أساور الفضة الفصل الثامن وثلاثون 38 - بقلم نهى

مساء الخير و عليكم يا اهل الخير
🌹🌹🌹🌹🌹🌹🌹🌹🌹🌹🌹🌹🌹

#اساور_الفضةج٢
#نهى_الحسون

هدى
جنت واكفة خايفة عالسرير متأهبة
وحجيت بخوف
.. بغوح ابوك لا تقتغب مني
(بروح ابوك لاتقترب مني )

قاسم جان واكف يباوع مصدوم
هز ايده بسخرية وسمعته يكول بغضب

.. يالله هاك استلم بالله هاي شحجي وياها
الله يسامحج يا امي على هاي الورطة

اباوع عليه عيونه نار
شلون ياربي شي يعدي هاي الليلة
جنت افرك ايدية ببعضهم وحجيت بترجي
.. الله يخليك انطيني فغصة بس هالمغة (فرصة بس هالمرة)
بس الى ان اتعود عليك والله اخاف

غمض عيونه بصبر
.. زين نزلي من الجرباية خلي احجي وياج
نكعد ونتفاهم مثل الناس والعالم

.. لا خليني هنا مغتاحة عادي احجي اسمعك
.. لعد ابقي بمكانج انا جايج
كالها بتهديد

يمة هو صعد عالسرير وانا طفرت من الصفحة الثانية
وجان هي طفرة وهي صرخة
وحسيت الا رجلي التوت بحيث كعدت عليها

عطت بصوت عالي موجوعة وخايفة

اشو بعد مااني عطت اسمع اصوات الهلاهل لام قاسم برة الغرفة
وراها صار صوت ضحك وتصنيف

وامه تكله
.. يمة قاسم على كيفك وية مريتك
بعدها صار الضحك والتنصنيف بفلس

شهكت وحطيت ايدي على حلكي
وعركت كصتي من الموقف المحرج
وباوعت لقاسم بحذر جانت عيونه تجدح نار

بلعت ريكي
لا ام قاسم على بختج كلش مو وكتج ادري شنو جانت خاتلة ورة الباب

كمز كلبي على صوت قاسم الخشن وهو يسب ويغلط
.. لا اليوم شكلي راح اجرم بواحد منكم لو انتي لو امي
..

هو يحجي وانا كاعدة بالكاع اتلمس برجلي وابلع بريكي
والله هسة يجي ياكلني بسنونه

اتجه علية وركع يمي بالكاع

وانا حجيت
.. لا غوح وخغ عني كله من وغاك التوت غجلي
( روح وخر عني كله من وراك التوت رجلي )

.. بالله هسة انا شنو افتهمت من ورة غوغوتج
مد ايده على رجلي
اجيت اسحبها خزرني وكال
..انطيني مجال خلي اشوف
احتمال صار عندج التواء بالقدم

لزمها وحركها واني كاتمة الصرخة واعض على شفايفي بألم

.. هسة هيج احسنلج صارلج ساعة تكمزين جنج قرد
فضحتينا الله يلعنج بعدني ممسوي شي

خرب احس حتى الوجع راح من كد الخوف والترقب
..

باوع على دموعي ورجفة شفايفي
غمض عيونه يطلب الصبر وكعد كدامي بالكاع
وصار يباوع علية بتفكير مثل الي يريد يتخذ قرار
ظل صافن علية وساكت مبين عليه الحيرة ديفكر بشي
وبعدها مسح على وجهه وجلى صوته
وكال
.. كافي لتبجين كومي ومسحي دموعج

نهض من مكانه ودنك علية حتى يساعدني اكوم من الكاع
حوطني بذراعه من خصري وسندني على صدره
انخبصت وما اعرف شصار بحالي
قربه وحرارة جسمه وترتني
كعدت عالسرير وابتعد مني

وكف كدامي وعيونه والنفس مالته جانوا شاهدين على اثارته

دنكت راسي من الفشلة وخدودي صاروا حمر
بعدين اجاني صوته
.. ااا .. احم احم
.. تصرفاتج دتصعب علية الامور وتعقدها فوك ما
هي متعقدة اشوف من الافضل اتركج اليوم لوحدج
لان الظاهر احنا اثنينا اعصابنا متوترة
من كثر الضغوطات

جان يحجي وقطع كلامه صوت النقال
عقد حواجبه وراح بتجاه السترة وطلعه من جيبه
اباوع عليه

