أساور الفضة الفصل الثامن وأربعون 48 - بقلم نهى

مساء الخير عليكم احبتي

اتقدم بخالص التبريكات لخواننا المسيحين بعيدهم المبارك . عيد ولادة سيدنا السيح (ع) ونسئل الله بهذا المناسبة ان يحفظ العراق لجميع العراقيين
♥️♥️♥️♥️♥️🎄🎄🎄🎄🎄🎄♥️♥️♥️♥️

#اساور_الفضة_ج٢
#نهى_الحسون

هدى
جنت واكفة ارجف على صفحة
وهشام الي هد على اخوه لزمه من ياخته وذاك دفعه
وبعدها صارت عركه بينهم قوية واحد يضرب الثاني

والبنات وام قاسم يردون يفكونهم ميكدرون عليهم

مكدرت اصبر اشوف اكثر
رحت ركض اتصلت على قاسم حتى يلحك
على هشام وخالتي الي وجها صار اصفر انخطف لونه

جنت اتصل واسمع صوت الصياح
والله اتخبل من العرايك واصوات الرياجيل بالعركة ترعب
اني من يمي كلي ارجف

رد على اتصالي
.. الو قاسم عفية تعال للبيت ضغوغي (ضروري ) تجي للبيت هسه
.. شنو شبيج هدى صاير شي ؟؟
.. اي هشام ديتعاغك (ديتعارك) وية اخوه الجبيغ (الجبير)
وخالة وجهها ميطمن اصفغ (اصفر) خايفه عليهم
تحاول تهدي هشام لو اخوه وتبعدهم عن بعضهم بس ماكو محد ديسمعلها

جاوبني بستعجال
.. يالله .. يالله انا جاي بالطريق
هدى عينج على امي روحي سحبيها بعيد عنهم
هذا صفاء ناقص كلشي اتوقع منه
جان يحجي بخوف على امه
والله هو حقه يخاف

لان كلام صفاء وية خالة جان بي هواي حقد دفين

والله لو سامعه قاسم يحجي هيج وية خالة
يمكن يدفنه بارضه
سمعت صياح هشام وباوعت خالة والبنات كلهم
لازمينه وصفاء طلع من البيت وهو يتوعدله

يكله .. ولك هشام اذا ما كسرت رجليك واخليك تزحف زحوف ما اكون صفاء
وخليك خدام جوة ايد قاسم ابو الملاهي
واكعد بين النسواين

ام قاسم عاطت بيه .. احترم نفسك واطلع برة
من تروح فدوة لتراب رجلين ولدي ياناقص
اطلع برة
..هو انا طالع ما ميت عليكم وابقى بس بسيطة
تجيج الاخبار

عزة بعينه حجاها بتهديد
عدل ياخة قميصه ومسح طرف شفته المجروحة
وباوع لهشام وام قاسم بعيون كلها غل وطلع

هشام الي شياطين العالم كلها متربعة براسه من الغضب والاعصاب
لازم ايد خالة يريد يهد يروح وراه بس ميكدر
.. حجية ابوس ايدج هديني رحمة على موتاج خلني اكصله السانه

ام قاسم واكفة كدامه وحاطة ايدها على صدره تدفع بي لداخل البيت
.. يوم هشام لخاطري اتكفى الشر والله كلبي خلص من المشاكل

كوثر .. هسة انت ليش حارك الدنيا عوفهم لوحدهم يحجون
اذا جنت متريد تتزوج بنت عمك خلاص مو مشكلة
كللهم ما اريد محد يكدر يجبرك انت رجال

ام قاسم تاكد كلام كوثر .. اي والله صدك انت لا تاخذ بحجيهم وتكعد تحرك بدمك
جاوبها وبعده يفور من الغضب
.. حجية السالفة مو سالفة اعتراض على بنت عمي
اني استفزني كلامهم وطريقة تعاملهم وياي

هذولي اخواني وابوي اعرفهم كلش زين
ترة السالفة صارت بالنسبة الهم
مسألة عناد وكسر خشوم

جانوا يحجون ودخل قاسم علينا
وباوع على امه وهشام وكال

.. شكو شنو صاير ؟؟

ام قاسم متفاجئة بجيته متدري بية اتصلت عليه
.. ها يوم قسام الله يساعدك
اشو راجع من وكت

قاسم .. الله يساعدج حجية هيج مريت عالبيت اريد اخذ الفلوس وارجع للشغل

عقدت حواجبي مستغربة جواب قاسم لامه
ليش مكللها اني اتصلت عليه

كمل كلامه .. شنو شبيكم انخرستوا متحجون
هشام شبي معصب وانتي حجية شبي وجهج اصفر

ام قاسم تريد تلحم السالفة ومتريد تكله
لان تعرف بقاسم كلبه محمل عليهم

ام قاسم.. لا هيج ماكو شي بس هذا ابن عمك صفاء
اجة لهنا وحجة وية هشام وكله
على الاساس ابوه خاطبله بنت عمه منير
وطلب منه يرجع للبيت لان ابوه يريد يزوجه
هذا كل ما في الموضوع

رفع حاجبه وسوة روحه مصدكها
.. وانت شبيك معصب
هشام رفع شعره من على جبينه ورجعه ليورة
.. لا هيج بس شوية ضوجني كلام صفاء عبالهم انا بكيفهم امشي

حسيت بهشام ما راد يطلع ام قاسم جذابة
كدام قاسم
بس عندنا احنا اذاعة رويتر ابو العلوم وهل يخفى الخبر
هالة .. لا قاسم مو بس هيج الحجي
هشام معصب لان صفاء اتجاوز على امي وصار يحجي كلام اكبر من راسه

انتبهت لأم قاسم
طول ما هالة دتحجي وية قاسم عن الصار
وهي واكفة ورة قاسم اتعض بأيدها واتأشر لهالة متكول شي
بس وين هالة كتت الاكو والماكو
اباوع لأم قاسم رصت اسنانهة
وسوتلها بأيدها حركة التوعد
(يعني بسيطة اصبريلي اني الج بعدين )

