أساور الفضة الفصل الخامس وثلاثون 35 - بقلم نهى

مساء الخير والعافية عليكم احبتي

#اساور_الفضة ج٢
#نهى_الحسون

هدى
احس احنا بموقف تحكمه مشاعرنا المعكوسه
بنظرات عيونه وانرسمت ابتسامات على شفايفنا
بس كل واحد ابتسامته مختلفه بمعناها عن الثاني

عيون تباوع بأعجاب ممزوج بتعجب
وابتسامة المتفاجئ ممصدك الي يشوفه كدامه مثل قاسم

وعيون ثانية تباوع بفخر ممزوجة بالفرحة
وابتسامة المنتصر بالرهان مثل ام قاسم

وعيون على جهة تترقب بشوق اللحظة المجنونة
.. بأبتسامة المتشوق للقادم من الايام مثل هالة

وعيون مغمضة بخجل ممزوج بالخوف
بابتسامة المحتاره الي مو عارفة وين تروح
وكعت بالمصيده
مثل حظي المدكم غلط

احس كلبي صار ينبض بركبتي
كمزت من مكاني من سمعته كال
.. هاي هي لكيتها لكيتها
حسسني وكأنه لكة الفارة الي يدورون عليها
وراح يلزمها من راسها

سحبت نفس عميق
فتحت عيوني جان قاسم واكف كدامي
يباوع علية عبالك يريد ياكلني
نظرات عيونه عبالك مفترس

وجنت غافلة ان طريقة تنفسي العميقة المتسارعة
راح تلفت انتباهه لمنطقة الصدر
همس من بين اسنانه .. الله يلعنك يالشيطان

عزة هذا كام يلعن حجيت حاصرتني البجية اترجاه
.. عفية بغوح (بروح) ابوك ديغ ( دير ) وجهك لاتباوع
.. بروح ابوي اذا سمعتج تغوغين
اجرم بيج وبلسانج

هزيت راسي وعيوني مبحلقة بي من الخوف
.. هذا هو صاغ ( صار) بعد ما احجي
انتبه علية بعدني واكفة جامدة بمكاني ولاطشة عالحايط
ياربي والله موقف محرج
الحايط من ورائي وقاسم من امامي منين انهزم

.. يالله شو اتحركي روحي ستري على نفسج
واكفة كدامي عندج عرض ازياء
انتي وشكلج هذا يجيب التايه تطلعين الزاهد عن طوره

ودار وانطاني ظهره وكال
.. انا طالع من تخلصون سوالفكم عود صيحوني انا بغرفتي
كان يحجي بغضب موجه كلامه لامه

ام قاسم والعيون تلمع بأدراك
عرفت بابنها كان يعاني من وجود هدى وحضورها
وهفوة السانه شاهدة عليه ان هو متأثر بيها
وما راح يكدر يتجاوزها ويخليها هامش بحياته
وهذا الشي يبشر بالخير

.. اي يمة اخذ راحتك من نخلص انطيك خبر

همة يحجون واني وجسمي صار قالب ثلج من الخوف
خرب بالحظ

حصرتني البجية
و ايدي على صدري لازمة البدلة المصخمة حتى لا توكع
من ساعة السودة من لبستها هسة اني شورطني
وشلون نسيت روحي اني داخلة بوكر الذيب

طلع قاسم وسد الباب حيل
كمزت من مكاني الله يلعن بليسه وكع كلبي
هذا شلون بي ابد ما تنحزر اطباعه ياربي هاي شلون
راح تصفى وياه
انتبهت لام قاسم
تضحك وكالت .. ولج هديوة شسويتي بوليدي

هزيت راسي ادافع عن نفسي
.. والله خالة كلشي مسويت
هالة.. ههههههه ليش هو انتي شنو بقيتي ما سويتيه

اباوع على هالة وكلبي محمل عليها
ومنا امها هنا عيب اروح اسحلها كدامها على هالدكة
.. كله منج انتي وغطتيني( ورطتيني) بلبس البدلة

ام قاسم .. بالله شو هدى تعاي اتقدمي خلي اشوف البدلة عليج

هزيت راسي برفض
.. لا لا خالة عفية ما اكدغ

جنت احجي وظهري لا طشته عالحايط
خاف ينتبهون عالوحمة والله اموت بدمي
ياربي سترك هاي وين جانتلي كلة مني انا جبتها لروحي

