أساور الفضة الفصل السادس وستون 66 - بقلم نهى

مساءالانوار عليكم احبتي
اشكر صبركم وسعة صدوركم يا قرائي الاعزاء

طلب. والتماس دعاء من احد. متابعاتي نزلته بصورة

#اساور_الفضة_ج٢
#نهى_الحسون

هدى

كعدت من النوم لكيت قاسم رايح مموجود.
بس مثل المعتاد حاط بنته على السرير بيننا
ولا يبطل من هاي الحالة.
كم مرة انبه عليه واكوله ميصير تعلم البنية تنام يمنا على السرير
يكلي اي ميخالف بس بعدين الكاه بالليل
يكوم يتسحب مثل الحرامي ويروح يم بنته يجيبها
يسولف وياها يعني حتى لو البنية نايمة الله هاديها
هو يكعدها والله طلع عينها

لحد ما صارت تكره سريرها. ولا بكل صلافة
منومها بوسط السرير

بسيطة انا له. بس خلي يصبرلي
باوعت عليها. ابتسمتلي وعيونها ورموشها
تخلي الحجر غصب عنه يلين كدام ابتسامتها

نزلت من فوك اني وبنتي
واتعودت كلما ننزل الصبح نسمع اصوات ترحيب الجماهير العاشقة. للست اسو

وفعلا اول مدخلت للمطبخ هي بس شافتهم ملتمين ديتريكون.
كامت تصيح بصوت عالي. وعلنت عن وجودها
وكعدت توزع ابتسامات.
مكشرة عن
اثنين اسنان بالمقدمة مفتخرة بيهم. وعيونها تلمع بوكاحة

وبدة الاستقبال من اول المعجبين
بيبيتها ام قاسم
خالتي لوحدها قصة
بس تنزل اسو اسمع خالتي تنشد
قصايد تغنيها. لأسو
وهي تصفك واسو تكمز بحضني فرحانة
(يمة اسو من حلاها .. كصايبها وراها
اجة الخاطب يخطبها .. وابوها ما نطاها .. وقسام ما نطاها)

يمة البنات عشرة واكول گليلااات
يمة البنات صاغهن الصايغ ومات )

هي خالة تهوسلها واسو. تحرك بأيديها وتضحك
لبيبتها بلهفة عبالك دتركصلها
وتميل جسمها كدام تريد بيبتها تاخذها مني

هالة.. يمة خفي علينا شوية انتي وحفيدتج
والله الي يسمعج يكول صدك عندها كصايب
وهنة شعرايتين واكفات مثل النخلة
جنها تويتي

ام قاسم.. موتي من الغيرة. لج هالة انطيج عيوني تشوفيها بيهن.
تشوفيها شلون حلوة وماكو احد. بحلاتها

هالة .. والله انا من يوم كلتي على قسسام محد بجماله
اني عرفت نظرج انضرب فايروس
وصار عندج التباس

ام قاسم .. ولي هالة. المايلوح العنب يكول عليه حامض
شفايتلج لو واحد مثل قاسم يباوع عليج ويتزوجج

مدت ايديها ثنينهم حتى تاخذها مني
.. تعالي حبيبة گلبي اشتاقيتلج

.. هاج خالة اخذيها وفكيني منها الباغحة ( البارحة )
مخلت ابوها ينام بس تبجي

.. يا خطية اشوفه اليوم نزل وعيونه حمر
وطلع بدون ريوك اثاري خطية منايم
كلتله انتظرني اسويلك ريوك كلي
لا انا طالع اتأخرت عالشغل
اتعودت عليج تكعدين وية رجلج وتريكيه
.. والله خالة كعدت وياه بس هو كلي غجعي (رجعي ) نامي.

هالة.. شبيها الست اساور مسهرة ابوها
.. علمود اسنانها تلج الباغحة (البارحة) كله
وقاسم انكلب كاظم الساهر علمود بنته
حاطها بحظنه ويكللها بابا وين اخذج وين انهزم بيج
بعيوني لو بغوحي (بروحي) اخليج

هالة.. انا كم مرة كايلتلج اذا اسو معاجبها تنام شمروها
علية العب عليها

.. لا حبيبي مشكوغين (مشكورين)
مامستعدين قاسم ينجلط من وقت وهو شاب من سوالفكم
هو لحد اليوم بعده ما ناسي الهبطة و سوايتج انتي وهشام بأسو

هالة عضتلي شفة وباوعت لامها حتى اسكت

ام قاسم.. شنو على ياهبطة. دتحجين
هالة .. هههههه والله عليج سوالف ياهدى
هو اني وين شايفة اساوروف حتى اسويلها شي

ام قاسم خزرتها .. هدى احجي شمسوين
باوعت لهالة الي عضتلي شفة
وسكتت محجيت شي

بس هديل حجت من يمها
.. ماما هدى دتقصد على موقف قاسم
بيوم شاف صورة بنته منشورة بالفيس على صفحة
هشام جانوا ماخذيلها صورة بالنقال لاسو
هم لاعبين بيها لعب مصخمين خدودها بصخام اسود.
وعيونها مدمعة دتبجي والخدود سمان ومبرطمة شفايفها

وكاتبين جوة المنشور
تم العثور على طفلة ضائعة قرب باب الجامع
على من يعرف ذويها
الاتصال بنا فله الاجر والثواب

بيومها قاسم لعب طوبة بهشام وهالة
خلاهم واحد . يدعم بالثاني
حتى زعل عليهم. يكللهم شلون تسوون بحبيبة ابوها هشكل وهاضمينها.
والله بعد تحلمون اخليكم تقربون عليها

ام قاسم متفاجئة. .. الله يطيح حظكم على هاي السواية
لج هالة الثولة اكيد هاي سوالفج

