أساور الفضة الفصل الرابع وسبعون 74 - بقلم نهى

ها انا اصل معكم يا احبتي الى نهاية مشوار
حياة. ابطالنا

#اساور_الفضة_ج٢
#نهى_الحسون

هدى

اتصلت علية ام فرزدق
واتفاجئت بيها من حجت وياي بموضوع قاسم ورائد
شلون وشوكت ومنو الي كللها

رديت على اتصالها وبعد تبادل السلام ومعرفة الاحوال خالة ام فرزدق كبل دخلت بالموضوع

ام فرزدق .. خالة هداوي اتصلت عليج عندي حجي وياج
واريدج تسمعيه بخصوص سالفة قاسم ورائد والي صار بينهم

بس جابت طاري رائد وقاسم بطني انمغصت سألتها
.. خالة شنو صايغ (صاير)

.. لا مصاير شي بس اني من يمي خمنت بعد الي سمعته من رائد وقاسم
عرفت انتي وقاسم مو على وفاق
وغضب قاسم على صاحبه خير دليل

عكدت حواجبي مستغربة رائد وين شاف قاسم
.. خالة عفية فهميني شنو الموضوع

.. انا اكلج
اليوم رائد اجة لعمج فرزدق وطلب منه يتدخل ويصير محضر خير
ويصلح بينه وبين قاسم
لان يعرف بقاسم يسوي حساب لعمه فرزدق ويحترمه

ومن اجة وحجالنا الصار بينه وبين صاحبه
وحلفنا ان ما نجيب سيرة لأحد حتى لا يزيد غضب قاسم

لذلك عمج فرزدق اتصل على قاسم وكله تعال اريدك بالبيت
وصدك قاسم ما طول بسرعة اجانا للبيت
واتفاجيء بوجود رائد بالاستقبال
قاسم بس شافه راد يطلع بس انا وعمج لزمناه وكلناله

لخاطرنا اكعد واسمع صاحبك شيكول لخاطر عشرتكم واخوتكم
انطيه فرصة خلي يحجيلك ويبررلك

وفعلا قاسم كوة على اعصابه كعد كدام رائد
ورائد استغل الوضع وبدا يحجي لقاسم

رائد.. وداعت ابني عمار الي ماعندي اعز منه بالدنيا
يا هدى يا بنت اثير ما عندي اي شي يجمعني وياها

غير وعد الطفولة والمراهقة بس الله ما كاتبها من قسمتي
وهاي هي وكلمن راح بطريقه

وهي قبل لا تصير عرضك انا طلعتها من حياتي
تتذكر من سألتني قبل عن البنية الي واعدتها بالزواج
وبيومها كلتلك ماصارت قسمة وسألتني بوكتها عن اسمها
الله عليك شنو كلتلك بوكتها

قاسم بس مدنك ويهز براسه
.. اي كلتلي هذا ستر بنية مادام ما صارت من قسمتي
بعد ما يصير اجيب طاريها واحجي بأسمها
كلمن راح بطريقه

هنا رائد من شاف قاسم بدا شوية يتجاوب وية كلامه
.. زين احلفك بالله اذا هي جانت مو عرضك وانا
جنت صاينها ومحافظ على اسمها
زين شلون تريدني من تصير حلالك وعرضك
اجيك واكلك انت اتزوجت البنية الي جنت خاطبها انا قبلك

على فكرة انا حتى ما لحكت البسها الحلقة
يعني يادوب تنحسب خطوبة. ومو بس انت متدري
الكل ميعرف بخبر خطوبتنا وهذا عمي فرزدق واحد من الناس ميعرف بالموضوع

همست بأمل .. خالة وقاسم شنو كان ردة فعله اتجاه كلام رائد

.. انا وعمج ما قصرنا صرنا نبرد الحطب
ونهدي النفوس وقاسم بدة يستمع لكلام فرزدق

قاسم كلة .. عمي انت رجال وتعرف شكبرها عالرجال
من احد يستغفله

دار على رائد وكله
.. انت تشوف بسكوتك حفظ عرضي وانا اشوف بسكوتك اهانة واستهانة وغدر

فرزدق جاوبه
.. شوف قاسم لو نجي للموضوع من وجهة نظرك فأنا اشوف الحق وياك

وبنفس الوكت لو اجيت اباوع للسالفة بعيون رائد
هم راح يكون الحق وياه
حقه ميريد يخسرك
والدليل هسة هو استعان بية حتى اصلح ما بينكم

رائد باوع لقاسم وكله
.. شوف قاسم وروح العزيز ابوي
الي بوفاته انكسر ظهري

زعلك جبير علية. وخسارتك
كسرت ظهري مثل يوم فراك ابوية

انت صديقي واخوي وحزام ظهري كبرنا وربينا سوى
ما جاي اتخيل يجي اليوم الي تفوت من يمي تشوفني
وما تسلم علية

وداعتك ما حلتلي اي صحبة من بعدك يا عضيدي
كانت كلمات رائد كفيلة بتنازل قاسم ومصالحتهم

ام فرزدق .. وبعدما اتصالحوا قاسم ورائد طلبت من قاسم يبقى
حتى احجي وياه وطلعت عمج فرزدق من الاستقبال
وبقيت اني وياه لوحدنا حتى اخذ راحتي بالحجي
ادري بي يضوج وينحرج من احد يحجي بخصوصياته
كعدته وسألته عنج وكلتله

.. شوف خالة قاسم ما دام انت هيج زعلان زعل ثگيل علىً صاحبك
معناها. اكيد المكرودة مريتك
راحت بالرجلين لان ضمت عليك

قاسم دنك وكللها .. ما اجذب عليج كلبي زعل اضعاف
على مرتي اكثر من على صاحبي

.. ادري بيك مقهور وحقك بس انطيها فرصة
هي بنية يتيمة وما طلعت منها العيبة
صانت وحافظت على بيتك وبنتك وامك وخواتك
وكايمة بواجب صغيركم وجبيركم
كل هذا ما يشفعلها

قاسم كال بقهر
.. حجية هو انا ليش جرحي كبر لان هي
مو اي واحد هي ظهري هي ايدي اليمنى
صعب اتقبل خذلان اقرب الناس الي
وانتي تعرفيني زين ما يحتاج اكلج

.. وليدنا ونعرفك زين ما يحتاج تعلمنا بيك
زين انت شنو فكرك
البنية. شنو البيدها تسويه حتى انت ترضى
كلي شتحطلك وتطيب جرحك

.. خالة مريتي عوفيها علية
هاي حلها يمي اريد اسويلها كرصة اذن
اخليها اتوب طول عمرها تحرم تستهين بية وتضم علية شي

.. هداوي خالة اني اتصلت عليج حتى اكلج اريدج
تصبرين على رجلج وتحتوينه
صدكي هو يحبج ويموت عليج
هذولي همة الرياجيل وعنادهم وكبريائهم وراسهم اليابس

بس وداعتج من تتصالحون ينسى كلشي.
ومن تكعدين تعتبين عليه. وتذكرينه بكلامه وياج
يسألج متفاجيء وناسي كل الكلام الي كاله بحقج
كأنما واحد غيره جان يحجي مو هو
وبعدها ختمنا اتصالنا بتبادل الاخبار وخالة دعتلنا ربي يهدي سرنا اني وقاسم

نهيت الاتصال وية خالة ام فرزدق وگلبي
رجعله الامل
جنت كاعدة بغرفتي باوعت عليها
واجتني فكرة وعيوني لمعت

كمت انفذ خطتي
سمعت صوت قاسم جوة اخذت اسو ونزلت
جوة باوعت عليه كان كلش هاديء
وكأنه شيئاً لم يكن
ولا عبالك جان يم بيت عمو فرزدق
ومتصالح وية رائد

جان وقت عشا وقاسم كال
.. صبولنا عشا انا وعزام

ام قاسم..يا عزام هنا اشو ماادري

قاسم.. حقج متدرين ضاعت عليج من كثر جياته لبيتنا
اكول هذا حتى صار يبات ببيتنا
شنو سالفته

كل يوم بالليل من ابدي اقفل البيبان

الكة واحد نايم عالقنفات مالت الاستقبال
شنوسالفته هذا ما عنده اهل يسألون عليه
لو شنو

ام قاسم تضحك
.. يمة عوف الولد بحاله شتريد منه
هذا هم بيت اهله هسة قابل احنا غربة
بس روح صيحله خلي اسأله عن ابوه شلون صار
اليوم كوثر اتصلت علية وكالت عمها مريض ماله خلك

قاسم .. هسة اصيحه الج منو يكول يعرف بأبوه مريض لو لا
لو شلون صار اذا كاضيها هنا

جانوا خالة وقاسم يحجون وهالة واكفة يمي بالمطبخ الحار وتدردم

.. مكرود يلي ماعندك حظ وبخت
سودة علية عزومي ماكول مذموم
مثل مرته ماعنده حظ بس يحجون عليه

