رواية ازمة ضمير الفصل التاسع 9 - بقلم Rozaya1122

ازمة ضمير ... البارت التاسع
«للكاتبه روزايه»

آفه..
تبدل حجيكم ليش
معقولة العمر أثر
هلي خلو الحچي مدثر
أنه
شبيدي العمر ركضه
هلي لو بيدي ما أكبر
...

ثريا...
مرات انكون بقمة السعاده والتفائل حته ننسى حزنه وننسى كلشي موحلو مر بطريقنه ..
بس مرات تكون هاي السعاده مؤقته وماتلحك حته تعيش لحظاتهه البسيطه تجينه لحظات تنزلنه لاوطأ مستويات الحزن وتخلينه حته ننسى اللحظات السعيدة...

تاخذني الصفنات وبالي يعيد كل لحظه حزن ويرجع يقابلهه بلحظات السعاده واكعد اقارن بيناتهم ياخذني المطاف بابتسامه رضى واني احمد ربي ع هاي النعمه الي بيهه...

فززني صوت ادهم وهو يصيح ثريا اكوي قميصي اليوم معزوم بعرس ..

كمت من مكاني ورحت طلعت ملابسو بديت اكوي بيهن وهو يدندن يمي باغنيه فوك النخل فوك يبه فوك النخل فوك ...

ادهم.. ثريا شدكولين برأيج يجي يوم وتتحقق الامنيات ؟؟

..اذا تسعى بيهه وتكون مصر تتحقق بس كلشي بالحياة يتطلب اراده وعزيمه وصبر موبسهوله يجي..

.. ثريا اني مفكر اقدم خارجي مثل ايوب واوس حيل حاب اكمل سادس واقدم كلية ضباط بس مرات اتردد اكول خاف ما اتوفق..

.. بس خلي عندك اراده وتوصل وتصير احلى ضابط قابل الي صاروا احسن من عندك ..
.. ديله لاتحركين القميص استعجلي تموتين ع السوالف..

... شكد فرحانه باخوتي رجعوا لدراستهم بقه بس قيس لازم نخلي يرجع لان بس فاروق اخذ شهادة السادس...

بهاي الفترة طلع قبولي كلية الصيدله جامعه الانبار يامحلى هذا الشعور واني اشوف سعاده اخوتي اكثر من عندي ...

حياتنه هادئه واخذني قيس سجلني بالكليه وبديت اداوم واخوتي من الشغل للبيت كلهم قدمو ع السادس حته قيس اقتنع وكال ع الواهس..

كل هذا الدعم جان من فاروق حته وفرلهم كل الي يحتاجو بسبيل يوصلونهم من الاساس شاطرين ويتابعون محاظرات ويقرون رادو بس شهاده ع الاقل يقدمون بيهه ع الجيش ...

ماكو اي شي جديد مستورين والحمدلله واخوتي امتحنو وننتظر النتيجه وشغلهم خير من الله بي ومايكثر ...

فاروق جان بالنسبه الهم عمود ومستندين علي دعمهم بكل مايملك ليل نهار لازم الشغل وهم يمتحنون ...

من جنت اسألو جاي تتعب جثير يكلي بس خلي ينجحون ويروح تعبي..
....

نيران...
حالنه مثل ماهز عمي انسحب كلشي من عنده ورجع يشتغل تكسي وبابا رجع لوضيفته ...

البيت كالو فاروق سمح نكعد بي بس بشرط نبتعد عن طريقه وممنوع نتواصل ويااا بس بعد ما اخذ حقه وانسجنوا بابا وعمي عشر ايام بس ماكدروا يحجون لان الشيخ ناصر جان مهددهم يرجعهم للسجن..

بهاي الفتره انتشرت الجماعات المسلحه ويوميه فلان قائد ميليشيه يذبح بالسنه والشيعه محد خلص من عدهم..

الانبار الكل ماخذ نظره عليهه كل الي يعيشون بيهه سنه بس بالعكس جانت اكو فئه جدا قليله من اخوانه الشيعه والحب والالفه بيناتهم...