جر حسرة وغمض عيونه ورجع شعره للخلف حركته دلت على العصبية
رد عالمتصل وانطاني ظهره وكام يحجي بهمس
ما كدرت اسمع شي

غير كلمة .. والله اكلت تبن
جان يحجي ويمشي بتجاه الباب يريد يطلع
هو طلع واني استغليت انشغاله بالاتصال

رحت اعرج عالخفيف بتجاه الباب اريد اتأكد راح لو بعده
اريد اغير ملابس النوم احس بالتهديد من وراهم اقتربت عالباب

وجان اسمع
.. خير حجية شكو شعندج تحومين هنا
ليش مو نازلة جوة يم خطارج

جان يحجي بغيض عزة شكله اتفاجيء بوجود امه
صاعدة فوك

بس اريد اعرف ام قاسم شتحس وين تريد توصل
يارب هاي العائلة راح تخبلني

جاوبته .. ها يمة قسام بشر
جاوبها وهو كوة لازم اعصابه
.. حجية ورب الكعبة راح تطلعيني عن طوري
بهاي سوالفج

.. يمة غير وليدي واريد اطمن عليك
.. هو شنو الصاير وتطمنين علية
قابل رايح احارب حجية لخاطر الحمزة عتقيني و عوفيني بحالي

.. لك يمة قسام ليش دومك شالع كلبي
وتكسر واهسي
هسة اني شنو رايدة منك غير بس اشوفك مرتاح وية مريتك

.. ادري بيج على شنو تحومين وما راح تعوفيني الا تعرفين شسويت
بس اطمني سدج امين ماكو شي صار
خليني اني براحتي شوكت ما يعجبني اخذها
يالله هسة ارتاحيتي

لطمت على صدرها
.. ياااااااا يمة قسام لعد والصوت السمعناه
جان شنو

.. اي مو جنا نسوي احماء وهي عاطت
اكلج حجية بالله رحمة على مو تاج ما تعوفيني
ترة والله روحي واصلة لخشمي

عزة بعينه كاعد يحشش على امه وهو بعز الغضب
بعدها عاف امه تدردم وراه وراح

ابتعدت عن الباب ورحت امشي سريع بية ما بيه
حتى اوصل لباب الحمام خاف تدخل علية

دخلت للحمام وانتظرت تفتح الباب وتدخل للغرفة
بس ماكو ما دخلت
شكلها غيرت رأيها
طلعت من الحمام ورحت اخذتلي بجامة نوم
ولبستها بالحمام وتالي طلعت وقاسم بعده ما رجع

استغليت الفرصة ودخلت جوة الغطا
وحطيت راسي عالمخدة واني انتظر شوكت يرجع للغرفة
حتى اعرف راسي من رجلية

ما اعرف شنو اسوي هسة شنو انام لو انتظره يرجع
وبعدين انام
وعلى هاي الحسبة ما حسيت الا وانا غاطة بسابع نومة

شيماء
بعد ما خلص العرس صلنا عمو امجد اني وسليمة للبيت
جانت سليمة على طول الطريق بس تدردم
على مروة وتحجي
سليمة.. انت لو تشوفها شلون دخلت للعرس
ما تكول للفلك ولك

شايفة نفسها كلش وهاي المكطمة نفخت ريشاتها
وصارت ما تتحاجة من شافت مريوة

اباوع عليها حتى ما كالت هاي بيبتي خلي اروح اسلم عليها
لبستني ولا جنك اني موجودة شكد فشلة من جاراتي كلهم
سألوني هاي بنت ابنج
صرت بنص هدومي احتاريت شجاوبهم

خرب جانت مستمرة تحجي بدون انقطاع
عبالك بالعة مسجل وعمو امجد بس يجاوبها
اي واي يسايرها

منا الى ان وصلنا للبيت راسي صاير طبل
واول ما دخلنا للبيت
واتوغلت بي حسيت خنكتني العبرة
دخلت للغرفة الي جمعتني بخواتي
صفت علية وحدي بس اني بيها

بدلت ملابسي وغسلت وجهي
وبعدها فرشت فراش واحد واتمددت
واني افكر بهدى شنو دتسوي بهاي اللحظة
خايفة لوتجاوزت خوفها .. نايمة لو كاعدة

والله هسه عرفت احساس الي يكول
كون انكلب طير واشوف شحال العزاز

استداريت واجتي عيني على مكان فراشها
جانت دائما تفرش بصفي وتنام بحضني
وهسه حضني فارغ مشتاقلها

