أساور الفضة الفصل الثالث وخمسون 53 - بقلم نهى

مساء الانوار والمحبة عليكم يا احبتي
☺️☺️☺️☺️☺️☺️☺️☺️☺️☺️☺️☺️☺️

#اساور_الفضة_ج٢
#نهى_الحسون

شيماء
لحظات فزع ورعب اتراكمت بداخل صدري
اسوء مخاوفي واكف متجسد كدامي

ارتديت للخلف وعيوني تباوع عالباب الوراه
اتعشم بابوي يجي يلحكني
اي اني بحاجة حمايته بهاي اللحظة
لان نظرات شاكر النجسة ما تطمن

شاكر .. ها يا شومة شلونج

كلبي من كد الرعب يريد ينهزم من بين ظلوعي ويتركني لوحدي
وعقلي يدور على مهرب وشلون استدرجه
ربي لجئت لبابك لاتردني
سألته واني احاول اتصنع الشجاعة
.. اااثير وين؟؟

ضحك.. ابوج الزين غاط بسابع نومة كلت امر اسلم عليج
ونكعد شوية نتسامر لان انتي الله يحفظج صرتي
محد يكدر يشوفج
تلعبين وياي دور صعبة المنال

لزم فكه يمسح عليه ويباوع علية جنت لابسة دشداشة
عادية نص ردن
كرهت روحي من ورة نظراته المقززة
ياربي نخيتك لا تردني خلصني منه

بلعت ريكي
.. شاكر شتسوي هنا

.. هههههه اجيت احط النقط على الحروف
ترة لا عبالج خفت من كلابه الي هدهم علية
وانطوني كم ضربة وكالوا جوز منها ولا تحاول تتقرب
عليها
عبالج افوتها الج لا انتي غلطانة هواي مستهينة بية

اباوع عليه متفاجئة هذا شكاعد يخبص

.. بيمن احلفلك اني ما عندي اي علم على شنو انت تحجي
ومنو تقصد

.. شيماء انا مو غبي اعرف منو الي دزهم علية
لان نظرات عيونه بذاك اليوم فضحته
لاعبالج عبرت علية هو دز جلابه حتى يوصل رسالة ما اقترب على شي يملكه
بس هو شكله ميعرف. ديلعب ويامن
انا شاكر محد يندك بية

حطيت ايدي على حلكي مصدومة معقولة ديقصد على حيدر اي ماكو غير حيدر هو الوحيد الي يعرف بسالفة شاكر
لان مروة مخبوصة بسالفة ضحى مابيها مجال تدز احد والا جان كالت بلعت السؤال خليني ساكتة احسن
وبقيت مصرة اجهل الموضوع
.. صدكني شاكر ما اعرف شنو تقصد
هسة على كلً هذا مو وكت واحد يحجي بي
تكدر تتفضل تطلع برة مثلما دخلت

ضحك وكشر عن اسنانه القذرة وكال
.. لج شيماء انا اليوم جاي لهنا ومبيت النية
يعني ابوج مو منا للدرب مفول وشارب
اني اليوم اتكفلت بشربه وبعدين وصلته بيدي هنا
حتى اضمن جيتي ودخلتي للبيت
واخذ الي اريده منج بالطيب لو بالغصب انتي بكيفج

اباوع عليه بدة يتقدم علية يعني راح ينفذ تهديده
احس النفس صار كولش صعب علية ولازم اشهك يالله احصله
شاكر راح يدمرني صرت اتخبط بخوف
باوعت عليه اريد شي يطلعني من هاي المصيبة

وبسرعة حجيت
.. هوب اوكف لحظة شاكر انت مو عرضت علية الزواج
.. اي عرضته عليج ورفضتيني
.. زين اذا اكلك اني موافقة عالزواج منك
بس لا تأذيني وتكسرني
.. هههه لج بنت اثير هاي السوالف ما تعبر علية
وشنو يضمنلي انتي ما راح تكلبين علية

..ماعندي ضمان غير بس كلمتي وانت بكيفك
.. شوفي ياحلوة انا ما منتظر موافقتج
انا اخذج. وعود من تنكسرين
تالي غصباً عليج راح تجيني برجليج تتوسلين اتزوجج
لان بساعتها. الشرف عزيز وتدورين الستر

هو يحجي ويقترب مني واني صرت
اتراجع للخلف وعيوني تباوع منا ومنا
ادور على شي يفزعلي فجاءة اتذكرت نقالي حاطته يم فراشي ياربي شلون اوصله.

