رواية ازمة ضمير الفصل الخمسون 50 - بقلم Rozaya1122

ازمة ضمير ... البارت الثامن والاربعون
«للكاتبه روزايه»
.....
يا غريب اذكر اهلك والكَالها ابحجية ايتنكّت
هيّج اجروح الكَلب والعين كت مهضوم گتت
ذكروّها واعادة اليذكر يحن ..
والروح .. لاهل الروح حنّت
ونتّ اوماظن مثل ونها الصخر خنساه ونّت
طاحت ، اوفوك الفشل بمصابها الشامت تشمت
شلون ذلت .... ؟
اخ ياروحي .. الكّبل جانت عزيزة شلون ذلت .. ؟.
وعاداة المحبين ..
لو حن المحب .. يطلب حبيبه يالتريدين
الولف .. ولف الجفاج .. امنين اجيبه
كافي غيبه .. كافي .. جلمات العتب
عالناس .. ياروحي الغريبة
هذا سهمج .. والسهم لوعات
والخانه الوكت يرضه بنصيبه
او هذا طبع الناس .. بيهم بلاوفه
اوبيهم وفي .. اتجيبه الحليبه
يالتظنين الشمل .. يلتم .. شمل عزّج .. تشتت....
...

ثريا... من يوم يومي متعوبه من اول يوم اجيت بي ع الدنيا فتحت عيني بلا ام بلا اب احتضنتني جدتي وربتني وانتقلت من حضنهه لاحضان اخوتي...

جنت ادحك ع نفسي بالمرايه واكول شوكت اكبر واصير دكتوره واخذ شهادات جثيره واسمعي يرتفع جنت بس اتخيل واتخيل ...

كبرت وكلما كبرت كبر حزني وزادت مشاكلي جنت دائما اردد يارب اكتبلي الخير بكلشي وابعد عني كل شر مثل مابعدت سلام عني...

من طلع فارس كدامي كلت هاهي عمري استحق الزواج وماناقصني شي ولازم ابدي اكون اسره وهو يكول احبج ومن زمان رايدني اتبعت كلام اهلنه قبل اخذ اليحبك ولاتاخذ التحبه...

بس مرات مو كل كلام يكولو نصدكو للاسف فارس من اول يوم بارد وحسيت بي بالخطوبه وحجيت ويا اكثر من مره بعد الزواج ويكول هذا طبعي..

قدرت هالشي وكلت يجوز صدك هو هيج لا اضغط علي جان يفرح من اكلو اروح لاهلي بحجه تخلصين من امي جنت ثوله ومثل مايكول ايوب نعجه وصدك انه هيج...

صوت صياحه وهو يصيح ويكلي اتزوج وغصبا عليج واذلج واكسر راسج وطلاك ماراح اطلكج اضوكج المر ...

الانسان بالعصبيه كلشي يبين عندو وكل الكلام الي ينكال بهاي اللحظه صحيح ونابع من القلب...

بلحظه الي حجه هيج وخيرني بين الزواج وبين الطلاك انعكد الساني وانه مصدومه شجاوب وشحجي وشريد اكول على هاي المصيبه...

ما واجهني ولا طيب خاطري بكلمه اعرف ناس صار اسنين ماعدهم وينتظرون قارنت بينو وبين ايوب الي اعتكف عن الزواج بعد وفاه حبيبتو ...

ايوب رجال وفارس هم يتسمه رجال كعدت ع الجربايه ودموعي تصب حجم الخسائر المريت بيهه ما اكدر اتجاوزهن...

دك تليفوني رقم غريب جنت بحاله يرثى لها ماجاوبت رجع دك اكثر من مره ما اكدر اجاوب من العبره الخانكتني والبواجي  ..

فتحت خط اجاني صوت بنيه كلت الو بصوت مبحوح ..

... شلونج ثريا اني شهد بنت خال فارس لاتسدين التليفون اريد احجي وياج...

... انتي شعندج داكه بيا عين هيج وقحه ومخليه عينج  ع رجال متزوج...

.. اسمعي بلاول وبعدين احجي ثريا فارس خائن وفارس ضحك عليه مثل ماضحك عليج...

فارس واحد ابو بنات من زمان ومن خطبج موحبا بيج بس لان رفضتي بوقتهه اهله حجو علي ومن لكاج كال الا اكسر خشمهه ترى كذاب لاتصدكين بي...

