى خبصة ولان جايين وفد من الخارج
يردون يشرفون على المستشفى والتجهيزات الطبية

انتبهت على نفس الرجال ديمشي ويحجي وياهم

ما انتبه علية من فاتوا من يمي بس اني ما ادري شبية

من اشوفه اوكف متصنمة بمكاني صحيت من صفنتي
ورتبت نفسي وعدلت الصدرية البيضة مالتي
ورحت اكمل المناوبة

احلى شي بهذا الدوام الجديد ان اني صرت اكثر اتصال وية رباب

يعني الاخت كل شوية الكاهة فوك راسي
اضافة الى مغامرات الولادة والنسوان عالم مستحيل
تحس بالملل او الروتين كل يوم نسمع حدث او خبر
غريب عجيب
ورة ساعتين
جنت دا اعلك المغذي للمرية حامل هابط عندها الضغط
واجتني رباب مستعجلة
صاحتني مبين عندها شي
رحت يمها .. ها خيرج رباب

رباب باوعت منا ومنا وحجت بصوت ناصي
.. شوفي شيماء هسة تعوفين الي بيدج وتجين وياي
.. اجي وياج على وين
.. لج حصلتلج على فرصة الا بشدة

.. هسة هي غير تحجي شنو الموضوع
رباب.. انا اكلج شوفي حبيبة صاحبنا الشخصية
عقدت حواجبي اريد اعرف تقصد منو اشو احنا كل يوم كاصات واحد بالحجي
.. منو ابو الشخصية

.. خاب امداني لج هذا الي اندعمتي انتي وياه
.. هاااااا اي عرفته هذا قبل ساعتين شفته عدة منا
جان يحجي وية الوفد المهم شبي

.. شوفي خية اريدج تفتحين اذاناتج عدل
الرجال قبل شوية اجة هو والمرية الجبيرة نفسها الي جانت البارحة وياه ودخلوا بقسم النسائية والدكتورة
كلفت ميادة العوبة تساعدهم حتى يجرون الفحوصات
والتحاليل

.. اي وشنو ما افتهمت من هذا كله انتي شتردين مني اسوي

.. لج عوبة انا ما انتظرج تسوين لان ادري بيج فاهية
اني من يمي اتصرفت ورحت زحلكت ميادة العوبة بشغلة ثانية. وكالت ما اكدر اروح
عندي شغل كلتلها ما عليج انا اخذ مكانج

وهي بالكوة يالله وافقت تروح شكلها الاخت حاطة عينها
على صاحبنا كطيعة

.. هسة المطلوب شنو
.. اريدج هسة تتلحلحين وتاخذين مكان ميادة
وترحين يم صاحبنا وتحجين وياه ووية امه مدري شنو تعودله
المهم اني دبرتلج اول فرصة لقاء

بعد الباقي عليج ما اوصيج اريد كون اسمع اخبار حلوة كون الرجال ينزرع هنا

اجتي تروح وتتركني لزمتها من زندها
.. شنو شنو تعالي وين رايحة منو كلج تسوين هيج
شكد عيب والله زحمة
لج رباب العوبة هسة الي يسمعج شيكول علية
كاتلة روحها عليه
باوعتلي بطرف عينها ورفعت حاجبها

.. يعني شنو افتهم من كلامج ما راح ترحين
جاوبتها مترددة .. لا استحي ما اروح مبينة الشغلة
اني دا ازحف عالرجال لا لا رباب كرامتي متسمحلي
انزل نفسي

.. شوف العوبة راح تضيع الرجال من بين ايدينا
خلاص مو لازم لا ترحين خلي ميادة العوبة
تاخذ راحتها بالعافية عليها
وانتي ظلي ابقي هنا وية كرامتج

دارت وجهها ومشت من كدامي
حسيت بالتهديد ما اعرف ليش عبالك داخلة بسباق
حجيت بدون ما احس على نفسي

