أساور الفضة الفصل الرابع وثلاثون 34 - بقلم نهى

مساء الانوار عليكم
حبايب ترة مو حلوة تكعدون تتهجمون بالكلام اذا اتأخر
البارت يعني اني هم بشر مثلكم
والكل يدري اني مريضة والله جاي ادوس على اعصابي علمود اكعد اكتب البارت كل يوم لعيونكم
بس مع الاسف تجي كم وحدة تعلق كلام جارح
يحط من تعبي ومجهودي
😔😔😔😔😔😔😔😔😔😔😔😔😔😔😔

#اساور_الفضة_ج٢
#نهى_الحسون

هدى
اباوع لقاسم كام من مكانه مفزوع

وحجة وية امه
قاسم.. حجية لكو هشام متصوب
الخطار انخبصوا
والبنات ركضوا على قاسم يردون يفتهمون شصاير

ام قاسم.. يايمة وليدي شلون اتصوب
قاسم اتوجه عالباب يريد يطلع
.. ما اعرف شلون اتصوب انا رايح اعرف شنو صاير

ام قاسم التفت عالبنات
.. هالة يمة ركضي جيبي عباتي
وحجت وية قاسم الي يريد يطلع
.. اوكف يمة قاسم انتظرني اخذني وياك
لتعوفني هنا كلبي مثل النار عليه

اباوع لفاطمة لبست جبتها بسرعة
وام قاسم لبست عبايتها
اجتي تطلع ورة قاسم بس قبل لاتطلع

حجت وية بناتها البقية
.. انتوا ابقوا هنا لاتجون خلي نفتهم شنو السالفة
خطية البنية ما لحكت تفرح بخطوبتها
حجيت وياها
.. لا عادي خالة الله يبغد (يبرد) كلبكم ويطمنكم عليه

.. الله يكملج بعقلج يايمة
راحت هي وفاطمة ورة قاسم

وانكلبت فرحة المهر لخوف وقلق

هالة لطمت على صدرها
.. يمة سودة علية اخوي هشومي بية ولا بيك

كوثر.. خلي ترتاح سعاد طيرت الولد
اتمنى اشوف وجه عمو كاظم اذا عرف بأبنه متصوب
شراح يسوي
منى.. وداعتج كلشي ما يسوي هذا مغسل ومجفن بيد مرته
عنده اهم شي سعاد متزعل ولا تتاثر بشي

طفينا الديجي شيماء كالت عيب زحمة نكمل الحفلة
والبنات مكسور واهسهم
وبدوا المعازيم ينسحبون وكلمن راح لبيته
وبقيت بس اني والبنات

عمو امجد واولاده راحوا ورة قاسم
كال عيب نتركه زحمة
وبابا طلع بس ما راح وياهم
وسليمة كل شوية تروح وترجع تحوم فوك راسنا

ورة فترة اتصلت منى على امها
وام قاسم طمنتها كالت خطية صارله ٣ ايام
بالمستشفى متصوب برجله بشضية من الانفجار
صاير قريب عالكوفي الي جان كاعد بي هو وجماعته

منى.. زين ليش ما متصل على قاسم
ام قاسم .. بعد ما تعرفين بهشام متعارك وية ابوه
وقاسم من ذاك وهو مخشن خاطره
منى.. كلة من جوة راس خرابت البيوت كلة منها
ام قاسم .. يمة منى حضري خواتج راح ادزلكم السايق
حسنين يجي ياخذكم لان قاسم اخوج كال
راح انطلع هشام من المستشفى على بيتنا يبقى عدنا

منى.. ان شاء الله يمة
سدت النقال وكعدوا البنات
يطمنون على وضع هشام

سألت هالة بصوت ناصي

.. هالة شنو الصايغ (الصاير) فهمينا اشو اني ما اعغف (مااعرف) عندج اخو ثاني بس قاسم
.. تتذكرين مرة بفاتحة بابا بيوم قاسم هد على بيت عمو منير بالسلاح واني وخواتي لبسنا عبينا ردنا نطلع ورة قاسم
.. اي اتذكغ (اتذكر) حتى اجة واحد من ولد عمج وكف ولزملكم الباب وكللكم
ولا وحدة تتحغك ( تتحرك)الي تطلع اكسغ غجلها (اكسر رجلها )
.. هو هذا هشام ابن عمي كاظم يصير اخوي بالرضاعة
امه جابته واتوفت وصادف امي جانت جايبتني

