أساور الفضة الفصل الرابع وخمسون 54 - بقلم نهى

كل عااااااااااااااااااااام وانتوا بااااااااااالف خير
وسنة سعييييييييييييدة عليكم ياربي
اتمنى ان تكون سنة ٢٠١٩ سنة خير على كل العراقيين من شماله الى جنوبه
طبعا رغم الانشغال بالاحتفال بعيد رأس السنة الجديدة
لكن حاولت اسرق من وقتي واكتبلكم البارت اونزله
الكم حبيت اشاركم بالسنة الجديدة ولو بالشيء البسيط
مع تحيات اختكم نهى الحسون
🎄🎄🎄🎄🎄🎄🎄🎄🎄🎄🎄🎄🎄🎄🎄

#اساور_الفضة_ج٢
#نهى_الحسون

هدى
تمر بينا السنين وتاخذنا الايام والامنيات
الحياة امرها عجيب. ومواقيتها غريبة

في يوم من الايام كنت نفسي اني هدى
اكره نفس الشخص الي هي سليمة
وجنت دائما اذمها
بسبب الظلم الي شفناه على ايدها
بطريقة او بأخرى كان الهة اليد
بعثرات حياتنا. وتغيير مصيرنا
ومجنت متوقعة يجي اليوم الي راح ابجي
عليها من تموت
جنت اتخيل راح اكون اسعد وحدة ويوم المنى
من تموت
لكن تبقى الانسانية عند البشر تحكم المشاعر
وفوق كلشي

جنت ابجي على سليمة مو علمود راح افتقدها بحياتي
وانما جنت ابجي بسبب الطريقة الي ماتت بيها
هاي الي هزت اركان كلبي وخلتني انهار

كان سبب وفاة سليمة اهمال اولادها
كانت مرية كبيرة بالعمر مريضة مقعدة بالفراش
تحتاج من يكوم بواجبها
شيماء اختي اتكفلت بيها. وقررت تبقى يمها
ورفضت تروح لبيت مروة

بس بعد الي صار بشيماء. على ايد اثير وشاكر
طلعت من البيت واتصلت على امجد وبلغته يروح ياخذ
سليمة لوحدها بالبيت ودلته مكان الادوية. وعلمته
اوقات اخذ العلاج

وامجد كللها اني هسة بس اكمل الشغل الي بيدي
اروحلها

شيماء لهنا خلصت مهمتها
بالرغم حالتها النفسية المتحطمة الي مرت بيها
وضرب شاكر واعتداءه ترك اثار جسدية ونفسية
عليها واخذت منها فترة حتى تتشافى
بس ما نست سليمة اتصلت على امجد ووصته عليها

بس الي ما جانت مسوية حسابه شيماء
ان امجد يعتمد على اثير ويكله ما راح اكدر اجي عليها واخذها عندي
لان عندي شغل كومة
انت دير بالك عليها

وصادف اثير العار بسبب مصايبه وبلاويه
لازمينه جماعة مهرة ومجنزينه تجنز ومبقينه عندهم
يومين يردون يعرفون مكان شاكر وين
لان هو. اخر واحد كان وياه والكل يشهد ضد اثير
ان شاكر اخر مرة شافوه بيها جان وية اثير
ومن عهدها شاكر اختفى فص ملح وذاب

بسبب مصيبةً اثير سليمة صارت ضحية
وبقت يومين لوحدها
بدون لا اكل لا شرب لا علاج بعدها سليمة اتوفت ببيتها
بدون لاحول ولاقوة.

وامجد العار جان ملتهي ببيته المرهون. ومعتمد بكل عقله على اثير يداري امه
بالرغم شيماء فهمت امجد عن موضوع شاكر
جانت خايفة تروح هناك لبيت سليمة
من ورة الي صار بيها حرمت تعتب ذاك البيت
وطلبت من امجد ياخذ سليمة عنده

خبر وفاة سليمة بهاي الطريقة
مرد كلبي وخلاني اكره شي اسمه اب
انفجعت من الموقف وصرت ابجي على حالها
من كانت تصارع لوحدها وتتأمل من يجي
يلحك عليها ويداري كبرتها

حسيت على ايدين خشنة حاوطتني ولمتني رفعت راسي
وكلبي انتفض من مكانه من شفت روحي
بحضن قاسم باوع عليه وكعد يواسيني

دفنت راسي بصدره وصرت اشهك من البجي
واني اتذكر ايامي وشقاوتي وحزننا وضحكنا
كلامها عنادها. سعيها لحتى تزوجنا
وترتاح منا هواية مواقف جمعتنا وية سليمة
الحلوة والمرة

جنا حتى من نجوع
نجوع كلنا سوية ومن نشبع
نشبع كلنا سوة
صرت ابجي حالها واترحملها.
وادعيلها. ربي يغفرلها

بعدها اخذني قاسم وخالتي راحت وياية
للبيت هناك
لكيت خواتي موجودات
والجوارين كلهم جايين وجنان مرت امجد
الغريب في الامر سليمة ماتت ببيتها لوحدها
وهي بعازة شخص يوكلها ويساعدها
وهسة بنفس البيت الي كانت تصارع بيه الالم
كان متروس بالجيران المعزية

((الناس متناقضين. في افعالهم
الميت يصبح عزيز تحت التراب
وعندما يكون حياً لا احد يهتم لأمره ))

اليوم ثالث من الفاتحة صحيح ما عندهم ناس هواي
بس تبقى اسمها فاتحة وعزاء

امجد واثير يبجون على امهم مثل النسوان
هذولي حرام بيهم الحياة
بس اكو جملة دائما. ارددها
الله يمهل ولا يهمل

اباوع لشيماء متبجي بس تباوع على اركان البيت
ومروة اصلا مكدرت تحضر عندها التزام بالعمل
وضحى ومريم اجوي

اثنيهم يبجون وضاعت اسباب البجي
على سليمة لو على الايام الي كضيناها وية سليمة
وهذا بيت ثاني راح نودع اركانه وذكرياته
وصار مالنة حق بي كمت اقدم الجاي

