رواية اسرني كيدها الفصل السابع والثلاثون 37 - بقلم الكاتبة ايات الـ سند

بقلم : ايات السند
السلام عليكم

لا تنسون التصويت تقديراً لتعبي وخاصة هذا البارت الاخير والتعليقات استمتعو ♥️

وفي النهاية سيحفظ الله علاقتك بمن هم خيرا لك فأطمئن.

____________
وهاي المرحلة الرابعة والسنة الاخيرة ولازم اكشخ الله واخيرا راح اتخرج

رجعنا ع بيت اهلي تعيشت يمهم واجى اسر اخذني دخلت ع الغرفة شوفته شنو اشتريت ورتبتها وصرت احجي وياه وبعدين كلت : شوف اشتريت كفر جديد وبلاش

اسر عكد حواجبه : ليش

جمان حركت شعرها بايدها : شافني حلوة كال هاي هدية مني الج

اسر : اي بعد احسن
تمدد وتغطى

جمان : اااااسسسرررر

اسر طكها بضحكة : يول انتي رب الجذب غير لو كال هيج صحيح هسه اطفرر ادور عليه و ابسطو

جمان : ههههه دوخر عبالي تغار صخام

اسر : انتي متعرفين تجذبين زين حبيبي تعاي اعلمج

جمان ضحكت : صدك يلا

اسر : اول شي حضري الجذبة زين وبعدين احجيها عادي مو حاصرتج الضحكة لو تئتئين اضل اعلم بيج انا عمي

جمان : هههههه يعني جاي تحثني اجذب

اسر : ومحمد اموتج علية لا عليهم اي جذبي وانا بظهرج

جمان ابتسمت : فدوة حبيبي وحضنته

صار عيد زواجنا الثاني وبعدين بديت اداوم و مر شهرين او اكثر وصار عيد ميلادي وصدك وصرت ٢١ سنة صدك الايام مرت بسرعة  بايام راس السنة نطو عطلة وجنت كاعدة انا و اسرر متمدد على رجلي وحاضني من خصري واشوف مسلسلي بالموبايل خلصت الحلقة الوقت متاخر اسر بعده على نومته علية نزلت نفسي شوي وردت انام تذكرت دورتي وينها هل شهر فتحت برنامجي حتى اشوف ايمتى موعدها

لكيتها متاخرة ١٠ ايام انصدمت اصلا انا انساها وما اهتم ايمتى ما تجي تجي بس هالشهر انتبهت ماكو ولا شي كلت خاف حمل بس شلون تاكد ماكو لا لعبان نفس مثل ما اسمع ولا شي نمت وثاني يوم صبحنا سنة جديدة كعدت لكيت اسر يصلي الظهر كبل اجى على بالي الحمل لمست بطني يارب

كمل صلاة ندار علية كاعدة ابتسملي واجى جرني من ايدي قوي كومني حضني وجعصني
اسر : يلا لج بابا كومي تنشطي يا كسولة
نزلنا ساعدت خالة وصبينا غدة من كملنا مليت ونور غسلت المواعين وكلمن رجع لغرفته صعد فوك لكيت اسر ديبدل

جمان : وين حتروح

اسر : ولد العم دازين علية

جمان : اسررر

اسر : عيونه

جمان : اكلكك

اسر : ليش نكطين بالحجي

جمان ضحكت : اسر شنو تحب يجيك ولد لو بنوتة

اسر عكد حواجبه : ليجي خير من الله ليش

جمان احجي ومتوترة خاف مو حامل : جوز يجينا

اسر : دحجي بابا عدل

جمان حجيت بثانية وحدة : اف اسر من الاخير دورتي ماكو وخاف حامل

اسر وسع عيونه بفرح : لبسي عباتج ونزلي وراي

جمان ضحكت لبست واخذت شالي ونزلت وراه ماكو احد بالصالة طلعت جان صاعد بالسيارة ويدخن صعدت : وين تاخذني

