رواية ازمة ضمير الفصل العاشر 10 - بقلم Rozaya1122

ازمة ضمير ... البارت العاشر
«للكاتبه روزايه»

توجعني الصور والذكره حسبة يوم
وبعدهه انفض الليل العله اجفوني انخط
وادور حب جديد ايلوكَلي من اشتاكـَ
وامسح كل رمح فوك الظهر شخبط
ربيت بديرة بيهه الموت فاعل خير!!
ما الهه خلك للحجيّ المصّفط
....

ثريا...
واكفه اغسل مواعين وبالي شارد محتاجه شغلات من السوك ولازم اكول لقيس الوحيد بالو طويل ويطلع وياي والله البقيه مايقبلون يمشون خطوه..

سمعت صوت فاروق وهو يحجي ويه اخوتي يگلهم عمر ابن عمي فلاح صادمتو سياره وانطاكم عمرو..

راح انروح وياهم وباجر انروح للفاتحه مو لخاطرهم بس زحمه كدام الناس ما اريد واحد يذكرنه بسوء وطولو بالكم ما انريد مشاكل..

شكد انقهرت هو الواحد عندو الله يساعد كلب امو كالت اريدو سند لا اخواتو الله يرحمو..

ثاني يوم كلنه اجينه للفاتحه عدنه كرايب جثيره وفاتحه جبيره اول ماطبيت دحكت ع بنات عمي منهارات...

بس دحكني لگحن نفسهن بحضني ويبجن انقهرت ع حالتهن شكد عزيز الاخ رغم هوطفل بس حسن بخساره جبيره..

امنيه لازمه بثوبي ودكول بابا ضربنه كلامهه خوفني.. نيران متغيره حيل وبيهه خوفه صايره مبينه من عيونهه مجرد ما ادحك ع الشخص اعرفو...

كعدت يمهن هديتهن بس خوفهن موطبيعي بنات رقيقات اجن من بغداد ترفات هين كلشي تغير الله بلانه بهيج اهل..

اشتعل گلبي نار واني ادحك جسم امنيه هاي الطفله البريئه جسمهه احمر ومشخط زادت ناري من حجلي قساوة ابوهن..

تخبلت اتمنيت عدهن اخ واحد من اخوتي والله ليعلگوا من رجلي ..ما اتذكر بيوم انمدت ايد عليه جانو ياكلون الكتل من دوني..

ما اتحملت لازم اخبر واحد من اخواني يخلصهن من فلاح الظالم خاصه من دحكت نيران ورجفتهه شكد عجبتني قوتهه وشخصيتهه بس الله اعلم شمسوي بيهه وهيج خايفه

ركضت للمر شفتلي جاهل كتلو روح صيحلي واحد من اخوتي كلو اختك تريدك بالعجل...

واكفه افرك بايدي بعصبيه واني ابدي الزم عماد وفلاح واحركهم شنو من بشر ليش هيج خلفتج ياجده كلهه عارات..

اجاني قيس كتلو بنات عمي مدري شبيهن وامنيه دكول بابا اذانه وخايفات حيل..

قيس.. ليش على يامال مأذيهن؟؟حاولي تعرفين من نيران وصيري حذره من بدريه..

... قيس راح اصيحلك نيران بس يصير مجال وتعالو احجو وياهه..

قبل مايصير الغده كالو انريد مواعين ماتكفي استغليتهه فرصه كتلهم راح اخذ نيران واجيب من البيت صح بعيد بس بالسياره..

كوه سحلت نيران ماترضى وصحت قيس اخذنه طول الطريق اسال بيهه وهي لامه نفسهه يم الجامه ..

نزلتهه بس اريدهه تهدء انطيتهه مي بس شفايفهه ترجف وتبجي...

كاعده بالمطبخ ودخل قيس بس دحكت علي طلعت تركض من المطبخ وعبالك شافت شبح اثنينه استغربنه ردت اروح وراهه بس كال عوفيهه ..

راح وراهه للديوانيه كلما يتقرب تبتعد وتاشرلو بيدهه بمعنى لا لا لا..

