أساور الفضة الفصل الرابع وستون 64 - بقلم نهى

مساء الانوار والخير عليكم احبتي

🌹🌹🌹

#اساور_الفضة_ج٢
#نهى_الحسون

هدى
دخل علينا قاسم وجهه ما يتفسر من الغضب

جان وجهه احمر وركبته مجروحة
مبين من شكله جان يتعارك
حجة بصوت هز اركان البيت هز. وكال

.. يمة. انا صاعد فوك جيبي هديل وتعالي صعدي وياها وراية

اشوف خاله. تغير شكلها من الصدمة وانخطف لون وجها

راح عبر خواته
وهنة راحن ركضن وراه
يريدون يفتهمون منه شنو القضية
بس هو مو بحالهم. راح صعد فوك

جان يصعد الدرج يهزه هز
ام قاسم .. كلولي وين هديل
منى.. فوك بغرفتها وية هالة

راحت ام قاسم صعدت الدرج والبنات وراها
الكل مصدوم من الموقف ويسال نفس السؤال شنو الصاير

التفتت على بناتها وكالت لحد تصعد ورانا اخوكم معصب مااعرف شبي.
صاير نار كبرة خلي اصعد وافتهم شنو السالفة
شمصخمة اختكم

عافتن وراحت صعدت فوك
اني كبل رحت طفيت الاكل والفرن طفيته لان خلص الشوي

ورجعت مرة ثانية عليهم اشو ملكيت ولا وحدة جوة

اكيد. الكل. صعدوا فوك حتى يتسمعون
واني هم رحت وراهم. صعدت اريد افتهم حالي حالهم

وصلت للطابق الثاني واني الهث
لان ركضت صعدت على الدرج ناسية اني حامل اريد اعرف شصاير
باوعت عليهم كلهم متجمعات منتظرين يسمعون شي يشبع فضولهم

لحظات وطلعت هالة من الغرفة الي بيها هديل
طلعت هالة وتركت هديل وراها بالغرفة وسدت الباب
وعلى وجهها نظرات. التعجب والاستغراب

هالة تباوع على الوجوه
.. بنات شنو شصاير. قاسم وامي ليش يردون يحجون
وية هديل لوحدها بالغرفة

مني .. والله حالنا من حالج كلشي منعرف

فاطمة بصوت حازم .. احجي كولي
هاي اختج المايصة شنو عندها شمصخمة
هي اربعة وعشرين ساعة كارصة يمج بالغرفة معقولة متحجيلج شي

هالة .. قصدج اربعة وعشرين ساعة كارصة بغرفتها
من تحتاج مني شي تجيني

فاطمة.. الله يعلم شنو مصخمة هالحيوانة

كوثر حاطة اذنها عالباب
واتبعتها سرور
كوثر.. اشو كلشي مدا اسمع
سرور.. اي لان ديحجون بصوت ناصي.

اتذكرت الشموع والبخور العربي بالمبخرة
اهووووو خرب حظي راح تعبج ياهدى

تركت البنات ورحت لغرفتي
فتحت الضوة وطفيت الشموع
والبخور وفركشت الكعدة. بعدما شفت اعصاب قاسم
ما بيها مجال نحتفل الظاهرالسالفة مو مال احتفال

سمعت صوت خالتي تركت كلشي وطلعت من الغرفة
اريد اعرف شنو الصاير
لكيت خالة طالعة من الغرفة والباب ورة ظهرها مسدود

كانت تحجي وية البنات بحزم
وكالت
.. يله كدامي امشو خلي ننزل جوة
وخلي اختكم يم قاسم
هي جانت تحجي وتحاول تبين قوتها بس وجهها فضحها بصفرته

فجاءة سمعنا صرخة هديل الخايفة
وصوت قاسم الغاضب
شهكت بخوف عزة قاسم ديضرب بهديل

فاطمة اتجهت للباب تريد تدخل تفك اختها
ام قاسم لزمتها من ايدها وبعدتها عن الباب

.. وخري منا ولا وحدة بيكم تتدخل خلو اخوكم. يشوف شغله
يالله شو كلكم اتحركوا من كدامي امشوا نزلوا جوة

اخذتهم ونزلت جوة وتركت هديل وية قاسم لوحدهم

اباوع عالباب واسمع صوت
ضرب قاسم لهديل

وكلبي اجة يوكع من الخوف
جسمي من يمه كام يوجعني
مجرد سماع اصوات التعذيب جوة الغرفة
واستغاثة هديل وتوسلها لأخوها ان يعفوا عنها
ويرحمها وقاسم يردلها الكلام
ويكللها .. لج عار اش ولا كلمة ما اريد اسمع صوتج
اليوم ادفنج ومتفتحين حلكج

وبعدها سمعت صوت ردمة اخشاب
وصرخة هديل المفزوعة الخايفة
خلة شعر راسي يوكف
خالة والبنات نزلوا جوة. وسمعت ام قاسم

.. هدى يالله تعالي نزلي
انتبهت لروحي بعدني واكفة. مكاني كدام الباب

رحت نزلت وراهم واني كلبي يرجف من غضب قاسم
وضربه لهديل

لكيت خالة مغمضة عيونها بتعب
والبنات وحدة تباوع بوجه الثانية

ورة شوية دخل هشام والجهال وخبصوا البيت
وهشام اول ما دخل وباوع للوجوه

المكلبة سأل .. شكو صاير شي امي شبيها ؟؟
كامت منى وراحت يمه وحجتله بصوت ناصي
عن الصار

عكد حواجبه وكال .. وهسة قاسم وين
.. فوك يمها.
اتحرك اتجه للدرج
خالة صاحتله
.. يمة هشام عوف اخوك يأدب اخته
هشام.. اي يمة خلي يأدبها بس مو بالضرب
انتي تعرفين قاسم ضربته ضربة موت زلمة ما يتحملها
لا نوب يروح يسوي بالبنية شي

تركنا وراح صعد فوك ودقايق سمعنا صوت قاسم
ديطلعه هشام من غرفة هديل.
ويهدي بي. ونوب هشام صاح
.. هاالة تعاي صعدي فوك لاختج