هالة.. اني مو لوحدي. حتى ابنج هشام. عود ما اوصيج
هم من يرجع اخذي بالاحضان وانا بنت البطة السودة
اكل الرزايل لوحدي

ام قاسم.. هسة هي لو تسكت فوك سوايتها
فوكاها لها عين تحجي

اباوع لهالة اضحك عليها
.. احسن تستاهلين
حتى تبطلين تسوين بأسو.شغلاتج مال المخابيل
يا اختي على الاقل حاولي تمهدين الطغيق (الطريق) لأطفالج. المستقبليين
ليش خطية قبل ليجون للدنيا دمهم مهدوغ (مهدور)
وكلها متحلفة بجهالج من وغاج (وراج)

هالة .. عمي همة خلي يجون بالاول وبيكم خير وتدللوا
عضوا وسحلوا براحتكم.
بس غير بالاول ابوهم يشرف ويشد الهمة
جانت تحجي بصوت ناصي تخاف لا خالة تسمعها وتطيح حظها

قاطعنا صوت خالة
.. اكول هدى. اليوم بيش الساعة ترحين لبيت اختج
.. والله ما اعغف (مااعرف) قاسم كال من اغجع (ارجع) من الشغل اوديكم
هالة.حجت من يمها وعيونها على اسو
.. شنو تباتين عندهم

.. والله اتمنى. ابات يمهم خطية شيماء اكيد تحتاجنا
لان مبقى شي على عغسها (عرسها)
بس تعاي شيقنع اخوج ويخليني ابات ببيت اختي

ام قاسم.. والله شومة تستاهل كل الخير
صبرت وعانت واتحملت. هواي علمودكم
اذا تردين احجيلج وية قاسم حتى يبقيج
يم خواتج

.. والله ياريت خالة تقنعينه
لان شيماء صحيح هي اكبغنا بالعمغ (اكبرنا بالعمر)
بس احنا متزوجات قبلها وعدنا خبغة اكثغ (خبرة اكثر ) منها

ولحد هسة ممكملة جهازها
وكاضيتها كله بالشغل وية مغوة. (مروة)
يعني اتخيلي بعد يومين عغسها (عرسها). هي اليوم مداومة
ودتشتغل عادي وتساعد مغوة (مروة)

.. الله كريم خلي يرجع قاسم من الشغل وانا احجي وياه
ابتسمت من كل كلبي وكلتلها
.. تسلمين خالة الله يحفظلج اسو وابوها

كمت من مكاني بعدما سلمت اساور لخالة واتريكت
وخالة ريكت اسو سيرلاك

بلشت بشغلي حتى اكمله واغسل ملابس قاسم واكويهم
اريد ما يبقى عندي شي من اروح لبيت مروة

جبت النقال وحطيت السماعات واتصلت على ضحى
ردت علية
.. هلو ضحاوي شلونج حبيبتي
ضحى.. هلا هدوش والله بنت حلال جنت اريد اتصل عليج.
.. كولي شنو تغدين (تردين)

.. كلت اتصل عليج حتى اذا تكدرين تفرغين نفسج
وترحين لبيت مروة وترتبين جنط جهاز شيماء
حتى تكون جاهزة من تطلع بيوم عرسها

لان اني ما اكدر اروح وخطية شومة لوحدها
ومروة ما فارغة ومريم امتحانات سادس ودراسة ومتلحك

.. اي اني اغوح (اروح ) اليوم قاسم كلي اوديج
بس احتمال ما اكدغ (مااكدر) ابات. لان ميقبل تعغفين (تعرفين ) قاسم
هسة كلفت الواسطات ونشوف الله كغيم (كريم)
بلكي الله يوافق

.. ياريت يوافق لان اني اهل ضافر مسوين علية دوريات
واخواته عاقجات الوجه علية

.. ياااا شبيهن اخواته ليش شكو

.. هنة من العرس كالبات الوجه علية
والله شلون ضافر يسوي عرس وجدهم بعده ما دارت سنة على وفاته.

.. اي بس انتوا اجلتوا العغس (العرس )
اتزوجتوا بعد ٨ اشهر بعد شكو. شبيهم زعلانين

..لا زعلانات يكولون ميصير يسوي عرس
كان لازم ينتظر بعد الى ان تدور السنة
يكولون هيج عيب من الناس

.. زين انتي شنو بيدج على شنو كالبات الوجه عليج
هو الصوج منج لو من اخوهم
.. يكولن كله منج خليتي اخونا يستعجل بالعرس
كلتلهم اني مالي دخل طلبت من اخوكم يأجل العرس و
وهو تخبل كلي لاتكوليلي على تأجيل
اني وصلت حدي وطكت روحي
هو اني جنت بالكوة انتظرتج على اعصابي تخلصين امتحانات السادس.
وراها طلعتلي سالفة وفاة جدي صفح
مو زين من عندي صبرت ٨ اشهر خلي يحمدون ربهم ويشكروا
ما تزوجت بعد ما طلعت الاربعين

.. هسة هو العغس (العرس) وين وانتوا وين هذولة شنو من كل عقلهم يحجون
صاغلكم شهغين (صارلكم شهرين) من اتزوجتوا
يعني مالها داعي يكلبون وجههم ويعتبون عليج

جنت احجي وية ضحى بالنقال وانظف

.. زين عمتج وعمج شنو موقفهم من الموضوع
.. عمتي وعمي. كلش حبابين علواه عليهم
بس حماتي الجبيرة والوسطانية هنة الي كالبات
الدنيا.

.. زين. وظافغ (ظافر) من يشوفهم يحجون وياج هيج ميكول شي

.. هنة نذلات عبالج يحجون كدامه يخافون منه
بس من يشوفوني لوحدي ينزلون بكلامهم الطيب
لج هدى من دخلوا لبيتي وشافوا الاثاث
هاي سماح اجتي تنجلط.

