أساور الفضة الفصل الثاني وأربعون 42 - بقلم نهى

تحية طيبة ومساء جميل عليكم يا احبتي
🌹🌹🌹🌹🌹🌹🌹🌹🌹🌹🌹

#اساور_الفضة_ج٢
#نهى_الحسون

شيماء
شكد يريد يتحمل بعد كلبي
احس كل صدمة تمر علية بحياتي
اقوى من القبلها
وكأنما الصدمات عندها منافسة مع بعضها منو بيهم الاشد على شيماء

باوعت لرباب وعدت وراها كلماتها بصوت مبهوت
.. حيدر !!!!

رباب.. اي حيدر بذات نفسه

رفعت راسي وباوعت على رباب
.. الله يهنيهم مع بعضهم
حيدر خوش انسان ورفل دكتورة مناسبين لبعضهم

جنت احجي الكلمات وكأنما كاعد ارش الملح على جروح كلبي حتى اعاقبه على اختياره
الغافل لان كلة من ورة كلبي هو الي وكعني
بحب انسان مو داري عني
احس بروحي كاعد انزف
اتوقع لو كان الالم الة وجه جان كان اقبح شكل بالعالم
هو وجه الالامي

كمت من مكاني وحطيت نقالي بالجنطة ورجعتها باللوكر وسديته وردت اطلع
بكل هدوء الي مر علية بحياتي كان اشد واعظم
من مو قف حيدر
بس حيدر كان القشة التي قصمت ظهر البعير

رباب.. شيماء دتخوفيني احجيلج كلمة
اني رباب صديقتج فضفضيلي عبري
عن قهرج لا تكتمين حزنج بكلبج

شيماء.. ومنو كلج اني مقهورة
وليش انقهر اصلا على شي ماله وجود
حيدر مجرد وهم اختلقه عقلي التعبان
وكعدت من يمي مثل الغبية اترجم تصرفاته البسيطة وياي الى اعجاب وحب
وهو بالاصل ماكو شي.
وعلى اي اساس اكعد الوم حيدر
وهو بالاصل لا حاجي وياي ولا منطيني وعود

رباب .. شيماء ..
.. عفية رباب سدي الموضوع
خلي اروح اكمل شغلي وراي كومة اعمال متعلقة ممخلصتها

رحت وتركت رباب وراي
وكعدت ارحب بأي شغلة يكلفوني بيها
السسترات او الدكتورات
وصرت اصيح هل من مزيد
ذبيت روحي بالشغل لحد الاجهاد

صرت اتنقل بين الحوامل والسيسترات
ومن يوم الصار بالبنية الي توفت واني
بطلت احجي او اكعد وية اي حامل

صرت اتعامل وية الحوامل والمريضات برسمية
ممزوجة بالعطف والرحمة
اريد احصن مشاعري ولازم افصل
وظيفتي عن العواطف
حتى اكدر اكمل طريقي

طبعاً وظيفتي كانت لها يد بتقوية شخصيتي
وصرت اتميز بالهدوء والسيطرة عالامور
جنت احجي وية وحدة من المريضات
.. حبيبتي نزلي مستوى ايدج علمود المحلول
ياخذ راحته

اجتني السستر ام احمد وهي تدفع عربانة بيها مواد
وادوات طبية

ام احمد.. شيماء هاي مرية مااعرف شلونها تسأل عليج بالاستعلامات
تكول صيحولي شيماء اثير
اريد احجي وياها

عقدت حواجبي منو يجيني للمستشفى ويطلبني بالاسم
تركت الشغل الي بيدي وسلمته

للممرضة الوياي وكلتها ما اتأخر بس اشوف منو يريدني

رحت متجهة على الاستعلامات وسألت الولد ابو الاستعلامات
.. العفو منو سأل عني
اشر على زواية شوية بعيدة عن مدى النظر
جانوا كاعدين بيها ثلاث اشخاص مريتين ورجال

رحت اقتربت عليهم
وجان اشوف مهرة كاعدة تعلج وكذلتها طالعة نصها والاظافر مصبغة ويمها واكف هذا الرجال الي اجة قبل كم يوم بالليل يسال عن بابا هذا شاكر ما غيره
ووياهم بنية كلش صغيرة دتتلوة وتبجي

مهرة .. يا صلوات هستوها بينت الست شيماء
.. كلبت عيوني ونفخت بوجهها بضجر
شنو بابا ما اتصل عليكم معقولة ما بلغكم برأيي

ترة اني رفضت اساعدكم بهذا الشي

مهرة.. اكلج من الاخير احنا عدنا نفوذنا مو بعازتج
بس اليوم الاكشر الي ذبنا عليج وخلة حاجتنا يمج

شاكر حجة.. احنا ما رايدين منج شي غير بس
تفوتين البنية لصالة الولادة حتى تجيب بدون اوراق ثبوتية لان هي مامتزوجة

خزرته.. اعرف بابا شرحلي كلشي واني رفضت وما راح اغير رأيي
مستحيل اقبل اشاركم او اساعدكم
بهيج شغلة قذرة والوث ايدي وياكم

مهرة.. خاب اسمع شاكر منو دتحجي عن القذارة والايد
الوصخة
شاكر.. عوفيها الظاهر بنت اثير ما تدري بسوالف
ابوها
.. اكيد ابوية هيج لان انتوا جماعته
وموبعيد انتوا ورة تلوث ايده بشغلكم وما خفي كان اعظم

مهرة.. شوفي ولج بدون حجي زايد وستري على نفسج
ولا تساوين راسج ويانا

شاكر.. على كيفج مهرة راح تطيريها للبنية
خلي نحجي وياها بالتفاهم
باوع علية وهو عيونه ما بطلت بحلكة
استفزني بنظراته الحيوان

كمل كلامه وياي
.. شوفي شيماء من الاخير شكد تردين
علمود تدخلين البنية لصالة العمليات بدون لف ودوران

غمضت عيوني بصبر.. انتوا شنو مداتفتهمون شنو معنى كلمة لا
واصلا اني ليش متعبة روحي وواكفة اسمعكم
اني رايحة و انصحكم تاخذون البنية وتطلعون منا بدون مشاكل

تركتهم ورحت بس قبل لا ابتعد عنهم سمعت شاكر
يحجي وية مهرة ويكللها

.. ولج شنو هاي مو بنية صاروخ
وديمشي عالكاع
مهرة.. ها شفتها مو كلتلك اثير طلع موهين

همة يحجون واني جسمي ارتعد من ورة كلامهم
وسرعت خطواتي حتى ابتعد عنهم بقدر المستطاع
الله لا يرضى عليك يا اثير وين تريد توصل بينا