اسر : يالمحللة غير تحللين ونشوف اذا حامل لو لا

جمان ضحكت وصلنا ع مختبر نزلنا لزمت ايده ودخلنا سحبو مني دم وطلعنا للسيارة افتر نص ساعة ورجعنا ع المختبر كال دقايق وراح يطلع كعدت كرسي الانتضار واسر فوك راسي

دقايق وصاح على اسر جاب التحليل وضايج
جمان هبطت : ها اسر

اسر : جمان لا تضوجين

جمان برطمت : مو حامل مو
كادني وصعدنا بالسيارة كبل جر راسي وباسني : يول جماني مبروك علينا

جمان : شبيك اسر مو كلت مو حامل
صار يضحك

جمان دمعت : وخر ما احبك
تلمست بطني

اسر جرني من فكي ومبتسم : شكلتي
جمان ابتسمت : احبك ابو جهالي
اسر : وانا هم بس هذول الجهال منين جبتيهم

جمان : دوخر وخر حتى تتكلف تكول احبج انا هم مووو

اسر : عمي لج عقلييي شلون حتربين جهالنا يا طفلة

جمان دحكت عليه وابتسمت : انتَ تربينا

اسر ضحك : امرنا لله ابتلينا بعد
جمان دخلنا بشارعنا : وكف وكف اسر خلي انزل ابشر ماما

اسر : بليل اجيبج

جمان : لا هسه ما اطول وكف ببداية الشارع على بيت اهلي نزلت بسرعة دخلت لكيت ماما كاعد ترش بالحديقة ركضت عليها : مامييي حتصيرين جدة للمرة الالف

ام جمان : حامل يروحي
وطكتها بهلهولة ضحكت بوستها وطلعت ماما طلعت وراية اسر جان بالسيارة شاف ماما ونزل باركتله باس راسها ومشينا لبيتنا اول ما نزلنا جانو كاعدين بالصالة
اسر صاح : شني يابة ما تباركولي راح اصير اب

كلهم فرحو وكامو باركولنا وايات ووسام مكيفين بية فرحت لفرحتهم صعدت فوك من صار وقت العشة اسر جاب من برا كال لا تسوين واكلنا وكملنا وبليل حضن بطني ونام اثنينا فرحتنا ما تنوصف

ثاني يوم داومت واسر يوصي بيا ادير بالي على نفسي رحت وبديت دوام وبعدين رحنا ع الارانب الي جايبيها وانا اخاف ابد ما اتقرب من جبناها ليهسه طيبة لزمتها واني شلت الابرة حتى اضربها وايدي ترجف والبنات يضحكون

مر شهر وامتحنت كورس اول عطلنا ويومين وطيبة واحسان عقدو بالمحكمة وثاني يوم يوت حفلة المهر وحنة بليل حيل تونسنا وانا واسر ممالخ ع الفساتين وانوب يكلي لا تركصين بعد حملج ضعيف اول شهر وانا اتخبل كلشي ولا الركص وعاندت وركصت

اليوم الي وراه صار العرس واصدقائه وعمامه وهيبة والزفة طولوها واحسان كل شوي موكف يركص وانا ويا اسر وفرحان باحسان يكول هذا ابني مو اخوية وحتى اسر دفع لاحسان نص الغرفة وزفيناهم للبيت واهل اسر راحو باتو ببيت جدتهم انا ما قبلت اروح وكلت لاسر انا اريد اروح لبيت اهلي وانتَ تعال وياية لا تروح ما قبل بس كوا قنعته ما اريد يروح هناك

وثاني يوم اخذنالهم ريوك ورحنا وانا كبل استلمت طيبة وخليتها تخرط كلشي ومتت ضحك عليها مخبلته

ومرالاسبوع صرت بالشهر الثاني ورحت بس مرة ع الدكتورة وكالت كلشي تمام وانطتني فيتامينات ومثبتات

حيل متونسة ويا طيبة جنت وحدي بالبيت هسه اجت هية ويوميا نكعد بغرفة ايات ونتعلل من رجعنا ع الدوام الكورس الثاني جان عملي او تطبيقي يعني ما بيه اي امتحانات جان لازم نسوي مجموعات علمود بحث التخرج صرنا اني وطيبة و٢ صديقاتنا نوب

