أساور الفضة الفصل الثالث وسبعون 73 - بقلم نهى

مساء الخير عليكم احبتي
اتمنى لكم قراءة ممتعة
مع البارت القبل الاخير

#اساور_الفضة_ج٢
#نهى_الحسون

هدى

جان البيت مخبوص وهشام منتظرنا بالباب
حتى نوصل مريم

واني دايخة بضيمي العلة رهف وين اختفت عبالك
كاعدة ادور على فارة مو بنية كبيرة

عقلي صار يضرب اخماس بأسداس
عبروا من يمي جهال كوثر زيوني وجواد

سألتهم .. حبيبي زيوني خالك قاسم وين

زين.. هستوني شفت خالو قاسم صعد فوك

هو اني سمعت بقاسم فوك واني كمت اكمز
صرت ما. اشوف كدامي
رحت صعدت فوك ومريم تصيح وراي
.. لج هدى وين صاعدة هشام دينتظرنا بالباب

اشرتلها هسة اجي بحركة الصبر
وكملت الدرج لكيت الطابق الفوك فارغ
لان هالة وهديل ميخلون الجهال يصعدون
بس يصير مارثون

رحت كبل لغرفتنا بس قبل لا ادخل
حطيت اذني عالباب اريد اسمع حتى اخذ احتياطاتي

وجان اسمع قاسم يحجي ويضحك ويكول
.. لج من فدوة رحت لضحكتج انا وعشيرتي واحد واحد
سكت بعدها سمعت طكطكة وشوية
وبعدها سمعته طكها ضحكة مرة ثانية
وكال

.. لج دتعاي وين رايحة خليني اشبع منج صارلي كومة
محروم ما ماخذ منج حضن
بعدها انكتم صوته
وصار يحجي بصوت ناصي اعرف هاي الحركة تصير من يدفن راسه بركبتي

يمة وانا الشيطان اتربع براسي وجان افتح الباب بكل قوتي
سويت مداهمة وصرت بنص الغرفة

وجان الكة قاسم هو واسو كاعدين على السرير
وهي تلعب بنقاله وهو يحجي وياها واني. وجهي كام ينطي الوان

وصرت اباوع منا ومنا.
سألني مستغرب .. خير شكو شبيج
اكو واحد يفتح الباب هيج

بلعت ريكي اريد اضيع فشلتي وكلتله
.. ااااا جنت ادوغ (ادور) على بنتي اسو

حطيت ايدي على صدري
.. يمة غاح ( راح ) كلبي خفت لان ما لكيتها جوة
فصعدت فوك ادوغ (ادور) عليها الحمدلله طلعت يمك

باوع على ايدي وكال
.. ديري بالج لا يوكف كبلج

اسو بس شافتني اجتي تنزل من السرير
تريدني اخذها وياية
سحبها عليه ورجع انطاها بوسة بركبتها وهي تدفع بي
منزعجة من لحيته

واكفة اباوع عليه شلون يبوس بنته
جريت حسرة اريد ابجي
واني كلبي معطب من نار الفراق
ياربي والله اشتاقيت لحضنه

رفع راسه وباوع علية وصارت عيوني بعيونه
انتبهت لوكفتي ونظراتي كانت مفوضحة
هزيت راسي. ودرت وجهي ورحت للباب اريد اطلع

سمعت صوت اسو كامت تبجي لان ردت اطلع
سمعته كال
.. تعاي اخذيها وياج

التفتت .. لا لا بقيها يمك اني غايحة (رايحة ) اوصل مغيم (مريم) اختي
وية هشام.

.. دتعاي اخذيها وياج هي بس تكعد بالسيارة كولشي متسوي
.. عمي انطيني اياها امغي (امري) لله بعدين تسويها علية
ملاك وماكو افقغ (افقر) منها.
وهي اوكح منها ماكو

جنت احجي واني اقترب عليهم مديت ايدي واخذتها منه
ما اعرف شلون ايدي لمست كف ايده

رجف كل جسمي على لمسته
هي جانت مجرد لمسة يعني يمكن لو بالايام العادية هاي اللمسة ما راح اتأثر بيها
. مثل هسة يمكن لان متفاركين صارلنا هواي

اخذت اسو ونزلت جوة
وجان اشوف الكابوس الاسود ست كهف كاعدة جوة يم البنات

عمة حتى عمة هاي وين جانت
الله يلعنج يا رهف شوكت ارتاح منج
لكيت مريم منتظرتني يم الدرج وكالت

