أساور الفضة الفصل السابع وستون 67 - بقلم نهى

مساء الانوار عليكم يا احبتي

#اساور_الفضة_ج٢
#نهى_الحسون

شيماء

بعد ساعات مشحونة بالتوتر حانت لحظة اللقاء

بعدما زفونا للفندق. رباب وضحى
دخلوا وياية للغرفة. وساعدوني انزع البدلة حتى ياخذونها وياهم. اريد ادخل للحمام وضحى انطتني

ثوب ابيض خفيف ووياه روب مالته
ضحى .. شومة حبيبتي سبحي بماي دافي حتى يساعدج عالاسترخاء
رباب.. ها ولا تنسين حطيتلج الغسول والمناشف
بالجنطة

باوعت لضحى طلعت شرشف ابيض وفرشته عالسرير
رباب تفتح بتسريحتي وسألت ضحى مستغربة
.. هاي شنو دتسوين
ضحى .. افرشلهم فرشة ما مدشنة انظف واحسن

جانت ضحى تحجي بصفحة ورباب بصفحة منا الى ان
خلصوا شغلاتهم اني دخلت الحمام وسبحت وبدلت
لكيتهم طالعات.

حسيت بالهدوء والسكينة. جان حيدر حاجز سويت
كامل
بعد يوم طويل محمل بالمشاعر المختلطة
والقيام بمراسيم الزواج من صالون وبدلة وتصوير
ومعازيم وزفة وانتظار وترقب كل هاي الامور
ولدت ضغط علية.
فعلا الحمام الدافي جان له دور بتخفيف التوتر

جنت واكفة كدام المرايا اعدل بشعري
همزين البنات ساعدوني بفتح التسريحة
والا جان انحجت حجايتي
لو عايفيني لوحدي جان مو بعيد اطلب من حيدر
يكعد يحل وياي اللغز المتشابك بشعري المسمى تسريحة

دخل حيدر للغرفة
وجان نازع السترة والرباط اتوقف بمكانه
وباوعلي بنظرات. كلها لهفة ورضى

حيدر.. ها سبحتي
.. اي سبحت
.. ليش ما انتظرتيني
اتسعت عيوني والخدود صخنت
.. ها حيدر اني شنو كلت

حيدر بضحكة.. لتخافين جنت اتشاقة
بس خلي ببالج. انا ناوي وحالف
اجرب كلشي وياج وما اخلي شي بنفسي

فعفية حبابة من هسة اريد تتعودين علية
مو كل شوية وكامزتلي وتكولين ها حيدر شنو كلنا

جان يحجي ويتنقل بالغرفة طلعله ملابس
وفتح دكم القميص وشمره عالسرير وعيونه علية واني اراقبه

.. انا داخل اسبح تردين تفوتين وياي
ابتسمت ودنكت .. لا شكرا اخذ راحتك

ضحك .. شفتي انا شلون حباب وافكر بيج
خاف تبقين لوحدج

.. والله الي يشوف نظرات عيونك ميكول حباب
لان نظراتك بعيدات كل البعد عن الحباب ابو النية الصافية

.. اموت على اليفهمني

ضحك ودخل للحمام وكلي ما راح اتأخر انتظريني

طلعت من الغرفة واني اضحك على كلامه وياية

رحت للصالة

جان اكو طبلة بزواية الصالة وكرسيين
وجانت صينية دائرية بيها اكل مغطيها
رحت كعدت عالكرسي وصرت
اكشف الصحون جان عشا عرسان دسم
قوزي على تمن ولبن وسلطات بأنواعها وبيبسي
دنكت اشم ريحة الاكل الزكية

.. هذا. من طبخنا. اني اليوم
ذبحت وجبنا طباخ معدل وطبخنا. للمعازيم عازميهم على العشا
اخوي كال نزفك انت ومرتك وبعدين نعشي المعازيم
من نرجع انا وولدي وولد عمك
بالحقيقة معارفنا هواي. وزحمة ما اسويلهم عشا
فهسة هو دازلنا عشا بيد ابنه. حسين

هو جان يحجي واني اباوع عليه جان لابس دشداشة بيضة.
لايكة عليه احلى من الزي الرسمي

رجعت باوعت للصينية
.. اي بس خطية ليش هيج مكلف روحه وداز اكل هواي
عبالك راح يعشي معسكر مو ثنين عرسان

اقترب وكال تعاي خلي ننزل الصينية ونكعد ناكل بالكاع.
لان هيج اكل ما ينوكل عالميز

نزل الصينية واني كعدت بالكاع وكل شوية اسد
فتحتة الروب الابيض طويت رجلية تحتي حتى اسيطر

وحيدر اتربع يمي بالكاع
وشنف اردانه
وكال .. بسم الله
شال الغطا عن الاكل وبدة. يفرط اللحم عالتمن.

