أساور الفضة الفصل الستون 60 - بقلم نهى

مساء الانوار والصحة والعافية عليكم يا احبتي

#اساور_الفضة_ج٢
#نهى_الحسون

ضحى
جنت واكفة اباوع لمهند واني كل الافكار السودة اتربعت براسي يعني مراقبني

مهند.. شنو شبيج ضحى اشو تحجين وياي بنترة

..هم الكم عين تجون وتحجون وياي بعد الشفته من اخوك ومن اهلك لتترجى اكون حبابة وياك

مهند.. عفو عليج انتي بتنا
مرت اخوي ومثل اختي. يعني زحمة هيج تحجين وياي

كلبي يريد يطلع من بين ظلوعي

.. اني جنت مرت اخوك
واتطلكت من اخوك بعد ماعندي شي يربطني بيكم

اباوع عليه ضاج وكام يباوع منا ومنا
وحجة بجدية
.. شنو ضحى شبيج راح نبقى واكفين هنا نظل نسولف
والرايح والجاي يباوع علينا
تعاي وياي نحجي بغير مكان
حتى نكدر نتفاهم لان هنا المكان مو مال حل مشاكل

هو يحجي وكلبي يرعد من الخوف احس راح يطلع من صدري وينج شيماء
اماني جانت واكفة على صفحة بعيدة اشرتلي ان هي اتأخرت وراح تروح
هزيت راسي بالموافقة لان بعد كلام مهند لازم انتظر شيماء وما احزر شكد بعد ًاتأخر

رجع عاد علية سؤاله
.. ها شنو رأيج نروح نكعد بمكان اعزمج على عصير وبنفس الوقت نحجي

هذولي والله امرهم عجيب هاي من شوكت نزلت عليهم اللطافة
اعرف بأسلوبهم الحقير يريد يستدرجني
.. اذا عندك شي تريد تحجي كوله هنا
لان شيماء قريبة راح تجي تاخذني

اتعمدت اذكر اسم. شيماء
.. زين على الاقل تعالي وياي نكعد بسيارتي بين ما تجي شيماء
حتى اكدر احجي وياج براحتي

.. مستحيل اطلع وياك لاي مكان
مهند من الاخير كول شتريد مني

اباوع عليه بدت عليه ملامح الغضب وشكله صار عصبي
.. دخيل الله شكد عنودية وراسج يابس
انا ما ردت منج شي غير بس نحجي بموضوع
سيف

..ماعندي شي احجي بخصوص موضوع سيف
لان سيف انتهى من حياتي. ماله داعي كل يوم واحد منكم يجي يحجي

اخير شي كب بوجهي وكال
.. شوفي ولج انا صارلي ساعة متحملج تتدعلين وتحجين براحتج.
انصحج نصيحة لوجه الله اذا هسة ما اجيتي
صعدتي وياي بالسيارة راح تعمين على روحج

يمة صخام هذا شنو قصده
.. انت شنو دتهددني. وليش انت هلكد مهتم اصعد وياك بالسيارة
معقولة هذا كله علمود تحجي وياي بموضوع سيف

..لا حتى اخذج وياي ارجعج على ذمة سيف
ما دام بعدج ما مخلصة العدة يحقلنا نرجعج

ارتديت للخلف مرعوبة. يمة وين جانتلي هاي
.. مستحيل ما اريد ارجع على ذمته
اني ما صدكت اتطلق واخلص منه
انتوا ليش هيج مهتمين ترجعوني لسيف

..والله رجال يريد يرجع مرته على سنة الله ورسوله
المفروض المثلج ابوها اثير
لازم تكيفين لان سيف فكر يرجعج على ذمته

.. انت من كل عقلك دتحجي صدك على شنو اكيف ؟!!
..اي احجي صدك
يعني سمعة ابوج ونوب تصيرين
مطلقة وداعتج ترحين بالرجلين والناس ما راح ترحمج

كل كلمة يحجيها مهند كلبي ينقبض ويزيد الخوف

.. صدكني جهنم اثير ولاجنة سيف
افضل اعيش حياتي وية اثير اهون علية من ارجع لاخوك وعذابه

صار وجهه احمر الظاهر وصل حده
اتقرب بتهديد
وزمخ بية .. انتي متكليلي شنو شايفة نفسج انتي
كلج خلك بنت اثير ابو العرك
مو زين ومن عدنا .......