وعدني قبلج وبيوم الخطبه مالتج من رجع اتصل بيه وكال اتزوجج واسوي هيج وهيج وهسه ثريا عندي دليل علي عنده علاقه بدكتوره ويا واني عفته ويجذب من كلج اريد اخطب بنت خالي ترى جذاب...

متزوج زواج سر اكثر من وحده ويوميه ويه وحده انه علي كتلج وسدي وراح ابعثلج صور ع الواتساب وانتي احكمي...

جنت اسمع كلامهه الدفعه وحده وزاد نبض كلبي واحس الدنيا تفتر بيه بعده التليفون ع اذني واجتني صوت اشعارات مال رسائل...

افتحهم وانصدم بعد اكثر فارس ويه اكثر من وحده وبغرفه النوم مالتي وبغرف بالفنادق صور اباحيه لابعد حد ...

كمت ادحك الغرفه ادور بيه لزمت التاج مال الجربايه وانه اقوي بحالي واكول ثريا صيري قويه صيري مثل اخوتج صيري قويه...

كمت اخذ النفس كوه وانه استرجع السنه ونص الفاتت من عمري بالكذب والخيانه ...

ما اعرف شكد مر الوقت جنت كاعده ع نفس كعدتي وفتح الباب فارس ويمشي يغني ويدندن ...

كمت بدون حيل ومهزوزه من الداخل لكحت التليفون علي وكتلو حرامات الموت يجي لهاي الشباب الزينه وعايف العارات مثلك...

ضربني راشدي ماحسيت بي لان الم كلبي اقوه من الضربه ما اهتميت الو اخذني بالصياح والغلط وانه ادحك علي شنو من انسان وضيع شلون عميه ومادحكت شي...

رحت للكنتور طلعت جنطه ملابسي وبديت اجمع بيهم اخذ الجنطه من ايدي ولكحهه بعيد وخنكني وكال تحلمين اخليج تروحين تظلين خدامه هنا واعلمج منو العار..

جنت ادحك بنص عينو وما اهتزيت شعره من تهديدو ضغط قوي على ركبتي وكال ماتخافين من عندي موو؟؟

ثريا... تدري ليش ما اخاف لان وراي زلم تسد حلوك اذا بيك خير روح احجي الحجي هذا كدامهم...

تخبل من كلامي وصار يضرب بيه راشديات ويجر بشعري انه قبل مايجي دزيت رساله لايوب كتلو ب١١ تعالي جنت اعرف بموعدو يجي ب٩ كلت اتفاهم ويا واروح جنت متوقعه ياخذ التليفون من عندي...

وصدك اخذ التليفون وقفل عليه الغرفه وكال تحلمين اخليج اطلعين الا اذلج ...

ماجاوبتو لان ادري ايوب هسه يجي صارت ب١١ ضبط ع الموعد واسمع الباب يندك  اسمع امو دكلو اجه اخو ثريا ...

فارس.. روحي طلعيلو كليلو ماتجي اختو وخلي يروح من هنا...

... اسمع امو تحجي علي ودكلو موهيج فارس وهو كاعد يهدد الظاهر طالعين لايوب وكاليلو ماتجي ومفتهمهه ايوب...

اسمع صوتو وهو يكول يول فارس اتجفه شري وخلي ادحك اختي ...

فارس ماقبل اطلع ويكلو ما تطلع وروح من هنا بس مالكه غير ايوب يندك بي اسمع صوت الصريخ والمكاون والبوكسيات مال ايوب ..

انفتح باب الغرفه واخذت جنطتي وطلعت لكيت ايوب قاضي على ومخلي ايدو ع خشمو ينزف وكفت بصف ايوب وكتلو فارس اطلكني وانت الممنون عفتو وطلعت...

بس صعدت بالسياره اندار عليه ايوب وكال هاينعجه واصله لطلاك ويه هذا التيس ...

بجيت بسرعه ماكدرت احجي بس كتلو يريد يتزوج عليه ..

ايوب.. حقو الله محلل ٤ خلي يتزوج...
... ايوب اسكت لخاطر الله لاتستفزني..

ايوب.. امسحي خشمج واذا طلك يروح جلب اسود يجي جلب ابيض ...

ثريا... ايوب حباب اسكت تحجي ابرود وانه النار مشتعله بيه...
.. هاهي سكتت ...

وصلت للبيت كابلت الحجيه ابجي وهي تبجي وياي وتصيح ااوف ياحظ المعثرات التمو اخوتي وانه احجيلهم ع كلشي..

