رواية ازمة ضمير الفصل الاول 1 - بقلم Rozaya1122

ازمة ضمير ... البارت الأول
«للكاتبه روزايه»

أخ يعيوني شكثر
تهوى البجي
وأخ ياصدري شكثر
شايل حجي
وأخ ياضهري يعينك الله
ولاحصلتك حايط علي
تنتجي
وضمهن همومك يكلبي واصبرلهن
وين تلكاه اليسمعك
حتی تكعد تشتكي....

...

بيت من البيوت القديمة في  محافظه الأنبار  بهذاك الزمن رغم مساحته الجبيره وموقعه الجميل بس يعتبر من البيوت العتيقه ومثل مانسميهه بحياتنه (الهيكل)...

كان عباره عن بيت ركن كبير بحدود 500 متر يحيط داير مدايره سياج من سعف النخل مرتب بأنتظام يستر البيت  الوحيد بهاي المنطقه هو هذا البيت هيج تعبان بقيه البيوت الي تحيط بي مرتبه واغلبهه بناء حديث...

ادفع الباب الجان بدون قفل بس حبل مربوط بحديده بصف الباب ادخل لهذا البيت الهاوي امشي بخطوات ثگيله واني ادحك يمين يسار واركز بكل جزء بي ...

مع كل اشراقه شمس وفجر جديد يتجدد عندي بصيص الامل بتغير الحال...

دحكت عن يميني صحيات قديمه وبيهه برده مختفي لونهه من  الشمس صديت لجهه اليسار حديقه جبيره بيهه انواع الزرع  والاشجار والرائحه الفواحه ماليه المكان وزايده هذا الخراب جمالا...

الطرمه صبه تعبانه محفره امشي واتعثر بيهه من كدما قديمه مديت ايدي على باب المطبخ وطلعت المفتاح من جنطتي فتحتو ودخلت ...

رجليه تمشي وكانهه مسيره لگحت( شمرت) جنطتي بالكاع بوسط الديوانيه وكعدت ادحك على نفسي وملابسي المدرسيه والجنطه الي كدامي..

جانت الساعه ب12 ونص الظهر هسه رجعت من المدرسه صدريتي لابأس بيهه بس جديده ونظيفه على الرغم هي مالت العام ...

برغم شكد اسمع كلام يحز بنفسي من البنات وشلون نفس ملابسي وبس صدريه وقميص واحد عندج بس ماباليد حيله...

جنطتي وزعتهه منظمه اليونسيف نيلي وبيهه علامه بيضه بالوسط بس هم لابستهه هواي وتنكطع واخيطهه صار 3 سنوات مامشتريه جنطه ...

درت عيني على البيت خالي من الاثاث بس جودليات مفروشات بالديوانيه والاستقبال والتلفزيون  هذا القديم مخلينو على طبله حته قليل ما نفتحو  ...

اليوم اتمعن بكل شبر بهذا البيت الي ضم طفولتي خاصه لان  اليوم الكلام الي سمعتو جرحني جثير ... من كالتلي وحده من البنات انتي فگر وبيتكم الحيوانات ماتعيش بي...

مااريد اكون ناكره لنعمه رب العالمين بس يبقى الكلام يحز بالنفس ويأثر وخاصه بهيج مرحله حساسه بعمري...

تنهدت واخذت جنطتي وكمت للغرفه  بيهه بوفيه عليهه شبه فراش وتحفيات عاريه ع شكل ملائكه ومواعين من كل شكل 3 مواعين هذا الورث الوحيد الي حصلنا من بيت جدي ...

بدلت ملابسي وطلعت للمطبخ اسوي غده قبل لايجون اخوتي من الشغل تعبانين ومايلگون اكل...

اليوم احبائي الخمسه كلهم ماراحوا للدوام لان اكو بيت محتاج عمال وراحوا يشتغلون على الرغم عدهم امتحانات بس كالوا نعوضو بغير امتحان والمدير يعرف وضعهم ينطيهم اجازه ...

طلعت العدس  هاي الوجبه السريعه عندي بسرعه بديت اطبخ تمن وعدس وادحك ع الساعه لان موعد جيتهم ب2 ونص ..

كملت الطبخ وطفيت الجدوره ورحت صليت مريت على غرفه الولد لاگحين( شامرين) ملابسهم كل قطعه بجهه النظيف رجعتو بكنتورهم والوسخ اخذتو للحمام ...

