رواية ازمة ضمير الفصل الحادي والعشرون 21 - بقلم Rozaya1122

ازمة ضمير ... البارت الواحد والعشرون
«للكاتبه روزايه»

رسام كالو صرت ترسم ادق الصور..
لملم بقايا العمر وارسملي صورة بشر
ولاتنسى ياصاحبي تمسح جروح الامس
تكتب فرح على الحزن والليل حطله شمس
ولو تعباك الرسم.... بداعتي خلي الوجه..
لن بيه دمعه سهر والغي بقايا الجسم..
لن بي منك اثر .. ولو تعباك الرسم
ارسم جزيرة وبحر وفوك الجزيره كبر
والماي فوكه عبر واكتب على صورتي
ميت قضاء وقدر...
...

ثريا.. طلع فاروق وانه رحت طبيت يمهه جانت كاعده ع جربايتي وايدهه ترجف وتمسح بدمعتهه بهيج حالات ما اعرف اواسي صحت ع الحجيه اجت يمهه...

هونت عليهه وتذكرهه الله ماينسى عبده ومرجعهم الج بس جانت تشهك وتبجي مبينه متحمله اذيه وفوك طاقتهه...

نورس.. خاله اروحلج فدوه  اثرو ع فاروق انه اعرف صرت حمل علي وهو يريد يدحك حياتو بس انه مالي احد والله ماعندي غير جهالي وعايشه علمودهم..

الحجيه.. يمه استهدي برحمان كليلي وين اهلج ليش مايساعدوج..

نورس... شعندي اهل انه اتزوجت وعمري 17 سنه ماعندي بس اخ واحد وصديق فاروق وصديق رجلي الله يرحمه ..

ورا زواجي بسنه وانه حامل بتوم توفه عمار وظليت من ايد لايد ابوي رجال جبير وقبل ياخذني حماي علمود جهالي لو انطيهم ولدهم بس ما اكدر شعندي بهاي الدنيا غيرهم

ستر عليه فاروق لخاطر صديقو وما انكر خيرو لو ما هو هسه انه الله اعلم بحالتي اخوي سافر للاردن ومارجع بعد وابوي وامي انطوج عمرهم وظليت غريبه بهاي الدنيا..

عيالي من سمعوا فاروق يريد يطلكني اجو ع جهالي انه خلصت من عمي ابو عمار مات وكلت محد يداعي بيهم تالي طلع عمهم وحمويني الباقين وانه مستعده اكتل روحي وما انطيهم...

اجوني الغروب وكعولي بالغلط والسب وقفلت الباب عليه وما خليتهم ياخذوهم واول مره اطلع وحدي واعتب لبيتكم لان اعرف زواجه سر وبس اخوتو شهود ...

ساعدوني الله ينطيكم كلبي مثل النار اعرف عيالي زين والله ياخذوهم لو يزوجوني لحماي المريض وانه اندفن شبابي ومادحكت شي من حياتي...

الحجيه.. والله يابنتي حال دنيانه ماترحم الزين كومي غسلي واطمئني وخلي راسج بارد انتي داكه باب شيوخ وولد شيوخ مايردوج ولايكصرون وياج...

كومي ثريا اخذيهه تغسل ترجف والجهال يرجعون ماعليهم شي بس صيري قويه يحتاجوج بعدهم صغار..

ثريا.. اخذتهه غسلت ولمت شعرهه وخلت حجابهه ع راسهه ادحك عليهه يعني عمرهه بدايه عشرينات لان كالت عمري 17 وتزوجت وهسه عمر التوم 4 سنوات عجل شكد شابعه قهر ...

رجعت كعدت بالغرفه ودمعتهه ماوكفت وايدهه ترجف سالتهه خوما مريضه اجيبلج شي؟؟

... لا شكرا فاروق راح يجيب علاجي من الخبصه طلعت ونسيته..

.. علاج شنو؟؟
.. انه مريضه شويه الله يبعدكم من كل مكروه..
.. شنو مرضج اكدر اساعدج؟؟
.. انه ورا وفاة عامر تخربطت وصارت عندي رعشه وكمت اوكع وطلع عندي نوع من انواع الصرع يسبب ارتخاء بلاعصاب وما اسيطر ع افعالي بعد حته الشي البيدي يوكع...

