أساور الفضة الفصل السابع وأربعون 47 - بقلم نهى

مساء النور عليكم يا احبتي
🌹🌹🌹🌹🌹🌹🌹🌹🌹🌹🌹🌹🌹🌹

#اساور_الفضة_ج٢
#نهى_الحسون

هدى

احجي بالنقال وية شيماء
واني حيل مغثوثة من تصرف
اثير احس النار كامت تشب بصدري
جنت احوم بالغرفة ياربي
معقولة اثير نذل لهاي الدرجة
وصلت بي يريد يزوج شيماء لواحد خريج سجون

شيماء تحجي واني كلبي ينعصر

جنت مسوية حملة تنظيف لغرفتي
بعدما خلصت مسح الاخشاب والارضية

اني بهاي الاثناء احجي وية شيماء وانظف وارتب الغرفة

وبعدين رحت على ملابس قاسم وكعدت اسطفهم
هو بي طبع اني اصفط وهو يخرب عبالك عنده لعبه
حتى لو ياخذ قطعة لازم يفركش كلشي

وبعدها وصلت بالترتيب لملابسه الداخلية
جانوا كلهم بالمجر كمت طلعتهم كلهم حطيتهم
بالكاع واتربعت وكعدت اسفط بيهم

واني احجي وية شيماء بغضب
.. اي وانتي شنو جاوبتي

احمد الله واشكره شيماء شخصيتها قوية
رغم الاضطهاد الي شافته على ايد اثير بس
بقت صامدة بوجهه

شيماء بصوت تعبان
.. بعد شجاوبه اكلج كمت ارجف من القهر
كلتله .. روح كول لصاحبك نجوم السما اقربلك من شيماء
ولو يبقى اخر رجال بالعالم ما اتزوجه
وخليه يلكاله زوجة من نفس المنزول الي هو عايش بي

جاوبتها واني اريد انفجر
.. اكول هذا يمكن عباله اذا اثيغ العاغ (اثير العار) ابونا معناها
اكيد بناته مثله حلل وصايعات

جرت حسرة وكالت
. . لج لو تشوفينه شلون هد علية بالغلط والسب والفشاير ونوب هد يريد يضربني

بس خطية مريم بس شافته هد علية كامت تعيط وتبجي وكلتله اذا مديت ايدك على شيماء والله كبل اتصل على مروة واكللها عليك
جانت مريم تحجيها بخوف وبأمل ان يرتد

.. من الله لا يوفقه ..حجيتها بحركة كلب

.. هو هم ما قصر كعد يغلط علينا ويسب بالساعتين
واخير شي كعد يعيرني ويكلي
.. العانس ابقي هيج بدون زواج محد راح يكلبح
لحدما ياكلج التراب
كل خواتج اتزوجن وانتي بقيتي لوحدج
لج البكدج عندهم جهال وبيت

جان يتعمد يسمعني هذا الحجي حتى يحرك كلبي
عباله من يحجي هيج اني انهار واوافق على صديقه
بس بقيت صامدة بوجهه ومتمسكة برأيي
وما غيرته منا لحد ما ايس وطلع من البيت

الي قهرني ومرد كلبي بهذا كله
صوت شيماء من لفظت كلمة عانس
حجتها بصوت مهزوز ضعيف وبعدها كالت
.. هو صحيح اني عنست وراح ياكلني التراب
بس التراب اهون علية من اتزوج شاكر

وبدت شيماء تحجيلي مثل قبل كل ما يدور بخاطرها

.. تدرين هدى مرات احط راسي عالمخدة بتالي الليل
وافكر واكول ميخالف مو مشكلة اذا عنست اشو اني
لا اول وحد تبقى بدون زواج ولا اخر وحدة

بس ما اعرف ليش سرت رجفة خوف داخل كلبي
اخاف اصفى وحيدة بهاي الدنيا
ومالي احد يشيل حملي اذا كبرت واتمرضت

