أساور الفضة الفصل السادس وخمسون 56 - بقلم نهى

مساء الخير عليكم احبتي

#اساور_الفضة_ج٢
#نهى_الحسون

تبحر السفينة والربان واقفُ بشموخ على متنها
راصداً بمنظاره مترقباً. لغدر امواج البحر
مستعدا . للقادم. الاتي
متأملاً ان يصل بسفينته الى مرسى الامان

شيماء
جنت كاعدة منتظرة مروة ترجع للبيت
الي هجرته صار بالنسبة الها مجرد محطة استراحة
مثل الفندق تاكل وتشرب وتروح تنام وبعدها تكعد من الصبح تبلش بدوامها وشغلها
وكأنما عازمة على ابأدة ومعاقبة. روحها

مرت من يمي ضحى جانت شايلة سلة الملابس
المغسولة
اباوع لضحى من دخلت لبيت مروة

اخذت دور ربة البيت وصارت تدير امور البيت
بالرغم مروة عندها خدامة بس ضحى داخلة وياها منافسة وكل شوية متعاركة وياهة.

استلمت المطبخ والطبخ وصارت مسؤولة عن كل شي يخص مشمش من ملابس من تمشيط من تدريس
ومرات تساعد مريم بالتدريس

وصارت هي المسؤولة عن المسواك للبيت
كامت تاخذ السايق وتروح تتسوك

لاحظتها من ترجع من السوك. تكون كلش فرحانة
خصوصاً من تكعد تعزل وترتب الغراض
الي اشترتهم للبيت واول مترجع للبيت
تكعد تحجيلنا شنو سوت ومنو شافت وشلون حجت
وشلون عاملت على الاغراض وشلون سوولها تخفيضات عليهن
جانت تحجي والعيون تلمع بالحياة الي جانت مدفونة يم سيف

اباوع عليها عبالك طفل هستوة بدة يمشي
وممصدك يكتشف العالم من حوله

يحاول يركض ويسابق خطواته حتى لو ميعرف شلون يمشي بشكل صحيح

جانت كلش متحمسة ومتفائلة
وبمرور الايام كدرت تتعرف على كم وحدة من جارات مروة

كانت مفاجاءة بالنسبة الي
اكتشفت خصلة بضحى ما جنت اعرفها قبل
ان طبيعتها اجتماعية. مثل امي وهدى
وتكدر تتواصل وية الناس بسهولة

بس حرامات قمع سيف عدم شخصيتها ودفنها
بحيث جانت عايشة حياتها على الهامش

وحتى مروة تعجبت منها وكالتلها
.. ولج اني صارلي شكد هنا. وممختلطة بجيراني
حتى ما اعرف شنو اسمهم
وانتي مصارلج هواي من اجيتي
عرفتي بهاي الفترة البسيطه كل شي عنهم وحتى
جنتهم عرفتيها حامل قبل لا يعرف بيها زوجها
خرب يومج ضحى
تذكريني بفضول سليمة الله يرحمها ))

انتبهت على ضحى تحجي وياية

ضحى .. اكول شومة المصرف الي بالجزدان
مال هذا الشهر. زاد منه. ١٠٠الف
شنو رأيج ادخل بيها سلفة وية. ام رفاه

عقدت حواجبي واني مستغربة
.. منو هاي ام رفاه

ضحى.. شنو السالفة هاي المرية الي عندها
سوبر ماركت براس الشارع
بالصدفة من جنت اتسوك. سمعتها تحجي وية جارتنا ام سارة عن السلفة وهيج شي

واني انتبهت على شغلة ان المصرف الي دتخلوا
انتي ومروة للبيت ديزيد منه. مية
كلت احطه بسلفة ويفيدنا المبلغ

طبعا اني ومروة من اول يوم وافقت بي اعيش عندها
بالبيت اتفقت وياهة ان يكون مصرف البيت علينا بالنص اني وياها
بالرغم هي مانعت بس اني اصريت على هذا الشي

رفعت راسي وانتبهت لضحى دتخيط بتنورة مشمش المفتوكة.
خطية ضحى متكعد وايديهة فارغة
احس هي دتسوي هيج وكأنما تريد تساهم ويانة
بحمل المسؤولية بس بطريقتها الخاصة

ضحى.. ها شنو كلتي اشترك لو لا
.. براحتج الي تشوفي صح سوي
لان انتي المسؤولة عن تقسيم مصرف البيت