كامو البنات اربعتهم
ام قاسم عاطت بيهم .. شنو خير هو صاح هالة
ما كال العشيرة

باوعت لهالة وكالت.. شوفي ترحين للناقصة اختج
وتكلليها اياني اشوفها كدامي والله ابتلي بيها
ما اريد اشوف جهرتها
هالة .. صار يمة
راحت هالة صعدت فوك

والجهال وحركتهم وهوستهم عبالك عايشين بعالم ثاني لوحدهم
بس باوعت للساعة جانت ب٨

وكلهم لحد هسة ممتعشين
كمت من يم البنات ودخلت للمطبخ
وطلعت الدجاج الشوي وكعدت افلسه
وضميت التمن البرياني بالثلاجة لان بعد الهوسة
الصارت ما اتوقع احد يشتهي ياكل برياني

وكعدت اسوي لفات
دجاج شوي فات من يمي زين. واخوه جواد
اسمع جواد يسأل زين

جواد.. اكول زيوني خالو قاسم ليش ضرب. خالة هديل
زين.. هسة تلكاها. ضامة ورقات الامتحانات عن بيبي وخالو
بدون ما تعرف بيها بيبي

جواد.. لك زين حتى انت هسة راح تنبسط
لان انت دائماً تضم درجاتك عن بابا وماما

زين ركض حط ايده على حلك جواد
التفت منا ومنا خاف احد يسمعه
.. وكله. لك حمار لا احد يسمعك.
والله اسحلك. .....

كملوا كلامهم وهمة يمشون طالعين للحديقة

الله يلعنهم غير جهال وكحين
كملت اللفات ورحت صحت للجهال وكعدتهم بالمطبخ عالميز وانطيت كل واحد لفة

كعدوا ياكلون
واخذت صينية بيها لفات واكوابة جاي للبنات
وخالة دخلت للهول ووزعتها للبنات

ووصلت لخالة رفعت راسها وباعتلي وكالت
.. لا خالة ما اريد والله ما اشتهي العسل
حلكي صار مر

.. خالة ميخالف جبغي (جبري) نفسج حتى لو بس لكمة
حتى انطيج دواج لا يغتفع السكغ (يرتفع السكر ) عندج

فاطمة.. اي يمة صدك ووجهج صار اصفر
خالة مدت ايدها واخذت اللفة وكالت
..رحمة الله والديج خالة
تركتهم وعزلت عشا لقاسم وهشام

نزل هشام هو اللاخ وجهه ما يتفسر
سألته.. هشام اصبلك عشا
.. لا ما اشتهي اتعشا
.. قاسم وين
.. قاسم راح دخل لغرفته التفت على امه وكال
.. يمة انا طالع وية عزام

ام قاسم.. روح يمة الله وياك بس مو تتأخر
رحت انطيتها علاجها

كامت فاطمة وكالت انا صاعدة فوك يم قاسم
اريد افتهم شنو صاير اشو امي ضاربة الصامت متقبل تكول اي شي

راحت صعدت فوك يم قاسم
واني دخلت للمطبخ احضر العشا لقاسم
لكيت منى وسرور دينظفون بالمطبخ ويغسلون المواعين

ورة نص ساعة نزلت فاطمة
كوثر.. ها بشري شنو كلج قاسم
فاطمة عافسة الوجه

.. بعد قاسم وعندج الحساب مستحيل يحجي او يكول
اي شي شلع كلبي احجي وياه وهو ساكت. ووجهه
ميكصه السيف

سألته خوية احجيلي انا اختك الجبيرة
شاركني همك خلي افتهم شمسوية هاي الثولة
حتى اربيها الك. اعلمها غلطها

جاوبني وكال.. فاطمة سدي الموضوع
ميحتاج تربيها وتعليمها
رحمة لوالديج طلعي وعوفيني لوحدي

ونوب رحت دخلت على غرفة الحيوانة هديل
لكيتها ملعوب بيها طوبة وصايرة خركة
قاسم مجنزها. ولكيت هالة يمها دتبدللها ملابسها

باوعت لخالة وحجت بغيض
.. انتوا شنو سالفتكم انتي وابنج
محد يقبل يفهمنا شنو الصار وشسوت اختنا
ليش تحسسونا عبالك احنا مو خوات والنا حق
نتشارك وياكم

ام قاسم.. يا عيني هو قابل الموضوع بي فخر ونكعد نحجي بي
المصيبة ما تتسولف لا تنتظرين من اخوج قاسم يكللكم الصار
عوفوا الموضوع وخلو اخوكم بحاله ترة الي بي يكفي

تركت خالة وفاطمة ديحجون.
الله يستر هاي الغبية شنو مسوية
دخلت للمطبخ
وحضرت صينية العشا لقاسم وصعدتها فوك
مريت من غرفة هديل اسمع صوت انينها
بعدها دتبجي
وصلت لغرفتنا وفتحت الباب على كيف ودخلت
لكيت قاسم كاعد عالسرير مدنك وحاط راسه وبين ايديه

مثل الي يريد. يحميه من الانفجار
حطيت الصينية عالطبلة ورحت وكفت كدامه قريبة
عليه كلبي انعصر على منظره جان يتنفس بغضب

جان مستوى راسه بنفس مستوى
طولي. جان منظره يوحي بالانكسار

احس بكلبي انمرد على حاله اتمنيت امحي عن وجهه
هاي النظرة

اقترب عليه حطيت وجهه بين كفوف ايدية ورفعت راسه وقربت وجهي عليه
وهمست بصوت ناصي
.. اغفع غاسك ( ارفع راسك ) مو قاسم الينزل غاسه (راسه ) مهموم
انت عودتنا نشوفك جبل صامد ما يهزك غيح (ريح )

طبعت شفايفي على كصته
ولميت راسه لحضني
اتمنيت اسحب كل همومه ولا اشوفه هيج مخذول

جان متشنج رافض يخضع او يعترف
مرت فترة واني ضامته لحضني احاول احميه من نفسه

حسيت بقاسم بدة يستسلم ويسترخي بالتدريج
انتبهت عليه رفع ايديه ولمني بين ذراعه
دفن راسه بحضني مثل الطفل التعبان