من انتشرت الاحزاب زرعت الطائفيه الشيعي يصيح السني يكرهني والسني كذلك بس من نرجع للواقع هاي الطائفيه سببتهه الاحزاب والي كل همهم يخربون الناس ويزرعون الحقد بگلوبهم ...

حاولت ارجع لدراستي بس بابا ماقبل حته رؤى بطلهه بس امنيه بصف سادس ابتدائي ويكول هم ابطلهه بس تنجح...

بيوم منهن صار نقاش حاد بينه وبين ماما لان تريد تروح لاهلهه اوتسمع اخبارهم مايخليهه ومانعهه من الاتصال حته التليفون الارضي شاله وهي بس تبجي ع اهلهه..

بيومهه ماما طلعت المتحملته كله وصارت تعيط وتتعارك وهو ماقصر من سب وغلط وفشار مايلبس علي ثوب..

بيان.. انت من يانوع فهمني صار 18 سنه متحملتك لخاطر بناتي كافي مليت من عندك ومن جبروتك ..

... سدي حلكج لاتخليني اكوم اكتلج وتكعدين تنوحين..
... سهله عندك تكتل وترجع ترضي وكانما الكدامك حيوانه بدون مشاعر انت انسان مريض ساعه السوده الشفتك بيهه لومابناتي اخاف عليهن من اب مثلك ظالم جان درت ظهرك واريد اشوف وين تلكاني..

كامت ترادد بي وتعيط وهو كذلك كام من مكانه هجم عليهه مثل الوحش كتل مو بانصاف وعبالك عدوته طول هاي السنين احنه انكول بابا يحب ماما بس صار مرتين يمد ايده عليهه..

يكتل بيهه وتصيح نيران فوتن للغرفه مارادت نسمع الكلمات البذيئه الطالعه من ابوي الي اول مره اسمعهم وعبالك الي كدامه بنت شوارع مومرته وعرضه..

كاعدين بالغرفه اني واخواتي ونبجي وعمر بي مثل الحاله النفسيه يصرخ بصوت عالي..

لا ماما لاتضرب ماما بس محد يسمعه اهدي بي بس جان منفعل حيل وهو طفل عمره 9 سنوات ويشوف كميه العنف كدامه...

انقطع الصوت والباب انسد حيل بسرعه طلعنه نركض ع ماما نايمه بالكاع والدم ينزل من حلكهه مجرم شلون انطا كلبه ياذيهه هيج..

كوه كومناهه ونبجي غسلتلهه وخليتهه تمدد ع الجربايه بس مو ماما الحلوه الهادئه انسانه مكسوره محطمه...

ماردنه نعوفهه وحدهه رغم شكد كالت روحن نامن بس جنت مصره اظل يمهه ...

بس من اجه بابا طردنه وسد الباب ولاكانو شي صاير رحنه لغرفتنه شويه ونامن اخواتي واني كمت من فراشي للمطبخ..

سمعت نفس الاصوات الي مثل كل مره اسمعهه وانين ماما مثل المخنوك كلش واضح كل يوم يزود واحسهه ماتتحمل بعد وع لحظه نفقدهه..

طلعت برا وانداريت ورا البيت جان الجو نهايه الصيف  ويعوفون الشباك مفتوح حته يفوت الهوه جنت متعمده اروح بس اريد اعرف شيسوي..

تسللت ع كيف واني امشي ع اطراف اصابيعي ماخفت ابد رغم صوت الحيوانات برا ودنيا ظلمه ردت اكشف جرائم بابا واخلص ماما من شره..

مديت راسي ع كيف البرده يهفي بيهه الهوه وجان انصدم بالمنظر الي شفته طول عمري ماراح انسى ...

دخيلك يارب العالمين احس اعصابي اتشنجت والالم يعصر بكلبي والهوه شح عليه...
لحظات الم على صدمه اختلط عندي الشعور كل جوارحي حسيتهه صارت شعله من نار..

اشوف ماما مربطه اديهه والنذل الي بيوم كلت علي سندي ودعيت ربي يحفظه مستلذ بتعذيبهه مثل الافلام...

يضرب بيهه ع اماكن حساسه وتحاول ماما تخلص نفسهه وتكتم صوتهه جانت بدون ملابس وعبالك موانسانه والهه كيانهه وكرامتهه...

