وصلنا للبيت وطول الطريق علي عيونة حمر ومايتحاجة وطاير بالسيارة طير اني گاعدة بمكاني وارجف شگد جان رزاق عصبي بس قطرة بحر عصبية علي وصلنا للبيت نزلت من السيارة وارجف
علي: گبل فوگ اسلمين واصعدين احجاية زايدة ادفنج
سالي دخلت للبيت وهو راية وجهي اصفر
سالي: السلام عليكم
سعاد: وعليكم السلام هلايمة ليش وجهج اصفر
سالي: ماا....
علي: صعدي فوگ
سعاد: شبيك يمة
علي: مابية شغل مشتاق لمرتي
سعاد: لعد ليش اتنتر بيها هيج
علي: احسن
سعاد: يمة الله يستر
شيماء: الله يساعد البنية على ابنج ماينحمل
سعاد: سالي أصيلة تتحمل
في الغرفة
علي بهدوء كاتم الغضب: شعندج واكفة تتمضحكين وية مهدي واسولفين
سالي: موووو ه ه ه ه و و و و
علي بصراخ: احجي
سالي ببكاء: اهى اهى والله ماكو شي
علي بصراخ: لعد اشعدج واگفة يمة وتتمضحكين متعمدة وسوالف
سالي: اهى لا والله لا اهى مابيناتنة شي
علي بصراخ وعروقة مبينة: لعدددد ليش واكفة ويا
سالي: والله اطاني الملزمة مالتي چانت عندة
علي: والله وهسة اني اصدگ
سالي: ماامجبور اصدگ والاني مجبورة ابررلك
علي: لج هاي اجاوبيمن 😡😡 طاااااااا حتى بعد اتعديها واترفعين صوتج
سالي: اهى اهى ليش تضرب يعني تحجي علية بالموزين واتريدني اسكت
علي مسكها من شعرها : ولج لجاوبين افتهمتي لجااااوووبين
سالي: اخخخ شعري عوفني اهى
شمرها على الچرباية : بحياتي مماد ايدي على مرة بس انتي جبرتيني
دخل للحمام وضليت على الچرباية ابجي على حضي اووف عبالي اخلص من رزاق وأبوية ومرتة اجي هنا يستلمني علي اوووف الله خلقني بس للكتل اهى
علي: گومي غيري سلابج واتنزلين واذا فكيتي حلگج متلومين غير نفسج گووووومي😡😡
گمت دخلت للحمام وغيرت ملابسي واني بعدني اشهگ مو من الوجع بس مستهضمة حيل احسة ضربة غريب ذل خلصت اتوضيت وصليت ونزلنا نتغدا
سعاد: يلة يمة وينكم اتأخرتوا
علي: اجينة
على السفرة على الارض
شيماء: سامر فدوووة خالة باجر شوفنة سيارة انروح نرجع لكركوك
سعاد: يااا شعدكم بعد وكت خل تطلع السبعة
شيماء: لا هم يلة انروح اتعرفين البنات مدارس وجامعات
رسل: واني هم نرجع لكربلاء
سعاد:' شوف انتي الثانية شكو تروحين
رسل: والله خية اني هم ولدي مدارس وجامعات
سامر: اي اشوف يلة روحوا دخنة هرچتونة
سعاد: يا ادب سز ياحيوان
شيماء: هههههه دعوفي يشاقة
علي: اي لتحجين ويا هذا طايح حظة
سامر: اهاا حجة
علي: شگلت
سامر: كلشي مگلت
علي : عبالي
سعاد: يمة گومن لمن السفرة
نور: اي
سعاد: يااا خالة وين گايمة
سالي: خالة الم السفرة
سعاد: لا خالة عوفيهن هنة البنات ايشلنها بعدها سبعتج مطالعة ميصير
علي: يعني خل اتساعدهن شكو بيها هسة اذا طلعت السبعة واذا مطلعت ششنو الفرق
سعاد: معليك انتة بهاي السوالف گوم اخذ مرتك واصعدي فوگ اكيد تعبانة المگرودة موديها للدوام وهي عروس يلة گوم
علي: اريد اشرب چاي
سعاد: نور سوي چاي لخوج
علي: لااا خل مرتي اتسوي