صرت اماطل بالكلام وياه حتى ما اعرف شنو دا احجي
بس اهم شي ابقى شاغلته عن تنفيذ النية الي ناوي بيها علية
بين ما جنت احجي وياه وارجع للخلف
جنت اتجه برجعتي وكان هدفي اوصل للنقال
وصدك حسيت رجلي انطخت بالنقال

احس كلبي كام يدك حيل عالسريع وكصتي عركت من الخوف
وشاكر بعده يحجي بكلام قذر مثل وجهه

شاكر.. شومة. خليني اونسج وتونسيني صدكني ما راح تتندمين

انتبهت على شاكر يسألني
شاكر .. ها شنو كلتي لتخافين اوعدج ما راح ااذيج
ادري بيج بنت بيوت اول مرة الج
كل الي اريده منج تطاوعيني وتصيرين حبابة
حتى ما تتأذين وانتي بكيفج تعاندين انتي الخسرانة
بعد هي هاي شغلتج وتعرفين بيها الي ترافس وتتحرك شيصير بيها

كان كلما ينطق بحرف يزيد الفزع بكلبي
وكأنه ديصورلي مشهد رعب
ويكلي شوفي هذا المشهد انتي راح يصير بيج هشكل مثله
ضاقت بية الواسعة وصرت اجمع كل قطرة دهاء
محتاجة الي يطلعني من هاي الشدة
لازم استدرج شاكر على الاقل
بس اضمن اوصل للنقال وبعدها كلشي ما اريد

بدلت صوتي وصرت احجي وياه بدلع
.. عفوا عليك شاكر والله زعلتني منك هاي هوستك
كلها وتحجي وياي هشكل يعني هاي بدال متطمني
تدري بية هاي اول ليلة الي
واني كوووولش اخاف

كل كلمة احجيها احس اريد اتقيء من التقزز
اباوع لشاكر الحيوان عيونه صارت شرهة اكثر وكأنما
كلامي زاده ما نقصه
.. اروح قربان للي يخاف

استغليت الموقف وكعدت بالكاع متعمدة وحطيت ايدي على وجههي
وصرت ابجي بدلع

شاكر.. لالالا تبجين خاب من يروحلج فدوة شاكر والخلفوه
صدقة لربها شلون تبجي تكول درر
توكع من عيونها

مديت ايدي بخفة وراية ولزمت نقالي
وهو اقترب علية ومد ايده يريد يمسح دموعي
من خدي
متحملت وخانتني شجاعتي
ابتعدت عنه بغير صفحة
ووجهي انخطف لونه
.. لا لا شاكر صبرك علية شوية انت ليش هشكل مس ...مستعجل
صرت امتمت بالكلام
.. اهوووو انتي شكلج راح تعبيني

الخوف وصل بية لحد الدمار
يعني بالكوة متماسكة لا انهار واضعف وابين خوفي منه اجيت اكوم من مكاني

اشو هذا لزمني من رجلي
يمة هو لزمني من رجلي واني
دين ما بقى براسي رفسته بكل قوتي
بس هو صار اسرع مني ولزم رجلي الثانية وسحبني
جواه
واني صرت ارافس واضرب واصرخ بكل قوتي

احس جنت باقية على شعرة وحركته هاي
قطعت الشعرة. وانهارت كل الحصون الي جنت
بانيتها حولي مثل الدرع وصرت
ذيج شيماء الصغيرة الي تتلاوة حتى تخلص نفسها من ايد المختار
وبرزت مخاوفي القديمة الي هاجت علية
وية لمساته وانفاسه القذرة ووصلتني للحافة
للانهيار

عطت بصوت .. شيل ايدك عني ياناقص ياحيوان
شاكر.. اشششششش صوتج
مد ايده يريد يسد حلكي عضيتها وتفلت بوجهه

عصب علية وضربني راشدي
وواني لازلت اصارع واتلاوة جواه حتى اخلص نفسي
انطيته دفرة بين رجليه خليته يصرخ مثل المرة ودفعته عني

واني اريد اتقيء من الخوف من حلات روحي
احس صارت عندي قدرة عجيبة غريبة للقتال
طول ما شاكر يحاول يعتدي علية
واني ابد متيهت النقال من ايدي صارت روحي معلكة بي

كمت من مكاني واني اتعثر ووصلت للباب وشاكر بعده متأذي ويحاول يكوم من مكانه

طلعت من الغرفة. وعيوني وكعت على المكان
الي نايمة بي سليمة وجان اثير ممدد وبغير عالم
اباوع لسليمة مددة بفراشها وتبجي وتصيح
بلا حول ولا قوة
عبرت من يمهم وفتت كبل عالمطبخ ما ظل عندي وقت
اريد مكان اامن على روحي بي
سمعت صوت شاكر

كبل دخلت للمطبخ
وسديت الباب بس المصيبة ما بيها قفل خربان

اتجيت بظهري عالباب وشاكر يدفع بكل قوته
دكات كلبي من الخوف تصم اذاني صرت ما اسمع
بس موجات صوت كلبي بداخل ظلوعي

نقالي بيدي وفتحته بأيدين ترجف
وشاكر يدفع بالباب ويسب ويغلط واني باقية صامدة
ومن غير اي تردد اتصلت على الشخص الوحيد الي اامن بي ما راح يخذلني

اتصلت وبسرعة رد وكأنما الله استجاب لدعائي اني اقاوم دفعات الباب واصرخ بكل قوتي
.. قاااااااسم خوية الحكلي

