أساور الفضة الفصل السبعون 70 - بقلم نهى

مساء الخير عليكم احبتي
🌹🌹🌹

#اساور_الفضة_ج٢
#نهى_الحسون

هدى
بعد وفاة المختار ابو رائد قاسم وهشام وخالة
طلعوا الساعة بال٣ بالليل.

وما رجعوا الا على وجه الفجر دخل قاسم عيونه
حمر وذبلانه. جنت نايمة بفراشي بس انتظره
جنت اغمض عين وافتح عين

واول ما دخل عرفت بقاسم اتذكر وفاة ابوه من شاف حزن رائد
دخل للحمام سبح وبعدهاطلع اتمدد على السرير وانطاني ظهره

جان لابس بس بجامة التراك. اباوع لظهره منحني
ووشم الصقر عبالك مكسور الجناح هي صدفة
لو الي وشم هذا الصقر فنان حقيقي
بحيث رسم الصقر بهذا الشكل المميز
واختار مكانه بحيث كل انفعال وكل حركة بعضلات كتفه وظهره
تنعكس على حركة جناح الصقر الموشوم وكأنه يحرك جناحه

ااباوع على لصقر هسة بأنحناء ظهر صاحبه
صار شكل جناحه مكسور

اقتربت عليه وليمته لحضني حسيت عليه اتشنج
تحت لمست ايدي

كانت حركته تدل على الرفض
يرفض اتقرب عليه
بس هو مو بكفيه اتعلمت اتقاسم وياه الحزن
حتى لو ما يرضى

طبعت شفايفي على الصقر
وصرت اواسيه واناشده

ها ياصكري مكسور الجنح اليوم اثاريك
ارجوك لاتعاند وخلني ياحبيبي اواسيك
اضمد جراح قهر كلبك الطيب وانسيك
لاتكابر وتزيد الالم
وتعض اصابيعك ندم
خليني كربك تراني منك وبيك
اوكع كبلك بس تعثر انتة
وجرحك كبل لاتجر حسرتة
ينزف بگلبي سكتة

بدة يسترخي تحت لمساتي صرت ادلكه من اكتافه
كان ضوة الغرفة خفيف

دار علية وصار وجهه مقابيل وجهي. وجر حسرة
عرفته مخزون يريد يحجي

حطيت كف ايدي على خده وهمست بصوت حنين
اشجعه حتى يحجي
.. كول اسمعك

.. اليوم منظر رائد كسر كلبي وذكرني بروحي
جان رائد يبجي ويكلي قاسم انا جنت مسافر بدوامي
وكالوا ابوك يريد يشوفك

كلتلهم جاي ما اتأخر
بس مع الاسف الموت ما ينتظر احد
كلمن ويومه وساعته
جان يحجي ويبجي ويكول مالحك يشوفني

انفاس قاسم صارت حارة. جان يحجي مقهور
على صاحبه وبنفس الوقت جان يشوف نفسه
بحزن صديقه
لان هو كان بموت ابوه بنفس الموقف

سحب نفس عميق
.. تدرين شنو اتمنيت من شفت رائد ذبلان ويبجي منهار
اتمنيت اشيل عن حزنه ولو قليل جان يباوع عالناس والاقارب والعيون تايهة والله صعبة الواحد يحس روحه وحيد ويفقد سنده بلحظة بدون سابق انذار

همست .. هاي سنة الحياة كل واحد ويومه
قاسم اني حاسة بوجعك وادغي (ادري) بيك
من شفت حزن غائد (رائد )على ابوه اتذكغت (تذكرت) مصابك على والدك
الله يغحمه (يرحمه)
بس ثق بالله
لكل شي سبب والله جعل بوفاة ابوك وانت مجنت موجود
حكمة الك حتى يصلح حالك وتتغير اموغك (امورك)

لان لوما صايغ (صاير) بأبوك هيج
وانت حاس بالذنب جان ما اتغيغت (اتغيرت) حياتك
وجان بقيت نفس ما انت
تتهغب (تتهرب) من المسؤلية. كاضيها كله سفغ (سفر)
وبعيد عن اهلك
وناسي امك وخواتك الي كلبهم عليك