هسة همة شبيهم ضايجين منه. لان حليو وحبوب
من فدوة رحتله ولا يزعل
كتير مهضوم يؤبرني ما اجملو
اباوع عليها واهز بيدي والله مخبلة هاي البنية مو عاقلة

ضحى
مرت الشهور واني حياتي وية ظافر
وجهاله الحمدلله زينة الا شي واحد قاضي على
راحتي والي هو سالفة الحمل

صحيح اني مصارلي هواي من اتزوجت
ظافر بس جنت متزوجة قبله وهم ماكو حمل
واني اصلا سالفة الحمل نقطة ضعفي وكابوسي

واليوم نفس كل مرة نزلت الدورة
يعني ماكو حمل خيبة امل جديدة

جنت صافنة وسمعت صياح ياسر
رحت دخلت عليه لكيته يتعارك وية اخته

على يدة بليستيشن
بالحقيقة اتفقنا اني وابوهم ان نسمحلهم يستخدمون
الالعاب الالكترونية مرتين بالاسبوع

.. ياسر ليش تتعارك وية اختك الصغيرة
.. ماما اخذت اليدة مالتي هذا دوري
متقبل تنطنياها

اقتربت عليهم.. ماما جود انطي اليدة لأخوج
جود بعناد.. ما .. ما انطي اريد العب

باوعت عليها بزعل وكلتلها
.. لعد خلاص اني راح ازاعلج
وهسة راح اسوي كيكة وما اخليج تساعديني

باوعت علية
وكالت.. يالله خلاص هاك اخذ اليدة

اجتي اقتربت علية وكالت
.. ماما انا اسوي الكيكة وانتي تساعديني

باوعت عليها وضحكت شلون كلبت الادوار واستلمت دور القيادة

صدك ابن الوز عوام
وعلى طاري الوز دخل ظافر وشافني احجي وية الجهال
باوع لوجهي وكال
.. شنو جنتي تبجين
ارتبكت ..لا مجنت ابجي
ردت ابدل الموضوع
.. متغدي لو اصبلك غدى

.. متغدي بس مكلتي ليش هيج عيونج حمر

جود.. عيونها حمر لان قبل شوية گاعدة
بالمطبخ لوحدها ودتبجي

ظافر ضيق عيونه وكال
.. ضحى انا رايح للغرفة
تعاي شوية اريد احجي وياج

راح للغرفة واني باوعت للجهال وكلتلهم
.. صيروا عقال بابا هستوة راجع من الشغل تعبان
مو تتوكحون

ياسر مركز يلعب بلاي
هز راسه بالموافقة
وجود جاوبتني ..اي اسير عاقلة

تركتهم ورحت ورة ظافر للغرفة لكيته ديبدل ملابسه
باوع علية واقترب مني وكال
.. شنو شبيج ليش جنتي تبجين

.. شبيك والله ما بية شي
داهمني بسؤاله وكال
.. اليوم اجتج الدورة ؟؟

هزيت راسي بخيبة امل ودنكت
رفع راسي بيده وكال
.. والله عرفت. انتي دائما مزاجج ينگلب بهيج ايام
باباتي انتي ليش ما عندج صبر

ليش تسمحين لهوس الحمل يقضي على تفكيرج
ويسود حياتج
ويتمكن منج. انتي مو رحتي راجعتي عند مروة
وهي فهمتج ان المنشطات الي جنتي تاخذيهم سابقاً

رجعت بأثار سلبية على ضعف عمل المبايض
وانطتج علاج يبدي يقوي المبايض بالتدريج

.. اي انطتني وداخذ منه. وهذا ثالث شهر دا امشي عليه
بس ماكو اي نتيجة

.. استغفري ربج هسة الي يسمعج يكول صارلج ثلاث سنين مو بالاشهر
عمي الله يساعد الناس الي صارلهم سنين ينتظرون الخلفة وصابرين

ثم تعاي انا شاكيلج يوم كايلج اريد طفل
اشو انتي من يمج تكمزين عالخلفة
.. كلامك صحيح والله اني دائماً احمد الله واشكره
على حياتي
بس اني اريد مثل اخواتي
حتى شيماء وراية اتزوجت وهاي المرة الثانية
تحبل ماشاء الله ربي يسهل عليها

اني من شفت هيج كلت معناها اني بية الخلل
والزاد خوفي بالزايد. اخاف اتضرر الرحم
لان هواية جنت اخذ ادوية وعلاجات للحمل قبل
اقترب علية اكثر ولمني بحضنه
.. وداعتج انتي كلش كافي علية صدكيني
ترة الخلفة مو السبب الوحيد لسعادة البشر

والله انا اعرف ازواج كومة ميصير عندهم اطفال
عاشو وية بعضهم طول عمرهم بالحلوة والمرة
وعايشين احلى حياة

هسة عوفج من هذا كله شتسوين بالخلفة وانتي عندج
كومة اشياء تشغل كل وقتج
لاتنسين عندج انا واطفالي وبيتج
وفوكاهم كلهم كليتج
وما بقى شي عالعطلة وتخلص وتبدين سنة ثانية كلية
.الي اريدج تتخرجين منها بتقدير عالي حتى تكملين دراسات

هاي كلها وتفكرين بحمل عمي هو بس انا
بعدال عشر اطفال غمزلي وهو يحجي

رفعت راسي وابتسمت
ظافر كان دائماً يعرف شلون يسحب مني نظرات الخوف ويبدلها بنظرة امل

بسته من حنكه وكلتله
.. حبيبي اليوم اريدك تاخذني اني والجهال نشتري بقلاوة لشومة اختي
ونروح نباركلها عالحمل

.. صار تدللين بس شمعنا بقلاوةً
.. سودة علية مشتهية بقلاوة وحيدر مسافر عنده شغل
وهي تستحي تكول لحماها لان هو الي يتسوكلها
ويشوف احتياجات البيت
ظافر .. صار من عيوني اصيرلج بقلاوة
ابتسمت وكلتله

.. والله احلى بقلاوة
دنك علية وابتسم وكال اي هيج خليني اشوف ضحكتج
وغلف ضحكتي بثغره الباسم وسحب مني كل مخاوفي

هدى
بعد اتصال خالة ام فرزدق

نزلت جوة ولكيت قاسم جوة استغليت انشغاله وية
عزام وخالة
خلصت العشا وخليت هالة تكمل الباقي

بعدها اخذت اسو وصعدت فوك لغرفتنا لان من. سافروا خوات قاسم
اني رجعت انام يم هالة
واليوم هاي هي
وعقدت النية
راح اسعى لحتى اسويله اجواء واكعد اصالحه
واحاول وياه وان شاء الله يحن كلبه ما دامه يحبني
اكيد يلين ويسامحني

عدلت الغرفة وزينتها بأضوية ناعمة
بعدها انتقلت اعدل بروحي
حطيتلي ميك اب فول مواصفات
عبالك طالعة للعرس
ولبست فستان كوكتيل لونه احمر بسيط فتحت شعري ولبست

طوق بي فيونكة صفح حمرة
والحمرة حمرة
واسو بنتي طول ما اني اعدل بالغرفة هي تهوس
وكل شوية مسويتلي مكسورة تخليني اعيط
منا لحد ما انتهيت من تجهيز الغرفة ونفسي
احس ظهري انكسر

وست اسو صايرة توها تخطي فما مصدگة بروحها
فكل شوية تحاول تخطي كم خطوة وتوكع
وهسة هي د تمشي ووكعت على وجها
وكامت تبجي بأخر المطاف
رحت عليها وشلتها جنت هستوني مسبحتها
وملبستها تراك احمر ميكي ماوس

.. يالله حبيبتي كافي لا تبجين تعاي احطلج حمغة (حمرة)
رحت للميز مالت المريا وطلعت حمرة وقربتها على
حلكها اشو هاي سكتت

.. عزةةة هاي من هسة ست اسو درب المكياج
بديت احطلها وهي ساكتة
اني اضحك على شكلها

دخلت علية هالة تصيحني واتفاجئت من
شافت الاجواء
هالة.. هاي شنو حركات وشيسمونة
اليوم اكيد ناوية تجلطين اخوية العزيز

.. لتخافين على اخوج كلبه من حجغ (حجر)
ما يهزه هيج شي

.. اكول هديوة عفية اريدج تعليمني على هاي الحركات والسوالف التعبانة.
حتى اطبقها عالمكرود عزامو

ضحكت وكلتلها .. ان شاء الله
انتي اتزوجي بالاول وبعدين نعلمج
اي صدك هسة هو وينه. استاذ عزامو

