أساور الفضة الفصل الخامس وخمسون 55 - بقلم نهى

مساء الانوار عليكم احبتي
بما ان البارحة. منزلت بارت
اذن سقط حقي بعطلة يوم الخميس
فأن شاء الله. باجر مثل كل يوم انزللكم البارت
اعتذر عن التقصير

#اساور_الفضة_ج٢
#نهى_الحسون

هدى

جسمي يوجعني وايدي مفصوخة
احس وخدي نار وفكي احس بي داير عبالك داعمتني سيارة
ينعل ابو شكلج يا سعودة
مسويتني تفصيخ

طلعنا اني والبنات وية خالة وراهم حتى نسد الباب
اباوع لسعاد سبحان مغير الاحوال دخلتلنا جنها
زرافة
و طلعت من عدنا جنها ديج منتوف ريشه
ونوب شوف الكذلة. او بالاحرى بقايا الكذلة
شلون مهلوسة صفة منها بس شعرايتين
عبالك زوج لوامس الصرصر الي تصير بمقدمة الراس

والله عبالي بس هي فلشتني طلعت اني هم ممقصرة وياها فديتني

همة طلعوا وسدينا الباب
وجان نسمع صوت قاسم وهشام وصلوا وديحجون
وياهم

ام قاسم لطمت على خدودها
.. يبوووو اجوي قاسم وهشام
باوعتلنا وكالت بصوت ناصي
.. شوفوا. سمعوني زين متحجون ولا كلمة
عن الصار ترة كلبي خلص من المشاكل
والله كل هبطة تاخذ نص حيلي

هالة .. اكوووول يمة. زين وضربة هدى
هم نسكت عنها . ؟؟

ام قاسم باوعت لهالة ورصت على اسنونها
..ولكم اخذوها من يمي لا والله ابتلي بيها

سمعنا صوت قاسم ديحجي وياهم بهدوء

اباوع لام قاسم قربت راسها عالباب تريد تسمع شنو يحجون
واحنا وياها اني وهالة سوينا مثل حركتها
نريد نسمع

هالة.. خرب بالحظ خطية قاسم واكف يحجي وياهم
بكل برود ميدري بالمجزرة الصارت قبل شوية
والله لو يدري بسعاد وكاظم وصفاء والحفله الي سووها
جان خلاهم يطلعون منا كبل عالمستشفى لقسم الكسور

اسمع قاسم وهشام ديحجون وية كاظم
بغيض
قاسم .. شتسوي جاي للبيت وانا مو مموجود

كاظم.. انا ما جاي علمودك اجيت
حتى اشوف ابني واحجي وياه.

هشام .. حجي اني عندي نقال وتكدر تتصل علية مالها
داعي تجي لهنا لبيتنا وتسوي مشاكل

كاظم.. لاتكول بيتنا. هذا مو بيتك
من يصير الك حصة بي عود تعال كول بيتي

هشام .. انا ما احتاج يكون الي حصة بي. حتى يكون بيتي
وجود امي بهذا البيت هو حصتي

قاسم .. وهسة انت شنو جاي علمود تثبت ملكيته للبيت
لو شنو فلمك هالمرة

.. لا اجيت حتى اقنع ابني يرجع وياي للبيت
خطبتله بنت عمه اريده يتزوج ويستقر

هشام.. شنو رحمة الله من عادها
شلون بالله نظل احنا كل يوم نعيدها للسالفة
مو ذاك اليوم نهيت الموضوع ورفضت طلبك
وكلتلك انسى اتزوج بنت عمي. او اي بنية تخطبها
انت الي
انا من افكر اتزوج اخلي امي تخطبلي هي تعرفني شنو اريد

.. مو بكيفك مستحيل اخلي قاسم وامه يخطبولك على مزاجهم وانا موجود اشم الهوى
لو اعرف اكسرك واحبسك بغرفة
وما اخليك تسوي الي براسك

هشام بغضب .. اريد اعرف لخاطر الله انت شتريد مني بالضبط
يعني والله زهكتني بعيشتي
لا من جنت صغير رحمتني ولامن كبرت ترضى تعتقني
اريد افتهم شرايد مني بالضبط ودور الاب الحنين ملايكلك
هذا حنانك وحرصك وين جان عني قبل

هشام يريد يكمل اشرله قاسم وباوع على عمه
قاسم .. اكلك كاظم بدون لف ودوران اني تعرفني مااحب التطوالة
من الاخير انت شنو تريد بالضبط من هشام

كاظم .. قاسم لا تكعد توز ابني علية وتشحنه
انت اطلع من الموضوع هذا الشي بيني وبين ابني

وانا اليوم اجيت مو بس علمود الخطوبة
لا انا اجيت علمود اريده يستلم الشغل بدل
عني. ويشارك اخوانه بحلاله
بدال ما ظال خادم جوة ايدك ومشاركك بتعبه

قاسم زمخ بي وهشام كامو يحجي على كاظم
جان كلامه يدوس بالمصارين

اباوع لام قاسم

اباوع عليها كامت ترجف والشفة صارت بيضة
مديت ايدي عالباب اريد افتحه واشوف
كلبي على قاسم خاف يتضارب هو وصفاء والثنين حادين اسنانهم

لزمت ايدي بضعف وكالت
.. لا لا ديري بالج تطلعين والله قاسم يحرك الدنيا على
راسنا

جانت تحجي وتتلمس براسها
خطية خالتي ام قاسم شكد شخصيتها قوية وصارمة
بس بالمقابل هي مرية مسالمة
وتخاف على اولادها من المشاكل.