.. يالله ياعيني
..اي هياتني اجيت بس غدت (ردت ) اجيب اسو خاف تبجي علية
.. اي مو هشام صارله ساعة ملطوع بالباب منتظر

باوعت عليها واحنا دنطلع للباب
.. وانتي شبيج حبيبتي هيج خابصة الدنيا وشنو خليه منتظغ (منتظر)
شكو عليه

.. اي يعني الا ينخطف مرة ثانية يالله ترتاحين

ضحكت على مخاوفها
.. خغب يومج مغيم صاغت (خرب يومج مريم صارت )
بيج خوفة

وصلنا مريم وهشام كل شوية يحجي على اسو
.. على كيفك عيني وية بنتي هسة الي يسمعك.
يكول كاطعة عليك ليلة عغسك (عرسك)

هشام جاوبني بضحك
.. هي هاي العايزة حتى اشوتها هي وابوها من السطح

ورة يومين اجوي خوات قاسم همة وجهالهم من السفر
والبيت ما شاء الله انملى

اباوع لخالة ام قاسم كل يوم تطكطك حرمل وملح وتقرة المعوذات
تحصن بيتها وتنشر بأية الكرسي على اركان البيت

فرحانة دتجهز على عرس هشام
وما بقى شي عليه

وبيوم وصول البنات هالة اجتي وسألتني
.. حبيبتي هدوش بما ان خواتي فاطمة وسرور شرفوا
همة وجهالهم فاليوم تلمين غراضج انتي وبنتج
وتنقلعون من غرفتي وترجعين لعرفتج
لان سرور وفاطمة متعودين كلما يجون لبيتنا يعسكرون بغرفتي

اوف هاي شلون راح ادبرها
شنو اكول لاستاذ قاسموف
هسة عباله ادور حجج حتى ادخل للغرفة يمه خرب بالحظ

وصدك خلص اليوم وصار الليل كلشي ما فتهمت منه بس خبصة

صعدت فوك قبل لا يصعد قاسم
واخذتلي فراش وفرشته بالكاع

جانت اسو نايمة واني هسة بدت عيوني تغفل وانام
دخل قاسم فتح الضوة
جمد بمكانه وعكد حواجبه باوعت عليه بكل لهفة
عيوني فضحتني

كال
..هاي شنو شتسوين هنا
جاوبته بحيرة
.. اجيت هنا لان خواتك فاطمة وسرور همة وجهالهم
ناموا بغرفة هالة وماكوا مكان
كلت ارجع لغرفتي مؤقتا
افرش وانام بالكاع لتخاف ما راح اخليك تحس علية

.. يعني هسة تردين تقنعيني بيت شكده وشكبره
ما بي مكان تنامين بي الا هنا

باوع علية وكال
معقولة اشتياقج لقاسم هو الي جابج لهنا
الظاهر حنيتي لحضني وما كدرتي تصبرين على فراكي

غمضت عيوني بألم
يعرف بية هو نقطة ضعفي وصدك نظراتي له جانت كلها مفضوحة جاوبته بغيض

.. ما انكغ (ماانكر) واكول ما مشتاقة لحضنك
صدكني كل جزء بجسمي وبگلبي يحن الك.

اعتغف (اعترف) اي اني احب ابو بيتي
واغيد (واريد ) حضنه هو بيتي وهو اماني

لا عبالك. انذليت من اعتغفت (اعترفت) بأشتياقي وبمعزتك بگلبي
خلي ببالك بين المغة (المرة ) وزوجها ابد ما بينهم كرامة

بالعكس اعتغافي (اعترافي ) بلهفتي الك
يثبت اني اقوى منك على الاقل اكول الي بداخلي
بلهفتي وشوگي الك
وما اتصنع اللامبالاة واعاند نفسي وااذي كل الاحبهم
علمود انتقم منهم لان غلطوا بحقي

غمض عيونه واخذ نفس عميق
وكال بنفاذ صبر
.. هدى الظاهر لحد الان ما تعرفين
عظم وكبر حجم غلطتج وياية

سكوتج عن خبر خطوبتج من رائد جان كفيل
بأنكماش كلبي وغلق بابه بوجه حبج ويصد عنج
بعدما انخذل