.. لحظة رباب اوكفي
اتوقفت بمكانها جانت حاطة ايديها بجيوب الصدرية البيضة باوعت علية وهي مبتسمة
.. شكو شتردين خلي الحك على ميادة قبل لا تطلع
ترجع تاخذ مكانها

.. لا لا ميحتاج ترجعيها
اني راح اخذ مكانها
ضحكت بأنتصار

.. رباب لا تفتهمين الموضوع غلط مو عبالج اني كاتلة روحي عليه بس راح اروح لخاطرج ما ردت اضيع تعبج على الفاضي
بس ها من هسة اكلج لا تتوقعين تسمعين مني
اخبار حلوة لان مستحيل افرض نفسي لو احاول احجي وياه

.. عمي كلشي ما نريد منج بس السلام

دلتني على مكانهم ورحت سلمت على المرية ورفعت راسي سلمت عليه جان مشغول يحجي بنقاله

رفع ايده بحركة يرد السلام بدون اهتمام وكأنما ديسلم عالبواب مالته
عمة حتى عمة عابتله
استغفر الله هسة اني شبية بكل عقلي احجي هسة اني شنو عرفت عنه حتى اهتم بيه وبتفاصيله
بس شكلها خبالات رباب عدتني وخلتني انسى روحي

بعدها حطيت صينية الادوات الطبية القطن والديتول وغيرها والتهيت وية المرية الجبيرة وبلشت وياها بسحب الدم وبعدها جيكت الضغط واخذتها للمختبر

حتى نكمل سحب العينات البقية وهو بقى بنفس الغرفة ما اجة ويانة كال انتظركم هنا وكمل اتصالاته الي ما انقطعت من دخلت لحد ما طلعت

عباتله شلون ابن هذا يترك امه لوحدها
تكمل الفحوصات

ورة ساعتين ونص كعدت اساعد الحجية اعدل حجابها
وانزل ردن الثوب مالتها
ورجعتها على نفس الغرفة وبيدي اوراق التحاليل الي طلعت استلمتهم وخليتهم بالفايل مالتها

لكيته على نفس وضعه ديحجي بالنقال مندمج وهاي المرة
حاط كدامه ورقة وقلم ودايكتب معلومات بالورقة
مندمج باوعت عليه
خلي تجي ست رباب وتشوف بعينها
الاستاذ اصلا فاصل عن العالم

ما عبالك بشر يمه مندمج بالاتصالات

درت وجهي على المرية وساعدتها تمدد عالسرير وكعدت تندعيلي
الحجية.. يايمة الله يبارك بيج ويترس حضنج بالولد الصالح

ابسمتلها وكلتلها
.. ههه خالة بالاول خلي اتزوج وبعدين اخلف الولد الصالح
ابتسمت وكالت.. يا يمة هذا الجمال كله وما متزوجة
لعد الرياجيل يمكن عميان

صاروا خدودي حمر .. اشكرج خالة عيونج الحلوات
جنت احجي وياها واني اعدل وضع السرير

سالتني .. شعجب يمة ضالة لحد هسة بدون زواج
.. حجية كلشي قسمة ونصيب واني بالاول جنت ارفض علمود امي اتوفت وعندي خوات صغار
انشغلت بيهم ونسيت نفسي

وفعلا نسيت نفسي وكعدت احجي وية المرية وهي تسألني واني اجاوبها متناسية
وجود الرجال

فتحت الجرجف وغطيتها بي وركبت المغذي
بالكانولة الموجودة بيدها
الحجية.. الله يحفظج لشبابج يخالة

.. تسلمين خالة ويخليج ابنج
جنت اقصد على هذا الاخ الفاصل عن العالم
اي صدك هذا وينه اشو ماله صوت التفتت
لكيته كاعد عالكرسي الوراي ويباوع علينا اني والحجية

