أساور الفضة الفصل الخامس وستون 65 - بقلم نهى

مساء الانوار عليكم احبتي

#اساور_الفضة_ج٢
#نهى_الحسون

ها قد لاحت بوادر الرحيل
فقطار قصتنا قد شارف على الوصل الى نهاية مطافه
فتهيؤوا. واستعدوا. فقريبا سنصل الى محطتنا الاخيرة
مع ابطال قصتنا

هدى

في المستشفى بعد ساعات من الم المخاض
والتعب والخوف. والترقب. وجان تشرف بنتي
احلى بنوتة بالعالم.

متمددة على السرير بغرفة بنتي بالبيت
غمضت عيوني بتعب واني اتذكر
الم المخاض واوجاعه القوية الي ماعرف منين مكانها بطني لو ظهري
والخبصة الي صارت وية صرختي
وخوف قاسم وخالتي والبنات

اتذكر وجه قاسم حبيبي كان خايف وفزوع اكثر مني
وكل شوية يسأل امه ويكللها
.. يمعودة حجية دشوفيها الله يخليج راح يغمى عليها
هاي وين تكدر تتحمل هيج اوجاع
ياربي والله بعدها صغيرة على الولادة.

ام قاسم.. يا يمة قاسم صلي على النبي. شنو قابل
اول وحدة راح تطلك وتجيب هاي انا كدامك
حملت بيكم سبعتكم. والحمدلله جنت اصغر منها بالعمر لما ولدت فاطمة

رجع يباوع علية. واني اتلوى واعض بشفتي بألم
وعيونه تلمع

وكال .. لك خوية هادي والله ما يلوكلك تنوجع
والله صعبة اشوفك موجوع وما بيدي شي اسويلك

هسة كون الالم رجال جان اتلاوبت وياه
واخليه. يحلم يقترب منج

هو يحجي واني دموعي ينزلون عشرة عشرة

بعدها وصلنا للمستشفى الي تداوم بيها مروة
لكيت خواتي منتظريني هناك ومجهزات كل شي

دخلنا للمستشفى وقاسم الي جان مخبوص . ومرتبك
ولازم كف ايدي شابكها بين اصابع ايديه

من اجتي شيماء حتى تاخذني وياها باوع عليها متردد
وهمس بصوت ناصي كال

.. ما يهلي اخليها تروح وحدها وياج وهي هيج موجوعة
باوعت عليه واني ابجي وكلتله

.. قاسم عفية خاف اموت اغيدك تديغ ( اريدك تدير ) بالك على بنتي

اني كلت هيج وهو حط ايده على حلكي
وايده الثانيه شدد على لزم ايدي وكال بغضب

.. لج هدى لتحجين هيج تزيدين قلقي وحيرتي عليج
تعرفين اني بهاي اللحظه بالذات عاجز مااكدر اسوي شي
لو بيدي الامر واكدر ارجع الزمن مااخليج تصيرين حامل ولاتتوجعين هيج
جان يحجي وهو لازم ايدي بكل قوته ميريد يتركها

شيماء ببتسامة.. لتخاف ما عليك بيها
هاي كل وحدة من تطلك تكول هذا الحجي
لزوجها. حتى تخليه يحس بتأنيب الضمير
حتى بعد ما يعيدها

قاسم يباوع علية واني ابجي ويرجع يباوع على
شيماء كللها .. شيماء يعني هي الا تنوجع يالله تولد.
يعني ماكو غير حل مثلا ابرة تسكن المها او اي شي ثاني

هو يحجي واجتي شيماء تريد تاخذني من يم قاسم
صرت مثل الطفلة. من يردون ياخذونها من حضن ابوها ضميت راسي بصدره

وعطت .. لا عفية قاسم لتعوفني
خلاص بطلت ما اغيد (مااريد) اجيب غجعوني (رجعوني ) للبيت

جنت احجي واني موجوعة

هو اتشنج وحوطني بذراعه وكال
.. شيماء متكدرون تولدونها واني ابقى يمها

شيماء ابتسمت .. لا ميصير لازم تدخل صالة ولادات
لتخاف عليها اني ومروة وياها راح ندير بالنا عليها