.. راح اخذ امي لبيتهم تريد تتطمن على صحة ابوه

جنا نحجي واسو تضحك

هالة باوعتلها متفاجئة
.. هاي شنو حاطة حمرة
لا مو بس هيج ونوب لونها احمر جريء
والله هاي بنتج الله يستر منها تطلع مو هينة

الملعونة اندلت درب المكياج منذ
نعومة اظافرها
اكول هدى عليج الله شوفيها مو صايرة تنطيني شبه

باوعت على اسو صدك جانت تنطي شبه
لعمتها هالة هم هيج عيونها شهل عسليات
وبيضة وشفايفها مليانة وخشمها هماتين
كلش نفس التقاسيم
باوعت لهالة
.. الله يلعنج يا هالة من كد ما مكابلتني وكاعدة بنتي
طلعت تشبهج

ادري انتي شوكت تتزوجين ونرتاح منج
خاف احبل مرة الثانية ويطلع المولود الثاني هم يشبهج

هالة.. شفايتلج لو جهالج يطلعون هيج حلوين مثلي احمدي ربج وشكريه علية

لج خاف اتزوج. وتبقين مكابلة العم حسنين وكاعدة
تالي جهالج يطلعون يشبهونه
بعدين وين تنطين وجهج

ضحكت عليها
.. حتى ما اخوج يطلعني جلاليق من البيت
وعلى طاري اخوها دخل قاسم للغرف وتفاجيء
بوجدنا واجواء الغرفة هالة گبل كالت انطيني اسو
اخذتها مني اتجهت للباب

وطلعت عرفتها ارتبكت من اخوها
وبنفس الوقت اخذت مني اسو حتى ناخذ راحتنا

جان يباوع علية
وكصني كص بعيونه
جان واكف يم الباب المسدود
عبالك خايف خاف يخطي خطوة ويتم افتراسه

ما يلوكله دور الفريسة
لان شكله وطوله يدل هو الوحش بذات نفسه

والله يعيني
سحبت نفس عميق
واقتربت عليه ورفعت راسي اباوع عليه
واجتي عيوني بعيونه

جانت نظراته بيهم لهفة واعجاب واني
اعرف قاسم يكون بهيج مواقف يضعف اتجاهي

قاسم .. شنو هاي شمسوية بنفسج
والمن هاي الهوسة كلها شنوالمناسبة

لزمت كف ايده بحنان وهمست
.. اني ما احتاج مناسبة حتى اقتغب (اقترب) لزوجي.
بس احتاج احاول اصالحك واغيدك (اريد)
تتقبل وجودي يمك واعتذاغي (اعتذاري)

قاسم صدكني كل مغة اغيد (مرة اريد) احجي
بسخايفة منك لان انت متنطيني فغصة (فرصة) حتى احجيلك

دائماً تصدني حقك تزعل علية على الصاغ (الصار) بيك
ما الومك لو شما تسوي
بس كلي شنو اسوي حتى تغضى عني وتغجعلي (ترضى عني وترجعلي)

قاسم سحب ايده من بين ايدية وكال
.. اليوم ام فرزدق اتصلت عليج
بلعت ريكي وجاوبته .. اي اتصلت علية

.. معناها كلتلج شنو صار بيني وبين رائد
.. اي عغفت (عرفت ) انت وياه اتصالحتوا
واني طمعت ان ما دام كلبك حن على صاحبك
ياغيته (يا ريته ) يحن علية

جنت احجي ونظراته على شفايفي من احجي
ابتعد عني وكال
.. متوهمة منو كلج مكانتج بگلبي مثل ما كانت ويرجع يحن عليج

صاحبي ترة شتان بينج وبينه
هذا صاحبي وانتي مرتي ماكو اي وجه للمقارنة
حتى تجربين حظج وياي

صدكيني. تعبين لحد ما يطيب جرحي
ابتعد عني التفت يريد يطلع من الغرفة

شهكت مصدومة من رده وصده البارد الي
لا مستحيل يسوي وياي هشكل
حجيت بكل قهر

.. قاسم اذا طلعت من الغرفة اعتبغ (اعتبر) كلشي الي بينا انتهى
لان اني بعد ماعندي شي اكثر اسوي

جاوبني وهو منطيني ظهره وكال
.. اني عني منتهي من زمان هاي بقت يمج
اذا كنتي لازالتي تعتقدين اكول شي بينا

راح طلع وتركني
بساعتها اتجمع كل غضب العالم بصدري
وصرت مثل المخبله اتحرك بالغرفة

خربت كل فيكة وترتيب سويته بالغرفة
صرت اخرب واغلط وابجي
.. استاهل كل الي يصير بية اني من البداية
استهانيت بنفسي قبل لا استهين بي

لان هواي اتنازلت لهنا ويوصل حدي
دخلت للحمام وغسلت وجهي ومسحت دموعي
بعد ماكو شي اسمه دموع لان ماكو شي يستاهل
ابجي عليه

سحبت نقالي واتصلت على مروة وطلبت منها تجي علية تاخذني.
وهي جاوبتني بدون متسألني ليش وكأنما جانت منتظرتني اتصل

.. خلاص اني دقايق ويمج جهزي نفسج
بيت مروة قريب على بيت عيالي اقل من عشر دقايق بالسيارة

طلعت جنطة وفتحت كنتور اسو واخذتلها
ملابسها واغراضها وسديت الجنطة
ورحت لغرفة هالة
دخلت للغرفة ما لكيت هالة
فتحت الكنتور مالتها الي جانت بي ملابسي
وبديت اطلعهم واحطهم بجنطتي بصورة عشوائية
غلقتها شلون ما جان

وبدلت ملابسي. ولميت شعري الي جان يستهزء مني
لان انخذلت لاكثر من مرة على ايد اقرب شخص الي
خلاص يلعن ابو الحب الي يخليني انتظر

الظاهر اني هواي رخصت من نفسي له
جنت البس بالجبة دخلت هالة للغرفة وبيدها اسو

شافتني وعكدت حواجبها وكالت
.. اسم الله شبيكم شنو صار ذاك رجلج طلع من البيت معصب

وانتي حالتج حالة.
نزلت نظراتها عالجنطة
.. تعاي لج شنو هاي الجنطة لايكون تفكرين
تطلعين زعلانة

.. اي شكو بيها ليش مستغغبة (مستغربة) اطلع زعلانة من ظلم اخوج
الفغوض(المفروض) اصلا انت تستغغبين (تستغربين) بقائي
اني شعندي لحد الان مستحملة. قساوته وبغوده (بروده)
هاي من غيغ اموغ (غير امور ) ثانية تدفعني ابتعد عنه.
بس لان اني بنت اصول واحبه ما غدت (ماردت) اهجم بيتي.
بس لهنا وكافي اني بعد مااكدغ (مااكدر) اكمل وياه

هالة جاوبتني بخوف
.. لا عفية هدى كبري عقلج ولاتتخبلين
على الاقل واحد بيكم يكون صبور مو اثنينكم
تكونون هيج وتعمون على بنتكم

.. حبيبتي وداعتج حاولت وية اخوج وخلص كل صبغي (صبري) وياه.
لزمت الجنطة حتى انزل

لزمتني من ايدي وكالت
.. هسة بس فهميني شنو راح تسوين وين تطلعين بالليل حتى الساعة بالعشرة

.. لتخافين علية اتصلت على اختي مغوة وغاح (مروة وراح)
تجي علية تاخذني
.. يبووو يا هدى شلون تردين تطلعين من البيت
وقاسم وامي مو بالبيت
يعني والله تكبر السالفة وتصير هوسة اذا قاسم يدري بيج طلعتي من البيت بدون علمه

.. عادي شيغيد (شيريد) يسوي خلي يسوي بعد ما يهمني
اصلا اني بكل الاحوال منبوذة. ومغضوب علية
بعد على شنو اسويله حساب

جنا نحجي ودك نقالي وكان المتصل
مروة
رديت عليها كالت وينج اني بالباب نزلي
حتى احجي وية رجلج
كلتلها ما يحتاج محد بالبيت.

