أساور الفضة الفصل الحادي وستون 61 - بقلم نهى

مساء الانوار والخير والعافية عليكم احبتي

#اساور_الفضة_ج٢
#نهى_الحسون

شيماء

نظرات خوف وفزع واستنجاد اشوفها بعيون حيدر
حيدر كلي وعيونه تتوسل بية
.. شيماااااء لحكيني بنتي سرى...

انشليت عن الحركة وعيوني مفتوحة على وسعها
مصدومة من اثر الخبر
لكن سرعان ما اتلاشت الصدمة بمجرد ما القيت نظرة
على شكل بنته الملفوفة بشرشف وضامة راسها بصدر
حيدر او بالاحرى ابوها.
كان منظرها واضح بحكم خبرتي بعملي ميحتاج التفسير

جان حيدر فاقد وشكله يوحي بالضياع
ميعرف شنو يحجي. كان بس يرددد كلمة
.. شيماء بنتي.

وصوت بنته المرعوبة المدفون في صدر ابوها
ما حسيت بروحي الا واني مستلمة المهمة
وشيماء المنكسرة بحلمها راحت وتلاشت
واخذت مكانها شيماء الممرضة اتولت زمام الامور

وركضت بهرولة كدام حيدر وكلتله
.. حيدر بسرعة تعال وراية
لعيادة مروة.

من حسن حظه ان الوقت ظهر بعد وقت على المراجعين
دكيت الباب على مروة وفتحته بسرعة من دون ماانتظر تجاوبني

ودخل حيدر وراية
وانتبهت للنسوان الثنين هم دخلوا وراه
شكلهم وكلامهم مو من بغداد بس مبين عليهن اقارب حيدر

طلبت منه يحط بنته على سرير الكشف
حطها وراد يبتعد حتى يفسحلنا المجال
وهي كامت تصرخ مفزوعة تتوسل بي ميعوفها
جانت معلكة ايديها بركتبه متقبل تعوفه
.. بابا لا بابا الله يخليك لتعوفني والله اموت

اباوع عليه مدنك عليها وشلون يغمض بعيونه بألم موجوع.
عبالك واحد ديطعنون كلبه وهو لازم يبقى واكف وصامد

وحدة من النسوان زمخت بيها
.. ولج ثولة فضحتينا خلي ابوج يطلع
حتى تكشف عليج الدكتورة
بس لا مكسورة واتسود وجهنا بين الوادم

حيدر عاط بيها
.. ام سجاد رحمة على والديج سكتي
كرمينا بسكوتج

المرة الثانية.. يا خوية عليش تصيح بينا
غير احنا عماتها ونريد نعرف شجرى وشصار عليها

اني كبل دك جرس عندي من انتبهت لحيدر
كعد يحجي ويدردم بصبر شكله ما طايق وجودهم

رحت بتجاه النسوان
.. العفو ممكن تتفضلون برة تنتظرون
حتى الدكتورة. تشوف شغلها

باوعتلي وحدة منهم وكالت
.. دكتورة على كيفج ويانة ليش تطردينا
خلينا هنا نريد نعرف شنهي السالفة شبيها الفرخة

عبالهم اني دكتورة ما اهتميت اصححلهم اعتقادهم
وكلتلهم .. رجاءاً. بدون مشاكل هاي قوانين العيادة
اتفضلوا برة وبعدين الدكتورة تفهمكم شنو الموقف

انتبهت لمروة كامت من مكانها وبدت تجهز الادوات من الخزانة
ولبست كفوف بلاستك وصاحتلي

.. يالله شيماء تعاي ساعديني
.. صار دكتورة بس لحظة

التفتت عليهن وحجيت بجدية صارمة هالمرة
.. رجاءاً طلعوا. برة ترة انتوا بتصرفاتكم تعرقلون عملنا
واذ ميعجبكم اخذوا بنتكم وروحوا

اباوع عليهم من شافوا الامر صار بي عدم استقبال البنيه
عرفوا راح يترزلون من الرجال الي بره الي جايين وياهم
التزمن بالسكوت واحترمن نفسهنوطلعن برة

وحيدر جان يحاول يقنع بنته ان تتركه وتخليه يطلع ويعوفها لوحدها يمنا

حيدر .. بابا سرى لتخافين هاي خالة شيماء الي حجيتلج عنها.
واختها الدكتورة مروة

جانت سرى مفزوعة لدرجة متسمع لاي واحد

يالله انمرد كلبي عليها
انتبهت لحيدر الرجل الجليدي الي جان دائما شخص بارد هاديء
اليوم هالني منظر دموعه المعلكة بعيونه
على بنته الي جانت بعدها متعلكة بركبته
متريد يعوفها

