أساور الفضة الفصل السابع وثلاثون 37 - بقلم نهى

مساء الخير والصحة والعافية عليكم

🌹🌹🌹🌹🌹🌹🌹🌹🌹🌹🌹🌹🌹🌹🌹

#اساور_الفضة_ج٢
#نهى_الحسون

هدى

تعرفون شنو معنى تكعد تلملم اجزاء مبعثرة من حياتك
بعدما مزقها الزمن
هذا جان حالي وحال خواتي
فرقتنا الحياة وشتت شملنا

اني وشيماء وضحى ومريم. جنا كاعدات بالكوشة دناخذ صور وانظار المعازيم كلها متوجهة علينا
تباوع علية بتمعن بصفتي عروسة قاسم
وحيد اهله

لكن فجاءة سكت صوت الديجي
وعم الهدوء بالقاعة وخفتت الانوار واتسلط ضوة خاص على باب القاعة

وجان نسمع صوت منظمة الديجي تشغل اغنية
وتعلن عن اهداء
وتكول ( هاي الاغنية طلب خاص
هدية للعروس من اختها الدكتورة مروة )

نهظت من مكاني متفاجئة واتبعوني خواتي ما مصدكات الي سمعناه
يعني شنو
جانت العيون شاخصة بترقب على مكان باب القاعة الي بدة ينفتح بالتدريج وية تشغيل الاغنية

جنا نباوع بأمل ممزوج بالحنين

انفتح باب القاعة على وسعه وجان تتقدم مروة بخطوات
بطيئة وية الاغنية
بقيت جامدة بمكاني من حجم المفاجئة احس كلبي طار
وراح يمها

اتبهت عليها التفتت
للجهة اليمنة ونزلت بنظرها وابتسمت بفخر
اتبعت نظراتها وعرفت شنو مصدر فخرها

جانت لازمة بأيدها طفلة صغيرة يجي عمرها ثلاثة سنوات
لابسة بدلة بيضة وطوق ورد ابيض
شعرها اسود طويل وبيدها سلة ورد ابيض

سمعت شهكة شيماء
باوعت عليها جانت حاطة ايدها على حلكها وتبجي

جانت مروة لابسة بدلة طويلة طالعة كلش حلوة

مشت على طول الممر والعيون تباوع عليها بفضول
اتعاونت كلمات الاغنية وية دخول مروة وحضورها المفاجيء على انهيار دموعي
جنت ابجي بحركة كلب مال وحدة مخزونة

اقتربت من عدنا بتردد
وباوعت علينا منتظرة منا تلميح يدل على تقبلنا
لوجودها خايفة نرفضها ونصدها

كلبي رف عليها وراح لعندها
واتخذت القرار ورفعت بدلتي حتى اكدر انزل من الكوشة
واتجهت عليها بدون شعور حنان الخوات يحركني
وشمرت روحي بحضنها وهي اتلكتني حوطتني بثنين ايديها

صرنا اثنينا نبجي ومنعرف شنو اكثر شي نبجي عليه
حرمانة من بعضنا لونبجي ظلم الزمن النا
جانت تبجي وتكول

.. لج هدى مندرين شكد جنت خايفة اكون خسرت فرصتي وياكم
خفت ارجع اتواصل وياكم تصدوني

واتحررت من حضنها وباوعت عليها
.. انتي سامعة بواحد يتخلى عن روحه
مروة انتي اختنا ريحة امنا شلون تتوقعين ندور وجهنا عنج

قطعت علينا اللحظة موظفة تنسيق الحفلة
وكالت ممكن تتفضلون تصعدون عالاستيج وتكملون الفقرة

انتبهت لمكانا جانوا المعازيم يباوعون بفضول ممزوج بالاعجاب
مروة من بين دموعها وابتسمت بأمتنان
.. شوف شلون همزين ما نسيت المفاجئة
لزمت ايد الطفلة الي جانت شايلة سلة وتباوع بفضول
وصعدنا عالكوشة وكعدتني
وبعدها اخذت العلبة من السلة وفتحتها وطلعت منها
كلادة ذهب كلش فخمة ولبستها الي كدام المعازيم

ورجعت حظنتني وهمست
اتمنيت اكون مصدر فخركم بهاي اللحظة
وارفع راسكم بية

حجيت من بين دموعي .. مروة يكفي ان انتي اختنا
هذا اكبر فخر ميحتاج تثبتينلنا

اباوع عليها التفتت وباوعت على شيماء وضحى ومريم
راحت على شيماء وهي كوة لازمة نفسها ما تركض عليها وتحضنها بكل لهفة
وبعدها انتقلت لضحى ونفس السلام ومريم هم سلمت عليها وكرصتها من خدها
.. لج مريم. هاي شوكت كبرتي