واخذته من عمو كاظم ورضعته
عمو كاظم عنده ٣اولاد وهشام يصر الثالث

وامي كلش اتعلقت بي وربته ويانا حاله من حالنا
ومن كبر شوية وصار بالمدرسة
كام يروح لبيتهم
بس خطية ورة فترة يرجعلنا ما يكدر يتوالم لاوية اخوانه ولا وية ابوه
لان اتعود على امي وعلينا واتعود على حماية قاسم والاخوة الي تربطه بينا

جان قاسم مثل الاخ الجبير لهشام شحده الي يتورط
ويمسه بضربة كبل قاسم يروح يسوي طحين
امه داعية عليه الي يضرب هشام

واتعود هشام يعيش ويانا حتى امي مسويتله غرفة خاصة بالبيت بس مع الاسف
مرة صارت عركة بين عمو كاظم وبابا
علمود شغل وصار الزعل بين الاخوان

وعمو كاظم سحب هشام بالعناد من عندنا راد يأذي بابا
بابا مثل امي وقاسم هم اتعلق بي
وصلت ببابا راد يسجله بأسمه
انا اعرف بابا راد يضمن اخو لقاسم

الضحية الوحيدة بهذا الزعل كله هو هشام
لان ابوه حرم عليه يخطي بيتنا فخطية كام يجينا
كله بالبوكات يعني يجي يشوفنا بدون علم اهله

ومرة عمو عرف بهشام يجي عدنا
لازم وضاربه ومجوي برجليه
يكله خلي اسمع بيك تعتب بيت عمك
هامرة جويتك مرة ثانيه اكسرها لرجلك

وشدد عليه المراقبة وهذولي ولد عمو كاظم كلش انذال
خطية من جان يجينا
بالختلة جان يكعد يبجي بحضن امي
اتذكر جان بكدي يصير عمره تقريبا ٩سنوات

يبجي ويشتكي من اخوانه وابوه يقسون عليه
ماسحين بي الكاع
لان هو امهم ماتت على الولادة مالته بقى يمنا
معزز مكرم مدلل
وين همة اخوته تبهذلوا بهذله ورة امهم ماعدهم احد يخدمهم
مرة الحارس جانت تطبخلهم وتنظف البيت وتغسل هدوم
صحيح كل شي بثمنه بس تبقى مو امهم
يعتبروا وجه شؤم ماتت امهم بسببه على الولاده
هي امهم الدكتورة كللها لتحبلين مو زين عليج
عندج القلب تعبان قللي اكل
اريدج تقللين من وزنج مو النوبه تصيرين حامل
هو بينه وبين اخو الاكبر منه سبع سنوات
وبينه وبين الجبير ثمانيه
هي خلفتهم واحد ورة الثاني وتعبت بوكتها

خطية حتى مرة اتمرض وباقي بالبيت لوحده واخوانه
وابوه كلمن لاهي بروحه
لحد ما الحارس اجة لبابا وجابه وياه يكله
عمي انتوا ما عندكم مخافة الله هذا الولد

مشمور لوحده بالبيت صارله يومين مثل الكلب
ضال مريض لا اكل ولا شرب
ولكم شنو ما عندكم رحمة
وابوي بيومها انصدم
كله ليش ابوه واخوانه وين عنه
كعد يحجي لبابا الصار
عالاساس ان عمو كاظم جان مسافر عنده شغل وعايف اولاده وهشام بالبيت
هو صدك عمو كاظم دائما يسافر
وولده جانوا شباب مراهقين واحد بعمر قاسم والثاني بعمر منى المهم
استغلوا سفر ابوهم وهمة همين حضروا جنطكم وسافروا لاربيل
وعوفوا اخوكم بالبيت يم الحارس
وهشام خطية جان عمره بهذا الوقت
١١ سنة بس اتمرض ومحد يمه