ضحكت مترددة.. هذا هو من باجر اروح وانطي خبر لام رفاه ام الاسواق
واكللها تسجل اسمنا بالسلفة
رجعت تخيط وهي تحسب على راس الشهر

دك نقالي جان المتصل خالة ام فرزدق
سلمت عليها
.. هلا بيج خالة
.. بشريني خواتج شلونهم وضحاوي شلون صارت صحتها
.. الحمدلله البنات وضحاوي بخير والحمد لله
.. يارب دوم بخير

خالة شومة هذا الاربعاء. زواج صهيب
وانتي والبنات كلكم معزومات بالعرس راح نسوي
بقاعة اعراس ال........
امانة تجون

.. بالرفاه والبنين ربي يتمم عليكم
ان شاء الله نجي
سلمينا على خالة ام صهيب والبنات

سديت النقال
ضحى. بنظرات كلها لهفة تباوع لشيماء سألتها
.. هاي خالة ام فرزدق
.. اي هاي خالة اتصلت علية حتى تعزمنا
على عرس صهيب يوم الثلاثاء

اباوع لضحى اتوقفت ايدها من الخياط
وبلعت غصتها. وعيونها غركت بالدمع
دنكت راسها. ورجعت تكمل خياط
اباوع للدموع شلون كامت تنزل. كل دمعة جانت
تحجي الف غصة

.. ضحى حبيبتي لتب.......

وقطع حديثي وية ضحى
دخول مروة للبيت سلمت علينا
مثل كل مرة ودخلت لغرفتها وسدت الباب
ضحى كامت من مكانها وراحت دخلت للمطبخ
تحضرلها العشا لمروة كلنا نعرف مروة من النوع
تهمل نفسها بالاكل

رحت وراهة للغرفة ودكيت الباب
سمعت صوتها
.. ادخل
فتحت الباب ولكيتها مبدلة ملابسها
و لابسة بجامتها. ولابسة نضارتها الطبية
وكاعدة تكلب بفايل.

نزلت نضاراتها شوية على خشمها وكالت
.. نعم شيماء رايدة شي

عرفت هذا برودها جدار تبني حول نفسها حتى متبين ضعفها كدامنا

سديت الباب ورحت كعدت يمها عالسرير
وحجيت بكل هدوء
.. مروة سؤال ممكن اعرف اني شنو بالنسبة الج

مروة جاوبتني بستغراب.. اختي الجبيرة واقرب وحدة الي بالدنيا
شنو داعي لهذا السؤال
.. هسه اكولج شنو الداعي له
زين ما دام اني اختج الجبيرة واقرب وحدة الج ليش متشاركيني. همومج
ليش خالة كلبي عليج مثل النار
واني اشوفج شلون تتلوعين وتتالمين وحدج كدام عيوني
وما بيدي شي اسوي حتى اجنبج الالم

احجي وطلعي الي بكلبج لاتبقين كاتمة بكلبج
عاجبتج حياة بنتج مشمش. لو عاجبج شكلج
الاصفر الي بدة يوم عن يوم يذبل

جنت احجي ومروة صافنة بغير عالم. وماكو شي
يدل على سماعها لكلامي غير بس
عيونها الي لمعت بالدموع

دنكت راسها وباوعت لأيديها
وحجت بصوت ناصي

.. شيماء شنو ترديني احجيلج وهو ماكو شي
يستاهل احجي.

.. حتى لو ميستاهل ميخالف احجيلي اسمعج

.. شيماء اني من وعيت عالدينا وشفت امي
تجاهد على العيشة الصعبة. وابوي نايم براسها
اخذت عهد على نفسي وكلت
مستحيل اصير مثل امي. واخلي واحد مثل اثير
يعيش على حساب تعبي

وصرت اشق طريقي بالحياة واجاهد. واصارع
الزمن واتحدى الغربة واتلاوة. وية الحياة
حتى اعتمد على نفسي واوكف على رجلي

اتزوجت رافد واني كلي امل انه اني وياه
راح نحط ايد بأيد. ونبني حياتنا سوية

اني استلمت دفة العمل وبديت ابني حياتنا
التهيت اتقدم بشهادتي

وهو يهتم بمشمش لان عنده وقت فراغ اكثر مني
وشال اغلب مسؤليتها عني
ياخذها للمدرسة يحضر اجتماع اولياء الامور
يطلع يشتريلها ملابس
ياخذها ويجيبها من دوام الحضانه