رحت اكمل شغلي
اني لازم اليوم احجي وية عمو امجد عن سالفة بابا
يشوفله حل
جنت كاعدة اراجع وية السستر
واشر بالبطاقة الي بيدي على جدول الحوامل
واكتب مقابل كل وحدة من الحوامل المدونة اسمائهم
شكد الكمية التحتاجها من المغذي وكم ابرة اصرف الهة

اجتي رباب وكعدت يمنا شوية وراحت السستر واني بلشت الترتيب

خطية رباب كل شوية وجاية يمي ادري بيها بعدها
خايفة علية خاف انهار بسبب موضوع حيدر وخطوبته للدكتورة

رباب.. اكول شومة منو هذولة الي جنتي واكفة يمهم
.. الله لا يرضى عليهم خلوني ارجف من القهر
اتمنيت الله يوليني عليهم والله لحظة وحدة ما اخليهم يعيشون

.. هو اني انتبهت عليج تحجين وياهم بعصبية شنو شبيهم

.. لج رباب لو اسولفلج يوكف شعر راسج
.. شنو كولي كتلني الفضول

.. بابا اتصل علية وكلي جماعته راح يجون للمستشفى ومحتاجين مساعدتي بموضوع
سألته بخصوص شنو الموضوع
كلي .. عندهم بنية صغيرة حامل ولادتها مستعصية
ولازم تدخل صالة العمليات
لان موديها للقابلة يمهم بالمنطقة وكلتلهم اخذوها لاتموت وتبلوني بيها هاي البنية يحتاجلها عملية قيصرية

رباب.. اي وليش ما ساعدتيهم وين الغلط بالموضوع
.. دسمعي جايتج بالحجي
الموضوع كله على بعضه مشبوه
يردوني ادخل البنية لصالة الولادة وافوتها عالعمليات بطريقة غير قانونية وبدون اوراق ثبوتية
يعني لاجنسية لا عقد زواج ولا اي شي

والطامة الكبرى الطفل الي ببطنها ابن حرام وبايعينه لناس وقابضين نص اجره وهو ببطنها وهسة همة يردوني اساعدهم

رباب.. زين شمعنا انتي اجوي عليج وطلبوا منج تساعدينهم
.. هي الحمة تجي من الرجلين
وبابا هو الي دزهم علية
.. عزة العزاج ياشيماء هذا ابوج كارثة
والله حتى لو تزعلين من دعائي عليه
هذا ما الله ياخذه ويرحم بحالج

.. شمعنا اني من دون البنات يكون موت ابويه رحمة ونعمة. استغفر الله ياربي
شكلي راح اتخبل والله.
زين ومني باقية متماسكة وعقلي لحد الان ما فصل

رباب لزمت ايدي وكالت .. ياعمري شومة
هي كل ضربة تجينا بالحياة اذا ما تموتنا فتقوينا
فصيري قوية على الاقل لخاطر خواتج
همة دائما بعازتج
.. هو اني شنو مصبرني على ضيم ابوية غيرخواتي

كمت من مكاني والقائمة بيدي
.. يالله رباب اعوفج اني رايحة
.. الله وياج مو تنسين باجر اني وياج نطلع للسوك علمود نأجر بدلة للعرس

ابتسمت.. صار تدللين من عيوني
انتي بس ذكريني حتى احضر نفسي

رحت اكمل شغلي
بس على طول ما اني اشتغل
جنت اترقب اسمع او المح شي بخصوص
خطوبة حيدر والدكتورة رفل

ورجع عقلي يحلل من جديد
اي هو من الاول اني جنت اشوفه دائما يمشي وياها
واتذكر موقفه من ردت احجي وياه
وهو التهة بالنقال ومن شافها كبل انهى الاتصال
وحجة وياها

ترة جانوا مبينين اكو بينهم شي
بس كبريائي الاعمى وثقتي الزايدة بنفسي خلتني اتغافل عنهم

جنت اترقب اشوف الدكتورة او المح حيدر اليوم
بس ماكوا ولا واحد منهم مبين اثنينهم مختفين اليوم
نفضت راسي ها شيماء رجعنا نفكر بيهم مو كلنا انتي قوية
اي بس مو بيدي غصب عني
اهووو صرت احجي وية نفسي مثل المخبلة

طلعت من الدوام ورجعت للبيت
ما لكيت احد موجود بالبيت سليمة طالعة
اصلا اتعودت اغلب الاحيان ارجع ما الكاها

جريت حسرة وطلعت نقالي واتصلت على مريم اختي
من يوم الي رحت بي لمريم واني كل يوم اتصل عليها
ونحجي بالنقال شوية اسالها عن احوالها
وهي تسألني عن يومي وعن خواتي

وصرت وية كل مكالمة اكتشف بمريم خصلة
وتأكدلي تصرفاتها ان هي صدك اختنا

وشايله من طيبة امنا رغم ماشافتها ولا لمتها بحضنها يوم

اول ما بديت اتصل عليها جانت تحجي وياي برسمية
وتقييد لكن اني جنت قبل كل نهاية اتصال
اكول
.. مريومة اني احبج ديري بالج على نفسج

وهي دائما ما ترد على هذا كلامي غير شكرا
بس اليوم فاجئتني مثل كل يوم اتعودت بأخر كل مكالمة اكول.. مريومة احبج
هم جاوبتني .. شكرا

بس بعدها فاجئتني
برسالة كاتبة بيها

.. شيماء اني هم احبج اموت عليج
ملاحظة .. اقري الرسالة بس لا تجاوبيني

حركتها هاي فتحت ابواب الشك براسي
معناها جنان موجودة فوك راسها تراقبها وتسمعها

حياة مريم اختي لغز ديحيرني
رجعت قريت الرسالة مرت اللخ وكلبي صار نار
ياربي رحمتك الطف بية وبخواتي والله الكلب ماعاد يتحمل اذية

اندك الباب ورحت سألت من ورة الباب
.. منو
اجاني صوت شاكر
.. انا شاكر ابوج وين
يا الله اشكد اكرهه
.. مو بالبيت اتوقع اكو اختراع اسمه نقال
تكدر تتصل عليه وتعرف هو وين بيا مكان

.. ماكو اتصلت عليه جهازه كله مغلق
من يجي كليله شاكر يريدك ضروري يمر علية
.. ان شاء الله هو خلي يجي بالاول عود نوصله كلامك

هدى

اتعلمت على بيت اهل قاسم
جان بيت دافي اساسه متين وجود امهم هو الاساس
صرت كل يوم اكعد الصبح
متلهفة اجتمع وية البنات وام قاسم