... الله يشافيج حبيبه انتبهي ع نفسج محد يفيدج بعدج بعز شبابج ...

.. انه تفاجات من دحكتج هسه انتي اجيتي ويه هيام جيرانه ..

... اي انه بيومهه عرفت زواج اخوي وبعدهه افتهمت الموضوع ..

.. فاروق طول عمري ما انسه موقفو وما اكدر اوافي ولو قطره من تعبو..

.. هم اخوتي هيج لاتشكرينه هذا واجبو وعمار صديق طفولتو وهالشي قليل بحقو..

.. الله يخلي ويحفظه صار 3 سنوات ويا ما يوم دحكلي بنظره ولا اجت عينو بعيني صان عرض صديقو ولا سمحلني افكر بشي ..

.. هسه لاتهتمين مددي ارتاحي انه عندي امتحان اقره واجي البيت بيتج وهاي الغرفه محد يدخل بيهه ...

طلعت من يمهه وعفتهه ترتاح وفاروق جاب علاجهه وانطا الهه اخذتو ونامت لان بي منوم ونيران وامنيه راحن لبيتهم وانه ظليت اقره للصبح...

ثاني يوم واكفه اسوي ريوك لفاروق يريد يطلع وهي كعدت كالت صباح الخير ردينه عليهه وكعدت كدامو مثل ماكالت لاحظت فاروق ولايرفع عينو عليهه يحجي وياهه ومنزل راسو ...

تريكنه ورحت ابدل سمعت صوت الخط طلعت لكيت فاروق بالباب وماخذهه ويا كال هسه اروح اجيب جهالهه اخوهه اليوم يجي...

سلمت عليهه ورحت من رجعت حجتلي الحجيه كالت اخوهه اجه من السفر وكعد يمهه واستقرت وسكتو عيالهه

ثريا.. جده ليش مايعلن زواجو منهه وتصير مرتو دحكتيهه شلون بنيه.

.. خايبه ابيش طالبه البت اخوج منو يحملو يرادلو وحده خرسه وعميه وطرشه لا يغرج سكوتو ترى هذا فاروق نسخه جدج الله يرحمو ...

جانت حليمه تسولف علي مانصدكهه انكلهه مايبين علي يريد الواحد يمشي مثل ميل الساعه تالي الله انطا شلون ولد مثل البهايم فلاح وعماد  ..

... عجل جده شوكت يتزوج موكافي وهو مامفكر ابد بهالموضوع...

.. كاعده يمي وتنفخين عليه روحي كليله بلكي لنو مسكتج بطريقتو ...

.. اي مقرره احجي ويا كومه نسوان خلي يتزوج يستقر كافي.. كمت اسوي عشا وهي راحت تصلي قضاء فتحت البرده جانت دنيا المغرب وشته والجو بارد دحكت قيس ونيران بالحديقه وبس ظهرهم عليه...

...
نيران... كاعده وخجلانه قرب قيس يوترني وهالمره كاعد بصفي شويه واطخ بي اريد افتح موضوع ماكو كلهه طارت من بالي ...

ماعندي سؤال بس شلونه دوامك وهو يكول زين قطع هذا الملل بصوتو كال نيران بعد 3 اشهر ويدزونه تدريب لروسيا...

شهكت وانداريت علي تحجي صدك قيس هو اني اشفت منك وبعدين وين تعوفني وتروح...

قيس.. والله يانيران شبيدي هي الكليه هيج لازم يدربونه ع طيارات والتدريب بروسيا كملنه الي بالعراق والباقي هناك...

.. وشكد تبقه وشلون اتواصل وياك؟؟
..  كالو كل 9 اشهر النه اجازه شهر انه شايل هم اكثر من عندج شلون افارگج واروح وانتي بين عيوني صايره...

... قيس اخاف من بابا من تروح يزوجني...
قيس... يولي نيران شيزوجج غير راح تصيرين ع ذمتي ما اروح اذا ما اعقد عليج ومن اكمل التدريب نتزوج...