علة صوته وارتبكت وصرت اباوع منا ومنا ياربي
مو حلوة بحقي اوكع بهيج موقف
ارتبكت من صياحه العالي حاولت اهدئه
.. عفية مهند ميصير تتهجم علية كدام الناس وبمكان عام. ترة هي مو بالكوة

.. اسمعي لج غصباً عليج تجين وياي انا جايب وياي سيد
حتى.........

قطع كلامه صوت مروة ووياها ابو ياسر

جانت مروة عبارة عن كتلة من نار
.. انت شلون تتجرىء وتهدد اختي
ابو ياسر حجة بكل هدوء
.. ام شيماء ممكن تهدين اعصابج
خلي نفتهم بالاول من الاخ شنو يسوي جاي هنا ورة اختج

مهند .. انا ممسوي شي اني اجيت حتى احجي وية زوجة اخوية
بخصوص زواجهم ونريد نطيب النفوس
و نرجعهم لبعضهم عادي ميحتاجلها كل هذا التهجم

ابو ياسر .. لا مو عادي. البنية عندها بيت
عندك كلام وياها تجي تدك الباب وتحجي كدام اهلها
مو تلاحقها مثل الحرامية وتتبع اسلوب التنمر وتستقوي عليها

مهند.. احترم نفسك ولا تتجاوز عن اي بيت دتحجي عليه
هي بالاول خلي يكون عندها بيت واهل مثل العالم
وبعدين اكعد اتفلسف براسي

مروة .. ضحى عندها بيت وعندها اهل
يوكفونك عند حدك والدليل اني هسة واكفة كدامك
واتحداك تتجريء وتفتح حلكك وياهة وتهددها

.. انا ميحتاج اهدد ضحى جبيرة وبعمر يخولها تتخذ القرارات
بدون ما ترجع تاخذ رأي خواتها

مستحيل اسكتلهم بعد منو اولى مني يدافع عني وياخذ بحقي
قاطعت كلامه .. لا مهند انت صارلك ساعة تهدد بية
وتريد ترجعني على ذمة اخوك بالكوة بالرغم اني
انطيتك ردي ورفضت بس انت بقيت تهدد وتتوعد

جنا نحجي ومروة نقالها كل شوية يدك عليها
اباوع عليها طلعته من الجنطة. وردت بسرعة
.. انتظروني ما اتأخر انتوا جهزوا غرفة العمليات
بين ما اوصل نهت الاتصال
ورجعت على مهند وابو ياسر

ابو ياسر ..طبعا تصرفك هذا ما ينسكت عليه
وعلى هذا الاساس راح نضطر نقدم بلاغ ضدك
للمركز.
مهند .. ميحتاج انا اجيت احلها بالتي هي احسن
بس الظاهر الست ما تدور الستر

مروة .. لاتكول هسة انت جاي لهنا وراها علمود
تدورلها الستر وخايف عليها

.. اي شكو بيها احنا ناس نحب الستر

ابو ياسر .. خلي اكلك من الاخير بصفتي رجل قانون
واعرف كلش زين انت واهلك على شنو تلفون وتدورون

انصحك ما تورط نفسك مرة ثانية وتلاحقها
لان اذا انعادت السالفة. ساعتها راح تلحك اخوك بالسجن. وقد اعذر من انذر

واشوف مو من مصلحتكم تكعدون تهددون
انتوا موقفكم ضعيف بالقضية فلا. تكعدون تزيدون الطين بلة
افضلشي تروح تستشير محاميكم قبل لا تخطون اي خطوة
بحق ضحى

مروة بإستعجال وتوعد.. شوف مهند والله وامان الله
اذا اختي ضحى يصير عليها اي شي صدكوني
انتوا حصتي

مهند الي حمت عليه الحديدة ومجان متوقع ان مروة مستعدة لاي تهديد مفاجيء
هواي استهان بقوتهامثل اخوه سيف وابوه.
كام يبلع ريكه ميعرف شيجاوبها
صدك عمر ذيل الكلب ما ينعدل

