رواية اسرني كيدها الفصل السادس والثلاثون 36 - بقلم الكاتبة ايات الـ سند

بقلم : ايات السند
السلام عليكم

لا تنسون التصويت لتعبي والتعليقات استمتعو ♥️

حينما أخبرك دائماَََ بأنني احبك لا يعني اني احاول تذكيرك بذلك ولكنني ازداد حباََ لك بعد كل مرة 🖤🦋

___________
علمني من الكل اخاف وارتبك بس من اوصل يمه لا كلشي يختلف

ثاني يوم كعدني من الصبح يريد يروح للدوام ما قبلت اكعد نعسانة نمت متاخر
اسر : يول لا تخليني ارجع انام هسه

جمان بنعاس : وخر داوم خلي انام

اسر : ليش نعسانة ويا منو سهرانة للصبح وغمز

جمان غطيت راسي

اسر : ترا راح اضل خفر اليوم

جمان طلعت راسي : يا صدك

اسر : اي حبيبي ديري بالج على نفسج
حضني وكال : خرب بعمي ترا راح ابطل ما اداوم

جمان : ههه كافي يلا روح

اسر باسني بشفتي
جمان : اسويلك ريوك ؟

اسر : كل هل شنور اكعد وحدي واحدر وهسه تريدين اسويلي ريوك نامي بابا نامي

كام اخذ موبايله والسويج وطلع انا رجعت نمت من اذن الظهر كعدت سبحت وصليت ونزلت اساعد خالة
وكضيت اليوم جوا ضوجة وحدي فوك

خلصت العطلة ورجعت اداوم مر شبيوم صليت المغرب ولبست شالي ونزلت حتى ابدي اسوي العشة اسر حان طالع يتسوك للبيت شفته بالمطبخ شكله رجع تقربت من باب المطبخ سمعت خالة تكول لاسر : يمة لا تحسبه تدخل او شي بس راح تدخلون سنة سوية وماكو حمل

اسر : ميخالف يمة انا ما اريدها هسه هية بقت سنة وتتخرج وما تكدر جاهل ودوام بنفس الوقت

ام اسر : يعني جاي تمانع ؟ً

اسر : لا يمة ايمتى ما الله راد يصير مو بكيفنا

جمان دخلت ع المطبخ اسر دحكلي وجانت خالة ناطيتني ضهرها وتحجي : اكيد بس انا اريد اشوفك وليدك علمودك احجي

اسر وهوا يدحك ع جمان : يلا يمة عزلو المسواك وجمان هياتها اجت وياج
خالة اندارت وشافتني وسكتت اسر صعد عزلنا المسواك وسويت العشة وصبيت وسام صاح اسر ولتمو  كملنا ولمينا كلشي وصعدت سبحت من ريحة القلي ولبست شي خفيف لان بدا يحتر الجو تمددت يم اسر ولزمت الموبايل شوي وتذكرت حجي امه نداريت عليه

جمان : اسر عود صدك ليش ليهسه ما حملت

اسر : حبيبي شبيج ما صار شهرين من اخذتج عادي يطول وهسه انتي خلي كل همج امتحاناتج الي هل شهر

جمان : اي والله حيل خايفة صعب

اسر : لا ماكو شي صعب

جمان هم مر شهر وشوي عادي وامتحنت وخلصت وهسه احنا برمضان الي صارله اسبوعين من اجى كالعادة تركت الامتحانات وزينت لرمضان اجوائه والعبادة وصوت القران الي مالي البيت حرفياً اكثر شي احبه بالسنة هل شهر وابد ما اريده يخلص بس خلص

وصار عيد ميلاد اسر بنص الشهر وصيت كيكة بدون ما يدري ورا الفطور وصلت وفتت اغني له وهوا مبتسم بسته وعيدته وكتلها خلي ننزل نحتفل جوا ما قبل استحى يحتفل عفنا الكيك ونزل عايدوه وكبل صعد كعدت اشاقيه : ها حجي صرت ثلاثيني

اسر : حجي او مراهق اهم شي انتي يمي

جمان : ههه اهو دخليني اشاقيك كبل كمت تتغزل شكد سخيف

اسر وخرني من حضنه : منو السخيف

جمان : لا اقصد حجيك كلام حلو

اسر ضحك و خليته ياكل من الكيكة وانتهى اليوم

اول يوم عيد جاي اول عيد فطر الي وانا متزوجة باسر ونطوها عطلة الهم اول يومين
حسيت بيه يكعدني من الصبح فتحت عيوني كبل حضني

