أساور الفضة الفصل الحادي وسبعون 71 - بقلم نهى

مساء الانوار عليكم

#اساور_الفضة_ج٢
#نهى_الحسون

ها قد بانت احدى عثراتي تلوح في طريق حياتي
ولكن هذه المرة مختلفة تماما
احسها مثل سيف الجلاد الذي ينتظر ان يقطع عنقي

و انا اجر اذيال خيبتي
اصعد على المنصة لتنفيذ حكم الاعدام بي
بلا حول ولا قوة

هدى

دخل قاسم والعيون جمر ووجهه احمر من الغضب
وساعتها غمضت عيوني وجسمي كله صار يرجف

ووكع النقال من ايدي وبلعت ريكي
سد الباب وراه وقفله

هاي هي اليوم راح يوقعون على ورقة. انتهاء حياتي
وية قاسم
هاي النتيجة الاكيدة بعد الكلام الي سمعته من فاطمة
عرفت اني حياتي وية قاسم وصلت نقطة النهاية

اقترب مني وعيونه بعيوني جمدت بمكاني
ورفعت راسي اباوع عليه

سمعته يكول بصوت هاديء عكس نظراته
.. هدى سؤال واحد واريدج تجاوبيني عليه
كلمة وحدة ... اي او لا
بدون لف ودوران

فتحت حلكي اريد احجي
رفع كف ايده بأشارة نفاذ الصبر وسكتني
بلعت كلامي من الخوف

وكمل كلامه .. صدك جنتي انتي ورائد مخطوبين قبل لا اتزوجج
وهو فسخ الخطوبة بسبب قصة الملهى
هدى اريدج تجاوبيني بكلمة وحدة بدون تبريرات
هذا الحجي صحيح ؟؟؟
اي لو لا

عيوني شاخصة تترجاه قبل لا الساني يتوسل
.. قاسم عفية خليني احجيلك والله .....

صاح بية بصوت عالي
.. جاااااااوبيني كلمة وحدة
ااااااااااي لولاااااااااااااا

مكدرت اهرب من الحقيقة المرة
الي حاولت اتجاوزها وانسها واحسبها ما مرت بحياتي
هزيت راسي بخوف ممزوج بخجل بالموافقة
لان الساني انعقد مكدرت احجي

ما حسيت الا واجاني راشدي
دار وجهي احس بخدي خدر وصار نار
من ورة كفه الثگيل

واني هي ضربة وهي وكعة بالكاع اتكومت مثل الخركة
اتلمست خدي ودموعي نزلت على خدي
ملوحة دموعي صارت تلسع على حرارة خدي المضروب

اقترب عليه وكرفص يمي بالكاع
ولزمني من شعري وكال

.. انا من الاول عرفتج انتي عار بنت عار وجنت خايف منج بس جذبت عقلي

حسيت بشعري راح يتكطع بيده
لزمني من فكي ودفعني حيل وبسرعة اتزحزحت للخلف واني كاعدة بالكاع

نهض من الكاع وظل يروح ويرجع بالغرفة مثل الي كوة لازم نفسه ميهجم علية

جنت ابجي واتوسله
.. عفية قاسم الله يخليك انطيني مجال
بس خليني افهمك والله العظيم وداعت بنتي اسو

اني من اشتغلت
عبالي كوفي ما كان يجي ببالي هذا المكان يكون ملهى
صدكني اني انضحك علية لاتظلمني ابوس ايدك لا تظلمني
لا تسغني (تكسرني) بيك
الله يخليك صدكني لا تعوفني وتحطمني

التفت باوعلي ورجع علية ولزمني من زندي
ورفعني من الكاع صرت مثل اللعبة
بيده احس بعظامي كامت تطكطك

كال..لج اني ممنتظرج تجين تحجيلي انتي اشتغلتي بالملهى مثل الثولة ومتعرفين
وليان ضحكت على عقلج السخيف واستغلتج

لان انا بنفسي وبيدي
طلعتج من الملهى ياثولة.
نقذتج بذاك اليوم من ايديهم والا جان هسه انتي رايحة بالرجلين
بس اني من شفتج يومها عرفتج
عرفت انتي منو وبنت منو وشنو تسوين هناك

واني بيومها نقذتج لان اعرفج صديقة هالة وشايفج
و اعرف بكل قذارة ليانواساليبها
ومثل ما غدرت بأختي هالة
وكعدت تهدد بيها
كدرت تتمكن منج وتستغل وضعج
وغدرت بيج من شفتج عرفت بوكتها انتي ضحية

بجيت واني ممصدكة ربي ظهر حقي
.. اني عاذغتك (عاذرتك) وحقك تعصب علية
اعغف (اعرف) مو سهلة عليك
يحجون بعغضك (بعرضك) كدام الناس
بس صدكني اني مظلومة وكلشي صاغ (صار) غصب عني
ولو اعغف (اعرف) بشغلة ليان ونيتها
اكيد والله ما اقتغب (اقترب) عليها ولا حتى اسلم عليها

زمخ بية وهزني بثنين ايديه احس ركبتي راح تنخلع
وكال
.. لج عار بعدج تحجين بشغلة الملهى واني داكولج اعرف بيها
منو كلج انا مهتم للصار بيج بذاك اليوم
ليش اني هيج ماعندي غيرة على نفسي واهل بيتي
اجي ادخلج بيتي واكعدج وية امي واخواتي
واني عندي شك واحد بالمية انتي متقصدة فعلتج
و رايحة تشتغلين بملهى وتخدمين على السكرانين