وثقي بالله السالفة مو قصة اريد انتقم منج
بس عزت نفسي مقيدتني بسلاسلها
ما تسمحلي ارجع مثل قبل واعيش وياج وكأن شيئاً لم يكن
صدكيني ما اكدر اتغاضى عن الصار

كلما اتذكر كلامي وياج عن حب حياة رائد.
وانتي تسمعيني بكل صلافة
احس بالاهانة لان استهانيتي بية
انا مو عتبي على خطوبتج من رائد
قبل زواجنا
هذا الشي مو هو سبب مشكتلي وياج

اني سبب غضبي هو كتمانج للموضوع
كان مثل الغدر بحقي

لج هدى انتي متعرفين شنو يصير بية من
اتذكر كلامي وية رائد بخصوص
حياتي وياج افور من القهر

اتعودنا انا ورائد واحدنا يحجي للثاني عن حياته
هو متعود يحجيلي عن حياته الزوجية
وانا بالمقابل جنت اسولفله
عن حياتي وياج مثل المغفل

القاهرني بهذا كله انتوا اثنينكم جنتوا تتصرفون كدامي عبالك محد يعرف الثاني

صرت كلما اكعد وية نفسي واراجع مواقفي وية رائد
واتذكر كلامي وياه يزيد كرهي الج

تدرين ليش
لان جان بأمكانج تجنبيني كل هاي الاحراجات
والاحساس الحقير الي كاعد احسه واعيشه

اااااااخ كمت اشوف بكل موقف الي وية رائد خيانة بحقي
لج انا لحد ذاك اليوم انا وياه اختارينا هدية ولادتج

يعني حتى لو جانت نية رائد. صافية بوكتها
المشكلة بعقلي ما يكدر يتقبل الموضوع براحبة. صدر

قاسم جان يحجي واني فاتحة عيوني اتابع الكلمات الي تنطقها شفايفه
واحس وية كل كلمة ينطقها افقد الامل
واباوع لحياتي شلون دتتهدم كدام عيوني

همست بخوف
.. يعني افتهم من كلامك اني بعد مالي مكان بحياتك
يعني هاي هي خلاص افقد الامل بالغجوع (بالرجوع ) لحياتك
او نغجع (نرجع) مثل قبل لحياتنا الاولية

همس وهو يفرك وجهه ويطلع برة الغرفة وكال
.. ما اعرف انتي وحظج
وما اوعدج بأي شي

لان المشاعر مو دكمة وتنداس وينسي كلشي
انا هذا عيب گلبي اذا صد
يصد صعب يرجع واعترف انا قاسي

صدكيني لو جنت املك السيطرة على مشاعر گلبي
جان كدرت اغير
هواي امور. بحياتي واتجاوزت هواي هفوات بالماضي
وجان صارت حياتي اكثر سهولة وجان گلبي عاش بسلام

دار وجهه واتجه للباب بعدما اخذله مخدة وبطانية وكال
.. انا نازل انام جوة بالاستقبال
خاف تسألج امي عني ليش نايم جوة
كليليها اسو البارحة كله ما نامت وقاسم جان تعبان
ومحتاج ينام لذلك نزل جوة نام بالاستقبال

طلع قاسم وعافلي الغرفة بكبرها واني
انهاريت بالبجي وبعدما عرفت
شنو شعور قاسم اتجاه رائد

بلحضتها عرفت ان قساوة قاسم ..عزت نفسه وعناده
الهم دور كبير في انهاء هواية علاقات بحياته

هي نفسها قساوته الي نهت علاقته وية رهف بنت عمه
وحب سنين ووعود بالزواج
بهفوة وحدة منها كانت كفيلة بنفيها من كلبه وطردها
من حياته بدون ما يرفله اي جفن

وهي نفسها عزت نفسه الي كانت لها اليد
بأبتعاد. قاسم وخروجه من حياة اهله لان
ابوه استهان بي وجرح كرامته

وبسبب عناده. تركهم وطلع من حياتهم حتى يبني له
حياة خاصة لوحده ويثبت نفسه لأبوه

نهض كلبي من الخوف
من اتذكرت كلام هالة ببكاء وتوسل امه حتى يرجع
واتصالات ابوه المتكررة الي تطلب منه
ينسى كلشي ويرجع وياه

