رواية ازمة ضمير الفصل الثاني 2 - بقلم Rozaya1122

ازمة ضمير ... البارت الثاني
«للكاتبه روزايه»

چنه نحلم
چنه واحنه إزغار كل عصرية نلتم
نلبس جناح الكواغد
نركض اويّ الغيم حافين وعلينة الليل يلتم
چنه شبعانين ماندري الخبز ياهو اليجيبة
صافي مثل الماي أملنا
وبطرگ لعب الشوارع
لا جگاير ، لا سياسة ، ولا حبيبة

...

طلعت اركض من البيت ادور على جدتي شفتهه نايمه ع وجهه بالزرع ...

ركضت عليهه احرك بيهه واكعدهه وهي ماكو كل رد لازمتهه وابجي واصيح يمه حليمه جده اكعدي سمعوا صوتي الفلاحين واجو يركضون...

شالوهه من عندي وفزعوا الناس واني وحدي اخوتي كلهم بالبستان شويه وكلهه تكومت يمنه وعماتي يصيحن ...

كل الي عرفتو بهاي اللحظه جدتي ماتت وكالو اثر جلطه قلبيه راحت وعافتني اتذكر اخر شي كالتو الي قبل ايام انتي عزوه اخوتج انتي امهم وابوهم .....

عمري جان عشر سنوات بهاي الحادثه واتذكر كلشي ولحدالان تجي ع بالي حنيتهه وخوفهه علينه ...

ومناگرهه ويه فاروق وهو يداهر بيهه وهي دكلو الا اخطبلك بنت خالك حمود وهو يكلهه اسويهه دم للركب...

شفت اخوتي اجو ويبجون على جدتي ركضت شمرت نفسي بحضن فاروق جان جامد الى ابعد حد حته مايبجي مثل البقيه بس اخذني بحضنو ويسكت بيه...

طفله بمعنى الكلمه ماشفت اي حنان غير حنان جدتي حليمه يوميه انام بحضنهه وتحجيلي قصص ايام زمان حيل تاذيت عليهه ...

افتقدتهه هواي ابجي واخوتي يبجون وياي بس من انشوف فاروق كلنه نسكت انخاف من عندو لان يصيح ع اخوتي يكلهم لاتبجون جنكم نسوان ...

بس مرات اشوف عيونه حزينه بس مايبجي ابد اسأل اوس فاروق مايحب جدتي ليش مايبجي يكلي لا يحبهه بس فاروق هو ماتنزل دموعه بسرعه...

بعد وفاتهه صارت روحي باخوتي خاصه قيس الا انام بحضنو يلعب بشعري ويقرالي قصص مال جدتي يله اغفه ...

البيت صار فارغ يجن عماتي يمنه وابوي يوميه يجي بس الكل يدور مصلحتو بهالزمن...

ورا وفاه جدتي باشهر الكل صار يداعي بحصتو حته عمي ابو بغداد اجه وهو حته ما اجه للفاتحه اجه ويريد حصتو مشاكل ودعاوي بالمحكمه وانباع كلشي...

جثير ناس حجت عليهم بعده تراب امهم مانشف وهم يدورون ورث وخاصه عمي ابو بغداد تكاون ويه ابوي من ورا البستان ...

حته عماتي يوميه وحده ادز رجلهه ع ابوي تريد حصتهه مابينهم اي محنه ادخل بيهه عم ابوي يله حلهه...

وحده من عماتي متزوجه ابن خالهه وهو هذا خابص نفسو ويركض بيهه حته يتقسم الورث ...

يوميه يجي يكعد يم ابوي ساعات طويله ويحجون بالموضوع واسمعه يخابر بعمي فلاح ويقنعوا يتنازل عن حصه البيت وياخذ بس من البستان...

اسمع بس ما افتهم التفاصيل واخوته يطلعون من الفجر للبستان ابوي شاد عليهم وهم نفسهم عزيزه مايقبلون واحد يحجي عليهم...

عرضوا كلشي للبيع من املاك وكالو تتقسم بالشرع والقانون كل واحد ياخذ حصتو حته ماتصير عداوه بين الاخوان...

جانت الاملاك جثيره حته كل واحد حصل ملايين حته ابو بغداد كالوا اشترى بيت راقي وعندو سياره كله من املاك جدي..

