أساور الفضة الفصل الحادي وأربعون 41 - بقلم نهى

مساء الخير عليكم
🌹🌹🌹🌹🌹🌹🌹🌹🌹🌹🌹🌹🌹

#اساور_الفضة
#نهى_الحسون

هدى
مشيت ورة خالة ام قاسم ودخلت لغرفتها
واحس كلبي معصور باحساس غريب خوف على ترقي
سديت الباب وحسيت احساس الخوف وصل لايدي وكامت ترجف

عرفت من نبرت صوتها الصارمة والحادة
ونظرة عيونها ان ام رائد كالتلها شي
وصلها لهاي الدرجة من العصبية

بس ما اعرف شنو هو بالتحديد الي كالته ام رائد
لان اني مواقفي وياهم هواي ما تنعد

وكلهم ما اتشرف ولا اريد ام قاسم تعرفهم عني والله صعبة اموت بدمي

وكفت كدامها منتظرتها تحجي
شكلي اتعودت على وقفة الترقب بهذا البيت
دائما احس محاصرة من قبل قاسم وامه
حبست انفاسي وعيوني تدور بوجهها
عن شي يطمني

منتظرة اعرف شنو تريد تكولي
وكأن حياتي معتمدة على الموضوع الي رايدتني بي ام قاسم

اقتربت مني وحطت عيونها بعيوني
وكالت.. انتي ليش ما حاجيتلي عن موضوع الوحمة

ارتديت للخلف وحطيت ايدي على حلكي من صدمة المفاجأة
لا يا ام رائد النذلة على هاي الدكة الناقصة
شكد سامعة بناس حقراء بحياتي مثل هيج حقارة
وقلي حقود عند بشر مسامعة

بكل ضني راح تحجيلها على موضوع خطوبة رائد الما صارت

جنت ساكتة مصدومة واحس دموع الخجل معلكة باهدابي
كوة لازمتها ما تنزل

ام قاسم كملت كلامها
.. ليش خليتيني كدام ام رائد
بموقف محرج
عبالك وحدة مستغفليها

احمد الله ان ربي انطاني الفطنة
من حجتلي ام رائد بخصوص الوحمة
وسألتني وكالت
.. ام قاسم انتي تعرفين بهدى عندها وحمة لو لا ؟؟

شهكت مصدومة من العرفته عنج

وهي كعدت تتشفة بجهلي بموضوع الوحمة
عبالك وحدة جاية مخصوص حتى تشوف
الصدمة على وجهي

بس اني اتلافيت مفاجئتي بالموضوع
وكلتلها اني اعرف بالوحمة اي عند هدى
بس انصدمت انتي شلوون عندج علم بيها ووين شفتيها

يعني وضحتلها ان سبب مفاجئتي هي معرفتها بالموضوع. مو جهلي بي
ليش المرة الغريبة تجي تكلي وانتي حتى مامفكرة
تكوليلي عن الوحمة

هي جانت تحجي واني لو يذبحوني من الاحراج قطرة دم ما يلكون بية
دنكت راسي واخر نقطة لمقاومتي لدموعي انهارت ونزلت

.. خالة اسفة مكدغت (مكدرت)احجيلج
جنت استحي منها وهي مو شي حلو وافتخغ (افتخر) بي واكعد احجي بي. للناس

ام قاسم .. بس انا مو اي واحد
انا ام زوجج بكل ضني من اتزوجتي قاسم ودخلتي بيتنا كلت صار عندي بنية سابعة
وحسبتج مثل بنتي عبالي راح تشوفيني مثل امج

بس الظاهر انا رايحة زايد
على كلٍ انا ما اكدر اجبرج على محبتنا
بس حتى نتلافى هيج موضوع مستقبلا

كلشي يخصج او يصير وياج مستقبلا وتشوفين ان اني لازم اعرفه
تعالي كليلي بي حتى يصير عندي علم

مو بعدين اسمع من الناس الغربة
واني كاعدة بينهم مثل الاطرش بالزفة

هي حقها بكل كلامها بس اني مو بيدي صعبه علية
جاوبتها .. ان شاء الله خالة اوعدج هذا الشي الصاغ (الصار) اليوم
ماغاح (ماراح) يتكغغ (يتكرر) بالمستقبل

اقتربت مني وكالت
.. بالله شو رفعي ملابسج خلي اشوفها
رفعت ملابسي واني ميتة من الخجل كرهت نفسي

وكعت عينها عليها وشافت شكلها
ومدت ايدها
واتلمستها ومشت ايدها عليها وكالت

.. ترة مو كلش تخوف مثلما اتوقعتها
صحيح ماخذة مساحة من جسمج
بس ممأثرة على ملمس بشرتج
يالله الحمدلله على كل حال هاي ولا غيرها

ظليت واكفة اباوع عليها بضياع
ودموع الخجل والاحراج غركتني

.. بس سؤال قاسم شايف الوحمة يعرف بيها؟؟؟

دنكت راسي ومجاوبتها
مستحية

.. يعني افتهم من سكوتج ان قاسم مشايف الوحمة
معناها قاسم لحد الان ما مقتربلج

شهكت بخوف عزة العزاني هاي شلون ورطة
حتى دموع الاحراج احسها نشفت لوحدها من الخوف
بس لا تروح لقاسم وتسأله ليش لحد الان ما متمم زواجه وياية

خرب بالقسمة الطويلة الغير المنتهية

يبوووو شلون ورطة وتعال قاسموف شيقنعه
شلون يقتنع اني محاجية لامه وهي من يمها تخمن ياربي والله حيرة

باوعت عليها وحجيت بسرعة
.. لا خالة خطية قاسم دائما يقتغبلي (يقتربلي )
ويحاول وياي

بس اني من الخوف اصده تعغفين (تعرفين)
خوف العغوسة (العروسه) وضيفي فوكاها موضوع الخجل من الوحمة
وخوفي من غدة (ردة) فعله اذا يشوفها