بعدما مهند سحب نفسه. وعيونه جانت تباوعلي كلها حقد وغيض
بس مكدر يفتح حلكه
لان فعلاً هذا الشي مو من صالحهم
اجة اتصال لمروة من شيماء
تستفسر ومروة فهمتها عن الصار

بعدها مروة راح لسيارتها بسرعة وهي تحجي بالتقال وية شيماء

وكان حديثها وية شيماء عن المراجعين
مروة.. شيماء بسرعة حضريلي فايل المراجعة نفسها الي مسوية اطفال انابيب
لان الظاهر راح يصير عندها ولادة مبكرة
اباوع عليها عدلت جنطتها فتحت باب السيارة بسرعة
والتفتت علينا اني وابو ياسر الي واكفين

وكالت .. عفية ابو ياسر بلا امر عليك وصل ضحى وياك بطريقك.

منا الى ان عقلي بدأ يصفي ويستوعب ويرتب افكاري
انتبهت لروحي ولموقعي وية هذا ابو ياسر

وارتبكت التفتت عليه وباوعتله
لكيته ديراقبني رفعت حاجبي واني انتظر منه
يعتذرلي عن الاشكال الي صار لان مروة
من حجيت وياها عن موقف ابو ياسر وياي
بوكتها اتصلت عليه وحجتله الموضوع
وهي تضحك

ما حجة اي شي اتقدم وفتحلي باب سيارته
الكدام وكال تفضلي خلي اوصلج

.. ميحتاج توصلني البيت هنا كولش قريب
.. ما انصحج تجازفين. وتمشين لوحدج
احتمال عيالج بعدهم يترصدون لحضرتج
ومنعرف شنو نيتهم

مجرد ذكر بيت عيالي وسيف يخليني ارتعد
صعدت بسيارته وسد الباب

ولميت كتبي وجنطتي علية انتبهت لروحي لاطشة عالباب

صعد بالسيارة. وبدة يسوق
باوع علية احس بي نظراته. تكرص
الصحيح بقيت اباوع ليكدام وما اتحركت

كال.. اكول ست ضحى ترة مو حلوة منج تستغلين
جهلي بمعرفتج وتخليني منطلق بالكلام بدون ما تنبهيني
عن سوء الفهم الصار عندي

خرب هذا شنو ناوي يتغدة بية قبل لا اتعشى بي
التفتت عليه وحجيت بغيض
.. اني ما استغليت جهلك بهويتي
اني فضلت اتغاضى
واسكت عن قلة احترامك وياي بالكلام
يعني هاي بدال متعتذرلي عن الاشكال الي صار

.. بالحقيقة اني ما عندي شي اعتذر عنه
ولا تتوقعين اسحب كلامي لان ما حجيت شي
غلط انتي فعلا حلوة. وشامتج عجبتني.

شهكت مصدومة من وقاحته وياي
.. انت صدك انسان وقح. ما اعرف مروة شنو شافت بيك وامنتني عندك
وصدكني مراح اسكتلك بس اوصل احجي لمروة على اسلوبك وياي
لان كلامك هذا بحد ذاته يعتبر تحرش

حجة بصوت ناصي مستفز
.. انتي تعرفين شنو معنى تحرش

.. اي تجاوزك ووقاحتك بالكلام هذا اكبر تحرش

.. خلي اصححلج المعلومة.
من اكول عليج الشامة على خدج تموت
وانتي بيج فتنة للعيون هذا معناها غزل

اما اذا اقتربت منج وبست الشامة او اتماديت اكثر
بالكلام العميق فهذا تكدرين تكولين عليه. تحرش

شهكت متفاجئة من جرئته وكلت
.. عفية سد الموضوع. انت هواي اتماديت وياي بالكلام
انت حتى ما احترمت مروة اختي

.. هذا ما له علاقة بأحترامي لمروة
انتي اتهمتيني بكلام مو من حقج تكولي عني
واني رديتج وين قلة الاحترام بالموضوع

عزة كلبي راح يوكف
هذا صدك لو كالوا عليه محامي كلشي عنده تحريف
وحقوق قلب الامور ويطلع الحق كله له

التفتت متضايقة اباوع عالطريق منا ومنا
.. عفية وين صار البيت اشو كلش طولت
لو رايحة مشي هم جان وصلت

