أساور الفضة الفصل الحادي وثلاثون 31 - بقلم نهى

مساء الانوار عليكم احبتي اعتذر عن التأخير
طبعا تم كتابة البارت في عيادة الدكتور
والبارت لم يخضع للتصحيح ارجو ان تتغاضوا
عن السحكات
🌹🌹

#اساور_الفضة_ج٢
#نهى_الحسون

شيماء
طلعت من البيت بعدما نبهت على هدى متداوم اليوم
واتهربت من سؤالها الفضولي عن سبب كشختي

اليوم كعدت من وكت حتى احضر نفسي للدوام
واتذكرت نصائح رباب بخصوص
اهتمامي بنفسي حتى الفت الانتباه

ضحكت على كلامها من تكول
.. وداعتج الا ازوجج على ايدي
جاوبتها .. متزوجين روحج بالاول جاية علية اني شكو

..لا حبيبتي اني ضامنة عريس الغفلة
ابن خالو جمعة هو الي راح يتورط بية

ضحكت.. لعد وينه اشو ماكو لحد هسة شنو ينتظر شكله مغلس ميريد يتزوج
.. اي ياعيني تسوين نفسج متعرفين
غير نكون نفسنا شوية شوية
اني وياه متفقين منتزوج ببيت اهله

وكلي هذا يحتاج وقت علما اكدر احطلج بيت لوحدج
اني كلتله مو الا ببيت ملك حتى لو تإجر
وابوه سمع بينا نريد نأجر كله علمن تأجر هاي الحديقة كدامك شكبرها وابني بيها مشتمل الك ولمرتك

جانت تحجي واني اضحك حفظتها للقوانة اليومية مال رباب واني كملت كلامها بدل عنها
.. وهاي اني كدامج دا اسوي سلف وارجع ليورة علمود
نبني المشتمل

رباب تكلب بعيونها .. شنو عوبة تضحكين علية
.. لج ما بقى احد بالمستشفى ميعرف رباب تسوي سلف حتى تبني وتتزوج

جنت دائما استفز رباب بسالفة الزواج خصوصا من تبدي تحوم فوك راسي عالزواج لان الله يحفظها كل فترة جاية وجايبتلي عريس تعبان
واني من اذكرها بزواجها تنسى السالفة وتكعد تحجي لي المقتل الي حفظته على ظهر قلب

رباب.. شوف العوبة تريد تنسيني الموضوع
سمعيني زين ولا تظلين فاهية ترة العرسان ديتبخرون بالجو وبخيتة الي تحصل عريس

.. اني ما اريد اتزوج خلي العرسان الج
..خاب شوف هاي العوبة مصدكة روحها
لج هو وينهم العرسان حتى كاعدة تتبطرين
بالله ما تسكتين ضلي انتي ابقى بمكانج مثل السليمة

ضحكت.. رجاءاً بلا تجاوز ترة سليمة بيبتي العزيزة

انتبهت لروحي واكفة لوحدي دا اضحك
وفاتحة الكنتور وصافنة عليه
.. عزة والله راح اتأخر على هالحسبة
طلعت ملابس جنت مشتريتهم بس ما لابستهم كلت
البسهم لمهر لهدى بس من ورة ملحة رباب قررت البسهم
لبست قميص لونه وردي مطفي ولبست وياه بنطلون رصاصي وضفت فوك القميص يلك واعدل
بيهم وفتحت شعري ونزلته هو سرح ميحتاج اسويله شي واصل لحد اكتافي
كملت وسلمت على ضحاوي ووصيتها على هدى
وطلعت

وصلت للمستشفى
جنت مستحية ادخل لان مبين علية التغيير
وفعلا اول ما دخلت بدت نظرات الاعجاب تلاحقني
اولهم حراس البوابة

جنت امشي وخدودي حمر كملت طريقي لغرفة
الممرضات واخذت الصدرية البيضة الخاصة بالممرضات لاحظت نظراتهن المستغربة

بس سويت نفسي ممنتبهة عليهن
خرب هسة اني شبية سمعت كلام هاي العوبة رباب

اي صدك هاي وينها اشو ماكو
فجاءة طلعت كدامي
رباب .. هاي شنو منورة اليوم شومة هلة هلة
حركات ياحلوة حركات