ويحط بماعوني واني لزمت الخاشوكة

انتبهت عليه بدة ياكل بيده
باوع علية وكال
.. القوزي احنا هناك بالسلف نسميه المفطح ناكله بيدنا
هيج طريقتنا بالاكل جربي وشوفي شلون راح تستلذين
لان المفطح ما ينفع ينأكل بالخاشوكة

ابتسمت متعجبة .. لا يابة وين اعرف اكل بيدي
حتى تشوف نص اللكمة بحلكي والنص الباقي واكع بحضني
وداعتك ما ادبرها

.. راقبيني شلون اكل بيدي وسوي مثلي
قدم راسه ومد ايده جانت الطريقة سلسة ومسيطر
جامع الخمس اصابع ملتمات على مسك اللكمة

بديت اكل بالخاشوكة واني اراقبه
بس بالحقيقة طريقة اكله اغرتني وحبيت اجرب اكل مثله

عفت الخاشوكة. ومديت ايدي وصرت اتصارع بيدي
وية اللكمة حتى ادبرها
جانت محاولة تصيب ومحاولة تخيب
وكعدت اكرر المحاولات لحدما اتقنت الطريقة

وابتسمت بنصر وبديت اكل وغمضت عيوني
حتى اتذوق
.. امممممممممم والله. عندك حق. صدك طيب
رفعت راسي واني ابتسم بانتصار

لكيت حيدر كاعد يمي و متجي عالنقة الوراه يباوع علية

ارتبكت من نظرات عيونه
وحجيت اضيع الارتباك
.. شكو ليش تباوع علية شنو ما شايف عروسة
تاكل قوزي بأيديها

تقرب علية وكال .. لا والله ما شايف غزالة ترفة
تاكل بأناملها.
يحجي وعيونه تريد تاكلني

احلفج بالله ما تحنين علينا وتأكليني بأيدج
اريد اجرب طعم الاكل شلون يكون من ايدج

ضحكت .. هو اني كوة دبرتها وكدرت ااكل نفسي
بيدي
.. جربي ما خسرانة. شي
مديت ايدي
ولميت اللكمة بأصابع ايدية. وقربتها عليه وعيوني بعيونه.
قرب راسه وفتح حلكه واكل اللكمة. وعض
صبعي وكمزت.

مصدومة .. عباتلك حيدر عضيت اصبعي
ابتسم وهو يباوع علية بمكر
.. بعدنا ما سوينا شي يادوب كلنا بسم الله
هاي عضة طرف اصبع هيج. كمزتي
شلون بيج ياحلوة بالباقي

اهوو هذا ما ناوي يسهل علية الامر
نفضت ايدي من الاكل مرتبكة وكمت من مكاني
بسرعة وهو اتفاجيء
رفع راسه يباوع علية

.. هاي شنو ليش كمتي بعدج ما اتعشيتي
.. لا الحمدلله شبعت

رحت دخلت لحمام الغرفة حتى اغسل ايدي
اجة وراي للحمام وكال
.. اتوضي وياج حتى نصلي
ركعتين الزواج

اتوضيت وطلعت ورحت لكيت محرم مال صلاة
حاطاته البنات الي بالجنطة
طلع حيدر من الحمام متوضي

ورة فترة بعدما خلصنا الصلاة. وشافني بعدني
خايفة ومرتبكة منه.
انطاني فرصة وكال تعاي خلي نكعد بالصالة
نشغل تلفزيون ونباوعلنا فلم او نسولف

افتهمت عليه يريد يطمني
وصدك شغلنا التلفزيون وكعدنا نباوع
صادف الفلم جان رعب اويلي شلون عندي حظ ياربي
هو اني على الاساس ناقصة رعب
ويجي الفلم الاجنبي يكملها علية

جان الفلم عبارة عن بنية شعرها طويل اسود
نازل على وجهها وكولشي ممبين منها

وتظهر للابطال بعدة صور
مرة تزحف بالكاع ومرة تزحف عالدرج
ويصدر منها صوت شهكة طويلة مخيفة