جنت احجي بصوت هامس وحاطة كصتي على كصت
قاسم اتشاركنا الانفاس
حسيت عليه بدة يسترخي وغمض عيونه الذبلانة
ونام بحضني واني نمت وبكلبي ادعيله ربي يبرد گلبه

يوم ثاني كعدت من النوم لكيت قاسم طالع
كمت من مكاني وبدلت لاسو ونزلت جوة

لكيت سرور وهالة وهديل كاعدات
بس خالة وفاطمة ماكو طالعات للفاتحة

سلمت عليهم وسرور مدت ايديها بترحيب
وكالت .. انطيني حبيبة عمتها خلي اتريك بيها

.. هاج اخذيها صايغة (صايرة) شكد وكحة وبس تزعبل
سرور .. اي ياعيني غير بنت ابوها. عليمن بعد تطلع
اشو الوالد تاريخه يشهدله

هالة.. اكول على طاري الوالد خفوا ايدكم
امي كالت قبل لا تروح. طبخوا الغدا من وكت

كالت حتى نرجع اني والولد للبيت نتغدة
لان قاسم وهشام ميحبون اكل الفواتح

سرور.. اهوو هاي شلون نسيت وكالت حضروا نفسكم
انتي وهدى ومنى حتى ترحون للفاتحة ورة الظهر

هدى .. هاي هي خلاص اني عني ماعندي شي
هسة اكوم عالغدة بس هاي الشحغوغة (الشحرورة) وين اخليها

سرور.. عندج هالة وهديل هنا ومحتارة ببنتج وين تخليها

هديل حجت من يمها وكالت
.. اني عندي دراسة. شنو نسيتي اني مأجلة مادتين
احياء وفيزيا
التفتنا اني وسرور وباوعنا على هالة
هالة .. ها خير اشو باوعتولي شكو. لايكون تفكرون
تخلون بنت. سنفورة وشرشبيل عندي

سرور.. لا احنا مدا ناخذ رأيج
احنا نأمر وانتي تنفذين هو انتي شفايتلج بنت قاسم
بحضنج هذا وسام شرف

هالة.. لا نشكرج سرور على كرمج
اني ما اريد وسام الشرف متنازلة عنه
حقج تحجين هشكل لان مو انتي الي راح تتورطين
بست اسو. من تسوي الثقيلة
وابدي اغير حفاظتها
ولو من توصخ ملابسها. وتعالي ياهالة بدلي
وسوي مميات

حجيت.. عمة حتى عمة. الله لا يحوجنا الج عوبة
صاغت (صارت) بتي بيها جغب (جرب). سودة علية يمة اسو
عمتج العوبة هالة محسوبة عليج عمة عالخالي بلاش

عالعموم لابد وان يحي اليوم وتحتاجين
خدماتي. لان حاجة المخنوك تغفس (ترفس)

هالة اتسعت عيونها و كامت على حيلها وكالت
.. يابعد عمري هدوشتي حبيبتي داتشاقة شبيج انتي متحملين شقى

قابل اني شعندي غيركم انتي واسو
انتوا الروح والرية.

ابتسمت على تحويل هالة بالكلام
.. اي صحيح صدكتج كلش مبين عليج تحبيها

هالة.. اي والله احبها وانتي ما محلفتني . احس بيها عبالك مثل بنت اخوي
هيج معزتها بگلبي

سرور.. لعد هسة هي شنو تعودلج
.. لا اذا ما اريدها. تكون بعيني بنت هديوة العوبة
واذا حابتها اشوفها بعيوني بنت اخوية حبيبي

بقت اسو عند هالة وجهال فاطمة حماتي حركوا البيت
امهم طالعة وية خالة

بلشنا بالشغل وسرور التزمت تطبخ الغدا
واني كملت البيت وصعدت فوك لغرفتي
والتهيت احضر ملابس قاسم القميص الاسود والبنطلون الاسود
لان اتصل علية وكلي جهزي ملابس الي لابسهم توسخوا

نظفت الغرفة وجان وقت الظهر
وصلوا قاسم وخالك وفاطمة وهشام
جانوا يسولفون عن الفاتحة وعلى ام رائد الي اتدهورت صحتها

صبينالهم الغدة واتغدوا.
وقاسم كال لخالة
.. يمة. ترة اجلت خطوبة هالة.
لان زحمة من صاحبي رائد.