.. عمة حتى اقغي (اقري) المعوذات من تجي لبيتج
.. لج اني تعرفين شنو الي قاهرني
هسة لو فقيرة وماعندها جان. كلت معذورة
بس هي مهندسة. ورئيسة قسم
ولوتشوفين بيتها يجنن. عبالك تحفة
بس ليش هاي الانانية الي عندها ما اعرف

.. ناس عندهم مغض (مرض) اسمه الحسد والحقد
هسة عوفج من حمواتج
سولفيلي انتي شلونج وية ظافر (ظافر) واولاده شلونهم وياج

تغة (ترة) اني عايفتج هاي صاغ شهغين بغاحتج (صار شهرين براحتج )
اتصل بيج على كد السلام حتى تاخذين غاحتج (راحتج)
وية ضفوري اكول بعدكم عغسان (عرسان)

ضحى ضحكت وكالت.
. لج سكتي لتذكريني
خبلني ضافر وطلع عيني. بأول اسبوع
اريد اخلص روحي ما اكدر. عبالك عنده مسابقة
ابن الاوادم

بس ورة الاسبوع من اجوي الاطفال جود وياسر
اختج ضحاوي كدرت اصقله وخفف من وكاحته
صرت انطيه محاظرات على التصرفات اللائقة
امام الاطفال

.. هههههههه خغب (خرب) يومج ضحى
شنو صغتي (صرتي )معلمة بغاسه (براسه.)
خطية عوفي بغاحته (براحته ) ليش تكسغين (تكسرين) بمواهبه الفنية

.. لج لا هدى هو مرات ينسى نفسه. ويفاجئني بالمطبخ
بحركاته الوكحة. وينسى وجود
اطفاله. هههههههه
لج مرة من المرات
كلتله هسة اني اكعد اعلم واربي الاطفال لو ابوهم
الوكح.

هو ما يضيع فرصة يكلي
.. عادي تعاي علميني. بس مو هنا بالغرفة لان انا طالب وكيح.

.. ههههههههههههههه خغب (خرب) والله ضحكت
لج هذا ظافغ (ظافر) طلع داهية.

.. اني عاذرته. لان حسب كلامه اغلب حياته خلصها
بالخارج بمجتمع غربي. عندهم حرية التصرف وعدم التقييد شي عادي

وهو اعتمد على امه وابوه بتربية اطفاله
لذلك ما عنده. انضباط
بس ها لتنسين اني اختج ضحاوي الجديدة
وداعتج بهاي الشهرين. سويته ابو بيت عراقي معدل

ماكو شي خارج عن المألوف محطيتله حد مصرف وتبذير وحلل.
و الاطفال سحبت منهم الاجهزة الالكترونية

واشتريتلهم العاب ميكانو. على لعابات باربي وبيوت لعاب
وسيارات وموقف سيارات لياسر

بالنسبة لبنته جود. صارت مثل ضلي وين اروح وراي
اصلا اتولعت بية.
بالحقيقة هي هم طفلة صغيرة وحلوة
اني تلقائياً لكيت روحي متعلقة بيها

صرت كل يوم اسوي شعرها فيكة وحركات قبل لا تروح للمدرسة
ومرات العب وياها ببيت اللعاب يعني كدرت اكسبها

بس شوية ياسر نحس وصعب يمكن لان ولد

.. يالله هو بمغوغ (بمرور) الايام يبدي يتقبلج .. ان شاءالله
.. اي هو هم هيج وراه وراه شعندي غيرهم

.. هسة شنو حمواتج ناويات يطولون يمكم
.. المشكلة استحي اسألهم زحمة
بعد بقت اني وحظي

نهيت الاتصال من ضحى ولكيت هديل
ماخذة اسو من خالة وصاعدة بيها فوك

صعدت وبديت احضر نفسي اني اسو
اتصل علية قاسم وكال انا جاي بالطريق حضري نفسج حتى اخذج لبيت اختج
جنت اتحرك على راحتي بالغرفة بس بعد الاتصال
صرت اهرول بسرعة لان قاسم

اذا كال اجيت وما لكاني جاهزة. يطنكر بي طبع
ما عنده صبر او خلك ينتظر ويكره سالفة الجرجرة
مرة صارت وياي. واتأخرت عليه لان
اسو قبل لا نطلع بشوية. طلعت بطولاتها كلها
سوت كل فعالياتها بهذا الوقت أتقيأت. وتلفت نفسها. وطلعت بطنها
واكيد صار لازملها تبديل كامل. واستاذ قاسم منتظرني بالسيارة

واني التهيت بالشحرورة بنته
اشو هذا طفى السيارة ونزل منها وكال ماكو روحة
لبيت اختج خلاص هاي هي

يابة يمعود ابو الغيرة. بنتك اخرتني اني مالي دخل
ماكو قاسم ركب راسه. ورفض ياخذني وبيومها خالتي
حجت وياه رادت تقنعه لان صدك انقهرت من
طلعته وياي. شدعوة شصار هيج ماعنده صبر وياية

ولو هو مو بس وياية حتى وية امه وخواته هيج طبعه
وهمة ماخذين حذرهم منه.
بس الحقيقة هو لازم يغير من نفسه لان هو صار اب
ولازم يتأقلم وية هذا الوضع
لان الطفل ميعرف قواعد ومزاج

انتبهت لروحي الهث انفاسي سريعة من الركض
حطيت اسو بالكاع وبيدها لعبة
وبديت ابدل. وانتبهت للقميص
صاير ضيق من يم صدري
معقولة اني سمنانة. لو هاي لان ارضع
هيج صار وياي

اوووف
دخل قاسم للغرفة وهو ضايج
واسو شافته راحت تزحف لابوها هو دنك وشالها وهي
هدتله احلى ابتسامة
وكعدت تصيح وتحجي وياه
هو عيونه علية سألني