قطع علية تفكيري صوت نقالي رديت جان المتصل مروة
.. هلا مروة شنو وصلتي لبيتج
.. هلا شومة اي وصلت ونومت مشمش
وكلت اتصل عليج قبل لا تنامين وابلغج
باجر الصبح حضري نفسج نروح اني وياج ناخذ الريوك لهدى وقاسم

.. والله هاي جانت نيتي كلت باجر اكعد من وكت
واسويلها ريوك واخذه الهة كدام عيالها

.. يالله لعد انتظريني امر عليج باجر
واخذج وياي
يالله حبيبتي شومة اخذي راحتج شكلج تعبانة مبين من صوتج
.. يالله حبيبتي الله وياج
نهيت الاتصال
واني افكاري صارت تدور على احداث اليوم
مروة وهدى وزواجها ضحى
الي ختمها علينا زوجها من اجة ولكاها واكفة لوحدها
بالشارع ووياها مشمش

حرك الدنيا عليها وصلنا
اني ومروة وانتبهنا لضحى واكف يمها سيف سلم علينا بغضب
وضحى حجت ومبين من صوتها جانت تبجي
كالت .. مروة حبيبتي هاي بنتج اني لازم ارجع وية سيف
جانت كوة تحجي

بس بنت مروة مشمش .. لزمت ايد امها وكالت
ماما هذا عمو ايييع شرير

جانت تحجي وتأشر على سيف
مروة بغيض سلمت على ضحى وكالت بصوت عالي
حتى يسمع سيف .. بنات مو تنسون عازمتكم يوم الجمعة عالغدة

سيف.. يالله ضحى استعجلي ترة السيارات طلعت
وبعدها ضحى سلمت علينا وراحت
ومروة حجت.. هاي يمكن جان يتعارك وية ضحى بالشارع

شيماء.. شلون عرفتي
.. مشمش كالت عليه شرير
هاي الكلمة تستخدمها اذا شافت واحد معصب ويغلط كدامها

شيماء.. عادي كلشي اتوقع من سيف
مروة.. الله كريم يصير خير تجي الجمعة وافتهم منها شبي هذا الثاني وياها

اتثاوبت وعدلت المخدة
ما ادري ليش احس مروة تعرف عنا كلشي
بس شلون كدرت تعرف واحنا محد يتواصل وياها

حتى سالفة الاجازة دوختني
شلون عرفت بية اني اريد اخذ اجازة وهذا فرات رفض ينطنياها

والله مروة لغز محير بحد ذاتها
بس الحلو بكل هذا هي رجعت لحياتنا

........
هدى
جنت نايمة حسيت على ايد تندهني حتى اكعد من النوم
فتحت عيوني ورجعت غمضتها واني اكول من بين نوم ويقضى

.. شيماء عمغي (عمري) اوكفي هسة اكعد بس شوية
حسيت بأيد خشنة هزتني حيل وبصوت خشن
.. يابة تكعدين لو شنو
امي وخواتي راح يصعدون ويشوفونج نايمة

يمة انا سمعت الصوت وانا كعدت مفزوعة
ونزلت الغطى وشعري مكوش بفوضى ونزل على وجهي

باوعت على مكاني منا ومنا
عزة والله للوهلة الاولى عبالي اني نايمة ببيتنا

وكعت عيني على قاسم جان واكف فوك راسي ويباوع علية شعره جان مبلل

بلعت ريكي عزة اني شوكت نمت وهو شوكت رجع
وهسة شسوي

عبالك حس بية بشنو كاعد افكر كال
.. سمعيني زين امي وخواتي راح يصعدون فوك
ويكعدون يجرجرونج بالكلام
فانتي اي وحدة تسألج كليلهم قاسم ميقبل
اسولف وياكم بخصوصياتنا
وكال بس اسمعج مطلعة يوم حجاية وحده
راح يكون حسابج عسير ومحد يخلص من ايدي

هزيت راسي بنعم وكمت من مكاني
نزلت عيونه على بجامتي واتسعت على قميص البجامة
باوعت على مكان نظراته
وجان اشوف روحي مدكمة البجامة غلط

ونص الشسمة طالع و مبين
شهكت ولميت صدر البجامة على صدري
وخزرته

.. عفية ديغ (دير) وجهك لا تباوع
هو رفع حاجبه وكال بثقة
.. اباوع على حلالي شنو حرام
باوع لساعته وكمل كلامه
بالله شو كومي اتحركي راح يجيبون الريوك
بس رحمة على والديج ستري علينا وبدلي البجامة