اباوع على شيماء وضحى ومروة كوة اتمالكن نفسهن
وسلموا بكل هدوء
لان عيون الناس كلها عليهن ودتراقب
ما رادوا يلفتون انتباه الناس بحرارة سلامهم

انتبهت لشيماء بقت لازمة ايد مروة مثل الي لكة
جزء من روحه ويخاف يتركه ويختفي مرة ثانية

ومروة لازمة ايد ضحى من الجهة الثانية وكأنما وحدة توصل للثانية مدى اشتياقها ومريم جانت لازمة ايد الطفلة وايد شيماء
واني كعدتي بمكاني بس ابتسم

والمصورة كعدت تاخذلنا صور وتصور بنفس الوقت
خلصت الاغنية جانت عن الخوات

وهنا اشرت لفاطمة تجي تاخذ صورة ويانا
فاطمة الاخت الي مجابتها امي
هي وامها كان الهم اثر جبير بحياتي

وبعدها استمرت اغاني العرس المعتادة
لفت انتباهنا صوت الطفلة جانت تسحب ببدلة مروة
وكالت
.. ماما اني اغيد اغكص ( اريد اركص)

اتسعت عيونا بتعجب

شيماء .. مروة لا تكولين هاي البنية الحلوة الج
مروة.. اي حبيبتي هاي بنتي
تعالي ماما شيماء سلمي على خالاتج

شيماء بجت بصوت يرجف وركعت كدام بنت مروة ولمتها لحضنها
.. يمة فدوة هلا ياروح خالتج

ضحى اقتربت منها بكل لهفة واخذتها لحضنها وصارت
تبوس بخدودها
ومريم سوت مثل خواتها وكامت تبوس بشيماء الصغيرة
.. لج مغوة مروة جيبيها يمي خلي اكلها من خدودها
لزمت ايدها وقربتها علية
كلتلها .. لا خليها تكعد يمي عالكوشة هي هم عغوسة
ما تشوفيها لابسة بدلة بيضة مثلي

من سمعت هي عروسة
كالت لامها .. اي اني عغوسة اكعد يمها
جانت تحجي تباوع علية بأنبهار
وعيونها تلمع بأعجاب على بدلتي عبالك
دتباوع على وحدة من اميرات (والت دزني) كدامها

شيماء تحجي بصوت عالي حتى نسمعها لان صوت الديجي مغطي على الاصوات
كالت.. بنات تدرون هسة شنو اتمنى
ضحى.. كولي شنو
.. اتمنى اخطفكم ونروح
لمكان خاص لوحدنا حتى نكعد سوية
عندي كومة حجي

ضحى .. عفية حتى ناخذ راحتنا بالسوالف
انا مثلج عندي هواي حجي بكلبي ولهفة
هدى.. ولكم اني كوة لازمة نفسي كدام المعازيم

ضحى .. بس شنسوي لمروة اجتي بالوقت
بدل الضائع. ههههه

مروة.. غصب عني استغليت هاي اللحظة بالذات
حتى اضمن تسامحكم الي كدام الناس
كلت الواجب والمستحة راح يقيدهم
وما راح تكدرون ترفضوني

مروة.. بس ولا يهمكم بعد العرس اخذكم
لأي مكان تردونه حتى نكمل جمعتنا سوية شنو كلتوا

هدى .. طبعاً موافقين هاي ما يحتاجلها سؤال
التفتت علية هي وشيماء وضحى ومريم يضحكون

ضحى.. حبيبتي انتي مامشمولة بهاي الدعوة
مروة.. شكلج نسيتي نفسج انتي العروس

حجيت واني حاصرتني البجية شوفة مروة نستني نفسي
ومكاني والدوامة الي اني بيها

كلت بقلة حيلة .. لا عفية بنات اخذوني وياكم
والله اصيغ (اصير) عاقلة انا هادي اخوكم الصغيغ (الصغير) شنو نسيتوني

شيماء .. شنو تردين قاسم يموتنا
.. يا الله اشكد اتمنى اجي وياكم

مريم حجت بصوت محروم
.. مثلي حتى اني اتمنى اجي وياكم بس......

قطعت كلامها ودنكت
رجعت رفعت راسها وهي مبتسمة وكملت كلامها
.. بس اني عندي دوام ما اكدر اكون وياكم
جانت تحجي وتباوع بأتجاه ميز سليمة وجنان

ما عبرت علينا نظرات خوف مريم
وهنا شيماء ومروة حجوا سوية بصوت واحد
.. تعالي ويانة وانا اوصلج للمدرسة

التقت نظراتهم سوية وابتسموا لبعضهم
جانت هاي اللحظة اثمن واغلى لحظة بحياتي
ولو خيروني بكنوز الدنيا ما ابدلها ولا راح الكة اغلى منها
احنا الخمسه مجموعين ناسين الدنيا وهمومها دنضحك فرحانين