قاسم دار عليها هي وهشام وباوع عليهم
.. يعني هيج الحجي طلع الناقص صفاء
جاي لهنا وبنص ببيتنا ومتجاوز عليج ومعلي صوته بييتنا هيج بكل صلافة

ام قاسم .. يمة قاسم انت شتدري بية
قابل اني هيج فقيرة واخليه يتجاوز علية واسكتله
هو ما يتجرء يقلل من احترامه وياية
يكفي اني ام قاسم يسد اكبر حلك
بس هو مكدرته طلعها على هشام. وكام يحجي عليه

.. ما دامه دخل لهنا واتعارك بدون ما يسوي حساب لحرمة بيتي
خلاص هاي هي انكتبت عليه حجة

والله العظم اذا ما اليوم اسحله بنص بيتهم مثل الخروف ما اتسمى قاسم

دار وجهه وراد يطلع هشام صاح وراه
انتظرني قاسم اخذني وياك رجلي على رجلك

ام قاسم ركضت وراهم .. لكم لخاطر الله
رحموا بحالي انتوا تريدون تموتوني
ناقصة عمر

قاسم.. حجية لتخافين ماراح اسوي شي
بس احطلهم حد واريد اخليه عبرة ودرس
كدام الكل حتى يعرفون اوادمهم
وزمن اول تحول بعد ما اسمحلهم يستغلون عدم وجودي
مثل قبل بالبيت ويجون يسربتون براحتهم ويطلعون بدون ما احد يردهم

طلعوا من البيت وعافوا امهم وراهم خايفة

والبنات دخلو خالة للبيت ومعالم القلق
مرسومة على وجهم
واول ما دخلت للمطبخ وشافت هالة
باوعتلها بغضب
.. هالة صعدي فوك بعد مااشوفج كدامي هسه
اتحاشيني احسلج لان مااعرف شراح يكون مصيرج بين ايدي
وصمت ايدها وكزت على سنونها

وست هالة بس شافت حركة امها وعصبيتها
كبل كمزت من مكانها والدرج سوته شبختين
ام قاسم.. بسيطه هالة بس خلي يرجعون اخوانج بالسلامة واطمن عليهم
اني اعلمج واعيد تربيتج من جديد
اذا ما كصيت السانج وتوتبتج من هاي العادة ما اتسمى ام قاسم

شفت منى لزمت ايد امها وكعدتها حتى تهديها
واني دخلت للمطبخ حتى اجيب كلاص ماي لخالتي
وعلاجها
انتبهت لكوثر جانت
لازمة نقالها وما اعرف وية منو دتحجي
بس اسمعها تكله
.. عفية روح الحك عليهم قبل لا يسوون شي

اخدت كلاص الماي والعلاج لخالة
رفعت راسها وباوعتلي واخذت الماي مني وعلاجها وكالت .
. رحمة الله والديج خالة والله حلكي نشف من الهبطة
.. بالعافية خالة
باوعت لمنى وكالت
.. لج يمة منى اتصليلي على عمج ابو صهيب
خلي يلحك على اخوتج والله راح يصير بية شي من ورة الهبطات

منى .. ماما صلي عالنبي ولا تخافين
وخلي قاسم زين يسوي بيهم وراح لبيتهم خلي يحطلهم حد
حتى مرة ثانية ما يستسهلون الوضع مثل قبل
خليهم يعرفون البيت له حرمة وراعية اخوية قاسم

تركت منى وكوثر يم خالة واني رحت اخذت نقالي وصعدت فوك حتى اتصل على قاسم

اسمع البنات وام قاسم يحجون
واني كلبي وجعني وخفت على قاسم لا يصير بي شي ويأذونه

عقدت حواجبي وانتبهت على روحي شبية شكو
مستغربة هذا الشعور جديد علية ما مارة بي من قبل
اي فعلاً اول مرة بحياتي اخاف على سلامة رجال
واكعد اترقب بخوف لا يصير عليه شي

صعدت فوك ولكيت هالة شايلة نقالها وتتصل
على سعاد مرت عمها كاظم
بس يدك ومترد عليها

وهديل طلعت من الغرفة والعيون مورمة من النوم
لان هنا الاخت كل يوم اول مترجع من الامتحانات
كبل تلف راسها وتنام حضرتها اختصاص سايق مخدة

هديل .. شكو شصاير ليش هذا الصياح
هالة.. يا صلوات على محمد. روحي رجعي كملي نومتج
العركة خلصت وست هديل هستوها تتحزم

هديل فرت عيونها وكالت.. هو مو صوجج صوجي اني سألت وحدة بقرة مثلج

ودارت وجهها ونزلت جوة بسرعة
وهالة لطمت صدرها وحجت وياي
.. اكلج مو جني سمعتها كالت علية بقرة
لو اني غلطانة

اني هزيت راسي بتأكد.. اي كالت عليج بقغة (بقرة)
وانتي بقيتي ساكتة مثل الحماغة (الحمارة) مجاوبتيها
.. حمارة انتي
بس بسيطة خلي تصبرلي انا اعلمها بعدين
بختها بالعركة اذا ما شلعت اذاناتها هالصخلة
واخاف انزل كدام امي

.. عوفج من عندها وتعالي كليلي حصلتيهم لو بعدج
.. لا ما كو ولا واحد يرد بيهم وهاي الغبية سعاد ماكو هم مترد

.. اكول هالة صدك قاسم شنو جان يقصد بكلامه قبل شوية
من كال بعد ما اسكتلهم مثل قبل

هالة .. اي مو عمامي دكايكهم الناقصة ويانا هواي
لاتعد ولاتحصى متشوفين احنا علاقتنا بيهم مو هلكد
.. اني عبالي علاقتكم بيهم خغبت (خربت) من وفاة ابوج والي صاغ (صار) وياه