حجيت من بين اسناني
.. سمتي ولج اتندمت سمعت كلامج
لان كل العيون تبحلك بية مستغربين
احس بروحي مبينة عندي شي ورة هذا تغييري

.. وهو المطلوب هو انا المن دا احجي والح عليج
تغيرين من مظهرج علمود اريدج تلفتين الانتباه

.. والله استحي
.. خلي عندج ثقة بنفسج
لا تصيرين عوبة كلش لج مو شلعتي كلبي
شوية ساعديني وخلي هذا النايم يصحى ويلحك على نفسه

جانت تحجي وتأشر على راسي
لو بس شوية تاخذين من خفة دم اختج هدى وحيويتها
بوكتها راح تلاحظين تتغير هواي امور بحياتج

وكولي كالت رباب
.. عزة تريدين مني اصير مخبلة مثل هديوة
عمي خليني على سالفة الملابس استرلي

ما عندي روح المغامرة والمجازفة الي تملكها هدى

هدوشة عصفورة حرة ما تحب التقيد تتصرف على
سجيتها بدون ما تحسب حساب نتائج تصرفاتها

والي مثلي اتعودت على حمل المسؤلية والتصرف
الواعي من صغري صعبة اغير طبعي من تالي
ابو طبع ما يجوز من طبعه حتى لو حاولت

رباب.. صحيح كلامج بس هذا ما له علاقة ان انتي تحاولين تهتمين لحياتج وتشوفين مستقبلج
هذا الشي ما يقلل من احترامج لنفسج

باوعت للساعة.. ان شاء الله راح ابدي احاول
يالله امشي ورانا كومة شغل واليوم لازم ارجع من وكت
استأذنت منهم ينطوني اجازة من نص الدوام
اليوم راح اطلع من وكت قررت اروح وية هدى من يشترون الحلقات والذهب ادري بيها

خوافة خاف تسويلها مصيبة بالطلعة وتجيب العيد

.. اي صدك هم يالله ترحين زين تسوين روحي وياها احسن حتى تسيطرين عالوضع

سلمت عليها وبعدها
كل وحدة راحت على شغلها
اخذت جدول مناوبتي وبلشت بواجباتي
منهمكة بالشغل
وجان اشوف المرية الجبيرة ام تقى جارة حيدر
دتمشي بالممر ووياها ميادة

باوعت منا منا اشو حيدر ماكو مو وياهم

انتبهت عليها شايلة الفايل مال الفحوصات والتحاليل بيدها
معناها حيدر موجود هنا بس وينه

وبدون ما احس اخذتني رجلية لعند ام تقى
وعيوني تدور عليه
شافتني وابتسمت .. هلا بسورها ونورها شلونج خالة شيماء

.. هلا بيج خالة ها دخلتي للدكتور لو بعدج
.. لا والله بعدني ستونا وصلنا جابني حيدر
وخطية هاي البنية استلمتني راح تدخلني عالدكتور

.. ان شاء الله ما بيج بس العافية
سلمت عليها وقبل لا تروح كلتلها
.. خالة امانة اذا تحتاجين شي كليلي اني مثل بنتج وان شاء الله ما اقصر

.. تسلمين حبيبة ربي يحفظج لشبابج
تركتهم ورحت على شغلي
وهي راحت وية ميادة
لطالما اشتغل افكر بي واتسائل هسة هو وين

اشو ما شفته اليوم مو على الاساس هو جايب ام تقى
اهووو هسة اني بكل عقلي دا افكر بي
والله فارغة وما عندي شغل وعمل

مريت من يم الاستعلامات حتى اوقع على سجل الحضور ما بقة شي واطلع
وانتبهت لنظرات موظف الاستعلامات شلون
يباوع علية بتفحص اتضايقت من عنده صحيح نظرته بيها اعجاب بس

هو الولد مو محترم وسمعته زفت
لذلك ما رحبت بأعجابه
بعدها سألته عن سجل اسماء المرضى وهو ظل يماطل
ويحاول يفتح وياي حديث بس اني ما انطيته مجال

اخذت الاسماء ورحت على الدكتورة ميساء الي اشتغل
تحت اشرافها
بقى بس ااكد مواعيد العمليات واخذ غراضي واطلع
كملت طريقي وجان الكة شاغل
افكاري واكف يحجي وية الدكتورة
مندمج
حسيت بكلبي اجة يوكف من الفرحة
جانت الدكتورة تسولف وتضحك وياه وهو
بس يبتسم بس جانت ابتسامته مجاملة.
وبنفس الوكت جان كلش مندمج وياهة بالكلام