رغم الظروف والمشاكل الي مرينا بيها احنا ومروة
بس بالاخير نبقى خوات والدم يحن
كان كفيل بنسيان الزعل والعتب والصار غصب عنا مو بيد احد هذا مقدر ومكتوب

سبحان الله محبة الخوات فطرة بشرية الله زرعها بكلوبنا من يوم ولادتنا

قاطعنا صوت ام قاسم وهي دتصعد عالستيج والكوشة وراها هالة والبنات
ام قاسم.. يا هلا وكل الهلا بدكتورتنا الغالية والله نورتي العرس وسلمت عليها

اجتي هالة واقتربت مني
.. لج عوبة ليش ما كلتيلي انتوا راح تسوون هيج فقرة بالعرس
ضحكت .. لج شلون اكلج واني ما عندي علم بيها
اني هم مثلج متفاجئة بدخلوها
وجانت احلى مفاجئة

منى ببتسامة .. ها بنات شنو رأيكم بالفقرة عجبتكم لو لا
هاي الفقرة ترتيبي اني صاحبة الفيكة
والتخطيط احم احم

عقدت حواجبي وباوعت متفاجئة
والتفتت على مروة جانت دتسلم على خوات قاسم وام فرزدق وام صهيب

ورجعت اباوع على منى وسألتها
.. شلون وصلتلج مروة
منى.. والله يا حلوة مروة تصير زميلة زوجي الدكتور
والظاهر هي تعرفني واني ما اعرفها

وجان يجي زوجي الحبيب ويكلي زميلتي الدكتورة تريد تحجي وياج
وهنا بدت مروة تعرفني على نفسها
وكالت شكد سعيت حتى اوصل لاي شخص من اهل قاسم

ما استغربت من كلام منى
لان اعرف بمروة اذا حطت ببالها شي توصله
لان هي صاحبة اصرار وارادة

وبعد مرور ساعتين
خواتي بقوا واكفات يمي بالكوشة
مروة تحجي وية بنتها .. ماما مشمش كافي ركص
جنت كاعدة عالكرسي الطويل الي متوسط الكوشة وفارشة بدلتي
ومشمش صاعدة يمي عالكرسي ودتركص
جانت دبدوبة والشعر طويل
.. لج مغوة (مروة)هاي شنو بنتج اتمنى اكغطها (اكرطها)
لوما اني العغوس (العروس)جان كابلتها وكعدت اغكص(اركص) وياها

لفت انتباهي من دتحجي كالت
.. لا ماما مو كافي اغيد اغكص

ضحكنا اني والبنات متفاجئات
ضحى .. هههه مروة هاي شنو بنتج دتغوغو

مروة.. شسوي انها الجينات الوارثية
كعدنا نضحك على حركات مشمش
ضحى.. بنتج شكلها وراثة حتى الركص

جنت ملتهية ومندمجة ببنت مروة وسوالفها
وجان اسمع من بعيد صوت طبول الحرب

اااااقصد طبول الفرح جانت هاي اعلان عن بوادر انتهاء العرس
كلبي كمز من مكانه
سمعت ام قاسم كالت

بنات حضروا نفسكم اجتي الزفة
راح يدخلون قاسم والرياجيل

اباوع لخواتي
شيماء لبست سترة فوك البدلة لان مو محجبة
ومروة لبست سترة منسقتها وية فستانها ولبست شال على راسها الظاهر مروة متحجية
وضحى لبست عبايتها والبركع
ومريم لبست بس جاكيت عالبدلة هم مو محجبة

وهالة كعدت تساعدني البس البرنص وهمست
.. قاسم اتصل وكال غلفيها عدل
جماعته والولد راح يفوتون وياه للقاعة حتى يزفونه

هي وتحجي واني اسناني اصطكت من الخوف
وجان يدخل قاسم على ايقاع الدف واغاني الهوسات
وصل وكعد يمي
وهالة بالكوة كدرت تقنع مشمش تنزل من يمي حتى قاسم يكعد

جانت مشمش مبرطمة شفايفها وتباوع لقاسم
اشو هاي بقت واكفة يمنا والعيون تلمع بالدموع
والخدود حمر

شافها قاسم وكال
.. هاي منو البطة الحلوة
جاوبته .. هاي مشمش بنت اختي مغوة
بس مشمش اعترضت على كلامي وحجت بكل ثقة
.. لااااا اني مو بنت مغوة اني العغوسة وانت وتباوع على قاسم العغيس

يعني صدك ضحكتني من كل كلبي جانت مروة
والبنات يضحكون عليها
قاسم.. حلفي والله
هي هاي العايزة كافي علية خالتج
جنت بوحدة تالي صرت بثنين
لافوكاها هاي هم تغوغو

جان يحجي ويبتسم لكن كل هذا ما كدر يخفي الغصة الي بعيونه

شيماء
جنت اباع على بنتي واختي الصغيرة شلون زفوها
كدام عيني نزلت دموعي
يعني شنو اني صفيت لوحدي
بعد ماكو احد ينتظرني من ارجع من دوامي والجيء الها
احجيلها عن خوفي وعن احلامي