دخلت لغرفتها واني دخلت وراها وكملت كلامها
.. لا حبيبتي احنا من قبل وفاة بابا منتحاجة وية عمامي
وعلاقتنا بيهم كولش قليلة
اشرتلي اكعد يمها عالسرير
تعالي كعدي خلي احجيلج عن سبب هاي المشاكل
.. شوفي يامحفوظة السلامة
عمامي من قبل همة شايفين نفسهم على بابا الله يرحمه
لان همة كلهم ماخذين شهادات عالية وزوجاتهم هم نفسهم عندهن شهادات عالية

وبابا الوحيد بيهم مخلص معهد وشهادته مقارنتاً بيهم تعتبر ضعيفة ومو من مستواهم

.. اي بس هذا مو سبب للكغاهية (للكراهية)بين الاخوان
يعني معقولة علمود همة احسن منه بالشهادة
تصيغ (تصير) بينهم حزازيات ويسوون مشاكل وية اخوهم

..لج لا مو هيج الحجي قصدي هاي احد الاسباب
بس صبريلي وسمعيني للاخير
.. يالله كملي اسمعج
.. مو بابا اتزوج امي عن حب هيج الي افتهمته
جانت اخت صديقه
شافها وحبها واتزوجها

ومنا بدت سلسلة المشاكل بين بابا وعمامي وجدي
لان راد يتزوجها
جدي وعمامي اعترضوا عليها
ومقبلوا بس بابا راح لعمه ابو فرزدق الله يرحمه وخلاه
يتوسطله عند ابوه وفعلا بالشافعات يالله وافق جدي
عالزواج
.. بس سؤال جدج وعمامج ليش جانوا ما قابلين على هذا الزواج

.. لان امي ممكملة دراستها
مع العلم والاطلاع اهل امي ما قاصرين
ناس معروفين وعندهم جاه وخير من الله
بس جدوا جان يعتبر نفسه ارفع شأن من اهل امي

ونوب من اتزوجها بابا بعدها صارت خلفتهم كلها بنات
هي من غير كلشي همةً يتخبلون من امي وناشبين وياها
والنوبة خلفتلهم اربعة بنات

عاد هنا الجماعة ماصدكوا يلزمون على امي حجة
حتى يتعاركون وياها ويهججونها من البيت
وصاروا يضغطون على بابا حتى يتزوج عليها ويخلف ولد
وبابا جان دائما يتهرب منهم ويرفض

بس امي رغم الصار بقت صابرة على عيالها ومتحملة
لحد ما الله من على بابا ورزقه من وسعه
واشتراله بيت بنفس منطقة بيت جدو
الي هو نفسه هذا البيت العايشين بي

وانتقلوا اله وامي الحمدلله جرت نفس من عيالها وملحتهم
وبابا بدة شغله يكبر ويتطور بعدها امي حملت
وجدوا لازال يعير بابا ويكله هسة تجيبلك الخامسة وتجي
وامي خطية من تسمع كلام جدو وعمامي
تنقهر وبوكتها ما بقة نذر ما نذرته علمود يصير عندها الولد

وصدك ربي استجاب لدعائهم هي وبابا
وجان يجيهم الولد وسموه قاسم بعد طول صبر ومعاناة

صار بالنسبة لعمامي وجدي مثل الشوكة بعيونهم
وخاف جان بابا بس يحب امي وما يتركها
ونوب زادت مكانة امي عند بابا
وصار ما يخطي خطوة بشغله الا ياخذ شورها
ورأيها

بالمقابل عمامي وعماتي متخبلين من هذا الوضع
وبعدها طلعوا دعاية جديدة على امي
على اساس امي مسوية سحر لبابا وخالته مثل المحبس بأيدها

ورغم امي صار عندها قاسم بس ما اكتفت كالت اريد
اسويله اخ
هم مرة اللخ جربت حظها وحملت
وجان تجيها بنية حلوة جنها اميرة الي يشوفها يغمى عليه من جمالها

.. اكلج مو وصلج الدوغ (الدور) بالسالفة وحميتي علينا
بالله شو كملي
.. امداج عوبة. اصلا اني من اجيت عالدنيا
تكول. فاطمة اختي ماما كامت تبجي
بس بابا ضل يحجي عليها وكللها
.. صدك زعلتيني منج اكو واحد تجيله هيج نعمة
ويبجي

واني جنت بالكماط وهو شالني بيده وكبر بأذني
واني ضحكتله وسويتله حركات بعيوني
وهو انجن على ضحكتي وصار بينا
حب من اول نظرة

.. تغة (ترة) حميتي هواية والحماد نفسه ينرادله رفسة
.. لا والله من صدك احجي
والدليل بابا على عناد العواذل
ذبح خروف على سلامة امي وسلامة حضرتي

وعمامي وجدي سمعوا صارت عنده بنية وذابح خروف
وهمة اجوي ينجلطون من الغيض
وجان جدي ابو بابا حبيبي الغالي مات من الفرحة
الله يرحمه

وبعدها اجتي هديل الصخلة وراي
وبعدها من ورة النكة مالتهم امي اتمرضت وشالوا رحمها ومنها عمامي ما بطلوا وزادوا ما نقصوا
بضغطهم على بابا

خصوصاً عمو محمد لان هو اخوهم الجبير والامر الناهي من بعد جدي
جان هو يلح على بابا يتزوج على امي
وحدة ثانية تخلفله ولد
واقترح عليه يتزوج اخت زوجته

تصير خالة رهف وحدة معنسة معقدة راد يمشيها براس بابا ويزوجها له
وكالعادة بابا يصدهم ويقابلهم بالرفض
وبالمقابل امي صارت تتخبل من عمو محمد
لان هواي ظلمها