هالة اتقدمت علية
.. بالله شو تعالي سويتيها خبصة شنو سالفتج وية المستحة
عاد انا ادري بيج بايعة الميانة وياي
اقتربت مني ودارتني
واني مثل الي انشليت من الموقف المحرج

وصار ظهري كدامها مدت ايدها تريد ترفع السحاب
لكن فجاءة جمدت ايدها عن الحركة وسمعت شهكتها

ام قاسم.. ها ولج هالة لاتكولين طك السحاب
والله العب بيج طوبة

هالة جاوبتها .. لا لا تخافين البدلة ما بيها شي
بس سديت السحاب على لحمة ايدي وانكرصت
سدته وابتعدت عني وصارت كدامي
تريد تشوف البدلة علية وكأنه شيئا لم يكن

عرفت من نظرات عيونها ان هي شافت الوحمة
اتمنيت الكاع تنشك وتبلعني
بس هي ابتسمت وكالت تطمني

.. هدى لا تخافين البدلة راهمة عليج وطالعة كلش حلوة بيها
.. اشكغج (اشكرج)هالة
حجيتها بأمتنان لان ما حرجتني كدام امها

ام قاسم .. اي صدك كلش حلوة عليج الف عافية
بقة بس الحذاء عندج حذاء عالي يرهم وياها
لو اشتريلج

.. لا عندي مالت الخطوبة
لونه اسود

هالة.. لاااااااا شنو اسود على بختج ما يرهم
دارت وجهها على امها وكملت كلامها
.. لا ماما نشتريلها حذاء ثاني عالي يرهم وية البدلة

باوعت عليها متعجبة من تفكيرها السطحي

.. وليش تغدين تشتغين وتغهمين ( تريدين تشترين وترهمين) وية البدلة
وهو اصلا ما غاح (راح) يبين من وغة (ورة) طول البدلة
يعني لو البس نعال لاستيك هم محد غاح يلاحظ
لو هو بس صغف (صرف) فلوس

هالة فاتحة حلكها تريد تنجلط من كلامي
.. عااااااا مستحيل لا تحجيها اعدمج والله
جمال المراءة بأحذيتها

.. يعني مو من المعقول اشتري حذاء عالي مال حفلات
بس علمود ارهمه وية البدلة وما راح استخدمه
غير بس بالمناسبات هذا التبطر بعينه

جنت احجي على سجيتي وطبيعتي وصدك اني وخواتي اتعودنا
على استخدام الشي العملي والمعقول

انتبهت على خوات قاسم واكفات يباوعن عالبدلة
وشكلهن سمعوا كلامي وية هالة عن الحذاء

هالة .. ههههههه هلا هلا
والله من خلال كلامج مبين عليج انتي جنة ام قاسم

ما افتهمت شنو تقصد
منى.. يمة واخيراً لكيتي شبيهتج بالاقتصاد
وعدم التبذير يالله هاج استلمي حتى جنتج طلعت تشبهج

صارت خدودي حمر من تعليقهم
باوعت لأم قاسم تباوع علية بفخر
.. مو كلتلكم انا هاي البنية دخلت كلبي من اول ما شفتها

هالة.. والله يا ام قاسم انتي مو هينة طلعتي داهية
ما تسوين شي اذا ما جنتي مالية ايدج منه
وما خفي كان اعظم

هنة يحجن والله واني كلشي ما افتهمت
منهم يالله لاحكة افهم عليهم الايام جاية وبالعشرة
راح اعرفلهم وافهمهم

بس هي كلها بكفة وسهل معشرهم
وقاسموف بكفة شلون بيه وبعشرته شراح يكضيها

بعدما ما هالة ساعدتني انزع البدلة ولبست ملابسي
وما جابت سيرة عن الشافته ولا سألتني لان مصارت
فرصة تنفرد بية وتحجي وياي

واعرف هالة اكيد بأقرب فرصة راح تسألني عنها
ام قاسم حجت
بعدما بدلت

ام قاسم كالت تعالي خلي نشوفج الغرفة مالتج
اخذوني وياهم قابضاً مثل المجرم الي ياخذونه لغرفة التعذيب
هذا جان حالي من رحت وياهم