واني وقاسم اتفقنا ان ما نبين كدام امه اي شي
اتذكر من نزلت يوم ثاني جنت اترقب سؤال خالتي
بس قاسم فاجئني من كلي
اليوم مو تنسين صعدي من وكت للغرفة

اني كبل من يمي دك الجرس عندي وسويت روحي خجلانة
وابتسمتله وكلت بصوت عالي
..قسومي عيب منا خالة والبنات هسة شنو يكولون
علينا

هو اتسعت عيونه متعجب وبنفس الوكت كاتم ضحكة
بس كان الكلام الي دار بيني وبين قاسم
كفيل برسم ابتسامة الراحة على وجه ام قاسم
ويخلصني من استجواب ام قاسم

هالة.. ها اليوم معزومة ببيت مروة
جاوبتها واني اعدل بمكياجي
.. اي عزمتني اني وخواتي
.. منو يوصلج
.. قاسم كال انتظغيني (انتظريني)انا اجي اخذج

هالة.. والله عمي الدنيا راح تنكلب قاسم صاير صاحب مسؤلية ويوصل بنية
.. الله يهدي هغقل (هرقل) الي ههه

هالة.. اكول عوبة بعده ديتصل برهف كل يوم بالليل
التفتت منا ومنا
وحجيت بصوت ناصي.. لج عوبة نصي صوتج لا
احد يسمعج واغوح بالغجلين (اروح بالرجلين)
والله اخوج يفطسني

هالة.. والله امركم عجيب

طبعا هالة كانت مستودع اسراري احجيلها كلشي يصير وياية
بدون ما اخاف يطلع سري

اتذكر من حجيتلها الصار بيني وبين قاسم
وكالت اني هم لو بمكانج ويكون زواجي بنفس
وضعج هم راح اسوي نفس ما سويتي ويمكن اكثر
اخلي حتى يوقع على ورقة اضمن بيها طلاقي منه
عكب ما يتزوج بنت عمه

حتى خاف يفكر يبقيني على ذمته بعد زواجه الثاني
. لج لا هالة عاد مو لهاي الدغجة (الدرجة) حتى ما اخوج يسحلني.
هو مو زين من عنده متحمل وجودي على كلبه

هالة.. والله خطية امي ما تدري الماي يمشي من جواها
ولو تسمع كلامنا تروح يوم ثاني تكعد بالشماعية
من ورانا احنا الثلاثة

.. والله خطية خالة ما تستاهل يكون عندها
هيج خلفة تكصغ العمغ (تكصر العمر)
هالة.. لج بقرة هيج صارت نوب درتيها علية
.. والله اني مالي دخل انتي واخوج اكبغ (اكبر) صايعين

.. ماشي ماراح انزل نفسي واجاوبج عندج رجال هو الي يشكمج
وكامت تلعب بحواجبها وتغنيلي (اليوم اليوم دكت للنصر اجراس )
ها خوتي ها ها اسمع يل ما رايد تسمع سحلة هديوة من قسام

.. حبيبتي هالة يمعود شبيج متحبين شقى يعني اني اختج واضحك وياج
اخوج ليش تدخلي بناتنا
.. هسه صرت حبيبتج يله ماشي ناس متمشي الا بالعين الحمرة
تعالي كملي لبسج لا يجي ويسحلج من صدك

كملت لبس شالي وباوعت لروحي
هالة.. انتي ليش تلبسين حذاء فلات
.. اخذ راحتي بي اكثر واصلا اني اتخبل من الحذاء الكعب العالي

هالة.. اي بس على الاقل حاولي تلبسي من تكونين طالعة وية قاسم
لان شكلكم يصير نشاز عبالك رقم عشرة

هدى.. والله هذا الموجود هاي اني وهذا طولي
هو اخوج هم طوله اوفر

جنت منطلقة بالحجي وجان يجيني صوت قاسم
.. هذا منو الي طوله اوفر

كمزنا من مكانا اني وهالة
وهالة ابتسمت بخباثة .. اسأل مرتك وهي تجاوبك
بلعت ريكي .. جنت اقصد على طولي اكللها كلش اوفر
يعني لو بس شوية عندي طول جان اكعد وزن

قاسم.. عمي ستري علية هو انتي طولج شبر
وما كاعدة راحة مو نوب شوية تطولين

جان قاسم يحجي بتلقائية
.. يالله خلصتي استعجلي ترة وراي شغل كومة
ينتظرني

.. يالله هذا هو خلصت ما عندي شي
اخذت جنطتي جنت لابسة قميص عالبنطلون
بي مجموعة الوان متناسقة والشال سادة والحذاء رهمته بلون الشال
والميك اب حطيته بسيط بس اتفننت برسمة العين
نزلنا سوية. وشافتنا ام قاسم

ابتسمت وكالت.. سلميلنا على خواتج
وعزميهم عالاسبوع الجاي همة وبيبتج وزوجة عمج
مو تنسين اني هم راح اعزم خواتي
لان بقوا بس اهلج واهلي ما عزمتهم
.. ان شاء الله خالة صاغ

طلعت وية قاسم وركبت السيارة باوع علية
من فوك ليجوة رفع حاجبه وكال
.. هاي شنو هادي ولا عرفتك

اتفاجئت من ملاحظته هزيت راسي بمعنى شكرا ودرت وجهي
بعدها انطلق يسوق

باوعت عليه.. اي صدك قاسم البارحة شبيك
دخلت للبيت معصب
جاوبني.. هيج ماكو شي
.. قميصك اليوم جيت اغيد (اريد) اغسله ولكيت بي دكمتين مكطعة وشك بالجيب

اتنهد متضايق وجاوبني .. البارحة اتعاركت وية اولاد عمي منير
لطمت على صدري .. عزة العزاني وخالة تعغف (تعرف) بالموضوع لو لا
.. لا ماعندها علم ديري بالج تكولين ترة الحجية صحتها على كدها
وبس تعرف تنخبص وتخبصني

وحتى هشام خطية البارحة بالوحدة بالليل يالله
دخل للبيت لان عينه جانت زركة
من سامع بية رايح لبيتهم لوحدي
اجة وراي وشافنا متزانكين وهو كبل

بدون ما يفتهم شنو السالفة دخل وياي وهد عليهم
بس عمامي اتدخلو

هدى.. منو بيهم
.. عمي محمد وكاظم وكامل اجوي
وكعدوا يهدون بينا
.. ليش اتعاغكت (تعاركت)وية بيت عمك

.. انتي اكيد سامعة بسالفة منير ومنتصر والفلوس الي اخذوها من ابوي الله يرحمه

.. اي اعغفها (اعرفها)خالة وهالة حجولي عن الموضوع
بس هالمغة (هالمرة) ليش شنو الجديد الي صاغ (صار)
.. اني البارحة بالصدفة عرفت منير داخل شراكة بمول كلش فخم
وجبير وعرفت اله حصة بي
.. وين المشكلة بالموضوع انت ليش ضايج
.. لج هدى هذولي داخلين بحلالي وحلال خواتي