ما اعرف شبية ايدي دترجف وجسمي يرجف
يمكن راح اوكع مريضة
لان اني صارلي ثالث يوم بايتة وية خواتي بالفاتحة
واني طول هاي الايام اكره احط شي بمعدتي
تلعب نفسي وحتى حرارتي صارت ترتفع

اني من يوم الي صار بيني وبين قاسم
اني والاكل صرنا اعداء

اجوي خالة وهالة
رحت سلمت عليهم ودخلوا جوة كعدوا يم البنات

خطية ام قاسم جانت كل يوم تحي وتجيب وحدة او اثنين من بناتها
وفاطمة وسرور اتصلوا علية ياخذون من خاطري

انتبهت لخالة تسألني
ام قاسم.. خالة هدى نقالج ليش مغلق
قاسم حرك النقال علية يكلي شبي نقالها مغلق

.. خالة. الباغحة (البارحة) بالليل بطاغيته (بطاريته)كلش تعبت
اشحنها وبسغعة (بسرعة) تفقد شحنها وينطفي النقال من وحده

اباوع عليها شالت نقالها وحجت وية قاسم وكلتله
وسدته

هالة .. اكول يا حلوة شنو سالفة قاسموف
كل شوية داز امي لو وحدة من خواتي للفاتحة عبالك عنده جنود
.. يعني يقوم بالواجب تعغفين (تعرفين) اخوج بالاصول محد يلحكه

سدت النقال من قاسم وكامت تحجي
ام قاسم.. هذا الولد. راح يخبلني
من ورة اعصابه على ابسط شي
كب بوجهنا مثل النار

هالة همست .. معصب لان اكو ناس ضاربينه بلوك
وما يقلدونه
لو تشوفينه عبالك ثور هائج مضيع بقرته

حجيت بغيض
.. على شنو معصب لا يكون الست فهاوة ضاغبته بوغي (ضاربته بوري.)

.. لج عوبة منو جاب طاري الصخلة التايهة
اني قصدي عليج انتي
الظاهر اخوي ديمر بمرحلة اكتشاف الذات
المفاجيء.
انتبهت عليه اول ميدخل للبيت عيونه تظل تدور بالوجوه
بعدين كبل يسأل اكول حجية
هدى مكالت شوكت ناوية ترجع

احلى شي نبع الحنان. مسوية روحها من اهل الله
وكلشي مفاهمة عليه
تجاوبه .. والله يايمة شلون ترجع وتعوف خواتها
بحاجتها هسة متكلي انت شبيك حارك الدنيا
خليها براحتها هي شوكت ما يعجبها ترجع للبيت ترجع

اباوع عليه ظل يحوم واخير شي كال
.. شوفي حجية اليوم من ترحين للفاتحة
تكليلها تحضر نفسها حتى ترجع وياكم
اشو الفاتحة وخلصت اليوم ثالث
بعد شعندها باقية

هالة تحجي عن قاسم واني كلبي ضيع نبضاته
جذابة اذا كلت ما مشتاقتله
اصلا كلبي طاك من اللهفة على شوفته
اخر مرة كنت وياه بغرفتنا من شافني ابجي على خبر وفاة سليمة الله يرحمها

بعدها لمني بحضنه وباسني من راسي حتى يطيب خاطري ويواسيني.
ساعات الحزن والفرح تقربنا من احبابنا
وتجمعنا بيهم حتى نتقاسم لحظات الحزن

باوعت اجوي جاراتنا سلموا ودخلوا كعدوا
كمت من مكاني حتى اروح انطي خبر لمريم
تصبلهم جاي بس كمت احس الدنيا افترت بية
واذني صارت بيها صوت وشة

ام قاسم.. خالة شبي وجهج اشو صاير اصفر مبهوت
شيماء جاوبتها .. والله يا خالة كولشي مداتاكل
تعبتني شكلها راح توكع مريضة

ام قاسم .. والله ياخالة هي حتى ببيتنا انتبهت عليها متاكل. ودايخة
وجهة صاير اصفر

صفنت ام قاسم وبعدها حجت بمفاجئة
.. ياااااااا عيني
هاي شلون فاتتني بس لا البنية خطية حامل ومتدري

بروحها اي هي مبين عليها علامات الحمل
وتضوج من الاكل ووجها صاير اصفر ومالها خلك وصايرة تضوج من قاسم
حتى ما تقترب عليه مو مثل قبل
جانت ابد ما تبتعد عنه بس
شكلها كامت تلعب نفسها من زوجها
شوف شلون هاي كلها واني ابد ما ربطت براسي
سودة علية خالة شلون ذبلانة. من الحمل

عزة خالة ام قاسم تحجي وتحلل وتفسر بكيفها
واني وهالة نباوع عليها مصدومات من كلامها

هالة .. اكوول هدى كومي فلتي بروحج العزيزة
لان احتمال اذا طولتي يم امي شوية
راح تكعد تحسبلج حتى تعرف جنس الجنين ولد لو بنية

.. خغب (خرب) هاي شنو امج والله خطيغة سغيعة (خطيرة سريعة ) الاشتعال
وبسغعة (بسرعة) تتفاعل
.. ها لعد شحسبالج هاي ام قاسم
ما يفوتها شي ابد ما تضيع وقت

كمت من يمهم ورحت
دخلت للمطبخ لكيت ضحى دتصب جاي بالصينية

.. ضحى اجوي جاغاتنا. (جاراتنا)
.. هاج خلصت صب الجاي تعاي اخذي الصينية
وقدميلهم
خلي اروح اكمل لف التمر واللبن حتى نلحك نوزعه

اقتربت عليها. اخذت الصينية بس شلتها بين ايدية
اهتزت الاستكاين
احس ماعندي قوة

ضحى .. بالله شو عوفي الصينية لانوب تكلبيها
على راس النسوان
وين مريم خلي تجي تقدملهم

باوعت منا منا هسة اشوفها وين طلعت من المطبخ جانوا النسوان كاعدات بالحوش
ادور على مريم ماكو مختفية شنو السالفة وين راحت