وجان لازم نبدي نتدرب بمختبر او بقسم التحليلات بالمستشفى البنات راحو مختبرات يطبقون انا اسر اخذني اني وطيبة يمه بالمستشفى صرنا نداوم واول يوم احلا يوم جان ما خليت اسر يروح من يمي حطيته وصرت اسحب منه دم بدون سبب
جمان : لازم تكون اول واحد اطبق عليه

اسر :كلي الج عمي تريدين اعلمج تطبيقين غير اشياء وغمز

جمان : كوم كوم روح لشغلك
ضحك وطلع شكله يجنن بسترة المستشفى سحت عليه

وشهر او اكثر احنا يوميا نداوم بالمستشفى حرفيا ما اوصف الشعور من اسر يكعدني ونبدل ونطلع اثنينا سوا للمستشفى لابسين ستر المستشفى و ببطني شي يربطنا بعدين داومت بمدرسة كم اسبوع طبقت تجارب ممتعة وحيل حلوة وخاصة من الطلابات حبوني واتمنو ما يخلص تطبيقي بس بكم يوم اندمجت ووياهم ورجعت لايام لمدرسة وبحيث اترك للدرس واجمعوهم ونسولف ونضحك شعور يجنن

كل هل تطبيقات والتجارب وفوكاها من ارجع للبيت التهي بالبحث تعب وشعور حلو بنفس الوقت

مر الايام وكفت عن التطبيق وصرنا نشتغل ع البحث اكثر و بشهر رمضان صرنا نروح للجامعة ونناقش عن البحث الدكتور الي جان مسؤول ع البحوث مالتنا احنا اختاريناه وجان حرفيا سهل بالتعامل وضمن النا امتياز ع البحث وفرحتنا لا توصف كبل من طلعت حجيت الاسر وكال : ول عفية ببنت كلبي ربي لا يضيعلج تعب

وخلصنا المناقشات وعرضنا البحث واني ما مصدكة اخيرا خلص تعب سنين حددنا يوم حفلة التخرج واختارينا مكان ورتبو كلشي ووصلنا هدوم التخرج وجان لازم قبل حفلة التخرج نروح ع الجامعة ناخذ صور وهيج

بيومها كعدت من وكت حيل وصرت امكيج واسر ما اتعرض كال هاي ايامج مراح ادخل الغيرة وامنعج من لبسج والرقة مالتج
كل خطوة جاي اخطيها واسر ووياية اندر وراية الكاه بظهري ادحك بصفي اشوفه يمي بكل يوم جاي يكبر بعيني من يشجعني على دراستي وفرحان بتخرجي اكثر مني كل يوم احمد ربي على هيج انسان واعي ومثقف وما حرمني من حلمي وابد ما فد يوم مد ايده او اذاني بفد حجاية صارلي رمز عن الحب الصدك

كملت مكياج وكمت لبست القاط وفوكاه العباية مالت التخرج والقبعة ووكفت اخذ صور واخذت ويا اسر وهوا جان لابس ملابس الدوام حتى يروح وكفت ع المراية الطويلة وجريته حتى ناخذ صورة ع الطول هوا وكف وراية وحضني حط ايده على بطني الي صارت بارزة شوية اخذت صورة وابتسمت لمنظرنا احلى صورنا النا

طلعت طيبة هم لابسة ملابس التخرج صرنا وحدة تتغزل بالثانية ونضحك وصلنا اسر اني وطيبة وراح لدوامه دخلنا ع القاعة الجامعة الكبيرة التنظيمات فد شي يجنن

النفاخ صاير مثل الباب قوس يعني هيج وممشى احمر والترتيباب كلشي حلوة كعدنا والكل اجى صار العريف يحجي ويلقي شعر وبعدين صاحو وحدة وحدة وتمشي ع القطعة الحمرة ومصور يصورها وتصعد ينطوها الشهادة وتاخذ صورة ويا العميد كالو راح تصير مثل الحفلة مالت الي بعد يومين بس هيج راح تصير افخم وبحضور الاهالي هاي بس هيج