ام قاسم.. شوفي خالة هدى
اذا جان عذرج عالوحمة فهاي سهلة
من باجر اخذج
واحجزلج عند دكتورة تجميل

جاوبتها بسرعة ومن دون ماانطيها مجال تقترح هواية شغلات

.. لا خالة ماله داعي اختي مغوة(مروة) قبل الزواج
اقتغحت (اقترحت)علية تاخذني عند صديقتها
طبيبة تجميل بس اني التهيت وتعغفين (تعرفين) الزواج صاغ (صار) بسغعه (بسرعة)

ام قاسم .. اني اقترحت عليج التجميل علمود انتي بنية
وزوجة ابني واني مثل اي ام احب لابني كلشي حلو
وخلي ببالج ترة مو عيب البنية تسوي عملية تجميل

انا ذاك اليوم صديقتي اخذت جنتها وسوتلها عملية تجميل لخشمها لان كلش جبير

ابتسمت عرفت بيها تريد تواسيني حتى لا اخجل منها

.. ان شاء الله باقغب فغصة اغوح لمغوة (اقرب فرصة اروح لمروة)
اخليها تاخذني لطبيبة التجميل واشوفها شنو تكول

.. اي بس خو ما اكعد اني انتظرج تسوين تجميل للوحمة
يالله تخلين قاسم يقتربلج
لا حبيبتي. هذا الشي ما يصير

ولتخافين من الوحمة ترة شكلها مقبول
ولو هو قاسم اذا يشوف هالجمال كله
ما راح يركز عالوحمة
واذا عالمستحى عود طفي الكلوب
من يقتربلج

يبوووو وين انطي وجهي شلون ورطة
ام قاسم مرية حازمة متقبل باوسط الحلول
من خلال اهتمامها وحرصها على ابنها وحيدها
اكيد راح تبذل ما بوسعها علمود سعادة ابنها
وهي تشوف زواجه مني وسيلة ابعد رهف عن طريقه
لمصلحة قاسم

حجيت بصوت ناصي .. ان شاء الله خالة

.. وما اريد اسمع هاي سالفة التنغوص مال خايفة وما اكدر انسيها
ترة الولد نفسه بيج لا تشعلين كلبه
اريدج هسة تصعدين لغرفتج وتصيرين سباعية وتجهزين نفسج
وتكعدين تتدلعين عليه

اريد كون باجر من تنزلين اسمع منج خبر يفرحني

انخرست والساني انبلع وصرت اهز براسي بموافقة
.. يالله خالة روحي طلعي وشوفي رجلج وين

طلعت من يمها واني كلبي يدك حيل عبالك جنت بسباق

جنت امشي رايحة اصعد فوك
وجان اشوف قاسم صار بوجهي
.. ها شنوانتي وامي شعندكم صارلكم ساعة بالغرفة

باوعت للغرفة وراي وحجيت بصوت ناصي
.. نصي صوتك لا تسمعك خالتي بعدين اكلك
شنو غادت (رادت) بس مو هنا من نصعد احجيلك فوك

وجهي كام ينطي الوان
ما اعرف شلون احجيله عالوحمة
اكله لو لا يا ربي شنو حلها هاي

ام قاسم طلعت من غرفتها وشافتني واكفة يم قاسم
ومرت من يمنا وراحت يم البنات
منى وكوثر وهالة وهديل

منى وكوثر متزوجات اولاد عمهم وهنا بيوتهم قريبة

فدائما يجون هنا لبيت اهلهم
دك نقال قاسم جان بجيبه طلعه من جيبه واني بعدني واكفة يمه
باوع للشاشة حتى يقرة اسم المتصل

واني نسيت نفسي هم كعدت اباوع وياه عالواهس اشوف منو المتصل
جان مكتوب نصفي الثاني

عزة بعينه يعني هذا الطول والعرض كله وبعد عنده باقي نص ثاني

شوف اني وين والناس وين واني كاعدة احشش
هاي اكيد ست كهف مسميها النصف الثاني

انطاها رفض
وفتح النقال وراح عالواتس ودخل على نفس الاسم
وبدة يكتب
( هلو حبيبي اني شوية وراح اجي انتي ..........)
جنت واكفة يمه ومندمجة اقرة شنو يكتب بكل صلافة وفضول
انتبهت على ايده اتوقفت عن الكتابة

هاي شنو ليش اتوقف ميكمل كتابة
رفعت راسي اريد اعرف شنو سبب التوقف
وجان الكة الاخ رافع حاجبه ويباوع علية

كال.. بعد .. بعد فوتي راسج بالنقال
يلعن ابو الفضول العندج كسرتي على امي

عزة ابتسمت بوجهه بفشلة .. ههههههههه لا مشكور ما تقصر بس
جنت انتظرك تكمل رسالتك حتى اكلك عندي موضوع مهم اريد احجي وياك

.. كولي شنو عندج
.. لا ما اكدغ (مااكدر) احجيه هنا من تصعد فوك افهمك
احسن لان هنا خاف احد يسمعنا

.. تمام لعد انتظريني من ارجع بالليل لان انا طالع هسة

.. اوك.
درت وجهي حتى اروح وهو رجع دنك راسه على نقاله يكمل مراسلة

رجعت عليه.. اي اتذكرت اذا خالة سألتني عليك
وين طالع شنو اكللها

رفع حاجبه وكال.. خالة ما تنتظر تسألج عن مكاني
خالتج كبل تتصل علية وتعرف وين انا وبيا مكان

باوعت عليه وصفنت .. اها لعد براحتك

درت وجهي اريد امشي
اجاني صوته من وراي
.. عود مو تنسين سليمينا على خالتج وكوليلها بطلي فضول لا تنسحل

رمشت بعيوني اريد استوعب القصف الي نزل على راسي ارض جو بحر
درت وجهي المقصوف عمة حتى عمة
الله لا يوكع احد بلسانه

تركته ومشيت للمطبخ يم خالتي والبنات وهو راح صعد فوك حتى يبدل ملابسه

دخلت عليهم للمطبخ لكيت ام قاسم تسولف وية بناتها

ومنى تخلط بمكونات الكيكة
وام قاسم دتشرب جاي
جنت مترددة اكعد وياهم بس
ام قاسم ما انطتني مجال كبل