نيران.. كلامه مثل الصاعقه صافنه علي واحفظ تفاصيله شلون راح افارگه وبعد مااشوفه كل هاي الاشهر ...

الجو بارد ونسمات الهوه البارده تلفح بوجهي واني اباوع بعيونه عيونه الي من اول يوم شفته ظلن ابالي بيهن جاذبيه موطبيعيه...

مارمشنه اثنينه وانريد نشبع شوف ونروي شوگنه وضمأنه عبالك انريد نسوي ذخيره لايام الجفاف ...

نزلت خصله من كذلتي لان جان هوه خفيف نزلت ع عيوني وايده امتدت رفعهه ودخلهه ورا اذاني الي جنت لابسه الحجاب شلون ماجان...

اطراف اصابعه لامست خدي حسيت جسمي قشعر وغمضت عيوني اريد انهزم من نظراته وعيونه الي محاوطتني وكانهه عالم ثاني وبي بس نيران...

كلساع انزل عيني وارجع ارفعهه بخجل وهو ابد ما نزلهه ويباوع بكل اريحيه شويه وانفتح الباب ادهم واوس اجو وطبوا ليجوه...

بدت الدنيا تظلم وردت اكوم بعدني هستوني ردت اكوم وما نسمع غير صوت الطبه والوكعه ومواعين تكسرت...

كمنه وكفنه اثنينه وانباوع وانشوف امنيه نايمه ع بطنهه والصينيه والمواعين كدامهه والتشريب والتمن امطشر...

واللحمه مشموره بعيد واجت البزونه تركض حطتهه بحلكهه وانهزمت وامنيه عافت المواعين ونست وكعتهه وتركض ورا البزونه....

المشكله ادهم واكف يغسل بالمغسله البرا وشافهه جان واكف ومخلي ادي ع خصره وصافن مثل المتعجب لو المصدوم ...

بلاول جنه في حاله استغراب بس صوت ضحكه ثريا فززتنه وهي دكلهه ثول يولي غير تنتبهين...

اجت امنيه بعد جوله من ركضهه ورا البزونه والتشريب منكع ملابسهه والتمن لازك بيهه وهي ادردم وما فشلانه ودكلهم شكو تباوعون ماشايفين وحده توكع ..

ادهم.. لا والله مامدحك وحده ثوله غمه مثلج كاع الله شكبرهه ...

امنيه.. مو صوجي صوج كاشيكم واحظ صاعد واحد نازل بس هو اني شكو صرت كريمه وعود جبتلكم عشه...

ادهم.. يابه حاتم الطائي فوكاهه طلع الصوج بينه امشي غسلي جنج سعلوه صرتي ولمي الاكل فضحتينه...

امنيه.. مامسويه شي عثرت شنو شصار...
نيران.. جانت تحجي بكل ثقه واحنه نضحك وهي ولامهتمه كعدت تلم بلاكل وتدعي ع البزونه لان اخذت اللحمه وادهم واكف فوك راسهه يداهر بيهه وهي السانهه متر ...

راحت بدلت واجت اليوم نتعشه يمهم صبينه ويه ثريا ونظرات قيس تربكني اكوم اكعد وهو ولا يمه وعبالك فاصل بعالم وحده...

كملنه عشا وكعدنه انشوف تلفزيون كالت الحجيه يمه فاروق عندي حجايه وياك ...

فاروق.. كولي جده ..
... امل بنتي تريد تجي يمي لان حماهه ماذيهه يريد بتهه ياقوت لابنهه وهي المسودنه ماتقبل وانه حايره وفشلانه من عدكم سوينه البيت مضيف...

فاروق.. لادكولين هيج جده البيت بيتج اصلا انه ناوي ابيعه وابني واحد اكبر افرح من ادحكه متروس خطار شوكت ماتجي هلا بيهه ...

الحجيه.. الله يحفظكم ولد حليمه وينور دربكم ...
عمكم باجر يشيل وكال خلي يعقدون عليهن قبل مايروح...