جنت مركزة وية الفلم والبطلة وخوفها لدرجة
كمزت من مكاني اول ما ظهرت فجاءة صورتها على الشاشة
هاي ام شعرالاسود المرعبة

احلى شي بالموضوع
اني من كمزت حيدر حضني وكعد يقرا علية ايات ويكلي
.. اسم الله .. اسم الله شبيج خفتي

كمت ابجي

حجة .. ها خير على شنو البجي

.. والله هواي علية هو كافي علية
رعب الليلة وخوفي منك
وفوكاها حاطيلي فلم رعب يريدون يشلوني
هسة حرت اخاف منك لو من الفلم

.. عفو عليج تخافين مني انا امانج شلون تحجين هيج
بالله شو تعاي كومي نامي انتي شكلج من التعب
انهاريتي وكمتي متعرفين شتحجين

كومني ولزم كف ايدي ومشينا لغرفتنا
جنت امشي مترددة
باوع علية.. لتخافين اليوم ما راح اسويلج شي
راح اعتقج في سبيل الله بس اليوم

اتنفست بعمق مرتاحة.
واتطمنت شوية على الاقل ما اشيل هم ذيج اللحظة
منا لباجر بلكي اكون شوية مرتاحة ومستعدة

طفى الضوة وسد الباب وحجة بصوت ناصي
.. اخذي راحتج ونامي

باوعت للغرفة جانت ظلمه وبيها ضوة ضعيف عابر من جوة الباب نزعت الروب ودخلت تحت الغطا
واتمددت على طرف السرير

حسيت على حركة بطرف السرير
كعد عليه وبعدها اتمدد
واتغطا جنت بعدني متشنجة ولازمة مكاني حسيت على حركته.
وكمزت من طرف رجله طخ طرف رجلي بعدت رجلي عنه

دار علية وكال
.. انا جنت سامع قبل بليل العاشكين طويل
بس ما جنت افتهم شنو معناه
هسة يالله عرفت. اثاري العاشك يظل يتلوع
لوحده علمود يوصل لحظن محبوبه

همست بصوت يرجف والغرفة ظلمة
.. ها حيدر وين الوعد انت مو كلت اليوم راح اخليج براحتج

.. اي صحيح انا كلت اليوم اعوفج براحتج بس ما كلت
بعد ما احجي وياج لو حتى هاي هم لازم تحرمينا منها

استحيت منه الظاهر اني كلش مصختها
.. ها لا عادي احجي براحتك

.. تعاي خلي اسولفلج على ديرتنا واهلنا
كعد يسولفلي عن حياته هناك وشلون هو واخوانه واولاد عمه
من جانوا صبيان شلون مغامراتهم
جان ساعة يفاجئني وساعة يضحكني بمواقفه

حيدر .. مرة من المرات واحنا بالبر
جان جدي الله يرحمه ياخذنا ويعلمنا شلون نستخدم السلاح ونرمي بي.
اتذكر انا اصغر واحد بين اخوتي وولد عمي
كلهم جانوا يعرفون ينشنون على الهدف الا اني
ولا مرة صبته

جنت كلما ارجع اخوتي يكولون لأمي اخونا ما فلح
ما يعرف يقنص
هي تبتسم وبوجهي وتكول
لاتضوج باجر تعرف تقنص
بعدك صغير من يقوى عودك راح. تكدر تلزم البندقية وتنيشن صح

جان جدي اليفشل بالقنص
يخليه يركض عالصيدة وين ما توكع يروح يجيبها ويجي
وهاي المهمة كلش تعيسة يعني اذا وكعت بوحل
اروح اجيبها بالماي بأي مكان اروح اجيبها غصبا عني وانا الممنون

ليش ما مرة من المرات وصلني الدور

حتى اقنص. رفعت البندقية وجانوا صافين بطالة وقواطي هنة الهدف

ليش ما حاولت واخذت وضع الاستعداد
وسويت كل الخطوات المطلوبة
وغمضت عين وبقيت اعاين بتك عين
من جانب الشايل بيها بندقية الصيد

بلعت ريكي ورميت.
وجان نسمع صوت حيوان كام يعوي
شمرت البندقية ورحنا انا واخوتي وولد عمي نركض بين الكصب
نريد نشوف شنو هذا الصوت

انا شغلت روحي خايف من رزالة جدي
لان ما دبرتها مثل كل مرة وما صبت الهدف.
بس شكلي من رميت صوبت حيوان