وبعدها ما اعرف شنو حجيت وياه من كد الفزع والخوف وشنو كال
كل الي اعرفه انه هو كلي انا جايج لتخافين
حاولي تصدينه علما اوصل شمااااء لا تستسلمين
خليج وياي عالخط لاتغلقينه
حجة اخر كلمة بخوف

اسمعه صار يحجي بنقاله الثاني وية غير واحد
وبعدها انكطع الخط اباوع هسة وكته يخلص رصيدي
حسيت بفزع
رجع اتصل علية وفتحت الخط اسمعه كام ينطي الاوامر مستعجل سماع صوته صار بالنسبة حبل النجاة

هذا كله واني واكفة ورة الباب اقاوم دخول شاكر
همست بضعف وحجيت
.. قاسم عفية استعجل اني بركبتك ما اكدر اقاوم

وصرت اعد اللحظات
بعدها خارت القوى وضعفت مقامتي
تركت الباب بسرعة واتوجهت عالمجر حتى اطلع سجين

انتبهت لشاكر دفع الباب بكل قوته متوقع اني بعدني دا اقاوم ورة الباب بس اتفاجيء من انفتح الباب بسرعة واتعثر ووكع بالكاع صار يم رجلي انطيته دفرة اريد اطلع السجينة ادور عليها
طارت على حظي الفكر مدري هي كدامي عيني واني من الخوف ما اكدر اشوف
ايدية كامت ترجف لزمني من رجلية
والنقال وكع من ايدي اسمع صوت قاسم المفزوع الغاضب يغلط ويسب
رجعت رفسته وابتعدت عنه

اباوع لشاكر كام على حيله وهد علية
ولزمني من شعري وسحلني جانت ريحة انفاسه نتنة كلها ريحة شرب

.. لج ساقطة انا تلعبين علية
الا علمج انا الج

جان لازمني من شعري ويضرب بية واني اتلاوة جوة ايده مثل الطير المذبوح اريد اخلص نفسي منه
احس اتكطعت انفاسي وخانتني قوتي وحيلي انهد

وصار يحاول وياي حتى ياخذني سمعت صوت تمزق
ثوبي جان يضربني ويرجع يغلط

جان مطبخ سليمة كلش صغير
وبين الخوف وضربات كلبي المدوية
ودفعني وحشرني يم السنك هجم عليه واني واكفة بمكاني وصار شك ثوبي

عيوني زاغت وعقلي بعده عنده امل ويدور على شي ينقذه وجان توكع عيني على المواعين المغسولة جنت عايفتهم عالسنك حتى يوشلون من الماي وجدرية و طاوة تيفال ثقيلة مديت ايدي اريد اوصل لأي شي يجي بأيدي

انتبهت عليه بدة يرفع ثوبي
وهاي حركته خلتني صرت مثل المخبلة
وصلت للمواعين وظل ماعون ما نبته براس شاكر
وهو كام يحاول يلزم ايدية حتى يمنعني
لزم ايد وحدة
مديت ايدي الثانية وبكل يأس شلت الطاوة التيفال
وحطيتها براس شاكر
اول ضربة اجتي براسه ترس بس بالضربة الثانية كدر يتلافاها وعصب علية لان كصته نزفت دم
وصار يغلط ويضربني على وجهي بوكسات

فجاءة بلحظة يأس وخوف
انتبهت على الباب انخلع وبعدها

ما حسيت الا على شاكر انشال من علية
مثل الفلقة ونضرب بالكاع وانعادت هاي الحركة اكثر من مرة

اباوع لقاسم جان الوجه مدخن من الغضب
ودخل ورة قاسم واحد شايل سلاح بيده اي هذا اعرفه
اخوه هشام

صرت احاول استر نفسي ولميت ثوبي من يم صدري

انتبهت لهشام ركض فات عالبيت لحظات
ورجع للمطبخ وبيده شرشف شمره علية

اخذته منه ممنونة ولفيت نفسي بي
وعيوني جانت بنفس الوقت تراقب بخوف وتتنقل ما بين قاسم وبين شاكر
الي صار وصلة مسح جوة ايد قاسم
جان يضرب يريد يشفي غليله
يعني كل ضربة من قاسم احس بماي بارد ينزل على كلبي وتجبر بخاطري

بعدها شمره مثل الجرو يم رجلين هشام

وكال لهشام
.. شوف هسة تاخذه وتربطه زين مثل الخروف
وتحطة بالصندوك
وبعدين نشوف شغلنا وياه
اباوع لشاكر لازم بطنه وممدود بالكاع يتلوة من الالم
دنكرعليه هشام ورفعه من ياخته وتفل عليه وطلعه من المطبخ سحل

انتبهت لقاسم اجة وكف فوك راسي والقهر مبين بعيونه
وسألني وهو حابس انفاسه

.. شيماء طمنيني وكليلي لحكت احمي عرضي ؟؟؟
وما دنسه ال......