ام قاسم.. زين تسوي يمة عزام ابننا
واهله مراح يكولون شي

خالة وقاسم يحجون
واباوع لهالة انخبصت وظلت تحوم تريد تبجي

ام قاسم .. خير يمة هالة شبيج كمتي تمشي وتدعمين
بالغراض

هالة .. لا هيج ما بية شي بس كلت اروح وياكم للفاتحة
اريد الطم على المختار يايمة
موته هيج احزاني يايمه
وكسر گلبي. وبهذل احوالي يايمة

جانت تحجي الكلمات مثل طريقة الگولات بالفاتحة

فاطمة.. لج عوبة كولي يا الله موزين تحجين هشكل
هو رجال جبير وراح لدار حقه.
ميجوز تسوين هشكل

هالة واكفة يمي وتحجي بصوت ناصي
.. هو اليدري يدري والمايدري يكول كضبة عدس

ام قاسم.. عوفيها هاي اكيد اتذكرت وفاة ابوها
متأثرة

قاسم.. يمة لا تاخذيها وياج خاف تتأذة
اخذي بس سرور وهدى ومنى وياج

جان يحجي بصوت تعبان ولحيته مضلمة وجهه
هو اتعود كل يوم يشذب لحيته ويحددها
بس اليوم هاملها والله ما يلوكله الحزن سودة علية

كام من الغدة وكال الحمدلله
راح غسل واتجه للدرج يريد يصعد فوك
واني رحت وراه
جنت امشي وراه دار علية وكال وين اسو
.. نايمة جوة بغرفة خالة

دخلنا للغرفة حتى اني هم اجهز روحي
دخل للحمام يريد يسبح واني لبست ملابس سود
ولبست شالي وحضرت جنطتي

طلع قاسم وانطيته ملابسه جان ساكت ميحجي اي شي
دك نقاله ورد عليه وهو يبدل
اسمعه يكول للطرف المقابل

.. شوف عدنان فوت بيها وعالزلم خليها كلتلك اني
ما اريدك ترحم احد
.. خلاص هاي هي اتوكل وهذا اني انطيتك موافقتي
اريد كون اسمع بيوتهم انهجمت على روسهم

صرت اعرف كل انفعالات قاسم
اكيد هذا الاتصال بخصوص بيت عمه
منير وابنه منتصر. جنت اسمع بس مقتطفات
من الموضوع.
وكل مرة اشوف وجه قاسم يغيم ويظل يرعد
من يحجي بطاريهم

اخاف اسأله ما اريد قاسم يورط نفسه بشي
علمود ينتقم منهم

رحنا للفاتحة جانوا ناصبين جادر للرياجيل
بالشارع والنسوان داخل البيت

دخلنا اني وخالتي والبنات
جان منظرهم يكسر الگلب ام رائد وليلى
كلش متأذيات على وفاة ابو بيتهم.

كان كل المعزيات كاعدات يواسون بيهم
اني اقتربت عليهم وسلمت ورة سرور
وام رائد سلمت بنظرات ضايعة
وليلى وكذلك

يا الله الموت والخزن يكسر غرور البني ادم
رحت كعدت على صفحة معزولة
وسرور وخالة بقوا يم ام رائد وليلى يواسوهم

جنت كاعدة وجان اشوف فاطمة صديقتي
اشرتلها وصحت عليها

شافتني وكامت من مكانها واجتني ولميتها لحضني دخيل الله
والله مشتاقتلها
فاطمة .. لج هدوشة حبيبتي وربي مشتاقتلج
.. والله مو بكدي
شنو شوكت اجيتي
.. لج اني من البارحة باقية هنا وية امي خطية بعد تعرفين امي صديقة خالة ام رائد
والبارحة اتخربطت صحتها كلش وماما كالت ما اكدر اعوفها لوحدها

.. اي خطية الله يرحمه ويصبرهم
.. انتي شلونج واسو ليش راسلتلي صورتها وهي نايمة
وتحركين بكلبي والله كلما اشوفها اظل اتحركص عليها

.. سكتي كلش متعبتني
جنا نسولف واجتي زوجة رائد وسلمت علية
وسألتها عن ابنها وكالت مصخن وملتهية بي