المصيبة رغم هذا كله. قاسم ما اتنازل وبقى معند
واخر شي موقفه وية بيت عمامه
يثبتلي ان قاسم صعب النسيان والتسامح

بس رغم هذا كله
كانوا كلهم اهون من مصيبتي
لان كل واحد بيهم صحيح قاسم طلعهم من حياته
بس على الاقل جان لكل واحد منهم حضن يلجأ له
وينسيه فراق قاسم

الا اني مالي احد من بعده
لان هو حبيبي وابو بيبتي وهو امي وابوية واخوية وكلشي حلو بدينيتي
ما اتخيل اعيش من دونه
تالي نمت واني ابجي واندب حظي العاثر

وخلص الاسبوع واليوم عرس هشام ومريم
وجان عرسهم يجنن كلش حلو وكلنا انجمعنا بي اني وخواتي
ما قصرنا وية مريم
وبيومها طلعت مريم ببدلة العرس البيضة
جنها اميرة
حبيبي جانت كولش فرحانة شيماء باركت لمريم وحجت
بصوت ثابت وكالت

يمة ان شاء الله بلغت ووفيت الامانة وصنتها
اليوم عرس اصغر ثمرة من ثمارج
اليوم تروح لبيت رجلها
ادعيلها يايمة عند ربي يوفقها ويستر عليها

كلمات شيماء لامست قلوبنا خطية شومة جانت
شايلة همنا من الصغر وتعتبرنا امانة بركبتها
ربي فرحها وسهل حياتها مثلما سهلت علينا حياتنا

وقاسم هو الي زف هشام وخالة ام قاسم
سوت احلى عرس خلت الناس كلها تسولف
تكول ما اريد اقصر وية ابني.

واني لبست فستان اسود قصير بي حزام ذهبي
عريض عالخصر. وحذاء كعب عالي لونه ذهبي
جنا كلنا مجتمعين بالقاعة.
واغاني الديجي عالكة الجو علك

واسو تبجي لان خايفة من الاصوات العالية
وبقيت متورطة ما اكدر اسوي اي شي حتى ما كدرت اركص
بس الحمدلله مشمش بنت مروة اخذت مكاني
بساحة الرقص
ومريومة كامت ركصت وية صديقاتها وجانت
كولش منطلقة

جنت واكفة يم مروة وشيماء وضحى
شيماء .. ربي يسعدها
مروة .. اللهم امين
ضحى.. مريومة جنها فراشة
حجيت.. تتذكرون من اخذتها مروة من بيت عمو
امجد وجنان شلون جانت خايفة ومتقوقعة على نفسها

مروة.. بس مريم الجديدة اتغيرت هواي
ونجحت بحياتها وبمدرستها وكدرت تجتاز خوفها
وتنتصر عليه

باوعت لمروة ولشيماء وكلتلهم .. طبعاً تنجح وتصير قوية
لان عندها خوات جواهر مثلكم وكفوا وياها وسندوها

جنا نحجي وفجاءة سمعنا صوت منظمة الديجي
تعلن عن دخول العريس
انتبهت لمنى وهالة اخذوا ام قاسم للكوشة مالت العروس
وهي تباوع عليهن مستغربة

ام قاسم .. شكو شبيكم
وين تردون تاخذوني

منى.. انتي تعاي ويانة وبعدين نكلج شنو الموضوع

اني لبست الجبة الاسلامية والشال
لحظات وخفتت اضواء القاعة
وانفتح باب القاعة وجان يدخل هشام وقاسم
من الباب على اغنية (ست الحبايب )

جان هشام وقاسم لابسين نفس لون القوط لون كحلي
هشام شايل بيده باقة ورد
وقاسم شايل بيده علبة حمرة

كمت من مكاني اباوع عليهم متفاجئة
جان منظرهم يجنن
انتبهت لخالة ام قاسم بقت واكفة بمكانها. تباوع عليهم وهي تبجي

وفاطمة وسرور وكوثر وهديل وهالة ومنى
صعدوا عالستيج ووكفوا يم امهم

والمصورة جانت تصور دخول قاسم وهشام
لحد ما وصلوا وصعدوا عالستيج هشام قدملها باقة الورد وحضن خالة
وقاسم فتح العلبة. ولبسها كلادة ذهب
ولمها لحضنه وباس راسها