هي جانت تحجي عبالك دتحجي وية نفسها
بس متدري كلامها شسوة بحالي

احس انهارت دموعي غصب عني
بجيت
سمعت صوت شهكت البجي وحست على روحها
وكالت وهي تضحك
.. اهوووو الله يلعن بليسج هدى خليتني انسى روحي مثل كل مرة بالحجي

ونسيت اكلج تدرين من رجعنا للبيت لكينا سليمة
واكعة بالقاضية وصحتها متخربطة

ادري بيها غيرت الموضوع حتى ما ابجي بس اني وين
احس دموعي ممصدكات ينزلن
حجيت واني امسح بدموعي واناشغ

.. شعجب سليمة مغيضة (مريضة) مو من عوايدها
الناس كلها تموت وتتمغض (وتتمرض)الا هي وولدها العاغ (العار)

.. لج صارتلها عبرة سامعة ابو المثل من يكول
جرب غيري تعرف خيري

احنا من طلعنا من البيت وتركناها هي ضلت لوحدها
لا ناصر ولا معين لا اثير ولا امجد فكروا بيها
كالو خلي نشوف هاي امنا شتاكل شتشرب لوحدها

وهي واكعة مريضة ومحد الها يداريها
وين قبل جانت عايشة بدلال شيماء
من تتمرض راسا اركضلها بالادوية والابر
واكعد اداريها بالاكل لحد ما تكوم على حيلها

هسة من وكعت عرفت قيمة وجودنا بحياتها
بس هي ابد ما تعترف
بس يكفي سكوتها لا تعلق ولاتدعي

البارحة مروة وضحى اجوي عدنا
ومريم سوتلنا كيكة تخبل وضحى سوتلنا جاي مهيل
وكعدنا ناكل بالطارمة والله مكانج فارغ
مشتاقيلج

هي كالت هيج واني زادن دموعي
صدك كلبي طاك على خواتي بس قاسم شكله مو بحالي كلش مشغول

بعدها كالت شيماء يالله اني صار لازم اعوفج خلصت استراحتي وراي شغل
سلمت عليها ورجعت امسح بدموعي وخشمي

وجان يدخل قاسم للغرفة
وكف متفاجيء بمنظري جنت كاعدة متربعة بالكاع
وعيوني حمر من البجي

قاسم بحذر .. الله يلعن بليسج هاي شكاعد تسوين
رمشت عيوني ومسحت دموعي وخشمي
وجاوبته.. شنو دابجي عندك مانع لو هاي هم حغام (حرام)
ممنوع علية ابجي لازم اكولك قبلها

قاسم .. لا ما عندي مانع تردين تبجي ابجي براحتج
بس مو معناها تسوين ملابسي الداخلية
كلينكس لعيون وخشم حضرتج وماخذة راحتج عالاخر

نزلت عيوني وجان الكة روحي لازمة
الفانيلة البيضة ومسويتها خريطة من الكحل والدموع
من الفشلة ما اعرف وين اودي وجهي

كمل كلامه وهو يباوع علية
.. يالله الحمد لله بالفانيلا ولا غير شي

شهكت واتسعت عيوني فضيحة والله
كمزت من مكاني ولميت ملابسه كلهم بدون تسفيط
وحطيتهم بالمجر بدون ترتيت

حجة وكال هاج نسيتي هذا
جان شايل كلسون ويضحك
غير ساحت روحي من الاحراج شلون فشلة
.. احم احم انت وديه

.. خاب شوف هادي صاير يخجل وحركات

برطمت شفايفي وتركته ورحت دخلت للحمام غسلت
السطلة وغسلت وصلة المسح ورجعت اكمل تنظيف
رفعت دشداشتي من الجهتين وبديت امسح الحمام بالماسحة
بس الظاهر اكو مي بالكاع اني ممنتبهة صاير وراية
دارجع ليورة واني امسح وجان تشطح رجلي ووكعت
اصرخت بخوف على الم

احس كلبي وكع. دخل للحمام على صوتي
لكاني كاعد مبسطة بالحمام

.. انت شنو سالفتج اشو كل شوية الكاج
بمكان متكليلي شنو دتسوين

باوعت عليه بالله هذا هم سؤال
.. مدتشوفني كاعدة العب المزرعة السعيدة
بعد شكاعد اسوي غير دانظف الحمام