اشرت لهالة اجتي يمي وكلتلها تروح تاخذ الصينية وتقدم للنسوان هي دخلت للمطبخ

واني رحت ادور على مريم دخلت للغرفة رحت بالحمام ماكو اباوع عالنسوان مابينهم مريم
حتى البيت مو جبير وتضيع بي

جانوا كم طفلة من بنات جوارينا المنتشرات بالبيت ماخذات راحتهم سالتهم عن مكان مريم
وحدة كالت خالة شفتها قبل شوية. دتصعد الفراشات
فوك بالسطح

رحت صعدت فوك لكيت باب السطح مفتوح
طلعت اباوع لكيت مريم واكفة بزواية ووجهة مخطوف من الخوف وجنان. لازمتها من شعرها

احس الدنيا غيمت بعيوني ورحت هديت عليها
وصلت لاذني كلمتين.
مصيرج ترجعيلي مثل الكلبة

ما انطيت مجال كبل سحبتها من دشداشتها وبكل قوتي المتبقية ودفعتها بالكاع
سبحان الله الغضب يولد طاقة
يستمدها حتى لو كنت بقايا رماد

عطت بيها بصوت
.. لج انتي شتسوين جاية هنا
المفرض هسة انتي مكانج
بمستشفى المجانين. ويحجزون عليج.
لان انتي خطغ (خطر) على حياة الناس

جنان.. شنو قصدج اني مخبلة بسيطة يا كلبة
اذا ما خليت عمج امجد يشوف شغله وياج ما اكون جنان اكيد انتي الي شجعتيها. وغيرتيها علينا

سمعت صوت شيماء وسألتنا شكو المن هذا الصياح
ومنا النسوان جوة تسمعكم.

جانت تحجي وباوعت لمريم قطعة كلامها وشهكت
وركضت عليها

اباوع على سبب شهكتها
جانت مريم كاعدة مكرفصة على نفسها بزواية السطح
انتبهت عليها صاكة على اسنانها ودترجف
وهدومها كلهم مبلولة من جوة

وكع كلبي من الخوف عليها
يعني معقولة مريم واصلة لهاي الدرجة من الخوف
والارهاب من جنان

شيماء كومتها من مكانها وعاطت بجنان
.. احجي شسويتي بأختي
الله لا يوفقج

جنان.. لاتخافين على اختج مجرمة
ومكانها لازم بسجن الاصلاحية.
وخاف كدرتوا تسكتون امجد وتخلونه يتنازل عن حقي فاني مستحيل اسكت مثله
راح اخلي اخوية يروح وياي للشرطة
واقدم عليها دعوة. عندي تقارير وشهود تثب
اختج اتهجمت علية وطعنتني

مريم صرخت ودفنت راسها بحضن جنان
.. لالااااالا عفية شيماء ما اريد ادخل للسجن

شيماء لمتها لحضنها وحجت وية جنان
.. انتي روحي قدمي بلاغج للشرطة
واحنا نقدم بلاغنا للشرطة. ونشوف منو بينا الي
راح ينسجن
مثل ما انتي عندج تقرير وشهود
يدخل اختي للسجن

احنا هماتين عندنا مو تقرير واحد لا تقارير
بس نسلمها للشرطة كبل
يدخلونج لمستشفى المجانين

اباوع لجنان ارتدت للخلف
مفزوعة
.. محد راح يصدكج اني ما بية شي

.. الله يرحم حبوب المهدئات الي ما توكع منج
ابسط تحليل للدم راح يثبت صحة كلامي
انصحج لا تجربين حظج
انتي الي راح تتأذين

اخذت مريم ونزلتها جوة للحمام
باوعت لجنان وانطيتها نظرة حقد اتمنيت
كون ماعدنا ناس جان اكلتها بسنوني

صار الليل والفاتحة عزلت وخالة ام قاسم وهالة راحوا
وامجد واثير اجوي دخلوا للبيت
وامجد جان كالب الخلقة

باوع لجنان وكللها
.. يالله كومي تحركي خلي نطلع لان لو ابقى دقيقة
وحدة اسوي مصيبة

اثير.. شكو شبيك شصاير ليش تحجي هشكل
امجد.. اسأل بناتك صرت ما اامن على نفسي
يمهن وحدة. تذبح والثانية عندها عصابة
وكل شوية مهددتنا بيهم
وهاي
جان يأشر على شيماء
.. كلة من جوة لجوة تشتغل
والله اليعلم شنو الي مسويته وخالة الرياجيل
تفزعلها بأشارة منها

ظلينا مصدومات على كلام امجد

اثير.. امجد شنو شبيك اتخبلت شنو مناسبة هذا الحجي
البنات شنو سوولك حتى تحجي هشكل عليهم

خاب امدا حظي اغم روحي احسن هي هاي الي الله قدرك عليها.
عايز بس ياخذ امجد بالاحضان
اااخ يمة راسي والله موتني

شيماء دارت علينا وكالت
.. الكلام ضايع وياهم يالله بنات امشوا خلي نطلع وصل السايق بالباب

مجاوبتهم ولا حتى وجهتلهم كلام عبالك همة ما الهم وجود

اباوع لمريم لازمة. ايد شيماء وتباوع بخوف على امجد وجنان
بحيث شيماء من كالت امشوا خلي نطلع ركضت كدامنا للباب
يا الله خوفها يكسر الكلب

طلعنا للباب
ودك نقال شيماء
ردت عالمتصل شوية وباوعت علية وكالت
.. هذا قاسم يكول انا بالباب منتظر
بلا زحمة كولي لهدى خلي تطلعلي

احس بكلبي كام يخفق وضاعت علية السالفة
يخفق من الشوك مدري يخفق من الضعف والتعب
باوعت للبنات وسلمت عليهم

فتحت الباب وطلعت ولكيته واكف يم الباب مدنك راسه
بس طلعت رفع راسه واقترب مني وعيونه
نار
سلم عالبنات ورحنا
بالسيارة باوع علية بغضب
.. انتي شنو سالفتج
يعني الي يريد. يحجي وياج. ميكدر يوصلج الا بالشافعات