لج يا غضب يا انتقااااااااام ربي مني
لو تعرفين شكد متندم بكد شعر راسي
لان سمحت لوحدة مثلج تطعني بظهري وتستغفلني

انتي ثبتي بسوايتج وياي انتي بنت ابليس
لج اني احجي عن صاحبي عضيدي
جنت اجي مثل الاثول احجيلج عن صاحبي رائد وحبه

وانتي تسمعيني بكل برود وصلافة.
تضحكين على الغبي الكدامج
الي جاي جايبلج اخبار الي كسرج شلون هو مكسور وراج
وحضرتج ماخذتني على كد عقلي تسمعين
ويمكن كلبج يركص فرح لان انتصرتي على الي خذلج
ومرسال الغرام اني الطرطور بيناتكم
ولج انتي شيطان من الله ينتقم منج
الله يلعن اليوم الي قللت من عقلي وشأني وارتبطت بيج

دفعني ووكعت عالسرير واني ابجي
وكمت من السرير اتوسله
.. لالالالا قاسم عفية لاتحاسبني على ذنب
اقتغفته بمغاهقتي (اقترفته بمراهقتي ) جنت جاهلة وغبية وحبيت
حالي حال اي بنية

زمخ بية جان يفور من الغضب
.. لج هي لو علاقة وبس كان عذرتج
يمكن اقشمر روحي واضحك على نفسي
اكول حالها حال البنات على كولتج غلطة مراهقة ومكدرت تكولي
لج هاي خطبة ياحقيرة
المفروض اني واهلي نعرف بيها
مو تعوفونا انتي واهلج ياغافلين الكم الله
مو الاصول تكول لازم تكولون انتي قبل مخطوبة وفسختي
حقكم اثير ابوكم وين تعرفون الاصول

.. قاسم والله ما.....
.. اشششششششش ولاكلمة ما اريد اسمع صوتج
لاتخليني اشوف وجهج
وتسوين فضل اذا تطلعين
من حياتي بهدوء
اني مناقصني وجع راس
عندي مشاكل بحياتي هواية
وجيتي انتي وعضيدي كسرتوا ظهري بيكم

صرخت مفزوعة ولزمته من مقدمة قميصه اتوسله
.. لاااا الله يخليك قاسم لاتظلمني وتعوفني اني احبك والله اموت
اني ما اكدغ (مااكدر) اعيش بدونك. خليني هنا
ابقى خدامة الك ولبنتي كولشي ما اغيد (مااريد)
بس ابقى هنا يمك
ما اخليك تشوفني يكفي اني اشوفك حتى لو من بعيد

نتر ايدي ودفعني عنه
وكال .. هدى اشتري نفسج ووخري عني
ما اريد امد ايدي عليج واضربج

ثقي بالله لو تدرين بنار گلبي وغضبي
والي احسه من خيبة بيج وبصاحبي هلكد خذلتوني

يمكن لو افكر افرغ شوية بيج
جان هسة انتي جوة ايدي تصارعين الموت
بس بختج ببنتج.ماريد احد يعيرها بامها من تكبر
هذا الشي الوحيد الي يشفعلج عندي
ولازمني عنج لحد هسة ما كاسر ركبتج

صاااح بصوت عالي من القهر

.. اااااااااااااخ ياحيف وانا الطير الحر
صكر يصيد ما ينصاد

يصير بية هيج
ومن منو
من اقرب اثنين لروحي
حزام ظهري وبنت كلبي
اثنينهم يطعنوني بظهري وبنفس الخنجر

ياربي عقابك صعب عاقبتني بيهم
وامتحانك اصعب لازم اصبر عليهم وماسويلهم اي شي
حتى لاافضح روحي ولااجيب حجاية لبنتي الي مالها ذنب بكل هذا

كور ايده ودار بكل قوته وكسر مرايا الميز
صرخت خايفة منه وعليه

ركضت علية ايده دتنزف دم.
وصارت نقاط الدم توكع بالكاع
لزمت كف ايده واني ابجي
.. قاسم ابوس ايدك كافي ايدك انجغحت (انجرحت) ودتنزف

نتر ايدي بقسوة ولزمني من شعري بكف ايده الثانية
وقرب وجهي عليه وكال
.. وداعتج جرح ايدي لا شيء بالنسبة لجرح گلبي
حجاها بحقد ودفعني بكل قوته وكعت بالكاع
. انطاني ظهره وكال

.. طلعي منا
اذا تردين تبقين هنا ببيتي خدامة بكيفج
بس لاتخليني اشوف
رگعة وجهج. كدامي
واياني وياج تكولين لاحد على اي شي صار بيني وبينج
لو على كص ركبتج وخصوصاً امي
مو علمودج مو هاممني الناس شلون تباوعلج وتحتقرج
بس ارجع اكولج ماريد بنتي تتحمل اخطائج

كمت من مكاني بسرعة بالكوة
ورحت طلعت برة

لكيت هديل شايلة. اسو وتريد تصعد الدرج
وعيونها فوك مستغربة بيها الف سؤال

طلعت من الغرفة واني حالتي حالة
رحت اخذت اسو من عندها

هديل بصوت مبهوت .. شنو شبيكم شصاير
لميت بنتي لصدري واني اشهك وابجي بصوت
متكطع من القهر
كلتلها .. ما صايغ (ماصاير) شي
رحت دخلت لغرفة هالة