صاحتني .. تعاي جيبلج كوب خلي اصبلج جاي
جبت الكوب وهي صبتلي كعدت يمها وسألتني
.. اكول هدى ام رائد شكد اتباركت

باوعت عليها.. والله خالة ما اعرف شكد انطتني لان جانت حاطة الفلوس بظرف

.. اي بالله حسبيهم وكليلي
بالله خلي اشوفها اشكد تتبارك لعروسة قاسم

هالة.. ليش يمة تسألين
.. مو علمود اعرف ام رائد بشكد اتباركت لهدى
حتى اشوف انطتها مثلما اني انطبت لمرت رائد من اتزوج

منى.. ههههه شبيج هالة متعرفين امي شلون تدقق بهاي الامور
تريد تعرف كل واحد بشكد يتباركلها حتى هي
مرة اللخ ترجعها الهم بالمناسبات التصير عندهم

هالة.. خرب شنو انتي يا حجية عليج تفكير جهنمي
ام قاسم تخزرها.. هذا ما يسمونه تفكير
هذا يسمونه واجب وتقدير لازم اعرف انطي كل شخص واستحقاقه

باوعت علية وكالت .. اريدج تلزمين ورقة وقلم وتسجلين
كل واحد من كرايبنا او جاراتي
بشنو اتباركوا

.. ماشي خالة اليوم اصعد فوك واخلي هالة تكعد وياي
ونسجل اسماء الناس الي اتباغكولنا (اتباركولنا)

هالة .. اكول يا حلوة شوكت ناوية ترجعين تداومين
ترة شكلج مغلسة عالوضع
ترة لا تنسين انتي من قبل العرس انتي ماخذة اجازة واليوم الرابع من بعد العرس
لا يكون ناوية تكعدين بالبيت
.. لا لا مستحيل ابطل بس كلت اسألج شلون اغوح (اروح)للكلية
ام قاسم.. وهالة شكو وتسأليها
المفروض تسألين زوجج بهيج امور

افتهمت هاي رسالة من ام قاسم
تريدني استأذن قاسم بكلشي
انتبهت على ام قاسم صار دورها ويايه
تفهمني شنو المطلوب من الزوجة من واجبات اتجاه زوجها

دخل قاسم للمطبخ كاشخ والريحة الرجالية القوية ملت المكان
وبيده نقالاته ومفاتيح سيارته
وسلم علينا قبل لا يطلع
وقفته امه وهي تباوع للساعة جانت الساعة ب٨مساء
.. ها يمة قاسم وين طالع
.. متواعد وية جماعتي بالكوفي
.. ادري شنو جماعتك ما يعرفون انت بعدك عريس
والناس بعدها تجي تتباركلك
.. حجية اطمني اتعودت اي واحد يريد يجي يتبارك يتصل علية حتى ينطيني خبر

سلم عليها وطلع وهي كلبت عيونها ما مقتنعة
باوعت علية
تعاي قربي مني خلي نحجي

باوعت لهالة استنجد بيها رفعت ايديها بأستسلام
يعني بأختصار ما اكدر اسويلج شي انتي لوحدج

اقتربت منها واستلمتني مرت ثانية بالنصائح
وكأنما ام قاسم ما عندها شي بس تكابل هدى وتعلم بيها
ياحظي
قربت راسها يم راسي وحجت بصوت ناصي

.. اكلج خالة هدى عفية بدون تعلوم
اريدج تكسبين ابني وتعلقينه بيج
يعني شوية اتلحلحي وجننيه بهاي سوالفج

فتحت حلكي متفاجئة من كلامها
خرب خالة ام قاسم ادري شنوً شافت من سوالفي
هسة اليسمعها يكول علية هاي شكد خبرة
البنية
وهمة ما يدرون انا كل خبرتي والساني جايبتها من سليمة هي المصدر

كملت كلامها
.. عفية وما اوصيج اريدج اليوم تخلينه ينسى حتى اسمه

سويت روحي اسمعلها بتركيز عالاساس اني مهتمة
اطبق كلامها جان هدفي ابين لام قاسم
اني عروسة طبيعية. تحب تكسب ود عمتها وزوجها
حتى ابعد الشك عني وما اخليها تحطني براسها

لان هي الله يحفظها فطنة وذكية وتلكفها وهي طايرة
يعني اي ردة فعل غريبة من عندي راح
تكون محسوبة علية وتدخل الشك بكلبها

ما اعرف ليش حبيت اكسب ودها في غض النظر عن كلشي
يمكن حنانها وحرصها على بناتها وابنها
خلاني اطمع يلوحني شي من هذا الحنان

ام قاسم.. واريد منج تصيرين مرايته الي يشوف
نفسه من خلال عيونها
وتخلينه يشاركج بكلشي ويحجيلج عن يومه شنو يسوي
ووية منو يطلع وشنو ياكل
حتى يتعلم على وجودج بحياته ويكون الج دور ماله غنى عنه

.. صاغ خالة منا وغايح (ورايح)
وين ميغوح (ميروح) تلكيني وغاه (وراه) ما انطيه مجال يتنفس
وداعتج اطلعله حتى بالمغكة (بالمركه)

ام قاسم ظلت فاتحة حلكها محتارة شتحجي وياي
غمضت عيونها بصبر كوة لازمة روحها وكالت
.. حبيبتي مو هشكل
اقصد كوني قريبة عليه حبيبيه بيج ومابيج اريدج تخلي ميشوف غيرج
مو ترحين تصيرين عريف شلتاغ على راس ابني وتكعدين تراقبيه

.. صاغ خالة تدللين
كعدت اساير ام قاسم بكلامها حتى ما تقلق على وضع ابنها

شيماء
جنت منتظرة على اعصابي اخلص دوامي
واروح كبل على بيت عمو امجد حتى اشوف مريم واتطمن عليها