ونوب قاسم ومغامراته وعرايكه ومشاكله
الي خلت الكل يتشمت ببابا وامي
واولاد عمامي عيناً مثل اهلهم جانوا يتعاملون وية
قاسم بحقارة وكلش متكبرين عليه

جانوا حتى لعب ميلعبون وياه
ومن كبروا صاروا ميحبون يكعدون وية قاسم
وهو قاسم وما ادراك ما قاسم

جان كلما يحاول يقترب منهم ويريد يلعب وياهم
همة يصدونه

وهو من يشوفهم يبتعدون عنه ويسمعونه حجي بالعظم
يكوم يهد عليهم ويسحلهم سحل ويخليهم واحد يدغم بالثاني
يعني بأختصار فكره الما يلعب وية قاسم
امه داعية عليه

وخاف بس جانوا ينبذون قاسم
ونوب بعد كاموا يتجنبونه لان وكح وبس يتعارك

ابتسمت وكلت.. يعني ربج ياخذ شي وينطي شي
همة انطاهم التفوق بالمدرسة
وقاسم الله انطاه الايد الي يبطش بيها عليهم

.. اي خطية كضة طول عمره لوحده
ويسمعهم يعيرون بابا بي لان وكح وما فالح بالدراسة
يكلوله طالع على خواله متخلف وهمجي

ومن عندها بابا بدة يتعارك وية قاسم
ومرت السنين وشغل بابا اتوسع وعمامي
كامو يحومون عليه لان صار عنده فلوس
صار اخوهم العزيز ابو قاسم الوردة

متشوفين امي ليش تريد تبعد قاسم عن رهف
هاي وحدة من الاساب
تعرفهم ان مو حباً بقاسم موافقين عالزواج
لا همة علمود فلوسه وحلاله
هاي من غير غرورهم نفسية

.. بالحقيقة بعد الي سمعته عن عمامج
اكول حقها خالة تضوج من عندهم لان الجماعة
مسويها بلية ملح

هالة.. بالله تعالي خلي ننزل جوة ونشوفهم بلكي
اتصلوا عليهم وحصلوهم

كامت من مكانها وكمت وياها
.. ست هالة ديغي( ديري) بالج
تغة (ترة)انتي دمج مهدوغ (مهدور)
امج متحلفة بيج

هالة.. ديالله عاد قابل جديدة على احمد راضي
امي من شفتها وشافتني متحلفة بية

نزلنا ولكينا ام قاسم والبنات على حطتهم وهديل
كاعدة يمهم مسويتلها لفة وتاكل

ام قاسم .. هسة همة غير يردون علية ويطمنوني
هسة من البس عباتي واروح وراهم اكو واحد يلومني
كوثر.. لا عفية ماما لتسويها والله قاسم يكلب الدنيا
اذا سويتيها ورحتي وراه

ام قاسم.. شلون ياربي يعني ابقى منتظرتهم على نار
ما اعرف شسوو
حانت تحجي وجان يدك نقالها
والمتصل خالة ام فرزدق
.. حجت وياها والي افتهمته من خلال الحجي

ان ام فرزدق متصلة عليها حتى تفتهم السالفة من خالة
وخالة سألتها على عمو فرزدق راح وراهم لو بعده
بعدما نهت الاتصال
سألتها منى

.. ها شنو كالت خالة ام فرزدق
.. خطية سألتني عن سالفة صفاء وهشام
وكالت ابو صهيب راح وراهم
والحمدلله ملحك عليهم قبل لا يتعاركون
وكالت بعده لحد هسة عند بيت كاظم

كوثر.. الحمدلله على الاقل اتطمنا عليهم
ام قاسم .. عفية بنات ذكروني مو انسى
يوم الخميس السنوية مال ابو فرزدق الله يرحمه

وام فرزدق مسوية ثواب
وعازمة الكل وطلبت مني اسوي
جدر دولمة للثواب لان هي تحب دولمتي
خطية تكلي ما احب الدولمة الا من ايدج

هالة استغلتها فرصة لتلطيف الاجواء بخصوصها
.. هو منو يلحك طبخ الشيف ام قاسم
منى.. اشم ريحة لواكة بالجو
. لوكية وافتخر اذا ما اتلوك لامي نبع الحنان
لعد المن ترديني اتلوك لابو غايب

ام قاسم.. بلا حجي زايد لا عبالج نسيت السالفة
بس اطمن على الولد اشلع اذاناتج

شيماء
جنت دا ابدل حتى اروح للمستشفى

.. مريم حبيبتي شوفي اريدج تبدين من هسة تدرسين مال السنه الجايه
واذا محتاجة ملازم كتب حتى تدرسين كولي

مريم.. صار اليوم راح اتصل على صديقتي
ونرتب جدول للدروس واكتبلج شنو احتاج

.. عفية حبيبتي اريدج ترفعين راسي

مريم.. ان شاء الله اشد حيلي.
واخليج ترفعين راسج بية

.. عفية حبيبتي
ها اي قبل لا اطلع عكب باجر مروة عازمتنا عالغدة كلنا
كالت خلي مريم تسويلي كيكة لمشمش
.. صار من عيوني مو تدلل مشمش

.. يالله تعالي سدي الباب وراي
ومو تنسين تنطين الدوة لسليمة بموعده

.. ان شاء الله
طلعت ورحت لدوامي الي اتعودت عليه
احس المستشفى صارت بيتي الثاني
نزلت عالشارع العام القريب عالمستشفى
عدلت جنطتي على كتفي ومشيت

وبأثناء ما كنت امشي
مرت سيارة من يمي وخففت سرعتها
والسايق نزل جامة السيارة
التفتت وجان اشوف الحيوان شاكر
رصيت على اسناني وكملت طريقي عبالك ما شفته
وسيارته تتحرك على كيف بصفي

حجة.. ها شومة شكلتي شنو رأيج باجر اجي
لبيتكم ونكمل الخطوبة والعرس ورة اسبوع

اتوقفت بمكاني والتفتت عليه
كلامه استفزني
.. شوف شاكر والله العظيم اذا ما تبعد عن طريقي
لاقدم بلاغ للشرطة واخليهم يسحلونك