صاح اسمي [والان مع الخريجة جمانة ابراهيم ] صرت امشي والمصور كدامي وانا احس طايرة من الفرحة وتمنيت امي واسر يمي الانسانين الي يستحقون كل حياتي

صعدت يم العميد نطاني الشهادة واخذت صورة ونزلت واني الضحكة مالية وجهي حضنت طيبة وبعدين صاحو اسمها وكملنا كلشي وخابرت اسر يجي علينا كال ما اكدر اكو عملية خلي طيبة تخابر احسان يجي بسيارة عمر وسده كلت لطيبة وخابرت احسان واجانة وطلعنا وصلت بدلت وتغديت وصعدت نمت وحسيت على اسر يبوس بية : ما شايف هيج خريجة حلوة وحتى هية نايمة

جمان ضحكت وحضنته

ورا يومين كعدنا من وكت حيل حتى نتجهز للحفلة صرت امكيج وبعدين كمت لبست قفطاني الي اشتريتها صاير اوف وايت (ابيض على بيجي ) ومطرز ب ذهبي وحيل حبيته ولبست حجابي اسر لبس القاط وعدل نفسه شافني كملت باس راسي ونزلنا كلهم مكملين طلعنا للقاعة وصلنا نطيت البطايق ودخلنا ومن اهلي اجو ماما واحمد وهاجر وزهراء

جمان جريت ماما على صفحة وعيوني مدمعة : ماما شنو ما كلتي لبابا يجي كل البنات ابوهم الي راح يلبسهم ملابس التخرج

ام جمان بقهر : والله يبعد امج كتله بس ما قبل يجي يكول انا احدر ع الحفلات ويضحكون علية العالم

جمان : ول شيضحكون دشوفي شيوخ جايين علمود بناتهم يلا ماكو داعي مسحت دمعتي رجعت كعدت يم اسر

اسر : شبيج

جمان : ما بية

اسر : مو حافظج اكثر من نفسي انا ابوج وحبيبج عجل شون

جمان ضحكت ولزم ايده
صالحولي البنات علمود الدخوليات كمت اول شي دخلنا كل طلاب القسم واحد ورا واحد والمصورين يصورون وبعدين صارت كل واحد يذيعون اسمه ويدخل وحده

صاحو اسمين وبعدها كالت يلا جمان تحضري دورج كمت رحت تحضرت ووكفت بمكاني صار يكول دخوليتي [ والان مع الخريجة التالي التي ستطل علينا كالشمس قصيرة القامة كبيرة بالتعامل لم تصل الى هنا بسهولة بل بعد تحدي اعاصير الحياة وبوقوف زوجها بجانبها خلال مسيرتها محبوبة وتدخل القلوب بدون استئذان ولو قدمتها للمرة الالل يحتار الكلام في وصفها لقبت من قبل اصدقائها بالاميرة النائمة رحبو معي بالخريجة جمانة ابراهيم ]

دخلت واشتغلت اغنية

جان اسر واكف هوا وماما لبسني العباية وهذا الي يصير ع الجتف بي اسمي وسنة التخرج دنكت على ماما لبستني القبعة وصعدت ع الستيج يم العميد نطاني الشهادة واخذت صورة بهل لحظة خصيصاً صرت متخرجة حرفياً فرحة لا توصف نهاية تعب 16 سنة دراسة يارب لا تحرم اي طالب من هل فرحة

نزلت جان اسر واكف حضنته : مبروك يحبيبي انتي

جمان : الله يبارك بيك يا روحي من هل دنيا
رجعنا على مكانا كعدت باركولي بعدين التنظيم جاب كيكتي مكتوب عليها مبروك التخرج كصيناها واكلت شوي وبعدين ذاعو اسم طيبة وكف ابوها لبسها منظرهم يجنن كملت ونزلت باركنا الها وجابو كيكتها كصتها هية واحسان