مكدر يكمل كلامه من الغيض
جنت ارجف وصاكة على اسناني ونزلت دموعي وجاوبته
.. اتطمن مكدر يدنسني

حجيت هاي الكلمتين وبعدها
انهاريت بالبجي والدموع الي جانت هاجرتني و ومعاندة. وياي
صارت تجري مثل النهر على خدودي

قاسم .. مسحي دموعج وكومي انتي تاج ينحط عالراس المثلج متبجي مكسورة

كلام قاسم هديء خوفي وفزعي بعدها
سألني اصعب سؤال حتى اصعب من سؤاله عن شرفي

قاسم.. ابوج وينه
غمضت عيوني بذل ومهانة واشرت على برة
.. هناك جوة نايم
انتبهت عليه وهو راص اسنانه مد ايده
وساعدني حتى اكوم من مكاني
وبعدها راح يدور بالبيت عليه
رحت امشي وراه ورجلية صاروا خيوط

جان يتحرك بالمكان مثل الاسد المحبوس بقفص
ويدور على فريسة حتى يطلع كل غضبه بيها

واثير جانت غاية قاسم من هذا الغضب
اباوع عليه اخذ اثير سحل ودخله للحمام
وهو جوة ايد قاسم دايخ ميدري بالدنيا طشت لو رشت

صرت اسمع صوت الماي وشهكة
اثير صوته مثل الغركان
اتقدمت اشوف شنو ديصير
وجان اشوف قاسم غاط راس اثير بطشت الماي
اباوع عليه يرافس جوة ايد قاسم
وكل شوية يكرر المحاولة عادها اكثر من مرة

واثير بدة يقاوم وحركته تدل على بداية وعي اثير لنفسه
على الاقل عنده ردة فعل لاجل الحياة

وقاسم بعدما اتأكد منه بدة يصحى
شمره بزواية الحمام
واثير بدة يفتح ويسد بعيونه
بتعب
حجة بصوت ثكيل
.. هذا عزرائيل شجابه هنا
جان يجر بالحجي جر. ويلحن بصوته الثكيل
قاسم.. لك انت اكبر عار شفته بحياتي
انت كفر تشم الهوى بس انا اعلمك
والي حساب وياك بعدين

كوم اتحرك لملم زبالتك وروح شوف وراجع نفسك
شوف روحك شمصخم
وباجر من تصحى اتصل علية

بعدها طلعني من البيت وكبل اخذني للسيارة
وما شفت هشام وصرت اتلفت منا ومنا
جان الدنيا ليل ظلمة بس مو اظلم من حياتي

صعدني بسيارته وطلبت منه يوديني لبيت مروة

شيماء سرت بجسمي رجفة وحجيت
.. لو ما راد على مكالمتي جان هسة
الله اليعلم شنو صار بحالي

قاسم .. شيماء اتصالج علية بوقت شدتج هذا وسام شرف افتخربي

.. تدري جنت ما اعرف شنو شعور البنية من يكون عندها
اخو تحتمي بي بس اليوم جربت هذا الشعور
قاسم اني جدا ممنونتلك وما اعرف شلون اشكرك
ربي يستر على عرضك
ويدفع عنكم اولاد الحرام

.. عفو عليج خوية انتي كلتيها انا مثل اخوج
وما بين الاخت واخوها شكر هذا واجبي ما سويت شي

ابتسم وكال .. ذكرتيني بهدى كل مرة يصير هيج موقف
تكعد تشكرني. انتوا الظاهر عندكم وراثة

قاسم ميدري بينا احنا عشنا طول عمرنا مظلومات من اقرب الناس النا
ومانتوقع من واحد غريب يحمينا وويوكف ويانا
لذلك الشكر والامتنان مو شي غريب علينا
جنت ابجي واني مستغربة على روحي شلون دموعي
كامت تنزل هيج بسهولة

اتصل على مروة وبلغها بجيتنا
من وصلت لكيت مروة ومريم وحتى خطية ضحى
واكفات بالباب ينتظروني خايفات ومفزوعات
بعد يادنيا شنو ضامتلي من ضيم وقهر

هدى

اباوع للساعة ياربي هذا وين صار اشو كلش اتأخر
اتصل عليه ميجاوب
معقولة هو عنده وحدة ثانية يقضي وياها حاجته وتلبيله طلباته
كمت من مكاني وباوعت لروحي بالمرايا
لشوكت ابقى انتظره

ياربي ساعدني اريد زوجي يصير حلالي
معقولة هالشي هواي علية لو ما استاهل

جنت صافنة وجان ينفتح الباب ويدخل قاسم والوجه مدخن
جان مدنك راسه سد الباب وراه
وهو ينافخ بغضب هذا شبي

رفع راسه واجتي عينه بعيني
ووكف بمكانه
وعقد حواجبه وباوع علية مستغرب
ابتسمت بوجهه
وشجعت نفسي ورحت اقتربت عليه
وهمست .. كلش اتأخغت (اتاخرت) جنت انتظغك (انتظرك)