وضامة راسها بركته. وتبجي بألم
اباوع عليه سحب نفس عميق وزمخ بيها
بغضب حتى يبعدها

.. سراااااااا كافي لخاطر الله. ترة تعبت عوفيني. وصيري قوية

فكك ايديها من حول ركبته ونزلها وحاول يبتعد عنها وهي صارت ترجف بهستيريا

باوعت لمروة الي جانت واكفة يمهم ومنتظره حيدر يطلع وتكشف على وضعها

اقتربت واني اترجاها تسوي حل لان البنية. فرفحت
روحها وتكسر الخاطر بخوفتها
لفت انتباهي كلامها وهي تصرخ
تكلة.. بابا عفية لا تعوفني والله يذبحوني

مروة راحت للمكتب ولزمت القلم
وكتبت على ورقة وكالت
.. شيماء بسرعة روحي جيبي هاي الابرة من الصيدلية

التفت عليها حيدر وهو يستفسر يريد يعرف شراح تسوي
اخذت الوصفة منها ورحت ركض للصيدلية واني اسمع مروة تجاوبة
.. لتخاف حيدر شوية مهديء راح يساعد بنتك على تهدئة اعصابها
ويساعدنا حتى نشوف شغلنا ونفحصها

وصلت للصيدلية وانطيت الوصفة
مروة بحكم عملها جانت جداً جريئة وعادي تتكلم مع
المرضى والمراجعين عن بعض الخصوصيات الزوجية او بما يخص الامور النسائية

طلعت من الغرفة وصاروا الرياجيل والنسوان الثنين بوجهي
وواحد منهم اتقدم كان لابس دشداشة وعكال
وكال .. ها دكتورة بشري شلونها بتنا
.. حجي بعدها الدكتورة يمها وتكشف على حالتها

تركته ورحت عالصيدلية وانطيته الوصفة
وانطاني الابرة المهدئة للاعصاب
تهديء المريض ترخي اعصابه المشدودة بدون ما تخليه ينام

رجعت لمروة ولكت حيدر على نفس وضعه
ومروة تحجي وياها تريد تفهمها وسرى دافنة راسها بركبة حيدر
وبعدها ملفوفة بالغطا
انطيت لمروة الابرة اخذتها مني وبدت
تحضرها واني اقتربت من سرى وطلبت من حيدر

يلزمها قوي خاف تتحرك وتأذي روحها
ومروة بسرعة ضربتها الابرة بالعضلة
بعدما كانت سرى تقاوم خايفة نسوي بيها شي

ورة دقايق بدة مفعول الابرة يظهر على سرى
وبدت ترخي ايديها عن حول ركبة حيدر
لزمت كف ايدها وساعدتها تتمدد على ظهرها

عيونها حمر بدت تذبل من التعب
حيدر جان لازم ايدها الثانية وباوع علية وعلى مروة
حسيت بي يريد يحجي وياي بس ميكدر

انكسر كلبي على حاله
ما هان علية اشوفه متأذي ومكسور هيج
اتمنيت اخفف عن حمله والمه ولو جزء بسيط

استدار يريد يطلع واني سبقته اريد افتح الباب
حتى اغلقه وراه
جان مدنك راسه. وكال
بصوت مكسور.. شيماء ارجوج في غض النظر عن النتيجة.
ما اريد احد يعرف بالصار ارجوا ان تتكتمون
عن الموضوع حتى لاهلي ما اريد يعرفون

راح اعتبره فضل ما انسالج اياه
اني اتعمدت اجيب بنتي لهنا لان ما عندي غيرج
اكدر اثق بيها والجيء الها بشدتي
متأكد انتي راح تساعديني

ابتسمت حتى اطمنه
.. حيدر لتخاف بنتك احطها بعيوني واوعدك
ما اخيب ضنك مادامك لجئتلي
اعتبر بنتك بأمان

وجهلي نظرة امتنان ودنك راسه وطلع
ربي يكون بعونه

مروة .. شيماء تعاي شوية
رحتلها بسرعة بعدما غلقت الباب
.. ها دكتور
مروة باوعتلي وضمت شفايفها بأسف
وعيونها نظرة قهر واعتذار

.. شيماء البنية متعرضة لحالة اغتصاب
ومع الاسف كلش متأذية

نقلت نظرتي لسرى الي جانت متمددة على ظهرها والدموع لازالت تنزل بهدوء

مروة .. شيماء انطيني ابرة تخدير
لازم اسويلها تنظيف ونخيط الجرح
وننطيها حبوب منع حمل للطوارئ
لحالات الاغتصاب حتى تمنع الحمل