جانت نيتي كلش صافية وياه
صحيح جنت بخيلة على نفسي وصحتي
لكن ابد. ما يوم بخلت عليهم. هو ومشمش والبيت
اكول همة عائلتي اني المن اتعب
اني ورافد واحد. ماكو فرق بيناتنا

مجنت متوقعة بعد كل هذا تعبي والي سويته علموده
يجي اليوم ورافد يخوني وية وحدة ثانية

ولا مو بس هيج يعتبر
انشغالي بعيادتي والمركز وبناء حياتنا
اهمال مني وتقصير بحقه
يعني طلعت اني السبب
الي دفعه يروح لحضن وحدة غيري

اعرف راح تكولين ليش مكبرة الموضوع
هو مو اول رجال ولا اخر رجال يخون مرته

بس خيانة عن خيانة تختلف
شيماء رافد خاني وية اعز واقرب صديقة عندي
فاتن جانت الي الاخت الخامسه الي ماجابتها امي

ياما مرينا بظرف بالغربة
وعدينا بأزمات جنا وحدة تسند الثانية وتكمل
الثانية من جانت متزوجة لحد ما اتطلكت كله
سوية

تعرفين شنو كاعد احس هسة
احس النار تاكل بروحي

اني اتعرضت لاقسى انواع الخيانة
لج اكتشفت رافد متزوج فاتن. بالسر
لا والادهى والامر من هذا كله
عرفت بالصدفة فاتن حامل من رافد . وصار عندها اسقاط.
طبعا عرفت من دكتورة صديقتي
بالصدفة شافتني وسالتني ليش معالجت فاتن وهي صديقتي
لان لو من الاول ملحكتلها مصار عدها اسقاط

هذا كله صاير من وراية واني الغبية
ما خطر على بالي واحد بالمية يطعنوني بظهري

جانت مروة تحجي وترجف من الالم
سودة علية شكد كاتمة بكلبها وساكتة
الله يساعد كلبها
اني مجرد. حب من طرف واحد ونظرات وهمية
لحيدر
وهم من عرفت بي خطب الدكتورة رفل
احس بكلبي اتكطع ومتت قهر.
لعد شحال هي هذا زوجها ابو بنتها
صدك صعبة

مروة مسحت دمعة خاينة نزلت على خدها

تالي بعد كل هذا التعب والعناء
وجان اوكع على غفلة بدون
ما احس بنفس غلطة امي
الي جنت احاول اتجنبها وابتعد عنها

.. شلون يعني ما افتهمت
.. حياتي تشبه حياة امي
بس الفرق بالمراكز
اني مثلها كضيت كل عمري اشقى واتعب
وزوجي ما يدري لا بحرها ولا ببردها
عليه بالجاهز .. كل شي حاضر من يريد
يعني اني اتعب وزوجي يعيش على حسابي
ولا فوكاها جازاني بالخيانة

جنت كاعدة يمها عالسرير
باوعت علية بضعف
وسحبت نفس عميق بتعب واتمددت وحطت راسها بحظني وكالت
.. تدرين شيماء شنو اتمنى

.. شنو ؟؟
.. اتمنى يرجع بية الزمن. واعيش حياتي
حالي حال اي بنية. اعيش حياتي واحب
وانحب وما افكر بمستقبلي.
اريد اتزوج رجال يحن علية ويحبني لنفسي
وهو الي يصرف علية

اريده كون حريص ويغار علية
اريد كون احس بضعفي من يحضني بين ايديه

هذا كله ما حسيت بي وية رافد
كان زواجنا. اني ورافد زواج عملي بارد
والله اذا اكلج مرات احس بروحي اني الرجال بهذا البيت
تكولين هاي تبالغ
والله شعور جدا صعب من
توصل المراءة لهاي المرحلة

.. لا مروة انتي قوية
انتي بنيتي نفسج من لاشيء
لتخلين خيانة رافد تكسرج وتحطم كل الي بنيتيه

هدى

بديت اتحرك بفراشي واتغمط براحتي ورمشت عيوني
وبديت استكشف مكاني
شهكت
وكعدت مخترعة هاي شنو للحظات جنت مستغربة مكاني عالسرير
بس ذاكرتي بسرعة بدت تسترجع احداث البارحة