.. خلصتي لو بعدج
جاوبته بعجل.. اي هياتني خلصت ماعندي بس البس شالي
.. اكول انتي دازة امي علمود تتوسطلج يمي حتى تباتين ببيت اختج مروة

اتوقفت عن الحركة وكلتله
.. اي. كلتلها تقنعك لان انت متقبل ابات

اباوع عليه الغضب احتل كل معاني وجهه وكال
.. خلاص ما دام انتي هيج كاتلة روحج تباتين يم اخواتج
عادي روحي الله وياج
باتي عند بيت اختج شكد متردين
عسى متبقين شهر حرام اذا اسأل عليج
انا اهم شي عندي اسو تبات بحضني

هو يحجي واني واكفة مصدومة. بكلامه هذا صدك يحجي
معقولة لهاي الدرجة اني مو مهمة عنده

رفعت. راسي وباوعت بعيونه كان بيها نظرة
نصر وتحدي
همست بغيض.. خلاص هاي هي اني ابات ببيت
اختي وانت تعال اخذ بنتك نومها بحضنك
الحمدلله اسو هي بدت. تعتمد عالممية وان شاء الله
متحتاجًون. للخدامة هدى

شيماء

ما بقى شي على دخولي لحياتي الجديدة
بس والله شايلة هم وخايفة اعوف اخواتي وراية
وبنفس الوقت متلهفة لحياتي وية حيدر

لهذا سويت جرد شامل وكملت هواية شغلات
اوبعض الامور الي كانت متعلقة بالمركز
لان مبقى شي على زواجي

وعلى طاري زواجي وزوجي
بعد الخطوبة بديت اتعرف على شخصية حيدر اكثر
و هنا توضحتلي هواية امور جنت غافلة عنها

وبمساعدة حيدر وتصرفاته كدرت افتهمه
واتعلم عليه
اكتشفت بي ان هو جداً حريص علية
اتذكر اول ايام من خطوبتنا اجة
للمركز وطلب مني اجهز نفسي
لان عازمني على غدا

جنت متلهفة . ومتفائلة

وصل حيدر وشافني واكفة منتظرته
كصني بنظراته من فوك ليجوة

جنت لابسة بنطلون قماش و قميص مقلم ابيض واسود حصر وقصير
لابسة عليه سترةً. طويلة تغطي الورك
جانت ملابسي رسمية. مناسبة للمركز

وجان شعري يوصل لاكتافي جنت
مسوية شعري صبغ موديل اومبري
وهذا الشي ضاف جمالية وجان اقتراح هدى
من جنا بالصالون بيوم المهر

جلى صوته وكال
.. ها جاهزة نروح
ابتسمت له .. اي جاهزة ماعندي شي

اخذني لسيارته وصعدت وياه وكلبي
صار يعزف لحن الترقب
كل شوية يلتفت يباوع علية

واني اصلا نظراتي ثابتة عليه
ردت افتح وياه موضوع حتى نسولف ممتعودة
اسكت اشو بالنقال نحجي اكثر هسة ليش اثنينا ساكتين

.. شنو وين راح نتغدة
جاوبني وكال
.. جبت اكل سفري لان اريد نتغدة ببيتي
ان شاءالله ما يزعجج هذا. الترتيب

.. لا عادي بالعكس هاي فرصة الي
حتى اشوف سرى والاولاد واتعرف عليهم اكثر وهمة
ببيتهم ويتصرفون براحتهم

باوع علية وابتسم
وصلنا للبيت كانت هاي اول مرة اشوف بيته
بيت حلو ومرتب
بمنطقة حلوة

نزل من السيارة ونزل علاليك الاكل
انطاني كم علاكة وبدة يفتح باب البيت بالسويج مالت السيارة

وبعدها فتح الباب الموصل لداخل البيت
عقدت حواجبي وسألته
واني اباوع منا ومنا

.. هاي شنو محد بالبيت ؟؟
.. اي محد بالبيت الاولاد وسرى وعمتهم معزومين عند بيت اخوية.
هنا قريب على بيتي. وانا استغليت الفرصة حتى اجيبج لهنا

واراويج بيتج ونسولف بالاشياء الي تحتاجيها للبيت
اريد ناخذ راحتنا بالكلام
بالحقيقة انتبهت اني وانتي. ابد مكاعدين
لوحدنا كل مرة نكون وية. اشخاص
ولا مرة تقابلنا منفردين

نهض كلبي بنبضاته وارتبكت اول مرة
اكون وية رجال ببيت لوحدنا حتى وية ليث
ما بقيت وياه بمكان لوحدنا شكد حاول اروح وياه للشقة
بس جنت دائماً ارفض
لكن شمعنا يم حيدر الساني انربط ما اعرف ليش

اباوع عليه مشى كدامي وكال
.. تعاي فوتي خلي اراويج المطبخ

دخل للمطبخ واني رحت وراه وشايلة بيدي العلاليك

وهو نفس الشي كان محمل بالعلاليك
حطهم على ميز طعام صغير حجم ست اشخاص
يتوسط المطبخ وجان المطبخ بسيط ومرتب بس خالي
من اللمسات او الالفة

وكأنما مطبخ شركة. حتى البيت كان بنقصه هواي لمسات.
حيدر شخص عملي. موفر فقط الاشياء الضرورية للاستخدام

نزع سترته وعلكها على ظهر الكرسي
باوع علية وكال

.. اخذي راحتج ونزعي سترتج ترة البيت بيتج
وانا رجلج مو غريب لا تتقيدين

هو يحجي واني كلبي يرجف ووجهي صار. نار
نزعت سترتي وعلكتها مثله على ظهر الكرسي

وبديت افتح العلاليك واطلع الغراض

انتبهت لنظرات حيدر وعيونه
الي بدت ترسم تقاسيم جسمي

انخبصت من نظراته وباوعت لملابسي جان القميص
ضيق وقصير وملفت للانتباه
ما اهتميت لقصره لان جنت لابسة سترة طويلة عليه
وادري بروحي ما راح انزع السترة لذلك مشلت هم احد يشوفه علية
مجنت مسوية حساب نظرات حيدر

طلع الصحون والنايلون السفري
وبدينا نصب الاكل
وكعدنا عالميز ناكل
شوية بديت استرخي لان حيدر بدة يسولف بأمور
عائلته وشغله جان يحاول يخليني استرخي
واتنازل عن الحذر.