سكتت ماجاوبتني وكالت
.. يالله لعد طلعيلي انا واكفة بالباب
سديت النقال و باوعت لهالة

وكلتلها
.. اني طالعة اتغجاج (اترجاج) لا تلزميني
ولا تزيدين همي بكلامج
هالة .. لج هدى صلي النبي واتعوذي من بليس
لتهجمين بيتج

اخذت الجنطة ونزلت بيها وهالة شايلة اسو وتمشي وراية وكلتلها
.. هو بيتي مهجوم من زمان
بس اني جنت اضحك على غوحي (روحي)
واكول عسى ولعل يتصلح الوضع ونغحع (نرجع) مثل الاول

طلعت للباب ومروة نزلت سلمت على هالة واخذت منها اسو
واني حطيت الجنطة بالسيارة وصعدت
ومروة انطتني اسو حطيتها بحظني وهالة تباوع علينا مصفصفة
متأكدة اول ما تسد الباب راح تتصل عليهم
بس اني بعد ما يهمني خلاص اتخذت قراري

مروة صعدت بالسيارة وشغلتها ومشت
ودارت وجها علية وكالت
.. فهميني شنو الصار
بعدها مشكلتج نفسها انتي وقاسم
شنو ما انتهت

.. اي نفسها المشكلة ما انتهت ولا هو كادغ (كادر) ينساها
مروة غمضت عيونها بصبر ووصلنا لبيتهم
الي كان قريب

ودخلت سيارتها للكراج
وسدت الباب دخلنا للبيت وكانت مشمش نايمة والخدامة
وشكلها حتى مروة هم جانت نايمة
لان من نزعت القميص الطويل اتفاجئت جانت لابسة جواه
بجامة منزلية

ابتسمت على منظرها خطية حتى عيونها جانت مبينه مال نعسانه
كالت تعاي نامي انتي وبنتج بغرفة شيماء وباجر نتفاهم.
كلتلها ماكو شي نتفاهم علية قاسم طلعني من حياته
ما يريدني خلاص واني هم وصلت حدي

لزمتني من ايدي واخذتني للمطبخ وكالت
..سويلي كوب كهوة حتى اصحصح لان الظاهر سالفتج مو مال تأجيل
وفهميني شبيكم شنو الي طرأ عليكم وخلاج تنتفضين على زوجج

نزعت الجبة وانطيت اسو لمروة كعدتها عالميز
جانت اسو تباوع مستغربة وجودها هنا تباوع منا ومنا

كعدت احجي لمروة عن كولشي صار بيني وبين قاسم
حطيت كوب الكهوة كدامها

واخذت اسو ومروة بدت تشرب الكهوة وتباوع علية بتفكير
.. شوفي هدى قرارج بالخروج من بيتج يحتاجله
جرئة وقوة إرادة
واذا كنتي نويتي وقررتي فاتمنى تكونين بكد كلامج
وتبقين قوية للاخير مو من اول مواجهة تنسحبين

ما افتهمت مروة شنو جانت تقصد

جنا نحجي اني ومروة وجان يندك الجرس
كمزت من مكاني وكلبي نهض وياي من الخوف
باوعت لشاشة الكاميرة عزة هاي سيارة قاسم وهذا قاسم
يدك بالباب
مروة كامت من مكانها وباوعتلي وكالت
.. اتمنى تكونين قوية بكد كلمتج

لا تطلعين
انا راح اطلع احجي وياه وافهمه

دخل بالكراج اسمعه يكللها
.. مروة روحي صيحي هدى اريد احجي وياها

.. اذا عندك كلام احجي وياي
.. شلون تطلع من البيت وانا ماموجود

.. هدى ما طلعت من البيت بدون علمك
لان انت بنفسك وبتصرفاتك طردتها من حياتك كلها
شنو تنتظر منها يعني حضرتك تبقى خدامة ببيتكم لو شنو

انت فهمتها بأكثر من طريقة
ما تريدها بعد شكو جاي ضايج وتحجي
من طلعت من بيتك ليش شنو الجديد
انت من الاول طاردها من غرفتها
وكلتلها هدى ميخالف صبري عليه لا بد وان يجي يوم
وينسى
بس انت ما نسيت واختي صحيح غلطت بس ما كفرت

قاسم بغضب
.. مروة رجاءاً لا تتدخلين بيني وبين مرتي
ارجوج روحي صيحيلها خلي ترجع وياية للبيت

جان قاسم كولش معصب وكوة لازم نفسه ما يدخل للبيت ويطلعني سحل وياخذني وياه

هسة ما افتهمت اي هو غيرما يريدني بعد شكو جاي وراية

مروة جاوبته بعناد ..شوف قاسم واسمعني زين
هدى طلعت من بيتك زعلانة
يعني مثلك حالها من حالك
مثل ما انت تشوف روحك انظلمت وانجرحت بموقفها وياك
هي هم تشوف نفسها انت ظلمتها وجرحتها
اضعاف جرحها الك على الاقل هي مجانت تقصد تأذيك
كلشي صار خارج عن إرادتها

بس انت جرحتها متعمد تقهرها. خلاص على شنو هاي
الملحمة.الي مسويها هسه
هاي حياة زوجية مو ساحة معركة. وخصم وتصفية حساب وانتقام

يعني الله يحفظك اذا انت ما ناوي تنسى خلاص كل واحد
يروح بطريقه

قاسم جاوبها بنفاذ صبر
.. مروة انتي ليش دتحجين عنها هي وينها
خليها تطلعلي

صاح بصوت عالي
.. هدى طلعي جيبي اسو خلي نرجع للبيت وهناك نحجي

التمست بصوته نبرت تملك مثل الي يخاف يخسر
شي جان ما حاس بقيمته

المشكلة صرت اعرف قاسم اكثر من نفسي للحظة
كلبي رف عليه وهميت اطلع واطمنه

بس ارتديت واتماسكت اذا اتنازلت هسة ورجعت وياه
معناها راح اخسر حقي بالكلام والاعتراض على تصرفاته وقسوته وياية

مروة كلتله بغضب
.. نصي صوتك قاسم شنو الداعي صوتك كولش عالي ومنا الجوارين
ارجع لبيتكم خلي اختي شوية تهديء. وترتاح من الضغط.
وانت هم كولش معصب ما راح تكدر تحل
اموركم بهاي عصبيتك

قاسم .. يعني افهم من كلامج ان هذا قرار هدى
متريد ترجع وياية

.. اي قرارها بذات نفسها

قاسم .. شوفي مروة ترحين تكوليلها اذا ما ترجع وياية
للبيت خلي تدز بنتي اساور
وهي خليها براحتها

شهكت وحطيت ايدي على حلكي احس بكلبي
انعصر من كال ياخذ اسو

جنت شايلتها على صدري
غمضت عيوني ولميت اسو لحضني.
يمة كولشي ولا بنتي شلون ياربي والله القرار صعب
ليش هيج يلزمني من ايدي التوجعني

مروة كلتله .. لحظة انتظر خلي ادخل اشوفها شنو تكول

دخلت مروة للمطبخ وشافتني واكفة ورة الباب

وكالت سمعتي الحجي كله
هزيت راسي بالموافقة
كالت .. شوفي هدى اياني وياج تستلمين حتى لو كان الثمن ياخذ بنتج
ماراح يصير عليها شي لا تنجحين حياة بنتج على حساب حياتج

شوفي اذا ما تسوين حل ودرس لرجلج من هسة اكولج
صدكيني ما راح ترتاحين طول عمرج راح يبقى يستقوى عليج

.. اي بس مغوة يغيد ( مروة يريد ) ياخذ بنتي اسو مني
.. اي وشنو يعني هي هم بنته لتخافين عليها
قابل شراح يصير بيها شي
وداعتج تعيش عنده مدللة اكثر ما جنتي وياها
محد يبقي عجينه بالشمس

غمضت. عيوني ومديت ايديه واني شايلة اسو حتى تاخذها مني وتنطيها لأبوها

مروة دفعت ايدي ورجعت بنتي علية
..لا حبيبتي مو اني الي انطي بنته
اريدج انتي تطلعين. وتحطين عينج. بعينه وتنطينه بنته

اريده يشوف ان هو. ماكدر يكسرج وان انتي بعدج
مصرة خلي يشوف هدى القوية

صدكيني الرجال يحترم المرأءة القوية.
وقاسم من هذا النوع ما يستهوي المرة الضعيفة
وانتي عودتيه دائما انتي قوية
بهواي مواقف

بس مع الاسف من وصل الموضوع للحب
طلعتي اضعف منج ماكو
هواية بينتي ضعفج كدامه وهذا الشي خلاه يستهان

كلام مروة وياي كان له تأثير كبير على مشاعري
سحبت نفس عميق وجاوبتها

.. هاي هي خلاص اني طالعتله وغاح (وراح ) اسلمه بنته بيده
وانطي المقسوم

فتحت الباب
وطلعت للكراج واني شايلة بيدي اسو
هوشافني وانطاني نظرة تجدح نار

اي بس مو اقوى من نار كلبي
وكفت كدامه وسلمته اسو هي شمرت روحها على ابوها
عبالها لعبة. اخذها مني وكال

.. جيبي جنطتج وتعاي هاي اخر مرة اعيد واكولها الج
ماكو بعد اذا طلعت من الباب انا واسو
صدكيني اخليج تحلمين تشوفينا