هالة. لزمت ايد امها .. ماما تعالي فوتي جوة لا توكعين
والله قاسم اذا يشوفج هشكل راح يعرف بالصار ويزيد الطين بلة

ام قاسم .. لا انتوا فوتوا دخلوا جوة للبيت
واني خليني اطلع اشوفهم
كلبي ما ينطيني خاف يتعاركون

رجعت دارت علينا وكالت
.. ديربالكم تطلعون. وراي.
ترة قاسم واصلة وياه حدها

عدلت ربطتها على راسها وطلعت برة يمهم وسدت الباب

.. خرب بالحظ هاي شبيها خالتي ليش سدت الباب
غير نشوف

اسمع صوت خالتي تحجي وية قاسم تهديه وتكله
. . يمة قاسم اتعوذ من الشيطان
وقاسم يجاوبها.. شلون اتعوذ منه وهو متربع براسي
حجية بروح ابوي وخري خلي اشوف هذا شكاعد يسربت

هديل حجت بسرعة .. اني رايحة اشوفهم من الكامرات شنو ديسون
هالة .. اي عفية شلون فاتتني اخذيني وياج
هنة راحن يركضن واني رحت وراهم

دخلنا. للمطبخ جان اكو شاشة بلازما معلكة عالحايط
خاصة لكامرات المراقبة
جانت الشاشة. مقسمة اربعة مربعات
كل كامرة تصور زواية من البيت والشارع والباب الخارجي

جنت اباوع ام قاسم واكفة ورة قاسم ولازمة زنده
تسحب بي تريد تدخله
وصفاء واكف مخوصر و متأهب للعركة

وهشام واكف كدام ابوه ديحجي ويحرك بيده
وسعاد واكفة ومتخصرة وتنافخ. وهي مستندة
على سيارة كاظم

بس المشكلة الكامرة ماكو صوت
ما اكدر اسمع شنو يحجون

جنت متوترة واباوع عالشاشة بترقب
عزة هشام ديحجي وية ابوه وصفاء انطاه دفرة
شكد خبيث وجبان وكعه بالكاع وخالتي دنكت على هشام

احس عقل ما بقى براسي
اكيد قاسم راح يتعارك ما ضل عندي صبر
ما اعرف شلون رجلية اخذتني الهم
وفتحت باب الشارع وصحت على قاسم خايفة عليه
.. قااااااسم

لكيت كاظم واكف يباعد قاسم عن صفاء
والزرافة سعاد مربعة ايديهة على صدرها
وواكفة تدردم

بس طلعت وصحت قاسم
هو كبل عاط بية وكال فوتي دخلي جوة للبيت
ورجع يحجي عليهم وكاظم واكف حاجوز بين قاسم وابنه

عزة ةةةةة اني بس سمعت صوته اليرعد
كبل رجعت رون سايد
وسديت الباب

قاسم.. شوف كاظم هسة تاخذ ابنك ومرتك
وتروحون منا
خليني محترمكم ما اريد اطلع صوتي بالمنطقة.
سكتلكم بما فيه الكفاية وصبري عليكم نفذ
ولخاطر هشام اني متحملكم

خطية قاسم يتخبل ولا صوتنا يطلع بالمنطقة لان زحمة
وخصوصاً منطقتهم هادئة وناسها محترمين

كاظم .. ولك انت صدك ما تستحي وماعندك اخلاق
الظاهر جو الملاهي هواي مأثر عليك وصرت مثل اخلاقهم
لا تحترم عمام ولاتعرف تقدر الجبير

قاسم .. حرامات والله الكاع محظورة. ما اكدر احجي
بختك بالحجية هنا واكفة
والاكان سمعتك حجي ينخر بالعظم
ولو ما يحتاج احجي
كلش كافي تندار وتنطي نظرة بسيطه لمرتك
وبعدين تعال كلي منو بينا المأثرة عليه الملاهي

عزة هو حجة هشكل وصار صياح بينه وبين عمه
وصفاء

يمة. شلون بية. والله راح يتعاركون كلبي صار عليه مثل الجمر
فتحت الباب مديت راسي اجاني صوت عمتي
عاطت بية حتى ادخل

دخلت شلون ما ينطيني كلبي اعوفه واروح
ولا ينطيني كلبي ابقى واكفة هنا بس اسمع صياحهم
جنت احوم يم باب الشارع اروح وارجع افرك بيدي
يا الله شلون اريد اشوف شنو ديسون
وبين الخوف وبين القلق والترقب

وجان
عيني توكع على برميل النفط البصف السياج
بس يصير بعيد عن الباب بالزوية
ما حسيت الا ورجلية ماخذتني يم السياج
وبديت احاول اصعد فوك البرميل