هديل دخلت وراي تباوع علية وكالت
.. تردين اتصل على ماما تجي تهدي قاسم

.. لاعفية هديل لاتحجين لأي واحد عن الي صاغ (صار)
هاي مشاكل بين المتزوجين عادي تصيغ (تصير)
يعني المشكلة بيني وبين قاسم اتغجاج (اترجاج)
الموضوع يبقى بيناتنا لان قاسم ميقبل احد يعغف (يعرف)

هديل.. اي بس شوفي وجهج شلون ازرك
واحمر صاير سينما قاسم ممثل بوجهج
صدكي امي ما راح تعبر عليها

حجيت واني ابجي .. اي اكيد خالتي غاح تعرف (راح تعرف)
اني وقاسم متعاغكين (متعاركين ) بس مو لازم تعغف ( تعرف) بالسبب

هديل .. ليش هو شنو السبب اني جنت وية اسو بالحديقة هسه دخلت
سمعت صوت صياح قاسم بس ديكولج طلعي من الغرفه
وماريد اشوف وجههج كدامي
على كل حال اني ما اعرف هو شنو سبب مشكلتكم
بس انصحج ما تسكتين عن الي صار

گلبي ارتاح من كالت ما تعرف اي شي
وهي بس سمعت قاسم من طردني من الغرفة
.. لا افضل الموضوع يبقى بيني وبين زوجي

وكملت بگلبي .. او بقايا زوجي
بعد الصار احس كلشي اتدمر بحياتي

طلعت وسدت الباب وراها
رحت. حضنت اسو ونموتها يمي
وهي جانت تلعب بلعبتها المفضلة وبقت تلعب لحد ما نعست ونامت

واني ظليت الليل كله مانمته خايفة
ما اعرف شنو مصيري وين اروح وشنو اسوي
ربي استر علية وعلى عائلتي. وبرد گلب قاسم علية

بجيت بحرگة كلب واني اتوسل
سمعت صوت الجرس اندك مرة اكيد اجوي بيت عيالي

ربع ساعة وجان اسمع صوت هالة دتصعد على الدرج
وتسأل عني فتحت الباب وبيدها العلاليك
اتوقفت متفاجئة بوجودي بغرفتها
وبشكل وجهي المضروب وشعري المهوس

اتغيرت معالم وجهها من الفرحة للصدمة
هالة.. هاي شنو شبي وجهج وليش دتبجين
وعيونج حمر

زادت دموعي وية سؤالها
.. هالة اني انتهيت وحياتي تدمغت (تدمرت)
وقاسم طغدني (طردني) من حياته
صرت احجي وابجي بدون ما اعرف شنو جنت احجي
هالة ذبت الغراض وسدت الباب واجتي ولمتني لحضنها

.. كافي ياعمري لاتبجين. مسحي دموعج
هو هذا قاسم من يعصب محد يوكف بوجهه

هسة جري نفس وارتاحي وبعدين نحجي بالموضوع
لان وداعتج كولشي مفتهمت منج بس تغوغوين
هو اني من غير كولشي مدا افتهم على كلامج ونوب تبجين وتغوغوين

سحبت نفس عميق احس براسي يريد ينفجر
ودخت من كثر البجي
هالة .. نامي شكلج صارلج هواي تبجين

واني راح اعوف الغراض على باجر
حتى تشوفين شنو اشتريت واسولفلج شنو صار بية وية عزام

هسة راح اعرفج ترتاحين وتنامين واني نازلة
اسوي العشاء لان الكل جوعانين وما متعشين

همست بتعب .. شوفي هالة تلكين مسوية تبسي دجاج
ومعكغونة.(معكرونة) بالبشميل حاطتهم بالفغن (بالفرن)
بس حميهم.

هالة.. يمة فديتج يابعد عمري
تردين اصعدلج عشا خاف ما بيج حيل تنزلين

.. لا ما اشتهي اكلوا بالعافية

راحت هالة وطفت كلوب الغرفة
واني حطيت راسي واتمددت يم اسو
وسمعت صوت قاسم عبر من يم غرفة هالة وهو يحجي بالنقال

كلبي نهض من سمعت صوته
وبعدها نمت

يوم ثاني الصبح كعدت مثل كل يوم
متعودة اكعد قبل قاسم و احضر ملابسه وانزل اسويله ريوك
قبل لا ينزل

لكيت هالة خطية. جايبتلها فراش ونايمة بالكاع
والله من كد التعب
ماحسيت بيها من دخلت للغرفة
كعدتها
.. هالة عفية كومي غوحي (روحي) كعدي اخوج قاسم من النوم
لان هو كل يوم معتمد علية اني اصحيه
هالة بصوت ثگيل من النعاس

.. اااوف منج هسة اكعده
والله ياربي هذا الي يخربك وية الصديق

تركتها كامت من فراشها وراحت على غرفتنا
احس گلبي يرفرف عليه اتمنيت اني اروح اكعده
هذا مكاني ودوري. غمضت عيوني اطلب الصبر من ربي

نزلت جو ودخلت للمطبخ وما لكيت احد
رحت كبل حطيت قوري الجاي على النار
طلعت البيض ورحت ادور على الصمون
ما اعرف خالة كل يوم تطلع تاخذه من عمو حسنين
باوعت للكاميرات لكيت العم حسنين موجود