جانت مروة تشتغل وتحجي وياية واني
اساعدها وسرى بدت تغفى وترجع تصحى
بصورة متقطعة

بدت مروة تنطيني التعليمات واني اكتبها بعدها
حجيت وياها
.. مروة راح يدخلون اهل حيدر يردون يفتهمون منج عن البنية شصار بيها
اتمنى ان يبقى موضوع حالتها بيني وبينج وبين ابوها
وبعدين افهمج

مروة .. يعني شنو قصدج احجيلي طبياً

.. يعني تكلليهم ان البنية صحيح اتعرضت للاعتداء والضرب
بس الحمدلله المعتدي ما واصل لغشاء البكارة

.. زين شلون بهذني النسوان الي جانوا واكفين
اخاف يكشفون عليها وراح يلاحظون الخياط وغيرها من الامور
حتى حركتها بالمشي راح تبين

.. مروة راح ااكد على حيدر ان يطلب من امها
متخلي اي وحدة تتقربلها
وتكول لهذولة الناس هاي الفترة علمود حالتها النفسية
منكدر نخليها تلتقي بأي شخص لان صايرة مثل المخبله
اي حجة تكولها الام المهم ميشوفون البنيه

سمعت صوت سرى الهامس
تحجي بس مكدرت اسمعها الا من رحت اقتربت عليها
ودنكت راسي حتى اعرف شنو تريد
همست مرة ثانية بضعف وكالت
.. خالة ماما متوفية

شهكت وحطيت ايدي على حلكي
يالله دخيلك خطية البنية تحتاج لامها

اتذكرت روحي ويوم الصار بية وية المختار
وشلون رحت لحضن امي اشتكيلها.
وشلون لمتني لحضنها وكعدت تسألني بخوف مفزوعة

ما اعرف شلون حوطتها بحضني وهمست
.. حبيبتي الله يرحمها. الحمدلله عندج اب
يحبج ويخاف عليج

ضمت وجهة بحضني تبجي خطية شكد متأذية
اتمنيت اسألها شلون صار بيها هشكل ووين

بس وضعها ميساعد تحجي
بعدما انتهت المهمة.
مروة نزعت الكفوف وغسلت ايديها بمعقم
وراحت لبست نضاراتها الطبية وبدت تكتب
وكالت .. شيماء مادام هيج انطي رقم نقالي لحيدر
خلي يتصل علية من يكدر ويصير عنده مجال يحجي
لان اكو تعليمات وكلام لازم احجي وياه بخصوص حالة بنته
لان بعد طلبج الغريب ما اكدر اكوله شي كدام اهله

..تمام هسة انطي رقمج
دكتورة هسة يدخلون لو بعد

.. خليهم يفوتون حتى احجيلهم
بس قبل كلشي روحي احجي وية سرى وفهميها
اي واحد يسألها عن الموضوع تكله ما اعرف اي شي

رجعت لسرى الي جنت شبه غافية
ركعت قرب سرير الفحص يم راسها وهمست
.. حبيبتي ممكن شوية تصحصحين وياي
وتسمعيني زين

رمشت بعيونها بضعف وهمست
.. امممم اكدر
.. حبيبتي شوفي اريدج تصيرين سباعية
وتتعاونين وياي
.. شنو اسوي
.. اي واحد يسألج عن الصار متحجين ولا تكولين اي شي
حتى لو كانوا عماتج نفسهم
حتىلو اقرب الناس الج
متكولين لان الصار محد راح يعرف بي
بس اني وانتي وابوج والدكتورة مروة الي هي اختي

.. اذا لحو عليج بالسؤال كليلهم ما اتذكر شي جنت خايفة
هزت راسها بموافقة.
جانت معالم الخوف محتلة كل معالمها
وكالت .. خالة تعاي وياي عفية
لاتعوفيني لوحدي اخاف منهم
خاف بابا يروح للشغل ويتركني يمهم

باوعت لوضعي ووعدتها
.. حبيبتي اكيد امر عليج من غير ما توصيني
حتى ابدي اشرف على وضعج بنفسي
لان ابوج ميكدر يجازف و يجي للعيادة ويثير الشك عندهم.
بس هسة حالياً ما اكدر اروح وياكم لان اذا رحت راح الفت انتباههم

همست بأمتنان
.. خالة شكرا

طلعت وطلبت منهم يدخلون واستوقفت حيدر
بحجة اخذ منه المعلومات. بخصوص عمر سرى
وغيرها من المعلومات المهمة
حتى املي فايلها خاف يريد يقدم بلاغ بحق احد
يفيده التقرير

دخلوا على مروة وعيونه راحت وراهم
عرفت بي يريد يدخل وياهم
باوعت عليه وبسرعة مديت ورقة بيها رقم مروة