اجيت اكوم عطت وعظيت كف ايدي بألم
.. يمة يمة
اقترب علية ودنك يسألني
شنو شبيج
.. يمكن انكسغ (انكسر) حوضي

مد ايده .. بالله شو كومي خلي نشوف
سندني بذراعه واتجيت عليها وكمت عضيت شفتي

وصلني للسرير واتمددت كبل واني موجوعة
ما اعرف تاهت علية موقع الالم بالعظم لو بالعظلة

.. بالله شو خلي اشوف
اشو هذا اخذ راحته ومد ايده ورفع الثوب يريد يستكشف
ويشوف مكان الالم وحط ايده على سيقاني يتحسسهم
كبل كمزت من مكاني ونسيت الالم

.. ها ها ها هوب مو جنك غحت (رحت)زايد
خزرني وكال بصوت غريب شوية
.. ولك هادي لا تبيعهم علية
وتسوي روحك خجلان والله ما تلوكلك

جان يحجي وعيونه على سيقاني المكشفة
هاي نفس نظرات عيونه بالمهر
نزلت الثوب وهو حس على نفسه وابتعد

وكال راح ادزلج هالة لو الحجية تجي تشوفج
خاف تحتاجين دكتور
لمسة قاسم خلقت عندي شعور جديد غريب
مو شعور خوف لا شعور ما اعرف شنو تفسيره
شعور حسيت المنطقة الي حاط عليها ايده صارت نار
وهاي النار مشت بدمي ووصلت لكلبي
وصار يدك بشكل عجيب عبالك يريد يطلع من مكانه

شيماء
نهيت اتصالي وية هدى
وبسرعة اتصلت على مريم حتى اتطمن عليها
جنت حيل متشددة بحماية مريم

اخاف لا امجد يدك بينا الناقصة
من يعرف مريم ببيت سليمة ويجي يسوي مشكلة
صحيح هو بعد ميكدر يسوي شي لان اثير اخذ الثمن وصار بصفنا
ومروة هددته بالتقارير الطبية الي يمها
بس هم ابقى بالي عليها واخاف يجي يسويلها شي

لكن رحمة رب العالمين فوق كل شي
الحمدلله شكله الله شغله عنا اني واخواتي
وانطاه مصيبة ابنه حسن الجبير
طلع راهن بيتهم
وساحب قرض من البنك بدون علم امجد

بس اخذ امه وياه لان هو البيت بأسم جنان
ما ادري شلون قانعها بالسالفة ومخليها توقع
بالبنك وترهن البيت مقابل مبلغ القرض
هو المفروض جنان متحجي وياه من يوم اخذ مرته وطلع من البيت
شلون هيج صار معرفت
وهسة صايرين من الروس هو وابنه
وهذا كل الي افتهمته من سليمة

بين ما جنت مشغولة بمتابعة جدول الحوامل
وية السستر ام احمد

سمعنا صوت مرية مفزوعة دخلت للمستشفى ورجال
وسدية بيها بنية شابة كلش حلوة ديدفعون بيها
ممرضين الطواريء

رحت كبل اني وام احمد استلمناها منهم وبسرعة
دخلناها لغرفة الفحص
وطلبنا الدكتورة سولاف تجي تشرف على حالتها

ام احمد بدت تنقل البنية لسرير الفحص

اني كبل طلعت صحت المرية
حتى احجي وياها واخذ منها المعلومات المهمة الي تخص المريضة.
بصفتها هي المرافقة للبنية
لان البنية جانت منهارة

حتى انطي التقرير لدكتورة سولاف وعلى ضوء المعلومات هي تقرر وتفحص

دخلت وياي لغرفة الفحص وسألتها
ولزمت البطاقة حتى اكتب الاجابات بالاسئلة الروتينية

.. خالة بلا زحمة ممكن تساعديني حتى اخذ المعلومات
عن المريضة
.. شنو اسم المريضة
.. اسمها ...
.. شكد عمرها
.. ١٨سنة
.. متزوجة لو بعدها