بعدها هشام باوع لقاسم واثنينهم ركعوا ونزلو باسوا
رجلين خالة

سمعت اصوات صفير وتصفيق بنات خالاتهم وخوالهم
طبعاً هذولي الحزب المناصر

التفتت من حولي وباوعت لخواتي
لكيتهم يباوعون و ديبجون عبالي بس اني دابجي
اثاري الكل متأثرين وديبجون

لكن مفاجئتي كانت بمروة
لاول مرة اشوف دموعها
جانت تباوع عليهم وتبجي

رجعت اباوع لخالة دنكت على ولدها وكومتهم من الكاع
وحضنتهم وهي تدعيلهم وتنشر عليهم من العين

وبعدها اجتمعوا كل خوات قاسم عالستيج
حول ام قاسم والمصورة كعدت ترتب وكفتهم
حتى تصورهم

كمت التفت منا ومنا
اباوع لعيون البنات اكلو قاسم بنظراتهن
واني من حركة گلبي
رحت صحت لزيوني انطيته اسو حتى ياخذها لابوها
حتى يشيلها ويصور وياها
شنو الاستاذ اشو ماخذ راحته كلش عبالك عزابي
ما متزوج

اباوع عليه جان يضحك متونس واني افور من الغيض والغيرة
جان حاضن خواته بذراعه وياخذ صور وياهن

زيوني جان شايل اسو بالكوة لان اسوة دبدوبة

وقاسم بس شاف اسو ابتسم واخذها من زيوني ورفعها ليفوك وباسها

جانوا الكل مجتمعين عالكوشة مريم وهشام كاعدين
وخالة كاعدة بينهم وهالة وهديل ومنى وكوثر
وسرور وفاطمة واكفات وقاسم شايل بنته وواكف بنصهن

جانوا كلهم موجودين خنكتني العبرة لان اني مو. وياهم دنكت مقهورة
وعيوني غركت بالدموع حسيت بروحي منبوذة ومالي مكان بينهم

التفتت اريد ابعد نظراتي عنهم ما اريد احد يحس علية
بس حظي الاغبر خلة عيوني توكع بعيون. شماتي

رهف باوعت علية ورفعت حاجبها وضحكت بتشفي
وكأنما دتكولي مالج. مكان بينهم

اجيت اصرخ من القهر
غمضت عيوني ورجعت باوعت على قاسم

انتبهت عليه اشر للمصورة تتوقف عن التصوير مؤقتاً

وجان اشوف نظرات عيونه تدور بالقاعة
منا ومنا.
سلط نظرته علية وابتسم

اتسعت عيوني من اجتي عينه بعيوني واشرلي
بحركة تعالي
اشرت على نفسي ممصدكة
.. شنو اني

هز راسه بالموافقة
ضحى ضربتني برجلها من جوة الميز
.. لج ثولة ديكولج تعالي. قابل ديصيحني الي

كمت من مكاني وكلبي يريد يوكف من الفرحة
عدلت لبس شالي
ورحت مشيت اتجاه الكوشة

وعيوني بعيونه. اباوع عليه كصني من فوك ليجوة
نزلت نظرات عيونه و اتسعت وخزرني

دنكت وباوعت على سبب تعجب نظرات قاسم وجان اشوف الجبة ممدكمتها كولها
والسيقان طالعة لفيت الجبة على رجلية وغطيت السيقان

همزين الحمدلله هشام جان ملتهي وية مريومة
وصعدت والبنات سولي
مجال بصف قاسم رفع ذراعه
وحوط كتفي وهو شايل اسو

وكعدت المصورة تاخذ هواي لقطات
وهالة كالت لقاسم اخذولكم صورة لوحدكم
انت وهدى واسو

رفع راسه واشر للمصورة تجي تاخذلنا صور لوحدنا
البنات نزلوا من الكوشة وبقيت اني وقاسم واسو
على صفحة اخذتلنا لقطات كومة

وباوعت بطرف عيني على مكان رهف
لكيتها تباوع بغيرة وعيونها تريد تطلع من مكانها

بالعناد ميلت نفسي على قاسم وحطيت كف ايدي على صدره
وهو دنك راسه وشاورني وكال
.. هسة ترحين تدكمين الجبة لا والله اكسرلج رجليج

ابتسمت عبالك جان يغازلني
همست واني رافعة راسي اباوع عليه بولع
.. صاغ (صار) من عيوني