باوعت عليه احس راسي يريد ينفجر والالم نزل على عيوني
يعني كلش مو وكته اني هسة بحاجة
واحد ينطيني علاج مسكن للصداع
واشرب شي يسكن معدتي وهاي هي كلشي ما اريد بعدها

حجة بغضب
.. انا ويامن احجي ليش متردين
.. قاسم نقالي عطلان وخالة كلتلك.
عفية كافي لا تصيح غاسي غاح ينفجغ (راسي راح ينفجر )

رجعت راسي ليورة وهو
كمل كلامه
.. هذا الصداع حجة جديدة حتى تتجنبين تحجين وياية
مثل كل مرة تحاولين تتهربين من قاسم

هو يحجي واني راسي كام ينبض من الالم والسياقة كانت سريعة
حسيت معدتي كامت تكلب

.. انا مو كلت ترجعين وية امي وهالة ليش ما
رجعتي للبيت وياهم. لو هي مسألة عناد

حضنت نفسي وهمست بالكوة
.. موقصة عناد بس صاغ ظغف (صار ظرف ) اقوى مني خلاني
ابقى يم خواتي

عركت كصتي وثقل النفس على صدري
حسيت عالسيارة اتوقفت باوعت وصلنا للبيت
نزل قاسم ودار حول السيارة
فتحت الباب ونزلت منها عالسريع
رجلية جانت خيوط ومعدتي كلبت
وصلت لنقطة الصفر

كعدت عالرصيف وصرت اتقيء
وقاسم انخبص واتصل على خالتي
كلشي ما افتهمت منه بس يصيح

جنت ملتهية بالفشلة مالتي
على الاساس اني عايزة احراجات وية قاسم
وكملتها

اباوع عليه كعد يمي عالرصيف فتح الشال
بس بقى على راسي
وصار يمسح على ظهري بكف ايده وهو يحجي

.. كومي خلي اخذج للمستشفى وجهج. صار اصفر
ماعت روحج

طلعت خالتي وهي وهالة
والتهوا بية

ام قاسم.. يا عيني والله اليوم اول مشفتج شكلج ماعجبني

.. حجية خلي ناخذها للمستشفى
ام قاسم .. لتخاف يمة قاسم هاي مرتك حامل
ودتتوحم
بس خلي ناخذها للمستشفى حتى نتطمن عليها

اباوع لقاسم همس من بين اسنانه وكومني من على الرصيف وكال

.. ما اعرف الحجية شتحس
كل شوية مطلعتلي اشاعة مثل الفنانين

فتح باب السيارة. وصعدت
ام قاسم .. بس انتظروني
البس عباتي

.. لاحجية ابقي ميحتاج هاي هنا المستشفى

شغل السيارة
واخذني للمستشفى تصير
قريبة على بيتهم

جان اكو دكتور مقيم موجود وصار يسألني وجيك الضغط
جان ضغطي هابط وكال لقاسم
.. خليها تاكل موالح حتى تعادل الضغط

وقاس الحرارة جانت مرتفعة
بعدها طلب مني اسوي مجموعة تحاليل
وجان الوقت ليل والمختبر ماكو معزل

قاسم همس يمي وكال
.. اكول هادي شنو رأيك اكله يكتبلك
تحليل حمل فد مرة بطريقه

شهكت وخزرته ودرت وجهي عنه
تصرفات قاسم غريبة حيرتني

بعدها الدكتور كتبلي وصفة
اخذها قاسم. وساعدني حتى اكوم
ورجعنا للبيت

لكينا ام قاسم
منتظرتنا بالباب
.. ها بشروا شلونها

.. طلع عندها هبوط بالضغط وحرارتها مرتفعها شكلها
بداية فلاونزة

ام قاسم حجت بصوت خذلان
.. صدك يعني بس هيج كللكم الدكتور

رفع حاجبه وكال .. يعني شنو تردين يصير بيها جلطة

ابتسمت على خباثة قاسم وية امه
جان يعرف بقصد امه بس غلس عليها

صعدني فوك للغرفة
واول ما دخلت كال

.. اااااخ ياهادي طلعت ما بيك خير زايع روح بس السان وراس يابس
طلعت روحك ترفة وبسرعة تسنح

احس حرارتي ارتفعت لخدودي من ورة كلامه
مدري صخنت
رحت اطلع الي ملابس

سمعته .. والله ياهادي مكانك فارغ
الك وحشة

استغفر الله هو اني المصخنة لو هو
اشو ديحجي كلام غريب

طلعت ثوب قصير وسديت الكنتور ودرت وجهي
واجيت اندعم بصدره

عزة هذا شوكت وكف وراي
رفعت راسي وعيوني اجتي بعيونه جانت عيونه بيهم شي غريب
رفع ايده واتلمس خدي بظهر كفه

.. خدودج حمارهم يجيب التايه

لالا لا كلش هواي علية
والله قلبي الصغير لا يتحمل

غمضت عيوني وميلت راسي على كف ايده
يالله على الاقل اني مريضة وعذري وياي
الا هو شنو عذره من يسوي وياي هالحركات

.. مشتاااااااك للغوغة
هادي امانة سمعني صوتك خليني انطرب
.. لا ما اغيد. ( اريد) شنو اطغبك (اطربك)

كام يضحك من كل كلبه على كلامي ..
.. واخيرا .. ديري بالج تفكرين
تباتين يم خواتج

اندك الباب ابتعد وراح يفتح الباب جانت هالة
شايلة بيدها صينية العشا

دار وجهه علية وكال انا نازل
طلع وهالة تباوع علية وعلى قاسم
وسألتني بفضول العجايز
.. شنووووووو جنتو تسوووون

.. عوبة هو من وغاج (وراج)
كلشي ما لحكنا نسوي
هسة انتي وكتج اجيتي قطعتي علينا اللحظة
عوبة. قطع الاعناق ولا قطع الاغزاق (الارزاق)

هالة .. خاب شوف هاي مصدكة روحها
هو لوما ام قاسم ساحلتني بالرزايل
علمود اصعدلج صينية العشا جان ما اجيت

اتلمست راسي
.. اااااخ يايمة راسي
بدلت ملابسي وكعت يم هالة
باوعت للصينية الاكل جان بيها
لحم شوي وشوربة عدس وزلاطة
فتوش.