حطيت رجلي الاولى ولحكتها رجلي الثانية وشوية
شوية كدرت اوصل للحافة وصرت اكدر اباوع شنو ديسون
جنت متعلكة عالسياج ومطلعة بس راسي وكل شوية
ادنك راسي خاف قاسم يشوفني ويرزلني
همزين جانت انارة الحديقة مخنفسة محد يكدر يشوفني

اباوع لام قاسم
كومت هشام من الكاع جان دايخ
الظاهر صفاء العار مأذيه

سمعت كاظم يحجي وية قاسم بغيض
.. لك قاسم
المثلك ميفتح حلكه ويحجي بالنسب
وروح بالاول شوف ابو مرتك منو
وسمعته شلونها وبعدين تعال عيرني بزوجتي
روح شوف جد جهالك المستقبلي
كل يوم يطلعونه من المنزول.
وغركان بالشرب والعربدة

شهكت مصدومة من الحجي السمعته
لا ياربي دخيلك هذا الماجنت حاسبة حسابه
سمعة ابوي تلحكني لبيت زوجي . ويتبهذل من وراه وهو ماله دخل

وبلسان الي ما يرحم وكع قاسم لا صوج ولاذنب
اتمنيت كون ميتة ولا سامعة هذا الحجي

سمعت هشام يحجي وية ابوه بغيض
.. ترة المرية ما تتقيم بافعال ابوها
المرة قيمتها. بشرفها وعفتها

قاسم .. هشام عوفه ميحتاج تبررله يكفيني فخر
اعرف بمرتي بنت حلال
وصاينة عرضي واكدر أأمنها على بيتي
ومينخاف عليها
لان اخت رجال وينشد بيها الظهر

حجاها وباوع لسعاد وهي كامت تكمز من سمعت كلامه وصارت تصيح

سعاد.. كاظم اشو ساكت احجيلك كلمة
لك شوفه يحظي شلون كام يرعد علمود
جبت سيرة مرته على لسانك عايز بس يهد عليك

وهي مرته كلها على بعضها جنها فصمة
صدك لو كالوا الناس حظوظ
مو مثل حظي انهان بوجود رجلي.

شهكت ينعل ابو شكلج
هو وينه هذا الحظ بالله متراويني شكله شلون صاير

قاسم خزرها
وحجة وهو راص على اسنونه
.. شوف كاظم قسماً بذات الله. اذا ما اتحركت هسة منا انت
والي وياك لكون حارك الاخضر واليابس
وبوكتها راح تعرف شنو اقصد

كاظم.. بسيطة يا قاسم انا اعلمك
لك انا من بعد هذا عمري هيج انهان
وانت يا هشام مصيرك ترجعلي مثل الكلب
وراح تشوف الايام تثبتلك

دار وجهه وشمر السويج على صفاء وكله انت سوق
السيارة. جان يحجي ويرجف من الغضب
من الله لا يوفقك ياكاظم ما تكلي منين طلعتلي

مكرود يالماعندك حظ وبخت
انا ما صدكت الدنيا بدت ستوها تبتسملي
وقاسم بدة يقتربلي. يجي كاظم
ويخرب الاول والتالي
ويزيد من مخاوفي.

بس اريد اعرف المشكلة بين كاظم وهشام ابنه
اسمي المصخم شيسوي يكمز بنصهم.
خرب حظي

جنت مشغولة. ادور على حظي التايه
وناسية نفسي معلكة عالسياج
ماخذة وضعية سبايدر مان

ماحسيت الا وصوت الباب الخارجي انفتح وجان يدخلون هشام وخالتي وقاسم

عزة خلي انزل قبل لا يشوفني قاسم معلكة عالسياج ويسحلني

وبين ما التفتت ودنكت حتى انزل
وجان اسمع صوت قاسم المتفاجيء من وراي

قاسم بغضب.. لج هاااااي شنو غضب شتصخمين فوك البرميل

حجاها وهو متوجه علية من الخرعة جمدت بمكاني

محتارة انزل لو ابقى معلكة.
خلي انزل والحك على روحي

انتبهت لهشام كمل طريقه ودخل جوة للبيت جان حيل ضايج
خطية كلمن همه شكل

ام قاسم.. لج خالة هدى شصعدج لتوكعين
ديري بالج لتطلعين حامل ويصير عالحمل شي

يالله هاك استلم بالله هاي خالتي شحجي وياها الناس بالناس والكرعة تمشط بالراس

اتحركت حتى انزل
وجان يهتز البرميل بية.كمزت من الخوف ولزمت السياج حتى استند عليه
وحجيت بهبطة
.. يمةةةةة زين ما وكعت

وقاسم اقترب مني وصاح بية
.. ولج جنية لو توكعين وتتكسرين جان اني بخير
متكليلي انتي. شصعدج فوك البرميل

جان يحجي
ومد ايديه وحوطني من خصري وساعدني حتى انزل
نزلت
وباوعت عليه ولميت شفايفي بذنب
وحجيت بصوت ناصي اتمسكن