وراحت
وفاطمة باوعت عليها وكالت
.. خطية هاي البنية شكد تكسر خاطري
.. ليش شبيها
.. ام رائد وليلى ناشبين وياها
ومراويها نجوم الظهر

خطية رائد سافر اول ما رجع هو وابوه من الخارج
وشاف مرته مطرودة من البيت
كبل طلع من البيت وكللهم اني عايفلكم البيت وطالع
وانتي وبنتج ابتلي بأبوية
لان انتوا حتى اني ممسويلي حساب

ورايح ماخذ مرته ومسافر لشغله هناك
وامه تتصل عليه وتكله ابوك محتاجك
وهو عباله هاي حيلة من امه حتى ترجعه للبيت
بس خطية عمو اتنكست صحته واتوفى

بقينا اني وفاطمة نسولف
وكل شوية يجون مجموعة نسوان يعزون
وام رائد تستقبلهم بالبجي والنحيب

ورة ساعتين
دك نقالي وكان المتصل قاسم
كال .. يالله جهزوا روحكم حتى ترجعون انتي وسرور وية هشام
وامي تبقى اني ارجعها
يله انتي رجعي بنتج. دتبجي

.. يالله هسة جاية
التفتت على فاطمة وسلمت عليها وعلى امها ورحت صحت لسرور ومنى

وكلت لخالة احنا طالعين
لكينا هشام واكف منتظرنا بالباب
جان الجادر مليان رياجيل
ولمحت قاسم.
واكف يسلم
صعدت بالسيارة وبالي يمه

شيماء
مر يومين على خطوبة. مريم اختي
وبالشافعات يالله كدرت اسحب نفسي من بيت عيالي واحظر الخطوبة
اني وسرى وحيدر

كرار وحسام بقوا بالبيت
اول ما دخلت للبيت راجعة من حفلة مريم وعيد ميلاد اسو بنت هدى فتأخرنا.
لگينا الوجوه مگلبة

حيدر شاورني وكال كبل سلمي وصعدي لغرفتنا
واني سويت مثل ما طلب مني
سلمت ورحت اصعد الدرج ووقفتني اخته سلامة وكالت

.. صلوات على النبي عالخير مسوية اخوية مثل الخروف جوة ايدج
عايف ابوية الحجي واخوانه. وكاعد يفتر وراج.
التفتت اباوع وراية خاف حيدر يسمع كلامها
وتصير مشكلة

رجعت باوعت عليها وكلتلها
.. سلامة شنو مناسبة هذا الكلام. خطوبة اختي
وزوجي اخذني لها. وين المشكلة بالموضوع

.. كون انتي بنت اصول وتعرفين الواجب
ما تعوفين خطارج وضيوفج وتطلعين.
ولو شترجى من وحدة طالعة من زرف الحايط

.. اول شي انتوا كلتوها بنفسكم البيت بيتكم
ودائما تذكروني بهاي الكلمة ان احنا مو خطار وتكعدين تتفضلين علينا

وبما ان البيت بيتكم ومو خطار خلاص عاملتكم مثل اهل بيتي
اترخصت منكم وطلعت
ترة ما انگلبت الدنيا

.. والله اكص ايدي اذا ما طلعتي مكابلة السحورة وكاعدة

.. شنو هذا التخلف منين تجيبين هذا الحجي
تعرفين شنو
هو مو صوجج صوجي اني الي واكفة اخذ وانطي وياج بالكلام

اباوع عليها شهكت واتسعت عيونها تريد تطلع من مكانها

واني تركتها وصعدت فوك ما اريد اطول وياها بالكلام
وهو الوضوع بكبره ما يساعد

دخلت لغرفتي ونزعت الجبة الاسلامية
ونزعت شالي وفتحت قراصتي

رحت للكنتور اريد ابدل
وجان يندفر الباب مثل الاعصار
وتدخل علية سلامة
بس بالحقيقة جان وجهة مخالف لمعنى اسمها
هي سلامة ووجهه يعلن عن حواث قادمة