وحده من عماتي ام باسم كالتلهم امي المرحومه جانت ناويه تحول قسم من الملك باسم فاروق بس شوي تاخرت لان شغله قاصرين ...

وخلت وصيه عند رجل عمتي ام سالم هو نفسو الي يشتغب بيهه لان هو ابن الشيخ ...

بس محد سمعلهه اتذكر عمي ابو بغداد كالهه اسكتي ام باسم عدهم ابو ويعيشون يمه اني ما اتنازل عن شبر من كاعي وافلوسي...

اسنين طردتوني وعماد وجهالو يلعبون بالخير لعب واني حسره عليه الالف راتبي 3 الالف يادوب يكفي اجار...

عماتي هوايه حجن وكالن حتلو بس نخليلهم البيت بس ابوي هنا صار سبع وع اساس يخاف الله وكالهم هم ولدي ويعيشون يمي مايحتاجون الحصه...

كلشي انباع البيت والاملاك تقسمت على عماتي وابوي وعمي واحنه طلعنه صفر اليدين...

عشنه اسبوع واحد ويه ابوي بعد ماتقاسموا الاملاك مرت ابوي ما استقبلتنه كالتلو ماريدهم ويه جهالي هذا الحجي سمعنا وهم يتعاركون واوس كال لفاروق ...

شفت اخوتي حايرين وواحد يكول لثاني وين انروح اذا طردنه ابوي بس جانوا مايحجون كدامي بس اجي يسكتون...

كل هاي الاحداث وهم بعمر مراهقه اصغر شي اني وادهم بلابتدائيه...

الايام الي عشناهه ويه مرت ابوي صدك تقهر جانت تطبخ شي قليل بس لجهالهه وتصبلهم من وگت حته ما يظل اكل لاخوتي...

ابوي يطلعهم ويا للبستان ومن يجون مايلگون اكل تگلهم ماكفى ويظلون بدون اكل والحسره بعيونهم...

اكثر من مره سمعت فاروق يحاجي ابوي ويكلو انطينه شغله نستفاد منهه حته نصرف ع حالنه ...

وابوي يگلو منين انطيك الشغل موزين بس بالحقيقه ابوي اخذ البستان كلوا وبي فلوس خير من الله...

انه جنت صغيره اكل ويه اخواتي الي من ابوي اثنين بنات بس اضوج ع اخوتي من يبقون بدون غده ويرحون ياكل بره...

يوم منهن الصبح كعدنه انريد نتريك ابوي كال لفاروق بويه فاروق اخذ اخوتك واخيتك وشوفلك مچان (بيت) قريب من هين..

اني مامسؤؤل عنكم لو ترجع لخوالك غاد انه ماعندي اصرف عليكم وانتم جثيرين يابويه...

كال كلامو دفعه وحده حته بدون ما يمهد الهم او يحاول يطيب خاطرهم بكلمه وحده بعدنه مامتريكين حته خلاهم مايعرفون يحجون...

اوس.. يابه وين انروح خوالي مايردونه واحنه اكبار منو يقبل يستقبلنه غير انت ابونه ونعيش يمك وامي اتزوجت وراحت وين نرجع...

.. اني عندي جهال وماعندي اصرف عليكم كبرتوا اخذوا اخيتكم ودورو ع بيت قريب من هين واني اتسوگلكم كل يوم بيومو ...

اوس..عجل ليش ماقبلت ينطونه حصه من البيت موكلت يعيشون يمي ترى مثل ما هذوله جهالك احنه هم...

وبهذا العمر حته زحمه يابه انعيش بغير بيت احنه موصغار ترى...

... اني ما اتحملكم عافتكم امكم وراحت وانت كلت اكبار موزغار اجرولكم بيت واكعدوا بي واني امر عليكم يوميه...

قيس.. بالله عليك يابه احنه من لحمك ودمك ماطالبين شي منك غير حقنه انت اسمك ابو وواجبك توفرلنه مكان..

تعرف كلنه طلاب مدارس شلون انكمل دراسه ونشتغل واختنه بعدهه صغيره ..

... والله اني اريد اخذ راحتي ومرت ابوكم ماكاعد تاخذ راحتهه لنكم زلم ومايصير ..