اجمع بيهم واضحك على هوستهم ولايكلك شباب كل قطعه بجهه والوسخ والنظيف سوه لاگحيهم...

اغسل بالملابس واتخيلت يجي يوم ادحگلهم عرسان من ارجع من المدرسه وادحك زفه احس گليبي يصير قطعه جمر...

اخوتي كبروا والي بكدهم عايشين بنعيم الا احبابي يركضون على العيشه ويادوب يطلعون فلوس الايجار ومرات نبقى ايام متواصله ناكل نفس الاكله لان ماعدهم شغل عايشين ع اليوميه وكلنه طلاب مدارس ...

غسلت ملابسهم وطلعت اشرهه ع الحبل لفحتني نسمه هوه بارده هذا الجو بده يكسر وراح يجينه الشتا هسه احنه بنهايه شهر العاشر  ...

غمضت عيني بالم  اسوء فصل بالنسه النه  ما اخلي كارتونه ما اجمعهه بس بسبيل اسد الشبابيك المكسوره  واخوتي يكعدون من الشغل من ورا الطين والمطر ...

امشي اجر بخطواتي واني اتذكر حياتي وطفولتي اتذكر كلشي عندي ذاكره ماتنسه ابد وتسجل باستمرار اتمنى انصاب بالنسيان ع الاقل اتجاوز شكم ذكرى مؤلمه ....

....

قيس... يول ايوب ناوشني( انطيني) الطاسه مال الاسمنت البيدي خلصت...

ايوب.. قيس رحمه لامة محمد انزل كافي يول ايدي اكلهه الاسمنت مالابس جفوف( كفوف)..

قيس.. بس هاي البيدي خلي نگضيهه( نكملهه) وانزل ماتسوه تظل ع باجر وابو البيت مالنه خلكوا يظل يشمر حجي واني ما اتحملو ...

اوس.. كوم ايوب روح غسل واني اخبط بمكانك لو تروح يم فاروق وادهم شغلهم اسهل وتلگاهم هسه راح يحلون ...

ايوب.. لا يول راح نگضيهه بس اليوم نسيت الجفوف وانعل ابليس الاسمنت اكل اديه اكل ..

قيس... واكف ع السكله مال البناء والشمس تضرب براسي واخوتي حيلهم انهد بس لازم نگضي اليوم  حته باجر نكدر انداوم..

مرت سياره اسمهه بروتون موديلهه حديث خليت ايدي على كصتي اضلل اشعه الشمس وحته ادحك زين لصاحب السياره...

اجت عيني بعينو سوه نفسوا ما يعرفني لومن غير صوب شخط السياره ومر بسرعه...

ادحك ع اوس وايوب واكفين بنص الشارع ومخلين ادينهم على خصرهم والحسره باينه على وجوهم ...

اااي ابونه هذا ابو الخير وهاي السياره الو واحنه نشتغل عماله ومايدري شلون عايشين وشنو من ايام صعبه نمر بيهه ...

خلصت البيدي ونزلت ماكو كلمه تعبر عن الاسى الي نحس بي اخذنه الطريق كلو ساكتين وكل واحد بداخلو الم يعجز عن التعبير عنو لحد ما وصلنه لمكان شغل فاروق..

نمشي بالدرب مالتنه ونحجي لفاروق ع عملة ابوي وشلون دار وجوهو عن ولدو بس فاروق بس يهز براسوا ماحجه اي كلمه تخصو...

اخوي الجبير فاروق بس ما اعرف بشنو يفكر شكد احاول اتقرب ولو لجزء بسيط على اليدور براسو بس ملتزم الصمت ...

مرات الانسان مهما يحاول يصارع الحياة بس مايگدر نتيجه ضعف بداخله ...
شكد نحاول نحصل اي شي انريده بس للاسف من نرجع لواقعنه المؤلم كل احلامنه الورديه تتحطم بثواني...
....

انه ثريا  مواليد 1986  الاخت الاصغر والوحيده لخمس شباب كلهم اكبر من عندي وبين كل واحد لو سنه لو اثنين...

احنه شبه ايتام ابونه وامنه عايشين بس للاسف تخلوا عنه واحنه زغار ودارو ظهرهم النه وعشنه طول ايام حياتنه بلا اهل...