ام قاسم.. لك قاسم شبيك يمة. كول يالله خلي البنية. تفوت وية. اختها
مو زين عليها. تعرضلها

اباوع عليه كوة ترك ايدي وعيونه. بيهم خوف
حسسني بحبه وخوفه علي

وغمض عيونه وحط وجهي بين كفوف ايديه وطبع بوسة على كصتي
.. الله وياج. ينبض كلب قاسم

حجاها ودار وجهه وراح ما يريد احد يشاهد نقطة ضعفه وهو يعاني

اخذتني شيماء ودخلتني صالة الولادات
تعاونوا شيماء ومروة حتى يولدوني

بعدها مروة اتولت الولادة.
وشيماء اول من شالت بيدها بنتي ولمعت عيونها وكالت

.. هدى. مبروك بنتج تجنن
شنو راح تسميها

ابتسمت بتعب واني وجهي وكصتي عركانة
وشعري مهوس وملتصق على خدي وركبتي من ورة العرق.

همست بصوت مبحوح من ورة الصياح
.. اتفقنا اني وقاسم نسميها اساوغ (اساور)
وقاسم بس سمع الاسم من بين شفايفي ضحك. وكال
اسميها وشكو علينا خليج تغوغين براسي انتي وبنتج والله كريم

شيماء جانت تنظف الطفلة وتحجي وياي
.. حلو اسم. اساور بس شلون بيها اذا طلعت عندها لدغة بالراء

مروة ضحكت .. صدكيني راح تجنن العالم بلسانها
فديتها شلون حلوة گلب خالتها

رجعت غفيت من التعب سمعت صوت بنوتي دتبجي
فتحت عيني ولكيت خالة. يم كاروك ( المهد)
اساور

بعدما رجعت من المستشفى وسبحت وخالة جانت
مجهزة غرفة جوة للطفل حتى تستقبل بيها الناس
واني انام بيها حاطة سرير لونه وردي الي ولبنتي

طبعا هاي سوالف منى. وهالة. اهتمت بالزينة
جانوا مزينيها نفاخات والعاب.

جتي هالة من برة وكالت لخاله
.. ماما. تعاي هشام جاب الكصاب وبدوا يذبحون الخروف
يكول صيحي امي خلي تنفهمنا شنسوي

ام قاسم.. اني مو كلتله يذبحه ويقطعه ويوزعه
كله على الفقرة

بالله شو تعاي كعدي يم مرت اخوج خلي اروح اشوف شسوة هشام
ادري بي ما راح يدبرها الا اوكف فوك راسهم

راحت واجتي هالة اقتربت من سرير اساور
هالة مدت اصبعها وصارت تتلمس ترافت خدود الطفلة
الناعمة وكالت .. يمة فديت اسو حبيبت عمتها

ابسمت .. ها هالة. ليش كلبتي اسم بنتي
هالة.. خاب شوف هديوة عود صارت ام ومتقبل احد
يعلق على بنتها
شوفي حبابة اذا انتي امها فأني عمتها والي حصة بيها
ياما وياما شبعنا غسل مواعين وكراب من وراج

وخلي ببالج بعد مشفتي شي من التغييرات
اليوم الاسم وباجر الله يعلم شنو راح اسويلج بيها

.. حغام (حرام ) عليج يعني شنوقصدج
انتي ناوية تطولين ببيت اهلج ماكو وغاج (وراج ) زواج

.. منين ياحصرة هو الرجال وطيرناه. وما شفنا غير بس غباره

مرت الايام
وبديت اتعلم شلون ارضع بنتي واعتني بيها
بدون ما اخاف أاذيها لان جانت كولش صغيرة

قاسم جان كلما يجي من الشغل كبل يدخل علينا اني وبنته.
يكعد يمنا ويضل يباوع عليها عبالك كائن
غريب.