وسحب نفس عميق
حسيت بحرارة انفاسه
الي جان مصدرها نار كلبه

همست.. قاسم لاتخزن يا حبيب الغوح (الروح) وحدك
شاغكني (شاركني) بوجعك وناغك (نارك)

حجة بتعب .. انصحج تبتعدين عني
وتتجنبين غضبي. لا يلوحج شرارة اعصابي
وتأذين نفسج وياي

.. لتخاف علية تغة (ترة) جلدي خشن يتحمل
لسعة السانك. اني زوجتك اذا مو اني الي
اتحمل ابو بيتي لعد منو الي يتحمله

رفع راسه واجتي عينه بعيني. ولازلت ايديه محاوطتني
وكأنما يلتمس مني الهدوء
غمض عيونه مثل الي ديصارع المه
وحجة بصوت مهموم وكال

.. ااااااخ لج شحجي وشكول
اختي بنت امي وابوي ربات ايدي
اليوم كسرت ظهري وشمتت بية عداي
خلت اليسوى والمايسوى يصير براسي رجال

اتسعت عيوني بصدمة لكن حاولت اتمالك نفسي وحجيت بكل غيض
.. ما عاش اليسكغ ظهغك (اليكسر ظهرك. )
ويغوحون (يرحون) لك فدوة لتغاب غجلك ( لتراب رجليك)

قاسم .. المشكلة الي غدرني مني وبية
ايمن ابن عمي محمد اليوم اجاني يكلي
الزم اختك وربيها وبعدها عن طريقي
دترسلي صورها وتستعرضلي وانا رزلتها بس ماكو فايدة
هي مصرة تبقى تراسلني وتضايقني .

يكلي اجيتك اليوم حتى تحطلها حد لان سكتت ما فيه الكفاية
القهرني جان يحجي وياي بالشارع
يعني حتى ما كلف نفسه يسوي حساب لسمعتها.

احمد الله واشكره جان رائد. وياي مو غير واحد
على الاقل رائد صاحبي مني وبية ما اخجل منه
وعرضه عرضي
بس بالرغم من هذا رائد من عرف شنو الموضوع
راح ابتعد ووكف على صفحة كلي راح انتظرك
بالسيارة علمود ليحرجني

.. اكيد هذا مو رجال ما عنده غيرة ولا ناموس
زين انت شنو سويتله

.. هدى انا مو غبي وما تعبر علية هيج سوالف
انا عابر علية اشكال والوان البنات
واعرف كلش زين
البنية ما ترسل صورها منا للدرب
اذا ما تشوف تشجيع من الطرف المقابل

انا ما ابرر لاختي اكول هي موغلطان
بس هو لوما منطيها مجال. وحاجي وياها

جان ما اتجرأت ورسلت صورها
مستحيل تسوي هيج لو ما كانت واثقة منه ومتجاوب وياها ومأملها بشي

.. كلامك صحيح وخصوصاً هي طفلة مراهقة
بسرعة تنجرف العتب عليه هو عشتوا دكتور
وجبير وفاهم

.. يعني اتخيلي اجاني بكل صلافة
يراويني صورها ومحادثاتها تارسة نقاله

شنو تتصورين راح تكون ردة فعلي. من اشوف اختي
تستعرض صورها كدام رجال ثاني
بلعت الصار وسحبت نقاله من ايده. وكسرته تكسر كدام عيونه
بحيث من حركة گلبي صرت اتصارع وية النقال
لحد ما اتكسر لقطع صغيرة

جنت اكسر واسب بأيمن واغلط
أيمن انطاني حجاية بالعظم اتمنيت ميت ولا سامعها
منه

ما اتحملت رحت هديت عليه واتفاجيء بهجومي
وانصدم اكثر من كلتله
.. انت اتجاوزت على عرضي. بسوايتك هاي
استغليت اختي واليوم الا اسوي عبرة لمن لا يعتبر

احس بروحي فقدت
رائد شافنة واجة اتدخل يفاككنا
جنت اعمى من الغضب.
كسرتي اليوم بسمعة اختي.
نفس كسرتي وقهري بوفاة ابوي
بالحالتين حسيت بروحي ضعيف وما كدرت احميهم

متحملت اشوف ضعفه . نزلت دموعي غصب عني
ولميته لصدري. واني اشهك

بقينا واحد حاضن اللاخ
جانت اثمن واغلى لحظة بحياتي

مجرد تنازل قاسم وسماحه الي اقترب منه
لهذا الحد واشوف واسمع ضعفه وكسرته
حسسني بأهميتي عنده. لدرجة هو رضى
يحجيلي ويشاركني بسره ومخاوفه بدون
حذر
بالرغم اعرفه كلش زين
كان دائما ينعزل بهيج مواقف ويبقى يكابر
ما يسمح لاي واحد يقترب منه ويشوف ضعفه

ابتعدت عنه وباوعت عليه واني امسح دموعي
.. شوف شلون نسيت صعدتلك العشا حتى تاكل

همس بتعب وهو ينهض من مكانه واتوجه للكنتور
.. ما اشتهي اكل. اريد بس اسبح وانام

ادري بي هو اليوم ما تغدة وما اجة عالغدة
.. اذا ما تاكل حتى اني ما اكل

.. هدى صدكيني مالي نفس اكل

سكتت ما لحيت خلي براحته
دخل للحمام واخذت الصينية نزلتها جوة
اهوو هسة شلون اكول لقاسم عن خطوبة ضحى
مروة كالت كولي لقاسم يحضر بالخطوبة

شيماء
مرت الايام
وحيدر كام يجيب بنته كل يوم لبيتنا
مو علمود مروة تشرف على وضعها وانما
هو لاحظ ان بنته بدت تتجاوب وتتغير شوية
لان اني اقترحت عليه ان يجيبها يم مريم ومشمش
وضحى حتى تغير جو وتبتعد عن كلام اهله

كام كل يوم يتصل علية بالليل بالبداية جان
يحجيلي عن سرى وشنو تسوي بالبيت
وشلون صار يراقبها بحذر. خايف عليها