ماكدرت اظل واكفه هي كلهه لحظات واحس الموت اهون عليه من هذا المنظر البشع واني اشوف ماما الي دائما دكول علمودك صابره هلكد متحمله وساكته..

رجعت للغرفه واني ارجف مثل السعفه ماما حبيبتي تتعذب ليش ساكته شلون ترضى بهيج ظلم خلي احنه طبنه مرض هي شلون جاي تتحمل كل هالقسوه..

للصبح اني كاعده ولافه نفسي بالشرشف وابجي المنظر مايروح من بالي معقوله كل المتزوجين هيج ليش يعذبهه مويكول احبهه ؟؟ ليش ماتنهزم من عنده؟ هوايه اسئله دارت براسي ومالكيتلهه اجابه...

هذا الانسان الي من جنه اطفال مانعرف معدنه شنو السبب من ماما جانت تسوي كدامنه ملاك وحته من يتعاركون تحبسنه بالغرفه طلع هيج يسوي بيهه ..

رغم عمري 17 بس ما اعرف العلاقه الزوجيه شنو مجرد يتخيلي بوسه وحضنه وواحد ينام بصف الثاني لا تلفزيون ولا كتب ولا انترنيت ولا عندي صديقه تحجي بهيج شغلات جنت عميه...

ماجنت اعرف اكو نوع اسمه سادي والي هو بابا من هذا الصنف من كبرت بديت استوعب شويه شويه طلع انسان مريض من يومه واحنه السبب كاسرات ظهرهه....

ثاني يوم كعدنه الصبح ما اريد اشوف وجهه حته ماتريكت الا طلع من البيت بس احس نفسي متأذيه حيل مجرد ما اسمع صوته كلبي يوكف من الخوف..

ماكدرت احجي ويه ماما لان ماتقبل وراح تحاسبني اكيد ظليت ضامته بگلبي...

حسيت نفسي موطبيعيه يتملكني الخوف بكلشي خاصه من اشوف بابا وعمي وحته لو اسمع صوت رجال مااطلع ابد حته لبيت عمي ما اروح يتخيلي كل الرجال هيج..

صار عدوي النوم اخاف انام ويجي بابا يسوي بينه هيج اطرد الافكار من راسي وارجع من جديد افكر تعبت حيل ...

رؤى تسالني شبيج صايره تخافين من خيالج بس ماعندي اجابه الهه واظل ساكته...

بين يوم وليله تغيرت جنت قويه وابد ما اخاف بس هسه مجرد ما اسمع صوت رجال اكوم ارجف اخذت نظره كلهم هيج بغرفه النوم وكدام الناس ملائكه واطفالهم مايدرون..

شكد اتمنيت اكدر اتواصل ويه خوالي واحجيلهم ويجون ياخذونه بس ماكو اي تواصل ولاتليفون وممنوعين من الطلعه المشكله خوالي شيعه تركمان ومايكدرون يجون...

ثريا...
شكد ما احمد ربي واشكره اظل مقصره هذا البيت سعاده بذاتهه اخوتي مرتاحين وعايشين حياة طبيعيه...

بيوم النتائج عدنه 4 بصف السادس گلوبنه نار جان الوحيد ايهم مامهتم يكول هو احنه ماعدنه حظ لا تفرحون ولاتتخيلون هسه تجيكم محمره برغم شكد تعبوا بالقرايه..

بيومهه قيس الي راح يجيبهه والباقي طلعوا للشغل يكولون خلي انلهي نفسنه مانظل نفكر لان هاي اخر فرصه كدامنه...

للعصر واجه قيس تلكيتو من الباب واني اسال بي بشرني قيس شطلعتوا؟؟

قيس.. ع كيفج يولي عبالك انتي الي بسادس ناجحين كلنه الحمدلله ..
... لگحت نفسي وحظنت قيس ودموعي تجري فدواتك ربي اذا رزقت عبدك ...

... ومعدلاتكم شكد؟؟
.. اني 74 وايوب 66 وادهم 60 واوس 85 ...