شوية وانفتح باب المطبخ الخارجي ودخلت خالة وبيدها علاكة الصمون

سلمت عليها واني دايرة وجهي وهي ردت السلام من غير ما تنتبه على وجهي

وهو المطلوب لان كولش مو وكتها تكعد تحقق وياية
وقاسم راح ينزل ولازم اختفي من وجهه قبل لا يجي

كملت الريوك وحطيته على ميز الطعام
وحطيت القوري والاستكاين على الميز قريب على خالة وكلتلها

سمعت صوت قاسم دينزل الدرج
كلبي نهض
.. خالة اني صاعدة لأسو سمعت صوتها دتبجي

جاوبتني وبالها مشغول
.. اخذي راحتج خالة

طلعت من المطبخ ورحت دخلت للحمام الي بصف المطبخ

سمعت قاسم دخل للمطبخ وسلم على امه
اني كبل طلعت ورحت صعدت فوك
هو ما يريدني ولا يريد يشوف وجهي

خلي اتجنبه كم يوم بلكي يهدئ غضبه ويبرد گلبه
صعدت فوك ودخلت للغرفة
ولكيت غرفتنا هوسة وجامة المرايا مكسورة من اثر البارحة ونقاط الدم عالارضية

اتفاجئت بمنظر الكنتور جان مطلع كل ملابسي وشامرهم بالكاع. وميز المرايا فارغ
كل عطوري وغراضي مشمورات فوك ملابسي

نزلت. دموعي غصب عني وكتمت الغصة
يعني هاي رسالة. الي حتى اطلع حتى غراضي وملابسي من غرفته
كعدت بالكاع يم ملابسي

وحطيت وغطيت وجهي بكفوف ايدية وصرت ابجي مثل الطفلة المنبوذة
قاسم ميريد يشوفني ولا يريد يشوف اي شي يخصني يذكره بوجودي

والله هواي علية ياربي.
الهمني الصبر صعبة علية ابو بيتي وزوجي وحبيبي
ينبذني ويهجرني بعدما حسيت نفسي خوت من البجي
مسحت دموعي وكمت على حيلي

وبديت انظف الغرفة. واغير جوها.
فتحت الشباك ووكعت
نظراتي على السرير
لكيته نايم على الجانب الي كل مرة اني انام عليه

شنو صدفة لو گلبي المخذول يدور على لمحة امل
اريد اقنع روحي ان حبه الي بعده وما انكسر

رجف جسمي وبديت انظف بالغرفة واجمع اثار ثورة الامس

وبدلت الفرشة وعدلتها جان منظر المرايا المكسور يشبه شكل كسرة گلبي. حالياً

مسحت الكاع من الدم واخذت ملابسه الي جانت مملية بالدم حطيتهم بالغسالة

وبدلت الفرشة وشلت ملابسي وعطوري وكولشي يخصني كل قطعة. اطلعها من غرفتنا احس تطلع روحي وياها

دخلت للغرفة لكيت هالة كاعدة هي واسو ونازلات
جوة اني حاطة جوة بغرفة خالة سلة ملابس احتياط لاسو
للحالات الطارئة خاف توصخ نفسها واني مرات ما اكدر اصعد فوك احضرلها ملابس

اخذتلي خانة من كنتور هالة
وبديت اصفط ملابسي. وحطيت عطوري وغراضي وية ملابسي
عدلت شالي اريد انزل جوة
وباوعت روحي بالمرايا جان وجهي خليط الوان
لان ثاني يوم الالوان تبين اكثر والوجع هم اكيد
اتلمست خدي كلش يوجعني

نزلت جوة ولكيت هالة مبدلة اسو وخالة دتريكها
وهالة جانت دتتريك وهديل كاعدة على القنفة دتدرس
باوعت علية.

كعدت يم هالة وبديت اتريك
ام قاسم .. اكول خالة هدى اليوم كلت لهشام
ياخذج وترحون لبيت اختج مروة حتى تنطون فلوس
المهر لمريم.
حتى تبدي تجهز نفسها لان حددنا موعد العرس
ونريد نزوجهم بعد شهر

هشام يكول اريد اتزوج بالعطلة علمود مريم
وراها كلية
جنت مدنكة راسي ودا اكل
.. اي زين يسوي قغاغه (قراره) بمكانه
حتى مغيم (مريم) يكون عدها وقت تجهز نفسها

ام قاسم رفعت راسها وكملت كلامها
.. لعد. هاي هي جهزي نفسج بعد ساعة
اريد تحجين وية خواتج
وتتفاهمين وياهم عل.......
وجان خالة تشوف وجهي وتقطع كلامها وكالت
.. ياااااا خالة هدى هاي شنو شبي وجهج

ارتبكت وهديل جاوبتها وكالت.. ماما البارحة
قاسم اتعارك هو وهدى وضربها

ام قاسم حطت ايدها على حلكها مبهوتة من الي سمعته وكالت
.. ليش بنتي عين الما صلت عالنبي شصاير شجاكم واتعاركتوا
شنو خالة احجي شبي قاسم وياج شنو صاير

.. خالة مصاير شي بس
هو جان معصب وملتهي بشغلة عمامه
جان كولش مشغول
واني لحيت عليه علمود ياخذني لخواتي وحجاية مني وحجاية منه وكام علية
وانتي تعرفين الشيطان من يدخل بين الرجال ومرته