سلامة تتنفس بغضب وحجت
.. لج ام السحورة. البايرة انا تكليلي متخلفة

جنت لازمة الدشداشة بثنين ايدية ورجعت للخلف

عزة اشو هاي هدت علية تريد تضربني
لزمت ايدها وعطت بيها

.. ديري بالج تمدين ايدج علية
صدكيني تخسرين احترامج

جنت احجي بصوت عالي اتعمدت اريد احد يسمعنا
ويتدخل لان صدك الموقف محرج وما ينحسد عليه

.. ولج انتي بنعال ما نشتريج على شنو شايفة نفسج
دتعاي خليني اربيج واحطلج حد

خمطتني من خدي وصرخت بيها ودفعتها
وكلبي يرجف وجسمي صار كوله يرجف
اني اتخبل من المشاكل وما احب اتعارك

كامت من الكاع وركضت علية يمة اني شفتها
وكبل طلعت من الغرفك ونزلت اركض هاي همجية
اتوقع منها. اي شي
وصلت لنص الدرج وصحت حيدر بصوت حاد ومرتبكة
بقيت واكفة بمكاني لان ما اكدر انزل ببدلتي
سمعت اصوات اخوانه واولادهم وابوه يم الدرج

اشو هاي شافت ابوها واخوانها كامت تبجي وتعيط عبالك وحدة. مكتولة
سلامة.. ويبوووو لحكو علي مرت حيدر ضربتني وطردتني

اباوع عليها نزلت الدرج جنت واكفة بنص الدرج اشو هاي فاتت من يمي ودفعتني عن طريقها تريد تروح تكمل تمثيليتها وتشتكي

بس حصل ما لم يكن بالحسبان
جنت لابسة حذاء كعب فجاءة وية دفعتها
التوت رجلي وفقدت توازني وصرخت بصوت مفزوعة ما لحكت الزم المحجر
كبل وكعت وتدحرجت على الدرج
لحدما وصلت بنهاية الدرج
من كد الخوف والهلع ظلمت الدنيا بعيني
وانصمت اذاني سمعت بس صوت وشة
بعدها ما دريت بحالي شصار

ورة فترة لكيت نفسي بالمستشفى ومروة واكفة كدامي
ووجهة مبهوت جنت كوة افتح بعيوني

سمعت صوت حيدر يسألها بقلق
.. ها دكتورة بشريني شلون صارت
مروة باوعت عليه والشرر يتطاير من عينها تتمنى تتعارك وياه
بس متحمله علمود شيماء ساكته

.. احمد ربك السالفة اجتي على هيج شي
صدكني لو صاير بأختي شي. محد يخلصكم مني
وربك لو مو اختك
والله اخليهم يسحلونها للسجن وتخيس بي

حيدر بقهر.. ام شيماء ماله داعي هالحجي ولا وكته
هسة بس طمنيني عنها شلونها

.. بعد شلونها فقدت طفلها وسوينالها كورداش
تنظيف الرحم

جانت مروة تحجي وية حيدر واني كوة افتح بعيوني
لكن من سمعت كلمات مروة الاخيرة شهكت مصدومة
شنو شوكت اني حامل
شهكت بصوت خايفة
.. حيدرررر !!!!!
اجة ركض على صوتي.
حسيت على حرار دموعي تنزل على خدي

صار وجه حيدر قريب علية وبعيونه خوف يشبه نظرات خوفه على بنته سرى

.. يا روح حيدر طمنيني عنج
همست .. اني زينة بس مجنت اعرف بروحي حامل
حتى ما لحكت اتهنى بخبر حملي انسلب مني

حيدر باوعلي بألم .. وداعتج الا اخذ حقج
بس لتضوجين. فدوة الج الراح

قرب علية وباسني من راسي
همست بتعب وكلتله
.. حيدر اريدك ترجعني لبيتي. وما اريد اشوف اختك
سلامة كدامي اترجاك

همس يم اذني وكال.. يجرالج الي ترديه
بس خلي اتأكد من مروة واشوف شوكت تسمحلنا نطلع

مروة حطت كف ايدها. البارد على كصتي الحارة وكالت
.. بس اكمل التحاليل وانطيج الابرة وبعدها يكدر حيدر ياخذج

بس اني افضل ترجعين وياي للبيت ترتاحين كم يوم
عدنا واحنا نعتني بيج

حيدر .. لا مايحتاج شيماء بيتها ينتظرها وانا اولى من
يهتم بيها وبصحتها جان يحجي بتحدي