جان عقلي مشغول على مريم وبنفس الوقت
كلبي تايه بغير وادي

وكأنما صار ينبض مخصوص علمود هذا الشخص

واول ما اوصل للمستشفى تبدي عيوني تدور عليه بكل لهفة جنت مشتاقة اشوفه
حتى لو بس لمحة المهم اطمن عليه واكحل عيوني
بشوفته
لان صارلي هواي مشايفته
وهو الله يحفظه مو دائما متواجد بالمستشفى بالسنة حسنة يمر
والا عنده ارتباط وية واحد من الاطباء يالله يمر

واني حظي وكعني بحب واحد مو داري عني ولا يعرف الله وين خالقني
هاي اذا طريت على باله
بس مشكلة القلب اذا حب ما يفكر بمصلحته
ولا يعرف يصير والمايصير
يجي ويجفت بدون استذان

رباب راحت وسلمتني واجبها
بصالة الولادات وجانت الحالات تقبض الكلب
مجرد ما اسمع اصوات الالم الصادرة عن الحوامل

واحس بمقدار الالم الي يتالموا ينتابني شعور غريب
لذلك مو دائما ادخل صالات التوليد
احاول اكون بالمرحلة الي قبل الولاده
بس اعلك للحوامل المغذي وانطيهم ابر حتى تساعدهم على تسهيل الولادة

او اجيك ضغطهم اما الامور العميقة
وتوليد ولادة طبيعية فهاي احاول اتحاشاها قدر الامكان

اما اذا صارت الحامل حالتها عسيرها
بوكتها يصير استدعاء وتتدخل الدكتورة النسائية المشرفة عالقسم هيج جان نظامنا

جنت اتنقل على اسرة الحوامل وجان اتفاجيء بوحدة حامل موجوعة دتطلك شعرها مكوش وكحلتها سايحة وحالتها حالة والعيون حمر وتأن بألم

ابتسمت
واقتربت منها ومسحت على كصتها العركانة جانت بعمر هدى اختي
حتى يتخيلي تنطيها شبه
وكلت.. هاي شنو تدرين ولا عرفتج
لج قبل شوية شفتج دخلتي لقسم الولادة
بقمة الاناقة والكشخة

والله حتى من شكلج رفعتي معنوياتنا وكلنا عليج خوش
بنية شاطرة اجتي تولد وهي بكامل اناقتها
اشو هسة الوجه انكلب ازرك على علبة الوان
جاوبتني وهي تأن موجوعة
.. لا تضحكين علية انتي جربي الم الولادة بالاول
وعود تعالي كملي تصنيفج علي

.. هههههه حبيبتي حقج الله يساعدكم
لزمت ايدي تتوسل
.. عفية خلي ماما تدخل تجي يمي
.. ممنوع حبيبتي انتي هسة راح يدخلونج على صالة الولادة
لتخافين السسترات راح يكونون بدال امج
وراح يديرون بالهم عليج

.. زين لا تعوفيني ابقي يمي والله اخاف
.. صار تدللين
اباوع عليها دترجف من الالم
كعدت تسولفلي هي بيها بنية وبالكوة صار عندها حمل
بعد انتضار خمس سنوات لان من تزوجت كان عمرها صغير
جانت لويات الطلوك متناوبة يعني تروح وترجع
فمن تروح تكعد تسولفلي ومن تجيها اللوية

تظل تأن بألم
بعدها ورة عشر دقايق اجتي السستر وفحصتها
وكالت .. يالله ماما كومي تعالي وياي
للصالة
اباوع عليها باوعت علية بخوف
عيونها تستنجد بية

لزمت ايدها حتى اطمنها .. لتخافين ساعة وسلامات
وبعدين بس تشوفين البنوتة تنسين الم الولادة بلحظتها

جاوبتني وهي ترجف .. عفية تعالي وياي
.. ما يصير اني عندي واجبات بالقسم هواي حوامل يحتاجوني اكمل شغلهم وهنا بداخل الصالة ماعندي شغل
السستر تستعجلها .. يالله ياعني خو منتظرج تره ورانا كومة شغل

البنية تأن بألم وحجت وية السستر
.. عفية حبابة صبري علية والله كلبي كام يوجعني
صيحيلي ماما
جاوبتها السستر
.. اللهم صبرج يا روح هاي كلهن من توصل ساعة الصفر يكولن صيحي ماما
ديالله امشي فوتي كدامي انتي شكلج راح تتعبيني بالولادة

اني حجيت وية السستروهي قابلة اختصاص توليد وكلتلها
.. خطية على كيفج وياها خايفة لان بجر وبعدها صغيرة

السستر .. والله عيارة بنات صرنا نعرفها يعني من اتزوجت اشو مكالت صغيرة

اني بالحقيقة ما اتدخل بشغل
القابلات الكبار ولا اقترب منهم لان البعض منهم يكونون
صارمات واحيانا حتى قاسيات بتعاملهن
يمكن من كثر تواجدهن بصالة الولادات

عفتها ورحت وانشغلت وية الحوامل الموجودات
بالقسم هاي الي تصيح وهاي الي طك ماي البطن عندها وتبجي مفزوعة
واصوات الخوف والفزع ومرات تجينا حوامل هادئات
يطلكون ويتألمون بس بهدوء ميكلبون الدنيا من الصياح

مرت ربع ساعة وجان اشوف وحدة من السسترات
طلعت من صالة الولادة تركض مفزوعة بسرعة
وتصيح دخلت على الدكتورة
اباوع صارت خبصة وحركة غريبة

يم صالة الولادة والدكتورة صارت دكتورتين
وبعدها انضم دكتور اختصاص نسائية احنا
الا بالشدة الشديدة يالله يتدخل الدكتور

بعدها طلعوا الدكاترة وجوهم صفر واحد يحجي وية الثاني خطية
الدكتورة الاولى.. همة صوج اهلها
الدكتور جاوبها .. كان لازم ينطون تقرير كامل
حتى ناخذ حذرنا