كام فاروق من مكانو وباسني من راسي وكال خلي يولي انه ادبو واعلمو شلون يمد ايدو عليج ...

ورجع قيس طيب خاطري وحضني ادهم واوس وكلهم وعدولي ياخذون حقي من عندو...

ايوب كاعد ومخلي رجل ع رجل وكال ايباااااا منظركم مؤثر كلكم وكفتو لثريا وواحدكم عنتر صار بس بنات عمكم خوش وكفه وكفتولهن...

ادري مو وقته هالحجي بس يا اخي ما اكدر اسكت كتلكم لوثريا تمر بهيج موقف مثل امنيه جان واحدكم صار بطل...

وفعلا هسه كلكم صرتو ابطال ثريا بس لاتزعلين من عندي يا ثريا ولادكليلي جنت مسحوره اشو انه ما انسحرت دائما اتذكري  ابد ماتتعدى حوبه اليتيم...

فاروق.. يول ايوب مو وكته هالحجي مدحك حالتهه شلونهه ..

ايوب.. شسوي ما اكدر اسكت المهم طلعت البكلبي تعالي ابوسج واجه باسني من راسي وكال الله يعوضج مايستاهلج...

شكد جنت مقهوره بس موقف اخوتي خلاني اصر ع قرار طلاكي واتشفه بفارس كام يدز ناس وشيوخ ومانستقبلهم ..

اقل من شهر كلشي تم واطلكت وكعدت يم اخوتي رجعتلهم ثريا ايد ورا وايد ليكدام ...

كسرتي ماتنسي ولا اكدر اتعداهه ابجي ع حظي الاغبر نقلت دوامي لغير مكان حته ما ادحكو وانتهت حياتي ويا...

وبديت حياة جديده عمه عمر وماعندي بهاي الدنيا بس هو اضحك على ضحكو وابجي على بجيو اسهر لصبح ويا بيوم المريض ردت اعوضو عن شي بسيط من حنان الام ...

بدت نظرات الحب بين ياقوت واوس تنولد من جديد بس البنيه محترمه نفسهه وحته ماتكعد ويانه ...

ام شذره ماهدءت ولا بطلت بواجي كمت اكعد نص الليل ادحكهه خاف بيهه شي اسمع ونينهه على بتهه...

بيوم منهن دحكتهه صعدت الدرج صعدت وراهه اعرفهه تروح لغرفه فاروق طبيت وراهه والكاهه فاتحه الكنتور وتشم بملابس شذره ...

اول مره اطب غرفه فاروق من يوم الماتت الله يرحمهه كلشي على نفس وضعو مكياجهه وعطورهه ع الميز كنتورهه وملابسهه وسيتات النوم المعلكه الي اكو منهن حته ماملبوسات ماملحكه تلبسهن لان بطنهه كبرت...

جان اكو سيت اسود ملبوس وعلى كلبتو من نازعتو معلك كلشي على حطه ايدهه بعد مرور سنه ونص كاملات وماكو شي متغير بالغرفه ....

سحبت ام شذره كوه وهي تبجي ونزلتهه جوه كابلتهه الحجيه بالبواجي وبعدين كعدت تحجي عليهه وتهون مصابهه كالتلهه شذره نقيه وطاهره وراحت شهيده وهي بالولاده ...

هسه هي بالجنه لاتبجين عليهه انتي وفاروق الله يجازيكم ع صبركم ويجمعكم بدار البقاء....

....
بعد مرور اشهر...

عموري واكف يم المعرض ويشيل ويلكح بالغراض ويدردم ما افهم شيريد...

كل الي يجي يمو يضربو ويبجي لحدما اجا ادهم شالو يله سكت مايحب النسوان ابد يريد يطلع ...

جان شته بوقتهه لبستو جثير ملابس وقمصله ماروني وكلهه فرو وبس خشمو الصغيرون طالع ...

من طلع كتلو انه اعلمك عموري يمد السانو عليه وعود مايخاف كالتلو الحجيه بعد ابن فاروق منين تخاف...

رجعت للمطبخ حايره شسوي عشه الصوبه مفتوحه وكاعدين داير مدايرهه سالتني امل ع امنيه وكعدنه نتذكر سوالفهه..

اتذكرت مره انه وياهه بالحديقه دنيا الليل واجو جماعه ادهم ومالحكنه نشرد رحنه ختلنه ورا شجره الياس مكرفصين وكاعدين...