قاسم.. اكول هاي شوكت تكبر وتكولي بابا
.. اهووو تلحك عليها. غاح (راح) تشبع. من كلمة بابا
بجت كام شالها من يمي وكال
.. هاي ليش هيج رابطين حبيبة ابوها. ومقيدينها عن الحركة

.. خالة تكول الكماط مفيد للطفل حتى يقوم عظامها
لان بعدها لينة وماعندها سيطرة
على حركات اطغافها (اطرافها ) فتشوفها اذا ما اكمطها
تصيغ (تصير) نومتها قلقة

جنا نحجي وهي تتنعوص كائن صغير يطالب بحقوقه من هسة
.. لعد هاج لزمي خطية لتخليها تبجي

جان شايلها بحذر شديد عبالك شايل تحفية ثمينة
خايف عليها لا توكع من ايده وتنكسر

اخدتها منه وحطيتها بحضني
وبلشت ارضعها
وهي بدت ترضع بنهم

دخلت هالة وكالت.. قاسم تعال اتغدة صبيتلك غدة
جوابها وعيونه علية تلمع بوكاحة.

روحي جيبي اتغدة هنا

راحت طلعت برة وكمل كلامه وكال
.. خلينا انا وبنتي نتغدة. سوية
هي تتغدة بالجنة وانا اتغدة بالنار

احس بخدودي صاروا نار من ورة كلامه
جان يمي الشال شلته وغطيت بنتي وصدري

وهو ابتسم.. ها ليش كطعتي علينا المشهد
والله جنت مستمتع

..يمعود خف بنظغاتك غاح ( بنظراتك راح )
تنفس غضعة ( رضعة بنتي ) انت وعيونك

.. حقي. رجال صارلي كومة صايم
وانتي وبنتج كاعدات تلعبن بأعصابي
متكليلي شلون اكدر اتحمل

اي صدك اتذكرت
شوفي شنو جبتلج
طلع من جيبه علبه صغير
حمرة وفتحها. وطلع منها زوج تراجي ذهب كولش حلوات وكال
.. هذني اشتريتهم الج بمناسبة ولادتج

جانت هاي اول هدية يجيبها الي قاسم
ابتسمت وعيوني تلمع وحجيت بصوت ناصي ما اريد اكعد بنتي وكلت
.. يا غوحي (روحي ) ونبض گلبي
الله يحفظك الي ويخليك خيمة على غاسنا

دخلت هالة شايلة بيدها الصينية
وراهة خالة كالت

.. اليوم بيت ام فرزدق يردون يجون يباركون على ولادتج
.. خالة حتى اخواتي غاح (راح ) يجوني اليوم.

.. هلة بيهم بكل وقت
بس من هسة اخواتج تكوليلهم يبقون يمنا عالعشا
حتى بيت ام فرزدق راح يبقون لان اليوم مسوية ثواب

بعدها بدة قاسم يتغدة ويسولف وية امه بامور شغله
اسمع ام قاسم تكله
.. يمة قاسم شنو هذا الي سمعته من هشام يعني صدك
انت ناوي تكسر وتعرقل شغل عمك منير وابنه منتظر

.. يمة لا تدوخين روحج بهاي الامور
انا جاي اصفي حسابات قديمة وياهم
لايكون نسيتي حقي وحق خواتي وحركة گلب ابوي وموته بحسرته

.. لا يمة ما ناسية بس
خايفة عليك منهم الكاعد تسوي ما راح يعدي على خير
همة الشر متربع بگلوبهم وخايفة يأذونك

.. حجية ما يشيل الراس الا الركبه
صدكي ما اتنازللهم وراح ابقى اسعى لحتى اخذ حقي لحد اخر نفس بية

همة يحجوو واني كلبي ينغزني بس ما اكدر اتدخل
بهاي الامور
حتى لو حجيت مراح يتقبل يسمع كلامي
ما بيدي غير بس ادعيله رب العالمين يدفع البلاء عنه

للعصر بدلت بيجامة وردي وابيض وطوق وردي
وبنتي اسو هماتين لبستها ملابس وردي وابيض
وشعري منزلته طويل اسود
وحطيت شالي على كتفي للحالات الطارئة