وبعدها انتقلت المواضيع بعد تحسن وضع سرى الي مر عليها اربعة اشهر
وصار يحجيلي عن حياته. وشلون طلق مرته الاولى جان تقريباً يحجيلي عن كلشي يخصه

مرات اذكر نفسي واكول ميصير
اني مهمتي جانت تقتضي فقط سلامة سرى
ومالي حق اتوغل بحياتهم واعرف. بمشاكلهم
لكن غصب عني الكة كلبي يغلس علية وينصاع
للهفته لحب حيدر

وصرت كل يوم اعرف عن حيدر صفة جديدة
مجنت اعرفها قبل ويزيد من حبي له

وابتسمت واني اكتب اسامي المراجعين بالقائمة
اتذكرت مكالمة البارحة

جانت مختلفة عن كل المكالمات
البارحة حيدر. كعد يسولف وياي عن اهله
والاقوى منها من سألته وكلتله اني مرة سمعتك تحجي بلهجة
اهل الجنوب واتفاجئت بيك
لان ولا مرة سمعتك تحجي بيها

ضحك وكال .. ما استخدمها لان هنا مو الكل
راح يفهم علية لذلك احجي بلهجتنا بس من اكون وية اهلي
لان ابوية الحجي يضوج من احجي وياه بغدادي

ابتسمت واني اهمس
.. بس تدري اني مرة وحدة سمعتك تحجي بيها وجانت كلش حلوة بصوتك

سمعت صوت ضحكته وكال
.. جا ما دامج ترديني احجيلج بلهجتنا
تعاي وخليني. اسولفلج عن دليلي شلون ضامي
يرتوي بس من شوفت عودك الريان.

ضحكت .. والله حلو كلامك عبالك تكول شعر

.. بس انا جنت قاصد كل حرف كلته بذاك كلامي

اتذكر اول مرة شفتج بيها جنتي تبجين
ودموعج مالية. عيونج

جنت العن بكلبي الشيطان
واكول هذا ياهو الماعنده مخافة الله وهان عليه ينزل دمعتها
يعني بنات الناس خلصوا وبقت بس ريانة العود
تتلوع بحيرتها وتبجوها
من عساها ببخت كل من له يد بنزول دمعتها

اذا اكول هو يحجي واني كلبي يطرب عبالك ديغازلني
همست اريد اسيطر على دكات كلبي المتسارعة
.. حيدر هذا انت الي دتحجي وياية ؟؟؟؟

.. اي انا حيدر بذات نفسي احجي وياج.

سكت ورجع كمل كلامه
وفاجئني بكلامه
.. شيماء اريد اكمل نص ديني بيج.
اريدج تصيرين حلالي

كمزت من السرير ووكع النقال من ايدية
عزة باوعت للخط انغلق
ارتبكت وانخبصت احس كلبي يريد
يطلع من مكانه

لزمت النقال وصرت اباوع عليه انتظره
يرجع مرة ثانية يتصل علية
بس ماكو صرت احوم طول الليل بالغرفة افكر بكلامه وعيوني عالنقال
وعقلي صار كل شوية يعيد كلمات حيدر
معقولة اني سمعته صحيح لو عقلي شطح وصار
يخبص من يمه

انتبهت من صفنتي على كلام الموظفة بخصوص
الواردات
.. ست شيماء نزلت كلشي بالحاسبة.
اتمنى تراجعين القوائم انتي او ست مروة
حتى ابدي ادرجهم وية الملفات

.. اوك من ارجع. نكعد اني ومروة نراجع
هسة هاج اخذي. قائمة المراجعين
جنت احجي وية الموظفة ودخل رافد من البوابة الرئيسية للمركز
حارس امن بالبوابة

كام من الكرسي وحجة وياه. اسمعه يكله اني زوج الدكتورة مروة

والحارس لان جديد. ميعرف رافد طلب منه يشوف الهوية حتى يتأكد

اباوع لرافد عصب. شكله ممتوقع ان يعاملوا
مثل الغريب
طلع هويته وشافها الحارس وبعدها.
سمحله بالدخول لداخل المركز

كمت من مكاني اتجهت عليه
شافني وابتسم
سلم علية ورديتله السلام بصورة عادية
.. اكدر اعرف شنو سبب زيارتك

.. اجيت علمود احجي وية مروة. بخصوص الطلاق
وبنتنا.

.. اي بس هنا مكان عملها مو لائق تجي لهنا وتناقش اموركم العائلية
الافضل لو تخليها من ترجع مروة للبيت وهناك تحجون براحتكم

.. مروة رافضة اي تواصل بيني وبينها
متقبل حتى تحجي وياي. لذلك اني فضلت اجي هنا
واحطها امام الامر الواقع حتى تضطر تسمعني

شيماء اترجاج ان تساعديني وتخليني ادخل
واحجي وياها

سحبت نفس عميق والتفتت اباوع للمراجعات المنتظرات سراهم بالعيادة
حتى يدخلون لمروة
وكلتله انتظر لحظة خلي اشوف مروة

رحت دخلت لغرفة السكريترة
وبعدها تجي غرفة المعاينة مال مروة
دخلت عليها. جانت كاعدة. دتحجي وية المراجعة
وتكتب بالوصفة
مروة .. شوفي حبيبتي تستمرين تاخذين هذا المنظم خامس يوم الدورة. وبعدها .........

كملت كلامها وسلمت المريضة الوصفة وطلعت

مدت ايدها تريد تدك الجرس حتى تدخل المراجعة الي بعدها
وقفتها .. اوكفي مروة لحظة. بس احجي وياج
باوعت علية وكالت
..ها شومة كولي شعندج.

جانت تحجي وتكتب بالبطاقة معلومات خاصة بالمريضة

.. رافد اجة هنا ويريد يشوفج ويحجي وياج بموضوع كلش مهم.