اسر : اكو احلا من انو اعيد بعيونج ؟

جمان : هههه كل عام وانتَ بخير حبيبي

اسر : كل عام وانتي خيري يجمانتي

جمان : بيش ساعة

اسر : راح تصير ب ٩ كومي حتى تريك ونحدر يم الحجية مسوية عزيمة ع الغدة

جمان اصلا ما نمنا للصبح لانو متعودة على رمضان للفجر صلينا وب ٥ اسر راح صلى العيد ورجع عاد نمنا كمت غسلت وجهي اسر نزل لبست حجابي ونزلت وراه كلهم كاعدين عديتهم وبست راس خالة صبينا ريوك اسر طلع كاعد قبلي وجايب كاهي وكيمر عرب بس انا ما احب الكيمر ف اكلت شوي كاهي وكمت صعدت فوك

لبست فستان اشتراه الي اسر للعيد جابه على ذوقه بدون ما ادري حيل عجبني نسقت وياه شال وحذاء كعدت اعدل نفسي شوي فات اسر للغرفة
اسر : يول عمي هاي شطالعة

جمان كمت :صدك حلو عليج ؟

اسر : عجل شلون ما يطلع حلو غير انتي جمانة

جمان ابتسمت : يلا بدل

اسر لبس دشاشة عدلها كام مشط شعره وتعطر

جمان برطمت : هاي شنو طلعت احلى مني

اسر : لا يابة انتي الاصل يلا امشي تاخرنا
نزلنا وطلعنا سيارتنا وسيارة عمر وصلنا هناك نزلنا دخلنا من الديوان جانو كاعدين الكل عمامه وعماته لانو عيد يجتمعون عايدناهم وعايدنا الحجية واسر اشر حتى ندخل جوا مع انو الكل هنا كاعدين دخلنا انا و ايات جانو البنات متجمعين اماني ومريم والباقي سلمنا واجت بنت عمتهم بوستني حيل حبابة تعرفت عليها من اجينا تغدينا بيت اسر بالخطبة والباقي سلمو وهما كاعدين اماني ردت بس مريم ما ردت بس دحكتلي

كعدنا شوي وعاد اجو النسوان من الديوان وكلهم كعدو بالهول انا كاعدة وخالة منا وايات منا رغم اكثر من مرة اجيت بس الي اعرفهم ينعدون ع الاصابع

اماني : ها جمان اشو ما حبلتي طولتي بس لا ما تحبلين

الحجية : دولي اماني ما تعرفين تسولفين ما صار جثير من تزوجو وبعدهي تداومي خليهم على راحتهم مو هاي نور ٥ سنين يلا حبلتي كل تاخيرة بيها خيرة

اماني : جدة غير نور جانت تحبل وتذب اشو جمان كلشي ماكو واذا ع الدراسة ف محد كللها درسي وتزوجي

ام اسر : شهل حجي يمة اماني هوا اخوج مو رايد هسه سدي الموضوع

مريم : بس عمة اسر يحب الجهال شعجب جمان انصحج تراجعين

جمان كل هل حجي وانا بس اتنافخ : ان شاء الله اذا احتاج الامر اراجع بس اسر يكلي دراستج هم من الجاهل حاليا وهذا اختيارنا

غيرو الموضوع وبعدين كامو يصبون الغدة الوكت يمو بطيء بس علمود اريد نخلص ونرجع قبل المغرب واسر دز علينا حتى نطلع الحجية ما قبلت وكالت ضلو ويا هل جمهور للعشة اسر ما قبل وطلعنا واخيرا نور ضلت يم اهلها واحنا رجعنا للبيت

بليل وكلت لاسر وديني على اهلي ما عايدتهم خواتي مجتمعات قبل
كبل رجعت لبست الفستان مال عيد وطلعنا تمشينا ووصلني
جمان : ترا راح ابات

اسر : يلا خليج مدام عيد انا هم باجر معزوم ع الغدة عود اجيج العصر

جمان : تمام
دخلت ولكيتهم مجتمعين عايدتهم ودخلت عايدت بابا رد ببرود و طلعنا مر اليوم عادي ثاني يوم زهراء كالت اريد اروح العصر حتى علي يوديني عندي مراجعة يم الدكتور