وفعلا بديت اخذ راحتي وياه
حيدر .. شيماء. اريد اسألج سؤال باقي يحوم بكلبي
اريدج تجاوبيني وبصراحة

.. اتفضل اسمعك. انت علمتني عالصراحة وياك فأسال
.. حبيت اعرف اثار خطوبة ليث. بعدها بكلبج. لو كدر الزمن يمحيها

.. باوعت عليه وابتسمت
.. حيدر اني من حجيت وياك عن موضوع ليث
جنت اقصد كل كلمة كلتها عنه

ما انكر في فترة كان بالنسبة الي حلم عمري مثل اي بنية من تنخطب
وتبني امالها. على رجل
بس صدكني بعدما ظهرت حقيقته وشفت الوجه الثاني لليث
خلاني اعيد حساباتي. بهذا الشخص
مجرد معرفتي ان هو اب وزوج
وكدر بكل برود. گلب يتحاوزهم ويتركهم وراه في سبيل يرضي نفسه.

سقط من نظري. وفقد احترامه.
وهو بتصرفاته هاي ساعدني اطلع حبه من كلبي وانتزعه. بالقوة
بدون ما يرفلي جفن لان الي ما له اول ما له تالي

فلا تشغل نفسك بموضوع خطوبتي من ليث
لان فعلا كان ماضي وراح. خلاص

جنت احجي وهو يباوع علية ويدرس وجهي
صرت اعرف حيدر اكثر من نفسي
شكلة ما اكتفى بكلامي عن الموضوع بالنقال
حب يتأكد مني بصوت وصورة حتى يرتاح كلبه

ابتسم وكام من مكانه وكال
.. اهوووو شوف شلون نسيتيني بالسوالف
عندي هدية الج جنت ضامها من زمان وحالف
من تصيرين حلالي اهديها الج

انتبهت عليه راح يغسل ايديه
كمت من مكاني وبديت الملم الاكل

اقترب مني وكال تركي كلشي من ايدج.
اليوم انتي خطار عندي.
غسلي وتعاي وراي

باوعت عليه طلع من المطبخ
واني رحت غسلت
وطلعت من المطبخ ادور عليه

لكيته كاعد بالهول
بس شافني كام من مكانه واجة اقترب علية
وشبك اصابع ايديه بأصابع ايدية

ومشى ومشيت وراها وايدنا بأيدين بعضنا
سحبني وراها وفتح باب غرفة
ودخلني بيها جنت مترددة ادخل لان
جانت غرفة نوم.

جان يحثني عالمشي
اتوقف كدام. مرايا طويلة دارني عليها
وصرت اباوع لروحي وهو واكف وراي

كلي ابقي واكفة بمكانج لا تتحركين
ابتسمت من طلبه.
وبقيت واكفة انتظره شنو يريد

لحظات وجان اشوف شال طويل
حطه على راسي بوضع مثل اكليل العروس

جان واكف وراي اقترب علية وحط ايديه على اكتافي
واحنا نتبادل النظرات واحد يباوع عالثاني بالمرايا

وهمس
.. شيماء
بما ان انتي حلالي فانا احب احافظ على حلالي
من عيون الناس

جنت كلما اشوف شعرج كلبي يحترك وينكوي بنارين
نار لهفتي له ونار. غيري يباوع عليه

فأخذت عهد على نفسي اذا الله كتبلي وصرتي
من نصيبي.
كون البسج بيدي. الحجاب

باوعت عليه ولفيت الحجاب.
كانت حركتي كفيلة برد الجواب والقبول بطلبه

ابتسم بفخر ودارني عليه
وعيونه تلمع
وهمس .. جنت متوقع راح تعارضين.
.. بالحقيقة حرصك علية وحمايتك
كانوا كفيلين بأقناعي

اليحب يسوي كل شي لارضاء محبوبه
دنك راسه وباسني من كصتي
.. كل يوم يزيد حبج بكلبي ويتوغل بثناياه

لمني لحضنه وجانت هاي اول مرة استريح على صدر
رجال واحس بالامان

وبيومها حيدر راواني البيت. وغرفتي وكلي
اخذج بعد كم يوم حتى نختار الغرفة على ذوقج

وبعدها صار كلام حيدر اكثر خصوصية
وميانة. احس انلغت الحدود وصرنا شخص واحد
لدرجة كل شوية اشهك من يحجي كلمة
جريئة تخص حياتنا الزوجية.