مرت ممرضة من الي جانوا بالصالة وسألتها من باب الفضول

.. شنو شكو كالت خطية هاي وحدة من الحوامل
صار عندها نزيف بأثناء الولادة وصارت عندها مضاعفات
وهي بالاصل عندها فقر دم حاد
ماتت وما لحكنا عليها

لحظات وجان يطلعون سدية بيها البنية نفسها الي جانت
تطلك قبل شوي اباوع عليهم غطو وجهها

شهكت بصوت مكتوم احس الدنيا افترت بية
صرت ابجي بدون شعور و انهاريت من البجي
بحيث وحدة من الممرضات كالت
.. شيماء عفية كافي لتبجين راح تخرعين وتخوفين بقية الحوامل
روحي طلعي برة شوية ارتاحي
طلعت بدون ما اجاوبها

.. يالله اشكد خطية هاي البنية
اتذكرت شلون كامت تتوسلي خايفة حتى ادخل وياها
اوف اوف

وقفني صوت بأثناء مكنت متجهة عالحمامات
.. شيماء شنو شبيج ليش دتبجين
رفعت راسي واجتي عيني بعينه بس شفت حيدر
جان واضح الاهتمام والخوف بعيونه

جنت اشهك بالبجي اريد بس اهدء حتى افهمه
رجع سألني بنفاذ صبر .. شكو اكو احد اتعرضلج سامعة شي واحد من اهلج بيهم شي

ظل يعدد بمصايب البشر
اجة صوت الدكتورة سولاف
.. هاي شنو شيماء بعدج دتبجين على البنية الحامل
الماتت
هزيت راسي بموافقة
اباوع عليه مسح وجهه بكفوف ايديه
واتنهد براحة

.. صدك جذب وكعتي كلبي
اااااقصد قلقتينا
بس المفروض تكونين متعودة على هيج حالات
تصيرين قوية
.. لا مو هيج الحجي بس البنية اتوفت بسبب اهمال
الكادر الطبي واهلها الثنين

جان المفروض من اهلها يحذرون وينوهون على مرض بنتهم وجان المفروض من الكادر يقرون فايلها
ويشوفون وصرت احجيلهم عن اسباب الوفاة
واني ابجي منهارة

الدكتورة سولاف .. لج كافي مو راحت عيونج الحلوة
والشفايف انفخت
هههه بس تدرين اول مرة اشوف وحدة تبجي تصير هشكل حلوة ههههه
البجي لايك عليج ابجي حبيبتي استمري بالبكاء

ابتسمت على كلامها متعودة على خفة دم الدكتورة سولاف

سمعت واحد سحب نفس عميق التفتت شفته حيدر
بعده واكف يمنا بس ظل يحوم
ويباوع بقلة صبر

مدلي علبة كلينكس
والدكتورة سولاف كالت .. يالله اني اترخص
وانتي كافي مسحي دموعج
ما اتعودنا نشوفج تبجين

راحت وعافتنا
حيدر همس بصوت ناصي وهو لازم الكلينكس
.. هو شورطنا غير دموعها وعيونها

جمدت مكاني ورفعت راسي مصدومة من كلامه
وهو مثلي شكله انتبه على زلة السانه

جلة صوته وحجة وكأنه ما كال شي
.. كافي بجي وهاج لزمي ومسحي دموعج ترة
صرتي فتنة لعيون الرياجيل بهذا شكلج
كالها وهو يبتسم مثل واحد يريد يخفف من حدة الموقف
مديت ايدي واخذت الكلينكس من عنده متفاجئة بكلامه

اجتي السستر ام احمد وقاطعت علينا الكلام
هو بس شاف ام احمد اترخص من عدنا وانسحب
وكأنه ما مسوي اي شي ولا حاجي اي شي

راح وعاف وراه كلب محتار اعمى ضايع

ام احمد .. شومة وينج تعاي
الشغل ينتظر ومهى لوحدها بالقسم
باوعت عليها .. اي هسة رايحة

خلص الدوام
واني كل شوية اتذكر البنية الحامل
ويعصرني كلبي

بعدما طلعت من المستشفى كبل رحت بوجهي
لبيت عمو امجد

استقبلتني جنان ونظرات الشك والارتباك بانت على وجهها دخلتني للبيت وعيوني كامت تدور على اختي
مريم

جنان.. شنو خو ما صاير شي
شنو هالزيارة المفاجئة
جاوبتها .. لا تخافين ما صاير شي
بس حبيت امر اسلم عليكم شفت روحي اشتاقيت لاختي مريم
اتعمدت اذكرها بموقع مريم بحياتنا
هي جانت دائما تنكر صلة مريم بينا
وحالت بقدر الامكان تبعدها عنا
لدرجة وصلت بيها المواصيل تسجل مريم بأسمها هي وعمو

حجت وضحكة صفرة على وجهها
.. هلا بيج بكل وكت تنورينا
والله اليوم عمج امجد الصبح بطاريكم
رديتلها ابتسامة المجاملة
.. خير ان شاء الله
.. والله هو من ذكر اسم ابوج بالسالفة
عرفت ما بي اي خير
.. شبي بابا
.. والله ابوج حضرته بارحة اجة لامجد ويكله
اريد اشتريلي سيارة استرزق بيها دايني
وامجد يكول راح اساعده بلكي صدك والله يهديه
من بعد الصار بشيماء
هو كع وارتد وما كام يروح يم الجماعة

.. والله ما اعرف شنو اكلج بس خوفي لا هم ياخذ الفلوس مرت اللخ ويصرفهن على خراب الدنيا
.. هو اني هم كلت لعمج
اولاده اولى بهاي الفلوس بدال ما كاعد
يصرفهم منا ومنا

عرفت هذا بسمار الي اني وخواتي
سكتت وغيرت الموضوع
.. اكول عمة وين مريم اشو ما نزلت

كامت من مكانها وكالت هسة اصيحها الج اكيد دتسبح
لان مصارلها هواي من اجتي من المدرسة تعبانة