عبالنه يطبون للمضيف جان ادهم يجيبلهم كراسي وكعدهم بالحديقه وانه وياهه محبوسين ورا الشجره سمعنه كل سوالفهم ع الجيش وع الامر مالتهم...

امنيه تحركت وجان تتحرك الشجره همزين جان ادهم الي كدامنه وواحد بس من جماعتو ودحكونه من ورا الشجره لان ادهم فتح اللايت علينه...

لانكدر نكمز ونطلع بس افترينه وانطيناهم ظهرنه وادهم تلافه الموضوع وطببهم للمضيف  ..

رجع علينه بوقتهه شبعنه رزايل وامنيه جرهه من اذانهه وانه هم بس فلتت من عندو...

امنيه ظلت اسيره بين اديه وهو يكلهه شسوي بيج هسه جنج جنيه وهي حصرتهه البجيه دكول بلاخير ماطلعت بخساره حصلت بوسه احسن منج ....

بيومهه شكد ضحكنه ضحك ماصاير ولحدالان من اتذكرهه اضحك واتذكر هذيج الايام....

صبيت العشه وهالمره تواسيل بياقوت يله كعدت ويانه جنت مسويه برياني لان الحجيه وام شذره صايمات ....

هستونه كعدنه جان ايوب طالع من اجه غسل وكعد صار كدام ياقوت بالضبط ...

ولا نكدر ننسه هذا الموقف من نتذكره احس الحراره تصعد من الفشله...

كاعدين ناكل وياقوت تستحي اوس ماموجود جان خفر وقيس بالدوام خطيه هستوهه وصلت الخاشوكه لحلكهه وغصت...

اختنكت مدري عطست ايوب كدامهه رشت التمن كلو على ايوب جان مدنك ياكل على شعرو ووجهو ...

بحيث ايوب مسافه عنهه بس من قوه الغصه مالتهه طشرت اللكمه من حلكهه امهه دكت ع ظهرهه واخذتهه تغسللهه...

وايوب لكح الخاشوكه وكال هاي التايهات ....

الحجيه تريد تسكت ماتكدر غطت وجهه بالشيله وميته ضحك وانه ما اكدر اسكت دموعي وكعن ع شكل ايوب...

وفوكاهه يكلي كومي يولي حته باذاني طب ...

وياقوت من فشلتهه تقيئت الاكل كلو وماكعدت بعد ويانه وايوب كلما يدحكهه يكلهه ماقصرتي ...

غسلنه وكعدنه ورا العشه وايوب سبح واجه والحجيه خربانه ضحك...

ايوب.. تضحكين نعيمه اضحكي شوراج...

الحجيه.. خايب اضحك ع حظك الاغبر حته بهاي ماعندك حظ ...

ايوب.. شنسوي من اسمي ايوب بعد صبرتلك صبر ايوب وكام يغني..

الحجيه .. جده ايوب هذا الفيس مدري شسمو ما تخلينه اندحك وياك...

ايوب.. اسويلج صفحه اسمهه الحجيه نعيمه..

... خايب سد حلكك لاتبدي تغرد بعد محد يسكتك..

ايوب.. انه ماعندي حساب يوميه اتكاون ويهكرو الملاعين ..

ثريا.. حته بالفيس طلايبك ايوب سويلي حساب والله اضوج واستحي من الدكتورات الوياي..

ايوب.. ماتسوين منو لازمج من دكولين دكتوره مدري شيتخربط عندي لان انه ما ادحكج غير نعجه ثوله..

ثريا.. قلد عليه بس سويلي هسه..
... تعالي اسويلج ابالج اسم..

... اي سمي دموع الثلج...

... دكلي ليش اطيح حظي دكومين من هين لا اطيح حظج ...

ثريا... يله سميني رحيق الورد..
ايوب.. كومي من هين خلكي كصير وياج ذاك ادهم يسويلج عسما يسميج جهنم ..

ثريا.. ماتنطي من نفسك ابد .. كمت لادهم بتواسيل يله سوه يكلي مابيه حيل وسميتو رحيق الورد ...

جنت ما اعرف استخدمه بحثت عن ايوب طلعلي حسابو القديم كاتب بي اني ايوب ...

ادري لعد انت منو جنت نايمه جوه البطانيه وميته ضحك دورت حسابات اخوتي كلهم لكيتهم عند ايوب ...