سعاد: يعني شنو الفرق اذا هية وإذا نور
علي: هسة اني اريد اشرب من ايد مرتي چاي كفرت گومي سويلي چاي
سالي: اي حاضر
سعاد: استغفرالله منك يا علي
شيماء: خالة اشبيك ويه البنية مدگولي اشبيك
علي: اشبية بابا ردت من مرتي جاي بيها شي
سامر: ولله ناس متعافية هاي لو اني چا عبدتها
علي بغضب مكتوم: چا استحيت من هيج حجيت ساااااااالي
سالي: خير شكو 😨
علي: امشي صعدي مااريد زقنبوت
سالي: هذا خلص صبيت
علي بصياح : گتلج مااريد امشي صعدي متفتهمين
سعاد: والك اشبيك وية البنيه
علي: بلة رجاءا لحد يدخل
في الغرفة
علي بصياح: وتاليها وياج اشوه خلفتج حتى اخلص ومحد ايباوعلج شلللللللون الحل شنو
سالي: اهى اشسويت
علي: انتي تتعمدين هيج اسوين ولج اكو غير هاي الدشداشة الضيگة هاااا شلون لبستيها وتفتررين جوة
سالي: والله مو ضيگة
علي: شوفي ولج سامر من ايطب للبيت تنطمين للغرفة واي ولد يدخل النة اتصعدين فوگ حتى لو عمي لا قسما بالله العظيم اشوفج الويلات
سالي: اهى اهى
علي: انخمدي نامي
علي
من شفتها واكفة وية مهدي واحد من طلابي اتخبلت ماادري شبيه اتمنيت هيج اكضة اورمة من الكتل اني اتقدمت اني وهو راح صار العصبية من نصيب سالي اتقدمتلها وماردتها تحجي واتبرر لان مااتحمل مشيتها گدامي للسيارة وطرت بسيارة لو مالله ستر چا سوينة حادث دخلنا للبيت وامي ضلت تحجي مااهتميت صعدت وبديت احجي وياها ودموعها مثل المطر وتشهگ بين حجاية والخ نترت عليه وكلش اكره واحد ايسيطر علية ضربتها بكل ما الله اطاني من قوة طبعت ايدي عليه خدها گامت تبجي وهم رجعت تجاوب جرتها من شعرها حيييل خلتها اتعيط ذبيتها على الچربايه همزين دخلت للحمام چان جرمت بيها من طلعت هية دخلت وطلعت شفت ما أثر الضربة ثاري خفيتها بالمكياج اول مرة اتندم ورة اي شي اسوي نزلنا جوة اتغدينا وخلصنا گلتلها اسويلي چان وسوالف امي ماتخلص عيب ولا وميصير گامت اسوي چاي وسامر حچة عليها اني من يمي فرت حسيته يتغزل بيها والله جمالها مصيبة كل يوم مسوية سالفة من هل جمال صحت عليها وخليتها تصعد فوگ وصعدت وراها وضليت اصيح وهية مثل الطفلة تبچي ومنزلة رأسها طلعت حرگت گلبي بيها ومنعتها من اي شاب خالقة الله نمت على التخم واني افور من الغضب شسوي بيها هاي حلوة وين اوديها يعني كل ما اطلع لازم اسوي سالفة ادور هية بلا مكياج تحلى بالزايد شنو الحل وياها احبسها ياللهي نمت من التعب
عصراً 5:30
سالي
گعدت العصر راسي يوجعني وعيوني مورمة من البچي شفتة نايم على التخم غاط بالنومة گعدت دخلت سبحت وبدلت لبسة دشداشة عريضة اخاف انزل خاف سامر موجود طلعت وگفت بالدرج اسنط لان اذا موجود هو صوتة عالي ويضحك فيبين البيت صنطة نزلت جوة نور گاعد تقرة وخالة بالمطبخ
سالي: سلام عليكم
سعاد: وعليكم السلام هلا بنيتي
سالي: خالة اساعدج بشي
سعاد: لا خالة انتي بعدج عروس
سالي: خالة الله عليج اذا عندج شي گولي والله ضوجة خل اساعدج