مشة من يمي وراح للباب يريد يطلع
جان يحجي وية نفسه بصوت مسموع
.. هي بجامة لو بلوى الله يلعنك يالشيطان
فتح الباب وطلع

وانا كبل رحت عالكنتور وطلعت دشداشة لونها
اوف وايت كلش نازكة
شيماء كالت هاي تلبسيها بصباحية العرس باول يوم

انتبهت لرجلي بيها الم بس طفيف
رحت دخلت للحمام
ورة نص ساعة
جنت واكفة كدام المرايا مبدلة ودامشط بشعري
بعد ما جففته بالشسوار

دخل قاسم للغرفة وهالة دخلت وراه شايلة بيدها صينية
الريوك وكاعدة توزع ابتسامات
هالة .. صباح النور عروستنا
جانت تحجي وتباوع على شكلي

تريد تشوف اي علامة عن ليلة البارحة
قاسم .. هالة حطي الصينية واتوكلي يالله
وسلمينا على امج وياج

ما افتهمت شنو جان يقصد
هالة وجها احمر كالت.. هدى خواتج اجوي وجابوا الريوك وامي كالت صعدي الهم
حتى يتريكون وينزلون فمو تنسين تكملين وتنزلين خواتج ينتظرونج جوة

هي بس ذكرت خواتي اني رحت عليها بلهفة
.. اني ما اغيد تغيك (مااريد اتريك) شبعانة
اجاني صوت قاسم من ورة
.. هالة طلعي وسدي الباب وراج
وهي كبل راحت بدون ما تباوع علية ولا تجاوبني
نفذت كلام اخوها وطلعت
باوعت عليه هسة شنو شسوي
كمل كلامه
الحجية وشغلة الاستخبارات ما راح تبطلها

راح اتوجه عالصينية وبسط ياكل
.. تعالي اتريكي حتى تنزلين يم خواتج
شوفي انا بية طبع اتخبل من البنية الي تتنعوص
وتتدلل على نعمة الله
جابولج ريوك تكعدين تاكلين مثل الخلك والعالم
وتكومين

يمة هو يحجي وانا من الخوف انعكدت معدتي
بربك هسة هذا ديدعوني للطعام لو للاعدام

خرب حظي الملطلط
رحت كعدت يمه قابضاً
صبله جاي بالكوب
وباوع علية وسألني تريدين جاي

.. لا ما اغيد شبعانة
اباوع عالصينية جانت مليانة اكل كاهي وكيمر
وخبز حار
جنت ميتة من الجوع وبطني ظلت تطلع اصوات موسيقية
باوع علية وخزرني بنفاذ صبر

.. مبين شبعانة
اكلج تاكلين لا والله
عزة كلشي لا يكعد يتحلف
بعده ما مكمل كلامه اني كبل مديت ايدي عالصينية
وكعدت اكل وعيوني عليه

دنك وكمل اكله اباوع عليه ما شاء الله
طبك الميمنة عالميسرة ماخذ راحته
بحيث سوالي واهس اكل ما اعرف ليش طريقة اكله
تشهي عالاكل

شنفت الردان وانطلقت اكل ونسفت المواعين الكدامي
وشربت الجاي وبعدها اتنهدت براحة
مال واحد شبعان رفعت راسي

وجان اباوع عليه لازم كوب الجاي ويباوع علية
وعيونه على شفايفي

مد ايده ولزم شفتي التحتية ومسح اثار الكيمر
من عليها
ظلت ايده تتلمس شفتي
رجعت راسي ليورة
وهو انتبه على نفسه وكام

.. انا نازل
راح للحمام وبعدها اتوجه للمرايا رش ريحة وعدل شعره وطلع

اتبعته وكمت من الصينية بعدما كترتها
ورحت غسلت جنت واكفة عالمرايا اعدل بنفسي قبل لا انزل
اندك الباب وبعدها انفتح
باوعت وجان تدخل شيماء ومروة
وراهم ام قاسم والبنات

رحت ركضت على خواتي واخذتهم لحضني
ام قاسم.. صباح الخير عروستنا شنو هالجمال
ما اعرف وليدي من اتريك بدة بيج لو بالكيمر