... الف الحمدلله اهم شي اوس كون ينقبل كليه طيران ويفرح بيهه اكلك مارحت كتلهم راحوا للمجمع..

... هسه جنت يمهم كتلهم بس اكو تجهيز بضاعه وهوسه يتاخرون اكلج لاتسوين عشا راح اجيب جاهز ...

ثريا... رب العباد ماينسى عباده حاشاه رزقنه من اوسع ابوابه وعله شأنهم ويبدون حياة جديده...

شكد تمنيت جدتي حليمه موجوده وتفرحلهم لو موفرتلهم كل سبل الرائحه جان اعلى معدلات جابو بس الحمدلله ...

دائما قيس يكول ان تصل متأخرا افضل من ان لا تصل ابدا...

وفعلا صح راحت عليهم سنوات طويله بس الحمدلله كدروا يحصلون الشهاده...

شكد ضحكنه بهذا اليوم وخاصه ع ادهم شلون كسلان اقل معدل بيهم...

فاروق.. يول ادهم لو دافع روحك شويه عاد تحصلك كليه زينه..

ادهم... لا ما اريد كليه اني اقدم كليه ضباط يابه يمين بركبتي اذا ما اسجن ابوي باول مهمه متحمل علي ولا جاي كلبي يبرد منو..

فاروق.. ادهم موكلنه ننسى هم رجعنه ابوك بحالو احسبو مات اذا تخلي دافع الحقد والانتقام ماراح توصل راح تصير انسان فاشل..

قيس.. هسه عوفو عماد شوكت ينفتح التقديم؟

ادهم.. ورا الدور الثاني اكلك يول قيس قدم طيران ويه اوس احسلك والله مواصفاتكم مطلوبه بنيه وجسم وين لاكين هيج شباب ...

قيس.. الله كريم الكاتبه الله يصير وين ماتريد توكع ما بيه حيل افكر...

ثريا...
بهاي الفتره اني نجحت للمرحله الثانيه وحياتي بالجامعه عبالك اعداديه ماعندي صديقه مجرد سؤال وجواب واني من الاساس تعودت اكون معزوله بسبب الفگر الي جنت اعاني من عندو...

من الجامعه للبيت لاعندي تليفون ولا من النوع اتفيك واكون صداقات لان اغلب البنات الوياي متصنعات ويحاولن يذمن ويقلدن ع اللبس لذلك متجنبه الكل..

ومن ناحيه الشباب اصلا نادرا ما اكول السلام ما اريد بيوم اخذل اخوتي كلما اتذكر تعب فاروق انزل عيني وما احجي ويه اي واحد لان اكو نفوس ضعيفه ويألفون حجي..
...

نيران..
بيوم منهن العصر ماما تخبز واحنه كاعدين يمهه سمعنه صوت سياره قويه وصوت ناس وهي تصيح لا لا ...

ممنوع علينه الطلعه ظلينه كاعدين بس شويه وتكسر الباب طلعت امنيه تركض وهنا جان نهايه الحياة السعيده بالنسبه النه..

عمر اخويه الوحيد ضاربته سياره وكاتلته ابمكانه صوت صريخنه ولوعه ماما وهي تركض حافيه بحد ذاتهه دمار...

اجه بابا يركض واخذه من حضنهه وركضوا بي للمستشفى بس هو مات ضربه قويه براسه ودمه ترس الشارع جان يلعب طوبه وجايه سياره ضاربته وراح عمر...

جنت فاصله عن كلشي بس الي اتذكره صريخ عماتي والبواجي وكالو عمر مات وناس اتجمعت ويواسون بماما اسمع يكولون خطيه عدهه بس هالولد بس بنات ..

ما ادري شصابني حسيت بابا راح ينتقم من عدنه ويحملنه السبب حشكت نفسي بزاويه الغرفه واتخيل منظر عمر وهو مدمه...

ابجي حيل هيج احس بلعومي يتشحط من الحرگه ساعه اتخيل عمر وبعد ماعندي اخ يصير سندنه وساعه اتخيل بابا شراح يسوي بماما لان كالهه لاتخلي يطلع بس هو كال بالباب ما اروح بعيد...