هنا الجبل الي عدنه فاروق كام لابوي لزمو من ركبتو وخنكو ودفعوا ع الحايط ابوي يتلاوه ويه فاروق بس ماكدرلو لان فاروق ضخم وبعده بحيلو جان عمرو 17 سنه وابوي جبير...

اتذكر كلام فاروق كلش زين وهو يتكاون ويكول لابوي انت عار اكبر عار ما اتشرف احمل اسمك بيوم ويكولون ابوك فلان انت واحد نذل بلا ضمير...

اني واخوتي ولد عسما انام بشارع بس شيمتك وغيرتك ماشالتك وفكرت ببنتك وين راح تعيش وشلون لو حرمتك عاميتك ولازم اطيع كلامهه مثل الطلي...

راح اخذ اخوتي واطلع واياك بيوم دكول عندي ولد لان هذيج الساعه ادوس ع راسك وراس الي يطلع وراك راح ادفعك الثمن غالي ..

راح اخليك تدفع ثمن كل لحظه نعيشهه بحرمان اتذكر كلامي زين لان يجي اليوم الي اعيده عليك...

كول بيوم من الايام ابني الجبير اتجاوز عليه واتذكر عيوني زين لان انت وامي اكرهكم وراح احاسبكم على كل لحظه فاتت من عمرنه ...

كوه بعدنه فاروق عن ابوي وملامح ابوي تغيرت بسرعه طلع ومرتو شردت للغرفه حته بدون مايردون علي بكلمه ...

زمخ (صاح) بينه فاروق لموا ملابسكم بسرعه ..اخذنه كلشي وطلعنه هايمين ع وجوهنه بكيه جيرانه مانعرف وين انروح ...

كاعدين بالبدي مال السياره وصايره بين اخوتي ايوب واوس مضللين اديهم ع راسي عن الشمس ...

ساعات طويله واحنه نفتر بسياره لحدماغفيت بحضن اوس ماحس غير يكعدوني ننزل..

نزلت وياهم لهذا البيت الخرابه تعبان حيل واسمع الزلمه يحجي ويه فاروق يكولو عمي اعرف بوضعكم الكم شهرين مجانا واذا استمريتوا ادفعوا ايجار هو تعبان البيت بس اكعدوا بالغرف الزينه ...

تشكر منه فاروق ودخلنه متروس اتراب وتعبان حيل هم اخوتي نظفوا من غسل وترتيب وراح اوس جابلنه لفات وكعدنه ناكل ...

نسينه حزنه ونضحك الا فاروق جان مايضحك ويانه وعاگد حواجبه حته ماقبل ياكل بس يدحك علينه ...

كمت شمرت نفسي بحضنو كتلو شبيك ضايج اني احبك هواي جدتي كالت ابوج فاروق لاتزعلي ابد لان من يغضب عليكم يصير اسد...

ضمني بحضنو حيل وكال يابعد ابوج اروح فدوه لهاي الخدود ماضايج اني بس تعبان مادحكتي شلون تعبنه اليوم...

... بس انت اليوم صيحت ع ابوي وضربتو ...
... لا ماصيحت بس جنه نتفاهم مالج علاقه بهيج سوالف انتي ابوج فاروق وهذوله اخوتج كلهم مثل ابوج انسي هذيج العائله ...

... يعني بعد ما انشوف ابوي ابد ..
... الي يريدنه يندلنه احنه مانروحله هسه تبدي المدارس ونرجع انداوم ونعيش ...

اوس.. فاروق منين انجيب افلوس وندرس جانت جدتي تصرف علينه هسه منو بحالنه ولاتنسه لازم مصرف يومي والمدارس تريد..

... يول لادكول امنين انت رجال يعتمد عليك كلنه نطلع نشتغل علمود نوصل بالدراسه وعلمود نوصل هاي الاميره مالتنه ومانخليهه تحتاج شي ..

ادهم.. شنو نشتغل اني مستعد نشتغل اي شي بس المهم انت ماتصير عصبي انت من تضوج احنه هم انضوج وياك...

... حبيبي ادهم انت بعدك زغير اني واخوتك قيس واوس اندور شغل وانت وايوب عليكم حمايه الغزاله مالتنه ...