خطية ام قاسم عايشة اللحظة
جاوبتها .. طبكنا سوية واترغيك (اتريك) بينا
سوانا لكمة وحدة

منى .. هههههه اول مرة اشوف عروس تحشش بصباحية عرسها

وبعهدها ام قاسم كامت تباوع منا ومنا مثل الي تدور على شي
مبين من وجهها اكو على لسانها سؤال
بس ما تكدر تحجي لان منا خواتي

بعدما كعدو البنات مروة وشيماء وخوات قاسم يسولفون
وحيل اندمجوا لان همة جانوا صديقات من قبل
وبعدها ام قاسم كامت

.. يالله خالة اني والبنات نازلين لان ورانا طبخ
عمام قاسم راح يجون عالغدة
وانتوا ابقوا اخذوا راحتكم

واول مطلعوا البنات واستلمتني مروة بالاسئلة
.. ها هدوش بشري شنو سويتي البارحة
خو ما اتأذيتي كليلي شنو تحسين
حتى اكتبلج وصفة علاج لمثل هيج حالات
علمود قاسم يجيبها الج من الصيدلية

شيماء.. ههههه خرب يومج مروة من اسألتج مبين عليج دكتورة

همة يحجون اني صرت بنص هدومي ما اعرف شنو اجاوبهم

مروة.. شنو شبيج هدوش اتزوجتي لو خيطو حلكج
وين لسانج يمعودة لو تعرف بيج سليمه تكوم تهلهل

جاوبتها بكل خجل
.. مغوة عفية لا تذكغيني (مروة عفية لتذكريني)
.. شكو شبيج احجيلنا

.. يابة شنو من موقف محرج صاغ (صار) بية
وداعتج
البارحة قاسم انكلب طرزان واختكم صارت القردة شيتا
هو يركض وانا اطفر من مكان لمكان

ومن زود الخفة التوت رجلي ووكعت وهو
كام يغرد من الغضب والعصبية

شيماء.. عزة بعينج هدى والله كلت ما راح تدبريها
وشسوة بيج بس لا اذاج

جانت تحجي وياي وتفتح بالعلاليك الي جايبتهم هي ومروة طلعت حلويات وعصاير وكعدت تسفط بيهم بالثلاجة القصيرة الموجودة بركن الغرفة

جاوبتها وانا اباوع عليها
.. لا بالعكس مسوالي شي شكله هو همين جان متضايق من الموقف
واحس بي اقترب مني مثل الي يريد يأدي واجب

ما انكر جان اكو نظرات اعجاب بعيونه
بس هذا الشي لوحده مو دافع قوي يخليه يتوازة وياخذني
واني خايفة وبجيت وهو عطف على حالي وعتقني
وكال بس هالمرة راح اعذرج

مروة.. شوفي هدى صحيح زواجكم تم بظروف غريبة
بس بعدما شفت امه واهله وهو همين من سلم علينا مبين شخصيته قوية اتطمنت عليج

لان اعرف انتي بين ناس ما راح يظلموج
فاتمنى منج ان تكبرين عقلج وتصيرين سباعية
وتنجحين بزواجج

دنكت بضيق ما اكدر ابوح لمروة
عن خوفي من الوحمة وحبه لرهف ووعده بالزواج منها
بعدني مماخذة على مروة. صار زمان مفاركتنا
مو بسهولة احجي وياها مثل شيماء

بس المشكله شيماء يكفي اباوع لوجهة التعبان واعرف
هي البارحة ما نامت

مروة انطتني رقم نقالها وكالت
.. هدى اعرف بيج انتي خايفة من الوحمة
فاحب اكلج اذا تشوفين ان الوحمة راح تشكل حاجز بينج وبين قاسم
تعرفين السنتر مالتي هو نسائية وتجميل
تعالي علية للسنتر اي وقت تريدين بي احسن دكتورة تجميل
ترة هي مجرد تصبغ انتي ليش هيج مكبرة
موضوعها

.. مغوة الوحمة وحدة من هواية اسباب
الي تخليني اخاف من قاسم
يمكن الوحمة اهون الاسباب

ورة ساعة راحو مروة وشيماء بعدما كعدوا يوصوني
على زوجي وببيتي

نزلت جوة للبيت وجان البيت مخبوص
بالجهال
شافوني نزلت جان يجيني واحد من اولاد كوثر
اسمه زين وكال