ام اسر : فدوة لهيج جناين حلوات فرحتوني بيكم اثنينكم بنفس اليوم

صارت فقرات جوبي كومت اسر ما قبل وبعدين شغلو ردح وصارو يركصون شباب القسم والعريف صار يسئل اسئلة عامة والي يجاوب اله هدية وايات وهاجر ربحو صدك جان من احلى الايام الي بحياتي

رجعنا للبيت وصعدنا للغرفة واسر جان جايبلي سوار ذهب هدية لبسني اياه وكال جملة مستحيل انساه : اناا حيلل مفتخر بيج جمانتاسر وختمه كلامه ببوسة .............

ثاني يوم اخذ اجازة اسبوع وطلعنا لبغداد اني واسر واحسان وطيبة خالة ما قبلت تجي ولا عمر وايات اسر دخلها دورات سادس عمود السنة جاية سادس طبعا بهيج الفترة ماما فتحت موضوع خطبة ايات لاحمد بس اسر كال كليلهم حاليا خلي تكمل سادس والله كريم

وانا دخلت الشهر السابع بحملي من طلعنا لبغداد تونسنا كل يوم طلعة شكل وكاعدين بالفندق غرفة احنا وغرفة احسان وطيبة وورا يومين من رحنا جانت طيبة تضل تعبانة وتريد تنام سئلتها عن دورتها كالت ماكو حللنا وطلعت حامل حيل فرحنا وخابرنا بشرنا خالة اسبوع ورجعنا علمود دوام اسر

من رجعنا رحت للدكتورة اخر مرة رحت عليها بالشهر الخامس كالت مبين جنس الجنين كتلها ما اريد اعرف هسه شعور غريب انا جاي اعيش احلى ايامي وين جنت عنها صدك عوض الرب يكون حلو

جانت طيبة هم وياية من دخلت ع الدكتور فحصتني وكالت : كلشي تمام ما غيرتي رائيج وتريدين تعرفين جنس البيبي

جمان : والله بعد ما اتحمل شنو

الدكتورة : مبروك بيج ولد بس ديري بالج ترا بيج فقر دم ودمج نازل حاول تصعديه قبل الولادة

جمان : جنت متحمسة عبالي بنوتة المهم هم فرحت بي كلشي نعمة

كمت وفحصت طيبة كالت الها انتي باول شهر بعدج وكلشي تمام وانطتها فيامينات

مر شهرين ودخلت شهري وجنت يوميا طالعة تعجبني هدوم للبيبي واشتريها ونطلع بليل نمتشى علمود هذا شهري واسر طاير بية وهالشهرين انا واسر نتمالخ ع الاسم هوا يريد شي قديم و حلو وانا اريد اسماء تركية وهوا يضحك علية بكول راح تتخبلين من ورا المسلسلات

اخر شي قررنا على اسم [شهم ] لانو جماعته يصيحون لاسر ابو شهم ف استقرينا ع الاسم

بيوم جنا كاعدين بالغرفة واسر متمدد يمي ع التلفزيون وانا الكب بالموبايل صار الم وتقلصات ببطني بس ما اهتميت عبالي مثل كل يوم بس ضل يزيد الوجع طكيتها ببجية اسر ندارلي متفاجئ : اسم الله شبيج يولي

جمان : اسرررر وخر عني بطنيييي

اسر : هاي ولادتج

جمان ببجي وصياح : اريد ماما وخر عنيي وينج ماما

نزل يركض على خالة صعدت تركض : اللهم صلي وسلم على نبينا محمد كومي بنيتي خلي نروح ع المستشفى

جمان : ماا ما اروح وخرو

ام اسر : يمة كومها خلي البسها العباية
كام سندني من ورا وكومني وانا بس ابجي واسر متوتر وما يعرف شنو يسوي
لبستني العباية وبس حطت شال على راسي اسر شالني ونزل وانا ابجي كال لايات خابر ماما تجي نزلت خالة بيدها ملابس للطفل واشياء لازمة الي اسر حطني ورا بالسيارة وخالة صعدت يمي هوا شغل السيارة ومشى وانا صار ينزل مني مي وابجي بالزايد