شاكر بكل نذالة.. انا السامع البنبة اذا تريد الفزعة
تكوم تهدد الناس بأبوها حتى ياخذلها حقها
اشو انتي تهدديني بالشرطة

.. شاكر اعرف وين تريد توصل بهذا كلامك

بس احب اكلك انت غلطان اذا جنت تتوقع اني ضعيفة
لان ما عندي اب يفزعلي
اسمعها مني زين
اني عدال عشر رجال واعرف شلون اخذ حقي من حلك السبع
وانت مو شفت ابوي مثلك ناقص غيرة
عبالك يزوجك بنته غصب عنها
لا عيني اصحى على روحك ترة مو اني الي انجبر
اتزوج واحد عار مثلك

عصب وكام يغلط ويسب
.. بسيط يا شيماء انا الج

وعفته ورحت كملت طريقي وهو بقى وراي يغلط ويسب
ودخلت للمستشفى
وانا احس بنار تاكل براسي من القهر
والله كلش مصخهة وياي

واول ما دخلت اجتي رباب
والوجه يضحك وحضنتني
ورحنا سوية لغرفة الممرضات
رباب.. لج البذاتة كولي هاي صديقتي مشتاقتلها
خلي اشيل نقال وادك عليهااسمع صوتها

.. اكول شنو حضرتج جنتي بالحرب
اي غير انتي عروس ونحترم وضعج وخصوصيتج
وما نقاطع عليج ايام العسل

رباب تضحك.. شوف هاي يا عسل تحجين عنه
واني عمتي وحمواتي ثاني يوم العرس
خيموا عندي بالبيت حتى ما نكدر ناخذ راحتنا

وداعتج عمتي وحمواتي شفطوا العسل كله وما بقولي ولا قطرة ينعل ابو شكلهم

جانت تحجي مغامرات عيالها
واني البس الصدرية
وضميت جنطتي بعدها اتفرقنا وكلمن راحت لشغلها

دخلت لقسم الولادات وبلشت شغلي
شكد جنت ضايجة من هذا شاكر واكول
ليش اني من دون البنات هشكل

بس من ادخل لقسم الحوامل واسمع مشاكلهم تهون علية مصيبتي
واليوم ما شاء الله عندنا هواي ولادات
واليوم ما يمر علينا اذا ما يصير موقف غريب يخلينا واكفين مصدومين

وعلى طاري الصدمة اجتي ام احمد السستر
ميتة من البجي اول مرة اشوفها بهاي الحالة

رحت عليها .. شنو شبيج ام احمد خيرج
ليش تبجين
ام احمد بقهر.. لج سكتي شيماء راح اموت من القهر
.. شكو اسم الله واحد من عائلتج بي شي

ام احمد .. لج لا هاي بنت جوارينة جابوها البارحة
للمستشفى وحالتها كلش خطرة

.. ليش شبيها
.. والله ما اعرف منين شنو اكلج حتى السالفة ما تنحجي
.. دكولي مو شلعتي كلبي

.. البنية عمرها اربع سنوات تداوم بالروضة
وامها موظفة متعودة من تخلص من وظيفتها
تروح تمر على بنتها تاخذها من الروضة

وخطية هي تحل من داومها الساعة بال٢ الضهر
والروضة يخلصون دوامهم الساعة بالوحدة ونص

فمن يحلون الروضة تبقى الطفلة تنتظر امها يم الحارس بالباب
بس البارحة امها من اجتي على بنتها حتى تاخذها
ما لكت لا بنتهاولا الحارس

وباب الروضة مفتوح
وتالي ما تالي بعد ما دورت على بنتها
لكتها بوضع يوكف العقل مغتصبين بتها وشامريها بوحدة من الصفوف
والحارس مضروب على راسه

حطيت ايدي على كلبي
.. وهسة الطفلة شلونها
ام احمد زادت بالبجي
ظلت تناشغ.. ولج شيماء الطفلة ماتت ممخلين بيها شي صاحي
وامها هسة بالمستشفى مثل المخبلة

احس كلبي انعصر.. زين ما عرفتوا منو سوة هيج بالطفلة

.. الام وجهت اتهامها للحارس
.. ليش شمعنا الحارس

.. لان قبل كم يوم الطفلة كالت لامها بعد ما اداوم
اخاف. بس الام عبالها تتكاسل وتدلع متريد تروح
للروضة

بس تكول انتبهت على بنتي من تشوف الحارس تختل وراي
بس تكول ما حاطة ببالي واحد بالمية ان الحارس يسوي هيج شي لبنتي

والحرس اخذوه للتحقيق ومنتظرين هسة
يسوون تحليل الDNA
للمادة المنوية ومن بعدها يعرفون

صدك الي يسمع بلاوي الناس تهون عليه مصيبته
وفعلا مشكلتي لا شي بالنسبة
لهاي الام وبنتها

بعدها اخذت مكان ام احمد بالشغل لان خطية كلش انهارت اليوم من البجي
والتهت وية جارتها. ام البنية

واليوم هي مكانها عند الدكتورة سولاف
دخلت عليها ولكيت عندها الدكتورة رفل
دتحجي وياها
بس شفت الدكتورة رفل كلبي انعصر

سلمت عليهم وبلشت بتحضير السرير والادوات
وعيني عليها اراقب حركاتها واتفحص شكلها عبالك
اول مرة اشوفها
اي اريد اشوف خطيبة حيدر شنو عندهامن مواصفات
خلته يتقدملها

لفت انتباهي اسم حيدر بحجيهم
ركزت وياهم بالكلام واني اشتغل

سولاف.. اي بس ميصير هيج تخربين كلشي
ترة حيدر ميتفوت ولتنسين خطوبتكم استمرت سنة
يعني مو شوية تهدمين هذا كله وتقررين تفسخين خطوبتج هيج بكل سهولة