المرية جاوبتني وهي تبجي
.. اي يمة متزوجة سودة علية
.. شنو سبب الحادث
.. يمة بنيتي عروسة واليوم ثاني يوم الهة بعرسها
رحت اوديلها ريوك بصباحية عرسها

وياخالة وجان الكة بتي بس تنزف
العافية بصوب وهي بصوب

جانت تريد تكمل كلامها بس اني
قاطعتها لان ما اريدها تسترسل بالكلام
وتكعد تحجي الاسرار العائلية وتصير حديث للجميع يتداولون بيها بالمستشفى

.. العفو خالة اني اخذت كل المعلومات المهمة
هسة تكدرين تطلعين تنتظرين بنتج برة

بين ما خلصت بكتابة المعلومات
دخلت الدكتورة سولاف وفهمتها النقاط الاساسية

سحبت الستارة وصرت اساعدها بالفحص
اباوع للبنية جانت كلش خايفة وترجف

انكسر خاطري عليها
فتحت الشرشف وغطيتها
والدكتورة سولاف لبست الكفوف النايلون و
بدت تكشف عالمريضة

اسمع صوت بجي البنية
انتبهت عليها جانت تباوع علينا بخجل
وكل شوية تكمز ومتخلي الدكتورة تفحص

الدكتورة سولاف .. اي ياماما يا حبيبتي غير اشوفج
اشوف شصاير وياج حتى اكدر اعالجج
بس انتي مداتنطيني مجال
بالله شوية استرخي
لحظات وباوعتلي الدكتورة وحجة وياي

.. لج هاي شمسوي بيها
هذا عبالك اغتصاب مو زواج
من الله ينعل ابو التخلف وسنين التخلف

يعني ماكو تثقيف توعية للشباب
لحتى يكونون على دراية ووعي ثقافي
علمود يجنبنا هيج حوادث

سألتها.. هسة شنو دكتورة شكد نسبة التلف
والاثار الجانبية
.. بالحقيقة البنية تحتاج خياط

بعدها خدرت البنية تخدير موضعي
والدكتورة بلشت بيها والبنية بس ترجف وتبجي

استغفر الله يا ربي والله وضعها يقهر
هسة هاي المكرودة شتتذكر من ليلة عرسها
اكيد راح تكون بالنسبة الهة تجربة مخيفة

بعدما خلصناها دزت الدكتورة سولاف على زوجها
وطلبت تحجي وياه مباشرتاً حتى تفهمه الموضوع
وشنو المطلوب منه

مع العلم زوج البنية مبين عليه شخص محترم
بس التخلف الفكري لا يخضع لاي قاعدة

بعدها تركتهم حتى الدكتورة تحجي وياه براحتها
ونتجنب الاحراج

طلعت من يمها وسديت الباب ورحت
اصيح المنظفة ام سامي حتى تجي تنضف سرير الفحص
وبهاي الاثناء وجان اشوف
حيدر ديمشي وية الدكتور منذر
هو عنده شغل بالمستشفى مالتنا
ماخذ مقاولة استيراد وتنصيب اجهزة طبية

مريت من يمهم سلمت عليهم بصورة طبيعية وعالسريع كملت طريقي
عفتهم وراي ديمشون

وكأن شي متعودة اسويه كل يوم
بس مع الاسف تعال منو يقنع دكات كلبي
الخاينة ان خفاقانه لهذا للشخص غلط
وراحت دكاته عالفاضي

هسة غير كلبي ياخذ درس من الصار بي ويتعض
بس الظاهر كلبي عاجبه شلة الحال ويطرب على ضرب الحبيب
اعتقد كلبي راح يبقى طول عمره يفز من مكانه
وكلما يشوفه يكوم ياخذله تحية

شفت ام سامي وبلغتها تروح لغرفة الفحص ضروري
وهي مثل كل مرة تكون دائما مستعدة

حركت عرابانة الادوات مالتها من منظفات ومعقمات
وشراشف وراحت بيها متوجهة لغرفة الطواريء