.. ااااا جنت اباوع عليكم خفت لا تتعاغكون (تتعاركون)
.. هسة اذا الزمج وامسح بيج الكاع. اكو واحد. يلومني

.. لا ما يحتاج الكاع نظيفة تلمع ستوني مسحتها
جنت احجي واتذكر عركة سعاد هسه مسحت الكاع بية

.. شلون بيج شنو حلها وياج
حجاها بقلة صبر
جاوبته .. شسوي والله مو بيدي كلبي مينطيني
خفت لا تتعاغكون (تتعاركون)
صعدت حتى اتطمن عليكم

جانت ايديه بعدها لازمة خصري نزلها
وجمد بمكانه وباوع عليه جان ضوة الحديقة مخنفس وصاير بظهره.
وجهه ممبين مكدرت
احزر ردة فعله من كلامي

ام قاسم.. يمة قاسم عوفها كافي مشاكل
ترة والله راسي راح يطك من وراكم انت واخوك

يالله امشو فوتوا جوة
وخليني اروح اشوف اخوك هسة الكاه يحرك بدمه
من ورة ابوه الناقص وهذاك الحقير اخوه الي اخذله غفله وممنتبه عليه
وانطاه دفرة على رجله ووكعه

دخلت وعافتنا وقاسم باوع علية خزرني ودخل للبيت
بس قبل لا يدخل
كال .. عيديها مرة ثانية. وشوفي شراح اسوي بيج
والله رجليج اكسرهم

دنكت راسي ومشيت دخلت وراهم
استغفر الله هسة هذا شنو سالفته وية رجلية
كل حجاية والثانية وكال اكسر رجليج
اليسمعه يكول كراعين باجة. ويكعد كل شوية مكسرهم

دخلت لكيتهم كلهم كاعدين بالهول
ام قاسم كاعدة عالقنفة. وهشام متمدد على نفس القنفة وحاط راسه بحضنها

وقاسم واكف فوك راسهم

قاسم .. اي حجية. كملي بعد شنو سربت كاظم
من جنت مموجود

ام قاسم جاوبته تريد بس تسد الموضوع
.. مكال شي زايد عن الي حجاه الكم
.. يعني تردين تقنعيني
ان كاظم ومرته وصفاء
اجوي لهنا من وراية ويريدون يستغلون فترة غيابي
بس علمود هاي الحجايتين

جان يريد يجرجر خالة بالحجي
وخالة تتهرب من اسألته ومحضر التحقيق
يمة همزين مجان موجود وشاف سعاد شلون تصول وتجول بينا جان حرك الدنيا

ام قاسم.. اهوووو قاسم شلون بيك كلتلك ماكو مسوولنا شي ولا كالولنا شي
حتى اسأل البنات.
ودارت وجهها علينا اني وهالة وهديل

انتبهت لخالتي باوعتلي وشهكت وحطت ايدها على حلكها وكالت
.. ياااا هاي شنوو !!!!!

شهكت خالة لفتت الانظار علية
شنو شكو ليش يباوعولي هشكل

اباوع لقاسم اتسعت عيونه واجة اقترب يمي والنار تجدح بعيونه

لزمني من زندي وقربني عليه
ورفع وجهي يتفحصه

ودار وجهه على خالة وسألها بكل هدوء بارد
.. شوفي حجية هسة اذا ما تحجيلي شنو الي صار
والله العظيم هسة اروح احرك بيت كاظم على روسهم وانتي السيبب

ام قاسم .. شوف احجيلك بس اريدك تحلفلي بروح ابوك
متعصب وتحلها بالتي هي احسن من تهدء

.. هسة غير افتهم شنوالسالفة شلون صار بوجه مرتي هيج
.. اوعدني بالاول متعصب وتروح تهد عليهم

رص اسنانه بغيض حجة بقلة صبر
.. هاي هي اوعدج اليوم مراح اسويلهم شي

ام قاسم بدت تحجي لقاسم عن الي صار وية عمه
وسعاد شلون هدت عليها
خالة تحجي وقاسم يسمعها وعيونه علية
وكوة لازم نفسه. ما يهد علية

حجة بصوت خشن وهو يباوع لامه
.. هذا كله صاير وما جنتي ناوية تحجيلي
مع الاسف عليج حجية الظاهر ما مالي عينج
ومالي دور بهذا البيت
شوفي سكوتج عنهم وتسترج عليهم
لوين وصلنا

خلاهم يطغون ويتعدون حدودهم
وصلت بيهم الجرئة. يدخلون ببيتي واني مموجود ويمدون ايدهم على مرتي
كله من ورة تسترج عالموضوع خلاهم يستهانون بوجودي

اباوع لام قاسم شلون وجهة صار اصفر
حجيت وياه

.. قاسم لحظة على كيفك وية خالة.