جنت احجي وعيوني تتهرب من مواجهتها
ام قاسم.. اي ياعيني اتعلمي من تشوفين زوجج
معصب وصاير نار. انصحج تتجنبين تلحين عليه
وتعوفيه الى ان يهديء وبعدين احجي وياه

والله اني امه البارحة من شفته
مدخن من الغضب
من يمي عفته وسكتت حتى ما كدرت افاتحه بموضوع موعد عرس هشام

همست
.. اي خالة كلامج صحيح اني غلطانة المفروض
ما اضغط عليه

جنت احجي وادبر الاعذار الواهنة واني كارهة روحي
ربي لشوكت ابقى مثل الحرامي اغطي على مشكلتي
وية قاسم

خلصت الريوك ورحت اكمل شغلي واتصلت على شيماء
طلبت منها ان تروح لبيت مروة اريد اشوفها واحجي وياها هي ومروة
بخصوص موضوع موعد العرس

وهي كالت تعالي على الظهر لان مروة موجودة بالبيت
اتفقنا على اي ساعة ورحت كلت لخالة
حتى تكول لهشام. يجي ياخذني

لزمت النقال ورسلت لقاسم رسالة عالوتس ابد
اني راح اروح وية هشام لبيت مروة علمود عرسه هو ومريم

وبقيت انتظره يرد علية ورة ساعة رحت شفت النقال
اباوع لكيته قاري الرسالة بس ما رد

لحظات واجتي هالة وكالت
.. قاسم اتصل علية وكال
كولي لهدى عادي تروح وية هشام
لبيت مروة بس تعوف اسو هنا بالبيت

ظليت احوم ياربي شنو. هالحرب الباردة
والله يموتني بجفاه. يارب ما عندي صبر على فراكه
وصده صعب علية

جانت هالة تحجي وتباوع علية
وكالت
..هدى والله سالفتج انتي واخوي اكبر من الموضوع الي حجيتيه لأمي
والله ما مقتنعة

.. هالة قاسم ما يقبل احجي اي شي عن سبب المشكلة
واني اعرف امج ما راح تتركني بحالي اذا متعرف شنو السبب

.. اي صحيح اني اشهد على ذلك
على العموم براحتج لتحجين
بس كل الي اتمناه منج ان تصبرين على اخوي

للظهر وصل قاسم وهشام عالغدة واني انسحبت
من يمهم حتى عالغدة ما كعدت وياهم

خالتي صاحتني وكلتلها خالة شبعانة ما اقتنعت
بجوابي بس ما لحت علية لان شافت غضب ابنها
من رجع للبيت جان بس يصيح

جنت اسمع خالة. عاطت بي وكلتله
.. ادري شنو سالفتك. اشو من دخلت للبيت
وانت مدخن ومعصب شكو. قاسم صاير شي وياك
عندك مشاكل وضغوط بالعمل فهمنا

ترة احنا عائلتك مو ذنبنا تطلع حرگتك بينا
يعني اليوم مرتك كعدت الصبح وخدها مصبوغ
والله علمود حضرتك ضايج ومعصب على شنو

ميصير هيج انتبه لنفسك ترة بنت الناس مو لعبة عندك
مالك حق هيج تبهذلها وتكسر بخاطرها
يمة استهدي بالرحمان وطول خلك
ترة يجيك يوم تخسر اعز ناسك بهذا عنادك

ما سمعت صوت قاسم رحت صعدت فوك لغرفة هالة
جهزت نفسي و اسو جانت جوة دتتغدة
انتظرت قاسم يصعد فوك
جنت بغرفة هالة واكفة ورة الباب سمعت
خطواته عبر من يم غرفة هالة وراح لغرفتنا
فتح الباب وركعه

واني طلعت بسرعة من الغرفة ونزلت جوة ولكيت هشام محضر روحه
واخذني لبيت مروة
وكل شوية يلمح لي يريد يجي يزور مريم
يشوفها

بس مستحي لان البيت محد بي
ومروة كالتلها ميصير يجي للبيت واني مموجودة وانتي لوحدج
خلي يشوفله يوم اني بالبيت ويجي يزورج

هشام.. احس بيها ما عندها ثقة بية

ابتسمت وكلتله.. كلام مروة صحيح وبمحله
ترة هي مو ما تثق بيك
بس هي حرصاًعلى اختنا الصغير لوحدها بالبيت
وتريد تحافظ عليها وانت هم لو بمكانه تطلب من اختك نفس الطلب
شوية اصبر شدعوة عليك

هشام.. شنو غير مرتي اريد اكعد وياها واحجي وافهمها وتفهمني
.. شنو النقال وين راح مو كل يوم كاعد تبسبس وياها
بالساعات بعد شكو

هشام .. الله يلعنج هدى ردتج عون صرتي علي فرعون
طلعتي اضرب من مروة
ونوب حتى الاتصالات راح تكطعيها علية

وصلنا لبيت مروة وسلمني ظرف فلوس المهر
وكال سلمينا على مرتي.
خلي اتزوج الا اخليكم تحلمون تشوفوها

ابتسمت على لهفته لمريم ونزلت من سيارته
واني ادعيلهم ان يديم محبتهم هو وياها

ودخلت لبيت مروة ولكيت البنات موجودات الا ضحى ماكو
واني نزعت شالي وحطيت شعري على صفحة خدي المضروب
لكيت مروة دتتغدة. ومشمش كاعدة يمها على الميز
وبديت اتبادل السلام وية اخواتي
سلمت ظرف الفلوس لمريم وكلتلها هاي هشام دزهم الج
ووصلت لحضن شومة