فاروق كلشي مامخلي بس صوره حداد وصارلهه سنه ونص لانشر ولاشي ..

ادهم صورتو بنجمات وقيس بالطياره واوس بالمختبر...

بس ايوب مامخلي صوره بس صوره غلاف اسد يصرخ ومكتوب عليهه ...

اني انا الليث العرين ومن له.... قلب الجبان محير مدهوش...

دورت ع كومه حسابات وبعثت طلبات صداقه لبنات ويايه دخلت ع حساب فارس مكتوب متزوج من دكتوره رنا هي نفسهه الويا بالصور...

نعست وسديت التليفون ونمت ثاني يوم كعدت على صوت ايوب وهو يكعد بيه ويكلي بعد المن مامدزيتي طلب ...

طلع تليفوني من صوت الاشعارات مكعد الحجيه وماخذتو لايوب كاعد من الصبح غسلني غسل برزاله...

ايوب.. شكو مبحوشه ع فارس جنج خبله الليل كله مامخليه بشر يعتب عليج ...

ارتاحي حته الفيس حظرج من كدما دحكج لزكه كال شورطني وياهه...

صدك انحظرت من كدما دازه طلبات صداقه جنت واكفه واسمعو يتشاقه ويه ادهم والحجيه دكلو دهر فرك...

ايوب.. اول ماسويت الفيس عبالي من النشر يبحثون وكتبت صور هيفاء وهبي رومانسيه...

شوكلشي ماطلعلي واعيد من جديد واكتب صور هيفاء بالقصير وهم ماكو تالي كتبت بدون ملابس وتلاحكوني ربعي..

كلهم يكلولي يول ايوب موهين ادور وانه طلعت ناشر ع العام .....

ادهم.. اتذكر بيومهه احمد الله ماعندك اصدقاء بس اخوتك وشكم واحد من ربعك...

ايوب.. لسه يصيحولي ابو هيفاء اول تالي وزني الشيطان وادور خلاعي صدك انه النفس لاماره بسوء...

ادهم... ع اساس هسه ما ادور والله نصك جوه الكاع...

ايوب.. لا وروح الغاليه مامدور ولاباحث ع ساعه انموت شكل لمنكر ونكير جنت ادور هيفاء وهبي بس زلة وتلاحكتهه ...

الحجيه.. خايب موكتلك اتزوج لوعندك مره مادورت ع هاي مدري شسمهه جان دورت يم مرتك...

ايوب... شدور ياجده هووب انتي بريكج عطلان لا اطلعين كبل منا ادهم ....

الحجيه.. وع اساس ادهم متقي ربو ليل نهار عينو بالتليفون الله العالم شيبحوش...

ايوب.. لا تسيئين الظن احنه فتية امنو بربهم ...اذا انريد اندور بالحلال

ادهم... جذاب جده مره من جنه زغار ابوي عندو سيدي القديم وانه جنت زغير هذا الملعون قشمرني ...

وخلاني اجيب القرص من غراض ابوي جان قافل الغرفه وخلانب اطب من الشباج وهو يدفع بيه جنت انه بالخامس ابتدائي وهو اكبر مني بسنه...

وجبتو الو ومحد يدري وبكنه السيدي وابوي بالشغل وفتح القرص...

جان مكتوب عليه للكبار فقط وانه اكلو ايوب ماكاتبين للصغار...

وفتحو وطلع فلم رعب ولزمتنه الحجيه حليمه وانه انكتلت منهه وهو فلت ذبهه براسي...

الحجيه.. انه اعرفو هذا من زغرو مشيطن يدور للكبار..

ايوب.. شسوي انه احب اجرب ادحك ابوي يضمو معناتهه بي شي ...

ثريا... شقه ايوب وادهم وهم يتذكرون الطفوله وضحك الحجيه بث الروح بالبيت وعموري المونسنه بسوالفو...

فاروق ملتهي بشغلو وملينه من كدما يندك الباب وشيوخ تجي واسطات وهو دائما يكول ما اريد الله يحاسبني واكون ظالم حته القضيه الي مامتاكد من برائتهه يحولهه لغير قاضي يكول ماريد يذكروني بسوء...

بيوم من عدهن كاعدين وحجه اوس كال انه اريد اخطب ياقوت.....

يتببببع ... متابعه ممتعه...

سنه سعيده ياحلوين الله يرفع الغمه عن العراق وايامنه وايامكم كلهه افراح ومسرات ...