اجتي عيني بعينه واتصنمت بمكاني
باوع علية وهالمرة عبالك يشوفني اول مرة
يباوع علية عبالك يريد يخترقني بنظراته
وبيهم اهتمام من نوع ثاني اي اني اعرف هاي النظرة

دنكت وهو حس على روحه وكام من الكرسي واستأذن من عدنا وطلع وكال فد شوية وارجع

عزة هذا من شوكت خلص اتصالاته وكاعد يستمع
لايكون سمع كلامنا اني والحجية شكد عيب والله زحمة

كعدت اراجع كلامي وية المرية خاف حجيت بكلام زايد منا منا

انتبهت على الحجية كالت
.. لا خالة هذا مو ابني
عقدت حواجبي وباوعت عليها
.. شلون يعني ما افتهمت لعد شنو يعودلج

.. ما يعودلي يصير ابن جارتي وصديقتي
الله يرحمها ويطيب روحها الجنة على هالتربية
تدرين انا لو رعاية الله وحيدر جان هسة انا الله اليعلم شنو حالي

اهاااا يعني الاخ طلع اسمه حيدر حلو
كملت المرية كلامها

اني مرة عايشة لوحدي وما عندي احد يساعدني
ويشوف احتياجاتي عندي اثنين بنات
و بناتي متزوجات مسافرات للخارج ووعدني يسحبوني وراهم بس اشو طالت المدة وما بين منهم خبر
وخطية حيدر الله يبارك بي هو وكم واحد من الخيرين الي بالمنطقة اتعاونوا

يساعدوني ويشوفوني شنو احتاج بين فترة وفترة
الحمدلله ربج ما يترك عبده
هو مدبر الامور

واني اسم الله عليج خالة باخر فترة صحتي كلش انتكست وخطية حيدر اتكفل بية وبعلاجي
وكلي اخذج وياي للمستشفى عندي اصدقاء دكاترة
وهمة راح يشرفون على وضعج ويجيكون صحتج

سألتها والفضول يقرة عندي الف
.. هو شنو يشتغل
اني ما شايفته بالمستشفى قبل بس مرتين

.. والله خالة ما اعرف شنو اسم شغله
بس الي اعرفه ان هو يمول المستشفيات وعيادات الدكاترة بالتجهيزات الطبية

قطع علينا الكلام دخول حيدر
اقترب من الحجية وحجة بصوت عذب
.. خالة عذريني انشغلت عنج بس انتي تعرفين الشغل ما ينتظر ما يعرف مريض

.. لا يمة انعم الله عليك انت ما قصرت بيمن اجازيك
روح يمة الله ينور طريقك ويبعد عنك اولاد الحرام

ابتسم الهة وبان بعيونه الحنان
عزة طلع الاخ عنده مشاعر مو بارد مثلما جنت متوقعة
.. تسلمين حجية هذا دعاءج الحلو يكفيني

خامة صوته تسحر رفعت عيوني ووكعت نظراتي على تفاحة ادم البارزة بركبته من يحجي تتحرك
جريت حسرة بدون ما انتبه على نفسي
ورفعت نظراتي وجان اشوفه يراقبني

رفع حاجبه ونظرة عيونه تسألني على شنو تباوعين

يبوووو عزة بعيني لا اني اليوم ابد مو طبيعية
هاي شكو شجاني اني شبية اشو نسيت احترامي لنفسي
وصرت اتصرف مثل المراهقات

الله يلعن بليسج يا رباب شخليتي ببالي هسة اني وين ووين هاي السوالف اتلاحكت لروحي

ورفعت راسي وباوعت على المرية وعدلت خصلة من شعري وحطيتها ورة اذني

حطيت فايل الفحوصات عالميز وحجيت
.. خالة هسة انتي خلصتي جميع الفحوصات
وباجر من تجين تراجعين عند الدكتورة
ضروري تجيبيهم وياج
جنت احجي وياها
وحطيت الغراض الي عالميز من ابر ومعقم وكلشي
جنت اشتغل بدون انتباه