كمت اتقيء من التفكير والخوف احساس ماينوصف مجرد ما اتذكرته هسه انعاد من جديد...

ما ادري شكد مر بس اتجمعت الناس وماما فاقده لازماتهه النسوان وهي تضرب براسهه بالحايط...

اخذوا عمر يدفنو وسمعت بابا يكول لامنيه اليوم اذبحجن ورا شلون مات وعبالك احنه السبب..

زاد خوفي واتمنى تنفتح الكاع وتضمني ولا يمارس وحشيته علينه وع ماما وهي بهاي الحاله ...

هوايه ناس يمنه وصوت البجي ونوح ماما ولا يروح من بالي لحظه ...

ب11 بليل الكل راح وكالو باجر نجي للفاتحه بحكم بيتنه صغير وبابا والرياجيل رجعوا كعدوا ابيت عمي عماد...

من فرغ البيت دخل علينه مثل الشيطان اول مالزم ماما بالحزام يضرب بيهه ويكلهه اليوم اموتج ورا...

ابدال مايكعد يواسيهه كلب والده ومحروك ابدال مايكعد يقره قران ويستغفر ربه ...

هالمره كدام عيونه يكتل بيهه وبدون انصاف امنيه من خوفهه سوتهه ع نفسهه (ادررت) ورؤى صوت شهكتهه لسه اتذكره..

بعدما شمر ماما جثه اندار علينه بابشع الالفاظ وعبالك بنات شوارع 3 محصورين بالزاويه ويضرب بينه بدون رحمه ...

اخواتي يحتمن بيه ويسحبهن من شعرهن ويمدهن بالكاع ويرفس بيهن ...

ماما تحاول تحمينه بس حيلهه مهدود نصرخ ومحد يسمعنه جان صوتي عالي حيل بس اريد واحد يخلصنه من عنده ...

شمر الحزام وطلع واحنه مكرفصين يم ماما ونمسح بجروحهه دمعتهه تنزل مثل الشلال وهي دكول روحن للغرفه ابد لا اطلعن اني اتحمل انت صغار...

اخذناهه كوه يمنه وقفلنه الباب اخاف يستولي عليهه بليل للصبح ماغمضت عيونه وامنيه بيهه خوفه صارت كلساع وتصرخ ...

ماما نايمه بفراش عمر وتحجي حجي مامفهوم فاقده ماتدري بنفسهه رغم جروحهه وجسمهه التعبان...

ثاني يوم فاتحه وهوسه وكوه نمشي من الضرب شفت ثريا بنت عمي اجتي اني واخواتي حاضنيهه ونبجي ...

امنيه دكلهه ثريا خلي فاروق يكتل ابوي اذانه بس رؤى تسكت بيهه ...

حسيتهه حنونه الى درجه اخذتنه للغرفه اني واخواتي وسدت الباب تحجي وتواسي بينه وكامت طلعت ملابس النه لان ملابسنه من البارحه من السحل والكتل لازكه علينه ...

احنه الكبار انبدل وحدنه بس هي بدلت لامنيه بس نزعتهه شهكت وكالت يا يمه منو مسوي بيج هيج امنيه؟؟

تباوع علينه وتسالنه واحنه دموعنه تجري شكد صعبه انكول ابونه هذا امنيه كلش منهاره تشهك وتحجي..

ثريا بابا ضربنه احنه وماما اني اخاف من عنده وضرب نيران هواي ..

ثريا... كسر بايدو يارب كدرتو عليكم والله اليوم الا اخلي اخوتي يوكفوا عند حدو ..

رؤى.. لا ثريا بس يتعاركون ويا يرجع علينه احنه انخاف ع ماما مريضه..

... لا ماتخافن مدام عندجن ولد عم محد يكدر يطخلجن طرف اصبرن اليوم والله الا اخلي يطيحون حظه ...

لاتزعلن احجي علي بس هذا حرامات يتسمى اب لو ياخذ جزاتو لو ناخذجن يمنه عبالجن اخوتي يسكتون اذا شافو امنيه هيج متاذيه ...

بدلن بين ما اشوف قيس لو فاروق واحجيلهم...

يتبببع....