.. يتخيلج ما طولت هو الطريق نفسه بس انتي مبين من
كعدتج لاطشة بالباب. كلش متضايقة
من تواجدج وياي

والتزمت السكوت ودرت وجهي عنه
بغيض

العجيب بالامر مروة دائما تحجي عن هذا الرجال
بأحترام ومواقفه وياها كلها تشهدله

بس ليش اني لحد الان ما شفت منه موقف يبيض الوجه
والشاهد عليه نظراته. الوكحة وكلامه الجريء وياي

شيماء
حياتي عبارة عن خواتي وعملي.
البارحة حيدر كان اخر يوم له بالمركز
خلص تجهيز عيادة دكتور الباطنية
ومر سلم علية. اني ومروة وراح

جان كل يوم يمر من الاستعلامات ويصعد بالمصعد
للطابق الثالث وهناك يبقى هو والعمال يبقى لحد ما يخلص شغله

واني طول ما حيدر يجي عالمركز
بطلت اكعد بالاستعلامات حتى ما التقي بي
اخاف كلبي يرجع يتأمل بحبه المستحيل

بس بنفس الوقت جنت انتظره من يجي حتى اكحل عيوني بشوفته
كان شباك عيادة مروة شاهد علية
جنت اوكف هناك انتظر رحمة الله تهب مثل نسمة هوى
على كلبي العاشق تروي شغفه المتلهف حتى يشوف طيفه

واليوم
واكفة بنفس المكان قرب الشباك
اباوع على الشارع مفتقدة وجود حيدر
هي مجرد نظرات مو اكثر بس كانت تغنيني
وترحم بحال كلبي. التعبان

اتهموا الحب بالعمى.
بس نسوا ان الحب هو نفسه ينفع يكون
مرهم يجبر بخاطر المحبوب
حتى لو كان ماله بالطيب نصيب

انتبهت لروحي بعدني واكفة يم الشباك انتظر
ها ياگلب بعدك تحبهم ما ناوي تنساهم
عجبي على حال گلبي المتيم يستلذ بنار العشق
مغرماً ولهانِ

قطع علية افكاري صوت نقالي
وكان المتصل هدى اختي

هدى .. الو هلا شومة شلونج
.. هلا وغلا هدوش ها كلتي لقاسم لو بعدج
.. اي هو اتصلت عليج علمود اكلج قاسم وافق اغوح (اروح ) وياج
بس كليلي بيش الساعة اجي امغ (امر) عليج
ونغوح (نروح) لبيت سليمة الله يرحمها

باوعت للساعة وكلتلها الساعة بال٢ الظهر
اذا تكدرين انتي والعم حسنين تمرون علية للمركز ومنا نروح
.. اوك تمام انتظغيني (انتظريني )

نهيت الاتصال وية هدى
اول البارحة اثير اتصل علية
وكال .. بعنا بيت امي الله يرحمها. اذا تردون غراضكم
تعالوا اخذوها.

الي فهمته من عنده ان همة باعوا البيت وقسموا الحصص بينه وبين امجد
اما عمو علي الي بالخارج ما يعرف حتى بأمه ميته لو عايشة
فلازم اروح اخذ غراضنا وحاجاتنا مناك
وحتى ذكريات امي مكينة الخياطة. وجنطة ملابسها الي اني محتفظة بيها
وكل فترة اطلعهم اهويهم حتى ليصير بيهم عثه

لذلك طلبت من هدى تجي وياي تساعدني
لان مروة مشغولة وضحى دتدرس سادس خارجي ومريم امتحانات
ومن حجيت وية هدى عن موضوع
بيت سليمة

هي عرضت علية ان تروح وياي تساعدني
اني مكدرت اطلب منها تجي وياي
لان اعرف بيها هي
هم عندها عيال وكلية. وزوجها كافي عليها
بس هي اصرت الا تجي.وياي

هدى

دوامي بالكلية خلاني اصير ام بيت ومنظمة اكثر من قبل صرت اقسم وقتي.
بين بيت عيالي وشغلي بي وبين زوجي وطلباته وكليتي ودراستي

مرت الايام وصرت احس بروحي اني ام البيت
خالة ام قاسم صار اكثر اعتمادها علية
بالحقيقة شخصيتها وتفانيها وحنانها على اهل بيتها
خلاني مثل العصفور الي يحتمي تحت جناح الصقر
حتى يستمد منه الدفئ والقوة ويحب يتعلم شلون
يكون قوي مثله