.. صار خالة كون اتذكر واجيبهم
حجة من وراي جان صوته كلش قريب

.. انا راح اخذ الفايل وياي وابقيه بسيارتي
حتى اضمن ما تنسيهم

كلبي كام يدك حيل
ادري هسة اني شبية هيج متأثرة بي. وبحركاته
خلي اطلع واستر على روحي قبل لا اسوي شي تالي اتندم عليه
استأذنت من عندهم وشلت الصينية الي بيها الادوات
وطلعت

حسيت بنظراته وترتني وقربه مني نرفزني
جنت امشي واني ادردم بيني وبين نفسي

سمعت صوته وراي يصيحني
.. شت شيماء لحظة انتظري

عقدت حواجبي وغمضت عيوني هذا شيريد مني
اقترب مني وهو يبتسم
.. شنو شبيج اصيح عليج متسمعيني
شكو الماخذ عقلج يتهنا بي
اوكفي بس شوية احجي وياج

اقترب مني
.. ممكن تنطيني

باوعت عليه مصدومة
شو هذا يحجي وياي بميانة
وبسرعة دك جرس عندي وعقلي حلل تصرفة
على انه ديحاول يتوددلي بأسلوب ملتوي افتهمت لعبته القذرة يعني يبيع ثكل كدام الكل ويبين كدامهم هو ما يهتم الي وتالي يجيني
من وراهم بالخفاء يطلب رقمي حتى يبدي يكون وياي علاقة
هواي شفت حالات من هذا النوع صارت وية زميلاتي
وغيرهم من البنات

جاوبته بنترة عصبية قريبة للصوت العالي
.. شكو شتريد انطيك
باوع علية متردد
.. انطيني الصينية ام تقى كالت شافتج حطيتي
مفاتيح السيارة بالصينية وية الغراض

اتسعت عيوني بشهكة وحطيت ايدي على حلكي من الفشلة ما اعرف وين اودي وجهي

مديت الصينية كدامه جانت مستطيلة مقسمة لعدة
خانات باوعت عليه مد ايده وكعد يكلب بالقطن الغراض جانت مو هواي شغلات وانتبهت على المفاتيح وية المقص وجهي كام ينطي الوان صار اشارة مرور

اتمنيت اضرب روحي جلاق من ورة غبائي
والفشلة عمة العماني شكد ثولة

.. اسفة صدكني ما انتبهت عليهم
جاوبني بكل هدوء وعيونه بعدها تباوع علية بتمعن
.. لا عادي مصار شي شغلة بسيطة ميحتاجلها تعتذرين
بس خطية رحمي خدودج صاروا حمر نار
من الاحراج

جان يحجي وعيونه على خدودي
رفعت ايدي واتلمست خدي جان حار عبالك صخنت
.. احم شكرا
وبعدها ما انطيته مجال يحجي كبل درت وجهي
ومشيت بأسرع ما عندي اريد بس ابتعد عنه

عززززززة هذا يكلي خدودج حمرة
يمة جان كلبي يركص مدري ينبض

رحت رجعت الغراض لمكانهم وما شفت رباب
واجتني العاملة المنظفة ام سامر
سألتني
.. اكلج خالة شيماء قبل شوية اجوي اثنين رياجيل
سألوني عن اسمج كالو شيماء اثير وينها

وانتي جنتي واكفة وية مرية جبيرة
اشرتلهم عليج كلتلهم ذيج هي
شنو ما اجوج

.. لا والله خالة محد اجاني
.. لعد شفتهم راحو بأتجاهج عبالي راحوا يحجون وياج

.. لا ماكو ما اجوي
ما كلولج شنو اسمهم او خاف موضفين هنا ممرضين
.. لا لا خالة شالقضية تعلميني بموظفينا
اعرفهم واحد واحد

ابتسمت على كلامها اعرفها ام سامر اكبر حشرية
وهسة هي راح يكتلها الفضول تريد تعرف هذولي منين
ومنو وليش سألوا عني

واني هم مثلها اريد اعرف منو هذولي

...................