قاطع كلامي وحجة بصوت امر وجان منطيني ظهره ويباوع على امه

.. هدى انتي لا تدخلين روحي صعدي فوك كدامي وحسابي وياج بعدين

..ليش معصب علية تغة (ترة) اني مسويت شي

دار علية. وعيونه تجدح نار
.. اششششش ولا كلمة شمعنا انتي اتعرضتي للضرب
مو هاي امي وخواتي. وياج اشو ممضروبين

ام قاسم .. لا قاسم لتحجي عليها لو لا هي .......
قاطع كلام امه

وكال .. هدى اتحركي صعدي لغرفتج

عزة اشو هذا دار علية اني شلي غرض
درت وجهي ورحت صعدت فوك وهالة وهديل
انسحبوا من الهول شكلهم يعرفون طبع اخوهم

جنت داصعد الدرج وسمعت قاسم
سحب نفس عميق ورجع يحجي وية خالة
قاسم .. حجية وتاليها وياج. ترديني اعوفلج البيت واطلع.
لان جاي اشوف مالي اي كلمة بهذا البيت

ام قاسم حجت بتعب .. والله يايمة غصب عني ابلع واتحملهم
لان كلبي ما يتحمل يخسر واحد ثاني
من ورة عمامك ومشاكلهم خسرت ابوك.
فما مستعدة اخسرك انت او اخوك
بس خليني افهمك شصار لان انت صاير تستنج وتحلل
بكيفك

خطية خالة هواي تكتم وتتحمل بكلبها
كملت صعدت فوك وخليتهم يكملون كلامهم.
ودخلت لغرفتي.

ورحت وكفت كدام المرايا حتى اشوف وجهي احس بخدودي صاروا نار

شهكت متفاجئة. خدودي حمر وعليهم طبع اصابع ايد
القندرة. سعاد الله ياخذها.

رحت طلعتلي ثوب فانيلا قصير خلي اروح انام
قبل لا يصعد ويزفني اشو هو امه. ما انطاها مجال تحجي.
ولو هو حقه هي ميصير تضم عليه
بس خرب يومه شكد عصبي

رحت ركض بدلت وفرشت فراشي وحطيت راسي على المخدة
ولبدت جوة الغطا.

سرت رعشة خوف بجسمي واني اتذكر تحذيره
هو منبه علية ما ادخل نفسي بأي عركة.
حتى لو جان هو بذات نفسه الي ديتعارك.

وصدك تدخلي بالمشكلة زاد الطين بلة. وسعاد زادت ما نقصت
يمكن سعاد لو متجاوزة شوية على خالة احتمال كاظم او صفاء يردونها.
لان يبقون يخافون من قاسم اذا عرف

متجاوزة على امه وفعلا كاظم بوكتها عصب وكال لسعاد بوكتها
خربتي علينا الاول والاخير

يعني ميريد توصل للضرب لان يعرف بخبالات قاسم
وخير دليل هالة وهديل مدخلوا نفسهم واتعاركوا
الظاهر واثقين من اخوهم
اووووووف واني اجيت مثل الغبية واتصديت واكلت تبن

والله ياربي ما اعرف حياتي منين ما اجيبها
عوجة متنعدل. لا ونوب فوك هذا الضيم كله
عاااار اثير الي ما اعرف منين جتني هاي السالفة
على الاساس اني ناقصة ذل وقهر
ما اعرف ادعي على كاظم لو ادعي على اثير
الي خلة اليسوى والمايسوى. ينهشون بلحمنا
اني وخواتي. اااااخ جريت حسرة وعدلت مخدتي

وجان ينفتح باب الغرفة. واسمع صوت قاسم
سد الباب واتقدم لداخل الغرفة وحسيت عليه
وكف يم راسي وحجة يصوت امر

.. هدى كعدي اريد احجي وياج
سمعت صوته الخشن وكمز كلبي من مكانه
وبلعت ريكي. اباوع عليه راح كعد عالسرير

ونزلت الغطا على كيف وكمت من فراشي
وكفت على صفحة وباوعت عليه بترقب

.. تعاي اوكفي كدامي
رحت وكفت كدامه واني رجل تطك برجل

رفع راس وباوع علية وكال

باوع علية وكال
.. ليش اتعاركتي وية سعاد
هاي ثاني مرة تعرضين نفسج للاذية

رفعت راسي وحجيت
.. اني ادغي بغوحي ميصيغ اتعاغك (ادري بروحي ميصير اتعارك)
بس والله مكدغت (مكدرت) اشوفها تتجاوز على خالة وابقى ساكتة.
هواي علية هيج مااكدغ (مااكدر)

اباوع عليه كام من عالسرير واقترب علية
وعيونه تلمع بنظرات غريبة عكس من جان جوة.
جانت كلها شرر
جانت نظرات عيونه هالمرة كلها فخر نفس النظرة بيوم
اتعارك
. شوفي هدى منا ورايح. ما اريدج تختلطين
بعمامي ومن يجون لتدخلين تسلمين عليهم

لان بعد. قرار هشام بخصوص الزواج
عرفت بيهم ما راح يوافقون بسهولة على اختياره

وراح يحاولون بكل طريقة يوصلونج انتي بالذات
حتى يلون ايدي بيج ويخلون هشام يتراجع عن قراره

دنكت راسي بحزن وعرفت شنو قصده
.. افتهمك وحقك تكون متشدد من هاي الناحية
لان الواحد كلشي ولا سمعته تنهان او تنداس

اوعدك منا وغايح ما احغجك (منا ورايح مااحرجك) كدام الناس
او بالاحغى (بالاحرى) ما اختلط بيهم. منا علما. تطلكني.