هو اني شفتها واني شمرت روحي بحضنها
وهي رادت تبوسني وخرت شعري شافت خدي

فتحت عيونها مصدومة من شكلي ومروة اتوقفت عن الاكل

شيماء لمتني بحضنها وهي مذهولة
.. حبيبتي هاي شنو خدج شبي وليش دتبجين شكو هدى

مروة كامت من اكلها وراحت تغسل
واني بعدني ابجي بشهكات واحجي بصوت متقطع
وسمعت صوت مروة تحجي بحزم

. شيماء تعاي جيبها خلي تكعد بالهول
ترتاح من البجي كلشي ما افتهمت منها

كعدت على القنفة واخواتي داير مدايري
ووجهم بي علامات التعجب
وبديت احجيلهم مصيبتي

.. اني هسة (غاح )راح احجيلكم الصاغ (الصار)
والمصيبة الي وكعت على غاسي ( راسي )

شيماء .. احجي كولي نسمعج
..الباغحة (البارحة) الخميسية. مال. بيت المختاغ (المختار)
واني مغحت (مارحت) علمود اسو

وبديت احجي لخواتي عن الصار بية وعن اتصال فطومة صديقتي

البارحة بالليل اتصلت علية صديقتي
فاطمة وفاجئتني بكلامها وصوتها الخايف

وكالت.. لج هدى لحكي
رائد اتعارك وية بيت جوارينهم بيت ابو ليان
لان صادف خميسية عمو
وبيت ليان عدهم الديجي ومسوين عيد ميلاد

وخالة ام رائد اتصلت على قاسم وكلتله
خالة الحك على صاحبك راح يتعارك وية جواريننا
وهذولي ناس ساقطين خاف يأذونه

وهو اصلاً قاسم جان موجود وكللها لتخافين خالة انا موجود يمه

سمعتها كالت لليلى
.. ماما ليلى عفية كومي روحي شوفي اخوج شسوة
وطمنيني

جانت ليلى بحضنها ابنها اني طفرت من مكاني وكلتلها خليج انتي كاعدة اني اروح اشوف. شنو الصاير

رحت مديت راسي من الباب
وجان الكة قاسم زانك اخو ليان ولاطشه على باب بيتهم. ويسبه وكله
.. انت صدك ما عندك غيرة ولا عندك ذرة شرف
ولك دتشوف احنا عدنا مصاب

معقولة لهاي الدرجة هجرتوا المستحة
وما بقت بوجهكم ذرة. اخلاق

جان اخو ليان مخنوك ميكدر يجاوبه
وجان تطلع ليان تلعلع بلسانها

وكامت تغلط وتسب قاسم ورائد
رائد .. ولج انتي وحدة ساقطة. دخلي فوتي
جوة

.. اسكت لك لا تخليني الم الناس عليك انت وصاحبك

قاسم جر رائد وكله
.. عوفها ما تنجس لسانك وتحجي وية وحدة متندل باب الشرف وينه

ليان .. عشتوا شوف منو جاي يحجيلي على الشرف
لك قاسم انت اخر. واحد يحجي عالشرف

شنو نسيت منو مرتك لو اذكرك الله يرحم
هاي شحال لوما انت طلعتها من الملهى بيدك

رائد عاط بيها وقاطع كلامها وكللها
.. اكلي تبن وخيطي حلكج لا اجي احرك الي خلفوج

.. هاي شنو عيني رائد. الظاهر حنيت لحبيبتك هديوة
شكلي هيجت المواجع عليك من جبت طاريها

رائد هد عليها يريد يسكتها وقاسم لزمه
وكله عوفها ودار وجهه عليها وكللها
.. مرتي تاج راسج. واشرف من الشرف
مو وحدة مثلج جاية من الوحل

تجي تتهم عرضي بكلام اكبر من راسج
انتبهي على الفاضح لان الكلام الحجتيه
صدكيني راح يوديج ورة الشمس

ليان هزت ايدها بستهزاء
.. حبيبي اني متأكدة من كلامي وما متهمة احد باطل
ولاتكعد تهدد وتطلع بطولاتك براسي
مو ذنبي اذا جان الماي يمشي من جواك
واذا اني متبلية على عرضك بحرف واحد الك حق تهدد وتحجي
بس هذا صاحبك يمك وسأله. وكله كلامي صحيح لو لا

جان قاسم منطيني ظهره مكدرت احزر ردت فعله
بس اتفاجئت من جاوب ليان وكللها
.. الكلام الي كلتيه اعرف عنه
وكلشي قسمة ونصيب
وهذا الشي ما يقلل من شرف هدى ولا يمسها
جان يحجيها بصياح

وانتبهت لليان بهت لونها ورائد هم جان منطيني ظهر
مكدرت اعرف بشنو يفكر معقولة هو كايل لقاسم لو شنو الموضوع

اجة ابو ليان ودخل بنته وابنه وكللهم لا تورطونا
وية قاسم احنا مو بكده
وكعدت يعتذر من قاسم ورائد
خايف على بيته مهما يكون اهل قاسم وعمامه وكرايبه بهاي المنطقة
والملهى مالته لا يهجمها عليه قاسم