غمضت عيوني وكلتله
.. عادي اصلا ما استغغب تصغفك ( مااستغرب تصرفك)
قساوتك مو جديدة علية
عادي عندك تشوفني اتلوع علمود فغاك (فراك) بنتي

.. ما دامج رفضتي ترجعين وياية مستحيل اخلي بنتي عندج

كل كلمة منه احس بيها مثل السهم ينبت بگلبي
اتنهدت بألم وهمست بتعب
.. خلاص هاي هي اخذ بنتك يمك
وغبيها تغبية (وربيها تربية ) صالحة احسن مني

لان اني تغبية اثيغ تعغف (تربية اثير تعرف ) وبنته.
خاف تغبيتي (تربيتي ) لبنتي تجيبلك العاغ (العار)
اخذها وغوح (وروح ) منا

وشوف حياتك انت تستحق وحدة غيغي (غيري)
تصون بيتك وتلزم ظهغك (ظهرك ) بغيابك وبوجودك
و تبغ (وتبر ) بأمك وتحب خواتك

واني بالحقيقة اعتغف (اعترف ) فشلت بحياتي وياك
لان غلطت بحقك وانت متعغف (متعرف) تسامح لان اصلا اني
مو مهمة عندك

الله يعوضك بالاحسن مني
اني ما افيدك
صدكني لو شما غاح (راح ) اسوي واقدم ابقى بنت اثيغ (اثير)
وتبقى انت معلك هذا الشي بغكبتي (بركبتي)

انتبهت لقاسم بهت لون وجهه
ولاول مرة اشوف قاسم يفقد الكلام عبالك واحد مضروب على وجهه

اجتي مروة
وصاحتني .. هدى فوتي دخلي جوة اريد احجي وية قاسم كم كلمة

درت وجهي اريد ارجع
سمعت قاسم كال لمروة
..شتريدين مروة اكو شي بعد

تركتهم يحجون ودخلت للبيت

شيماء
مريم اتزوجت وسافرت وية زوجها لشهر عسل بالشمال وهسة همة هناك
ديتونسون جنت بين يوم ويوم اتصل اتطمن عليها

اما مروة
شاغلة بالي كولش هواي خصوصاً اتقدملها
صديق ظافر يريد يتزوجها

كان متزوج وعنده جهال
ويريد يتزوج مرة ثانية لان مرته حسب كلامه مريضة
ومرة شاف مروة وية ابو ياسر
وعاجبته

بس مروة رفضته بدون حتى ما تسمع عنه اي شي
مجرد عرفته يريد يتزوج على مرته
كبل انطته الكارت الاحمر

بالحقيقة هي بعدها عمرها بالثلاثين ودكتورة ناجحة
يعني الحياة بعدها كدامها وتستحق شخص يكون كفو لها

بس هي عيبها دائما تصد الي يقترب منها
وكلما اسألها عن السبب تكلي
اني ما تعبت كل هذا التعب ووصلت لهاي المرحلة
علمود انزل قيمتي واتزوج بهيج طريقة

شيماء انتي غلطانة لو كنتي تعتقدين ان سعادة المرأة تكتمل بوجود الرجل

ليش متكولين شهادتي وطموحي وحريتي.عملي وبنتي وانتوا همة سبب السعادة

تصدكين اذا كلتلج اني عندي هذني الاشياء الي عددتهم
اهم عندي من وجود رجل بجانبي ثقي بالله
الزوج ما يقدم ولا يأخر عندي شي

وعلى طاري الحرية. اني ومشمش راح نسافر الشهر الجاي لايطاليا
ايفاد وية اللجنة الطبية مجموعة اطباء وطبيبات
وحدة منهم الدكتورة. سولاف راح تكون من ضمن المجموعة.
واني هسة دا اجهز نفسي علمود السفر

فأريد منج تتأكدين من الدكتورة البديلة. الي راح تحل مكاني
وترتبين وياها مواعيد المراجعين
مو تنسين تخليها تتطلع على كل فايل يخص المراجعات الحوامل حتى تكون على بينة

جنت صافنة ونقالي بيدي
اريد اتصل على هدى واشوفها شنو سوت
خطية كاسرة خاطري هاي البنية
مروة تكول هدى البارحة جاية زعلانة يمها
واني اليوم منتظرة حيدر اريده ياخذني لها
اشوفها

دخلت سرى باوعت علية وكالت
.. ماما حبيبتي هاي انتي الي شارة سلة الملابس

.. اي اني ليش
.. ماما اني مو كلتلج متشيلين شي ثقيل. يعني انتي ليش ما تسمعين الكلام

ابتسمت على شكلها
وجاوبتها .. يا عمري يا حبيبتي من غير ما تكولين
اني حذرة ودايرة بالي على نفسي
واصلا لوما شفت سلة الغسيل خفيفة جان ما شلتها
وانتظرج منا لحدما تجين تشريها

.. ميخالف ماما حتى لو جنتي تشوفيها خفيفة
تركيها علية

حضنتها .. تدرين اتمنى تجيني بنية
مثلج حتى يصير عندي اثنين بنات حنينات
ابتسمت وعيونها لمعت

سرى
بنية ضحية بلاء مجتمع
المشكلة حيدر انتبهت عليه دائما يحاول يتجنب
هذا الموضوع. وكلما اسأله يكلي
بعدها البنية صغيرة خلينا نأجل الكلام عن موضوعها بوكته
بأختصار حيدر كان يتهرب من المواجهة

هدى
من نمت بالليل كلبي انعصر اول مرة اطلع زعلانه من بيتي فوكاها بدون بنتي
ياربي امتحانك صعب الليل الي يمر على الناس
اني باقية سهرانة بي بس اتگلب افكر ببنتي واريد بيتي عبالك طفلة

كعدت يوم ثاني الصبح متعودة
اكعد لقاسم واريكه اليوم منو يكعده
للشغل اكيد خالة وهالة يقومون بواجبه ما راح يحس بالفرق

للعصر وجان يدك نقالي
قريت اسم خالة ام قاسم ورف كلبي عليها
رديت بكل لهفة
وسلمت عليها
سمعت صوت خالة ام قاسم.احس ردتلي روحي
. ولو انا خالة زعلانة عليج بس
ما ينطيني كلبي ما اتصل واتطمن عليج

.. حقج علية خالة بس صدكيني قاسم صعب وحيغني (حيرني) بزماني

.. ليش اني اخر من يعلم عن مشكلتكم
يعني لو بس جايتني وكايلتلي عن الصار جان كعدت
احجي وياه

.. خالة انتي تعغفين (تعرفين) ابنج كلش زين شلون صعب
لا يخليني احجي لأحد عن مشكلتنا
ولا هو قبل يغحمني (يرحمني)
سد كل الابواب بوجهي وضيق علية الخناق
لحد ما شفت نفسي بعد ما اتحمل اصبغ اكثغ (اصبر اكثر )
تغكت (تركت) البيت وطلعت خليه يغتاح (يرتاح)

.. شوفي خالة اريدج تسمعيني زين
انا اتصلت عليج علمود ابني وراسه اليابس
شوفي خالة انا اعترف ابني عنودي
وراسه يابس وهذا عناده ياما وكعنا بمشاكل وشلع كلبي
بي. واريد اسويله كرصة اذن واتوبه لله
كون اخليه يبطل يعاقب اقرب ناسه
بتعامله
واني اول المتضررين من تصرفاته

.. كولي خالة شلون اساعدج
ولو اني لازم اخغ (اخر) وحدة تفكغين (تفكرين)
تسوي لقاسم كغصة (كرصة ) اذن بيها

ام قاسم جاوبت باصرار
.. لا هو انتي بالذات الي راح تأثرين عليه
تعرفين ليش
.. ليش
.. لان ابني اول مرة بحياته يتنازل ويطلب من احد يتوسطله

.. شلون يعني ما افتهمت المن يتوسط
.. اليوم الصبح على الريوك كلي يمة اليوم حضري روحج
نروح انا وياج لبيت مروة اريد ارجع هدى للبيت

كمت من مكاني ممصدكة كمت اطفر مثل القرد
.. شوكت اليوم بيش الساعة يعني هسة شنو الحك اعدل
نفسي

ام قاسم.. لج هدى شبيج انخبصتي الله يلعن بليسج
طلعتي ملكوفة واضرب من هالة
واني على بالي كلت هاي البنية كفو وراح تجيب
ابني للدرب وتخلي يتوب يعند.
اشو طلعتي منتظرته بفارغ الصبر حتى يجي ويرجعج
للبيت
شوفي خالة صحيح انا اتمنى ترجعين لأبني
ولبيتج. بس بالاول اريد اسويله درس ويعاني
وينشلع كلبه حتى ترجعيله
تعرفين ليش هيج اريدج تسوين
حتى يعرف شلون يكون احساس الرفض والعناد
شيسوي بالطرف المقابل