اتربينه ابيت جدي اهل ابوي وجديتتي ام ابوي هي الي جانت مسوؤله عنه وعن تربيتنه...

امي وابوي اصلهم من عشيرتين مختلفات من اهالي الانبار بس جيران وبينهم علاقه قويه متزوجين وصاير عدهم 5 ولد بس المشاكل مافارگتهم ...

السبب ابوي من النوع الشكاك ويكولون جان حابس امي ويشك بيهه ويضربهه لحد ما اجه اليوم الي طفح بيهه الكيل وامي شارده لاهلهه وهي حامل بيه...

زعلانه بحدود 4 اشهر وابوهه واخوتهه مصرين يطلكوهه لان ابوي متكاون وياهم وغالط وسابهم وهنا بلانبار دور العشاير وكل واحد يكول انه وبس...

بيت جدي اهل ابوي حالتهم الماديه زينه وناس كافين شرهم حته ابوي ماعندو اذيه على احد بس من شردت امي بليل اظلم والكل دره جنتهم شارده متخبل بساعتهه...

عباله راح تبقى تتحمل الكتل بسبيل جهالهه بس امي اختارت حياتهه وعافت كلشي وراهه وكالتلو حته الولد اخذهم بس طلگني ...

جان ماقابل يطلك يكول عندي 5 ولد وين اوديهم شكد محاول يرجعهه ومامخلي مشيه مادازهه عليهم بس اهلهه موخوش اوادم فضلوا الطلاك بسبيل ياخذون الغايب مالتهه وحته ماقبلوا الولد يبقون يم امهم...

جثير اطراف مدخله بس للاسف خوالي وامي اصروا ع الطلاك وبوقتهه جان مهرهه غالي لذلك هلكد مصرين ومحد حاول بيهم يدخل طرف خير الكل كال ماندخل...

بزع ابوي وطولت السالفه وكلهه كامت تحجي علي طلكهه واخلص منهه يوميه زعلانه وشالعه كلبك...  كايلهم اطلكهه بس تجيب وتنطيني الطفل وهي ماكايله لا بس المهم تخلص من عندو...

ابوي عنده 4 اخوات وكلهن متزوجات بنفس الانبار وعندو اخ واحد اسمه فلاح عايش ابغداد من صغره لان معارض ابو من ورا زواجه من بنيه تركمانيه وعايف اهلو ورايح ...

اسمع عنو يكولون مدير مدرسه وعندو ولد واحد وبنات 3  وينعم بالراحه واتنازل عن عاداتو وتقاليدو بسبيل حبه ودار ظهرو عن الانبار واستقر ببغداد ...

ورا ما جايبتني امي وعمري يوم واحد  شايليني باللفه ولاگحيني ع ابوي يكولون بهذا اليوم ابوي متخبل شلون هيج عدهه كلب وعافت ست جهال منو الهم..

محاولين يهدونه لان كلساع يريد يهد على اهلهه بس كلشي فات وبعد مايفيد وعافتلهه ابنيه عمرهه ساعات ودارت ظهرهه...

بس جدتي بالبيت وابوي واخوتي الخمسه زغار ابوي من غضبه يرجع ع الولد يكتلهم ويكلهم شراح يكبركم ومنو يربيكم بس جدتي جانت توكف بوجهو وماتخلي ...

جدتيتي دكول من زعلت امج وطلبت الطلاك رايحه تقنعهه وكايلتلهه حته انطلعج ابيت وحدج مع العلم ماكو احد بالبيت بس جدتيتي ...

دكول جانت رافضه نهائيا وكالت لو تسجلولي الاملاك كلهه مااقبل ارجع حتلو ساعه ...

ولج عدلي بدلي هاي الجهال منو الهه 5 ولد والسادس ابطنج ويجوز ابنيه ليش تكسرين بختهم ...

ماقابله ابد بحيث دكول حته ماحترمتني واجه ابوهه واخوهه يسحلون بالولد ويكلولي اخذيهم...

لسه اتذكر لوعه ادهم الصغير عمره سنه ويفرفح لازم حجابهه ويبجي من العياط ...

اتذكر ايوب لازم رجليهه ويكلهه روحي ويانه ابوي يكتلنه...