جمان : ومفتحين بالعيد ؟

زهراء : اي سئله

جمان : صدك زينب اريد اسئلج (زينب ممرضة ) ليش يصير عندي بالادرار حركة وضل منا اسفل بطني توجع هالشهر كله بس اليوم زادت

زينب : خاف التهابات

جمان : شلون اعرف

ام جمان : روحي العصر ويا زهراء ع الدكتورة وفحصي حتى اذا اكو شي تنطيج علاج

جمان كمت خابرت اسر وسولفتله كال : اي احسن فحصي حبيبي مدا هيج شو ما كتيلي يلا انا العصر اجي اخذكم
جمان : خوش

كلت لزهراء خابرت علي علمود ما يجي عليها للعصر وبدلنا خابرني اسر وطلعنا ودانا دخلت زهراء ودخلت وياها من كملت مراجعة هية وشفنا البيبي جان بيها بنية احساس يجنن

من كملت سولفت الها علية كالت سويلي تحاليل سوينا وفصحتني سئلتني وانا اجوابها ب اي او لا ع الاشياء الي بية واغلبها اي

الدكتورة : ماما انتي عندج التهابات قوية وهذا سبب تاخر حملج راح اكتبلج علاج ولازمم تستمرين علية حتى تشوفين نتيجة وراجعيني مرة ثانية

جمان : دكتوري يعني ما احبل ؟

الدكتورة : لازم تعالجين الالتهابات ونشوف

جمان طلعنا لكينا اسر صاف السيارة ويدخن صعدنا وانا كدام
اسر : ها شكالتلج

جمان ومبرطمة : التهابات ولذالك ما احمل

اسر : عادي حبيبي بسيطة تتعالج تكتبلج علاج ؟

جمان : اي هاي
نطيت الورقة اله وكف يم صيدلية وانطته هم زهراء ورقتها وانطته فلوس

اسر : عيب عليج خوية
اخذ بس الورقة ونزل جاب علاجي والفيتامينات مال زهراء وصلناها للبيت واحنا رحنا لبيتنا من نزلت ما قبل ابدل وكال لاهله تحضرو خالة ما قبلت تجي ما بيها حيل اجى احسان وايات ووسام كادني وطلعنا رحنا ع الشط وبعدينا تعيشنا واخذنا سفري لخالة ورجعنا للبيت

ورا فترة انا مستمرة بالعلاج وطلعت نتايجي ناجحة بتقدير جيد الحمدلله وايات نحجت من الرابع اعدادي وصارت خامس

بدينا نتحضر لعرس رغد نزلت ويا البنات اشتريت فستان وبيوم الحفلة قنعت اسر ورحت وياها ع الصالون ورجعنا لبيتنا لبست الفستان وبدت حفلة المهر وخالة وايات ونور اجو هم
من دخل لبسها الذهب لبست عباية بس شاب مرتب وحلوين لبعض ربي يحفضهم وصرت اتذكر لحضاتي انا واسر

طلع ورجعت اركص ولزمتهم جوبي صدك حيل تونسنا وبالحنة هم الي صارت بليل بتت يم اهلي الي صايرة يمهم هوسة ثاني يوم هوا يوم العرس راحت ع الصالون انا مكيجت بالبيت رجعت ولبسناها البدلة وشغلنا الاغاني ركصناها شوي

هاجر : الله عمة شوفي بقينا بس انا وانتي وخلصنا منهم

ام جمان ضحكت : اي والله

جمان : ياااا ماما خلصتي مني ؟
حضنتها قوي

ام جمان : ههه وج خنكتيني
اجت الزفة واسر خابرني حتى اطلع وياه
طلعت وشغل اغاني ومشى ويا الزفة شوي ودار علمود هما بيتهم بمنطقتنا القديمة وراح تطول الزفة ف ما رحنا ضلينا نفتر شوي ورجعنا للبيت

اجى يوم 8/21 يوم زواجنا اني واسر صار سنة النا سوا واحلا سنة وابد ما متندمة عليه وصيت كيكة واحتلفنا وجابلي هدية وجان احلا يوم حرفيا

اسبوعين واحسان رجع فتح موضوع الخطبة مالت طيبة وكال حجة بعد ماكو شغل واشتغلت وفلوس وجمعت اريد تمشولي عليها