ما اعرف ليش ضجت من شفته صاب كل اهتمامه وانتباهه عالدكتورة

رحت بكل لهفة اقتربت منهم وسلمت عليهم واني حابسة
الانفاس حجيت بصوت متحمسة
.. شلونك استاذ حيدر
جنت منتظرة اشوف نظرات الاعجاب بعيونه
من يشوف مظهري الجديد

حجة بدون ما يرفع عينه من الدكتورة
.. هلا شيماء
ورجع كمل كلامه وية الدكتورة

رمشت عيوني مثل الي انضربت على وجهي
هاي شنو بس ( هلا شيماء )

رصيت على اسناني بغيض من سلامه البارد وياي
حتى ما كلف نفسه يلقي
علية نظرة وحدة عمة حتى عمة

لا والاقوة منها كمل كلامه وية الدكتورة متجاهلني

بس انتبهت على نظرات الدكتورة باوعت علية بأستغراب الظاهر انتبهت عالتغيير

قطعت كلامها وية حيدر وسألتني
.. شيماء كصت شعرج كلش حلوة هاي وين مسويتها

انتبهت للاخ رفع عيونه وباوع علية وكأنما سؤال الدكتورة لفت انتباهه وصار يباوع علية بتمعن

درت وجهي عنه بدون ما اباوع عليه
ابتسمت للدكتورة وجاوبتها

.. اشكرج دكتورة هاي اختي كصته الي صارلها زمان

اتلمست شعري واتذكرت موقف بابا بيوم كص شعري
وضحى عدلتلي الكصة

الدكتورة.. بس تدرين حيل لايكة عليج
.. اشكرج عيونج الحلوات

اجة دكتور منذر وسلم عليهم وحجة وية
حيدر على اجهزة طبية موصيه للعيادة

واني والدكتورة جنا نحجي بخصوص مواعيد العمليات القيصرية الي عندها لان هنا هواي دكتورات

وكل وحدة عندها مراجعاتها الخاصة الي يسون عندهم عمليات

لذلك لازم اذكرها حتى نجهز صالة العمليات عالموعد المحدد

جنا نحجي وحجة الدكتور منذر بأعجاب
.. هاي شنو شومة طالعة كيكة اليوم

اتعودت عالكل يصيحوني شومة
صارت خدودي حمر
.. اشكر دكتور والله خجلتوني

منذر .. دكتورة ميساء الله عليج باوعيلها شلون صارت طماطة
جان يضحك ويحجي
.. هو اكللها اذا يشوفونج المرضى كبل يطيبون
بدون مياخذون علاج على هاي الخدود
ملتهين نسولف

وقطع علينا الحديث صوت حيدر الخشن
باوعنا عليه جان عاكد حواجبه ويباوع علية
وسألني

.. ست شيماء ام تقى دخلت للدكتور لو بعدها
.. اي قبل شوية شفتها دخلت للدكتور

.. اذا متصير زحمة ممكن تشوفيها خلصت لو بعدها
لان وراي طلعة مستعجل
جان يحجي وياي بترفع من ورة خشمه
اتمنيت اضربه على راسه بالسجل هذا شبي شيحس

كلش شايف نفسه يتأمر علية عبالك اشتغل عنده
شلون صرفني عمة حتى عمة

.. لا عادي استاذ هسة اروح اشوفها الك
التفتت على الدكتورة ميساء اترخصت منها

.. دكتور قبل لا اطلع اريدج بس تأكديلي على المواعيد حتى اسلمهم للاستعلامات

اخذت مني الورقة ودونت على كم اسم وانطتها الي
بعدها رحت لغرفة الممرضات نزعت الصدرية
وعلكتها واخذت جنطتي وحطيتها على كتفي

اجتي ممرضة وكالت .. هاي جنطتج ؟؟
.. اي جنطتي
.. نقالج صارله ساعة يدك سطرنا

فتحت الجنطة ورفعت النقال لكيته مغلق مخلص شحن
.. يا خلص شحنه البطارية تعبانة بسرعة تخلص شحن

.. حقه يخلص شحن من كد ما دك دخنا كل شوية تدخل وحدة ونسألها هاي جنطتج تكول لا تالي طلعت الج
.. اكيد هدى دتتصل ادري بيها اليوم راح تاكل كلبي من التوتر والخوف وتريدني وياها جنها جاهلة