وجان هذا الحيوان ثعلب وصادف جان خامطله طيرة
من الي صدناهم

اجينا لجدي وبيدنا الثعلب الصوبته والطيرة الي لحكنا عليها زين ما اكلها

ابن عمي جان تقريباً بعمري. ودائما انا وياه على منافسة
كال لجدي .. جدي ترة حيدر ما نيشن على الهدف
ما دبرها

انا كمت عليه وبسرعة قبل لا يحجي جدي
كلتله.. انا اجيت انيشن بس من شفت الثعلب وشايل الطيرة بحكله
تركت الهدف ورميته

جدي باوع علية متعجب وكال
.. والله كفو يالذيب. طلعت مو هين ياحويدر
اثاريك سبع وانا ظلمتك يابعد جدك
التفت على اخوتي واولاد عمي وكال
حويدر احسن واحد بيكم بالقنص
ومن يومها جدي اعلن انا احسن واحد بيهم بالقنص

وطبعا كلهم اعترضوا شلون وليش حيدر احسنا
كللهم جدي

.. يابعد جدكم ترة اخوكم صوب الثعلب وهو يركض
وهاي وحدة من صفات الصياد الماهر
لان التصويب على الهدف المتحرك
يكون اصعب بهواي من التصويب على الهدف الثابت بالصيد

وبيومها من رجعت للبيت وامي سمعت بالخبر
خطية كامت تهلهل ووزعت خبز وخضرة
عالجوارين عبالك حررت فلسطين مو صدت ثعلب
همة ما يدرون انا والثعلب جنا خوان بالمكر
طبعي مثل طبعه. كدرت اقنعهم انطلت عليهم الحيلة

جان حيدر يسولف ويضحك واني اتخيل شكله وهو صبي
واضحك وياه
همست .. صدك حيال

حيدر همس يم اذني .. وعلى طاري الحيلة. دخيل ربج
شكد ترفة

عززة هاي شنو
انتبهت على روحي اني ملفوفة بين ذراعه ونايمة بحضنه

عزة هذا شوكت اقترب مني. وصرت بحضنه
اشو ما حسيت عليه

اتوترت وهمست بخوف .. ها حيدر وين الوعد
مو كلت اليوم اخليج براحتج

.. اهوووو انت شكد فقيرة دخيل الله وعلى نيتج
شكلج بعدج ما تعلمتي
ترة وداعتج حيدر الي صاد الثعلب وكدر يقنع جده
بالحيلة. هو نفسه حيدر النايم يمج وانتي بين ايديه

حجيت خايفة .. يعني شنو جنت تستدرجني وتضحك علية
.. ما عاش اليضحك عليج
بس جنت مسويلج كمين ردت اجيبج للدرب بالحيلة

.. حيدر صدك حيال ومالك امان والله زعلتني منك
.. عفو عليج كلشي ولا زعلج
تعالي اصالحج خليني احبنج.

حجاها بصوت هامس وختم كلامه على شفايفي
وبعدها صار الثعلب حيدر يطبق كل الحيل
علية وشوية. شوية لحد ما صادني وملكني.
ووشمني بحبه.
وصرت مرته قلباً وقالباً

هدى
مرت الايام وصارت امتحانات مريم
وهشام كل يوم يجيني جايب مرشحات المواد
ويكولي .. هذني المرشحات ٣٠بالمية راح يجيبون منها
بالامتحانات

خطية هشام جان شايل هم مريم
ومثل كل يوم اجاني هشام وكعد يكلي عالمرشحات حتى ارسلهم
لمريم. جنت اشتغل بالمطبخ وهو يفتر فوك راسي
وشايل اسو ويهز بيها

باوعت عليه واتذكرت سؤال مريم عنه وسالفة مروره على المدرسة
.. اكول استاذ هشام انت شعندك كل يوم غايح (رايح)
فايت من يم مدغسة مغيم (مدرسة مريم )

هشام ضحك وكال
.. عمي مو كلنا بطلنا توبة بعد ما نعيدها
من ذاك اليوم رسلتيلي رسالة عالواتساب شطولها
وشعرضها
وسألتيني بوكتها وجاوبتج كلتلج والله ما رايد. شي
ولا مفكر بشي غير بس اتطمن على مريتي
وخلاص وداعتج بعد ما رحت

ظليت مصفصفة هذا يحجي على شنو
جاوبته بدون ما افتهم شي
.. اي عفية عليك زين تسوي

هشام .. اي تعاي صدك. شنو حضرتج جنتي تستخفين دمج
شنو فلمج بيوم تدزيلي رسالة وتسألني
(منو قصدك. عن اي مرة دتحجي )

عقدت حواجبي مستغربة حثيته حتى يكمل كلامه
.. اي كمل
.. بعد شكمل متذكرين من جاوبتج مستغرب من سؤالج

وكلتلج هدى شنو السالفة اكو غيرها مريم اختج.