اي حقي اشوفها غرفة تعذيب يعني
غرفة وراح تجمعني وية هرقل وينسد علينا باب لوحدنا
شنو راح يكون وصفها غير كلمة رعب

دكت الباب وسمعنا صوت قاسم المتضايق
.. فوتي حجية
دخلنا عليه جان متمدد بنص السرير
ولازم نقاله ديكلب بي

شافنا دخلنا عدل نفس واخذ وضعية الجلوس
ونزل رجليه من السرير وعدل التيشرت المخربط
ورفع ايده يعدل شعره المهوس

باوع علية من دخلت اتفحص شكلي وملابسي
مثل الي ديختبر او يدرس عينة جديدة غريبة
حتى يحكم عليها هيج نظراته كانت واضحة

ام قاسم .. تعالي يمة هدى فوتي شوفي غرفتج
وانطينا رأيج اذا تردين تغيرين مكان الاثاث كولي
حتى اخلي العمال يبدلون الاماكن ما دامهم بعدهم هنا عدهم شغل بالبيت

باوعت للغرفة جانت كلش حلوة
اتذكر اني وام قاسم واخته فاطمة الكبيرة اختاريناها

جانت غرفة تركية بيضة نازكة اباوع صارت الغرفة
احلى من نقلوها هنا لان الحايط جانت الوانه حلوة ومتناسقة
وجان مبين عليهم هواي متكلفين
منى.. ها شنو رأيج ترة هذا كله ترتيبي
ابتسمت .. عاش ذوقكم كلش مغتبة (مرتبة) وحلوة

اقتربت هديل وحجت يمي بصوت ناصي اتعمدت تسمعني
هديل .. هي وين شايفة حتى تسأليها عن رأيها
عايزة بعد تعترض

اتسعت عيوني من كلامها صدك فاجئتني بتصرفها
محد سمعها بس كمزت من سمعت قاسم زمخ بيها
.. هديل !!!
اباوع عليها كمزت من مكانها وكامت تمتمت

.. ها قققاسم
حجة وياها بغضب
.. طلعي برة !!!! ونزلي شوفيلي حسنين نزل
الغراض من السيارة لو بعده

اباوع عليها بسرعة راحت طلعت من الغرفة بدون ما تلتفت او ترفع عينها بعينه

دنكت ما باوعت عليه
سمعت ام قاسم والبنات ملتهيات يسولفون ومندمجات
ام قاسم كملت كلامها
.. ما بقة بس تخلص البردات ويجي ابو البردات يعلكها

منى.. اي يمة شنو تنتظرين ما تتصلين عليه
ام قاسم.. اتصلت عليه كلي باجر يمج الساعة بالعشرة الصبح اجي اعلكهم

همة يحجون واني كلمة هديل ظلت ترن براسي
شكد حقيرة

شوية وام قاسم اتجهت للباب تريد تطلع وكالت
.. بالله شو منى تعالي انتي وهالة
اريدكم تتعاونون تنزلون السجادة من المخزن افرشها بالاستقبال

انتبهت للبنات مشوا ورة امهم يردون يطلعون برة
الغرفة واني مشيت وراهم

اجيت اطلع واشو ام قاسم التفتت علية وكالت
.. شكو اجيتي ورانا شنو انا كلت هدى ؟؟؟

انخطف لوني عزززة بس لا تفكر تبقيني يم ابنها
حجيت وياها واني حاصرتني البجية
.. خالة اغوح ( اروح) وياكم اساعد البنات
خاف السجادة ثقيلة عليهم

هالة.. لا مشكورين استاذ هادي عضلة
ما نحتاج مساعدتج

ام قاسم.. لا يمة هاي اول دخلتج عيب نشغلج
اخذي راحتج وشوفي غرفتج

فتحت حلكي اريد احجي
بس ما انطتني فرصة اكمل
كبل طلعت هي وبناتها وعافوني يم البعبع

يمكن بلحظتها لو يذبحوني ما يلكون قطرة دم بية
من الخوف اطرافي صارت قالب ثلج
جنت واكفة كدام الباب المسدود