قيس.. نيران لاتخافين شبيج مفزوعه؟؟
.. لا لا تقترب روح الله عليك رووح..

... يولي يابه اهدئي منو مأذيج بس كولي من شنو خايفه؟
نيران.. انفعلت وكمت اصرخ كلهم نفس الشي هو بابا عمهم يعني هم يسوون مثله ..

واكفه بالزاويه واصرخ وقيس يقترب من عندي جرني من ايدي وصاح بيه بصوت خلاني انخلس بمكاني..

قيس.. كافي يولي شايل سجينه وخايفه احجي منو وياج من شنو خايفه وبطلي هالبواجي هاي..

نيران.. كعدت بالكاع بخوف ولكيت نفسي احجي لقيس بالتفصيل من يوم الي طلعوا من بيتنه وشسوه بيه بابا ...

تعذيب ماما وشلون شفته من الشباك ويوميه اسمع صوتهه والبارحه شلون عذبنه بدم بارد..

جنت احجي واشهك ما مستوعبه كلامي وخاصه علاقه ماما ويه بابا جنت احجي اكله قيس ما اعرف شيسوي بيهه بابا يوميه اسمع صوت انينهه بليل..

احجي وهو فاتح عينه ع وسعهه ومصدوم حيل راد يمد ايده على راسي من شافني احجي وارجف بس اتراجع...

قيس... ثريا تعالي اخذيهه تغسل وخليهه ترتاح شويه ...
نيران.. مدنكه راسي بالمغسله اغسل وابجي ثريا مخليه ايدهه ع ظهري كل جسمي يوجعني من ضرب البارحه ..

الالم الي بگلبي اكبر من الم جسمي احس نفسي منهاره ما اريد ارجع للبيت بس تخلص فاتحة عمر بابا راح ينتقم من عدنه..

اني حجيت لقيس ما ادري راح يساعدنه لولا حسيته عاجز بان يحجي حرف واحد مصدوم بكلامي..

ثريا.. تعالي نيران تعالي هين حبيبة اكعدي ارتاحي لاتخافين كلنه وياج ولد عمج ينشد بيهم الظهر انتي بامان انتي قصرتي ماحجيتي كل هاي المده جان وكفوا عند حدو..

نيران.. ثريا ما اريد احد يتأذى بسببنه اني يوميه اموت الف موته بابا انسان ظالم  مايخاف الله ماما جانت حاميتنه من عنده بس من كبرنه عرفنه نوعيته شنو..

ثريا.. اسمعي نيران اني اكبر من عندج بس موجثير بس من ادحكيني تلگيني اكبر بعشر سنوات ...

الدنيا علمتني اشكال الوان ردت اشياء بسيطه حيل وماصارت واتمنيت وحلمت بيهه احلام ورديه وللاسف ماتحقق اي شي منهه ..

تدرين شنو جانت احلامي؟؟ جانت بس ادحك عندي عائله من اب وام ويدافعون عنه ويهتمون بيه ومن نحتاجهم نرجع الهم ويكونون سند النه..

تدرين من جنه ازغار يتمرض واحد من اخوتي نظل كلنه كاعدين يم راسه ونسويله كمادات..

هذا ادهم اكثر واحد جان يعاني دائما يتمرض ويكوم يهذي ويصيح اريد امي يمه وينج ..

بس الله يدري بكسرة خاطرنه ولحد هذا اليوم احنه ماندري بيهه وين وشلون تخلي راسهه ع المخده وماتذكرنه

انتي عندج اب ظالم واني حالي من حالج امي ما اعرفهه وين بيا ديره بس الي ادري بي شردت من ابوي لان يكتلهه..

نفس الكلام الي تحجي هسه جانت جدتي حليمه تسولفلي ودكول شكاك ويضربهه وهسه ابوج مايفرق عنو يول الله بلانه بشياطين...

نيران.. ثريا اني خسرت دراستي حرمني من عدهه من جنه ابغداد يخاف من خالي لان جيران ومايكدر يحجي حرف واحد  بس من اجينه هنا بطش بينه وعبالك اعداءه موبناته..