الي يشوف شكلنا يكول هنيا لها شوف شلون هذا ديغازلها
بس همة ما يدرون.
ان اخر ما يخطر على بال قاسم يقترب مني

رغم دوره كدام الناس بس لمحت بنظراته البرود
الي محد يكدر يشوفه غيري بس اني

وبيومها خلص عرس هشام ومريم وزفيناهم للفندق
وبعدها كلمن رجع لبيته واني بيومها
جنت اتكلب اريد زوجي يرجعلي

بالحقيقة طول الاسبوع الفات اني انشغلت عنه
بتجهز عرس هشام ومريم

بحيث مالحكت افتقد وجود قاسم
لان من التعب اول ما احط راسي على المخدة كبل انام

وورة زواج هشام ومريم
بدينا نرجع نرتب البيت بعدما انخبص واتهوس
منا خوات قاسم كلهم موجودات ومنا جهالهم ماشاء الله
حبابين ما يحبون يهوسون

لكيت هالة معصبة دخلت للمطبخ واني دا انظف وياها
سألتها
.. ها خيغ (خير) شبيج معصبة
.. بعد شبية اكو غير شياطين خواتي
هسة كون يكومون يصيحون على جهالهم ماكو
بس من ينضرب واحد منهم يجوني يركضون
ويصير هو وبس
ويطلع هو الكادود مال العائلة

.. خطية اتحملي لخاطغ (لخاطر) خواتج مو كل يوم همة عدنا
.. اي مو حقج متعرفين شسوو بية

.. شنو شسوو بيج
.. غير حظي الحلو طلعت وراهم للكراج بالماسحة
وحالتي حالة اتوعدلهم واتحلف بيهم

وجان اشوف كدامي عزام فاتح حلكه مصدوم
بية. او بالاحرى اتحققت مخاوفه.

عزام .. هاي شنو لاتكولين ناوية تضربين الجهال
بالماسحة
ابتسمت بوجهه من الفشلة وكلتله
.. ها لا جنت اريد اغسل الكراج وهاي الماسحة مو علمود الجهال
هاي علمود اريد امسح الكراج

اريدهم يدخلون جوة للبيت حتى ما يدوسون الكاع
وهو باوعلي بشك شكله ما مقتنع

عزام.. هالة اياني وياج اشوفج تضربين طفل
صديكيني ازعل

هالة عزة كلشي ولا زعل العزيز
.. لا ياعيني جعل ايدي الكسر ان شاء الله اذا مديتها على جاهل
.. اسم الله على ايدج ان شاء الله الي يكرهج

كمل كلامه وهو يباوع منا منا
واقترب علية
.. على فكرة نسيت اكلج البارحة طالعة تجننين
خرب خو الحذاء الكعب ياكل ويشرب على رجلج
طير عقلي اجيت انجلط من شفتج لابسته

واتذكرت حذائي الي انطيتج اياها مرة وضربتي بي عزام بيوم العركة
وضحكت وكلتله

.. عزام على فكرة ترة هذا الحذاء الي انضربت بي بيوم العركة.
هاي المخبلة هدى لبسته مني بيومها

عزام حك راسه وهو يتذكر ويضحك وكال
.. الله يلعن بيلسج واشوف روحي حبيت الحذاء
اثاري طلع حذائج

.. ادري شنو السالفة ماكو غيرج ينظف بهذا البيت
اشو من شفتج وشفتيني كله انتي تنظفين

رمشت بعيوني
جنت لازم الماسحة وشكلي جان تحفة
وهمست واني اضحك
.. شسوي هذا حظي والله مرات اشك اني مو بنتهم

وكعدت ادك اليتيمة يمه واتشكى من الشغل
عزام واكف يمي وكال

.. تردين اساعدج انتي تغسلين الطارمة وانا ومسح وراج بالماسحة
جان يحجي وعيونه تلمع بجرئة

ابتسمت وهمست
.. اي عيني حتى انت تاخذ راحتك
بالمنظر وتكعد تبصبص بعيونك الزايغة

جنا مندمجين وجان نسمع صوت ام قاسم صاحت علية بغضب

.. لج هاااااااااااااالة علللللللللللللة وين صرتي
والله هاي البنية راح تموتني ناقصة عمر

كمزنا اني وعزام على صوتها
جنت لازمة الماسحة بيدي
و اباوع لعزام. بلهفة جاوبتها وعيوني بعيونه