باوعت لروحي بالمرايا وعدلت شعري واني ابتسم اتذكرت شلون نامت بحضني خايفة

سلمت عالبنات وطلعت جنت دامشي بالممر
متوجه على باب الخروج اجاني صوت رباب

من وراي
وكفت التفتت عليها
.. شيماء اوكفي لحظة
الظاهر جانت تمشي مستعجلة
وكفت يمي انفاسها سريعة
.. ها رباب شبيج

مدتلي فايل وكالت.. هاج لزمي هذا فايل ام تقى نسته
عالميز اخذي وياج ستوهم طلعوا هسة تلكيهم يم الباب

غمزتلي .. ما اوصيج استغلي الفرصة

.. اكص ايدي اذا ما طلعتي انتي الي اخذتي متعمدة حتى تخليني اني اوديه

.. اهوووو هسة ديالله مو على اساس اني فارغتلج
واكعد ارتب مواعيد الغرام مالتج
يالله شو اتحركي بسرعة قبل لا يروح

اخذته منها واني ادردم عليها

.. هسة شيكول علية اكيد راح ياخذ فكرة مو زينة
علية وعباله دا اتوددله

شفته من بعيد لازم ايد ام تقى ديمشيها.
قريب عالبوابة رحت بأتجاهم

.. لحظة استاذ حيدر

التفت علية وباوع .. ها شيماء
مديت الفايل
.. هذا فايل الفحوصات مال ام تقى نسيتوا

باوع علية ورفع حاجبه
.. لا ما نسيته اني تركته عالميز حتى الدكتور منذر
يشوف التحاليل ويكتب التقرير من يفرغ
روحي رجعي لمكانه

يمة .. يمة اتمنيت الكاع تنشك وتبلعني من الفشلة

عااااااا اتمنيت كون رباب هسة واكفة كدامي
والله اشبعها رفس لحد ما تصيح التوبة وما اتردد لحظة وحدة اسحلها

الله ياخذج يا رباب خلتني بموقف بايخ كدام الاستاذ حيدر
جليت صوتي
.. احم .. احم ااعتذر منتبهت

.. لا عادي مصار شي متعود على هيج نماذج
دائما تكعدون تدورون الفرص والاعذار
حتى تتقربون بس جنت اتوقع انتي تختلفين عنهن
بس مع الاسف تصرفاتج تثبت العكس

يمة انا حجة هيج وانا حسيت الدخان كام يطلع من اذاناتي هذا شنو قصده
عقدت حواجبي بغضب وغيض ورصيت على اسناني
.. العفو شنو قصدك

.. الحليم تكفيه الاشارة
دار وجهه وراح على ام تقى
واخذها و اتوجه عالكراج

يمكن لو ميتة ولا هاي الفشلة الله يلعن بليسج يا رباب
شلون فشلة
اني من الاول جنت اعرفه مغرور وشايف حاله
بس مو صوجه صوجي اني الي سمعت كلام ست رباب

رجعت للمستشفى وشفت العاملة ام سامر
وسلمتها الفايل وكلتلها سلمي هذا الفايل لرباب ضروري وكليلها شيماء تكول

(طاح حظك سلمان )

ام سامر سألتني بفضول
.. شنو معناها هاي
.. خالة انتي بس كليلها هيج وهي راح تفتهم الرسالة

شكد مارة بمواقف محرجة بس مثل هذا الموقف ماشفت
هو منو حتى هيج شايف نفسه

طلعت من البوابة ومريت من يم الخرس الي عيونهم كصتني كص

ومشيت شفته ديحرك سيارته بالكراج متجه للبوابة
جان لابس نظارات شمسية جانت سيارته حديثة

رفعت راسي بكبرياء ودرت وجهي ومشيت
لا نوب عباله دا اراقبه ميحتاج اكبر غروره
ومثل كل يوم متعودة اطلع من المستشفى واتوجع

للشارع العام اركب عبرية
جان الشارع العام يصير قريب عالمسشفى

جنت امشي والغضب شاغل كل حواسي
فجاءة انتبهت على دراجة اقتربت مني راكبين بيها ثنين رياجيل ملثمين