خالة فعلاً مدرسة جديرة بطلب العلم والتعلم منها
جنت اتعلم اسرار الحياة. وبنفس الوقت
صرت اعرف عن طريقها. اسرار قاسم
ونقاط ضعفه

نزلت سلة الملابس اريد اغلسهم ما دام عندي اوف
علمود وراي طلعة وية شيماء لازم اكمل شغلي من وكت

شغلت الغسالة
وبلشت بغسل الملابس
حطيت قميصي مالت الكلية الابيض وية قميص قاسم يصير ابيض بي كتابة عالصدر

ابتسمت واني اتذكر نظرات قاسم اول ما وصلت من الكلية للبيت
جان هو واصل قبلي للبيت
طبعا هاي جانت اول مرة يشوفني بزي الكلية

لان هو جان يطلع قبلي ويرجع وراي لذلك ما صادف
يشوف الزي علية. وبالحقيقة حتى اني مجنت مهتمة للموضوع

بس اول البارحة من شافني بالزي اباوع لنظراته
كصتني كص
صادف جان كاعد يحجي وية. خالة
بالمطبخ
دخلت وسلمت عليهم واترخصت منهم حتى اصعد ابدل
ملابسي وانزل للهم وانصب غدة لان هو ممتغدي

انتبهت لنظراته على طول ما اني احجي
هو عيونه على ملابسي

دخلت للغرفة نزعت حذائي. وحسيت بالحرية والراحة.
وحطيت سجلاتي والملازم عالميز. وعلكت الجنطة

فتحت شالي وشمرته عالسرير فتحت شعري
الي جان يطالب بالحرية. بعدها بديت افتح. دكم القميص
وحدة ثنين ثلاثة

دخل قاسم للغرفة وكال
.. لا لا اوكفي لا تبدلين
خلي اشوف.

عقدت حواجبي .. شنو تشوف
.. ما شايف مرتي طالبة. تدرين الي يشوف شكلج
وانتي بالزي ميكول طالبة كلية عبالك تدامين بالمتوسطة
ابتسمت بتعب جنت حيل تعبانة
اقترب مني وعيونه تريد تاكلني
حجة بصوت امر
.. بالله شو امشي كدامي.
خلي اشوف

باوعت عليه واني اضحك مبين من نظرات عيونه
قاسم ناوي علية. ما راح يخليني انزل الا ياخذ المقسوم

مشيت كدامه وعيوني لمعت بخباثة
نظرات الاعجاب بعيونه تسعدني

حجيت بدلع .. قاااااسم. عفية صيغ (صير) عاقل
والله وغاية (وراية) كومة شغل وفوك هذا كله عندي
امتحان لازم ادغس (ادرس)

اقترب مني وسحبني عليه
ودنك راسه علية وكال بصوت خشن
.. بالله شو تعاي انا ادرسج واشرحلج المادة الصعبة

صرت احاول اتسحب من بين ايديه
بس وين هيهات اين المفر

هالة.. امدا حظي.
كمزت من مكاني على صوت هالة
.. عمة حتى عمة كمزتيني شبيج تولولين
جنج وحدة عجوز ماكول عشاها

وشغلت الغسالة
وباوعتلها
جانت تحوم على راسي
.. لج هدى اريد اموت من القهر
.. ها شكو شبيج

.. كوثر اختي بنت امي وابوي من دمي ولحمي
.. عزة احجي شبيها ولج ستوني شفتها كاعدة يم خالة

.. بعد شبيها كاعدة يم امي ومنى وتكول
بيت عيالي يدورون على بنية حلوة وحبابة وبنت اصول
لحماي عزام
وتسأل امي اذا تعرفلها وحدة منا منا حتى توصي عمتها
ام عزام تشوفها

خطية جانت تحجي بحركة گلب
.. يا عيني شلون شغلة هاي هسة شنو غاح (راح) تسوين

ضربت بحركة كلب على رجليها
.. يعني احلفج بالله اني موحلوة شناقصني
هي تسألني واني اجاوبها