حسيت بالجوع بس شفت الاكل وانفتحت شهيتي
نزلت على الاكل فرد نزلة
هو اني لو جوعانة لو شوفة قاسم سوتلي واهس للاكل

جنت اكل وهالة
تسألني عن الصار فوك السطح
جان الفضول يقرة عندها الف

سولفتلها على مريم والصار بيها
وشنو سوتلها جنان
هالة.. ياعيني والله كسرت كلبي
خطية خلي ست هديل تجي تسمع
الظلم والقهر

حتى تبطل تكول. اني مظلومة
قاسم اخوي خانكني هو وامي ميقبلون
اطلع وية. صديقاتي للمول
خلي تشوف حياة. مريم الي بنفس عمرها
حتى تعرف شنو معنا كلمة حياتي صعبة

.. خلي تحمد غبها وتشكغه.(ربها وتشكره) عندها واحد مثل قاسم مسؤول عنه
ويحميها. وموفغ (موفر)الها الامان. بعد شتغيد (شتريد)

.. اي والله صدك خطية قسومي اخوية هو بالذات
هواي يخاف وحريص علينا لذلك تشوفينه صعب
ومتشدد مرات ويانا علمود. مصلحتنا
بس هديل بعدها صغيرة متقدر هاي النعمة

غمضت عيوني

.. اي صدك هالة
اشو اخوج شوكت ما اجيه يصيح انا اكغه (اكره)شي اسمه
المسؤولية والالتزام

زين اني اشوفه مسؤول عن امه وعنكم وحتى مغات (مرات)
يوكف لخواتي
بالعكس اشوف المسؤولية لايكة عليه عبالك ثوب ومفصل عليه ما شفته يوم خذل وحدة بيكم.

هالة.. اخوي كال انا اكره المسؤلية والالتزام
بس مو معناها هو ميكدر يشيل حمل مسؤلية والتزام
بالعكس هو كلش حريص بهيج امور.

يعني بأختصار سالفة قاسم
مثل الواحد يكره درس الرياضيات
بس هو دائماً ياخذ بيها درجات عالية
اذا كره الدرس مو معناها هو ضعيف بي

لزمت راسي وصرت امسد عليه
.. اممممم عجيب امرغ (امر)اخوج
يعني اشوف الرجال يتفاخغ (يتفاخر) من يتولى المسؤلية
هو بالعكس

هالة .. تكدرين تكولين هاي عقدة نفسية صارت بقاسم من ورة بابا اله يرحمهً. وشحن عمامي وكلامهم
براس بابا جانوا دائما يتهمون قاسم بالاهمال
وفاشل وما ينفع لاي شي

ودائما اسمع عمو محمد يكول لبابا. اتزوج وخلفلك
ولد ثاني ترة هذا ابنك ما براسه خير
مو حمل مسؤلية وراح يفشلك كدام العالم

هذا الحجي مجرد قاسم طلب من بابا. اني ينضم لفريق
كرة قدم للناشئين. جان حلمه هو جان بمرحله
المراهقة وبعدها. بدة بابا يزيد بالضغط على قاسم
وصار يحاسبه على كل جبيرة وصغيرة.
من ورة كلام عمامي بابا صار يتصرف
بخوف ان ابنه ما راح يفلح بإي شي بحياته
مرة من المرات اتعارك وية قاسم وكله

انا شايل هم لامك وخواتك منو الهم من اغمض عيني واموت منو يشيل مسؤليتهم من بعدي
جان قاسم من يسمع هذا الحجي يتعارك وية بابا
ويطلع من البيت وصارت هذا الكلام يتكرر
كلما بابا يتعارك وية قاسم

لحدما قاسم صار يكره شي اسمه مسؤلية
والتزام ومن اتوفى بابا وقاسم جان. مسافر
من رجع وعرف بالي صار ببابا وشلون هد على
عمامي وهو لوحده.

وصار يلوم بنفسه اتذكر بيومها صار يعيد كلام
بابا اكثر من مرة
ان هو خذل بابا وماكدر يوكف وياه من جان بحاجته

ويكول المفروض جان لازم ابقى ادافع عن نفسي واثبت لابوي ان اتهامه بحقي باطل.
واطلع حقه من عيونهم لان جنت اعرف همة
ورة كسر الشركة

بس مع الاسف قاسم جان اعمى من الغضب
وعاند نفسه واهلي وتركهم وسافر
حتى. يشتغل ويثبت لنفسه ولبابا ان هو
مسؤل عن نفسه

وفعلا قاسم بدة يشتغل على مشروع صغير
وية صديقه
بعدها صار الي صار
لحد هذا يومج غصة فقد بابا.
موجودة بكلب قاسم مثل الجمرة
متشوفين قاسم. حاد اسنونه عليهم
والله العالم شنو ضاملهم لبيت عمي منير
وخطية امي الي واكعة بيها
متريد المشاكل
خلصت العشا وهالة نزلت الصينية
واني رحت فرشتلي
بالكاع وحطيت راسي عالمخدة ونمت
حتى ما كدرت انتظرت قاسم
لان جنت كلش تعبانة ومريضة
احس جسمي من الصخونة
صار يطفوا عبالك راكبة بسفينة.