وصلوا خواتي مروة وشيماء وضحى ومريم
ضحى شافت اسو بنتي وهي كامت
تبجي .. اووووي لج هدى اكلها ما اتحمل
كلها وردية هي وملابسها وخدودها وشعرها اسود

مريم حجت بلهفة .. يالله ضحى. خلصي. ترة احنا وراج
لازمين سرة منتظرين شوكت تنطينا اسو

مشمش .. حتى اني منتظغة ( منتظرة ) سغاية ( سراية)

هالة تبوس بخدود مشمش .. يمة حتى مشمش تطالب بحقوقها

مروة.. مشمش حبيبتي راح سوكج بعد اجتي من تكسر
غرورج
شيماء.. لج مروة لتحجين على مشمش هشكل
تبقى معزتها بالقلب نفسها ماتتغير هي اول فرحة لنا

مريم اخذت اسو من ضحى بعدما اجتي وحضنتني واتحمدتلي. عالسلامة
وحطتها بحظنها
.. فدييييييت والله فديييييييت. حبيبة خالتها
دنكت عليها وباستها.

هدى بنتج جنها لعابة
سمعنا صوت هشام بالصالة يحجي وية هالة
يكللها
.. ادري شنو الجماعة ما تابوا بعدهم على
فديييييييت والله فديييييييييت

هالة.. لتخاف هالمرة دتفدي بنت اخوك
مو فنان

ابتسمت على وجه مريم الي صار ينطي الوان
خالة ام قاسم سألتها
.. شنو خالة انطوج النتايج
همست .. اي خالة انطوني النتائج وطلعت ناجحة

.. اي صلوات علىً النبي حبيبتي الله يوفقج ان شاء الله يوم
تتخرجين من السادس
.. شكرا خالة تسلمين
شيماء.. اي والله خالة ادعليها.
بلشت تدرس للسادس من هسة

باوعت لمريم وكالت
.. اسعى ياعبدي وانا اعينك
ان شاء الله ربي ميضيعلها تعب

بعدها اجوي بيت ام فرزدق وزوجة صهيب حامل
وخالة ام فرزدق مكدرت تجي صحتها كلش مو زينة

بس ام صهيب وزوجته واخته.
اباوع لضحى جانت تسولف وتحجي وية زوجة صهيب
وام صهيب وبعدها خالة ام صهيب باركتلها
علمود خطوبتها وسألتها شوكت الزواج

.. ان شاء الله هذا الاسبوع
ام صهيب .. اي صدك سمعت بيج. امتحنتي سادس خارجي
عفية عليج. زين تسوين

.. اي الحمدلله امتحنت. بس بعدني منتظرة النتائج تطلع

اخت صهيب حجت وية هالة جانت وياها بنفس القسم بالكلية وكلتلها

.. البنات يكولون. النتائج راح يعلنون عنها الاسبوع الجاي
هالة.. منين جابوا هذا الخبر اشو اني ما سمعت

.. بالحقيقة حتى اني ماسمعت بهذ الشي
بس وحدة من بنات الكروب يصير العميد. خالها وهو كايللها

.. لعد ما دام هيج الحجي اني عكب باجر اروح واستلم النتيجة
خلي اشوف روحي شمخبصة

يحجون بالنتائج وكلبي رفرف
.. هالة عفية ووياج تمغين (تمرين ) على قسمي تستلمين نتيجتي

.. صار وشكد تنطيني اذا رحت
.. اخليج تبوسين اسو

.. خاب شوف هاي. مصدكة. روحها
بابا انا اتعديت مرحلة البوس وية بنتج ووصلت للعض

ام قاسم شكهت .. عزة بعينج يا هالة
واني اكول وجه البنية شبي. محصف واحمر
اثاري انتي الكلبة دتعضينها

هالة .. والله مو بس اني دا اعضها العشيرة كلها دتعضها بس بالبوكة

هدى.. لج منوا يعضها واني ممخلية اي واحد يقتغب (يقترب) منها

هالة .. خليني ساكتة احسنلي ما اريد اذكر اسامي
اخاف اجيب حجاية لبنتج وتصير سمعتها على كل السان
ويكولون عليها وحدة مو زينة