قيس واوس يتوسلون بيهه برائه الطفوله بداخلهم يكلولهه احنه نغسل مواعين وانظف بس ارجعي...

فاروق مثل الصنم شلون الحايط واكف كل الحقد والغل بعيونو وهو يدحك امه شلون تدفع باخوته تالي جمعهم وطلعنه بهذيج العصريه الكشره...

امي وراهه ب6 اشهر متزوجه بغير منطقه بعيده عن منطقتنه وكالعاده يكولون ابوي هم زادت حالتو وكلساع يكلهم شلون فرطت ب6 جهال ...

جدتيتي تسولفلي كل هاي الاحداث دكول جابوج لحمه حمره وبس تبجين حرت الجارات وياج وما اعرف شسويلج عماتج ماينطن من نفسهن بحجه عدهن بيوت والتزام وابوج واحد مابي خير اعتكف ورا امج...

الولد صاروا شرانيين ويوميه يضربولهم واحد بالمنطقه ومن يجي ابوج يلزمهم واحد واحد يكطع الحزام عليهم ....

جانت جدتي تحجيلي التفاصيل دكول بيوم منهن واحد كاتل ايوب واخوتج كلهم هادين علي ومخلين دمه بطوله واهل الولد اجو هادين علينه ...

ابوج ماقصر لزم اخوتج حبسهم بلغرفه وجابلهم الصونده من برا وكل ضربه والله اسمع صوتهه واني برا صحت وملخت روحي عوفهم بس هو من يومه هيج نفس الكتل جان يكتلو لامج...

فتح الباب وطلع ركضت عليهم بعد ماتفلت بوجهو وطردتو من البيت وظل شهر كامل كلما يجي اطردو لحدما جابلي عمومته ورجع للبيت ...

طبيت عليهم لكيت الزغار محتمين بفاروق الجبير وضامين نفسهم بحضنو وكل الضرب جاي بظهر فاروق...

دكيت ولطمت  واني اشوف ظهرو شلون مشخط بس ماخلاني الزمه دفعني وكام جنت ادحك نظرات الغضب بعيونو رغم صغر سنه بهذا الوكت عمرو 7 سنوات وانتي عمرج شهرين...

حرمت ع ابوج يطب البيت وكمت اكعدلهم بلباب وكل الي يحاجيهم اكلهم اضربوا طلعوا دمه صيروا اسباع ...

ردتهم يصيرون زلم معدله واول مايحاسبون امهم وابوهم على السوو بيهم اني جنت بظهرهم واكبر واحد ما اخلي يطخلهم طرف...

استسبعوا هواي ودحكوا منو ساندهم بحيث من يمشون بشارع كلهم سوه كل الجهال تخاف منهم لان ايدهم والضربه ...

يوميه اجمعهم بليل احجي وياهم اريدهم گلب ع گلب ما اريدهم بيوم يختلفون ويفترگون ...

اوصيهم اكلهم اني واخوي ع ابن عمي واني وابن عمي ع الغريب انتو ماعدكم ولد عم ولا ولد خال ...

انتم نجوم وكعت من السما وهاي النجوم ماممكن بيوم ينطفي ضواهه دومكم لازمين ايد بعض وتكاتفوا ولا تخلون لواحد يستغلكم...

يابنتي  لو ميتين ابوهم وامهم ع الاقل اكول يتامى بس من اسمع بامهم متزوجه وابوهم مامهتم الهم واشوف الحزن بعيونهم ياكل بروحي...

شلون ولد ينحطون بالكلب حته حجايتهم ناشفه ومن يرحون ويه اخوي بديوان يكول عبالك زلم عليهه العتب بس ظلموهم اهلهم....

من عافتكم  امكم تكفلت بيكم  اكثر شي تعبوني انتي واخوج الصغير ادهم عمره سنه وحده يزحف  واني مره جبيره ورجليه ماتساعدني...

بيوم منهن جمعت عماتج وتعاركت وياهن كلهن بيوتهن قريبه كتلهن يوميه ع وحده تجن لولد اخوجن مااكدرلهم وحدي وصدك عماتج صارن يوميه ع وحده تجي تكمل كلشي وتروح...

لحدما تعبنه من هاي الحاله وقررنه انزوج ابوج وهو الله يسلمه كام يطب يتعارك يطلع يتعارك يريد مره كلت اخلص منه وازوجه ...