دخلو وجوة وسدوا بابهم وليان تحجي وية ابوها
تكله والله عمي خوش احنا كاعدين وسادين بابنا علينا وهمة الي هدوا علينا. يحلفون شلون بالله
نريد نحتفل نريد نعيد
شلون يعني نبطل
وابوها يكللها لج كافي ستري علينا

شفت قاسم ورائد اجوي يمشون اتجاه البيت
رديت الباب وجان فجاء سمعت سؤال قاسم
لرائد
وكله .. رائد شنو الي معنى كلام ليان الي حجته قبل شوية
كولي مو صحيح
جان يحجي بصوت ناصي
لطمت على خدي خايفة والله عرفت قاسم
اتفاجيء بكلام ليان بس ما بين كدامها

رائد دنك راسه وجاوبه وكله ..
اوكف قاسم خلي احجيلك ترة ليان جذابة
صدكني احلفلك وغلات عمار ابني
هدى شريفة وليان الحيوانة هي الي جرت رجلها لهذا المكان

بس قاسم سكته وكله بصوت
.. ميحتاج تكولي لان اني اعرف مرتي شريفة لو لا
ولتتهرب بجوابك بكلام ثاني

جان رائد يباوع عليه. مصدوم
قاسم .. انا ما سألتك عن غدر ليان
انا اسألك عن غدر صحبتك الي
يعني هي هدى نفسها البنية الي تحبها وفسخت خطوبتك منها

رائد دنك راسه بخجل وكله
.. اي هي نفسها بس بشنو احلفلك
حتى تصدكني انا ما عند..........

لج هدى
قاسم ما ترك مجال لرائد يكمل كلامه
كبل انطاه بوكسي ووكعه بالكاع
وصار يضرب بي بكل قهر
ورائد ما يشيل لا ايد ولا رجل ويدافع عن نفسه
بس اسمعه يكوله

اضربني بس لاتظلمني وتظلمها
والله عرضك مثل عرضي وما يوم نظرت
لهدى بعين نجسة وداعت خوتنا. وروح ابوي
البنية من يوم الي افترقت طرقنا بعد لا شفتها ولا شافتني

بس وين قاسم جان بقمة الغضب
دفره. ببطنه
وكله .. والله بختك. بخميسية ابوك وبالرياجيل الموجودين بالاستقبال
والا جان مسحت بيك الكاع واخليك تزحف زحوف
اتجه لسيارته ركبها وشغلها وطلع

حجيت كلشي صار بيني وبين قاسم لشيماء ومروة ومريم
خطية يباوعون علية مصدومات

شيماء .. لج ليش هدى مو كلتلج
لازم تكولين لقاسم عن موضوع خطوبتج من رائد
قاسم له حق يعرف بهيج موضوع

جاوبتها واني ابجي متندمة
.. صدكيني شيماء
اني بالبداية شفت ماله داعي اكول لقاسم عن خطوبتي برائد
لان جنت اعغف (اعرف) بزواجي منه مؤقت
مجغد فتغة (مجرد فترة ) ونتطلق وكل واحد بينا يغوح بطغيقه (يروح بطريقه)
لذلك كلت ميحتاج اكوله

مروة بغضب.. زين شنو عذرج. بعدما استمر زواجكم
ليش محجيتي
هسة هي لو علاقة حب قديمة جان عذرتج واكول
معذورة لان صعبة على الزوجة تكول لزوجها
عن هيج سوالف

بس هاي خطوبة في غض النظر عن هو صاحبه
يعني صار الموضوع اقوى من ان تضميه عنه
يعني لابد وان يجي اليوم الي راح يعرف قاسم بالموضوع

.. ما كغت (كدرت ) اكول من استمغ (استمر) زواجنا
لان حبيته. وخفت اذا يعغف.(يعرف) يعوفني

شيماء .. والله هذا الجنت خايفة منه

.. عفية شيماء لا تلوميني
كولي شنو
من حظ اسود واعوج الي يخلي قاسم دوناً عن الناس كلها
هو الي يفزعلي ويخلصني. بسالفة الملهى
يعني لو احجيها للمخبل الي بشارع هم مراح يعقلها

مروة.. بالعكس هذا الشي الوحيد الي بصالحج
على الاقل هو يعرف انتي مظلومة ومستغفليج
بالحقيقة ما راح اكعد الومج بس
كل الي اريده منج
تبقين تحاربين حتى تحافظين على زواجج
لان قاسم رجال بمعنى. الكلمة
وتربطكم بنية. لا تحطمين حياتها

جاوبتها بأمل .. غاح (راح ) ابقى واتحمل واصبغ (اصبر) عليه
وادعي الله يحنن كلبه علية

شيماء .. ترة خلي ببالج الموضوع مو هين على قاسم
ما اتوقع راح يتجاوزه بسهولة

بعدها مروة غيرت الموضوع وانتقلنا نحجي
عن تجهيز مريم ونحضر ويشانها
شيماء كالت اني عني راح اتكفل بتجهيزها

وبيومها بقيت ببيت مروة لليل
وبقيت منتظرة. شيماء يجي عليها حيدر ويوصلوني للبيت

لكن فجاءة دك نقالي وكان المتصل خالة ام قاسم
رديت
ام قاسم .. خالة هدى قاسم رحع للبيت وعرف بيج لحد الان ما راجعة للبيت
حرك البيت علينا

عفية خالة اتكفي الشر راح يجي عليج هشام ياخذج
عفية بنتي رجعي. وياه ادري بيج. بعدج زعلانة