هو قبل ٣ سنوات حلف دين قسم
انه ما ماخذ فلوس من ابوي
وان هو هم خسر فلوسه بالمشروع حاله حال الوالد الله يرحمه

زين كليلي هذا المول قبل سنتين من انفتح
منين جاب هذا المبلغ الضخم

بس انا مو قاسم اذا ما ازوعهم كل فلس اخذوه
بس خلي يصبرولي ضاملهم ضمة بس عند الله خبرها

تدرين انا البارحة من هديت عليهم مو علمود سالفة الفلوس لا
بس البارحة سمعت بمنتصر رجع من الخارج

وانا حذرتهم وكلتلهم
منتصر اذا لمحته ترة هو حصتي
مو تكولون ما كال قاسم
ومن عندها
هدوا علية اولاد عمي واتزانكنة
وجان يتدخل عمي محمد يكولي
.. لك قاسم انت ما تكلي شنو سالفتك انت شبيك مالك رداد كل يوم هاد على واحد

جاوبه هشام.. عمي ترة قاسم صاحب حق
وطالب الحق ما ينام ليله لحد ما يسترده
عمي كاظم سكته
كاظم.. انت تنجب وتسكت لا تدخل نفسك بالموضوع. السالفة ما تخصك

هشام.. اذا مو انا الاوكف بظهر اخوي لعد منو الي يفزعله

كاظم .. هشام اشو صاير ترادد لا تخليني اصدر قرار بحقك واسحبك عندي واخليك تحلم تشوف عتبتهم

هشام بستهزاء .. صدك جذب رجال مشورب طول بعرض واكف كدامك تكلي اسحبك منهم
حجي اصحى وفتح عيونك زين هذا الكلام قبل جنت تكدر تسوي تدوس على كلبي وتمنعني عنهم
بس هسة زمن اول تحول اني صرت رجال وراضع حليب امي ام قاسم

وهسة اكول بعالي صوتي وخلي الكل يسمعني
انا ابن المرة الربتني ومو انا الينكر حليب امه
وقاسم اخوي
والي يريد يوصل لقاسم ويأذيه خلي يتعداني بالاول

كاظم .. والله عمي خوش الظاهر الجماعة مسويلك غسيل دماغ
شكلي لازم اراجع حساباتي وياك من جديد
واسويلك كرصة اذن ولك انت الظاهر نسيت نفسك

بس هشام ما اهتز ولا اهتم لتهديد عمي كاظم وجاوبه باستهزاء
.. شتريد تسويلي عود الراتب الي مجري الي كصه
تره انت ممنطيني شي وتمنني بي
حتى احساس ابوة ما منطيني فبشنو تهددني متكولي لخاطر الله
تريد تحرمني من ورثك اني ممنتظرك تموت حتى استارثك
اني ربتني مرة اخت رجال اطلع رزقي من الصخر
مو اعيش بذل وانتظر ابويه يموت حتى اخذ ورث من وراه

تدرين هدى
جان كل ضني ان هشام باقي وياي لان محتاجني
وحياته الصعبة هي الي جبرته يعيش ويانا
جنت اكول كافي علية انا احبه وراح ابقى احميه
عن طيب خاطر

بس موقفه وياي البارحة
كحل عيني وبرد كلبي وشفى غليلي بعمامي
وعرفت بوكتها بقيمة الاخو
وصرت اباوع عليه بفخر
واكول هذا شوكت كبر وكام من يحجي يسكت اكبر واحد
لو تشوفين الكل شلون ساكتين ويباوعون عليه على كلامه الموزون

قاسم جان يحجي واني اسمعله واباوع لعيونه شلون تلمع من يحجي بطاري هشام

.. ربي يحفظه ويخلي سند الك
جنت كل يوم اكتشف بقاسم صفة وطبع جديد
وكعدت اباوع عليه عبالك اول مرة اشوف هذا الانسان

وصلني لبيت مروة بس قبل لا نوصل وكف يم محل حلويات جبير
وكلي نزلي عيب تدخلين ايدج فارغة.نزلت وراه دخل اشترى بقلاوة وقطع كيك
واني طلبت منه بخجل يشتريلي مجموعة حلوايات لمشمش
وبعدما مروة وصفتلنا مكان البيت
وصلني
اتفاجئت ببتها ما شاء الله جان بيت جبير بمنطقة راقية وحديث
صدك فرحتلها من كل كلبي

سلمت عليه
.. مو تنسين من تردين ترجعين اتصلي علية حتى اجي اخذج
.. صاغ
ابتسم وحرك سيارته وراح
اتجهت للباب ودكيت الجرس

وجان اسمع صوت اقدام خفيفة دتركض
اجاني صوت مشمش
.. ماما اوكفي اني اغيد افتح باب لهدى

ابتسمت فتحت الباب عالسريع نزلت نظراتي عليها
جانت ظافرة كصيبتين وحدة مظفورة والثانية
مفتوحة بعدها ما وصلها الدور

جانت مروة تمشي وراها جانت لازمة المشط بيدها وتضحك
.. بس شافتج بالكامرة طفرت من جوة ايدي وكالت اني افتح باب

انطيت علب الحلويات لمروة
نزلت عليها وحضنتها
.. تعالي يابعد غوح خالتج خلي اشبع من هاي الخدود
ضحكت بشقاوة وكالت
.. هدى وين بدلت العغوس
مروة.. لج مشمش اني كم مرة اكدت عليج تكولين خالة

.. يابة عوفي البنية بغاحتها ( براحتها)
اقتربت مني واخذتني لحضنها بكل لهفة
.. لج صارلي يومين اعلم بيها اكللها من يجون خالاتج
تكولين خالة وكعدت اراويها صوركم كل وحدة بيكم
واذكر الاسماء وهي كعدت تردد وراي
تكول خالة شيماء وخالة ضحى وخالة مريم

الا انتي من تشوف صورتج تكول هدى العغوسة

هدى .. ههههههه فديت كلب خالاتها مميزة من يومي
باوعت منا ومنا اكول مغوة
شنو البنات وين
شكلي اني اول وحدة وصلت
مروة.. البنات بالطريق شيماء ومريم راح يجيبهم عمو امجد
وضحى منتظرة زوجها يجي ويوصلها

وبين ما جنا نسولف بالكراج اندك الباب ودخلت شيماء ومريم واتبادلنا الاحضان
ولاول مرة اشوف ابتسامة مريم ووجهها منور