.. انتي ماكو احلى منج
.. اني حبابة لولا
.. انتي دغة (درة) مال الله

.. زين اني بنت اصول لولا
.. اهلج همة الاصل والنعم منهم

زين ما دام اني متوفرة بية كل هاي الموصفات
زين اختي شبيها متشوفني مناسبة
يعني الطم كليلي شنو اسوي

.. هالة بس خلي ببالج تغة صعبة كوثغ تقتغح (ترة صعبة كوثر تقترح )
عليهم يجون يخطبوج عيب ميصيغ (ميصير) اكيد تستحي

.. اوووف هسة شسوي
.. اني اكلج علكي لافتة على بيتكم
وكتبي بيها. يوجد لدينا فتاة صالحة للزواج
حلوة وحبابة وبنت اصول.
على كل من يغغب (يرغب) بالزواج علية التواصل معنا
على التلفون (*********)

.. لج عوبة اني مو كاتلة روحي عالزواج
اني ما اريد اي واحد
اني اريد بس عزام

سهلة نضيف على الاعلان فقغة (فقرة) وحدة
على المتقدم يجب ان يكون اسمه عزام
وبعد انتي وحظج

هالة.. تالي يطلعلي واحد اسمه عزام
رجال جبير بالعمر عجوز مكسرة سنونه ميكدر يمشي

.. اي يجي عليج فرحان
ويكلج هالة حبيبتي انا عذام. عندي كل المواثفات تتذوجيني
وخطية من زود الفرحة يوكع طقم اسنانه من حلكه
وينجلط وياخذوا للمستشفى

هالة واكفة فاتحة. حلكها. وتباوع علية
.. اكول ياحلوة انتي دتوصفين حظي لو عريس الغفلة
لان اشو ثنينهم مسكربين

شوفي شلون اخذتيني بالسوالف ونسيتي وراي شغل
حتى اروح وية شيماء

عفتها وبديت اطلع الملابس من الغسالة
وحطيتهم بالسلة

هالة.. لاعفية هدى لاترحين وتعوفيني والله اضيع
ويصير بية شي اموت
اخاف اسوي شي واخرب الاول والتالي

شلت الملابس واني اضحك عليها
.. كعدي وسكتي ولا تصيرين عوبة وتسوين شي
انتظريني منا الى ان اروح وارجع اكون مفكر بفد حل لمشكلتج

اخذت السلة وصعدت فوك
شريت الملابس. وحسيت بإلم ببطني عبالك مغص

ما اهتميت
دخلت لغرفتي وبديت احضر نفسي حتى اروح لشيماء
لبست جبة اسلامية وجواها اتراك حتى اكدر اخذ راحتي بالتنظيف

بعدما اخذني العم حسنين ومرينا على شيماء
صعدت شيماء بالسيارة

سلمت عليها وسألتها على ضحى
.. اكول شومة ضحاوي شلونها وشصاغ (وشصار ) وياها
من بعد اخغ مغة (اخر مرة ) خو ما غجعوا (رجعوا )
مغة (مرة) ثانية يضايقونها

.. لا بعد ماكو ما رجعوا. لان مروة بذاك اليوم
ما اكتفت بس بتحذيرهم. بيومها اتصلت على قاسم
وطلبت منه يحجي وية اهل سيف

يعني حبت تحاربهم من كل الجهات

عقدت حواجبي اشو قاسم ما كلي
.. يعني معقولة همة لهاي الدغجة (الدرجة) متمسكين بضحى

.. لا يابة شبيج صدكتي ترة الله وكيلج همة كل هاي هوستهم
علمود يردون يرجعونها لسيف
قبل لا يحاكمونه . لذلك جانوا يتعشمون اذا رجعت ضحى على ذمته.
راح تتنازل عن القضية ويصير الحكم لصالحه

.. اووف والله خطية ضحى

وصلنا لبيت سليمة
ولكينا اثير ينتظرنا

حييييييل شكد كبران وضعفان معقولة هذا اثير
سلم علينا وهو مستعجل
اثير.. كلش اتأخرتوا
شيماء.. الطريق ازدحام
.. يالله هاج هذا مفتاح البيت من تخلصون
قفلو البيت وخلوا المفتاح عند بيت ابو علاوي