ابتسمت بخجل ورجعت راسي عالمخدة والضحكة شاكة حلكي

اتحركت حتى اعدل ثوبي او بقايا الثوب
عززة هاي شنو صايرة فلم

عبالك سعاد رجعت مرة ثانية مسحت بية الكاع

اباوع عليه شلون نايم مثل الحمامة الوديعة
الي يشوف شكله وبرائته وهو نايم ميكول
هو نفسه قاسم المغوار البارحة بالليل

ابتسمت بحنان
يماااااي قسومي صار حلالي

اتحركت وانيت بألم

حسيت بأيد قاسم الخشنة حوطتني
ورجعتني لمكاني وصار ظهري ملاصق لصدره

همس بصوت نعسان
.. شنو موجوعة

جاوبته خجلانة... اممممم
.. اليوم ذكريني اخذج لأختج مروة للعيادة
تجيكج

يبوووووو تعالوا دوروني هذا ما عنده. ابريك
كبل يحجي بدون مقدمات

همست بصوت ناصي كوة ينسمع
.. اي ان شاء الله. هسة يالله كوم
هم يالله تغوح (تروح) للشغل

دارني عليه وباوع بعيوني وضحك بشيطنة
.. شنو شبيك هادي شنو نسيت انا البارحة عريس
واليوم صباحية عرسي

دفعته من صدره
.. هذا الحجي كوله لخالة من تجي تفلش عليك الباب حتى تكعدك
اتحركت حتى ابتعد
رجع لمني لحضنه مرة ثانية بكل سهولة
.. تعالي بعد وكت وين رايحة
خلي احجي وياج

لزمني من زندي وعطت بصوت موجوعة
نزل الغطا وباوع لزندي وشاف اثر ازرك
حجة متفاجيء.. هاي شنو منو مسوي بيج هيج
لا تكولين انا.

عبست وجهي
.. اااخ يمة جسمي كله مكسغ (مكسر) والله ضاعت علية السالفة
وما اعغف (مااعرف ) منو السوة بية هيج انت ما ادغي (ادري) سعاد
اشو انتوا اثنينكم الباغحة (البارحة ) جان عدكم واجب تفصيخ
واني الضحية الي وكعت بيدكم فصختوني

اباوع عليه يضحك
.. شكو ليش تضحك
.. تردين الصدك والله البارحة كسرتي خاطري
جنج كتكوت يرجف جوة ايدي من الخوف

والله عبالك عتوي لازمج وراح يفترسج

دنكت خجلانة وكوة لازمة حلكي من المستحة
.. كااااافي عاد والله استحي
.. خااااااب شوف منو يحجي على المستحة
بابا يعد انتي صرتي مرتي
واتعديتي هاي المرحلة
انا صرت سترج وغطاج

وعلى طاري الستر
هذا الثوب البارحة هواي ضايقني
.. شنو ليش شبي
جنت احجي واباوع على ثوبي الفانيلا

.. يعني كاتم علينا وحرمنا من شم الهوى
ما اوصيج اليوم لبسيلي شي
يخلينا نشوف رحمة الله

يبوووو هذا هواي علية والله
.. لا عفية قاسم على كيفك وياي وحدة وحدة
تغة (ترة) اني بعدني كتكوت صغيغ (صغير)
وهذا كلامك يخغب بغائتي ( يخرب برائتي )

سحبت نفسي بالكوة من بين ايديه
ورحت دخلت للحمام.
اسمعه يكول
.. والله اطلع عينج بس اصبريلي

دخلت سبحت وبعد فترة
طلعت من الحمام لكيته. راجع نايم
يبووو هذا شلون بي
.. لك قاسم اكعد
حجة وراسه جوة المخدة
.. جنية. عوفيني شوية انام والله تعبان
.. شبيك تعبان.

