رواية اسرني كيدها الفصل الرابع عشر 14 - بقلم الكاتبة ايات الـ سند

بقلم : آيات السند
السلام عليكم

عمري كل عام وانتو بالف خير وعساكم من عوادة البارحة ما نزلت بارت لانو ليلة عيد والتهيت
لا تنسون التصويت والتفاعل بالبارت استمتعو ♥️

ادعو عليكَ، أن تُصاب بدائي
وتموت شوقًا ميتة الأحياءِ
وتسير بين العاشقين مُعذبًا
ظمآن مثلي دون رشفة ماءِ

______________
اسر

ام اسر ضحكت : واخيرا يمة راح افرح بيك اشر وانا اخطبها لك
بس مو كون مو مثل خطيبتك السابقة

اسر : شجاب سيرة هاي هسه ليش ما تتذكرين ليش خطبتها

ام اسر : صحيح يمة عوفك منها كلي مدام نويت اكو وحدة ببالك

اسر اخذت نفس من الجكارة تذكرتها وابتسمت : ي اكو

ام اسر : ها ولك اسوري عاشق يبعد امك

اسر : ما ادري شصار بية وحبيتها ذبيت الجكارة وخليت راسي ع رجل امي

ام اسر ضحكت : كوم نام هسه والصباح رباح

رحت صعدت فوك وتذكر كلام امي عن خطبتي السابقة

.....
قبل ٥ سنوات

ابوية قبل ما ينطي عمره جان دائما يكول خلي ازوجكم واشوف جهالكم قبل لا اموت واحنا نكله عمرك طويل لا تحجي هيج فترة وخطب لعمر وزوجه

خلص من عمر جان يضل يحجي وياية و وانا اكله لا يابة بعدني ما الي خلك مسؤولية ورا ٥ اشهر تمرض حيل وصحته تراجعت وهم فتح سالفة الزواج انا ما اريد اقهره واكله ان شاء الله

ابو اسر : تؤامك تزوج ومرته حامل وانا اريد اشوفك عريس قبل ما اموت

اسر : اسم الله يابة لا تجيب طاري الموت

ابو اسر : ميخالف ابني الموت حق وجاي تشوف حالتي جاي تتازم اذا تركت الدنيا قبل ما ازفك ع ايدي اريد تخطب مريم بنت عمك جمال واخلاق وما بيها قصور وانتَ احسن من الغريب

اسر : لا يابة ما احبها وما اودها (ما اريدها)

ابو اسر : ميخالف تحبها ورا الزواج

اسر بتهرب : الله كريم
وراها بشهر توفى ابوية الله يرحمه والتهينا بالفاتحة ورا شهرين عمي اجى وكال عمي : اخوية الله يرحمه كلي موصيك ع شي قبل لا يتوفى

اسر تنفست وزفرت : الله يرحمه جاي يريد يزوجني ع ايده

عمه : هوا جاي حيل يحب مريم و طلبها مني

اسر رفعت راسي ابوية بس حجة وياية ما كال خطبتها قبل لا احجي شي كال

عمه : هية هاي جان امنيته تريد تحققها لو تريد تزعل ابوك ؟

اسر ما اريد ازعل ابوية وهوا بكبره توكلت ع الله : ي ان شاء الله بس مو هسه خلي يمر كم شهر

ورا ٣ اشهر انا بين دوامي وأهلي امي هم فتحت الموضوع وياية شكله كايل الها عمي كلتلها روحي عليهم وكملي الموضوع مالي خلك
راحت ورجعت كالت هما موافقين من زمان

كلت يلا لعد فد كم شهر ونعقد ماكو بس ما اريد العرس هسه ومن نعقد ماكو حفلة ولا اغاني ولا اي شي

ام اسر : يمة خطية بعدها بنية تريد تفرح

اسر : امي شبيج وابوية؟ عود بعدين تسوي حفلة

ام أسر : هوا يمة مو هسه قصدي
مرت ٤ اشهر وعقدنا بهدوء وبلغت بيت عمي لا حفلة ولا عرس هسه
صارت السنة مال ابوية و ذبحت ثواب ع روحه ورحت زرته بالمقبرة وحجيت وياه كتله راح اسوي الي تريده واتزوج يابة البين فارغ بدونك يابة صارت المسؤلية كلها علية وعمر ما مهتم حيل صعبة ضليت احجي كلشي اريده وكمت وانا دائما اسويله ثواب اصلا

اما مريم صرت كل اسبوعين اروح انطي الها مصرف لانو صارت مسؤوليتي خلص واشوف شنو تحتاج واطلع وانطيتها المهر حتى تتحضر بس صرت اضوج منها تشك عندي علاقات وتتدخل بكلشي وتقارني بغيري وتكلي بارد وحجيها حيل صلف وانا تحملت شهرين وراح تصير ٣ وضلت نفس الشي بعد ما اتحمل ليش اذب نفسي بهيج شي وانا اصلا ما رايدها

حجيت ويا عمي انو ما تراهمنا واريد افصخ الخطوبة زعل مني وكالت شبيها بنتي كتله ما بيها قصور بس ما تراهمنا انازجنت اريد اسوي الي راده ابوية بس ما همت عمي ان شاء الله يجيها الي احسن مني فصخنا وصار حتى بعد ما يجي علينا لا يجي انا سويت الي علية وحاولت وما ضبط وبعدها انا دخلت معهد وكملت دراستي ومصار هواي من تخرجت وكلشي تمام بحياتي
................