... صيري قويه ودافعي عن امج واخواتج ابد لا تسمحيلو يمارس طغيانه عليكم ابد لاتخافين مدام عندج ولد عمي امني الهوه بظهرج عبالج راح يسكتون ع عملتو هاي...

نيران.. كلام ثريا مثل الي يحاول يصلح الزجاج المكسور احس بداخلي متحطمه كل تفكيري يم ماما احسهه بعد ماتقاوم وخاف اخسرهه..

ظليت بحدود الساعه احجي ويه ثريا تقريبا هدءت نفسيتي كامت طلعت المواعين وطلعنه بعد ماقفلت الباب ..

ثريا... اخذت المواعين وكتلهه يله خلي انروح سديت الباب وطلعنه جان قيس واكف مرتجي ع بنيد السياره والجكاره بحلكو...

مبين يفكر بكلام نيران الي كالتلو ماينعقل مبينه نيران داخلهه طفله والا ماكعدت تشرح علاقه ابوهه ويه امهه وتسالو دكلو ليش يخليهه تصيح وتأن..

وصلت يمو وهو بالو سارح كتلو يله قيس تاخرنه وخاف يصبون غده ...

لگح الجكاره من ايدو وداس عليهه واندار يريد يصعد بالسياره دحكت على نيران بنظره غريبه وخاصه هي باجيه جثير وحته تعبانه كوه تحرك نفسهه وتصعد ...

طول الطريق عينو عليهه بالمرايه ماشالهه لحظه عبالك اول يوم يدحك عليهه..

حقه اخوي نيران حلوه عيونهه وحواجبهه متعاكده وخشمهه منفوخ من البجي خدودهه صايرات حمر وكلساع وتمد ايدهه تمسح دمعتهه ..

نيران.. لاحظت نظرات قيس اليه بس ما اريد امل نفسي بشي صح معجبه بي من اول يوم شفته واني انعجبت بهدوءه وشخصيته بس ما اريد ادخل حرب بين كلبي وعقلي..

وصلت للبيت ركضت ع ماما عماتي منوماتهه بالغرفه كلش تعبانه كوه تاخذ النفس ..

مدري شصابني ابجي ولازمه ايدهه واتوسلهه دكوم اخواتي تخبلن وعماتي يهدن بينه بس ماما تعبانه كلش ماتكدر حته تفتح عينهه..

من البارحه هي بدون اكل ولا شرب وغير الضرب مال البارحه وفاتحه وهوسه بعد ماتتحمل ...

ادعي ع بابا بحرگه كلب فتحت عينهه كوه واشرتلي اتقرب الهه همست يم اذني بصوت خافت..

نيران انتبهي ع اخواتج وعينج ع البيت صيري سباعيه اغلب المعزيات شماته...

...ماما فدوه كومي اني ما اكدر بدونج عمر راح يم ربنه وطير بالجنه احنه وين انروح انضيع بلياج..

..ماما نيران اني مابيه شي بس تعبانه هسه اصير زينه بس روحي صيحي ابوج كليله امي متخربطه ..

... ركضت ليبرا ادور ع ابوي جانو يصبون غده اجه كبالي قيس من شافني اجه عليه..

قيس.. هايولي نيران شعندج طالعه بنص الزلم فوتي جوه..

... قيس صيح بابا كله ماما تريده ودكول متخربطه حباب صيحه ماما تعبانه..

.. روحي فوتي هسه اصيحو وناخذهه للمستشفى يولي شبيج خوافه من دحكت اول مره كلت سباعيه شو طلعتي جبانه ..

... اني خايفه ع ماما ما اريدهه تتاذى..
.. لاتخافين تعبانه حقهه روحي جوه هسه اصيحوا

... دخلت يم ماما ولازمه ايدهه رؤى اخذت امنيه برا لان بس تبجي دقايق واجه بابا كعد يم راسهه ..

ابتعدت بالزاويه واني اباوع بعيوني خله ايده على راسهه وباسهه من گصتهه ولزم ايدهه بحنيه..