جانت نومتي كلش قلقة
بعدها حسيت السفينة استقرت وجسمي سكن
وغطيت بسابع نومة

يوم ثاني
بديت شوية اصحصح
فتح عيوني وجان يصير كدام وجهي
صقر قاسم

شمرت الغطا وكعدت مفزوعة
صقر قاسم شيسوي يمي او. بالاحرى
الصقر وصاحب الصقر شيسون يمي

اوكفو لحظة باوعت على مكاني التفتت منا ومنا
عززة بعيني انا نايمة عالسرير
معقولة اني لهاي الدرجة انضرب عقلي
وكمت من فراشي وصعدت نمت يم قاسم

لالالا حالتي صارت خطرة
ما ينسكت عليها. يمة هذا عقلي الباطني
صاير ينطي ايعازات بكيفه
يمة والله بعد منا ورايح اذا انام. اربط روحي برجل
السرير خاف اروح مرة اللخ. اشمر روحي عالولد

افترسه والله كلشي يصير الدنيا ما تتأمن وخصوصاً
افكار عقلي الباطني جداً منحرفة بخصوصه
يبووووووو الله يلعنك يالشيطان
ا

اتحركت على كيف اريد اكوم من السرير
وهو حس علية وبسرعة دار علية وعيونه كوة يفتحهم
من النعاس
.. ها شلون صرتي

بلعت ريكي احس بروحي مزنوكة ياربي
شحجي وشنو اكول شلون صعدت يمه
ترة والله زحمة كل مرة
يكعد الصبح يلكاني بفراشه هسة شيكول علية ماعندها
كرامة وذابة. روحها علية

ابتسمت .. لا صرت زينة الحمدلله. بس البارحة
الله لا يراويك شصار بية. حسيت بعظامي متكسرة تكسر ورحت للحمام وكمت كلي ارجف
بحيث اريد اوصل لفراشي انام بي ما كدرت صار علية
المسافة كلش بعيدة. فصار السرير اقرب شي
علية. كبل شمرت روحي عليه ونمت

جنت احجي واني اهني نفسي على الحجة المعقولة
على الاقل انقذ ما تبقى من ماء وجهي

اباوع لقاسم
مد ايده على كصتي يتحسسها حرارتي
وكال .. خاب هاااادي شبيك
ترة البارحة انا الشلتك وحطيتك عالسرير
انت جنت بس تهلوس من الصخونة ما تدري بالدنيا
طشت لو رشت وانا صرت ماما الحنونة. وكعدت اسوي كمادات خفت لاترجع تصخن. حطيتك يمي
عالسرير

يبووووووووووو تعالو دوروا وياي وجهي
الي ضااااااع واصبح اشتاتا من ورة الفشلة
خرب حظي

درت وجهي ونزلت من السرير ودخلت للحمام
بسرعة مثل المكروصة
ما اريد اراويه وجهي. عمة حتى عمة
طبعاً همة كالوا حبل الجذب قصير
بس ما اتوقعته لهاي الدرجة قصير
يعني شدعوة عليه هشكل قصير

نزلت يم خالتي ولكيت قاسم ماخذ ملابسه وسابح بالحمام الجوة وطالع للشغل

شافتني ام قاسم وكامت تسألني عن صحتي
لكيت هالة كاعدة تدردم لان مكعدينا من وكت اباوع للساعة جانت بال١٠ونص.

ام قاسم.. اتريكي لا تعوفين نفسج بالاكل
اكلت وهالة تباوع علية وتحجي
.. بس اريد اعرف حنانج هذا وين
يكون من تجين تكعديني من النوم
تحسسني عبالك اني مو بتكم

كامت ام قاسم من الميز وكالت
.. اتركي بلا حجي محد كلج روحي نامي وعوفي
السنك مملي صحون ممغسولة

.. اني شلي غرض هو استاذ هشام الطحش
مسوي لروحه اكل بنص الليل.
.. هو انتي لو مثل البنات ومسوية لاخوج عشا
جان ما هوس المطبخ حتى يسويله لكمة

خلي مرة ثانية اسمع
ام قاسم راحت وعافت وراها هالة تدردم
.. بسيطة انا الك يا هشام شوف بعد منو يجيبلك معلومات عن حبيبت الكلب

لا واني الفطيرة البارحة كله كاعدة متحملة
البقرة. هدى تغوغي علية. علمود اسحب منها الكلام
والاخبار عن اليح .....
قطعت كلامها وكالت
.. استغفرالله ياربي خليني ساكتة احسنلي ما اريد احجي

.. عمة حتى عمة هسة اني شنو افتهمت منج
علي صوتج شوية

باوعت علية وشكلها ستوها انتبهت على زلة السانها
.. حبيبتي رجعي نامي مو يمج اني داحجي وية حظي
اكله شبيك تمشي اعوج

كمت من يمها واني ابوس ايدي واحطها على كصتي
.. خلي اكوم من يمج احسنلي. اخاف تعديني
خبالاتج الله لا يبلينة

الساعة بالثمانية. بالليل
اتصلت علية مروة حتى تأكد وياي موعد
جلسة الليزر الثانية للوحمة.

جنت فوك بغرفتي كاعدة احط مكيك اب
علمود نفسيتي زفت من الفلاونزة

اليوم ما شفت قاسم ماكو
حتى عالغدة ما اجة
سمعت صوت الجرس اندك يمكن قاسم وصل رحت بسرعة
لبست دشدادة سبورت كيوت بيها ارنوب بالنص
وجيوب جان لونها رصاصي ووردي فاتح
حظرت شالي

ونزلت ودخلت بالهول وجان اشوف عمهم كاظم وزوجته سعاد
وصفاء ابنه سلمت عليهم
وردوا علية من ورة خشمهم

رحت كعدت يم خالتي. ودخلت هالة بيدها صينية التقديم
قدمتلهم واجتي كعدت بصفي

اباوع على وجوهم. جانت مدخنة من الغضب وشكلهم
يكول يا شر اشتر
انتبهت لنظرات صفاء من دخلت لحد ما كعدت
يباوع علية نظراته مو مريحة

حجيت وية هالة
.. عمة حتى عمة هذا شبي يباوع علية

.. عوفج منه هذا استاذ. صرصار دومه هيج ماعنده
كونترول على عيونه.
ان غاب القط العب يافار والله لو قاسم هنا يحلم يرفع عيونه