لحد ما كلش اتخربطت صحته
الحارس خاف لا يصير بي شي ويتورط بي وتوكع براسه

فتحت حلكي مصدمة.. عزة هذولي شنو مخابيل ما عندهم عقل ادغي (ادري)يعني ما فكغو (فكروا) بأخوهم الصغيغ (الصغير )
.. لا لو تسمعين عذرهم من عمو محمد وبابا

كعدوا وياهم ووية عمو كاظم الي جان يجهل الموضوع
كالوا احنا خليناه يم الحارس ما عليه شي والثلاجة مليانة اكل

ومن عهدها عمو كاظم لازم ولده معاقبهم
عقاب قاسي وبابا رغم هو جان. زعلان
عليه بس كله خلي هشام عدنا عينا عليه
بس عمو كاظم رفض
رفض قاطع واخذ ابنه وطلع
يكول لبابا هوانت بالاول ربي ابنك صايع بالشوارع
وما ناجح بأي شي وبعدين تعالي طالب بأبني

اولاد عمو كاظم جانوا كلش شطار في غض النظر عن خباثتهم وانانينتهم
مرت السنين وهشام كل ما يكبر سنة يزاد تعلقه بقاسم وبينا
ولحد ما صار عمره ١٨ سنة

وبهاي السنة عمو كاظم اتزوج وحدة تصير بعمر
كوثر اختي اسمها سعاد اصغر من عنده بهواي

جانت كلش حلوة بس اسم الله من يوم الي اتزوجها
والمشاكل زادت ما نقصت بالبيت
كل يوم طارد واحد من ولده من البيت وعمو محمد
يكعد يرجعهم بالشافعات

هدى.. زين هسة شنو الصاير
.. انا اكلج حسب كلام امي من راحتلهم قبل شهر
على اساس
عمو كاظم ضاربه وطارده من البيت بسبب مرته
يكول ضارب سعاد ومتجاوز عليها
وهي كلتله اني مرت ابوك و غصباً عليك تحترمني
وهو معصب وضاربها

وبيومها امي راحت وشافت سعاد ملعوب بيها طوبة
امثل بيها تمثيل

امي بالبداية ما صدكتهم بس من سألت هشام كله اي انا ضربتها

سألته عن السبب كله هشام
اتحارشت بية كل مرة ابلعها واسكت واغلس عليها
اكتفي ارزلها واطلع من البيت
لحد ما اليوم جتني وبملابس النوم دخلت غرفتي
تكلي لو تصير الي لو اخلي ابوك يطردك من البيت
عاد انا كلبي مليان عليها كضيتها وطلعت حركت كلبي كلها بيها

قاسم بيومها جان مسافر للخارج عنده شغل
من رجع وسأل عن هشام كالتله الصار
وهشام مختفي من يوم الي طرده ابوه من البيت

.. يبوووو الي يشوف بلوى الناس تهون عليه بلوته
دك نقال منى
منى.. يالله بنات عمو حسنين بالباب
طلعوا البنات بعدما سلموا علية وعلى شيماء وضحى وطلعوا
....

مرت يومين عالخطوبة

ضحى.. بنات شلون بية ما اريد ارجع وية سيف
شيماء.. دصبري هسة انتي شبيج خايفة خلي نشوف
عمو امجد وبابا شنو يكولون

هدى.. هسة همة وين
.. كاعدين وية سيف بالاستقبال
ديحجون وياه

لحظات ودخل بابا وعمو امجد وسليمة
اثير.. ضحى جهزي روحج حتى ترجعين وية
زوجج هو وعدنا بعد ما يكررها وكال حقكم علية
انا رايد مرتي وانتوا شنو تفصلون انا البس

عمج امجد كله .. اول شي تحطلها نقال حتى تتواصل وية خواتها
وايدك ما تنمد عليها وكل جمعة تجي زيارة لاهللها

وهو كللهم.. صار تدللون كلشي التردونه انا اسوي بس رجعولي مرتي

ضحى بطنها مغصتها بخوف متريد ترجع

.. عمو سيف كل مرة هيج يوعدني بس فترة ويكلب علية
.. لا هالمرة غير
.. والله ابو طبع ما يغير طبعه