.. حااااااااااظر يا مرات ابوية. انا گاية اهووو
متعصبيش

عزام طكها ضحكة وكال
.. والله انتي كارثة

هالة تحجي واني اضحك
وكلتلها .. والله صارت بيها حذاء وخدامة وتنظيف ومظلومة ومرت ابو
لايكون حاسبة نفسج سندريلا وهو الامير

.. اي عيني وسندريلا بشنو احسن مني
اشو كل المواصفات تنطبق علية

.. الله يلعن ابو شكلج
ما اشوف من هاي المواصفات كلها غير بس الحذاء
اما الباقي ماكو هي شمال وانتي جنوب
اشو انتي ماكلة الناس بلسانج حاصل فاصل
وسندريلا جانت مكرودة اربعة وعشرين ساعة مرت ابوها تدمغ على راسها
بعد منين اجتج تشبهينها

هالة .. شبيج عوبة هاي سندريلا مال الفين وخشبة
هسة مسويلها تحديثات
وطلعت بصورتي

يالله حبيبتي هدو خلي نكمل شغلنا حتى تحفيلي

.. يبووو همزين ذكغتيني (ذكرتيني) بالشغل
مغيم (مريم) طلبت مني احظغ (احظر) جنطتها

هالة تهز بيدها .. تهي بهي والله عمي خوش
احنا نلهط ونتعب ننظف اثار هوسة وخبصة عرسهم
وهمة يسافرون شهر العسل للشمال

دخلت فاطمة علينا للمطبخ وكالت
.. صدك جذب بنات هشام ومريم راح يوصلون عالغدة ووراهم سفر وانتوا
كاعدات تدكون سوالف كولشي ممسويات

عززة اجتنا فاطمة جنها عتريس خلتنا اني وهالة وحدة تدعم بالثانية

وصلوا هشام ومريم
وخالة والبنات استقبلوهم بالهلاهل
والفرح
اباوع لمريم جان وجهة احمر
جانوا كاعدين بالهول هي وهشام والكل مجتمعين

اجة زيوني لكوثر وكللها
.. ماما اريد اتزوج. مثل خالو هشام
كوثر جاوبته وهي تضحك
.. لك ملعون بعدك بكد الفصمة وتريد تتزوج

جواد.. اي ماما صدك زوجيه
كلها اتزوجت خالو هشام اتزوج وعمو عزام راح يتزوج خطية بقى بس زيوني

هالة .. يالله هاج استلمي ويكلي استاذ عزام لا تعاقبينهم خطية هذولي ملائكة اطفال صغار

ام قاسم.. ولك زوين كون الله يكتبلي عمر واحضر عرسك
الا اطش جكليت بيوم عرسك بالشارع

همة جانوا يضحون وانتبهت لنظرات مريم المحرجة من اسئلة البنات
اقتربت عليها وكلت
.. مغيومة بالله تعاي صعدي وياي فوك
حتى تجيكين جنطكم مالت السفغ (السفر)

استأذنت منهم و
وصعدنا اني وياها فوك
لغرفتهم الجديدة الي خالة. جهزتها ورتبتها

واول ما دخلنا للغرفة وسديت الباب
كبل سألتها.. مغيومة طمنيني شنو كملتوا
الباغحة (البارحة)

كعدت عالسرير ووجهة كام ينطي الوان وكالت
.. هدى عيب شنو هاي الاسئلة.
.. لج ثولة اغيد (اريد) اتطمن عليج اغيد اعغف (اريد اعرف
خو ما متأذية حتى اعلمج تهتمين بنفسج
هاي الاشياء ما بيها عيب بين الخوات

ابتسمت وكالت .. اي البارحة تم كولشي
لان هشام جان كولش مستعجل بس الحمدلله
ما اذاني من اقترب مني وطول خلكه وياي
وخلاني على راحتي. لحدما اني بديت اتقبله

.. الحمدلله

وبعدها كعدت اعلم مريم شلون تهتهم بصحتها
جنا نحجي وطلعنا الجنط هي جانت محظرة جنطة السفر اني بس اتأكدت منها خاف ناقصها شي

دخل علينا هشام وكال
.. وين خطفتي مريتي
.. عيني لتخاف ما غاح (راح ) ناكلها بس غدت ( ردت )اتأكد من تجهيز
جنطتها