.. حيد.. ااقصد استاذ حيدر
هذا رقم مروة ضروري تتصل عليها من تشوف نفسك تكدر تحجي وياها.
حتى تفهمك على وضع سرى

سحب نفس عميق بتوتر ومسح بكف ايده على وجهه
وسألني
.. شيماء شلونها بنتي
عرفت على شنو يسألني اني مارة علية هواي هيج حالات
وردود افعال الاهل واسألتهم تكون متفاوتة
ما بين الخجل من السؤال وما بين الجرئة الوقحة. وغيرها
وحيدر من هذا النوع

جاوبته .. مع الاسف جنت اتمنى اطمنك واكلك
ماصاير شي ببنتك.
حيدر غمض عيونه وانخطف لون وجهه
وكال.. بالرغم جنت متأكد من الصار بس تعرفين قلب الاب
يرفض يصدك ان واحد من اولاده تأذى من شي
ومو اي اذية لا هاي مصيبة

اخذ الرقم مني وكال لازم ادخل
اشكرج مرة ثانية على وكفتج وتسترج على بنتي

ابتسمت وجاوبته
.. استاذ حيدر ترة الحياة دين
واني اليوم وفيت ديني

ختمت كلامي وابتعدت عنه ورجعت للغرفة وهو اجة وراية دخل

جانوا النسوان الثنين ورة الستارة الي بيها سرير الفحص
يم سرى
والرياجيل شي كاعدين وشي واكفين
وواحد منهم جان شاب. قلق يجي عمره بحدود العشرين
جان يحوم وعيونه كل شوية تصد على مكان السرير

بين ما جنت اخذ المعلومات من حيدر
دك نقالي وجان المتصل هدى
انطيتها رفض ورجعت اتصلت رديت عليها بصوت هامس وكلتلها
.. هدى. بعدين احجي وياج عندنا حالة طارئة

جانت مروة تحجيلهم وتفهمهم عن وضع سرى
لفت انتباهي اسئلة الرجال الجبير ابو العكال
سأل مروة بشكل مباشر
.. يعني دكتورة بتنا نظيفة. ما بيها شي
مروة.. نعم بنتكم ما بيها اي شي غير بس بعض الكدمات
لان الظاهر المعتدي جان غايته اذية الضحية حتى لتفضحه
وليس الاعتداء

حيدر جاوبها بسرعة
كال.. اي نعم بيتي. اتعرض للسرقة والذهب والفلوس
تم سرقتهم من قبل المعتدي

المرية كالت.. اي لكينا البيت مكلوب. كلاب عبالك
قنبلة مفجورة بي.

واحد من عندهم جان ينطي شبه لحيدر بس اكبر منه
ولحيته بيها شيب. جان لابس نفس ملابس حيدر بنطرون وسترة سبورت

كال .. الحمدلله بالمال ولا بالعيال الله دفع عنها
انتبهت للشاب مثل الي وصل حده
وسبقهم كلهم وسأل مروة
.. دكتورة طمنينا هسة هي شلونها. خوما متأذية

مروة.. طبعا اكيد متأذية
لتنسى هي تعرضت لعنف جسدي
وضرب بقوة واتوقعوا المريضة راح تعاني نفسيا من الصار
لان الخوف الشافته باثناء التعرض للهجوم مو قليل

انتبهت لحيدر عين على بنته وعين على مروة
والوجوه الي جانت قبل ساعة حادة سنونها والشر يمليها
اتغيرت معالمها وصارت تتحمد الله وتشكره

كام الرجال الجبيرة من مكانه والبقية كاكوا وياه
والتفت على حيدر وكله
.. بوية حيدر جيب بنتك وتعال وراي على بيت اخوك
خلي اشوفها قبل لا اسافر وارجع للناصرية

طلعوا من الغرفة. والنسوان بدوا يساعدون
سرى حتى تكوم من مكانها
حيدر بصوت امر كال
.. لا ام سجاد عوفوها اني اجي اشيلها
متكدر تمشي رجليها بادت من الخوف

رجعوها لوضعيتها وراحوا طلعوا ورة الرياجيل
وحيدر شال بنته وطلع وياهم
وحدة منهم سألت
.. شني ماكو دوة شي. للبنية
حيدر.. الوصفة عندي هسة اجيب العلاج من الصيدلية
بس اوصل الحجي للسيارة جان يقصد عالرجال الجبير
المعكل

طلعت وراهم حتى اتصل على ضحى الي صارلها ساعة تتصل على مروة
حتى اطمنها ان اليوم ما نلحك نرجع نتغدة بالبيت