جنت اباوع عليها جانت رافعة بدلتها وقاسم وهالة ديساعدونها حتى تصعد بالسيارة

عرس هدى جان عبارة عن مجموعة مفاجئات
لكن حسيت على ايد تشد على كتفي تواسيني
التفتت جانت مروة واكفة يمي هي وضحى ومريم
سحبت نفس عميق وابتسمت للبنات

وبعدها طلبت من مروة تجي ويانا للبيت
مروة.. لا شيماء ما اكدر اجي وياكم
لذاك البيت الي انظلمت بي وانحرمت بي منكم
اني حرمت على نفسي ادخل بيت سليمة واثير
لان ما اطيق اشوف ركعة وجهم

سكتت مجاوبتها حقها
نفس شعوري اني هم اكره رجعتي للبيت من ورة سليمة
بس وجود خواتي هو الي جان مصبرني ويخليني ارجع للبيت علمودهم

سألتها بخوف.. يعني شنو بعد ما نشوفج
مروة.. لا ليش ما تشوفوني هو اني ما صدكت انجمع بيكم
وينتهي الخلاف بيناتنا ونتصالح شلون اعوفكم بعدما لكيتكم

انتوا تعالوا وياي لبيتي
تدرون بنات جانت امنيتي تتجمعون عندي بالبيت
ونحجي براحتنا بدون ما احد ينغص علينا لمتنا مثل سليمة واثير
اي صدك على طاري سليمة شفتوا سليمة شلون اجتي تنجلط من شافتني دخلت للقاعة
ضحى.. ههههههه لج اي جان شكلها يخرب ضحك
مريم بخجل .. هههة جانت المفاجئة واضحة على وجها
حتى شكيت بيها دخلت سكتة قلبية

بعدها مشينا للسيارات المجتمعة كدام قاعة العرس وصايرة خبصة
اتفقنا وية مروة نلتقي على يوم الجمعة
مريم اترخصت وكالت راح اروح اشوف ماما وين

مروة .. تجوني عالغدة انتي والبنات
بعدني ما شبعت منكم واتمنى اخذكم هسة وياي للبيت
بس شكلي صرت طماعة ورحت زايد بالحلم

شيماء.. لا وين مانكدر نجي وياج شوفة عينج كل وحدة بينا عندها ارتباط
ضحى زوجها عكرة مستحيل يقبل تبات عندج
ومريم متكدر عندها دوام
اني باجر راح تخلص اجازتي ولازم ارجع اداوم بالمستشفى

مروة.. اذا تردين اجدد لج الاجازة مرة ثانية

باوعت متفاجئة .. مروة لاتكولين انتي ورة موضوع اجازتي

ابتسمت.. اي اني ورة موضوع الاجازة مالتج
.. هاي شلون وشوكت ما ادري عندج معارف بالمستشفى
ابتسمت.. لتخافين اختج الدكتورة مروة مو شوية عندي نفوذ
اكدر اوصل بيها لاكبر راس
جنا نحجي

وشفنا مريم اجتي تبجي بغيض
قطعنا كلامنا والتفتنا عليها
شيماء.. شكو مريم ليش تبجين منو وياج

حجت مريم من بين دموعها
.. هذا واحد حقير زمخ بية لان جنت واكفة ادور على سيارة بابا امجد
ماما كلتلي روحي شوفي سيارة ابوج وين صارت
يكول منتظركم عالشارع كليله خلي يقرب سيارته عالبوابة
بيبي سليمة ما بيها حيل تمشي
شيماء.. اي وهذا شنو حجة وياج
عاط بية بنترة
.. كال هي انتي شنو تسوين واكفة هنا
حضرتج دتستعرضين انتي وشعرج هذا

انا كمزت من مكاني جنت مرتبكة
لان كلها شباب وهوسة وفشلني كدامهم
جاوبته .. منتظرة سيارة بابا

وهو اتقدم علية خوفني
وكال بزمخة .. بالله شو امشي فوتي للقاعة وما تطلعين الا وية اهلج
ورجعت تبجي .. الحقير حسسني عبالك اني مستغلة فرصة انشغال اهلي بالعرس
حتى اخذ راحتي
الحقير عباله راح اخاف من عضلاته هو وشكله

مروة بغيض.. بالله شو راويني اياه
اشرت على مكان قريب على مكان بوابة القاعة
وجانت السيارات متجمعة و تريد تطلع

وجانوا الشباب منتشرين حتى ينظمون سيارات الزفة
مريم.. هذا الولد الطويل ابو القاط الكحلي الي عنده لحية

مروة تباوع على المكان الي تأشر عليه مريم
.. ها اي ذاك شفته بسيطة انا اله خلي يصبرلي