اتوقفت عن الكتابة ورفعت راسها وباوعتلي
.. هذا من كل عقله ديحجي. جايني لهنا لعيادتي

انتبهت لمروة بدت تبين علامات الغضب عندها
.. مروة عفية لتعصبين. كولشي ينحل بالتفاهم
اني اختج الجبيرة وانصحج ان. تنطي فرصة
اسمعي وافتهمي شنو يريد منج بالضبط

غمضت عيونها بتفكير وكالت
.. طبعا هاي لخاطرج راح اتنازل. واوافق
اقابله. واحجي وياه

ابتسمت .. عفية عليج هاي اختي الي اعرفها.
درت وجهي واتوجهت للباب واني احجي
.. يالله لعد خلي اروح ادخله حتى يحجي وياج

مروة.. لحظة شيماء اني صحيح وافقت. اقابله واحجي وياه. بس ما حددت شوكت.
روحي كليله اذا يريد. يحجي وياي خلي ينتظر
اكمل شغلي وية المراجعات. وبعدين. اقابله

باوعت لمروة رحعت لبست نظاراتها الطبية
مدت ايدها للجرس وضغطت عليه. اشارة لدخول المراجعة
التالية

طلعت من عيادتها ولكيت رافد كاعد على قنفة متوسطة
صالة المركز مكانها مقابل الاستعلامات
جان كاعد وحاط رجل على رجل ولازم بيده مجلة يگلب بيها

شافني ونزل رجليه ورجع المجلة وكام من مكانه
يستفسر.

.. ها شنو كالت
.. وافقت تقابلك. وتحجي وياها
ابتسم بنصر وكال .. عرفت ما راح ينطيها كلبها
تردني
شفته اتحرك يريد يروح للباب العيادة

.. لحظة. رافد مروة وافقت تقابلك. بس بعدما
تخلص شغلها. ويرحون كل المراجعين
وانت براحتك تريد تبقى تنتظر او تروح
بعد هاي بقت يمك. انت صاحب الموضوع

اباوع عليه. عيونه اجتي تنط من الغيض والاهانة الي وجهتها له. مروة

من غضبه وعصبيته
عرفت ان هذا الرجل شكد مغرور. وشايف حاله
والمضحك عنده ثقة زايدة.بروحه يكول انا عرفت ما راح تكدر تردني

هدى
صار يومين على سالفة هديل
والبيت كلها اجواءه متكهربة

خالتي ارتفع سكرها. ونامت وسكنت غرفتها
وفاطمة وسرور. اخذوا جهالهم. وراحوا ببيت منى

علمود يفرغ البيت لان خالة تعبانة. وتحتاج هدوء

بقينا بس اني وهالة وهديل
هديل بغرفتها متنزل. والاكل هالة تصعده يمها

وهي كلها بكوم وهالة بكوم
هالة من بعد موقفها وية عزام الي اتزامن وية مصيبة هديل
من يومها اتغيرت عبالك مو هالة الاولية

جنت واكفة بالمطبخ اطبخ غدة. وما اعرف اصلا المن اطبخ
اشو لا قاسم ولا هشام ولا خالة ياكلون
وهالة. كامت تتجنبني ما اعرف ليش
حتى اكلها صارت تاكل بأوقات متفاوتة

باوعت عليها كاعدة لوحدها بالهول وتكلب بنقالها بملل
رحت كعدت يمها وحجيت بزعل

.. عوبة هالة شبيج صاغلج (صارلج) يومين تتهغبين (تتهربين) مني
وضايجة. زين اغيد (اريد) افتهم اني شنو دخلي بالصاغ (بالصار)

باوعت علية وعيونها ما بيها لمعة.
هالة .. ما بية شي.
.. هالة لاتشوفيني محتغمتج ( محترمتج ) وساكتة عليج
تغة (ترة) والله ازعل. اطنكغ (اطنكر)عليج واخليج تحلمين تحجين وياية

هالة .. شبيج هدى يعني الواحد ما يصير يضوج لوحده
يعني الا مزاعلج

.. اي لعد شنو اكو اسم ثاني غيغ (غير) الزعل
هيج تتهغبين (تتهربين) مني وتتحاشيني
غمضت عيونها وكالت
.. اذا اكلج مستحية منج ومن روحي ومن عزام ومن الصار كله بذاك اليوم تصدكيني

.. وعلى شنو تستحين مني.
.. لج هدى بعد الي صار كرهت روحي

.. لا هالة الموضوع ما مستاهل كل هذا الخجل والزعل
انتي مبين عليج جنتي تحجين بشقى وضحك

.. هدى لو جان الموضوع. بس شقى وضحك.
جان كدرت اتجاوز الفشلة واكل تبن واكعد واسكت

بس بعدما سمعت كلام هديل وعرفت شنو سبب
عركة قاسم. وضربها
بهاي اللحظة راجعت موقفي. وخفت لا عزام. يروح
يحجي لكوثر او هشام على الكلام الي سمعه مني
بساعتها.حسيت بالخجل من نفسي وتصرفاتي الغبية المتهورة

كليلي اذا وصل الكلام لقاسم وامي
شلون راح اكدر احط عيني بعيونهم
يعني هاي بدال ما اجازيهم على تعبهم ويانا

خصوصاً قاسم. اخوي سودة علية.
ممقصر ويانا اني واخواتي حريص علينا وعلى حمايتنا
ميستاهل. هيج ننزل راسه بغبائنا
ونخلي هو وامي علج بحلوك الشمات.

.. هالة كلامج صحيح. بس اني احب اكلج شي يمكن انتي تجهلينه
عزام ما دام هو صديق اخوانج معناها يتصف ويتحلى
بنفس اخلاقهم لان قاسم وهشام ما يصاحبون
الا. الي مثلهم

لذلك اني اكلج سدج امين ما غاح (راح) يوصل كلامج
لأي واحد لتخافين

هالة .. حلفي والله. ميجيب سيرة بالصار
.. اي والله. واني احلف عنه. وواثقة منه
لان عزام نشمي وعنده شهامة تمنعه يحجي بهيج سوالف تعبانة

اباوع لهالة شلون. رد الدم بوجها.
بس بقت محافظة على هدوءها
وصارت تحجيلي عن هديل وشصاير بيها
وشلون جانت تحجي وية ايمن. وهو طلب منها ترسله صورها بحجة مشتاقلها.