... هاهي انتو روحوا واحنه نظل نحمي ثريا بس من تجون نطلع احنه نشتغل وانتم تحموهه...

ضحك فاروق وفتح ايده لادهم وحضنه شعره عالي كفش شعره وكال اسمعوني زين .

رغم صغر سنكم بس كلكم تعرفون وضعنه هذا البيت تعبان راح نحاول نعدل بي كلنه طلاب مدارس ولازم ندرس حته يصير عدنه راتب ونعيش حياه كريمه...

بالعطل نشتغل وبالدوام نحاول نقتصد بس ما انبطل ابد وحته لوتسمعون كلام من احد لو يكولون علينه فگر لاتتاثرون المهم ننجح...

انسوا عدكم اب هو طردنه من بيتو وانسوا عدكم ام امكم حجيه حليمه وماتت كل الي علينه نعتمد ع نفسنه واهم شي عدنه ثريا...

ما اريد بيوم تصيرون وحوش وتتخلون عنهه لحد اخر يوم بعمرنه كون كل همنه نسعدهه ...

قيس... فاروق احنه مانعوفك وحدك صح انت الجبير بس احنه نفتهم الي تفكر بي احنه من باجر اندور ع شغل ونكمل دراسه...

اوس.. والله لعبوهه صح ابوي وعمي جدتي ماتعوفنه بدون ماتطمن علينه ..

اني متاكد عافتنه حصه بس ابوي وعمي اخذوهه ولاتنسون احنه قاصرين بالحق العام...

فاروق.. لابد يجي يوم وينكشف كلشي وهذيج الساعه لكل حادثه حديث هسه علينه بالحاضر ..

اخوتي يتناقشون بحرگه گلب حته ادهم الصغير يكلهم اني هم اشتغل وياكم نعست وهم يسولفون ونمت على رجل فاروق ...

ثاني يوم كعدت على بوسات قيس واوس وهم يكعدوني ويدغدون بيه عطت عوفوني هسه اصيح فاروق عليكم...

بس قيس يدغدغ بيه ويكلي كوم ياحلو كوم ...

فتحت عيوني بملل شفت نفسي نايمه بوسط اخوتي فراش فاروق فارغ وادهم وايوب نايمين...

شالني قيس من ايدي وخلاني بحضنو دائما اشوف قيس مكسور من داخلو مدري ليش من اباوعلو انقهر احسو يمثل الفرح ...

كال كومي يله خلي انلم الفراشات ونروح اندور شغل وانتي يولي ممنوع توصلين للطباخ من نجي انجيب لفات وما اطلعين بشارع نزعل عليج..

سالتهم عن فاروق كالوا راح كدامنه يتفق ويه الاسطه حته نشتغل عماله ...

ماادري ليش انعصر كلبي وانه بعدني صغيره بس احس بمعاناه اخواني احس بيهم بكلشي الله واهبني الاحساس واني بهالعمر ومن عيونهم اعرفهم...

كمت وياهم ولموا الفراش وكعدوا ايوب وادهم وطلعوا واني واخوتي نفتر بلبيت جثير واسع كلساع نفوت لغرفه انظفهه كلهه اتراب...

ايوب يغسل وايهم يرتب واني وياهم وكلساع نكعد نرتاح من التعب ونرجع نكمل شغلنه..

للظهر يله اجو تعبانين حيل ملابسهم كلهه وسخ وشايلين علاكه لفات بيدهم قيس شمر نفسه ع الفراش وكال كومي اسحكي رجليه يوجعني..

حركته المفضله ادوس ع رجليه وهو يكلي ااااخ بعد بعد واني اكوم اكمز عليهن لان خفيفه واضحك واخر شي يرفع رجلينو ليفوك واوكع ع صدرو ويظل يدغدغ بيه ....

قيس متمدد ع ظهرو واني صاعده على رجلينو وفاروق راح يسبح اوس راح جاب صينيه ودولكه مي والفات كلنه كعدنه داير مدايرهه ...

انتظرنه فاروق يجي يله نبدي ناكل بس صاح علينه اكلوا اني ما اشتهي ولفتي انطوهه لثريا مو تاكلوهه ...