.. جنت اقوم بواجبي المقدس وحررت بلاد الاندلس
.. شعنده قاسم بن زياد

فز من مكانه وزمخ بية
.. ولج هاي عليمن تصنفين

.
خزرني وكام من السرير
عزززة كام علينا هرقل
واني كبل طكيتها ركضة وطلعت من الغرفة
انهزمت بروحي العزيزة

نزلت جوة ولكيت خالتي كاعد وحاطة القوري على النار
صبحت عليها
.. هلة. صباح النور ها رجلج كعد لو بعده
.. اي خالة كعد هسة ينزل

دخلت هديل وعاقجة الوجه وبيدها البردات
وتنافخ وراحت لغرفة اللوندري فتحت الغسالة
وتنافخ وتدردم

وراها دخلت هالة والوجه يختلف تماماً عن اختها
صبحت علية رفعت حاجبي وسلمت عليها بصوت
ثقيل
عقدت حواجبها

جانت حواجبنا جهاز الارسال بيني وبينها نتفاهم بيها

وكعدت يمي على ميز الطعام ومالت
.. شنو. شبيج ليش عافسة الوجه.

رفعت راسي لكيت خالة واكفة عالطباخ دتكلي بيض وبصل.
رجعت باوعت لهالة وضربتها على كتفها

.. امشي ولي بوخة. اني ما احجي وياج
زعلانة

هالة .. ليش زعلانة اني شنو مسويتلج
.. لج عوبة البغحة (البارحة) كدامج انكتل وانتي
ابد ولا اتحغكتي (اتحركتي) وفزعتيلي

بالله هديل معذوغة (معذورة) تضوج مني
بس انتي صديقتي ماشاءالله بلية حسد شنو عذغج (عذرج)

هالة.. يوم لا ينفع لا مالاً ولا بنون
يابة والله اخاف من العنف

شبيج هدى نسيتي من جنا صغار وتضربيني ومتلعبيني
اروح اجيب قاسم عليج ويجرج من ظفايرج

اباوع لخالة. فتحت باب المطبخ وطلعت للكراج
واني استغليت الفرصة
ولزمت هاله من شعرها ونزلت عليها بالعض من زندها
هي جانت كاعدة عالكرسي واني فوكها

هالة تريد تصد الهجمة المفاجئة
.. اخ .. اااخ .. اخ شعري عوبة اااخ ايدي .. ايدي
يمااااااااا لحكي علي
.. لج صدك شلون جنتي تجيبين اخوج علية ويجغني (يجرني) من كصيبتي
ويخليني غصب عني العبج

مندمجة اتعارك وية هالة
وجان يدخل قاسم للمطبخ ويفاجئنا

مجرد مسمعت صوته كبل بدلت
الوضوعية وهديت شعر هالة
وعدلت كوشتها بلطف وحنان. وتحولت العضات
بقدرت قادر الى بوسات

سحب الكرسي وكعد عالميز
وهو مضيك عيونه ويباوع علينا بشك

هالة تفرك بزندها وهمست
.. عوبة والله عوبة شافت قاسم وبدلت الموجة
انا الج بسيطة اااخ يمة زندي

رفع راسه من نقاله وسأل.. لاتكولين انتي همين
سعاد ساحلتج وانا ما ادري
كمت من مكاني وحضرت الاستكاين حتى اصب الجاي

هالة.. لالا مو سعاد هاي شسمها
وتباوع علية

جنت واكفة ورة كرسي قاسم اشرتلها على ركبتي
بحركة الذبح ( اذبحج اذا حجيتي)

.. لا هيج انضربت بالباب من دا انزل جوة
دخلت ام قاسم وبيدها. علاكة الصمون الحار

احنا متعودين كل يوم العم حسنين يشتري الصمون من الصبح وام قاسم تطلع تاخذه منه

حطيت استكان الجاي كدام قاسم ورحت
اكمل احط الريوك على الميز
وخالة كعدت كدام قاسم واخذت استكان الجاي
وبدت تشرب

قاسم.. صباح الخير يمة
انتبهت لخالة جمدت ايدها
وبقت رافعة استكان الجاي عالنص
جانت تباوع لقاسم متفاجئة

رحت كعدت بينه وبين هالة
هالة.. لج هدوة سمعتي الي اني سمعته

.. شنو الي سمعتيه
.. لج قاسم كال لامي صباح الخير يمة

التفتت علية لكيته مدنك عالريوك ودياكل
رجعت اباوع لخالة

لكيتها العيون بيها نظرة غريبة وكالت
.. صباح النور يمة قاسم

حجيت بصوت ناصي
.. ليش همة شبيهم اخوج وامج
.. لج غير قاسم من يوم الصار وامي
اتعاركت وياه علمود الزواج وهو زعل