التفتت على ضحى وكالت .. هاج ضحى لزمي مشمش
عينج عليها خلي اروح اشوف هذا شبي

وحجت وية مريم .. بالله شو تعالي وياي
اخذتها ومشت
وانا رحت وراها اهديها

.. يا عزة لج مروة لحظة اوكفي وين رايحة
لج عيب هذا مبين من اقارب العريس
متسوى نسوي مشكلة
مروة.. لا والله ما اسكتله ولا راح اعديها لحضرته

.. يبووو الله يستر
جنت احجي وامشي وراهم
وصلت لمكان الولد الشاب
ووكفت وراه جان واكف يم سيارة بيضة عالية
فاتح البيبان مالت السيارة وديحجي بالنقال مستعجل

.. يمة رحمة على والديج وين صرتي الزفة راح تطلع
ومنتظرينج تطلعين
يعني شنو راح تعزلين القاعة على ايدج اليوم

مروة حجة من وراه بنترة. .. انت هي

اتعمدت تحجي وياه بنفس اسلوبه
مريم واكفة وراها واني واكفة يمها حتى اهدي النفوس

عقد حواجبه والتفت ونزل نقاله وباوع على مروة
.. العفو دتحجين وياي

.. اي وياك انت
رجع رفع نقاله وحجة وية المتصل.. يمة يالله انا انتظرج استعجلي
وانهى الاتصال وباوع علينا
.. اتفضلي شنو ردتي

مروة بتهجم.. انت على اي اساس تصيح بوجه
اختي وتفشلها كدام الناس منو انطاك الحق تتجاوز عليها

اشر على نفسه .. انا متجاوز على اختج هاي شوكت
سحبت مريم وحطتها كدامه
وكالت.. احجي مو هو هذا الي حجة عليج
مريم هزت راسها بتأكيد وكالت
.. اي هو
جانت تحجي وتباوع عليه خايفة
وكالت .. مروة عوفي ماعليج بي
لزمت ايد مروة
رفع حاجبه وحجة .. زين ما دامج حريصة على اختج
وهيج خايفة عليها ليش ما جنتي وياها

من جانت واكفة والشباب واكفين يصجمون بيها
اتسعت عيون مريم وحطت ايدها على حلكها
.. جذب ماكو هيج شي جنت واكفة لوحدي

.. اي لان حضرتج مطفية حقج منتنتبهين عليهم
اذا حضرتج جنتي ملتهية تكلبين يشعراتج

جان يحجي وعيونه تجدح نار
ومروة حجت.. وانت منوا تحاسبها اخوها ابوها
علمود تفرض رجولتك عليها

.. اني بصفتي ابو العرس وهي ما دامها من معازيمنا
اذن صارت من عرضي وتحت حمايتي لحد ما توصل لبيته

قطع علينا الكلام صوت ام قاسم
اقتربت من عدنا ووراها هديل وهالة وحجت وهي تباوع عالوجوه بتسائل
.. ها يمة هشام شكو شصاير ليش معصب
جانت تحجي وتباوع علينا

هشام رجع شعره للخلف والربطة جانت محلولة ملتفة عالركبة
.. يمة هيج كلشي ماكو روحي صعدي قاسم حرك الدنيا يكول وين صرتوا

مروة.. خالة ام قاسم ابنج اتعدة على اختي بالكلام
ام قاسم .. يا يمة هشام على بختك انت تعرف هاي منو

هشام عاقد الحواجب بغيض.. منو
.. هاي اخت العروس زوجة قاسم وهذني خواتها الكبار
اشرت علية وعلى مروة

مسح كف ايده على وجهه وسحب نفس عميق
وحجة من بين اسنانه وهو مستعجل يريد يصرفنا
.. اسف خيتي حقكم علية
قطع كلامه صوت نقاله رفعه وباوع عليه وكلب عيونه بنفاذ صبر

.. يمة هذا قاسم ديتصل ابوس ايدكم صعدوا
راح يطين عيشتي لان هواي اتأخرتوا

ام قاسم .. حبيبة مسحيها بوجهي وعذريه ميعرفها لاختج
وباوعت لمريم .. مسحي دموعج خالة.
انا اعلمه بالبيت جانت تحجي وتخزر بهشام
اباوع عليه هو بس ينافخ ويباوع على ساعة ايده

اتدخلت حتى اهدي الموقف.. لا خالة مصار شي
احنا اهل ان شاء الله وما بينا زعل

ومروة تخزر بي وكالت.. الله حابه طلع ابنج جان صار
حسابه عسير

زم شفايفه بغيض كوة لازم روحه كدام امه ما يحجي
لان الموقف متأجج ما يحتاج نار

بعدها ام قاسم اترخصت من عدنا
و اعتذرت مرة ثانية مني ومن مروة على الاشكال الي صار

هدى
بعدما ودعت خواتي جنت كلش خايفة اتوسلت لشيماء تجي وياي
بس رفضت كالت عيب ما يصير
صيري سباعية