سعاد: دتعاي ماطول لحيتي اخذي البتيتة گشريها
سالي: اي صار
سعاد: هذا اعليوان هم سوالج شي
سالي: هااا لا مسوة شي
سعاد: سالي گولي يمة لتخافين
سالي: لاخالة مسوة شي بس حجة وياي وهاهية
سعاد: اكيد
سالي: اي اكيد
سالي: خالة شنو راحوا الجماعة
سعاد: اي راحوا ب٣
سالي: يااا شگد عيب منزلت اودعهم
سعاد: لا يمة ماعليج عتب يمة فدوووة لچنتي النادرة شلون تگشر
سالي: هههه عادي هذا ولاشي من الي اسوي بيتنا
سعاد: يمة اتنضفين
سالي: انضف واغسل اماعين واغسل اهدوم واطبخ
سعاد: ياا هذا كلة اسوي
سالي: اي والله
سعاد: الله يساعدج اني نويرة مانة علية بالمسحات والكنسات والكم ناعون
نور: هااااااا اني مانة عليج
سعاد: عزززة بعنيج خرعتيني انتي مو بالهول اجابج
نور: والله رجلي حكتني واجيت اشوف تحجين علية سعودة مووو
سعاد: انجبي سعودة شنو ادب سزز
نور: لعد ليش تحجين علية
سعاد: مچذبة لعد مو كنسج اشلون ماچان من فوگ الفوگ والماعين من ادخل للمطبخ بس الماعين مغسولات الطباخ مال الجيران ميتنظف والسنگ والكاونتر
نور: والله موزين انظف تعاي شوفي صديقاتي اميرات
سالي: ميصير اتخلين امج تشتغل وانتي شعليج بصديقاتج تعاي شوفي اني من قبل لا اروح للجامعة انضف ومن ارجع عبالك ولامنظفة ارجع انضف من جديد والله من چنت بگدج والله مرت أبوية خلتني كل يوم اغسل البيت بالامتحانات الوزاري وبالگوة تخليني اقرة ومن جبت معدل ٩٥ اتخبلت گلتلي شلون بالغش ودخلت طب ومنتقمة علية بالشغل
نور: اي اني مااعرف اشتغل شسوي
سالي: ماكو احد ميعرف انتي بس اتخلين واهسج وشوفي
نور: اووي مابية.
سعاد: من اتجيب الاحساس للما يحس
وقت الأذان
دخل نزل علي من فوگ هسة يلة نزل مدري شيسوي فوگ نزل اتوضة وفرش السجادة وصلة اشوية ودخل سامر هم اتوضة وصلة اتفاچات كلش رغم هو علاقات وسوالف وضحك وايصلي حيل كبر بعيني اني هم صعدت ال غرفتي همة اتوضيت وصليت هواي احس بالامان بهذا البيت يعني وقت قبل وقت الأذان القران مشعول وقت الأذان الأدعية وكل الي بالبيت ايصلي ابد ميأجلون ابد من چنت بيتنا بس أبوية ايصلي واني والباقي كلهم لا خو ندى تشغل اغاني قريب ميأذن ورزاق يدخل ريحة العرگ تكتل اوووف شلون چنت عايشة اني ولو اهنا استاذ علي ممقصر علية بالدگ والرزيايل نزلت جوة شفتهم مخلصين رحت للمطبخ گمنة انصب العشة وفرشنا السفرة واتعشيانا حلووة هواي لمت العائلة خلصنا غسلنا الماعين سويت چاي وديتة نور اجت گعدت يمهم چان سامر موجود خليت وصعدت لغرفتي ورة ربع ساعة دخل إعصار
علي: حضرتج تستنكيفين اتگعدين يمنة لو شنو مااستحيتي من خلصتي درتي ضهرج وصعدتي هاا
سالي: استاذ شنو السالفة كل متدخل اترزلني يعني مو انت گتلي من يجي سامر لتگعدين يمة گبل تروحين لغرفتج اهى يعني مو حالة كول متدخل اترزلني اووف
علي: هااا اي..... وانتي ليش اتنترين تعاي اخذيلج راشدي
سالي