ومن ذاك اليوم بطل كلمة يمة. وصار ميكعد وياها مثل قبل

عليج الله كولي شنو الصار اخوي شبي شسويتيله

جانت تحجي واني اتريك
باوعت عليه ورفع راسه واجتي عيني بعينه
واني فصلت وصرت اوزع ابتسامات.
وهالة مستمرة تحجي واني بالي مو يمها

دنك راسه وكال .. عيونج فضحتنا.
جان يحجي
وحسيت على حركة جوة الميز
وما احس الا رجله دخلت بين رجلية

وهو يباوع علية بنظرات وكحة
غصيت بالاكل

هالة تحجي .. سم حتى سم.
ضربت على صدري بيدي .وهالة وانطتني كلاص الماي
اخذته وشربته واني اهفي بكف ايدي على وجهي
النار ما اعرف هي صارت حارة

لو المصيبة اليمي سواها نار
كام من مكانه وكال الحمدلله

وباوع لامه
.. اكول يمة مو تنسين تكعدين هشام
الساعة ب١١يجيني احتاجه

.. ان شاء الله اكول يمة قاسم قبل لا تروح
كلت لمرتك عالموضوع لو اني اكللها

.. اهووو والله البارحة نسيت
اكللها.
.. شبيك ياحظي بيمن دايخ. شحال لوما اخوك البارحة
انضرب كدامك وصارت عركة
الله عليك هذا كله وتكول نسيت

ابتسم. .. يالله مصار شي انتي كليلها
همة يحجون واني دايخة بشنو ديحجون وشنو يكلولي
طلع قاسم

وصاحتني خالة وكالت
.. هدى خالة تعاي اريد احجي وياج بموضوع
رحت كمت وراها
واني اباوع لهالة.
كعدت بالهول ورحت كعدت يمها
وكالت
.. شوفي خالة هدى
البارحة هشام فاتحني بموضوع خطوبته
وكال يمة اريدج تخطبيلي اخت هدى الصغيرة

بالحقيقة اني ما اتفاجئت بطلبه
لان ابني من يوم عرس اخوه وهو يحوم فوك راس اخته يسأل عنها.
وكلي يمة كولي لهدى تسالها اذا تقبل بية
فخالة اريد منج تكعدين وية خواتج الكبار
وتكعدين وياها وتسأليها. واذا صارت الموافقة قاسم
يحجي وية ابوكم. ونتفق عالخطوبة
وانا بعد ما يحتاج اكلج منو هو هشام وشنو اخلاقه
بعد انتي عشتي وياه وعرفتي طبعه واخلاقه

خالة تحجي واني اباوع عليها مصفصفة ممصدكة
معقولة ديحجون على اختي مريم الصغيرة
عيوني لمعت بفرحة اكول ياربي مريم كبرت وصارت
يجونها خطابة

جليت صوتي
.. بالحقيقة خالة من غير متكولين
هشام مثل اخوي ويوم الهنا
مغيم تصيغ (مريم تصير) من نصيبه ما نلكة احسن من هشام
بس اسأل خواتي واغدلكم الخبغ (واردلكم الخبر )
جنت احجي واني كلبي من يمه يدك حيل

شيماء

بالمركز مثل ما اتعودت كل يوم اداوم
اباوع لمروة اليوم كعدت اتريكت ويانا وانتظرتني
واخذتني وياها للمركز مو مثل كل يوم كل وحدة تجي

لوحدها جانت تسوق بسيارتها ولابسة نضارات شمسية
كالت

.. اني رفعت قضية طلاق على رافد
البارحة

حطيت ايدي على حلكي
بقرارها اشو ما كالت
.. مروة ومشمش خطية مفكرتي بيها.
هي كولش متعلقة بأبوها اتمنى تراجعين قرارج

.. شيماء بعد الي صار مستحيل ابقى على ذمته لو كانت
حياتي كلها معتمدة على هذا الزواج
ما اهتم.