عقد حواجبه وكال
.. وشنو جاب طاري الطلاق بموضوعنا
.. قاسم مو اني سمعت كلام عمك. وياك
بخصوص ابوية وشلون كعد يعيغك (يعيرك) بي وبسوالفه
الموزينة.

.. لا غلطانة اذا جنتي تتوقعين ان كاظم كدر يهز شعرة مني من جاب طاري ابوج
وانا اقوى من هيج
مستحيل كلام مثل هذا يخليني اتأثر
صدكي ترة كلامه لا يقدم ويأخر

.. بس انت ممجبوغ(ممجبور) تتحمل هذا الحجي
ليش متطلكني وتشتغي غاحة (تشتري راحة) بالك
ومتخلي واحد يتشمت بيك. اشو احنا اول وتالي متطلكين
اني اشوف هسة احسن من بعدين

عزة هو سمعني حجيت هيج وهو عيونه صارت نار
وحجة بغضب
.. تعالي اكلج انتي شنو سالفتج كل حجاية والثانية
وكلتي طلكني
سمعيني زين وخلي. ببالج انا طلاق
ما اطلك. واياني وياج تجيبين سيرته على السانج مرة ثانية
وحتى اتوبين وتبطلين تحجين بالطلاك
اليوم راح اربطج وياي مو بس بالاسم. لا اليوم راح اخلي زواجي منج كول وفعل

.. قاسم لتكول هيج اخاف بعدين تتندم
.. اصلا عمري ما اتمسكت بقرار صائب مثل اليوم

.. ليش شنو غيغ رأيك بية (غير رايك بية)
نسيت قبل شنو جان غأيك (رايك)
مو انت الكلت لخالة. ما اتشغف اغبط (مااتشرف اربط )اسمي
بوحدة ابوها مشبوه خغيج (خريج) سجون

مو انت الكلت علية اذا ابوها اثيغ (اثير) هي شنو غاح (راح) تطلع
اخلاقها
على فكغة (فكرة) اني مداحاسبك او الومك على كلامك. وية خالتي
لان اعغف (اعرف) كلش زين هذا من حقك
صحيح انقهغت (انقهرت ) بوكتها من حجيت هيج علية

بس اليوم بعدما سمعت كلام كاظم. وياك
عذغتك وعغفت (عذرتك وعرفت) سبب غضبك واعتغاضك (واعتراضك)
حقك متغيد (متريد) اطفالك يتعيغون (يتعيرون) بجدهم.
بالحقيقة مو بس انت تستعغ تغبط (تستعر تربط) اسمك ببنت اثيغ (اثير)
اي غجال (رجال) بمكانك غاح (راح) يسوي هيج
فاني اشوف مصلحتك بهذا الطلاق اكثغ (اكثر) من مصلحتي

جنت احجي وكلبي ينزف دم
جان لازم اقسى واصير قوية حتى لوجنت ارش الملح على جروحي بهذا كلامي. بس هذا واقع. حال
لازم اواجه الحقيقة. وما اوهم نفسي
وواذكره بكلامه
دنكت راسي بحزن

مد ايده ورفع وجهي وكال
.. رفعي راسج من تحجين.
مرتي متندك راسها مهضومة

صحيح ما انكر غرتني المظاهر وحكمت عليج
لان ابوج اثير لان جنت متخوف منج

بس الايام اتعاونت والزمن جان كفيل
يثبتلي خطاء حكمي. وخلاني افتح عيوني
على هواي اشياء جنت غافل عنها

والبنية الي تجازف بروحها وتدافع عن اهل بيتها
حتى تحميهم من غير متخاف على نفسها
اتشرف بيها تصير ام بيتي

رمشت بعيوني متعجبة يمكن اني داحلم
باوعت عليه سحب نفس عميق ومد ايديه
ولمني بحضنه وعصرني حيل
وباس كصتي حجة بصوت هامس
.. هااااادي شلون بيك وين اضمك ووين اخليك
صرت اخاف عليك لا اجي يوم والكاهم كاصين السانك

يمة هوحضني واني اتخردلت وارتبكت
صار عندي تضارب بالمشاعر وعقلي وكلبي انخبصوا
وصار واحد يردم باللاخ
عبالك ناس اجوهم خطار . فجاءة وبيتهم هوسة
هيج جان حالي من المفاجئة

نسيت نفسي وريحت راسي على صدره
مستغلة الوضع. ترة الواحد مو كل يوم يحصله هيج
حضن. خليني اتنعم بالجنة. سحبت نفس عميق
وعطره اتوغل بين ظلوعي فرصة لا تعوض

جنت حاطه راسي براحة مفترشة زولية صدر قاسم

اوووف يمة مو بيدي والله احبه.
وربي هالرجال عنده بخت بكلبي يشفعله ويخليني اتغاضة عن كل
قساوته وياي وبكلمه منه. احس يذوب
كلبي وانسى زعلي منه.