وانتي كمتي تسألني سؤال اغرب من الثاني
كتبتيلي شنو شفت بيها وليش تحبها وشمعنا هي بالذات

واني اكول هاي هدى شبيها سامعة شي
بس هم كلت حقج انتي اختها واكيد تريدين تطمنين عليها

المهم بطلت لخاطرج لان كلتيلي. مريم زعلانة
وتكول بعد لا يجي للمدرسة ويكعد يستعرض كدام البنات صديقاتها
ابو عيون زايغة
شكله متونس عليهن

هو يحجي واني اتذكرت مريم عزة بعينها
العوبة انا اعلمها

هشام .. عليج الله كلتيلها جوابي الي رسلته وحلفتج تكولي لها

بلعت ريكي واني كولشي ما مفتهمة بس متأكدة ورة هذا
الاشكال الي صار مريم اختي

جاوبته
.. بس ذكغني (ذكرني) انت شنو كتبتلي بوكتها لان وداعتك
اني ذاكغتي صايغة صفغ (ذاكرتي صايرة صفر)

.. كتبتلج

مو هشام اليلعب على بنات العالم وعيونه زايغة
خلي تحاسب على السانها
ها هسة اتذكرتي

.. ها اي اتذكغت (اتذكرت) هسه شلون ما اتذكغ ( ماااتذكر)
.. عليج الله وصلتيلها هذا الحجي

.. اي اكيد وصلتلها هذا الحجي
.. شنو كالت من سمعته

.. بعد شنو تكول بلعت السانها وسكتت

دخل قاسم للبيت وجان هسة جاي من الشغل
اسو بس شافته جانت بيد هشام

كبل برطمت شفايفها وكعدت تشتكي لابوها

قاسم اخذها من هشام وحضنها
.. ها ولك شمسوي لحبيبة ابوها
شكلك ما اتوب الا اسحلك كدامها

وكام قاسم يسوي نفسه يضرب بهشام
وهي تباوع عليه. يضرب تمثيل
وهي مصدكة السالفة. تمد ايدها تشارك ابوها .
وتضرب بأيدها الصغار على طهر هشام

هشام.. بسيطة وين ترحين مني انا الج
اذا ما اكلج راح ودخلوا هو وقاسم للهول
واني بقيت بالمطبخ اكمل شغلي

جنت اسوي كباب عروك
وداثرم بالمواد
تركت السكينة
و سحبت النقال ورحت دخلت عالواتساب

ودخلت على محادثتي وية هشام
وطبعا ما لكيت اي كلام من هذا الي كاله
لان اني مكاتبتله هذا الشي الي يكوله اكيد هاي مريم

وصارت كدامي صورتها من رحت ابات عندهم
نقالي جان عندها تكلب بي
ابتسمت واني اتذكر سؤالها واهتمامها
وتبين كدامنا هي ما مهتمة بنت اللذين.
يعني مريم واكعة بحب هشام. خطية وتغار عليه من

عيون البنات هههههه والله شلون داخلتله
ولو هي هسة اكيد ارتاح كلبها بعدما قرت رسائل هشام وعرفت بحبه

خلصت الكباب وعجنته وحطيته على صفحة وغسلت ايدي.
مر من يمي هشام وطلع وقبل لا يطلع كال
مو تنسين ترسلين المرشحات لمريم

.. اي ان شاء الله مشكور ما تقصر
ابتسم وكال .. هذا واجبي
طلع وسد الباب وراه

رحت دخلت للهول لكيت هالة وخالة وقاسم وهديل
كاعدين
قاسم جان يحجي وية خالة

رحت كعدت يم هالة اسو جانت تزحف بالكاع بس شافتني
اجتي تزحف بسرعة علية عبالك عندها لعبة ممصدكة تزحف

هالة سألتني على مريم شلونها بالامتحانات واني
كلتلها مريومة سباعية وتكول ان شاء الله مجاوبة
بين ما جنا دنحجي
لفت انتباهنا كلام. قاسم وية خالة

قاسم .. حجية اليوم بالشغل اجة علية ولد هو وابوه طلبو ايد هالة
ام قاسم .. منو هذا الولد نعرفه لو لا
قاسم التفت على هالة وكال .. يكول جنت طالب وية هالة بنفس الكلية