رحت ع كرايبي خطبتهه وحجيتلهه وضع جهالهه كالت احطهم بعيوني بس طلع حجيهه دغش حطت بعيونهه تراب ...

زوجنه ابوج وجبنالو حيه عدهه اربع روس ماكعدت ويانه غير شهر وكالتلو الا اطلعني ابيت وحدي...

هو ماعندو امكانيه لان كل الاملاك تحت وصايتي ماله حق يتصرف بيهه راد يقسم البيت ويكعدهه بمشتمل...

واني فكرت منا وغاد اشوفلي واحد من اخوتي احمله مسوؤليه يحول قسم من الاملاك الكم حته من اموت ماتضيعون ...

اعترضت اني وكتلو روح لجهنم وما انطيك غرفه من البيت وتحلم اخليك تقسمو هوبز وصيح بس ماعندي كلمه تمشي فوك كلمتي وطردتوا من البيت ...

طلع ابوج وسكن ابيت بنفس المنطقه وعاف جهالو وماسأل عنهم ابد وصارت المسوؤليه براسي وليل نهار ابجي على حال الولد ...

اوصله حجي بيد ولد عمومته اكلهم كلوله جهالو  كبروا وبنته تعبتني زغيره يكول مشكلتهم اتحمليهم لو تخليني اوزعهم على اخواتي ...

جنت من اسمع حجيه اخذ العصا مالتي واهد علي للبيت اشعل اهلو كلهم بس شيفيد اني مره جبيره والي مايسوكه مرضعه سوك العصا ماينفعه...

من اتزوج غسلت ايدي من عندز وبديت اعتني بيكم بس تعبت حيل سجلتهم بالمدرسه واتابعهم واروح وراهم لو ادز الفلاحين يوصلوهم ...

اشوفهم مكسورين خاطر ودمعتهم تلالي بعيونهم عندي راتب جدج التقاعدي وعدنه زرع وكيعان خير من الله ومحصول زراعي يجينه يعني عايشين بنعمه ...

ماخليتكم تحسون بنقص ابد بس يبقى حنان الام والاب اله دور اشوف بعيون اخوتج اليتم ويقارنون نفسهم ويه الي بحلهم بس الله قسملهم ام واب شهوانيين...

دائما جدتي تسولفلي عن اخوتي وتعلمني ع اطباعهم تلزم ايدي وانه عمري عشر سنوات دكلي صيري الهم ام واب حته لو انتي الصغيره ابد لاتعوفين اخوتج واديرين ظهرج انتي الثريا الي تنورين حياتهم ....

هذوله اخوتج 5 احزام ظهرج وسندج لاتفكرين بمصلحتج من تكبرين وتعوفيهم صيري حبيبه الهم...

ماراح يظل الحال مثل ماهو راح يتغير الزمن وتمشي السنين ويكبرون اخوتج اذا شفتيهم حزنانين صيري دوه الهم وعالجيهم واذا شفتيهم فرحانين ارفعي ايدج لرب العباد وادعي تكمل فرحتهم...

كل كلام جدتي حافظته ودائما اتذكره واستعيده براسي وارجع اخذ عهد ع نفسي اكون وياهم لاخر نفس...
....

احبائي الخمسه...

فاروق الجبير وقيس واوس توأم اصغر من فاروق بسنتين
ايوب فرق بينو وبين اوس وقيس سنه واخر واحد ادهم اكبر من عندي بسنه وحده...

جنت اشوفهم شكد يتعبون رغم صغرهم بس جدتي ماتقبل يشتغلون دكلهم ادرسوا وصيروا شي جبير حته تاخذون حقكم من ابوكم وامكم ولا تغفرولهم ذنبهم ابد...

مرات يطلعون للبستان بدون علمهه ومن تدري بيهم تزعل عليهم وهم يكلولهه احنه انريد نعتمد ع نفسنه ...

علمتني هوايه شغلات خلتني رغم صغر سني بس احس نفسي مره جبيره حته طبخ علمتني بس ما اشتغل دكول تعلمي للزمن اذا دار ...

جانت تاخذني وياهه وانروح لمدرسة اخوتي نسأل عليهم فاروق بصف الخامس علمي والبقيه اصغر ...