ودانا ع المستشفى الي يشتغل بيها كبل دخلنا لصالة الولادة ودخلتلي الدكتورة والممرضات ونيموني وبدت تجيبني كالت لا تخافين انتي اصلا واصلة حدج ما تطولين بدت تكلي انو ادفع وانا اصرخ وابجي واسب باسر

طلعت روحي يالله واخيرا نطقت الدكتورة : مبروك اجاج الولد

جمان ما بية اتحرك ولا اي شي وجع وجع دخلتلي ماما لبستني وفات اسر حطلي الشال على راسي وشالني روحي سايحة حطني بالسيارة ورجعني للبيت ماما كالت له ذبها يمي ما قبل نزلت و ودانا ع البيت نزل شالني وخالة شايلة الطفل دخلني بغرفة ايات جوا دخلو باركو وطلعو خالة كالت تعال اسر شيلها خلي انضفها رجليها كلهم دم شكد نزفت وفوكاها هية عدها فقر دم

اسر بس شالني او حاول يكومني احس افترت بية الدنيا وبعد ما احس بشي

___________
اسر

من دخلت جمان لصالة الولادة وانا كلبي واكع عليها ما بحياتي توترت هيج من طلعو الطفل وامي نضفته ولبسته كبرت باذنه وفتت على جمان ساعدتها بحجابها واخذتها للبيت ما خليتها تروح لبيت اهلها حتى تضل جوا عيوني اليوم

دخلو اخواتي باركولي وطلعو امي كالت شيلها خلي نبدل الها بس لزمتها كبلت عيونها وخربت عرفت هذا بسبب قلة الدم الي بجسمها رجعتها بمكانها وضليت اصحي بيها صحت وكلت لامي تجيب اكل الها

جابت ما قبلت تاكل كعدتها وسندتها علية غصبتها اكلت شوي وعافت نومتها وغفت
كمت شفت شهم يم امي كالت لباجر ترتاح وترضعه
راحت ايات نامت بغرفة امي وانا دخلت يم جمان الصبح كعدت من الصبحيات خابرت اخذت اجازة وطلعت جبت من المستشفى بطل دم ورجعت للبيت حطيته اله حتى تصحى حست ورحعت غفت رحت اشتريت ذبيحة وعزمت عمامي ع الغدة كلها اجو ذبحت وصارو يباركون

كملت منهم ودخلت لجمان كاعدة شلت منها الكانونة وكومتها شوي بيها روح دخلتها ع الحمام وبديت اذب هدومها ما قبلت مستحية من منظرها تجاهلتها وغسلت الها بايدي ونظفت ما غسلت شعرها ولا قربت من الجرح شوي شري بس نظفتها شفتها ولبستها دشاشة وشال وكتلها تعاي كعدي برا لزمت ايدها سندتها وطلعتها يمهم

_____________
جمان

طلعت وانا ما لي خلك سلمت باركولي وشهم صار يبجي كالت خالة تعاي رضعيه اخذته وانا خايفة من صغره بسته ما شاء الله اشگر طالع دخلت للغرفة حطيته بحضني وطلعت صدري حطيته بحلكه اخذته بس توجعت منه بس بعدين تعودت

مر الغدة والهوسة والعصر راحو واخيرا
فرغ البيت اسر صعدني بغرفتنا فوك وانا بالكوة امشي متوجعة رتب مهد شهم وكربه يم جربايتنا بس حطيته نام

شوي ودخل وسام الي كبر ودخل مدرسة وبعده خبل كال : اجو اهل جمان ماما تكول نزلو

جمان : افف والله مبية
اسر كبل كام وياية لبسني حجابي ونزلني وصعد كال بس يكعد شهم احدره يمكم

جان خواتي جايات باركولي وشوي واسر نزل شهم شافوه وتخبلو عليه من ايد لايد ويبوسون بيه وانوب ابن زهراء كام يبجي يريد يشيل شهم