فاروق.. اي باجر الصبح انجيب الشيخ خلي يروح المهم عدنه البنات وين مايريد خلي يكعد...

امنيه.. بس انه ما اريد ادهم شو لزكتو براسي...
ادهم.. يولو سكتوهه من تبدي تمسلت تخليني افقد اعصابي...

فاروق.. اصبر ادهم واسمعيني امنيه مامخلين سيف ع ركبتج وجبرناج بس احسن الج انتي بعدج صغيره وابوج عادي بس ياخذج هناك يزوجج...

ادهم مجرد حبر ع ورق شوكت مايعجبج اطلبي التريدي وعلي ينفذ...

امنيه... بس اني ما احب العسكري شلون بهاي...
ادهم.. ليش ماتحبي وشلون لازم تحبين مثلا؟؟ امنيه ادري بيج زعطوطه وعمرج 15 سنه بس السانج طوله 15 الصمي واسكتي ..

الحجيه.. نيران اخذي اختج ترى هاي ادوس بالمصارين وانه ما اسكت ام شعفه ماتحب العسكري خايبه منو الحامينه غيرهم ...

نيران ... اخذتهه وكمت للغرفه وهي ادردم امنيه صغيره وماتعرف مصلحتهه ولحد الان طفله وادهم بالذات متعوده علي مثل الاخ الجبير ويشاقيهه ويضحك وياهه شلون راح تتقبل فكره خطوبه...

ثاني يوم الصبح بدلت ولبست فستان وحجابي واجه الشيخ عقدلنه وبعدهه ادهم وامنيه ...

من راح الشيخ اني وقيس كعدنه سوه وادهم طلع وامنيه راحت نامت عرفتهه ضاجت وكوه حابسه دموعهه بس ادهم حاول يلطف الجو عليهه...

كعدت بصف قيس باجر يروح وماادري شوكت يجي لان ماينطو اجازه لزم ايدي جانت ايده حاره حيل عبالك صوبه ما ادري اني الي ايدي بارده...

مدنكه راسي وكلساع اسرق نظره وارجع انزله كال نيران ما راح اوصيج لان انه اختاريتج اريد تنتبهين ع نفسج بغيابي وما تغلطين ولا تخلين شي يأثر على حبنه...

كدامنه عمر طويل وبعدنه باول خطوه نمشيهه بطريقنه نواجه اشكال كون نتغلب عنهه باصرار وماواحد يتخلى عن الثاني ولايسمح لاي مخلوق يدخل ...

نيران.. روح وانت مطمئن نيران فتحت عينهه عليك ومااعرف الحب وعرفته وياك تروح وتجي وتلكاني ع العهد ...

قيس... ما اريد تكونين مثل اسمج اريد تكونين بلسم ودوه وانه ما اقصر وياج ولاراح اسمح لنفسي اذيج ولو بشعره...

... لاتحجي هيج نام وانت هاني البال انه احبك وراح انتظرك واصونك طول العمر...

قيس.. انه هم احبج واكثر من حبج الي تعالي خليني اشمج واخذ نفس من عندج...

.. استحيت حيل وهو يسحبني لحضنه ويضمني ع صدره ودنك راسه بركبتي احس كلبي راح يطلع من صدري ...

خليت ايدي ع صدره وراسي يم كلبه دكاته منتظمه وطبيعيه الا اني عبالك اعصار حته هو حس بيه وضغط ع زندي وضمني اكثر ...

وكال اهدئي ليش هيج گلبج ورفع راسي بايده وتلاقت عيونه ما اكدر اباوعله احس نفسي راح اخرب واوكع كدامه غمضت عيوني واني ع وضعي وايدي ع صدره...

انطبعت بوسات متفرقه ع كصتي وعلى عيوني واني بعدني مغمضه بس وصلت لمرحله ما اكدر بعد احس جسمي تشنج ...

شفايفه لامست هاي المنطقه الي بين خدي وشفايفي رجف فكي برعشات متتاليه وايدي لا ارادي دفعت صدره...

بس جانت قبضته قويه وهالمره انطبعت البوسه بحنان اكثر وشغف ولهفه كلشي بيه اتخربط وماكدرت اقاوم ولو بذره واحده...