انا بكلامي وياج اقدم خدمة لحياة ابني
اريده يعرف شلون يحب ويسامح ويغفر
يعيش بدون قيود
ويبطل يستخدم قساوته وية عائلته الي همة اقرب ناسه

همست .. يعني هسة شنو المطلوب مني خالة
.. المطلوب منج ما ترجعين ويانا اني وقاسم اذا اجيناكم
اليوم بيني زعلج وصيري قاسية وعنودية مثله

.. بس خالة والله كلبي ما ينطيني اصده
.. لج ثولة قابل انا الي ينطيني كلبي اشوف ابني متلوع
بس غير علموده
اقسي عليه حتى تصيرله درس وعبرة ويحاول يتحكم بأعصابه
.. خلاص هذا هو خالة غاح (راح ) اسوي كل الي تكولين علية
وكلت امغي (امري) لله هو ينطيني الصبغ (الصبر) من عنده

اكول خالة عفية بس كليلي اسو شلونها وين نامت الباغحة (البارحة)

ونزلت على خالة بالاسئلة عن اسو
اخير شي طكت روحها من عندي وكالت راح اصيحلج
هالة حتى تطمنج عليها
شوفي قبل لا اروح مو تجيبين سيرة عن اتصالي وياج

تمام خالة ما اكول لأحد

.وفعلا اجوي خالة وقاسم بالليل حتى يرجعوني
وقاسم

واخواتي مروة وشيماء وضحى الي صادف جانوا موجودين
كلهم انصدموا من سمعوا ردي بالرفض بالرجوع
وبوكتها قاسم اشتعل وانطفى بناره
يتمنى يسحلني وبنفس الوقت ما يكدر

قاسم.. لج هدى اجيتج بنفسي ودا اكلج انسي الفات
وتعاي رجعي وياي لبيتنا

تكليلي ما ارجع شلون يعني وين تردين توصلين

.. ما اغيد (اريد) اوصل لاي شي بس انت ما جاي تدغك (تدرك)
عظم غلطتك وياية انت استهانيت بية وطعنتني
وعيغتني (وعيرتني) بأبوية واخذت بنتي مني كل هذا وجاي
اليوم بكل ثقة تكلي انسي الفات وتعاي غجعي (رجعي ) لبيتج
عبالك مسويلي فضل

ام قاسم التفتت على ابنها وكالت
.. لا يمة قاسم مو هيج العشم بيك عفو عليك
شلون انطاك كلبك هيج تسوي بأم بيتك

مروة.. تصدكين خالة هدى فاجئتنا بهذا كلامها
احنا خواتها اقرب الناس لها ما كالتلنا هذا الحجي

ولو ادري الوضع بينهم واصل لمرحلة يعيرها بأبونا
جان ما بقيتها لحظة وحدة وياه بالبيت

قاسم .. مروة لحظة سأليها وكليلها شوكت حجيت هاي الكلمة
جاوبته .. ادغي (ادري) حجيتها بساعة غضب
بس هذا ما ينطيك الحق تعيغني (تعيرني) بأبوية

قاسم .. انا هذا عيبي بساعة الغضب احرك الاخضر واليابس
بالحقيقة انا ما جاي احجيلج هذاالكلام حتى تعذريني
لا انا جاي اكلج ان هذا انا وهاي قسمتج الله وكعج
بيد رجال غضب
كام من مكانه وكال

.. يالله يمة كومي بعد ماكو كلام ينحجي الظاهر
الي جنت اتوقعها مني بية واشد بيها الظهر
اليوم صارت من شماتي
بس خلي ببالج لو تموتين ما اطلكج
الا اخليها حسرة بكلبج

شفت نظرة خذلان وغضب بعيون قاسم
تركنا وطلع وكال لخالة
.. يمة انتظرج. بالباب

وخالة كامت من مكانها وسلمت علينا
وطلعت وراه

واني بقيت كاعدة بمكاني جسمي كله يرجف

من قهري من قاسم وعليه

خواتي يباوعون علية
ضحى سالتني متعجبة
.. هدى ليش ما رجعتي وية زوجج

شيماء كالتلي بهدوء
.. شوفي هدى صحيح هو غلطان بحقج
بس يكفي اجة. وجاب امه يريد يصالحج

مروة كالت بتحدي
.. بالحقيقة اني احييها على هذا القرار
لان الاخ بعده ما معترف بغلطته

غطيت وجهي بيدية وبجيت بقهر
ما كدرت اتحمل اكثر
حضنتني شيماء
وصارت تواسني

ضحى شافتني وكامت تبجي وياية
مروة كالت
.. شنو راح تكلبوها علينا فاتحة
بالله شو كومي انتي وياها

جهزوا روحكم نطلع بالسيارة افركم
نغير جو

باوعت على نظرات القلق بعيون خواتي
مسحت دموعي وكلتلها واني اناشغ

.. اااوك. اطلع. وياج .. بس تشتغيلي (تشتريلي) ايس كريم
قوقعة دبل اغيد ابغد (اريد ابرد ) گلبي بيها

ضحى مسحت دموعها وكالت
.. واني هم اريد قوقعة ابرد كلبي
باوعنا عليها .. وانتي شكو بعد شبيج تريدين تبردين كلبج
قابل انتي هم زعلانة

.. لا بس النفسية زفت
مروة.. اهوووو خبال هاي كلما تنزل عليها الدورة
متخبلة علينا.
شيماء.. ما اكول غير الله يساعد ابو ياسر عليج

وبيومها طلعنا واني وخواتي بسيارة مروة
شغلت مسجلة السيارة على اغنية

بسبس ميو
جنا نسمعها ونضحك.

كالت مروة .. هاي الاغنية اهداء لهدى
من تشوف قاسم تصير بزونة اليفة
بس عايزها يكوللها بسبس ميو

قضينا احلى لحظات الي يشوف ضحكتنا
يكول ما عندهم مشاكل ولا هموم.

ورة يومين
اليوم الصبح خالة اتصلت علية
وحسب كلامها تكول
.. قاسم صارله يومين ما يلفي للبيت كام حتى اكل ما ياكل بالبيت

.. يمة سودة علية يعني شلون حتى اكل مكام ياكل بالبيت
وهو يتخبل من اكل البرة شلون بي

ام قاسم.. ما اعرف حتى ما اعرف اسأل منو عليه ويطمني
هسة لو هشام هنا جان على الاقل اعرف
وين يروح ويامن يكعد

.. خالة تدعين (تدرين)احس بنفسي متندمة ليش ما غجعت (رجعت ) وياه
.. كلتلج صبري هو صحيح ما يتواجد بالبيت بس
من يرحع للبيت يظل يحوم بس ما يعترف

ومثل كل يوم اتعلمت اتصل على هالة
حتى اتطمن على اخبار اسو وتدزلي صورها
لان كلبي مفرفح عليها

بس اشو اليوم اتصلت على هالة
ما ردت علية مرة مرتين ثلاثة ماكو

ظل بالي عليهم
بالاخير رجعت اتصلت علية
.. لج عوبة ليش ما تغدين (تردين) على اتصالاتي
هالة بقهر.. سكتي هذا ابن عمي منير منتصر
اليوم راجع من السفر وعرف بالصار بأبوه وبموضوع
المشروع
ورجل منى اتصل على امي كللها اذا اجة قاسم
خلي تلزمه بالبيت وتتصل على عمامه

لان منتصر ناوي عليه الشر
لطمت على صدري بخوف
.. يمة صخام الصخمني
منين طلعلنا هذا منتصغ (منتصر)
.. هو هذا الولد كضة طول عمره سكط
ما يجي من وراه غير المشاكل

.. هسة شلون قاسم وين
.. قاسم هنا وامي كوة لازمته وهو معصب
يريد يفتهم شنو الموضوع لان امي ما كلتله على جية منتصر وتهديده

جنا نحجي اني وهالة شوية وجان اسمع
صوت شهكة هالة
.. عزة بعيني لج هدى هذا منتصر واخوانه
واكفين بالباب.
لج سدي النقال خلي اروح اشوف شنو السالفة

هي دتحجي وجان اسمع صوت رمي

هو اني سمعت صوت الرمي واني اتخبلت دين ما بقى براسي
كمزت من مكاني مثل المخبلة
ورحت اركض مفزوعة ما اعرف شنو سويت

بس كل الي اعرفه قاسم بخطر. راح يصير بي شي
طلعت اركض من البيت خدامة مروة هي ومشمش يباوعون علية

شلون وشوكت وصلت لمنطقة عيالي عقلي فاصل
مكنك فقط على هدف واحد اريد اوصل لبيت عيالي
وكف التكسي يم بابهم
وكع كلبي بين رجلية لكيت لمة رياجيل
وصياح وجان المح قاسم ديتعارك

وية واحد ولازمة من قميصه
وراسه ينزل منه دم
يمة هذولي منو النا منو علينا

عقلي كعد يحلل على السريع وافتهمت من الوجوه الغريبة
ان هذولي كلهم هادين على قاسم

رحت ركض عليهم فاقدة مثل المخبلة

جان قاسم يتلاوة بينهم مبين ولية مال جبناء داروا عليه

سمعت واحد منهم كام يغلط على قاسم ويسب بي
كبل عرفته من الاعداء

من حركة كلبي مكدرت اشوف قاسم لوحده
تلقائياً لكيت روحي ادور على حجار

وهناك وجان توكع عيني على باب بيت جوارينا
جان عندهم بناء. وتل مال حصو
وانا مهروش طاح بكروش
عيد وجاب العباس النا.