جان يباوع علية وعيونه تدرس وجهي وترجع تنزل
تزور معالم جسمي
.. شكو ليش نتنظريني وشنو هذا الي لابسته
انا كم مرة حذرتج لتلعبين بالنار
اشو تسوين هيج حركات
و تردين مني احافظ عالوعد
ترة للصبر حدود وانا رجال مو ملاك
لازم تعرفين شنو راح تكون نتيجة هاي حركاتج
اتمنى تكونين بكدها

قويت نفسي واقتربت منه وحجيت بصوت ناصي من الخجل
.. قاسم اني اعغف (اعرف) بنتيجة افعالي وليوين غاح (راح) توصلني
لان اني قغغت (قررت) احاول وياك وانطي فغصة (فرصة)لحياتنا
واغيد (اريد) اتمم زواجنا

سألني بحذر زائد شك
.. اكدر اعرف شنو الغير رأيج
وشنو الي اتغير بحياتنا وخلاج
تقدمين على هيج خطوة

.. الغيغ غايي (الغير رأيي) انت
بعدما عشت وياك شفت بيك الملاذ الامن
وحمايتك الي ولخواتي وحنانك
صاغ (صار) عندي سبب قوي يدفعني ابدي زواجي وياك
لزمت ايده بين ايدية ورفعت راسي وعيوني بعيونه وكملت كلامي
.. وهسة اسألك من جديد
اذا اكو باقي الي مكان بحياتك تضمني الك واكون
من ضمن اهل بيتك واصيغ (اصير) حلالك

باوع علية وعيونه تنطق بالاعجاب واللهفة بس كان عنده تردد
وكال
.. هدى ما يحتاج تقدمين امتنانج وتشكريني بهاي الطريقة
بس علمود فزعت لاختج وحمايتي الكم

لتخافين راح ابقى احميج وبنفس الوقت احافظ على كلمتي وياج انتظرج تكملين دراستج وتتوكلين. ميحتاج تنطيني مقابل على خدماتي
ما احب استغل وضعج وضعفج هاي تنتقص من رجولتي

جانت ايده بعدها بين ايدية
لزمتها حيل وحجيت
.. لا قاسم لاتتصوغ (تتصور)اني دا اسوي هشكل علمود
اشكغك (اشكرك) بالعكس اني دا افكر بحياتي ومستقبلي وياك
بعيد عن الامتنان هذا ماله علاقة بموضوعنا
اتمنى تفهمني.

سحب نفس عميق مثل الي ديقاوم
.. فهمتج ترديني اتمم زواجنا حتى تضمنين حمايتج
وحقوقج كزوجة
خلاص هذا هو ما راح اخذلج
انا بالاول والاخير ابقى رجال
وما عندي مانع تصيرين حلالي
انتي حلوة ومناقصج شي

جان يحجي وعيونه اكلتني
كلامه زرع الامل بداخلي

كمل كلامه
بس قبل لا ابدي وياج لازم تعرفين
صحيح انتي اتغيرتي وقررتي تكملين وياي

بس خلي اكلج ترة اني ماكو شي اتغير بحياتي
بعدني اني نفسي قاسم ما اتغيرت
بعدني اكره الالتزام والمسؤولية
وحريتي فوق كلشي
وتحتل المرتبة الاولى بحياتي
وكلبي هو نفسه ما اتغير باقي على حاله
احب اذكرج من هسة حتى لا بعدين تجين تشتكين استغلالي الج
وتكولين كسرتني وحطمت حياتي وياك

جان هو يحجي وجنت احلل بعقلي كل كلمة كان
ينطقها لان اني اعرف قاسم ميحجي كلمة بدون
مايقصدها جنت احاول ابرر كلامه على انه صعوبة تقبله الي بحياته

بس مع الاسف كلامه الاخيرة كسر اخر امل
بكلبي ورجعني لنقطة البداية

بعد الي سمعته مستحيل اخليه يمتلكني وكلبه بعده. وية وحدة ثانية
يعني رغم الصار بينه وبين رهف شكله حبها
بعده موجود بكلبه حتى لو كانوا متزاعلين
اني شكد غبية. شلون انسى هيج فقرة
وهو اصلا الزعل المن. انخلق غير بس للمحبين

دنكت وصرت اصبر دموعي واترجاها
لاتنزل وتذلني كدامه
تركت ايده وابتعدت عنه ورفعت راسي وباوعت بعيونه
وحجيت بصوت واهن حاولت ما ابين بي نبرة
انكساري

.. خلاص قاسم غسالتك (رسالتك) وصلت
وافتهمت من كلامك اني مالي مكان بحياتك
واشكغك (واشكرك)
لان حذغتني (حذرتني) ووصحيتني من غبائي الي جنت عايشة بي

كلامك صحيح اني احتاج غجل (رجل) يكون بكد حمل المسؤلية
وما يتهغب (يتهرب) منها. وشكلي اجيت على الشخص الغلط