سليمة .. اكلج حبيبة احنا ما جاي ناخذ رأيج
لا عيني احنا دننطيج خبر حتى تحضرين نفسج وترجعين وية زوجج

هدى.. بيبي تغة (ترة)ضحى هي الي عايشة وياه
وتعغفه (تعرفه)كلش زين ما غاح (راح) يتوب
يعني هي صاحبة القغاغ (القرار)
ومن حقها تغفض (ترفض) يعني هي مو بالكوة

ضحى.. كلام هدى صحيح انا ما اريد ارجع

سليمة.. شوف ولك اثير اذا ضحيوة ما رجعت وية زوجها
تلمون غراضكم وتطلعون
من البيت انت وبناتك والله انا وصل حدي
هو انا ما اصدك افتك من وحدة تجيني الثانية زعلانة وتريد تتطلك

ولشوكت انا ابقى اتحملك اثير انت وبناتك ومشاكلكم

ضحى.. بيبي بس انا ما مأثرة عليج بأي شي
ليش تضغطين عليهم حتى يرجعوني بالكوة

.. ليش هو اني شنو الي محصلته منج ومن خواتج غير بس المصايب
كلش كافي مصايب ابوكم
الله وكيلج متحملتكم على اعصابي
جنت عايشة لوحدي ببيتي وراسي بارد من المشاكل

باوعت لعمو ولبابا وكالت
.. والله ثم والله اذا ما رجعتوها هسة كلكم تطلعون من بيتي
اثير التفت على ضحى وحجة

.. وانتي شدعوة عليج هيج نفسج حامضه
انكلج الولد حاي ومتندم ويكول شنو تريد ضحى يجرالها
وين لاكيتها واحد جاي يعتذرلج على السواه
ويكلج حقج علية.

ضحى تبجي .. اي بس
قاطعها .. لا تكعدين تبسبسين وتحجين حجي زايد

بالله شو كومي حضري روحج حتى ترجعين وية زوجج
ما عندي بنية تتطلك على شي تافه مثل هذا السبب
ترة اي مرة ورجال يتعاركون ويضربها وتالي يرجعون يتصالحون

انتي مو اول مرية يضربها رجلها
فكبري عقلج ورجعي لرجلج
ولا طلعت من بيتها

باوع لشيماء.. شيماء كومي اخذي اختج وفهميها
ماكو مرة تهجم بيتها برعونيتها

كامت ضحى دخلت للغرفة
وراحت وراها شيماء
اباوع لضحى لمت ملابسها ولبست عبايتها
وطلعت من الغرفة والدمعة بعيونها مغصوبة ترجع
حضنتني وحضنت شيماء وكامت تبجي

وراحت دخلت للاستقبال وية بابا وعمو امجد
وبعدها اخذها سيف وراح
والله منظرها يكسر الكلب من طلعت
اندليت مكان كلبي من القهر وحقدت على سليمة

وبعدها بابا طلع ووراه عمو امجد راح لبيته
التفت على سليمة
.. انتي شنو من بشرغ (بشر)
ليش هيج سويتي بضحى بشنو ضغيناج (ضريناج) اني وخواتي
ليش هيج كلبج اسود وحاقدة علينا من شفتج وشفتيني
تكغهينا (تكرهينا)
سكتت ورجعت حجيت
.. ولو انتي الحجي وياج ضايع ما منه فايدة
لان الي غبت (ربت) واحد مثل اثيغ (اثير)
. اكيد تكون وحدة كلبها اسود خالي من الغحمة (الرحمة)

شيماء صاحت بية مصدومة من جسارتي وية سليمة
.. هدددى عيب شنو هذا الحجي شبيج تخبلتي

سليمة .. عوفيها عوفيها هاي البكعة ام السان المكطم
هاي شافت عنتر ابن شداد فزعلها بذاك اليوم
عبالها هاي هية بعد محد يكدر عليها