راحت اتعودنا على جنان وحركاتها
جانت دائما تحرص تخلينا قريب ما نريد نطلع
تروح تصيح لمريم حتى نشوفها
بحيث يادوب نسلم عليها حتى لو نلحك نسألها عن احوالها لو ما نلحك

نزلت مريم وبس شافتني عيونها لمعت بفرحة
واجتي بكل لهفة وسلمت علية
بس بحدود احس بيها متقيدة حتى بمشاعرها ويانة

معقولة لا مستحيل
اشرتلها تجي تكعد يمي جان جوة عيونها سواد
موطبيعي وحيل ضعفانة
.. شلونج مريمة شخبارج والله مشتاقتلج
.. والله حتى اني مش .....
وقطعت كلامها وباوعت لجنان
وبدلت كلامها
.. اني زينة الحمدلله هدى شلونها بزواجها

نبصت جنان .. اي صدك اختج شلونها
وية زوجها وعيالها خو مكال شي من شاف الوحمة

سكتت وكأنما اني ناقصة ضيم وتجي جنان تكمل علية
وهاي وحدة من الامور الي شايلة همها بكلبي وخايفة منها

.. لا هدى زينة وعيالها خوش ناس
.. اكول مريومة مو تنسين تحضرين نفسج يوم الجمعة تجين ويانا عازمتنا مروة عالغذة مو ما تجين

باوعت لجنان وكالت
.. ما اعرف اشوف بابا شنو يكول
جنان.. انتي مو عندج امتحانات
شلون تكدرين تطلعين

مريم.. اي صدك اتذكرت عندي امتحانات هواي احتمال ما اكدر اروح وياكم

اذا ما طلعت جنان دتحجي من وحدها فلا اني شيماء
وهاي سالفة الامتحانات بدعة
جاوبتها.. مو مشكلة قابل انتي شكد راح تطلعين هي ساعتين زمان معقولة راح تأثر عليج
لا تخليني اكول لعمو امجد يجيبج النة قابضاً

عيون مريم ولمعتهم جنها تكول
والله ياريت يجيبني الكم

وعيون جنان كامت تتطاير منها الشرر
جنان.. هسة الله كريم منا للجمعة لاحكين
خلي يرجع ابوها و نشوف
شنو يكول

سألت مريم .. انتي عندج نقال
.. اني بابا حطلي نقال بس مو دائما عندي
جنان.. اي اني اسحبه منج لان ادري بيج تعوفين الدراسة وتكابلينه وتكعدين

باوعت لجنان وحجيت بجدية
.. منا ورايح تاخذين النقال من عمة فد عشر دقايق
تتصلين علية او اتصل عليج المهم اريد كل يوم اسمع
صوتج حالج حال مروة وضحى وهدى

جنان.. ليش صاير شي شعجب هذا التشديد
شيماء.. اني ما احتاج اقدم تبرير علمود احجي وية مريم يكفي اني اختها الجبيرة واشوف هي هسة صارت كبيرة وتعرف الواجب والاصول
والواجب يكول تتواصل وية خواتها وتسأل عنهم
لان صلة الرحم واجبة

جنان شكلها ما اقتنعت بكلامي وياها
وعنها لا رضت اني اخر همي رأي جنان
سألت مريم .. اكول مريم ليش هيج ضعفانة
شكلج ما عاجبني

جنان عاطت بينا .. انتي شنو سالفتج اليوم
من اول ما دخلتي للبيت واني ما مرتاحة لجيتج
احس بيج ناوية عالشر
شكو اكو واحد شاكليج وكايلج احنا دنكرب على مريم
وتعالي اكلج انتي من شوكت نزل عليج الوحي
واتذكرتي عندج اخت ولازم تتواصلين وياها

.. من يوم الي اخذتوها من حضني غصب عني
واني ما ناسيتها ولا بطلت اسأل عنها
وانتي هم ما قصرتي بعدتينا عنها
وما انطيتنا فرصة نقترب منها
عبالك ملك حصري بس الج

جنان.. هاي جزاتي اخذتها منكم ومن ابوكم التعبان وربيتها احسن تربية
وعاملتها مثل بنتي ودللتها دلال الفهد حالها من حال اولادي
وروحي سألي عنها بالمدرسة
وشوفيها شلون شاطرة نار
تردين بعد كل هذا تعبي
تجين وتلمحين بالتقصير وية اختج
لا عاد لهنا وحدج اذا انتي اختها
فاني امها الي ربتها
الام هي الي تربي مو التحمل

.. تزة اني مكلت شي ومحد اتهمج بالتقصير
هاي انتي من يمج خلقتي المشكلة
وسويتلج فلم هندي

اني ما ردت غير بس اتواصل وية اختي
بيها شي هاي
.. لا ما بيها شي بس .....
قاطعتها وكملت
.. لعد شبيج عصبتي وضجتي وصرتي تحجين حجي صاعد نازل
فتحت حلكها حتى تحجي وجان يقطع علينا
صوت الجرس
كامت مريم وراحت فتحت الباب
ودخل عمو امجد جان هستوة راجع من الشغل
كمت من مكاني وسملت عليه
واستأذنت

.. يالله عمو اني استأذن منكم لازم ارجع
امجد.. هاي شنو وين رايحة ابقي ويانا عالغدة
جاوبته واني اعدلك حزام الجنطة على كتفي
.. لا مشكور عمو بس بيبي سليمة
هسة اكيد باقية بدون غدة تنتظرني ارجع
احميلها الاكل واصبه

باوعت مريم بدون ما اهتم لجنان
.. مريم مو تنسين كل يوم تتصلين علية ماكو اذا ما تتصلين علية اعتبريني كل يوم امر عليج واجي لهنا
اشوفج
باوع عمو امجد
.. والله ياريت تجينا كل و تنورينا
اباوع لجنان نطت عيونها
كلشي ولا واحد من عدنا
يدخل لبيتها كوة على اعصابها تستقبلنا عبالك فايروسات ملوثة داخلة عليها
عايز بس تسبحنا بديتول وتدخلنا لبيتها