اباوع عليه عبالك لوحة فنية وصرت اتمعن بي
جان لونه صاجي واليدة ذهبية صرت اتمعن
بكل تفاصيل الباب اريد انهزم من التفكير
ان اني وقاسم لوحدنا

اجاني صوته الخشن من وراي والله طفرت من مكاني مثل المنتولة

قاسم.. اكول شنو راح تبقين واكفة تباوعين عالباب
جنج طالب معاقبينه لو شنو سالفتج

التفتت وعيوني تباوع عليه بحذر
بقيت واكفة يم الباب احتياط امني خاف يفكر
يسوي بية شي على الاقل الحك انهزم
بروحي العزيزة

كام من مكانه ويباوع علية حط ايديه بجيوب الجينز
والقميض جان حاضن اكتافه الحركة ضيقت من اكتافه

اقترب مني وحجة وياي
.. هدى تصدكين كلما اشوفج
كبل تجي ببالي صورة
بنية صغيرة مسوية ظفاير وعيون كبار وخدود تفاحة

حجيت بدون شعور
.. سبحان الله بغوح (بروح) بيبي سليمة
وانت ما محلفني نفس الشعوغ(الشعور)
كلما اشوفك اتذكغ (اتذكر)بطولاتك ياغبي (ياربي)شكد جنت حباب
وحنين بيني وبين نفسي اكول (حونين اوي)

جنت احجي واتلمس بكصتي مكان اثر الضربة
حسيت على روحي خرجت عن النص
وكعدت اصبغ بي بس شسوي مو بيدي الخوف يعدل الشوف

ابسم واتغيرت اساريره
.. ما اعرف ليش احس جاي تجامليني
لان حسب كلام امي وخواتي والناس يكولون جنت
كلش وكح والناس تصيح منك الغوث من شيطنتك

طبعا انا جنت ما اشوفها وكاحة
اعتقد جنت اشوفها لعبة ومغامرة وجان شي عادي اتعارك مو فد مشكلة
وبالحقيقة اني مو كلشي اتذكر مرات تخوني الذاكرة

همست
.. خغب (خرب) حظي يعني انت ناسي كلشي
لعد حظي المصخم ليش ما نسيت ايامي السودة وياك
لو هو المنحوس منحوس حتى لو حطوا على راسه فانوس

حجة بصوت خشن
.. شنو ما فهمت علي صوتج ماداسمعج شنو تكولين

ابتسمت ابتسامة صفرة
.. هههههه جنت اكول يا محاسن الصدف
شكد حلوة. من حسن حظي خلتك ما تنساني

اي هدى استمري استمري باللبخ
شكلج راح تكضين العمر وياه تلزكين بالمواقف وترجعين ليورة

باوعت لوجهه اتغير وكال هالمرة بجدية
.. هدى طبعا اني وياج مصارتلنا فرصة
نكعد لوحدنا ونحجي عن الصار

جان المفروض هذا الشي يصير من اول يوم عقدت عليج
نكعد سوية ونحجي ونتفاهم بهواية امور

اني اعرف بيج انتي انغصبتي على هذا الزواج
مثلما اني انجبرت عليه
يمكن ضروفنا متتشابه
ولا اكدر اقارن موقفي بموقفج بس بالنهاية
اني هم انغصبت لان امي عندي بالدنيا
واعرف مراح تفض وياها لان اني عندي نفس عنادها ورثته منها

اكيد انتي جانت الج حياتج الخاصة واحلامج
بعيدة كل البعد عن قاسم وحياته

هزيت راسي بالموافقة كلامه طمني وبنفس الوقت
بقيت متمسكة بحذري منه

.. اي صحيح
.. انا هم مثلج ما جنت اتخيل نفسي واحد بالمية
لو بعد مليون سنة ان انتي تصيرين من قسمتي
ولا حاط ببالي هذا الشي

طبعا مو انتقص منج لا بالعكس انتي
تشبهين اختي هالة مبين عليج حبابة
والف من يتمناج.