دخلتنا للبيت جان كلش حلو ومرتب وجان عندها
خدامة
جانت مشمش تطفر داير مدايرنا
فرحانة
سمعنا صوت الجرس وجان توصل ضحى
وتنضم النة نزعت البوشي عن وجهها
ومشمش تكول
.. ماما شفت الشغيغ (الشرير) بالسياغة (بالسيارة)
مروة باوعت لضحى
.. لج ضحى هاي مشمش من يوم عرس هدى وهي تسمي زوجج سيف الشرير

ضحى.. اهوووو سكتي عمي حقها تسمي شرير
اي هو غير صار بية فلم بيوم العرس اجيت اموت بدمي الا شوية
شيماء.. والله كالت مروة يمكن زوجها متعارك وياها
ضحى .. هو بس زوجي اشو بذاك اليوم كلها
التمت علية
وجرت حسرة
هدى.. اهووو صاغ (صار) بيها حسغة (حسرة)
احجيلنا

ضحى.. خلوني بالاول اجر نفس وارتاح
واسمع اخباركم
والتفتت لمشمش وانطتها لعبة مكعبات
ومريم مشترية الهة باربي
وشيماء جابتلها بدلة بيضة تول كلش حلوة اصير نفش

مشمش شافتها وصاحت .. بدلة عغوس (عروس) ماما
اغيد اعغس ( اريد اعرس)
ضحكنا كلنا من كل كلبنا على سوالف مشمش
اباوع لمروة شلون فرحانة
بحيث احنا كلنا كاعدات عالقنفات
الا هي بقت واكفة وتسولف ويانا عبالك اذا تكعد راح يفوتها شي

انتبهت من كد لهفتنا وشوقنا لبعضنا
جنا كلنا نحجي بوقت واحد سوية. والمشكلة كلنا نفهم
على بعضنا

ومريم انطلقت وما ادري بيها
عندها حس الفكاهة مثلي
وكعدت تحجيلنا عن صديقاتها بالمدرسة
ومروة كالت

.. مريومة اني فرحانة بيج لان سمعت بمستواج بالمدرسة
كلش زين متفوقة بدراستج وذكية
وعرفت جان عندج كم مادة ضعيفة بيها

مريم.. لا الحمدلله كدرت اسيطر عالمواد الصعبة
لان خطية بابا حطلي مدرسين اثنين للفيزيا وللرياضيات الي همة نقطة ضعفي

شيماء عقدت حواجبها بتسائل وسألت مروة
.. انتي شلون عرفتي بمستوى مريم
.. اهووو هاي سالفة طويلة بعدين احجيها الكم
هسة كومو تعالوا وياي خلي نصب غدة

كمنا وياها
مروة.. من هسة اكلكم مو تعيبون على طبخي اكلوا
وسكتوا لان اني كلش صفر بسوالف المطبخ

شيماء .. عمي راضين شنو يطلع منج انعم الله

صبينا وبدينا ناكل
ومروة شرطت نفرش السفرة بالكاع ما قبلت ناكل على ميز الطعام
تكول اريد اتذكر ذيج ايمنا من جنا نكعد على فرد صينية

ميز الطعام احس بي يبعد المسافات بينا
والله وبسطنا بالكاع وانزلت نزلة اخت الجذب على الاكل

ضحى.. هدهد شكلج صارلج كومة ما ماكلة
تذكريني بروحي من جنت عروس بأول ايام عرسي هيج جنت استحي

.. اي والله بعدني استحي من بيت اهل قاسم وما اخذ غاحتي (راحتي)كلش بالاكل
بالرغم طبخ خالة ام قاسم
كلش طيب وما عليه قصور
.. بعدين تتعودين وتصير سوالف

ورة ساعة
جنا كلنا كاعدات شي بالكاع وشي عالقنفات
مروة كاعدة بصف مريم عالقنفة واني ومتمدد عالكاع وحاطة راسي بحضن شيماء ورجلي رافعتها عالقنفة

وضحى كاعد وبحضنها مشمش وتلعب بشعرها

مروة باوعت علينا واتنهدت برضى وكالت
.. احمد ربي واشكره الي خلاني انجمع بيكم من جديد
ضحى.. اي صدك مروة عمتي دائما تسألني عنج
وتكول اختج مروة منين جابت هذا الخير كله
واني اصلي عالنبي بكلبي واكللها
.. خالة مروة اختي من جانت صغيرة وهي شاطرة وسباعية
ولا تنسين هي دكتورة
بس شكلها ما اقتنعت بكلامي

هدى.. صدك مغوة انتي من بعد ما طلعتي من عدنا
شلون دبغتي اموغج (دبرتي امورج) وين عشتي

اباوع عليها اتنهدت بحسرة

.. ما تعرفون اني شكد عانيت بحياتي من بعدما طلعت من عندكم
شفت الويل واللوعة وضكت المر
جربت كلشي بحياتي
الخوف البرد الجوع الضياع الغربة
كل هذني مريت بيهم بس الي جان يدعمني ويقويني

شهادتي ونجاحي جان رغم الي مريت بي
جنت انتقل من نجاح لنجاح
يعني تعبي وخوفي ما راح عالفاضي

اتذكر من طلعت من مركز الشرطة
جانت عندي صديقتي هم دكتورة اسمها هناء الله يرحمها
جانت حيل طيبة
وهي بذاك الوكت هواي ساعدتني

واقترحت علية بالبداية اسكن يم امها وفعلا جانت مرية جبيرة
لان هناء جانت متزوجة وعندها بنية وولد ومتكدر تسكن يم امها
زوجها دائما متنقل ما بين اهله بالناصرية وببغداد
لذلك كالت تعالي سكني يم امي هي وحدها
بس خطية امها ما طولت يمكن بالاشهر وماتت وانتقلت لدار الطبيبات

جنت امر بذيج الفترة بشدة شديدة واتعرضت لهواي ضغوطات اولها كلام الناس
وصارت سيرتي على كل السان من بعدما عرفوا بية قدمت بلاغ على اثير بمركز الشرطة

ماخلو حجاية ما كالوها بحقي
صرت اعيش بجحيم من ورة كلامهم
كثرة الكلام بسمعتي
لدرجة اضطريت اوافق على اول واحد اجة اتقدملي

الدكتور رافد جانت سمعته معروفة مو شي
بس اضطريت اوافق حتى اسلم على روحي
جنت حيل خايفة
ما اعرف منو وياي ومنو ضدي

وصادف جان رافد مقدم طلب يريد يدرس برة
حتى ياخذ الماجستير واعتيادي اني زوجته اكون مرافقة له
وهو حاول بمعارفه وواسطاته ان يقبلوني اني هم دراسات