وراحت وعافتني يم قاسم الي كام من مكانه وساعدني حتى اكوم وياه
ونزلنا من الكوشة
واصوات المزايق والهلاهل والهوسات تتبعنا

بعدها صعدنا بالسيارة وهالة جانت وياي بكل خطوة
روحي صارت معلكة بهالة من كد الخوف

صعدت بالسيارة وكعدت اعدل ببدلتي والبرنص
وقاسم كل شوية يتصل ويحجي بغضب وية هشام اخوه
هو منا اني كلبي يريد يوكف من الخوف

وهذا كل شوية صارعني بصوته
والله يمكن راح يصير بية سكر
من ورة الهبطات

عفية نقال ما يسكتله لحظة
وبعدها اجاه اتصال حجة قاسم
.. رائد هاي وحدة وياك ولك ناقص اشكد انتظرتك
كل شوية اباوع عالباب اكول هسة يدخل ظلعي ويكحل عيني بفرحته بيوم عرسي
تالي تكلي طيارتي اتأخرت علية

جان هو يحجي وانا حابسة النفس ومتشنجة
حسيت بصوت وشة بأذاني وعرك جسمي
ما اعرف شصار بية من ذكر اسم رائد

بعدها انتبهت على سيارتنا اتحركت
ووراها اتحركت السيارات واصوات ابواق السيارات
سووها مثل الموسيقى

طلعت الزفة وعلى طول الطريق اني مدنكة
واباوع على مسكة الورد الي لازمتها بين ايدية

جانت الافكار تتلاطم بداخل راسي مثل امواج البحر الهائج
جان الوضع داخل السيارة كلش هادىء عكس
اصوات الهوسة بخارجها

يعني اذب الابرة اسمع صوتها من كد السكون
ما اسمع غير انفاس قاسم المخنوكة
كل شوية يجر حسرة

انتبهت للسيارة خففت سرعتها
وبلحظتها عرفت وصلنا لمنطقة بيت قاسم

رفعت عيوني حتى اشوف احنا وين
وجان تجي عيوني على شوارع منطقتي
القديمة جانت السيارة عبالك متعمدة
تمررني على طريق مدرستي الي هو نفسه يوصل لبيت اهل قاسم

اباوع للشوارع والذكريات هجمت علية
والعيون غركت
وكلبي يناغي الذكريات
ها ياشارع احلفك بالله هم حنيت لخطواتي على دربك
مثلما ما انا حنيت للمشي على رصيفك

بطئت السيارة تريد تستدير بنهاية الشارع
واصوات السيارات لازالت تتبعنا

فجاءة وجان اشوف مشاعل المخبل يركض
وية سيارتنا ويركص ويهوس
شهكت وحطيت ايدي على حلكي
ما اعرف اضحك مدري ابجي على هذا الموقف
شكلي راح اصير مخبلة مثل مشاعل وافقد عقلي

يعني سخرية القدر طالت ووصلت على ابواب حياتي
اباوع لمشاعل لابس كلابية مقلمة جبيرة ومعلك
جيس بركبته مبين مملي حلويات الظاهر ماخذها من بيت ام قاسم
جان حافي. وفرحان

ااخ يامشاعل والله الي وياك مواقف
وشكلك راح تصير اشارة ومعلم تاريخي على كل اطلال ذكرياتي
لاعب دور البطولة في كل ذكرى من ذكرياتي

ااتوقفت السيارة وبدوا الناس ينزلون من سياراتهم وقاسم
سبقني ونزل من السيارة يريد يستدير

حتى يفتحلي الباب وينزلني
اباوع لمشاعل المخبل واكف يركص
ويصيح عالناس

صرت استنجد بمشاعل
(يامشاعل ما الله يهديك الي
وتهد على قاسم بالحجار على راسه وتنسيه
اسمه واسم هدى وعشيرتها )

ضحكت على افكاري المعوقة
انفتح الباب وقاسم واكف يمه ساد علية الرؤية
نزلت من السيارة وجتي هالة ساعدتني انزل

بعدما نزلت بديت امشي وية قاسم متجه لبيتهم
باوعت باب بيتهم جان مفتوح على وسعه

لكن فجأءة سمعنا صوت رمي بالجو
انتبهت على قاسم اتوقف بمكانه واني اتوقفت وياه
رفعت راسي وباوعت بأتجاه نظرات قاسم
وجان اشهك بصوت مكتوم حطيت ايدي على حلكي
مصدومة

رائد رافع سلاحه ليفوك وواكف يم عتبة باب بيت قاسم
كام يرمي وعيونه تلمع الم حسرة

وحجة بعالي صوته للكصاب
.. يالله هسة ابدي اذبح جوة رجيلن
الغالي
جان جايب خروف وبدة الكصاب يذبح