نزل الرجال من الدراجة واجة يركض بأتجاهي
ما اعرف شلون الله انطاني الفطنة ورجعت على ورة
خايفة
عرفت هذا ناوي علية بشر
اتسعت عيوني بخوف من شفته طلع سجينة
من جيبه. واتقدم علية

كبل ركضت مفزوعة باتجاه المستشفى ارجع عالحرس حتى يفزعولي

لعنت حظي من ورة الحذاء الكعب الي جنت لابسته اليوم
انلوت رجلي واتعثرت وكعدت بالكاع
وهو اجة يركض علية مثل الوحشي

وجه السجينة على وجهي يريد يضربني بيها
صرخت خايفة مفزوعة وغمضت عيوني وحطيت ايدية اثنينهم على وجهي

اجتي الضربة على ايدي وحسيت بألم حاد
بس من كثر الخوف ما اهتميت للالم بكد ما اهتميت

اخلص نفسي منه
جنت امر بحالة رعب عجيبة
اتكورت على نفسي اريد احمي روحي من اعتداءهم.

فجاءة سمعت صياح وصوت رمي واتبعها اصوات صياح
اجتي الدراجة وكفت يمه حتى يشردون

بس قبل لا ينطلقون حجة بصوت مرعب يهدد
.. سمعيني زين ولج
كولي لأبوج الشفية مهرة تسلم عليك

وانطلقت الدراجة بأسرع ما عندها
حسيت على واحد يركض ورمى وراهم
راد يلحك عليهم

بس مع الاسف اجة متأخر
اني كلها بصوب
والخوف الي نزل علية شل حركتي
ما اكدر اعين نفسي واكوم

سمعت واحد ركع يمي وسألني بصوت خشن
عرفت صاحب الصوت رفعت راسي ونزلت ايدية
وفتحت عيوني

جان حيدر راكع يمي ولازم بيده سلاح ووراه
حرس البوابة
حيدر.. شيماء طمنيني انتي بخير
حركت راسي بموافقة

جان يحجي ويتفحص شكلي وباقي جسمي
مد ايده ولزم ذراعي

.. هاي شنو ايدج دتنزف دم
ساعدني حتى اكوم من الكاع

واجتي مفرزة مالت الشرطة الي جانت موجودة على
الشارع العام
واحد سألني
.. منو هذولي وشنو يردون منج

حيدر جاوبه بنترة.. بربك هسة وكت اسألة مداتشوفها
دتنزف وتحتاج اسعاف

مشيت ورجلية ترجف

اسمعهم يحجون حرس المستشفى كعدوا ينطون مواصفات الدراجة والاشخاص الملثمين

واني بس اباوع بعيوني
ما اعرف شنو اجاوبهم
وفضلت التزم بالصمت شفت ان مو من صالحي احجي
واكول منو همة لان معناها

الكل راح يعرف بموضوع بابا
وسيرتي تصير على كل السان باوعت

لحيدر جان يمشي كدامي وكل شوية يلتفت علية يتطمن
وصار يلقي بالاوامر على الحرس

وصلت ودخلوني للمستشفى وشافتني ام سامر واجتي تركض وام تقى تباوع علية بفضول

ام سامر.. ياستار استر ها خالة شيماء ستوج ما بيج شي شجاج ورجعتي فايضة دم

باوعت على ملابس جانت كلها دم وايد ملطخة
من كد الخوف ما انتبهت لروحي ولا شفت جرحي

جان الجرح مو عميق بس طويل على طول منطقة الساعد

بعدها اجتي رباب تركض وايدها على كلبها
كعدوني بغرفة الطواريء

واجتي وحدة من زميلاتي الممرضات مالت
.. جرحج يحتاج خياط
خفت سحبتها وراي .. لا لا ميحتاج بس تضميد

قاطعني صوت حيدر الامر وحجة وية الممرضة
.. اذا جان الجرح يحتاج خياط فخيطي

فتحت حلكي بأعتراض وقاطعني
.. اتوقع انتي مو طفلة ونكعد نقنع بيج
وكمل كلامه وية الممرضة
.. شوفي شغلج وخيطي

سديت حلكي بغيض من اسلوبه
انطتني ابرة اخدير موضعي
وبلشت تخيط الجرح
جنت كاعدة
حسيت بدوخة و راسي مال ليكدام اجتي المرية الجبيرة
ام تقى ووكفت كدامي وسندت راسي