تكاونه اني وادهم هو اكبر مني بسنه هو يكول الي واني اكول الي تالي قيس اخذهه وقسمهه بالنص يله سكتنه...

كل هاي الاحداث عمري 10 سنوات شكد ماعايشه حياه فقر بس لان اخواني موجودين احس نفسي مدلله ومحد يكدر يصيح عليه ...

ظلوا ع هذا الحال يشتغلون ويعدلون بالبيت اشترينه طباخ وثلاجه ومواعين لان كلشي ماعدنه اشترينه بطانيات وجودليات جديده لان الي بلبيت وسخات وماينام عليهن....

محد سأل علينه ابد لاقريب ولابعيد حته بيت الشيخ واهل الحجيه حليمه محد عبرنه بفلس ...

بدت المدارس وجنت اشوف الحزن بعيون اخوتي الكبار هالمره محد طلعني اشتري ملابس وجنطه جديده بس كلما اريد احجي شي يمنعني اكول من اشوفهم يضحكون يله احجي ...

فاروق السنه سادس علمي واني صف خامس ابتدائي بس كل فكري بالمدرسه شلون انداوم وهي بعيده من هين ولازم سياره تاخذنه ...

بليل مايطلعون يظلون بلبيت برغم تلفزيونه كلشي مابي غير قناتين بس جنت ادحك فاروق ع طول (دائما) يقره بكتاب ...

وقيس واوس ينامون من المغرب وايوب وادهم يلعبون اتاري يدوي زغير واني ادحك وياهم...

شفت فاروق نزل كتابه وناداني كال يولي ثريا حدري هين لشوف..

رحت ادحكلوا شو يريد كال روحي اندهي ( كعدي) الولد عندي سالفه وياكم...

ركضت كعدتهم واجيت كعدت بصف فاروق كاعدين بالكاع ومستنده ع رجلو مثل الاب وجامع اطفاله حولو..

ادحك عليهم واحد واحد بيومين بشرتهم تغيرت ومبينين تعبانين وخاصه قيس عيوني مركزه بوجهو ليش هيج جاي ادحكلوا حزين...

اجو كعدوا كلهم ويترقبون فاروق يحجي دحكت فاروق ياخذ نفس يله حجه بهدوء...

كال اسمعوني يا اخوتي وضعنه بي ومايزداد سوء شغل ماكو يوم نحصل عماله ويوم ماكو وهاي كدامكم البيت تعبان وراح يجي الشتا ويراد شويه ترتيب ...

وهذا الشهر نبدي ندفع ايجار يعني الي اطلبوا منكم تنطوني وعد وانتو كاعدين هسه كلكم تنتبهون ع دراستكم ما اريد درجاتكم تنزل...

فكروا للبعيد فكروا من تكبرون وتصيرون شباب وتتمنون تصعدون سياره وانتم ماعدكم ولا فلس بس اذا انت عندك راتب ما تهتم وتشتري الي بنفسك وتسافر وتطلع...

فكروا بمستقبلكم زين كلشي ما اريد من عدكم غير دراستكم اني وقيس السنه ماراح انداوم حته نشتغل ونوفرلكم مصروف بس الباقي عليكم...

كون من اروح اسال بالمدرسه ارجع مرفوع الراس ومتباهي باخوتي احنه هسه ماالنه غير بعض واحد يسند الثاني ...

اذا واحد منكم فلت ايده من عدنه معناتهه كلنه راح نوكع وراكم تدرون احنه هسه في مواجهه مصارعه ويه الحياة وماممكن نخليهه تتغلب علينه ...

اوس.. فاروق اني ما ارضاهه ادرس وانت وقيس تشتغلون اني هم اشتغل وياكم وبعدين نرجع للدراسه ...

... لا اوس انت مستواك زين واشطر واحد بينه لذلك ما انريدك تلتهي بشغل املنه بيك ولاتخيبه شد حيلك حته تطلع معدل عالي ...

اوس... مستحيل ادرس وانتم اتعبون وحدكم ازعل عليكم والله حتلو شاطر عود السنه الجايه ارجع وياك موهاي انت صف سادس وبطلت...

ايوب... اني هم اريد اشتغل اي شي ما اكعد بالبيت..