مروة.. وين جان اهتمامك وحرصك على اختي
من دفعتها اختك من الدرج.
هم لو جانت وحدة صغيرة متفتهم جان كلنا معذورة

بس مرة طول بعرض وعليها العتب
تدفع وحدة من الدرج تصرفاتها مال وحدة مجرمة

لزمت كف ايد مروة حتى تهدء
وهمست بتعب .. مروة حبيبتي كافي لتحركين دمج
صار الي صار بعد ما ينفع العتب والملامة
خسرت وصلة من روحي
مو ذنب حيدر عنده اخت. حاقدة

ورة ساعتين بعد ما بديت استرد توازني وحجيت لمروة عن كلشي
كتبتلي مروة على ورقة خروج من المستشفى
وحيدر اجة يساعدني حتى اكوم والممرضة.
اجتي حتى تشيل عن ايدي مصل المغذي

كان الوقت متأخر ومروة كالت
.. اروح وياكم اوصل اختي واتطمن عليها
لان بالحقيقة بعد الي عرفته والي سمعته من شيماء
يخليني اعيد حساباتي واتندمت لان التزمت بالسكوت
ومتصلت على الشرطة تتدخل

حيدر.. مروة اترجاج لتتدخلين احنا عائلة بيت
صحيح اختي غلطانة والف مرة كلتها ما راح اخلي الصار يتعدى
بسهولة وحق مرتي انا اعرف شلون اخذه

ميحتاج الجيء للشرطة واخلي عرضي بحلك الناس
ترة لتنسين هاي الي دتحجين عنها اختي وهاي مرتي
وانا اولى بأخذ الحق وتنفيذ القصاص

اعذر تصرفج وتهجمج علية لان اختج لكن ما ارضى تتجاوزين حدودج وياية

جان حيدر يحجي بغضب
حقه هو ما بيده شي ولو يعرف بنية اخته
هم جان ما خلاها تبقى ببيته لحظة وحدة

باوعت لمروة الي جانت مكورة ايدها بغيض
.. مروة حبيبتي لخاطري. رجعي لبيتج
الوقت كولش متأخر وكلنا تعبانين من اثر اليوم الطويل

اباوع للساعة جانت بال٢ بالليل
ومروة هي الي شرفت على عملية الكورداش وتنضيف الرحم

طلعت من الغرفة جنت كاعدة بالعربانة
وحيدر يدفعها حتى يوصلني للسيارة لان ما اكدر امشي

شفت فائزة واخوه منذر وابن اخوه حسين جانو موجودين واكفين منتظرين برة الغرفة بس شافوني اتحمدولي عالسلامة
وشكرتهم واني دموعي تلمع بعيوني

اباوع لأخوه منذر
ظل يلعن بأخته سلامة بس عرف بالصار وكان يتوعدلها

قبل لا ياخذني حيدر للسيارة
سلمت على مروة وكالت باجر امر عليج قبل لا اروح للدوام
باوعت لحيدر بخزرة وكالت
.. حيدر اختي امانة عندك هالله هالله. بيها
راحت وعافتنا

رجعنا للبيت وجان البيت هاديء اجتي سرى
وحضنتني. وهي تبجي

.. ماما الف الحمدلله على سلامتج
ربي ما يحرمني منج

حضنتها حتى اطمنها واني كوة واكفة على اعصابي
وكلتلها .. لتخافين حبيبتي ما بية شي

سرى.. خطية كرار جان يبجي خايف عليج
يكول ماما طلع منها دم عباله راح يصير بيج شي

رفعت نظري واني اتمشى لداخل البيت
.. حبيبي هسة هو وينه
.. خطية نام وهو يبجي

حيدر تركني وراح يجيب الغراض من السيارة
وسرى سندتني
جنت امشي على كيفي واتعثرت بمشيتي
فجاءة انمدت ايد ولزمتني باوعت لكيت حسام
واكف يمي ولازم ايدي