جمان : دطير ماما هوا هل وحيد متت البارحة يالله جبته مو زين كدرت اكعد وياكم ليهسه متوجعة

ضحكو وضلينا نسولف وتعشو وتعللو وراحو ماما كالت عود تعاي رتاحي يمنا

صحت اسر ينزل يساعدني اصعد : اوف منك عاندت الا نصعد

اسر : جيبي شهم
اخذه بايده هذيج وحط الثاني على ظهري وسندني وصعدت بصعوبة من دخلت للغرفة كبل تمددت اسر طلع مدري وين شهم كام يبجي شلته و رضعته دخل اسر كام يصوفر : ها عمي هاي السوالف الزينة بس شهم مستفاد

جمان ضحكت عليه نام شهم كلت لاسر تعال حطه بالمهد مبية اشو اسر اجى تمدد يمي وجر شهم على صدره ونيمه حط راسه يم راسي وباسني : هاي احلى هدية من ربي انتي وشهم

جمان : هاي احلى هدية من ربي انتَ وشهم

اسر : اشكر الصدفة الي جمعتني بيج ورجعتلي روحي

جمان ابتسمت : احب الصدف لان جمعتني بيك

اسر : احبج جمانتي

جمان : احبك اسري

اسر : انتي جمانةاسر بسس

جمان : انتَ اسرجمانة بسس

اسر شال حط شهم بالمهد ابتسم وكال : تعاي حدري هينة اشو انتي تقليديني

جمان رفعت حاجبها وكالت بتقليد : عجل شنو اخاف منك

اسر باس شفتي : عمي هوا ياهو اليجي يكول هيج عجل حلوة

جمان :اسري

اسر :جمانتي

جمان :سندها وحبيبها للابد

اسر : للابد وحتى اذا انتهى الابد راح اضل وياج
النهاية ..............

للاسف اليوم ماكو يتبع لانو هذا البارت الاخير كلش زعلانة لانتهاء القصة جانت قريبة لقلبي وعشت وياهم واستمعت

اسرني كيدها .. هاي اول قصة الي ممكن شفتو اخطاء املائية ممكن سرد ما عجبكم ممكن شفتو استعجلت بالاحداث وما انطيت تفاصيل كثير ومرات تاخرت بالتنزيل
انا اعتذر بس مو كلشي يكون مثالي وهاي اول تجربة الي حبيت تكون مختلف ما شوفتكم حزن وكئابة وهيج لا فقط حبيت اشوفكم حياة حلوة ممتعة

راح تكولون شنو العبرة من هل قصة .. انا ما راح اترككم بدون عبرة عبرتي الي اريد اوصلهم اختارو الي يفهمكم شون يعني مثلا شفتو اسر شلون دعم حمان بدارستها وبحياتها واحترام وكلشي بيناتهم واصلا اغلبكم ما حب اسر ليش علمود ما يضرب وواعي ويحب جمان ؟
اغلب القصص الي هسه جاب تنعرض ضباط وشرب وبنات وضرب واهانة للبطلة ويمعنها عن الدراسة وتكول اي هذا رجال وتحبوه وتصيرون تتمنون مثله
لا الرجولة مو بالضرب والشرب الرجولة من تدعم احلام الي تحبها من تكون وياها لا عليها الرجولة بالالتزام بالدين والصلاة الرجولة بالاحترام والتعامل مع اهلك والناس
اتمنى تكونون فهمتو كلامي ووصلتهم بالشكل الصحيح

اتمنى لابطالي كل الخير والموافقية والكم هم
شكرا لكل من تابع وياية القصة ودعمني كل الحب الكم
ممكن انزل عن احداث ما بعد الرواية ما اعرف

لا تنسون تضيفوني هنا ع الواتباد وع الانستا ayat_alsanad

بقلم ايات انتضروني بقصتي الجديدة الي ان شاء الله تكون احسن من هاي واكون متطورة بالسرد