بعدها راح وتركنا لوحدنا اني وشيماء حتى ما سألنا
عن احوالنا. يعني بني ادم شوكت. يلتفت لنفسه
ويهتم باهل بيته
دخلنا اني وشيماء وهجمت علينا الذكريات هجمة وحدة

جان البيت اظلم موحش فارغ وبارد
شيماء حجت بصوت ناصي وكأنما تخاف
على سرب الذكريات لا يختفي من كدامنا
.. اشكد. النا ذكريات بهذا البيت
.. اغلبها قهغ والفغح ( قهر والفرح ) بي ينعد على الاصابع

شيماء.. يالله هم يالله نبلش حتى ما ياخذنا الوكت

بعدها كمنا نعزل ونكتر بغراض البيت اغلب الغراض مبيوعة هذا اكيد اثير الي باعهم

طلعنا جنطة امي ومكينتها
دخلت لغرفة سليمة تخوف كلها ريحة رطوبة
اباوع لمكان المعرض والغراض كلها مختفية

مرت اربع ساعات على تحميل الغراض المهمة هواي اكو زعابيل ما نريدها لكيت عندي
لعابة قديمة اذا انومها تغمض عيونها واذا توكف تفتح عيونها جانت عين موجودة وعين مفكوسة

ضميتها بعلاكتي هاي لعابتي المفضلة
جان مشخبط على وجهها بقلم الجاف

بين ما طلعنا الغراض واني اسحب بالجنطة الجبيرة
حسيت بالم قوي مثل السكين ببطني
ونزل شي دافي من بين رجلية
دنكت لكيت بجامتي بيها دم
انرعبت
جمدت بمكاني وشهكت وباوعت لشيماء
شيماء بخوف.. شنو شبيج وجهج انخطف لونها

.. شيماء ما اعرف شبية بس بطني سكاكين تكطعني
من الالم

شيماء بنظرة العارف جاوبتني
.. ابقي بمكانج لا تتحركين
راحت دخلت جوة للبيت جابت المفاتيح وجنطتها والجبة. الاسلامية والشال مالتي وساعدتني
حتى البسها

قفلت الباب وانطت المفتاح للجوارين

وكالت ابقي هنا الى ان اجيب تكسي واجي
راحت ورة خمس دقايق وكفت سيارة التكسي يمي رركبت
واخذتني راسا على عيادة مروة

مروة بس شافتني طلبت اسوي تحليل حمل
حتى تتطمن.
وبعدها طلبت من شيماء تسويلي سونار
وبعد ما سويت كل هاي الاجراءات

مروة وبيدها اوارق التحاليل دتقراهم
باوعتلي وابتسمت
.. واخيرا هدى كبرت وراح تصير ام
كلمات مجرد كلمات بسيطة

بس كانت كفيلة برفع نبضات كلبي وتنزل دموعي
مثل زخات المطر. صرت ابجي واضحك بنفس الوقت

شيماء اقتربت علية ولمتني لحضنها
.. الف مبروك حبيبتي ان شاء الله تصيرين احلى ام بالدنيا

جانت تحجي والدمعة تلمع بعيونها
مروة .. يالله هسة اجلوا اللحظات العائلية
وخلونا ندخل بالمهم

وتبدلت معالم وجهة من اختي مروة الى الدكتورة مروة
.. شوفي هدى انتي حامل داخلة بالشهر الثاني
وضع الجنين جيد بس عندج الجارة متقدمة وهو هذا
سبب نزول الدم لازم تديرين بالج منا ورايح

كعدت مروة تكتبلي وصفة الدوة
وشيماء اخذت الوصل منها وراح جابت العلاج واجتي من صيدلية المركز نفسه

ومروة كعدت تعلمني شلون استعمله
اندك الباب ودخلت الموظفة وكالت

.. ست شيماء نقالج يدك بالجنطة
طلعته وكالت هذا قاسم ديتصل
كلتلها
.. شيماء عفية مو تكولين اني حامل اني اغيد (اريد)
اسويله مفاجئة
احب افاجئه
ردت عليه
سلمت عليه وسكتت وبعدها مدتلي النقال
كالت .. هاج قاسم يريدج

اخذت النقال منها
وجان يزمخ بية بصوت معصب
.. ادري اريد افتهم نقالج وين بأي زبالة ذابته
الي يريد يحصلج ما يلكاج يعني انتي من طلعتي
واتأخرتي كل هذا الوكت ما تفكرين تكولين وراي
بيت. ورجال خلي اسأل عليهم. اشوفهم وبن ما وين
لو درتي وجهج وهاي هي.