اباوع عليه مسح كف ايده على وجهه وظل يلعن ويغلط من بين اسنانه

درت وجهي وانطيته ظهري ومشت متوجه للكنتور
فتحته وطلعتلي ملابس تحمي ضعفي كدامه
رحت للحمام وبدلت وغسلت وجهي وشمرت الثوب الابيض بالكاع بزواية الحمام صرت اباوع عليه
بحقد

طلعت من الحمام ولكيته يحوم بالغرفة مثل الاعصار
جان ينتظرني
بس شافني اتوقف كدامي وكال
.. هدى صدكيني الصار احسن النة ثنينا
بعد الشفته اليوم عرفت ليش جنتي خايفة مني البارحة من رجعت متأخر من السهرة
متريدين تتكرر حياة ابوج وياج

بس مع الاسف الي تردينه مني ماموجود عندي
لان لو كان موجود عندي جان ابوي اولى واحد
بأهتمامي
ولو جنت موجود يمه مسانده جان ما فقدته

هو يحجي واني جنت غركانة بكسرة كلبي
ادري هو ديحس بالذنب بتجاهي لان خذلني

رفعت راسي.. خلاص قاسم ميحتاج تكعد تبغغلي (تبررلي)
سبب غفضك (رفضك ) الي
هاي حياتك انت حغ (حر) بيها

على كلٍ خلينا بالمهم
بما ان زواجنا والظغوف (الظروف) الي جمعتنا. كانت كلها غلط بغلط
لذلك اني اشوف وجودي بحياتك ماله لزمة
ما اغيد اصيغ حجغة عثغة بطغيقك
(ماريد اصير حجر عثرة بطريقك )
فكل الي اغيده (اريده) منك تطلكني
وتخلص نفسك من مسؤليتي وكلمن يغوح (يروح) بحال سبيله

اباوع عليه صار نار كبرة
.. انسي شي اسمه طلاق
انا وعدتج تكملين كليتج وتعتمدين على نفسج
وتبقين لحد ما تكدرين تعتمدين على نفسج

.. لتخاف علية صغت اكدغ (صرت اكدر) احمي نفسي من ابوية
مغوة (مروة) اختي وشيماء موجودات ما غاح يتغكوني (ماراح يتركوني)
وابويةعصباً عليه يتقبل الموضوع

طلكني واغتاح وغيح (ارتاح وريح ) كلبي وياك

رص على اسنانه وحجة
.. سمعيني زين طلاك ما اطلك انسي
مثلما انتي عندج اسبابج
انا عندي امي اكبر سبب مستحيل اخذلها واقهرها
بطلاكي

درت وجهي وحجيت
.. خالة انسانة متستاهل تتأذة بسببنا
لذلك غاح انتظغك ( راح انتطرك ) من تشوف الوقت المناسب وتطلكني

بعدها ابتعدت عنه
وطلعت من الغرفة بكبرها
ورحت لغرفة هالة دكيت الباب ودخلت
جانت ستوها تريد تنام مقفلة
من شافتني كعدت مصحصحة
.. ياستار شعندج بغرفتي بهذا الوقت

اني هي حجت هاي الكلمتين واني شمرت روحي
بحضنها وانفجرت بالبجي
وهي صارت تطبطب علية تواسيني بدون ما تعرف
اي شي

هالة تواسيها
.. الله يلعن الحب وسنينه
ما وراه بس شل الحال ووجع الكلب

جنت ابجي واحجي
.. الحب شعليه هو اخوج ثوغ (ثور) ماعنده احساس

هالة.. هي هنا المشكلة اخوي ثور
وانتي مثل البقرة الغبرة. اجيتي وحبيتي

احجي واناشغ من بين ادموعي
.. مو كلبي الغبي حبه مو غاضي (راضي) يفهم هذا الغجال (الرجال) ما يفيده

.. ادري هسة انتي شنو افتهمتي منه وحبيتيه
غير بالاول تختبرينه
وتشوفين تاريخ صلاحية كلبه منتهية لو بعدها
صالح للحب او لا

مسحت خشمي وباوعت عليها
.. هالة انتي دتحجين عن اخوج لو عن قوطية لبلبي

.. لج عوبة دا احجي عن اخوي الثور ومرته البقرة
يالله هسة بما ان انتي بديتي تتجاوبين وياي احجيلي شنو الصاير

بديت احجي لهالة عن الصار بيني وبين
قاسم وعن ردة فعله وياي

هالة .. يبووووو على حظج ياهدى وين نايم
والله تختارين اوقات كلها حرجة
.. ليش يعني تغديني (تريديني) اخذ موعد وياه
من اغيد اقتغب (اريد اقترب) منه
حتى يكون مستعدلي

.. ولج لا يالفالحة
اني قصدي الوقت الي اجيتي بي
انتي متدرين شنو صار بذيج الفترة
من جنتي ملتهية وية اختج ضحى

.. ليش شنو صاغ (صار)
.. لج رهف العوبة حاولت الانتحار
وابوها حرك الدنيا وبيومها قاسم راح يركض
عليها حتى ما انتظر امي
وبعدها امي اخذت العم حسنين وراحت وراهم للمستشفى. حتى تشوف شنو السالفة