.. يا يمة شومة هاي وين جانتلج

بس سمعت الحنية الموجودة بصوتها
واني كبل انهاريت بالبجي
اتذكرت امي
وهمست .. انا بعازتج يا يمة
ضميت راسي بحضنها

وهي كعدت تطبطب
ورة فترة خلصت بعدما خلص الخياط وتضمد الجرح
كل هذا وحيدر واكف فوك راسي

اجتي رباب وبيدها قطن وماي وكعدت تبلل القطن وتمسح الدم من على خدي وايدية

رباب.. يمة سودة علية شومة منو هذولي
همست.. ما اعرفهم

حيدر .. شنو كلولج قبل لا يشردون
رفعت راسي متفاجئة
.. كلشي ماحجوا
ضيك عيونه .. اني شفته اتوقف حجة وياج شي قبل ليشرد

هزيت راسي بخوف.. ما اعرف .. ما اعرف
جنت كلش مرعوبة بوكتها ما ركزت بكلامه
من حجة

باوعلي بعدم اقتناع بكلامي
.. اتمنى تحجين حتى اكدر اساعدج
لا تتسترين عليهم هذولي مجرمين لا تستهانين بالموضوع

.. ما اعرف اي شي عنهم غير بس الي كلته الكم
اني هم مثلكم متفاجئة بالصار

كمت من مكاني بمساعدت رباب
.. رباب اريد ارجع لبيتنا هسة خواتي يظل بالهم علية
لان كلتلهم راح ارجع من وكت اليوم

حيدر .. ابقي شوية بعدج دايخة
خلي يستقر وضعج وانا اوصلج لبيتكم

.. لا شكرا ميحتاج رباب تاخذلي تكسي
يوصلني للبيت

رباب.. شيماء ما تكدرين تطلعين هسة
لان ضابط التحقيق وصل ويريد يدخل حتى يحجي وياج وياخذ اقوالج لان الموضوع يعتبر تهديد لجميع الممرضات مو بس عليج

حسيت بروحي مثل انحشرت والموضوع صار اكبر مما جنت متوقعة

.. بس اني اريد ارجع للبيت
حيدر.. ماراح يطول مجرد اجراء روتيني بس يسألج كم سؤال وترحين

طلع حيدر اسمع صوته برة يحجي وية الضابط
هو والحرس يعتبرون شاهد عيان

لان جانوا موجودين بساعة الاعتداء
وشافوهم

دخل الضابط وفعلا مثل ماكال حيدر ما طول
اخذ اقوالي وطلع

بعدها كمت من مكاني بمساعدة رباب جان قلقها علية واضح

.. عفية رباب اتصلي على اخوج خلي يجي يوصلني
.. هسة اتصل عليه اشوفه اذا ما عنده كروة يجي عليج
ياخذج

متعودة على اخو رباب عنده سيارة سايبة يشتغل بيها تكسي ومرات ااجره ياخذني اني وخواتي اذا نحتاجه

اتصلت عليه وكللها شوية واجي
خلي تحضر نفسها
باوعت لملابسي الجديدات صاروا فلم

شوية ودك نقال رباب باوعت علية وكالت

.. شيماء هاي هدى اختج دتتصل علية
شنو اكللها
.. يااا اكيد هاي ظل بالهة علية لان اتأخرت
ونوب نقالي مغلق جاوبيها وكليلها شيماء راح تجيكم
بالطريق مو تجيبن سيرة الصار

خلي اني من اوصل هناك لبيتنا احجيلهم الصار مالهة
داعي اقلقهم

ردت رباب على هدى واسمعها تكللها لا شيماء ستوها طلعت ونقالها مخلص شحن
ومغلق
اي ما بيها شي خوش ان شاء الله لتخافين كلتلج ما بيها
شي

سدت النقال وباوعت علية
.. خطية هاي اختج تحجي وياي خايفة عليج وسمعت صوت ابوج يكللها
بالله سأليها صارلهة شكد من طلعت وخو ما بيها شي

خطية اهلج جنهم كلبهم يعلم صاير عليج شي

غمضت عيوني وما حجيت اي شي
هذا خوفه علية مو منا للدرب اكيد وراه شي

رباب .. يالله شيماء اخوية وصل بالباب
مشيت اني وياها لخارج المستشفى وعلى طول ما امشي كل شوية واحد موكفني ويتحمدلي عالسلامة