جان يحجي معصب بلعت غصة. دموعي
وحجيت بصوت ناصي ما اريد الفت انتباه خواتي
.. اسفة انشغلت واخذني الوقت ونسيت

.. انتي وين هسة
.. اني بالمغكز (المركز)مال مغوة

.. شتسوين هناك انتي مو كلتي رايحة وية شيماء لبيت بيبتج
.. بعدين افهمك اني هسة شيماء غاح تغجعني (راح ترجعني) للبيت

.. لا انتظري انا جاي قريب عليكم
سد النقال بوجهي حتى ما سلم
انطيت النقال لشيماء

مروة .. يالله بنات خلصت فلوسكم اتفضلوا برة
وراي هواي مراجعين متعطلين من وراكم
واليوم شومة عافتني لوحدي واموري لايصة

ابتسمت وطلعت وكبل لا اطلع مروة كالت
.. هدى مو تنسين من تطلعين هلي شيماء تسويلج كارت مراجعة عندي
شيماء.. ميحتاج توصين حريص
اي صدك دكتورة اخذ منها كشفية هالمرة لو ميحتاج

ضحكت مروة .. لا هالمرة كشفيتها ببلاش
بس المرة الجاية خلي قاسم يحرك جيبه شوية علمود ولي العهد

ابتسمت على كلامهم جانت فرحتي ما تنوصف حتى غضب قاسم ما كدر يكسرها

.. لحظات ووصل قاسم واتصل على شيماء
ووصلتني لحد سيارته

سلم عليها وصعدت وشيماء باوعتلي وحطت بحظني علاكة الادوية وكالت
.. ديري بالج على نفسج
وسلمت على قاسم وراحت دخلت جوة للمركز

باوع علية بعدها شغل السيارة وساق بيها بسرعة

التفتت عليه وابتسمت وكلتله
.. ليش ضايج
.. ليش يهمج امري اذا جنت ضايج

..طبعا تهمني غير زوجي حبيبي
.. مبين والدليل المغلق
على طاري النقال. هاج مد ايده عالكرسي الورة وانطاني علاكة بيضة بيها علبة باكيت مستطيل
بحجم كف الايد او اكبر بشوية

.. هاي شنو
.. هذا نقال جديد اشتريته الج بعد ما شطت من وراج

.. قااااااسم كافي عاد ترة هواي حجيت علية واني
مو زين علية انقهر

.......

شيماء
يوم ثاني الظهر في المركز
مثل كل يوم روتين المركز رجعت مروة من المستشفى

مروة اليوم الصبح عندها مواعيد عمليات بالمستشفى
وهسة يالله. رجعت للعيادة

خطية حتى ما. راحت للبيت علمود شوية تاخذلها ريست كالت مريت هنا حتى اخذج وياي ونرجع سوية للبيت نتغدة ونوب نرجع للعيادة

.. اوك بس خلي انطي القائمة المراجعين
للموظفة حتى اجهز نفسي واطلع وياج

طلعت وية للاستعلامات واكفة احجي وية الموظفة

فجاءة اسمع صوت صياح
التفتت وجان اشوف
رياجيل ثنين لابسين عكل ودشاديش وثلاثة لبسهم عادي والمريتين لابسات عبي راس جانت نظرات الفزع والخوف مبينة على وجههم

لكن مبين كل القادمين وجان اشوف من بينهم حيدر
ديركض مرعوب
صدمتني نظرة الفزع والخوف المرسومة على وجهه لكن الصدمة الكبرى

جان شايل بيده بنية جبيره يجي عمرها بسن المراهقة
ما كدرت احزر عمرها لان لحظات و
حيدر شافني اتجه علية بكل خوف وعيونه تستنجد بية
مثل الي واكع بشدة

عيوني اجتي بعيونه وحجة بصوت مكسورة

.. شيماااااء لحكيني بنتي سرى...........

يتبع

احبكم كومة احبكم هواي
اختكم نهى الحسون ☺️☺️☺️☺️