.. لج عوبة اكص السانه الي يحجي على بنتي لج هاي بنت قاسم مو اي وحدة

هالة .. والنعم منها. بس انا لو منج ما افتح حلكي
واكعد احجي واتفخفخ ببنتي وابوها

لان. قاسم بكبره البارحة
كاعد. بالهول وشايل بنته وفاتحله مزاد
براس اولاد خواته مجمعهم ويكللهم
منو يزود انطي بنتي كاعد يدلل بيها

وخطية زيوني وجواد البارحة صاروا من الروس
كل واحد يكول انا اخذها
اتعاركوا الاخوان من ورة بنتج

هي تحجي واخواتي يضحكن عليها

ام قاسم رافعة حاجبها وكالت
.. اي مو بدلتي الموضوع عبالج تنسينا العضة
والله مرة ثانيه خلي اشوف. خدها احمر
صدكيني اضربج على حلكج

هالة.. اهوووو انتوا شكلكم ناس ما تدورون الستر
لعد. تعاي خلي اكلج منو الي ديعضها وياية

.. هشام. وزيوني وجواد.
والله حتى هديل لكيتها خاتلة بالبنية وتعض بخدودها.

ضحى .. عزة لج هدى لو ما حاجية احسنلج بنتج
صايرة فرهود بيناتهم خطية
القوم كلهم متعاونين عليها

مريمجانت كاعده بصف هالة كالت
.. هداوي حبيبتي. هي خدودها وترافتهم تشهي عالبوس والعض
هالة دغتها وكالت بصوت ناصي بس سمعتها
.. سبحان الله نفس خدودج. ما تشوفين جماعتنا
شلون مجلوبين عليها وكاتلين روحهم نفس الترافة
عرفت دتقصد على هشام
مريم سكتت ودنكت راسها

مر الوقت وصار ليل واخواتي راحوا
وقبل لا يطلعون هدولي. سوار ذهب. البنات اربعتهم مشتركات بي.

فرحت بهديتهم خطية حتى مريومة مجمعة ومشاركة وياهن.
لبسته وية سوار امي الفضة

اباوع لضحى ولمروة ولشيماء ولمريم
كل وحدة بيهم جانت لابسة سوار امي الفضة
ابتسمت واني اترحملها بكلبي

شيماء

بعدما حيدر. فاتحني بموضوع الزواج
مرة ثانية اجاني للمركز وهناك طلب مني الزواج وبصورة مباشرة

بعدها عرفت عن طريق الصدفة من سرى ان حيدر
متعارك وية اهله
سألتها عن السبب كالت
معترضين على زواجه منج انتي بالذات

بيومها عرفت شنو سبب رفضهم
ميحتاج احد يكلي ليش معترضين علية
شترجى بعد واسم اثير لازال بهويتي
مثل العار راح يظل يلحكني طول عمري

سرى.. خالة شيماء عفية ما عليج بيهم. لا تخليهم يأثرون عليج
صدكيني اني وبابا وحتى حسام وكرار
صاروا يحبونج من كد ما حجيتلهم عنج وعن طيبتج

وكل يوم يسألون بابا شوكت تجي خالة شيماء تعيش ويانة
بالحقيقة كلام سرى وياية جان له تأثير
بتمسكي بحيدر.

وبيومها من اتصل علية بالليل فتحت وياه الموضوع
وهو جاوبني وكال
.. شيماء انا رجال عمري ٣٩ سنة مو صغير
حتى اسمح لاهلي يتدخلون بحياتي

هي مرة وحدة صارت وخليتهم يتدخلون بحياتي
واتندمت. بعدها بكد شعر راسي
لان سمحتلهم يختارولي زوجة من اقربائنا
وسمعت كلامهم واتزوجت.