يوم ثالث خالة شوية صحصحت وكامت على حيلها
وكالت
.. اليوم اشوي دجاج واسوي تمن برياني خطية بناتي يحبونه
واتصلت عالبنات تريدهم يرجعون
وبيومها رجعوا البنات همة وجهالهم للبيت

ووياهم منى وكوثر وجهالهم
احس البيت صار بي حياة بعدما عشعش بي الحزن
جنت واكفة منتظرتهم بالكراج

اول ما دخلوا الفريق رحت سلمت عليهم بلهفة

فاطمة .. والله ما الوم. امي. بيوم. اتمسكت بيج وكالت
تربية بثنية. ما تتفوت

منى .. فديت مرت اخونا الحنينة
جاوبتها واني اضحك
.. زين بس اغيد اعغف (اريد اعرف )
فاطمة وسغوغ (سرور) ناس مهجغين (مهجرين)
خالة اتصلت عليهم يغجعون ( يرجعن) للبيت زين انتي وكوثغ (كوثر) شتسوون
لافين علينا مو هنا بيتوكم

كوثر .. مالت عليج ياعوبة ما تحملتي تصبرين شوية
صارلهم ساعة يحمدون بيج.

ضحكت .. لا والله.تغدون ( تردون ) الصدك
بالحقيقة البيت ضوجة من طلعتوا

دخلوا البنات وجنا مسوين غدا واني اتصلت على قاسم
بس جاوبني وكلي انا مشغول ما اكدر ارجع من وكت
بس هشام راح يرجع يتغدة

رجع هشام والكل كعدوا يتغدون
ام قاسم .. ها خالة هدى ليش متاكلين
.. خالة ما اشتهي والله
هشام.. طبعا متشتهي لان ابو الجهال ما موجود.

ام قاسم .. يا خالة موزين على الحمل
يعني اني اذا التهي عنج شوية هيج تسوين بروحج وتنسين نفسج
عود هاي انتي جنتي ام البيت واعتمد عليج
وانتي روحج مكدرتي تداريها

.. لا والله خالة اكلت قبل شوية
وشبعت

تركتهم يكملون اكلهم ورحت للمطبخ الحار. ارتب المواعين وحطيت القوري عالنار

كملوا الغدى ومنى كالت يالله ست هدى راوينة. عرض
اكتافج وسلمينا القيادة. بالمطبخ

واني ضحكت وجاوبتها بفرح
.. ما يغد الكغيم (يرد الكريم ) الا البخيل
اباوع لهالة. ابتسمت وكعدت تعزل وية البنات

منى شاورتني .. اكول هدى اختنا هالة شبيها
احس بيها مو طبيعية

.. تلكينها ضايجة علمود هديل وخالة تعبانة
.. لا هالة اختي واعرفها كلش زين صحيح هي مرات تحزن
بس عمرها ما صارت عاقلة ومؤدبة

جانت تحجي واني اباوع لهالة
صدك جانت تتجنب تكعد يم اخواتها وخصوصاً كوثر.
وحتى جهال كوثر ما تقتربلهم مثل قبل

حضرت. الجاي واخذته للهول يم خالة
دك نقالي وجان المتصل قاسم

جاوبته بلهفة
وهو حجة وياي وكلي
.. شنو شبيها جنيتي يكولون عنها ما تشتهي تاكل
اكدر اعرف السبب
رحت طلعت من الهول رحت بالحديقة احجي وياه لان المكان الوحيد هدوء

.. اي مقاطعة الاكل من وغاك (وراك)
.. ها ليش وانا شكو
..انت مقاطع الاكل ومتجي تاكل بالبيت واني كلتلك
اذا متاكل اني هم ما غاح (راح) اكل
وهسة اني وابني ميتين من الجوع وانت السبب

.. يخسة الجوع. لعد ما دام
هيج الحجي حظيرلي غداج وانا جاي
نتغدة انا وياج لان اني. هم بطني خاست من
الكيك. والعصير

ابتسمت بفرحة وجاوبته
.. صاغ (صار) من عيوني الثنين
.. تسلم عيونج. جنيتي

نهيت الاتصال ورحت دخلت للمطبخ لكيت خالة
عازلة دجاجة مشوية وصرت احضر
بالتمن والسلطة. واللبن. وبعدها رحت صعدت

فوك لغرفتي وكعدت احضر بيها واتذكرت الكعدة
العربية حضرت الاجواء والبخور.
اجنت اتحرك بسرعة وبطني كدامي

رحت للكنتور وطلعت عندي ملابس
جنت ناوية البسها بعيد زواجنا
جانت دشداشة. موديل مصري. مقلمة وبيها
دلعة الصدرة واسعة. والجاكات عالجانبين
السيقان كلها طالعة

حطيتها عالسرير واتصلت على قاسم
.. حبيبي من تغيد (تريد) توصل انطيني خبغ (خبر)
حتى اصب الغدة
.. صبي غداج انا وصلت
سديت النقال بسرعة حتى الحك اصب الاكل
واصعده فوك للغرفة اريد. ناكل اني وياه لوحدنا

نزلت وجنت حاطة الدجاجة بالفرن
وبديت اصب الغدة ووحضرته وطلبت من هالة. تصعدلي الصينية

خطية مكالت شي كبل اخذتها وصعدتها الي فوك
وشافت اجواء الغرفة

وكالت.. شنو اليوم مسوية لأخوية كمين

.. اي والله بلكي ينزل من بغجه (برجه) العالي
ويغجعلنا (يرجعلنا ) من جديد

سمعنا صوت سيارته كمزت من مكاني
.. يالله حبيبتي. تفضلي بغة من غيغ مطغود (برة. من غير مطرود)

هالة.. همة كالوها. سوي خير وذب. بالشط
..
طلعت هالة وسدت الباب وراها
ورحت لبست الكلابية المصرية

جانت بيها ليرات ذهبية على. الجاكات
الجانبية

بحيث من اتحرك. تطلع صوت. خشخشة
ورحت لبست سواراتي. ووعدلت شعري.