وجانت هاي فرصتي وسافرت وياه للخارج
اتذكر جنت كلش متفوقة عكس رافد الي
كضاها ونسة وطلعات وية الجاليات العراقية
اتعرف على مجموعة اصدقاء
والتهى بيهم بالوكت نفسه اني حملت بمشمش
صحيح جنت ادرس بس بنفس الوكت
قدمت على وظيفة مساعدة طبيب

بعيادته جان دكتور نسائية. جبير بالعمر وشوية شوية
كمت حتى اخذ مكانه من يسافر
وبعدها اتفوقت حتى عالدكتور نفسه صاحب العيادة

وصاروا المراجعات يطلبوني بالاسم
وبعدما خلصت دراستي داومت بمستشفى خاص هناك
وصرت اشتغل بجد
بحيث اليوم كله ما ارتاح الا خمس ساعات
حتى مشمش جنت احطها بالحضانة التابعة للمستشفى

بس الحمدلله هي جانت صغيرة ما تنتبه لوجودي
مرت علية ليالي ما انام من ورة الواجب والشغل

وجنت احط الفلس عالفلس وحيل حريصة
وجنت شنو احصل احولة لصديقتي هناء
تحطهم الي بالبنك

ورافد جان عليه توفير الايجار الشقة والكهرباء الماي
واني علية توفير المسواك الملابس ومصرف مشمش
ونوب الدكتور صحته كلش تعبت
وهيج كدرت اشارك الدكتور بعيادته

وراها اشتد عليه المرض
قرر يبيعلي حصته ومن عندها

كدرت اتنفس وبدت اموري تتيسر بفضل من رب العالمين
وظليت مستمرة اشتغل واحول لهناء
منا لحد ما شفت متمكنة واكدر اوكف على رجلي
كلت افتحلي مشروع هناك بالخارج
مجنت ناوية ارجع
بس رافد اتمرض واتدهورت صحته
اول شي فكرت به من اتمرض رافد

هو مشمش شلون اذا صار علية شي اني او ابوها
خفت لا تبقى لوحدها ما ردت بنتي تعيش وحيدة بالغربة
فصار شغلي الشاغل اامن مستقبل بنتي

وليش ما مرة من المرات زوج هناء جان رجال قمة بالاخلاق اقترح علية
نفتح اني وياه مشروع مركز طبي نسائي وتجميل
والحمد لله
ربج ما يكطع حصلت ثمرة تعبي
صحيح اول ما وصلت للعراق
جان بالبداية محد يعرفني

بس بعدين كدرت بفترة وجيزة اكون سمعة طبية
متميزة

وهاي اني كدامكم بخير ونعمة
ضحى .. والله بالحقيقة مروة. مو كدامج
انتي رفعتي راسنا وحققتي حلم امي
عكسي اني الفاشلة ما فلحت
بأي شي لا بمدرسة لا بحب ولا بزواج

شيماء.. صدك ما كلتي سيف شبي وياج ذاك اليوم بالعرس
حسيت عليج مقهورة بس ما كدرت اسألج كدام سيف
وكل مرة اسألج شبي تغيرين الموضوع

.. اي مو ما تعرفين سيف كل ما احجي بالنقال وية وحدة منكم
يضل يوكف فوك راسي فما اكدر احجي كدامه عن الصار

هدى.. هذا استاذ سيف شكله محتاج
اهد عليه علاوي ختيبي السابق يفلش سياغته مغة (سيارته مرة) ثانية
ضحى.. مروة تتذكرين من اجتي مريم تبجي وبوكتها
خليتي يمي مشمش
.. اي اتذكر

.. بوكتها جنت مدنكة لازمة ايد مشمش وواكفة بالشارع منتظرتكم
لان انتوا الله يحفظكم عفتوني بمكان الرايح والجاي يشوفني واني جنت
لابسة بوشي ولازمة مشمش الي بدت تتنعوص
تريد امها والناس تعبر عبالهم خاطفتها
ههههههه
و من بين هاي الهوسة كلها وجان اشوف صهيب
غير اجة كلبي يوكف
بس شفته اني نسيت كلشي ونسيت حتى اسمي
وصرت بس اباوع عليه بشوك

بس مع الاسف صهيب مجان لوحده جان وياه
خطيبته جان حاط ايده بحماية على ظهرها
وفاتحلها باب السيارة حتى تصعد المسعدة
سيارته جانت واكفة كدامي

اني بس اباوع عليه واتحسر واعظ ايدي من الندم
وبهاي الاثناء
جان تجيني ام فرزدق وكالت

.. ها خالة ضحى ليش واكفة لوحدج هنا وين خواتج
هي كالت ضحى
وجان انتبه لصهيب التفتت بسرعة وصار يباوع علية
بتمعن
عبالك يريد يخترق بنظراته هذا البوشي المغطي ملامحي عنه
ويشوف وجهي ويتأكد اني ضحى بذات نفسها

جاوبتها واني عيني معلكه تباوع عليه
.. خالة مروة وشيماء راحوا بشغلة وهسة يجون

خطية ام فرزدق جانت كوة تمشي
وكالت .. يالله خالة انا رايحة عذريني جان بقيت وياج انتظر خواتج
بس رجلية ما يعينوني ما بيهم خير
.. حبيبتي خالة ادري بيج ما تقصرين لا تشيلين همي
اخذي راحتج

اجة صهيب ولزمها من ايدها حتى يوصلها للسيارة

بس قبل لا يروح سمعني حجاية خلتني اتمنى الموت
همسلي بصوته
وكال.. هم تنامين ليلج
شهكت وحطيت ايدي على حلكي حتى اكتم عبرتي
وما انفضح وراح اخذ بيبته وصعدها بالسيارة
وهو صعد وظل واكف منتظر

وكل شوية يلتفت يباوع علية
اسمع خطيبته تكله شنو تنتظر ليش ما تتحرك
وهو يجاوبها وعينه علية
.. لحظة خلي ننتظر صديقي كال اوكف حتى نطلع سوية

وما تحرك من مكانه الا من اجاني الغضب الساطع
سيف شافني واكفة بنص الشارع
وهو نزل علية فشاير وغلط وسب
اخير شي لزمني من زندي بنترة اجة يخلعها لايدي

هذا صار كله كدام عيون صهيب الي فتح الباب بسرعة ونزل من السيارة اتقدم خطوة وبعدها ارتد مثل الي تذكر هو ماله حق يتدخل وتالي رجع صعد بالسيارة وحركها وراح
وهو يسب ويلعن بقهر ما فاتتني حركته

بالعكس اصلا زادت ناري وصرت اتكلب مثل المطعون بخنجر مسموم هيج جان حالي بذيج اللحظة