سمعت واحد من الرياجل جان لابس دشداشة
مبين هو اصغر من الرجال المعكل الجبير
حجة وية حيدر بعتب
.. لو مزوجنا بنتك جان هسة. ارتاحيت من دوخت الراس ومسؤليتها

حيدر جان يمشي وياهم وتوقف وخلة
الحجي الجبير والوراه يعبرون كدامه يطلعون للشارع
والتفت جاوب الرجال بغيض وكال

.. ابو مؤمل مو وكته هذا الحجي
لا عدالك بعد الي صار
اوافق ازوج بنتي. لأبنك
اني بنتي مابيها شي الحمدلله وبعدها جوهرة ابوها

خلها ببالك موش اني الي تنلوي ذراعي لو اهتم بهيج
امور

بقيت واكفة ببمكاني وفاتحة حلكي متعجبة على
حيدر شلون يحجي بلهجة جنوبية وهو حاضن بنته يدافع عنها
كمية المفاجئات الي اكتشفتها بهاي الساعتين الاخيرة
عن حيدر كانت كفيلة
ان تنقلني من صدمة لصدمة

...........
هدى

رجعنا للبيت وقاسم خلص الطريق كله مكالمات
ردت بس شوية يترك النقال من ايده. حتى اكدر اكله
عن خبر حملي ما دام اني وياه لوحدنا بالسيارة
بس وين استاذ قاسم
وصلنا للبيت وهو على نفس الاتصالات

دخلنا ولكيت حماتي كوثر وجهالها ومنى موجودات
وخالة ام قاسم دتحجي بالنقال. والكل كاعدين بالمطبخ

هشام حاط زيوني وجواد وكاعد يتلاوة وياهم
بالكاع عبالك كاعدين بحلبة مصارعة

سلمت عليهم بعدني ما كعدت قاسم خلص اتصاله
وكال .. قبل لا تكعدين سويلي عشا ميت من الجوع
كوثر .. لعد من كلتلك امي قبل شوية تعال اتعشى ويانة
ليش كلتلها ما اشتهي لو انفتحت شهيتك من شفت مريتك

ام قاسم سدت النقال وباوعت علية وكالت
.. ها خالة شلونهم خواتج
.. بخيغ (بخير) والحمدلله يسلمون عليج

بديت اطلع من الثلاجة همبرغر من الفريز
هالة حجت من مكانها ضايجة وكالت
.. هدى لاتسوين عشا جديد .
اكو هواي زاد من العشا بس حمي تلكينه بالثلاجة حطيته

خطية هالة ضايجة طاكه روحها
طلعت العشا واني بعدني لابسة الجبة
والشال
ودخلت للمطبخ الحار
اباوع لقاسم جان يفتر وراي
جاب بيده طماطة وكال

.. كلي وياج هاي الطماطة.
.. هسة بس احط الشوغبة عالناغ (الشوربة عالنار) واسويلك

اباوع عليه بقة يحوم فوك راسي بالمطبخ الحار
طلع سكين وتختة وبدة يقطع الطماطة

.. لا عوفها اني اسويلك
.. اي بين ما تكملين اني اقطع الطماطة
رفع راسه وهو بعده مطنكر وعاكد حواجبه

سمعت صوت خالة جانت تحجي وية بناتها بصوت عالي مثل الي تبسمر
.. والله زمن الي خلة الناس تدخل للمطابخ

هشام جاوبها
.. ها حجية من هسة اكلج انا ادخل للمطبخ وية مرتي
اساعدها لا عبالج تكعدين تعيرينا

احلى شي قاسم عبالك الحجي مو يمه
ولا اهتم ياجبل ما يهزك ريج
اني من يمي استحيت
.. قاسم انطيني خلصت.
طلعت الطاوة وبديت اكلي

وهو بعده يمي طلع الصينية. وسألني
.. متعشية لو لا
.. ما اشتهي شبعانة
.. بعد عليمن خو كولي اتعشيت ونسيتك.

.. لا والله ما اتعشيت متكلي وين اتعشا
هو بيت بيبي سليمة مهجوغ (مهجور). عبالك كهف

.. شنو كملتوا شغلكم لو بعد وراكم
.. بالحقيقة بعد بقة شوية بس

.. خلي ببالج ماكو روحة مرة ثانية
سقط حقج هاي هي

خلصت الاكل وحطيته بالصينية.
واخذه مني وحطاه عالميز
وصاحلي تعاي كعدي اتعشي وياي

استحيت جانوا خواته وامه واخوه كلهم كاعدين
شي كاعد على ميز الطعام وشي كاعد على القنفات
لان المطبخ البارد جان كلش جبير وبي تلفزيون ونص طخم قنفات

اجيت وكعدت يمه واني ما مشتهية اكل لان نفسي لعبانة
.. بدة ياكل ويسولف وية خواته وامه