هالة تحجي واني كلبي كام يكمز من الغيرة
خرب حظي ولا اتوب منه رجعت دموعي نزلت
من جديد

.. هسة افتهمت شنو كان يقصد من كال
اني بعدني ما اتغيغت (مااتغيرت) وباقي محافظ عالوعد

هالة.. شوفي هدى اني ما اعرف شنو هو شعور قاسم اخوي بأتجاهج
بس الي اعرفه ومتأكدة منه
ان قاسم اخوي مستحيل يتنازل
او يسامح واحد. يكسر كلبه واتعدة عليه
لو على كص ركبته ميسويها ويرجع لرهف

.. ليش شنو الي يخليج متأكدة
.. لان قاسم قبل مرة صارت وياه
من بابا كسركلبه واتهمه وظلمه
وبابا من عرف غلطه حاول يسترجع قاسم
بس مع الاسف قاسم كان مسافر ومعند راسه يرفض يسامح

شيماء
بعد الصار بية بفترة حاولت اتجاوز الصار بية
وانهض من جديد مثل كل مرة. اتعرض لعثرة
وارجع اضمد جراحي واوكف بوجه الزمن
كان سبب قوتي وصلابتي خواتي
خوفهن وقلقهن علية خلاني
انهض واطمنهن علية اني بعدني اختهم الكبيرة القرية
الي يستندون عليها

ورة يومين باشرت بدوامي وية مروة وجان اله الدور. الكبير بانشغالي عن الصار بية
مرات انام بالليل وافز مرعوبة خايفة
يتخيلي شاكر وصوته يعتدي علية واني نايمة

وفعلا كان الدوام مثل كالت مروة
ومريح ومتشعب وجانت اكو بنية بالاستعلامات
هي الي اتكفلت تعلمني وتعرفني على مراجعات مروة
وبالتدريج بديت اتعلم لشغل مروة

واغلب الاحيان مروة تطلبني وياها بداخل العيادة
خصوصاً من شافت خبرتي بهذا المجال

اما اثير بعدما صحة على روحه
اتصل علية بس اني رفضته كلبي هواي محمل
عليه وبعد ما عاد بالكلب مجال يشفعله
عندي افعاله سلبت منه حق الابوة
عندي

اما ضحى اليوم المحامي كال راح تكون اخر جلسة
بالمحكمة بخصوص الطلاق
وهي راحت وية اثير والمحامي. حتى تنهي كلشي
طبعا مروة عرفت شلون تلزم اثير وتجبره يروح وية
ضحى

اما مريم فبدت تاخذ دورات التقوية
والحمدلله مريم كلش شاطرة ان شاء الله تبيض وجهنا
وترفع راسنا

اما كلبي فكان بوادي لحاله عبالك معايش
بحياة شيماء يلحن لوحده
جنت كلما اكعد لحالي اتذكر كلام شاكر عن حيدر
وتهديده
وابقى من يمي اخمن واستنتج. واسأل روحي الف مرة ليش هو سوة هيج

معقولة هو مثل ليث
هو متزوج وعنده عائلته
و عادي عنده يهتم بوحدة ثانية غير مرته

كمزت من مكاني على صوت عياط مروة
اجتي مريم ولازمة بأيدها مشمش الي جانت تبجي

مريم .. شيماء لحكي مروة ما اعرف شبيها
جانت كاعدة يمنا كلشي مابيها
فجاءة اجاها. اتصال وراحت دخلت لغرفتها
وبعدها كامت تكسر بالغرفة وتصرخ بعصبية

رحت اشوف مروة وكلت لمريم تبقى يم مشمش

نزلت جوة ودخلت على مروة لكيتها حمرة من الغضب
فاتحة الكنتور وتشمر بملابس رافد

اقتربت منها
.. شنو مروة شبيج ليش دتسوين هشكل

هدى

بعد الصار بيني وبين قاسم اتغيرت هواي اشياء
وخصوصاً. تصرفاتي
بس ما كدرت اكره على موقفه وياي
وخصوصا بعدما عرفت من شيماء الصار بيها
بيومها طلبت منه ياخذني لبيت مروة
ووافق. ومن سولفتلي عالصار بيها ووكفت قاسم

غصب عني لكيت حبه يكبر بكلبي ويتشعب
بس رغم هذا بقيت متقوقعة على نفسي وصرت اتجنبه
وابتعد عن طريقه
بعدما جنت افتر وراه وين ميروح مثل ظله
واسولف وياه
واول شي سويته كمت الم شعري والبس حجابي كدامه
وابد ما احاجيه الا للظرورة

بالحقيقة اني ما دا اعاقبة عالسواه بية
لان هذا الشي مو من حقي محد كلي اوكع بحبه
مو ذنبه
بس اني اريد اعود نفسي على عدم وجوده
بحياتي حتى اكدر اعيش

وبهاي الفترة
بديت اخذ جلسات الليزر عند دكتور التجميل صديقة مروة وجنت اخذ. هالة وياي خوات قاسم
سافروا