سمعت صوت واحد يصيح بأسمي
عقدت حواجبي والتفتت ووكفت متفاجئة
هذا شاكر شكو شيسوي جاي هنا لا يكون حضرته جاي
على موضوع الخطوية
هذا والله مصدك روحه شيحس اذا عنده احساس طبعا

اجة بتجاهي وعيونه كصتني كص
اشكد اكرهة
حجيت قبل لا يفتح حلكه
.. خير يا طير شكو شتريد جاي هنا اكو شي
ابتسم بكل ثقل دم وكال
.. على كيفج يمعودة شبيج
ما رايد شي غير بس سلامتج يا حلوة

.. الله يسمك شاكر هسه كول بدون لف ودوران من الاخير
شعندك جاي هنا

.. اويلي الله شحلاته طالع اسمي من حلكج
تكول عبالك دتغني اول مرة اعرف بأسمي هيج حلو

خزرته .. تكول شتريد مني لو اروح واعوفك
اجيت اتحرك وهو وكف كدامي وقطع علية الطريق وكال

.. شيماء انا البارحة طلبت ايدج من ابوج
.. اعرف ميحتاج تكمل ليش بابا ما كلك اني رفضتك

.. اي بلغني بس انا ما اقبل بكلمة لا
شومة اريدج تسمعيني زين بس وافقي عالزواج
والله اصوغج ذهب وادللج دلال الماصاير

.. شوف شاكر هاي لاخر مرة راح اعيد كلامي وياك
فتح اذاناتك واسمعني زين
ما اتزوجك لو تبقى اخر رجال بالعالم
تحلم اباوع عليه

انكلب وجهه جنة شيطان وكال
.. لج شيماء لا تخليني اسوي شي ميعجبج
اقترب علية
وخفت من نيته وارتديت للخلف
مهما كان اني هم عندي سمعة
واخاف عليها وما اريد اسوي مشهد يلفت الانتباه

حجيت بصوت حاد بس مو عالي
.. قسماً بالله اذا مرة ثانية اشوفك هنا
لاقدم بلاغ لادارة المستشفى واخيلهم يصدرون
اعلان يحرمون دخولك للمستشفى ويعتبرونك تشكل تهديد للكادر والموظفين

اتقدم عليه بحيث صغرت المسافة الفاصلة بيني وبينه
وجان اسمع صوت حيدر التحذيري
حجة بكل هدوء ووجه نظرات تحذيرية لشاكر
اني من يمي ارتعدت
باوع على شاكر بتمعن وحجة وياي

.. خير شيماء شفتج تحجين معصبة
شنو الاخ هنا ديضايقج
هزيت راسي وحجيت بتحدي وية شاكر
ما اعرف امنت من شفت حيدر

.. لا استاذ ماكو شي بس حضرته جايني بموضوع
واني نهيته للموضوع
شاكر بغيض
..بعدني ما خلصت كلامي وياج

حيدر وجه كلامه لشاكر بتهديد بس بهدوء
.. شنو اكو شي يخص عملها بالمستشفى
غلطانه بشي وياك او احد من اقربائك بالعلاج

انتبهت لشاكر جان فاتح حلكه ويباوع لحيدر
واكف يحجي وياه باسلوب خاف منه عباله مدير المستشفى
وحس على بهذلته وشكله التعبان من شاف كشخة وهيبة حيدر
كعد يعدل بقميصه المعكر

باوع لحيد بحذر وخوف وكال بصوت
حاول يكون بي واثق من نفسه

.. لا العفو استاذ .. بس اني عندي شغلة خاصة وياها
باوعله حيدر ورفع حاجبه
.. شغلة خاصة ؟ اذا عندك شي خاص تشوفها برة
تروحلهم للبيت مو تجي لمكان عملها
يله تفضل من هنا ماريد اصيحلك الامن يطلعوك
انت رجل كبير ميحتاج تتبهذل