وحطيت عطري المفضل
وحطيت حمرة. وردية

اباوع. لروحي. بالمرايا. جانت الكلابية قالب وبطني
بارزة. طوبة صغيرة.
ضحكت على. شكلي
دخل قاسم للغرفة. ورفع حاجبه

ما متوقع المفاجئة
كال.. وانا اكول وين مرتي. مو من. عوايدها
ما تنتظرني. وتفتحلي الباب. من. ارجع
اثاري طلعت. ناوية علية. اليوم

رحت. عليه. وكلتله
.. تصدك جنت محضغتلك (محضرتلك )هاي الكعدة. قبل يومين
بعيد ميلاد. زواجنا. بس ما لحكت احتفل وياك

.. اهوووووو. والله ناسي. تصدكين بيومها
جنت طالع انا ورائد واشتريتلج هدية.

وجان يصادفني العار ايمن
ويخرب الاول والتالي ونساني حتى اسمي

اقترب عليه ورفعت نفسي على اطراف اصابيعي وبسته. من حنكه

ابتسم وكال انتظريني خلي ابدل واجيج

.. قسومي حبيبي من تطلع البس هاي الدشداشة السودة
مالت الحنة الي اجيتني بيها

جانت تاكل وتشغب (تشرب) عليك.
ضحك وكال .. نلبسها ليش لا
امرنا لله. كلشي ولا نزعل الحكومة

دخل للحمام
واني رحت بسطت بالكاع اتربعت عالصينية
ورجلي كلها طالعه من الفتحة

حطيت شعري على صفحة
وشميت ريحة الاكل حسيت بطني كامت تغني

طلع قاسم من الحمام ولبس الدشداشة السودة
جانت دكم.الصدر مفتوحة. وشعره. مهوس

بلعت ريكي. وحجيت
.. قساااام. عوف يمعود لا تدكم تعال اكعد اكل
اني كوولشش. جوعااانة

جنت احجي وغمزتله واشرت بنظراتي على شفايفه

ضحك وهو يباوع عليه. .. اكول هسة انا. اريد.
اكل. ابدي بيج لو بالغدة

وحسيت بحركة رفسة ببطني
اتلمست بطني وابتسمت ودنكت راسي
.. ها مامي. جوعان حبيب امه
.. ديري بالج اسمعج تحجين وية ابني. هشكل

برطمت شفايفي .. وليش عيني ابني وادلعه
.. بابا على هالحسبة ما يصير. رجال
جان يحجي وهو
يكعد يمي بالكاع واتربع وشنف اردان الدشداشه

مديت ايدي عالدجاجة وبديت افصخها
لقطع صغار. وبديت اكل واني مستمتعة

.. امممممممم والله عاشت ايدي على هذا الطبخ

رفعت راسي ولكيت قاسم فاتح حلكه
.. عليج الله انتي متأكدة. مسوية الغدة
والنية صافية لو شنو

غمضت عيوني بدلع وكلتله .. حبيبي عند البطون
تعمى العيون يعني وداعتك هسه بهاي اللحظه التاغيخية (التاريخية)
واني كبال الدجاجة
ما ببالي اسويلك اي اغغاء (اغراء)

اخذت قطعة دجاج وقربتها. على شفايفة وكلتله
.. اخذ هاي مني

قرب علية يريد ياكلها بعدتها عنه واني اضحك
خزرني ولزم ايدي وقربها عليه واكل. القطعة
وهو يباوعلي
بعدها عض ايدي وكال
.. هاي حتى تبطلين تلعبين علية

وكعدنا ناكل مندمجين
خطية جان مبين عليه كلش جوعان.
اتكأ على الكعدة

واني بديت الم الصحون وردت اكوم
حتى ابدل علمود انزل الصينية

سحبني عليه وكعدني يمه وكال
.. عوفي الصينية. وكعدي يمي خلي نشوف شمسوية
بروحج
ضحكت
.. قسااام. غير انزل اصبلك جاي
.. عوفي
مد ايده واخذ النقال
واتصل على هالة
وكال.. هالة صبيلي كلاص جاي وصعدي فوك للغرفة

همست .. عيب من هالة هسة شنو. تكول علينا
.. لا تشيلن همها هسة هي بس تشوف شكلج
راح ينكسر خاطرها عليج وتعذرج

.. ليش عيني شبي شكلي
.. شكلج يكسر الخاطر
خطية كالبة دقلة. وكاعدة تسويلي اغراءات
انتي ووبطنج كدامج. وحالتج حالة وما كاعدة راحة
وما متنازلة وواثقة بعد

لميت شفايفي بزعل. وكعدت امسد على سيقاني
وكلتله .. حبيبي اني صحيح حامل. بس سيقاني لازالت
متصدغة (متصدرة) قائمة. الاغغاءات (الاغراءات)
باوعت عليه عيونه عليهن
.. والدليل عيونك. تشهدلهم

اقترب مني وكال.. هو انا شنو طير عقلي غيرهن
من اول يوم شفت. رجليج البيض بالحنة وانا. دخت

دنك علية وقرب راسه على وجهي وجان يقطع علينا
صوت. الباب
كام على حيله وفتح الباب ودخلت هالة بصينية قوري الجاي والاستكاين

وعيونها متنقلة بيني وبين اخوها
بس شافت ضحكة قاسم على وجهه

هي نور وجهها بابتسامة وكالتله
.. اتفزل. ياخوية الشاي الف عافية على. ألبك
ريتو مطرح ميسري. يمري

قاسم باوع. علية وكال
.. بالله هاي شنو ادوس وتنطفي. اربعة وعشرين ساعة
تحشش

تعاي اخذي صينية الغدة. وياج
هالة.. انت تؤمر ياعكيد ريت ماتبلى هالطلة

راحت شالت الصينية وطلعت من الغرفة
عرفت. ان سبب حزنها قاسم
وحزنها على حزن اخوها

انسد الباب وباوع علية
ونظرات عيونه. كلها وكاحة
وفرك ايديه ببعضهم مثل الي يتحضر لوليمة

اجة وكعد يمي عالكعدة العربية والنية مبينة من عيونه
همست واني عيوني بعونه
.. قاسم الجاي
سألني وعيونه على شفايفي
.. شبي الجاي
غمزتله وكلتله. .. حاااار
سحبني عليه. وكال .. اي بس مو احر مني
وبعدها ما حسيت الا واني. بين حرارة احضانه