بس الغريب بالامر والي خلاني استغرب
غضب قاسم وعصبيته من برودي وياه

انتبهت من افكاري
واني انظف بالطبخ على صوت اعتراض هديل
جانت ام قاسم كاعدة على ميز الطعام
ودتشرب كهوة. تركية وهالة يمها كاعدة

سمعت ام قاسم تحجي وية هديل

.. سمعيني زين لا عبالج اني ممنتبهة
لتغليسج على الشغل بالبيت بس اني بزاجي
اعبرلج واكول
انطيها فرصة حتى تنتبه ما اريد اعاقبها

هديل.. وليش انظف. هالة وهدى دينظفون ممحتاجيني
كافي عالبيت

ام قاسم.. انتي جبيرة. مو صغيرة حالج من حالهم تنظفين وياهم
شوفي باجر اول ما تكعدين الصبح. تنظفين البنكات
واتندلين بردات غرفة الاستقبال وتغسلينهم

اباوع لهديل كامت تحجي وتبجي
وتتوسل لامها تخفف عنها
بس ام قاسم ما اهتمت لتوسلها ياجبل ما يهزك ريح

دخلوا هشام وقاسم وسلموا عالكل وراحوا على امهم
واني رديت عليهم

سألت هشام .. هشومة متعشي لو اسويلك عشا
.. والله ياريت لان كلش جوعان زوجج اليوم
مدخل الكل بالانذار وما انطانة مجال نحك راسنا

.. يخسة الجوع هسة احلى عشا يجي لعندك

التفتت على قاسم
وحجيت .. اهووو والله نسيت
قاسم تغيد (تريد)عشا لو لا

حجة من بين اسنانه وكال بصوت
قاسم .. همزين طلعتي تتذكرين. اسمي

يحجي ويباوع علية بغيض
سويت نفسي ما سمعته
.. شنو متعشي اي لو لا

.. ما اريد زقنبوت
شوفي انا صاعد فوك
تعوفين الي بيدج تصعدين وراي فاهمة

هالة اجتي يمي وكالت
.. هدى عوفي الي بيدج وروحي وراه. ما انصحج
تعاندينه شوفي شيريد وانا اسوي عشا لهشام

انطيتها الماعون ورحت واني انافخ
من ورة الاستاذ قاسم

دخلت للغرفة لكيته. ديبدل ملابس
جمدت بمكاني وغصب عني لكيت روحي واكفة اباوع
مثل السليمة
التفت يباوع علية اول ما دخلت
وكال .. انتي ما تكليلي شنو سالفتج
شنو شبيج ليش هيج اتغيرتي

جان يحجي بغيض
.. قاسم انت الي كلي شنو تغيده (تريده )مني
تغة والله تعبتني وياك

قاسم.. اريدج ترجعين مثل قبل
ما متعود على جفة هدى الجديدة الي تحاول تصدني وتتجنبني

اقترب مني وسحب شالي من على راسي واني
جامد بنفس مكاني مصدومة من كلامه
حجة بهمس
.. ليش تعاقبيني وتضمين شعرج عني
تدرين بية شلون اتونس من اشوفه

يتمرجح على راسج ويحضن جسمج
واني اهدي بكلبي حتى لا يفرح بكلامه

باوعت عليه وكلت
.. صاغ (صار) قاسم هذا هو غاح اغجع (راح ارجع)وياك مثل قبل
هادي اخوك الصغيغ (الصغير) علمود اسهل علينا الوضع
حتى تمشي السفينة منا لحد ما تفغج (تفرج)

بس اما عن شعغي والاموغ (شعري والامور) الثانية الي تخصني
فلهنا واكلك اعتذغ (اعتذر) ما اكدغ (مااكدر)اسمع كلامك
واكعد استعغض بشعغي (استعرض بشعري)كدامك

اني احب احتفظ بشعغي (بشعري) ودلاله لزوجي المستقبلي
احب اشاغكه (اشاركه)بي وهو الوحيد الي غاح (راح)يملك
الحق يتغزل بي ويخليه وسادته
بكيفه هو حغ (حر) بي

يمة اني بعدني مكملت كلامي ما احس الا وقاسم هد علية مثل العاصفة
ولزمني من شعري
.. لج جنية اتقي شري ولا تكعدين تجربين حظج وياي

فرشت فراشي بالكاع دام زعلي وجفاي على قاسم
بس اربع ايام
وبعدها لكيت نفسي من جدة وجديد احبه
وانسى نفسي من اكعد يمه
وهو هم صار اكثر قرب مني ما اعرف ضميره يأنبه
وكثرة كعداته وياي مدري
هو بدة يتقبل وجودي وياه

جنت دا احضر بملابس قاسم علمود الصبح
اندك نقالي وجان المتصل شيماء

جاوبتها .. الو هلا شومة شلونج
اجاني صوتها وهي تبجي وكالت

.. هدى بيبي سليمة ماتت

يتبع

احبكم كومة احبكم هواي
اختكم نهى ☺️☺️☺️☺️