وبعدها بقيت ١١ سنة ادفع ثمن اختيارهم الخاطيء
وبعدما ارتبطت وياها وصار بينا ثلاث اطفال
عرفت بطريق الصدفة. ان هي جانت تحب ابن خالتها
واهلها جبروها علي الزواج مني واكتشفت لازالت بكل صلافة
مستمرة بعلاقتها وياه

مع الاسف اجة اكتشافي بوقت كلش متأخر بعدما
صار عدنا بنية وولدين

قررت اهجرها بالفراش واسحب منها نقالها
بس احنا بهذيج الفترة جنا عايشين وية بيت اهلي
وكان هناك الف وسيلة تكدر تتواصل بيها وية ابن خالها

وبيومها كلتلها تلمين ملابسج وتطلعين من حياتنا
وانسي عندج اولاد. وبنية
وفعلا ما صدكت اني كلت هيج يوم ثاني كعدنا الصبح ما لكيناها

ورفعت عليها قضية طلاق وانفصلنا وكلمن راح بطريقه
وبعدها انا صار شغلي ببغداد
قررت ابدي حياة جديدة هنا وية عائلتي

بعدها اتعرفت عالدكتورة رفل بالمستشفى جانت كلش حبابة
وصارت هواي امور بيني وبينها
وكلت هي هاي الي راح اكدر ابدي وياها حياتي

جانت رفل متزوجة ومتطلقة
وعندها بنية عند ابوها.
من اتقدمتلها جانت كلش فرحانة

هو يحجي واني اتذكرت صدمتي بخبر خطوبته من الدكتورة رفل
احس النار بدت تشتعل بداخل صدري من جديد وسألته

.. شنو سبب انفصالك عن رفل

.. بالحقيقة هواي ظروف اتعاونت على فسخ خطوبتنا
. صادف انا جنت امر بفترة. ضغوطات بالعمل
وشغلي جان هسه بدأ يتوسع
وانشغلت عنها هواية. والله اني جنت يا دوب
الحك اشوف احتياجات اولادي وبنتي

بس هي جانت تغار من اولادي وبنتي
بالبداية كلت معذورة لان هي ما متعودة عليهم. وبعدها جديدة

بس بمرور الايام ومن صرنا نخطط لزواجنا
اشو فاجئتني بطلبها

.. شنو طلبت منك
.. طلبت ان اعزللها بالطابق الثاني لوحدنا اني وياها
اولادي يبقون جوة يم عمتهم صمود
تكلي حتى اخذ راحتي وياك وما نتقيد بيهم
وهذا الشي حط حد ونهاية لخطوبتي بيها

.. زين انت هسة ليش تريد تخطبني
.. السبب الاول والاخير كلبي هواج
ولاؤل مرة بحياتي عقلي وكلبي يتفقون
على شي الي هو انتي

كلبي يكلي شنو تنتظر متروح تخطبها لا يسبقك
احد. وياخذها منك

وعقلي جان فرحان بس خايف ويكلي
لاتنسى انت عندك. اطفال ومتزوج ومتطلق
وهي ممتزوجة. ومناقصها شي

بس غصب عني بعد ما اتعرفت عليج وزادت
معرفتي بطبعج صرت اناني واطمعت بيج وردتج
الي

جانت الدكتورة سولاف دائما تحجيلي عنج
ما اعرف شلون يدخل اسمج بمواضيعنا

بس كل الي عرفته عنج انتي
امرأة. تحارب بقوة علمود تحافظ على اخواتها
الصغار. وتتولى مسؤليتهم. وتفكر بيهم قبل نفسها
وهذا الشي زاد من احترامج بكلبي

لذلك لا تتوقعين اهلي راح يكدرون يوكفون بطريقي او يأثرون على قراري
ترة خلي ببالج اهلي راح يحاولون يسمعونج كلام
انا كل الي اريده منج
ما تستمعيلهم خليج منج الي وعوفيهم علية
اني مني الهم لتدخلين نفسج بيناتنا
لان اعرف شلون احطهم عند. حدهم

شيماء.. حيدر بس اني اعرف شنو سبب رفض اهلك
الي اني مو غبية
واعرف كلش زين بابا واسمه. ميشرف ناس مثل اهلك
حتى يحطون ايدهم بيده

.. شوفي شيماء خليني اكلج شغلة
انا راح اتزوجج الج. ما راح اتزوج ابوج

واذا جان هو انسان فاشل فهذا الشي على نفسه ما راح
يأثر على اهل بيتي.