اباوع لمريم ودعتني وعيونها بيها لمحة امل

هدى

.. هالة وسجلي عندج بيت ام طارق
باركولي ب ٢٥الف
هالة كاعدة ولازمة القائمة بيدها وتسجل الاسماء المتباركين ونوع الهدية
هالة.. عزة العزاني بيت ام طارق منطيج بس٢٥ الف
.. اي ليش شكو بيها شي
.. هلا هلا هسة امي تلعب بأم طارق طوبة
.. هههه ليش
.. مو امي من عرست بنت ام طارق
اخذتلها فرشة وانطتها ٢٥ الف بيدها

.. يالله مصار شي انعم الله عليها ذكرتنا
.. لا حبيبتي شكلج ما تعرفين ام قاسم زين
كلشي ولا واحد يستغلها يتشاطر وياها
تكلب عاليها واطيها

.. والله امج عجيبة يعني كل هذا الخير وتحاسب على هاي الامور

هالة .. هدى امي مو بخيلة وهاي الاشياء ما تهز عندها شعرة

بس امي حريصة وتريد تعرف كل فلس وين يروح
واحنا علمتنا على هذا الشي
اقتصادية ما تحب تصرف عفة بطرانة
تدرين هذا خير بابا وقاسم كله صار بتدبير امي
وقوتها

لان احنا من بعد وفاة بابا بعد انتي تعرفين شصار بحالنة كعدنا عالحديدة
وضلينا بطرك هذا البيت لان عمو منير من عمة العماه
نهب كل فلوس ابوي وما خلة على حالنة حال

وبفضل امي وتدبيرها وقاسم وتعبه
كدروا ينهضون بينا من جديد
مرت علية ايام كوة اشتري القميص للكلية
اكول خطية قاسم مكسور ظهره واني اجي عالجاهز
اصرف بتعبه وحتى امي جانت دائما تذكرنا وتنبهنا لا ننسنى نفسنا لازم نراعي الظروف الي دنمر بيها
والحمدلله ربج ما يكطع

.. الف الحمدلله
باوعت للساعة عزة الساعة ب١١
وهسة تجيني امج وتزفني اذا لكتني كاعد
ادك سوالف يمج
هالة .. دروحي روحي اني عني لا اعرفج ولا تعرفيني
تردين توكعيني بلسان امي

ضحكت وكمت من يمها
واني اتلفت اتذكرت الفراش
اليوم بأثناء التنظيف اندليت مكان الفراشات والبطانيات
رحت ركض طلقة قبل لا احد يشوفني
دخلت للمخزن مثل الحرامية اخذت الفراش

وطلعت طلقة ودفعت الباب عالسريع ودخلت
وجان اشوف قاسم
واكف ديبدل وبدخلتي ببسرعة رفع البجامة

خزرني وحجة بنترة.. انتي شنو سالفتج ما تعرفين تدكين الباب قبل لا تدخلين

.. شبيك قاسم تريد خالة تشوفني ادك الباب عليك حتى ما تسولنا عرس ثاني والله

مسح وجهه هاي شلون بلوة انا ما متعود اتقيد بغرفتي
وانتي وجودج بقربي يقيدني يعني ما اكدر اخذ راحتي
باللبس او من اريد احجي بالنقال

وهواي امور ميصير انتي تشوفيها

باوع علية بقلة صبر.. بالله هاي شنو حلها
بالله سالفة النومة وحليتيها
والاحراجات البقية شنو حلها

صفنت بوجهه صدك كلامه خطية شنو ذنبه
مازياخذ راحته بغرفته
لذلك كلتله واني مسيطرة
.. شوف قاسم انت لازم تتأقلم على الوضع واتعامل وية مسألة وجودي بصورة طبيعية
اعتبرني مثل اختك حتى تكدر تاخذ راحتك وياي

باوع علية ورفع حاجبه
.. استغفري ربج ما يجوز اعتبرج اختي
تدرين هو من اليوم الي سويتيني مثل امج صرت
صعبة اشوفج بعيني مثل اختي
والحليم تكفيه الاشارة

اتسعت عيوني من كلامه وحاولت اطلع نفسي من المأزق الي اني بي
.. بسيطة هاي اسهل منها ماكو
يابة اعتبرني اخوك هادي الصغير
وهي تمشي السالفة

هو اني حجيت هاي الكلمة وجان هو يطكها ضحكة
بصوت عااالي

كمزني من مكاني .. الله يلعن بليسك كمزتني
.. ولج جنية اشو انتي كل يوم جايتني بسالفة
ما تكليلي منين تجيبين خاي الافكار
بس تدرين شنو عجبتني مال اخوي هادي

ومن هاي اللحظة انخلقت علاقة جديدة غريبة من نوعها

انا محتاجة الاخ وهو محتاج يتأقلم وما يتقيد وياي
اباوع عليه اتمدد عالسرير وهو كل شوية يذكر كلمة هادي ويهز راسه ويضحك

ما جاي اتخيل بهذا الشخص يكون ابو بيتي
ما بي اشي من الي اني اتمناه بصفات الزوج
الي اتمناه

اخذتلي دشداشة ردن طويل ودخلت للحمام ابدل
سمعت صوت باب الغرفة اندك

بعدها سمعت صوت هالة تحجي وية قاسم
فتحت الدوش وسبحت وكملت ونشفت شعري
وبعدها هم رجعت سمعت صوت الباب يندك

اسمع قاسم يحجي بغضب من بين اسنانه
.. اللهم صبرج يا روح والله الحجية راح تموتني بسوالفها اشتغلت رحمة الله

فتح الباب وهالمرة منى حجة وياها واني طلعت من الحمام اباوع لمنى عين علية وعين على قاسم مثل الي يسترق النظرات بفضول

بعد ما صرفها قاسم ركع الباب وسده حيل كمزت من مكاني وباوعت عليه
جنت لازمة المنشفة
.. شنو شبيك معصب
.. هاي امي مو بيدها كل شوية دازة وحدة من خواتي
ترني بموضوع او بحجة شكل
اكص ايدي اذا ما طلعت امي ورة سالفة ملحتهن