.. ولكم تعالوا نزلت العروس وكام يهلهل
مثل بيبته
والتموا الجهال علية
سالته.. زيوني ماما وين
اشرلي عالمطبخ وهو يباوع علية
.. عااااااا ولكم شوفوا شعرها شكد طويل
اجتي ام قاسم وفرقتهم عن طريقي
.. لك زين سمي باسم الله
يالله روح منا

باوعت علية واخذتني للمطبخ
وكالت البنات مشغولات يساعدوني بالطبخ
.. خالة تحتاجون اساعدكم
.. لا حبيبتي انتي اليوم عروس كافي عليج قسام

البنات ظلو يضحكون
دخلت هديل للمطبخ
وشافتني وعفست الوجه وكالت
.. اكول ماما بيت عمو محمد راح يوصلون همة وبيت عمو كاظم

ام قاسم كالت .. لعد خلي اروح ابدل ثوبي صار كله ريحة طبخ
طلعت من المطبخ

وهديل اجتي يمي
.. همزين راح تجي رهف اكيد قاسم راح يفرح
بشوفتها

منى زمخت بيها بغضب
.. هديل طلعي برة لا ابتلي بيج والله
هديل.. على شنو تبتلين بية ترة هو مو سر
كلنا نعرف بقاسم ورهف اول وتالي راح يتزوجون

هاله.. هديل اذا ما انلصمتي اروح اكول لماما عليج
هديل.. شنو شبيكم هديتوا علية واكلتوني بكشوري

همة يحجون واني وجهي كام صار نار
مو علمود شي بس حسيت بذل

كمت من الكرسي وباوعت لهالة وكلت
.. لا عادي انا غاح (راح) اطلع منا
دخلت فاطمة وخزرت هديل وكالت
.. لا انتي تبقين وهديل تطلع

هديل كبل طلعت وهي تحجي
.. والله زين تطردوني علمود وحدة ما عندها كرامة
اهلها لزكوها بأخوي

رصيت اسناني بغيض والله لو ما استحي وعيب
جان رحت نتفت شعرها كله بيدي
بس مع الاسف الكاع محضورة
كوة لازمة نفسي

دخلت ام قاسم وباوعت للوجوه وحست اكو شي وسألت
.. شكو شبي صوت هديل يلعلع صاير شي

منى .. لا يمة ماكو شي تعرفين هديل مخبلة وزعطوطة
وبسرعة تتمزعل

هالة.. لا هديل مو صغيرة جبيرة وتعرف الحجي كلش زين
ولازم امي تعرف بهديل شلون اتجاوزت على هدى وغلطت عليها

ام قاسم.. سدو ا الموضوع هسة الخطار راح يوصلون
وباوعت علية
ماما هدى لتضوجين هديل حسابها يمي انا اخليها
تجي تعتذرلج

هدى.. لا خالة ماكو شي يكفيني ان هي تحس بغلطها
لان اني ممسويتلها شي

ورة ساعتين
جنت فوك بغرفتي ابدل وحطيت مكياج
وسمعت الاصوات جوة شكلهم وصلوا

رشيت معطر وحضرت شال للحالات الطارئة خاف
احد موجود
ونزلت جوة وكلبي كام يدك حيل دخلت
عليهم للصالة جانوا الكل موجودين العمات وزوجات العمام وبناتهم

سلمت عليهم وحدة وحدة بس ولا ارتاحيت الهم
كلهم شايفين نفسهم ومعاجبهم العجب
واكو وحدة جانت مميزة عنهم
عيونها ولا استقرت بس تبصبص
بعدين عرفت هاي سعاد مرت عمهم كاظم
عزة هي هاي سعاد

وام قاسم والبنات يحجون ويسولفون وياهم
مجاملة
ما اخذين راحتهم وياهم
واني تلقائيا انضميت لفريقهم

نظرات رهف اكلتني اكل
جانت كاعدة وية امها فاتحة الشعر وصابغته
وطولها يجنن ورغم هذا كله عيونها مليانة حزن

عمة قاسم سألتني
.. شلونج انتي وقاسم البارحة بالعرس جان كلش
ضايج
ضليت فاتحة حلكي بالله هاي شجاوبها

وام قاسم كبل جاوبتها
وهي تضحك
.. هههههه هههه حبيبتي غضب قاسم صار خبر كان
اول ما دخل لغرفته وشاف زوجته
وداعتج اليوم كوة طلعته من الغرفة
بعد تعرفين سوالف العرسان