ما دامه ما كدر يأثر على اخلاقج واخلاق اخواتج وتربيتكم
اذن مستحيل راح تسمحيله. ان يأثر على عائلتج

رجف صوتي بفرحة ونزلت دموعي غصب عني
وهمست بصوت متكسر من اثر الدموع
.. اكيد ما اخلي يقترب على عائلتي وراح ابقى احارب
بأيدي وسنوني. حتى احافظ على عائلتي وبيتي

حيدر.. لج شومة مسحي دموعج ولا تمردين كلبي
وتبجين. لا تدخلين بخطيتي وين انطي وجهي بهذا الليل
وصوتج اليرجف يعذبني

ابتسمت من بين دموعي..يالله هسة امسحهم
حيدر سحب حسرة بلهفة
.. اااااااخ ويلوموني من احبج واعاندهم
واكول بعالي صوتي. لو هاي البنية لوما اريد

كلبي يدندن على نبرات صوته
جنت كولش فرحانة. بكلامه وياية

ويوم ثاني حيدر اجة للمركز
حتى يتفق وية مروة. على يوم الخطوبة
وفعلا حددوا يوم الخطوبة

وبيوم مشية الرجال مروة اتصلت على اثير وامجد
وحتى يسجلون حظورهم كدام الناس
وصدك بيومها اجوي

اثير الاب حسب ما مكتوب بهوية الاحوال الشخصية
وامجد العم بس بالاسم واولاده الي كان وجودهم
بس تكملة للصورة الاجتماعية كدام الناس مو اكثر

بس الي رفعت راسي بيهم حقيقة
قاسم وظافر وعمو ابو فرزدق الي هم حظروا خطوبتي

وانملت استقبال مروة بالرجال
وحيدر جاب اخوه الي ساكن ببغداد وعمامه
والشيوخ. وحتى اولاد
اخوانه اجوي
بس ابوه واخوه الجبير ما حظروا

الشارع. انسد من الطول للطول بالسيارات
اباوع عليهم من الكاميرا

كلبي بوكتها يريد يطلع من صدري
وسرى وحسام وكرار اولاد حيدر
دخلوا وكعدوا يمي كان مبين عليهم
الفضول والتردد

كسروا خاطري خطية محرومين من حنان الام من
صغرهم
وبيومها صارت الخطوبة والعقد بيوم واحد

قاطع علية حبل افكاري سؤال مروة

مروة.. شومة شنو . شبيج متوترة. وخايفة
صارلج ساعة. فكرج مشغول وبالج مو يمنا
عبالك انتي العروس مو ضحى

ابتسمت .. سؤالج نفس سؤال حيدر الي من طلعنا نختار غرفة النوم
هم سألني ليش خايفة

مروة .. شنو ليش تخافين
.. اخاف ابني امل من جديد. ويتهدم مثلما صار بية
وية ليث

مروة لزمت ايدي اتطمني
.. لا شيماء
حيدر مو مثل. ليث وهواية فرق بينهم
حيدر اجة وعرض كل حياته كدامج ماعنده
اسرار ماعنده شي مخفي

جنا نحجي واجتي هدى علينا وشايلة اسو
جانت هي وبنتها لابسات نفس الفساتين
برونزي واسود
هدى لابسة شال برونزي موالم الفستان منسقته وية
طوق اسو. بي فيونكة. ولونه بونزي
عمر اسو ٨ اشهر ودبدوبة

واليوم زواج ضحى بالنادي. الكل حضر عرسها
صديقاتها. وعيال هدى وبيت خالة ام فرزدق
وام صهيب ووزوجة صهيب