.. لحظة قاسم لا تعصب خلي افهمك شغلة امك اليوم خمنت
من يمها ان انت بعدك ما مقتربلي
عقد حواجبه بشك
.. شلون يعني خمنت انا ما مقتربلج
شنودقابل نزل عليها الوحي

فركت بأيدي ودخلت بصراع وية نفسي صرت بين خيارين اكول لو ما اكول

هسة شنو يريد يصير اذا كلتله عن الوحمة هو بكل الحالات ماراح يقتربلي خلي اكوله وارتاح

بلعت ريكي بأحراج وحجيت
.. ااااااا قاسم اني عندي وحمة بجسمي يصير لونها
اسود وامك اليوم بالصدفة عرفت عنها وشافتها
وسألتني وكالت قاسم شاف الوحمة
اني سكتت لان ما عرفت شنو اجاوبها
وهي من يمها فسرت سكوتي على انه ما دام قاسم ما شايف الوحمة معناها ما مقترب
واني كلتلها خالة الصوج مني لان اخاف من الوحمة
جنت احجي واباع عليه
اترقب ردة فعله

وكال .. والله يا امي عليها سوالف
شلون ربطتها للسالفة شجاب الوحمة على اقترابي
بس هي الحجية تصطاد بالماي العكر

وانتي مطفية وعرفت شلون تستدرجج
وتسحب الكلام منج عالعموم عوفج ....

وجان يندك الباب مرة ثانية
صاح بصوت عالي ..منوووووووووو
اجانا صوت امه
من ورة الباب .. انا يمة قساااااام

اباوع عليه فتح دكم قميصه وهوس شعره
وهو يسب ويلعن ما دام صارت بيها قسام امي
معناها امي ما ناوية تجيبها لبر

هذا شبي شديسوي
همس من بين اسنانه
.. روحي فوتي دخلي للحمام
خلي اشوف الحجية شتريد

رحت ركضت دخلت للحمام وسديت الباب بس ما غلقته
كلش اريد اعرف شنو صاير

فتح الباب هو وشكله المهوس حضرته مسوي تمويه
.. ها حجية
ام قاسم بيدها ماعون بقلاوة ابتسمت
وكالت .. يمة جنت اكل بقلاوة واتنغصتلك
كلت خلي اصعدله ماعون يتحلى بي هو مريته

جانت تحجي وكل شوية مطولة ركبتها وتباوع وراه
تريد تستطلع

قاسم رفع حاجبه ومد ايده وكال
.. رحمة الله والديج حجية ما تقصرين
ربي ما يحرمنا من حنانج
يااااااا حنينة
هو يحجي وهي بالهة مو يمه عيونها تدور على هدى
باوعتله
.. اكول يمة قسااااام مريتك وين
جاوبها .. بالحمام دتسبح
.. ادري هاي شنو سالفتها نامت بالحمام
اشو من مساع بالحمام

.. اكول حجية ليش ما تفوتين تنامين ويانا
حتى ترتاحين ليش خطية مشلوع كلبج وكل شوية
ودازتلي مرسال

باوعت عليه ابتسمت تريد تضيع السالفة
.. يا.. يا.. يا ولك قاسم انت شلون تحجي وياي هيج
مو صوجك صوجي اني الي حبيت تاكلك شوية حلا
كلت خطية عريس

.. بالله شو هاك اخذ الماعون من عندي
خلي اشوف اخوك هشام شكاعد يسوي
.. اي روحي للمكرود الثاني شوفي شمصخم اليوم

شهكت ولطمت على صدرها
ورجعت لقاسم والفضول يقرة الف

.. ها يقاسم كلي اخوك شمسوي
.. انتي روحي سأليه بنفسج شنو مسوي اشو انتي اختصاص
استخبارات انا متأكد بس تستخدمين اسلحتج وتسألين هشام كبل ما راح يطول جوة ايدج
غير بس ساعة ويزوعلج الاكو والماكو

كلبت عيونها ما عجبها كلامه وهزت ايدها
وراحت متوجهة على غرفة هشام

سد الباب ورة امه وكال وبيده الماعون
.. علينا هالحركات ام قاسم
خطية تكول اتنغصتلك عالبقلاوة
استغفر الله ياربي مو على الاساس انا بسجن ابو غريب وحسرة علية الحلا

اقتربت منه ومديت عالماعون الي بيده واخذت برمة من البقلاوة
واكلتها .. اممممممممممم تمووووت

جان واكف يباوع علية
.. اكلج تاكلين مثل الناس لا اجي اعدل حلكج

انطاني الماعون ودار وجهه عني
وهو يهز بيده معصب

شيماء

بالمستشفى
داحجي بالنقال معصبة
وية ابوي

.. معقولة وصلت بيك تفكر ترسلهم الي للمستشفى
.. شيماء بس هالمرة
.. مستحيل لا تفكر لا اعرف هسة تموتني ما اسوي الي يطلبونه مني

.. لا تخليني اجيج وتصير مو خوش
.. حتى لو اجيت وهددت ما راح اسوي اليردونه

ضل يتحلف ويتوعد
اباوع لرباب دخلت علية لغرفة الممرضات
ووجهة ينطي الوان

انهى الاتصال وسده بوجهي وهو يغلط
غلقت النقال حتى ما يتصل علية
مرة اللخ
والله ياربي شوكت ارتاح
انتبهت لرباب كل شوية تفتح حلكها تريد تحجي وترجع تسكت مترددة

اتنهدت بتعب
.. ها رباب شكو شبيج انتي الثانية تحومين فوك راسي
رباب تجلي صوتها تحضر نفسها
عبالك راح تلقي خطاب
.. اااااا شيماء قبل شوية سمعت من ام سامر الفراشة
تكول الدكتورة رفل انخطبت

رفعت حاجبي.. اي مبروك عليها
واني شكو
.. الي خطبها حيدر

يتبع

احبكم كومة احبكم هواي
اختكم نهى☺️☺️☺️☺️