ام قاسم.. ان شاء الله بيها الخير
وانت شنو رأيك بالولد

باوعت لهالة وجهة كام ينطي الوان
صارت العيون كلها عليها
خطية هي ارتبكت وانخبصت وكامت من مكانها وراحت

واني كمت رحت وراها
متفاجئة من هذا الكلام

لكيتها. بالحديقة وكاعدة بالمرجوحة

رحت كعدت يمها وبحضني اسو
.. هالة عن اي ولد قاسم ديقصد
هالة بصوت ناصي .. تتذكرين الولد الي وياج بالقسم
بيوم اجة وحجة وياي وطلب ايدي

.. اي اعغفه (اعرفه) بس انتي بوكتها مو نهيتي الموضوع

.. اي بس رجع مرة ثانية وحجة وياي بالموضوع
من رحت استلم النتائج مالتج
فكرت بالموضوع وشفت ما عندي سبب يخليني ارفضه

لذلك جاوبته وكلتله اني عني امري بيد اهلي
وبيومها طلب مني عنوان بيتنا وعنوان شغل اخوي قاسم
واني انطيته وعفته ورحت

جانت تحجي بدون روح باهتة
سألتها .. زين وحبج لعزام. واصغاغج (اصرارج) عليه

.. هدى خلينا صريحين انا وانتي نعرف كلش زين
عزام انتهى امره
خصوصاً. بعدما سمع كلامي وعرف مشاعري اتجاهه
صار كلشي واضح جان رده الابتعاد والتغليس

عرفت بوكتها اني مالي فرصة اكون
زوجته حتى ان جان هو حلم حياتي
بس مو معناها هو لازم
يبادلني المشاعر واكون حبيبته
خلاص اني استسلمت ورضيت بالامر الواقع
وهذا الولد خوش ولد ما ينرفض

اباوع عليها دموعها كامت ترقرق بعيونها
انقهرت عليها رفعت غطت وجهها بكفوف ايديها
وشهكت وكامت تبجي من كل كلبها

وهمست من بين دموعها
.. لج هدى احبه والله مو بيدي اموت عليه
هسة لو الواحد يملك السلطة على مشاعره ويتحكم بيها
جان هسه اني اسعد بنية ولا هذا القهر والذل

لزمت ايديها ونزلتها. وباوعت خدودها مليانة دموع

.. كافي هالة لتبجين الخيغ في ما اختاغه الله (الخير في ما اختارها الله )

انتبهت لأسو بنتي برطمت شفايفها
وتباوع لهالة شلون تبجي وهي كامت تبجي
.. لج هالة اسو كامت تبجي عليج شلون يا الله
جنت بوحدة صغت (صرت) بثنين هسة اسكت منو بيكم

هالة تبتسم من بين دموعها اخذتها من عندي
.. لج فديت حبيبة عمتها حنينة جانت تحجي من بين دموعها

كمت من المرجوحة
.. دكومي لا يجي قاسم ويشوفج دتبجين ويكعد يحقق
اني غايحة ( رايحة ) اسوي العشا

دخلت جوة وسويت العشا وقاسم واكف فوك راسي
كل شوية ماخذله كبابة يكلي تصبيرة
خلصت العشا
وكلتله
.. اتصل على هشام خلي يجي يتعشا
طلع النقال واتصل عليه وكله انا جاي وصلت يم بالبيت
جنت يم عزام

سد النقال وباوع علية وكال
.. اكول هدى كلتي لاخواتج احنا راح نخطب مريم اول متخلص امتحاناتها

.. اي كلتلهم بس مغوة (مروة) وشيماء كالوا
احنا منحجي وياها اي شي تخلص امتحانات يالله نفاتحها بالموضوع
بس قاسم خلي شغلة ببالك تغة الغأي (ترة الرأي) الاول والاخيغ (والاخير)
بيد صاحبة الشأن يعني. ما بيها زعل من هسه اكولك
اذا هي غفضت (رفضت) وكالت اغيد ( اريد ) اكمل
احنابالنسبة النا اخواتها وياها ومنجبغها ( ومنجبرها ) على شي

.. اي طبعاً شي اكيد هو كلشي قسمة ونصيب واخوي
ما ناقصه شي الف من تتمناه.
اذا هي مو من قسمته ربي يعوضه بأحسن منها

باوعت عليه ولميت حلكي واني اصب العشا عالميز
.. على كيفك عيني اكلتني بكشوغي (بكشوري)