اباوع لقاسم جان يبتسم بفخر
وكال.. والله عرفتك راح تحضر
اجة رائد واتقدم عليه

وكال .. مبارك عرسك يالظلع شلون ما احضر زفة الغالي
اتقدم لقاسم ولمه بين ذراعه واتبادلوا الاحضان
واني واكفة جامدة بمكاني والرجفة صارت تسري بداخل ظلوعي من المنظر الكدامي

ياربي شنو هالمحنة تركت رهف وراي بالقاعة منهارة
واجيت ولكيت رائد منتظرنا بعتبة الباب

الدنيا شكد غريب امرها
حطمت اربعة قلوب جانت عامرة بالحب
بس مع الاسف ولا وحدة من هاي القلوب المسكونة
بالحب .. واحد بيهم سعيد

هو صحيح الحب موجود لكن طريق الوصول اله وعر وصعب
بالاخير صفينا ولا واحد بينا كدر ينال محبوبه

انتبهت على صوت رائد جاي يهنيني
.. مبروك عليج يامرت الغالي

حجة هاي الكلمتين وابتعد مخنوك
وانتبهت على قاسم حثني حتى اتحرك وامشي
ادخل للبيت واجاني صوت ام قاسم
.. يمة فوتي وخطي برجلج اليمين

حتى تخضر دارنا بيج وبجهال قاسم
جانت تحجي بصوت مسموع تريد تسمع العذال

بعدما دخلوني للبيت نزعوا عني البرنص
وبعدها صعدنا انا وقاسم فوك للغرفة
وانا من كد الخوف احس صرنا اني والخوف اخوان
لان جان وياي بكل خطوة اخطيها وية قاسم

دخلنا للغرفة وانسد الباب ورانا
والتفتت عالباب المسدود اباوع عليه بجزع
لفت انتباهي حركة قاسم

اتوغل لداخل الغرفة
حل ربطة العنق مثل المخنوك وشمرها عالكرسي
ولحكتها السترة وفتح اول دكمتين من القميص

ومسح على وجهه وسحب نفس عميق وباوع علية
لكاني بعدني واكفة بمكاني مثل الطفلة التايهة الما تعرف الطريق منين

ابتسم على شكلي وعيونه سافرت على طولي
جانت نظرة الاعجاب بالمنظر الكدامه واضحة
لميت شفايفي بحذر

وهو حجة .. استغفر الله يابة شبيج مبرطمة الشفايف
لا تخافين ترة بعدنا ما كلنا حلال

.. تعالي فوتي ارتاحي خوما تكضيها علينا واكفة يم الباب
.. لا ما اغيد ( اريد) خليني هنا مغتاحة ( مرتاحة)

.. اي هو مبين كلش مرتاحة والدليل عيونج
الخايفة

.. لا اني ما خايفة بس شوية هواية غاح (راح) اموت من الخوف

.. الظاهر انتي شكلج راح تتعبيني وياج
شوفي انا طالع وانتي اخذي راحتج وبدلي ملابسج

جان يحجي وعيونه لازالت تسرق النظرات
حسيت بروحي عبالك واكفة كدامه عارية
بدون ملابس

(طلع من الغرفة او بالاحرى انهزم قبل لا يضعف
كدامها ويفقد صبره ويقع المحظور )

سحبت نفس براحة انتبهت لنفسي جنت حابسة انفاسي بوجوده
اتوغلت للغرفة اباوع عليها وباوع لشكلي بالمرايا
اكتافي وزنودي جانت كلها طالعة

كعدت عالسرير ودنكت ونزعت الحذاء العالي

خرب والله اتكطعت رجلية من وراه
واتنهدت براحة
لكن ما لحكت اخذ انفاسي

دخلت ام قاسم وبنتها الجبيرة فاطمة ومنى
جانوا شايلين صينية العشا مغطاية
ام قاسم.. ها عروستنا اشو بعدج بالبدلة

بلعت ريكي وكمت امتمت
.. ها انا هسه اغيد( اريد) ابدل وانتوا دخلتوا

منى.. اصلا حتى لو ردتي تبدلين ما راح تكدرين تنزعين البدلة لوحدج
بالله شو تعالي
اتجهت علية وصدك كعدت بالربع ساعة
تنزعني البدلة وتفتح التسريحة
عبالك كاعدة بورشة تصليح سيارات

وام قاسم وفاطمة يتحركون بالغرفة انتبهت لفاطمة
جانت شايلة ثوب ابيض
اقتربت مني وحطته عالسرير
عززة هذا روب النوم
صرت ارمش بعيوني من الاحراج
وام قاسم جانت شايلة دشداشة رجالية بيضة وحطتها يم
الروب