فلاح.. بيان اعذريني قسيت عليج بس من حركه كلبي واني ادحك ابني الوحيد يموت بين اديه ادري اذيتج حيل يابعد گلبي.

بيان.. ابنك هو ابني وانت مو احن علي مني هاي حركه كلبك التحجي عنهه اني اضعاف اضعافهه  كلشي ما اكول غير حسبي الله ونعم الوكيل..

... كومي بيان اخذج للمستشفى حالتج تعبانه بعدين نحجي وحگج عليه..
.. مابيه شي بس انطيني حبايه مهدئه وحب ضغط من دواك لان ادري ضغطي مرتفع..

.. كومي لاتعاندين خلي اخذج لايصير بيج شي كومي حبيبتي..

لزم ايدهه بس ماما نترت ايدهه بقوه ودارت وجهه عنه كالتله روح اذا ماصرت زينه اروح  فلاح بناتي بناتي اذا الي معزه بكد الشعره بكلبك ما اتذيهن ارجع عليه اتحمل بس هنه زغار مايتحملن...

..اسكتي بيان نامي هسه ارتاحي باسهه من راسهه وطلع من الغرفه ..انطيت العلاج لماما ومددت بصفهه ادلك براسهه وهي مغمضه عيونهه ودموعهه ع خدهه لحدماغفت من التعب والالم...

غطيتهه وطلعت هوسه وناس هوايه ما اعرفهه بس عماتي اعرفهن عيوني ادور ع اخواتي خايفه عليهم اخذت امنيه ورؤى وكعدنه يم ثريا ..

شويه وصاح علينه بابا من خوفي حضنتهن اثنينهن وعبالك راح ياخذوهن من عندي يصيح واني ما اريد اكوم بس ثريا اخذتنه وكالت اني وياجن..

طلعنه للمضيف ورجلينه وحده تضرب بالثانيه كل ضني راح يعاقبونه كدام الزلم ..

دخلنه للمضيف محد اكو بس بابا وولد عمي بش شفتهم ارتاحيت اخذت نفس براحه وكعدنه ..

بابا صاحو علي اجو ناس واحنه بقينه وحدنه كاعدين كال فاروق البقاء لله بعدو صغير طير بالجنه ..

الاخ مايتعوض بس احنه ان شاء الله نصير الف عمر الجن كل الي اريدو من عدكم تخلون ابالكم عدكم 5 اخوه يدافعون عنكم..

..مبين فاروق يعرف بالصار واكيد قيس حجاله كل الي كلته بهاي اللحظه خفت لا يتعاركون ويه بابا ويرجع علينه..

فاروق يحجي وما انحس غير امنيه كمزت من مكانهه وركضت حضنت فاروق حته هو ارتبك حركتهه مفاجاه..

امنيه.. فاروق اني احبك خلصنه من بابا يضرب بينه وبماما...
فاروق.. نزلهه وخلاهه بصفه يولي امنيه هاي صارت وبعد ماتصير لاتخافين اني اعلموا ابوج..

نيران.. نظرات قيس وترتني احس الكل يعرف دايباوعلي رؤى من النوع الهادىء ماحجت اي شي بس امنيه حجت الاول والتالي..

فاروق.. خلي تخلص الفاتحه ويصير خير احنه ماعدنه حرمه تنضرب وانتن حالجن من حال ثريا مانرضاهه تنهانن ..

... يامحلاتهم شنو من شباب وشلون طمنونه بكلامهم طلعنه من المضيف واني بالي يم قيس يتخيلي لو هو صدك نظراته غريبه...

خلصت الفاتحه ورجعنه لحياتنه ماما تعبانه وبابا يتوسل بيهه ليل نهار واشوفه يبوس بيهه وبراسهه بس ماما لاترفض ولاتستقبل ...

ما ضربنه ولامد ايده بالعكس اجه رضانه وباسنه كلنه خاصه امنيه حضنهه وباسنهه من راسهه وكال حقكم عليه مرات اصير ظالم..

ياربي تعبت هذا الانسان غريب انحبه ونكرهه هسه الي يشوفه يكول ونعم الاب بس قبل ايام شيطان كدامنه معقوله مريض وبي حاله نفسيه...