جان الجو مشحون الي افتهمته جايين على نفس الموضوع
وعمهم كاظم مستغل غياب قاسم وهشام وجاي
يريد يحجي وية خالة
علمود موضوع هشام خاطبله بنت منيرة
ويريده يوافق ويرجع للبيت
ويروح وياهم. يتممون الخطوبة

وكمزنا من اني وهالة
على صوت نترة عمهم كاظم بخالة
ام قاسم

وكال .. انتي كلة منج خربتي الولد علية
شوفي وسمعيني زين تحجين وية هشام
وتقنعينه يرجع لبيتي

ام قاسم. حجة وياه بكل وقار
.. زين بس اريد افتهم انت ليش هيج راكب راسك
ورافض هشام يعيش هنا. يمنا
ترة هذا هم بيت عمه يعني مثل بيته الثاني

كاظم.. ما اريد ابني يعيش يمج وانت وقاسم ابنج
ابو الملاهي ما يشرفني اسمع بأبني صاير خدام صغير
جوة ايد قاسم

مو عبالج انا ما يوصلني الحجي
ترة خيرة قاسم وشغله ما ينجح لوما. وكفة هشام وياه
وصلني الحجي كله ان هشام ابني داخل شراكة
وية قاسم

بس انتي وابنج ملتفين عليه ولاغفين فلوسه
بحجة انت ابنا

اباوع لام قاسم غمضت عيونها بصبر
.. زين احلفك بالله ماسألت نفسك هشام منين جاب فلوس
ودخل بيهم شراكة وية قاسم
.. هشام ابني مهندس وشاغول اكيد جان مجمعله كم فلس جوة ايده مو مثل ابنج ما اعرف منين مصدر فلوسه. مو بعيد تكون فلوس حرام

اباوع لام قاسم كامت على حيلها بغضب
.. كاظم لهنا وحدك بيتي يتعذرك

هو كام من مكانه وكامت سعاد تلعلع
كاظم بغضب بصوت عالي
.. لج انتي تطرديني من بيت اخووي
الظاهر نسيتي انا منو وشنو اكدر اسوي

.. لا ما ناسية بس شكلك انت نسيت نفسك
ونسيت انا منو. واخواني منو وشنو يكدرون يسوون
للي يدوسلي على طرف
يحركون بيته على راسه

ما اهددك بأبني قاسم لان منك وبيك صعبة اخليه
يهد عليك والا هو ما قاصر يتمنى بس اشارة مني
وداعتك كوة لازمته عنكم

كام من مكانه رهد وكف بوجه ام قاسم
وظل يسربت بكلام يفور الدم اتمنيت اني ولد
والله جان نعل ابو طاهره
وصار الصياح وكبت العيطة حجاية من هذا وحجاية من ذاك

اباوع لهالة واكفة على صفحة تفرك بيدها
وهديل تباوع لامها خايفة بس بقت واكفة بعيد عنهم

واني سحبت نفسي ورحت على نقال خالة ام قاسم
جان عالشحن بالمطبخ
واتصلت على قاسم
واني اتلفت منا ومنا
جاوبني .. حجيت وياه بصوت ناصي خاف احد يسمعني
.. قاسم عفية تعال للبيت بسرعة انت وهشام هذا عمك كاظم هنا
ما انطاني مجال اكمل مجرد ما سمع
بعمه كاظم عندنا بالبيت كبل
كلي انا اصلا جاي بالطريق

سديت النقال وعلة الصياح رحت ركض ودخلت
عليهم. رحت وكفت يم هالة

انتبهت على سعاد كذلتها نصها طالعة من الشال
والاصابع متعوب عليها بس مبينات تركيب
الي يشوفها يكول عبالك لعابة باربي

بس هي عبارة عن مستنقع لعمليات تجميل
عبالك فأر تجارب ما مبقية شي ممسويته
بوجهة. ونوب هي منا طريلة ولابسة الكعب العالي صايرة جنها سارية علم

والذهب يلالي بيدها يعني تعالوا شوفوا اني طاكة
اباوع لكاظم يباوع عليها مثل المسطول

صفاء عض ايده وكال
.. ااااخ اتمنيتج زلمة. جان والله خليتج تبلعين
كلامج وية ابوي

بلعت ريكي وهالة تفرك بيدها

انتبهت لسعودة
اشو هاي راحت سحبت صفاء بعدته من كدام
ام قاسم وكالت

..بالله شو وخر منا
صارلك ساعة واكف بس تكمز
وهاي العجوز ام السحورة مستغلة الوضع
وتسربت وتحجي بكيفها

هاي عوفوها علية. اني مرية وهي مرية

اقتربت على ام قاسم
وكالت.. لج شلون تتجرئين وتحجين ويانا هشكل وتطردنا

ام قاسم .. انا ما احجي وحدة منحطة مثلج
كلامي مو وياج لا تدخلين نفسج بشي ما يخصج

اني اسمع كلام سعاد واني من يمي افور
اتمنى تحجي كون الله يوليني عليها يمة يمة

باوعت لهالة وحجيت
.. لج عوبة شوفيها دتتجاوز على امج
احجيلج شي يمة كون هاي امي ووحدة
مثل سعيدة تحجي وياها هشكل غير امسح بيها الكاع ذهاباً واياباً

هالة .. اكول هدى مو جني سمعت سعاد
تكول على امي عجوز ام السحورة

هزيت ايدي وباوعت عليها

.. اي كالت على امج عجوز ام السحورة
وبنتج هالة مثل نعامة. دافنة راسها جوة بالتراب

هالة جوابتني وهي تفرك بيدها وتباوع لسعاد
.. اشكد ما تستحي مو مؤدبة. هسة الله يذبها بالنار

.. خااااب من امدااااااني
مال هسة كون نعال اكطعه عليج انتي وسعاد سوية

انتبهت لام قاسم كامت تحجي وياهم وهي معصبة
.. كاظم اخذ مرتك وطلعها منا لان كامت تتجاوز
لاتخليني اصيح لحسنين يجي يطلعها منا

.. لج عجيز تطرديني ام السحورة لفيتي عقل الولد
بسحورتج روحي ربي ابنج ابو الملاهي وبعدين
روحي طالبي بهشام
لو انتي صدك مرة تعاي انتي طلعيني