رجعت للواقع دخلت لحساب جمانة وراسلتها

اسر : اذا اتقدملج توافقين؟

_______________
جمان

جنت كاعدة ع الموبايل قبل ما انام وصلني طلب مراسلة ومكتوب اذا اتقدملج توافقين جمدت بمكاني شنو منو وين شكو كبل اقدملج ما رديت كلت اكيد واحد غريب ومضيع

رجع دز رديي اعرفج شفتي الرسالة
وتتتت هذا منو انا اشوف بالمسلسل وادحك ع الرسايل من فوك

رجع دز انا اسر تعالي
شننووووو كمزت من مكاني وكعت بالكاع

صاحو علية النايمين طلعت برا عبالك دا يقرا افكاري ويرد
دخلت للمحادثة قبلت الطلب
جمان : العفو؟!

اسر : الي كلته واضح اذا اتقدملج توافقين جاوبي ب اي او لا

جمان : شكلك انتَ دا تحلم ارجع نام

اسر : انجبي ولج شنو جاي احلم سئلت جاوبي مثل البشر

جمان : والله تعذرني اني مو بشر

اسر : شني حيوان مثلا

جمان : ي بس من النوع الاليف
من دزيتها قريت رسالتي وشهكت يا فوكاها اكله اي يعني انا حيوانة

جمان : اقصد لا يلا مع السلامة اريد اروح انام

اسر : جاوبي وروحي اي او لا

جمان : اكيد لا تتوقع عندي ثقة بيك بعد ما طلبت صوري مني عبالك طفلة وتضحك براسي لا عبالك نسيت واكيد مثل ما طلبت مني تطلب من غيري وانا ممستعدة انخطب لواحد ما اعرفه هوا شنو وما عندي ثقة بيه اني اريد ارتباطي يكون ع ثقة وتفاهم

واني عندي دراستي وتخرجي اهم من الزواج ورجاءاََ بعد لا تراسلني
عفت الموبايل ورحت احاول انام

_______________

اسر

ضحكت ع فهاوتها تكول اي اني حيوانة
رادت تروح تنام وانا ردت منها جاوب حتى اعرف شنو حيكون جوابها

صدمتني وابهرتني بكلامها بنفس الوقت !
ضجت من انو رفضتني بس عدم ثقتها بية عرفت انو انا اختاريت الصح وانا اريدها ما تثق بأي احد وجمان مو سهلة بس زاد تمسكي بيها

رجعت تذكرت من طلبت صورتها شكد جنت غبي ومراهق حيل ندمان ما اعرف ليش سويت هيج وطلبت منها جنت بدون مسؤلية وبدون اهتم لاحد حتى ابوية عرفت قيمته من راح من عندي و وعيت ع نفسي انا شجنت اسوي بس كبرت بعيني من ما قبلت اكو بعض بسرعة يدزون ويأمنون بس عرفت هية واعية واكبر من عمرها مو يم هل سوالف

انا اصلا ما جنت اسوي علاقات ومواعدة ويا بنات واطلب صورهم واستغلهم مثل ما هية متخيلتني وما اكدر الومها جنت احجي كم وحدة هما يدخلولي وما انكر جنت ارد عليهم عادي بس ما سويت علاقة حب او وعدت وحدة بشي فقط حجي او تقضية وقت جنت اعتبرها بس ابد ما استغليت وحدة بصورها او استغلها بغير أشياء

ومن بعد ما تعرفت ع جمانة و توفى والدي كطعت علاقتي ويا الكل وجمان اساساََ قبل الخطبة راحت من ايدي بسبب طلبي وكلامي الي لي هسه ما عرفت ليش حجيته بس حيل جذبتني وحتى بعد الخطوبة ضلت تخطر ع بالي ويأست الكاها بس سبحان الله جابها جدامي مرة ثانية وما لازم اضيع هاي الفرصة

صباح الاحد

رحت لداومي بس ضل دوامي للعصر

________________

جمان

كعدت اليوم دوام بدلت ملابسي وتحضرت
سمعت صوت الخط طلعت وصعدت وكالعادة شفت نظارات عبدالله تلاحقني تافافت ودرت وجهي للجامة