هدى
ستوني راجعة من الكلية تعبانة
بدلت وخلصت ورحت بالمطبخ
واتلكتني ضحى
.. حضري روحج ياحلوة ما بقة على خطوبتج شي
غير بس ٣ ايام

.. اي وشنو يعني شتغديني (شترديني)اسوي اغكص (اركص)
.. لج ثولة بطلي عناد ترة هم يالله تجهزين نفسج
.. اني ما علية شيماء كالت عكب باجغ (باجر) اخذ اجازة
حتى اتفغغلج (اتفرغلج) واخذج للسوك واجهزج

.. اي مبارك الله ينطي شيماء دتفكر عنج
والا انتي لو عليج مستعدة تطلعيلهم بالمهر بالبجامة

.. ضحى اتمنى املك فهاوتج وغبائج
جان هسة اني مو هذا حالي جان تلكيني عايشة بنعيم
ما اشيل هم ولا اخاف من اي شي

.. شنو شبيج هدى رحمة الله من عادها انتي كل يومية هاي القوانة ما اريدة وما اريدة
يابة استسلمي واخذي الامور على ما هي عليه
هاي هي قسمتج اتقبليها

.. هو اني المشكلة احس بنفسي ضايعة وخايفة
مع انه اني اعرف شنو ينتظغني (ينتظرني)
والجاي اسوء والمفغوض (المفروض) اكون قوية
ومستعدة

بس مو بيدي غصب عني من توصل السالفة لقاسم
مجغد (مجرد) اكعد اتخيل غوحي (روحي)واكفة كدامه
ما اعغف (مااعرف) جسمي شبي يكوم يغجف (يرجف) مثل السعفة

اقتربت ضحى مني واخذتني لحضنها
.. حبيبتي لتخافين ان شاء الله يكون قاسم عكس كل توقعاتج عنه ويعاملج بحنية

.. هو من وغة (ورة) سواية ابوج وياه
بقة بيها حنية
اكيد هسة الكة استاذ قاسموف حاد سنونه
الله وكيلج اول ما يستفغد (يستفرد) بية
كبل لو يكتلني اوياكلني
هي وحدة من الثنين ما تقبل غلط

صبيتلي غدة وكعدت اكل واندك الباب
ضحى.. اكيد هاي شيماء هسة وكت جيتها

وطلعت تشوف منو
واني نزلت عالاكل فرد نزلة جنت كلش جوعانة
شوية ودخلت ضحى وجهة مخطوف لونه
ودخلت وراها ام فرزدق
فرحت بشوفتها
تركت الخاشوكة وكمت من مكاني
سلمت عليها
واني اباوع على ضحى الي حاطة ايدها على كلبها

ام فرزدق.. هلة وكل الهلا بعروستنا الحلوة
يمة هداوي كبرت وصارت عروسة

اختفت ابتسامتي ومغصتني بطني من جابت طاري العرس خرب شنو السالفة
اليوم الكل متعاونين يذكروني بفاتحتي

دنكت ومجاوبتها
اندك الباب مرة اللخ وراحت ضحى تفتح الباب شوية ودخلت شيماء وسلمت علينا

شيماء.. خالة والله مشتاقتلج
.. تشتاقلج العافية حبيبتي كون مشتاقتلي صدك
هذاك هو بيتنا ما يتيه وتعالي يمي شدعوة
يعني لو انا الي اجي واسأل لو محد منكم تحن علية
وانا حيلي مو مثل الاول صارت الطلعة علية كلفة

.. حقج علينا خالة والله ادري احنا مقصرين وياج
بس الدنيا شغلتنا وماكو مجال نشوف دربنا
من الركضة