ثريا... فاروق اني هم اريد اشتغل وياكم؟؟

ضحك بضحكه خفيفه كال وشنو تشتغلين ياعزيزه فاروق؟؟

... اني اعرف اسوي كبه مثل جدتي حليمه علمتني احطهه هيج بيدي وهيج اسوي مثلت الحركه واني افر بايدي...

... ههههه يولي يابنت ابوي انتي الروح مالتي عمري ما اخليج تنذلين وادورين شغل انتي بنوته حلوه مكانج البيت كل الي عليج ادرسين وبس ...

.. اني اريد اصير مديره مثل ست سميره ..
.. لا مو مديره اريد طبيبه ويكولون اخت فاروق الدكتوره ثريا..

... اااي لعد هاهي اصير طبيبه بس انت كون ماتزعل وقيس هم مايزعل ويضوج..

قيس.. ليش ازعل كل الي انسوي على مودكم ضحكتكم وحدهه حياة بس نبطل هاي السنه والوراهه نرجع ...

اوس.. يولو دحكوا دراسه ما ادرس رجلي ع رجلكم وين ماادورون شغل اني وياكم ...

قيس.. يابه اوس هسه ماصار معلوم انبطل احنه راح اندور شغل واذا ما كدرنه بين المدرسه والشغل هذيج الساعه انبطل

فاروق .. ايوب وادهم وثريا تنتبهون ع دراستكم واني واخوتكم راح نشتغل...

ادهم.. اني اكره ابوي حيل واكره امي كلو منهم احنه هسه فگر ...

فاروق.. يول ادهم كلنه فقره امام الله لا تستنكف من عيشتك غيرك يتمناهه..

ادهم... فاروق ابوي عندو فلوس وكلهم عدهم احنه ماغلطنه ولاسوينه شي ليش عافونه...

فاروق.. ادهم اول يوم طلعنه بي من بيت جدي كتلكم انسوا الصار واعتمدوا ع نفسكم ...

ابوك وامك وغيره وغيره وكل واحد الو ايد بمعاناتنه يجي يوم ويدفعون ثمنهه..

...

انتهت جمعه اخواني بالضحك والشقه ودائما المسحول ايوب واخر شي ينام زعلان بس من يكعد رايحه من عندو ...

ثاني يوم اخذني قيس للسوك واشترالي صدريه وقميص وجنطه وجواريب وحذاء رجعت فرحانه بيهم...

اقترح قيس يداومون وبعدين من يلكون شغل يبطلون حته ماتروح عليهم بالخالي بلاش...

بديت اداوم صف خامس ابتدائي وكل معاني الطفوله والبراءه بداخلي اروح ويه ادهم وارجع ويا لان بصف مدرستي بس الطريق بعيد ..

اني ويا نصعد سياره بس بقيه اخوتي يروحون مشي ويرجعون ميتين تعب مرات اتلكاهم بالطريق ونرجع سوه...

قيس مايخليني امشي يشيلني على ظهرو وجنطتي يشيلهه اوس وادغدغ قيس من ركبتو وهو يكوم يتلاوى وياي اخر شي يعضني من ايدي...

قيس نقطة ضعفو ركبتو من يتكاون ويه اخوتي بالشقه يلزمو من ركبتوا يوكع بالكاع يغار منهه حيل...

انه كلش شاطره يوميه يطلعوني بلاصطفاف يصفكولي وتسالني المديره ماما منو يدرسج ؟؟ واجاوبهه بجوابي المعتاد اخوتي الخمسه ...

بحيث مشت عليه تسميه اخت الاخوه الخمسه والكل عرفني بهذا اللقب ...

مره من المرات جانت حله مدارس وصار مدافع بالباب ووحده وكعدت ع الثانيه اني حالي من حال البنات ودفعني ووكعدت ع وحده ضعيفه حيل واني بيه لحمه...

اشو هاي راحت لبيتهم كدام المدرسه وجابت اخوهه جبير اكبر من فاروق واجه يعت (يجر) بيه من اذاني ...

اني لابسه حجاب الاميره بس يجر بيهن ويكلي شلون تضربيهه واني ابجي اكله عمو والله ماضربتهه ...

مدرسة ادهم بصفنه بس للبنين شافني واجه يركض هو بصف سادس ابتدائي مايكدر للولد وكعلو دك بالطابوك وهذا يكمز ويسب بابوي...