مروة.. بعد الصار صار ما يفيد العتب ولا الندم
اثنينهم يدمرون صاحبهم

بس كوليلي سيف شلونه وياج يعني ليش هيج يتعامل وياج

هدى .. بي حالة نفسية يشك بيها بخبال
وخانكها. واختج عوبة لا تحل ولا تغبط (تربط)
شنو يكللها هي تنفذ الغبية

وهو شافها على كد ايده واستغلها

ضحى.. هو لو باقي عالشك والضرب بس
جان زين تعالي شوفي هسة ما اعرف شبي
كلش متغير وصاير ما ينطاق

من جنت زعلانة ورجعتله وهو مو على بعضه
صار ما يقتربلي مو مثل قبل جان مهووس بية
والنهار كله برة البيت وما يرجع الا تالي الليل
ومن يرجع يكابل النقال ويكعد

هدى.. عزة بس لا عنده. وحدة ملتفة عليه
ضحى.. والله ما اعرف وهاي الايام كمت اراقبه
بس المشكلة الحل الوحيد
الزم نقاله وادور بي يالله اعرف بس هو ما يتيه نقاله وبي رمز سري

هدى.. وانتي منا مطفية من هسة اكلج مبروك
راح يروح الرجال من بين ايديج ويتزوج عليج وانتي ظلي
دوغي عالغقم السغي (دوري عالرقم السري) مال نقال الشغيغ (الشرير)

لحد ما يجي واحد من جهاله من زوجته الثانية
وينطيج الغمز السغي (الرمز السري)
هاج خالة امي تسلم عليج
تكولج هذا الغمز(الرمز) مال نقال ابوية
بالله اتأكدي ابوي جاي يخونج لو لا ؟؟

مروة وشيماء ومريم ضلوا يضحكون علية

مروة جانت كاعدة بصف مريم
ربتت بكف ايدها على رجل مريم
وهي تضحك

مروة.. والله ياهدى بعدج ما اتغيرتي جنية الله يساعد كلب قاسم عليج
سمعنا شهكة مريم ورفعت قماش تنورتها
من على منطقة الفخذ

مروة باوعتلها .. شنو شبيج كمزتي
شبيها رجلج
مريم بارتباك.. لا البارحة جنت دا اكلي بس والخشوكة وكعت على زري
وانلسعت

شيماء.. اي غير تنتبهين شبيج
مروة.. ذكريني انطيج مرهم مال حروق
يفيدج حتى يطيب بسرعة وميترك اثر

مريم.. ما تسوى الحرق كلش بسيط
مروة.. حتى لو ميخالف يوخر اثر الحرق ويعالجه

شيماء.. مريم احجي ويانة وشاركينا
ادري بيج مترددة من عدنا وبعدج مماخذة علينا
واكيد انتي دتسألين اني وين جنت عنج كل هالفترة
وهسة يالله اتذكرت عندي اخت

مريم دنكت وكالت بصوت هامس مايل للخجل
.. بالحقيقة اي هواي سألت نفسي. وين جانت شيماء
شعجب هسة كامت تسأل عني

شيماء.. شوفي مريم انتي جنتي صغيرة وما تتذكرين
ولا تعرفين شنو الصار
من بعد وفاة امي اني صرت المسؤلة عن نفسي وعن ثلاثة بنات صغار
وفوكاهم ابوي.. اني و اخواتي بكفة وابونا بكفة ثانية

الدنيا كبرتني قبل عمري وما انطتني فكة اجر نفس
جنت الشخص الوحيد الي مرتاح كلبي ومتطمنة عليه هو انتي
دائما اكول على الاقل خلي وحدة من عدنا تعيش
مرتاحة

ورغم هذا كله اني بقيت اتواصل واسأل عنج بس جنان
جانت تحاول تصدني وتبعدني عنج
فاريدج تعرفين انتي قطعة من كلبي حالج من حال هدى ومروة وضحى
فخلي ببالج مهما يدور علية الزمن راح ابقى مثل ما اني عيني عليكم

ببيت قاسم
بعدما اجة علية قاسم ورجعني وياه للبيت
واول ما دخلنا للبيت لكينا خالة وهالة وهشام كاعدين بالهول
سلمنا عليهم بس جان سلام ام قاسم بثكل
سألته
.. اكول قاسم اليوم وين اتغديت
انتبهت لهشام يأشر لقاسم من ورة امه

بس قاسم رفع حاجبه وجاوبها
.. اتغديت بأرض الله الواسعة
ليش تسألين
ام قاسم وعيونها تجدح نار
.. اخوك هشام كال اليوم اتغديت ببيت عمك محمد

اباوع لهشام دمغ كصته مثل الي اتورط

قاسم باوع عليه وكال
.. والله عرفت بيك اغبر ما راح تدبرها وراح تجر الحجية لسانك
ام قاسم.. خليك وياي وجاوبني ولا تكعد تتحلف بالولد
قاسم.. اي جنت معزوم عندهم عالغدة ليش عندج مانع

جان يحجيها بتحدي اباوع عليها رصت اسنانها
وحجت وكالت هدى وهالة طلعوا شوية اريد احجي
كلمتين وية ولدي

طلعنا اني وهالة ووحدة تباوع بوجه الثانية
فتحت حلكي اجيت اسألها جاوبتني بسرعة
.. كلشي لا تسأليني حالي من حالج كلشي ما اعرف

تركتها وصعدت فوك لغرفتي وكعدت ابدل
وافكر بكلام شيماء عن خطوبة حيدر صدك انقهرت عليها
ياربي ما تستاهل

دخل قاسم للغرفة وهو مدخن من العصبية
فتح الكنتور بكل عصبية وطلعله ملابس وفات للحمام جان بس يركع بالبيبان

طلعت من الغرفة شردت من غضبه
ونزلت يم هالة

واني بقيت اتلافة ام قاسم
بس بالاخير صادتني جنت كاعدة يم هالة نبارع مسلسل وهي اجتي وكعدت يمي
.. اكووووول خالة هدى

هالة بصوت ناصي ياستار صار بيها اكوووول
استلمي لعد
.. اشش نصي صوتج لا تسمعج وتكوم علينا
ام قاسم .. شوفي خالة اليوم اريدج من تصعيدين للغرفة
تسوين نفسج زعلانة على قاسم
ومن يقتربلج كليله اني مزاعلتك ما احجي وياك
بس ها ما اوصيج اريدج وانتي زعلانة تلبسين
ملابس حلوة تحركين كلبه بيها
والا اكلج لبسيله احمر قاسم يموت عاللون الاحمر
نقطة ضعفه