جانت تحجي هيج تريد تستفز خالتي بكلامها

وما اشوف الا
ام قاسم ضربتها راشدي. كيوت. مال وحدة. نازكة
.. انتي هواي تجاوزتي حدودج

هالة بصوت ناصي .. لا على بختج حجية ليش ضربتيها هسة يكوم علينا التنين المجنح
والله امي جانت خوش مرية. الله يرحمها

سعاد انضربت راشدي
وهي صارت جنها شيطان
هدت على خالتي تريد تمد ايدها عليها

عزززززة اني شفتها هدت على خالتي تريد تضربها
واني عيد وجابه العباس النة

شنفت ارداناتي ولفيت شالي عدل
استعداداً للعركة.
وهديت عليها

هالة حجت من وراي .. عززةةة كام علينا ساسوكي
الطائر الناري
اكول هدى وياج سليمنا على امي من تشوفيها بالجنة

سعاد مدت ايدها وخمطت خالتي من ثوبها
وجان اني اتعلك بيها من ورة من المدالية
والزمها من شالها
دارت علية متفاجئة بحركتي وياها
.. لج سعاد شلون تتجرئين وتمدين ايدج على خالتي
اليوم الا امسح بيج الكاع واراويج الامهات شتجيب

ام قاسم واكفة بمكانها وجهها صار اصفر
وهالة وهديل اجوي وكفو يمها يباوعون علينا

ام قاسم.. لج خالة هدى عوفيها هاي وحدة ادبسزز
هالة.. لا يمة خليها هدى راح تعلمها شلون تحترم

هنة يسولفن واني ملتهية داخلة بمعركة طاحنة
هي منا طويلة ولابسة كعب عالي
واني قصيرة. ما اكدر الوحها هي غسلتني غسل
بالكفخات

اسمع هالة تكلي
.. هدى .. هدى صعدي عالقنفة حتى تلوحيها زين
يلعن ابو شكلج ياهالة على هالدكة
طفرت عالقنفة واستلمتها اكس ومربع

وهاي سعاد بنت بليس عبالك ماخذة الحزام الاسود بالكاراتيه.
شبعتني طن رفس
والله راحت سمعتي الهداوية

اسمع العوبة هالة تحجي وية خالة
.. يمة .. يمة.. يبدوا انها مليوصة
خلي اتصل على قاسم يجي يلحك على
العكيد معتز باب الحارة قبل لا يفطسونه بالحلقة الاخيرة

ام قاسم .. صفاء وخر مرت ابوك عن جنتي
والله اذا صار على مرت قاسم شي
اخلي قاسم يحرك بيتكم على روسكم

كاظم اتوجه على مرته يريد يبعدها عني
.. سعودة. عفيها خليها تولي
بس سعودة وين ما تسمع لأحد كامت تزاكط جنها حصان

واني لازلت اجاهد ضربة تصيب وضربة تخيب
بس غير الصدك كلمة حق لازم تنكال
بحق سعاد طلعت خوش تمسح الكاع
واني اشهد على ذلك اسأل مجرب
بصفتي صرت وصلت المسح الي مسحت بيها الكاع يلعن ابو شكلها

اسمع هالة العوبة تهتف
.. هيهات منا الذلة. .هيهات منا الذلة
الموت ولا العار

اباوع عليها وانا جوة ايد سعاد تدمغ علية
.. لج ياعار. تعالي لحكيني انسحلت

يعني صدك اكلت تبن
واتورطت وفزعت لخالتي
.. يابة سعودة يمعودة يام الغيرة اتشاقة وياج
موصدك. احجي

بس وين سعاد وما ادراك ما سعاد
المراءة الحديدية متلحكها

كاظم.. سعاد كافي خلي نطلع مو هيج تنحل السالفة
هاي بدال ما تكحليها كمتي وعميتيها وخليتي الحق علينا
اتوقت سعاد فحطانة وانفاسها تتسارع من العرك

واني جنت امسح على خاصرتي متأذية شبعتني طن
بسط حشة مو ايد تكول عبالك طاوة

وهالة استغلت سهوة سعاد وية كاظم
اباوع عليها
راحت ركض وشالت من الكاع نعال تميمي مال رياجيل جان بالباب
.. اي يالله واخيرها اتحركت العوبة واخذتها الحمية على امها

اشو هاي اجتي بسرعة يمي وانطتني النعال بيدي
وكالت
.. هاج بسرعة اخذي لزمي هذا النعال وكطعي على راسها
واذا تحتاجين بعد. امدج بالسلاح بس كولي تلكيني
عند يمناج

اباوع عليها عبالك مسوية انجاز
.. هسة من اكطع النعال على راسج اكو واحد يكلي
ليش
هالة .. ليش
.. لا هيج بس اكول انتي متأكدة اخت قاسم الهرقل
.. لا اني بنت عم رهف المايعة

كاظم لازم سعاد من كوعها
.. اتحركي كدامي من الله يلعن بليسج
خربتي السالفة كلها

سحبها
صفاء .. خليها زين تسوي بيهم
جانوا يحجون ويمشون متوجهين على الباب يردون يطلعون

ام قاسم بغضب.. شوف كاظم قبل لا تطلع
وتاخذ مرتك. لاخر مرة احذرك
ديري بالك تندك باولادي. صدكني
وروح ابوقاسم. لاخليك بحلك اخوتي
وهمة يشوفون شغلهم وياك وانت تعرفهم كلش زين
ميحتاج اكلك شراح يسون

كاظم اول مرة بحياته يبلع لسانه وميجاوبها
راحوا طعلوا للباب الشارع
واني وهالة وهديل وخالة رحنا وراهم حتى نسد
الباب

همة طلعوا وجان نسمع صوت قاسم وهشام يحجون وياهم
ام قاسم ضربت على خدودها
.. يبوووو اجوي الولد

يتبع

احبكم كومة احبكم هواي
اختكم نهى🎄🎄🎄🎄🎄🎄