وكل شوية عيونه تصد علية.
ينتظرني اشارك وياه بالكلام
بس بالحقيقة اني عقلي يفكر بغير وادي
جنت افكر شوكت نصعد لغرفتنا لوحدنا حتى احجيله احلى خبر بحياتي

خلص عشاه واني شلت الصينية وديتها للسنك وغسلتها
دخل قاسم للمطبخ الحار واقترب عليه ودنك راسه
وكال .. انا صاعد فوك مو تتأخرين انتظرج
حجاها بصوت ناصي ابتسمت

وكلتله
.. صاغ (صار) بس اخلص اصعد وغاك (وراك)

وبين ما خلصت المواعين وطلعت لكيت قاسم ماكو

هالة غمزتلي واشرتلي اجي اكعد يمها
معناها عندها حجي تريد تحجي
رحت كعدت وكبل هي نزلت بكلام

.. لج هدى سكتي اكتشفت شي بالصدفة خلاني ادك والطم على وجهي
.. شنو احجي.
.. لج طلع عزام يحبله وحدة من زمان واتوفت صارلها سنة
وهسة هو شالع كلب اهله عالمواصفات الي يريدها بعروسة المستقبل
كوثر تكول احتمال ديتهرب من الزواج

.. وانتي شنو غاح (راح) تسوين يعني شنو شعوغج من عغفتي (شعورج من عرفتي)
.. هدى بالحقيقة معرفتي بعزام جان يحب وحدة ثانية ما غير من حبه بكلبي ولا شعرة

لان اني من بديت احبه كضيت عمري من طرف واحد وماعندي شروط
ولا هو واعدني بشي او عنده علم بحالي

بس اتوصلت لشغلة
عزام ما طاري على باله ان يفكر بية كزوجة
.. وانتي شلون عغفتي (عرفتي ) يافهيمة
.. لان اني اربعة وعشرين ساعة كدامه
يعني مفكر بية مجرد تفكير جان ابسط شي يلمح لكوثر
مو لكوثر يروح لهشام مو هشام يكلي اني اشو هواي صدف مصخمة نلتقي بيها
يعني عنده الف وسيلة لو يريد

.. هسة افتهم من كلامج ان انتي غاح (راح ) تنسحبين
وهاي هي انتهى الموضوع بعد ما تدكين وتلطمين على راسي
.. لا يابة. شكلولج عني. هيج اني عوبة واتنازل عنه
بهاي السهولة
.. يعني شنو قصدج

.. يعني الما يجينه بالطيب والعيني واغاتي
احنا نروحله ونسحله من ياخت قميصه
ونخليه يتزوجني ما غصباً عليه
لهنا وكافي هواي انطيته مجال. وصبرت عليه

.. عزة بعينج هالة والله الي يشوف هاي الانوثة
والنعومة ما يفكغ (يفكر) بيج عندج هيج افكاغ (افكار) عنفوانية
يعني شنو راح تخطفين الرجال من بيت اهله
لو شنو

.. بس صبري علية واني اكلج.
جنت مندمجة وية هالة بالكلام وبنفس الوكت فرحانة
كل شوية اتلمس بطني ونسيت نفسي

سمعت صوت قاسم الضايج
باوعت عليه جان مبدل ملابسه ولابس اتراك منزلي
بعده عاكد حواجبه وشايل بيده نقالاته ومفاتيح السيارة

.. صارلي ساعة من صعدت للغرفة.
شنو ما ناوية اليوم تصعدين لغرفتج
لو ناوية تعزلين البيت على ايدج يالله تفكرين تصعدين

.. ها اي هسة اصعد كمت من مكاني وهو كال
.. لا ابقي اخذي راحتج بالسوالف
ميحتاج تصعدين انا طالع يم جماعتي بالكوفي

رحت اقتربت منه وكلتله بصوت ناصي
.. اسفة حبيبي لتغوح (لتروح) عندي كلام مهم اغيد (اريد) احجي وياك

.. انتظريني من ارجع احجيلي
شفته التفت للباب يريد يطلع

كال لهشام
.. هشام كوم افتحلي باب الكراج اريد اطلع السيارة
اني درت وجهي وباوعت لخالة والبنات والدموع بعيني
ما اعرف شبية اشو صايرة
دمعتي سهلة وبسرعة ابجي

وهو جان منتظر هشام يلبس نعاله. يم باب المطبخ
انطيته ظهري وحجيت وية خالة
.. خالة اليوم حللت بمغكز مغوة ( بمركز مروة. ) وطلعت حامل

مجرد ما كلت هاي الكلمات
وجان اشوف الوجوه
انكلبت بين المفاجئة والفرح

لحظات ولكيت نفسي انتقل من حضن لحضن
وخالتي كامت تهلهل

وهالة .. ابشرج من هسة اكلج ضاع مستقبل ابنج او بنتج المكرودين
لان انتي امه واني عمته.