وصلنا للمركز
وكل وحدة بينا استملت شغلها وقبل لا تروح كالت

.. شيماء مو تنسين ضروري تخلصين الي بيدج
وتجين وياي عندي هواي مراجعات يحتاجون شغل

.. اوك بس اخلص العندي اجي

راحت واني. فتت على غرفة الاستعلامات جانت
عبارة عن غرفة زجاجية صغيرة. شفافة

بيها مكتب وعليه لابتوب واكو موضفة لابسة زي المركز الموحد

بالحقيقة اني ومروة الوحيدات ممتقيدات بالزي
نلبس بكيفنا بس كادر العمل زي موحد

بلشت وياها نجرد القوائم ونكتب المواعيد
جان المركز عبارة عن بناية
بيها ثلاث طوابق مروة ماخذة الطابق الارضي كله

حاطة الها عيادة ومختبر وسونار.
اما الطابق الثاني فلصديقتها دكتورة التجميل كله الها

اما الثالث فكان مشترك دكتور اسنان. ودكتور باطنية
دكتور الاسنان موجود من قبل اما الباطنية جديد
ديجهز بالعيادة

جنت كاعدة احجي وية الموظفة مندمجة وجان يلفت انتباهي. ابواب البناية سلايد اوتماتيكي
ينفتح تلقائياً
باوعت اتفتح الباب . دخل حيدر ونزلوا وياه عمال
جان لازم بيده فيتة قياس

بس شفته كبل كلبي لزم استعداد مثل الجندي
وصار يطالبني بالحرية
منتبهت على نفسي من كمت من مكاني
مجرد شوفته نستني كلشي

اقترب من غرفة الاستعلامات والتفت حتى يحجي
بس شافني
كال .. شماء!!!!

.. هلو استاذ حيدر شخبارك
التفت يباوع على العمال وكال انتوا صعدوا كدامي
وانطى المفتاح لواحد منهم
كله.. هاك المفتاح ودخل الاجهزة للعيادة

واني بعدين جاي وراكم
حجاها ورجع يحجي وياي
.. كليلي انتي شخبارج
.. اني الحمدلله بخير

.. سمعت من الدكتورة سولاف بيبتج اتوفت
البقية بحياتج ان شاء الله اخر الاحزان

.. حياتك الباقية
.. طبعا صارلي ٣ايام داجهز عيادة الدكتورة
وكل يوم ادخل هنا اتأمل اشوفج

جنت اعرف انتي هنا تشتغلين وية اختج
بس حسب كلام الدكتورة سولاف
انتي دائما متواجدة بداخل العيادة

جان يحجي برسمية.
بس نظرات عيونه بعيدة عن الرسمية

يعني حتى لو اريد اتغاضى واقنع نفسي بالاوهام
الكة روحي كدام نظراته بلاحول ولا قوة
ما اكدر اسوي شي غير بس استسلم

انتبهت لصفنتي واتلاحكت لروحي
.. اي صحيح مثلما تعرف اختي دكتورة نسائية
واني صرت مساعدة بالاضافة
الى شغل الاستعلامات

جنت احجي وياه واجة مراجع رجال بعمر الاربعين
هذا مراجع عند دكتور الاسنان ديزرع سن
واليوم عنده جلسة ثانية احنا هنا بالاستعلامات نثبت الحجز.

بس عيبه هذا الرجال وكح حتى بتعامله
عادي اني شايفة هيج نماذج وعرفت شلون اتعامل
انتبهت عليه راح للموظفة حتى يحجز

رجعت احجي وية حيدر
حتى اترخص منه. ما اريد ارجع اعشم القلب
بحب ماله اساس

هو رجال متزوج اتعمدت اسأله عن عائلته
.. شلونهم الاهل
جاوبني .. بخير والحمدلله
.. يارب دوم
يالله انت اخذ راحتك اني اترخص

جنت احجي واني كلبي يريد ينخلع من مكانه من الالم

.. احم اخذي راحتج
احس بي متردد يروح

بديت انسحب درت
وهو بقى واكف بمكانه
وايده بجيوبه

قطع علية الطريق نفسه المراجع الثقيل
.. هاي شنو ست شيماء اشو منشوفج اسأل عنج
.. اتفضل استاذ محتاج شي

.. اذا ممكن اريد رقم نقالج
عقدت حواجبي
.. وشنو المناسبة تطلب مني رقم نقالي
دخيل الله شكد وكح وصلف

.. احتاجه حتى من اريد احجز اتصل عليج تأكديلي
الموعد.
جان يحجي وعيونه كصتني كص

جاوبته .. ها اي هم حقك
صحت للموظفة

وكلتلها تجيب لي كارت المركز
انطتني الكارت
باوعت عليه وسلمته الكارت
.. شوف استاذ هذا الكارت بي ثلاث ارقام
بأي وقت يعجبك تريد تحجز اتصل على واحد من هاي الارقام
واحنا راح نأكدلك الحجز