..ماكو داعي تهددني استاذ اني طالع
جان يحجي ويباوع علية وعيونه تكلي صبري
انا الج حسابج وياية بعدين
مشى من يمي وحجة يسمعني بس الي
.. والله هالمرة بختج بالمدير اجة وفزعلج

شوف هذا خطية من الخوف عباله حيدر المدير
ولو هو حقه يكول هيج لان نظرات عيون
حيدر ونبرة صوته وكلامه القوي الواثق
يخلي المقابيل يسويله الف حساب من يتعامل وياه

واخيرا راح شاكر وسحبت نفس مرتاحة يمة فكه
انتبهت لروحي واكفة كدام حيدر

واحتي عيوني بعيونه

باوعت عليه هو من غير كلشي كلبي رايح مسلم امره
وفوكاها هو يجي ويعرض علية مساعدته
وينقذني من شاكر وعيونه بيهم اهتمام
هاي وين جانتلي

جلى صوته وكال
.. انتي منين تعرفين هاي الشكولات
ترة وقوفج يم هيج شخص مشبوه يعتبر خطر على حياتج وسمعتج

بلعت ريكي وجنت متفاجئة من ملاحظته
عزة هذا ابد ما يفوته شي كون يلكفها وهي طايرة

ماادري منين طلعلي هالعلة
من الله ياخذك يا شاكر العار

.. هو اني ليش جنت احجي وياه بعصبية
لان جنت اريده يبتعد عني

.. اي بس مجاوبتيني انتي منين تعرفين هذا
عقدت حواجبي هذا شنو حضرته ديحقق وياي

جليت صوتي وجاوبته برسمية
.. استاذ حيدر ترة احنا بمستشفى حكومي وعامة
وكل يوم نلتقي باشكال البشر بيهم الشين وبيهم
الزين

وهذا الشخص واحد منهم حب يجرب حظه وياي
وعرض علية الزواج واني انطيته رفضي وخلاص
وانتهى الموضوع

اباوع عليه اتسعت عيونه بغضب
بس محجة شي
وتراجع عن طريقي وسوالي مجال حتى افوت اكمل طريقي

رفعت راسي ومشيت من كدامه بدون ما التفت
وكلبي وعقلي يتعاركون بينهم بكل قوة
لحتى واحد منهم بنتصر بس مع الاسف
طلعو اثنيهم خسرانين من هاي المعركة لا كلبي راضي ولا العقل مقتنع

للاسف رغم معرفتي ان حيدر خاطب
بس يبقى للقلب رأي اخر

....
هدى

مرت الايام وحياتي وية قاسم بدت تتطور

وبديت اتقرب لقاسم
بحجة ان مصلحتي تقتضي اقترب منه واكسبه
بصفي حتى اضمن حمايته الي وغير هيج مجان ببالي اي شي

وجنت وازنة الامور بعقلي
واكول اقترابي من قاسم راح يخدم مصلحتي ويفيدني

وفعلاً بديت اتقربله بالتدريج وصرت اتوغل بحياته واستكشف اهتماماته
واعرف كل صغيرة وجبيرة عن حياته وصرت احاول بقدر الامكان
اكون ملاذ راحة البال لقاسم وكلشي يحبه
ويريحة يحي يلكاه يمي

والحلو بالموضوع ان قاسم
بدون مينتبه بدة يتقبل وجودي وياه وصار دوري بحياته كلش مهم
يعني باختصار صرت بالنسبة مكانه الامان المريح
وصار من يشوف روحه ضايج او تعبان
يجي تلقائيا يمي ويكعد يحجي ويفضفض

وحتى مرات ياخذ رأيي ويشاركني بمشاكل شغله وغيرها من امور حياته
بالرغم انه يعرف بية كلش زين اني ما راح اكدر افيده بأي شي
بس مجرد ما هو يحجيلي عن مشاكله
واني استمعله
هو تلقائيا يرتاح نفسيا وكأن خفف من حمله