رمشت بعيوني اباوع عليها متفاجئة
وفاتحة حلكي على خطط خالتي الجهنمية
شنو هذا فلم الاغراء الي تريدني اطبقه على قاسموف

سألتها .. خالة ما افتهمت وليش ازعل عليه
.. ولج شلون بيج شسوي بفهاوتج اشك هدومي لج ليش تطلعيني عن طوري
لج ثولة قاسم اليوم مو رايح لبيت عمه محمد
معناها رايح يشوف رهف
وانتي شي اكيد تغارين على رجلج صحيح لو اني غلطانة

كرصتني هالة واني كمزت وجان يدك الجرس عندي متأخر
عزة بعيني هاي شلون فا تتني صدك قاسم ورهف
اتلاحكت لروحي
ولطمت على خدي وكمت من مكاني
.. لاااااااااااا خالة لاااااااا تكوليها صدك قاسم متغدي يم غهف
اليوم ما ابقاله ولا لحظة وحدة بالبيت
اهيء .. اهيء.. اهيء
الخاين الغداغ جغح (الغدار جرح ) قلبي
ااااخ ليش هيج

هالة من بين اسنانها تحجي وياي
.. على كيفج ويانا ياعبلة كامل
شكلج حميتي.

ام قاسم فلت وجهة .. اوكفي خالة خلي افهمج
ترة......
قاطعتها وما خليتها تحجي

.. لا خالة ابد والله لا تكعدين تبغغين (تبررين)وتدافعين لابنج
اتوجهت صعدت الدرج

وهي خطية كامت وراي تريد تهديني
وهالة من وراها تصيح
.. لج هدى يمعودة ام الغيرة صلي على محمد
لا تتعاركين وية قاسم لا يفطسج وربي

صعدت فوك ودخلت للغرفة وسديت الباب
وجان قاسم مبدل وكاشخ واكف كبال المرايا ديليس ساعته
التفت باوع علية مستغرب وضعي

شكو شبيج ليش هيج دفرتي الباب جنج نعجة تزاكط
دخلت وقفلت الباب وراي

.. ولك قساااام هسة توديني لاهلي بعد ما ابقالك لحظة وحدة بالبيت
عقد حواجبه مستغرب
.. احجي عدل شكاعد تمسلتين
لاتخليني هسة اطلع اجناني عليج

اجانة صوت امه هي وهالة تدك عالباب
باوع
وكال بصوت عالي .. شكوووووو
ام قاسم .. خالة هدى صلي عالنبي

اني شلت حذاء قاسم وضربت الباب
الباب بي وعطت وراها بصرخة
وحجيت من ورة الباب

.. اااااااخ يمة لك قاسم يعني فوك خيانتك تضغبني (تضربني)

اسمع هالة تدك بالباب وتكول
.. الزلمة يطلع دم .. الزلمة يطلع دم
عبالك عندها هتاف

اسمع ام قاسم ضربتها
.. طيح الله حظج يا عوبة

احلى شي بالموضوع قاسم باقي واكف بمكانه
صافن علية شكاعد اسوي ويهز بيده

ويحجي بصوت عادي مامهتم
.. والله انتي مخبلة مو عاقلة
توخرين من وجهي لا اجي اشمرج من فوك السطح وابتلي بيج

ام قاسم.. يبوووووووو راح يموت البنية
ركضي روحي صيحي اخوج خلي يجي يفلش الباب

دار وجهه عالباب
يالله هاك استلم اجتي الثانية
راح فتح الباب وطلع كدام امه الوجه ما يكصه السيف
.. والله من وراج انتي وهاي الجنية
راح اعوفلكم البيت واطلع ماكو اذا بقيت ثانية وحدة
معناها اطلع منا كبل للسجن

اخذ نقالاته وسويجه وطلع
وام قاسم نزلت وراه تهدي بي

وهالة دخلت يمي وسدت الباب وكعدنا ثنينا
بالكاع خربانات ضحك

شيماء
بعد خمسة ايام من بعد عزيمة مروة
جنت كل يوم اتواصل وية البنات
ومريم بقيت مستمرة كل يوم اتصل عليها
دتخضر لامتحانات نهاية السنة
بس هدى وحياتها قالقتني ممرتاحتلها احس بيها
دتسبح عكس التيار وخايفة عليها لا تتعب بالاخير وتغرك وتطلع الامور من ايدها
ثاني يوم العزيمة
اخذنا اجازة اني ورباب مروة اتوسط لي وانطوني الاجازة
حتى اطلع وية رباب دنجهز لزواجها كل يوم لان ما بقة شي على عرسها

وهستوني رجعت من السوك رباب وصلتني للبيت وراحت جنت كلش تعبانة
واول ما دخلت سليمة استلمتني تحقيق
.. وين جنتي وشعندج ستوج رجعتي
ولج باوعي للساعة ب٨ وانتي ستوج يالله شرفتي
ويامن جنتي احجي
.. بيبي شكو ويامن يعني جنت طالعة وية رباب للسوك
.. لج شيماء ما مرتاحتلج هواي متغيرة من خواتج اتزوجوا وانتي اتخبلتي
خايبة بس لا ترديلج رجل
حجيت بعصبية
.. ما راح ارد عليج لان انتي معذورة شكلج كبرتي
وكمتي ما تعرفين شنو تحجين

كلامها جبرني ادوس بالحجي وياها
بس حجيها ينطق الحجر

دخلت للغرفة
متنرفزة وبدلت ملابسي ودك نقالي
وباوعت عالمتصل جانت هدى
سحبت نفس عميق ورديت بصوت هاديء
.. هلو هدهد شلونجز
.. هلا شومة حبيبتي اكول شومة عفية اذا تكدرين
تحضريلي الملازم مالتي والسجلات
باجر امر عليكم واخذهم
لان محتاجتهم بالكلية

.. صار تتدللين من عيوني
جنت احجي وجان اسمع صوت الجرس
خليت سليمة تفتح الباب وكملت كلامي وية هدى

بس لحظات وجان اسمع صوت سليمة تصيح
.. يمةرصخام ولج احجي شمسوية
وسمعت صوت ثاني كمز كلبي من مكانه وشهكت

.. عزة هذا صوت مريم
هدى.. شكو شيماء شصاير

ما جاوبت هدى رحت طلعت برة والنقال بعده بيدي
وجان اشوف اختي مريم واكفة يم سليمة بطرك البجامة
مالت البيت وجهها مشخوط ونزف دم
كلبي انخلع من مكانه على منظر اختي
وتحجي وتكول بهستريا
.. والله مسويت شي هي ماتت
من وحدها

يتبع

احبكم كومة احبكم اهواااااااي
اختكم نهى
☺️☺️☺️☺️☺️☺️☺️☺️☺️☺️☺️☺️☺️