ابتسمت واني استند عليه
حسام ولد بعمر ال١٣ سنة
متحفظ بمشاعره

جلة صوته ووجهه احمر وكال .. الحمد لله على سلامتج
م .. خالة

كعدت عالقنفة
وبعدها حيدر فرغ غرفة حسام حتى انام بيها

سمعت اخوه منذر كله ابوية واخواني اليوم يباتون يمي
لزمتهم عندي

حيدر.. منذر كول لسلامة اذا اشوفها ما يصير طيب
منذر .. عوف سلامة علية. حسابها يمي

راح منذر وحسين وبقت فائزة بالبيت
اباوع
لحيدر ظل الليل كله يحوم
جنت متمددة على سرير حسام جان ابو نفر

همست .. حيدر روح نام لتخاف علية
حيدر.. وداعتج عيوني ما تاخذ نوم وانتي مو بحضني

ابتسمت وكلتله تعال ترة سرير حسام يكفي وزايد
اقترب علية وسألني بشك
.. يعني عادي ما ااثر عليج

..بالعكس اني بحاجة دفو حضنك
حتى تواسيني
باوع عالباب راح غلقه
اني سويت مجال له حتى ينام يمي
اقترب مني ونام بصفي ولمني لحضنه

وشم ركبتي وكال
.. جعل يومي قبل يومج
رفعت كف ايدي وقطعت كلامه وكلتله
.. اسم الله على اسمك لتكول هيج
اني كلتلك اريدك تنسيني خوفي وخسارتي لطفلي
تكوم تزيد من حزني ليش
باسني من شفتي وكال
.. ماعاش الي يحزن شومة بيتي

وبيومها حط ذارعه تحت راسي
ونمت بحضنه للصبح

ورة يومين سافروا عيالي وسلامة ابد ما راوت وجهها
لحيدر ولا سمعت عنها خبر

بس فائزة اجتني وكالت قبل لا تسافر
.. انتي تأثرين على حيدر عفية خليه
يقبل يحجي وية سلامة تريد توكع عليه وتستسمح منه
وهو رافض

غمضت عيوني وسكتت وجاوبتها
.. ان شاء الله احجي وية حيدر
لكن حيدر من رجع من بيت اخوه
كلتله عن طلب فائزة
وهو رفض وكال

.. شيماء اختي اعرفها ما راح تعقل انتي انتبهتي
حتى من تريد تصالحني وتوكع علية
ما معترفة بيج ولاجابت طاريج وكالت اعتذر منها
عالسوته وياج

وانا شرطت عليهم اذا تريدني اقبل اعتذراها تجي توكع على مرتي وتستمح منها

وسافروا اهله وابوه معصب عليه
بالحقيقة اني كلبي محمل عليهم لذلك ما حسيت بأي ذنب من راحوا وهمة زعلانين
لا ونوب همة اصحاب الزايد

يعني فوك سوايت بنتهم بية.
زعلانين حضرتهم

والبارحة خواتي اجوي كلهم يتحمدولي السلامة
وهدى اجتي شوية ورجعت لان عندهم خميسية
المختار ابو رائد

انتبهت على صوت نقالي
جان عالميز كان المتصل حيدر
.. الو شيماء حضريلي نفسج نتي وسرى انا جاي
عليكم اخذكم لمركز الشرطة

كلبي نهض من مكانه
.. حيدر شكو شصاير
.. ما صاير شي هيج اجراء روتيني
بخصوص سرقة البيت
.. اي بس انت كلت ما قدمت بلاغ من اتعرض بيتك
للسرقة

.. شيماء انا جاي وافهمج على كلشي
صحت لسرى وحجيتلها الموضوع
اباوع عليها انگلب وجهة
سرى بصوت خايف.. شنو ليش مركز الشرطة

.. حبيبتي لتخافين اجراء روتيني
مو اكثر يالله بسرعة ررحي بدلي
وجهزي نفسج اني راح ابدل

جهزنا نفسنا
ولبست شالي وحيدر وصل
دخل للبيت
ودخلنا للغرفة اني وسرى
وكال

.. اتصلوا علية المركز لازمين واحد من العصابة
واثنين ماتوا
وبأثناء التحقيق والتعذيب اعترف المتهم
ان تمت سرقة مجموعة بيوت ووحدة من البيوت
كان بيتي من خلال الوصف وماخذهم ومدليهم
على اماكن البيوت الي انسرق منها واماكن
الجرائم الي ارتكبوها