لحد ما وصلت للبوابة الخارجية
اجاني صوت حيدر وقفني
.. شيماء ممكن تنطيني رقم نقالج عندي شي احجي وياج
ما اعرف ليش اتذكرت كلامه وتحقيره الي قبل الحادث
رفضت طلبه بغيض

.. العفو بصفتك شنو انطيك رقم نقالي. انت مدا تلاحظ
نفسك شوية اتماديت وياي
يعني صحيح انت نقذتني بس مو معناها تكعد تستغل
الموقف وتطلب رقمي اشوفها واكفة

حسيت على رباب تكرص بيدي حتى اسكت
وهو جاوبني بغضب وعيونه تجدح نار

.. ترة لا تصدكين نفسج وتعيشين الدور
انا طلبت رقمج بخصوص موضوع مهرة وابوج
ما حبيت اذكر الموضوع كدام الشرطة وتصير سين وجيم وانتي تتأذين
وكلت اخليه بيني وبينج واحاول اقدملج المساعدة
لان اني عندي جهات مختصة وظهر قوي يكدرون يتدخلون بالسالفة بكل هدوء ويخلصونج منهم.

بس الظاهر عقلج التعبان رايح لبعيد
خلة ودار وجهه وراح مشى بأتجاه سيارته الي راكنها
يم باب المستشفى

سمعت شهكة رباب..
عزة العزاج يا شيماء لج انتي شلون تحجين وياه هشكل
لج تعرفين هذا طلع منو

باوعت عليها بستفهام
.. يالله احجي منو اشو اليوم هو يوم المفاجئات
.. لج هذا ابن عمه يصير مدير المسشفى
.. يالله هي بقت بس يفصلوني من المستشفى وتكمل السبحة

جنت احجي بتعب
بعدما وصلني اخو رباب للبيت

اتلكوني هدى وضحى وبابا وسليمة من الباب
وبس شافوا منظري بانت على وجوهم نظرات الفزع
هدى.. لج شيماء هاي شنو منو سوة بيج هيج

باوعت لبابا وحجيت
.. سألي بابا هو يجاوبج

ضحى.. شيماء شنو الصاير احجيلنا وجهج اصفر وملابسج كلهم دم وايديج شبيها
سليمة.. عزة العزاج يا سليمة
ولج شويمة احجي شمسوية ليش هيج حالج

كعدت عالكرويتة مالت المطبخ بتعب
وجريت نفس وكعدت احجيلهم عن الصار

جانوا هدى وضحى يباوعون بخوف
وسليمة كعدت تلطم

.. احووو.. احووو
ولك يمة اثير من ورة مصايبك راح يذبحونا واحد ورة الثاني

اتصلولي على امجد خلي يجي يشوفلي حل لهاي المصيبة انا ما اكعد انتظر يجي واحد يذبحني
من ورة عمايلك

انا لهنا حدي وياكم بعد ما اتحمل

كمت من مكاني
رحت وكفت كدامه باوعت عليه وبعيوني عتب
.. بابا مهرة تسلم عليك اتوقع الرسالة واضحة

انكلب وجهه اصفر وحجة
.. لا تكبرين السالفة اصلا انا رجعت علمود
اروح الهم واحط حد للموضوع بس همة الله يحفظهم استعجلوا ما قبلوا ينتظروني ارجع

انتبهت عليه دخل جوة للبيت ما اعرف شنو سوة ورة
دقيقتين طلع وشايل علاكة سودة بيده واخذ نقاله
وكال.. انا رايح انطيهم فلوسهم وارجع

ما درت بال لكلامه
ضحى .. تعالي فوتي بدلي ملابسج
هدى.. لا لحظة خلي اروح احضرلها الحمام
خلي تسبح احسن

فعلا جنت محتاجة للحمام
زفرة الدم معلكة بملابسي بحيث اختنكت

اجتي هدى غلقت ايدي بنايلون حتى مايلوحها ماي

دخلت للحمام وسديت الباب وراي اليوم جان اغرب يوم
بحياتي
مثل الدوامة بس صدمات

طلعت لكيت البنات محضرات الغدة
كعدت اكل وياهم ما ردت اكسر. واهسهم

حجت ضحى.. اتصلي على بيت ام قاسم وكليلهم خلي يأجلون جيتهم انتي تعبانة ما بيج حيل تطلعين