اباوع عليه فلت وجهه
واخذ مني الكارت وسألني
.. ست شيماء انتي مرتبطة

فتحت حلكي حتى اجاوبه
بس اتفاجئت برد حيدر من كال
.. متشوف نفسك زودتها انت شكو وتسألها هيج اسئلة

فتحت حلكي متفاجئة من وجوده جان واكف بيني وبين الرجال وعيونه نار
.. العفو منو حضرتك
.. مو مهم تعرف منو حضرتي

اتدخلت وحجيت وية المراجع
.. العفوا استاذ تكدر تتفضل
موعدك راح يفوت

رص على اسنانه ووجه نظرة لحيدر باوع للكارت الي بيده وراح مشى للمصعد

رجعت اباوع لحيدر. وهو بعده يباوع
للرجال
باوعلي وكال .. ما اعرف ليش وين ما ترحين انتي بخطر
دار وجهه وراح حتى ما انطاني مجال
احجي وياه

او افتهم شنو جان يقصد بهذا كلامه
رجعت لشغلي ويوم مثل كل الايام الطويلة
بس جان الشي الوحيد الجديد بي. شوفت
حيدر ولهفة كلبي

ياربي طلع حبه من كلبي ما يصير افكر بي
وهو متزوج وصاحب عائلة
يعني نظراته تأكد اعجابه بية

بس المفروض انسحب وما احجي وياه غير بس السلام
ما انطي مجال
عدت ساعات الدوام
ورجعنا للبيت لكينا مشمش تبجي وضحى ومريم
محتارين شلون يسكتونها

مروة غمضت عيونها وسحبت نفس عميق بصبر

ضحى.. اي عفية همزين اجيتوا هاي مشمش
خبصت الدنيا بس تبجي وكل شوية تسألني
بابا وين
اريد بابا
اتصلي على بابا اريد احجي وياه

باوعت لمروة وحجيت
.. هذا الجنت خايفة. منه
مروة راحت لبنتها واخذتها لحظنها
.. مشمش بابا مسافر صيري عاقلة ولتبجين

اجتي مريم واخذتها من مروة وكالت
.. تعالي مشمش خلي نرسم اني وياج

ورة ساعتين جانت ضحى تصب العشا
وتحجيلي عن يومها
ضحى.. اي مروة صدك اتذكرت
اليوم واحد ما يستحي اجة سأل عليج

.. ما افتهمت شنو ما يستحي شنو يسأل عني

.. مو اني جنت اغسل بالكراج. مندمجة
وجان يندك الباب شمرت الصوندة بالحديقة
جنت لابسة ربطتي بوضعية الشغل
وبيدي الماسحة ورحت فتحت الباب

لكيت رجال واكف بالباب

بس جان يحجي بالنقال وية واحد شافني فتحت الباب
واشرلي بأيده انتظر
اشو هذا ما خذ راحته ويحجي وية صاحبه مدري شيصير منه
يكله
.. هاي شنو مروة بدلت خدامتها
سكت وبعدها ضحك وهو عيونه علية
واني واكفة منتظرته. وراصة على اسناني وكوة لازمة نفسي
لا احط الماسحة براسه خدامة بعينك عمة حتى عمة

كمل كلامه بكل صلافة وكال
.. لك تعال شوفها شلون وحدة
والله حرامات هيج جمال تشتغل خدامه
خرب ونوب شوف شلون شامة بخدها غير تسطر
سطر هاي من اي مكتب جايبتها مروة

شهكت ولطمت على صدري
شكد ما يستحي

.. يالله .. يالله موتنسى مثلما وصيتك تسلم كلشي وتوقعهم على الاوراق يالله تبيع
يالله تمام مع السلامة

غلق النقال. وباوع علية وانطاني الظرف وحجة وياي
‏.. ( Hi, give this to Marwa)
(هاي انطي هذا لمروة )

اشو هذا رطن علية بالانكليزي
عمة هذا عباله اني خدامة مروة
واحتاريت شنو اجاوبه تالي حتى احفظ ماي وجهي
حجيت من بين اسناني
‏.. ok
ضحى تحجي

ومروة ابتسمت وكالت
.. لج ضحى هذا ابو ياسر

يتبع

حبكم كومة احبكم هواي
اختكم نهى الحسون