ثريا...
ورا ماخلصت الفاتحه رجعنه لبيتنه واخوتي ع اشغالهم واني اكرب شغل ليل نهار ...

اكلهم راح يصير عندي سوفان بالركب من وراكم ليل نهار اغسل ملابس واكوي واصبغ احذيه واحضر حمام ..

مره بزعت وتعبت حيل كتلهم ع الاقل حسو بيه شيصير لو واحدكم هو يفتح المي الحار لو يغسل قميصوا..

اجاني الجواب من ايوب وليش عيني ست ثريا مليتي الله يرحم ايام زمان حته صدريتج اغسلهه والله لا اطلعهن وحده وحده شكم مره غسلت صدريتج ..

ادهم.. وين انروح لفضيله العميه نكلهه ثريا تعبت تعاي اغسلي اهدومنه ..

اوس.. لا لا ما توقعتهه من عندجن هاي تاليتهه تعيرنه بالملابس والحمام وينج حليمه شوفي ثريا كبرت وكامت تولول ومابيهه حيل..

ثريا.. من صدك ردت ابجي وتجمعت الدموع بعيني من كلامهم مدري شبيه واني اتذكر ايوب جان حته الحذاء هو يشدو اليه وهسه متعاجزه من قميصو..

لو ادهم ييشل جنطتي لان ثكيله ويخليني امشي بخفه وهو ظهروا مكسور..

اوس جان يوميه يمشطلي ويظفرلي ويشتريلي القراصات بنفسو ...

اول مره اتذمر عليهم ما اتحملت نزلت دمعتي ويه طبت فاروق كلامهم اثر بيه حيل..

فاروق.. ثريا منو وياج ليش تبجين التفت ع ادهم وكالو يول ادهم شسويتلهه ؟؟

ادهم.. ماسويتلهه شي شو هي متحمله علينه ثريا زعلتج اني؟؟

ثريا.. انوبه زدت بالبجي واني ادحك الخوف بعيونهم وكاموا من مكانهم واتقربو عليه..

فاروق لمني جوه ايدو ويسال بيه شبيج بنيتي منو من هذوله الصعاليك زعلج؟؟

..محد زعلني اني حجيت عليهم لان جثير ملابس بس اتذكرت من جنت صغيره هم اعتنوا بيه وبجيت شلون احجي هيج اني..

اوس.. خرب ثريا وكعتي كلبي ما ادري بيج صايره رقيقه تعاي يابه خلي احبج من راسج الي اتذكر وحبني من عندو..

فاروق.. ثريتي انتي كبرتي وبعدج حساسه غير اتشاقو وياج ندري تعبتي واحنه متعبين بس شنسوي كدامنه عمر طويل يلا نتزوج ..

... لا اني ما اتعبكم من عدكم بس شغله وحده خلصوني منهه حبابين بطلو سالفه الكوي متت من عندو خاصه ادهم باليوم اكويلو 5 مرات..

ادهم.. والله احجيهه لبدريه هاي السالفه يا اختي وين اروح عندي مره وماكتلهه اكويلي تحملي وطوري من مهاراتج خاصه بكوي الدشداشه..

... يداهر بيه واني ويا مثل مايكولون رويسيه نتكاون وصوتنه عالي الا يصيح فاروق يله نسكت...

بهذا اليوم طلعت القبولات بس للاسف لازم فرحتنه تتنغص وماتكمل بس اريد اعرف امي بيمن توحمت وهيج فرحتنه ناقصه..

ادهم انقبل كلية ضباط وهذا اختيارو..

ايوب ادارة واقتصاد وماقبل لان راد كلية ضباط وماطلع اسمو مع العلم معدلو اعلى من ادهم بس كال راح اقدم فنون لان هو رسام بشكل موطبيعي..

قيس واوس قدموا كليه طيران مدني بس لازم نحزن وماانلحك نفرح بالبقيه..

اوس ما مقبول ع رغم معدلو عالي بسبب نظروا لان عندو قصر ولابس نظارات ...