خايبة البكعة بدال ما كاعدة تفكرين بأختج وبرجلها

كعدي فكري بروحج وبرجلج شنو راح يسوي
اذا يشوف البكعة مالتج

والله بس يشوفها يحرك الدنيا على روسنا
هاي اذا ما رجعج علينا يوم ثاني

جان كلام سليمة مثل السوط اللاسع عالجلد هيج يوجع
جاوبتها
.. لا تخافين ما يغجعني عليج لان اني كلتله عن الوحمة
وكلي لا تخافين حبيبتي انتي بس شعغج ( شعرج ) يسوى عشغ ( عشر) نسوان
والسانج اليغوغي هذا مجنني

جنت احجي واباوع عليها تريد تنفجر من الغيض
.. همة كالوها بخت الغبرة كاعد

سليمة بكلامها فتحت جراح قديمة وخوف ما بعده خوف
جنت غاضة النظر عنه او احاول اتناساه
من يوم الصار بيني وبين رائد
بعد ما التفتت لذاك الالم

شيماء

بعدما انتهت اجازتي جنت كلش مترددة شلون ارجع للدوام وشايلة هم. خاف التقي بحيدر
حيل مستحية احط عيني بعينه

خصوصا من طلع سامع الحجي كله من هددوني
بسالفة مهرة وبابا بس ما حب يحرجني كدام الضابط ويفضح امري ومن راد يساعدني ويحفظ ماي وجهي
اني رديتله الجميل
بكل جحود وحرجته كدام رباب

بس رباب اقترحت علية اذا اشوفه اعتذر منه عالصار
واكله اني جنت خايفة وحجيت هيج وياك بلحظة عصبية مجنت اقصد اتجاوز عليك
بس كون عندي الجراءة من اشوفه
اكدر اروح احجي وياه

رجعت للدوام
وجنت امشي بممر المستشفى وانتبهت للكل يباوعون علية بفضول

هذا الي جنت خايفة منه ان راح اصير علج بحلك الكل
دخلت لغرفة الممرضات
واستقبلوني البنات يتحمدولي عالسلامة

واجتي رباب حضنتني وهمست بأذاني بصوت ناصي
.. اي وحدة تسألج عن هذولي الي اعتدوا عليج
بذاك اليوم كولي هذولي حرامية جانوا راكبين دراجة وباكو الجنطة مالتج وشردوا لان الكل بالمستشفى
فهموهم هيج القصة

عقدت حاجبي .. منو الي كللهم هذا الحجي
.. حيدر اجة يوم ثاني هو والضابط المسؤل عن التحقيق بالحادث وكالوا هذا الحجي
وبما ان هو شاهد عيان عالحادث

كال انا شفتهم اخذو الجنطة منها بس هي رفضت تنطيهم جنطتها وهمة طلعوا سجينة وكطعوا الجنطة
ونجرحت واخذوها وانهزموا

عقدت حاجبي .. اي صدك اتذكرت بالحادث جنطتي شالهة حيدر من الكاع
ومن كملت الممرضة خياط وطلعت يالله انطاها الي بس مجنت منتبهة عليه جان الخوف الفزع ما يخليني اشوف شي

ياربي شكد عيب يعني فوك هذا كله رجع يوم ثاني
يحمي سمعتي من القال والقيل
يعرف كلام الناس ما راح يرحمني

.. يالله عيني الفرصة اجتي لحد عندج
روحي شوفي شغلج
.. لج رباب ما اعرف ليش مستحية من عنده
هو صحيح كدر يحمي سمعتي كدام الكل

بس يبقى هو عارف بسالفة مهرة وبابا
وهذا الشي بحد ذاته مخليني استحي ارفع راسي واحط عيني بعينه

.. اهووو شيماء انتي ليش تسوين من الحبة كبة
اخذي الامور على ما هي عليه
بالعكس اني اشوف سكوته عن الموضوع والحفاظ على سرج اشوفه علامة اهتمام وحب

جنا نحجي ودخلت الممرضة صاحت لرباب تجي تكمل
شغلها
راحت رباب واني طلعت وراها ورحت استلم
شغلي وطلع عندي مباشرة يم الدكتورة ميساء
رحت اخذت جدول المواعيد من الاستعلامات