هي تحجي وانا وجهي كام ينطي الوان
اباوع لمنى وكوثر خربانات ضحك

هالة .. اي والله يمة وانتي الصادكة
اليوم من دخلت عليهم صينية الريوك
كبل شحتني من الغرفة عبالك خربت عليه الجو

ام قاسم كرصتها وهمست يمها
.. انا الج عوبة وانتي شعرفج بهاي السوالف
يالله امشي كومي ساعدي سرور

هالة كمزت من الكرصة وكامت من مكانها وهي تحك
.. رحمة الله والديج ام قاسم هاي جزات
الي يوفي للوطن

سمعت هديل تكول لرهف
.. رهف حبيبتي تعالي وياي خلي اراويج الملابس الي اشتريتهم

اباوع لرهف كامت من مكانها والعيون كامت تلمع بالدموع
وطلعت بسرعة هي وهديل من الصالة
وصعدوا فوك

هالة .. هدى تعالي وياي للمطبخ
شعندج كاعدة وياهم والله اذا بقيتي بعد ساعة يمهم
يصعد عندج الضغط
من فهواتهم

ما اعرف ليش احس بروحي ضايعة وياهم
يمكن لان جديدة بهذا البيت

دخلنا للمطبخ وسمعنا هشام يحجي بغضب وية كوثر
.. هاي الزفت شعدها جاية هنا
.. اي غير مرت ابوك المزيون
محسوبة علينا من العائلة ولازم امي تعزمها

.. من هسة اكلكم بس اشوفها كدامي انا غير مسؤل عن الراح يصير
مو تكولون هشام ما كال

هالة.. عفية هشام صلي عالنبي واتكفى الشر خليها تولي
اعتبرها ما موجودة هي مو يمك

دخل قاسم وشاف هشام معصب
.. شكو شبيك تجعر وصوتك واصل للخطار
هالة .. هشام متضايق من وجود سعاد مرة ابو

قاسم باوع عليه وبعيونه نظرة استفزاز.. وكال
.. سهلة ما تريد سعاد تعتب هذا البيت روح ادخل عليها
واطردها من البيت وكللها اكسر رجلج اذا عتبتي هنا

هشام.. ما اكدر صعبة امي توكف بعيوني
صعبة احرجها كدام خطارها

.. زين ما دامك تعرف عندك خطار وزحمة
ليش ما اتسيطر على غضبك وتصير حليم وتنتظر الفرصة تجي لحد عندك
وتاخذ بحيفك مو انت تروح تكمز ويقل مقدارك خليك ثكيل وراكز بكلشي

خلة وطلع قاسم
وقبل لا يطلع كله
.. روح اكعد يم الخطار بين ما اروح ابدل ملابس واجي حتى يصبون غدة

طلعوا اثنينهم من المطبخ
وسرور بعجلة.. يالله بنات صيحوا امي خلي تجي
حتى نبلش نصب غدا قاسم بس ينزل يريد الاكل كون جاهز

اجتي ام قاسم وكم وحدة من بنات عماتهم
حبوا يساعدون مدري يردون يشوفوني من باب الفضول

المهم كلنا اتعاونا بتجهيز السفرة
وام قاسم كالت
.. شنو هو وين قاسم اشو ماكو هذا بس هشام
دينقل الاكل يم الرجال

هالة.. يمة قاسم صعد فوك يبدل ملابسه
جنت احضر بالمواعين حتى يصبون

ام قاسم باوعتلي وحجت من بين اسنانها
.. عوفي الي بيدج وروحي صعدي صيحي رجلج خلي ينزل كوليله صبوا الغدة
جانت تحجي وعيونها تجدح نار

تركت المواعين ورحت بسرعة
خرب شلون بيهم ياربي تصرفات هاي العائلة ابد ما تنحزر شكلي راح اضل
اتعثر بيناتهم وانصدم الى ان ربي يفتحها علية وافهم عليهم

صعدت فوك
جان الفوك سنطة هدوء ماكو اي صوت
رحت لغرفتنا حتى اصيحه عبرت من يم باب شوية مفتوح
لفت انتباهي صوت وحدة تبجي

اتوقفت وباوعت بفضول اريد اعرف منو صاحب الصوت
اقتربت عالباب المفتوح
وجان اشوف
رهف كاعدة عالسرير دتبجي وقاسم راكع يم رجليها
وديمسح بدموعها يواسيها

يتبع

احبكم كومة احبكم هواي
اختكم نهى