رفل.. انتي كلتيها بنفسج خطوبة دامت سنة
واني خلال هاي السنة حسيت ان اني وحيدر
ما متوالمين
.. اي ليش غير افتهم

.. سولاف اني هواي تنازلت لحيدر
وهو بالمقابل مقدم اي شي الي يثبت اهتمامه
اذا اكلج يمكن اني اخر اهتماماته
وشوكت ما احتاجه ما الكاه يمي ولا يقدر ظروفي
ما يتفاهم احس بي كلش صعب

بالحقيقة شفته ما يفيدني لذلك بابا من شاف وضعي وية حيدر
نصحني اعبر النهر ما دامه ضيك ونفسخ الخطوبة وكلمن يكعد بمكانه

سولاف.. حرامات حيدر خوش انسان ميستاهل هيج تسوين
رفل.. لعد ازيدج من الشعر بيت
تدرين من كلتله نفسخ الخطوبة
اتقبل الخبر بكل برود ولا كأنما صاير شي
يعني حتى ما كلف نفسه يحاول يقنعني اتراجع عن قراري

سولاف.. ترة لا تنسين الي مثل حيدر
ما راح ينزل نفسه ويكعد يتوسل حتى ترجعيله
لو على كص ركبته زميلي واعرفه كلش زين

رفل.. عالعموم اني اجيتج حتى اخذ رأيج بموضوع
وبدت رفل تحجي لسولاف عن موضوعها

واني التهيت اهديء بدكات كلبي الي كامت تركص من الفرح عالخبر السمعته

اي بس تعاي لحظة وانتي شبيج فرحانة هشكل ومنو يكلج حيدر اصلا يفكر بيج هي اذا دكتورة بكبرها
ما مهتم الهة تردين يا شيماء يلتفت عليج
ويهتملج

اوووف هسة اني شبية اشو صرت احجي وية نفسي

هدى

متمددة بفراشي اتكلب ما يجيني النوم
افكر بقاسم الي شلع كلبي وما ناوي
ينتبهلي
مدري ينتبه علية ويغلس
المشكلة اني اول مرة بحياتي احاول
الفت انتباه رجال
اريد اكله
ان هو مهم بحياتي واني موافقة ان اتمم زواجي وياه
بس ما اعرف شلون اوصله الكلام اشوفها صعبة

استشاريت ابو العريف ست هالة حتى تساعدني
تكلي روحي. غمزيله بعيونج
وطلعي سيقانج كدامه وضحكي بدلع
وهو راح يجيج زحفاً

.. لج عوبة انتي فاهمة السالفة غلط
اني مدا اكول اغيد انحغف ( اريد انحرف)

اني اغيد (اريد) الفت انتباه زوجي
واكله احب اكمل حياتي وياك واتمم زواجي
بس اإيد (اريد)اكوله هذا الشي بطغيقة غيغ مباشغة (بطريفة غير مباشرة)
وبنفس الوكت ما اغيد اخسغ ( اريد اخسر )
ماي وجهي كدامه
تعغفين (تعرفين )هيج شغلات صعبة

هالة صفنت بتفكير
.. اممممم زين ليش ما تعلكين لافتة ورقة بيضة كبيرة عالكنتور
وكتبي عليها الكلام التردينه وهو يجي ويقراها
وهيج انتي وصلتي الفكرة بصورة غير مباشرة

.. خاب امدا حظي بعد فد مغة متغيديني (فد مرة متريديني ) اعلك
عليها نفاخ وواحطلها قلوب الحب الحمرة
والله هو مو صوجج صوجي اني ما افتهم الي جاية
اطلب منج تساعديني هو انتي وين والمساعدة وين

هالة تضحك .. ههههههه والله شكلنا اعمى يقود بضرير
بالنهاية انينهم عميان

يعني انتي صدك متفتهمين ترديني اعلمج شلون واني
كل معلوماتي الخارقة مصدرها
من المسلسلات التركية
وافلام فيفي عبدو

يعني اذا نبع الحنان مسويتها علينا حصار
كلما تريد تحجي وية اخواتي بهيج مواضيع
تكوم تخزرني بعيونها وتطردني من المكان بكبره
عبالك دتحجي بأسرار البيت الابيض
وميصير اعرفها

هزيت ايدي .. هلة هلة لعد خلي تجي خالة تسمع نصايحج
الي والله تنجلط

هالة.. امداج عوبة انتي مو مال واحد يساعدج
حرامات بيج نصائحي الثمينة الي هدرتها عليج

.. شعندها الدكتورة فوزية ام النصائح
عايز بس تكولين
(عزيزتي المراءة ) وتلبسين حجاب اصفر فاقع
يدوخ العين وتكمل الصورة

عدلت المخدة واني انافخ
ورجعت اتكلب اووف تمثال ابو الهول نايم عالسرير
يعني صدك دقني

عدلت روحي ولبست دشداشة ميدي قصيرة
نص ردن. وسويت ميك اب خيف ورشيت عطر خفيف وكلبت دقلة وبالك عني

وتالي حضرته من دخل للغرفة اباوع عليه
بدل ملابسه وكعد يحجي ويسولف وياي
عادي ولا كأنما اكو انثى واكفة كدامه
يا اخي اتحرك شوية.