واهل ظافر كلهم اجوي وجانوا مبينين عائلة.
محترمة وامه وابوه. حضروا العرس

جان العرس بقاعة اعراس مختلطة
نساء ورجال ضحى جانت لابسة بدلة بيضة
خاصة للمحجبات طالعة اميرة
احلى ما بيها فرحتها كانت مرسومة بعيونها

وجود بنت ظافر لابسة بدلة بيضة تول
وياسر لابس قاط اسود رسمي مثل ابوه

اماظافر الي كان كاعد يم ضحى بالكوشة
وفاصل عن العالم عبالك بس هو وضحى
موجودين بالدنيا

اباوع لمروة اختي تصفك وتباوع لمشمش شلون تركص.
وهشام مكابلها يركص وياها وهي تتدلع عليه

التفتت اباوع لهدى جانت شايلة بنتها وواكفة يم قاسم الي جان
لابس قاط كحلي. واسو اتقيأت عليه
وهو نزع السترة وبقى بس بالقميص والرباط

الي يشوف ضحامة قاسم ميتوقع ان كلبه يوكع
اسير بيد بنوته الصغيرة. اساور
جان مجنون بيها. حتى مرات اضحك على هدى من تتصل علية وتشتكي تكول
كمت اغار منها ماخذة ابوها كله لها متنام حضرته الا على ايده

..
ضحى

كاعدة لوحدي بالغرفة وكلبي ينبض بين ظلوعي
خايفة ومترقبة. صحيح هاي مو اول ليلة الي
بس يبقى ظافر رجال غريب علية
ولازم يقترب مني ويملكني ويصير ستري

كمت من مكاني اباوع للغرفة الي اختاريتها اني وظافر
هي وباقي اثاث البيت كله اختاريته اني
جنت حيل فرحانة وما مصدكة اني كاعدة اجهز
لبيتي لوحدي. جهزت غرف لجهال ظافر
اتذكر اخذ بنته وابنه وخلاهم همة يختارون على ذوقهم
ظافر يحب اطفاله بس بطريقته

اشوفه تعامله وية بنته جود لو تطلب النجمة
يجيبها لها. وكذلك وية ابنه. وهمة مبين عليهم كولش مدللين بس ما عندهم انضباط.

هذولي همة عائلتي وراح احبهم بحلوهم وبمرهم
اهتم بيهم
يارب قدرني اكون عند حسن ضنه بية

جنت واكفة كدام المرايا اباوع لشكلي
وثوبي والدلعة الواسعة تتحداني
شلون اضم روحي من عيون ظافر

وعلى طاري ظافر انفتح الباب ودخل صاحب
افكاري

وعيونه تلمع بوكاحة. نفسه هو ظافر بأول يوم ما تغيرت نظراته

اقترب مني وكال
.. الف مبروك نورتي بيتج
جان يحجي ويتقدم علية

وجهي صار نار من الحرارة رفعت كف ايدي امسد
خدودي متوترة

ابتسمت وكال
.. يابة بعدنا مكلنا شي انتي كبل انكلب وجهج طماطة
لحد هسة انا عاقل
والله وكيلج هنة هذني
الكلمتين الوحيدات سليمات طلعيهن
من الكلام المحضره لهاي الليلة

..يالله تعاي هسة صار وقت الجد
خلصتي فترة الخطوبة كله. عيب وما يصير وزحمة

ابتعدت عنه وخليت مسافة بيني وبينه مرتبكة

وحجيت .. ااااا اي صدك ظافر انت ليش مجبت
الجهال ويانة بالبيت خطية

رفع حاجبه. وكال.. هو منو الخطية انتي لو همة
انا كلت لامي تاخذهم عندها حتى يفرغلنا
البيت لوحدنا وخلي ببالج.
شرط اسبوع ماكو طلعة. كون اطلع صيامي
بذيج الايام كلها منج

اقترب علية ولزمني من زندي وقربني عليه
جنت ارجف جوة ايده وعيوني بعيونه همس بصوت ناصي
.. تعاي خلي المج بحضني هنا بيتج وامانج

يتبع

احبكم كومة احبكم هواي