شيماء
بعدما خلصوا المراجعين
ورافد دخل على مروة
جان يفضل يحجي وياها. لوحدهم
بس مروة
كلتلي ما تطلعين عنده حجي خلي يحجي كدامج

ارفض نبقى اني وياه بمكان. لوحدنا
جان رافد يغلي من الغيض

واخير شي اضطر يحجي كدامي وفاجئنا بطلبه
من مروة
رافد .. مروة انا ما اريد اطلكج
مروة .. ليش هو اني بكيفك. تطلقني غصباً عنك
.. لا تنسين بينا بنية. ليش تضيعينها
.. بنتي. معززة ومكرمة. بيك من غيرك ما راح يفرق عندها شي بالدلال بالحالتين اني المسؤلة عن مصرفها

.. مروة انا مستعد اطلق فاتن حتى نرجع سوية
.. رافد لا عبالك علمود رحت اتزوجت
صديقتي
اني طلبت الطلاق

لا حبيبي ثق بالله ترة انت ما هزيت شعرة مني

بس اني اريد الطلاق لان انت مقصر وياي اني ومشمش بالمصرف. واكتشفت ان مالك دور بحياتنا
وانت بالحقيقة تشكل حجرة عثرة بطريقي
وفوك هذا ارجع اكعد اصرف عليك
واني في غنى عنك. ما تاقصة دوخة راسك

دار الحديث بين مروة. وصدمة رافد
بيها او بالاحرى. ردتله الصاع صاعين

طلع. رافد من عيادة مروة وهو يدردم

باوعت عليها وحجيت

.. مروة ليش متنطين لرافد فرصة اخيرة مو لخاطره على الاقل لخاطر مشمش خليها تعيش بين ام واب
وهي تحتاجكم اثنينكم صدكي مشمش تتأذى على بعادكم

مروة .. هو اني طلبت الطلاق لخاطر مشمش
عكدت حواجبي .. شلون يعني ما افتهمت؟؟

.. اني اذا رضيت اعيش بالمهانة. وضعفت امام طلب رافد وارجعله
ساعتها. راح اعكس لبنتي صورة ضعيفة عن امها
بختصار اكللها ان المرة متكدر تعيش بدون رجال
والرجال اله حق يغلط ونسامحه ونرجعه لحياتنا وكأن شيئاً لم يكن

لا شيماء بالعكس انتي غلطانة
مشمش تحتاج تشوف الحياة بصورتها الصحيحة
ميصير تكبر وتفتهم ان الام عادي تنهان ولازم تصرف عالاب
بساعتها هذا الشي راح يأثر على حياتها بالمستقبل

هدى

تمت خطوبة. ضحى وظافر
ومرت الايام والشهور خلصت. امتحاناتي لاخير السنة
ودخلت بشهري
مروة اتطلقت من رافد

والكل ببيت عيالي داخلين بالانذار
لان ما بقة شي على ولادتي ولاضرب من هذولي
كلهم مروة وشيماء. محضرات نفسهم
مروة تكول
.. اني اشرف على الولادة
وشيماء تكللها انتي تشرفين عالولادة واني
اشرف على استقبال الشحرورة الجديدة

جنت كاعدة ببيت يم عمتي. ومنى. وهديل
لازلت منبوذة

وعلاقة قاسم اتوترت وية بيت عمه محمد من عهد سالفة ايمن وهديل

وهالة بطلت تجيب سيرة عزام على لسانها
بعد ما شافته ولا التقت بي

واني فرحانة ودا اجهز لبنوتي
واحضرلها بالحقيقة مو بس اني دا اجهز خالتي وحمواتي همين ديشاركون بالجهاز

وهالة اتكفلت بتزيين البيت وتحضير غرفة الطفل
كلها لو وردي وابيض

ام قاسم جانت كاعدة تسولف وياي
اندك نقالها وجان المتصل قاسم
حجة وياها وهي انكلب وجها وكالت
.. هلة بيهم انا ما اكدر اطردهم

سدت النقال وهالة وسألتها
.. شنو. شبي قاسم
.. يكول انا جاي بالطريق بيت عمي محمد يردون
يجون همة وعمي فرزدق.
شكلهم يردون يتراضون ويانة

همة حجو هيج اني بطني انمغصت
ما اعرف من يجيبون سيرة عمهم محمد كلبي ينكرب

وصل قاسم ووياه هشام. وكال
.. يمةً. ما اريدج تنفعلين من يفتحون الموضوع
لا تخلين بالي يظل عندج

.. لا يمة لتخاف علية انا. شفت الاقوى منهم
واكدر اواجهم

همة جانوا يحجون وجان يندك الجرس
وقاسم التفت على هشام وكله

.. هشام روح افتحلهم انا رايح ابدل ملابس الشغل
راح قاسم صعد فوك

باوعت للكاميرا وجان اشوف بيت عمه محمد كلهم جايين حتى ست كهف. جاية وياهم

يمة كلبي كام يوجعني
حضنت بطني. اطمن بنتي.
بالحقيقة ما اعرف منوا بينا الي تحتاج الاطمئنان

دخلوا. كلهم. وبدينا نسلم عليهم.

ايمن جان مدنك راسه. ما رفعه ولا اتجرأ
يحط عينه بعين احد بينا

دخلت رهف مثل. الطاووس
متأنقة على اخر حباية. جانت عيونها تدور بالوجوه
اني اعرف عليمن تدور

هي تدور بعيونها واني لويات بطني زادت ما نقصت
وبدة وجهي يعرك

وجان يدخل قاسم ويلقي السلام
والعيون كلها اتوجهت عليه

حسيت بروحي كامت تلوب
اباوع عليه كعد يسلم عليهم واحد واحد
ومن وصل يم رهف راد. يسلم عليها

اني عطت بصوت مفزوعة.
.. قاااااااااااسم الحك علي

يتبع

احبكم كومة احبكم هواي
اختكم نهى الحسون
.☺️☺️☺️☺️☺️