همس بصوت هاديء
.. هادي اياني وياك اسمع بيك فايت بعركة

يماااااااي شحلاتها كلمة هادي بحلكه
صرت احب اسم هادي

رفعت راسي واني بعدني بحضنه وجاوبته
.. صاغ.(صار) بعد ما اتعاغك. ( اتعارك)

.. هسة اليسمعك يكول كفو عرايك
هم ياريت بيك خير وتعارك
اشو سحلوك من اول ضربة

.. شسويلها هي جانت طويلة جنها زغافة. (زرافة)
وكمت ارمش بعيوني اريد اضحكه
واني شوفة عينك ناعمة وكيوت. وغقيقة. (رقيقة)
بس بنفس الوكت دمي حامي البية ما يخليني
شسوي لروحي

ابتسم بحنان ورفع كف ايده ومسح على خدي وسألني
.. خدودج يأذونج ؟؟؟

هزيت راسي بموافقة ما اريد احجي واخرب اللحظة
اخاف ينتبه على نفسه وينسحب مني ويحرمني من
حضنه

دنك وباس كصتي ونزل شفايفه وباس خدي
ولحكتها شفايفي

عزةةةة. واني كلبي صار (دمبق دمبق ) يرقص طرباً
وعزم بقية حواسي حتى يحتفلون وياه بالحفلة الراقصة
احس كل مكان بجسمي ينبض

اما عقلي اتوقف عن العمل واخذ عطلة من يمه
ونزل مجاز يحتفل وية فرحة كلبي

غمضت عيوني وهمست
.. قاسم اغيدك (اريدك) توعدني متعوفني وتبقى تحميني
وتحاول تحبني.

.. ما يحتاج الوعد لان من يوم ايدي لزمت ظفايرج
ومن يومها صارت مهمتي حمايتيج
انتي معزتج هيج من الله
غصب عني اتوغلتي بحياتي

فرحت بكلامه هو كال كلشي الا كلمة احبج ما كالها
بس يالله ما علينا نصبر عليه. يكفيني اني احبه

همس يم اخدودي

.. لج ااااااخ كون سعاد يمي جان الا اخليها تعض الايد
المدتها عليج
ونوب ضاربتج على الخدود
وانا البارحة مشتعل جد جدي من وراهم
جنت اتحكرص عليهم واتمنى اعضهم

لزمت خدودي ولميت شفايفي وحجيت
.. بالله هسة اني شنو افتهمت اشو بالحالتين
خدودي هنة الضحية انت تعض وهي تضغب (تضرب)

جانت عيونه تلهب
.. لج جنية عضة عن عضة تختلف
تعاي خلي اراويج

هو حجة هيج وبعدها احس بروحي اتسلبت
بين ايديه ما انطناني مجال افكر
او حتى الحك. اخاف

لكيت روحي بين ايديه. عالسرير
والمشاعر بدت تتراكم على عقلي
الخوف واللهفة والامل والحب كلهم مجتمعين بكلبي

انفاسه الحارة لفحت ركبتي وبدت مرحلة الجد
ودخلت لمنطقة الخطر
وفجاءة خفت و اتذكرت الوحمة

همست بخوف مرتبكة على مستحية
وعدلت ثوبي
.. لحظة قاسم. اوكف
بعدت ايده جانت محوطتني

دنك راسه وهو متجي على كوعه وباوع عليه. متفاجيء
من صدي اله

..وهمس وانفاسه حارة
.. شنو شبيج اتشنجتي على غفلة
جليت صوتي وعدلت شعري الي ما اعرف شوكت انفتح وحجيت
.. احم قاسم اغيد (اريد) اطلب منك طلب. اتمنى توافق عليه

.. شنو كولي

جان يحجي وعيونه على شفايفي
ورجلية

.. اغيدك تصبغ (اريدك تصبر) علية. بس هاي الشهغين (الشهرين)
وبعدها اسلمك نفسي

عقد حواجبه مستغرب
.. اكدر اعرف شنو سبب طلبج الغريب

احس بخدودي صاروا نار من الفشلة
.. مو اني مثلما تعغف (تعرف) دا سوي جلسات ليزغية (ليزرية)للوحمة
مالتي.