وصلت الكلية كملت الدوام عادي وطلعت للسيارة وصعدو البنات
كل مرة يوصلني وبعدين يوصل البنات اشو اليوم هما بالأول سئلته بنية

: شو اليوم احنا قبل جمانة

عبدالله : عندي شغل منطقتهم اذبكم واذبها عندج اعتراض

: لا بس سئلت
نزلو ومشى شوي وحجى

عبدالله : شلونج جمانة

استغربت ولا مرة حاجي وياية وهذول البنات يضلون يحجون باسمي كدامه استغفرالله رغم كرايبي بس ابد ما ارتاحله انحرجت ورديت
: الحمدلله

عبدالله : شلون الدوام اليوم

جمان بتوتر : زين
سكت بعد ما حجى شي الحمدلله
وصلني البيت فتت لكيتهم جاي يصبون غدة بدلت وكعدت وياهم

كملت ورحت نمت قبل المغرب كعدت غسلت وكعدت بالحديقة اقرا لليل رحت اساعدهم اذا يريدون شي بالعشة ورا ما خلصنا كاعدين اهلي يشربون جاي

ندك الباب طلع احمد اجى كال ام اسر ع الباب دخلتها ع الديوان

كامت امي وراحت يمها احنا ضلينا كاعدين

_________
في الداخل

ام جمان : هلا بيج ام اسر

ام اسر : وبيج عيني شخبارج شلون البنات

ام جمان : الحمدلله يسئلون عنج

ضلو يسولفو نص الحديث وحجت ام اسر : الصراحة ام احمد اليوم جايتج بموضوع خير و ان شاء الله ما ترديني

ام جمان باستغراب : تفضلي

ام اسر : والله اسر كبر واريد يتزوج ويستقر مثل اخوه

ام جمان : ي والله شكو بيها

ام اسر : و جمانة اخلاق وجمال ما شاء الله وانا رايدتها منج لابني ع سنة الله ورسوله

ام جمان بتفاجئ : والله ما اعرف شنو اكلج الصراحة ام اسر

ام اسر : ميخالف لا تحجين شي بس اريدج تفتحين الموضوع ويا البنية وابوها ورجعولنا خبر وان شاء الله خير

ام جمان : ان شاء الله
دخلو البنات سلمو وكعدو وطول الكعدة ام اسر عيونها ع جمانة

جمان : خالة شو ايات ما جبتيها

ام اسر : والله عندها دراسة وانا اجيت اسير ع ام احمد

البنات : هلا بيج
شوي وكامت

ام اسر : يلا من رخصتكم

ام جمان : بعد وكت خلي نتعلل

ام اسر : خيرها بغيرها مع السلامة
طلعنا وياها ع الباب وراحت ودخلنا

______________________

اسر

رجعت من الدوام قريب العصر تعبان كعدت اكل شوي اجتي امي يمي

ام اسر : يمة ما كتلي منو هاي المحظوظة

اسر : قصدج تعيسة الحظ

ام اسر : لا ليش يمة شبيك عين البارد عليك

اسر : ههههههه فدوة لعمرج

ام اسر : هسه لا تغير الموضوع يلا يمة مدام نويت احجي خلي نستعجل

اسر شغلت الجكارة

ام اسر : ولك غير لو تعوف هل سم

اسر : هسه شضارج

ام اسر : انا علمودك يمة، خلي اعرف منو هاي المحظوظة والا اول شي اخليها تبطلك من الجكاير

اسر : شسالفة هية شعليها

ام اسر : هسه غير تحجي منو

اسر بابتسامة : جمانة بنت ابو احمد

ام اسر عقدت حواجبها : شمعرفك بيها

اسر سحبت نفس : شفتها مرة ويا ابوها بالاسواق ها بعد عندج استفسار

ام اسر ضحكت : لا هاهية، ان شاء الله بليل اروح افتح وياهم الموضوع ويفكرون

اسر : ان شاء الله
كملت ورحت لغرفتي رغم رفض جمان بس بلكي من تشوفها صحيح تقدمت توافق صليت العصر ودعيت
وطلعت برا رجعت بليل كعدت ويا اخواني وامي راحت ع بيت ابو احمد وصلها احسان رادت ايات تروح وياها كتلها ممنوع تعالي يمي كعدي اقري امتحان باجر ضليت كاعد يمهم الا ان كملت وامي اجت صعدت لغرفتي شوي ونمت

___________________

جمان

ثاني يوم الصبح رحت للدوام ورجعت تغديت واجيت انام ماما فاتت يمي بالغرفة وسدت الباب وتقربت

ام جمان : اريد احجي وياج موضوع

جمان : احجي ماما بسرعة اريد انام

ام جمان : من البارحة اجت ام اسر

جمان : ي اعرف شبيها

ام جمان : تريد تزوج اسر

جمان : خلي تزوجه

ام جمان : بس طلبتج مني

جمان بهدوء : رجعليهم خبر رفضي.........

يتبع......