بيومهه حته ما تعشه وطلع يم جماعتو وكلنه حزنه لاجلو لان هذا حلموا من جان صغير يسوي طيارات ورقيه ويطير..

هو الي سوه واهس لاخوتو وقدمو خارجي لان جان مصر يحقق حلمو بس الله ما راد يكتبلو...

قيس.. التوأم مال اوس هو الي انقبل كليه طيران بس من دحك حزن اوس مالحك يفرح بيهه وكلساع يكلو والله اعوفهه ما اخذ حلمك..

اوس.. لايول انت شعليك الله كاتب هيج بالعكس راح افتخر بيك انت الي تحققو...

بيومهه خيم الحزن ع البيت ايوب ضايج واوس نفس الحاله حته مانعرف انواسي منو ..

بس دائما موجود سندنه وعزنه وفخرنه فاروق ابونه العمود الي مستندين علي بدونه من زمان نوكع ونصير بخبر كان...

احتواهم مثل كل مره وكعد يهديهم ويطمنهم وانرسمت معالم الراحه ع وجوهوهم...

فاروق.. لحد الان ما اتيقنتو ان الله اذا راد شي يقول له كن فيكون"

الله ماراد اوس يحصل هاي الكليه لان الو حكمه بيهه ومو من نصيبو وايوب نفس الشي مامكتوبلك تشارك ادهم بنفس المكانه..

لو انعرضت كدامنه كلشي انريدو وكل الي بنفسنه يعني لو اندحك حياتنه حسب ما نحب واندحك حياتنه حسب الكاتبو الله راح نبقى طول العمر نشكر ونحمد وما نوفي هاي النعم...

ياخذ شي ويعطي شي احسن من الي ردتو ابد لاتصيرون ناكرين لنعم رب العباد دحكوا وين جنه وين صرنه ودحكوا بيدكم شكد اموال بعد ماجنتو تتحسرون ع عشره الالف...

اجذب عليكم لو اكلكم راح اظل اتفرج عليكم واني ادحكم ماتحققون ولو ربع من احلامكم..

الي راح اكولو تنفذو وبدون نقاش تعرفوني زين الكلمه الي اكولهه بشقه وبالجد ما اتراجع عنهه..

ايوب راح تقدم قانوني ع حسابنه من وارد المجمع يسد ويكفي..

واوس معدلك عالي حرامات يروح هيج قدم قسم تخدير  ابغداد  سامع عنو يكولون تعين مباشر بي واني وياك اسندك لحدما تلبس القبعه..

قبل ماتحجون اعرفكم تعارضون بس ابد ما اريد كرامه وعزة نفس بيناتنه المجمع مالتنه كلنه والوارد مالتو خير من الله ...

المحلات ماجريهم وهم مستفادين منهن نستغل هاي الفرصه والكل يحقق احلاموا مثل ماكتلكم ولو شي بسيط..

ما اريد تحسون بالذنب ودكولون فاروق همل حالو...
كل الي اريدو منكم اسمع اسمائكم بفخر واشوفهه تلمع ومن يذكروكم كدامي ارفع راسي بيكم ...

ثريا... ما اعرف اوصف كلام فاروق اخوتي ماناقشوا لان جانو عاجزين عن الكلام مواقف فاروق من صغرنه لهذا اليوم وهو ساندنه وحامينه .

رغم كبروا بس يحسهم اطفالو يخاف عليهم لايحزنون ومستعد يفني عمروا بسبيل راحتهم ...

اعرفهم احبائي ماراح يقصرون وراح يخلون فاروق كدام عيونهم ويحققون الي يتمنى..

من هاي الكعده وكلام فاروق تغيرت حياتنه جذريا تغيرت تغير كامل وبدت مرحله ثانيه اول مره اعيشهه بوسط اخوتي...

يتببببع.... حبايب بعد فتره الانقطاع التفاعل موشي والقصه ماماخذه حقهه حرامات مااريدهه تنظلم مثل القبلهه ويخرب واهسي بيهه واختمهه بسرعه همتكم ويايه حته تصعد القصه لاتقصرون ... احبكم