هو جان يحجي واني جنت اتسأئل هو وين يريد يوصل بهذا كلامه

.. شكغاً ( شكرا)
ابتسم .. تصدكين كلما تغوغين تصعبين علية الامور
تحسسيني بعدج صغيرة عالزواج من تغوغين
وخصوصا انتي ناعمة

جان يحجي ويباوع على طولي
كلبت عيوني لميت شفايفي
عمة حتى عمة. صغيرة بعينك
عمري صار بالعشرين وعديم الذوق يكول صغيرة
هذا اكيد احول لو اعمى لو عاجبه يقصفني

حجيت.. اي اني الكل. اول ميشوفني ينطيني عمر ال١٦ سنة ميكول بالكلية
طبعا هاي اعتبرها ميزة حلوة مو اي وحدة تكدر تحافظ
على عمرها وتبقى صغيرة
جنت احجي ببقايا الكبرياء الي ظلت عندي

.. اي صحيح
هدى اني قتحت هذا الموضوع حتى افهمج على شي
اشوف ان من حقج ان يكون عندج علم بي
بما ان انتي راح تصيرين مرتي وتشاركيني حياتي
فلازم اكلج وتكونين على بينة بي حتى ما يصير اشكال بعد الزواج
وتكولين ظلمني كسر بختي

باوعت عليه بترقب
محجيت شي اريده يكمل

.. شوفي يا بنت الناس انا قبل لا اعقد عليج
ومن زمان اني وبنت عمي محمد واحد يحب الثاني
ومتواعدين عالزواج

بس الحادث غير كلشي صارت اشياء مو بالحسبان
بس رغم الي صار
بقيت على وعدي لبنت عمي وما اتغير شعرة عندي من حبها
يعني بأختصار اريد اكلج ترة انا حتى لو اتزوجتج
انا باقي على وعدي لرهف
وراح اتزوجها اول ما تتخرج

جان هو يحجي واني جريت نفس عميق براحة
حسيت هم وانزاح من على كتفي

رفعت راسي .. الله يسهلك امغك (امرك)

اني صحيح الي يشوفني يكول عني صغيغة (صغيره)
بس الحقيقة اني كبيغة (كبيرة)وافهم معنى كلامك

اني ما اغيد اصيغ حجغ عثغة بطغيقكم
(اني ماريد اصير حجر عثرة بطريقكم)
واشوف من الظلم تفتغقون (تفترقون) بسببي
لذلك احب اكلك من هسة مبغوك عليك غهف
وان شاءالله تصيغ (تصير) من قسمتك

باوعت عليه جر نفس عميق وارتاح وجهه
شكله هو هم جان يعاني
هو ما يدري بهذا كلامه سهل علية هواي امور
ووحدة منها الوحمة ربي يلهي عني

قاسم بهدوء.. ما اتوقعتج راح تتقبلين الموضوع بالسهولة هاي
جنت محضر نفسي لمشهد درامي ودموع وعتب

.. لا يابا مو لهاي الدغجة (الدرجة) هذا الشي يصيغ (يصير) بحالة
لو جنت متزوجة زواج طبيعي
بس المثل حلاتي لازم تكون متوقعة هيج اموغ (امور)

جنت احجي واباوع عليه يباوع علية بنظرات وكأنه اول مرة يشوفني

.. والله صدكت امي بيوم كالت عنج خام
.. اذا تغيد (تريد)حتى ما يصيغ (مايصير) اشكال بينك وبين غهف
احجي وياها وافهمها عن وضعي وياك

يعني اكللها لتخاف مني اني ما راح اشكل عليها اي خطر
يعني زواجنا راح يكون بس شكل هيج

يمة انا حجيت هيج وهو عقد حواجبه
وضيك عيونه وحجة
.. لحظة لحظة ترة انتي رحتي لبعيد
صحيح انا كلتلج وعدت بنت عمي بالزواج وناوي احافظ عالوعد

بس مو معناها اخليج معلكة
بالعكس انا ناوي اتمم زواجي واكمل واجبي وياج
على حسب الاصول وما راح اخليج تعتازين اي شي

لان رجولتي ما تسمحلي اقصر وياج بأي شي
هيج امور صعبة عالرجال يجتازها

.. اي افتهم قصدك اكيد غاح تكون
انت ولي امغي (امري) والمسؤل عني
ولازم ما اطلع لاي مكان الا اخذ اذنك
اني اعغف (اعرف )كلشي

باوع واقترب مني.. لا مو بس هشكل
وضيفي عليهم انا ناوي اخذج كزوجة
وتصيرين حلالي هسة افتهمتي لو اوضح اكثر