همست خجلانة .. حيدر كافي عيب هذا الكلام
كوم رجعني للبيت الظاهر نسيت نفسك وكلش اخذت راحتك

اباوع عليه ضحك على شكلي المتعجب وكال
.. يابة بعدنا ما حجينا اي شي وانتي خلصتيها علية
فاتحة عيونج على وسعهن متعجبة
حسستيني عبالك دنست برائتج بكلامي

انخبصت وكمت من مكاني وهو كام وراي

.. يالله حيدر رجعني للبيت
ابتسم وكال
.. صار ارجعج للبيت بس بالاول اريد اختم هذني
...
دنك راسه. وغلف. شفايفي
وسحب مني انفاسي. واستغل صدمتي

حسيت بضعف وحيرة بعدها
صارت استجابة وحياء

جنت صافنة ورايحة بغير وادي وية افكاري

قاطعني صوت مروة
.. شيماء يالله شو عوفي كل شي. من ايدج
باوعت عليها لكيتها شايلة جنطتها ومستعدة
تريد تطلع
.. شنو وين طالعة

.. اريد اخذ اختي واطلع بيها للبيت
لان الظاهر نست نفسها بعد يومين راح تتزوج

كومتني من الكرسي وحضنت ذراعي وانطتني جنطتي
من عالمكتب واخذتني متوجهة على باب المركز

ابتسمت .. بربج هو اني اكدر انسى حبيب الروح

.. زين ما دام هيج تتذكرين لعد امشي خلي نلحك
سألتها واني اصعد بسيارتها
.. على شنو نلحك
شغلت السيارة وكالت.. نوصل للبيت وانتي تعرفين

وصلنا للبيت ومشمش فتحت الباب قبل لا ندك الجرس وكالت

.. خالتوا. جابوا بدلة العغس البيضة
اي خطية حيدر كال راح اجيبها
بالحقيقة اني فضلت ااجر فستان العرس

لان كان كلش مكلف وما حبيت ابذر الفلوس علمود بدلة
راح البسها مجرد ساعات وما راح البسها مرت ثانية

بالرغم اني متأكدة ان حيدر ميكول شي اذا اريد اشتريها
بس مو بيدي ابو طبع ما يغير طبعه

دخلت للبيت
وجان اشوف احلى مفاجئة. واكفة. كدامي
صديقتي ورفيقة دربي. بالحلوة والمرة. رباب

جانت واكفة وشايلة بيدها ابنها انطته لضحى
واجتي علية
اخذتها لحضني وصرت ابجي وما اعرف ليش ابجي

صارلي كومة مشايفتها صحيح احنا نتواصل
بالتلفون بس الزمن ومشاغل الحياة شغلتنا عن بعضنا
هي انشغلت بدوامها بالمستشفى وعائلتها

واني انقلت وانشغلت بحياتي وية اخواتي
.. جنت خايفة متكدرين تجين
رباب.. لج شلون ما اجي واني ناذرة
اسويلج شيرة عرسج بيدية

ضحكت واني امسح دموعي
.. اهووووو خرب يومج رباب بعدج تتذكرين
.. ليش هو اني شوكت نسيت

لكزتني وغمزتلي بعينها وكالت
.. تتذكرين ايام التخطيط والتنقيب عن الاستاذ حيدر
.. جانت احلى ايام والله

دخلنا جوة وصرت اتبادل الاخبار وية رباب عن احوال الممرضات صديقاتنا
وهي كعدت تسولفلي عليهن وحدة وحدة

باوعت لخواتي جانوا كلهم موجودات يفترون حولي
هاي تحضر بجنط الجهاز مالتي وهاي الي دتكوي
بيهم
هدى وضحى ومريم

.. ها ضحاوي اشو اجيتي وحمواتج منو بقى يمهم
ضحى.. سكتي الحمدلله. ضافر اجة وكلي كدامهم
جهزي نفسج حتى اخذج لبيت اختج مروة اتصلت عليه
وكالت محتاجين ضحاوي بالبيت

واني سألته مستحية من خواته لان كاعدات وسمعوا كلامه
كلتله. عيب شلون اعوف خواتك لوحدهم بالبيت
زحمة
كلي اي وشنو يعني قابل همة خطار هو البيت بيتهم
وانتي عندج واجب

همة بس سمعوا ظافر كال هيج
كبل من يمهم كالوا اصلا احنا طالعات

هدى.. زين يسوي بيهم
اباوع لمشمش مندمجة وية جود بنت ظافر

هسة ما كلتي تباتين اليوم لو لا

ضحى.. والله ما اعرف لان الاخ كل شوية يتصل
علية يكلي عبالك مضيع شي

هدى .. الحمدلله انا ابونا وافق ابات وكال
باتي شكد ما تردين ببيت اختج
انا اهم شي عندي اسو اجي اخذها تنام بحضني

جانت هدى تحجيها بغيض عرفت اختي مشتغلة اطباكاتها على قاسم.

صحت هي وينها اسو
هدى.. عند مغيم (مريم) بالغرفة.

هدى
بعدها اجة علينا حيدر واخذنا اني وضحى
كملنا ترتيب جهاز شومة
بكنتورها. وشومة ومروة بقوا بالبيت يم رباب تسويلها تنظيف للجسم

ورة ساعتين رجعنا للبيت ولكينا رباب مخلصة شيماء
واستلمتنا وحدة ورة الثانية.
وبلشنا بالسوالف والضحك
وطلعنا مريم من الغرفة وكعدنا كلنا نحجي براس شيماء
عن ليلة العرس

وهي الوجه كام ينطي الوان
شيماء.. عزة بعينكم وانا اكول عن نفسي كل شي افتهم
وما احتاج وحدة تعلمني
اثاري طلعت يمكم كلشي ماكو

باوعت وهي تضحك متعجبة
.. لج عوبة هديوة والله طالعة عينج وصايرة وكحة
واني اشوفج بعيني بريئة والله طلعت ماكو وحدة بريئة بيكم
بس اني

.. والله قاسم طلع عيني. اني عني جنت فقيرة وحبابة

وعلى طاري قاسم
دك نقالي باوعت للساعة جانت بالسبعة
بدلت صوتي رديت عليه بثگل
.. الو
.. هدى يالله جهزوا روحكم اني قريب عليكم

ابتسمت شوف شلون لوتي غير كلامه.
جاوبته
.. قصدك احضغلك.(احضرلك) بنتك حتى تاخذها وياك
لان اني ابات ببيت اختي