وادهم يشمر كل حجاره شكبرهه فلشه تفلش انوبه يريد يركض ورا يلزمو حته يكتلو بس من كدما لازم طابوك ويشمر يخاف يتقربلو...

ركض ورا ادهم واسمع ادهم يكلو اذا بيك زود وانت رجال اوكف ...

مدري منين جايب حجار كومه شايلهن بقميصو ويضرب على بيت الناس طلع ابوهم ويصيح ويركضون ورا ادهم يشرد عبالك طياره...

انه ركضت من الفرع الثاني وهذا الولد يركض ورا ادهم خلا يلتهي بالحجار وكض (لزم) ايدي ونركض كلساع اوكع ويسحلني...

احس كلبي انكطع وانه اركض لحدما ابتعدنه عنو صرنه قريبين ع مدرسه الولد الاعداديه ...

ضلينه ننتظر اخوتي يطلعون هم شافونه شلون مسحولين بالتراب وادهم الحجار بعدو بيدو...

صرنه نحجيلهم شلون ضربوني وادهم شردهم بالطابوك ايوب يكول لادهم يول اغبر ليش ماطلعت دمو ...

واوس يكلو يول زمال شلون تخلي يمد ايدو ع ثريا والله باجر الا انعل والدي ...

وقيس يكلو انت اثول ليش ما اجيت علينه حته اعلمو شلون يكتلهه تايهه الو ماعدهه اخوه...

شالني فاروق لان حاره وشمس وتعبت من الركض وهم يهدون ويغلطون ورجعوا ع ادهم يكلولو هي هاي الله كدرك علي بس الحجار ...

حصله ضربه ع علباته من قيس وهو يرزل بي شلون مخليهه وحدهه بشارع ويمدون ايدهم عليهه...

وصلنه للبيت بتعب وبدون غده بس نشتري لفات من المدرسه وناكل بدلنه وغسلنه ونمنه شويه ...

الملابس اني اغسلهه اعرف وهم ينظفون البيت ماعدنه مكناسه كلما نشتري وحده جديده من يتكاونون واحد يضرب الثانيه بيهه ويشمروهه ...

يوميه لازم يتكاونون ع اقل شي وماكو سلاح غير بس المكناسه...

يجيبون سعفه من برا ويكنسون والزبل يظل وراهم واني اكلهم مو هيج التنظيف ويصيحون بيه لاتتدخلين ...

من نرجع من الدوام لحد ثاني يوم بس نضحك وواحد يقري الثاني ...

قيس يدرس ادهم يشبعو راشديات مايفرق بين الظاد والضاء وكلساع وتجي كفخه ع راسو...

ايوب يقره وحدو بس من عنده شي صعب يدرسه فاروق واني لو قيس لو اوس يرجعولي املاء ...

من نرجع يفتحون جنطتي يدحكون ع تحضيري يلكوني كاتبه كل الدرس بدون نقاط اكتب الكلمه بدون ما اخلي نقاط...

كاتبه اسمي ولانقطه بي يكلي قيس اقري شووو؟؟

اكله ثريا يكوم يصيح وين النقاط؟؟ صدك وينهم ولانقطه حته ماينقره الاسم...

خطيه يرجع يتبع الدرس وينقط وراي ويعلمني وثاني يوم اجي نفس الشي يكلي وين النقاط؟؟ اكلو نسيتهم بالمدرسه...

يلتفت ع فاروق يكلو هاي تريدهه دكتوره والله هاي الخمسين ماتحصلهه ...

واوس يداهر بيه ويكلهم لا هاي يقبولهه سديه بالمستشفى وينهه وين الطب ...

فاروق يسكتهم يكلهم لاتقللون من شأنهه تكبر وتتعلم محد اجه متعلم من كاعو...

ماادري ليش عندي عقده ويه النقاط اعرف اقره الكلمه بس ما اكتبهم ...

هاي حياتي البسيطه ويه اخوتي واتمنى ما تمر الايام ونكبر ونظل ع نفس حالنه ازغار ومانعرف شنو معنى الحزن...

يتبببع... احبكم هوايه

حبايب ممكن متابعه وقراءه القصه لهاي الحلوه tugaMahmoud