وبعد مرور ساعة
جنت كاعدة عالسرير
بعدما جهزتني منى
بعدها استلمتني ام قاسم وكعدت توصيني
ادير بالي على ابنها واسعده
اجيت ابجي هو منو المفروض توصي اني لو ابنها

بعدها طلعت ام قاسم ومنى وبقت فاطمة اخت قاسم الجبيرة
يمي تفهمني شنو اسوي من يقترب مني قاسم
فاطمة بصوت قوي كملت كلامها
.. هاج اخذي هاي القطعة البيضة خليها جوة ايدج

يمة انا هي كالت هيج واني غديت ماي من المستحى
عمي ستر الله ضحى اختي على الاقل جانت شوية خجلانة
بس هنا الاخت جانت تحجي بالقلم العريض
ونوب هي الله يحفظها تحجي بجدية يعني تخلي الواحد غصب عنه يرتعد

كامت وهي تكول
.. يالله بعد ما اوصيج حبيبتي
شوية انتي اتحلحي مو تصيرين فاهية ترة الرجال
يحب البنية الفطنة والحركة

يمة هي منا ضخمة وطويلة ونوب تحجي وياي هيج عبالك عتريس

بحيث هي من كامت من مكانها تريد تطلع
انا كبل كمزت من مكاني وكفت كدامها
عايز بس اخذلها تحية مثل الجندي

بعدها هي طلعت من الغرفة وسدت الباب
وانا صرت احوم بالغرفة
مثل البزونة حابسيها بغرفة لوحدها

ياربي شلون راح اتعدي هاي الليلة وية قاسم هاي
معقولة اصير سباعية
واتحمل قاسم يجي ياخذني ويسويني مرته
كول وفعل

جنت اروح وارجع بالغرفة
ياربي شلون بية وين اروح اذا شاف الوحمة

وسمعت صوته صار قريب عالباب
فتح الباب ودخل ووكعت عينه علية

سحب نفس عميق وغض بنظره عني ومسح على وجهه
وبعدها دار وجهه وراح اخذ الدشداشة واتوجه عالحمام
اسمعه يحجي وية نفسه
.. يالله هاك استلم يقاسم
شلون راح اتحمل وهاي واكفة كدامي هيج

شهكت وحطيت ايدي على حلكي
عززة اليوم هرقل ناوي علية
يمةةةةة

ورة دقايق طلع من الحمام وهو لابس الدشداشة والمنشفة على راسه باوع عالصينية
ورجع باوع علية وكال

.. هاي شنو بعدج ما اكلتي
ترة انا اكلت
همست بصوت ناصي كوة ينسمع
.. ما اغيد (ماريد)شبعانة

بربك يا اكل بهذا الزلك تعال كابلني والطم

جان يتحرك بالغرفة واني اباوع عليه شلون راح وكف كبال المراية
وكعد يمشط بشعره
ورش عطر وبعدها

دار وجهه وباوع علية
نظرات عيونه تكول واخيرا فرغتلج

اجة وكعد يمي عالسرير وبدة يحجي ويمهد للقادم الاتي
.. شوفي يابنت الحلال
انتي صرتي مرتي وحلالي فأريد منج تخليني اتهنا
بحلالي

اقترب علية والنية باينة من عيونه
لزم ايدي
واني كاعدة عالسرير اباوع ليكدام اجيت ابجي من الخوف
لمسات ايده انتقلت على طول زندي
وكال بصوت هامس
.. دخيل ربج شكد ترفة
اخاف امرر ايدي على بشرتج وتنجرح
قرب راسه على ركبتي وحرارة انفاسه صارت قريبة على النبض

يمة هو قرب راسه
وانا كمزت من مكاني ووكفت
وبهاي اللحظة
هجرتني شجاعتي و عقلي اتخلى عني
وتركوني لوحدي اواجه هرقل

عكد حواجبه ونهض من مكانه وراي
.. شكو ليش كمتي بعدنا ما كلنا بسم الله

ابتعدت عنه ودرت حول السرير وصار
السرير بينا

من شاف حركتي غمض عيونه بصبر
وكال بغضب
.. شنو كاعدة تلعبين وياية
يالله شو تعاي اليوم اخذج
اخذج وين ترحين وراج وراج
جان يحجي وهو يمشي بتجاهي

عاد انا هو حجة هيج
وانا الجني الهداوي برز للساحة
واتبخرت اخر قطرة عقل براسي

وجان اطفر فوك السرير
وحجيت بخوف وانا واكفة عالسرير

.. بغوح ابوك لا تقتغب مني
(بروح ابوك لاتقترب مني )

يتبع

ملاحظة ..
ياجماعة الخير منا ورايح انزل البارتات
طول ايام الاسبوع ما عدا يوم الخميس
فهذا راح يكون يوم عطلتي
اشكرا تفهمكم وتعاونكم معي
لكم مني اجمل تحية

احبكم هواي احبكم كومة
اختكم نهى