هشام.. هالة من هسة اكلج ما تقتربين من
ابن قاسم. لان انا عمه واولى بي. وبتربيته

كوثر.. هاي اذا ام قاسم انطتكم مجال تقتربون منه
جواد .. اقترب مني وكال
.. هدى جيبي ولد جبير حتى العب وياه
وبنت منى كالت .. لا لا اني اريد بنية

منى.. راحت عليكم وخرب سوكم ان شاء الله ولي العهد راح يشرف.

باوعت لخالتي راحت وراية وكالت
.. يمة قاسم الف مبروك ويتربى بجاهك
التفتت واتفاجئت بعده. واكف بمكانه

و البنات صاروا يهنون قاسم
وهمة يحجون وياه

ونظرات عيونه علية. بيهم لمعة فخر
نفسها هاي النظرة من امتلكني وتمم زواجنا

اقترب علية وعيونه بعيوني
رفع وجهي ودنك راسه علية. وباسني من كصتي
.. الف مبروك جنيتي. راح تصيرين ام

بس شوكت جنتي ناوية تكليلي عن الحمل

جنت محرجة لان كدام اهله وقريب علية
همست بصوت ناصي
.. كله انت خغبت (خربت) المفاجئة عابتلك
على كلٍ .. مبغوك (مبروك) عليك انت هم غاح تصيغ ( راح تصير) اب

ضحك .. حقج علية جنت ضايج

هالة .. ياجماعة الخير ترة يوجد حولكم حدايق
فاحذروا. وخافوا الله فيهم

ويلكم من الله ويلكم من الله عليكم اللحمه

هشام واكف يمها ويمسح دمعة وهمية ويجر حسرة

.. اخونا العزيز اخذ مرتك. واصعد بيها فوك
بلا عرض مشاعر امام الجمهور.
وداعتك قلبي الصغير لا يكدر ولايحتمل

اني حديقه وبدون ثيل هم

ام قاسم.. يمة خمسة وخميسة بعين الي ما يصلي عالنبي
بالله شو وخروا انتي واختك لا تنفسون الرجال

جنت اضحك وانتبهت لقاسم
كل شوية يباوع لبطني.
ورة ساعتين جنت نايمة بالسرير بحضن قاسم
وسألته.. قاسم شبيك اليوم جنت ضايج

.. يعني تدرين بية اضوج ارجع للبيت وانتي ماكو
وفوكاها انتي صارلج يومين تتهربين مني
وتصديني. واليوم الصبح اجيت اطلع تكليلي ريحتك موحلوة
وفوك هذا كله اتأخرتي اتصل عليج ماكو مغلق
وانتي حتى ما حاولتي تتصلين حتى اعرف
راح تتأخرين

جنت نايمة على ذراعه ورفعت نفسي واتجيت على صدره وكلت
.. قسام .. قاسم .. قسمتي
شعندي غيغك (غيرك) انت ابوية واخوية وزوجي
انت واخواتي كل دينتي واهم شي بحياتي

باسني من راسي وكال.
.. اكول جنيتي افضل تبتعدين عني وتاخذين دور هادي
حاليا. لان ما اضمنلج نفسي اصير حباب
واطبق ارشادات الدكتورة مروة بالابتعاد لمدة اسبوعين

والله سوت علية حضر تجوال على ممتلكاتي الخاصة
ولازم ابقي ايدي بعيدة عنج.

ضحكت عليه وكلتله هو امتحان صبغ (صبر)
الك والي تغة (ترة) لا عبالك بس انت دتعاني
حتى اني غاح (راح ) اعاني مثلك

نمت بحضنه واني ادعوا الله يتمم علية
ويوم ثاني كعدت الصبح لكيت قاسم طالع
من غير ما يكعدني مثل كل يوم ههههه شكلي كسرت خاطره
اوووف شلون دوامي
كعدت بية ما بية اخذت علاجي بس اكو كم نوع نسيت شلون استخدامه

داومت بالكلية واتصلت على فاطمة واجتي هي وهالة
اليوم هنة يمي يجون مثلما اتعودنا كل سنة
كل اسبوع نروح بقسم وحدة من عدنا
جان الوقت ظهر بالكلية
اتذكرت علاجي لازم اتصل على شيماء حتى تعلمني
طلعت نقالي واتصلت عليها انطتني رفض
عقدت حواجبي. ورجعت كررت الاتصال جوابتني بصوت ناصي وكالت