وحتى مرات من يتعارك وية رهف
ويرجع معصب منها
واني مثل كل مرة اتعودت

اهدي بكم كلمة واخليه هو من نفسه يبدي يسولفلي
عن سبب العركة الي بينهم
وهمة الله يحفظهم. يوم متصالحين وعشرة متزاعلين
هذا غير حب تعبان كضوها كلها مشاكل

بس الغريب بالامر بأخر أيام تصرفاتي بدت تتغير
صرت اضوج من
اسمعه يحجي وية رهف بالنقال او يحجيلي عنها
و اذا جاب طاريها بالكلام
ما اعرف شيصير بية احس كلبي يصير نار
واعمي من الغضب

بس عقلي يكعد يذكرني بوضعي وية قاسم
وكأنما يكلي شنو اشو بديتي تنسين نفسج

بس مع الاسف قربي من قاسم واهتمامي بي
فتح ابواب بكلبي جنت قافلتها وحاطة عليها
ختم مجنت حاسبة حساب ردة فعل كلبي

مشاعري الي جانت مكتومة بداخل كلبي
اعلنت ثورتها وانتفضت واعلنت العصيان
وصارت تطالبني بأكثر من مجرد علاقة صداقة وية قاسم

وهسة حاليا اني عايشة بخوف لان هاي المشاعر
جديدة على كلبي وخايفة اعلن عنها لان اعرف بقاسم
كلبه وية غيري
يعني حبي انولد مخنوك بالظلمة ما يتجرء يشوف النور
لان ميكدر يعبر عن حبه بحرية

ومنها قررت انتقل بعلاقتي ويك قاسم
لمستوى اعمق بحياته ما اريد اكون بس
مجرد رفيقة بحياته

واليوم اخر يوم بالامتحانات
بالسيارة
هالة .. يمة ما اصدك خلصنا امتحانات
هدى.. سكتي متعغفين (متعرفين)شكد محتاجة للعطلة
جنت احسبلها يوم يوم

هالة.. ها هدوشة شكو خير اليسمعج يكول امراءة اعمال
وعندها مشاريع كلش مهمة عالعطلة

جاوبتها واني افكر
.. اي اعندي كومة اموغ (امور) متعلقة بحياتي محتاجة اتفغغلها (اتفرغلها)

هالة.. ها هدهد اشو صفنتي
وصرت اشم ريحة مؤامرات وخطط من نظرة عيونج
مبينة

.. هالة شكد تعجبيني لان انتي الوحيدة تفهميني
.. مو بنيتي واعرفج كلش زين
من تنوين تبدي العيون تلمع

.. هسة على كلً كليلي
هالمرة عليمن ناوية

.. هالمرة ناوية على اخوج المغواغ هغقل (مغوار هرقل)
اعيد اجيبه للدغب اهيده يصيغ غجلي
(اريد اجيب اخوج للدرب اريده يصير رجلي )
زوجي وابو جهالي بيها شي هاي لو طلبي مستحيل

هالة.. عزة بعينج يا هدى
احنا شنو اتفقنا مو كلنا ما تعلبين بالنار
بس اتدفي بيها
اشو شكلج صرتي طماعة وتريدين تحتركين بالنار
من هسة اكولج الامور مو بهاي السهولة

..ليش وين الاشكال بالموضوع من ابدي اطالب بزوجي واغيده (واريده) يكون الي

.. شنو هدى نسيتي صدج لقاسم ببداية زواجكم كلما يحاول يتقربلج
وكعدتي تطلبين منه ينطيج كلمة شرف ميقترب منج
واصريتي يلتزم وياج بوعده ويعتبرج مجرد صديق حتى مو صديقة
وكعدتي تبجين وتولولين عبالك وحش كدامج
كتيله اني متنازلة عن جميع حقوقي وواجباتي اني ماريد منك شي

.. اي هالة كلامج صحيح بس هذا الحجي كان ببداية
زواجنا من جنت اخاف منة وما احس بنفسي كزوجة لقاسم