شهكت مصدومة وفكيت عيوني وحطيت ايدي
على حلكي
رجعت لنقطة الصفر وللخوف نفسه وانبلع الساني
اين المفر حجيت ودموع اليأس وصلت طرف عيني

.. ليش انت مو تكول تحب غهف .. بعد اني شكو
ما كدرت اكمل كلامي استحيت
هو افتهم شنو قصدي

.. اولا لتفتحين عيونج هلكد هي جبيرة ومفتوحة من الله
.. ثانيا يا بنت الناس انتي صعبة عليج تفهمين هيج امور
خلي كلشي بوكته

قطع علينا الكلام الباب
اندك وبعدها دخلت هالة
.. امي تكول تعالوا نزلوا اتعشوا

حسيت بحبل الانقاذ وصل بوقته

نزلنا وشفتهم صابين العشا وكاعدين ينتظرونا
كعدنا وياهم وصرنا نتعشا

والله ما اعرف شنو اكلت وشنو اتعشيت
جان كل شي نفس الطعم لان اكل بدون احساس
كان كلام قاسم وياية شاغل تفكيري
حسيته كولش هواي علية مداكدر اركز

بعدها خلصنا العشا وكعدنا سوية
ياربي كعدتهم شكد حلوة وسوالفهم تجنن ما ينمل منها
كان جو عائلي اتمنيته طول عمري

منى.. صدك هدى اتذكرت حجزنالج عند الحلاقة
على يوم العرس

وكالت كون عندي الساعة بالعشرة الصبح
مدت ايدها ولزمت خصلة من شعري
شنو تكصين شعرج لو تبقينه على طوله

هالة .. انا اكول خليه على طوله لا تكصه
يفيدها بالتسريحة كلما يكون الشعر طويل كلما تصير التسريحة احلى

حجيت.. انا كلت بس اكص اطغافه (اطرافه)
اجانا صوت قاسم من ورة

.. ديري بالج اسمع بيج كاصة شعرج
هالة.. لا ما تكصه بس الاطراف تعدلهم

.. انا كلت اذا اسمع مكص لامس شعرة من شعرها
متعرفون شنو مصيركم مو تكولون

رفعت عيوني اباوع عليه
ياربي صبرني على بلائك
انا بشخص قاسم احتاريت وضعت

على طول ما جان كاعد ويانا نقاله ما وكع منه
كل شوية يدك

احس بي كاعد ويانة مجبور مجاملة
يعني شلون واحد محلفه يبقى يمنا لان عيب
وكل شوية ينافخ مثل المختنك

اخير شي اجاه اتصال وكام من مكانه
وكال
.. حجية انا طالع عندي شغل ضروري

اباوع على ام قاسم كلبت عيونها بس متكدر تحجي
لان الكاع محظورة

.. اي يمة اخذ راحتك اذا تكدر وصل بدربك هدى لبيتهم

بعدما وصلني للبيت
وراح جان على طول الطريق يحجي بالنقال
ما اهتميت اصلا احس النقال اجاني رحمة
وشغله عني لان وجودي قرب قاسم بحد ذاته معاناة

اتلكتني شيماء خطية جانت تنتظرني

دخلت للغرفة وراي وكعدت تسألني عنهم واحد واحد
واني انطلقت بالكلام

خلصت تبديل ملابسي ورحت اتمددت عالفراش
جسمي مكسر تكسر اليوم ما لحكت اجر نفس
من الكلية كبل على بيت اهل قاسم
اتمددت وصرت اباوع عالسقف
وسرح تفكيري بكلام قاسم

اجتي شيماء واتمددت بصفي واتغطت وغطتني وياها
وحجت بصوت ناصي نعسانة
.. احجي كولي شبيج صافنة صار شي هناك
درت راسي باوعت عليها

.. اي صاغت هواي اشياء هناك ببيت اهل قاسم
.. احجيلي شنو صار
.. اول شي اليوم هالة شافت الوحمة وانصدمت

حسيت على شيماء جمدت بمكانها
.. وشنو كالت من شافتها
.. كلشي ما كالت لان امها جانت موجودة ما حبت تحغجني (تحرجني)