.. الله يساعدج حبيبة ادري بيج شومة كلة براسج
وكعدنا نحجي ونتبادل الاخبار وشافت وجه ضحى وكالت هذا منو ضاربج على عينج ومزوركها هيج

جاوبتها شيماء
.. يا خالة هاي زين لو جايتنا قبل يومين جان ماعرفتيها
من ورة الورم والزراك
.. ليش منو مسوي بيها هيج
.. خالة اكو غير هذا العار زوجها

باوعتلها ام فرزدق وكالت
.. الله يكسر ايده هالحيوان النذل الا اخلي عمج ابو فرزدق يطيح حظه
بسيطة

شوف الحظ لهيتوني بالسوالف و راح تنسوني
انا عليمن اجيت
خطية هاي ام قاسم اتخربطت صحتها
واتصلت علية وكالت روحي للبنات بمكاني وشوفيهم شنو يحتاجون

كلتلها ما يحتاج توصين حريص
وهي هذا وليدها الوحيد فتشوفين خطية مخبوصة رغم مريضة بس
ما كاعدة دازة عالعمال تريد تسوي تجديد للبيت وصبغ
تكول قاسم مستعجل عالعرس

يمة هي كالت مستعجل واني عظيت الساني من
الرهبة
دخلت سليمة وعبايتها على راسها
وشافت ام فرزدق وسلمت عليها

وكعدن دك سوالف بخصوص العرس
وسليمة عبالك هي العروس كل شوية تطلب طلب من
ام فرزدق

اخير شي ختمتها وكالت لأم فرزدق
سليمة .. اكول حبيبة احنا متعودين بتقاليدنا
اهل الولد يكصون قطع قماش لكل حبايب العروسة
ويهدونها اشو ام قاسم لحد هسة مجابتلنا شي اني
حبوبتها لهدى وهذني خواتها

شيماء بأحراج
.. هههههه والله يا بيبي عليج سوالف ان شاء الله احنا وبيت ام قاسم اهل وما بينا هاي الرسميات

سليمة.. لا حبيبة هذا يسمونه تقدير قابل احنا معوقين على قطعة القماش بس هيج الاصول تكول

باوعت عليها واني اتمنى اثرمها بسنوني
حجيت يم ضحى
.. ينعل ابو الاصول الي تعغفها (تعرفها) سليمة
لا تفشلنا والله اذا ما سكتت اغوح (اروح)اكوم اخنكها والله
هو اني بلا كلشي عقلي فاصل

ونوب سليمة وسوالفها تجملني حتى كلش تكمل السبحة

شوية ودك نقال ام فرزدق وحجت
.. ها جدة صهيب ها راح تجي علية
يالله خوش انا انتظرك

.. ها شنو
يااااا معقولة ماعرفتها منو هاي

باوعت لضحى
لك صهيب هاي ضحى
اي خطية هذا زوجها الناقص ضاربها ومزورك وجها

شوية وسمعت ام فرزدق
.. ها جدة اسم الله شبيك صهيب شجاك

..لعد بيبي دير بالك وانت تسوق لاتدعم
يالله انا انتظرك
سدت النقال
باوعت على ضحى شلون العيون انملت دموع
وحجت ام فرزدق

.. هذا خطية صهيب سألني وكال منو هاي الي طلعت وفتحتلنا الباب وعينها مزوركة
بس خطية وكع كلبي وانا احجي وياه سمعت صوت
عالي مال سيارة

سليمة .. الله يحفظهم هالشباب طايرين بهالسياقة
ما اعرف على شنو مستعجلين
جانت ام فرزدق تحجي وية سليمة
على نياتها وغافلة عن الكلوب الملجومة
مثل الي يرش الملح عالجرح من غير ما يعرف
بصاحب الجرح مجروح

اعرف ام فرزدق مرة من اهل الله
بسرعة تنسى وبكل ضنها ان سالفة صهيب وضحى
انست من اتزوجت وهاي هي خلاص