انتبهت عليه سكت وبعدها جاوبني بنترة
.. براحتج. هاي بقت يمج تردين تبقين عند اختج تردين ترجعين
اني ما يهمني اهم شي عندي
بنتي يالله جهزيها انا وصلت بالباب

جان يحجي وياي من ورة خشمه
خلاص هاي هي بات المحبس
شلون واحد عباله راح انسى كلامه اليوم وياية

دك نقالي قاسم معناها وصل بالباب
انطيت اسو لمروة
.. حبيبتي مغوة (مروة) انطي اسوا وجنطتها لقاسم
ما اكدغ (مااكدر) اطلع لان معصب بس يشوفني يخمطني والله

مروة .. ديالله جيبها خلي اوديها لابوها
والله خابصنا بيها خبص عبالك بس هو عنده بنية

جانت تحجي وتبوس بخدود اسو
ونوب بنت مروة مشمش عاضتها من خدها وصاير احمر.
هسة استاذ قاسم بس يشوفها يحرك الدنيا على راسي

راحت مروة وودتها لقاسم
ورجعت
جنت واكفة اباوع من الكاميرات شلون اخذ بنته واغراضها
وراح هيج بكل سهولة
ما اعرف ليش انقهرت من تصرفه

دخلت مروة وسألتها.. ها شنو بشغي (بشري)
.. والله استاذ قاسم مدخن
هسة جان رجعتي وياه بلاها هاي المشاكل الي مالها داعي

.. والله هو لو طالب مني بأسلوب لطيف اغجع (ارجع ) وياه
عادي كان غجعت ( رجعت ) بس الاستاذ
يمكن السانه يصغ (يصير) بي شلل
اذا كال غجعي ( رجعي ) وياية اضوج من انتي ماكو وتبقين بعيد عني

مروة.. كل شخص وعنده طريقته بردة فعله
لتضوجين يلة
دخلنا للهول يم البنات ولكينا رباب مستعدة تريد تطلع
مروة .. ها وين بعد وكت ابقي اتعشي وطلعي

رباب شالت ابنها وكالت .. لا بنات هواي اتأخرت وهو هاليوم قبل اجي.
خليني اصير حبابة حتى يوافق
يجيبني بيوم العرس اشوف شومة وهي بالبدلة البيضة

مروة.. ان شاء الله
راحت رباب بعدما اجة عليها زوجها
كاعدة اسولف وية شيماء وضحى ومروة
وانتبهت لمريم كاعدة تكلب بنقالي

ما اهتميت
سألت شيماء
.. هسة اتفقتوا على العغس غاح يصيغ ( العرس راح يصير) بس زفة
كبل للفندق

.. اي بس قبلها ناخذ صور بالاستديو
وبعدين نروح للفندق

.. الله يسهل عليكم

صارت الساعة ب١١ وخواتي كل وحدة بدت تدخل لغرفتها
وبقينا اني وضحى ومريم
فرشنا بالهول وكعدنا نسولف

مريم .. اكول هدى تدرين هاي الايام دا اشوف
حماج هشام يمر بسيارته من يم مدرستنا

حجيت .. خاف بالصدفة. لان مغات (مرات)قاسم يدزه على. شغلات
قريب من مكان مدغستكم (مدرستكم)

.. ما اعرف. بس جان يباوع عالبنات
ومرات يباوع علية

حتى البنات انتبهوا كالوا هذا شنو تعرفيه
اشو كل يوم يمر يباوع عليج ويروح

مريم جانت تحجي بحيرة ومترددة
واني اضحك على سوالف هشام وخبالاته
والله هو قبل اسبوع بالصدفة سألني عن مكان مدرسة
مريم واني جوابته وكلتله ليش تسأل هو بوكتها كال
اريد اطمن على حلالي

وخالة بيومها رزلته وكالتله عيب شنو هذا الحجي
بس هو هشام ما يهمتم الي بكلبه على السانه
ميخاف ولا يتردد

كل شوية اباوع للساعة بدة كلبي يحوم على اسو
ووجهي صار فاهي

قبل شوية حجيت وية هالة وسألتها بالواتس اب عن اسو
وكالت هسه قبل شوية نامت
و اخذتلها صورة وهي نايمة ورايحة بسابع نومة
ورة ساعة
واني متمددة بفراشي وكاعدة اتكلب مثل السمجة
ممتعودة ابات بعيد عن بيتي وغرفتي وزوجي وبنتي
والله احس بالوحشة شعور صعب
دك نقالي وكمزت من مكاني باوعت عالمتصل جان قاسم كلبي وكع بالكاع
يمة بس لا اسو بيها شي
جاوبت بخوف
.. الو ها قاسم شنو

قاسم .. انا واكف بالباب طلعيلي
نزلت النقال اباوع عليه ورجعت سألته
.. شكو صايغ (صاير) شي

حجة بغيض .. بنتج مريضة ومصخنة
حرارتها صايرة نار. وانتي حضرتج كاضيتها دياحة
وسوالف ملتهية بروحج وناسيتنا

هو يحجي واني طفرت من فراشي
مثل المخبلة
ولبست شالي ولميت غراضي وكعدت ضحى حتى تكوم تسد وراي الباب

جنت اتحرك اجمع بملابسي وغراضي
وارجف من الخوف على بنتي
سد النقال

رحت طلعت وضحى سدت الباب وراي وتكول
.. مو تنسين تطمينينا على اسو
.. ان شاء الله

لكيته منتظر بالسيارة لابس اتراك وشعره مهوس
صعدت بالسيارة وسلمت
رد السلام وسألته
.. شنو شبيها اسو
اليوم اخذتها مني كولشي ما بيها
.. ليش هيج تهمج اسو جايتني هسه ملهوفة تسألين عليها

.. شلون ما تهمني غيغ (غير) بنتي واخاف عليها
وصلنا للبيت
وجانوا الكل نايمين
تركته. وصعدت فوك للغرفة ادور على بنتي