اسر : ابشر يول باجر يروحون عليهم شتريد بعد

احسان باس راس اسر : لك كفو من شاربك يخوي

ثاني يوم رحنا اني وخالة ونور على اهل طيبة اسر ودانا وعرف بيتهم من وداني عليها مرة
دخلنا استقبلتنا امها وكعدنا عرفت هذول عيالي ضلت تسئل عن الاحوال واشياء عادية بعدين خالة بدت تحجي
ام اسر : خية والله احنا جاييج بموضوع خير ونريد طيبة بنتج لابني احسان

ام طيبة : والله مدري شكلج اكيد رائيها ورائي ابوها هوا الي يقرر

ام اسر : اكيد يمة وجمان تحمد باخلاقها وشلون حبابة وابني تخرج العام وبدا يدرس بمدرسة اهلية الحمدلله واسئلو علينا وشوفو بيت الحاج ****

ام طيبة : والنعم منكم وان شاء الله كم يوم ونرجعلكم خبر و ميكون خاطرج الا طيب

فاتت طيبة سلمت وقدمت الجاي ومسوية نفسها هادئة متتت ضحك عليها

شوي واجى اسر ورجعنا للبيت كبل بليل خابرت طيبة : احجي وافقتو لو لا

طيبة : ههههه اوستحي

جمان : دنجبي واحجي شصار

طيبة : توني ع العشة ماما كالت لبابا واخواني وكالو نسئل عليهم ونشوف وبدت تتدلع ويريدون رائي بس عود استحيت

جمان : هههه لا مستحيل طيبة تخجل

طيبة : يا خجل بابا باجر اكللهم موافق وخلص انا ارفض هذا الصاك

جمان : ههه ادريج ادبسز

طيبة : الله ونصير بيت واحد انا وياج والله الا نخبلهم تحققت امنيتنا نكون سوا

جمان ضحك : الله وافقي بسرعة ولج
سدته ويومين ام طيبة خابرتني ونطيت لخالة ورجعتلهم خبر الموافقة هوا حاط اذنه ع الموبايل بس سمع كام يركص

اسر : اثكل يول عيب من شاربك وتتمركص ترا ابطل ما ازوجك

احسان : هههه ضل هددني من نقطة ضعفي وبعدين خوما اصير حقنة مثلك

اسر : هاي عليمن
وما نشوف غير احسان ركض متتت ضحك عليهم

ام اسر : بس تكول لازم تخلوها تكمل دراستها

اسر : اي عمي عجل خوما نبطلها

اسبوع وتحضرنا رحنا حتى نعقد قران اسر لبس دشاشة وعمامه وكلهم مشية زلم والنسوان عمته وام مريم واماني ونور واني وخالة والحجية دخلنا جوا جانت لابسة قفطان ومسرحة شعرها فدوة تنكرط كعدت يمها وسولفنا وبعدين صاحو حتى يعقدون وكفت ورا الباب واني يمها وسئلها اذا موافقة وبدون ضغط وهيج وجاوبته وتم العقد صارو يهلهلون شوي ودخل احسان الضحكة مالية وجهه لابس بنطرون وسترة ومرتب

لبسها حلقة وقطعو الكيكة وكالولوه اطلع هوا لازم فضحنا وطيبة سايحة ضحكت عليهم طلعو وبعدين خلصت الخطبة ورجعنا للبيت كالو العرس مو هسه لي نص السنة لانو باقي اسبوعين وشوي عن الدوام وكال ماكو داعي استعجال

انا رحت راجعت الدكتورة كلت قبل ما يبدي الدوام وانخبص
رحت كالت الحمدلله خافة الالتهابات وان شاء الله تحبلين رجعت كتبلي علاج وكالت هاهية بس يخلص لا تجيبين انوب لانو صرتي زينة بس اذا رجعت الاعراض تعالي

طلعت وانا مبتسمة كلت ع الي كالته كال : تريدين تحبلين مو يدلل الحلو وغمز

جمان كرصته : دمشي ولا تستحي بنص العالم
جبنا العلاج ورجعنا

ثاني يوم رحت على اهلي واخذت ماما ونزلنا ع السوك اريد اشتري كم شغلة واشتري كم لبسة للكلية لانو الاسبوع الجاي وهاي المرحلة الرابعة والسنة الاخيرة ولازم اكشخ الله واخيرا راح اتخرج .......

يتبع ........