شوفي بابا سرى اريدج تسمعيني زين
انت عليج بس تتكلمين عن السرقة وما تجيبين اي سيرة بخصوص الصار بيج
فاهمة
هزت راسها بالموافقة

غمض عيونه وسحب نفس عميق
اعرف بحيدر ديعاني من صعوبة الموقف
بس غصب عنه لازم يواجه الحقيقة اليوم باجر لا بد وان يجي اليوم وتتزوج بنته ويحجي الحقيقة

لكن حيدر يفضل ما يحجي بالموضوع وكان دائما يغلقه
رحنا للمركز ووبدة الضابط ياخذ اقوال حيدر وبنته
وعن الممتلكات الي انسرقت

جانت سرى ترجف
الضابط .. عمو اريد تركزين زين
.. اذا دخلنا المتهمين تعرفينهم
سرى كالت .. جانوا ملثمين ما اكد اتعرف عليهم
بس واحد منهم كدرت اشوف شكله بالصدفة

جانت تحجي وترجف
عرفت بسرى جانت تقصد على الحيوان الي اغتصبها
من خلال كلامها وياي كالت
بيومها كدرت تسحب القناع الاسود من وجهه
وتشوف شكله

دخلوا المتهمين مصطفين
وهي باوعت عليهم واحد واحد وهي ترجف
التفتت على ابوها وكالت ما عرفت ولا واحد منهم

بعدها الضابط طلعهم
وكال زين ممكن تشوفين هاي الصور

انطى لحيدر مجموعة صور وهو حطهم كدامها وظل يكلب بيهم
وبأثناء تقليب الصور
سرى لزمت بثنين ايديها صورة
وحجت بصوت مفزوعة وكالت
.. بابا هذا.هو الحيوان

حيدر قاطعها
وسحب الصورة منها وباوع على الشكل وانطاها
للضابط
اني كومتها من مكانها وحضنتها
وصرت اهدء بيها ما اريدها تنهار وتحجي حيدر
مأكد عليها بس سرى من الخوف موبيدها

الضابط شاف الصورة وكال
.. للاسف صاحب الصورة مات مقتول قبل يومين
حسب اعتراف المتهم الي نفذوا عملية السرقة
همة ثلاث اشخاص

وبدة الضابط يسجل الممتلكات الي انسرقت
وكال بحيدر ان لكينا بحوزتهم هواي ذهب وفلوس
مسرقة من عدة بيوت

وبعدما كملوا اخذ الاجراءات

هدى
اليوم خميسية ابو رائد واني ما رحت بقيت بالبيت لان اسو مريضة وقاسم كال متروحين ابقي بالبيت
هالة جانت طالعة وية كوثر وام عزام
وعزام حتى يشترون الحلقات
لان حددوا موعد الخطوبة

وخالة ببيت المختار
وبس اني بالبيت
بس هديل جوة كلتلها خلي يمج اسو
واني صاعدة فوك

قاسم كلي اكويلي الدشداشة السودة
وعندي هواي احتياجات ونواقص بالغرفة
رحت اعدل بيها وطلعت الملابس مال قاسم
وبديت ارتب الكنتور
جنت اشتغل

دك نقالي
وكان المتصل فطومة صديقتي
رديت عليها واني ابتسم
اكيد دتسأل عني ليش ما اجيت للخميسية لان جنا متفقات نتشاوف هناك
جنت لازمة بيدي قميص قاسم ورديت
.. ههه الو ادري بيج. متحل.....
قطعت كلامي
وشهكت مصدومة
جانت فطومة تحجي بصوت ناصي وهي مخبوصة

كلامها زلزل كياني. وخربط احولي وانخطف لوني
بلعت ريگي بخوف
ووكع القميص من ايدي
.. ششنو فاطمة شلون منو كلج
جانت فاطمة تحجي واني النفس صار ينسلب مني بالتدريج

سمعت صوت الجرس اندك ا
ما اهتميت لان هديل جوة وهي تفتح الباب
لان اني بالي وتركيزي وعقلي كله يم فاطمة

لحظات وجان ينفتح الباب مثل العاصفة
وجان يدخل قاسم العيون حمر

وكع النقال من ايدي وانخطف لوني

يتبع

احبكم كومة احبكم هوااااي
اختكم نهى الحسون