.. هدى بعدين احجي وياج عندنا حالة طارئة
ونهت الاتصال
شنو هاي الحالة الطارئة وهمة وقت ظهر ماعندهم
مراجعين

اجوي البنات هالة وفاطمة. كلت لفاطمة عن خبر
حملي
هالة.. ولكم سكتوا لو شايفين ام قاسم شلون نشرت الخبر ما بقى واحد بالعشيرة ما عرف بزوجة قاسم حامل بقى بس ما تعلن الخبر على قناة. Mbc

جنا مندمجين نحجي وجان يجي طالب جان وياي بنفس المرحلة اعرفه كلش حباب
وجه كلامه لهالة
.. هالة اذا متصير زحمة اكدر احجي وياج بموضوع
خاص

اباوع لهالة الي جانت مبتسمة بهتت الابتسامة
واني وفاطمة صرنا وحدة تباوع. بوجه الثانية
والفضول يقرة. الف

ضحى
رغم الصار بقيت مستمرة اداوم بالمعهد واتمسكت
وصرت اكثر اصرار
دعم خواتي الي زاد من تمسكي باخذ الشهادة
خلصت محاضرتي ورحت على صديقتي اماني
وكعدت اسولفلها. صارت تقريباً تعرف عني كل شي

اهل سيف بعد ما اتعرضولي.
بس لازال المحامي مالته يرسل رسائل للمحامي. مالتي
بان سيف لازال يطالب ان ارجعله

ومرة اجتني رسالة من رقم غريب
واتفاجئت من مرت حماي الي ساعدتني.
هي الي كالتلي على حقيقة سيف

جنت متفاجئة وسألتها
.. انتي منين جبتي رقمي

كالت .. جبته من عمتي ام سيف
عالمعموم اني راستلج علمود. ديري بالج تسمعين كلامهم
ترة بيت عيالي حادين اسنانهم عليج وسيف يتوعد ويهدد ويكول شلون تتطلك واني بالسجن خلي تصبرلي
واطلع من السجن وحسابي واياها بعدين

اماني .. ضحى عفية باجر مو تنسين تجيبين ملزمة الفيزيا
اريد ادرس هواي فاتتني
محاظرات
.. اي غير انتي كضيتيها كله سفرات
.. اي غير كلها عريت وية عرسي
وكل يوم طالعلي واحد معرس من العشيرة
ولازم نسافر نأدي الواجب

وصلنا لمفترق الطريق سلمت علية ودخلت لشارعهم
واني كملت طريقي

جنت امشي واني اطلع النقال من جنطتي
خلي اتصل على شيماء واشوف شوكت نروح لهدى
علمود نباركلها عالحمل ونتطمن عليها بييت عيالها
شيماء كالت من ارجع من المركز اخذج انتي ومريم

تقريباً دخلت بفرع بيت مروة.
وجنت مشغولة اطلع النقال بيد وحدة من الجنطة

وبهاي الاثناء وجان اتفاجيء بصوت نباح الكلب ابن الكلب

كمزت من مكاني واني ادور على مكانه
بكل ضني صوته جاي من البالكونة
وجان المحه واكف بالباب ومحد يمه
وهو شافني اشو هذا اركض علية
يلهث. وينبح عبالك شايفله حرامي

هو اني شفته اجة يركض بتجاهي واني انشمرت الملازم من بين ايديه
وطاروا العلم والعلماء بالهوى
وصرت اركض بالشارع اريد اوصل لبيت مروة
جان بين بيت مروة وهذا جارهم ثلاث بيوت

انتبهت لروحي من السرعة والخوف ما دا اركض عالكاع احس بروحي طايرة

اركض واجتي عيني على باب بيت مروة.
جان مسدود ولكيت يم الباب سيارة
واكفة وبابها مفتوح

كبل بدون اي تفكير ما اترددت ولا لحظة
من حلات روحي لكيت نفسي صاعدة بالسيارة
وسديت الباب بسرعة قصوى

يعني لو اكول هي جانت مجرد لحظات
بس من كد الخوف صارت عندي. دهر مر علية

جنت دايرة وجهي اباوع عالكلب ينبح يم باب السيارة
واني اغلط
.. الله ياخذك حشى مو كلب والله خلي تجي مروة اكللها تحجي وياهم ترة ما صارت هاي

فجاءة سمعت صوت رجال يضحك كاعد وياي بالسيارة
بلعت ريكي والتفتت وجان اشوف اخر شخص اتمنى
يشوفني بهاي حالتي

ابو ياسر .. ها هسة منو كاعد يتحارش بمنوا

يتبع

احبكم كومة احبكم هواي
اختكم نهى الحسون