كبري عقلج ورجعي لخاطر بنتج وزواج هشام ما بقى عليه شي
مو وكتها هاي المشاكل

جاوبتها. مستغربة
.. خالة حبيبتي والله اني. ما طالعة زعلانة.
اني جنت منتظغة (منظرة) زوج شيماء يجي ويوصلني
بطغيقه (بطريقه)للبيت

ام قاسم براحة.. اي عفية خالة الله يكملج بعقلج

نهيت الاتصال والبنات باوعلي. وسألوني
وكلتلهم عن الصار

مروة.. يالله حبيبتي رجعي لبيتج وصيري سباعية

دك نقالي وكان المتصل هشام انتبهت لمريم جانت تنتظره. بالمطبخ تباوع عالكاميرات

بس شافته وراحت ركض تفتحله الباب
حاولت ااخر روحي واشغل البنات
حتى هشام ومريم ياخذون راحتكم

ورة عشر داقايق سلمت على البنات
مروة كامت تريد تطلع وراي

.. لا حبيبتي ظلي كاعدة بمكانج انا اطلع اندل
الباب

رحت طلعت من المطبخ وعيوني تدور على عصافير الحب وين خاتلين اشو ماكو بالكراج

وجان الكة الاخ ماخذ اختي ورة المولد الديزل الموجودة بالكراج

خرب يومك هشام ما يضيع فرصة

جان هشام مدنك راسه ومغطي مريم بذراعه

جليت صوتي حتى ينتبهون لوجودي

انتبهت لمريم دفعته بسرعة مرتبكة
وهشام ارتبك وانخبص
باوع. علية

وبعدها باوع وراية خاف. وحدة من خواتي الكبار
جاية وياية

هشام اتنفس براحة وكال
.. الله يلعن بليسج هدى والله عبالي مروة لو شيماء وياج
والله اجيت اطفر.السياج من الخرعة
كلت سولنا كبسة

هدى

مرت الايام واني وقاسم علاقتنا متوترة
واني جنت احاول بقدر الامكان ما التقي بي
ولا هو حاول يلين من عناده

وشيماء بدت تجهز بمريم. وخالة ام قاسم
بدت تجهز البيت وتعدل بي وهالة. يوم الخميس
هذا خطوبتها

ابتسمت واني اتذكر عزام شلون
دخل وحجة وية خالة ام قاسم وكللها
عزام .. امول خالة يعني من اجلتوا خطوبتي كلت حقهم معذورين وعيب من جوارينهم يفرحون وجوارينهم حزانة

بس مال تحددون عرس استاذ هشومي وانا تركنوني
عالرف ابقى انتظر هاي الما مرجية منكم

يعني شفتوني فقير وساكت. تكومون تاكلوني وتغلسون علية

هشام .. خاب دكل تبن انا خاطب قبلك وانا اولى
اعرس قبلك قابل انا فاهي مثلك

ام قاسم تضحك عليهم .. يا يمة هشام عيب تحجي وياه خطية هو هم حقه

عزام.. والكعبة اذا ما اسوي خطوبتي قبل عرس هذا التيس ما اكون عزام

هشام.. اكول اشو انت جاي ببيتنا بكل وكاحة عين
تطالب وتحلف وتتعود الظاهر جسمك يحكك
وصارلك هواي ما مسحول

ام قاسم .. يمة هشام شبيك كمت عالمكرود
هسة اليسمعك يكول كاطع عليك ليلة عرسك
هو هم خطية يريد يفرح ويخطب

وانت ما بقى على زواجك اسبوع بعد شبيك دايخ

هشام .. يعني هو الا يعرس وية عرسي.
وانتي ملتهية ومشغولة. بتجهيز عرسي

ام قاسم ابتسمت التفتت على عزام وكالت
.. يمة عزام عكب باجر خميس جيب اهلك وتعال
وخطبوا احنا ما عندنا شي اشو احنا اهل وما بينا رسميات.

هالة سمعت بالخبر وكامت تكمز من الفرحة
والوجه احمر خطية ممصدكة
حلمها واخيراً راح يتحقق

مر يومين
واليوم خطوبة هالة
كعدت من الصبح مثل كل يوم
احضر ريوك لقاسم
نزل الدرج وجان التقي ووكعت عيونه
بعيوني.

جانت نظراته جامدة. دنك وكمل طريقه ما عبالك شافني
متت من القهر

لشوكت ابقى اصبر عليه. ما اعرف ليش كلما اشوف نظراته
افقد الامل برجوعه بالزايد

اليوم الكل مخبوص
وخوات قاسم الي بالمحافظات بعد يومين بجون
واني دا اسوي حملة شاملة عالبيت
وخالة استلمت المطبخ والطبخ

وهالة طلعت وية منى وكوثر للصالون
لان الساعة بالستة الخطوبة

الساعة ب ٢ الظهر
دك نقال خالة ام قاسم وجان المتصل
قاسم
درت عليه وهي تضحك
ام قاسم .. الو هلا يمة قاسم

شوية وجان تشهك مفزوعة وضربت على خدودها
ام قاسم .. يمة صخام الصخمني
يمة كلشي ولا ابني

رحت ركض عليها وكلبي يريد يومع بين رجلية
وسألتها
.. خالة شنو صاير قاسم شبي

ام قاسم سدت النقال وهي تلطم على خدودها وتكول
.. ولج هدى هشام طابكة عليه سيارتين وخاطفينه

يتبع

احبكم كومة احبكم هواااي