سحب الكرسي وصاح بصوت عالي
.. عشاااااااااا
اجتي خالة وهديل
وهالة دخلت من الحديقة وبيدها اسو

هديل من يوم الصار وياها بسالفة ايمن
وانسحب النقال منها وخالتي زعلت عليها
كامت متراوي وجهة لقاسم الا بعد ما مرت فترة طويلة.
كامت تنزل وتكعد يمهم وانتبهت لقاسم لحد اليوم
ابد ما يوجهلها كلام مباشر

كامت تغير من تصرفاتها
اني عني بالنسبة الي ما احتك بيها لان ما احزر موقفها
اتجاهي

ومن اجوي بيت عمهم محمد علمود يصلح الامور وطلب ايدها من قاسم لابنه ايمن

وقاسم وام قاسم رفضوا كالوا بعدها صغيرة ما نريد نزوجها.
يعني رفضوهم بس بأدب

دخل هشام
وكعد ياكل ويانا على العشا وكال
.. اكول قاسم يكولون المختار ابو رائد دينازع
وحالته كلش مو زينة على اي ساعة يموت

قاسم.. اي والله ادري لحد قبل شوية اتصلت على رائد
وسمعت الاخبار منه. خطية رائد
كولش انكسر ظهره. بأبوه. ماخلة دولة ما سفره لها
حتى يعالجه بس ماكو شكل المرض الخبيث انتشر بجسمه
وما منه جارة

قاسم .. يمة ما اوصيج اريدج تاخذين البنات وترحين لبيتهم
تواسون امه واخته. خطية حيل متأذين

ام قاسم.. يايمة من غير ما تكول
اني البارحة عندهم بس الصدك ما اخذت البنات وياية
اشوف بلكي هاليومين اروح واخذهم

شبع قاسم وكام واخذ اسو من هالة وطلع بيها بالباب
هاي صارت عنده واجب لان اسو والشارع اصدقاء
اي واحد تشوفه متهيأ للطلعة وشافته لابس هدوم طلعة
او بس تسمع واحد كال باي

اسو كبل من يمها تشمر روحها عليه
تريد ياخذها وياه
حتى خالة ام قاسم مرات بيها حيل وتاخذها وياها ومرات لا متكدر

بعد ساعة دخل قاسم محمل حلويات
وطلبات اني دزيتهم له برسالة
حفاظات وحليب وكم شغلة قائمة المرأءة العراقية

اخذتهم من عنده وكعد بالهول وية هشام
جانت هالة فوك هي وهديل

سمعت هشام يكله .. قاسم شنو صدك جايين خطابة
على هالة
جاوبه قاسم .. اي صدك
هشام مستغرب.. زين وعزام. شنو نسيته

قاطع عليهم الكلام صوت
نقال قاسم. طلع النقال وباوع عالمتصل وكام من يمنا
وطلع برة يحجي بالنقال هاي دائماً متعودين لان هوسة
اسو واصواتنا لذلك يطلع برة حتى ياخذ راحته بالحجي
باوعت لهشام كاعد يباوع بتلفونه

واني كلبي ظل يحوم من الفضول خرب هسة غير يكمل
كلامه ونفتهم شنو شبي عزام
وشدخله بموضوع خطوبة هالة
شلون ياربي الفضول يقرة عندي الف

مالي غير درب الهداوي
حتى نسحب الكلام من قاسموف
كملت ترتيب المشتريات
وصعدت فوك اني واسو

جهزتها للنوم واخذتها هي والعابها وحليبها ومميتها
لخالتها هالة

دخلت للغرفة لكيت هالة عابسة الوجه
وتسمع اغاني حب حزينة. مال واحد
مضروب بوري على راسه وماكل تبن من ورة الحب

ابتسمت وكلتلها
.. لج هالة والله ما يلوكلج تزعلين
صدكيني صايغة (صايرة) تخوفين
والله جنج غجال (رجال ) شايب كاعد يسمع اغاني
تجيب الهم

هالة.. هدى عفية رحمة على والديج عوفيني بحالي
هسة اني اخر همي شكلي.