دخلت رحت كبل على سريرها ما لكيتها
سمعت صوت. الباب
درت شفت قاسم دخل للغرفة وسد الباب وراه
عيونه تلمع بوكاحة وغيض
.. شنو وين اسو
اقترب من عندي وكال. اسو نايمة يم هالة كولشي ما بيها
هسة عوفج من اسو وتعاي. لحكي على ابو اسو
حيل تعبان وحرارته. مرتفعة

اتسعت عيوني. وبقيت واكفة بمكاني متفاجئة. بكلامه
ونظراته للحظة شفت ذاك قاسم المشاغب

.. والله انت مو طبيعي
اقترب مني وسحب شالي من على شعري ودنك راسه
وكال
.. والله متحلف بيج الليلة كون اخلي
بيج اثر حتى تتذكريني كلما تشوفيه
وتبطلين. تعانديني
الف مرة كلتلج. مكانج هنا

اشر على صدره
ما تغمضلي عين وانتي بعيدة. عني
لميت حلكي وحجيت بدلع
.. لعد ليش تحغك (تحرك) بكلبي وتكولي. اهم شي عندك اسو
تنام بحضنك

.. والله وداعتج معزت اساور من معزتج بكلبي
المفروض لازم تفرحين. من احجي هيج
ضربته على صدره وهو يلمني بثنين ايديه
.. حتى لو
اني ابقى بنتك الاولى واغاغ (اغار) وداعتك اغاغ عليك
حتى من.بنتك ومن حضن امك

.. حنى على حالي ترة كلبي ما يتحمل دلعج يجنية
تعاي نوميني والله ميت نعاس

.. اوكف لحظة انتظغ (انتظر) خلي اجيب اسو من يم هالة
.. اي دتعاي مو حركتي عشيرة ابو اسو
سحبني عليه.

وهمس وهو يقرب راسه على ركبتي
.. عوفيها نايمة يم هالة اليوم
خليج يم ابو اسو وشوفي شبيها حرارته
ابتسمت وعيوني لمعت بمعرفة.
وصارت لمساته تحاكي غضبه. وتثبت
وجودي بين ايديه
وبليلتها نمت للصبح على ذراعه

شيماء

كاعدة امسد على فستاني الابيض.
بدوا المعازيم بالوفود على بيت مروة
عيال هدى وحمواتها وضحى وعيالها
وخالة ام فرزدق اجتي ووياها ام صهيب
ورباب وصديقاتي
مروة قررت تسويلي حفلة بسيطة قبل لا تجي الزفة

باوعت لخواتي مروة سندي. هدى روحي وضحى امي ومريم بنتي
لكل وحدة الهة بكلبي معزة خاصة
اباوع لمريم كاعدة على صفحة ودموعها معلكة بعيونها. تحاول تداري بيها حتى ما اشوفها وانقهر
متدري اني احس بكل وحدة بيهم من تكون حزينة
بدون ما اشوفهم

دنكت راسي وباوعت لسوار امي جنت لابسته بيدي اجتمعت الدموع وصرت اناشد سوار امي واحاكيه

يا سواري. كن معي في لحظة وصالي مع الحبيب
فأمي امنتني. لديك. فكن رحيماً. ومواسيا وعطوفاً. بي
فاليوم انا بأمس الحاجة. لوجود امي معي
انا بحاجة سماع همسات دعوات امي لي

انتبهت لخالة ام فرزدق اقتربت مني وحطت
كتاب قران بين ايدية وصارت تبارك وتهلي
وتدعيلي وزادت دموعي

مروة دخلت للاستقبال وكالت
.. بنات جهزوا شيماء وصلوا
كامت رباب وضحى يساعدوني البس
البرنص.
سمعت اصوات الهورنات السيارت والرجال وهوساتهم
يم باب بيت مروة

كلبي انتفض وصار يرعد من مكانه

دخل حيدر بكل هيبة ووقار جان لابس قاط اسود
ودخلت وياه . كم وحدة من قرايبهم
وسرى وزوجة اخوه واخته. بدوا يهلهلون
وكعدوا يهوسون لحيدر فرحانات

كعد يمي وقرب راسه يم اذني وحجة بصوت ناصي
حيدر.. مبروك يا نبعة ريحان مزروعة بكلب حيدر
همست بخجل .. الله يبارك بيك
ياحيدرة گلب شيماء
ابتسم
لزم كف ايدي وشبك اصابع ايديه بين اصابع ايدية

ابتسمت مرتبكة ورفعت راسي ادور بعيوني على خواتي
مثل الضايعة واريدهم يمي قريبات علية
بهاي اللحظات

باوعت لمريم الي جانت قبل شوية تداري بدموعها
جانت تبجي منهارة مثل الطفلة الي راح ياخذون امها منها. جانت هدى حاضنتها وتواسي بيها وهم تبجي مثلها مريم وضحى. لازمتها من كتفها وتبجي

ااتمنيت اكوم واروح عليهن امسح دموعهن ما يهلي اشوف يبجن

عيوني بقت تحوم وتدور بين الوجوه
و هنااااك وجان اشوف سر قوتي بالحياة
اختي مروة جانت واكفة. على صفحة رافعة راسها تباوع علية. والعيون جامدة الوحيدة من خواتي. جانت
محافظة على تماسكها

جانت لازمة بيدها مشمش اجتي عيونها بعيوني
نظراتها . بيهم رسالة غريبة يمكن لو اكول
كانت كفيلة بتفتيت كلبي. لقطع صغيرة
خلتني اندل مكان كلبي.

من السهل ان تبكي وتعبر عن مشاعرك
لكن كم هو صعب ان تحاول التصنع بالقوة. والتماسك
امام. من تحبهم

يتبع

احبكم كومة احبكم هواي
اختكم نهى الحسون