اخير شي طنكرت من ورة بروده
رحت كدام المرايا طلعت ورق مزيل المكياج وكعدت امسح بحركة كلب واني انافخ

ورفعت شعري بالقراصة والتفتت
اريد اروح انام بفراشي.
لكيته واكف وراي متصنم
يباوع علية من فوك ليجوة وعيونه جانت بيها نظرات اعجاب
من التفتت عليه
انتبه على روحه ومسح وجهه بكفوف ايديه وكعد يلعن الشيطان بصوت ناصي
وراح اتجه للسرير واتمدد عليه

واني رحت طفيت الضوة
واتمددت على فراشي وكلبي يرجف مثل الطفل البردان بعز الشتا مجرد نظرات عيونه خلتني اعيش
هيج حساس حلو
زين اذا ياخذني يحضني ويهمسلي بحبه
يمة يمكن اموت ممصدكة روحي

سمعته جلى حنجرته وهمس بصوت نعسان
.. اكول هاااادي

ودي اخنكه من يكول هادي
احس يحط بينا حواجز وحدود
تصعب علية المهمة
.. شنو هادي نمت

جاوبته بغيض .. اممممم
.. اكول شنو اسم العطر الي حاطه كلش عجبني

عزة واخيرا نطق ابو الهول
طلعت عنده حاسة الشم تشتغل
يالله انعم الله على الاقل انتبه لعطري
والعافية بالتداريج لميت حلكي حتى اسيطر عليه
وكلت بثكل
.. اسم عطغي (عطري) (ماي بغبغي) (ماي بربري)

.. هادي دير بالك تحط من هذا العطر وانت طالع فاهم

.. ليش هذا عطغي (عطري) المفضل

.. دروح نام احسنلك
انت بعدك صغير وصعبة عليك تفهمها

ودي ما يخلص الكلام اريده يبقى يحجي وياي
وفجاءة اتذكرت موقف العركة وسألته
.. اي صدك قاسم انت ليش ما كلت لخالة
اني اتصلت عليك وخبرتك بالعركة

كال.. لان اعرف امي كلش زين اذا تعرف انتي ورة جيتي للبيت
راح تأكد عليج منا ورايح ما تتصرفين من يمج

اذا تصير مشكلة
وتحتم عليج تتكتمين عالخبر ومتحجيلي لان امي بيها
طبع متحب تكلي كلشي

لذلك انا مكلتلها اريدج تصيرلي العين وايدي اليمنة بهذا البيت

وتحجيلي كلشي يصير لان امي متحب المشاكل وهواي تتنازل لعمامي
تتكفى الشر وتخاف علية. خاف اتعارك وياهم
وان هذا الشي ما يرضيني لان همة يتصورن
ان اني اعرف بسواياتهم وية امي وساكت
عليهم
يعني بأختصار ما بية خير احمي اهل بيتي
لان ما اكدرلهم

هسة فهمتي يالله روحي نامي

بعدها كعد يكلب بالنقال
كل شوية اسمع مقطع فديو شكل

واني بقيت اتكلب بفراشي
سحبت نقالي من جوة المخدة وراسلت فاطمة صديقتي عالوات وبعدها شفت كروب خواتي
وشفت ضحى دازة ومروة يحجون بالكروب وتكللها مو تنسين عكب باجر من تجين عالغدة
جيبي وياج اوراق التحاليل والسونارات

ضحى كاتبتلها
.. ليش اني مو كصيت صور الهم ورسلتهم الج عالواتس اب

مروة.. الصور كلهم مغوشات كلشي ما افتهمت منهم
ضحى.. اي مو هذا الخبيث سيف كل شوية موكع نقالي بالكاع نعل ابو طاهره يريد بس حجة حتى يعطل النقال وارجع مثل قبل انقطع عن العالم

وعلى طاري النقال التعبان
ما حسيت الا ونقالي خنفس ضواه وكام لمض
وانطفى ااوف منك هسة وكتك
ستوه شحنه جان مية شبسرعة فقد شحنه
اووف الظاهر استحق تبديل
ولو الله يساعده صارله قرن عندي حتى نسيج عنكبوت
صار عليه معمر
رجعته جوة راسي
ورحعت الافكار تاكلني

ولحظات وجان اسمع صوت النقال يقطع علينا الهدوء
اسمعه رد عالمتصل بصوت هامس مسيطر
يمكن عباله اني نمت
لان مرات من اكون كاعدة وتتصل عليه ست كهف
ميجاوبها ينتظرني منا لحد ما انام

يالله يحجي وياها هو يسوي هيج مو مراعاتاً
لمشاعر وانما حتى ياخذ راحته بالحجي وياها

بس المصيبة اني بأخر فترة
عيني ما تاخذ النوم واظل اكل بروحي من تتصل عليه
وهو يحجي وياها
والله من الغيض والقهر اظل اعض بأيدي

المشكلة مالي حق اعترض واحجي على اتصاله وياها
لان اني اتنازلت عن حقوقي وهو حذرني بوكتها
وكلي ديري بالج يجي يوم وتكعدين تشتكين من تقصيري وياج بعد مالج حق يمي

حبست انفاسي واني اسمعه
شلون يهمسلها بصوته بكلام حلو وكله حنية

يمة احس اتشعوطت
لكمت المخدة بقهر مجنت حاسبة حساب هذا اليوم
صرت اتكلب

لاحظت صوته انكلب جدي وكال
.. رهف انا كلت لا يعني لا
لتزعليني منج

(وزعلت الكلاب السود
وياربي كون يلتم عليها الدود)

صرت اتحرك بقهر اريد الفت انتباهه لوجودي
ضربت رجلي بالسرير متعمدة
بس اشو هذا ولا يمه
الظاهر الاخ رايح مندمج وية كهف

لعد اني الك بسيطة اذا ما اخرب عليكم
الجو ما اكون هادي على كولته

سويت روحي نايمة وصرت اشوخر بنشاز
بصوت عالي عبالك محرك مولدة عطلان

جانت الغرفة كلش هادئة بحيث اسمع صوتها من تحجي وياه
سألته .. قسومي حبيبي شنو هذا الصوت اليمك يخوف
قاسم ضحك وجاوبها

.. لتخافين حبيبتي هذا صوت الجني
هي كامت تتدلع .. يا ماما. لحكي علية
لا عفية قسومي لتخوفني