عفتة دخلت للحمام حيل ضجت منة شنو طاب طالع ايرزل بية گمت ابجي وابچي لحد مسمعت صوت الباب انرگعت عرفت بي طلع گمت غسلت وجهي وطلعت طلعت كتبي وقريت خلصت شفت الساعه ٩ نزلت جوة شفت خالة گاعدة ونورة
سعاد: هلا خالة تعاي ليش صعدتي من وكت مااشربتي چاي
سالي: خالة مو عندي باجر امتحان وصعدت اقرة
سعاد: هاا الله يسهلج
سالي: شكرا
سعاد: خالة اگلج سبعتج باقيلها ارببعة أيام تردين انسويلج حفلة لو شنو بنفسج
سالي: بكيفكم
سعاد: ماكو بكيفكم هية السبعة مالتج انتي گولي شتردين
سالي: خالة اذا مصير زحمة اني بنفسي اروح الكاظم عليه السلام
سعاد: عليه أفضل الصلاة والسلام والله خالة زين ماختاريتي
نورة : لا عليج الله خل انسوي حفلة حبابة خل نرگص
سعاد: يمةة راح اتموتني هلبنية بس مال رگص ياهو احسن الكاظم لو الرگص
نورة: هسة شحجينة
سالي: ههههه يلة انتي من اتعرسين سوي سبعة واني ارگصلج
نورة: اتعرفين اترگصين
سالي: ااااي
نورة : صدوگ
سالي: اي اعرف ولو اني ابد ماراگصة بعرس بس اعرف ارگص
نورة: زين انسوي مسابقة وانشوف منو اتفوز
سالي: تمام بس مو اليوم
نورة: تمام خوش
سالي: يلة اني استأذن
سعاد: روحي خالة تعبتي اليوم
سالي: تصبحون على خير
سعاد ونورة: وانتي من اهلة
في جهة أخرى
سامر: خاب متگلي اشوكت تزوج انتة مو حتى علي الي مئيسين منة ازوج وانتة بعدك
إياد: نايم على گلبك ابن الاوادم
علي: لعد متزوج انتة
سامر: هه ومنو گلكم مامزوج مزوج وعند طفل عمرة تقريبا ٥ تشهر
علي واياد: 😱😱هااااا
سامر: اي والله المرة من ليلتها حبلت
علي: ولك صدگ
سامر: لا اچذب
علي: شگلولك علينة مطاية واتچذب بكيفك
سامر: شعلية اني اذا انتو بسرعة اتصدگون
إياد: عووفة يولي
علي: إياد شخبار اهللك مناوين يرجعون
إياد: والله ياخي ماادري شنو سالفتهم يوم نرجع ويوم لا
سامر: شنوو معقولة ماحنوا للعراق
إياد: هذا واخوي العار يحش برأسهم شعدكم رايحين ومو امان ومن هل حجي
علي: شماله هذا شو راح للخارج ونسة المحنة
إياد: هو هذا اخوية من زمان
علي: يلة سامر أتأخر الوقت
سامر: اي يلة
علي
رجعنا للبيت امي گاعد ااطفي الضوايات سلمت علية وصعدت شفت الضوة مطفي دخلت لگيتها نايمة شعلت الضوة ماادري ليش اتقربت منها واتمعنت من ملامحها عبالك ملاك نايمة مثل الاطفال وخدودها حمر انتبهت على روحي رحت لبست هدومي طفيت الضوة ونمت
اليوم التالي
علي:
گعدت الصبح مالگيتها گلت اكيد بالحمام انتضرت اشوي ماطلعت اتقربت من الباب ماكو صوت دكيت الباب ماكو رد دخلت ماكو احد گلت اكيد جوة دخلت للحمام سبحت وخلصت عدلت نفسي ونزلت همين مموجدة اتخبلت هاي وين راحت
علي: احم لعد سالي وين
سعاد: گاعد تسبح بالحمام
علي: لعد مو اكو حمام فوگ عدنة
سالي: اتگول مو خاف يگعد علي ويتأخر
علي: لعد من ذيج الساع لهسة بالحمام
سعاد: لا هسة طبت لان چانت اسوي ريوگ خطية
علي: هااا