صرت اشمر بالحجار من كل حدب وصوب
مال واحد محروك گلبه

انتبهت على سيارات عاليات طبكوا يم باب بيت قاسم
ونزولوا خواله واولاد خواله
هذولة شنو اهل خالة قاسم

عزززززةةة من هؤلاء القوم
واحدهم تكول عبالك عمليق

ستر الله على قاسم وانا اكول قاسم عليمن طالع اثاري الجماعة عندهم وراثة

خرب اشوف واحد من ولد خاله كام يلزم كل
اثنين ويطبكهم راس براس

وقاسم سودة علية. اخذهم فلاحة ملاجة. ساكوا عليهم
واني المراءة العراقية الصامدة
لا زلت مشاركة بالمعركة بكل ما اوتيت من قوة

هو شكو اشو تل الحصو موجود واني ما خسرانة شي
اهم. شي ابرد گلبي بيهم

وبعد العركة وبعد الهوسة وصلوا عمام قاسم
يا صلوات على النبي هذولي وين جانوا نايمين
اشو العركة خلصت وهذولي هستوهم يتحزمون

انتبهت لواحد من هذولي المخانيث
بعده يهد على قاسم ويغلط
شلت حجارة مرتبة

وحجيت بتهديد .. خاااب دتعال انت مو مال احترام
وشمرتها عليه.
احتي بكصته واني اغلط
.. ولك انت اكبغ عاغ (اكبر عار)
لو ما عاغ (عار) جان ما تهد مثل النسوان

حسيت بواحد لزمني حيل من كتفي
من زود الحماوة التفتت حيل عبالي راح انسحل
وجان اشوف قاسم الي جان يباوع علية.

مستغرب
قاسم بغضب .. لج غضب الله عليج هاي انتي من شوكت هنا
وشكاعد تسوين بنص عركة الزلم

همست وعيوني تباوع منا ومنا. انتبهت على مكاني خواله واولادهم دخلو جوة وعمامهم هماتين
بعد ما شحتوا منتصر والكلاب الي مأجرهم وياه

حجيت بصوت ناصي
.. وداعتك من اول حجاغة انشمغت (حجارة انشمرت )
جانت مني سجلت بيها حضوغ (حضور)
اني موجودة هنا من شفتهم ملتمين عليك وانت لوحدك

غمض عيونه وعض ايده وكال
.. ولج جنية تفوتين جوة لا اجرم بيج
والله العظيم العركة كلها بكفة وانتي اشوفج بينهم تكمزين جنج قرد وكلبي وبالي يمج
لا واحد منهم يسويلج شي يضربج
يعني زاد خوفي وفزعي عليج اكثر من خوفي على روحي.

جان يحجي ولازمني من ايدي ودخلني جوة للبيت
واني من اول كلمتين حلوات من قاسم

واني عقلي قفل وفصل عن المعقول
دخلت على خالة والبنات واستغربوا وجودي
ولاول مرة حسيت على مكاني ووجودي الغلط
خوفي على قاسم نساني زعلي

اول ما دخلت وقاسم وراي
وسلمت عليهم كلت لهالة بصوت خجلان
.. ااااا هالة اتصلي على مغوة (مروة)خلي تدزلي السايق يغجعني (يرجعني) للبيت

قاسم اتجه لباب الاستقبال يريد يدخل لعمامه ولخواله
وكال

.. اريد مرة تعتب الباب والله اكسر رجليج
بس صبريلي حسابي وياج بعدين خاي يطلعون واني اعلمج

باوعت للبنات هالة وهديل
.. شفتوا اخوكم ويكلولي ليش تطلعين زعلانة
بعز هي الهوسة والخبصة وهو يحجي علية

بعدها استغليت الفرصة اخذت بنتي اسو
يمة كعدت اشمشم بركبتها
يمة ربي ما يحرمني من عطرج

ورة ساعة اتصلت مروة على خالة
تتطمن علية. اوهو نقالي تركته عالكاونتر بالمطبخ
هسة اكيد متصلة علية

ورة اربع ساعات يالله انحلت المشكلة
خوال قاسم اتحلفوا بمنتصر كون يكسرونه ويخلونه يمشي على عكازات

ماشاء الله عليهم صدك من كال
خواله هواي والشارع يسدونه

والله اول ما شفتهم اتذكرت اغنية
خالي ابن اختك هالمعرض

لليل وجان يجي قاسم يكعد يم امه وصار يحجيلها عن الصار حتى يطمنها
الله يساعد گلبها اليوم خالة شكد اتلوعت
من الخوف على ابنها بس هذا حال الدنيا
ولطالما هو يحجي وياها عينه تصد علية

وبعدما طمن امه وحجالها كلشي
خزرني
وكام من مكانه وصعد فوك

خالة اشرتلي اروح وراه جنت شايلة بنتي اسو
اخذتها وياي وصعدت وراه

دخلت للغرفة لكيته نازع قميصه ومنطيني ظهره
يمة فديت الصقر وراعيه
ياربي شكد مشتاقتله

التفت وباوع علية طلعله
اتراك لبسه وعيونه بعيوني عبالك ديسويلي اغراءات
انتبهت على روحي
بعدني واكفة بالباب مثل الخبلة

دخلت وسديت الباب وحطيت اسو عالسرير
ونزعت الجبة حتى ما انذكر شنو لابسة جواها
لان بالحقيقة من جنت ببيت مروة جنت
متكأبة ونفسيتي زفت ما اهتم بلبسي

عيونه نار وعيوني ثلج
افتربت منه ورفعت نفسي على اطراف رجلية
بدون مقدمات لزمته من صدر التيشرت حتى يقترب علية علمود اوصله وبسته من حنكه

همس .. شنو كاعد تسوين
.. اريد اضمد جروحك وانتبهت هنا اكول كدمة
جنت ااشر بصبعي على حنكه

قرب راسه اكثر علية واشر على شفايفه وكال
وهو بين الزعلان والمشتاق

.. خوية هادي بوسني هنا وياك لان هم حصلت بوكسي
على شفتي

رفعت ايدية وحوطت ركبته
وغلفت شفته بلهفة وشوك

وهو ما صدك عبالك متحلف بية
لزمني وما تركني
بعدها
انتبهنا لوضعنا وكال .. بختج ببنتج جان سويتج تفصيخ
من كد ما متحلف بيج
والله شلعتي كلبي

تصدكين انا اليوم حجيت وية عمو فرزدق حتى يجي وياي لبيت اختج علمود يلين راسج اليابس
علمود ترجعين

كلت هاي اخر محاولة صلح بالعيني والاغاتي
ماكو اذا ما رحعتي ويانا
كلت اخطفها وارجعها سحل للبيت واشوف مرة الي تتجرأ تطلع من بيتها

عيوني تلمع بفرح
رغم جانت كلماته كلها تهديد وتوعد
بس عبالك ديغازلني خرب بالحظ
قاسم گلب كل موازين الغزل وصار
كلشي وياه بالمقلوب

وبيومها نمت بحضنه واسو بيناتنا
جانت عيون قاسم تحجي قبل لسانه وياي

قاسم.. هدى كلامج وياي بذاك اليوم ذبحني
ما جنت متخيل هلكد انتي شايلة بگلبج علية
وساكتة

.. بالعكس اني ما اشيل عليك اني ابلع جرحك الي واتحمل اكول ميخالف هو حبيبي
وبساعة الغضب البشر كولشي يحجي

.. هو بيومها كرهت نفسي. لان ما اهتميت لضعفج ولحاجتج الي

جنت بوكتها اعمى من الغضب ما همني غير شلون
اردلج الصاع صاعين

بس مع الاسف حسيت على نفسي متأخر
من تركتيني ورحتى صحيت على روحي وعرفت
ان انا هواي غلطت بحقج