باوعت للساعة جانت بالاربعة
.. لا ما يحتاج اتصل عليهم
خليهم يجون عادي اني ما بية شي اكدر اروح وياهم
اني وهدى
هو اختيار ذهب ما ينرادلها شي

كلت لهدى تكوم تحضر نفسها لان همة على جية
كالو بالخمسة ونص نجي

شوية اتمددت وغمضت عيني ما اريد انام
بس شوية ارتاح

بدت احداث اليوم تزحف على افكاري وصور الحادث
تتكلب كدام عيني
لحدما اختنكت وجسمي ارتعد بخوف من اتذكر الحادث

جريت نفس عميق وكمت من مكاني خلي اكوم احضر نفسي والهي روحي احسن ما اظل كل شوية اتذكر
الصار

بدلت ملابس عادية وسويت شعري كبابة

رحت لبيبي سليمة وكلتلها. تنطيني فلوس المهر
لان خليتهم عندها حتى ضمهم يمها

سليمة.. خاب يا فلوس مهر دتحجين عليهم
ابوج اخذهم حتى يوفي الديانة بيهم
قبل لا يجون يذبحونا

عطت بصوت عالي مفجوعة
.. صخاااااام الصخمني شلون يسوي هيج
بينا

اجتي هدى وضحى على صياحي
هدى.. شنو شبيج شيماء

.. لحكولي بنات ابوي اخذ فلوس المهر كلها
شلون بية وبيت ام قاسم على جية شنو اكللهم على فلوس
المهر

هدى بغضب.. شنو سالفته معقولة اكو هيج بشر
يالله ابوي وين يريد يوصلنا

شلت النقال واتصلت على بابا وكلي انا هسة جاي
شوية ودخل علينا
يباوع عالوجوه
شيماء .. بابا شكالتلك روحك من اخذت فلوس المهر مالت هدى ما فكرت شنو راح نكول للناس اذا سألونة عليها

.. انتي مو كدامج شفتيهم شنو سوو من اتأخرت عليهم بالتسديد لج الفلوس مو اهم من حياتنا

اجتي هدى ووكفت كدامه بكل غيض
وحجت بصوت عالي مقهور
.. واحنا الى متى نبقى ننظف مخلفات افعالك القذرة

ضربها راشدي ودفعها

لزمت خدها وباوعت عليه بغيض
.. هي هاي الي الله قدرك عليها

حجة .. شيماء سكتي اختج واخذيها من كدامي لا والله ابتلي بيها ترة البية يكفيني ما ناقصها

هدى.. لا ما راح اسكت انت انسان عالة نكرة
كفر يسمونك. اني لو منك ادفن روحي ولا ابقى شبه رجال

اباوع لبابا انكلب وحش
.. لاااااا الظاهر انتي ما راح تسكتين الا اكسر بيج شي

وهد على هدى الي جانت واكفة منتظرته وكأنما جانت مستعدة تتلقى العقاب

ركضت عليه اريد ابعده عن هدى
بس جان هو اسرع واقوى منا اخذها سحل للغرفة
جنت لازمة ايده بيدي الصاحية
اترجاه يتركها
.. بابا ابوس ايدك اتركها جاهلة وساعة عصبية وحجتها
بلحظة غضب

.. اليوم الا اربيها من جديد هالعار
ولج شلون تتجرأين تحجين وياي انا هذا الحجي
بسيطة

جانت هدى ترافس جوة ايده وتدعي عليه
دخلها للغرفة ودفعنا اني وضحى وقفل الباب

سليمة.. حل تستاهل خلي يربيها ها طغت
وكامت تتجاسر على ابوها

هي تحجي واني اسمع صوت. صراخ هدى

احس شاغت روحي ووصلت للسما صرت ادك بالباب
مثل المخبلة

.. بابا الله يخليك افتح الباب

جنت اسمع صوت صريخ هدى وضرب بابا وغلطه عليها

فرت روحي عليها مثل الطير المذبوح
فجاءة سمعت صوت الجرس اندك

رحت اركض مثل المخبلة بلكي اجة عكو امجد يلحكنا
فتحت الباب وصرخت استنجد بالجاي

.. خالة ام قاسم لحكي بابا راح يموت هدى

يتبع

احبكم هواي احبكم كومة اختكم نهى
🌹🌹🌹🌹🌹🌹🌹🌹