گمت اكل علكيف حتى أتأخر بس اريدها تتطلع ماكو ماادري شنو هاي التصرفات الي گاعد اتصرفها انتضرت شربت گلاصين چاي وهاي عاصية رحت اغسل شفت مااكو صوت بالحمام اتخبلت وين راحت غير على اساس بالحمام
علي: اشو محد بالحمام
نورة: قصدك سالي صعدت اتبدل
علي: هااا
ردت اصعد فوگ بأي حجة ردت اصعد ودگ التليفون مدير الجامعة اووف اخذت غراضي وطلعت
سالي
گعدت الصبح مطنگرة علية غسلت وجهي اخذت ملابس نزلت جوة شفت خالة دسوي ريوگ ساعدتها قريب مايريد ينزل گلتلها اسبح جوة دخلت للحمام سبحت شفتة بعدة گاعد اليوم أتأخر شعجب سحبت نفسي وأفلت ليفوگ بدلت نزلت جوة اتريگت ردت اغسل للماعين ماخلتني خالة گالت تتاخرين رحت للجامعة
درة: طلع البدر علينا
سالي: هههه صباح الخير
درة: والله ... همزين اذكرتيني يمة كلمن هيج تتزوج تنسى صديقتها
سالي: ماعاش الي ينساج بس لو تدرين اتعذرني
درة: دحجي خل اعذرج
سالي: سردت لها كل شي
درة: اووي مشعوطج شعوطة الله انشاللة
سالي: شسوي هذا حضي
درة: اوي الاستاذ اشكوكي هواي
سالي: كلش يلة امشي راح تبدي المحاضرة
درة: يلة
علي
دخلت للمحاضرة همزين شفتها ارتاحيت مدري ليش بس لاحضتها متغيرة ابد مشارك ومتباوع علية من اشرح گلت هاي اشبيها اليوم عود من اخلص اني ارجعها مو السايق واعرف خلصت محاضراتي رحت اشوفها ماهية مخلصة محاضرات من وكت استغفرالله اتنرفزت حيل رجعت للبيت شفتها گاعد اصب غدة ماشالت عينها علية باوعتلها بغضب وصعدت غيرت ملابسي ونزلت اتغدينا هم مشالت عينها من لمن الماعين نور تجي اتشيل القريبات مني صبت چاي نور چابتة صعدت فوگ اتانيها ماكو اتمددت على التخم انتضر مااحس على نفسي غير گعدت العصر اخذتني النومة گعدت هم مالگيتها
علي: استغفرالله شنو هاي صدگ عود
نزلت جوة لگيتها اتقري نور وهم مارفعت عينها علي طلعت وعيوني حمر من الغضب اضوج من اسوالف الچهال هاي طلعت رحت لعمي اشوف الحسابات والمحلات رجعت گام ايأذن دخلت ماهية اتوضيت صليت نزلت چانت اتصلي صبوا العشة وهم نفس سوالفها اني القاهرني ليش هيج مهتم الها مااعرف شالن الاكل ضليت اشوي گاعد بلكت اتخلص وتصعد ماكو ضالة بالمطبخ دگ السوالف صعدت بدلت خلصت نزلت طلعت رحت لاياد گعدنة گلت ارجع من وكت رجعت امي گاعدة ونور هي ماهية گلت جوز فوگ صعدت شفت الضوة مطفي دخلت شفتها نايمة لا هاي مصختها فتحت الضوة اتقربت يمها حركت ايدي يم وجها ماكو هاي صدگ نايمة بدلت وانطمرت
وهاي مرت اربع ايام على ابطالنا علة هل حال هو يلحگها وهية تشرد
يوم السبعة ؟
___________________________________
خلص البارت
بنات اتحدد موعد النشر كل يومين من نشر بارت ثالث يوم بارت جديد ادري دااشلع گلوبكم بس شسوي عذروني ورجاء مدام اتحدد موعد النشر عوفوا كلمة كملي اتوقعوا للبارت الجاي اغلب التعليقات كملي كملي هسة اتحدد النشر ورجاءا طلب وليس أمر اتركوا كلمة كملي
توقعاتكم للبارت الجاي؟
تقيم البارت من ١٠
البارت اهداء للجميع 😍😍
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!