دكيت الباب ودخلت ولكيت عندها مراجعات حوامل وغيرهم من المريضات
سلمت عليها واتحمدتلي عالسلامة

بعدها بلشت بشغلي كبل رحت عالمغسلة واخذت الادوات وكعدت اعقم بيهم وهي تفحص المريضات
واني اساعدها اهيء المريضة الهة
واستمرينا على هذا المنوال للساعة ب١٢ الظهر
اخذت فترة راحة وهي الدكتورة طلعت عندها
عملية بصالة العمليات

جنت امشي وجان اشوف حيدر واكف بنهاية الممر وية دكتور منذر ومدير المستشفى

كلبي اتسارعت دكاته صرت احس بكل دكة نبضها
بأذني
غصب عني لكيت رجلية ماخذتني لعنده
عيوني ما تشوف بس هو
ما اعرف ليش من اشوف هذا الشخص
يغادرني العقل واصير تحت رحمة دكات كلبي المجنونة

انتبه علية الدكتور منذر
.. هلا شومة توها نورت المستشفى الحمدلله على سلامتج.
ابتسمت وعيوني على حيدر
.. الله يسلمك دكتور
حيدر جان يبتسم ويحجي بس من حجة الدكتور منذر جمدت معالم وجهه وباوع علية ونزل عيونه على ايدي

.. يالله ياوردة تكبرين وتنسيها
هو جلة حنجرته ومال
.. الله دفع ما كان اعظم بالجنطة ولا غير شي
هزيت راسي وعيوني عليه
.. اي صدك الحمدلله على كل حال

اريد احجي وياه اريد اعتذرله بس استحي منا الدكتور منذر والمدير
اترخصت منهم ورحت
جنت كل شوية اروح وارجع بلكي الكاه لوحده
بس هو ماكو صلوات كثير الانشغال

ابد ما الكاه فارغ
والله باوعت للساعة ما بقى شي وتخلص استراحتي ولازم ارجع لغرفة الدكتورة ميساء

والله هناك وجان اشوفه واكف لوحده
يم قسم صيانة الالات والاجهزة الطبية

رحت عليه بكل لهفة
وكفت كدامه واني اتنفس سريع لان جنت مستعجلة خاف يروح وما الحك عليه
رفع عينه من النقال جان لازمه بيده ويدوس بي
باوع علية ورفع حاجبه.

.. استاذ حيدر ممكن تنطيني من وقتك اريد احجي وياك
اذا تسمحلي
نظرات عيونه غير عن كل العيون
فتح حلكه يريد يحجي
وجان يدك نقاله باوع علية بأعتذار
.. انتظريني بس دقيقة

ودار وانطاني ظهره ورد عالمتصل
وكعد يحجي وياه سمعت يحجي
عن الكادر وتنصيب الاجهزة
واني واكفة وراه كل شوية اباوع للساعة
اوف الوقت راح يخلص

اشو هذا اجتي دكتورة رسل محجت وياه
اشو انهى الاتصال بسرعة وكعد يحجي وياها
واني والواكفة ملطوعة صارلي ساعة شنو
حسيت بالاهانة وصارت النار تطلع من اذاناتي من الغيض

هو مو صوجه صوجي اني الي جاية اعتذر منها
حجيت بكل غيض وعيوني تجدح نار

.. استاذ حيدر اني اترخص الظاهر انت كلش مشغول
بس جنت اتمنى تحجي وتكلي ما عندي وقت احجي
بدال ما ظالة ملطوعة هنا

درت وجهي ومشيت
سمعت صوته يصيح علية
يريد مني اوكف

بس اني وين عيوني غوشت من الدموع
ومن الغضب كلشي ما اسمع

رجعت لغرفة الدكتورة ميساء لكيتها بعدها ما راجعة
مسحت دموعي وسحبت نفس عميق

ورحت عالادوات الي استخدمتهم الدكتورة للفحص
وكعدت اعقم بيهم واني ادردم

سمعت صوت وراي التفتت لكيتها وحدة من الممرضات بيدها كارتون
حطته عالميز وكالت
.. هاج هاي مجموعة ديتول وكفوف بلاستك طلبتهم
الدكتورة ميساء كالت خلصوا العندها
.. اي صحيح نحتاج
اخذتهم من عندها ورحت ارتب المواد كل شي بمكانه
يعني تحت متناول الدكتورة