.. اي اعرف وانا ذاك اليوم اخذتج بيدي لاختج
بس شنو ربط الوحمة بموضوعنا

مصدر مخاوفي برز وغصب عني نزلت دموعي
واللحظة الي جنت شايلة همها من قبل حانت

.. قاسم الوحمة سودة . ماخذة مكان بجسمي
واستحي اخليك تقتغبلي (تتقربلي ) وتشوفها اخاف يزعجك منظغها (منظرها)

صرت احجيله الي بكلبي بدون لف ودوران

باوع علية وحجة بأمر
.. اشو من يمج تقررين عني
بالله شو خليني اشوفها

جنت مترددة ومستحية اول مرة بحياتي راح اخلي رجال يشوف جسمي
همس بهدوء حتى يطمني
.. هدى ترة انتي حلالي. لتستحين مني

ومد ايده لثوبي ورفعه
وصارت الوحمة كدام عيونه
غمضت عيوني وحبست انفاسي واني مهيئة نفسي للرفض
جنت اسمع بضربات كلبي ينبض بأذاناتي

لحظات فاتت من الترقب
وما حسيت الا وقاسم مد ايده واتلمس مكان
الوحمة

وهمس
.. هي هاي الوحمة الخبصتيني بيها وصارلج ساعة تحجين ومضيعة علينا الوقت

فتحت عيوني بتردد وهزيت راسي بموافقة
قرب راسه ومسح دموعي
وكال .. تصدكين اذا كلت الوحمة ما مأثرة على
جمال ونعومة بشرتج بشعرة وحدة

ما اشوف بيها اي شي يخليج تخجلين منها

وطول ما هو يحجي وياي ايديه تتحرك على طول الوحمة الموجودة على طول صفحة خاصرتي

.. بس اريد اعرف شنو هذا الاثر الاحمر الي محوطها

.. هذا من وغة (ورة) جلسة الليزغ (اليزر)
رجع مددني بحضنه
وقرب راسه على ركبتي وطبع شفايفه عليها وهمس

.. اذا جنتي دتسوين ليزر علمودي فأني اكلج
ميحتاج تسويها عاجبتني صدكي
كلك على بعضك حلو

نزل عيونه على رجلية
وكال .. وخصوصاً
هذني خبلتني الجنية برجليها
عود ذاك اليوم مسوية روحج زعلان. بالك عني
وضميتي شعرج عني وقررتي تحرميني من شوفته
وتالي الليل
من ادخل للغرفة الكة الجنية نايمة ومسويتلي عرض
سيقان ونايمة بالكاع

خرب بالحظ وانا كلبي يوزني عليج
ويكول حرامات هاي نعمة الله هيج
نايمة بالكاع.

جنت متمددة. بين ايديه ونسولف سوية حسيت بي يحجي وياي حتى يخفف من خوفي وابدي استرخي وياه
بس كلامه ذكرني.
بالبوري. الي اكلته بذاك اليوم

رجعت لوضعية الجلوس واني مبرطمة شفايفي
وحطيت شعري ورة اذني ولكمته بقبضة على كيف زعلانة

.. اي صدك اتذكغت ( اتذكرت)
تغة ( ترة) اني بعدني زعلانة وما نسيت.
موقفك بذاك اليوم
عابتلك جغحت ( جرحت) انوثتي

لزم ايدي وسحبني عليه حيل وكعت على صدره
وهو. يضحك

.. يااابة. حقك علينا هادي تعال خليني اراضيك
واستسمح منك
اتبدلت المواقع
ودنك وقرب راسه على وجهي وعيونه تنطق بالوعد
بعدها
وشمني بملكيته وصرت مرته قلباً وقالباً

شيماء

من عهد وفاة سليمة الله يرحمها
واني والبنات بدينا نشق حياتنا الجديدة

جنا كلنا نمر بفترة جديدة. من حياتنا
ضحى وطلاقها من سيف تم وبدت تسترد انفاسها
صارت تفتح مثل الوردة

ومريم ما بقى شي على عطلتها وتبلش تداوم
خامس خلصت دوراتها بالمعهد

واما مروة.
ااااخ يامروة هاي الي كاسرة خاطري

من يوم الي اكتشفت خيانة رافد وهي منطوية على نفسها متحجي وية اي واحد
شغلت نفسها بعيادتها ومركزها. وحتى مشمش هملتها
والشكلة حتى رافد اجة للبيت اخذ ملابسه وطلع

وبيومها اتعارك هو ومروة جنت اسمع مروة تكله
.. لك رافد ليش تخوني بشنو قصرت وياك

رافد.. مالج حق تلوميني على خيانتي الج
كضيتي عمرج كله. مشغولة. وملتهية بشغلج
ليل نهار. وكلما احتاجج ما الكاج يمي
انتي هواي مقصرة وياي

وبيومها مروة انهارت من الاعصاب وكامت تكسر
بغراض البيت وتشمرهم عليه

ومن يومها. طلعت رافد وما رجع. ومروة اتقوقعت على نفسها

بس الضحية من هذا كله بنتهم
خطية مشمش كامت تنام كله بحضني
تكول ماما هواي تبجي بالليل تخاف من الوحش
حتى اني اخاف من الوحش

وصارت كل يوم بالليل تجيني وبيدها ودبدوبها
وساحلة بطانيتها وراها
لامة شفايفها. وترمش بعيونها حتى اخليها تنام يمي
لا والجنية. تكلي. تغدين ( تردين ) احجيلج قصة
يعني مسوية براسي فضل

صحيت من افكاري على دوخول مروة اليوم قررت ما انام الا احجي وياها
اريد افتهم الى متى تظل دافنة نفسها وتتهرب
من حياتها

يتبع

احبكم كومة احبكم هواي
اختكم نهى الحسون ☺️☺️☺️☺️☺️