نست ما الحب الا للحبيب الاولي وصعب نسيانه
عرفت من خلال كلام ام فرزدق
ان صهيب رغم الي صار ورغم قساوته

بعده على عهده الاولي
سليمة حجت
.. اي صدك انتوا ما ناوين تزوجونه
اشو شهادة واخذها وبعد شنو ينتظر

ام فرزدق .. والله يا حبيبة جاي اندورله على بنت الحلال بس هو الله يحفظه كلش صعب بس البارحة
اجانة وكال اريدكم تخطبولي وحدة اخت صديقه
شافهة بالكلية وعاجبته
انتبهت لضحى حطت ايدها على حلكها وكامت من مكانها بسرعة قبل لا تفضح نفسها ويحسون عليها

كملت ام فرزدق كلامها
.. اندعيله بلكي الله يكتبها من نصيبة
سليمة .. ان شاء الله البي خير يقدمه رب العالمين

بعدها طلعت ام فرزدق واتفقت وية سليمة تدز عمال
يعلكون اضوية وينصبون الكراسي
للشارع يم بيت عمو امجد تكول خاف ناسهم هواي وماكو مجال بالاستقبال نكعدهم برة

سليمة تحب تستفاد لحد اخر لحظة
خلص اليوم وسليمة كل شوية تسأل ضحى
.. اكلج انتي شنو سالفتج صارلج فوك السنة من اتزوجتي ما صار عندج حمل منا منا

جاوبتها ضحى بدون خلك
.. كلشي ماكو على حطت ايدج
.. عزة بس لا عاقر وما تحبلين
ويشمرج علية سويف
ولج يالغبرة راجعي دكتورة خلي تشوف شنو علتج
حتى تربطين رجلج بالخلفة

ضحى.. اخر همي اقوي ارتباطي بي والله يسوي فضل اذا طلكني

يمة هي كالت هيج وسلمية كامت عليها
.. شنو شنو حبوبة عيدي شكلتي

لست ضحاوي تتشرط هي بس هاي العايزة تتطلكين
شوفي ولج وسمعيني زين هاي كدام خواتج
بس يجي رجلج ترجعين وياه ماكو

اطردج انتي وابوج وخواتج من البيت
ترة اني وصل حدي متكوليلي اني شمحصلة منكم انتوا
وابوكم
غير بس وجع الكلب والمصايب اني ما اعول ازوجكم
افتك منجن تجي المحروسة تتأمر

كامت ضحى من كدام سليمة بدون متحجي اي شي
باوعت لشيماء وكلتلها

.. شيماء احجيلج كلمة وياها لا والله ارتكب بيها
جريمة وادخل للسجن من وراها
.. شحجي واحنا مالنة حق نحجي
لان هذا صدك بيتها وهي مسوية براسنا فضل ومكعدتنا
وياها وسوالف ابوج التعبانة تنطق الحجر وتفك الحديد

جان كلام شيماء صحيح
رفعت راسي للسماء اطلب الصبر
الواحد شكد يكدر يتحمل ويبقى صامد
حتى يحمي اعز ناسه
لا بد وان يجي اليوم الي يشوف
بي اعز ناسه يعاني كدام عينه وهو واكف بلاحول ولا قوة ما بيده يسوي شي

لليل فرشنا اتمددنا عالفراش واتصل بابا على شيماء يسألها
.. خوما اجتكم هاي مهرة مرة ثانية
شيماء جاوبته
.. ما اجتي اليوم
.. همزين انا باجر اجي واحل الموضوع وياها

انهى الاتصال
وباوعت لشيماء
.. متكليلي هذا ابوج وين مسافر
.. والله علمي علمج اسأله عن مكانه يكلي مو شغلج
شتسوين بمكاني
يعني هي مهرة بكبرها مكدرت على ابوج
على كولتها
(اني مهرة محد يكدر يندك بية )
تردين مني اني شيماء اكدر على ابونا
ضحكت عبى شكل شيماء شلون تقلد حجي مهرة