جنت اشتغل واحجي بغيض
.. على شنو شايف نفسه استاذ حيدر
هو مو صوجه صوجي اني الي نزلت من نفسي وكلت اعتذر منه
بس هو ما تصيرله جارة لان هو واحد مغرور
شاف روحه وسيم وشخصية عباله
البنات كلهم راح يكتلون نفسهم عليه هي هي
والله ياربي كون ينكسرن نقالاته ويظل يدعم

بس والله ثم والله يحلم اروح اعتذر منه
جنت مستمرة بالحجي

وفجاءة اسمع صوته من وراي
معقولة من الغيض عقلي كام يخيلي صوته
رجع يحم حم. وكال
.. معقولة كل هاي الصفات بية
كطعت النفس مصدومة جمدت بمكاني
والتفتت على كيف واني مغمضة عيوني وحابسة الانفاس

............

هدى

جنت هسه راجعة من الكلية
دخلت وفتحت الثلاجة واخذت دولكة ماي
وكعدت اروي عطشي
وجان سليمة استقبلتني بالبشارة

.. لج كطمة ما بقى شي على زواجج
اليوم اتصلت ام قاسم على شيماء وكلتلها
العرس بعد اسبوع حضروا نفسكم

يمة انا هي كالت هيج واني طلع الماي من خشمي
وصرت اكح وعيوني طفرت منها الدموع

.. هاي ششنو ليش هيج مستعجلين
.. وليش التأخير اشو الله رازقهم وما عندهم شي يمنعهم وهمة مكملين كلشي

ما اعرف شنو صار بية
دخلت شيماء وباوعت عليها
.. شومة بيبي تكول العغس (العرس)بعد اسبوع
صدك هذا الحجي؟؟
ابتسمت تطمني
.. اي حبيبتي كلامها صحيح
حبيبتي جهزي نفسج
ام قاسم راح تمر عليج هي ومنى تكول عازمينها عالعشا
وياخذونج وياهم للبيت لان اليوم جابوا الغرفة ويردونج تجين تشوفينها

بلعت ريكي بخوف.. ما يحتاج اشوفها
مو شفناها بالمعغض (بالمعرض) بيوم الطلعنا بعد على شنو اغوح
اشوفها شنو غاح يتغييغ (يتغير)

شيماء.. حبيبتي هاي مبادرة حلو
من ام قاسم حتى تدخلين لبيتهم وتتعرفين عليهم وعلى اطباعهم وتشوفين غرفتج

يالله امشي كدامي هم يالله ترحين تحضرين نفسج راح يجون

صرت اتحرك مثل الي داخلة بدوامة
بدلت ملابسي ولبست جينز وقميص ابيض
وحجاب وردي وحطيت شوية مرطب شفة
وكحلت عيني

مرت ساعة وسمعت صوت الجرس
وبعدها دخلت علية شيماء وكالت يالله هدى
ام قاسم تنتظرج بالباب

طلعت وسلمت عليهم وانا رجلي وحدة تدعم بالثانية
وصلنا لبيتهم اتغير لون وجهي وصار اصفر

نزلت من السيارة
ام قاسم دكت الجرس واجتي هالة فتحت الباب
ام قاسم.. يالله يمة هدى خطي برجلج اليمين
تعاي فوتي خلي بيتنا ينور بيج

اخذتني هالة لحضنها فرحانة
وسحبتني من ايدي ودخلتني لبيتهم
من الخوف كلشي ما شفت ولا انتبهت على اي شي جان عقلي يردد

خاف يجي قاسم
دخلت كعدت بالصالة والبنات اجتمعوا يمي
وصاروا يسولفون
وهالة راحت جابت البدلات حتى تراويهم الي
الي اشتروهم للعرس الهة ولمنى وهديل