ايده التفت ع خصري وجان يبوسني بكل شغف وهدوء وكانو عنده لوحه فنيه وجاي يدقق بيهه ومايريدهه تخرب اول مره اجرب هيج شعور حسيت جسمي ارتخى وايدي الي ع صدره وكعت ...

ابتعد من عندي بهدوء وسحب راسي علي صرت بركبته واستنشق عطره واستمع لدكات كلبه الي سلبت كل قوتي...

مثل الاسيره صرت بين اديه سمعنه صوت بابا وابتعدت من عنده واني امسح بحلكي همس يم اذني احبج ...

سلم عليه وراح بعدما كرصني  خفيف من خدودي ماكدرت حته اطلع ورا رجليه ماتساعدني كاعده ومبتسمه واتلمس بشفايفي شنو هاي الرومانسيه الي عند قيس شكد هادئ وحنين ...

التهيت ويه بابا لان نقل غراضه وقيس ماشفته بعد وثاني يوم الكل راح بابا سلمنه علي وانتقل للفلوجه واني وامنيه اخذنه غراضنه ورحنه لبيت عمي وقيس واوس وادهم رجعوا لدوامهم ورجعنه ع نفس الروتين اليومي....

اجت امل وياقوت بتهه كالت علما تهدي الامور يمهم وترجع لان يتيمه وعمامهه يردوهه كوه التهينه اكثر ومتونسين ع سوالف الحجيه ....

بغداد...

اسماء... طلعت من الكليه امشي مرات ارجع بخط ومرات نرجع عبريه مايجينه الخط احنه مجموعه بنات مو وحده واثنين بحيث انقبط الكيه ...

اهلي ولا اجوني ولارحتلهم اسمع اخبارهم ومرات اخابر اخواتي يكولن احسنلج خلصتي احسن شي سويتي...

جاي امشي قريب منطقتنه اكو شقق نفوت من يمهه قبل ما افوت للمنطقه دائما امشي اني وصديقتي رقيه ويه مامرينه من المجمع نزل شاب شايل بيده علاكه ...

جان مامنتبهي لازم تليفون بيده احس نفسي شايفته مدري وين وكفنه كلنه ع الشارع انريد نعبر وهو واكف قريب علينه ...

مبين جان مستعجل راد يعبر واجت سياره بيهه شباب ماوكفت رادت تضربه بس هو ابتعد ع السريع وصاح بيهم يولو عميان ...

جانو شباب رجعوا بسياره ليورا واحد نزل الجامه وغلط علي كالو روح كو....... بس ظلو واكفين ماتحركو ...

اشو هذا اشمر جنطتك بالكاع وافتح باب الصدر واسحل الولد من قميصه وشمره بالكاع وضربه دفره ابطنه...

احنه ابتعدنه ووكفنه ع جهه نزل الولد الثاني وتعاركو لاول مره اشوف عركه شباب البوكسيات والفشار مايلبس عليهه ثوب...

بس والله سبع عنده بنيه موطبيعيه كل ضربه توكع الولد للكاع خشومهم تجري دم وركضوا وهو هم خشمه طك دم...

عيني علي فتح الجنطه يدور ع كلينس ماكو جر فانيله وخلاهه ع خشمه اني شالتني الغيره العراقيه ...

فتحت جنطتي وطلعت من كلينس وعندي بطل مي بيدي ورحت علي كتله تفضل جان رافع راسه ليفوك مد ايده بدون مايباوعلي ودار وجهه غسل واخذ الكلينس...

اريد ابتعد بس انطيته وصديقتي وياي اجاني صوته كال شكرا اختي ...

التفتت علي اجت عيني بعينه هذا نفسه ابو رموش الي من تيهت ساعدني ولا راحت عيونه من بالي ظليت صافنه بوجهه وهو رفع حاجبه باستغراب بمعنى شكو؟؟

بسرعه انداريت ورحت وكلبي يدك سريع بس صوت صديقه وهو يكله وينك ادهم ليش تاخرت...

يتببببع... احبكم..