قطع حديثنا صوت نقال شيماء
.. هاي شنو اليوم الاتصال العالمي
اشرتلي شيماء
.. اش سكتي هاي خالة ام قاسم عدلت كعدتها
واني حبست الانفاس

ردت شيماء عالاتصال وسلمت عليها وبعد
اسمع شيماء بس تكول اي واي
واي وان شاء الله وهلا بيكم
وبعدها سدت النقال وباوعت علية وكالت

.. ام قاسم تكول باجر العصر راح نجي اني وقاسم وهالة كولي لهدى تجهز نفسها حتى تطلع ويانا
نشتري حلقات وباقي الذهب

جانت شيماء تحجي واني بهت لوني يعني شنو
صارت صدك يعني باجر اشوف قاسم

صحت بصوت خايفة
.. يمةةةةةةةةةةةة
اقتربت من شيماء وضميت راسي بحضنها خايفة
اطلب منها الامان اريد اختل جوة ظلوعها
بس هذا الشي مستحيل
من اين المفر
نمت بدون ما احس على روحي

يوم ثاني الصبح كعدتني شيماء جانت لابسة ملابس
جديدة وموديلهم ولونهم كلش حلو

فركت عيوني بنعاس
.. هدى صحصحي وياي اليوم لا ترحين للكلية
كعدي بالبيت جهزي روحج خاف يغيرون رأيهم ويجون من وكت على الاقل انتي ما تكونين تعبانة من الدوام

.. خرب يومج شيماء اكو واحد يكعد بشر من عز نومته ويخرعه بهيج خبر

ماتكولين هاي اختي خطية
شيماء ببتسامة والوجه وردي
والعيون تلمع
.. والله انتي مخبلة مو عاقلة
ضيكت عيوني
.. اكول شومة شنو سر هاي الكشخة والجمال
منو ورة هذا كله

.. كامت من يمي وراحت تعدل شعرها بالمرايا
قبل لا تطلع
كالت.. لا يروح تفكيرج بعيد اني لابسة هيج
علمود اليوم راح يزورنا وفد للمستشفى ولازم كلنا نطلع بصورة مرتبة

رفعت حاجبي بشك
طلعت وسدت الباب
.. اكص ايدي اذا ما طلع ورة هذا التغير شي كبير

التهيت اليوم ضحى حصرتني وكالت لازم احف شواربج عيب شيكولون عليج
صدكيني الولد بس يشوف شواربج
ينهزم من الباب
.. عادي خلي ينهزم وهو المطلوب

لزمتني حجاية منها وحجاية مني اكلت راسي بالحجي
لحد ما استسلمت ووافقت تحفني

بس مو حفافة شوارب خرب عبالك تعذيب
نتل نتل
كل شوية اصرخ وطلعت روحي لحد ما خلصت شواربي يمة تموت

وبعدها كعدت تختارلي ملابس وكل شوية تطلع قطعة من ملابسي وتكعد تدردم

ملابسج مال بنات صغار كلهم كاجول مو مناسبات
لهاي الطلعة
وسليمة اليوم كعدت راسها يوجعها
شادته عصابة وكل شوية صاحت سويلي جاي
حتى غدة ما اتغدت
الله يساعدها من كد الفرة والكركة بالمنطقة

الظهر الساعة ب٣ونص
اندك الباب بكل قوة عبالك دخلو علينا مداهمة
رحت فتحت الباب ولكيت بابا
دخل للبيت ووجهه مدخن
سالني مستعجل وهو يباوع داخل البيت

.. شيماء اختج رجعت للبيت لو بعدها
جاوبته مستغربة .. لا بعدها. ما رجعت هسة هي على جية
ليش شنو صاير

يتبع

اتمنى لكم قراءة ممتعة
احبكم كومة احبكم هواي
اختكم نهى☺️☺️☺️☺️☺️☺️☺️☺️☺️