اكول شيماء شنو تكولين صحيح لو غلط
ابقى ضامة عليهم سالفة الوحمة ؟؟؟

شيماء بحيرة.. شوفي هدى هو لو جان الزواج طبيعي
جان كلتلج يابنت الناس ترة ما يصير نضم عليهم هيج شي
ولازم نكللهم عنها لان هذا يعتبر غش

بس بالنسبة لوضعج فيختلف
لان سواء عرفوا بموضوع الوحمة او ما عرفوا
ما راح يقدم او يأخر شي بالنسبة لزواجكم

لان هو بالاصل تم زواجكم بظروف صعبة
وهاي هي يعني ان حضر الوضوء بطل التيمم

وانتي تعالي اكلج همة اول وتالي راح يعرفون بالوحمة
يعني مو فد شي
وسمعيني زين انتي ما عليج بكلام بيبي سليمة
لا تخليها تخوفج بكلامها ترة صدكي الوحمة مو شي
سيء مثلما سليمة مصورتها
ترة شي عادي وكلش طبيعي

وهو الي يشوف هذا الجمال يكعد يفكر بوحمة

.. يعني شتكولين ام قاسم اذا عغفت (عرفت)بوحمتي بعدين
ما غاح تضوج مني

.. لا بالعكس ام قاسم مرية حبابة وكلبها جبير اشوفها اكبر من هيج
هاي السوالف التعبانة خليها لبيبي سليمة هذا اختصاصها

وبعدها كمت احجي لشيماء عن كلام قاسم
من كملت كلامي

شفتها تباوع علية فاتحة حلكها
ممصدكة اكو هيج كلام دار بيني وبين زوجي المستقبلي
يعني صدك الموقف غريب

واحد قبل لايتزوج زوجته يكللها راح اتزوج عليج
يا اخي على الاقل راعي مشاعر الحديقة الي بداخلها

.. بس اريد افتهم شغلة وحدة
هو مو راح يتزوج رهف ويحبها ويموت عليها
بعد اني شكو ليش يريد يورطني وياخذني كزوجة

شيماء بمعرفة.. الي مثل قاسم يعتبروها
هاي اكبر اهانة لرجولتهم
يعني بختصار هو مو رجال اذا ما اخذ مرته وثبت حقوقه وملكيته عليها

ظلينا اني وشيماء نسولف لحد ما نمت بدون ما احس على نفسي

شيماء

كعدت ثاني يوم الصبح
وداومت بالمستشفى
وسجلت حضور وكبل باشرت بأستلام المهام
والتهيت
رحت حتى اخذ اجازة علمود عرس
هدى بس
المسؤل عن تسجيل الحضور
رفض ينطيني اجازة كلي كثرت اجازاتج بأخر فترة
ترة ما يصير اسجلج انقطاع
اذا ما اجيتي

صدك انقهرت لان كلش محتاجة الاجازة اكثر من اي وقت ثاني
لان ما ضل شي على زواج هدى

.. صدكني كلش محتاجتها اختي الصغيرة راح تتزوج
واني الوحيدة الي اكدر اكمل جهازها ماعدها احد غيري

عاند وضل متمسك بقراره صدك ضوجني
اشكد خبيث
كوة لزمت اعصابي ما انزل عليه بالرزايل
التفتت اريد اطلع وجان يصير حيدر بوجهي

شايل جهاز مثل التلفزيون وحطه عالميز
دنكت وطلعت برة

ياربي الانسان شكد يشوف ذل احس زاد قهري من
عرفت حيدر شاهد على توسلي بالنذل
ادري بي ما راح ينطيني اجازة

رجعت اكمل شغلي واني احجي وية رباب حتى
تاخذ هدى بدل عني وتكمل شغلاتها

لان هذا خبث
وجان تدخل السستر ام احمد وتنطيني ورقة
وكالت .. هاي الورقة الاجازة دزها فرات
المسؤل عن الاجايز
كال هاي سلميها لشيماء
اخذت الورقة من عندها وانصدمت
شفته موقعلي على اجازة لمدة ٣ ايام

يتبع

احبكم كومة احبكم هوااااااااااااي
يمة فديت اهل الفزعة كحلتوا عيني ورفعتوا
راسي على عناد العواذل