.. بالحقيقة اني مو علمودج اكلج عدلي خلفتج
بس خطية علمود اسو بنتي لا تختغع (تخترع) منج

انتي وهذا شكلج
عايزج بس تدخنين جكارة وتوكفين بغاس الفغع (براس الفرع )
تطكيها صفنات
وتكتبين على الحايط . حبيبي عزام ذكغى انهياغ (ذكرى انهيار)
جبل حبنا الغيغ (الغير) معلن

هالة كامت تنافخ بضجر
.. اهووو هدى كولي من الاخير المن جايتني انتي و بنتج
كاعدين تغوغون براسي مثل الذبانات

رمشت بعيوني وكلتلها بكل لطافة
كلمات جملية مطعمة باللواكة

.. حبيبتي هيلانة. خلي اسو اليوم تبات عندج.
حتى تونسج وتغيغ عليج الجو وتبعد عنج الوحشة

هالة مدت ايدها وهي تگلب بعيونها
.. جيبي امري لله. بس كافي لا تحجين بافضال بنتج
علينا
لا نوب تسويها براسي ام بيت وتصرف علينا
وكلنا عايشين بجاها

جانت اسو تضحك لهالة وهي تحجي عليها
طلعت واني
مبيتة النية خلي اروح الحك اجهز نفسي
دخلت للغرفة وبديت
احضر نفسي. واجواء وحركات وكذا

وطلعت من الثلاجة ماعون فواكه

دخل قاسم للغرفة ورفع حاجبه
وهو يباوع منا ومنا يدور على شي

رحت اقتربت عليه وكلت
.. ها حبيبي. مو على بعضك احسك
الي دتدوغ (دتدور) عليها. يم هالة
اليوم ماكو بس امها
قاسم. باوع علية ابتسم وغمزلي

وهو يمسح بثنين ايديه مثل الي عنده وليمة
.. ما دام بتني اتسفرت من غرفتنا معناها
اليوم يوم التحرير
يحيا العدل ونعم للحرية

سد الباب
فات للغرفة وبدة يبدل
ملابسه اباوع لظهره ووشم الصقر يتحداني

رحت احضر صينية السهرة
من عصير وكرزات وفواكه لزوم جلسة التحقيق

لكيته كاعد عالسرير وساند ظهره على تاج السرير
رحت اخذت الصينية

وغمزتله واني شايلة الصينية. اتمايل بمشيتي
كدام عيونه وهو يباوع ويمسح على لحيته الخفيفة

حطيت الصينية عالسرير
واتربعت. واتعمدت اضهر السيقان
جان يكلب بالنقال عين عالنقال وعين علية

لزمت السكينة وبديت اكشر بالتفاحة
وقطعتها قطع صغيرة وبديت اتلحلح

اقتربت عليه واستندت على كتفه وحطيت
قطعة التفاحة. بحلكه. جان يراسل بالواتساب

.. اكووووول قساااااااااام حبيبي
.. هممم كولي
.. قبل شوية من جنت تحجي وية هشام عن خطوبة
هالة سمعته كلك وعزام شنو نسيته

جاوبني وهو عينه بالنقال
.. اي مو استاذ عزام. قبل فترة طويلة
جانت هالة بمرحلة اخيرة

طلب ايدها مني وكلي طالب القرب منك بأختك هالة
وهو على حظه الفكر. اجاني بفترة

جنت متخبل من سالفة هديل وموقف ايمن . ابن عمي
بحيث من فتح وياي الموضوع

كبل كلتله ما عندي اخت للزواج منا
لحد ما تتخرج هالة يالله تعال كلي على خطوبة

عزام كلي هسة يعني افتهم منك انتظر اختك تتخرج
يالله اجيب اهلي اخطب
جاوبته وكلتله اي انتظرها

والاخ ظل ينتظر وهالة اتخرجت وانا انشغلت
بشغلي وسالفة عمامي ومنتضر الناقص

وانا همين شفته بعد ما فتح وياي الموضوع
وانا جنت منتظره يتلحلح ويحجي وياي مرة الثانية عن الخطوبة
بس هو مطفي حاطه على الصامت

قاسم يحجي واني الطم على خدودي واكول
امدا حظج يا هالة

سألته.. يعني قاسم تغيد (تريد) الصدك وحق الله لازم تكول لعزام
لان هو فاتحك واجاك قبل الولد
ميصيغ (ميصير) زحمة الاصول تكول هيج تسوي

قاسم ضحك وكلي .. ما يحتاج اكله. الاخ بس سمع
بالسالفة. كبل اجاني ولكيته زارع روحه
كدام باب بيتنا بكل صلافة يكلي

.. قاسم. خير اكو شي سالمين سمعت جايين خطابة على مرتي

يتبع

احبكم كومة احبكم هواااي
اختكم نهى الحسون