هسة انتي اقتنعتي تكونين زوجه فعلية ماشي
زين تعالي شلون راح تقنعين قاسم ابو راس اليابس
بعدما صديتي وجرحتي بكرامته ورجولته
وجبرتي بتوسلاتج بي ينطيج وعد ماكو شي بينكم
شلون راح يقترب منج
ترة خلي ببالج بعد الي صار ببداية زواجكم
ما راح تكدرين توصليله بسهولة حتى لو ميت عليج
بوكتها راح يحاربج ويحارب نفسه الا بحالة وحدة
تروحين بنفسج تكوليله اريده

جاوبتها واني محتارة
تعغفبن (تعرفين) هالة اني عندي هواية اشياء بنفسي تغيغت (تغيرت)
بعدما عشنا سوية صاغ (صار) قاسم شي مهم بحياتي
يوم عن يوم صرت اتعلم على وجوده وحمايته وتزيد اهميته
صاغ (صار) بالنسبة الي هو اماني واستقراري
وهسه عندي احساس غغيب(غريب) اتجاهه
مداكدغ (مداكدر) بوجود هذا الاحساس
اتخيل حياتي بدون قاسم شلون غاح ( راح)تكون

ومن دخلت لبيتكم وشفت حنان خالة ام قاسم
وحغصها(حرصها)علية ونصايحها كأني بنتها
وتعاملكم وياية انتي والبنات
لكيت نفسي غصب عني اتعلق بيكم
واحبكم كلكم
حبيت الاحساس ان اعيش بوسط عائلة
هذا الشي الي اني مفتقدته طول عمري

والظغوف الصاغت بأخغ فتغة
(والظروف الي صارت باخر فترة)
بية وبخواتي ووكفة قاسم ويانا
خلتني اوزن الاموغ (الامور ) من جديد
خلتني اشوف مكاني وين واكفة

هالة .. هدهد امي واني وخواتي. نحبج
وندعي من الله كون يهديلج قاسم
بالنسبة الي ماكو حاجة اكولج اتمنى تكونين زوجة اخوية حقيقة
وامي تعرفين موقفها

وصلنا للبيت
واول ما دخلنا للبيت لكينا منى وكوثر لازمات هشام المعصب
هشام .. منى رحمة لاهلج وخري عن طريقي خليني اشوف هذا شكاعد يسربت

منى.. هشام اروحلك فدوة لاتسوي مشاكل عوفه يم امي
ديحجي وياها
هشام .. والله ما اسويله شي بس اشوفه شعنده جاي
دفع منى وخرها عن طريقه ودخل يمهم

هالة سألت كوثر
.. شنو شبي هشام ليش معصب
.. اخوه الجبير صفاء اجة هنا ويكول ابوي خطب لهشام بنت عمي منير
ويريده يرجع وياه للبيت

والمصيبة هشام هستوة وصل وسمعنا اني ومنى
دنحجي وعصب

هالة.. خلي يولون هذولي الزبالة وين جانوا
عن اخوهم قبل من جان صغير ومحتاجهم
هسه من صار رجال وشواربة تارسة وجهها جايين يدورون عليه
زين يسوي بيهم خلي ياخذ حقه منهم
حيف السنين الي عافوا بيها وذلوا وهو صغير

جانت تحجي وهي معصبة وراحت
دخلت يمهم رحت وراها

وجان اسمع ابن عمهم كاظم يحجي وية خالة
يكللها
.. كلة منج انتي الي غسلتي عقل الولد وخلتيه ما يطيقنا

ودار وجهه على هشام الي حاجزته خالة ام قاسم حتى ما يهد على اخوه
ام قاسم.. يمة هشام عوفه ماعليك لا تسوي مشاكل

وهذا الناقص مستغل الفرصة
وكام يحجي .. اي هشام اسمع كلامها. اشو انت صاير خدام الها ولابنها
مسويك وصلت مسح ياثول

يمة هو حجة هاي الكلمتين وما نحس الا وهشام
طافر على اخوه ومتزانك وياه

يتبع

احبكم كومة احبكم هواي

اختكم نهى ☺️☺️☺️☺️☺️☺️☺️