هشام.. يالله رحمة الله من زار وخفف
مريم شهكت وكالت.. هشام عيب تحجي وية اختي هشكل

برطمت شفايفي وكلت
.. لا عيني عوفي اني اتعودت
على استاذ هشام صحبته لركبته
الله يرحم ايام زمان شكد جنت عزيزة والمفضلة عنده
بس اثاري الناس كلها مصالح

هشام.. اهوووو صارتلي هالة الثانية
تركتهم وطلعت وسديت الباب وراي

سمعته يكللها
.. خلي ناخذلنا شوط ثاني قبل الغدة

ابتسمت واني انزل وادعيلهم ربي يتمم عليهم

للظهر
سافروا هشام ومريم

وخالة اخذت فاطمة وسرور وجهالهم
لبيت خوالهم عازمين البنات على العشا
اني وهالة بقينا بالبيت
واني وهالة استغلينا الفرصة
وسوينا حملة عالبيت لان بقى عالنص

اجة قاسم وبقيت اسو عنده
باوع علية جنت لابسة اتراك برمودة لونه بنفسجي
جانت بس نظرات عيونه تحجي اما تصرفاته وياي فكانت تختلف جذريا

وبدينا ننظف اني بلشت بالحمام الجوة وبديت اغسل
السيراميك بكلور وزاهي صادف
جان الجو حار وصار جو الحمام يخنك
جنت اجلي بالسيراميك

وحارة حست ضاق النفس بصدري واختنكت من ريحة الكلور القاصر جانت ريحته كلش قوية وكع السطل من ايدية وصدر منه صوت عالي
ما حسيت الا واني مغمي علية بالحمام

بعد فترة حسيت على ايدين اثنين تدلك بصدري
فتحت عيوني
لكيت هالة كاعدة يمي عالقنفة مالت الهول
وقاسم شايل اسو ويحوم فوك راسنا

اول مفتحت عيوني قاسم سألني
.. ها شلون صرتي
جانت بعيونه نظرات قلق

همست حتى اطمنه ما يهلي اشوفه خايف
.. لا اني زينة الحمدلله
بس يمكن اختنكت من ريحة الكلور

قاسم بغضب
.. عوفي الزفت ادري عفية تنظيف ما يخلص

انطة اسو لهالة وطلع من البيت
جان كلش معصب

لليل رجعت خالة والبنات
واجوي عمام قاسم محمد وحسن
الظاهر
وصل خبر خسارة المشروع لعمه منير وطكته جلطة وهاي ثاني جلطة وكولش خايفين

وعمه حسن ومحمد اجوي للبيت يعتبون على قاسم وكلوله ما اتوقعناك هيج كلبك قاسي
يعني ما كسر خاطرك الرجال
واصل للموت

وقاسم كللهم
.. شبيدي عليه الله يشافيه خطية

عبالك ديحجي عن واحد غريب
وبقوا عمامه محمد وحسن
يحجون وياه
يردون يقنعونه حتى يحن شوية على عمه منير

بس خالة ام قاسم دخلت عليهم للاستقبال
وحجت وية قاسم وكلتله
.. يمة قاسم لخاطري لاتكسر بعمك لان يبقى منك وبيك
بعدما خالة حاولت وياه حتى يتراجع ويحن على عمه
قاسم كام على حيله وجاوبها

وكال.. هاي هي لخاطر الوالدة. راح اتنازل عن بيتهم واخلي الهم اما الباقي فأنا اعتذر

عمه محمد.. قاسم على الاقل شوية حن عليهم حتى لو ترجعلهم
نص حلالهم يدبرون امورهم بي وينهضون
بشغلهم من جديد

.. والله انا لهنا ويخلص كرمي وياهم
اصلاً. فضل مني اتنازلت عن بيتهم
وداعتك بختهم بالوالدة الي اتدخلت
والا انا ما يحن كلبي عليهم لو اشوفهم يجدون بالشوارع
بيومها طلعوا عمامه ضايجين

ورة ثلاثة البنات فاطمة وسرور سافروا رجعوا لبيوتهم
وبدة البيت يفرغ علينا

جنت كاعدة ودك نقالي كان المتصل خالة ام فرزدق
اتفاجئت بيها بيوم حجت وياي بموضوع زعل قاسم
ورائد

يتبع

احبكم كومة احبكم هواي
اختكم نهى الحسون