جانت البدلات كلش حلوات وصرنا نحجي بكلشي
وشوية شوية بديت استرخي واخذ راحتي وياهم بالكلام
هالة .. هدى نزعي حجابج واخذي راحتج

محد موجود هشام عند الدكتور بس احنا هنا
نزعت حجابي وعدلت شعري
اباوع لام قاسم صلت على النبي وكامت تنشر على شعري

وبعدين اخذتني هالة لغرفتها وكامت تفتح بالكنتور وتطلع البدلات
البقية مال الحنة واني بقيت فاتحة حلكي متعجبة
على شكلهن

.. هاي شنو كم فستان مشتغيات ( مشتريات)
هالة.. اهووو بعدج ما شايفة شي لعد خلي اجيب بدلتج
معلكتها بكنتور هديل يمكن يوكف كلبج اذا شفتيها

طلعت من الغرفة راحت تجيب البدلة حتى اشوفها
جابتها يمة اجة كلبي يوكف من شكلها

اتسعت عيوني رحت اقتربت منها وكعدت اتلمس بيها
.. لج هالة هاي صدك الي
.. اي والله شبيج هاي امي اول ما شافتها كالت هاي راح تطلع تاكل وتشرب على هدى

بالله شو تعاي لبسيها حتى نشوف قياسها اني ادري قياسج 38 بس خلي نشوفها مضبوطة
.. اي البسها بس مو كدامج انتي تطلعين بغة (برة) البسها واصيحلج تجين تشوفينها

هالة.. عوبة تستحين مني والله عمي خوش لعد
شلون بيج بعد كم يوم وية استاذ قاسموف هم راح تكليله
اطلع برة اريد ابدل

يمة هي تحجي واني وجهي صار نار
.. يالله شو غوحي طلعي بغة
دفعتها وسديت الباب

نزعت ملابسي وكعدت البس بالبدلة جان موديلها
قالب من جوة مثل الحورية وبيها ذيل طويل
بدون اكتاف يعني منطقة الصدر كلها طالعة

لبستها وحطيت شعري على جنب
وكعدت احاول وية السحاب حاولت اكثر من مرة
ماكو اريد بس الوح السحاب ما كدرت
جنت لازمة صدر الفستان لان كل شوية
تهدل من يم الصدر

وبين ما جنت مندمجة وية البدلة ونوب حيل طوية علية يعني ينرادلها مو بس حذاء كعب حتى ياخذون من طولها صرت انافخ بخذلان

وجان اسمع صوت ام قاسم جاي تصعد فوك الدرج وسمعت صوت قاسم ديصعد وياها وحجوا وية هالة
اسمع ام قاسم تسأل هالة عني

وهالة كالت هياتها هدى بالغرفة
شهكت بخوف
واجة كلبي يوكف من شفت يدة الباب اتحركت

كمت اكمز بالغرفة مثل فار وحصروه بالمصيادة
اروح منا وارجع منا

شلون شسوي ماعندي مجال ابدل باوعت للباب بدة ينفتح هي لحظات مو اكثر
ما اشوف روحي الا وانا اتخذت القرار
وجان اركض مثل الطلقة واختل ورة الباب
لطشت روحي ورة الباب وكطعت النفس
وغمضت عيوني

والعوبة هالة فتحت الباب ودخلت للغرفة واتقدمت
وراها ام قاسم
ام قاسم.. شنو هدى وينها
هالة حاصرتها الضحكة تدري بيها واكعة بمأزق
.. هديوة العوبة طلعي وينج
قاسم .. شنو هاي وين راحت الجنية
وجان قاسم يلجح طرف البدلة من ورة الباب

اتجه عالباب وحركه كدام
وشاف هدى لازمة مقدمة البدلة وراصتها على صدرها تريد توكع
والوجه احمر والزنود طالعات ينادونه يجي يلمسهم
والصدر من اثر الضغط بارز
وشعرها مغطي كتفها
والعيون مغمضتهم

قاسم. باتسامة تعجب . حجية هاي هاي لكيتها.

يتبع

😔😔😔😔😔😔😔😔😔😔