افتر وياهه ع المدرسين وتسال عنهم واحد واحد ودكلهم اريد اوراقهم جدتي حليمه جانت مره حكيمه الكل يحترمهه والمدرسين يعرفوهه لا جدي حجي ومعروف قبل لايموت ...

اتذكر كلام  كل مدرس تساله يكلهه حجيه ام عماد ونعم التربيه والاخلاق يسوون الف طالب عنده اب وام ...

تكعد بالاداره ويجيبولهه مي واني بصفهه وتكعد تتناقش ويه المدير ع وضعهم ودرجاتهم ودكل للمدير هذا المدح كله مايوكل خبز اريد اخلاقهم شلونهه؟؟؟

المدير كالهه يمه حالف ابوسج من راسج ع تربيتج هاي وكام وباسهه كالهه اني اعرف قصتهم كلهه واعرف انتي الي مربيتهم...

حجيه لاتجين بعد احفادج ابطال شاطرين حيل ومتفوقين واخلاقهم حلوه  ...

كل مرحله عدنه طالب متفوق ومن نرجع للسجلات نلكاهم من الاخوه الخمسه ...

وهي دكلهم ماريد درجاتهم تنزل عن التسعين اريدهم زلم عربان مايعوفون حگهم ويتاكتلون عنه والف واحد يحسبلهم احساب ...

واريدهم بنفس الوقت مثقفين وصاحبين شان وكون بشهادتهم يخلون اكبر واحد يحترمهم ويقدرهم...

جانت تطلع وهي فرحانه تبوس بايدهه وتحطهه ع كصتهه ودكول الحمدلله اني اريد اوصلهم وما اخلي شماتهم يفرحون بخسارتهم....

ترجعني وياهه للبيت تاخذلي اجازه ويجينه فاروق يرعد عصبي الى ابعد حد يكلهه شلون تجين وراي واني رجال شكبرني وتخلين الطلاب تضحك عليه ..

الطلاب يكلولي جدتك اجت تسال عليك رحمه لابوج بعد لاتجين اتفشل كدامهم مقدر تعبج وخوفج بس اني جبير موزغير ...

... فاروق لاتعلي صوتك عليه اذا الله انطاني عمر اجيك حته وانت بالكليه وافوت للمعلم واكله شلونو فاروق بدروسه..

من تحجي هيج تخلي يشيط للسما وينطفي يكلهه الطلاب تسمعني حجي وواني ما اسكت وهي دكله يغارون من شطارتك ولان ماعدهم جده تسال عنهم...

جده اروحلج فدوه بعد لاتجين اني اليوم كتلت واحد من اجيتي واول مره اوكف بلاداره مذنب ...

ماعليك بيهم هذوله نفسهم راح تضحك عليهم واولهم ابوك وخوالك فاروق انت العمود الي يستندون علي اخوانك خليك قدوه الهم ...

بعد مايخلصون مناكر هي ويا يروح يحبهه (يبوسهه) من راسهه ويكلهه البركه بيج بدونج نضيع ...

حيل حياتنه حلوه ونادرا ما انشوف ابوي يجي صدفه حته ناسيته وامي ماشايفتهه ولا اعرفهه ابد وفاروق اكثر واحد حاقد عليهه يكول لحد يكول امي ماعدنه ام كولو لجدتي حليمه يمه...

جان فاروق صارم ويانه معلمنه ع نظام ممنوع نتجاوزه حته اخوتي البقيه يخافون منه وجدتي دكول هو هذا سندكم وعزوتكم ....

عماتي يجن  كل يوميه مامقصرات ويانه بس الفضل كلو للحجيه حليمه مره قويه كلمتهه وحده كل الاملاك تحت امرهه برغم كلو باسم جدي بس هي دايره البستان كلو...

شاء الله تعالى واجانه القدر واني بعمر 10 سنوات على شكل ضربه خلتنه نوكع للكاع ومن يومهه هذا حالنه...

كعدت الصبح ادور ع جدتي افتريت البيت كلو وهي ماكو امشي واصيح يمه حليمه جدتي وهي ماكوو ..

مرات تروح ورا البيت عدهه زرعات تعدل بيهن رحت ادحكلهه وين وانصدم صدمه عمري جده حليمه نايمه بوسط الزرع ...

يتببببع....