احتركت عشيرتج كهف عود تتدلع
عليه ام الكمل
اااخ لو يمي الا الزمها انتفها شعرها
شعراية .. شعراية واخليها
تعدهم كدامي

اسمعه يكللها
.. فدوة لربج

لالا لا والله هواي على كلبي
بعد ما اتحمل راح انفجر. وعلى طاري الانفجار
انطيت لتاج السرير ضربة عبالك قصف
هاي من زود القهر طلعتي حركتي كلها بالضربة

خليته يفز من مكانه ويوكع نقاله اسمعه كام يسب ويغلط
حسيت عليه كام من السرير

عزة هذا بس لا راح يجيني
كمت كبل غطيت راسي باللحاف
وسويت نفسي نايمة
كلبي كمز من مكانه من شغل الضوة

حسيت عليه اقترب مني واني جوة الغطا حابسة انفاسي
وما احس الا والغطا
انشال فجاءة
بحيث عطت من الخرعة ينعل بليسك

عقد حواجبه ورص اسنانه وسألني بكل هدوء
.. هاي انتي ضربتي السرير هشكل

بلعت ريكي ورمشت عيوني
وجاوبته بكل برائة
.. لا هاي مو اني ضغبت السغيغ (ضربت السرير)
هذا الجني ضغبه (ضربه)

اتسعت عيونه من ذكرت كلمة جني
وكال.. يعني حضرتج جنتي كاعدة وتتسمعين
لكلامي واني احجي بالنقال

من زود الخوف جاوبته بسرعة
.. لا والله جانت الغغفة (الغرفة ) ظلمة كلشي ما سمعت

.. ولج انتي وتاليتها وياج كل يوم طالعتلي بسالفة شكل
والله بختج بالليل جان سويت شعرج
جاوبته بغيض .. اعغف (اعرف) ما يحتاج تكمل
تسويه حبل تغبط بي الخغوف (اربط بي الخروف)

باوعت عليه لم حلكه بالكوة وانطاني ظهره
وراح طفة الضوة ونام
وقبل لا ينام كال
.. هادي بطل حركاتك ترة تعم على روحك وتنسحل
بعدها حطيت راسي واني اتحلف واتوعد
بس خلي يصبرلي

كعدت يوم ثاني
من الصبح صليت
واليوم لازم انزل قبله لان حمواتي
فاطمة وسرور وجهالهم
راح يوصلون

اتجهت حتى اكعد قاسم مثل كل يوم
بس هالمرة من اجيت اكعده جان نايم على بطنه ووجهه صاير جانبي نومته عشوائية فوضوية
بس وجهه جان بتجاهي

باوعت لظهره وكعت عيني على وشم الصقر
احس اصابيع ايدي كامت تكرصني
ووشم الصقر صار يغريني حتى اتلمسه

لكيت نفسي غصب عني مادة ايدي على ظهره ومشيتها بكل هدوء
وصرت اتلمس الصقر بكل رهبة عبالك تحفة فنية ثمينة جان ملمس بشرته دافية
رجفت ايدي وجنت مشغولة بأكتشاف شعوري الجديد
تماما مثل الطفلة من تكتشف شي جديد عليها
تكون متفاجئة ومنبهرة بنفس الوقت
حسيت كلبي نسى يخفق

بس فجاءة ما حسيت والا وقاسم نهض على حيله
متفاجيء وعقد حواجبه وعيونه حمر من اثر النوم

سألني بشك .. شنو جنتي تسوين

صار وجهي نار من الاحراج
.. اااا جنت اغيد (اريد) اكعدك حتى تلحك عالشغل

باوع علية وغمض عيونه وسحب نفس عميق مثل الي جان يركض بسباق
كام من السرير
وكال .. مشكورة

حجاها وهو متوجه للحمام

اتلمست حرارة خدودي
عزة بس لا حس علية من جنت ماخذة. راحتي
واتلمس الصقر

نزلت جوة وسويتله ريوك
وجانت خالتي ام قاسم كاعدة قلبي وكالت
.. عفية خالة بالعجل روحي صعدي كعدي
التنابل الي فوك هالة وهديل
خليهم ينزلون هم يالله ترة البنات على جية

باوعت عليها وكلت
.. خالة خلي اتصل على منى وكوثر يجون عالغدة
ويانا عالواهس
باوعت علية وابتسمت

هذني ما يكعدن من النوم الا ااذن فوك راسهم يالله

.. صاغ (صار)خالة هسة اغوح (اروح)صبيت الجاي لقاسم وحطيت الريوك عالميز
وطلعت اريد اصيح للبنات وجان يصير قاسم بوجهي
وعيونه هالمرة تباوعلي بحذر

مثل الي ديدرس ظاهرةغريبة عليه ومتفاجيء بيها
دنكت وكملت طريقي اتهرب منه

سمعت ام قاسم كلتله
.. ها يمة قاسم على وين
اشو ما اتريكت
جاوبها وكال.. حجية. شبعان مامشتهي
اتريك

خلص اليوم واني اتكلب ما بين مد وجزر المشاعر

بعدها صفت النتيجة ان راح ابقى متمسكة
بزوجي وما اتنازل عنه لرهف

كعدت البنات من النوم
ونزلنا وبلشنا حملة شاملة عالبيت

وبعدها اجوي البنات
والتمينا عالغدة وصدك اتونسنا
وقاسم وهشام رجعوا للبيت من وكت
علمود خواتهم

وللعصر وجان يجون بيت عمه محمد
رهف وامها وابوها

استقبلتهم ام قاسم والبنات واني رحت طلقة صعدت
لبست احلى ملابس عندي وعدلت روحي
جنت اتحرك بسرعة
وهالة كل شوية ترمشلي
حتى انزل بعدها دزتلي رسالة عالوات اب

لج عوبة بسرعة نزلي
هاي رهف العوبة. دخلت وية قاسم بالاستقبال لوحدهم

يتبع

احبكم كومة احبكم هواي
اختكم نهى😘😘😘😘