حطيت ايدي على شفته
.. اشششش كافي خلينا بالمهم وكلي حضرتك وين جنت
تاكل بهاي الايام
وبدة التحقيق الاستخباراتي
وهو طكها ضحكة. وكال
.. والله يا ام اساور ابد ما تضيعين وكت
كله حار بحار

يوم ثاني جان خميس و قررت
ارجع ذكريات ليالي زمان وية قاسم
واليوم سلمت اسو لعمتها هالة

وكلبت الغرفة عالبطانة
صارت عبالك غرفة عروس
نشرة ضوئية. وفيكات وصينية السهرة
كرزات وحلويات وفواكه وبالك عني
واهم شي بدلة الرقص ام الليرات

دزيت رسالة لقاسم وكتبت بيها

.. هلااااااااااااا بالخميس

هاي كانت كلمة السر بيني وبين قاسم
مجرد دقايق وجان الكة استاذ قاسموف
كدامي محمل علاليك للثلاجة الفارغة

حطهم بالكاع وسد الباب وعيونه اكلتني اكل
اجيت شلت علاكة
لزم ايدي وكال بصوت ناصي
.. عوفيها
حجيت بدلع .. حبيبي غير ارتب المسواك

اقترب علية بنفاذ صبر وكال
.. دعوفي. المسواك مو حمستي ابو اصلي
تعاي خلي اشوف شنو شبي اليوم الخميس

غمزتله واني اتمايل كدامه بالكلابية المصرية
لزمت ايده وسحبته وراي

وكعدته على قنفة الشازون
وشغلت الديجي بصوت ناصي على
اغنية مصرية رقصني ياگدع

والحمدلله بعدني جاي اركص مثل فيفي عبدو
ما لحكت اصير مثل فيفي
لان بعدني بأول العرض وما حسيت
الا وهولاكو هجم علية. وصرت اسيرة بين ايديه

قاسم.. دخيل الله شكد ترفة منين ابدي بيج
وكلشي بيج يصيحني ويكلي انا الاول

ابتسمت وكلتله اني الاول والاخير
وبيومها عبالك اتبادلنا عهود الزواج من جديد
وصار يراويني لهفته علية بأكثر من طريقة

وعلى طاري اللهفة والحماس
يوم ثاني صبحت بالمستشفى اتفاجئت بروحي حامل
واحنا جنا ماخذين راحتنا عالاخر

الحمدلله طلعت حامل ومروة تحجي وتخزر بية
عبالك طالبة مدرسة شاردة من سياج المدرسة
وقاسم صاحبي هو هم وجهه احمر.
ونوب فوك هذا كله اتخلصنا من نظرات مروة استلمنا خالة اكس ومربع
خاف مروة جانت مستحية من قاسم. وما حجت شي الا خالة لا ماكو شي اسمه زحمة واراعي مشاعرهم

ام قاسم .. اي ادري ياعيني اذا انتوا حضرتكم مسوين البارحة عرس وانا الفقيرة
اسأل اختك الثولة هالة
اكللها يمة شنو بيت جوارينا عندهم عرس
اشو محد عزمنا ولا احد كال

جنت ماخذة ذنب الجوارين اثاري ابني ومرته
معرسين

من صعدنا فوك قاسم ضحك وكال
.. كلة منج فضحتينا انتي وكلابيتج تفترين علينا
وانا مكرد لا حول ولا قوة ما بيدي شي اسوي

.. هسة نوب طلع الصوج كله بية
وانت الفقير واني العايلة بيك
لعد تمام من اركص ما ادز عليك ابقى لوحدي
اركص

.. انتي جربي ركصي من وراي وشوفي شلون احش رجليج

بعد مرور سنتين
المكان في الامام الكاظم عليه السلام
شيماء
مروة
ضحى
هدى
مريم

جنا كاعدات ملتمات حول شيماء
اليوم ضحى بعد صبر سنتين حللت وطلعت حامل
ومروة عزمتنا عالغدة احنا ازواجنا واطفالنا
ثواب على روح امي وكالت بعد الثواب نروح نزور الامام الكاظم عليه السلام

بعدما صلينا وزرنا

مرقد الامام عليه السلام
ولكل وحدة من عندنا في گلبها رجاء وامل ودعاء
التوسل
لكن الهدف واحد هو شرح الصدور من منبع نفحات
الرحمان لبلوغ الهدوء والسكينة
مهما تمر السنين فللمكان حكاية.

بنفس هذا المكان البي امنا جانت تزور
وتكعد تندعي لكل وحدة بينا ان يسهل امرنا وييسر حياتنا

شيماء
جابت ولد وسمته عباس
مروة بقت نفس ما هي بس برز بحياته واحد من الوفد الطبي. ولحد الان ما نعرف شنو موقع بحياته

ضحى اليوم عرفت بخبر حملها
اما مريومة
فهسة هي بداية مرحلة ثالثة كلية صيدلة
والى الان ماكو حمل كان بأتفاق بينها وبين هشام
ينتضرها تصير مرحلة رابعة ويسون طفل
وهشام حاليا ديبني بيت الهم

ام اني فصار عندي ولد وسميته علي
قاسم كل مرة يذكرني ويكول هاي خيانة
زوجية شمعنا تسمينه علي
خاف اتذكرتي خطيبج علاوي. وحنيتيله

وهالة اتزوجت وجابت بنية
والحمدلله
اما ابونا العزيز
فهسة هو حاليا سافر لتركيا منهزم من جماعة مهرة
لان اتهموه بقتل شاكر
فجانوا يطاردونه بكل مكان

وبيومها لجأ لمروة وكللها طلعيني من العراق
ومروة ساعدته وكلتله راتبك يوصلك هناك لتركيا
ومن عهدها

اي تواصل ما بينا والشي الوحيد الي يدل انه على قيد الحياة هي الحولات الي يستلمها من مروة كل شهر

كاعدات بحضرة الامام
وحدة تباوع للثانية
اني ومروة كلمن اشترت سوار فضة
لبناتنا اسو ومشمش من نفس محل الصايغ
الي جانت امي تشتري منه صحيح الرجال
مات بس ابنه كاعد بمحله
هو اي ثاغ لبناتنا

شيماء ابتسمت وهي تباوع علينا وتكول
خواتي ربي يحفظكم الي.
ويديم لمتنا

🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹 🌹
شعر الختام هدية لقصة صديقتي الكاتبة نهى .... هدى ادمن بيج قصص الكاتبة نهى

شيماء

تمنيتج كون انتي يايمة اليوم ويانا
تشوفين لمتنا تفرحين
تلمين صغارنا بحضنج تشمين
تمسحين على روسهم وتبسبسين
مثل ماجنتي دوم ويانا يحبيبة تسوين

من جنت اجيلج يايمة
وانة شايلة بكلبي هموم
تمسحين على راسي
يطيبلي يل غالية بحضنج النوم

وانتي تبسبسين
وعلى راسي تنفخين
وانا ماخذني الضحك
بس فهميني يحبيبة واشتكوليين

مادريت لمساتج وي بسبستج دوة
تشيل من روحي وگلبي كل الهموم
مشتاگة رويحتي لذيج البسبسه يا يوم

يل جنتي لدنيتي وبوسط گلبي فرحة
مايهمني اذا جار الدهر ولايهمني جرحه
دامني يا يمة بحضنج الدافي انام واصحة
جنت اظنها يل حنينة دايم تدوم
مشتاگة رويحتي لذيج البسبسة يايوم

مشتاكة ناكل سوة من زادج ييمة
تلمينا حولج وانتي الضوة للمة

الزاد من ايدج يايمة شهد (عسل)
كلمن اكل منه يحبيبة شهد (شاهد)
نار فراكج تسعر شلزم شهد (اترك )
اخذتج يا يمة بعيد من عدنا المنيه ..

جينا اليوم لابو الجوادين يايمة وتعنينا
هزينا شباجه
وعلى ذكر اسمج كعدنا و التمينا

سوارتج تراهن دوم يا يمة بل يمين (اليد اليمنى)
ما اخليهن يروحن يسار ولا يمين (جهة اليمين)
ولا افرط بيهن يوم واقسملج يمين (قسم)
وربي على الي كلته شاهد علية

هدى سعد
#Hoda
🌹🌹🌹🌹🌹🌹🌹🌹🌹

تم بعون الله
ارجو قد تمكنت من ايصال القصة بما تحتويه من معاني بين طياتها

اشكر لكم متابعتي بقصتي
واشكر الاخوات
هدى ومروة وشيماء وضحى ومريم
على سعة صدورهم لمشاركتنا بقصتهم
ختامي لكم يا احبتي

احبكم كومة احبكم هواااااااااي

اختكم نهى الحسون